رواية اغلال القدر الفصل الرابع 4 - بقلم الكاتبة ديانا

البارت الرابع
اغلال القدر

من شفت المنظر روحي لابت بس ردت انهزم و ابچي ...
علي صار يوخر كسر البلوك بصورة جنونية ... يعيط و يبجي .. واخر شي طلع كيس بي ...... يا ربي ... بي زينب اخته بس فاتحة حلكها و عينها و بلا ملابس و جسمها كله محرگ ... تذكرت هذاك اليوم الصبح من شفتها ... و جانت .......... لا يا ربي ... اني صوچي ... اني كله من وراية .... كمت ابچي و هو يبچي و يصيح ... نظييييييييمة والله الا اموتج ... الا اكتلچ ... والله الا بيدي اذبحچ ... حضن الكيس و گعد فوك الانقاض يبچي بصوت عالي ....و يتحلف لهظيمة... اخذ الكيس و راح علي ... و اني ظليت اركض وراه و اكله علي تعال ... اسمع ... علي تعال اكلك ... ركض اخذ الكيس و راح ...
رجعت يم خواتي و البرد كاتلهم لان بدت الشمس تغيب ... بس وين حنروح ..اني ظليت ابجي و اتذكر الموقف ... مديروح من بالي صورتين ببالي صورة نظيمة تجوي بزينب اخت علي و صورة علي من لگاها بكيس نايلون ... ميتة ..... اخذت نونو من اسيل و شلته و بعدني ابچي ... مشينا و مندري وين متجهين ... مشينا و اليتم راسم اقسى لوحاته بوجوهنا ... مشينا و محد النه ... احنه شنو مو مرئيين ..؟ احنه شفافين ؟ ليش الناس متشوفنه ... ليش الناس مدتميزنه و دكول هذوله محتاجين مساعدة .. بس علي الله دزه الي و ساعدني و ...... هسة راح ... و كله ذنبي ... لازم من اشوفه اكله ... اي و شيريد يسوي بيه خلي يسوي ... هو ساعدني هوااية و هذا ردي لمساعدته ...
اني مردت اعوف المكان لان اريد اشوف علي و احجي وياه ...و اكوله ليش مكتله على اخته ... يا رب سامحني اني غلطت وية انسان صافي مثل علي الي وگفلي وگفة كرايبي مسووها ...
مشينه لان المنطقة صارت ظلمة و ماكو ناس بيها ... طلعنه ع الشارع و كعدنه ع الرصيف ...نونو بحضني و شمة حاطة راسها على جتفي ... و اسيل واكفة بس تتأفأف... بس البرد كتلنه .. و بدوا خواتي يجوعون ..
طال وكت گعدتنه ... و السيارت بدت تقل بالشارع ... و غفت شمه على چتفي و اسيل ايست و حطت راسها على ايدي اللخ و نامت ... و بقيت بس اني كاعدة ... صافنه بحالة اخت علي... معقولة ... اني السبب ... اني لو حاجية لعلي جان ما صار الي صار ..
يا ربي ..سامحني ... يا ربي اني خفت من نظيمة لتكتلني او تجويني مثل زينب ... كمت ابجي على علي لان ما هو حسيت بي بعد ما اشوفه و اني السبب بفقده اخته ...
ورة ساعة وكفت سيارة نزل واحد منها  عنده لحية خفيفة هو اكبر من علي بس مو هواية ...كال انتو ليش هنا كاعدين  وين بيتكم ...كتله هاااا... و سكتت ...  لان خفت احجي ... كلي.. جاوبي عمو اني جاي اساعدكم
كتله انت منو ... كال اني اساعد الي ما عدهم احد  و اخذهم لبيتي  .. كتله صدك ...؟
هو من كلي هيج  فرحت كلت اي بلكي هذا رح يودينه لبيتهم ننام و نتعشى عدهم بلكي الناس صدك رح تساعدنه  ... كلي كومي انت خواتج تعاي ويانه ... بالبداية خفت و ترددت اصعد ... كتله لا عمو ... ما اكدر اجي ... كلي اني كرايب ابوج ... و ابوج وصاني عليكم ... باوعتله ... بهالاثناء كعدت اسيل و شافته ... و سمعته يكول اني كرايب ابوج ... كالت اي هم زين كومي نروح وياه .... لان ما عدنه مكان اليوم ننام بي ... خنزرت عليها و كتلها اكعدي ..
كلي هذا اخوج ..( اشر على نونو ) كتله اي هذا نونو ... ككلي ياله تعاي ... كعدت خواتي و صعدنه بالسيارة ... شفتها حجايته سمة....
يمشي بينه و الطريق ميخلص ... هذا وين ديودينه ...
كتله عمو وين رايحين ... مجاوب ساكت ... شمة كامت تبجي ... واني كمت اخاف و اسيل تباوع من الجامه و هم خايفة ... كتله عمو وين رايحين ...؟
شافنه بالمراية ... كال ... رح اوديكم لبيتي ... يم جهالي ... تلعبون وياهم ... شلون مكان حلو ... بي مراجيح و زحليكات ... و عندي جهال هواية ... رح تتونسون وياهم ... كام يضحك .... خوفتني ضحكته ... و كمت ارجف هذا وين مودينه ...
كمنه نبچي و نعيط ... جان يندار علينه و يصيح بسسسس كااافي ... ترة و الله هسة اموتكم ... اسكتوا خلوني اسوق ......
عينه خوفتني ...سكتت و ما عيطت و خواتي سكتوا بس الرعب كتلنه ... احنه متوجهين للمجهول ... مندري وين ماخذنه هذا ...واصلاً هو منو ... هذا اكيد كذب علينه مو كرايبنه .....
وكف السيارة و نزل ... و فتح الباب الورة وكال نزلوا ... احنه باوعنه عليه بنظرات خايفة و منزلنه ... جان يعيط بينه نزلوا ..... لا تسووني عصبي... جر اسيل من ياختها واني كمت اصيح عوووفها ... عوفها ... كلي لج تعيطين عليه .. جان يجرني من شعري و نزلني و دفعني ... راد يوكع نونو مني ... كام يبجي نونو من  العياط فز ... و شمة تبجي ... كال والله المتسمع كلامي ... اذبحهة ... فوتوا ياله ... و ما اسمع صوت وحده بيكم ...
فتنه للمكان هو بفرع سنطة بيت بناءه قديم .. و اظلم ..
يمشي و احنه نمشي وراه .. دخلنه من باب كصيف و بي ممر طوويل ... و بنهايته هم باب ... اني خفت و گلبي يريد يوكف نونو كام يبچي.. گلي الرجال وهو ديمشي ،،
سكته لهذا ... كمت اهزهز بي حتى يسكت
وصلنا للباب و فتحه و دخلنه بغرفة  ظلمة ...بس بيها ريحة مو طيبة ...، فتح الضوة ... و جان عزااااا هاي شنووووو و كووووومة جهال لكيت نايمين بهالغرفة ..... هي قاعة مو غرفة لان كلش واسعه .... وفارغة بس مليانة جهال و بمختلف الاعمار ... من عمر سنة الى ١٦ سنة ... جانوا نايمين واحد بصف اللخ و بنات و ولد يشبهون هذولة الي يبيعون كلينكس و علج بالشارع ... طبعاً همه كعدوا على صوت نونو و على الضوة من فتحه الرجال ...
وبدوا يتهامسون بيناتهم و يباوعون علينه ...اسيل جتي يمي كالت هذوله كلهم جهاله،،؟ كتلهة ما ادري ...
كال تعالوا وراية ... و صرنه نطفر من على الجهال ... و من الارتباك دست على ايد ولد و كتله العفو ... بس كام يعيط و دفعني .. جان الرجال يصير عصبي و وكفه من ياخته و كتله حيييل .. و هو ساكت الولد و عينه نار و يباوع عليه .... اني ردت ابجي من الكتل الي اكله ... بس حسيته توعدلي بعينه .. ورة شوية شمره الرجال و كله انهطررر ابو المشاكل ... طبعاً الكل ترجف من هذا الرجال و كلهم يباوعولي بغل الي و لخواتي .. و هذا الولد الي انكتل منزلتله دمعة و لا نزل راسه ابد .. ظل رافع راسه و يباوعلي ... جان يصيح هذا الرجال .. ناااااااموا ... و بلحظة وحدة كلهم ناموا ... اني من خوفي درت وجهي ... وجان يجرني  من هدومي و كلي امشي انسة ...
مشى و مشينا وراه .. اكو باب  ورى هاي القاعه ... فتحها و دخلنا بممر قفل الباب و مشى بدة المكان يتغير .. الريحة المو طيبة راحت وهذا انظف من هذاك ...
اكو غرفتين بيبانها صاج ... دك وحدة... و دخل .. و احنه وراه ...
الغرفه جبيرة كلش و نظيفة و معطرة و دافية و بيها بنهايتها سرير نظيف ... و ميز طعام و ٤ كراسي و تخم قنفات كلش حلو و معرض خشبي للتحفيات و كبالنه يعني كبال الباب ميز كبير و كرسي رئاسي دوار ... بس ظهرة علينه ... الرجال الجابنه كله للكاعد ريس جبتلك خوش صيدة ... ضحك الكاعد ... و ضحكته خشنه تخوف ... جان يندار علينه ... كاله غسان انت شكد فطير ... تجيب و تكوملي بالحثالة و دكولي صيدة .... جان يغمزله .. كال هذوله رح اوكلهم و انيمهم ... و احميهم من الفقر و العازة ... كله في سبيل الله ... واني الفقراء صاروا هواية عندي ... ما اريدهم .. (وهم غمزله )طلعهم ... ميكفي المكان بعد ...
غسان تلعثم... وكام يمثل ... كال ريس خطية ما عندهم احد ... اوعدك اخليهم يسوون الي تريده ...
كال الريس ..: اذا هيج ميخالف ... جان يباوع علية كلي شسمج يا حلوة.... ارتبكت و بلعت ريگي ... كتله ز.ي..زينب ... باوع على نونو و كال هاي لعابتج ... كتله لا هذا اخوية ... گلي امج المسعدة وين ... ابوج الفحل وين ...؟
كتله امي وابوية ماتوا ...
كلي باعي ... طبعاً اني و هذا فضل من الله اني اعيل الفقراء ... و انطيهم اكل و ينامون عندي و البسهم هو يحجي و اتذكرت الجهال شلون نايمين بالقاعه و شلابسين  ... جان يكمل ..: بس لازم يشتغلون و يجيبون حق هالاعالة...  ولو هذا شغلهم  فد شي بسيط ميسد الصرف الي اصرفه عليهم ... لكن اني راضي جان يشيل اصبعه ليفوك و يكول في سبيل الله .....وهسة انت موافقة تبقين عندي حتى لا تتعرضين لوحوش الشارع ... ؟
اني صفنت يعني شنو وحوش الشارع ... يعني الشارع رح يصير بي وحوش وهذا يريد ينقذنه ...؟ كتله بس شنو اشتغل ما اعرف كلشي اسوي ...ضحك و نفس الضحكة الخشنه ... و طلع جكاير و علگها و صار ينفخ الدخان علينه ... كال اني اشغلج انت معليج .....
باوعت لاسيل ... وباوعت لشمة ... كتله اني موافقة ... بس عفية اريد حفاظات اخوية خلص ...
ضحك... كلي ..انتوا رح تعبوني ... كال لغسان ...
بصوت خشن و لهجة قوية ..: هذوله من باجر يلتحقون وية البقية .. غسان كال امرك ريس ... كله حتى هذا الزغير وياها ... انصدمت و كتلهم لا ... لا ... بس اني اشتغل ... خواتي و نونو يبقون هنا ....
جان يضحك و كلي لتصدكين رح اعيشبفندق خمس نجوم و خدمة رويال ... جان يصيح بصوت رعب كل خلية بجسمي غساااااان طلعهم برة .....