#أحببتك_انت
نزل بارت مثل ما وعدتكم
تعالو نشوف سوة شنو صار وياهم هاي الفترة
هواي سألتو عنهم، هسه رح نعرف
اكو هواااااي مفاجآت
.
.
تعالوا نفتح الباب و نشوف شنو هاي الهوسه عدهم، رحنه لبغداد و حاليا ابيت اسامه احنه دخلنه
اسماء : سلااام عليكم، شلونكم من جديد و شلون اخباركم، عذروني بس مخبوصه كلش لان اليوم عرس عدنا و لأني اخت العريس الهوسه كلها عندي
غيداء حماتي تتذكروها، اجت يمي حتى تساعدني لان وحدي ما الحك، وها رنا هم اجت بس عد اهلي تنتظرنه هي و عمتي
اسماء : غدووو حبي وين وصلتي
غيداء : جيت جيت
اني جوة احضر الصواني و ورود الحنه بالصاله و غيداء فوك دترتب الغراض اللي راح ناخذها لبيت اهلي، صار لعلي و عروسته
نزلت غيداء و بيدها الجنطه كوة تنزل بيها تلكيتها اخذتها منها نزلناها بالكليدور حتى من يجي اسامه رأسا نطلعها
غيداء : سومه نغدي الجهال خاف نتأخر
اسماء : امير اكل قبل شوي بقوا بس دنو و ادومي
غيداء : زين لعد تعاي نوكلهم حتى نصعد نتحضر بعد
اسماء : اوك يلا
رحنه صبينه اكل و وكلنه الجهال
هااا صح راح تسألون هسه احنه وين
احنه ب2022 صار اسبوعين من دخلناها
و علاوي راح يعرس، يا ترى منو عروسته؟؟
منو تتوقعون علاوي تزوج؟
صارت ساعه 2 دكلي اسامه جاي بالطريق
تحضرنه و الجهال هم لبستهم
اسامه : ها الله يساعدكم
اسماء : الله يساعدك حبيبي، ها بشر بلشتوا
اسامه : اي أصدقاء علي اجو و عقيل و احسان بالطريق
غيداء : اسامه ماكو خبر عن محمد و سارة
اسامه : لا والله كلي اذا حصل طيارة يجي بس بعد مدا احصله و مرته هم ماكو
اسماء : ان شاء الله يجون يلا حبيبي اخذ الجهال للسيارة لبين ما نطلعلك الغراض و الحنه هم
اسامه : بسرعه گلبي كون اروح لأبويه بعد
غيداء : راح اطلع اني سومه و الجنطه هاي يمنه نحطها مو
اسماء : اي اي هاي بيها غراض الحنه، اسامه حبيبي اخذ هاي الجنطه وياك
غيداء : اني اطلعها
اسماء : لا نطيها لاسامه وأخذي اموري وياج
طلعوا و اني شلت صينيه الحنه و فستاني و طلعت وراهم، ثبتهم اسامه بالسيارة بحيث ما يتدمر شي و اجه اخذ علب الاكل مال الحفله
باوعت ماكو شي بعد ناسيته، اي زين كله تمام
اخذت دنو و طلعنه لبيت اهلي
التحضير و التجهيز كله ابيتي سويته
حتى الهوسه يمي هناك يوصلون معازيم امي المكان جاهز متصيح عليه واني يدوب اشوف دربي وي الهوسه و الجهال
بالطريق اسامه شغل الديجي على أعلى شي
و اموري يركص وي عمته ليورة كاعدين
أجواء كلش حلوة سادين جام السيارة و خاله الفستان مالتها غيداء على الجامه بحيث ممبينه من برة و ماخذين راحتنه على الآخر
وصلنه بيت اهلي شفت عمي واصله و رنا هم
تلكتنه امي
غيداء : كلللللللللللوووووووش
امي : عاش صوتج خالاتي هي هاي الهلهوله المنتظرتها
غيداء : افا عليج خاله اشبعج هلاهل لبين ما تجي سارة هههه هلاهلها اقوة بعد
عمتي : راح يجون يعني
غيداء : ما اعرف والله محمد كايل لاسامه اذا حصل طيران يجي
اسماء : غدو حبي صعدي الفساتين، اروح ادخل الغراض وي اسامه، عمه فدوة اخذي دنو يمج
عمه : اي جيبيها للسلطانه، رنااا رنااا خاله تعاي شوي
اجت رنا فدوة شلون حلوة طالعه لابسه فستان محجبات بس كشخه يجنن
رنا : هلا سومه شلونج حبي
اسماء : هلا گلبي، هسه اجيج
عمتي : رنو حبيبتي وي اسماء فدوة دخلي الغراض بلا امر عليج
رنا : تدللين عمه
طلعت للحديقه اخذت من أسماء دخلت صندوقين
وهي جابت صندوقين و اسامه جاب واحد
خليناهن بالمطبخ
اسامه : علي جاي هسه و الولد هم وياه، اسماء تحضرون كلشي و تطبون وماريد بشر منكم يبين مفهوم
عمتي : شنو منروح نحني العروس
اسامه : مدري اسماء علي ما كالج شي
اسماء : لا ما كال و ما اعتقد يسوون حفله
عمتي : لو سارة هنا جان فهمنه منها
اسامه : سارة شكو
عمتي : غير هو علي حاجيلهم هي و اخوك
اسماء : هففف بلكي الله تلحك
امي : سومه مامه دخلي غراضكم رتبيها حتى ما تنخبصون من يجون
اسماء : اي يوم صار
رنا : عمه فرح و كرار اجو بس يردون احد يطلعلهم لراس الشارع متيهين الفرع
عمتي : غيداء مامه روحي لاخوج كوليله خل يشوف منو يدزلهم
غيداء : اي
طلعت للحديقه صار كدامي اكرم صحته
اكرم : ها حبيبي محتاجين شي
غيداء : اي رايدة اسامه يطلع لكرار تيه الفرع وين
أكرم : ماشي هسه اكوله
غيداء : اي فدوة لا تتأخر
أكرم : بدليله لآدم و جيبي يمي لا يروح يعذبج
غيداء : اي والله فدوة لوجهك تسوي فضل
أكرم : تدللين حبيبي، كم غدو عندي
غيداء : هههه تفداك غدو وعشيرتها
دخلت لبست ادومي و جهزته و نطيته لأبوه
غيداء : رنو فتحي شوي شالج لبين ما يجون عود لفي
رنا : اروح افتحه وهاي تتخبل ومالحك الفه خلي هيج
غيداء : زوزو، عماتو تعاي يمي شويه مامه دتشتغل
رنا : اووووه يوم المنه تروح يم احد لازكه بيه متقبل
غيداء : ادم هم هيج معلك بيه
رنا : اكولج سارة ماكو
غيداء : مدا احصلها، مدري تجي لو لا الكل يسأل عنهم
رنا : شكو رجع محمد مو على اساس يستقر هنا
غيداء : علمود سارة
رنا : ليش شبيها
اسماء : كلللللللللووووووووووش
علي : خرب فضحتينه
اسماء : يمه اذا لاخويه ما اهلهل المن تريد لعد، غير عندي حظ و بخت و اليوم الحنه مالتك
علي : فدوة لگلبج يا طيبه
امي : كللللوووش الف مبروك يمه، حصنتك من عيون الناس و باركتك بينهم
علي باس ايد امه : فرحتج عندي تسوة الدنيا كلها يالغاليه
عمتي : الف مبروك خاله يارب يتمملك على خير
علي : يبارك بيج خالتي، والله ما قصرتي انتي هم
غيداء و رنا : الف مبروك
علي : يبارك بيكم و يوم تفرحون بزهورة و ادومي
الكل : آمين
اسماء : يلا حبيبي اصعد القاط مالتك بغرفتي تجهز بسرعه و انزل لتطول على الولد
علي : اي رايح
صعد بسرعه شوي و صعدت وراه
اسماء : محتاج شي علاوي
علي : لا حياتي بس مجاكم خبر عن محمد
اسماء : لا
علي : كتله اذا متجي اخرب العرس خل اشوف شنو حجته بعد
اسماء : ياااا و عروستك شذنيها
علي : اي حتى ما يردلي فره عرسه، فريته بغداد كلها وهسه بعرسي يريد ياكلها عليه
اسماء : ههههههه متجوزون انتو
علي : عطر اسومه بسرعه
رحت طلعتله العطر دك تلفونه
علي : ها عقيل انت وين
عقيل : بالمطار
علي : اجو يعني
عقيل : يكول اي بس ماكو اليوم طيران لا من لندن رأسا ولا من تركيا مدري ياخط متبع
علي : المهم يجي
أسماء : هاك حبيبي
علي : عاشت ايدج
اسماء : علاوي حباب بس يوصل محمد كولي
علي : صار تدللين، يلا انزل بعد
اسماء : يلا
نزلنه و طلع علي راح لجماعته، يجون بزفه بعدها يبدون مراسيمهم مال الحنه و سوالفهم
غيداء : ها مامه بشري محد خابر
مها : ماكو خبر، لحد يسألني بعد
عصبت لان ميجاوبون علينه و مندري هسه هم وين
جهزنه كلشي، ميز الحلويات و ميز الطعام
و اماعين تفريغ كلشي جاهز تمام بعد
سدينه الباب و دخلنه بعد نلتفت لنفسنا
غيداء : هاهيه بعد مو نبدل يعني
اسماء : اي حياتي صعدوا بدلوا
رنا : اني اروح بهذا فستاني ما احتاج شي
غيداء : امشي حبي امشي خلي مكياج رتبي وجهج
رنا : دمشي يلا
صعدوا البنات و بقيت اني جوة
نص ساعه و اجوي بيت خالي جاسم
الي زمان ماشفتهم زين اللي تذكرونه
بعدها اجوي صديقات امي
قدمت للكل و صعدت بدلت بسرعه و نزلت
صارت ساعه سته صارت هوسه برة
دخلوا الشباب للحديقه و جايبين واحد يغني هم
سوولهم جو يجنن احنه نباوع من الاستقبال
نزلوا على ركص و هز واحدهم اضرب من الثاني
عقيل وكف بالنص يصيح يوم الالي و اذبح طلي
و الولد وراه يصيحون يوم الالك، موتنه ضحك
إحسان دار الكامرا عليه و جان يصيح
إحسان : علي عقييل
جاوبوا : هااا
احسان : شرااح نسوي بمحمد من يجي
علي : نحرگ دي**
عقيل : محمددد اخليك تندم لان عرفتني
إحسان : هذي نتيجه تأخيرك
الكل ضحكوا عليه متحلفين بي ليهسه ما بين
صارت 7 نص اجت السيارة و كالوا يلا
كلنه تجهزنه و طلعنه نروح لبيت العروس
الاغاني بالسيارة بأعلى شي و الكل يصفگ
امير و زهراء بت رنا من الجامه طلعناهم و يغنون وي خوالهم، عبالك زفه رايحين
عمتي بقهر : لسه عندي امل يجون
غيداء : ان شاء الله مامه، محمد ما يعوف علي بهيج يوم هو خبله لحد ما خلاه يروح يخطبها عاد هسه يسووها مفاجأة اذا ما لحك اليوم ف باجر اكيد يجي
اسماء : نفتح خط سارة اعتقد وصلوا العراق
غيداء : اسكتي لا تسمعج امي وانوب تاكل گلبنه لحد ما يجون
رنا : كافي مامه نزلي
زهراء : نااا بابه نااا هههه بااباا
رنا : هاي اجو عيالي هم، كملت الزفه زين
اسماء : اي طبعاً يجون هو غير كلهم عزمناهم
غيداء : ليش ما جيتي وياهم
رنا : لا جيت وي عباس و مرتجى
غيداء : هااا د يلا بنات، سومه صينيه الحنه ويانه مو
اسماء : بسيارة علي
نزلنه دخلوا و اني اخذت صينيه الحنه و طبيت
الولد سوو هوسات بالبات وي اخوان العروس
غيداء : كلللللللوووووووش
اسماء بصوت ناصي : اللهم صل على محمد وآل محمد ولج مرت أخويه صدك حلوة
غيداء : ههههههه
سلمنه على هاجر و أهلها و شغلوا الديجي الكل ركص و هي نزاكتها و رقتها ذابت بگلبي فدوة
شوي و دخل علي انجن بيها
باسها من راسها و حضنها حيل
علي : كل هذا الي
هاجر : لاء، هذا لحبيبي
علي : اخ گلبي
اسماء : علاوي عيني نحنيكم و انطيك وكت وياها
علي : قاطعه اللحظات خل اشوفها اول
خاله هاجر : هههه تلحك خاله، الله يسعدكم يارب
علي : تسلمين خالتي
كعدناهم سوة مدت ايدها حتى امي تخليلها حنه
بقت سادتها لحد ما طلعت فلوس خلت بيدها يلا فتحتها و علاوي هم خالتها حنت ايدة
بعدها سوينالهم جلوة و كاموا رگصوا
فدوة اروح لضحكته و فرحته
يارب اخذ من سعادتي و نطيهم
طلع علي و رجعوا البنات دك و ركص
لحد ما هاهيه نرجع، سلمنه و اتفقنه باحر ب 9 نجي ناخذها للصالون و الأهل يجون للقاعه على ساعه 4
وصلنه بيتنه، اهليتنا باتو عدنا
و اهليه اسامه راحوا لبيت عمي
و اني اخذت زعاطيطي و رجعت بيتي وي اسامه
بالليل بعد ما بدلنه و ارتاحينه خابر محمد
اسامه : هلا والله هاي وينك يمعود
محمد : هلا اسامه شلونكم
اسامه : بخير بشر وين انتم هسه
محمد : هممم بالنجف قبل شي ساعتين وصلنه
اسامه : وليش ما اجيت علي كلش مقهور
محمد : صارت عراقيل، الصبح اشوفه ان شاء الله
اسامه : اجي عليكم
محمد : لا لا هاي اجونه عقيل و جعفر
اسامه : ها ماشي اي شي تحتاجه خابرني
محمد : ماشي، مع السلامه
سديته منه التفتت عليهم
جعفر : نطلع هسه لو تزورون
سارة : لا فدوة نروح لبغداد مبيه ترة
عقيل : ديلا لعد توكلنه
محمد : نطيني الصغيرة عنج
جعفر : افضل تجي يم خالها وانتو احتاروا بنفسكم لحد ما نوصل
رجعنه لبغداد و سارة رأسا نامت كلش تعبت من الطريق و رناد نحسه صايرة وهاي تعبت وياها
وصلنه لبيت اهلي نزل عقيل رن الجرس
نزلنه اغراضنه و رناد هم غافيه بيد جعفر
شوي و نفتح الباب أبويه، حضنته مشتاقله حيل
صار اكثر من سنه من آخر مره شفته بيها
سلم على سارة و اخذ رناد يشمشم بيها
دخلنه و تلگتنه امي و دموعها ما وكفت
كلش تأثرت بيهم، كلش مشتاقلهم
كاعدين و نزلن عماتي مليكه و سميه تفاجأوا بينه
ساعه زمان و الكل كعد، طلعوا هنا بايتين
رزاق : طولت هالمرة ممسويها قبل
محمد : كورونا غدرتنه وراها مشاكل جوازات سارك و رناد
كرار : كول همزين كملتهن قبل عرس علي
محمد : هو شنو اخرني هم سوولي هوسه بالمطار و اخذوا الفيزا كلش اذونه والله
ابويه : الحمدلله اللي وصلتوا بخير و سلامة
محمد : الحمدلله
رنا : كوموا بنات ندخل جوة احنه ناخذ راحتنه أكثر
فرح : يلا سرو كومي حبي
سارة : غيداء وين شو ما نزلت
امي : اخذها اكرم و نزلوا بفندق مقبل يبقى يكول اني ولد غريب بينكم البنات مياخذون راحتهم
سارة : خطيه
جعفر : سارة تعاي اخذي الصغيرة، اروح اني بعد
محمد : ابقه هنا وين تروح تأخر الوقت
جعفر : لا مكدر تعرف امي وحدها بعد
سارة : اجي وياك
محمد : نروحلهم عود لتخافين
عقيل ' يلا اودعناكم اروح وي جعفر اني هم و نلتقي باجر ان شاء الله
محمد : انت وين
عقيل : ترة اكرم نسيبكم ما بقى تريد اني ابقه، مع السلامه تصبحون على خير جميعاً شحنوا لباجر ورانه ردح ترة علي يردح على راسنه لو شافنه كاعدين
محمد : ههههههه تصبح على خير، ماقصرت عقيل
عقيل' تدلل هو محمد واحد عدنه
طلعوا الولد و كعدنه احنه
سارة دخلت وي البنات و اني هنا يمهم
مددنه نسولف و غفيت على روحي
.
.
سارة
.
.
رضعت رناد و نومتها يم زهراء بت رنا
و كعدت يمهم حجولي عن سوالف الحنه و شسوو
البنات بكروب دزوا فديوات الحفله كعدت وياهم اشوف بيهن و غفيت من التعب، ساعه زمان و حسيت على بحي رناد وهاي الليل كله هيج عود الصبح نامت 3 ساعات على فد جرة أخيراً
مدري شكد مر وحسيت على صوت البنات يمي
انداريت وراي ماشفت رناد
سارة : صباح الخير بنات
فرح : صباح النور حبيبتي
بلسم : صباح النور
سارة : بنات، رنودة جوة
فرح : اخذها أبوها قبل شي ساعه
سارة : ها ماشي
كمت غسلت وجهي و توضيت صليت الصبح و نزلت
سارة : صباح الخير
الكل : صباح النور
اجه محمد ' صباح الحب سروتي
سارة : صباحك عافيه، رناد وين كلولي أبوها أخذها
محمد : اي مردت تكسر نومتج، جوة يم غيداء
سارة : ها اجتي
محمد : اي جوة
دخلت يمهم : سلاام غدووو
غيداء : سروو شلونج حبي، مشتاقلتج حييل
سارة' حياتي واني هم كومه، شلونك أبو آدم.
أكرم : هلا يابه حمدلله على السلامه
سارة : الله يسلمك، ادومي خالاتي تعال
غيداء : لتحاولين وياه يستغرب كلش
سارة : هههه كلهم هيج
غيداء : اييي احجيلي شلونكم، وينج بارحه گلبي عليكم نار ما احصلج لا انتي ولا رجلج
سارة : سكتي لعبوا بينه والله كومه بجيت منورة الجوازات
غيداء : سمعت محمد ديحجي لبابه، ليش هيج محمد مو جان يروح ويجي براحته ولا كأن لندن شو محد اعترض بيهم
سارة : اخوج ميستعمل جوازة العراقي حبي لهذا كلش سهله روحاته، بينما اني و بته على جوازاتنه العراقيه لهذا نلعب بينه طوبه
غيداء : تالي شلون ترجعون لعد
سارة : ماكو رجعه ما اكدر بعد تخيلي رناد تكدر تروح واني لا
غيداء ' هاي ليش
سارة : اي عدها هويه مو عراقيه و محمد قدم اوراق لجواز يسويلها هم لان العراقي تلف ميفيدز
غيداء : والله زمن، جان جواز العراقي اقوة شي
دخلت فرح : بنات اسماء تكول منو تجي للصالون هي رايحه على هاجر
غيداء : اني ماروح اكرم مقبل
فرح' ليش خويه خليها ويانه
اكرم : ليش ترحون و تصرفون تالي باقيات بحجاباتكم؟؟ تردين روحي بس الشال ما ينزل من راسج ولا ثوبج يتبدل
سارة : هو مو عرس
أكرم : عرس مختلط ام رناد
سارة : هلااو يعني اني هم ما اروح فروحه محاجه اكولج أبن عمج شرح يغرد مو
غيداء : نسيبه ما قصر
أكرم : كتلج روحي بس نطيتج شروطي
فرح : شوفي كرار هم ما قبل ترة نروح بس ع الاقل خل نضبط مكياجنه هنا وي الجهال وين تكدرن تخلون شي
سارة : جبتيها عدله اروح اقرة الغزاله لرجلي
فرح ' يلا بسررعه
غيداء : حب قلبي
أكرم : لاء
غيداء : حبااب والله ادومي ميثبت شلون اركز وياه
اكرم : هسه اخذة و نروح للفندق حتى أبدل وانتي سوي مكياجج براحتج
غيداء : انت متحبني صاير
أكرم' هااا بلشت الهرمونات، محممد محممد
غيداء : شكو تصيح على أخويه
دخل محمد : ها يابه
أكرم : اسمع اختك اني تعبت من هذا الفلم
محمد : شكو
غيداء : هاي كل قوتك اكرم تحيل اخويه عليه
اكرم : اي والله ما اكدر ارزلج راح تسوين اني ابيت اهلي ترة اصيحهم، سهلتها عليج و صحت لخوج اني حتى اسرع الفلم مالتج حسبي سويتله skip
محمد ' احجي شكو
غيداء : ماكو شي
طلعت مقهورة : شبيكم
أكرم : كلتلها ممنوع تروحين صالون، يابه ليش، قاعه مختلطه يعني حجاب يعني مكياج خفييف، ها انت متحبني ها ادومي ميكعد وعلى هالفلم كل مناسبه
محمد : وانت شبيك حتى تصيح، كول لاء و اترك الباقي شكو تناقش
اكرم : اييي مو هي هيج رح تسمع
محمد : والله هذا الموجود، هاي سارة بس كالتلي و عرفت قاعه مختلطه اللاء لاء بدون نقاش ا نت صوجك
سارة : حبي خابري أسماء كوليلها محد يجي
فرح : لا اني و بلسم رايحين
سارة : ماشي حياتي
اجت عمه مليكه : ايي شلونكم عمه، احجيلي هناك مرتاحه زينه كعدتكم شغلكم
سارة : الحمدلله عمه، الله راضي علينه و منطينه من رزقه
مليكه : الف الحمد لله، والله يعمه اكلت گلبهم لعمج و عمتج من كلولي ولدتي هناك، ليش ما اجيتي هنا يمنه
سارة : ممنوع اطلع او أسافر جنت بالحجر لان كورونا صرت مرتين خلال الحمل، و الولادة صارت مخطرة كلش تأذيت
مليكه : يمه سودة عليه وهاي محمدنه وحدة يمج يلوب محد اكو من اهلكم
سارة : الحمدلله اصدقاءة يمنه جانو بعدهم ما تركوه وحدة لحد ما تعديت مرحله الخطر
مليكه : الله ينطيهم العافيه
سارة : آمين يارب
مليكه : ما اثرت الكورونا عليج بعدها
سارة : بالبدايه كالو ميصير ارضع الصغيرة لان مصابه و خايفين لا تنعدي، خلوها عدهم بالخدج شهر و اني بالحجر داخل المستشفى، بعدين كالو لا حتى اذا مصابه يبقى حليب الأم صحي وهيج شي على شي حمدلله عدت
دخل محمد يمنه
مليكه : شصاير بيكم يعمه ليش هيج ما حجيت والله جان اجيتكم وانعل ابو كورونا، مهم احد يمكم
محمد : عدت بدعواتكم عميمه الف الحمد لله
سارة : اجتنه غيداء ورة ولادتي ب4 أشهر بقت عدنه أسبوعين و رجعت
مليكه : كلتلنه اجت بس ما حجتلنه شي عنكم
محمد : اني كتلها، ماردت اقلقكم و أبويه لو درى يجي او يجبرنه نرجع واني بس اريدها تخلص مرحله الخطر و تتعافه مو انوب احتار هنا هم
سارة : الف الحمد لله و الشكر اللي هسه خلص صارت سوالف ويارب ما تنعاد علينه
مليكه : اي والله حمدلله
اجوي رنا و رزاق، محمد كعد وياهم يسولف
كمت اني اكلت لكمه و طلعت ملابسي كويتهن
و كويت ملابس لمحمد هم جهزت كلشي و نزلت
عمتي : ها عمه محتاجه شي
سارة : لا حبيبتي كملت و نزلت يمكم
عمتي : زين تسوين تعاي يلا نكعد وياهم
سارة ' اي يلا، بس رناد وين
عمتي : اخذها عمج و طب جوة للصاله
سارة : ماشي
كعدنه وياهم، عمي خال رناد بحضنه
ادم و زهراء يمه منا ومنا
بعد جهال اسامه و يكمل الجيش
على ذكرة سمعنه صوته
اسامه : السلام عليكم
الكل : عليكم السلام
اسامه : ابو رنوود عيني
كام محمد حضنه تسالموا
اسامه يحجي و محمد يكوله اي اي
اسامه : حمدلله على السلامه سارة و مبارك عليكم رنودة نعيد التهاني وجه الوجه هم
سارة : ههههه الله يسلمك و يبارك بيك
اسامه : وينها ولج عموو
عمي : على كيفك وياها بابه
اسامه : اوي فدوة اوي فدوة، ولك محمد بتك نسخه منك ولا غلطه
محمد : ههههه طبعاً
اسامه : ادري كل هالشكول و تسميها رناد لييش
محمد : منوراك والله عاندت بتك سميتها دانيه تخبل علي و خله بتي براسه، امشي رجع اسم بتك ودق حتى اغير اسم هالطفله و ما ينگ على راسي علي
اسامه : وشعليك كوله اي و روح سجل غير اسم
محمد : لاا علاوي هذا ماسويها بي
سارة : أصلا هي شايفه علي اكثر من ابوها
اسامه : شكد فاهي لعد
محمد : مو فاهي و إنما فرحان بنتي عدها عمام افتخر بيهم هناك من عينهم وراها اذا ناقصها شي يجي قبل لا تلحك سارة تطلبه مني
سارة : والله اجت ايام مايروح للدوام يبقى مرابط يمها، بحيث أكمل شغلي واني ناسيتها أساساً
عمتي : والله ما قصروا علي و عقيل و إحسان
اكوللها سارة عمه محتاجه شي محمد منتبه عليكم
تكولي والله عمه بنفسي شي ينقص حتى اطلبه ممقصرين لا محمد ولا الولد كلهم فوك راسي ممخليني اعتاز حاجه
محمد : اي والله، لا وعقيل لو سمع رناد تبجي و متنام يكعد يبجي وياها يكول لاحسان هاي طفله شلون تعبر عن اللي تريدة
سارة ' صدك جان صدمه
اسامه : اكوللكم يعني هسه اسامه كخ صار مو
محمد : هههههههه لا مو كخ بس رناد بعدها متعرفك عمها مثل عمامها الباقين
اسامه : يصير خير
محمد : امير وين لعد
اسامه : اخذته اسماء لبيت اهلها هو ودانيه كالت يبقون يم عمتي أحسن لان هي لهناك تروح
محمد : هااا
مليكه : يلا يبنات نكوم نتجهز حتى ساعه اربعه نروح للقاعه بعد
اكرم : غيداء
غيداء : فهمت لتخاف
محمد لسارة : وانتي هم نفس الشي
رزاق : شبيكم
محمد : كول نفس الشي وهم يفهمون مرتك
رنا : ههههههه فهمت كلكم نفس الكاربون
دخلنه كل وحدة راحت تجهز نفسها
بدلت و ضبطت مكياجي وي الفستان كلش حلو صار
نزلت اخذت رناد لبستها همات جهزتها و نزلنه
سارة : حمودي حبيبي ملابسك ع الجربايه من تبدل شوف اختار الرباط النيلي لو الماروني خليتهن الك عاللي تريدة
محمد : ماشي گلبي عاشت ايدج
اسامه : كملتيها
سارة : اي بقه بس اوكلها
اسامه : جيبيها و روحي سويلها
اخذها و سويتلها اكل و وديته هو طعمها
ساعه زمان و كلنه جهزنه، طلعنه للقاعه من بعد توصيات، محمد كال يجي وي الولد عاد طلعنه
القاعه جوها حلو مشغلين ميوزك كلاسيك هادئ
اللي نعرفهم نسلم عليهم و المانعرفهم بعيدين
اكو اليركص و اكو اللي يصور
بس ميزنه كاعدين بمكانه مكتفين ع الإبتسامه
اجه صوت الزفه و المصورة سوتلهم مراسيم استقبال كلش حلوة، هاجر هم كلش حلوة طالعه شكد ما اكول عنها نزاكه هي بعد أكثر
عقيل و محمد و احسان و اسامه اخذوا علي و نزلوا جوبي بعدها الولد انظموا وياهم كلش حلوة صارت ركصتهم
سوو ركصه سلو للعرسان و انضموا وياهم كلواحد و مرته الأجواء تجنن ولا غلطه
ركصنه اني ومحمد وهذا كلشوي ذاب حجايه لعلي
والثاني يجاوبه سوو جو تحفه بمعنى
صار وكت الكيكه قطعوها
هاجر وكلته قطعه شافها طيبه
بدل ما يوكلها اكل قطعتها هم موتنه ضحك
هواي ضحكنه بسوالفه
منضمين الحفل : معازيمنه الأعزاء، صار وقت العشه اطلب من الجميع الجلوس في اماكنهم، عرسانه الحلوين تكدرون تنظمون وي المصورة لاخذ كم صورة الكم سوة
فعلاً بلشوا يوزعون العشه و علي و هاجر يصورون
اسماء كعدت يمي : أخيراً شفتج، ولج مشتاقتلكم
سارة : حياتي اني هم والله، و الف مبروك لعرس علاوي يارب يكون زواج الدهر
اسماء : الله يبارك بيج عمري، شحدة ما يكون الدهر غير خبلها للبنيه وياه
سارة : ههههه اي والله
اجانه علي : هاااا يلا وين چنتي
محمد : منو هاي
علي : رناد منو يعني انشالله تريد تاكلها عليه عيني بعدها ابطن امها حجزتها
محمد : هههه امشي التهي بعروستك و عوف بنتي
علي : تحلم، سارة نطيني الصغيرة
أخذها و راح خلاها بحضن هاجر و اخذ وياها صور
فدوة شكد يحبها يحظها لرناد عليهم
رجعت الأغاني و الشباب واكفين بالنص يركصون وي علي و كلشوي واحد بيهم يختار اغنيه على ذوقه
احنه رحنه لهاجر باركنالها و اخذنه وياها صور هم
سارة : اكولج سومه امها لهاجر ماكو، شو ياهو تعرفنه عليها لو عمه لو خاله لو مرت عم
اسماء : شبيج محجالكم علي ... هاجر يتيمه، امها و ابوها و اخوها توفوا بحادث
سارة : عزة، يمه گلبي الله يكون بعونها
اسماء : اي والله و خالتها هي الربتها
سارة : حبيبتي ما تستاهل
اسماء : هذا امر الله بعد، الله نطاها خاله ما فرقتها عن بناتها و خافت الله بيها حمدلله الله هسه عوضها و نطاها علاوي
سارة : فدوة عاد شكد يحبها والله اجتي ايام يكوله لمحمد شلون اني هنا وهي هناك تعبانه وحدها و اصابتها قويه صارت بيها الهنديه هواي فرفح عليها
اسماء : سكتي فترة كورونا دمرتنه
سارة : كولش والله
الديجي : حضورنا الأعزاء صار وقت نودعكم و نكوللكم بااي باي بيباي بيباي، الكل وي الأغنيه غنى
اجتي الزفه و طلعنه وياهم اخذنالهم فرة و رحنه لبيتهم، نفس زفتنه سوو هم صوروها كلها علي خبلهم خبال اريد زفتي ما تفوت منها لقطه
دخلنه بيتهم و هم سوو هوسات و اغاني
مجهزين كلشي بحيث اول ما دخلنه شتغل الديجي
ريم بت خالتها : الف الصلاة و السلام عليك يا حبيب الله محمد كلللللللووووووش
اختنه خوش اخت تستاهل الهوسه
و اختنه خوش اخت تستاهل الهوسه
اسماء : واخونه خوش اخو يستاهل الهوسه
عقيل : شبااب شبااب حسام
جبناها و اجت ويانه
جبناها واجت ويانه
هم عريس هم نشمي هم ربعه يزفونه
هي وياه و تتمناه، هو بحبها خيعونه
سمعونه هلهوله، الف مبروك كولوله
الكل : كللللللللوووش
عرسه العيد جا شيريد اذا مثل الگمر مرته
اذا مثل الگمر هووووو
الكل : هاي الرادها وهاي التمناها
بنت الشيخ لبن الشيخ جبناها
محمد : صار سنين تبجي العين، يكسر گلب اللي يشوفه
إحسان : هسه ارتاح و الهم راح قصه حبهم معروفه
الكل : هاي الشافها گلبه الحلم بيها
حبي و روحي و عمري يسميها
كللللللللووووووش
محمد : متعرفون حبها شلون، متعرفون اسألوني
علي : ههههه بعد بعد فضحوني عدل لتقصرون
محمد يعاندة : من تفوت گلبه يموت حيل يحبها صدگوني
الكل : منوصيك نعرف انت تحواها
انسى الدنيا كلها وهاي لتنساها
هاي الشافها گلبه و الحلم بيها حبي و روحي يسميها
هاي الرادها وهاي التمناها بنت الشيخ لابن الشيخ جبناها
اسماء : كللللللللللوووووش
الف مبروك حبايب گلبي
علي : هاي شنو خلصتوا بعد بعد يلا هذا عرسي ولكم
إحسان : ابجي حتى هسه اركصلك
علي : مو بعدك ممعرس اطلعها بيك ها
عقيل : ولك صوتنه راح بقه حسام يغني وحدة تالي نطانه الاغينه وراح بيتهم زعل
علي ' ولكم بعد ماعدكم علي هاي آخر ساعات استغلوها قبل ان اهاجر إلى يثرب مع هاجِرَتي
محمد : ههههه كفينه و فينه يلا اخذ عروستك و اصعد
علي : شوف هذا ترة حنتي ما اجيت بيها
محمد : شسوي فهمني اشيل الطيارة و اجيك
اسماء : يلا يلا آخر وحدة، الف مبروك كولوله
شغلوها وصلو مقطع و كامو يغنون وياه
الكل :
بنت شيوخ جبناله ...... على هالحلوة هنياله
وفي تستاهل الهوسه ..... اخونه فدوة رحناله
فرحتك هي فرحتنه ...... مهنه بعرسك مهنه
اليوم نذب لحم كللنه...... ومنقصر على الغالي
نلعبلك جوله و منقصر، نركصلك ركص يعور
رگص عمارة ارگصلك حالف، يالگاعد بالكوشه منور
محمد : كافي لتلح راحت حنجرتي
علي : عود سوولي زفه والله يا الله
يلا هجورتي امشي نصعد إلى يثرب احنه و نعوفهم ناس متحب تفرحلنه، هيا اذهبوا إلى الحبشه فهنالك حاكم لا يظلم عنده أحد
اسماء : ههههههه
خاله هاجر : دير بالك عليها خاله، نطيتك أمانه اختي
حن عليها و صيرلها اب و ام و اخ اللي فقدتهم
خليها تحتمي بيك وما تحتمي منك
الله يسعدكم و يكتبلكم من السعادة نصيب
علي : امانتج بالحفظ و الصون خاله، ان شاء الله ما يجي يوم و اكسر خاطرها وان صار لا سامح الله يكون هذا آخر يوم بعمري، هاي هجو فكه العين و لوعه الگلب و وفاء الكلمه، بت گلبي هاي لتخافون عليها
خاله هاجر : الله يسعدكم يمه، سبع سعادات يارب
علي : تسلمييين، يلا يابه تصبحون على خير و كلكم ما قصرتوا عدا محمد ما اجه بحنتي هاي كتلكم يلا اودعناكم
ضحكنه عليه قافل على محمد
كلمن اخذ مرته و طلع بعد ما صعدوا
احلى عرس بحياتي مر عليه
حتى احلى من عرسي
رجعنه لبيتنه و كملنه الحفله هناك بين اهلنه
محمد : اكوللكم كيكه العريس ما بقت منها لو اخذوها اهل القاعه
اسماء : بقت ابيت اهلي علي موصي عليها مو من القاعه هاي
محمد : نسوي بيهم دگه هسه
اسامه : شنو
محمد : اروح اگطع عليه ليلته، اكوله اريد كيك
رزاق : ههههه والله يخبلك
محمد : والله ثرد نفسه و اخذ كيكه عرسي كلها تردون اعوفله كيكته، كومي سرو نروح عليهم
سارة : عزة كل عقلك
محمد : كومي ولج امشي كدامي والله اخبله اليوم
سواها صدك و هاي احنه واكفين ابابهم
دننتظر يفتحوها النا
سارة : شرح تسوي
محمد : صبري ........... الو
علي : شتعلت صفحتك محمد شتريد
محمد : تعال، رناد ماخذها للمستشفى
علي بخوف : ششنو رناد، جاايك
سدة الخط : ههههههه اني الك علي
فتحت الباب ام علي سلمنه و دخلنه للمطبخ
شوي و نزل علي خطيه وجهه مخطوف وبيدة السويج شافنه تفاجأ
علي : رناد وين، شعدكم هنا
محمد : كيكه عرسك وين
علي : شبيك وكت كيك بتك وين فهمني
محمد : بتي عد جدها غير
علي : محمد لتخبلني شبيها رناد شنو تكول مستشفى
محمد : ههههه ماكو شي جيت اخذ كيكه عرسي
اصعد كمل مين ما وكفت تصبح على خير
علي بهت بوجهه : هاي صدك تحجي محمد، كايلك تشاقه بكلشي بس ابقه بعيد عن رناد بشقاك
محمد : هاي شنو رح تبجي يمعود لو بيها شي راح اجي اكولك كل عقلك
علي : ولي من خلقتي محمد
عافنه وصعد، قهرني خطيه هو كلش يحبها
أخذنه الكيكه و رجعنه للبيت
حجالهم محمد شسوة عمي حجه عليه مقبل
وهاي تقريباً طلع الصبح يلا نمنه
حسيت على رناد تبجي مثل كليوم
بسبب كورونا الصارت عندي ونقص الفيتامينات
كامت الرضاعه متشبعها لازم انطيها وياه حليب قواطي، كل دا اعاني بسبب هالشي
مبقه عليه لا مناعه ولا فيتامينات كله راح
محمد : جيبيها حبيبي نامي انتي
سارة : لا وين أنام بعد ساعه 12 صارت
محمد : وذا انتي كلشوي كاعدة وياها نامي
سارة : ميخالف حياتي، هم يالله نكوم نشوف شنو نسوي غدة خوما نعوف عمه وحدها تجهز و الكل هنا و بعد كون اروح لاهلي
محمد : دمشي هسه بعدين نشوف سالفه اهلج
نزلت صبحت على عمتي وحدها
وياها ساعدتها حضرنه غدة و اسماء و غيداء هم اجن كلنه تعاونه لحد ما جهزنه كلشي
تغدينه كلنه و للعصر جماعه البصرة رجعوا كلهم
غيداء هم اخذها اكرم و رجعوا للناصريه
اني هم اخذت بتي و طلعنه لأهلي
شفت امي شلونها، سودة عليه هي هم الكورونا مأذيتها هواي رايحه منتهيه
سويت عشه و كعدنا نتعشه
صبيتلهم جاي و محمد فاتح جعفر بالموضوع
محمد : من تطلع منو يبقى هنا يم عمتي
جعفر : والله هو كل ثنين و ثلاثاء ابتهال تجي وباقي الأيام وحدها مرات تجي ام يزن جيرانه يمها وهاي هيج كاضيها
محمد : جعفر عمه كلش تعبانه وهسه انت دتطلع الصبح لشغلك على باب الله ترجع العصر ورك العصر، لازم احد يمها يبقى، إبتهال تجي بس لابد ما تصير عدها سالفه تقيدها مرح تكدر كلمرة او مصطفى ساكت بس إلى متى، شوف اني ما اكذب عليك هسه اخلي سارة هم تجي مثل اختها اسكت شهر شهرين تلاثه، سنه بس هم رح ابدي اضوج اتحسس من الموضوع و الولد ساكت صار سنه 3 اشهر
جعفر : هي مجايه مجبورة هاي امها
محمد : وياك و صح كلامك امها و واجب عليها خدمتها بس انت هم مو يرادلك اللي تخدمك؟ تشوف طلباتك تشوف شنو تحتاج، خواتك شكد مراح يجون و يكولولك شنو تحتاج مرح تكدر تطلب منهم مثل ما تطلب من زوجتك انت شريكه حياتك سترك و غطاك
جعفر : ممفكر بالزواج، هو اني 22 سنه .... يرادلي هواي شغل محمد هواي لازم اتعب على نفسي حتى اتمكن، الزواج يريد، المرة تريد البيت يريد هذا كله لازم احسبه
محمد : صح وياك وكلامك عين العقل، بس فكر بيها من اليوم رح تشوفها فجأة هي دبرت انلمت، وذا على مصاريف عرسك وهاي الأمور، احسب كلشي خلصان انت إبنه، و اخويه الصغير اللي تريدة قبل لا تطلبه تلكاه حاضر و موجود
جعفر : رحمالله والديك اعرفك متقصر، تركلي الموضوع كم يوم خل ادانش عقلي و اصفي فكري و ساعتها يحلها ربك
محمد : اللي تريدة، لا تنسى عندك اخ جبير هم اي شي تحتاجه لا تتردد ماشي
جعفر : الله يديمك ويحفظلك سارة و الصغيرة
محمد : آمين يارب
دخلت سارة مطلعه فاكهه
محمد : يلا عيناي نروح بعد
جعفر : هاي فاكهه ناكل و بعدها توكلوا
سارة : شلونك جعفوري
جعفر : الحمدلله
سارة : فاتك عرس علي و ما اجيت يخبل صار
جعفر : الله يهنيهم يارب
سارة : آمين يوم الأفرح بيك
جعفر : الله كريم
نص ساعه و كمنه بعد، سلمت على امي و طلعنه
رجعنه للبيت بس عمتي موجوده
محمد : ها كلهم راحوا
عمتي : اي أبوك هم راح لدوامه
محمد : وهاي وحدج
عمتي : تعودت مامه مو أول مره
محمد : هاي بعد سارة و رناد يمج ما تبقين وحدج
عمتي : وانت
محمد : اني هم لازم أسافر هناك شغلي مام
عمتي : ارجع هنا شعندك هناك وهسه عائلتك هم بعد مقيد بيهم متكدر تاخذهم
سارة : المشكله اني هم دراستي هناك
محمد : هو مشوفين لازم اروح تني ادبرها بس انتي طالبه
عمتي : شرح تسوين بشهادتج عمه عبالج رجلج يخليج تتوظفين
سارة : هو كال عادي
محمد : اكولج مامه شنو عشاكم
عمتي : شفتي هاي تهرب ابني و أعرفه
سارة : بسيطه اني الك محمد تشوف
.
.
وهيج كضينه اليوم بين المناكر وياه
وبين رناد و عمتي
مر أسبوع و رحنه لعلي نباركلهم بعد
اسماء هم اجت
كعدنه عدهم ساعه و محمد كال يلا
مقبل علي اله نتعشه عدهم
بقينه عاد رحنه للمطبخ نسولف و نشتغل
اجانه علي : اسومه جاي عيوني
اسماء : اي حبيبي
علي : اي سارة متجون بالحنه مالتي مو
سارة : هههههه اخ يالحنه
هاجر : هو يوميه ينام و يكول خرب ببليسك محمد ما اجيت بحنتي
علي : شوف هاي، اكولج لو ما محمد عبالج انتي ابيتي هسه
هاجر : هااا يعني انت متريدني، حبك كلاوات طلع
علي : انننن اني كلاوات، ولج منو هاجر بيج إلى يثرب ها جان عفتج بالحبشه وي الكفار بس محمد كالي لا خطيه بعد انتظرتك اربع سنوات
اسماء : أي غدار يسويلنه اني وين و الحب وين تالي طلعت من جوة لجوة ولك ع الاقل كولي اني اختك
علي : شكو اكولج، ليغرج سارة تعرف ترة هاي صارت جنها جرادة وكفت تتسمع علينه اني و رجلها
سارة : هههههه اني شعليه أصلا هو اجه حجالي
علي : يا خاين، ولك محيداااان
سارة : والله منوراك كال هسه عقيل هم نفس الفلم بعد كم يوم هم يجي يفاجأني يحب وحدة بكذا سنه
اسماء : يسووها
محمد : بالله عليك عايفني هناك وجاي تسولف شنو
علي : صوجهن 3 نسوان ما عرفن يصبن استكانين جاي، صدك ما بيجن خير
محمد : مرتي خطار و مرتك عروس و اختك دتشتغل متروح حضرتك تصب مو بيتكم
علي : منو عروس، ولج هجيرة عرستي و ما كتيلي
هاجر صفنت عليه
اسماء : محمد فدوة اخذة طبوا جوة
علي : عود زعلتي ولج، ترة هذا محمدنه حماج اخو ريلج حامي عرضج علاوي الكيوت لتستحين كدامه شوفي هاي العوبه سويرة شلون عادي وياي تحجي لاني صديق رجلها الاقرب من اخوه علاوي
سارة : عمت عين الباميه، خل تاخد وجه عليك بعدين تفاخر بنفسك
اسماء : اكولج هاي شلون عشتي وياهم
سارة : هههه لا شبيج هاي زلاطه ترة حبابين
هاجر : والله مجان هيج من جيت يمه دا اتفاجئ
علي : ما طلك مو تسويلي عرس بعدين غشيتني، اربع سنين حب اطلعهن من خشمج عفت بنات نعمه الله كومه كدام هناك بلندن و بقيت احبج
محمد : امشي حباب والله لو تطردك من الغرفه حقها محد يلومها
علي : ولك اني شكد جنت اصف وياك على مرتك ليش ما ترجعهن الي
اسماء : اهووو علي و لزك فدوة روح يم الجهال خل اعرف اطبخ عدل
سارة : امشي رناد وحدها
علي : اخرتي اخذها منكم، امشي حمدمد ما يفيدن
طلعوا اسماء التفتت على هاجر
اسماء : هاي كل عقلج تسكتين من يبدي الفلم مالته
هاجر : اول مرة يسوي هاي سوالفه
سارة : حبي تعودي كل ما نجيكم حسبي علي عندة فصل
اسماء : بالضبط
هاجر : حبيت مجنون و ما ادري
اسماء : اخويه ولج ما اسمحلج
هاجر : كلت حبيت حبيت
سارة : يلا بنات شبقه بعد
هاجر : اني كملت
اسماء : هذا هم كمل يلا
تعشينه عدهم وي فصول علي الما تخلص
لاااا علي بعد ما تزوج صار اضرب لا يغشكم
طلعنه وصلنه اسماء و دانيه لبيتهم و رحنه لبيتنه
سلمت على عمي و صعدت
رنودة نايمه رأسا خليتها بفراشها و رحت بدلت
اجه محمد هم بدل و كعد يمي
محمد : سروشتي
سارة : همم
محمد : نروح للبصرة
سارة : لا فدوة حباب خل هاليومين ابقه بالبيت كلش دا اتقيد من اطلع
محمد : عوبه البنات يموتن ع الطلعات وانتي متردين
سارة : حبيبي، احنه نحب نطلع من وحدنه
من جهالنه كبار او من ماعدنه جهال
من النه كذا يوم مطالعين و صايرة بينه حصرة
بس مستحيل تلكه بنيه عدها طفله بكد عمر بتك و تكيف تطلع، بالذات انه بتك ترضع هاي اول فقرة تقيدني من غير انه مليت اريد شوي هدوء بحياتي
لندن تعبتنه، وأنت هم تعبت اعترف
خلينه نشبع شويه من اهلنه، نشبع من بعضنا
محمد : همممم ما اشبع منج اني، ليهسه اشكر الله اللي كافئني بحبج و رزقني بأعظم طفله بالعالم
سارة : گلبي انت، الله لا يحرمني منكم
محمد : آمين
سارة : يلا كوم خل انام شوي مدام بتك نايمه
محمد : زين اني شمفتهم منج من اجت ليهسه
سارة : كول لنفسك فوكاها تريدنه نطلع، طفي الضوة يگلبي و تعال دنام باجر ورانه مقلوبه لان كلش مشتهيتها من ايدين عمه
محمد : هسه اجي امقلبج صبريلي، هاي الضوة و طفيناه تعاي يمي اشو ...
.
.
بعد شهر
.
.
سارة : صباح الخير عمه
عمتي : هلا عمه صباح النور
سارة : عمي اليوم هم ما اجه
عمتي : لا هذا الأسبوع كله يكضي بالمستشفى
سارة : هااا مشتاقتله والله صار 4 ايام من شفته
عمتي : يجي يجي ان شاء الله، رجلج وين
سارة : طلع، ما أعرف
عمتي : بيت أسامه جايين اليوم ع الغدة
سارة : هااا زين مفكرة شنو تسوين
عمتي : اي تمن باكله و تشريب اسامه طلبه
سارة : زين لعد، اكوم انظف بساع لبين ما يوصلون
كمت بسرعه كنست و صعدت نزلت رناد خليتها يم عمتي توكلها لبين ما امسح، رتبت الصاله و كلشي نظيف جاهز
وي اذان الظهر دخلوا
سلمنه و كعدنه بين سوالفهم
مر الوقت لحد ما رجع محمد و تغدينا
العصريه طلعت فاكهه هم
قريب المغرب اجه عمي
ما حجه ويانه ولا رد السلام
دخل لغرفته رأسا
محمد : خير ان شاء الله
اسامه : كوم نشوف شبي
عمتي : خل اروحله اني صبروا
دخلت عمتي وراه و احنه مترقبين الوضع
اسماء : اكوللكم گلبي نغزني خاف صاير شي
سارة : الله يستر
محمد : اني رايحلهم
وي ما توجه ع الغرفه لزم اليدة ديدخل جان تصيح عمتي : وللللج يممممه بنتتتي
نصدمنه، گلبنه نرعب، صاير شي
محمد و اسامه دخلوا يمهم
عمه كاعدة تبجي و عمي ديبدل بسرعه
حجه وي اسامه رأسا طلع
اسامه : جايين وياك
اجه اخذ سويج سيارته و طلع
سارة : محمد فدوة شكو شبيها غيداء
محمد : متكهربين، آدم توفه و هي مخطرة و اكرم منهار عليهم مندري الباقين شنو وضعهم بعد
سارة : هئئئئئ
اسماء : يمه ادومي
عمتي : فدوة قاسم خل اجي هنا النار رح تاكل گلبي، فدوة انتظر اجي وياكم ، يمه غيداء شلون رح تتحمل
عمي : اهدي اروح اشوفهم و ابلغج عود
عمتي : شهدئ قاسم غيداء من تعرف رح تمووت، ابنها روحها من الدنيا
محمد : اهدي مامه امشي بسرعه جهزي نفسج رايحين
كامت متدري شطلع شنو تريد
دموعنه ما وكفت، راحت اسماء طلعتلها الجواريب و لبستها الربطه و العبايه وهي سودة عليه تبجي و تاكل گلبها على غيداء
طلعوا كلهم و بقينه احنه
مر الوقت على كيفه مو راضي يمشي
صارت ال11 بالليل اسماء خابرت على رجلها
هواي رن وماكو رد انتينه قلق
سارة : اسماء محمد دك، فتحت سبيكر : الو ها محمد
محمد : ها سرو، اسمعيني أبويه جهزوا نفسكم انتي و اسماء و الجهال، الصبح يجي عليكم كرار يجيبكم لهنا
سارة : غيداء شلونها
محمد : ما نعرف وضعها بعدنه أبويه هسه دخل يمهم
سارة : ووو آدم صدك يعني
محمد : هذا عمرة، الله يجبر گلبهم
سارة : لا إله إلا الله
محمد : رح نبقى هنا لحد ما تخلص الفاتحه حسبو حسابكم
سارة : يسوون فاتحه يعني
محمد : اي، حور اخت اكرم هم توفت
سارة : لا حول ولا قوة إلا بالله العلي العظيم ، ياربي صبرهم يارب
محمد : آمين، يلا حياتي اروح وانتي مثل ما گتلج ماشي
سارة : صار اي شي يصير بلغني، سداه
اسماء : ولج شجاهم ليش هيج
سارة : ما اعرف، كومي خل نشوف شنلم
اسماء : ماعندي هنا اسود شسوي
سارة : انطيج من يمي وهناك هم اشتري
اسماء : امشي صعدي اني الم جنطه لعمه
و فعلاً جهزنه بين البجي و الدموع و الدعاء بالرحمه
صار الصبح اجانه كرار اخذنه الهم
ام صادق من الصدمه صارت جلطه و شلل
رندة زوجه صادق هي اللي قايمه بالبيت و تجهز للفاتحه و هم خطيه دمعتها ولا نشفت وبين الشغل و الجهال هلكت، كمنه ساعدناها بلي نكدر عليه
رجعوا من الدفن اكرم منتهي
كاعدين الكل بالصاله و ساكتين
اكرم : ولك محمد راح آدم
محمد : لا اله الا الله
أكرم : جنت يوميه اشوفه و اكول بگلبي أكبر اريد احجي وياك، نروح و نرجع للمدرسه سوة و اروح وياك بتسجيل الكليه، تجيني خجلان بابه هاي البنيه حبيتها، بابه زوجوني، هههه والله بابه ماسويت مثل ابوك، ولك باباتي دفنتك بيدي وانت طفل
الكل بجه عليه، حاله يكسر الگلب
صارت ضربه على باب الشارع شوي و دخل ولد شاب يطلع نهايه العشرين، عيونه حمر و مغورگه دموع
بقه يباوعلهم واحد واحد و يهز براسه لا
صادق كام عليه حضنه و ثنينهم بجو
مشتاق : كلولي حور نطتك عمرها، ضحكت بت گلبي ما تسويها هيج و تروووح بدوني، ولك صاادق كتلك خل نكمل عررسنه، ولكم رجعولي مررتي، اكررم كتلي بس تطلع سنه خالك نسوي العرس وهاي صار شكد من طلعتتت، شنو استفاديت هسه فهموووني مررتي ويييييييين
أكرم مدله ايدة : هذا ترابها بعدة على أيدي، راحت حور عافتنه و راحت
مشتاق : آآآآآآه
انهارينه عليهم، وضعهم يمرد الگلب
أكرم ساعه يصيح آدم و ساعه يصيح حور
و مشتاق انتهى على مرته اللي ما فرح بيها بعدة
و صادق مايدري شيسوي كلشوي يفرك صدرة و ياخذ نفس عميق
جان يوم كلش مؤلم، اثر بينه كلنه
مندري شوكت نمنه و كعدنه هم بعدهم على كعدتهم
محمد : امشي نروح لغيداء
سارة : ورناد
محمد : اخذيها، منطول و راجعين
سارة : ماشي
بسرعه طلعنه للمستشفى و هم غيداء ع الاجهزة و فاقدة الوعي بعدها، عمي رح يتخبل عليها ميدري شيسوي
ساعه زمان و رجعنه، اجوهم ناس يعزوهم
مرة سألت رندة شلون صار الحدث
رندة : كلنه هنا مجموعين لان جمعه، و غيداء كالتلنه حامل فرحنه بيها، التهينه تحضير غدة و شيل و حط
غفلنه عن الجهال شويه دنشيل الغدة بعد ما كملوا
سمعنه صيحه ادم، طلعنه و وشفناه هئئ 😭 سودة عليه جان كيبل مكطوع و نازل ع الارض و هو لازمه
غيداء من حار گلبها ركضت عليه تجرة انصعقت 😭 حور دفعتها و هي سحبت آدم و ثنينهم راحوا بيها
ما ادري ماي جان ما ادري من الكابل مدنفهم كلشي صار بسرعه، لحظات خسرناهم ثنينهم
المرة : و غيداء وينها
رندة : تنتظر دعائكم الها فدوة لتنسوها
المرة : لا اله الا الله، الله يكومها بالسلامة يارب
مر أسبوع، خلصت أيام الفاتحه و أكرم مرابط بالمستشفى يم غيداء يوميه يدخل يمها و يطلع منهار
يتوسل كولولها لا تعوفني هي هم
وضعها بعدة خطر، فقدت جنينها
تخبل أكرم عليها
مر شهر ثاني، خابرو محمد كلوله صحت
راحلهم رأسا، يكول من افتهمت بآدم
صار عدها انهيار و رأسا شكل السكر
عمي ما قبل تبقى جابهه عدنه
مو غيداء اللي نعرفها
شخص ثاني صايرة، ضعفت حييل
من الصدمه متحجي بس تباوع بالوجوه
من يجون بيت اسامه و تشوف امير تحضنه و تشمشم بي لحد ما تنهار و يغمه عليها
كم مرة سوتها كام امير يخاف يروح من تصيحه
سنه بديناها بفرح، وسطها حزن و الم
يارب يكون العوض الهم لحد نهايتها
دخل علينه شهر رمضان واحنه نحاول وياها
مرات ننجمع، اسماء تجي و فرح و رنا و هاجر هم اجت مرة نحاول نسويلها تغيير شوي و نسيها حزنا
نعرف اللي فقدته مو سهل بس لازم تحاول تستجمع نفسها لأجل زوجها، اكرم هم محتاجها
نزلت رناد سويتلها اكل و كعدت اوكلها وهي كاعدة هم ويانه اليوم زين مبقت بغرفتها
سارة : يلا مامه اكلي ورايه شغل
رناد : بفففف
سارة : شلون بيج ضربه ولج، اكلي عااد
غيداء : نطيني اني اوكلها
رفعت راسي عليها بصدمه
سارة : شنو؟ انتي حجيتي لو اني دا اتخيل
غيداء : جيبيها
سارة : يمه غدووو ولج مشتاقه لصوتج، عممه عمممه تعااي غيداء حجت، هاج ولج تروحلج فدوة رناد و عشيرتها مهم سمعنه صوتج يگلبي
غيداء : ابد لا تنطين ضناج لاحد فدوة
سارة : عزة صدك دتحجين مدا اتخيل
عمتي : يمه غديدة، حمدلله يارب سمعتنه صوتها
غيداء : مامه اريد ابني
عمتي : ولج يمه ادومي لو يشوفج تبجين هلكد ما يجي بحضنج و يمسح دموعج، ماماتي ابنج راح طير للجنه هسه
غيداء : يمه ابنننني 😭
وهاي بعد ما هدئت و اجه اكرم شافها
حضنها و بجه هواي
احنه بالمطبخ و صوتهم يمنه
انهار بحضنها، وهي هم
يضمدون جراحهم و يتعافون ابعضهم
مرات الإنسان الألم اللي بداخله ما يطيب
بس نكدر نضمدة بقوة شخص و صوت شخص و وجود شخص، لأجل احبابنه نتناسه اوجاعنه و نصبر عليهن حتى نكون مصدر القوة لبعض
حادث آدم، خله عمي يفحص كابلات البيت كلها
و يتأكد من الحديقه اذا بيها كابل واكع او شي
ومن يجون جهال أسامه يبقى وياهم يخاف يرحون على شي خطر و يتأذون
بعد العيد مباشرة، سافروا محمد و إحسان
بقينه عد عيالي اني و رناد
كل أسبوع امر لأمي
اشوف احتياجاتهم هي و جعفر
ابتهال هم تجي و ننجمع عدهم
وهاي كاضيها هيج، الحمدلله على كل حال
أسبوع ثاني و شوي تحسنت غيداء بعد و تقريباً رجعت لطبيعتها، حجه وياها أكرم انه بعد يرجعون لبيتهم
بالبدايه مقبلت بس هو كلش متاذي
هناك امه هم اللي نشلت بسبب الحادث
لازم يبقى يمها، يخاف يفقدها هي هم
رجعوا و عمي سودة عليه دمعته بعينه عليها
من بعد السكر الصار عدها و الأنهيار كلش خايف
الله يهدي بالهم و يكتبلهم العوض اللي يداوي جراحهم
.
.
هاي كضت 7 أشهر من السنه بين ضحكنه و حزنه
ويارب يكون الجاي افضل، يكدر يشافي الآلام
.
.
.
.
.
انتهى
.
.
سارة : حبايب، شكراً لتعليقاتكم مقدماً
و شكراً لكل الحب اللي قدمتوه النه
كله يوصلني، متابعه القصه من اول ما نزلت
ما غفل عني تعليق كلهن اقراهن
جد اشكركم من كل گلبي و يارب ينطيكم بالمثل اللي تتمنوه النه و حبه مسك زيادة
استودعكم الله لغايه تواصلنه القادم
انتظر كلامكم و تعليقاتكم للبارت هم
نقفل وياكم لحد احداث شهر السابع
ان شاء الله تنتهي السنه علينه كلنه بالخير
.
.
محبتي الكم ♥️
.
.
الكاتبه : إسراء الخزرجي
في أمان الله 🤲🏻
انتظركم بالروايه الجديدة كسرة روح
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!