رواية أجرام مستباح لثلاث ندبات الفصل الثاني والعشرون 22 - بقلم الكاتبــة ايلول

مساء الخير ...

#أجرام_مستباح_لثلاث_ندبات

aylol. بقلم الكاتبه

ins: t8_fe3 للتواصل

𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒

الجرح لو طاب هم يترك نياشين  ..

𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁

جــــمرة. ::- همست صوتي رايح وبلعومي متشخط
::- الأبـــــهر

نطقتها وجمدت بمكاني حرك راسة بصعوبة من المخدة التفتت عليه شهكت حيل ارجف حجة بتعب

::- طلعي ...طلعي بره

- سديت حلكي بيدي  متخبلة من منظرة عينه المورمة وزركة ملابسة المتروسة دم ورجلية الصايرات شكدهن من الورم

::- رووحي

عمر ::- بــــس ارجعي الغرفتج بــــس عوفيه

- درت عيني العمر جامدة كلي دخل وسد الباب رجعت للغرفة الثانية صريخ بروحي منظرة اكل گـــــلبي اكل
كعدت بالگاع لامة رجليه الصدري وارجف
يتخيلي وجع جروحه بجسمي"

دقايق وسمعت صياحة متوجع اسد اذاني گـــــلبي نزرف تمددت هادئة اسمع صوتة ودموعي تنزل بقهر الحد ماراح صوتة بقيت بمكاني أريـــــد اطلع أريـــــد اشوفة ومالي حيل اتحمل شكلة هيج

اكثر من ساعتين مرن وندك الباب صوت عمر
:- خوية هذا غداج

لبست شالي وفتحت باب الغرفة باوعلي ساكت بيدة صينية اكل. مسحت وجهي وحجيت

-: أريـــــد اشوف الأبـــــهر

:- عوفية هسه

:- تكدر تاخذة للمستشفى؟

هز راسة لا

:- هسه اروح اجيبله علاج بــــس الزمي اكلي

-: ماريد روح بــــس لا تقفل الباب خاف يحتاج شي

سديت باب الغرفة وكعدت منتظرة عمر يطلع من البيت بــــس سمعت صوت السيارة طلعت
فتحت الباب على كيف دخلت على اطراف اصابعي كعدت يمة على اركبي

عمر غاسل جسمة اوجهه بــــس شنو اليخفي اثر جروحة ماراحن بالمي مانغسلن اباوع بوجهة ودموعي غصب عني ينزلن
شضعفني هيج واثر جرح يبجيني "

عقج وجــــهة موجوع مسحت دموعي بسرعة يريد يسحب ايدة من جوه الغطا مديت ايدي أريـــــد اوخر الغطا عنه حتى يكدر يرفعها رفعتة عن ايدة واباوع بوجهة دنكت عيني الايدة من ماحركها. شهكت ورجعت ليورة فازة فك عينة يباوعلي بتعب واني عيوني ماكدرت اشيلها من ايدة المابيها اظافر مكان الاظافر عبارة عن قطعة حمرة ومورمة كل اصبع صاير بكد ايدي

::- روحــ..... روحـــــي

:- بجيت ::- والله ما ادري هيج راح يصير بــــس ردت اشوف مصطفى والله مادري بيه راح يعذبك.

زحفت يـــــمة رجع غمض عيونة مديت ايدي ترجف رفعت ايدة ابين ايدية امسح عليها واحجي صوتي يرجف كلمة مانطق ولا رجع فتح عينة رجعت نزلت أيــــدة يـــــمة مسحت وجهي

ما اعرف شنو الاسوية شنو الازم اكولة كل الاجة ابالي اتمدد يـــــمة رفعت الغطا وتمددت مخلية راسي على صدرة لف أيــــدة على راسي يون موجوع صك سن على سن وحجة بخنك

::- ااخ جــــمرة

:- ما اشرد بعد بــــس صير زين ما اشرد التوبة
بسته بخده واحلفله ما اشرد لمني بحضنة حيل من التعب والسهر بس أمنت نمت

وره وين يله حسيت نفـــــسي محترة ومختنكة
فتحت عيني صايرة جوة كتفة رفعت راسي اباوع بوجهة لاصق جروح على وجــــهة بخدة ويم عينة وبكصتة

رفعت ايدي مشيتها على خدة فتح عينة لمحني رمش بثگل وسحب أيــــدة مبتعد عني كعدت على جهة حاول ينگلب لجهة الثانية ويا كل حركة تشوغ روحة ويشيط

كمت على حيلي أريـــــد اروح للحمام حجة بتعب

::- لا ترحين لهذيج الغرفة عمر بيها

- لبست شالي ومشيت اريد افتح الباب گـــــال

:- غداج بالمطبخ اكلي !!

-طلعت للحمام غسلت ودخلت للمطبخ عمر عازل اكلي ومواعين وصخة الظاهر ماكلين هو وياه اخذت صحن وخاشوكة ورجعت للغرفة يـــــمة باوعلي ودار وجــــهة كل شوية يگول

::- ااخ يا يـــــمة

خليت الصحن يـــــمة وكعدت غمض عينة حيل وجر نفس بحسرة

:- أبــــــهر

- دار وجــــهة مني مايريد يشوفني ولا يسمع صوتي. اخذت الصحن ورجعت للمطبخ. اكلت شوية غسلت ورجعت فتت للغرفة كعدت يم الشباك وهو نايم بقيت اباوع على الزرع الاصفر
رجعت درت وجهي اباوعله يتكطع گـــــلبي من ينوجع ويون شوية وسمعت صوت بزونة من يم الشباك التفتت ادور لمحتها جبيرة وياها طفلاتها ثنين صغار مديتلها ايدي

::- بسبس بسسس

شردن لبعيد وندك باب الغرفة صوت عمر
فتح عينة الأبـــــهر باوعلي وتحمحم

::- لبسي شالج

- لفيت الشال على شعري وهو يباوعلي لمن كملت كاله

:- تعال عمر

- دخل عمر بيدة علاكة علاج

عمر :- هــــا شلونة ابو الجود

-حجاها وتقدم على الأبـــــهر خله ايدة جوة راسة كعدة واني اراقب من بعيد

-خله مخدة وره ظهرة والابهر،مغمض عينة موجوع  لمن استقر كعد عمر بصفة فتح العلاگة طلع منها شاش ومعقم راسا رفعت عيني بعين الأبـــــهر أشرلي،براسة روحـــــي هزيت راسي لا

الأبـــــهر ::- كومي بهذيج الغرفة

:- ما أريـــــد

:- كووومي

:- ليش؟  ....دنك راسة ساكت وعمر اتدخل

عمر ::- بــــس شوية وتعالي

-كمت طلعت من الغرفة لمحت باب البيت مفتوح طلعت بسرعة افتريت من ورة كعدت يم الشباك مخلية بــــس عيني ظهر،عمر،عليه والابهر،الا يباوع الجهتي يله يشوفني

نزعة قميصة وفتح الشاش من صدرة سديت حلكي بيدي. ماريد ينتبهولي كل جسمة ازرك اثار ضرب وفوك گلبة على الاثر القديم جروح ثلاثة بالطول ومفتوحات بدون خياط كاتم نفسة وعمر يعقم بيهن وهو كل شوية لازم ايد عمر وشايطة روحة لمن كمل. ولفاهن جر الغطا من رجلية جانن نص اصابعة بدون اظافر ومورمات منظرهن يبجي الگلبة من صخر اباوعلهن وعيوني طاكات فززني صوتة من نطق بفزع

::- جــــمرة

- رفعت عيني باوعتله وعمر راسا كام يركض حسبالهم راح اشرد وهو عينه بعيني

:- الزرع خطر بالج تفكرين

:- ما أريـــــد اشرد ليش تطردني من يمك

- سكت عينه بعيني وعمر وكف فوك راسي يلهث

عمر ::- صدك جذب منين طلعتي

الأبـــــهر ::- كتلك ديربالك هاي سنايبر

جــــمرة ::- كمت نكثت ملابسي من التراب واحجي وياه
::- انـــتَ عايف الباب مفتوح

- دمشي امشي شلون ورطة هاي بالابهر ومرتة

- مشيت گدامه الغرفة الأبـــــهر. اشرلي اكعد بصفة عبرتة وكعدت رجع عمر يريد يعقم رجلية واني مخلية عيني وياه. لحد ماحسيت ايد الأبـــــهر لزمت ايدي التفتتلة اجر النفس كوة وكلبي يريد يطلع من مكانة گال بصوت ناصي

::- لا تباوعين

- يباوع بعيني وكل ما أريـــــد التفت واباوع لرجلية يسحب ايدي عليه اكثر مانعني التفت. واني مراقبة نزة جسمه من ينوجع ويكتم بــــس يسد اسنانة بقوة يكز عليهن لو يعض شفتة. لمن كمل عمر

حجو باسماء غريبة علمود شغل سلم عمر وكاله مرتك تعشيك اشوفك باجر وعلاجك اخذة

الأبـــــهر ::- ديربالك وانتبه زين

عمر::- اقفل الباب؟

:- نطيني نسخة واقفلة من تطلع

- فتحوا المفاتيح اخذ نسخة الأبـــــهر ونسخة عد عمر سلم وراح.

:- شنو انـــتَ زعلان مني ...

ماحاجاني دنك حاول يرجع يتمدد تقربت نزلت المخدة اله نزل جسمة ساكت تغطه وغمض عينة

:- أبــــــهر

:- هممم

:-  زعلان مني

:- اخذتي فرصة عمري هاي ثاني مرة احسهم يضيعون من بين ايدية

:- مو ذنبي

:- ابقي ليصي الدنيا وكولي مو ذنبي

:- سكتت وهو رجع نام جريت مخدة بصفة خليت راسي مانعسانة بــــس صافنة شوية وگام يرجف ويسحب بالغطا عليه ابتعدت وهو بــــس يون
زحفت يـــــمة

:- شبيك أبــــــهر؟

:- غطيني

- كمت من يـــــمة جريت بطانيه غطيته هي الغرفة حارة وهو يرجف وعركان مسحت وجــــهة بايدي

:-  مصخن انـــتَ أبــــــهر اكعد

وخرت البطانيه منه وادغة بكتفة

:- اكعد كلي شسوي مصخن انـــتَ

- فتح عينه بتعب باوعلي ورجع غمض
:- أبــــــهر حاجيني ، تشرب علاج

:-كـ كمادات

:- والجروح شلون....
سكت. كمت من يـــــمة جبت مي ورجعت ابلل شالي واخلي على كصتة ينز جسمة فاز.... تعــــبت اكتافي احسهن تكطعن وهو بــــس يون وين يله نزلت حرارتة وفتح عينة باوعلي رفع راسة خلاه على رجلية

:- جوعان جــــمرة

:- تگوم تسويلنا اكل؟ اني هم جوعــــانة

فتح عينة باوعلي ورجع يظم راسة بحضني اكثر
:- للحمام مابيه اگوم

:- لعد اني ماعرف اسوي شي

:- اي شي شوفي المطبخ

:- خوش وخــــر اعرف اسوي بيض وچاي

:- اخذيني للحمام بالاول

- ابتعدت. وخرت الغطا منه أريـــــد اساعده ماكدر. ثگيل وهو مايعين نفسة كوه كدرت مخلي كل حمله عليه يمشي ورافع اصابع رجلية يخطي الخطوة وتشيط روحة دخلته للحمام وبقيت منتظرتة لمن طلع ورجعتة. للغرفة تمدد ....فتت للمطبخ محتارة شسوي اكو چاي أريـــــد اشعل الطباخ اجدح بالجداحة وماكو صاح

:- جــــمرة لا تحتركين

- اشتغل الطباخ عفت القوري عليه وفتحت الثلاجة اكو طماطة وبيضتين هو الأبـــــهر لو ياكل طبقة كاملة متشبعة سويتهن طماطة وبيض صبيت چاي واخذتهن

::- يله أبــــــهر اكعد

- فتح عينه

- اجيت يـــــمة كعدته واقرب الصينية اله أريـــــده يمد ايده رفعهن يراويني

:- وكليني ما اكدر

- بلعت ريك اباوع بعينة سويت لفة فربتها الحلكة اكلها

:- تكدرين كلشي تسوين ليش تكربين عليه

:- ما اعرف مجبورة هسه

- كملنا اكل وشلت الاغراض ورجعت يـــــمة احسه حاقد عليه حتى من احاجية مرات يغلس ومرات. يجاريني ويجاوب فرشت بصف فراشة وتمددت ساكتين ثنينا شوية وكتله

::- الأبـــــهر

:- هممم

:- لو اعرف راح تتعذب هيج بسببي ما اشرد...
تحسر حيل

:- حسيت روحـــــي ضحيت بيهم اصعب اختيار من اتساومت بينج وبين الفلوس التطلعهم

:- اني شدراني صخمان مراقبك

:- هههه ااخ

- كعدت على حيلي ::- هــــا شبيك

لازم صدرة ومغمض حيل لزمت أيــــدة
::- هــــا أبــــــهر شبيك

:- الشاش لازك على جرح يمكن ،  جاي يوجعني

- زحفت يـــــمة كلش ::- يااا شلون خابر عمر

::- عمر عنده شغل تعالي بــــس افتحي وعقمية

- وكفت بسرعة جريت علاكة العلاج والمعقم رفعت راسة على المخدات فتحت الشاش منه عقمته بخوف لزم ايدي رفعت عيني اله حسبالي اذيته

::- ليش ما اكدر احقد عليج

:- لان مالي ذنب ...
عاف ايدي رجعت ادور بالعلاجات اكو عصارة رفعتها اله

:- هاي مال شنو

:- ما ادري يمكن لهاي الجروح

- دنكت اباوع من غير الجروح اثار زرك وبنفسجيات مال سوط
خليت عصارة باصبعي وامسح الاثار على كيف احتركن عيوني غصة جلبت ابلعومي

::- شلون يكدر يضربك هيج

:- كلشي يگدر

- جريت نفس ارجف مسحت وجهي
::- اكو شي اسوية حتى ما يوجعنك؟؟

::-صايرة حنينة

مشيت ايدي على صدرة وعلى اثار الجروح غمض عينة حيل وبلع ريك

:- لان مريض من تصير زين ارجع جــــمرة التكرهك

جر ايدي من صدرة الشفتة باسها
:- يعني هسه تحبيني؟

- باوعت بعينة ::- لا هم اكرهك بــــس مقهورة وكلبي يوجعني. عليك

- بعد الغطا منه وفتح أيــــدة
::- تعالي

- تقربت بهدوء خليت راسي على زندة لماني بحضنة منوجع. وساكت نمت هادئة حيل

ثلث ايام مرن رجع يحجي وياي ويسولف بــــس طول هل ايام هو ماطالع من البيت اعقم جروحة والفهن والاكل عمر يسوية النا

باليوم الرابع جنا بالغرفة. هو نايم واني اباوع من الشباك شفت نفس البزونات الصغار ثنينهن بــــس امهن ماكو هم مديتلهن ايدي وحـــدة اجتي اوحده شردت

لزمتها اضحك دخلتها للغرفة امسح عليها
وهي تريدني اعوفها وتدور براسها تريد تعض اصبعي فز الأبـــــهر على صوتها عاكد حواجبة

::- شنو هاي

:- هههه شوف اجتي وحدها دخلت من الشباك

::- اييع شمريها

:- لا حلوه شوف ...اخذتها ومشيت يـــــمة هذا المريض ومايكوم من مكانة الا اني اساعده بــــس تقربت عليه والبزونة بأيدي طفر وكام على حيلة مبتعد

وكفت على جهه
::- شنو تخاف منها؟

:- هــــا لا ..ما اخاف منها شنو اخاف بــــس ايع لا تلزمينها بيدج عوفيها

:- اخذتها ورحت يـــــمة بقى واكف بمكانة وبس ارفع ايدي ينز ويرجع ليورة
::- شوفها شحلاتها يا باوع عيونها ملونات شوف

رفعتها كدام وجــــهة صيح ورجع لبعيد خايف
باوعتله

::- هاي صدك تحجي تخاف من البزونة

هز راسة لا يباوع لأيدي واني لطشت اجي يـــــمة أريـــــد اشمرها عليه وهو يصيح ويجر بالبطانية وراه يحمي نفسة بيها افتر وراه وارفعها أريـــــد اشمرها عليه واسوي اووووه ههههههه

:- لا جــــمرة كاافي خرب

::- هههههه شبيك ماتعض مو اسد هيه

::- بــــس وخررري عني لااااا

:- حطيتها يم وجــــهة ابتعد مشمئز اضحك من كل گـــــلبي والبزونة انجعصت بيدي تريد بــــس تشرد ..

:- عوفيها يابه راح تطلعين مصارينها

:- رخيت لزمتي الها مدري شلون ندارت عليه وخرمشتني شمرتها بسرعة لازمة ايدي وهي شردت صاح

::- حيييل تستاهلين

- لزمة الشخط عاصرتة.. :: حل يحلك وحمار يحبك

:- ادري بيج حمار

:- جبان يخاف من بزونة عود هي اسد

:- ما اخاف انجبي

::- اي اي ومنو شرد منها امي كون الله يگلبني بزونة حتى ماتلزمني

:- ههههههههههـهــهــهــهه لو شما يگلبج الزمج ..

....

نــــهله::- ماجنت اعرف شنو الاسوية وخوف اسمر زاد رهبتي دك تليفونة وباوعلي عــــــيونة مدمعة
::- هيه

- اخذت الجهاز منه جاوبتها وهي بــــس تبجي وتصيح
:- تصخم وجهي شسوووي شكول الاهلي يذبحوني واللـــه يذبحوني

:- كلشي لاتحجين احنا نحلها بــــس لاتحجين

:- بسترج وستر بناتج فدوه اني بركبتج يموتوني واللـــه

- حتى ما اعرف شنو. احجي وياها سديته منها الطم هــــا ياعلي يا حاضر الشدات. احضرنا شسوي شحجي وشگول المنو اسولف

دك التليفون بايدي خالتة وداد
اخذة مني رد وفتح مايك وهي صوتها يرعد
تغلط عليه وتسب وشلون وهسه رايحه للبنية وهيج وهيج

جريت التليفون وصيحت
::- وين رايحه وين تردين تصخمين وجهنا ويهدرون دمه

:- ايطبببه مرض لعد يذبحونهاا احسن

::- بــــس اطلعي منها ولا ترحين لاهلها وتنبهيم خلينا نحلها

::- شلون تحلينها شلون ست الحسن ياحل هذا البنية راح تموت نفسها

::- عليمن تموت نفسها مو هي هاي لعبتجن مو تفترين وراهم ماكفاج السويتيه بغفران وغيث لحكتي اسمر جهال اختج ياظالمة النفس

سديت التليفون بوجها واسمر ساكت مخلي راسة ابين ادية

جريت تليفوني ارجف صاح

:- راح تحجين البابا

:- بــــس اصبرلي ......
دكيت عليه رد بسرعة

::- هــــا عيني

::- الله يساعدك

:- سالمين شبيه صوتج

:- مابيه شي ماتجي للبيت؟

::- شكو نــــهله شصاير
:- ماكو شي بــــس تعال

:- نــــهله احجي

:- اسمر طالع ويا زميلته وقرايب البنية شايفينها وهي تبجي خاف اهلها. يسوولها شي

::- جايج

- سد الخط واني گـــــلبي رايح ما ادري شنو الراح يصير اجو الجهال من امتحانهم مستغربين من منظر اسمر غسلتلهم وكعدتهم بالغرفة

رجعت بصالة يـــــمة باوعلي گـــــال
::- واللـــه هي بــــس زميلتي

:- شنو الصار اسمر .....؟
فرك وجــــهة

:-  جنا بمطعم كاعدين اكلنا وطلعنا وصلتها البيت اختها وجلبت الا انزل اتعرف على اختها بــــس كعدت يمهن شوية وبعد ما اتذكر شنو الصار

::- ورطنك شيحلها هاي اسمر شيحلهاا....

سمعت صوت سيارة ادريــــــس فتحت البردة اباوعلة حتى ماطبكهــــا عدل نزل بسرعة والقلق مبين بوجهه فتح الباب مرتبك شمر السويج على الميز يباوعلي ويباوع الاسمر

ادريــــــس ::- هاا سالمين

نــــهله ::- نروح الاهل البنية

:- صلي على محمد غير تفهميني شكو

:- دنكت محتارة شحجي واسمر عيونة تتوسل

:- بنية وياه بالجامعة زميلتة

ادريــــــس ::- هاي هي هسه انتِ اسكتي
احجي انـــتَ استاذ اسمر. شمصخم

اسمر ::- بابا واللـــه ما اعرف شنو الصار بــــس جنا طالعين واكلنا ما ادري شنو بعد

:- شنو البعد احجييي

:- ما ادري واللـــه ما ادري لكيت نفـــــسي وياها بغرفة ... 

يتبــــــع⋆𓍯

الكــــاتبة أيـــــــلول⋆𓄼𓂁

🌿💚

...