"وبرب الوريد الذي ينبض باليوم ألفًا: أحبك🍃❤️ محمد: صبح يوم الحنة، خلينا الحنة بس عند سارة. ما أسوي أنا حتى من يجيبون الغرفة أكون موجود. بالليل أهلها هم يجيبون الأغراض مالتها. صفيت الكنتور كله وفتحته نزلته. ويا نزلتي اجت غيداء ورجلها. محمد: يا هلا هاي شوكت جيتوا؟ غيداء: ما صار عشر دقايق، مبروك حمودي. محمد: الله يبارك بيك. أكرم: مبروك سبعنا. محمد: يبارك بيك حبيب، شلونكم؟ غيداء: الحمد لله، امشي نصعد حتى أنت تشتغل ونحكي.
محمد: إي والله أحسن. أكرم: صبري ولج خل نسلم أول. محمد: ماكو أحد 😂. أكرم: هااا ديلا لعد. محمد: شوكت ترحين لبيت سارة؟ غيداء: هي الحنة بالـ 5 أروح فد بالـ 4. محمد: ترى حماتها أنتِ مو من الغربة حتى تحسبين وقت. غيداء: أعرف، أصلاً أريد أروح هسه بس أكرم ما يقبل. محمد: ولك لا تطلع غيرتك بعرسي. أكرم: لا والله مو هيج بس غيداء شوي حملها مو تمام وقالت الدكتورة كون كله نايمة مو زين اللي جبتها.
محمد: اااا إي صح هم حقك إن شاء الله يجي بالسلامة، يلا خل يطلع على خاله من هسه أقول لك. غيداء: ههه يكفي عندك أمير نسخة منك. محمد: لا أمير ابن أخويه يختلف عن ابن أختي. غيداء: ههه دخل يجي والله كريم. محمد: أكرم اسحب الصاجة. أكرم: إي. سحبنا الصاجة وفصخنا السرير. نزلناهن كلهن وفرغنا الغرفة. ساعتين واجت سيارة الحمل نزلوا الغرفة الجديدة صعدناها شديناها. غرفتي الأولى بعتها لهم هم يستفادون منها. شدينا الغرفة ورتبتها غيداء.
صارت الـ 3 تحضرت حتى تروح. أكرم يزن على رأسها ويوصيها ما تتحرك. رغم بالغ شوي بتوصياته، بس حقه لأن هذا أول طفل. محمد: غيداء نروح سوى أحسن. غيداء: عزة أروح بالـ 5 ونص شكو خو أبقى أحسن لي. محمد: غير يروح أحد وياي ما تردين ولي. غيداء: لا حبيبي خلص أجي وياك. صارت الـ 3 ونص طلعنا أنا وأكرم للحلاق. انجمعوا الولد هناك فاجئوني. عقيل وعلي وإحسان وأسامة. مرتجى ورزاق وعباس وكرار والباقين ولد عمي ومرتضى هم أجه.
الشلة كلها انجمعت بالحلاق. شالوا محل الحلاقة شيل بالأغاني والركص. سووا لي أجواء خرافية. إحسان قال حجز مزايق لباكر. وعلي هو اللي يريد يزفنا. أسامة حاجز الفندق بدل أبويه. عقيل قال هديتك خاصة بعدين. خلصنا وطلعنا على بيتنا أخذنا غيداء وتوجهنا لبيت سارة. الطريق كله رقص وضحك. وصلنا الفرع وبدت الهلاهل منين ما أعرف 😂. كنت حاسب عرسي رح يصير هادئ. ما أعرف بيهم راجعين وهيج مخططين. صدق من يقولون الأصدقاء إخوة.
وأنا محظوظ بصداقتهم. دخلنا البيت ودقوا بالحديقة. جعفر بارك لي وأخذ طريق حتى أدخل. متحمس أشوفها، مشتاق لها. أريد أصرخ قدام العالم أخذتها وفازت بقلبها. جعفر: محمد تفضل. مصطفى: شوف بحنتي خلوني بس عشر دقائق إذا سمحوا لك تطول أموتك 😂. محمد: ههه إذا ما أشلع وصلة ما أطلع. مصطفى: لعد قول لهم أريد أعيد عرسي. محمد: ههه يلا وياي عيد على الواهس. دخلت عمتي واقفة بالباب. بستها من رأسها وباركت لي. أمي هم طلعت بوستها ودخلت.
الصالة مليانة عالم بس اللي بعيني وحدة ماكو غيرها. أمنيتي وعشقي الطاهر اليوم ملكتها. منزلة عينها بخجل حارق. فستانها الأبيض مطلعها أميرتي اللي حلمت بيها. أصريت يكون أبيض تلبس. أحس أجدد حبي لها من أشوفه عليها. بقيت بمكاني ما تقدمت. انتظرت ترفع عينها، أريد أنظر لها. البنات يضحكن وهي مبتسمة بس منزلة عينها. أشروا لي فوت قلت لهم لا أريد أشوفها. مضت عشر دقايق لحد ما رفعت رأسها. باوعت بعينها وضحكت. محمد: اليوم...
كللت حبنا ووفيت بيه، قدام الكل أقولها لكِ... أحبك سارتي. خجلت وصدت عني. رحت لها بستها من رأسها والكل صفق. سارة بهمس: رح أموت ليش هيج تحرجني. محمد: حتى الكل يعرف أحبك. سارة: أحبك. عمتي: يلا عمه نبدي الحنة. محمد: إي ليش لا. ابتهال: لا يمه خل يرقصون أول.. بنات كملوا الأغاني. شغلوا الدي جي على أعلى شيء. أغنية بيت حبيبي شغلن وقمنا عليها رقصنا. هسه لو اليوم العرس يعني. آخذها وأشرد 😂. محمد: الأبيض عليكِ هو اللي وقعني بحبكِ.
سارة: شلون؟ محمد: هاي بعد من شفتكِ أول مرة كنتِ لابسة أبيض. سارة: شكرًا على حبك إلي. محمد: فدوة لروحكِ. أسماء: يلا حمودي الحنة بعد. محمد: إي يلا، بس أريد ماي سومة. أسماء: تدلل. شربت ماي وخلينا الحنة. فرحان لفرحتها أكثر من فرحتي. كومة أخذنا صور وأخذوا ويانا هم. كنت مقرر أقول لهم ممنوع صور. بس خل تأخذ ما أبقيها بنفسها. ساعة وطلعت بره يم الولد. هم شوي دقينا ورجعت لبيتنا نكمل هناك. الطريق فرينا الكاظمية والأعظمية.
من يصير ازدحام ونوقف بمكان. العالم ويانا تطبق ويصفقون ويغنون. الجمال بهذا اليوم هو عقيل وعلي. سووا الأجواء وحيوها كلها. حتى إحسان مو مثلهم فرحان. هذا أخلص عرسي وأتفرغ له. كملنا حفلتنا ببيتنا. للـ 8 وبعد تعشوا واللي راح بيته واللي بقى. رجعوا أمي وأسماء وغيداء. ابتهال وثرية اجوا وياهم جابوا أغراض عروساتي. صعدوا فوق يرتبون ويا أمي. عقيل وعلي بقوا عندي ما راحوا. وعباس وكرار هم بقوا. مرتجى رجع حتى يجيبهم باكر للعرس.
نزلوا من فوق طلعت لهم. محمد: يا هلا. ابتهال: هلا بيك شايفين كل الخير. محمد: الخير يصيبكم، يلا قول له لمصطفى خل يشد حيله هو هم منتظريه باكر. ابتهال: شتسوون باكر؟ محمد: ههه غير نزوجه. ابتهال: عزة محمد صدق تحكي؟ أسماء: هاي صدق يعني؟ محمد: ههه غير يريد تعيدون عرسكم لأن ما قعد يمك هواي. ابتهال: شأحكي عليك وقفت قلبي. محمد: ههه سمالله، شلونها مريتي؟ ثرية: طردتنا ونامت. محمد: أحسن خليها ترتاح باكر وراها هوسة.
ابتهال: شرح يشلعها من الـ 7. محمد: شتسوون قابل حتى من الـ 7 شنو تعيدون خلقها. ثرية: مو هو حجز محمد لازم نروح من وقت. محمد: لحظة.. غيدااء، غيدااء. غيداء: هااا، لحظة. محمد: شسمه الصالون اللي رحتِ لها مو ما طولتِ ساعتين. غيداء: إي ما طولت لأن بس مكياج مو لبست حجاب. محمد: إي خل سارتي هم تلبس. ابتهال: جرب تقول لها. ثرية: لا شنو هيج أحلى من تسوي شعرها. أسماء: هههه ومحمد يقعد يفلي الماشات من رأسها.
محمد: ما يخالف المهم تبقى ببيتي بعد 😂. اجت أمي جايبة علبتين كبيرة. أمي: هاج خاله هاي نطيها لأمك. ابتهال: ماشي خاله، يلا ثرو نروح بعد. محمد: أوصلكم. ابتهال: لا تسلم مصطفى موجود بره. محمد: يااا ليش ما قلتوا جان دخلته. ابتهال: وإذا هسه قابل غريب. غيداء: هو لو غريب يبقى مو القريب. ابتهال: ههه على الجايات إن شاء الله. محمد: إن شاء الله. ثرية / ابتهال: مع السلامة خاله. أمي: هلا بكم خاله، مع السلامة.
راحوا ورجعت للولد كملنا سهرتنا. للصبح احنا قاعدين نسولف. صارت الـ 5 بعد تعبت عبرت الـ 24 ساعة قاعد. محمد: أفلت أنام ورايه هوسة. كرار: إي حقك وراك هوسة. محمد: ههه ولك صار 26 ساعة قاعد ما تحل عني. عقيل: روح نام ساعتين ونقعدك. علي: لا لا روح للـ 10 نصعد لك. محمد: إي زين هيج، أنتم هم ناموا. عباس: محمد خالي شوكت يجي؟ محمد: بالـ 11 تقريبًا. عباس: إي ماشي روح نام يلا. صعدت غرفتنا أشوف أغراضها. كانت كم قطعة بس هسه كلها.
ميز المراية أغراضنا سوى محطوطة. زاوية الملابس سوى معلقة ملابسنا. فتحت الكنتور بيه أغراضها. يعني هاي كل واحد من يتزوج اللي يحبها. هيج رح يكون شعوره!!! بدلت ومددت على السرير أنام. تعبان ومرتاح أنه حصلتها بعد. أحداث اليوم كلها تعيد برأسي. خجلها وجمالها وهدوئها. ما غلطت من حبيتها أبد. شكد كنت مقرر أقسي وياها بس ما قدرت. أخذتني النومة بعد ما حسيت غير على هجوم صار بالغرفة فزيت. أشوف الشلة كلها مسطرة قدامي.
التفتت أشوف الملابس المعلقة شنو! بس صاية، ارتاحيت. محمد: شنو هالذوق بالله تدخلون هيج. كرار: شوفوا المعيدي هذا يحكي بالذوق. علي: وين الذوق من تسد التلفون بوجهنا. عقيل: انطيناك ساعة زيادة أبو الذوق. عباس: فهمنا منو ما عنده ذوق هسه. أسامة: خبلوك بالذوق قوم بعد. محمد: خبال إي والله، يلا اشو الكل بره. عقيل: قوم قدامنا لا تخليني هسه أمرعدك. محمد: بيك حظ جرب.
علي: هو بيه حظ، بس مو وقته لأن مرتك منتظرتك بالصالون تقول وين البدلة أستاذ محمد. محمد: شنو بدلة! مو دزيتها. أسامة: وي منو دزيتها؟ محمد: إحسان أخذها غير. عقيل: تنطي بدلة العرس لدودة الكتب شكو. محمد: البدلة وين هسه؟ أسامة: اصبر أشوف أسماء. أجه قعد يمي علي وحكى بهمس. علي: قوم اكو موضوع مهم. محمد: صاير شيء، إذا تافه عوفه ما أريد أتنكد بيوم عرسي. علي: يخص أحمد. محمد: يوهوووو عوفه علي لا تنكد عرسي. علي: قوم هسه والله كريم.
طلعوا من يمي وقمت غسلت ووقفت صليت. بالي يشرد ويا ذكر أحمد!!! شنو ممكن يكون الموضوع يعني. شنو اللي سواه أحمد بيوم عرسي. صليت فرض للإمام المهدي لتسهيل هذا اليوم. أعرف ما تكمل لي فرحة. بس إن شاء الله ما يصير شيء. تعبت ما بيه حيل مشاكل جديدة 😩. بدلت وطلعت لهم قاعدين بالصالة. محمد: هذا إحسان هنا، شنو سالفة بدلة سارة لعد. علي: البدلة وي أسماء. محمد: بيضوها لأن مبين كذبكم. عقيل: تذكر اليوم عرسك بدون مشاكل.
محمد: وين أسامة مبين أنتم ما رح تحجون. علي: أسامة بره... واقف وي أحمد. محمد: يعني يا أحمد!! إحسان: أحمد نفسه. محمد: هاا، إي ماشي. حاولت ما أبين شيء الولد موجودين. ما أريد ينعرف قدامهم منو أحمد. إلا أنه أغلي بداخلي. إذا أطلع رح أبسطه وباقي بس أعصابي تنأكل. بقيت أحوص ما أدري شنو أسوي. محمد: علي تعال وياي شوي. صحته وتوجهت للمطبخ حتى بعيدين. علي: اهدأ محمد، أسامة بره يحكي وياه. محمد: شنو يريد؟ علي: أفف ما يريد تركه اهدأ.
محمد: جاي على سارة مو؟ ... لا تسكت وتخبلني. علي: إي محمد على باله البارحة كان العرس. محمد: علي روح يم أسامة، أريد أعرف شيريد. علي: تركه يحلها وحده. دخل عقيل: لا تتوتر، كلنا هنا وياك ضلعي. محمد: عقيل اطلع وي أسامة. عقيل: كنت يمه لا تخاف كلامهم عادي. محمد: صلافته هاي خانقتني أنه يجي بيتي وما أقدر أطلع حالي حال المرة. علي: تريد تنفضح! تفضل اطلع وحتى مرتك تخسرها. عقيل: اهدأ لو يصير شيء كلنا هنا وياك. تركتهم وصعدت غرفتي.
طلعت ملابسي ودخلت سبحت. بس أريد ألهي نفسي عن هذا الجوه. طلعت بدلت ونزلت لهم. أسامة: مو بعد وقت للزفة. محمد: أحكي شراد هذاك؟ أسامة: بعدين نحكي، ارتاح. أشر بعيونه على الولد قاعدين. محمد: أبويه أجه! أسامة: «قبل شوي وصل.» محمد: «زين.» _سارة تروي _وصل يوم عرسي! من بعد سنتين وشهرين، من بعد أيام عشتها بخوف إنه يخرب هالعرس. حمد لله وصل ورح يصير حقيقة، لحد الآن ممصدكه إنه اليوم هو. كعدت الصبح بـ6، كمت غسلت وصليت الصبح،
صليت ركعتين لأم البنين فدوة لاسمها، نذرت حياتي الجاية كلها وطلبت راحة البال. خلصت كفيت المصلاية ورحت رتبت الجنطة اللي آخذها للفندق وياي. زين تاركيلي ملابس غير المشخلعة. كعدت صفنت لحياتي، شكد تعذبنه وقررنه ننهي كلشي، بس حمد لله رح يتم آخر شي من زواجنه. رح أكون باسمه بعد ومحد إله صلة بيه عداه، رح أكون وياه بكل وقت بدون ما يفرقنه شي. شوكت حبيته وتعلقت بيه هل كد ما أعرف، بس اللي أعرفه هو غير شخصيتي كلها،
غيرني كلني، رح أتزوج شخص جنت أدعي من الله يموته حتى ما يتم الزواج، بس القدر خلاه أهم من أنفاسي حتى، مستعدة أبيع العالم كله في سبيل قربي منه. محظوظة لأن الله رزقني شخص، مدري شنو أوصفه غير ملاك. يا رب! كمل فرحتي اليوم. يا رب! أستودعك زوجي وحياتي. ندكت الباب، كمت فتحتها أمي. سارة: «صباح الخير يمه.» أمي: «هلا صباح النور، عبالي نايمة.» سارة: «كعدت قبل شوي صليت.» أمي: «زين تسوين، تحضري فد شوي ترحون الصالون.» سارة: «تمام.»
أمي: «انتبهي على نفسج سارة، هذا زواج... المشاكل اللي تصير تكونين أنتي مسؤولة منها، بعد كبرتي أحنه ماكو رح ترحين بعالم جديد... كلمة رجلج هي التنسمع، حتى عنادج بعد ماكو.» سارة: «ادعيلي يمه.» أمي: «الله يوفقج بحياتج، يلا كومي تجهزي.» سارة: «يي.» حتى أمي متغيرة! لو لأن عرسي؟ كمت سبحت وبدلت، أخذت أغراضي ونزلتلهم. سارة: «صباح الخير.» الكل: «صباح النور عروستنه.» أبويه: «اليوم سورة تكعد يمي.» سارة: «تدلل يا روحها لسارة.»
جعفر: «يمي هم تكعد.» سارة: «ههه أكعد يمكم كلكم حبايب.» ابتهال: «كملتي كلشي سرو؟ سارة: «أي حياتي، علوش وين خل أشوفه من أرجع من الصالون مكدر آخذه.» ابتهال: «عد ثرية نايم.» سارة: «أخلص وأروحله.» كعدنه كل أحنه على السفرة تريكنه، كلهم يدللوني، كل واحد ينطيني شي، أحس إنه رح أفاركهم للأبد، ليش دتصعبوها عليه يعني؟ قابل مرح أجيكم يعني 😭. كمت أبجي من يمهم رحت الصالة هناك، إجت ابتهال وراي تركض: «شبيج ولج؟
سارة: «ماكو مابيه بس انتو أجبروني أبجي.» ابتهال: «تردين أخرب العرس؟ سارة: «حت أموتج وعلي.» ابتهال: «لعد صيري شاطرة وبلا دموع يلا.» غسلت وجهي، مبقه بس يخرب عرسي، حت بدل ما تطلع الزفة تطلع جنازتي. لفيت حجابي وأخذنه جعفر للصالون. أكثر شخص رح أشتاقله هو جعفر، أكثر شخص أحبه من أهلي كلهم. وصلنه الصالون وبده الشغل، رادت أسوي شعري ميش بلاتين ما حبيته. تالي بلشت مكياج أول، البنات هم سون مكياجهن. قريب ما أخلص خابرت أسماء.
سارة: «ها حب.» أسماء: «هلا سورة، أكولج دزيتلج حجاب وي علي خلي مكياجج هم هادئ شوي ماشي.» سارة: «ليش حجاب يعني، ممتفقين هيج؟ أسماء: «عمي حاجز قاعة، وممخبرنه حت نسوي وقت النه ولهم.» سارة: «هاااا، محمد عرف؟ أسماء: «أي هستوة درة بعده يحجي.» سارة: «هدئيه خطيه.» أسماء: «ماشي حب، كولي للبنات هم العرس مختلط.» سارة: «تمام.» البنات يسمعن لأن سبيكر مفتوح. ثرية: «حرامات على اللف اللي سويته.» نرجس: «و الصبغ 😭.»
سارة: «لا تقهروني 😭.» ابتهال: «مصار شي حبايب سهلوها.» نص ساعة وإجه علي جايب حجاب وي البدالة، بدلتي بيها سترة عود حت من أطلع ما يبين شي مني، هاي إجت عدلة بعد. كملت كلشي ومعدت أنتظر الباقين يكملن. ثرية طلعت جابتلي لفة صاج أكل، حسيت معدتي تصوصي من الجوع رغم أكلت. كاعدة أكل ودك التلفون! سارة: «آلو نعم! .... : «شايفة كل الخير سارة.» سارة: «منو حضرتك؟ ..... : «أي حقج أني منو بعد.» سارة: «شنو تريد أحمد؟
أحمد: «أباركلج مو شي، دا أكولج اليوم اللي حلمت بيه حققه غيري.» سارة: «أحمد انساني، بس تتأذى ترى، تعرف قدرنه من البداية مو لبعضنه.» أحمد: «شنو اللي أنساه سارة؟ وعدنه إنه نكمل حياتنه لحد ما نصير بيبي وجدو!! لو وعدنه إنه نشيب على مخدة وحدة!!! لو ما رح تكونين لغير أحمد وبس!! سارة: «وعود مراهقة، وعود جان القدر أقوى من إنه نحققها.» أحمد: «لا سارة جان كدرنه عليها بس أنتي مو كد الوعد.» سارة: «أحمد، إذا أنت تحبني صدك! انساني،
دور بنت العالم اللي تنسيك مكاني كله، أنت ذهب أحمد وألف وحدة غير سارة تلوك إلك.» أحمد: «شفائدة الذهب إذا اللي يشتريه غشه! سارة: «شنو تريد يعني!! أخرب العرس!! تعرف محمد شنو بالنسبة إلي؟ تعرف هو الوحيد اللي ألكاه من أحتاج أحد يسندني!! أحمد إذا تحبني صدك، ادعيلي إنه أتوفق، واللي يحب ما يدعي بالخراب لحبيبه مو هيج! أحمد: «الهآضمني اللي ما تعب واللي ما سهر واللي ما بچة، متهني بيج!
سارة: «أحمد إنساني، الله يهنيك وي بنت العالم.» أحمد: «تدرين، قبل شوي جنت عد رجلج... بس ردته يطلع! ردت أحط عيني بعينه وأكوله عساك ما تتهنى باللي جانت حلمي، بس ما طلعلي.» سارة: «شون تكول تحبني وشون تدعي بالتعاسة لحياتي، من مرح يتهنى محمد يعني حياتي رح تكون جحيم أحمد.» أحمد: «رح تكون جحيم سارة، رح تكون لحد ما آخذج باسمي... هذا وعد، روحي هسه وراج حفلة بس تذكري أنتي مال أحمد وبس...
إذا بنت أمج وأبوج خليه يقربلج حت بيومها أدفنكم ثنينكم.» سارة: «أنت مريض، شما أنطيك عذر تبقى مريض.» غلقته بوجهه، بس أحس جسمي يرجف. أحمد ميعرف شديصرف بعد، جن! لا هالكلمة هم قليلة عليه. معقول يعني مستعد يدمرني حت يرتاح؟ اللي يحب ما يأذي حبيبه، مستحيل والله. اتصلت على محمد دك للنهاية وما رد. اتصلت مرة ثانية وهم نفس الشي. كلبي ممرتاح وخايفة، يا رب 🙏. مرت ربع ساعة واتصل هو. سارة: «أنت وين ما تجاوب فهمني؟
محمد: «التلفون بالسيارة تاركه، كملتي؟ سارة: «وكعت كلبي والله، أي كملت تجي؟ محمد: «أي حبيبي هسه جايين.» سارة: «ماشي، انتبه على نفسك.» محمد: «صار رويحتي.» حمد لله اللي مبيه شي، حمد لله اللي مو عصبي. الله يعدي هذا اليوم على خير، واضح مالي حق أفرح حت بيوم عرسي 💔. البنات عدلن ولبسن حجاباتهن، أني هم عدلت نفسي وأنتظرته يجي. مرت ساعة وصار صوت المزايق والأغاني، توترت أي بس أعرف أيدي رح تكون بأيد أمينة.
دخل للصالون شافني وشفته، طالع هيبة بالقاط، شكله يصلف من بعيد، فدوة لروحه أروح، رجالي يسوى العالم كله، أحبه يا ربي، وباركلي بحبي هذا. تلاقت نظراتنه بحب وفرحة، شكله يجنن، عشقت نظرته هاي وهو يشوفني بالفستان الأبيض. سارة: «ما رح تتقدم؟ محمد: «لا خلي هنا حت ما يشوفوج.» سارة: «ههه كون أروح لأهلي ترى.» محمد: «أهلج شنو وأني هنا؟ ثرية: «أجلوا غزلكم وراكم تصوير وقاعة وهوسة.» محمد: «شكد نغصة صايرات عوفن أشوفها براحتي.»
ابتهال: «دخذها للسيارة وشوفها عود.» سارة: «يلا نطلع.» مدلي أيده حضن أيدي بيها، عن كمية الأمان اللي حسيتها من أكون وياه، طول فترة الراحت ما حسيتها. طلعنه من الصالون وأصدقاءه زفوه للسيارة، صعدنه ورحنه للمصور أخذنه صور العرس، لقطات تجنن، جريء جان كلش، أصر يأخذ لقطة وهو يبوس راسي، طلب تكون كبيرة. أخذت صور وي ابتهال وثرية، للمصور أجوا أسماء وغيداء، هم أخذنه صور وياهم فردية وكلنه.
خلصنه طلعنه لبيت أهلي والباقين راحوا القاعة. دخلت أمي وخالتي وأبويه وجعفر بس الموجودين. حضنت بابه حيل وأخذت نفس منه، بابه هو سبب تحملي هواي أمور، صح جان قليل يبقى ويانه بسبب شغله، بس جان هو العمود المستندة بيه. جعفر هم حضني حيل وبچه، جعفر أبد مجان بيوم أخويه، جان صديق... جان سند رغم فرق العمر بينه. التفتت لأمي! أمي اللي عانيت هواي بسببها، وآخرتها فترة خطوبتي، مجانت أم بالنسبة إلي أبد،
بس تبقى أمي ومكانها بداخلي مكدر أتخطاه. حضنتها حيل وشميتها، أحس هاي لحظة خالدة من هي هم حضنتني، حسيت بيها اليوم بهواي أوقات، الصبح وصتني، دارتني، وهسه ودعتني. باست راسي وشمتني هي هم. سارة: «ادعيلي مامه، ادعي الله يوفقني.» أمي: «موفقة يمه، كلبي بارد عليج.» سارة: «بابه حبيبي، أمي وجعفر... كلكم أحبكم.» أبويه: «كافي بجي بابه، قابل وين رايحة؟ تقدم محمد سلم عليهم. بابه: «تعرف شنو ناطيك، يحتاج أوصي؟
محمد: «بعيوني عمي، أمانتك بالحفظ والصون.» أمي: «عمه سارة شما تغلط كون أنت دليلها، وأنت أكثر اللي يعرفوها.» محمد: «لا تخافين عمه، الله يقدرني أكون دليلها.» جعفر: «لو سمعت مزعلها بيوم، تذكر عدها أخ يحرگ الدنيا على راسك ماشي، دير بالك عليها.» محمد: «هههه تدلل حبيب بعيوني سارة.» أمي: «روحوا يمه، الله يجعل حياتكم كلها فرح وسعادة وهنه.» محمد: «آمين، يلا ويانه انتو لأن العرس بقاعة صار مفاجئة مال أهلي.»
أمي: «لا عمه وين نجي ما يصير أحنه.» سارة: «يصير يمه لأن قاعة.» محمد: «أي صح يصير.» أبويه: «روحي وياهم حنان وجعفر هم حت يرجعج.» محمد: «أنت هم عمي؟ أبويه: «لا عمو ما يصير أبوها لا قاعة ولا بيت 😂.» محمد: «هههه ما أعرف بيهاي بعد.» سارة: «يلا يمه دخلي تحضري.» خالتي: «محمد خاله تعال أخذ الكيكة.» محمد: «يمكم بقت.» خالتي: «علي جابها النه رأسا لأن مراح لبيتكم.» محمد: «هااا أي ماشي.» أخذ علبة الكيك وطلعها للسيارة.
بلشت المزايق تدك. دخل غسل أيده وسلم على أبويه وطلعنه. صعدنه السيارة وعلي يزفنه، الأغاني والركص والهلاهل من الشباب تموت ضحك. أبد ممتوقعة هيج رح يفرحوله، محمد ذهب وأصدقاءه يلوكون للذهب. أجواء الطريق تجنن بكل معنى للكلمة، علي وعقيل تسابقوا بالسيارات، المزايق تدك طول الطريق، العالم اللي بالشارع تضحك على عقيل وعلي، أحنه ميتين ضحك بسببهم، واحد يرفع والثاني يكبس، ناصبين على محمد 😂😂😂.
وصلنه القاعة نزلنه وهم أخذولهم شوط ركص يلا صعدنه. دخلنه غرفة التعديل حت نرتب نفسنه، عدلت الحجاب ومكياجي، ومحمد هم رتب روحه وطلعنه. سوولنه دخوليه تجنن، أصدقاءه استقبلوه من الباب، أغنية هم عريس هم نشمي هم ربعه يزفونه، مشغليها ومطبقيها ع المضبوط. فرحة ما تنوصف جانت، الكل فرحان وسعيد. شغلوا أغنية سلو وركصنه سوى، المتزوجين كلهم نزلوا ويانه ركصوا. محمد بهمس: «لو ما مختلط جان سويت شي العالم كلها تحجي بيه.»
سارة: «ششش لا تفضحنه.» محمد: «غير گوة مستحمل.» سارة: «هههه تحمل تحمل.» محمد: «أحبج يولو.» سارة: «أحبك.» كملت الأغنية وبده الركص والطربكة، كعدت بمكاني بس محمد ما قصر، صدك عريس وفرحان بيومه، وي أصدقاءه ذب لحم حقيقي 😄. أخذت صور وي البنات وأهليتنه هم. كمنه قطعنه الكيكة وتصفك وضحك، لعب جولة بينه علي، كل ما نريد ناكل يسحب الماعون، موتنه ضحك. طبعًا هدية عقيل هي تسجيل لأحداث العرس كلها، من طلع محمد من بيتهم لحد اللحظة هاي،
كله موثقة... يكول اللحظات هاي ما تنعاد، وفعلًا، هذا اليوم مرة وحدة بالعمر يصير. استراحة العشة أجه كعد محمد ينهت. سارة: «عليك الله شكم كيلو ضعفت؟ محمد: «هههه 5 قليل،» عريس وأفرح بعرسي. سارة: إن شاء الله كل أيامك فرح حبيبي. محمد: فدوة لحبيبج. التفت صاح على صديقه خالد. محمد: بداعة الغالية ماي ولفة، ترى انتهيت. خالد: يمعود هسه يجيك، لا تنتهي هسه. محمد: هههه، سافل مو بيدك، بسرعة. خالد: تدلل حبيب.
سارة: أريد كيك، كيكتنا طيبة. محمد: طلبت ناخذها ويانا للفندق. سارة: محمد زحمة نروح فندق. محمد: لا أحسن، بيتنا مليان وين نعرس. سارة: هههه وخر اشو. محمد: جوعانة، أطلبلك هسه. سارة: لا لا، رقصنا قبل شوي هسه معدتي قالبة. محمد: طبيعي هذا حبيبي، لا تتوترين يروح كل شيء. ضربته على چتفه والتفتت. صارت عيني بعينه!!!!! أي هذا هو! ليش أجه العرس؟ شدراه العرس بهالقاعة يعني؟؟؟ شديت على يد محمد وأنظر له.
يتقدم باتجاهنا وعينه بيها لمعة غريبة. يا ربي ساعدني أرجوك. سارة: ممحمد شوف. محمد بهمس: تصرفي طبيعي سارة. سارة: محمد خايفة فدوة. محمد: اهدئي. قام على حيله، صافحه وحضنه. التفتت على علي وعقيل ديراقبوهم. علي أشرلي أهدأ. شلون أهدأ أرد أفهم 😭 أصلًا شلون دخل هنا، شلون سمحوا له. شوي ورجع محمد يمي. تقدم أحمد ونطاني باقة ورد. أحمد: شايف كل الخير ضلعي، مبروك سارة. محمد: تسلم. سارة: تسلم أحمد.
أحمد: قلت لك الأبيض حلو عليك، وهاي طلع يجنن. محمد: أحمد اطلع بعد أديت واجبك وزايد. أحمد: لا شلون، مو قلت لك عندي طلب. محمد: روح هسه وبعدين نتفاهم. سارة: أحمد، بغلاتي لا تخرب هذا اليوم. أحمد: لا تخافين، رايح.. انتبه عليها ماشي. التفت وطلع، راسي صداع قوي. محمد صار كتلة مال أعصاب مو طبيعي. علي وعقيل طلعوا وراه. أسامة شوي ولحقهم. خايفة لا العالم منتبهة، والله أصير علج. محمد: يلا حبيبي، نقوم نعدل حتى نطلع بعد.
سارة: أي يلا. رحنا غرفة التبديل، دخل وسد الباب. اتكأ عليها وغمض عيونه. حضنته حيل، جسمي يرجف. رغم خايفة من ردة فعله بس ما لي ملجأ غيره. يا رب والله تعبت، يا رب هذا يومي لازم أفرح مو أنكسر. بعدني عنه بهدوء: يلا رتبي نطلع. سارة: محمد خايفة منه. محمد: الولد يحلوها، لا تخليه يخرب يومنا. سارة: ماشي. رحت عدلت مدري شلون وطلعنا. أشر لعمتي يلا بعد. راحت على الدي جي وطلبت أغنية الختام. باي باي بيباي بيباي.
شوي رجعت الأجواء لروحها واختفى التوتر. زفونا وهم جعفر وصاه لمحمد من جديد. ركبنا السيارة وطلعنا زفة. محمد: كل شيء تمام علي! علي: لا تخاف مو قلنا لك إحنا هنا. سارة: شلون دخل القاعة. علي: هنا بس يذكر اسم العرسان يدخلون لأن مو نظام بطاقات الدعوة. محمد: ههه فاتتتنا والله. علي: أي جان زدنا طقوس جديدة. محمد: عقيل وين؟ علي: ينتظركم يم الفندق، مسوي مفاجأة. محمد: هههه آخرتكم تجلطوني. علي: لا لا راح تحبها صدق.
محمد: أي نشوف ليش لا. على الأغاني وهم تسابقوا. هالمرة علي وأسامة تسابقوا. عمتي وي عمي قدامنا يمشون. بصفنا بيت أسامة ورانا غيداء وأكرم. وراهم الزفاف كوستر والمزايا. حتى زفة الشارع يصورونها. أحسن حتى أشوف عرسي من أرتاح من الهوسة. وصلنا الفندق وجان واو بمعنى الكلمة. يجنن مسويه، كله بالونات وأضواء. هم فرقة مزايا تنتظر بالباب. نزلنا وأخذوا شوط رقص بالشارع. يمكن ما يتعبون ذوله أبد. صار كومة يرقصون ولا كأن بهم تعب 😂
وصار رمي طلق بالنهاية.. محمد بقى يلتفت يريد يعرف منو رمى. اللي أعرفه أنه أكد عليهم محد يرمي. حتى علي منبه محد يرمي. إن شاء الله ما يصير شيء. نص ساعة من الرقص ودخلنا الفندق. دخلت غرفتنا ومحمد طلع لهم. افتريت الغرفة حلوة مرتبة. فتحت البالكون شفتهم بعدهم يكملون. جلست أتفرج عليهم لحد ما لقطوني. شوي وراحوا كلهم حتى عمي وعمتي. صعد محمد تعبان 😂 شمر روحه على السرير من التعب. سارة: قوم بدل ونام. محمد: وج تعبت ما بي أبد.
سارة: هههه طبعًا غير ذبيتوا لحم. محمد: إذا بعرسي ما أفرح شوكت لعد. سارة: محمد شسويتوا. محمد: ولا شيء، تعالي أفتح لك البدلة حتى تبدلين. سارة: قوم بدل بين ما أفتح الحجاب. قام طلع ملابس ودخل الحمام. فتحت شعري، رغم حجاب بس مليته ماشات حتى يثبت. سفطت الطرحة والحجاب. طلع محمد من الحمام فتح لي السحاب. راح طلع المصليات ودخلت للحمام سبحت. توضيت وطلعت صلينا سوة. شقد مصلين سوة قبل بس أحس اليوم مختلف. كمل هو وراح مدد.
قرأت سورة الرحمن حتى أبعد خوفي. كملت ورحت يمه، نايم!!!! شكو نام بدوني يعني 😭 دحست روحي بحضنه ونمت. شد عليه وغفينا. أحلى شيء، هو أنه ليلتنا بريئة. جنت خايفة وهو عرف شلون يأمني. صبحت الصبح عليه، قاعد ومبتسم. سارة: صباح الحب حبيبي. محمد: صباح الحب عافيتي. سارة: شوكت قعدت. محمد: من شيء ساعة. سارة: ليش ما قعدتني. محمد: أفكر بيك شلون راح نمضي حياتنا. سارة: مثل ما تمضيها العالم نمضيها إحنا. محمد: ما مكنكة شنو أقصد.
نزلت عيني عنه لأن طخت براسي. ندت أي وأخذني لحضنه. ما لازم أمنع أو أعاند. هذا هو أنا مرته بعد وهذا الشيء مو خطأ. صارت ساعة 10 دق التليفون عليه. محمد: ألو هلا يابه.. هسه جايين.. أي أي، يلا هلاو. سارة: ها نروح بعد. محمد: أي حبيبي منتظرينه. سارة: ماشي. قام للحمام يسبح، قمت لملمت أغراضنا. طلع دخلت وراه. كملنا وطلعنا للبيت. وصلنا وتلقونا بالهلاهل.. عمي ذبح لأول دخلة لنا للبيت وعازم أهله. سلمت عليهم وباركوا لنا.
محمد صعد أغراضنا ونزل. جدته نطتنا هدية العرس ومدري شنو قالت له. البيت مخبوص لأن الكل موجود. أشرت لأسماء تجي: سومة أهلي يجون. أسماء: أي حياتي شوي وجايين. سارة: ماشي. مضى الوقت بينهم قاعدين. أجوا أهلي وهم باركوا لنا الزواج. اجتمعنا كل إحنا على الغداء عمتي حضرته. سألوه لمحمد إذا كل شيء تمام. متت خجل لأن عمي وأسامة قاعدين. زحمة هيج يسألون بس هاي عاداتهم شسوي. قاعدين وياهم بس تعبانة. خبصة البارحة ودق والرقص ساطر راسي.
للـ 6 راحوا أهلي بعد. بس أريد محمد يقول يلا أريد أصعد. راسي بيه صداع مو طبيعي. هو ولا وياه طاب بالسوالف. إجت إيلاف وإحسان. هم قعدنا نسولف ساعة وراحت. ارحموني كافي خطار 😭 أنوب أروح أقول لهم تعبانة. وأصير أتدلع لو شيء 😞 بـ 7 ونص قمت أصعد بعد ما بيها مجال. وي ما حطيت رجلي على أول پاية. دق الجرس 😭 دا أصعد صاح محمد انتظره. طلع يفتح الباب شوي ودخل. أخذ إيدي وصعدنا سوة. ما عرفت منو إجه وهو دخل ناشف وجهه.
دخلنا غرفتنا مستغربة تصرفه. سارة: منو إجه محمد. محمد: ما أريدك تنزلين. سارة: منو إجه دفهمني. محمد: سارة بلا عناد، ما تعبتي مددي ارتاحي. سارة: ماشي لا تعصب. رحت بدلت ومددت أرد أنام. صدق تعبانة وراسي مصدع. سارة: محمد وين جنطتنا. محمد: بالكنتور ليش. سارة: أريد علاجي راسي بدأ يهيج. محمد: لحظة، سارة شنو المسكنات اللي دتأخذيها؟؟ سارة: ما دآخذ بس من يوجعني راسي آخذ نورجسك و2 براسيتول.
محمد: أعرف اللي تأخذيه مختلف، خل تروح هاي الجوة ونتفاهم. سارة: منو جوة. محمد: رنا ورجلها. سارة: أي خل ننزل شعلينا بيها. صاح بي: أنتي مو تعبانة نامي. سارة: عافية بيك عافية من أول يوم تصيح. عفته ومددت غطيت راسي. وذا إجت يعني شدخلنا. هسه أنا بنت هذا البيت مو هي. شكو دا أختل لأن حضرتها إجت. قاعدة أدردم وغفيت بعد. حسيت عليه مدد يمي وأخذني لحضنه. نمنا مدري شكد بس ارتاحيت حتى راسي فك. نمت براحة لأن قريبة منه.
نمت بدون قلق أنه لازم أرجع لأهلي. حسيت الصبح على صوت الأذان. قمت على كيف رحت توضيت وصليت. قعدته فت روحي يلا قام إله أبوسه. قام هم توضأ ووقف صلى خلص. محمد: انزلي شوفي شنو اكو أكل جوعان. سارة: أخلص وأنزل وياي. محمد: هم تستحين يعني، مرتي بعد ولج. سارة: قبل هم مرتك 😂 محمد: لا هسه مختلف الوضع. سارة: ههه يلا نازلة كمل وتعال. محمد: بيت أسامة هنا؟ محمد: يمكن، شوفي سيارته برة. رحت للشباك موجود: سيارة رصاصي مالتكم.
محمد: سيارة رزاق، يعني بعدهم هنا. سارة: هسه أنزل لو شنو. محمد: لا انتظري ننزل سوة بس لبسي صايتك. قام لم المصلاية. رحت طلعت صايتي ولفيت حجابي. كملنا ونزلنا الكل نايم والبيت هدوء. سارة: محمد شيلني على الدرج ونزلني. محمد: لا ولج هسه يطلع لنا قويسم. سارة: نايم عمي هسه قابل يعرف شايل مرتك. محمد: وج عيب، وها أها خلص الدرج. سارة: مو عيب، زين شيلني وديني للمطبخ. محمد: من نصعد أشيلك بالغرفة. سارة: أعرف صاير ما تحبني.
محمد: ههه مو هو الحب بالشيل مو. سارة: أي 😁 شفت عمتي حاطة عشاء بالفرن. طلعته مسوية صاج.. يمكن جاهز جايبين. حميته وطلعت وياه مشاريب هم. قعدنا نأكل، الوحيدين اللي يتعشون ساعة 5 الصبح 😂 سارة: شوكت نسافر. محمد: أروح وحدي أسبوع وأرجع عليك آخذك. سارة: ليش يعني. محمد: لحد ما أأمن سكن لنا هناك، زحمة نبقى بالشقة وعلي وإحسان وعقيل موجودين. سارة: مو بقيت وياكم أسبوع. محمد: جان أبويه موجود من أطلع. سارة: أنت مو تثق بيهم.
محمد: حتى لو أثق سارة، بس العالم شتحجي. سارة: محمد العالم أول تالي ما تسكت، بعدين بلندن وين يدققون، كومة عايشين وي بعضهم بدون زواج أو رابطة شرعية. محمد: حتى لو، خليني هيج حتى أرتاح. سارة: صدق لو يعرفون تفكيرك هيج يزعلون. محمد: علي يعرف ومأيدني. ما أشوف هالشي ضروري لأن عشت وياهم. أعرف هم شنو من عالم ويتأمنون. بس بعد هو أدرى ما لحيت على الرفض. كملنا وغسلت الماعين.
دنصعد جان تطلع رنا من الغرفة بيدها ممه مال زهراء دتسويلها حليب. رنا: هلا سارة مبروك، البارحة ما شفتك حتى أبارك لك. سارة: الله يبارك بيك، أي تعرفين عروس وأتعب. محمد: يلا سارة. رنا: مبروك محمد. محمد: يلا سارة صاعد. عافنا وصعد.. احترت أعتذر لو لا. بقت تباوع علي وراحت للمطبخ ما حچت. طنشت وصعدت.. أصلًا شكو أعتذر. زين سوة 😏 _رنا تروي _قاعدة بالحضرة مال الإمام وبيدي زهرة. أقرأ الزيارة وأنخى الإمام يرجع رزاق.
انتبهت اكو اثنين قعدوا يمي. رفعت راسي شفته هو ومرتجى. تعبان، ضعفان، طفرت دموعي بس أريد أحضنه. مشتاقة له بكد الكون. أف يا قربك، حييت روحي كلها. بقت نظراتنا اللي تحكي بهدوء تام. أعرف اشتاقلي، أعرف صعب فراقنا. وأعرف بعده ما مسامحني 💔 مرتجى: أروح أزور ماشي. رزاق: أخذ راحتك. وقعت دموعي بعد من سمعت صوته. رواني، حياني، انعشني. مد إيده أخذ زهرة بوسها وشمها.
رزاق: بباه، وج مشتاق لك حبيبي، هو شهر هيج كبرك لو هذا من البعد والشوق.. روح أبوك ولج. خفت آخذ مقصد الكلام وأتأذى. بس أتمنى لو طلع كلامه لي. يعني ممكن يكون لاحظ حالي شصفى بغيابه. رنا: راح ترجع لنا رزاق. ....... ما دار بال ولا رد. رنا: رزاق أحكي وياك رد. خنقتني العبرة، أخاف يجون وبعد ما أقدر أحكي. رنا: وحق هذا المكان، رزاق وعد اللي صار ما ينعاد.
رزاق: سدي الموضوع، على الأقل احترام للمكان.. زحمة خاينة وقاعدة بحضرة الإمام مو! رنا: صدق تحكي!!! زين، خلص طلّقني حتّى ترتاح وترجع لبيتك. رزاق: هههه، سكتي خليني أشبع من بنتي حتّى تروحون. رنا: وأنا، مالي حق أشبع منك! ما ملاحظ غيابك شمسوي بيّه! رزاق: ابن خالج ممكفّي يعني؟ رنا: حرام عليك، أقسم بالله حرام. رزاق: آااخ، كافي رنا. إجه كرار من ورانا: مو كافي رزاق؟
ترى أعرف كل شيء.. ما أقولك رنا ما غلطت، بس أنت هم تتحمل نسبة من الغلط إذا تعاقبها بالبعد. رزاق: لو فرح حبت عباس وأنت زوجها راح تسكت كرار؟ كرار: لا، راح أعاقبها وعقابي تعرفه.. بس ما أبعد عنها. رزاق: ما تفهم أنت. رنا: أرجع، وقابلة أروح لأهلي، حتى لو تاخذ زهرة عندك. رزاق: طلعة من البيت مالج فهمتي؟ كرار: اهدأ وكوم خل ندخل نزور زهرة ونجي. رزاق: ماشي. أخذوا زهرة وراحوا للضريح يزوروها. النار تغلي بروحي.
يا رب، آخر أمل هو هسه يا رب اهديه عليّه. نص ساعة وإجه نطاني زهرة. ديروح صحتله: رزاق لحظة. التفت بضجر: شنو تردين؟ رنا: شاكة بنفسي، ولازم تكون موجود. رزاق: شنو شاكة يعني؟ رنا: شاكة حامل. رزاق: صار شهر ماكو أنا. رنا: صار شهرين ماكو شهريتي. رزاق: رنااا، لا تكذبين حتى أرجع، حتى المكان مو لائق يعني.. زحمة تكذبين هنا. رنا: وغلاة زهرة، وطهارة هذا المكان مو كذب. بقى صافن عليّ وبعدين التفت عني.
رنا: ما أجبرك.. بس على الأقل تعال وياي حتى أتأكد، تعرف إذا ما تتواجد ما يدخلوني. رزاق: راجع، منو يعرف؟ رنا: محد، أنت منعتني من أهلك، بس كرار أحجي وياه علمود أعرف أخبارك. رزاق: أوف منج رنا، هجولتي حياتنا. ما رديت، شنو أرد يعني؟ انتهى وقت اللي أبرر بيّه. وذاتًا حقه، أعرف حجم غلطي كله. اجوا مرتجى وكرار. سلمنا على الإمام وطلعنا. استلم الطريق كرار لأن طويل ومرتجى تعب بالجية. رجعنا للبصرة وطول الطريق ساكتين.
زهرة تتنحس شوي ومن تشوف أبوها تسكت. رغم مو وقته الطفل الجديد. بس إذا راح يرجع حياتي. فراح يكون أحسن وقت وجوده. أتمنى من الله بعده ومصايرله شي. 6 ساعات ووصلنا تعبت من الكعدة. دخلنا البيت أخذت زهرة نايمة بحضني. دخل وعمتي تلكته بالأحضان والدموع. نيالك اللي حضنتيه يا عمة. صعدت زهرة فوق نيمتها بفراشها. دخلت الحمام حسيت برطوبة. ومثل ما توقعت 😭. نزلت على كيف: عمة زهرة نايمة فوق إذا بچت نزليها عفية. كرار: طالعة.
رنا: لازم نطلع أنا ورزاق اكو شغلة مهمة. رزاق: شنو صار؟ ما أقدر أقوله وكرار وعلي موجودين. كرار حس دخل غرفته وعلي هم. عمتي مدري وين سلّتت روحها. رنا: رزاق عندي نزف، الطريق طويل. رزاق: دَمشي للمستشفى. طلعنا هم الطريق آذاني كوة مستحملة. وصلنا المستشفى بالباب بعد ما حسيت. فقدت وعي، عرفت خسرته بهاللحظة. رزاق: رغم الصار بس من شفتها ارتاحيت. دخلت الإمام وأنا أدعي من الله ينطيني إشارة حتى أعرف شنو أسوي.
رنا تستحق تكون باسمي لو لا؟ قالت شاكة حامل وارتاحيت لأن أخذت مطلبي. رجعنا وأعرف مبين عليها وجهها أصفر. بالباب مال المستشفى وكعت بعد. تهسترت، صار شكد تنزف اللي ما تحملت هسه. أخذناها للطوارئ بسرعة. بين ما اجت الدكتورة وأخذتها للفحص. طلعت عصبية! الدكتورة: حضرتك وين جنت عنها؟ رزاق: احجي عدل وفهميني شبيها. الدكتورة: زوجتك صار لها شكد نزف، شكد فاقدة دم.. ليش هذا الإهمال؟
رزاق: لحظة، أول شي جنت مسافر عنها، ثاني شي هي حامل يعني نزف بسبب الطفل. الدكتورة: من تنزف يعني طارحة! ماكو طفل بعد، من حالها مبين نزيفها صار له مدة. رزاق: فهميني المطلوب. الدكتورة: لازمها كورتاج.. ولازم توقّعلها وتحصللها دم. رزاق: ماشي. طلعت محتار منين أحصل دم والدنيا ليل. هي زمرتها أي بي، ما أعرف إذا أقدر أنطيها. ساعة أدور وأسأل على مصرف دم ماكو. رجعت تالي انطيت مني وهم يفتصلون. سحبوا بطلين دم، أحس ضغطي هبط.
سوولها الكورتاج ساعة وطلعوها. شوي واجت الدكتورة تشوفها. الدكتورة: لو شوي متأخرين، تتأذى. رزاق: شلونها هسه؟ الدكتورة: أحسن لا تخاف، بس لازم ترتاح فترة يلا تسوي حمل لأن رحمها تعبان. رزاق: إن شاء الله. كتبت مدري إيش وراحت. كعدت يمها.. شكد استحملتي لأن مجنت. ومن رجعت بعد ضعفتي وخارت طاقتج. آخ يا رنا، المشكلة هي حب الطفولة صعب يتخطى. وأنتي لعنة طفولتي مو بس حبها. غفيت يمها لحد ما طلع الصبح. حسيت الممرضة اجت انطتها علاجها.
كاعدة هي هم، قمت غسلت واجيت يمها. رزاق: الحمد لله على السلامة. رنا: الله يسلمك... راح ابني مو؟ رزاق: عدنا زهرة هسه، الله يعوضنا بغيره. رنا: جان سبب رجعتك وهسه فقدته. رزاق: اهدئي حتى ترتاحين ونطلع. رنا: أخذني لأهلي رزاق. رزاق: بيتج وياي وبس. دارت وجهها عني وبچت. خليني أشبع منج يولُ. صعب أقولها بس سهل تفهميها ترى. مضى الوقت وطلّعتها. على كيف ركبت السيارة ورجعنا للبيت. تلكتنا أمي تسأل وينه من البارحة.
رزاق: رنا تعبانة أخذتها المستشفى. أمي: هسه توك رجعت تلحك تفرفرك؟ رزاق: يمه بلا كلام زايد. رنا: اهدأ ميخالف. أمي: مو رجع رزاق تردين تصيرين المظلومة؟ رنا: عمة شحچيت فهميني، شجاج وياي شادة هيچ؟ رزاق: صعدي فوق رنا. أمي: أي صعدها تخاف عليها وأمك طز. رزاق: يمه رنا تعبانة وأنا هم تعبان فدوة هدي المشاكل هسه لحد ما نرتاح. خليت وصعدت غرفتي. ما راح أحصل غير اللغوة. دخلت شفتها كاعدة تبچي ولازمة بطنها. رزاق: موجوعة؟
رنا: أحس بطني حارة شي يوجع 😭. رزاق: منا لباچر ننزل بغداد نمر لخالج ماشي؟ رنا: خالي ملتهي بعرس ابنه. رزاق: ميخالف أكيد عنده عرف بالمستشفى. رنا: تمام. نامت بوجع وتتلوى. من ألمها كل الخلاف نسيته. هذا اللي يحب ياكل وحل. بدلت ومددت يمها. أخذتها لحظني شفتها مصخنة. آه يا رنا هو طفل وبعده وهاي رجعت. هيچ مأذية روحج ليش؟ ضربتها إبرة ونامت. ثاني يوم نزلنا لبغداد وديتها مستشفى. بيّتها ليلة ورحت لبيت خالها.
حضرت حنة محمد وحچيت وي خالها. خلصت الحنة ورحنالها سوة. هم شافها ووصى بيها دكتورة. مبين خوش دكتورة وفاهمة. دارتها عدل، اطمأنيت عليها الحمد لله. بقيت وياها ليلة لأن عرس محمد. وثاني يوم المغرب طلعنا لبيتهم. كرار هم جاب زهرة اليوم حتى تبقى ويانا. فتح لنا الباب محمد سلم عليه ورنا تجاهلها. هم صعبة عليه جاي بوجوده. بس مكانهم الأقرب على المستشفى. دخلنا وراح هو، أخذت زهرة نايمة. رزاق: أم أمير دخلي زهرة نامت. أسماء: أي جيبها.
أخذتها ودخلت لغرفتهم. رزاق: عمي إحنا باقين لباچر بس تطلع فحوصات رنا نرجع للبصرة. عمي قاسم: لا ابني ابقى خل تستقر حالتها وروحوا. رزاق: عمي هم زحمة ولهسه خطاركم ما واكف علمود عرس محمد. عمي: غرفتكم فوق ما مأثرين علينا. رنا: لا خالو نرجع حتى زهرتي مجايبتلها هواي ملابس. عمي: على راحتكم بعد. تركنا ودخل جوه.. التفتت عليها. رزاق: تردين تمددين؟ رنا: ناسيه مفتاح غرفتي جان صعدنا بيها. رزاق: ما عندهم مفتاح ثاني؟
رنا: الثاني عد غيداء. رزاق: هففف صيحي مرت أسامة خل تجيب غطى وفراشات. رنا: ماشي. راحت على كيفها مشت شوي اجت جايبة فراش. رنا: رزاق زهرة بيد أسامة أخذها. رزاق: أي گايم. رحت أخذتها وتشكرته ودخلنا. فرشت بالأرض وحطيت زهرة. شما تريد تمدد بالأرض ما تكدر. رزاق: قومي رنا، مددي هنا على الطخم. رنا: متأذية 😭. رزاق: الصبح نرجع للمستشفى تحملي هسه. كوة استحملت ومددت. أخذت زهرة يمي حتى ما تخاف. وي ما غفينا وجان تكعد تبچي.
لعبتها وهدّأتها حتى رنا تنام شوي. بس هاي جوعانة. رزاق: رناا، رنااا قومي رضّعيها جوعانة. رنا: ما أقدر أنطيها موجوعة. رزاق: شلون لعد دتبچي؟ رنا: هسه أسويلها حليب. قامت على كيفها وأخذت بطل الممة. رنا: ألم مو طبيعي وكوة مستحملته. قمت أسوي حليب لزهرة وصادفت محمد وسارة. باركتلها ومحمد تجاهلني ولا موجودة. ما أعتب عليه لأني غلطانة. صعدوا فوق ورحت كملت الحليب مال زوزو. رجعت لهم رزاق حاطها على بطنه وغافي.
كعدت يمهم وجريتها كعد. رزاق: ها جيتي؟ رنا: أي شفتك نايم قلت أنطيها. رزاق: لا جيبيها روحي ارتاحي. أخذها من إيدي شربها الحليب. مددت يمهم شوي ونمت. ساعة وكعدنا تحضرنا نروح للمستشفى وي خالي. طلعت صبّحت عليهم كلهم مجتمعين. رنا: خالة عادي أترك زهرة هنا؟ خالة مها: شنو راح ترحين؟ رنا: وي خالي نطلع عندي فحوصات. أسماء: أي تركيها وي أمير تلعب. رنا: أخاف يأذيها. سارة: تركيها إحنا هنا عيني عليهم. رنا: تمام. خالي: رزاق نايم؟
رنا: لا خالو كاعد جوه. خالي: خل يجي وجيبي بتج تعالوا تريكوا. رنا: هسه أقوله. نظرات محمد ما طايقتني وما أعتب عليه. قلت له لرزاق يجي نتريك وياهم. جاب زهرة وإجه. كعدنا كلنا ناكل وزهرة وأمير يلعبون. كملنا وقمت حضرت روحي وطلعنا. محمد: نمنا ساعة وكعدنا بعد. بدلت سارة ونزلنا نتريك كلنا. محمد: صباح الخير. الكل: صباح النور. أبويه: هلا بيك بابه، شلونج بنيتي؟ سارة: هلا عمو الحمد لله. محمد: يمه كامل الجاي؟ أمي: أي ديتهدر.
سارة: هسه أصبلك. اجت أسماء وأسامة صبحوا علينا. أسماء: تعاي كعدي سرو أنا أكمل الريوك. سارة: لا حياتي عادي. محمد: هههه وج كعدي أيام عرسج ما تنعاد. سارة: حتى لو هو استكان جاي قابل شدسوين؟ أسامة: شلونكم؟ محمد: هههه زينين، أمير وين؟ أسامة: يتفرج تلفزيون. محمد: قوم جيبه.. يمه غيداء راحت؟ أمي: أي البارحة إجه أكرم وراحوا. أسامة: غير أنت طفرت فوق. محمد: غير تعبان. أبويه: شكد وترجع تسافر؟ محمد: يومين وأروح أحجز.
أمي: دكمل عشر أيام ميصير تعوف مرتك وهي عروس. أسامة: صدك ترى، قلنا لك أجل عرسك لحد ما تخلص. محمد: لا تخبلوني من الصبح، سارة وين الجاي؟ سارة: هذا جبته. دخلت رنا صبّحت علينا. منا متنرفز ومنا شفتها لعبت روحي. كوة مستحملها لخاطر رزاق الولد ماله ذنب. تريّقنا وطلعوا هم. بقيت كاعد وياهم وسارة وأسماء لمّن السفرة. أمي دخلت غرفتها. شلت زهرة بيدي. حرام هالشكول تكون أمها رنا. خلصن وأسماء أخذت الجهال وياها.
صعدنه غرفتنا، محد بالبيت عبالك هدوء. محمد: وين بوستي؟ شو اليوم كلشي ما شفت. سارة: قابل أبوسك كدامهم؟ محمد: لا يلا صرنه وحدنه. اجت باستني من خدي ووخرت! محمد: هي هاي بوسه بالله! سارة: ما حبيتها. محمد: من صرتي مرتي صارت هاي البوسه، عمي نرجع للخطوبه ع الأقل نكدر نبوس براحتنه. سارة: شبيك مشتاق تبوس؟ محمد: غير بعد ماكو شي ممنوع، شريد أسوي؟ سارة: لا والله مو هو كله بكيفك. محمد: طبعًا، أكيد رضاچ هم وهاي سهله.
سارة: مو سهله طبعًا، شهالثقه؟ محمد: مو أراويچ الثقه عدل. سارة: ما وخررر. دتنهزم من كدامي ولگفتها من خصرها. حضنتها وهي ترفس تريد تفلت. محمد: وج ماكو مهرب بعد صبر سنين. سارة: الله عليك لا تسوي شي. محمد: خليني أشبع منج قبل لا أسافر. سارة: خوش حجة هاي. محمد: شو تعاي هنا. سحبتها ومددنه ثنينه ع السرير. خلت راسها على صدري وحاضنها. محمد: مرتاحه سارة؟ سارة: يكفيني قربك أمان بالنسبه إلي. محمد: فدوة لروحچ. سارة: أحبك.
محمد: شوفي منو تحارش، ماكو بعد مجال. سارة: عفو عفو حباب. سكتتها بطريقتي الرائعه. منو كال إني حباب؟ محد. عشنا مشاعرنه بلهفتها وجمالها. غفينا فترة مدري شكد. حسينا على دك الباب خفيف. سارة: محمد كوم على الباب. محمد: عوفيهم معلينه. سارة: كوم حباب، خاف عمه وفشله منها. محمد: ليش فشله ولچ؟ سارة: دكوم عاد. محمد: أويلي على عنادچ. كمت فتحت الباب شفت أسماء. أسماء: آسفه كعدتكم بس أريد سارة. محمد: صاير شي سومه؟
أسماء: لا لا بس صيحها. مديت راسي بالغرفه: سارة تعاي. سارة: جايه. محمد: شصاير؟ طلعت سارة: ها حب، دخلي. أسماء: لا بس أريد تنزلين يم زهرة وأمير شوي. عرفت السالفه مختلفه، تركتهم ودخلت. سارة: هسه دقايق وأنزل. عفتهم ورحت للحمام سبحت. طلعت شفتها محضرة ملابسها دخلت سبحت. بقيت أنتظر لحد ما طلعت. محمد: نعيما. سارة: ينعم الله عليك. محمد: شبيها أسماء أعرف مو ع الجهال. سارة: تعبت وياهم صار عدها نزف شوي تريد تمدد وذولي وكاحه.
محمد: نزليلها إذا متأذيه أخذها مستشفى. سارة: ماشي، سوي نفسك ما تدري. محمد: تمام، يلا ننزل. سارة: أي. محمد: أقول لك أمي وين لعد؟ سارة: ما أعرف ولا سألت. محمد: شو من عرستي صرتي فاهيه بعد شبيچ ولچ؟ سارة: هههه أنت أخذت الحلا غير. محمد: يي قشمريني. سارة: ههه. نزلنه راحت لغرفة أسامه شوي وجابت لي الجهال يمي ودخلن المطبخ يحضرن أكل. محمد: أموري عمو وين بيبي؟ أمير: بتلفه. محمد: شو ماكو. أمير: مادري شفته هنايه.
كعدتهم عدل ورحت غرفة أمي. مو موجودة! شنو وين راحت؟ دخل المطبخ يم البنات: سومه وين أمي؟ أسماء: راحت للمستشفى عمي خابر رادها. محمد: خير إن شاء الله. أسماء: رنا متأذيه مدري شنو ما فهمت عدل. سارة: ولا ترتاح هالبنيه دوم معلعله. محمد: المن أيده الله يزيده. سارة: لا خطيه شبيك، ترة كل أم بعد ما تخسر ابنها هيج تتبهذل. أسماء: أي والله رغم عندي أمير بس من طرحت نفسيتي انكسرت، حاسه بيها.
محمد: ما متشمت بس خل تصفي نيتها تنال اللي تتمناه. دخل أمير للمطبخ عصبي. أمير: عمو هاي هاي زهرة ما تخليني ألعب. محمد: العب غير شي هسه عمو، خطيه دادة صغيرة. أمير: هي ما تقبل تخليني ألعب وياها. محمد: ميخالف عمو أنت مو رجال جبير روح يمها علمها شلون. أمير: أي إني رجال جبير حيل. محمد: ههه فدوة للرجال. أسماء: يلا بعد نريد مرة لابني. محمد: هستونه عرسنه وينچ بعد. أسماء: يي وإذا. سارة: عود ننطي لابنچ الجديد، أمير كبير عليها.
محمد: ليش كبير؟ كلش كلش يصير بينهم 3 سنوات. سارة: هوايه ترة. محمد: بينه أحنه مو 6 سنوات قابل هواي. سارة: طبعًا ما تشوف رافضتك جنت. أسماء: ترة عرستوا بعد بلا عراك. محمد: دشوفي شتحچي أول. دك التلفون عقيل: يا هلا بالضلع. عقيل: هلا بيك شلونك؟ محمد: الحمد لله على الله، أنتو شلونكم؟ عقيل: هم الحمد لله، شوكت ترجع أريد أقرأ وذولي ما يسوون واهس. محمد: هههه منو ديحچي هاي؟
عقيل: غير دورة بلشت ولازم ندرس، بروفيسور مارن حشك اسمي بينهم الله لا ينطيه. محمد: ههه غير علمودك، يومين وإن شاء الله عدكم. عقيل: ومرتَك خطيه، أخذها وياك. محمد: الله كريم أشوف شلون تصفه. عقيل: تمام، يلا حبيب أفلت. محمد: الله وياك سلم لي. أسماء: يعني صدك يومين وتسافر؟ محمد: أي انتهت إجازتي. سارة: معليه أجي وياك. محمد: بلا لسان زايد. سارة: عفيه بيك. خلت وصعدت زعلت. أسماء: على كيفك وياها.
محمد: وج فهمتها ليش ما أخذها بس عنادها آخ منه. أسماء: ما غلطت ترى. محمد: ارجعي لجدرچ حبابَه. خليت وصعدت لها كاعدة يم الشباك عصبيه. كعدت يمها كامت سحبتها إلي. تحاول تفلت بس لازمها حيل. محمد: ما رح تهدئين يعني؟ سارة: وخر هدني عاد. محمد: أهدج بشرط تبقين كاعدة. سارة: من تحترمني أبقى كاعدة عود. محمد: شنو تحترمني! سارة: ترة بعدنه عرسان محمد، شنو كدام أسماء تكولي لسان زايد!! محمد لا تغير نفسك بعد ما حصلتني نهائيًا.
محمد: شهاللغوة ولچ! شنو تغير؟ سارة: عفيه صارت لغوة بعد. محمد: هسه تنزلين وكأن شي ما صار، سارة إذا تصغرين عقلچ أصغره إني هم وساعتها تندمين لا توصليني لهاي النقطة. سارة: وين راح حبك!!! وين اللي انطى كلمة لأهلي إنه يصوني؟ محمد: لج بابَه هسه شمسويلچ، گصري لسانچ رح تلقين مني كل خير. سارة: أعرفك مليتني، وأعرف تريد تروح وحدك حتى براحتك عبالك غبيه ما أفهم عليك. محمد: شكد عمرچ؟ سارة: أي صنف صنف، وخر إيدك خل أولي.
بالله شحچي وي هاي ما أدري. تخليني أصدق إنه الزواج يقتل الحب. مو چانت حياتنا تجنن قبل. هسه من إجت يمي بعد هيج تحولت. تركتها وكمت ع الحاسبه. كعدت أراسل جماعتي وهي تنظر لي بغزر. عبالها ما أشوفها يعني. محمد: قومي سارة أريد چاي. سارة: عليك الله راضي باللي دتسويه!! منو ثالث يوم عرسهم يتزاعلون فهمني؟ محمد: منو زعل! أنتِ.. منو طنكر! أنتِ يعني إني شعليه، ما غلطت أنتِ كله سويتيه. سارة: هاااا ماشي، قوم رجعني لأهلي.
محمد: يي يلا قومي حتى أخلص. سارة: أي تخلص اشو كاعدة على گلبك محمضه. محمد: وكأني رح أعترض. سارة: أي ليش تعترض تكيف حتى تتعارك. محمد: وج بابَه شبيچ فهميني. سارة: الله ياخذني زين. خلت ونزلت!!!! شبيها هاي. يعني هم غلطت بشي، لا طبعًا. للعصر اجه رزاق أخذ بته وسلم وراح. سارة يوميه طنكورة شكل. أعرف حتى ما أروح وحدي. بس ما دام هو أسبوع وأسحبها. صبحت الصبح كعدتها حتى تسوي ريوگ أرد أطلع. شما أصيح ما تجاوب لو تون.
قلت تعاند ما تريد تقوم. رحت يمها أشوفها عركانه. كمشتها تشع حرارة!!! نايمه يمي ما بيها شي ليش تمرضت؟ نزلت لأهلي آخذ لها خافض حرارة. محمد: صباح الخير يمه. أمي: هلا حبيبي صباح العافيه. محمد: الله يعافيج، أبويه هنا؟ أمي: أي يوصلك المطار ويروح دوامه. محمد: أي زين، هاي سارة سخونه داكه بيها أريد خافض حرارة. أمي: يي حسبت لهالشي، مرتَك يومين عايشه ع المي ما تقبل تاكل. محمد: ليش ما حچيتي لي؟ أمي: فهميني شجاها.
محمد: تريد تروح وياي، قلت لها آمن مكان نبقى بيه وآخذج.. الشقه بيها الولد والفنادق مالهم غاليه بس هي عناد عناد. أمي: حقها مامه ترة عروس أكيد ما تقبل تغيب عنها. محمد: أف منجن أروح لأبويه أحسن. أمي: رأيه من رأيي هسه تشوف. محمد: ماشي لعد صاعد حتى خافض ما أريد. عفتهم وصعدت، نسوان عقل صغير. حتى أمي صارت وياها شلون. دخلت الغرفه هاي على حالها. لا إله إلا الله، نزلت مرة ثانيه لأبويه. محمد: يابه، اصعد لسارة عفيه مصخنه.
أبويه: هسه جاي بابَه أمك قالت لي. أمي: حتى بعد ما تعاند من أحچي شي. محمد: يوووو مها من تحچي بعد ما تسكت. أبويه: ولك كم مرة قلت لك لا تصيح لأمك باسمها. محمد: قويسم إني وأمي أنت شكو. أبويه: شو لسانك طولان ولك. محمد: بويه تزوجت بعد. أبويه: هم أرزلك عبالك أقول ما يصير. محمد: مهاوي افصلي وي قسومي خل أروح لمريتي. أمي: ههه أنت عصبي وانهزم. محمد: ش عندي غيركم فهميني. أبويه: شو وخر خل أشوف هالبنيه أنت ما منك رجا.
صعد لغرفتي يدردم عليه. محمد: يمه مرتي أمانه عدكم. أمي: لا تخاف يمه روح وتطمن. محمد: فدوة لروحچ غاليتي، أروح أشوفهم. أمي: دمشي جايه وياك. صعدنه فوق شفت أبويه مكعدها يفحص حرارتها، نحلانه كوة كاعدة. أبويه: شلون يصير هيج بابَه غير تنشفين شعرچ. سارة: تعاجزت عمو قلت أنام وهو ينشف. محمد: چان قلتي لي أنشفه لكِ. سارة: أنت ابقه محتار بجماعتك. محمد: يوووو أروح أبدل وأولي أحسن. أبويه: ولك شكلت لك هي ها.
محمد: بويه لا تدخل إني وياها ما عليكم. أمي: اهدأ مامه، قاسم لا نتدخل أحسن. أبويه: ليش ما نتدخل، لو بنتج تحطين خشمچ غصب عنهم مو، شوف تروح ولا ترجع لحد ما تخلص لعبت روحي من سفراتك لا عتب على بنت العالم. محمد: أي أشكرك بويه. أمي: روح تحضر مامه، روح لا تتأخر. أبويه: قومي عمو تريقي أوديج لأهلچ. محمد: ما لها طلعه منا، يابه سارة تطلع بشوري وبس. أبويه: ولك لا تخليني أحچي غير شكل كدام مرتَك. محمد: قصرت أنت ما شاء الله.
سارة: اهدأ محمد، عمو ما أروح خليني هنا أرتاح أحسن. أبويه: ما عليك من هذا إني أقول ترحين. سارة: لا عمو، حتى لو متعاركين ما أطلع وهو مو راضي وهم ببيت أهلي زحمه أروح وما صار لي كم يوم من متزوجه. أمي: عفيه بيچ عمه.. يلا قاسم أمشي. باوع لي بصفح وطلعوا هو وأمي. سارة: ليش تعصب هيج، يعني ما تعرفني ما أطلع بلاك. محمد: صوت ما أسمع. سارة: محمد لا تسوي هيج الله عليك. محمد: شسويت يعني، هاي بسببج ترزلت زين هيج.
سارة: ش دخلني فهمني، محمد ليش تغيرت. محمد: يوووو رح ترجع تزن تغيرت وتغيرت. سارة: طيارتك رح تتأخر عليها، روح كمل أحسن مما يروح وقتك بالزن مالتي. نامت وغطت راسها تبچي. أدري منو قايل لهم مرتاح بسفري بعد أيام من عرسي. ليش هسه صارت ما تفهمني. شنو تغيرت يعني! هاي إني مثل ما إني. بدلت وحضرت غراضي كلهن. رحت يمها كعدت وخرت الغطا من على وجهها. محمد: قومي سارتي، قومي خل أحچي وياچ. سارة: ما محتاجه شي تكدر تروح.
محمد: إني محتاج ما تريدين تعرفين شنو؟ سارة: مو مهم روح. محمد: وين بنيتي لعد، قومي باباتي. قامت حضنتني وتبچي أنوب. محمد: هسه شنو البچي أرد أفهم. سارة: أنت ما تفهمني، محمد بعد ما الله جمعنه رغم المشاكل الصارت بينه تريد تروح وبدوني يعني!! أوكي روح بس اصبر خل يمضي على عرسنه 10 أيام.. فهمني من يجون العالم بالسبعه ما رح يضحكون رجلها عافها وسافر شو شبيها؟؟
محمد: لهذا قلت لأمي ماكو سبعه.. سارة دراستي مهمه، وبقالي بس شوي وأرتاح.. لا تصعبيها عليه هسه. سارة: خلص روح، دراستك مهمه.. روح. محمد: لا تبچين رويحتي، أنتِ هم ارتاحي فترة لحد ما أكمل وآجي أخذچ، وعيونچ أعوضچ أحلى من هاي الأيام. سارة: روح ما أريد منك شي، روح بعد. محمد: كافي صياح، عيب من أهلي يقولون أخذنه طفله، مو؟ سارة: لا تقشمرني محمد.. «تعرف شكد متعلقة بيك؟ تعرف أنت شنو بالنسبة إلي؟
محمد: «يا روحي أنتِ كافي، خليني أروح مرتاح لا تقلقيني.» سارة: «روح ما أريد أشوفك بعد.» محمد: «أهون عليك يعني؟ سارة: «مثل ما هنت عليّ وحتى دموعي ما أثرت بيك.» محمد: «سارة ليش هيج تسوين؟ سارة: «روح يلا، وخر مني.» محمد: «أروح بدون ما تودعيني؟ سارة: «ما أريد أودعك ما أريد.» محمد: «لج بابا اهدي، بلا عصبية وصياح، خلص منطمر هنا ما ولي.» عصبتني كلش، تركتها ونزلت. أبي واقف بالدرج يدردم عليّ. أبي: «ارتحت هسه؟
محمد: «أستغفر الله ربي.» أمي: «عوفه قاسم ما تشوفه عصبي.» محمد: «لا شلون يعوفني؟ أبي: «شو أنت تزوجت طلع لسانك علينا؟ محمد: «بويه رحمة لأبوك عوفني، يمه صعدي لسارة خل تسكت.» أمي: «عين صابتكم والله يمه، شو قبل عرسكم تجننون جنتوا.» أخذت السويتش وطلعت برة البيت. وين أولي بـ 7 ونص الصبح؟ أستغفر الله ربي شجاها هيج فقدت. خليت ورحت لبيت أسامة.
أفضل مما أفرفر بالشوارع هيج. هم زحمة شنو رايحلهم من الصبح. أوف أوف شحكي شكول ما أدري. صفيت السيارة ونزلت، دقيت الباب عليهم. شوي وطلع أسامة. أسامة: «منو؟ محمد: «أني محمد افتح.» أسامة: «شو من الصبح خير؟ محمد: «دفتح عاد شلون بيك؟ أسامة: «دصبر أسحب السركي، ها أها، هلا شلونك؟ محمد: «هلا بيك، شلون؟ أسعد رجال بالعالم.» أسامة: «وصلت؟ بلشت عراك مو؟ محمد: «أوف وخر أخذلي طريق.» أسامة: «هههه تعال نتريك.»
دخل شوي وصاحلي، دخلت. أمير قاعد يتريك. أمير: «حبيب عمو شلون؟ محمد: «هههه والله بس هذا يطفي عصبيتي.» دخلت أسماء. أسماء: «هلا شلونك؟ محمد: «هلا سومة، يابا عذرينه من الصبح.» أسماء: «ياا غير بيت أخوك، على راحتك تعال أي وقت.» محمد: «هههه زين أخذت الأوكي.» أسماء: «يي، اقعد تريك هسه أجيبلك جاي.» محمد: «أي والله وصبلي ثقيل.» أسماء: «تدلل، أسامة تريد جاي ثاني؟ أسامة: «أي والله.» محمد: «إيه شو ماكو صارلك فترة؟
أسامة: «ملتهي بالقضايا وهوسة.» محمد: «الك خلق شطوله.» أسامة: «هسه أنت مو تدرس هم الك خلق تشرح وتصحح وووو منو اعترض؟ محمد: «هههه اليوم وين ما أروح يصيحون بوجهي، خير، كاتل أبوكم وما أدري.» أسامة: «تستاهل.» محمد: «سومة جاي بسرعة حتى أولي، أبقى بالشارع أحسن.» أسماء: «معليك من أسامة، فهمني شنو سبب جيتك! مو طيارتك بعدلها كم دقيقة شعندك هنا؟ محمد: «شلون أروح وبعدني عريس ما يصير؟
يابا دراستي هاي مهمة، جيبي اللي يفهم، إذا تطبقين وياهم أبقي ساكتة حتى أروح.» أسماء: «هو حقها محمد، وأنت هم حقك، لهذا السبب كلنالك أجل عرسك.» محمد: «أأجله وأحمد قريب من سارة! عبالكم ساكت يعني مرتاح؟ أسماء: «أوثق بمشاعرها إلك، راح ترتاح.» محمد: «أعرف مشاعرها بس مو نبي حتى ما تخطأ، أسماء أنتِ بالذات المفروض تفهميني.» أسماء: «فاهمتك، وهسه ما راح تروح.» محمد: «وين أروح إذا سوولي عرس بالبيت؟
أسامة: «أكيد تعاركت وي أبوي هم.» محمد: «طبعًا يرادلها سؤال.» أسماء: «بس زحمة محمد تتعارك وي عمي.» محمد: «صح تعاركت بس مو لدرجة أزعل لا تخافين، تعرفين علاقتنا شلونها.» أسامة: «باقي هنا لو ترجع؟ محمد: «تريد أروح يعني؟ أسامة: «لا مو هيج، إذا تبقى حتى أروح، وإذا تطلع أخذ أسماء وأمير لبيت أهلي.» محمد: «أخذهم وياي ليش تتأخر؟ أسامة: «لا عادي وقتي متعود على هالدرب.» أسماء: «عادي روح أنت يكمل أمير ونروح.»
أسامة: «كيفج بعد، انتبهي على نفسج، المغرب عود أمرلج ونرجع.» محمد: «شنو توصي وين رايح؟ أسماء: «هاي غير للحلة صايرة بيته الثاني يومية يروح لهناك.» أسامة: «ألف مرة كتلك انتقلت هناك وعندي قضايا بس أخلصهن أرجع هو بس هالشهر وانتهى.» محمد: «شو ما أدري انتقلت؟ أسامة: «هو منو شايفك أنت بين عرسك وبين لندن؟ محمد: «أبوي يدري.» أسامة: «طبعًا مرتين إجه وياي.» أسماء: «سترتك والرباط خليتهن ع السرير والفايل ع الكومدي تلكاهن.»
أسامة: «ماشي.» دخل أسامة، التفتت عليها. محمد: «شبيه؟ أسماء: «أوف أوف محمد، ما مرتاحة لسفراته والله ما مرتاحة.» محمد: «اهدئي، أبوي يدري لهذا متطمن.» أسماء: «إن شاء الله يكون صدك يدري.» محمد: «أبد لا تشكين برجلج، لا تزعين الجحيم بحياتكم.» أسماء: «أخذ أمير بين ما ألم السفرة.» كل وحدة تعجز أكثر من الثانية. كل وحدة منهن عقلها أصغر من الثانية. يعني شغلة هيج، تجين تشكين ليش. أدري الحب والثقة وين راحن لعد؟
أسامة: «يلا أروح، دير بالك عليها محمد، كول لأمي ما تخليها تتحرك.» محمد: «إن شاء الله، أسامة وين شغلك حتى أجيك، اليوم ما أبقى بالبيت حتى ما أتعارك.» أسامة: «هههه والله مشيتك عدل، أوصل الحلة وخابرني أدليك.» محمد: «ماشي.» أسامة: «يلا سلام... أسماء طالع أني.» أسماء: «الله وياك، انتبه على نفسك.» أسامة: «إن شاء الله، مثل ما وصيتج.» أسماء: «إن شاء الله.»
طلع وأخذت أمير، بدلتله جابته. شوي واجت مجهزة غراضهم ومبدلة. شفت الساعة 9 ونص. محمد: «يلا كلشي ما ناسيه؟ أسماء: «لا جاهزين.» محمد: «طفي الكهرباء وسدي الغاز.» أسماء: «الكهربا برة والغاز سادته.» محمد: «يي زين.» طلعنا منا ومنا، وصلنا البيت. أسماء: «ادخل خل تشوفك ما مسافر وأنوب اطلع.» محمد: «لا خليها.» أسماء: «خطية محمد لا تعاملها هيج.» محمد: «والله أني الخطية، أقسم بالله.» أسماء: «ههه ميخالف بس ادخل.»
نزلت جنطتهم ودخلت. قاعدة يم أهلي بالمطبخ. حالها على حاله عبالك الخافض ما سوى شي. أسماء: «سلام عليكم.» أبوي وأمي: «وعليكم السلام.» محمد: «سلام.» أمي: «هلا يمه.» أسماء راحت عليها تسلم جان تشهك. أسماء: «ولك محمد أخذها مستشفى، ترى سخونتها تخوف.» طفرت عليها، شنو تخوف. محمد: «هاي شنو سارة، ليش ساكتة عنها؟ سارة: «ما أكدر... أحكي... ما عندي... طاقة.» كوة واقفة ما عندها قوة. محمد: «يابا أخذها مستشفى.»
أبوي: «لا بابا هسه أمك سوتلها ورد، منا لساعة ما فاد أخذها وياي.» محمد: «بابا حرارتها عالية.» سارة: «لا تخاف ما بيه شي، روح.» محمد: «وين أروح وأنتِ هيج، تعاي وياي.» سندتها وأخذتها لغرفتنا، صعدنا. محمد: «ليش هيج تسوين بروحج، مو كتلك ما راح أروح باقي هنا؟ سارة: «محمد أخذني الحمام رح أرد اللي ببطني.» محمد: «صبري شوي، واصلين.»
دخلتها الحمام، اتكت يم المغسلة. طلعت بدلت ملابسي ورجعتلها. شفت البرنص مالها موجود بالحمام. رحت مليت البانيو مي. لحد ما يمتلئ سندتها عليه. صار بيه نص شلتها خليتها بيه. المي شوي بارد فز جسمها من البرودة وشهكت. سارة: «بارد محمد فدوة طلعني.» محمد: «استحملي بس دقيقة حتى جسمج يفك.» سارة: «بارد.» محمد: «اهدئي حبيبي، هاي أني يمك اكو أحلى من هيج، وأنتِ بحضني وما راح أسافر، شفتي؟ سارة: «أي، ارتحت لا تروح بعد.»
محمد: «ما أروح حبيبي باقي وياج.» سارة: «كافي فدوة جمدت.» محمد: «يلا خلص طلعنا.» شلتها منه، تبللت وياها. بقت ترجف، سندتها شوي وغيرتلها ملابسها. لفيتها بالبرنص وهي مثل السعفة تختض. أنوب أني هم بردت بس تجاهلت روحي هسه. طلعتها قعدتها قدام الصوبة. بسرعة رحت بدلت ورجعت يمها. دفيتها عدل، جبتلها حليب. كل شوي أقيس حرارتها، خفضت أحسن. تكولي ورد، هاي مكبرة بالحرارة وين يفيد الورد. محمد: «يلا حبيبي نكوم نبدل.»
سارة: «لا أني أدفى وأكوم.» محمد: «لا بنيتي أني أبدللها.» سارة: «لا عليك الله عوفني.» محمد: «مو وقت خجل وذاتا كلشي شفت وحلال وأنتِ مرتي ماكو عيب بعد، يلا قومي حتى تنامين ترتاحين.» سارة: «مو خجل بس أستحي.» محمد: «أعتقد أنتِ نطيتي مرادف الكلمة مو نفيتيها.» سارة: «وخر اشو.» قمت جبت ملابسها وقعدت يمها. لهيتها بالحكي وبدلتلها. طفلتي بس شوي كبيرة ماكو فرق أبد. محمد: «يلا للفراش.» سارة: «تعال يمي لا تطلع.»
محمد: «لا نامي أنتِ وأني رايح لأسامة.» سارة: «ترجع؟ محمد: «أي راجع لا تخافين.» سارة: «محمد لا تزعل مني فدوة.» محمد: «نامي هسه وبعدين نحكي.» تركتها ونزلت، تلقتني أمي. أمي: «ها شلونها؟ محمد: «نامت، نزلت حرارتها شوي.» أمي: «أي زين الحمد لله.» محمد: «رايح لأسامة يمه، نرجع المغرب عود.» أمي: «ماشي مامة انتبه على نفسك.» محمد: «إن شاء الله، يلا رايح.» _رنا تروي
_بالمستشفى ورزاق قلق يروح ويجي. أحس إنه الشغلة مو بس إسقاط عندي. لأن ما بيه هيج وجع. شكد سامعة إنه اكو يطرحن. بس يومين ويكومن عادي ما بيهن شي. حتى هو قلق لهالسبب متأكدة. دخل الدكتور وخالي قاسم وياه. حكوا ثنينهم بالإنكليزي ما فهمت شي. إنكليزيتي مو كلش. رزاق يحاول يركز وياهم ويفهم. رزاق: «دكتور بلا زحمة.» الدكتور: «أي تفضل.» أخذه وطلع برة، بقى خالي يمي. رنا: «خالو شنو شبيه؟ كولي ليش تتعبون نفسيتي؟
خالي: «ماكو شي بنيتي، هسه الدكتور يفهم رزاق وانتهى، بس يرادلك راحة وإن شاء الله ترجعين مثل قبل وأحسن.» رنا: «زين كولي شنو رح يفهمه؟ خالي: «لا تقلقين بابا، زهرة هم لا تخافين عليها هسه موجودة يمنا بس المهم ارتاحي أنتِ.» رنا: «الله كريم.» بقت غصة بروحي، يا رب لا تعاقبني بشي فوق طاقتي، تعلمت من أخطائي واكتفيت. إذا أنت هم تقسى عليّ لمن أروح بعد؟ يا رب ارحمني وكون وياي دائمًا. شوي ودخل رزاق وي الدكتور.
الدكتور: «دكتور قاسم فهمت زوجها وإن شاء الله يومين وتطلع لا تقلق.» خالي: «مشكور دكتور يوسف.» يوسف: «تدلل هذا واجبي.» خالي: «يلا بابا أروح وإن شاء الله أمرلج.» رنا: «أخذ راحتك خالو.» طلعوا ثنينهم ورزاق ما يدري شلون يتصرف. رنا: «كولي، أصلاً حسبت حساب بيه شي، فهمني رزاق لا تحرك أعصابي.»
رزاق: «ماكو شي رنو، بسبب النزيف إله مدة وأنتِ ساكتة عنه والحمل تعبان عندج الرحم شوي بس كال اكو مقويات وعلاج حتى تتعافين بسرعة، وبعدين عدنا زهرة مو كافية علينا؟ رنا: «يعني أكدر أحمل لو انتهى؟ رزاق: «أكيد حبيبي أكيد تكدرين ونرجع نفرح بنونو جديد بس هسه خطر عليك، خل نكبر زهرة وبعدين نفكر.» رنا: «هاي شفت شلون الله عاقبني، لأن أذيتك هيج صار بيه.»
رزاق: «حرام هيج تكولين، الله أخذه قبل لا يجي لأن يمكن يكون مو بار بينا أو رح يجي معلل، دائمًا كولي إنه الله ما يسوي شي ما إله بيه حكمة.» رنا: «وهسه أخذه لأن أنت رجعت بسببه.» رزاق: «رجعت لأن أعرف رنا شمدت سوي ما أقدر أكرهها، شمد أقصى عليها... يطلع دا أقصى على روحي... رجعت لأن أريد روحي اللي تعبت من فراقج رغم قررت إنه أنهي طريقنا، رجعت لأن روحي بيج من صغري لدرجة ما أقدر أتركج حتى بعد ما صار اللي صار.»
رنا: «وعد والله يشهد عليّ، ما يتكرر هالشي. وروح ابني اللي خسرته قبل لا أشمه، رح تبقى أنت وبس بحياتي، بس أنت ابقى وياي ولا تبعد عني بعد لأن أموت أكثر مما أنت تموت بهالبعد.» رزاق: «لا تخذليني رنا، تعرفين هالشي مو سهل بس شذنبي إذا روحي بيج؟ رنا: «وروح أبوي بعد ما تنعاد.» تقدم حضني وثنينا نبكي. أخ يا رزاق لو تدري شصار بيه بهالشهر اللي بعدت روحك عني بيه. شفت الموت، رجعت يتيمة مرة ثالثة.
مرت يومين واستقرت حالتي الحمد لله. طلعنا أخيرًا ورحنا لبيت خالي. ما نزلت، بس هو نزل جاب زهرة وطلعنا للبصرة رأسًا. أحسن هيج. كرهت بغداد كلها رغم أحلى أيامي عشتها هنا، بس ذكرياتي البشعة كلها مرتبطة بهالمكان. الطريق طويل والكعدة أذتني لحد ما وصلنا، بدل الأربع ساعات صارت سبع. رنا: رزاق خل نروح بيت أهلي. رزاق: شلون، منو يداريج؟ رنا: فدوة، رزاق عمتي ممستقبلتني وهيج أتعب أكثر.
رزاق: أوديج بس ما ترحين بيت أهلج، أعوفج وي بيت جدج حتى فرح موجودة. رنا: لا أريد أفتح بيتنا. رزاق: رنا لا تقلقيني، ارتاحي بعد ونفتحه، ماشي لو ترجعين وياي؟ رنا: ماشي مثل ما تريد. غير الطريق وأخذني لبيت جدي. رنا: من تجي وياك جيب ملابس لزهرة غير ذني. رزاق: ماشي، يلا نزلي على كيف. أخذ زهرة ونزل، نزل الغراض. دقينا الباب شوي وفتحها مرتجى، تفاجأ بينا. مرتجى: هلا بالضلع. رزاق: هلا بيك، أخذ زهرة. مرتجى: جيبها حبيبة خالها.
رزاق: انطيني إيدج رنا، اتكئي علي. مرتجى: خير رنو، سلامتك. رنا: الله يسلمك لا تخاف. رزاق: خالة هنا موجودة؟ مرتجى: إي موجودة، ادخل. دخل قدامنا، صاح خالتي مليكة. طلعت تلقانا، هم تفاجأت من حالتي. وجهي أصفر ومتكية على رزاق، قوة أمشي. خالتي مليكة: يمه رنو شجاج خالة؟ رنا: ماكو شي خالة شوي مريضة. خالتي: ادخلوا ادخلوا، مرتجى جيب مي مامه. رزاق: إي والله الطريق شطوله صار. خالتي: هياتكم أنتو شلون طويل؟
رزاق: لا خالة جايين من بغداد. خالتي: يااا شوداكم بغداد وي هاي الأوضاع؟ رزاق: رنا تعبت وأخذتها لخالها للمستشفى. دخل مرتجى بيده ماي وياه دخل خالي جواد. خالي: يا أهلاً وسهلاً برزاق. رزاق: هلا بيك عمي. خالي: شلونج رنو، شجاج بابه؟ رنا: تعبت شوي وكلت أجي عدكم، تعرف زهرة حركة ما أسيطر عليها. خالي: كل الهلا بيج بعد خالج، فرح فروح تعاي بابه. فرح: ثواني بابه. رزاق: خالة شوي تعاي عندي حجاية وياج. خالتي: إي يمه تعال للصالة.
طلع وي خالتي مليكة وجروا فرح وياهم. خالي جواد: صاير شي بابه؟ رنا: لا خالو لا تخاف. خالي: معافاية بنيتي، إن شاء الله ماكو شي. رنا: تسلم. بقى كاعد، توترت لأن سنطة. شوي ودخلن مرام ورقية. مرام ورقيه: ولج هلاو. رنا: هلا بيجن، هاي أنتو هنا؟ مرام: هستونا جينا، فرح كالت ضايجة ولا ذكرت أنتي هنا. رقية: خبيثة لو كايلتلنا من الأول جان جينا من وقت. رنا: ههه لا هستوني جيت ما تعرف فرحه. مرام: هااا، أكولج ابقي مدام اجتمعنا.
رقية: إي عفية ابقي ويانا. رنا: خل يجي رزاق وأكوله. خالي: ولج لا تلعبيهن. رنا: هههه خالو لا تخربها. مرام: شنيه؟ رنا: هيج حياتي مو يمكم. شوي ودخلوا رزاق وفرح اجت سلمت. حضنتني وهمستلي: كل الصار تحجيلي سببه. خفت، معقول حجالهم رزاق. رنا: ماكو شي حياتي لا تخافين. فرح: حجي يفيدج. مرام: رزاق عفية خلي رنا تبقى عدنا. رقية: إي حباب مشتاقيلها. التفتت عليه أشرتله. رزاق: وأني وين أروح لو بقت؟ مرام: مكافي هي شبع صارلها شكد وياك.
رزاق: صار شهر مشايفها. رقية: لا تجذب علينا، خلص رنا باقية أسبوع تمام. رزاق: هههه لا أسبوع هواي يومين وآخذها. فرح: ثلاثة حتى أحسن. رزاق: ماشي مثل ما تريدون، يلا أروح بعد. رنا: لا تنسى تجيب ملابس لزهرة. رزاق: إن شاء الله، يلا أودعناكم، مع السلامة عمي. خالي جواد: الله وياك وليدي انتبه على نفسك. رزاق: صار إن شاء الله، وأنتو هم انتبهوا على مريتي. خالي: بعيونه روح وأنت مرتاح. رزاق: تسلم، يلا مع السلامة.
طلع وبقينا أحنا البنات وحدنا. خالتي واقفة بالباب تنظرلي مدري شلون. يمممه ولك رزاق تعال أخذني 😭 شكو خفت يعني، شحجالهم أريد أعرف. خالتي مليكة: يلا بنات خل رنا ترتاح وتنوم بنتها. رنا: إي والله اليوم ولا رضعت طول الطريق. خالتي: هسه مرتجى وكلها بس هم رضعيها خالة. رنا: إن شاء الله. صعدت فوق غرفتي وفرح جابت زهرة. دخلت وسدت الباب قفلتها. رنا: فتحيها هسه البنات يجن. فرح: لا كتلهم تنومين زهرة ونطلعلهم.
رنا: زين تسوين، جيبي زوزة. أخذتها أبدللها، كعدت كدامي فرح. فرح: فهميني رنا شنو الصار، كرار كالي شي وهسه رزاق كال شي مختلف. رنا: شنو كالج كرار؟
فرح: أنتي ورزاق متعاركين واصلين للطلاق، هذا اللي كيلياله رزاق.. رزاق اختفى شهر، رجع يوم رجعته لهنا أنتي طرحتي، وراها رحتو بغداد، رزاق هسه وصانا عليج ولا تزعلين أني كتلها لعمة مليكة على كلام كرار حتى نفهم شنو الصاير، الفاجئنا هو رزاق من حجتله عمتي كال لا ماكو بينا شي، تمام رجع كلشي لوضعه نكول، ليش عافج عدنا لعد!!
رنا: ما أكدر أشرح السبب بس صدك كلام كرار صارت مشاكل والحمد لله تجاوزناها، اجيت عدكم لأن وضعي ممستقر شوي فرح.. اكو احتمال بعد أفقد القدرة على الحمل، رزاق قوي كدامي بس أعرفه شكد متأذي بالداخل.. فرح غلطت بحقه والله عاقبني، بس بالنتيجة هو هم تعاقب. فرح: اهدئي لا تبجين مو زين دترضعين أنتي، ورزاق مبين يحبج.. أكيد الحب رح يمحي الخلاف هذا بس ارتاحوا أنتو الاثنين.
رنا: فدوة فروح لا تحجي شي كدام البنات، حتى خالتي كوليلها لا تحجي شي. فرح: لا تخافين عمري، وعمة هم طلبت أنه الموضوع ما يطلع ارتاحي. رنا: فدوة لروحكم. فرح: يلا مددي أنتي هم وي زهرة ونامي تمام. رنا: إي هو هيج لأن ظهري يون وجع. فرح: حياتي الله يساعدج، يلا أروح أعوفج براحتج. طلعت وطفت الضوة. وي كل هالاحداث رح أكدر أنام وأرتاح! رح يصفى بالي ويهدئ! بقيت أفكر وأفكر، ومدري شلون غفيت. *** **رزاق يروي**
طلعت من بيت أهلها ومتردد. حجيت لخالتها مختصر حالها. وخايف لا تروح ما تصدك وتتأذى رنا أنوب. وصلت البيت ولازم اتحضر لأمي بعد. وكأن المشاكل متقبل تاخذ راحة وياي. كله فوق بعضه يجي ماكو فاصل. رزاق: سلام عليكم. أمي: وعليكم السلام، زين تذكرت وجيت. رزاق: الحمد لله يمه أنتو شلونكم؟ أمي: ههه سحرتك بت بلقيس ما تعرف تفرق بعد. رزاق: آآخ آخ، صاعد أنطمر أحسن. أمي: إي عفية عليك زين تسوي روح. رزاق: يمه ما دشوفين تعبان! فهميني شجاج؟
أمي: إي مو أم جاحدة وما أقدر. رزاق: لا إله إلا الله. تركتها وصعدت فوق، ما بيه أرادد. دا أروح غرفتي سمعت بلسم تخابر. بلسم: لا حبيبي يمكن بعده بالطريق. بلسم: هااا إي زين بوسيالي عود مشتاقتلها. بلسم: فديت روح عمتها شكد أحبها. بلسم: طبعًا أحبك بس هي هم أحبها. عصبت وبدي أدخل أموتها. أعرف كلش زين منو دتحجي وياه. نبهتها يبتعد عنها وما فاد. حاولت أتمالك نفسي ودخلت غرفتي. بدلت وصحتها.. شوي وإجت وجهها أصفر.
رزاق: أريد مي ما بيه أكوم. بلسم: إي إي هسه. راحت ع الثلاجة جابتلي مي. اجت يمي بقيت أنظرلها وأفكر شسوي بيها. بلسم: رزاق مي. رزاق: إي، شكرًا. بلسم: تدلل، تريد شي بعد؟ رزاق: إي، أريد تلفونج، تلفوني نسيته وي رنا. بلسم: هااا ما بيه شحن طافي. رزاق: بلسم! تلفونج حبايه. مدته وخايفة ترجف. فتحته. رزاق: هذا مو يشتغل. بلسم: ااي عبالي بعده مشاحن. رزاق: الرمز. بلسم: انطيالي أفتحه. رزاق: بلسم الرمز، لا تخليني أعيد كلامي.
بلسم: 920413. رزاق: شعجب هيج حاطته، يمكن الرقم مو غريب عليه!! بلسم: لا رقم عادي خالة. رزاق: عيد ميلاد منو هذا، ما عندنا أحد مواليد 92 بعائلتنا. بلسم: مو مواليد، هذا رقم عادي ليش ما تصدكني؟ رزاق: زين اهدئي شكو ترجفين لعد.... هاي منو my heart آخر اتصال؟ بلسم: فففرح هاي جنت أسألها على رنا. رزاق: اتصلي عليها أريد أحجي وي رنا. بلسم: راحت تسوي عشة كالت. رزاق: بلسم تردين أتصل أني؟ بلسم: من تخلص عود أجيبيالك خابرها.
رزاق: شوفي، رح أتجاهل الموضوع بمزاجي.. هسه تدكين عليه تكوليله يومين مو غيرهم يجي يخطبج وإن ما اجه! عمر ابن عمج يعقد عليج فهمتي 😠 بلسم: إي 😭 رزاق: وخري من كدامي لا أهفج بالكلاص. طلعت تركض، أول مرة أقسى وياها هيج. بس لازم ما تتمادي أكثر وتاخذ راحتها. لمن واصلين لمرحلة أحبك وأحبج. شنو اللي دينتظره بعد! يخلفون يلا يجي يمشي عليها. لفيت راسي ونمت، أتعس أسبوع مر علي. قلق وتفكير وحرك أعصاب وقهر كلهم سوى. *** **رنا تروي**
بالثالثة كعدت عطشانة. غطيت زهرة وكمت أجيب ماي. طلعت من الغرفة سمعت صوت مرتجى عصبي. مرتجى: ولج شنو يعني ضربج لو لا؟ مرتجى: مو حب هو وأخذ الحبهة منو منعه؟ مرتجى: أخذج غصب عنه ما عسى أهرب بيج. مرتجى: هذا العندي بلسم ما حبيتج لعب أني. دخلت عليه الغرفة. رنا: شنو أهرب مرتجى هو هيج تحل الموضوع؟ مرتجى: طلعي رنا خل أكمل. رنا: ما أطلع، جيب التلفون. رنا: هلو بلسم، رزاق نايم. بلسم: هئ إي هئ نام.
رنا: اهدئي وروحي نامي أني أحجي وياه. بلسم: رنو يكولي إذا ما يخطبج تعقدين على عمر، وأنتي تعرفين عمر ابن عمو مو رجال وبس يشرب 😭 رنا: اهدئي، أني هنا أحلهة وياه. بلسم: فدوة رنا والله أحب مرتجى لا تخليه يزوجني غيره. مرتجى: أدفتج وما أخليج لغيري. رنا: اسكت أنت، وأنتي هم روحي نامي. سديته منها. رنا: هو هيج تحلهة مرتجى هاي أنت الجبير يعني؟
مرتجى: فهميني شسوي لعد رنا، أدري حبيتها يعني كفرت.. من شوكت كتلج أريدها فهميني من شوكت، لو أريد ألعب وياها يومين وأعوفها مو هالمدة تمضي وأني روحي بيها تتعلك. رنا: أفهمك مرتجى اهدأ، رزاق حقه من هيج كاللها.. أنت ترضى مرام تحب واحد وهيج بالخفية؟ أكيد ما تتقبلها وهو هم نفس الشي. أنت رايدها بالحلال، نروح نطلبها مرة ومرتين وعشرة لحد ما يكول خلص أخذها.. واثقة مرح ينطيها لغيرك. مرتجى: يريد يزوجها ولج.
رنا: اهدأ، ما شفت كال عمر لأن يعرفه مو كفو، لو يريد جان كال وليد مو الكل يشهد بأخلاقه، اهدأ وأني أحجي وياه ماشي. مرتجى: وإذا ردج رنا.. والله أهرب بيها وأنزل راسه. رنا: عبالك رح تعيش مرتاح لو هربت.. بعدين حتى لو ردني مرة، رح يقبل بالثانية تمام. مرتجى: ماشي، بس إذا خسرتها مرح أسامحج. رنا: ما تخسرها إن شاء الله إذا الله خالها قسمتك، تصير حتى لو الأكبر من رزاق رفض. مرتجى: إن شاء الله تكون هي قسمتي.
رنا: ادعي بدل ما تبجي، أنت رجال ادعي وبس. تركته ونزلت أخذت بطل مي. صعدت وما بيه نومة. كعدت على سجادتي صليت ودعيت. يا رب افتح طريقي وحياتي، يا رب سهلها على مرتجى وبلسم. كعدت زهرة تتنحس كمتلها. شوي ونمنا، كعدت على طبت البنات للغرفة. فززن زهرة وكامت تصرخ. رنا: دماغسزيات هو هيج اللي يطب، ما تكولن اكو طفلة نايمة. مرام: عزة نسيتها. رنا: برا يلا ما أشوف منكم وحدة 😠 رقية: آسفين والله. رنا: برا كلت بسرعة.
طلعن وهاي على فد صرخة. يمه سودة علي تعبت والله. شوي وصعدتلي بيبي وخالة مليكة. جدتي: شبيج يمصخمه رح تموت بيدج من البجي. رنا: بيبي مدتسكت فززوها 😭 خالتي: إذا أنتي تبجين بوحها طبعًا ما تسكت، أخذيها يمج يمه وذني رزليهن الطرنات. جدتي: هسه بالعصا كل وحدة حتى تعرف شلون تتصرف. رنا: جيبيها بيبي خل أرضعها بلكي تسكت. خالتي: لا خالة تغص. رنا: شلون لعد تعبت من البجي. جدتي: عوفيها عندي يمه. أخذتها ونزلت تصيح على مرام ورقية.
خالتي: تعاي خالة كعدي أنتي هم نطركتي. رنا: هجمن هنه مو دخلن. خالتي: عود كتلنهن على كيف زهرة نايمة. رنا: جذابات يسونلي نسيناها. خالتي: «شافن خرّعنها، جذبن». رنا: «أوف، شحجي عليهن؟ خالتي: «دبدلي وتعاي نتريك». قمت غيرت ملابسي ولفيت شالي ونزلت. زهرتي شوي هدئت بس بعدها دموعها. سودة عليه يمه، شسون بيج. سويت لها حليب وأخذته جدتي تشربها. حضرت وي فرحة السفرة وكعدنا نتريك. خالتي: «ما مبين شوكت عرسكم عمة؟
فرح: «لا عمة، كل ما أكوله يكولي دا أدور بيت». خالتي: «يعيش وي أهله، حت وي رنا». رنا: «لا خالة، خلهم بيت وحد أحسن». خالتي: «ليش خالة، صاير شي؟ رنا: «لا بس إحنا هم دنريد نطلع». جدتي: «ليش يمه، عمتج خوش مرة». رنا: «اي بيبي، كلش خوش مرة». خالتي: «زين صار شكد يدور ما لقى؟ فرح: «هو يريد نسكن ببغداد، يكول أمنيتي بيتي يكون بالكاظمية، كم بيت يشوف لو يطلبون سعر عالي لو يكون مو كلش زين».
رنا: «والله الكاظمية ناسهم ذهب، شفايتلي لو رزاق هم ياخذ وياه». خالتي: «زين لعد خل يتشاركون وياخذون». رنا: «لا خالة، حت عمتي تنتحر غير». جدتي: «شعليها؟ رنا: «بيبي، هو إياد طلع بيت وحد شدت وي فاطمة، وهسه هي وياي على خلاف، وكرار صار له فترة ما يبات بالبيت لأن عرفت يريد وحدة يعيش. بقى عليّ الله اليعلم شنو دوره يكون».
جدتي: «بلقيس جانت تكولي نجيه مو مثل ما نعرفها، بس ما جنا نصدقها، نكول تغار لأن عمتها تفضل نجيه عليها. طلعت صادقة بنيتي بعد عيني عليها». رنا: «أمي جانت دائمًا على خلاف وياها، أذكر قبل وفاتهم من جنا نروح جانوا هواي يتعاركن». خالتي: «بلقيس جانت تسكت بس نجيه دنغوزة». فرح: «شكرًا لأن نطيتونا خلفية عنها 😂». رنا: «ههه حت من البداية ما تنصدمين». دخلوا عباس ومرتجى للمطبخ. عباس ومرتجى: «صباح الخير». كل إحنا: «صباح النور».
مرتجى عصبي شوي، إجه كعد يمي. رنا: «خالة بيبي، أريد أقول لكم شي». خالتي: «اي كولي خالة». جدتي: «كولي يمه». رنا: «مرتجى يريد يتزوج وكلفني بالعروس الرايدها، وأريد همتكم». خالتي: «ولك شو ما تكولي، والله أروح أخطبلك خيرتهم بس أدلل». مرتجى: «أففففف». رنا: «اهدأ.. خالة بيبي، مرتجى يحب بنية ورايدها». فرح: «صدق خوش بنية وأدب وأخلاق، وإنتوا هم تحبوها». جدتي: «مني هالبت ولك يمه؟ رنا: «اسمعوني أول جدة...
أخوها عرف مرتجى يحجي وياها، وشرط إنه خلال يومين إذا ما خطبها يزوجها ابن عمها غصب، وابن عمها موش زلمة ولد سكير». جدتي: «يااع فلك طره لأخوها، شجاه هالمجنون؟ رنا: «جدة لا تحجين عنه هيج». فرح: «اهدئي مخبلة لا تفضحينه». مرتجى: «صدق مجنون هو جدة». رنا: «ترى ما أساعدك مرتجى». خالتي: «خلص عرفتها البنية، بس ليش هي؟ مرتجى: «حبيتها يمه، شذنبي إذا كلبي اختارها؟ خالتي: «وإذا ردونا يمه، عبالك أبوك رح يرجع يطلبها؟
مرتجى: «يمه غيرها ما أخذ، وإذا رفضتوا إنتوا أو أهلها أهرب بيها وحق هو علي». رنا: «كتلك هذا مو حل، خالة إنتي راضية؟ مرتجى: «حت لو ما ترضى خالتج أخذها». جدتي: «مني هالبت، أحد بيكم يحجي؟ رنا: «بلسم حماتي جدة». جدتي: «وي يمعزة بعدها طفلة». مرتجى: «ولأنها طفلة حبيتها جدة». خالتي: «ماشي، أقول لأبوك اليوم ونشوف ردة».
فرح: «عمة ترى كرار يدري وقابل مرتجى، بس رزاق قافل، أما علي وإياد ما يدخلون لأن كلمة رزاق وكرار أكثر شي ماشية». خالتي: «نشوف شون نقنع رزاق طالما كرار راضي». رنا: «رزاق عليّ، أني أقنعه». مرتجى: «أعرف رح يردج رنا، متأكد». رنا: «حت لو أحسن مما ما أحاول ونندم». عباس: «تسمعون رأيي لو لا؟ مرتجى: «لا اسكت». خالتي: «كول خالة نسمع طبعًا». رنا: «إذا يفيد كوله». دخلن رقية ومرام ويانا كعدن يتريكن.
عباس: «أني لو بمكان رزاق ما رح أرضى لأن ماكو واحد يقبلها على أخته، وكتله لمرتجى هالكلام». رقية: «شنو الما ترضاه عيني؟ عباس: «لا تخلين خشمج بسوالفنا». رقية: «وإنت شكو، لا تجيب اسمي لعد». عباس: «منو كال ذكرتج ولج؟ مرتجى: «انطمروا ثنينكم و حت رأيك مأريده». خالتي: «رأيي من رأي عباس، لهذا إذا يرفض رزاق حقه». مرتجى: «يمه كتلكم لو يرفض وتستسلمون شيصير؟ رنا: «مو كل شي ينحل بعصبية وتهديد». خالتي: «اللي يحلها واحد بس».
جدتي: «جنج وصلتي لفكري». خالتي: «اي يمه وصلت، بس هو من يحجي كلمته ما تنرد.. مرتجى إنت عليك إقناعه». مرتجى: «لا تحاولون ما يجي، اليوم يسافر لندن». فرح: «بس ما راح، شفت منزل ستوري هو بالحلة». عباس: «بارحة حاجيته كال باجر طيارتي». مرام: «خابروه وشوفوا». مرتجى: «خابريه إنتي يمه». خالتي: «مرام جيبي التلفون». عفتهم وكمت سلقت بيضة لزهرة. محمد لو قبل يسعى لمرتجى. يعني لازم يجي لهنا. يعني لازم أرجع بيتي. رجعت يمهم.
عباس: «خابريه ع الماسنجر عنده نت». خالتي: «صبر أدور اسمه.... هياته يلا هدوء». ... خالتي: «ألو هلا عمة، شلونك حبيبي؟ محمد: «هلا بملكتي، الحمد لله شلونج إنتي؟ خالتي: «فدوة لعمرك، الحمد لله». محمد: «كولي عمتي شنو محتاجة؟ خالتي: «محتاجة شوفتك ضروري، علواه لو تجي اليوم يكون أفضل». محمد: «والله ما أردج غاليتي، أرجع أشوف سارة إذا تحسنت جاي، وإذا بعدها تعبانة على صبح باجر إن شاء الله أجي». خالتي: «خير، شجاها مرتك؟
محمد: «هاي تعب العرس لازم يطلع بعد، اليوم مرتفعة حرارتها شوي». خالتي: «انتبه عليها عمة، مرتك نسمة تتأثر بسرعة». محمد: «ههه والله صدقتي». خالتي: «دشوف عمة، جيبها وتعال أحسن». محمد: «الله كريم، إذا بيها طلعة أجيبها». خالتي: «اي عفية عليك». محمد: «أسامة يسلم عليكم». خالتي: «الله يسلمه، سلم لنا على أمك وأبوك، روح لشغلك عمة عطلتك». محمد: «تدللين عمتي، إن شاء الله قريب يمكم». خالتي: «إن شاء الله مع السلامة.. هلاو...
الله وياك». مرتجى: «بعد بت جيرانا تزوجت ليش ما كتيله؟ خالتي: «كوم من وجهي مرتجى». عباس: «تستاهل حت ما تصنف بعد». جدتي: «ها يمه جاي؟ خالتي: «اي جاي، مرته مريضة يكول إذا تحسنت أجي وإذا بعدها يجي باجر». جدتي: «ولا تصح هالبت على طول مريضة». اللهم لا شماتة، بس هذا اللي متوقعته. رنا: «فرحة انطيني زهرة أوكلها». فرح: «اي حياتي هاج». كعدت أوكلها وهم يسولفون عن محمد. قررت أخلص وأخابر رزاق أرجع. ما أريد أشوفه، يكفي اللي صار.
شالوا السفرة والتهيت وي زهرة. خالتي بدت تركب الغدة. حت تكون عدكم صورة. خالتي مليكة وخالي جواد عايشين وي جدتي. خالتي بيتها مشتمل وي بيت جدي. مثل بيت أهلي، بيت مشتمل بس بداخل بيتهم. خالي جواد عايش هنا إله الطابق الفوك. هو وفرح بس موجودين. زوجة خالي تطلكت وتزوجت غير شخص. لهذا بالطابق الثاني صارت عندي غرفة بعد وفاة أهلي الله يرحمهم. وغرفة رقية ومرام من يجون يباتون. رغم مرام بيتهم هنا بس هم تبات ببيت جدي.
خالتي سمية قليل تجي، أغلب الوقت رقية وعباس وحدهم يجون عدنا. صار الغدة، تغدينا وكاعدين يشربون جاي. دق تلفون خالتي مليكة. خالتي: «هلا عمة، ها جاي؟ محمد: «اي عمة أجي بس لليل يلا أوصل». خالتي: «امشي سرعة شوي حت أوكت توصل». محمد: «ههه إن شاء الله المغرب عدكم». خالتي: «هلا بيك بعد عمتك، سارة وياك؟ محمد: «اي وياي تجي». خالتي: «زين ما تسوي هلا بيكم». محمد: «تسلمين عمة، يلا ساعات ونكون عدكم إن شاء الله».
خالتي: «إن شاء الله، انتبه لنفسك عمة». محمد: «إن شاء الله». خالتي: «جايين محمد ومرته». جدتي: «هلا بيهم». أخذت زهرة وصعدت خابرت رزاق. رنا: «ألو ها عيني؟ رزاق: «هلا، هسه جاي ما أطول». رنا: «رح أرجع وياك رزاق وأبقى مصر إني أرجع تمام». رزاق: «تمام بس شصار فهميني؟ رنا: «من تجي ماشي». رزاق: «ماشي، نص ساعة ويمج». رنا: «تمام». حضرت غراضنا أني وزهرة. بدلت لها ملابسها وجهزتها. كعدت بالغرفة أنتظره يجي. وصدق نص ساعة ووصل عندي.
شوي وإجه نزلت له عادي كدامهم. خالتي: «هلا خالة تفضل». رزاق: «هلا بيج خالة، صيحي رنا خل تجهز بعد». رنا: «هاي جيت حياتي». خالتي: «هاي شنو راجعة؟ رنا: «اي رزاق وحده بالبيت هم خطية أروح أحسن». خالتي: «ابقي عدنا خالة، فد شوي هم يجي محمد ومرته ابقي ويانا». رزاق: «لا خالة تسلمين على غير مرة إن شاء الله، يلا رنو جيبي زهرة». رنا: «اي هسه». تفاجأت خالة من تصرفي لأن أروح. ورزاق هم استلم الموضوع ليش أريد أرجع.
هيج أحسن، حت أرتاح وأني بعيدة. نزلت له زوزة ودخلت أسلم عليهم. جدتي ما قبلت أروح بس وعدتهم أجي. البنات هم انقهرن، حت لو المهم راحتي هسه. رنا: «يلا مع السلامة». الكل: «الله وياج». رزاق: «خو ما ناسيه شي؟ رنا: «لو ناسيه مرتجى يجيبه المغرب عود». هز راسه وطلعنا.. راح من بالي سالفة مرتجى. رحنا للبيت ودايخة مابية حيل عمتي. أف الله يمضي هاليوم على خير. دخلنا، واقفة بالمطبخ تركب. رنا: «سلام عليكم شلونج عمة؟ رزاق: «سلام عليكم».
عمتي: «هلا زين اللي رجعتي ست الحسن، رجليج أخذت ع الطلعات تعلمتي يومية». رنا: «أستغفر الله، جيب زهرة خل أصعد أرضعها». عمتي: «اسمعيني إنتي ورجلج.. تردين تولين تطلعين ولي ما عليّ بس زهراء تبقى هنا فهمتي؟ رنا: «حسبي الله ونعم الوكيل». أخذت زهراء وصعدت عفتهم وحدهم. بقت تعد وتصف ولا سكتت أبد. عمري ما صدقت العمة تصير أم. وعمتي ثبتت لي هالشي. بدلت لزهرة وخليتها بسريرها تلعب. طلعت رحت لبلسم أدق عليها الباب ما تفتح.
رنا: «بلسم هاي أني افتحي». بلسم: «ما أريد روحي». رنا بصوت ناصي: «افتحي مرتجى يريدج». شوي وفتحت الباب، العيون شكبرها صايرة. رنا: «عززة شمسوية بروحج يمعزاية، روحي غسلي لا يشوفج رزاق». بلسم: «خلي يشوف، عادي بعد». رنا: «امشي غسلي وتعاي أريد أقولج شي». بلسم: «رنا ما لي خلق فدوة». رنا: «اليوم يجون أهلي، تردين تطلعين هيج؟ بلسم: «رجلج رح يرفضهم هو كالي». رنا: «رجلي هو أخوج! وما يرفض أني أحجي وياه».
بلسم: «والله أموت نفسي هسه تشوفون». رنا: «بلا خبال، غيري ملابسج وغسلي ونزلي». خبال اي والله، تموت نفسها. رجعت غرفتي شفته كاعد وي زهرة يلعبها. يمه بس وجوده بالغرفة هو عافية. رنا: «أحس الغرفة تشع نور». رزاق: «ههه كولي لروحج مشغلة الأضوية كلها». رنا: «😒 صوجي أغازلك». بدلت ونزلت أحضر العشة قبل لا تسوي لي هوسة ما بيّ حيل اتعارك وياها. هفف شسوي هسه!!! قمت طلعت باذنجان قصقصته طوال شرائح خفيفة و قليته.
طلعت لحم مفروم وثرمت له بصل وخضرة. بهارات كباب.. كملته. حشيت الباذنجان بيه ولفيته. صار لفات صغيرة مبرومة. صفطته بالتبسي ودا أسوي السلطة مالته. دخلت تركض: «منو كال إلك سوي أكل إنتي؟ رنا: «محد كالي عمة». عمتي: «وشكو لعد مصخمة بهذا؟ رنا: «عمة ما تردين لا تاكلين، عندي رجال وطفلة مسوية لهم ترى». عمتي: «لج دبسز صايرة تردين بوجهي؟ رنا: «رحم الله والديج عمة، أشكرج».
عمتي: «خطية شوف التربية تنقط عبالج ما أعرف بسوالفج من رحتي بيت خالج، صرتي بت بغداد علموج اللسان الطويل شون يصير.. بسيطة أعلمج شون أكصه». شالت التبسي شمرته بالكاع. وشيشة المعجون هم كسرتها. رنا: «شجاج عمة، حرام عليج نعمة الله هاي». عمتي: «زقنبوتكم وراح خل أشوف شون بعد تتصرفين». رزاق: «ليش هيج يمه؟ عمتي: «إنت ولا حرف». رزاق: «ليش ولا حرف، من بداية كلامج سمعت.. يمه تردين أطلع حت ترتاحين كولي».
عمتي: «تبقي هاي على ذمتك، أحسب الليت يتعذرك بعد». رزاق: «ماشي يمه.. رنا كدامي امشي لمي الغراض». عمتي: «زهراء تبقى هنا». رنا: «لو تشوفين نجوم الظهر، بتي ما أعوفها». رزاق: «رنااا، كلت صعدي». رنا: «زهراء تبقى وياي رزاق وحق هو الله أقتلها وما أنطيها». تركتهم وصعدت. أحس جسمي كله يرجف. مدري شنو أطلع وشنو آخذ. مدري وين رح نروح. اللي أعرفه هالخطوة لازم من الأول. ما كان لازم أبقى هنا عايشة. لميت ملابس لزهرا كافية لأسبوع.
مدري شكد رح نبقى، شلت اللي كدامي. لميت ملابس لرزاق هم مال دوام وسيتين بيت. أنا طلعت تراكسودين ودشداشة. جمعت الأغراض ودخل الغرفة. رزاق: بدلي لزهرة. رنا: هسه هاي طلعتلها ملابس. رزاق: جيبي أبدللها أنا. أخذهن وأخذها بحضنه بدللها. ربي لا يحرمني منكم.. آمين. رحت غيرت ملابسي وأخذتها منه. كعدت أرضعها بين ما هو يبدل. رنا: رزاق أهلي يجون اليوم. رزاق: شعدهم؟ رنا: يخطبون. رزاق: أجليها لحد ما تهدأ الأوضاع.
رنا: هم هيج لازم، بس وين رح نروح؟ رزاق: لبغداد. رنا: لا، نمر لبيت إبراهيم ناخذ مفاتيح الداخل مال بيت أهلي، ونروح بيه. رزاق: لا رنا، هيج أهلج رح يعرفون. رنا: لا أقولها لخالتي فتحناه علمود ذكرى وفاتهم. رزاق: ماشي، يلا جِرّي صدرج منها خل نطلع. رنا: أي يلا. شال جنطنا ودينزل. رنا: رزاق خاف عمة تاخذ زهرا. رزاق: مو بكيفها، جيبيها. رنا: فدوة لا تخليها تاخذها. رزاق: جيبيها بلا بجي، قلت ما تأخذها.
أخذها من إيدي ونزلنا شفت عمتي. واكفة بباب الكوريدور تنتظرنا. عمتي: لو أخذتها وياك أحسب مالك أم بعد. رزاق: يمه زهرا طفلة وترضع من أمها يعني مستحيل أعوفها. عمتي: يعني تكسر كلامي؟ رزاق: يمه ما كاسره، بس الله ما يقبل تفرقين أم وبنتها. عمتي: وهسه هي شنو سوت؟ مو هاي رح تاخذك مني وتطلع. رنا: أنا شكو عمة، رزاق قال نروح. رزاق: يلا رنا. عفناها وطلعنا للسيارة، بقت تعد وتصف.
عمتي: عساك ما تربح يا رزاق، عسى ربي يزرع بدربك كل الشوك وترجع مذلول.. لج يا سحارة أخذتي ابني وهسه الله ياخذ جهلبح. رنا: الله يسامحك عمة.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!