رواية أحبها فياليتني احصل على حبها الفصل السابع والعشرون 27 - بقلم نور الشمس

القرار الچ أنتي
وهسه لتقررين ارتاحي وفكري زين والي تردي يجرالچ
حسيت نفسي اختنگت اخذع باكيت الچكاير وسويچ السياره وطلعت
مااعرف وين اروح والمن اشكي الهم البيه
ضليت افتر ومااعرف وين اريد اوصل
معقوله قسيت عليها بس اني هم حقي
زين امي ليش مگالتلي يجوز من قاطعتني چانت تعرف بالموضوع ومن تأكدت يلله حاچتني
احس راسي يريد ينفجر
ليش مااترك كلشي ونبدي من جديد
هذا هوو القرار الها

حلا..
بقت الحسره بگلبي وكل الحچيته مفاد
أحس بروحي مختنگه والي صارلي مو شويه
ليش بأحلى ايام تخرب فرحتي ليش شهم بسرعه شك بيه بس هوه هم حقه الصار مو شويه واني غبيه معرفت اشرحله بصوره صحيحه
شنو القرار الي لازم اوصله ابقه وياه ونبدي صفحه جديده لو انهي كلشي
احتاريت ومااعرف شسوي
بقيت اليوم كله افكر اجه بالليل كلش بس حسيت بخطواته داخل البيت سويت نفسي نايمه
فتح الباب وصار قريب عليه مسح راسي وقبله بهدوء
حسيت بأنفاسه  تنفس قوي وطلع
نزلت دموعي تمنيت عندي جرأه اصيحه يمي واحضنه وانام على صدره واگله الفات يولي ونبدي من جديد مگدرت احس نفسي مخنوگه
نمت ومااعرف شنوو الي مضموملي
ثاني يوم تأخرت خليته يطلع يلله گمت اشوف شغلي
نضفت البيت وحضرت الغده وكملت كلشي اجه
طلعتله اصبله الغده
..اصبلك غده
..صبيلنه نتغده سوه
..اني مااريد شبعانه
..اذا متردين اني هم مااريد افوت انام احسن
..تركته ودخلت للغرفه انام
بقيت نص ساعه ضجت عليه وعلى نفسي ليش هيچ نعاند الي صار صار
گلت انطي فرصه انطي النفسي هم
رحتله للصاله
لگيته يشرب جگاير ويگلب بالفون
وگفت گباله ترددت احچي وهوه هم تجاهلني
حاچيته
..شهم اريد اروح البيت اهلي
..رفعت عيني عليها گلت يعني قررت گتلها شگد ناويه تبقين
..مااعرف اني اريد افكر وارتاح واشوف شلون تصفه
..يعني الهسه بعدچ ممقرره
..لا
..حضري نفسچ اوصلچ
رحت اخذت الأغراض الضروريه لأن عندي ملابس يمهم هاي اول زياره بعد العرس صار اكثر من شهر مرايحه الهم بس يوم واحد امي مرتلي بالفتره الي بيها شهم بالدوام

اخذت اغراضي وجهزت نفسي وطلعت
..اني حاضره
..هيچ مستعجله
..محچيت شي سكتت
..يلله اني هم ماعندي شي راح اسلم على عمي وحمزه واطلع اروح الأهلي
وانتي فكري زين وخلي ابالچ قبل وهسه وبعد اني رايدچ ولو تفترين الدنيا كلها متلگين شخص يحبچ مثل مااني احبچ
الي صارلي مو شويه واذاني وتعب نفسيتي
ياريت تنصفيني وياچ اني مراح اضغط عليچ راح انتضر منچ جواب
..ان شاءالله

وصلتها بقيت شويه يمهم عمي گال المفروض تجونه عشه او غده خابرنه حلا اكثر من مره تگول شهم مشغول
..اي صح عمي اعتذر منك جديد بالدوام ويراد التزم بفترة دوامي ومن ارجع للبيت ادرس المشاريع
جاوبته واني اول مره اسمع منه حلا مموصلتلي عزيمتهم المفروض اعتذر منهم بوقتها خلتني بموقف محرج باوعتلها وفهكت الكلام الي ردت اگوله
شويه وطلعت الأهلي
مشتاقلهم ومشتاق المتهم وگعدتهم على سفره وحده
من طلعت منا مرتاحيت المفروض تكون راحتي اكثر
سألوني وجاوبتهم حلا معزمه يم اهلها
بلغني هشام انو علا حامل وفرحتله هواي يستاهل
شويه ارتاحيت ورجعت الأيام قبل
بعدها صار لازم ارجع للبيت استأذنت منهم ورجعت
ردت احاول افهم من امي الصار بعدين گلت انهي كلشي وهالموضوع يولي من اساسه مااريد اعرف شي
كل الأريده حلا وبس
وصلت البيت هدوء والوحشه البي تذبح
صح من چنت اجي مچان يطلعلها صوت بس يمفي هيه موجوده
تمددت وافكاري تودي وتجيب
وعدتها مااضغط عليها ومگدرت اوفي الوعد
اتصلت عليها
..الوو
..حلا والله مگدرت. مگدرت انام وانتي بعيده عني وعدتچ مااضغط عليچ واترك القرار الچ بس مااگدر
حلا فكري بيه
..حنيت اله حتيت النبرة صوته الي تبينلي تعبه واشتياقه
..شهم اني هم مااگدر بدونك والله احبك احبك والي اذاني بعدك
..روح شهم وگلبه انتي عمري كله امنيتي افوز بحبچ چنت دائما أكول احبها وياريت هيه تحبني
..احبك وانت روحي من الدنيا والي صار ننساه ونبدي من جديد
..زين اذا هيچ حضري نفسچ جايچ
..تهال بس اهلي شراح اگلهم
..اني اگلهم مگدرت اخليها تبات يمكم همه ميعرفون شي موو صح
..اكيد ميعرفون
..حبيبتي احبچ
..شهم
..عيونه
..تحسرت وايات شلون اواجهه
..تعالي وكلشي ينحل عزميها بالبيت وافتهمي منها كلشي
سديت الفون وارتاحيت حضرت اغراضي شويه واجه
شهم ..
واني احاچيها طلعت من البيت دقايق ووصلت
طلعلي عمي سلمت علي ابتسملي
..ها مگدرت تنام وتخليها
..والله ياعمي تعذرني البيت مينطاق بدونها غير مره تبات
..حقك عمي ولا غير مره بيتها قريب تشبع من عدنه وتجيك المره مالها غير بيتها
..الي يريحها اسوي بس اليوم اتي طلبت منها هالشي
..تفضل ارتاح بين متطلعلك
حمزه ..هلا شهم مشتاقلك لك كل اليتزوح مثلك ينسه اصدقائه واخوته بعد
..مناسيك والله انت بالقلب ابو عبدالله ..وينه حبيب خاله ارد اشوفه بوسته ولعبته وگعدنه شويه وطلعنه
بيومها انولدت من جديد
وكلشي صار نستاه اول مدخلنه البيت
اخذتها بحضني وقبلتها حبيبتي ربي لايحرمنه من بعض
حسيت بشوقها ولهفتها الي حسيت بحبها بادلتني المشاعر
بهذا اليوم ليلتنه چانت من العمر قررنه نحدد هالموعد عيد زواجنه ونلغي الفات كله

حلا ..
سويت مثل ماگال شهم عزمت ايات واجت
تمالكت نفسي وياها بصعوبه
طلعت فونها بأيدها اتصلت ع الرقم رن باوعت الفونها ماكو اتصال
سألتها
..ايات شكم خط عندج
..واحد ياعيني شگد يعني مو زين وهالواحد عندي كل اربع اشهر يلله اخليله رصيد لما الشركه تمل من الرسائل يردوني بس اخلي رصيد وارحمهم
..ضحكتلها مجامله بس نار بگلبي گتلها اسألچ وتحچيلي الصراحه
..احچي لچ شكوو انتي مو طبيعيه
..ايات اكو رقم دز رسائل الشهم من يوم الحنه وحاول يخرب حياتي وصلت بينه للطلاگ والله ستر
..عزه صدگ تحچين
..اي والله وحاولنه نغرف منو صاحب الرقم وطلع الرقم بأسمچ
..شنو بأسمي شبيج حلا
..والله هذا الي صار واني لأن انتي صديقتي ردت افهمچ وافهم منچ الحد هسه ممصدگه انتي تسويها
..ضربت وجهي عزه عزه بأسمي شنوو حلا شجاي تحچين شلون اخرب بينكم واني الي چنت اقنعج بشهم واگلچ ابن عمچ مالچ غيره واحسن من كل احد الچ
..مااعرف حته اكو حچي بس الچ حچيته كلام الصار بيناتنه بالعقد
..لچ حلا تصدگين اسويها
..مااصدگ بس اريد افهم منچ
..لچ والله مو اني شنو هالورطه وشهم يعرف
..اي هوه الي عرف
..لچ راح اتخبل والنبي بس هذا الرقم عندي
..زين انتي ناطيه مستمسكاتچ الأحد اني هم مجاي اصدگ انتي تسويها والكلام البينه هم حاچيته الوحده
..اوگفي حلا قبل فتره ريم اجتني ورادت مني مستمسكات گالت اريدلي خط واراقنه كلها عند رامي ابغداد يريدون ينتقلون وهيه بحاجه للرقم لأن شريحتها موقفيها الشركه
..يعني هيه الي وره كل هذا
..مااعرف بس الي متأكده منه مو اني وانطيتها بوقتها مستمسكاتي ورجعتهن وره يومين الي
..لچ شلون تنطين متعرفين هذي مسؤليه
..صديقتي وطلبت مني طلب شمعرفني بخططها
..هسه شلون نعرف هيه لو مو هيه
..اتصل بيها واسجل المكالمه

اتصلت ايات بريم
..الووو
..هلاوو ايوته حبي
..هلا ريم اگلچ هذا رقمچ الي سجلتي بأسمي
..ها لا حبي مو هذا ذاك تركته لأن مو بأسمي
..اشرت الحلا تتصل ع الرقم الي مضايقهم
شمعت اكو رنه يم ريم
..يعني الرقم مغلق هسه
..بلي مغلق
..زين شنو الي جاي يرن يمچ
..شبيچ ايات مو الي هذا الماما التليفون
..ريم احچي الصدگ ليش سويتي كل هذا
..شنو شسويت شبيج ايات
..ليش دازه رسائل الشهم واكو كلام حچي صاير حچيته الچ بدون قصد چنتي تسوين نفسچ مهتمه الحلا وحزينه ع السوته امچ واني اطمنچ وواحچيلچ كلشي تحچي ترحين تخربين حياتها
..منين عرفتي
..كلشي عرفت وكلشي صار واضح
..وشنوو المطلوب ماكو اي دليل يديني الي ردته صار خطيبها الي يحبها وذبح نفسه عليها عرف كلشي وراح يتركها واخويه هم مميت على شكولها وراح يتزوج وانتن اغلى صديقات فرقتچن هسه ارتاحيت
..شگد حقيره انتي الله ينتقم منچ بالعكس رجلها يموت عليها وتمسك بيها وهيه من  متحبني مصدگت بيه وحچيتلها كلشي ومراح تخربين بيناتنه وهيه راح تكون سعيده وانتي ابقي بحقدچ متأذين الا نفسچ ياحقوده شنو تستفاديت من السويتي
..اموت منكم انتو الأثنين وحلا اكرها وحته لو متزوجها اخوي ابقه تكرها واموت منها چنت اتوعدلها من تصير يمي ادمرها بس حرامات مصار الي ابالي جان سودت عيشتها
طول عمركم مدللات والكل يحبونكم المدرسات الأهل وحته الشباب اخوي الهسه ذابح نفسه عليها ومقنع نفسه انو هوه ميستاهلها واخذت الأحسن شنو البيها الي يخلي رامي وشهم يذبحون نفسهم عليها
شنوو الأختلاف العدها اهلها مدلليها من الأبتدائيه وهيه شنو الشي نازل جديد اول وحده تلبسه ملابس قرطاسيه جنط بكلشي متميزه
..لچ شنوو انتي شنو من بشر هذي السنين كلها تمثلين علينه وانتي مثل الحيه تنتضرين الوقت يسمحلچ وتذبين سمچ
..اي وماارتاح الا اشوفكم بأتعس حال
..الله دائما وي المضلوم وانتي الي راح تتأذين
تلاحگي نفسچ ونضفي گلبچ من الحقد وشيلي السواد الي مالي حبي العالم حته تحبين نفسچ
غلقت الفون واني الدنيا تدور بيه
..لج حلا سمعتي
..اي سمعت كلشي شلون گدرت تسوي كل هذا شلون
..مااعرف بس لازم افهم شهم على كلشي
..مااريد احرجج تركي كلشي عليه
..لا لازم يعرف كلشي

شهم..
رجعت من الدوام اول مفتحت الباب طلعت حلا قبلتها براسها وحضنتها مشبعان منها والفتره الچنت متفرغ بيها خلصتها بقهر
..حبيبي يمنه خطار
..كل الهلا بالخطار بس منو عدنه
..ايات
..حلا ايات كل عقلچ كو گتلج افتهمي منها وانهي الموضوع والصداقه تنهيها
..اش جلي تسمع فاهمين غلط وكلشي صار واضح
..شكو شنو الصار
..تعال افهم منها تريد تشوفك
..تعالي گعدي وخل نفهم
فهمناه كل الموضوع وشكر ايات وصلناها البيت اهلها طلب مني اقطع كل علاقه وي ريم وحته الي عنده علاقه بيها
..حلا انهي موضوع ريم من الأساس هواي اكو ناس الحقد مالي گلوبهم يكرهون ويأذون بدون سبب
..بس عمري متخيلتها تكرهني
..مسامعه الي يگول المضاهر خداعه الناس اجناس وكل شخص وطبيعته بيهم الطيب وبيهم الي يحب النفسه والغيره وبيهم الي كاره الناس ويوصل مرحله يكره نفسه لأن يخسر كل الحوالي
..ربي يبعدنه عن هذا النوع من البشر
..امين يارب

مر على زواجنه سنه ونص ويوم  عن يوم احب شهم اكثر
بس دائما چان يگلي مو بگد حبي ومقتنع انو هوه يحبني اكثر وهالشي يفرحني

رضا خطب انسام على مايكمل كليه ويتزوجون حاليا همه مخطوبين وزواجهم قريب باذن الله
وحمزه تشافه وگام يمشي على طوله بدون عكازه
وراح يجيهم طفل ثاني اخو العبدالله بعد ما الأطباء شككو انو يصير عنده جهال ربي رزقه وارادة الله اقوه والحمدلله

حياتنه اني وشهم حلوه ومينقصها غير الطفل الي ينور بيتنه باقي على ولادتي اربع اشهر

اكثر يومنه مخلصي ابيت عمي.. وعمتي حيل حبتني وعرفت اني شنوو وماكو غير شهم بگلبي

شهم ..
الحد هسه شگد متحبني اتمنى يوصل حبها الحبي لحد الأن حبي الها هوه الي مسيطر ويبين دائما بأغلب المواقف الي تصير دائما حبي الها يجبرني اتنازل وبسهوله ..بيني وبينكم هيه هم مقدره هالشي ومعوضتني غمزتلها مو صح حلا
..صح ياروح حلا
..انتي روحي وگلبي والشي الي تمنيته وجاهدت حته احصل عليه حصلتچ بتعبي وسهر الليالي
محد راح ياخذ مكانچ بگلبي الأخر يوم من عمري
..متأكد
..اكيد متأكد وابصم بالعشره
..واذا اجه يوم وحبيت بنتك اكثر
..بنتي اكيد احبها خاصتا انتي امها راح تكون بنتي وبنت غاليتي

النهايه..
لهنا وخلصت القصه اتمنى وصلتها بصوره حلوه وياريت تعجبكم مثل معجبت صاحبة القصه طبعا هالبارت بدون مراجعه ودزيته الصاحبة القصه
وافقت ع النشر يلله لأن حبيت الختام تشوفه اخاف بي اختلاف او مترضا علي بي الحمدلله عجبها طبعا

صاحبة القصه
تگول دائما هاي جملته الي
يگلها
اني جاهدت يلله كدرت اوصلچ وحصلتچ بسهر الليالي وتعب السنين مو بسهوله صرتي حلالي
اني اگلها ربي يحفظه الچ ويسعدكم