رواية أجرام مستباح لثلاث ندبات الفصل التاسع وثلاثون 39 - بقلم الكاتبــة ايلول

مساء الخير ...

#أجرام_مستباح_لثلاث_ندبات

بقلم الكاتبة أيلول

ins: t8_fe3 للتواصل

𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒

‏آنـه الحسرة الچبيرة
‏الـ بين الگلوب
‏ آنـه الما يدري
شنهو وليش متعوب
..........................................................

جــــمرة ::- اباوعله ساكت وهو تخبل يصيح بخبال گلب المطبخ ويسب ويفشر حتى على اهله غلط على امه لان انتحرت وعافتهم على ابوه الما ابتعد عن عمهم من البداية انجن كسر المطبخ كله وانا واكفه بالباب مبتعده بــــس اباوعله الحد ماشفته كام يضرب ايديه على الكزاز ركضت أريـــــد اسحبه دفعني حيل وكعت على اصبعي روحـــــي شاطت اجه يركض متخبل يجر بايدي ويصيح بتعب

::- ااسف اسف جــــمرة أذيتج اسف اسف ما أدري اذيتج مو أذيتج .

-جريت ايدي من عنده ولزمت وجــــهة ابين ايديه بــــس اريد يهدأ

::- أبــــــهر بــــس باوعلي حــباب لا تضعف هيج

- باوع بعيني عــــــيونة حمر ويرجف كل ذرة بجسمه ترجف حده لهنا انترسن عــــــيونة دموع وهو فاتحهن على وسعهن مايريد دموعه ينزلن الحد ماوكعن على خده ونفجر يبجي بصياح جريته الصدري

::- تعــــبت ولج تعــــبت اااخ يا بويه يا اباذر يا خويه غبي وما لكيتكم الگوني انتم .

::- أبــــــهر كـــــافي عفيه شبيك

- شهك بشوغة يضم وجــــهة مني يناشغ الحد ما تعب حيل تمدد على رجلي حاضن نفسه والدموع نشفت على وجــــهة رموشة مبللات فاتح عينه بتعب

- مسحت على شعره ساكته سحب ايدي يلزم اصبعي

::- أذيتج كسر الايدي شلون دفعتج .

::- لان حقير جنك ثور نطحتني

::- ههه اسف

-حجاها وخله ايدي على شفته يبوسها مغمض شوية وكعد مسح وجــــهة وراح يغسل

فتت للغرفة اجه وراي بيده المشط بدون مايحجي كعد وره ظهري مشط شعري ومن كمل سحب الخاولي ويمسح بأذاني ويراويني

::- الوصخه .

::- جذاب مو من اذاني؟

::- هههه اي تعالي خلي انظفهن عدل

- سحبني من ايدي الرجله نمت وهو يمسح اذني يفرك بيها ويرفعلي الخاولي يگلي

::- شوفي الوصخ

::- وووينه ليش تجذب

::- الخايسة

::- انجب اسبح اكثر منك وريحتي اطيب من ريحتك وكلي انظف منك

- كلبت نفـــــسي واني بحضنه اباوع الوجهه وهو كاعد لزم وجهي مبتسم

::- حتى گلبج انظف من گـــــلبي وابيض

::- اي صح واللـــه

- ضحك كعدت الزم اذاناتي
::- صخنن كله منك

:: زلغتهن زلغ طلعتهن بالباكيت صارت بيهن لمعه

- ابـــــتسمت ساكته كام طلع ملابس يريد يطلع مو ملابس شغل كشخه سكتت راح للحمام ورجع
مبدل بنطلون اسود قماش وقميص

::- وين رايح؟

::- هنا هسه اجي

::- هـهــه وين هنا للملاهي؟

- دار عليه وهو يحسب فلوس هز راسة ماعاجبه

::- اجيبلج عصارة علمود مايبقى أثر واجي يا ملاهي شبيج

- درت وجهي ساكته لف على رگبته چراوية رتبها بطريقة حلوه يغطي اثار التعذيب البرگبته التفت عليه

::- تردين شي من الصيدلية؟

::- اي

::- شنو؟

::- ما ادري بــــس هاي تأذيني

- دنكت لزمت بطني من يم خاصرتي ضحك عباله اجذب عليه وهز راسة موافق اني هم مالحيت سكتت وهو طلع تمددت اعد بالاشياء الصارت وياي وشنو الجابرني اتحمل شنو علاقتي بكل هذا ليش خايفه عليه مو جنت واعده نفـــــسي اسجنه بأقرب فرصة ليش صارت امنيتي الوحيده ينجمع بأخوانة لان كاسر خاطري لو بــــس حتى اخلص وارجع الاهلي

غمضت عيني حيل اتذكر معاملته الي والذل العيشنياه من خلاني مدمنه وما اعرف ليلي من نهاري من سبح ما اكدر اسبح تذكرتهن موقف موقف ويرجع گـــــلبي يحقد ويا كل ذكرة اذاني حيل من ادمان من خلاني اتوسل على حباية
من خوف ورعب ابيت مسكون من اشتياقي الاهلي من وهم الاغتصاب وشكد اذتني فكرته وهو عبارة عن خطه من عافني بالبيت وحدي وموتني من الجوع لان تصوب واصدقائة نسوني من خطف وتعذيب ليش اتحمل كل هذا .

نحفرن بگلبي مو جنت احلف اخذ حق كل العيشنياه وارجع واتذكر اهتمامه الشغلات انا بنفسي ما اهتملهن عالجني وتعالج وياي صح بطريقة صعبه وماتعالجت تماماً بــــس تبقى بالنهايه موقف ينحسبله من اختارني بدل اخته
من كل هل فترة انام بحضنه ويجبر نفسه مايتقرب وهو يگدر ويدري انغش بكلمتين حتى اروي فضولي وشكي من يحاول بكل مرة يطلعني من الخطر وهو عادي يبقى بنصة

جريت نفس بحيرة ما اكدر انسه لا ايجابيات ولا سلبيات هو مو بــــس انجبر يمشي بهل طريق هو تغابى الاجل اخوانه وركض وره سراب ما بيه ذرة امل اختار المحاولات الفاشلة على الاستسلام.

نترس گـــــلبي حيرة ومن انقهر كلش اقنع نفـــــسي لو اني مكانه هم هيج اسوي تعــــبت من التفكير الحد ما رجع بــــس باوعلي گـــــال

::- هــــا تردين تعاركين؟

- هزيت راسي لا متمدده اباوعله كعد يمي بيده علاگة علاج طلع عصارات ثنين فتحهن اباوع بعينه ساكته اخذ مرهم منهن وتقرب سحب التشيرت من صدري خله للاثر ويضم بالتشيرت بملابسي الداخليه يحجي بجدية

::- الزمي لا تخلينه يرجع عليهن وينمسح

- رجع ليوره اليم رجلي سحبها من الغطا كعدت على حيلي رجع سحبها ثنه رجله وخلاها فوگاها
يباوع للحرك صافن دنك بثگل باس اثر الحرك على طولة غمضت عيني ارجف لو اموت ما اسويها وابوس رجل شخص. شنو اليخليه يبوس رجلي احتقن بلعومه ونزل عــــــيونة ماباوعلي بعد خلالها عصارة وجر المخده خلاها جواها يحجي

::- لاتنزلينها

::- بلا تعال

- سد العصاره واجه كعد يمي اخذتها من أيــــدة باوع بعيني كلبت بالعصارة ورجعت باوعتله

::- الشنو؟

::- تعالج الاثأر حتى ماتبقى

::- لعد خلي الجسمك

- حجيتها وفتحت العصارة اخذها من ايدي مبتسم سداها وحجه

::- لا هههه

::- ليش

::- تعالجي انتِ وانا بخير

::- اراويهن الامي أثر أثر واحجيلها شنو سببهن بــــس توديني.

- باوع بعيني عــــــيونة تفتر على ملامحي بسرعه تقرب طبع شفته على راسي بشوغة ويتنفس حيل يهمس

::- ما اكدر

- دفعته من أيــــدة عاكده حاجبي ::- شنو الما تگدر؟

::- اموت بدونج

::- موت

::- هم ميت وانتِ يمي شلون اطلعج من حياتي أريـــــد اخلصج مني بــــس انتهي بدونج

::- معليه تعــــبت بعد

::- حقج هاي هي

::- شوكت؟

::- شهر لو شهرين

::- ليش مو هسه؟

::- عندي اسباب هواي قسام ما عايفني اريده يوصلني المنو باعهم جــــمرة وعد ارجعج اوعد شرف بعد مــــحد يوصلج ولا تتأذين .

::- اشتاقيت الاهلي واللـــه متت

::-ههه اقلها خلي نكمل سنه سوه وارجعج .

- كمت من يـــــمة ساكته يمكن بعده خايف يرجعني واشتكي عليه كعدت اباب الصالة اباوع للطارمة وهي هلكدوتها . الضوه خفيف واللـــه من شرد بــــس اركض دفره تفتح باب الشارع واطكها رگضة واقرب مركز

حسيته كعد وراي مد أيــــدة على خصري حضني
سحبني اله وخله راسه على كتفي من وره

::- جاي تفكرين تشردين مو؟

::-امم واقرب مركز اشوفة اطكك بلاغ واسمط جد جدك وجد قسام وعمر اشعلكم شعل اسطركم واحد واحد شو كلشي عرفت عنكم.

::- هههه تذكرت مره هم عفتج تطلعين للطارمه وصفنتي نفس هاي الصفنه سألتج تردين تشردين كلتي اي

- ابتعدت من حضنه درت عليه عاكده حاجبي واباوع بوجهه

::- اكلك خاف انـــتَ جذاب؟

- رفع أيــــدة يخلي شعري وره اذني ويباوع بعيني
::- شلون جذاب؟

::- خاف ماعندك اخوان وكتلي هيج حتى ما اشرد

- ابتسم وايده على وجهي ماحجه دفعت أيــــدة ورجعت درت وجهي للطارمة رجع حضني من خصري اله

::- أبــــــهر

::- يا روحه

::- جوعانه سويلنا عشا

- سكت ثواني سحب أيــــدة وجراني وياه وكفت اباوعله
::- شنو مشتهيه؟

::- هو انـــتَ شعندك البيض والطماطه سوي اي شي

- فتح عينه كلها مد أيــــدة بقوة يريد يضربني ونوب بــــس خلاها على راسي على كيف ودفعني يضحك

::- ام بطن اكثر اكلنا لحم ودجاج شنو بنفسج وما مسويه الج

- ابـــــتسمت وهو يسوي عشا ويسولف وياي كاعده على جهه اباوعله وحايره بروحي وهو من ملامحه عرف اكو شي كل شوية يباوعلي بشك ويحاول يضحكني الحد ماخله الاكل كعد يوكلني
وانا مدنكه اختنكت ونزلن دموعي دفع الصينيه واجه يمي متخبل

::- شبيج جــــمرة شكوو شسويت؟

::- وخرر وخرر ليش علمتني عليك شلون اعوفك شلووون

- رجعت ليوره وجريت رجليه حاضنه نفـــــسي وابجي وهو بــــس يريد يلزمني اغلط واسب

::- أريـــــد ارجع الاهلي بــــس هم أريـــــد ابقى اعرفك أريـــــد تبقى مهتم بيه

::- جــــمرة ولا أريـــــد اعوفج واتمنى العمر كله تبقين زوجتي بــــس اخاف عليج اخاف تتعلقين بيه اكثر ولو انسجن لو اموت شيصير بيج

- مسحت دموعي اهز براسي لا تقرب لزم رجليه مدنكه وكلبي يدك حيل يحجي بصوت خافت

::- شنو التردينه كليلي؟

::- اريدك انـــتَ ما أريـــــد تموت لو تروح وتعوفني

- بسرعة مد أيــــدة وره راسي وسحبني يبوسني
ابتعد تعبان لازم راسي ساند راسة عليه ويحجي

::- اذا ما متت ارجع اخطفج

- دفعته حيل اغلط وابجي وهو ضحك وسحبني الحضنه ضميت وجهي بصدرة اسب

::- لا تمسحين بيه جــــمرة خشمج الزميه

- نفخت خشمي ومسحت بقميصة وهو حاضني يضحك ابتعدت

::- ايععع ماتلعب نفسك؟

::- منج ابد

- سكت يباوع بعيوني مسحتهن درت ورجعت باوعتله

::- أريـــــد ابوس رموشج

::- وخــــر عني

::- هههه ابد ما غلطت من سميتج سنايبر جبتيها بنص گـــــلبي

- حجاها ورفع أيــــدة اشر على گلبه

- كمت من يـــــمة عايشة بتناقض يخنگ ماعرفت شنو الاريده غسلت وكعدت بالغرفة شوية واجه يمي باوعتله بطرف عيني ثنينا نحاول نتعود نفارگ بعض من هسه وثنينا نريد ننسى راح نفترگ شمر العصارات بحضني وهو يدور بالاغراض حجه

::- راح اطلع ويا عمر بشغل خلي منهن قبل لاتنامين

- جريتهن رجعت شمرتهن عليه انتر ::- خليهن الروحك

::- شبيج

::- معليك يله فضها أريـــــد ارجع الاهلي مليت منك

::- اهاا؟

- درت وجهي منه اختنكت وهو سكت بدل ودار عليه

::- تردين تفوتين للحمام راح اقفل الغرفة

- باوعتله بنفاذ صبر ::- ترا لو أريـــــد اشرد الف فرصة كدامي بــــس باقية ومتحمله الخاطر دره واباذر حتى مو الخاطرك فـ لا تصير حيوان وتحبسني بغرفة عوفها مفتوحة ما اشرد

- هز راسة لا ودنك ::- تشردين لان ضايجه مني حالياً وماتعرفين شنو التردينه ساعه ترديني وساعة تردين اهلج

- حجاها وطلع قفل الغرفة غلطت عليه اصيح واجر نفس بتعب أريـــــد اوصل القرار شنو الاريده تعــــبت تعــــبت ما اعرف تمددت مغمضة عيني بــــس كون اعرف افكر واوصل الشي يناسبني واخيراً وصلت القرار

::- لا احاول اتعود على فراگة ولا اتغير خلي اعيش هل شهرين بذكره حلوه ومن يرجعني نهائياً ما اشتكي عليه واذا انسجن واكدر اساعده اوكف وياه ما راح اعوفه وبالوقت نفسه ما ابقى وياه.

- انتظرته ردت احجيله بــــس ما اجه الحد ما نمت حسيت أيــــدة على رجلي بهدوء يحاول مايفززني خلالها عصارة سحبتها من أيــــدة ما أريـــــد يرجع يبوسها رفع عينه باوعلي ابـــــتسمت وهو خجلان دنك

::- وين رحت اتأخرت. ؟

::- شغل لا تنامين راح اسبح واجي

- هزيت راسي اي اخذ ملابسه وفات للحمام غمضت نعسانه موكلش غافيه بــــس نعسانه سمعت الباب من رجع نفتح فشر بصوت ناصي

::- السافله اكل ونوم

-بقيت مغمضة حسيت عليه بصفي خله وجــــهة بشعري يجر نفس شايغة روحه ويهمس

::- ما انام اذا ما اشم شعرج شلون افارگج.

- فتحت عيني مبتسمه وهو ابتعد باوع بعيني عود يريد يرجع بالوجه الثگيل بــــس من ابتسم مايكدر

::- شبيج

::- فكرت بشغله

::- اسمعج

::- مو بعد شهر لو شهرين وترجعني؟
::- امم

::- خوش باوع ليش تضوج مني واضوج منك وهن بــــس شهرين نصير حبابين ومن ترجعني الاهلي والقرآن الكريم وغلات صوفي لا اشتكي عليك ولا احجي شي يخصك واذا انسجنت يعني مو اني السبب بــــس يلزمونك واحتاجيتني اجي اساعدك واوكف وياك اكلهم مو مجـــرم ممرض ويشتغل حلاق

::- هههههههه متأكده؟ انا أريـــــد اكرهج بيه قبل هل شهرين هههه عود حتى ماتضوجين من ترحين

::- لا لاتصير ارعن تقهرني هيج

::- يعني هسه اجيب فراشي يمج؟

- ضحكت هزيت راسي اي جر فراشة بصفي تمدد وسحبني الحضنه ويدغني بخاصرتي يضحك

::- تردين هل شهرين يبقن بذاكرتج للأبد؟

- حضنته حيل مبتسمه واضم وجهي برگبته ::- اممم

::- واذا طلبت منج اتقربلج بهل شهرين تقبلين؟

- ابتعدت رافعه وجهي بوجهه ابتسم ورجعني الصدره

::- جاوبي

::- لاا

::- وانا هم ما أريـــــد تقبلين بــــس انتِ غشيمة خايف بكلمتين اغشج.

::- واللـــه اغشك واغش عشرة مثلك وما انغش

::- تراهنين

::- لا ما ارهن بــــس واللـــه

::- تراهنين اكدر اغشج لو لا؟

- ابتعدت منه وهو يضحك دفرته ::- اخذ فراشك اولي منا صوجي اصير حبابه

::- هههههه سنايبر الزقجة السافلة

::- جـــــندل الكافر المجرم .......

::- ادبسز لا تتسوفلين

- مد أيــــدة ضربني على راسي شهكت لازمة راسي وفاتحه عيني حيل

::- الارعن اتشااقة

- مديت رجليه ادفر بيه واغلط

::- راسج يتمغمغ شسويتلج حتى ماضربتج

::- ايدك بكد راسي اذا فكرت تضربني الوجع يوصل قبل ما ترفع ايدك ثور واللـــه ثور

- دكيت على صدرة وسكتت صافنة

::- نلعب؟

::- لا ما العب وياج

::- اكعد يله

::- ما العب

- عفته يحجي ورحت للمطبخ ادور مالكيت بطل جريت كلاص. ورجعت للغرفة لكيته متغطي مسوي روحه يشخر

كعدت على بطنه صيح موجوع ابتعدت
::- حتى بعد ماتجذب كوم نلعب

- سحب التشيرت من بطنه يراويني الجروح ويحجي ابرائة

::- باوعي مريض لازم انام

::- هــــا أبــــــهر مليت مني؟

- ابتسم وكعد جراني من ايدي على رجليه يعصرني بحضنه ويدغ براسي

::- شلون امل شلووون؟ سنايبري الزقجه السافلة

::- كااافي وخــــر باوع

- ابتعدت خليت الكلاص كدامنا

::- افر الكلاص التصير عليه هاي الجهه ينسأل سؤال الصراحة واذا مايجاوب ينضرب راشدي
واذا مثلاً صار عليك وسألتك شي وجاوبت بــــس ما اقتنعت وحسيتك جذاب هم اضربك

::- هههههه خوش يله

- كعدت عدل وهو مقابيلي فريت الكلاص اشو هذا كبل صار عليه باوعتله ضحك

::- اسأل عدل هيوو

::- ههههههه خلي افكر. هااا لكيته مسوية شي جريمه بطفولتج ومحد يدري بيج وشنو هيه

::- مو جريمه بــــس مره اكو وحـــدة مصاحبة بابا وتحرك بگلب امي يعني تجي البيتنا تغث امي وتكلها البارحه يمي طلعت الفجر وكتبت على حايط بيتهم انا ...........

- فك عينه وضحك حيل ::- خرب يومج

- دنكت فريته هم صار عليه كتله ::- لا هاك انتَ فره مايصير كله اني

- فر الكلاص صار عليه ضحكت وهو يباوعلي مبتسم منتظر اسأل سكتت افكر ورجعت اباوع بوجهه

::- تتذكر من حجيتلي عن البنيه البلملهى

::- ما اجاوب اي شي يخص هل موضوع حجينه بيه وانتهى

::- حتى بعدني ما سأله؟

- نزل شفته ورفع اكتافه حرگ گـــــلبي تقربت أريـــــد اضربه راشدي لازمه وجــــهة ورافعه ايدي

::- سنايبر اذا حيل اموتج

- ما اهتميت محروك گـــــلبي منه بحركه ضربته صوت الراشدي يون دفع ايدي فشر على عمر خازرني

::- لا تخزر هذا العب

- فر الكلاص بعصبيه صار عليه سأل سؤال حيل حيل سخيف خزرته ماقابله

::- تأدب شوية

::- لا تخزرين هذا العب تجاوبين لو تنضربين

- دنكت ساكته طنكرت رجعت باوعتله مسحت خدي وحجيت اتمسكن ::-حــباب مو حيل واللـــه ينكسر وجهي

- طبك ايد بأيد يسوي احماء غمضت عيوني مقربه وجهي اله وكل شوية متحركة خايفه اتخيل وجهي فك ينطبك على فك يصير خربطه بملامحي عيني تجي بمكان خشمي

مغمضة حيل منتظرة الراشدي فزيت من حسيت نفسه بوجهي ولازم وجهي بين ايديه باسني  ، دفعته فكيت نفـــــسي منه امسح بشفتي وهو مبتسم

::- شبيك انـــتَ؟

::- كل واحد يختار العقوبة اليريدها انتِ تضربين انا ابوس لان لو اموت ما اكدر اضربج

::- اااي حنين كلش

- ضحك ورجع فر الكلاص وهو مدنك حجه

::- وخري ايدج  وركزي بالعبه هسه ارجع 

::- انجب لا تسترعن.

- ضحك والكلاص عليه صفنت افكر ادور اسئله صعبه ::- لو يرجع بيك الزمن تخطفني؟

::- لا ابد

::- ليش

::- الج حق سؤال واحد بالعبه

- سكتت موافقة رجع فره صار عليَ گـــــال

::- شنو احساسج من .
باوع الشفتي يأشر عليها

- فتحت عيني مرتبكه ودنكت بسرعة ماعندي جواب واذا بقيت ساكته يفكر اريده يرجع يبوسني

::- تجاوبين لو تتعاقبين؟

- ميلت راسي ادور اعذار ::- ما ادري ما احس بشي

::- جذبتي وانتِ كلتي اذا الجواب مو مقنع ينضرب

::- لا اوكف خلي ادور جواب طويل

- جراني من ايدي ورجع يبوسني غصب ولازم ايدي خاف ادفعه جريتها و دفعته من صدرة حيل اصيح وماده ايديه گدامي

::- مو جااااي ادور جواب .

::- حتى ماتجذبين بعد وتجاوبين من الاول هي تنگلب حمره وتتغير 180 درجه وتگول ما احس بشي.

- مسحت شفتي حيل افور كمت بــــس أريـــــد ارجع اضربه حتى يبرد گلبي هم صارت عليه گـــــال

::- لو انا فعلاً مغتصبج تصيرين هيج حبابه وياي

::- الحد هاي الحظة اعتبرك مغتصبني لان عيشتني شعور الاغتصاب ايام وليالي وشوكت اكتشف كلشي جذب وره ماسلمتتتك نفـــــسي

- حجيت بحركه وهو مدنك اخذ الكلاص گـــــال

::- كـــــافي

- عفته ورحت لفراشي منطيته ظهري ومغمضة عيني شبيه نقهرت شبيه شنو وعدت نفـــــسي
شوية ورجع تمدد بفراشة دقايق وقرب وجــــهة  الظهري ويحجي

::- حتى ما اگدر اكلج اسف وسامحيني الكلشي ممكن اطلب منج تعذريني الا هل موقف واستحق تعاقبيني عليه جــــمرة انا حتى هاي معاملتج ما استحقها عيشتج بنار احقر بشر صرت وياج .

- سحبني اله حاضني وساكتين ثنينا شويه وكال

::- شكد غلطان وياج بــــس تبقين الصح الوحيد بحياتي

::- باوع صح عذرتك وسامحتك بالدنيا بــــس ما ابريك الذمة بالاخرة

::- استاهل بــــس مثل ما اتفقنه انسي كل الصار خلي نبقي هل شهرين بذكريات حلوة

- درت وجهي عليه حضني بقوة الحد ما نمت .
ومرن يومين مگابلني وكاعد نخابر امي مرتين باليوم ومن يريدني اسد الخط يسلم على امي وهي بــــس ترد السلام تكول اخذوا راحتكم وهو يكعد يضحك ويصيح ام الضباط ويخليني انزل اهله وعشيرته بالمسبه

عمر يجي ويطلعون سوا رجعوا يشردون اطفال ويخربون شغل قسام وهو فار الدنيا عليهم

منتظرتة يرجع .خرز السوار بأيدي احسبهن كل شوية 11 خرزه خاف طاحت وحـــدة منهن ومخليه حجتي بيهن ابجي كل ما افكر من اروح ماعندي بــــس السوار منه سبحت وهو بأيدي جلب والخيط نگطع لميت الخرزات خايفه تضيع وحـــدة منهن

مسحت دموعي من اجه باوعت الباب الغرفة اسمع صوته يدندن ومنتظرتة يدخل طول يله فتح الباب مبتسم وغابت ابتسامته من لمحني شمر الاغراض البأيده واجه بسرعه خايف

::- شكو شبيجج جــــمرة شبيج

- مسحت عيوني ورفعتله ايدي ::- سواري انگطع

- باوع للخرزات لازم وجهي بايده غمض وجر نفس براحه

::- خيولي اشتريلج غيره

::- ما أريـــــد اريده هوه

::- راح اروح اشتري خيط صوف واجي اجيبه غير لون؟

::- لا هم احمر

- هز راسة موافق وراح اشتره لفة شگدها يضحك

::- بين فترة وفترة نبدل الخيط حتى ماينگطع

- كاعده يـــــمة ومنتظرته يكمل مديتله ايدي شداه وباسها 11 بوسة يضحك

::- هواي تبوس

::- شتــــردين مني

::-ههههه

::- جــــمرة اطلب منج شي

- باوعتله مبتسمه تقربت كعدت بحضنه وعبرت ايديه على رگبته :: اي اطلب

- ابتسم مغمض عينه ويحجي ::- انسه حتى اسمي هيج

::- ههههه احجي بلا

::- السوار ماتنزعينه ابد ابد

::- واللـــه ما انزعه ابد ابد ابد

- قرب وجــــهة يضحك  فرحان ابتعدت وكمت من رجليه راح سبح ورجع

::- تعالي احجيلج شنو عرفت

::- شنو

::- اباذر ودره مو سوا اباذر موجود بـ بغداد
دره لو بنوادي بغداد لو خارجها

::- عرفت منو المشتريهم؟

::- عرفت كم معلومة وجاي ادور على المشتري دره بــــس المشتري اباذر ما اعرف شي عنه

::- اذا اباذر موجود ليش مايدرو عليك

::- مستحيل يلكه شي عليه لو يروح الاكبر استخبارت جــــمرة سجلي وشخصيتي موجوده بالنرويج الي هوه حسين يعني حياتة مستمره شكد مايدور مايلگاني واذا تجين على دره ما اتوقع تتذكرنه

::- زين يعني هم مجـــرم اباذر؟

- هز راسة لا بقهر عــــــيونة حمر صارت ويغص بالكلمه

::- ما اتوقع

::- وقسام شسويت وياه؟

::- انطيته الفلوس واخذت اسم الشخص الشتره دره هههه وعذبته

::- حركته؟

::- بالدهن مثل ما حركج

::- ماخليت عمر يغتصبه الجلب ؟

- فتح عينه بصدمة وضحك حيل

::- متسوفله ورايحه

::- ما متسوفله بــــس الله عليك مو يستاهل ؟ ونووب يلزمه ويشربه زيت يفور حتى تحترك امعائة وراها يتعلك بسلاسل ويندك جسمه ابسامير ويشعل نار بجمر وكل شوية يحركه بجمره

::- انتِ مجرمة اكثر مني

::- ماحب اشوف انسان يتعذب اموت بــــس قسام ادفع نص عمري حتى اشوفة يتعذب كدامي.

::- ههههه انسيه يولي

- سكتت لليل ماكدر ينام عباله اني نايمه اخذ تليفونه وطلع الباب الشارع البيت صاير بدربونه صغيرة كمت وره فاتح باب الشارع وكاعد على حيله مشغل اغنيه

في حزن وسع المدى
في وجع جوا عميق

- رافع راسه ليفوك ولام رجليه الصدرة فوگ راسة عمود وبيه بلوجكتر وباب البيت صغير رجعت للغرفة سحبت شال وطلعت فز التفت عليه ورجع باوع بالشارع بــــس بزازين تفتر مد أيــــدة الي كعدت على حافة الباب وهو برا الباب سندت راسي على أيــــدة نباوع للدربونه ساكتين وبس كلمات الاغنيه الجو بيه هوا خفيف وبارد جريت نفس بقوة حيل حلو شعوري رغم حزنه لف راسه الي باس ايدي العلى زنده ورجع دار يباوع للشارع
نعست حيل غمضت عيني گـــــال

::- جمراية كومي انام

- وكفت على جهه طفه تليفونه ودخل قفل الباب بقيت واكفة بمكاني

::- أبــــــهر

::- يا روحه

::- شيلني مثل قبل

::- ههه تعالي

- مد أيــــدة رفعني بحضنه حضنت رگبته حيل يمشي مبتسم ماعافني على الفراش. تمدد لامني على صدره

::- أريـــــد اضمج بروحي من روحـــــي

::- ههه شنو هاي

::- احضنيني جــــمرة خليني اشبع منج حيل احضنيني

- عبرت ايدي احضنه بقوة وهو گلبة يريد يطلع من مكانه اذا رجلي نزلت من رجله للفراش يرجع يرفعها وانا خباثة انزلها واضحك سكته الحد ماغفيت.
...

غـــــدير ::- كعدت يمهم اشو هاي كامت تعاند تحجي وتشاقي وكل شوية تضربه على رجله وهو يتحمحم ويباوعلي من اخزرة يدور وجــــهة ويرفع رجله مبتعد عنها وترجع تضربه شيطتني كام من يمها بيده ابنها يضحك ويمشي كعد يمي ويحجي بصوت عالي

::- غدوره مو يشبه مصطفى ابن عمتج؟

::- لا مصطفى يخبل

- باوع بوجهي ساكت يعضلي شفه وانا اهز براسي شنو رجع حجه بصوت عالي

::- لا شوفي ملامحه يشبهه

- باوعت بالطفل ولا اكو ذرة شبهه كتله

::- لا واللـــه شجابه على مصطفى

- خزرني عض شفته هزيت راسي اي

::- هااا اي اي من جان صغير يشبهه

- صاحت رقيه

::- شبيه ابني ست غـــــدير؟

- باوعتلها ابـــــتسمت ::- يخبل

- دارت وجــــهة ضايجه وكف بــــسام والطفل بأيده گـــــال

::- راح نروح نشتري تجين ويانا

- بعدني ما مجاوبة وصاح ابوه

::- وين موليه

بــــسام ::- لا تدخل رجاءً شي ما يخصك

غـــــدير ::- وكفت بسرعة مرتبكة ما أريـــــد تصير مشكلة وبسام طلع ابوه يغلط ويسب طلعت وراه كتله
::- روح بــــسام بــــس لا تتأخر عفيه

::- اصعدي الغرفتج من اجي انزلي

- عفته طلع وصعدت ركض مارجعت نزلت الحد ما اجه شوية واجه زوج رقية ياخذها سلمت عليه وعلى عــــمة ومدت ايدها البسام تريد تباوسه ضحك خله أيــــدة على اكتافها كالها

::- كمت استحرم ماتدرين؟

::- لا واللـــه مو تستحرم بــــس عود ست الحسن تغار

غـــــدير ::- ساكته بــــس اباوع مدري علكتها مدري هو هذا الازم يصير طلعت من بيتنا زعلانه رجعت للحجية بسرعة غيرتلها شربتها علاج ودرته الها على مسلسل يوسف الصديق طفرت فوگ حتى ما اسمع حجاية تغثني

كلبت بالصور مالتنا اني وفاطمة مبتسمه اتذكر كل صورة شنو سالفتها وشنو صار بوقتها الحد ما اجه بــــسام بعده اباب الغرفة گـــــال

::- باجر العصر ناخذ اغراضنا ونروح دانعل ابوه لا ابو بيته

- سكتت اباوعله اعصاب ومقهور يجر بملابسه ويسب
::- انعل ابو الوكت الخلاني بأيدك لا ابو الساعة الجابتك عليه

- بدل وسد الكنتور مد فراشة وتمدد عليه مخلي ايده على عــــــيونة بقيت ساكته وين يله وخــــر أيــــدة وحجه بهدوء

::- نمتي غـــــدير؟

::- لا كاعده

::- تعالي بلا

- كفيت الغطا مني ونزلت كعدت يـــــمة كعد على حيله اباوع الوجهه بخوف رفع أيــــدة مسح خدي وابتسم

::- وين مقابل الخطط

- جريت نفس براحه وضحكت ::- وكعت گـــــلبي

- حجيتها وكمت للكنتور طلعت خمسه ورجعت يـــــمة انطيتها اله
::- اخذ اربعه ورجعلي الف

- رفع حاجبه ::-شنو هاي

::- الفلوس

::- ما أريـــــد فلوس أريـــــد ابوس

- فتحت عيني مصدومه ما انطاني فرصة اشرد جراني لفراشة بسرعة يبوسني سند راسة على راسي مغمضة عيني جامده بمكاني

::- ليش تبعديني ليش حارمتني منج غـــــدير

- دفعته من صدرة اريد ابتعد لزم ايديه بسرعة
::- ابقي يمي بــــس ابقي

- حجاها ومد نفسه بصفي بقيت متشنجه بمكاني
گـــــال
::- عرفتي مقابل تعاوني وياج شنو؟

::- اممم

::- كثري خطط وانا بالخدمة

::- بعد ما أريـــــد مساعدتك

::- ليش والله خوش رجال وامشي على خطة

::- بــــسام اكلك شي

::- احجي عيون بــــسام

::- احس مجذب عليه بــــس مدري بشنو؟

- سكت درت وجهي عليه يباوع للسگف وهز راسه لا .
خفت الح خفت اكتشف شي رغم فضولي غمض عينه ساكت اني هم غمضت الحد مانمت وفزيت على صوته يتحلم

فز مخروع ويمسح بوجهه لزمته خايفه

':- بساام شبيك

- عافني وكام يرجف دموعه تنزل ويمسحها بسرعه يجر بملابسه مايحاجيني يلبس ويحرك بروحه حرك صيحت.

::- بــــس حاااجيني وين رايح شبيك

::- ااــــخ عـــــلي ولج عـــــلي ولج يكول بطلت ما تجيني رايحله

- حجاها وجر السويج يركض بسرعه جريت صاية وشال ونزلت لازمتهن بايدي هستوه مشغل السيارة صعدت وياه ماحجه شي طلع السيارة من الكراج نزل سد الباب وطلع دموعه ينزلن كل شوية ويرفع أيــــدة يمسحهن نزل غسل بالطريق
ودك تليفونه ابوه كاله

::- ابقى يمها لا تطلع الشغلك شوية ونجي

- حجاها وسد التليفون رجع اتصل ما جاوب الحد ما وصلنا امشي وراه بعدني بعيده عنهم واختنكت غير كون من اجي اكدر احضنها اكدر اشوف وجها الحلو وعيونها الماخذت روحـــــي بــــسام يمشي ويصيح

::- اجيتك يا صاحب روحـــــي اجيتك يا عـــــلي

- كعد كبال كبره يبجي ويبوس بصورته صاح بخنگة

::- تعلم گـــــلبي على التعب ماضل عزيز مافارگته بــــس انتَ الجنت مصبرني وهم رحت انتَ

- بجيت الحد ماتعبت كام هو اشتره مي ورد وبخور بقينا شوية كاعدين يمهم ورجعنا طول الطريق ساكتين نزلنا وابوه منتظرنا بالكراج اول مانزل بــــسام هو جر حزامة من البنطلون وبسام بدون تفاهم. تقدم بسرعه لزمه من رگبته بثنين ايديه تخبلت ركضت اجر بايده وابوه يرافس وبس يريد يفلت نفسه دفعه بالگاع يكح ويجر نفس وبسام واكف بغضب جر هويته من جيبة شمرها عليه وحجيه

::- هي هاااااي الشبعتني كتل عليها اخذهاااا

- حجاها وجراني من ايدي دخل للصالة عافني وصعد بقيت فاكه عيني كلها ما مستوعبه والحجيه تصيح بــــس أريـــــد افهم شي ماكو عقلي ضرب رحتلها بسرعه غيرتلها وسويتلها ريوك وهي وضعها مو تمام كوه تاكل وتعبانه رجع بــــسام گـــــال

::- عزلي الاغراض بــــس غرفتنا واغراض امي ملابسها ماناخذ غيرهن

- حجاها وطلع لميت ملابس الحجيه وهي مالها خلك كلش رجعت نامت

صعدت عزلت ملابسي وملابسه لميت كلشي وتعبت حيل الجرارات والاغراض البيهن بقى ميز واحد جاي افتحه مقفول اول مره ادري بين مقفول سحبت مفاتيح الكنتور جربتهن عليه ولا واحد فتحه كمت ادور باغراض بــــسام لكيت مفتاح وحده دك گـــــلبي حيل ليش عازلة فتحت
الميز اوراق ودفاتر فوگاهن بيريه سحبتها وكعت منها قراصة مال شعر صغيرة

عفتها على جهه وسحبت الاوراق اگلب بيهن
كلها تخص شغله صور اشخاص ومعلومات هواي اوارق واسماء ودفتر صغير الورق مالته صاير اصفر لونه ازرك وعليه اشارة دائرية حمرة جانوا ينطوهن النا بالمدرسة فتحت اول صفحه شخابيط دوائر ودائرة متصله بدائرة بشخابيط

درت الورقة الثانية مكتوب

"الدروب هواي بــــس مستكثرة تلمنا !

- كلبت الورقة صافنه أريـــــد افتهم واول شي اجه ابالي جان يحب الورقة الوراها كاتب

" لفيت الگلب حيل وعصبت عــــــيونة حالف ما افك شوفة لمن تجونه. !

- نطحنت طحن اقره بقهر واكلب بيهن وحـــدة منهن كاتب

"ما زالت نار الفراق تحرق صدورنا كل يـــــوم
اما حان القاء الان؟ ....

- اقره بيها والتفتت على فتحت الباب جان مبتسم ومن لمحني كاعده بنص الهوسة والدفتر بأيدي اتسعت عــــــيونة بصدمه ركض دفعني ويلم بيهن من الگاع يرجف ويصيح

::- اغرررراضي لا تمدين ايدج عليهن فهمتي لا توصلين يمهن

- ابتعدت وكفت ميته قهر ::- ليش شنو ضام عليه

- لم كل الاغراض ولا التفتلي قفلة وشال المفتاح عــــــيونة حمر

::- ليش ما اوصلهن شنو بيهن؟

::- شغلات تخص شغلي مايصير

::- هههه ودفتر الاشعار والفراااق والحب المن الشغلك؟؟؟

::- اطلعي راح يصعدون يفتحون الغرفة .

- عافني ونزل مسحت دموعي بسرعه لبست نزلت جنطة الملابس ورحت للحجية ابو بسام ما جان موجود بقيت يمها بالغرفة وهو صعد الولد فوگ شوية واجه بيده عربانة الحجية گـــــال

::- يله خلي اخذجن للبيت

- كمت لبستها عبايتها وطلعنا ما احجي وياه
مشتري اثاث جديد اشياء بسيطة وقليلة يمشي ويحجي

::- بعدين على ذوقج تشترين بــــس اوفي الدين

- ساكته ماحاجيته بيت عـــــمو ويانا ابد ماعفوني حتى عـــــمو ادريــــــس واسمر ينزلون ويشدون الاغراض وعمه سوت عشا واجو ابيتنا تعشينا كالت عــــمة

::- داومي باجر الصبح اول ماتكعدين بدلي للحجية وريگيها واني بــــس اريگهم للتسعه اجي يمها اشوفها وارجع البيتي ساعه وارجع اعبر عليها.

- شوية وراحو افتريت بالبيت فصالة حلو مرتب الحجيه شوية ونامت طلعت من يمها رتبت الغرفة وهو ما ادري وين ساعة ورجع يحجي ويسولف ولا كأنوا صاير شي وكفت ساكته

::- شبيج

::- ليش خفت من شفتني ادور باغراضك.شنو ضام عليه؟

- سكت يباوع بعيني فرك وجــــهة ورجع باوعلي

::- ماضام شي اوراق شغل واذا ضاع شي منهن يطالبوني بيهن وينزلون رتبتي

::- هههه والاشعار الكاتبها العمو ادريــــــس؟

::- لا حول ولا قوة الا بالله هيج احب اكتب واصلا مابيهن معنى بــــس لان مال الطفولة محتفظ بيهن

- درت وجهي ساكته جريت فراشة حطيته كدام الجرباية گـــــال

::- اجرتلج خط ب 7:30 يجون عليج وياج بنات ثلاثة.

- ماجاوبته لفيت راسي ونمت گـــــلبي ميت قهر
كعدت الصبح لكيته يسوي ريوگ يوكل بالحجية باوعت للغرفة كتلها

::- صباح الخير حجية

بــــسام ::- صباح النور غدوره

- باوعتله ابتسم ودنك والحجيه اتمتم بابتسامه
غسلت وبدلت وفز على دكة الباب طلع وطلعت وراه فتح الباب ودخل غيث بملابس المدرسة يحجي

::- ماما سوت خبز حار اودتلكم

- اخذهن منه بــــسام يضحك ضحكت فدوه اروحلج عمه دخل بــــسام ياكل منهن رفع حاجبه وهو بالطارمه يحجي

::- راح نشبع خبز حار نستفاد

- ردت اضحك ولزمتها خيولي غلوسي ويضم عليه شكد ومن اسأل يفر السالفة بدلت للحجية وكتلها رايحه الدوامي بــــسام طلع قبلي شوية ودك تليفوني گـــــال

::- اطلعي السيارة بالباب

- طلعت سلمت وصعدت وياهن يومن مرن حيل مرتاحين بــــس بــــسام يغثني من مايحجيلي
وعمه كل شوية دازتلنا صحن اخر مره بــــسام جان عنده واجب ويتأخر جاي نتعشا اني والحجية وندك الباب وتليفوني بنفس الوقت كمت اركض جاوبته عـــــمو ادريــــــس گـــــال

::- انا بالباب عـــــمو

- ركضت فتحتله الباب مبتسمه
::- هلا عـــــمو تفضل

::- حبيبتي بابا زاد فضلج هاج هاي من عمتج

- اخذته من أيــــدة اضحك. ::- راح ابطل بعد ما اطبخ

::- هههههه. يله اقفلي بابج واي شي تحتاجينا اتصلي علينا

- سديت الباب ورجعت والحجيه من تشوفني فرحانه تكيف وياي رغم تكسر الخاطر تعــــبت حيل هل فترة وضعفت

بــــسام جاي واني نايمه من كعدت لكيته كاعد قبلي مستعجل گـــــال

::- اكعدي بسرعه ماتحلكين

- طلع يركض واني كمت ركض ابدل واسوي ريوك للحجية واوكلها مستعجله وهي من شافتني مستعجله تدفع بايدي وتأشرلي روحـــــي روحـــــي عود شبعت

::- لا حبيبتي يـــــمة اكلس بعد حبابه شوية بعد

-اكلت اخر لفة من ايدي واسمع الخط.يدكلي هورن كمت اركض غسلتلها وجريت اغراضي أريـــــد اطلع بالطارمه.واتصل بــــسام.

::- غدوره عفيه انطي الامي نص حبايه من الشريط الاحمر

- سكتت مختنگة ركضتي كلها راحت خالي بلاش كتله تمام واشرت للخط روحوا ما اروح رجعت يمها فتحت عينها متفاجئة ليش رجعت مسحت عيوني ابتسمتلها

::- ماعندي شي مهم باجر اداوم

- اجيت يمها انطيها علاج وهي تحاجيني وتمسح على كتفي شربتها حباية وبست ايدها مسحت عيوني مقهوره

::- مابيه شي حجية بــــس هيج انا ابجي على كلشي لاتنقهرين مو زين عليج اطلعج يمي بالعربانة راح احرث الحديقة؟

- اشرت تحجي وما افهمها جبت العربانة خليتها وكعدت ارتاح وابتسملها بدلت واخذتها طلعت احرث الحديقة وهي وياي وياي تريد تمد ايدها وتشتغل مبينه حاره كل شوية اطك رجليها بحركة كلب تريد تگوم كتلها

::- عـــــمو ادريــــــس وعدني يبوگلي شتلان من حديقتهم هههه هاي عــــمة فاتحه مشتل بالحديقة

- حجيتها وجريت طبله كتلها ::- بلا خلي نباوع

- ضحكت صعدت ردت اشوف حديقتهم ماكدرت السياج عالي

بقينا بالساعة كاعدين برا هستونا نريد ندخل ونفتح الباب بقوة وبسام يصيح

::- غديررررر

- وكفت بمكاني هو يرجف ويمشي بسرعه

::- واللـــه ما مسوية شي

- وصل يمي وجراني الحضنه يبوسني ويحضني بقوة ويصيح

::;- ما بيج شي

- ابتعدت منه مصدومة اباوع بعينه وهو يبوس بوجهي يرجف

::- شكو بــــسام

- هز راسة ماكو شي ورجعني الصدرة خايف وكلبه يريد يطلع من مكانه ابتعدت كعد على حيله كدام امه وهي تحجي وياه رفع راسة باوعلي وباوعليها گـــــال

::- سيارة الخط مالتج مگلوبة السايق ميت والبنات كلهن وضعهن خطر

- شهكت ايدي على گـــــلبي رجف داخلي حيل وهو مدنك ويحجي

::- جا متت لو صاير بيج شي

- دنكت عيني للحجية ثاني مره بسببها ابتعد عن الخطر ...

نــــهله::- مكيفة اجت غـــــدير يمي وجهالي على گـــــلبي وجمره تخلص اليوم سوالف وضحك وياي وادريس وسوالفة الما تنمل

كملت شغلي بــــس اني ومصطفى بالبيت عفته وعبرت على الحجية كعدتها شوية وكلتها وسولفت وياها ساعه وطلعت أريـــــد ارجع البيتي قفلت بيتهم ودرت نسوان يدكن اباب بيتنا

خليت ايدي من الشمس اباوعلهن واشوفها هند وامها

تقربت سلمت على امها وهي تتعذر وتتوسل ادخلها للبيت دخلتهن للاستقبال وطلعت خابرت ادريــــــس انطيته خبر گـــــال جاي رجعت يمهن كالت

::- هند حامل وموتوها اخوتها من الكتل احنا ماعدنا بت تطلك انا بركبتج طلاكهم باطل
اقنعي يمن فدوه اروحلج واللـــه انا ادبتها الج وهسه تكوم تبوس راسج وتعتذر

- صافنه بوجها ساكته وهند كامت باستني تتعذر منصية عينها لمن اجه ادريــــــس واسمر وياه

اسمر.من عرف حامل يصيح تضل عدكم واخذ ابني وامها تكله

::- ايطيح مانتحمل مسؤولية طفل من كتل اخوتها يموت .

- وادريس احتار يگل الاسمر اعزل واسمر يحلف كل دين مايعزل والام تبجي وتتوسل تكسر الگلب وهند تتعذر وتحلف ماتنعاد باوعلي عــــــيونة بحيره يسأل

::- هاا شوري عليه شسوي

::- التريده ما اعترض

- بعدنا ساكتين والام كامت وهي توصي بنيتكم.وبالكم عليها خلت وطلعت وهند فاتت الغرفة اسمر بدلت وطلعت بدشداشة وحجاب سكتت بلكي عقلت وادريس ولا عاجبه يهز بأيده

.يومين مرن هي عاقلة خانسه بغرفتها ومن تريد شي تطلع ومرات تجي تكلي

::- عــــمة مشتهيه مرگة حمص

::- هذا الحمص وسالگه لحم اطبخيها خلي ناكل من طبخ ايدج اليوم.

- سكتت وفاتت للمطبخ اراقبها من بعيد شفتها اذا وكعت منها الخاشوكة بالگاع ترجعها للجدر بدون ماتغسلها اخذته منهــــا اني اكمل هادئة وساكته بــــس من تجي سمر تبقى تبسمر بيها ومن تجي غـــــدير تگلب خلقتها عليها وتنتر

.ماصارلهم سبوع يمنا بيت بــــسام وتخربطت الحجية بــــسام بالواجب وخابرتني غـــــدير تبجي اخذناها اني وياها واسمر واجه بــــسام متخبل ما طولت للعصر توفت ...

يتبــــــع⋆𓍯

الكــــاتبة أيـــــــلول⋆𓄼𓂁

💚🌿