رواية أحبها فياليتني احصل على حبها الفصل الثاني 2 - بقلم نور الشمس

شهم ..
خابرت حمزه لأن مشتاقله حيل اني وياه تقريبا نفس العمر بيناتنه اشهر اني اكبر منه بس درسنه سوه
وكبرنه سوه وهوه صديقي واخوي واشتاقله من يلتحق
طبعا لحد الأن مگايله اني رايد حلا وهوه يعرف بيه رايدها كلش زين السبب الي ميخليني اكله مااريدهم يجبروها
واني اعرف اهلي وعمامي وتفكيرهم بنضرهم اني زين خلاص يزوجوني وميهمهم امرها او رأيها وهالشي ميرضيني اني اريدها توافق من طيب خاطر
لو تعرف شگد احبها چان مترردت لحضه بقبولها
لو تعرف بفكري الي مشغول بيها
وعيوني الي متشوف غيرها چان متفكر بغيري
طبعا هيه تدوام قريب علينه يوميه اني اطلع حته اشوفها وأدري بيها تضوج بس مو بيدي اني انتضر وقت طلعتها مرات أتأخر عن دوامي بس حته اشوفها
حلا بت عمي بس حبي الها مو لأن بت عمي ولا الأي سبب حبي الها خارج عن ارادتي
مرات  اتمنى نفسي انام  واگعد الگه نفسي مغير كل فكري وممفكر بيها اصلا
جاي افكر ورن التليفون
..هلا حمزه اجيت
..أي اجيت يمعوود اطلع سويلي طريق
..جايك دور ع الباب الثاني امي يمها خطار افتحلك الباب الثاني
..صار داير هيه عمتي شوكت مايمها خطار
..تعرفها انت بعد هههه
صحت ريحانه
حضري الريوگ حمزه اجانه اني وياه نتريگ سوه
..صار تدلل
حمزه لك عمي مسكين شيشوف من عمتي من اني زغير الهذا عمري هيه مضيفها عامر هههه
..لتخاف على عمك هوه فرحان بهالشي وهيه ممقصره وياه بس تعرف امي تعرف تساعدهن بشغلات محد غيرها يسويهن هنا
عوفنه من عمتك اليوم انت الي وين تحب نطلع نغيير جوو
..والله بكيفك اني هم اريد اتونس بس
لو نسويلنه گعده ونجمع اصدقائنه وولد عمومتي مو احسن
..براحتك اهم شي نتونس زين نطلع نتعشه بره عشاكم عليه وانتو اختاروو وين نگعد ابيتنه ابيتكم بكيفكم
ريحانه  .
حضرت الهم الريوگ ودگيت الباب
صاحني شهم
..ريحانه تعالي حمزه مو غريب فوتي سلمي
من سمعته ارتبكت نزلت الصينيه عدلت ردن ثوبي نزلته ولبست شالي عدل
وفتت متردده ومارفعت عيوني
..السلام عليكم
..وعليكم السلام هلا خويه هلا بيج شلونج
..الحمدلله
شهم..گمت اخذت منها الريوگ عاشت ايدج
..الف عافيه گلتها وطلعت ركض
صار شگد مشايفته وجه الوجه اشوفه بس من وره الشباك لو من يجي لخواني ابد ممسلمه عليه
طلعت منهم رحت يم امي اخاف تحتاج شي
ام ستار جيرانه هذي فضوليه بشكل وعبالك كاعده على گلبها كل متشوفني شوكت تتزوجين اني اضل صافنه بوجها ابتسم واسكت امي تجاوبها بعد مجايه قسمتها
هالمره هم دخلت وصارت گبالي گلت يبوو راح تعيد عليه هالسؤال
..هلا بريحانه شلونج يمه
..هلا خاله ام ستار شلونج
..الحمدلله شوكت نفرح بيج
..ابتسمت الها مااعرف والله يمكن من تبطلين تساليني هالسؤال
الموجودات كلهن ضحكن
عمتي ام حمزه ضحكت بوجهي گالت عن قريب ان شاءالله
حسيت عمتي تلمحلي انوب گلت لا مشتبهه اني
رجعت كملت شغلي وامي حايره تكتب حجاب الهذي وتسمع شكاوي هذي وتحاول تنصحها
چانت اذا اكو مشكله بين حته جنه وعجوز او مريه رجلها مو تمام وياها ويريد يطلگها امي تروح تحاچي عمتها وتدخل واسطة خير ومحد يردها مرت سيد كريم الكل يحلف براسها
لهذا نسوان المنطقه يحبنها ويعتبرنها اخت الكل
شويه وخابرتني زهور بت عمي علي
كلتلي اشوي احنه نجيكم
طبعا حيل فرحت ورحت كعدت زهراء
..خاتون گعدي صار الضهر وانتي نايمه كلشي كملت بس كعدي تزقنبي راح يجونه بيت عمي علي
..الله عليج
..اي والله شبيج زهور خابرتني
..اليوم نشحت الولد بمضيف ابوي ويبقه للبيت النه ههههه
..اي همه بس يسمعون وحدهم يطلعون

اجو بيت عمي وفرحنه وساعه ندخل على عمتي ام حمزه حته تجيب البنات وتجي العصر
طبعا بيوتنه بشارع واحد بس كل شهر نلتم مره
احنه البنات الحريه الأمهاتنه والولد وابوي وعمامي كلساع يتشاوفون بس احنه كوه نلتم
عمي علي عنده بس زهور ومريم
وحسين زغير عمره عشر سنين
وعموو وسام هذا ازغر عمامي متزوج جديد وزوجته حامل هم اقاربنه تصير بت عم ابوي
وهم علاقتنه حلوه وصديقات
عمي وسام يعتبر امي مو زوجة اخوه يعتبرها امه او اخته الچبيره لأن هيه الي ربته طبعا هوه عمره ٣٤
يعني من تزوجت امي بعده عمره ٧سنين او ثمانيه
من طلع شهم وجاب صينية الريوگ
كتله
..شهم اليوم بنات عمي ونسوان عمي متجمعين يمنه يعني انتو ترحون يم ابوي
..اخذوو راحتكم احنه هم الولد متجمعين ابيت واحد من عمومتي يمكن نروح البيت عمي حسن
بس وره الغده نطلع غدانه يم وابوي
..خوش تدللون
رحت العمتي واتفقت وياها البنات يجن يمنه
وصدگ وره الغده الكل انجمعنه
بالصاله احنه البنات
وامهاتنه يم امي
علا.ذبن حجاباتجن اليوم الولد كلهم مجتمعين لليل ميجون حمزه گلي شهم عازمهم بره ويرجعون يكملون گعدتهم ابيتنه وهسه همه يم حمزه هم بالبيت
ريحانه ..اي صح هوه هم گلي اخذن راحتجن احنه طالعين
زهور..خرب هسه لو شايفتهم ولچن اخوانچن انفات على شنوو ولد عمي وعاجبني اسلم عليهم نگعد نتونس شگد معقدين الأمور شيصير يعني لو شفناهم اني عن نفسي والله احبهم ومعتبرتهم اخوتي اتمنى نكعد سوه ونسولف شنو هوه كلشي عيب وحرام مابيها عيب
زهراء ..شوف بالله هذي شتفكر كون ابويه يسمعج
ريحانه ..أصلا عادي اليوم دگيت الباب حته شهم ياخذ الريوگ لان حمزه موجود تفاجأت شهم كلي فوتي سلمي حمزه مو غريب
كلهن بصدمه ..وسلمتي
..أي طبعا فتت سلمت بس ع السريع لبگت السلام وفلتت هههه
حلا..وشعجب شهم خلاج تفوتين مبيين حقنه اصلا
ريحانه ..منو الحقنه اصلا انتي متعرفينه شهم وين اكو منه والله حباب واريحي صح عاقل وثگيل ويريد كلشي موزون وجدي بس هوه مو حقنه
حلا ..مااعرف هيج احسه
زهراء..صدگ حلا اسألج بس مو تزعلين ليش متوافقين على شهم وهوه تدرين بي رايدج
..والله مو بيدي ماجاي اتقبله ولا افكر بيوم اصير اله
بدون سبب هيج
علا..خايبات عوفنها هذي بطرانه
كملنه يومنه ونسه وسوالف وشغل
طبعا قابل نگعد وامهاتنه ذابات كلشي علينه
فديتهن يگعدن يتأمرن ومرات كل هذا شغلنه ميعجبهن
صار الليل وراحوو الكل
لمينه بيتنه واجو الولد
..السلام عليكم
..وعليكم السلام
هشام ..اني تعبان اروح انام
ورضا گعد ينتضر اللعبه
شهم ..
يجي الليل واضل اني وصفنتي صفنه تاخذني وحده ترجعني شوكت ارتاح
الشي اليقلقني تداوم سادس وراها كليه واني اريد الخطوبه اتم قبل هالشي بس شلون اعرف اريد اخلص هيه تريدني لو لا الحد هسه امي مرادتلي رد شافي ساعه تگول انساها وساعه تگول اصبر عليها تكمل
مااعرف شنو السامعته او شنو الي متريد تگوله الي
الي اعرفه اليوم هيه هنا
بودي الرئه مالتي تسحب الهوا الي موجود كله هنا اكيد انفاسها ماليه هالمكان
گعدت واني ممغير ملابسي اتفحص المكان واتخيل وين چانت گاعده
شويه واجت ريحانه
صحتها ريحانه
..ها شهم صحتني
.حكيت شعري مااعرف احچي لو لا
..ها شهم گول
..أكلج حلا اجت اليوم
..أي اجت
..اي
..شنو اي گول شتريد تحچي
..ريحانه مااعرف امي ليش متنطيني جواب نهائي حلا رافضه لو موافقه اريد اتأكد بس
..مااعرف والله بس هيه يمكن شايله فكرة الزواج
..شلون يعني شايله الفكره لشوكت يعني
..مااعرف شهم انت ليش متختار غيرها يعني الا هيه
..لچ هوه بيدي اني رايدها شسوي
..مااعرف والله الله يجعلها من نصيبك
طلعت منه واني ضايجه علي
ويمكن كرهت حلا بساعتها
شهم..
رحت افكر بفراشي صدگ اني ليش رايدها هيه وبس البنيه ممأملتني ولا ناطيتني مجال حته هالگد اروح زايد بحبها يعني اني اريدها بس مااريد اجبرها ولا اتخيلها تصير الغيري مستحيل اقبل بهالشي
عندي الموت اهون من فكرة حلا تصير الغيري
نمت واني غرگان بهذي الأفكار
ثاني يوم الصبح گعدت بكل نشاطي حته اشوفها اليوم دوام

حلا..
گعدت بكل نشاط اليوم دوام الله مو علمود الدوام لا
بس راح اشوف ريام واكيد راح تجيبلي اخبار حبيب الگلب رامي
اي الشي الي يخليني مااشوف شهم هوه رامي
من اني بالمتوسطه هوه يدزلي رسائل بيد ريام اخته وحيل احبه هوه نيته زواج بس المشكله هوه مو سيد واهلي مينطوني مستحيل مااعرف نهاية حبنا شنو بس الي اعرفه احبه وبس اشوفه مرات من يوصل ريام
طلعت اني وصديقاتي وشفت شهم من بعيد
يبوي شلون مصباح هذا عقجت وجهي
صديقتي ايات
..لچ هذا ابن عمچ واگف
..اي شفته
..حلا ليش متحبين ابن عمج مو احسلج ولد مناقصه شي شهاده وجمال واخلاق لچ شنو شفتي برامي وعجبج دراسه ممكمل ولايوصل الحلاة شهم ومستحيل اهلج ينطوه ليش تشلعين گلبج بأيدج
..أيات اسكتي لتخليني اضوج منج
..والله حلا بكيفج اني علمودج رامي ممرتاحتله ابد
واحسه مو صادق وياج
..ليش هيج تحسين
..مااعرف بس مااحسه يتصده الأهلج ويقنعهم لچ هيج شغلات يرادلها واحد بايع نفسه منو ينطيج انتي الا بالطلايب ياخذج
..يمعوده سديتي نفسي من الصبح سكتي
..مو زين افكر بمصلحتج وصلنه قريب اله سكتنه وهوه مشال عينه من حلا احنه دنگنه وفتنه للمدرسه
حلا ..خرب بليس شوكت ينساني وارتاح لچ يمكن شغلتنه تسهل لو محد رايدني من ولد عمي بس شهم رايدني منو يخليني اتزوج غيره بس گليلي
..انتي غبيه ومشتريه شلعان الگلب شرايه
..أيات كافي لتلحين

يتبع ..