رواية أجرام مستباح لثلاث ندبات الفصل الخامس 5 - بقلم الكاتبــة ايلول

مساء الخير ...

#أجرام_مستباح_لثلاث_ندبات

aylol بقلم الكاتبه

ins: t8_fe3 للتواصل

𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒

الدهر يحبابي هم مثلي وصلكم
وصل وتلمني بس ريحة وصلكم
درتو وجوهكم وادري وصلكم
حجي وخلاكم تكطعًون بيا

(اياد عبد الله )

𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼

نــــهله ::لبست عباتي وطلعت من المطبخ. لگيتة واكف بالطارمة لبسة عادي مو عسكري لام شفتة الحلكة بأسف تقدم خطوتين وحجة.

:-السلام عليكم

-وعليكم السلام ....التفتنا ثنينا للباب من دخل عـــــلي وشاف ادريــــــس بقى واكف بالباب رجع ادريــــــس باوعلي

-البقية بحياتج الله يرحمها ويجعل مأواها الجنة..

- البقاء لوجهة الكريم نحمد الله على ما ابتلانا

هز راسة ودنك ابتعدت على جهة واشرتلهم بيدي للغرفة الثانية :- اتفضلوا

مشة ادريــــــس وعلي اجة يمي اخذت العلاكة من ايدة گـــــال
:-ماعرفت شنو اجيب من جبن بــــس كون يطلعن طيبات

-ابتسمتلة :-هاي هي عاشت ايدك

نزع حذائة وفات للغرفة خليت الغراض بالمطبخ
بيتنا بارد وبــــس صوبة وحدة عندي ..دخلت
للغرفة النايمين بيها الجهال كثرتلهم غطا واخذت الصوبة

كاعدين يسولفون من دخلت رفعوا راسهم ثنينهم كام عـــــلي بسرعة اخذها من ايدي

رجعت للمطبخ احضر الريوك شوية سمعتة گـــــال :- يا الله ......بقيت واكفة بمكاني البس عباتي لو زحمة ...:- احم تفضل

-دفع باب المطبخ على كيف يباوعلي. دخل ورد الباب ورا..دنكت عيني على الطباخ روحـــــي ترجف تمنيت مايشوف مطبخي كلشي بية قديم ومتكسر.بــــس واللـــه نظيف ... خايفة اخليلهم الريوك وتكش روحة خايفة ينكسر بخاطري

-اعذريني لان عفتج جان عندي شغل غير محافظة وماردت اضغط عليج كلت خلي ترتاح وتفهم بنياتها ما اتوقعت يصير هيج

- الحمد لله على كل حال ....:-

سكت واني هم سكتت وتقربت اخبز اخر خبزة دكيتها ومديتها على صاج مال خبز. مخليتة فوك الطباخ متوترة ومترددة ..درت احضر الصينية وشفتة تقرب للطباخ ..گلب الخبزة وطبطب عليها گـــــال

:-الله شكد صارلي ما ماكل شاتي

-التفتتلة قسم شوية واكلها ..واكفة على جهة ساكتة وهوا جر القوري من الطباخ ودار يصب بالاستكاين المحضرتهن ...

طكيت البيضات جاي احوسهن صاح
-عوفيها عين

-تقرب اخذ الخاشوكة من ايدي يشيل بيها دهن من اطراف الطاوة يخلي فوك البيضة.
جراها بالخاشوكة وخرها من النار ويدور منين يطفي الطباخ ....يتصرف عادي عبالك بيتة .......تقربت اني طفيتة وجبت صحن أريـــــد اشيل البيض گـــــال

-لا ليش بالطاوة اطيب

-خلاها بالصينية وباوعلي ابتسم
-هسه عـــــلي يلزمها علية خليت سيــــدي يسويلي ريوك

-يقربلك عـــــلي؟

دنك ورفع ايدة الشعرة مبتسم خلة ايدة على گلبة وحجة

- قرابة دم لا ...بــــس معزة اول ابن

-سكتت دار يشيل الصينية گـــــال: - الجاي برد

-هسه احمي روح ....اخذ الصينة وراح رجعت الچاي للقوري حميتة منسطرة ..اذا سئلني على الفلوس شگول ...التفتت على صوت عـــــلي

-خالة أريـــــد صابونة نصي اتراب اذا اكل اتسمم

-كدامك بالحمام. باوعلي وضحك دار يباوع لباب الغرفة وحجة بهمس ..راح تشووفين فــــــاطمة اليوم بوسيها الي .....

حجاها ومشة للحمام لابس برجلة شحاطتي نص رجلة طالعة منها .... صافنة بكلامة مافاهمه

-اخذت الچاي وصينية الاستكاين وفتت للغرفة
نزل ايدة خجلان ..جان واكف والتلفون بأيدة صور صورة الامام عـــــلي عليه السلام ..ابتسم وكعد مثل الفشلان گـــــال

-ابالي الصورة ما ادري ليش كل يـــــوم تجي كدام عيني

-التفتت للصورة وكعدت على جهة

واني اصب جاي حجيت
-بيتكم مابي صوره؟

_ لا شلون مابيه ابو الحسنين معقولة اكو بيت يخلة من صورتة

بــــس ما ادري ليش من دون الصور احس المعلگة ابيتج حيل حنينة

-رفعت عيني بعينة وبسرعة دنكت دخل عـــــلي يضحك
-خالة وحدة من بنياتج مدت راسها من الغرفة وشافتني نخرعت كوميلها خطية

-كمت بسرعة اسمع غـــــدير تصيح
:-عــــمة

فاتحة الباب مطلعة بــــس عينها ترجف من الخوف دخلت يمها

-اسم الله شبيج
-عبالي مدري وين رحتي ....شيسوون هنا؟

-باوعتلها ساكتة وهي الخوف تارس وجها ..خايفة اعوفها خايفة ارجعها البيت جدها

دنكت تلم فراشها ساكتة
:-غدير. باوعيلي

-دارت علية سادة عينها وشفايفها يرجفن

:- وحگ من خلة لوعة مصيفي بگلبي
حد كطع النفس دربج يتماشة وي دربي

-فكت عينها وبجت اجت الحضني

:- فدوة لا تعوفيني واللـــه اموت
واللـــه امووت عــــمة فدوة لا تعوفيني

-وخرتها من حضني امسح بعيونها
:- شلون اعوفج شبيج يمة

-ترجف وتحجي ....
:- واذا هوا كالج وديها البيت جدها لو الامها اذا ماقبل اجي وياج

-ما اروح اني وياه نبقى ابيتنا ....كـــــافي. يـــــمة لاتحجين هيج ....عندج امتحان اليوم؟

-لا باجر .....:-زين عــــمة هسه اني شكول سيــــدي لو عـــــمو لو شكول واسلم علية لو اغلس ما ارد اخليج بموقف كليلي شسوي. اسلم لو اغلس واذا اسلم شحجي

-كولي السلام عليكم عـــــمو ..تعالي سلمي هسه حتى ماتنحرجين

غـــــدير :: هزيت راسي اي ..:- بــــس اغسل واجي

لبست شالي وطلعت غسلت ماكدرت اطمن وما اخاف خوفي اخلي عمتي بموقف اكثر من خوفي هي تعوفني خاف تنجبر تختار بيني وبين العيشة عدهم وامل شفاء مصطفى

مسحت وجهي ورجعتلها واكفتلي بالباب لبست صاية فوك ملابسي ودخلت وياها
مدنكة ..:- السلام عليكم

سمعتهم ردوا ثنينهم رفعت راسي باوعتلهم ودنكت گـــــال الرجال

:- شلونج عـــــمو

-الحمد لله ......كعدت عــــمة ولزمتني من اصبعي الصغير كعدت يمها وهم ياكلون انطاها استكانة وصبتلة من جديد رجع باوعلي گـــــال

-يا مرحلة انتي

-اولى

-ياكلية

- تربية قسم انگليزي.....رفعت عيني للولد من حجة وهوا مدنك

عـــــلي :: Do you have problems in your studies ؟

-التفتت العمة.مدنكة ساكتة رجعت باوعتلة. مرتبكة خاف احجي حرف غلط. صح شاطرة واعرف هواي بــــس من احد يحاجيني ارتبك حجيت بتردد
:- I do not have any problem

-رفع عينة باوعلي ورجع دنك گـــــال
::- Good ....... I wish you success

باوعت الادريس وعمه ثنينهم ساكتين.

حجيت واني اباوع العمة ::- Thanks
ترخصت ورجعت يم هبة ومصطفى

نــــهله :: طلع عـــــلي للباب بــــس غسلوا صاح ادريــــــس ::- بلا امر عليج تعالي شوية

-شلت المواعين ورجعت يمة للغرفة ثاني المخدة جوا رجلة ورافع ادية يدفيهن مقربهن للصوبة حيل

كعدت على جهة حتى ادي لافتهن بالعباية
دفع الصوبة قريب علية وجر نفس

- خاف اسئلج شي وتنقهرين

-بقيت اباوع بوجهة ساكتة دنك گـــــال

-شوكت توفت الوالدة

-حجيت كلشي والفلوس شلون ضاعن بــــس ماجبت طاري جــــمرة ماكدرت اكول بنتي باگت فلوس ... اسولف ودموعي تصب من اتذكر امي وحجاياتها سوالفها سكت شوية گـــــال

-حجيتي البناتج ؟

-مسحت وجهي مرتبكة اتخيل هسه جــــمرة تعرف انا متزوجة اتخيلها موجودة وتدري بية جاي ياخذنا شنو راح تحجي وشسوي

:- جــــمرة ماتعرف

-ليش غير تسولفيلها وتقنعينها

-باوعت بوجهة بحيرة :- تزوجت قبل اسبوعين

فك عينة كلها مصدوم وعدل. كعدتة

-لحظة لحظة ماجاي افهم شنو تزوجت شنو امج توفت

-حجيتلة على الولد وشلون استعجل هز ايدة
بأسف وسولفتلة على الحجية الداريها جمرة گال سهلة يومية.اخلي واحد.يجيبلها اكل وعلاجها .....شوية.وضحك

-مو انا. گلت ام السان ماطلعت توقعتها تتلگاني للباب وتطردني

- ابـــــتسمت ورفعت ايدي امسح بوجهي تحسر يباوعلي

-من اليوم بعد ماكو شغل بالسوك
انسيلي ايام التعب

-درت عيوني للفراغ اختنكت ...خايفة من المجهول خايفة اضيع انا والايتام العندي گال

- بــــسام وعلي شوية ويجون تحضرين اغراضكم؟؟ بس اكو فد شغلة ماكتلج بيها
البيت هذا اشتريتة انا

-بلعت ريك ساكتة همست. :- ليش

-صرتي مرتي والج حگ علية كون من اموت ما اتعبين وتعيشين براحة وبتعبي انا. اشتريتة حتى يبقالج كلشي يصير بالمستقبل

يجوز ماتعجبج العيشة عدي بيتج موجود ترجعيلة ....حجاها وابتسم

-رفعت عيني بعينة.مرتبكة ...:- عمرك طويل

-هز راسة گال....:- اهلي مسوين عشا علمود جيتكم لمة اهل واحباب يعرفونج وتعرفينهم

-شي واحد اطلبة منج لاتسولفين الاحد ولادكولين زواجنا صار علمود اداري جهالة ويعالج ابني والفلوس لاتجيبيلهن طاري ابد
ماخايف من شي بــــس للمستقبل ما أريـــــد حقج يضيع

-كمت من يمة وطلع هوا للباب ريگت مصطفى والبنات و لمية ملابسنا وايدي ترجف شنو المنتظرني الجاي اسوي غلط لو صح ضعت لحظات گـــــلبي يشتعل نار من الحيرة وارجع ..

رجعت افتر بالبيت لايبة. روحـــــي ريحة امي وبتي هنا تعبي وعيشتي ضحكات مصطفى ولعباتة ....اودع كل هذا اليوم ..

صاح من الطارمة
- بــــس ملابسكم نــــهله كلشي موجود

اجمع اغراضنا وكلساع ابجي صعب كلشي صعب
طلعتهن اباب الغرفة.
وهوا واكف بالطارمة كل ما اطلع يجر حسرة ويتلفت بقهر
طلعت اخر شي علاگة علاج مصطفى
صاح

- نــــهله

-رفعت عيني اباوعلة عيوني مدمعات وشفايفي يرجفن. ..فرك وجهة بيدة وجر نفس

-بالله الكريم حركتي روحـــــي حرك عليمن هل بجي هسه هدي على كيفج

شوكت ماتردين اجيبج الهذا البيت بــــس لاتبجين يابة

-بعباتي امسح بعيوني واباوع الاغراضنا شال تلفونة اتصل على عـــــلي وبسام طلع للشارع

ركضت للغرفة هيج هيج روحـــــي فرفحة.للصورة مديت ايدي افلتها امي جانت حييل تحب الامام عـــــلي وجايبتها قبل لاتزوج ابوي وانا احس كل روحـــــي معلكة بهل صورة

مسحتها وبحجابي الاسود غطيتها وخليتها وي الاغراض.

وغدير وهبة يلمن بكتبهن سمعت صوت الولد بالطارمة يحجي عليهم لان اتاخروا وهم واحد يذبها براس الثاني

طلعت للطارمة باوعلي بــــسام سلم وعلي ضربة على راسة

عـــــلي ::انگل يلة

بــــسام :: وعلي ابو الحسن ادفرك دفرة ......:-سكتت من شفت سيــــدي خازرنا حقة بالعباس حقة فشلانة كدام مرتة ..وكفت عدل اخذتلة تحية وعلي يهتز كلة يضحك

دنكنة نشيل اغراضهم طلعنا نخليهن بالسيارة صحت علية

- واللـــه اذا ما احرك فلمك كدامها اشوف فطيم لو ما اشوفها باجر

-اول شي لادكول افطيم احترم نفسك

-جا لا تضحكني كدام ابو اسمر زحمة وعلي يكضنا و يسجنا ...تتذكر من سواها

-ههههههه خان العشرة ازوج مرة الثانية واحنا ضالين

-ضل ضل على فطيم ياخذك الموت وما تاخذها

نــــهله ::طلعنا وكفنا يمة بالطارمة .شايلة.مصطفى .وهوا بطولي ...باوعلة ادريس
استغفر ربة

وتمشة للباب يحجي على الولد

- جنهم شرايج هذا اليبيع ميانة.ويا حمايتة حظة يطيح

-حجة.ومشة للشارع صاح عليهم دخلوا بسرعة
ثنينهم صفنوا على مصطفى البيدي يمكن عبالهم
جسمة بيه فد نقص لو ماينمو ...دنكوا اخذوا باقي الاغراض واجة.دريس علية

-انطينياه

-مد ايدة سحب مصطفى مني وشالاة باسة براسة.وضحك يحاجية ..:- مصطفى

رجع باوعلي گـــــال
:- يله تفضلوا

-مشينة.وراه اجة عـــــلي اخذ المفتاح مني. صعدت ورا ومصطفى بحضني وبناتي يمي اغراضناا بسيارة عـــــلي

حرك السيارة ساكت طلع من منطقتنا..بــــسام و وعلي بالسيارة الورانا يدكون هورن كلساع ويتزاودون وياة.يوصلون ليمة.ويضحكون جر تلفونة.واتصل عليهم عاط عليهم

-والله اذا مابيتتكم بالسجن انا مو ادريــــــس

-مشوا ورانا هادئين..وهوا كلساع وصاح :- استغفر الله

توتر وخوف ايد غـــــدير المجلبة بية موترتني اكثر من كلشي محشوكة.بية وطاير كلبها

هواي مشة دخل بفرع عبر ثلث بيوت ودك هورن
لاف السيارة الباب البيت رجع دكلهم هورن اكثر من مرة يله فتحوا الباب ولد شاب طلع فتحة وهوا طلع راسة من الجامة صاح علية

-شنوا عـــــمو نايمين

-دخل السيارة ورفع الجام رفع عينة للمراية باوعلي

-اخواني جوا واحنا بيتنا فوك

-سكتت عيني بعينة نزل وطلعن بنات شابات ونسوان بگدي يلفن بحجاباتهن اوحدة منهن تقدمت علية فتحلي الباب اخذ مصطفى من ايدي ويحاجي غـــــدير وهبة

-انزلن عـــــمو شبيجن انزلن

-نزلت رجلي ترجف صاحت المرة بابستامة
:- يا كل الهلا

-دنكلها راسة بوستة وتحجي: - شلونك خوية
شلون صحتتك

-تقدمت علية باوستني اوحدة ثانية اجت تمشي.وايدها على حلكها تهلهل

-مبارك خوية يالحنين مبارررك

-بس اباوس وماعرف احد وهوا واكف ومصطفى بايدة هواي بنات وجهال. صاح عليهن

-خلنا نصعد عود تنزل وتتعرفن مو.وكتها خلي يرتاحون

-صاحت وحدة من اخواته :- اي وعلي حكك تعبانين تفضلوا تفضلوا

-مشينا وراه درج بالكراج. من عندة صعدنة للببت الفوك والبنية.ويانا تهلي وترحب وصاحبة ملگة. دك الباب وفتحتة.بنية صاحت

-هلا بابا تفضلوا
دخل.واني ورا باوستني وباوسة البنات

وكفت بالصالة.وهوا دخل الوحدة من الغرف
وبسرعة طلع بدون مصطفى باوعلي گـــــال

:- هنا خليتة تشوفينة خاف مانومتة عدل

-هزيت راسي اي فلتت ايدي من ايد غـــــدير ومشيت وراه

مخلية على جرباية وبالجهة الثانية جرابي ثنين

اجيت يم.مصطفى اغطي گال

-خو ماضجتي لان بيتنا فوك

-رفعت راسي اباوعلة ..:- لا عادي ...دكت الباب البنية وصاحت :- هــــا خوية

-تعالي خوية تفضلي

-دخلت اختة تباوعلي .. وجهة.بشوش وكلساع وكالت كل الهلا خية. وتفتح الشال وتلفة مثل الشخص المستعجل ..

ادريــــــس :: ام مصطفى ..هاي اختي الجبيرة ام تبارك

ام تبارك ::ههههه اليوم هي معذورة ماتحفظ لا اسم ولا شكل

ادريــــــس :: الله يسلمجن كل وحدة مسويتلها فريق شتحفظ ..شو مروة ماجاية؟

-راح اسمر يجيبها ..دخلني افهم المرة وعلي تنخبص ماتفهم ياهوا اخوك ياهوا ابن اخوك

نــــهله :: خلت ايدها على ايدي وكعدتنا على طرف الجرباية.وهوا.واكف مقابيلنا مبتسم.گالت

-شوفي خية احنا ست اخوان ثلث ولد وثلث بنات
اخوتي ثنين عايشين جوا ويا امي ابراهيم وعيسى هسه هم تشوفينهم ولدهم.وبناتهم بطولهم
واحنا البنات مزوجات
واللـــه يحبج لا بينة.وحدة.خبيثة.
ولا عدنا مرة.اخو حية وامي من اهل الله اطيها
زيارة وتسوي قرايات وثواب لاهل البيت فدوة الاسمهم

ادريــــــس :: هيه من تشوفهم يـــــوم يومين وتعرفهم لا تشبشينها عليها

نــــهله ::كامت ام تبارك. تضحك كالته: - لعد خلني اروح ارتاحوا وانزلوا

طلعت وسدت الباب وراها اشرلي للباب
باوعت المصطفى وكمت طلعت كدامة
قنفات بالصالة.كاعدة غـــــدير وهبة والبنية تسولف وياهن ..باوعتلي من طلعت وكفت مبتسمة تقرب ادريــــــس يمي گـــــال

::- سمر بنتي

-تقربت البنية علية فتحت ايدي رجعت باوستني ...

-نورتي بيتج

-حبيبتي يـــــوم منور بوجودج ...حجيتها ودنكت منحرجة خجلوني بطريقة ترحيبهم ..گـــــال ادريــــــس: :- راح انزل اجيب الاغراض

بس طلع كالت سمر
:-تفضلي اكعدي
-كعدت بصف غـــــدير. وهي جرت كلاص المي نطتنياه ومن اباوع بعيونها يلمعن بدموع كعدت يمنا ساكتة

:- احم اخوانج الصغار ماكو

- ابيت جدي اهل ماما العصر يجيبهم بابا

-ابتسمتلها وسكتت متشنجة وشايلة هم وجودي ابين عائلة غريبة ..بين ليلة ويوم صارت عائلتي.وانا مسؤلة عنها

ندك الباب الداخلي وصوت بنات ثنين يضحكن ويحجن :-لج سمر

:- كامت سمر فتحتلهن الباب تضحك فاتن ثنينهن.وحدة لابسة.بنطلون وقميص وشعرها ضفيرة

.والثانية. صفنت بوجها لابسة دشداشة وشال ..وجمالها يحير اكبر واحد تقربن وكفتلهن
باوسناهن كالت سمر

- هاي فــــــاطمة بت عـــــمو.عيسي وهاي تبارك بت عــــمة

-كل الهلا حبيباتي ..حجيتها وفكيت عيني وحجي عـــــلي يدك براسي فــــــاطمة اليحبها هوا ..

فدوة شكد حلوة. وجها دائري وابيض والعيون رصاصيات من دون كل الشفتهم هي هيج حلوة وتتبسم بخجل ستر وعفة وخجل. دخيل محمد الله يجعلها من نصيبك يا عـــــلي

ابتسمتلها. وهي ادنك بخجل ... جرن غـــــدير من ايدها كاللها :-تعالي ويانا بــــس بنات جوا
وغدير تباوعلي بحيرة :- روحـــــي يـــــمة

جلبت هبه وياها اخذنها ونزلن كعدت سمر يمي
-بيتج هذا خالة لا تتقيدين

-ابتسمتلها تسلمين يـــــمة.. دنكت ورجعت سئلتها ..شوكت زواجج

-بعد اسبوع ... باوعي خاله اخواني شوية وكحين ومايحبون احد لان عاشوا بتشتت ابينا وبين بيت جدي. يجوز يتعبونج بــــس انا متاكدة دام بابا اختارج وكال حنينة وتربيتها صح معناها
ينعدلون على ايدج

- عافتني وكامت تفتح الباب الابوها. دخل الاغراض وراه ولد شاب اخذهن منة واخر شي الصورة شايلها ويباوعلي مبتسم

كالت سمر راح انزل اشوف البنات وين ودن غـــــدير عود انا اقرب الها وكذا

عافتنا ونزلت ضحك هوا يباوعلها

-متوتره هــــا
-شوية

-حقج بــــس هسه تتعودين

-رفع الصورة يباوعلها ويبتسم رجع يباوعلي
:- وين نعلكها

-اتلفتت بالبيت وحجيت بابتسامة: -مو كلت عدنا صورة.وينها ؟..ضحك.بصوت وصاح

:- تعالي اشوفج

-مشة.واني.وراة فتح باب الاستقبال وشغل الضوا صورة الامام جبيرة معلگة والاستقبال صغير وبية قنفات وطاولتين كزاز. سد الباب وطلع صاح
:-تعالي

-دخل الغرفة ثانية غرفة نوم خشب دخل وفتح باب ثاني بداخلها واني بقيت واكفة بالباب
باوعلي واكفة اشرلي براسة وحجة...::-تعالي

-مشيت ورا بثكل لمحتة من بعيد مكتب دخل ودخلت ورخ صغير المكان واحسة يخنك. ..اشرلي للصورة

-ها شفتي قابل مجذب عليج انا

-لا حشاك ما قصدي هيج ..خلة الصورة على المكتب ..

-ننزل نسلم على الوالدة
-هزيت راسي اي ودرت طلعت كدامة.وهوا وراي قفل الباب ويسولف على امة واخوانة

طلعنا من غرفة النوم بعدني بالعباية هوا طلع وراي ونفتح الباب. دخل ولد شاب ..فك عينة بغضب سد الباب واجة.مدنك يريد يفوت للغرفة الورانا عبرني صاح علية بنتر

-اسمررر

-وكف رجع خطوتين.وكف كدامة. :- هــــا بابا

-سلم

نــــهله :: من يمي تشنجت اتلفت ابينهم ادريــــــس خازة.واسمر منزل عينة بعصبية رفع وجهة.بوجهي ..

:- اهلا وسهلا

-هلا بيك ....حجيتها واباوعلهم بخوف ابتسم اسمر الابوة.وكالة

:- سلمت وهسه ممكن افوت الغرفتي اذا انتة وزوجتك ما تمانعون

-ابتعد ادريــــــس على جهة كالة

-لا ما نمانع تفضل

نــــهله :: فات الغرفتة وادريس ما متهم گـــــال تعالي اراويج اخر مكان. تمشيت وره ممر بنهاية الصالة.وباب فتحة بابتسامة

كعدة بمكان مفتوح زرع قليل ومرجوحة

-اذا تضوجون من البيت دكعدون هنا تنزلون
بالكراج. يم الحجية جوا. بكيفج

-شوية.ونزلنا جوا سلمنا عليهم اخوانة اكبر منة
معگلين يرحبون ويسئلون على مصطفى شنو مرض وليدج ...كعدت يم الحجية.والبنات اخواتة يسولفن ويشاقن ماعبالك غريبة عنهن

نسوان اخوانة وحدة فطيرة.تجفص كلساع تحجي اي شي في سبيل تضحكهن والثانية رزنة وثكيلة

وانا عيوني تفتر ابين البنات الشابات ادور على فــــــاطمة شوية.واجت عيونها حمر كعدت يمنا
كام ادريــــــس.گالهم

-يله بوية.نترخص
الحجة ::وين يمة وكت غده

-العشا يمج حجية.بــــس هسه غدانا من ايد ام مصطفى الله لايعوزنا الكم

عيسى :: خوية ام مصطفى كفيلج الله يومية ينزل والصحن بيدة. ..هــــا ولك ..وصاح
:- سمر طبخها ماينبلع .......عازل وياكل ويانا

سمر ::- يااااا بابا صدك

ادريــــــس ::- لا مو صدك بــــس غير اضوك اكلهم

نــــهلة :: ضحكوا كلهم.وكمنا وكفنا يحجون علية ماقابلين وهوا يضحك ويكلهم ::- جا احنا فوكاكم وين رايحين عود صعدولنا الغدا

جاي نصعد ودخلوا ولد اثنين شباب سلموا وباوسوا عمهم اشر عليهم وكال

-كرار ابن عيسى..وعباس ابن ابراهيم
-اهلا وسهلا

صعدت سمر گدامنا وياها هبه وغدير
صعدت وره والولد صاحوا علية

-شنو عمي خلنا نتعرف على مرة عمنا
-بعدين عـــــمو بعدين

نــــهله ::- ضحك يباوعلي وهمه يضحكون ويحجون دخلت وسد الباب وراي قفلة من جوا باوعلي وكال

-تسويلنا غدا
-هزيت راسي اي ...بــــس اصلي

-اخذي راحتج ...جايب سمج انا اشوية وانتي بــــس حضري

-صاح على سمر وطلعوا ثنينهم للكراج يشوون
اجتي غـــــدير تباوعلي بحيرة

- هبه كيفت كلساع تطفر المكان وتلعب. بــــس صلينا حضرنا الاغراض حاولت اتصرف بدون تقيد مثل ما اتصرف ابيتي. ..وسمر ساعة تنزل للكراج يم ابوها ساعة تجي يمي حبابة وتشاقي اخذت غدير.وياها ونزلن

جابوا السمجات وتضحك بصوت عالي صاحت
:- تعاي خاله مو محروكاات ههههههههههه

-طلعت من المطبخ اباوعلهم ميتة من الضحك على ابوها وهوا يكلب بيهن ويصيح ..:- لا واللـــه مستويات ....

وجهة احمر من الجمر وادية متربات ..باوع الغدير كالها: - احجي الصدك محتركات لو مستويات

سمر ::- لا اتجاملين احجي الصدك

-لا ما محتركات مستويات بــــس شوية محتركات

نــــهله ::- ضحكت على غـــــدير وهم ميتين ضحك عليها صاح عليهن :- ماعاجبجن لاتاكلن
اجة للمطبخ يضحك ويحجي عليهن عافاهن وغسل.

-صبوا انا اصلي واجي

-حضرنا الصينية وسمر كلساع وضحكت بــــس بصريخ كلساع وكالت. :- ابوي تزوج حتى يخلص من اكلي ..
ضحكت التفتتلي

:- واللـــه خالة انا لا احب اطبخ لا انضف نطيني شغل ودراسة وحب

غـــــدير::- تشتغلين انتي
-اي سكرتيرة بمكتب وادرس معهد راح اتخرج

نــــهله :: نقلنا الاكل للصالة صاح على اسمر
اجة.كعد ساكت الفهمتة ماعاجبة شي بــــس مايكسر كلمة ابوة ...لا اني.ولا غـــــدير كدرنا ناكل ..

الورا الغدا صعدن البنات يمنا وهوا طلع احاول اختلط وما اتقيد ابينهم اسولف وياهم واستفسر هذا منو وذاك منو .....

بالعشا تأخر ..وكلساع يخابرونة وين صرت يلة تعال. ...لثمانية.اجة.وجايب جهالة ويا البنية لينة واكدرلها بــــس الولد جان حجايتة واكفة حتى من كالولة سلم عليها ماقبل

البنات اخواتة.ورا العشا راحن هنه وبناتهن
شوية.وترخص صعدنا فوك صاح على غـــــدير

:-ترحين ويا فــــــاطمة بنفس الجامعة انتن
يوصلجن بسام

بالصالة كاعدين. وهبه كعدت عاقلة من شافت
غيث وغفران لا حبتهم ولا حبوها. يلعبون ويتعاركون ابيناتهم..

كام ادريــــــس دخل الغرفتة بــــس شافت ابوها فات اخذت الالعاب منهم ودخلتهم الغرفتهم تهددهم بأسمر

-بقينا وحدنا بالصالة كمنا دخلنا بالغرفة البيها مصطفى تمددت هبة على الجرباية وانا كعدت مصطفى اعصر بجسمة. واحركة

شوية ورجعت سمر
:- ارتاحن ذبن حجاباتجن اسمر مايدخل الهاي الغرفة وبابا دخل مكتبة بعد مايطلع

نــــهله ::اجت تقربت يم مصطفى وجها كاش بخوف لزمت ايدة تمسح عليها
-اووي ياعمري ...يسمعنا اذا انحاجية؟ يفهمنا

-بقيت مدنكة واهز براسي لا ..رفعت عيني الها يسمع بــــس مايفهم

-اجيبلج شي ترديلة شي توكلينة بعد

-لا حبيبتي ارتاحي

-جا كومي روحـــــي الغرفتج اخذي راحتج احنا يمه انا والبنات هنا انام

-بلعت ريك ساكتة.....وهي منتظرتني اكوم همست :- وينها غرفتي

-هههه صوج بابا تعالي انا اديلج

-كمت من يم مصطفى غطيتة منحرحة.واكفتلي بالباب ...وكلبي يدك حيل دكت باب غرفة ابوها وفتحتة بقيت واكفة بالباب وهوا طلع من غرفة المكتب صاحت

-شنو بابا تلحك على شغل عايف زوجتك حتى غرفتها ماتندلها

-خله ايدة على راسة يعتذر منها بضحك
:- اعتذر منج انا

نــــهله: :- ضحكت سمر كالت: - تصبحون على خير وطلعت سدت الباب ..بقيت واكفة بصف الباب منحرجة جر نفس يباوعلي

- نــــهله

-رفعت عيني العينة دنك وحجة

- انا انام بالمكتب اخذي راحتج. بــــس جيبيلي فراش واذا تردين تسئلين شي تعالي يمي

-دار وجهة ورجع للمكتب افتريت بالغرفة
ميز صغير وعلية فراشات مسفطة.اخذت بطانية.ومندر ودكيت الباب ...بــــس گـــــال
-:تعالي بوية لادكين الباب

-فتت فرشتلة وهوا يشتغل بالحاسبة واوراق كدامة ملابسة العسكرية معلكات يمة والصورة معلكها. بالجهة الثانية ابـــــتسمت من شفتها
باوعلي وكال

:- ملابسي وصخات وسمر غلست اليوم

- هسه اغسلهن ..مشيت فلتتهن من التعلاكة وطلعت من الغرفة جريت نفس ..اللهي ساعدني انا اسعى عيني

احاول اتوالم وياهم وامشي بالحياة رحمتك ولطفك اللهي

طلعت للحمام البيت هــــــدوء صار. غسلتهن واحاول انشفهن ماتشتغل احتاريت بيها
طلعت أريـــــد اصيح السمر واسمع دكات خفيفة على الباب. تقربت

-سمر يمعودا

-سمعتة صوت فــــــاطمة فتحتلها الباب ..فشلت من شافتني. بقت واكفة محتارة ابتسمتلها ..اتفضلي

-اسفة عــــمة ازعجتكم بــــس ردت اجي يم البنات

-تفضلي حبيبتي ماكو ازعاج.....دخلت وسديت الباب ..جريتها من ايدها وبستها بخدها
بقت فاكة عينها مصدومة ....::-هاي امانة

-من منو
- واحد.....تعالي شغليلي النشافة اريد انشف هدوم عمج ....تمشت كدامي للحمام. شكد لايگين البعض ليش. الهسة ما مزوجين ..شغلتها اوكفت على جهة ابتسمتلها

-من عـــــلي الامانة .......فكت عينها على وسعهن وخدودها اكتسن بحمار دنكت حيل خجلانة ......

:- الله يجعلكم من نصيب بعض لاتخافين ما احجي......
تحسرت وباوعتلي عيونها مدمعة

-اصلا كلها تدري
-ليش الهسه ما مزوجين؟ ..... دنكت عيونها وبجت تحجي بخنكة

-ابوي مايقبل وعباس ابن عـــــمو ابراهيم ناهي عليه وانا ما اريدة انا روحـــــي وكلبي انخلقن بــــس العلي اموت وما ازوج غيره

-مسحت دموعها ...:- لاتبجين الله يهديهم ويوافقون وهوا هم مبين كلش يحبج كل مايشوفني يكلي ادعيلي اخذ فــــــاطمة

-ههههه فدوة اروح الطولة

-ضحكت وراحت يم البنات اخذت الملابس كويتهن ورجعت للغرفة شغلت تلفوني ودزيت رسالة الزوج جــــمرة. نرسلت مني وما وصلتة
تمددت على طرف الجرباية متشنجة كلي ...
وماحسيت بنفسي من نمت

.............

جــــمرة. :: ضياع وبهتان وبرودة حياتي الموت ارحم منها واسهل شي بهل بيت الانتحار بــــس هيهات اموت قبل ما اخذ حقي منة اذا ما اكسرك كسرة ينحجي بيها اني مو جــــمرة الخلصت عمرها بالشارع

جان اصعب شي عندي من يتاخر ومايجي ابقى الوب بــــس أريـــــد الحباية أگلب البيت كلة ادور وما الكة شي. املخ شعري واصرخ جسمي ياكل بروحي.

بــــس سمعت صوت الباب ينفتح كمت طلعت من الغرفة دخل يبااوعلي رحتلة وامسح بوجهي مديت ايدي اله ..اباوع بعينة ::- الحباية

-جر نفس ودار عيونة عض على شفتة يباوعلي
:-ختولي اليوم

-اررررريدهاااا ....صيحت حيل عاف الاغراض البيدة على الكاع ومد ايدة بجيبة نطانياها بلعتها راسا وكعدت على جهة قفل الباب. وراح للمطبخ

كمت وراه التفتلي مسحت حلكي بكفة ايدي وحجيت ::- جوعــــانة

-شال راسة باوعلي ودنك ... ::- اكعدي هسه اجيبلج.

-رجعت لصالة كعدت ايدية يرجفن حيل ومن امشي الشال شادتة على ايدي بقوة ويسحل وراي ولبسي اي شي يجي كدامي البس وانزع وهوا يغسلهن ويشرهن بالغرفة. شعري بــــس اول فترة امشطة ومن ادمنت كمت بــــس انشفة من المي ومرات امشطة ومن اتعب اعوفة ما اسيطر على ايدي

جاب صينية واجة خلاها بالكاع وبقة واكف
:-كومي غسلي ايدج

-ما هتميت مديت ايدي على الخبزة جراها مني وكومنيي للحمام طبك ادية بجفة وفركهن حيل

رجعت كعدت من أريـــــد اكل شي الكمة اطيح من ايدي جر الخبزة من ايدي

-عوفي انا اوكلج

-بسرعة جوعاانة .....هز راسة موافق اكلت وشبعت اخذ الصينية وراح عيوني بقن يغوشن بنفس المكان تمددت. ..أريـــــد انام

-من المطبخ صاح
-سنايبر كومي غسلي حلكج

-غمضت عيني مغلسة غفيت وحسيتة يمي يمسح حلكي باطراف اصابعة. ويطبك اصبع على اصبع يعصر شفتي ..فتحت عيني دفعت ايدة

-غير لو تتنازل

-وخررر

-اششش

-سحب ايدي كعدني واخذني للغرفة. مد الفراش
بس خليت راسي غمضت عيني جسمي ذبلان
احس دماغي شابع نوم بــــس جسمي محتاج ينام اشياء غريبة جنت احس بيها

غفيت وعصرت عيوني حسيت وجهة بركبتي
من يم اذني يبوسني على كيف ويحجي بخفوت
يرجف

-شسويتي بية

-واني مغمضة اهمس صوتي كوا يطلع ..:- شسويت

-شم شعريي حيل ::- موتيني سنايبر

-اخذتني النومة ومكدرت اقاوم اكثر ..كعدت الصبح لكيتة يمي نايم على بطنة بدون تشيرت
راسا باوعت الملابسي لابستهم وهوا اول مرة اكعد والكاه بالبيت

كمت على اطراف اصابعي ..جريت قميصة من يم راسة سحبت المفتاح على كيف ماجانت نيتي اشرد ردت الحبوب ..وكع المفتاح من ايدي وفز. يباوعلي عيونة حمر

جراهن من ايدي وسحبني علية. دفعتة حيل وخرر

-تردين تشردين
-اي

-وين ترحين تنوكلين بــــس اطلعين من هذا الباب

-وخرررر دفعتة من صدرة. ابتعد. يفرك بوجهة

بقيت بوكعتي وهوا كاعد على حيلة. ومخلي راسة ابين ادي ..باوعت الظهرة والاثار

-رفعت ايدي خليتة عليهن نز جسمة ورفع راسة بصدمة ..همست ::- تستحق اكثر من هذا

-دفع ايدي ودار يباوع بعيني

بلع ريك ساكت تحسر ودنك رفع ايدة
باوع بيها فوك من جفة مشة اصبعة عليهن كعدت عدل اباوعله

اثر على شكل دوائر ثلاثة

مسح عليهن ورفع جفة خلة اصابيعة اربعة على شفتة وخشمة باساهن وشمهن حيل وخلاهن على كلبة مغمض عينة وشفايفة يتحركن

بس فتح عيونة سئلتة
:- شنو حجيت

-كام وكف كمت وراه ....:-شسويت

دخل للحمام وكفتلة بالباب. :- احاجيك

-شتردين

-شسويت

-بست ايدي

-لا حجيت وياها شحجيت ....سكت طلع للمطبخ رحت وره ....:- احجي ......طك بيضة وطلع خبز من الثلاجة

-وكفت يمة وجريت ايدة الباسها سكت ورفع وجهة ليفوك ..مشيت اصبعي عليهن

...:-شنو هاي

-سئلتة ورفعت راسي اباوعلة. بلع ريك وجر ايدة يريد يسحبها ماعفتها. :- كلي شنو هاي

-نزل عينة العيني عيونة انملن دموع. اوجهة تغير رجف وبلعومة احتقن جر ايدة مني اخذ الصينية وطلع صاح

:- تعالي تريكي أريـــــد اروح

-كعدت يـــــمة ما اتريك هوا بــــس وكلني وگام
جلبت بية ...:- أريـــــد حباية

-دفع ايدي
-من ارجع

-بس هسه انا محتاجتها

-لا ماتحتاجين بــــس وحدة بليل تبلعينها ...
تغدي ونامي خوش

-بقيت كاعدة بمكاني وهوا طلع. ...كمت سبحت وكعدت روحـــــي تلوب ما مرتاحة اريدها

رجعت نمت وفزيت للحمام هستوني طلعت من الحمام اسمع صوت يم الباب تقربت. علية جاي ينضرب بشي حديد بحديد
تقربت اكثر اسمع صوت همس

-خرب مو هيج اذا هسه هوه بالبيت يصيدنا

-فكيت عيني على وسعهن بصدمة.وخوف ركضت للغرفة ورجعت للمطبخ اركض وارجف سجينة جريتها ورجعت ..دخلت للغرفة سديت الباب اوكفت ورا ارجف ..ولاول مرة حسيت احتاجة لاول مرة تمنيت يجي ويحميني

الثانية من تعبر اختنك واحس راح يوصلولي
جريت المندر شمرتة فوك الكنتور وصعدت. رفعتة وصرت جوا والسجينة.بيدي ترجف. ندفع الباب الحديد بقوة وصوت دخلتهم للبيت هز گلبي يدفرن بالبيبان ادفر

عصرت عيوني حيل وجلبت بالسجينة كل قوتي من دفروا باب الغرفة ......

يتبــــــع⋆𓍯

الكــــاتبة أيـــــــلول⋆𓄼𓂁

💚🌿.