رواية اغلال القدر الفصل الثاني 2 - بقلم الكاتبة ديانا

مساء الخير  ❤️❤️
بالنسبة لقصة اغلال القدر القصة مو من خيالي ...القصة شفتها مرة بالفيس بنات  ٣ بلا ام و لا اب يعيشون بخرابة لا كهرباء و لا ماي .. و بالبرد و الحر ...
ارتأيت اكتب قصة و تكون بدايتها هذني الوردات بالحقيقة اني كلش ممرودة عليهم .. و اكتب و ابچي ... وترة احياناً الخيال يكون بي ريحة من الواقع وهذا صعب .. لان الخيال هو اقصى حالات اللاموجود .. نرسم اشياء ما موجودة .. عندما نورق بخيالنا و نلكي هالاشياء الي موجودة بالحقيقة صراحةً ننصدم ... احنه عايشين بغابة مع الاسف .. و الشاطر ينفذ بروحه من افواه السباع .......
و الان اجه موعدنا مع البارت الثاني
#اغلال_القدر
بقلمي.. الكاتبة ديانا

اعذروني لكمية الوجع الي بيها 🌹

زينب ....
بعد ما اجة جوارينه ابو همسة واخذنه وياه لبيتهم اني و خواتي و نونو ... رحنه لهناك و الي افتهمته انه ابوية .... مات .
اي مات ... و هاي صرنه وحدنه ... لا ام و لا اب ... جوارينه بيت ابو همسة خلونه يمهم لان البيت مو مالتنه و جوي كرايب ابو البيت و طلعونه و همه كعدوا بي ... ام همسة مقصرت ويانه و حبابة و تحبنه حتى هي كامت تداري نونو ... واني شوية ارتاحيت صح افكر مرات شلون رح نكبر واحنه بلا ام يعني اباوع على همسة امها تمشطلها و تلبسها هدومها وهي بعمري حتى قيطان الحذاء امها تسوي هي متعرف  ... واباوع على ابوهم ياخذهم للطبيب اذا اتمرضوا او يطلعهم ... حتى مرات يدرسهم .. دمعتي تبقى بعيني لايبة لا هي التنزل و تتحسر و لا هي الراكدة بمكانها ... اخنگ عبرتي و اسكت و بس عيني تباوع ... اني ما احسدهم بس اني محتاجة اكون بخير ... محتاجة امارس حياة طبيعية الكل عايشيهة و هذا من حقي ... انحرمت اني خواتي من ابسط الحقوق ... وهي امتلاك اب و ام ...
المهم ... بقينة فترة بيت ام همسة لحد ما طلعت اربعين نونو ... و صار يناغي .. و يباوع اذا حطيت شي احمر گباله ...
ابو همسة كلش منزعج من عدنه اني و خواتي .. لان اسيل تتعارك و ية بنته على اشياءها تريد تلعب بالعاب بنته و بنته متقبل .. و شمة متنحسة هواية و منزوية و اقل شي تبجي ... و اخوية نونو يرادله مصرف ... حفاظات و حليب و غيرها
فد يوم سمعته يكول لزوجته .. كاافي مليت بية خير خلي اكفي اولادي اني شنو مبتلي بيهم ... كلتله خطية مو ايتام ... وهمه جوارين ... وامهم الله يرحمها جانت كلش زينة وياية ياما و يما لفتلي كبب و سوتلي كليجة ... والله ما انسى فضلها ... كللها لفتلج كم كباية و كم كليجاية ننطمغ بيها و نربي جهالهم ...شوفي دا اكلج اني رح ادبر رقم تليفون خوالهم  و ادز عليهم ياخذهم ... منظل هيجي ....
وفعلاً دور ابو همسة تليفون خوالي و لكاه بتليفون ابوية بس ما حصلهم و ظل ايام يريد يحصلهم ماكو ...و زادت مسؤليتنا و حملنه عليهم ... فد يوم فكرت اگول لابو همسة يوديني لگرايبنه ... عدنه ناس اقرباء ابوية من بعيد مرة رحنه الهم بالعيد بس بعيد على بيتنه وبالحقيقية ما اندلهم ... حتى اخذ خواتي و اخوية و اروحلهم لان ضجت يومية يحجي علينه ..هو فرح و گلي امشي اوديكم حضري ملابسكم ...
صعدنه بالسيارة و اني ما اندل البيت بس كذبت عليه كتله اسم فد منطقة سامعتها من امي ... ام همسة مقبلت نروح بس ابو همسة تعارك وياها و كلها اني بزعت ... رح اسلمهم لكرايببهم و افضها ... كلتله خطية ابو همسة انطيهم مجال لحتى خوالهم ينفتح تليفونهم و يجون احنه منعرف هذول الناس ...
كلها انت معليج ... البنية تعرفهم و كالت نروحلهم دائماً ... وخري هيج ...
جتي ام همسة و جايبة نونو حطته بحضني و شفتها تباوع لابو همسة و كلتله بصوت ناصي ... زين خلي نخلي يمنه نونو ... خنزرلها و گلها مع السلامة ...و صعد بالسيارة و ام همسة تباوعلنه و تبچي ...
و بدات مرحلة الشقاء .......

يمشي بالسيارة و اني اكله هااا لا مو هنا ... هااا مو هنا ... هو مصدكني لان بس يريد يخلص منا ... الى ان شفت منطقة چولة و بيها بيوت مبنية من البلوك كتله اي هنا ... گلي وين البيت ...؟ اشرتله هيچ لا على التعين ...
گلي همه بيت ابو منو ..؟ صفنت حتى اتذكر هذاكمه كرايبنه الي مندليتهم بيت منو،،؟جان يباوعلي و خفت منه و جان اكذب ... كتله بيت ام علي .....
گلي خوش ... خلي انزل وياكم ... كتله لا عمو احنه نروح نندل ... كال لا شلون ... نزل و اني خايفة ليكتشفني كذابة ... ابو همسة عصبي و دائماً حواجبة غاضبة ... و ميحبنه ..
نزلت اني شايلة نونو و اسيل شايلة الجنط و شمة بيدها ربطة امي متقبل تذبهة من توفت امي ليهسة ...و كلش صايرة نحسة و قل كلامها جداً ...وكفنه و نزل ابو همسة و كال وين البيت ... باوعت لكيت بيت واكف ولد يمه كتله يم ذاك الولد .....كال زين خلي اروح ادك بابهم ... كتله لا عمو احنه نروح ... الولد الي جان واكف يم البيت اجة يركض كال عمو تريدون تكسي ... كله لا ...باوعلي و كال انتو المن تريدون .. كله انتو بيت ام علي ... كله اي ... كله هذوله كرايبكم ..؟ باوعلي الولد وصفن ... اني استنجدت بعينه و توسلت يكول اي حتى ما اطلع كذابة ... وخفت من ابو همسة يصير عصبي ... جنت طفلة و ما افتهم محسبت حساب اذا صدكني رح ننشمر بالشارع و هذا اصعب من ان يعصب ابو همسة ...
الولد نطق وهو يباوعلي ... كال اي عمو هذوله كرايبنه ...
كله زين صيح ابوك احجي وياه ... الولد كال بتلقائية ... لا ابوية طالع و ميجي الا باليل ... جيبهم عمو اني اخذهم ...كله ميصير ... كله عمو شبيك متصدكني ...
ابو همسة كله زين هاي شاسمها و اشر علية ....
اني كلت ها هي رح يكتشف اني كذابة ... اهم شي جان عندي ما اطلع كذابة ... نسيت اني شلون اذا راح ابو همسة اني وهاللحم الوياية وين نروح ... وهنوب عندي هذا الصغير ... الولد باوعلي و جان اقرأ بعينه اشياء ارتاحيت الها عبالك طمنني ...جان يتلعثم الولد و كال امم ....اسمها زينب ...
اني اندهشت ... وصرت واكفة عبالك تمثال صافنه عليه هذا شلون عرف اسمي ... خاف صدك يعرفني ...
ابو همسة اطمئن و الي عليه سواه و اكثر ... مو زين طلع منه هيج ...تاكد اكثر من مرة ... كال لعد اني رح اروح محتاجين شي ...؟ و جان يطلع من جيبه فلوس و نطانياها كال اني رايح ... اندارينه اني و خواتي عليه و باوعنه عليه بنظرة .. صدك نظرة يتيمة .. نظرة لاخر شخص من عالمنا الودعنا خلال ايام معدودة...
حسيته انقهر علينه اجة علية و مسح راسي  اول مرة اشوفه مقهور علينه ... كلي ديري بالج عمو على اخوتج .. و راح ...و احنه ظلينا نباوعله لحد ما صعد بالسيارة و مشى  ... جتني اسيل ... كالت انت ليش كذبتي ... وين نعرف هالولد ... هذا منو ..؟ كتلها اسيل ابو همسة ميريدنه ...اني كذبت لان هو ميحبنه .. و ميصير نبقة عدهم هواية ... كالت و هسة انت وين جبتينه .. وين حنام وين نكعد ...
الولد صافن علينه گمنا نتعارك ... اني وياها .. اخر شي حطت الجنط و كعدت عليها و ضايجة تباوع عليه  .. كال الولد تعالوا بيتنه ... باوعتله هو مبين اكبر مني بشوية ... كتله... انت شلون كتله لعمو ابو همسة  انت تعرفنه  .... ضحك كال اني كلت هذا ديختطفكم وخلي اوهمه حتى لا ياخذكم ... كتله زين و اسمي شلون عرفته ... كال هيج عليك يا الله ... لان اختي اسمها زينب ...فكلت لو تصيب لو تخيب ...
كال هذا اخوج ... كتله اي نونو ... كال شسمه كتله نونو .. كال اي ادري بس شنو اسمه كتله هو اسمه نونو ... كال هااا ... يعني اسمه شنو و تدلعوه نونو ... كتله ما عنده اسم ... كال صدك ...
كال زين انتو وين حتروحون ... كتله ما اعرف ما عدنه احد ... كلي ابوج وين امج ... كتله ماتوا .. شفته انقهر علينه شال الجنط و كال تعالوا ببيتنه ..
اني مشيت وية خواتي وراه ...
دخلنه لبيتهم .. بيتهم جان كوولش زغير ... و مبني من بلوك و السياج عبارة عن سعف و خشب و اغراض زايدة ... والباب مزنجرة وزغيرة ... الطرمة جانت زغيرة بس بيها غراض هواية ... تنور و يمة گونية طحين و كشن مال سيارة وسخ و قناني غاز ... و عربانة دفع بيها مكينة لحيم ... كال تعالوا طبوا ... نونو كام يبحي و يصرخ ... كتله اريد الحمام حتى اغسل لنونو ... كلي تعاي دخلي .. طبيت .. وخواتي وراية شمة لازمة ثوبي و خاتلة وراية و تشم بربطة امي و اسيل متچتفة و تباوع ع البيت و نفسها لعبانة .. البيت مو بس وسخ .. مبهذل .. الكاع صبة و ما مصبوغ داكين ع الحياطين وصل و جذع شجرة بالنص ... و السگف عبارة عن چينكو و سعف و نازل منه گلوب اقتصادي ... كلي هذا الحمام روحي ...
ورة هاي الغرفة الي واكفين بيها اكو ممر ... اظلم ممبين شي خفت افوت كلي اجي وياج ؟
كتله اكو احد بالبيت ... كال لا امي نظيمة طالعة و ماخذة اختي و ابوية مو هنا ... كتله زين لعد اني اروح ...
احنه صح فقرة و حالتنه المادية مو هالكد بس عمري مشايفة هيج بيت ... احنه من چنه بديالى صح بيتنه ايجار و صغير بس جانت امي تعدل بي و تنظفه ... ومن جينه لبغداد كعدنه بيت صديق ابوية حراس جان بيت جبير ... ونظيف
طبيت للحمام و نسيت نونو  ديفرفح يريدني انزعه الحفاظه ضايج منها ... وهو بايدي
لان مندهشة بوضع بيتهم .. هذولة شلون عايشين ... الحمام اظلم و ما بي ضوة و كله رطوبة و الدوش يذب مي يقطر ... و عزة ... ما عندهم مغسلة ... كتله يا ولد ... كال ها كتله وين المغسلة ..؟ كال ماعدنه ...بس هذا البوري ... اباوع ع البوري هذا ليش راسه معووج ؟
كتله اريد مي دافي .. كال ما عدنه لازم نحمي ...
راح اختفى و اسمعه يچقچق بالجدور ...
و اني ظليت اسكت بنونو ... و ورة شوية اجة الولد و جايب مي ... بجدرية كال هذا المي ... اني باوعتله و كتله شلون وين ..؟  كلي هنانة بالكع و اني اديرلج...
والله ردت ابجي ... بعدين كلت بگلبي زينب هاي البداية ....
ما اسمع الا صوت مرة .. علي ... ولك علي ... هاي شنو .. منو هذوله ..
شلت نونو وهو مصلخ .. و يلگع و عرفت المرية تصيح ع هذا الولد ... كتله هاي منو ... گلي هاي امي نظيمة ...
راح و اسمعها تكفخ بي و كالت ولك معزى هذولة منو .. طلعت شوية و اجي الكه البيت مليان مزعطة ... كالت اني كم مرة كايلة اني جهال الشارع مطببهم للبيت ...
كللهة اسمعي امي نظيمة والله هذولة مو بالشارع جانوا ...كالت لعد من يا قصر جوي عيني ...
كال خطية امهم ميتة و ابوهم هم و ما عدهم احد و حتى عدهم طفل زغير خطية انقهرت عليهم ... و طببتهم ...
اني سمعته و گلبي انزرف ... صرنه موضع شفقة و كلمة خطية توصف حالنه و هويتنه ايتام ....
كالت و منو كلك اني مؤسسة اجتماعية لو دار ايتام ... ياله طلعهم برة .. وهنوب وياهم ابن انفاس .. باوعت عليه كالت حجاية واني بوكتها مفتهمتهة كالت ولج هذا نغل ... هذا ابنج عوبة شكدوتج و عندج هذا ... ؟؟؟
علي صار اعصاب و كلها لا امي نظيمة خطية هذا اخوها .... كالت شعليه هي او امها الي لاعبات بليلة سودا و جابن هالنغل.. المهم طلعهم منا علي ... ترة والله احرك ابوك عليك و هو يعرف يتصرف ....
كلهة زين بس هالليلة خطية و اني باجر من الصبح و قبل متكعدين اطلعهم والله .. هذا الحجي هي جارة اذنه و واكفه چنهة شيطان .. شكلها يخوف .. عينها جاحظة و سنونها كبار و خشمها مفروش و سمرا حيييييل و سمينة ... باوعت علينه اني وخواتي بقسوة .. كالت زين .. بس ما اريد صوت فايتة لغرفتي ارتاح ...
فاتت منيمي و جان تباوعلي بازدراء و فرت ايدها وكالت عشتووو ... شكدوتهن و بيهن بلة .....
اني مفتهمت شنو تقصد ...
اخذت نونو الي خبصني بالبچي و رحت ابدله ... ام همسة علمتني شلون البسة و اشطفه ...
كعدنا بهذا الهول ... و علي جابلنه صمون و روبة ... اكلنه
و رضعت نونو  ... علي ما ظل يمنه ساعة بالشارع و ساعة بالطرمة يم ابوه يشتغلون ابو لحيمچي و يساعده ... ابوه هم تفاجىء بينا ... و سأله و حچاله كلشي ... و صار عصبي گله هو احنه بالگوة عايشين هذوله شنو فوگ روسنا و قنعه بس هالليلة ...  نفس ما گال لنظيمة ...
نمنه و ونونو الله هداه و نام فد جرة جرها للصبح ...
و صار الصبح و اجة علي عليه ... گلي زينب ... زينب .. گومي ... صار الصبح ...
فتحت عيني و اريد استوعب اني وين ... و هذا منو الگعدني ... ظليت صافنة بوجهه و هو يباوعلي ...
گلي شبيج زينب ( عبالك فهمني ... من عيوني ) گلي اني علي ... البارحة جبتكم لهنا ... كومي امي نظيمة رح تگعد و تجي تعيط خاف تأذيكم ....
اتذكرت رأساً و كمت لميت الغراض و گعدت خواتي و گعدت اسيل تدردم واني اسكتها و شمة تبچي وحاظنه ربطة امي ... و فز نونو گام يصرخ ... الدنية باردة شلون رح نطلع ... زين وين رح نروح ...؟