رواية أجرام مستباح لثلاث ندبات الفصل الثاني عشر 12 - بقلم الكاتبــة ايلول

مساء الخير ...

#أجرام_مستباح_لثلاث_ندبات

aylol. بقلم الكاتبه

ins: t8_fe3 للتواصل

𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒

صرت هيّلة بوَسُط هَاون
العُطَر للغيَر وَالدَگات بيَة .

𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼

نــــهله. :: عدت البصمة اكثر من مرة مادري شبية ردت اكتب ولان مو كلش اعرف للتيلفون ابقى ساعة يلا اكتب  كلمة ادور بالاحرف راحت اشارة المتصل. واني بعدني هستوني كاتبه
:-الحمد لله

رجع متصل
دز بصمة شغلتها
:-لا تكتبين دزي تسجيل

كتبت: -الحمدلله على سلامتكم

كتب ::-الله يسلمج

-فتحتها وسكتت اتصل وفززني بسرعة جاوبتة
-الو

- الو شلونج
-الحمد لله انت شلونك

-الحمدلله .....
حجيتها وسكتنا ثنينا ماعدنا سالفة شويه وگال

-تعشيتوا
-اي
-الف عافيه

-الله يعافيك ....
هم سكت واني ما اعرف شحجي وياه اخذلة شوية گال

-شتعشيتوا؟
جاوبت. متشنجة ماعرف احجي وياه

-سويتلهم شوربة وحميسة لحم وهسه اشتهوا حلويات ..غـــــدير جاي تسويلهم لقيمات

-ها عافيات ...
-سكت ماعنده شي يحجي لو يدندن وي نفسه

واگولة::- شنو ماسمعتك
يكلي::-لا هيج مو وياج.
سكت شوية  تحمحم گال باستعجال

:-اكلج نــــهله
-  هــــا عيني كول

- الطوشة شوبرة

- شنوو
- الشوربة طيبه؟

- ههههههههه ههههههههه

- الشوربة يابه الشوربة

-شوبرة؟؟؟ ادريــــــس ويا منو وكعت تسحك يمي تورطت ههههه

ضحك هو هم وحجة بهدوء

- لو ادري بسحكتي تضحكج وتخليج دكولين ادريــــــس  كل ساع اسحك

:- سكتت منحرجة. منه گال

- ما اوصيج بعد البيبان اقفليهن على ايدج
وب12 كون غفران.وغيث نايمين وتأكدي من اسمر ب12 لازم بالبيت وها تذكرت باجر جدتهم تريدهم بيت خالتهم جايين تريد تشوفهم مادري شنو اسمر يوصلهم

- صار
- اخذي راحتج

-سديت التلفون وكمت غـــــدير خبصت المطبخ وهمه وياها هستوهم تعدلوا باجر راح يرحون يعني يضيع كل تعبي  خلي يجي ادريــــــس واسولفلة اقلها يقلل روحاتهم كل ما يروحون يرجعون متغير اسلوبهم يوم يومين يلا يرجعون مثل قبل

اكلوا وغسلوا مرة اني احضر ملابسهم مرة اكلهم
:-انتم حظروا ملابسكم
اريدهم يتعلمون يعتمدون على نفسهم

ابسط شي اذا رادوا شغلة من المطبخ مايكومون
يجيبونها لا راسا يصيحون عليه اول بداية جنت انطيهم وراها كمت اكلهم
كوموا انتم بــــس باسلوب حلو وابتسامة حتى مايضوجون وياها كلمة عفية السباعية وعفية البطل يمشون مثل ما أريـــــد

ل12 جاي اقفل البيبان وصعدت فــــــاطمة يمنا كيفت عليها... صارت ب12:30 واسمر ماكو
اتصل عليه مايرد
للوحدة واني مكابلة الباب وكاعدة الوب يومية يخاف من ابوة يجي من وكت
ب1:30 اتصل عليه كال اجيتت بــــس بصياح

ومن اجة ينتر نتر.
::- شنو تتصلين عليه هالگد شكد تلحين

:- بـ 1:30 وين جنت ليش تتأخر

- تردين تحاسبيني ان شاءالله

- لاا على شنو احاسبك بــــس ابوك گال ب12 يرجع للبيت وتقفلين البيبان عود من يجي عسى ماتبقى ل3 مالي علاقة. بــــس بهل وقت. الابوك ما موجود. بيه ب12 اقفل الباب

- دطيرري اشايفة روحــــــج انتي امي شنو ؟
تردين تسيطرين عليه ادوسج واعبر فهمتي عبالج مثل غفران وغيث بكلمتين تضحكين عليه

-  احس اعصابي ترجف من اسلوبة عفته يحجي ودرت اقفل الباب شلت المفتاح
وفتت للغرفة سب وغلط وفشر كلهن اسمعهن وساكتة.

والصبح كعد مثل العاقل اتريك وراح الدوامة
والعصر اخذ اخوانة البيت جدة رجعهم ب9 بليل

كتلهم :-يله اسبحوا حتى تنامون
غيث ماقبل يخلي اصبعة براسة ويسووي
::- ابكييفي اسبح ما اسبح بكيفي

-غفران كالت اني اسبح ...
راحت تركض للحمام وفتت اجيبلها ملابس رجعت للحمام دكيت عليها الباب وفتحتة جانت كاعدة على جهة بدون ملابس وتحك ابجسمها

علكت ملابسها وكتلها
::- يله  حبيبتي ابسرعة اسبحي راح تبردين
:- هسه
:- جاي اطلع ورجعت التفتت عليها.
::- اشبيج ليش تحكين ....
دنكت ساكتة ..كومتها من ايدها وكفتها

:- وخري ايدج باله خلي اشوف
بعدت ايدها بخجل ...جسمها احمر
باوعت بعينها دمعت...
:- هسه اخليلج عصارة.وتصيرين زينة لا تبجين

-هزت راسها موافقة كعدتها اني اسبحها جاي افرك بشعرها ودك گـــــلبي حيل وخف ماادري شلون خطرت ابالي هالافكار ..غسلت شعرها ومسحت وجها
وحجيت بهدوء

:- غفورة حبيبتي اكو احد لازمج منا أشرتلها على جسمها......
هزت راسها لا مدنكة وعيونها متروسات ادموع خايفة تحجيلي
:- باوعيلي احجي علمود انطيج علاج وماتتمرضين لان هاي المنطقة مايصير واحد يلزمها غيرج تتمرضين ....شهكت حيل وبجت گطعت گلبي

تخبلت لفيتها بالمنشفة وبس أريـــــد افهم منها
:-  احجيلي منو لازمج
:-خاله وداد

-فكيت عيني بصدمة اعرفها وداد حاجيلي ادريــــــس عليها بكد اسمر وما متزوجة ....

وغفران مفرفحة تبجي
سألتهه
:-شتسويلج؟
وكف عقلي من سولفتلي عبالك مرة ورجال تجبرها على شغلات تخزي

بدلتلها ونومتها واتصلت على سمر بــــس سلمت عليها  واحس روحي أريـــــد انفجر  كلتلها
:-وديلي رقم خالتج وداد

:-ليش خاله صاير شي
:-لا حبيبتي
:- جا شسوين بيه هاي السانها زفر. ختولي

:-محتاجتة سمر دزي
... سديت الخط منها شوية ودزته خليت غدير تسجلة  الي واتصلت عليها  احجي وياهه مفرفحة وهي ولا مهتمة دكلي
::-جذابة غفران هسه اكول الاهلي تتهجمين عليه سدته بوجهي

تحلفت بــــس يجي ادريــــــس احجيله كلشي
باليوم الثاني بقيت كلش قريبة منهم الحد ما بگت السان غيث وهم طلعت تجبرة على شغلات تلعب النفس وتخزي ...خوفتهم اليسوي بيكم هيج يريدكم تتمرضون وهذا حرام مايصير
واول سؤال يسئلونة الي

:- يعني راح نموت؟
واجاوبهم:- لا اسم الله عليكم بــــس اذا نعادت اي........... لا تخلون اي شخص يلزمكم.واني بعد ماخليكم ترحون البيت جدوا

مرن ثلث ايام. ادريــــــس يـــــوم يتصل ويوم لا باليوم الرابع جان جمعة

وعازمة سمر وزوجها على الغده هوه راح وهي بقت يمنا العصرية طلعنا بالكعدة مسوين چاي وكعك ومصطفى بالعربانة يمنا. من يسمع ضحكهم هوه هم يبتسم حتى لو مافاهم شي والجهال يلعبون بالمرجوحة نسولف والبنات يضحكن والجو حلو

الحد ما اجة اسمر من بعيد گـــــال
::-حضري الجهال أريـــــد اوصلهم البيت جدي

-ثنينهم باوعولي صحت وراه
:- مايرحون ....اجوا ثنينهم كعدو يمي خايفين

رجع فتح الباب يباوعلنا ماعاجبة ضحك وهو يتحداني گال
:- وهوه شنو بكيفج؟
رديت
:- لا مايردون يرحون
ولا اهتم لكلامي صاح بيهم

- كوووم غيث كومي غفران انزلوا للسيارة

نــــهله ::رفعت عيني اباوعلهم ثنينهم اعيونهم تتوسل ما اخليهم يروحون وكفوا كمت وياهم وگتله ...
::-والله مايرحون

حلفت لو تخبل صياح  بعلو صوته وغلط واعمامة.من جوا يصيحون عليه الجهال يبجون وسمر تتعارك وياه  دخلتهم للغرفة قفلتها وشلت المفتاح المصيبة ماكدر احجي وافضحها. واني اتذكر

مقولة الامام عـــــلي عليه السلام

{{لو وجدتُ مؤمناً على فاحشةٍ لسترتُه بثوبي}}

ومذيع الفاحشة كـ فاعلها
اذا فضحتها كل ذنب مايبقى عليها واني اخذ ذنبها واتحاسب عليه

-شوية وصعد عيسى راسا سكت اسمر سلم وباوعلي كال
:-ام مصطفى خليهم ليش ماتقبلين يرحون

:- خويه هم ما يريدون يروحون الجهال اهناك يضربونهم بــــس يخافون يكولون لا مانروح

صاح اسمر :: دنجبييي

نــــهله ::سحبة عيسى من كتفة وضربة راشدي وهوا يحلف ياخذهم لو تنگلب الدنيا ياخذهم
صعدوا كلهم يحجون
:-عوفيهم يرحون ما الج حق تمنعينهم

واسمر اتصل على ابوه بصياح يگله
:- ماتخليني اخذهم
سد التلفون يباوعلي بشماتة گال

:- امشي يلا ردي على تليفونج اشوف شلون ما تخلينهم
اول مره انحط بهالموقف واني منحرجة حيل من عيسى وام فــــــاطمة ومرة ابراهيم
و صياح اسمر وي عــــمة
اجت غدير تركض وبيدها تلفوني ادريس يتصل واني لازمة يدة الباب جاوبته

-الو
- هــــا عيني نــــهله خليهم يرحون

يحجي مستعجل ويصيح على الولد اليمه بلعت ريك كتله
:- لاا ما اخليهم
سكت شوية وحجة بهدوء

-ليش؟
-من تجي اكلك ليش ماكدر احجي هسه
-صاير شي؟
-من ترجع بسلامة تعرف
- خوش هاي هيه يله

- سديت التليفون اباوعلهم دك تليفون اسمر ابتسم وجاوبة تشنطن اعيونة كام يفور من العصبية سد التلفون غلط وسب ونزل يركع بالبيبان

بقيت ساكتة وعيسى يتعذر بسبب اسمر
شوية ونزلوا. وسمر اجة عليها زوجها وراحت
كتمت بگلبي ماكدر احجي الاحد بــــس الابوهم
احجي حتى يقتنع مايخليهم يرحون بعد

غـــــدير. ::-  وگعت روحي بمتاهه وعلگت گـــــلبي بمصيبة ويا كبر هم گـــــلبي حتى الفاطمة ماحجيت رغم هي من تبات يمنا كل اسوالفها على عـــــلي لو تراسله من جهازي وماتحذف المحادثة تأرشفها تريدها ذكرى
واني اگولهه

- هسه تورطيني اذا عــــمة شافت المحادثة شسوي

-ارشفتها ولج ماتلكاها ....تحمليني من نتزوج اجيبلج تليفون من الغاليات

-ههههه عيش يحمار لمن يجيك الربيع

حييل صرنا قريبات البعض ورغم هذا ماكدرت احجيلها على بــــسام كل تفكيري بعمه ماريد احد يحجي عليها بسببي ادوس على گـــــلبي ويجوز مو حب يجوز بــــس اعجاب فترة وينتهي ......جنت اقنع نفـــــسي. بهذا الكلام الحد يوم رجعتهم...

نــــهله. ::- غيث وغفران صاروا شحلاتهم وبلسانهم اعترفوا بيبي وخالة يكولن اغلطوا وصيروا وكحين...

كدرت اكسبهم
وشوية شوية اعلمهم يعتمدون على نفسهم
حتى بالدراسة اخليهم يتهجون الاحرف واشجعهم يحلون وحدهم

ومن قررت اعلم هبه على الصلاة اخذهم الواهس وياها يردون يتعلمون صح يخربطون اهواي ويتلفتون ويحجون

مثلا اذا شافوا هبه رادت تسجد بــــس ما ركعت يكلولها لا ولج وانوب يكولون استغفر الله ويكملون صلاتهم يقدمون ويأخرون
وبس يسمعون الاذان يركضون يتوضون اوكف بصفهم اصلي وهم يقلدوني. رغم اخطائهم

بــــس
جنت مكيفة بيهم واحس براحة مأدية واجبي يتعلمون من هسه علمود من يصيرون مكلفين هم ضابطين الصلاة ..

العصريات انطيهم مصرف يشترون ويجون نطلع بالكعدة حلوة مرتبة وتفتح النفس اخلي مصطفى بالعربانة.واطلعه يمنا احسة يتونس لان يضحك.

وهم حتى معاملتهم تغيرت قبل يضوجون منة
هسه لا اذا عدهم حلويات يجون يركضون
-خالة تعالي وكلي هاي المصطفى يريد منها

وابد ما افشلهم بسرعة اروح اوكله واكلهم يگول شكرا مرات بصالة يشغلون اغاني اطفال ويركصون كدامة.ومن يضحك يكيفون ويجولي
-خالة مصطفى ضحكلي

اما اسمر اعتزل بغرفتة مرات يكعد ياكل ويانا ومرات يطلع. ما احتكيت بيه ولا حاولت احجي وياه ابد ....

بيوم جية ادريــــــس. اول مارجعوا من المدرسة سبحتهم وصلينا اني وياهم. مكيفين بأبوهم .اجت غـــــدير ب2 وادريس اتاخر لا يقبلون يتغدون ولا يدرسون منتظرينة

اتصلت عليه- گـــــال ربع ساعة يمكم
رحت الغرفتهم جاي اكلهم راح يوصل بابا
اوكفت اسمع حجيهم غفران
تگول لهبة

- انتي كولي البابا بابا واحنا انكول الخاله ماما

غيث ::- لا مايصير اذا هيه دكول البابا بابا احنه انكله عـــــمو وهي دكول الامها خاله احنه انكلها ماما

نــــهله. ::- دكيت الباب عليهم سكتوا وحجة غيث بضحك ::- اتفضل
صحتلهم

- يلا تعالوا راح يجي بابا ....
طلعوا ثلاثتهم يباوعون من الشباك فتت للمطبخ يم غـــــدير تسوي زلاطة. سمعتهم صيحوا واجوا يركضون
:-تعالي افتحي الباب اجة بابا

-وخرت البردة شفتة دخل السيارة للكراج أشر للولد روحوا راح يفوت الاهله فتحتلهم الباب ونزلوا

:- غدورة طفي الفرن .....حجيت وفتت اخذتلة ملابس علكتهم بالحمام طول يله صعد مجلبين بيه منا ومنا وثلاثتهم يحجون ويا ويضحكون.ويحجوله على درجاتهم
وعلى الصلاة غيث مايقبل يكله بــــس اني اصلي صح هنه يحجن بالصلاة

دخل يضحك. وكفت اني وغدير طلعت من المطبخ ع الصاله
گال
:- السلام عليكم
:-وعليكم السلام الله يساعدك
غدير:-الله يساعدك عـــــمو

- كعد على القنفة وهذول ثلاثتهم بحضنة.حتى هبه تغار صايرة شيسون تسوي مثلهم انطتة غدير كلاص مي....

گلتله:-تدخل تسبح ؟
رفع راسة باوعلي وگام من بينهم حرك.ركبتة يمنى ويسرى

گال:-اي
كام للحمام صبيت الغده دخل اسمر هستوه راجع من الكلية بدل وطلع كعد يم اخوانة يشاقيهم ..ومن طلع ابوه كام سلم عليه

كعدوا ياكلون عاقلين بــــس اسمر يسأله وادريس يجاوب ما كمل اكله شوية.وكام شكله تعبان استأذن ودخل الغرفتة

لميت السفرة وكمت اسوي چاي الجهال دخلوا الغرفتهم واسمر وكف صباله استكان وهوا على الطباخ شربة.وطلع.

اخذت چاي الادريس دخلت للغرفة لكيتة متمدد على الجرباية غافي وكفت يـــــمة محتارة هوا كايلي اذا اكلت وماشربت چاي راسي يبقى يوجعني ...
تقربت يمة همست بصوت ناصي
:- ابو اسمر ....ادريــــــس

فتح اعيونة فاز وراسا كعد لم رجليه ومد ايدة
ياخذ الچاي انطيتة اله گـــــال

-تعالي اكعدي
-تقدمت كعدت على حافة الجرباية وهو من النعاس اعيونة حمر.
گال:- احجيلي شصاير

- بعدين هسه نام من تكعد نسولف....
سكت يشرب ردت اكوم لزم ايدي ورفع اخر شي بقة بالاستكان شربة وعافة على الميز

:- لا احجيلي

- دنكت بحيرة ماعرف شلون احجيلة ومنين ابدي وهو يدنك راسة يريد يباوع بعيوني

:- هاي خالتهم الصغيرة وداد

-ااي؟
-اي تجبرهم وتعلمهم على شغلات مو حلوة

- نــــهله احجي بوضوح فهميني يابه هذا وهذا الصار حتى افهم واعرف شتصرف من يدزون عليهم

- لازمة ايد بايد ميتة ماكدر احجي بالكوه نطقت
::- تتقربلهم مثل زوج وزوجتة. تجبرهم على حركات تخزي وتلعب النفس اطفال بــــس معلمتهم على شغلات مالازم يعرفونها

-حجيت. ورفعت عيني اشوف صدمتة فاتح عيونه على وسعهن مصدوم. وما مستوعب راسا گـــــال

- خااالتهم ؟

-هزيت راسي
:-ااي واللـــه خالتهم .....
فرك وجهة يرجف مايريد يصدك هل شي

-شلون خاف فهمتي غلط خالتهم هاي مثل امهم وهم اطفااال ماتدني نفسها عليهم  اطفااال نــــهله

- لا واللـــه مافاهمة غلط ...من راحوا اخر مرة البيت جدهم ... اجيت اسبح غفران ولكيت جسمها متحسس
من سألتها خافت تحجي بعدين قنعتها وحجتلي كلشي وراها حاجيت غيث وطلعت هم متقربتلة

-  وينهم صيحيلهم

- لااا واللـــه تخوفهم يبقون مايحجولي اذا شخص تعرضلهم هسه مأمنين بيه جاي يحجولي كلشي .. اذا ما مصدكني ادخل للمكتب واني اجيبهم هنا احاجيهم وانت اسمع ....

خله راسة ابين ادية
:- مصدددكج مصددكج بــــس أريـــــد اعرف اليا مرحلة واصله اخااف مسوية شي بغفران

- لا مابيها شي تأكدت
-اخذتيها لدكتورة؟
-لا كل عمرها 7 شنو ذنبها تتعرض للفحص بهل عمر بــــس كدرت اتاكد بغير طريقة

-سحب السويج يريد يطلع لزمت ايدة
- وييين رايح
-عبالج اسكت اشو وحدة تزني اوحدة تمارس ويا جهااالي  ما اخلص من أ............
ما اخلص

-صيح بصوت عالي رفعت ايدي اسد بحلگه
:-اششش عفيه اسكتت الفضيحة حررام
جريتة كعدتة.
:-بسس اصبر افهمك

كعد يرجف وكل ساعو يعله صوتة گلتله
:- انت ليش حتى توديهم لجدادهم

- الخاطر عمي واللـــه وهو مريض من يدز عليهم استحي اكله لااا بــــس بعد مااسكت سكتت على القبله هااي ما اسكت عليهاا

- تفضحها ابين اهلها؟ ....زين تدري شنو عاقبة مذيع الفاحشة ...كـ فاعلها يعني كانما انت السويتها. تاخذ ذنبها وهي حتى ذنب مايبقى عليها
وراح تخلي نقطة سوده على غيث وغفران ماراح ينسون حتى لو هم نسوا العالم راح يذكرونهم

- باوعلي بحيرة اعيونة.حمر وايدة ترجف كام من يمي بدون مايحجي دخل للمكتب ...عفتة براحتة. درست الجهال ورجعت عصرت برتقالات اثنين بالعصارة اليدوية.

خليتها بكلاص ودكييت باب المكتب گال
- تعالي
- شفتة متمدد على القنفة تقدمت ..وهوا كعد سحب رجليه سوالي مكان يمة كعدت ومديتلة العصير اخذة من ايدي شربة وبقى لازم الكلاص بأيدة مدنك راسة

- لا تبقى تفكر بــــس بعد مايرحون واني شوية شوية اعلمهم شنو الصح وشنو الخطأ وهم اطفال ينسون شنو العاشوه بهل عمر........
بقى مدنك راسة مايحجي

- ادريــــــس ......حجيتها ودنكت ماعرف بيا طريقة اواسية ولا عندي الجرأة احجي شي كل الطلع مني خليت ايدي على ظهرة
:- كاافي لا تقهر نفسك

- جر نفس بحسرة وحجة مختنك
:- الاولى خانتني بفراشي خلتني افتر ابين المستشفيات علمود اتاكد هذول اطفالي

والثانية تزني بجهالي ...وياريتهن غريبات بنات عمي المستهترات

- سحبت ايدي من ظهره  ساكتة رفع عينه يباوعلي ما ردت  ابينله سمر حاجيتلي. .
.هز راسة اي

- وفرتلها كلشي رغم لا احبها ولا تحبني
بــــس جنت اكول ميخالف صاروا عدنا اطفال
وبينا عشرة عمر ...شتريد وشتطلب اكلها بلي
عود بلكت تتحسن

وتالي تجيب واحد بگد ابنها بغرفتي وعلى فراشي

-زواجكم من الاول خطأ لا هي رايدتك ولا انت رايدها وثنينكم بعمر صغير ما مناسب للزواج

- ماجنت اكدر اكول الابوي لا

شوفي هي من الله

المره التريد أتخون لو تضمها بقفص اتخونك
والشريفة لو تعيشها ابين اذيابة وبأنكس مجتمع هم تصونك

- دنكت ساكتة ولاول مرة يفتح گلبه ويحجي على طليقتة سولف اهواي عن معاملتها واسلوبها
جنت اسمع واني ساكتة

الحد ماغفى غطيتة وطلعت ....

اتصلت على الأبـــــهر ماجاوب بالي يم جــــمرة
ما مرتاحة ودائما من تحاجيني هو يمها
كم يـــــوم مرن ادريــــــس دوم ضايج وعنده شغل ..عفتة ابراحتة

دام الجهال زينين وكدرت عليهم مرتاحة
واسمر مرات يعقل مرات يخبث من ابوه ما موجود ..

غـــــدير. ::- نزلت ويا عـــــمو هو يطلع بسيارتة
واني وفاطمة نطلع ويا بــــسام وكفت يـــــمة بالكراج منتظرة فــــــاطمة تطلع گال

- شلونج بالدراسة
- زينة عـــــمو بالمرحلة الثانية ابقى حتى بالبيت احجي انكليزي حرف عربي ماتسمعون مني

- ههههههه احسن من الحمير العندي من تصير بيها انگليزي يطفرون

- ضحكت ودنكت طلعت فــــــاطمة تلبس بالعباية اوجها يضوي اني من اشوفها بدي هيج اكرص اخدودها اعضها خاصة من تضرب الشمس بوجها وعيونها يصير لونهن فاتح كلش گالها عـــــمو

- استفتحت بوجهج يعني يومي كله خير
- تقربت تضحك بوستة.

طلع محفظتة مدت ايدها. بمعنى أنطــــيني ودكلة
:- لا عمو لا رجع افلوسك

وهو ماكال باطل رجع المحفظة الجيبة جلبت بيدة خربانة ضحك
:- لاا لاا اشاقة طلعهن

- :لا عـــــمو اني ماكسر كلمتج كلتي رجعهن
-: زلت السان عـــــمو

-ضحكوا اثنينهم طلع عشرتين انطاها وحدة ودار مد ايدة والعشرة بيها بقيت اباوعلها منحرحة استحي اخذ منه واستحي ارفض. جرتها فــــــاطمة من ايدة كالتله

:- عـــــمو هاي تخجل اني انطيها الها

- ضحكنا وطلعنا البسام سلمنا وصعدنا
السيارة جانت مضللة بــــس الشمس حلوة مديت ايدي أريـــــد انزل الجامة ماتنزل رفعت عيني للمراية بسرعة من حجة

-عوفيها
- بــــس خليت عيني بعينة وكلبي يدك حيل نزلت عيني ابسرعة وهوا دخل بركن وكف لاا اني ولا فــــــاطمة فاهمين شي.  بقى واكف ثواني وانفتح بابي فكيت عيني بصدمة من لمحة عـــــلي گال

:- خوية اصعدي گدام

- درت الفاطمة ارجف وخايفة وهي حالها اخس من حالي بــــس تهمس :- شجاي يصير عـــــلي واللـــه يذبحوني شجاي تسوي ...

نزلت رجلي يطكطكن عـــــلي صعد بمكاني واني صعدت يم بــــسام ارجف كلي. ..
اسمع صوت فــــــاطمة تبجي وعلي يكلها

- بــــس باوعيلي تعــــبت ما كدر أريـــــد اشوفج من شنو خايفة. انتي

-الحد ماسكَتت وبقى يحجي وياها بصوت ناصي ..واني متشنجة.واباوع گبل
حتى عيني ماحركها.  لمن وكفنا بالازدحام

دنكت راسي لمحت ايدة يدك باصابيعة على الستيرن
باصبعة البنصر محبس خرزتة سودة والساعة فضية ... البدلة العسكرين ردنها حد وي معصم ايدة ساد الدگمة وضابة حيل عليه

حتى عـــــلي وفاطمة ما اسمعهم  مركزة أريـــــد اشوف شكلة بــــس بدون ماينتبهلي
أريـــــد احفظ تفاصيل مجنت اكدر امنع نفـــــسي. ..
دار وجهة يباوع للازدحام بسرعة رفعت راسي اباوعلة. واحفظ تفاصيلة. دنكت من التفتلي وكلبي يدك حيل

هستوه حرك السيارة. ودك تليفونة
جان مخلية بهاي البينا  لمحت الاسم مكتوب الحجي جاوب

:- هــــا يابة ... اي الممرضة تعرفة ....نص حباية تنطيها ...خير ان شاءالله الله وياك

- سد التليفون وحسيتة التفتلي بقيت مركزة ليگدام بعد ابد ما التفتت ناحيتة
وصلونا لباب الجامعة
نزلت اوكفت منتظرة فــــــاطمة. شوية ونزلت اعيونها حمر لزمتها من ايدها وفتنا

:- اشبيج اشكالج
:- اليوم راح يجي يتقدم جايب سادة ومعممين من النجف وجايب اشيوخ يارب تصير هل مرة ياارب مايرفضون

- ان شاءالله بــــس لا تبقين هيج ترجفين يحسون اهلج .....ماكدرت افوت ولا محاضرة
بقبت وياها بــــس تبجي وخايفة

ولا نكدر نرجع للبيت يحسون بينا الحد ماخلص الدوام ورجعنا دخلت وياها للبيت الجوه كلت الامها
:- خاله اريدها تتغده وياي وحدي ما اشتهي

-قبلت وصعدنا اني وفاطمة بــــس دخلت بيتنا راحت العمة تتوسل بيها تدعيلها وعمه حتى صلاة صلت وخافت على خوفنا.

للعصر اجو نباوعلهم من الشباك. ناس لابسة عمامات سود وناس بيض
وشيوخ وناس ابدلاتها العسكرية وفاطمة.ترجف وتحجي ::-هذا مدير عـــــمو ادريــــــس.

واخر واحد دخل.وياهم عـــــمو ادريــــــس وبسام. هستوهم دخلوا وصعدت ام فــــــاطمة تريد تكتل فــــــاطمة وعمه دكلها

:-واللـــه ما توصليلها

- هي هاي البنية حرثة والكل يمر عليها شلون بله كل ماواحد يخطبها تكتلونها

:- انتي تعرفين شي.وانا اعرف شي قفلت فطوووم بعد قفلت لو عـــــلي لو ما تاخذ. ولج شسوي بيج امووووتج اذبحج شسوووي يومية حاركة گـــــلبي

نــــهله. ::- ما مسوية شي البنية ليش تحللون على نفسكم وتحرمون على غيركم انتي وغيرج هم حبيتوا وتعرفون شنو الحب ليش هسه تظلمونا

- انا وبتي لا تحطين روحــــــج بنصنا

- من تنزل ابيتكم حاجيها اهنا اعذريني دام انا.واكفة تحلمين تمدين ايدج عليها

نــــهله. ::- فرفحت تتحركن شوية ونزلت وفاطمة بــــس تبجي. جريت التلفون ودزيت صوت الادريس

- بــــس يرحون الناس اصعد فاطمه يمي وخاف يحاجونها ماكدر احميها

دزيتها وسمعت باب الشارع انطبك ركضت للشباك اباوع شفت ابراهيم اخو ادريــــــس. دخل وادريس طلع للكراج گلب بتلفونة نوب رفعة الاذانة يسمع. باوعت. بالتليفون شفتة متصل. رجع يسمع من جديد وقرب التليفون الحلگة يحجي
وصلتني فتحتها بسرعة

:- بــــس يطلعون اصعد

- لمحتة رجع دخل رجعت يم فــــــاطمة وغدير
تكسر الگلب تبجي ورافعة اديها تدعي.

شوية وسمعنا صوتهم عله وراها بشوية طلعوا. ركضت بسرعة قفلت باب بيتنا. بعدهم الناس بالكراج وندك بابنا وصوت كرار اخو فــــــاطمة يصيح

عفتة واتصلت على ادريــــــس اباوعله من الشباك يتسالم وي الناس وكف عـــــلي يـــــمة مدنك حاجاة. ادريــــــس رفع ايدة.دك على متنة.
والتفت البيتنا اجة.يمشي بهمة

صوت كرار وامة.وعباس كلهم بلباب الثاني. فتحت الباب الادريس بسرعة كتله

:- اجو ......نزع احزامة. ولفاة على ايدة وهم يصيحون ويدكون على الباب ..فتح الباب. جاي يغلطون وفزوا ثنينهم من شافوة قبل مايححون شال الحزام وضربهم على رجليهم ويغلط عليهم وعيسى من جوا يصيح

:- حييل الزعاطيط فشلونة

نزلهم الدرج يدفعهم ويضربهم.وام فــــــاطمة مجلبة بايدة وهوا متخبل بــــس وصلهم لصالة
عيسى نزع اعكالة. وضربهم. ...ما ادري شحاجين بــــس مفشلينهم بالديوان بحيث مفرفحين كلهم ابراهيم وعيسى وخوا ادريــــــس حيل فشلان لان كدام مديرة

وكف عيسى يلبس بعگالة رفع ايدة گال

عيسى::- واللـــه يا عباس وروح ابوي وعافية امي لو
تصب روحك.ذهب ما اطيك اظفر افطيم

ادريــــــس. ::- ليش ماتنطيها العلي شنو ناقصة انا الربيتة شاريها بروحة  ليش فهمني ونطيني سبب. شنو اليخليك ترفضة

- بتي وبكيفي.زوجت بنتك انته حاجيتك اعترضت لا تدخل ادريــــــس

- اذا الاعمام مالهم سلطة معناها عباس خلي ينكع نهوته ويشرب مايها مادام حجيك هيج ماله حق ينهي عليها

- اي هاي هي ماناهي عليها ومانطيها اله ولا انطيهــــا العلي وكلية بعد ما اداوم تكعد وتنجب واي واحد يجي عليها اطيها

- الكلية شعليهاااا ليش ليش شنو هل ظلم

- ادريــــــس اخر مرة اكلك لا تدخل عائلتي وبكيفي اكو يـــــوم اجيت وكتلك لا تسوي هيج اكو.يـــــوم اعترضت على تصرفاتك

- اللهُ اكبر بــــس فهمني الكلية شنو.علاقتها المن تعــــبت كل هاي السنين سهرت ودرست... برد.وحر وتحملت كلشي تالي تجي دكعدهااا

نــــهله. ::- متت من القهر ادريــــــس يرجف كله.ويتصايحون.والحجية تهدي بيهم رجعت صعدت يم فــــــاطمة انتهت من البجي شوية.واجة ادريــــــس وابوها من جوا يصيح خلي تنززززل بسرعة

اخذها ادريــــــس ونزل وياها حتى مــــحد يحاجيها

حرموها من الكلية مــــحد جان يگدر يحجي ادريــــــس يتحركن عليها ومابيدة شي. يومين
واجو ناس عليها من طرف ابوها

خابرت ادريــــــس. ميتة خوف كالي
:- اسمر وين
:- نايم
:- كعدي بــــس خلي يدخل.ويگول انا ابن عمها ورايدها ناهي عليها

:- ركضت الغرفة اسمر ومن الاستعجال كعدتة.بخرعة فز. يصيح
:- هااا هــــا شكو

- جريت تشيرتة انطيتة اله :-البسس بسرعه البس. ..وكف يلبس ويصيح شكو.شصاير

:- ناس اجو على فــــــاطمة
:- اااي؟

:- ابوك گـــــال خلي يدخل لديوان يكلهم انا ناهي عليها

:- شنوو جا فــــــاطمة مثل سمر ماريدها

:- ادري ادري بــــس علمود الناس يرحون ....
الله هداه ونزل بسرعة كالهم.منهي عليها ورجع للبيت يركض
گـــــال ::- طافر اني  يكتلني عمي عيسى بــــس يلزمني

:- اخذ سويج سيارتة وراح

وهم من اجة.ادريــــــس صار اابينهم صياح. ودائما الجو.متكهرب. وادريس يحلف كل ماتجيب عليها واحد اخلي اسمر ينهي عليها لو تطيها العلي لو هاي هي مــــحد ياخذها

وفاطمة حتى البيتنا مايخلونها تصعد بــــس غـــــدير تنزل يمها ...شوية وترجع ميتة قهر عليها
....

بــــسام. ::- طلعت من بيتنا اتصل على عـــــلي. مايرد رحت البيتهم طلعتلي امه(المره الربتة) كوه تجر نفسها. اخس من امي

-فتحت باب غرفتة. وشغلت الضوه رفع راسة لمحني ورجع للمخدة
:-كووووم لك
:- عـــــوفني بــــسام كلش مالي خلك

:-  الك خوش خبر عندي يخص افطيم ...كعد على حيلة رافع ايدة بوجهي

:- اول شي كول. فــــــاطمة ثاني شي احجي ابسرعة

:- ههههه دكوم غسل وخلي نطلع واحجيلك
:- وين نولي

:- اي مكان

:- للكاظمية؟

- يله فضها ....اخذ ملابسة يسبح كعدت مقهور عليه حابها بكل روحة ويتخبل عليها من اشوفة متعذب احمد ربي واشكرة انا ماحب ولا أريـــــد احب

اخذتة وطلعنا للأمام الكاظم عليه السلام ...مرات كل الاماكن تخنگك وماكو اجمل من حضرة الامام تتنفس بيها

عـــــلي. ::- شسوي بعد اخطفها؟  اغدر عمي ادريــــــس؟

- انچب يابة شلون تفكير شو استسلمت خابصنا وهسه استسلمت

- ههه للموت واللـــه للموت ما استسلم وابقى اخطب كل فترة يملون همه وما امل اني

- اكلك على طاري الزواج أريـــــد ازواج انا
- ياهو الكاظك بــــس شعندك مو جنت ماتريد

- دنكت بحيرة واللـــه يا عـــــلي عليك تنظم على الله ما تنظم ...أول شي تعرف وضع امي
والحجي دوم بمكتبة. يعني  بــــس الممرضة تبقى وي امي  وهاي يمكن عاشر وحدة اجيبها لو تشوف معاملتهن الها مايدرن بيه مخلي كامرة بالغرفة

وبعد اكو سالفة خفت منها فـ خلي اشوفلي بنية هم ادير بالها على امي وهم اخلص من القلق العندي

-سالفتيش قلقيش احجي بله لا تظل تلطم

- البنية بت اخو ام مصطفى غـــــدير

- اي اعرفها شبيها

- اي اكثر من مرة اشوفها مدري شلون تباوعلي
انا اموت ولا سيــــدي يكلي غدرتني مأمني عليها مجرد افكر بشي اخاف من كلمتة

- اول شي حسيتك بسمرتني امني على فــــــاطمة وحبيتها ثاني شي لا حبيبي مشتبهة بشنو تنعجب خلقة اخلاق انتة

- هههه اشبية وسم. هسه شني كل للحجية ماتعرفلها ابنية منا منا
- خوش خوش بعدين ...
...............

جــــمرة. ::- احس بطني متكطعة بــــس حتى جفني ماكدر افتحة مرة احس روحـــــي بوعيي ومرة لا. ومن افتح عيني بــــس اتاكد شال امي مشدود على ايدي. وارجع اغمض

حسيت نفـــــسي انرفع من الكاع فتحت عيني شفتة دخلني للحمام ساكت كعدني على تختة همست ميتة.من الوجع
::- بطني

:- اي غسلي هسه جــــمرة بــــس فتحي عينج باوعيلي

::- فتحت اباوعلة. احس شي ينزل من رجلية
بقيت اباوع بعينة وكلبي يدك.حيل دفعتة من صدرة ولميت روحـــــي .. ارجف فرك.وجهة

:- راح اجيبلج اغراض واجي بسرعة.اسبحي
:- وخرررر وخرررر وخــــر.عـــــوفني

:- ضميت راسي وهوا كام.طلع ... كارهة روحـــــي حيل وبطني متگطعة من الوجع بالعادة الشهرية ماتجي الا كل ثلث اشهر وتبقى ثلث ايام جنت مكيفة بهل شي لان اكرها حيل
بــــس هسه كارهة روحـــــي

رجع دخل للحمام علگ ملابس همس
:- راح اجيبلج اغراض واجي اسبحي
فكيت شال امي من ايدي ...ارجف كلي كمت ما اسيطر على رجفة جسمي اعصابي دائما مشدودة والاشياء الالزمها لو تقفل ايدي عليهن لو توكع مني

اشطف بجسمي.وابجي ساعة اغلط عليه
ساعة اصيح.وينك تعال ساعة احس بنفسي وبالاحجية.وساعة ما استوعب تصرفاتي وكلامي

رجع دك الباب. بقيت كاعدة على التختة حاضنة رجلية الصدري وارجف ...گـــــال

:- ادخل جــــمرة؟
:- لل لاااا

:- جــــمرة بــــس اخذي هاج جبتلج هذني

:- بقيت كاعدة كل ما اتذكر شاف ملابسي متوصخات احتقر نفـــــسي واحتقرة اهز برجلية وارجف فززيت من طفه الضوه شهكت
:-  ووينك

- يمج

- حسيت ايدة على وجهي لف شعري بالمنشفة
جلبت بايدة ..
:- أريـــــد حبااية أبــــــهر. أريـــــد حباية

:- اشش هسه انطيج بــــس كومي خلي البسج
:- لا تباوعلي

:- ظلمة ما اشوفج بــــس البسي راح تبردين

- كمت ارجف لبست وجلبت بايدة
:- أريـــــد حباية

:- تعالي هسه انطيج من تاكلين

:- طلعت لازمة.بية.بقوة وما انطق غير كلمة أريـــــد حباية كعدني باوعت الايدي الشال ماكو

وكفت أريـــــد اروح اجيبة سحبني كعدني واني اصيح
:- الشااال الشال بقه الشال ع عـ عفيه الشال

:- هسه اجيبة اكعدي

- رجعت كعدت وارفع بايدي اوخر شعري من وجهي رجع بايدة الشال عافة بحضني وكام طلع
بــــس أريـــــد اكدر اشدة على ايدي. من كد ما ارجف ما اسيطر اسوي بية عكدة واضبة رجع كعد يمي خلة الصينية كدامي بــــس رفعت راسي اشوفة ودنكت اشد بالشال الايدي

:- عوفيه اكلي
:- بقيت مدنكة أريـــــد اضبة على ايدي شال الخاشوكة الحلكي اكلتها ورجعت اشدة

:- جــــمرة اكلي عوفيه

:- اشدة مايصير اعوفة اشدة ..مد ايدة يريد يشدة دفعتة ..
:- وخرر توصخ شال امي

:-  عووووفية اكلي
:- قرب الخاشوكة الحلكي دفعتها اطشرت
دفع الصينية وجر الشال من ايدي يصيح واني اصيح ومجلبة بية

:- هم ادمنتيييه شنو فلمج

- اخذاه من ايدي وطلع وكفت اركض وراه اصرخ وابجي. شفتة وكف بالمطبخ ركضت علية دفعني وبالجداحة شعل طرفة وشمرة. بالكاع

تخبلت ركضت على الشال اطفي بيدي وابجي
جراني منه. ولزم النار بيدة سد ايد على ايد طفاة نص الشال محروك

- اسف اسف ما ادري

- جريت الشال من ايدة فاتحة عيني على وسعها. خليتة على وجهي اشمة وخرتة بسرعة اصيح

:- رررراحت راحت ريحة امي ليششش حركتة ليشش راح عطر امي راح

كعدت على حيلي ابجي واصرخ واشم بالشال بــــس ريحة الحرك بية.  واصيح ..راحت ريحة امي راااحت

:- كعد على اركبة مقابلي بــــس يريد يلزمني واني مفرفحة
:- هسه اغسلة وترجع. بــــس على كيفج

:- رفعت ايدي ضربتة على وجهة.  ابتعد ورفع راسة ليفوك لازم خشمة

اخذت الشال وفتت للغرفة تمددت ومخليتة بحضني بجيت الحد ماتعبت ونمت. رجعت كعدت حسيتة كاعد كدامي جنت صاحية وهادئة. لكيتة كاعد مقابيلي بــــس رمشت بعيني ونطقت

:- ليش حركت الشال
:- لان غبي

:-حركت گـــــلبي
:- و گـــــلبي هم

:-  اكرهك حيل وحك عيون امي .....

هز راسة موافق. وسحبني من ايدي شكيت بيه منطيني شي لان جنت عاقلة واتصرف بعقلي دخلت للحمام غسلت ورجعت جريت الصينية من كدامة خليتها كدامي اكل بقى يباوعلي شبعت وبقيت اخربط بالاكل ماريدة ياكل وهو ساكت

:-غير الفراشات واجة اتمدد جان الضوه مشتغل ومن انطفت حتى صوت النفس صار ينسمع. متمددة ساكتة وكلساع اشم الشال بية ريحة عطر طيبة. وره فترة همس

:- اسف

:- بقيت ساكتة. الاوقات الاكون بيها صاحية احاول استغلهن كتلة
:- عمر هم مات

:- لا
:-علول شلون مات؟

غمضت حسيت ايدة على خدي
:-لا ادوخين نفسج

-رفعت ايدي لزمت ايدة ..
:-اريد اعرف

تحسر وحجة بخنك

:- اكو اطفال يشتغلون عد قسام واكو عد ابو الهيل ابو الهيل عدو القسام

تذكرين الطفل الجبتة للمزرعة
:-اي
- اي من. اخذناه احنا مثل النخطفة من. قسام
هوه اسمة محمد الطفل

:-اي

-اي قسام عباله ابو الهيل الاخذ محمد فـ رحنة المنطقتهم وهناك انكتل علول

:- كون انت بمكانة. ...
بقى ساكت وسحب ايدة من خدي
تمدد. بمكانة مايحجي. شويه شوية احس افقد وارجع الجمرة المدمنة الحد ما نمت

كعدت مالكيتة واني الوب على حباية
لو اعرف اموت وراها خلي اموت بــــس خلي ابلعها جسمي ياكل بروحي كل البيت احس يخنكني

كمت ادور بكل مكان وازحف ادك بالكاع بلكي يطلع مخلي شي
ومن ما الكه ارجع أذي نفـــــسي. حد الليــــل اني الوب الكمة الاكلها أريـــــد اتقيئها همي الوحيد اشرب حباية.

تعــــبت وغفيت حسيتة فتح الباب فتحت ابتعب شفته منطيني ظهرة ضم شي وره الثلاجة ورجعها مثل ماجانت كيفت

من اجة. يمي كعدت هادئة كلش من يحاجيني ما احاجية اكلت وكمت للحمام. رجعت تمددت گال
::-راح اروح اني ساعتين ورجعلج
;- هزيت راسي موافقة. بــــس سمعتة طلع كمت ركض للثلاجة

ماكدرت ادفعها تعــــبت حيل يلة كدرت احركها صندوك بينها وبين الكومدي جريتة تعبانة وارجف فتحتة طلع بيةة جيس فتحتة باستعجال وكعت بحضني هويات رفعتهن اقرأ بالاسماء

الأبـــــهر محمد جواد
اباذر محمد جواد
درة محمد جواد
محمد جواد محمد
زهراء عـــــلي راشد»

.......
يتبــــــع⋆𓍯
الكــــاتبة أيـــــــلول⋆𓄼𓂁

.💚🌿