احفاد السيد : الثار ( بأجزائها الإثنين ) الفصل الحادي وخمسون 51 - بقلم ​رُقَيَّةُ الْأَكْبَرُ

بسم الله الرحمٰن الرحيم
اللهم صّلِ على محمد وعلى ال بيت محمد

﴿الباقيات الصالحيات ﴾
الحمدالله
سُبحان الله
الله اكبر
لا اله الا الله
لا حول ولا قوة الا بالله
حسبي الله ونعم الوكيل

الکَـــاتـبة ﴿ رُقــيّــة الأكـــبِـــر ﴾
بقلمي روايــة ﴿ ضحايا الثأر ﴾

➖ المعروفة بأسم ﴿ أحفاد السيد : الثأر ﴾

_____________|| لمُتابعة حساب الكاتبة ||_____________

انستكرام || o.oll13

تيك توك || oo_ll13

قناتُنا تلكرام || oo_ii13

واتباد || oo_ll13

______________________★______________________

✨ التَــعب علينا والتفاعل عليكم ✨

- هي هيچ السكته متروسة تعال وهي هيچ الصفنة مليانة عتب

⁦______________________ 📖 ______________________

""""" طــيبة الزهراء """""

صار الليل صعدت لغرفتي بعد العشى وبديت اقرا أحياء خلصت فصل كامل بلشت بي بـ 8 بليل و خلصت بـ 12 الصبح حسيت راسي صدع نزلت للمطبخ سويت عصير برتقال حتى اريح نفسيتي شوي

واني اريد اصعد لفوك وصلتني رسالة فتحتها لكيتها من علي الصادق يكلي
< کاعدة ؟ >

شفتها وطلعت من المحادثه بدون ما أرد صعدت لفوك شلت الاحياء عن وچهي
وفتحت الأيباد دخلت على المحاضره السابعه لمادة الاجتماعيات وصرت أتابع واسجل الملاحظات يمي بالبورد

ما بقى شيء لدوام فقط شهرين ويدخل الشتاء علينا وتچي وياة المدرسة ويصير الدوام اليومي وننتضر يوم الچمعة على نار وهاي السنة اني وزاري ثالث !!

يعني ماكو لعب هاي ألسنة كُلشي جدي أخذت انتبه أكثر وسمعت رنين تلفوني اتصال أخذت وضغطت على مفتاح الرد
بعد ما قرأت الإسم حگ المتصل
وحطيت السماعة على أذني و وقفت المحاضرة و أردفت

طيبة الزهراء ؛؛ ألو ؟؟

علي الصادق ؛؛ طيبة وياي ؟!

- لا بنت الچيران

- احجي عدل

- أي انتَ أسأل عدل واني اجاوبك بالمِثل يعني منو راح يچاوب على اتصال تلفوني غيري اني طيبة !!!

- ما أعرف على بالي التلفون عند امچ أو اختچ

- لا عندي محد يأخذ تلفوني

- اذا عندج أنتِ الشفتي رسالتي ؟!

- چا شمالج ما تجاوبيني تعرفين راسي شنو صار بي ؟ لچ صرت أضرب اخماس بأسداس

- ليش يابة شكوو؟

- يمگموعة أخترعت كلت أمها لو أختها شايفين المراسلة وراح يسوون الها مشكلة خفت عليچ هووواي

- عادي خلي يشوفنة أكول الهن علي الصادق ابن عمي ماكو أي مشكلة ولا أكو شيء يخول

- چا اذا أنتِ القريتي ليش ما چاوبتيني !

- ماعرف جنت صاعدة لغرفتي وبيدي اغراض طلعت من المحادثة ونسيتها كُول ضني جاوبت عليك

- عذر حلوو

- ما اتعذر اني صدكت صدكت ماا تريد تصدك طبك مرض !

- هايي ويا منوو ولچ ؟؟؟

- ايي والله علي الصادق راسي مسطور وچاي ادرس وأنتَ تحجي وياي بهذا الأسلوب !

- اني الغلطان هسة ؟؟

- علي الصادق

- خلص طيبة الزهراء اني اعتذر ما جان قصدي هيج اضغط عليچ أشوفچ بخير مَع السلامة ....

- بس ثواني علي الصادق !

سد التلفون ابوچهي عرفتة زعل ..!
واني هم طيح الله حظي شككوو يفلت ألساني واغلط علية ؟
ترى هذا زلمةة مو صديقتي التافهة !!

استغفرالله ألي خلگ اني هسة شمرت التلفون صفح عني ورجعت استچمعت فتات عقلي وفتحت المحاضرة ولمن خلصتها باوعت للساعة راح تصير بـ 2
الوقت چاي يرکض ياربي !!

بقت ألي محاضرة وحدة واخلص الفصل الثالث خليني اخلصها هسة وافتك وراي كيمياء و فيزياء ... فتحت المحاضرة الثامنة ونفس الروتين ولمن خلصت رتبت المكتبة شلت الأوراق الشگّكتهم ورتبت الكتب مالتي والسجلات والاقلام المطشرة

وطفيت الأيباد وشكلتة بالشحن وأخذت الكلاص وأخذت تلفوني ونزلت للمطبخ
غسلت الكلاص ورديتة لمُكانة وطلعت أباوع للاستقبال ماكو ولا نفس كل شخص نايم بغرفتة طلعت للحديقة الخلفية وصرت أفكر بِـ علي الباقر لأن أغلب وقتنا چنا هنا نقضي ...

كعدت على المرچوحة وفتحت تلفوني وصرت أكلب بصورنا سوة شنو هذا الأثر التركتة بكلبي و رحت ؟! ليش هلكثر مشتاقة الك هسة ؟ زين وين انتَ هسة وشلونك ؟!

طلعت من الاستيديو ودخلت على سجل المكالمات اتصلت على علي الباقر وكذالك نفس الشيء طلعلي خارج التغطية !
غلقت الاتصال وكعدت أفكر وخطر على راسي علي الصادق ...

صحح اني غلطت وياه وحقة من يسد التلفون ابوچهي مو من حقي اضوج وأخذ موقف منة واسوي بيها اني ام الحق
ما جان لازم افقد سيطرتي على نفسي والساني ياالله مني
اچفص وما انتبه لنفسي لاززم اعتذر منة وما يصير ينام وهو ضايچ علية !

فتحت التلفون واتصلت علية اول مرة سدة ابوچهي ( انطاني رفض )
رجعت اتصلت مرة ثانية وانطاني مشغول
وحاولت للمرة الثالثة وفتح الخط وسمعت صوتة يكول الي ؛

علي الصادق ؛؛ هلأ طيبة !

طيبة الزهراء ؛؛ زعلان مني صداقي ؟

- الدنياا نص ليل روحي نامي

- صداقيي والله ماجان قصدي اغلط عليك والله الساني فلت باللحضة الغلط وهم وي الشخص الغلط .. أسفة

- هاي هي ما صار شيء لا تفكرين بعد روحي نامي وريحي بالچ

- أمبريلي الذمة ؟

- مبرية ..

- دنيا و اخره ؟!

- يمعودة دنيا واخره مبري الذمة وهم كلبي و روحي راضين عليچ ما زعلان ولا ضايچ ...

- اذا هيچ تمام ارتاحيت بس يعني انتَ صدك ما زعلان يعني ؟!

- طيبة روحي نامي بوية اتاخر الوقت

- ما بقى شيء للأذان أصلي وانام

- خوش يلا تصبحين على خير

- صداقيي !

- عيوني طيبات

- العباس عليك زعلان مني شي ؟؟؟

- والعباس أخو زينب ما زعلان شمالچ راح تخليني صدك اصدك اني زعلان !!

- چاا اذا مو زعلان ليش احسنك ضايچ

- وعلي ما ضايچ بس حيل تعبان واجيت انام انتِ اتصلتي علية

- اها چا اذا هيج ارجع نام ونعتذر عيني نعتذر على الازعاج

- من يصير عندج وقت فراغ اتصلي علية وطمنيني عنچ وعن اخبار البيت

- ان شاءالله

- تصبحين على خير

- بسس صدااقيي قبل لا ترووح سؤال أخيرر

- اسألي عيوني

- الظهر جنتم تردون ترحون لعند عمي شنو صار وياكم ؟؟

- حجينة وياه كم احجاية وراح لا تفكرين ماكو شيء روحي صلي ونامي ومن يصير شيء لو يصير عندچ وقت فراغ اتصلي علية انا موچود بكل وقت ..

- تمام انتبه لنفسك صداقي

- لا توصين أنتِ انتبهي لنفسچ

- ان شاءالله تصبح على خير

- ﴿ أستودعتچ عند الذي لا تضيع عندة الودائع ﴾

سديت التلفون وكمت دخلت لچوة صعدت لغرفة علي الباقر فتحت الباب ودخلت كعدت على افراشة وصرت أشم عطرة بكُل الغرفة بقيت نايمة بفراشة والعب بتلفوني لحد ما سمعت صوت الآذان

رحت اتوضيت وكعدت اصلي بالسجادة تبع علي الباقر وقرأت بقرآنة ولمن كملت وردت اطلع شفت الدشداشة السوداء مالتة معگلها بالشماعة
رحت وشميت عطرة بيها حييل مشتاقتلة فراگة يذبح والله ....

طلعت من الغرفة ورحت لغرفتي نمت وما كعديت الا بعد الـ 11 الصبح فزيت وكمت نزلت من الغرفة عدلت حجابي وغسلت وجهي وسمعت صوت امي جاي من غرفة المعتز باالله كاعدة تقرأ قرآن اتجاهلت افوت الها وازعچها

عفتها ونزلت للطابق الأرضي ودخلت للمطبخ لكيت علي السجاد كاعد على الكاع وجاي يعچن
وعلي الهادي واكف على السنگي وجاي يغسل المواعين
والعلوية واكفة على الطباخ تسوي الغدة

أول ما شافتني إردفت وياي ...

العلوية :: هاا يمة طيباات جوعانة اسويلج شيء خفيف تاكلينة علما يصير الغدة يروح اميمتج ؟!

ضحكت ورحت فتحت الثلاچة وطلعت كرتون الحليب واني أردف وياها

- لاا يروحيي اريد اشرب بس حليب ما اريد اكسر جوعتي خليني للغدة واكل

العلوية :: براحتچ يمةة

فتحت الكاونتر وطلعت منة اكلاص وكعدت بالطبلة فتحت الحليب وصبيت واني اباوع لعلي السجاد شلون جاي يدوف العچينة من گلب و رب
ضحكت بصوت عالِ شوي وهتفت وياه

- اعچن عدلل ملچها زيين ما نريد الخبز يطلع فطير لو مفصص ترى نخليك تچيب من المخبز وعلى احسابك همم

باوعلي ورفعلي حاچبة وأردف وياي

علي السجاد :: باع منو يحجي ياالله ! أكوللل اسكتيي لا اعچنچ ابدال الطحين هذا

- والله احجي صدك وياك خوية نريد ناكل خبز زين موش تسوي أحچار النا

هنا العلوية ادخلت وردت علية

العلوية :: ولج طيبات اسكتي عنة لا اخليج تسوين العجين أبدالة

- لا والله واني شلي غرض أكسر ظهري على هيج شغلات موش هذا شغل الزلم ؟ لو بس فالحين شما نحجي احجاية كمزو وصاحو نحن أفحلة خوشش خلهم يسوون الشغل الصعب دامهم زلم ويكسرون ظهرهم

العلوية ؛؛ ولج يمصگوعة السانچ اطول منج بَـ مترين !

علي السجاد :: دام هذا شغلنا مالچ غرض بي ولا تحشرين روحج

ضحكت لــ علي السجاد وانداريت لـ علي الهادي وأردفت وياه حبيت اباغتهم شوي واغثهم ههه

- اغسل عدل مالنا نگعد نغسل وراك أريد المواعين تلگ لگ

هنا علي الهادي شمر علية ماايي
وضحكت العلوية وردت علية

علي الهادي :: أكلي تايتت احسلج

العلوية :: ههههه ترى والله اني لازمتهم بالگوة طيباات اسكتي عنهم لا يبسطونچ

- لا والله اتشاقى يدرون بية أخواني وعزوتي شنهي عندي غيرهم وهم گواكم الله هذا كلة بعين رب العالمين تعبكم هذا ابيت اهلكم تأجرون علية

علي الهادي :: شوفي نحن ما ضالين على العفية مالتكم نريد أجر وثواب

علي السجاد :: اي والله صدك لا عبالج جاي نسوي هناا لسواد عيونج نريد الله يجازينة بمقدار كل التعب حسنااات

علي الهادي :: زلم ثواب نحن ندورر ثواباات وأجورة تفيدنا باليوم الي لا ينفع بي لا مال ولا بنون فقط العمل الصالح

العلوية :: وعسى ربي يبدل تعبكم هذا وياي أجر يرضيكم

علي الهادي :: الله يسمع منچ

ابتسمت لكلامهم وكلت آمين لكلام العلوية
وبعد لحضات لمن شفت جمعتهم طرى على راسي علي الباقر اخذت اسال السادة علية

- صدك شباب اسألكم ما وصل الكم شيء من الباقري أو عزوز صفد ضل بالي يمهم !!!

علي السجاد :: الأعرفة ان هم بخير الحمدالله بس ما وصلني شيء منهم

العلوية :: هم وين غدو ؟؟

علي الهادي :: يمة شغل شلون شغلهم بالعرس مثل هذا بالضبط ويرجعون بمزاجهم بس اطمئني ماكو أي خطر

العلوية :: ماعرف شچاكم شمالكم هيجي جاي ترحون بهذن الشغلات ترى والله كلبي خلص أفراگكم صعب ونطرتكم ثچيلة على حيلي !!

علي السجاد :: ان شاءالله يجي اليوم التشوفينة بي كلنا حولچ وما يحتاج بعد هيج تفكرين وتخافين

العلوية :: يرادلها بخت أمرية مبخوتــة

اني هنا رديت على كلام العلوية وهتفت وياها ورد علية علي الهادي

- چا يمة انتِ موش هينة بس اندعي وراح تشوفين الكُل يمچ !

علي الهادي :: رب العالمين الي خلق السماوات والارض بسبع أيام وهيچ رتبهن الافلاك والاكوان وبالأرض رتب الطبقات و الابحار وابدع بخلق كل كائن ورتب هيئتة ليكون مُختلف عن غيرة تتخيلون صعبة علية يرتب حياتكم ؟؟
وعلي بسس تخلون ثقتكم وايمانكم بي راح تشوفون شلون حياتكم تترتب بدون ما تحسون ..

العلوية :: والله اني محد أمصبرني غير ثقتي العالية بِ الله واهل البيت وعندي الأيمان المطلق أنهم راح يعوضننا بكل دمعة عوض عظيم

علي السجاد :: أهل البيت هم الحبل الممدود من رب العالمين النا من تمسك بهم ما يضل الطريق أبد

- دامكم تفكرون هيچ ياابة ماكو خوف عليكم هههه

علي السجاد :: أي والله ماكو خوف علينة اني حتى هسة بالي وكلبي مطمئنين على أريج الله لان بنضري هي مو لوحدهاا مادامها متمسكة برب ماكو أرف منة ومتعلقة بِ 12 معصوم راح تكون متحصنة و بأمان وين ما جانت

العلوية :: الله وياها ويحرسها كلبي داعيلها ... صدك على طاري ابنيتي أبوكم وينة لا أول أمس ولا أمس أجة لهنا وبين

علي السجاد :: ابيت عمي كاعد وي جدي عيسى وأبنة

علي الهادي :: هو هذا رچلج لو بس الله يهدي شووية ويعوف مرافچة هاي الفلة المُباركة من الشيخ مُحمد وشيلي أيدچ جان نحن بألف خير

العلوية :: أشش ولكك لا تحجيي هيچي لا تجي ليناا هسة متستحي تخليها تسمعك وانت تحجي على ابوها ؟؟؟
عود هاي انت السيد هاي اخذت غيبة الرجال شحصلت ؟؟

علي الهادي :: يا غيبةة التحجين عنهاا دخيل بختج يا علوية

ضحك علي السجاد هناا ورد على أمة بأستهزاء

علي السجاد :: يمة ما سامعة المثل اليكول : رحم الله أمرأ كب الغيبة عن نفسة
وامثال الشيخ محمد هذا ما عندة غيبة ناخذهاا اصلاً ههههه

العلوية :: ياا دهر عود انت الجبير العاچل هسة علي الهادي اعذرة بزر وما يعرف شنو يحجي بس ما ترچيتها منك يا بچري تحجي على ابو امريتك ..

علي الهادي :: والله لو واحد غيرج كايلي بزر جان سحبت بي الكاع بس امي انتِ
الچنة مالتي چوة رچلج تمونين .. وبعدين تعااي اكلج واذا ابو مرتة يعني ابو مرتة لازم يصير نبي ؟؟ الطالح طالح لو يبلط روحة بماي الذهب لووو يغرك نفسة بماي زمزم يبقى طالح

لاحضت على العلوية شلون ضاجت وجاوبت علي الهادي بطريقة نتر وانا جنت مسمتع بهدووء ...

العلوية :: علي الهادي لا تتجاووز على رچال اكبر منك وهم شييخ !!!

علي السجاد :: ترى كلام علي الهادي صحيح يمة الردي من الله تطلع بزرتة خايسة وكُلنا نعرف أبو الشيخ محمد منوو وشنو جان يسوي ليش هسة لازم نمدحة ونصفكلة ؟؟ واصلاً اني مستغرب ومتفاجأ شلون ابوي مرافچة ومقربة مننا هلكثر

هنا العلوية حط ايدها على خصرها وافترگت لعلي السجاد وردت علية
واني لتوتر الصار بالمُكان كمت ووكفت يم علي الهادي وصرت اساعدة هو يغسل واني امسح المواعين واحطهم بالكاونتر ..

العلوية :: محد يتحاسب على فعايل أهلة وابو الشيخ محمد صحيح جان موش زين بس كلنا شفنا شلون الشيخ تعب على روحة وطلع أحسن من ابوة ميصير هيج تسولفون علية هسة بيا عين ترحون وتكولون الة حجينة عليك أبري النا الذمة ؟؟

علي الهادي :: ههه هاي اذا طلعت عندةة ذمة من الأساس

العلوية :: علييي الهادي هااي شجااك ؟؟؟؟

طيبة الزهراء :: اههه علي الهادي كافي اسكت العلوية بدت تعصب وتضوج

علي السجاد :: يلا اني كملت العچين

العلوية :: ايي يمة غطي وحطة هناك على الطبلة كواك الله ..

علي السجاد :: گوة الله حيلچ ..

طلع علي السجاد و بقى علي الهادي يغسل بالخواشيك واني ردت اغير الموضوع الصار واردفت ...

طيبة الزهراء :: چا شنوو رحمة الزهراء وينهي ؟؟

علي الهادي :: من صبح الله مرّ زاچل اخذاها

بقيت صافنة علية وضحكت ورديتت ..

- منوو زاچل ولك ههههههه

علي الهادي :: هذا رچلها شسمة مو زاچل ؟؟

العلوية :: إسمة زُبير ولك

علي الهادي :: ماكو فرق الاثنين سوة زاجل و زبير كلهن على بعضهن طيور !!

- والله جنت مُعجبة بأسمة بس هسة لعبت نفسي من اتحول من زُبير الى زاچل هههههههه

علي الهادي :: نكول زاچل والنقصدة زُبير

العلوية :: اييي مو عدنا المعنى في قلب الشاعر

علي الهادي :: اني هيچ خلصت يلا في امان الله

طلع علي الهادي واني كملت ترتيب المواعين وكعدت على الطبلة وفتحت تلفوني ورچعت وحجيت وي العلوية ..

- چا يمة اذا هسة الساعة ب 11 شوكت راحت شيخة ؟؟

- تقريباً بـَ 9 أجى زوجها وراحت وياه

- شني ما صدك على الله هذا زاچل أجى طاير ما تركها للعصر عوود ؟؟؟

- لاا حقة ترى هم الله ينطي العافية اتحمل مصائبنا

- ما دام اتزوج من عندنا غصب عنة يتحمل ما مفضل علينة چا على بالة العرس بس بدلة ودك ادفوف

- طُرگاعتچ اي والله شنهي چرالكم صاير الكلام على الناس يمشي بدمكم ؟؟ اخوانج مساع وهسة انتِ !!!!

- لصراحة ما اعرف اخواني على شنو جانوا يحجون لان ما اعرف الشيخ محمد ولا اعرف ابوة بس اني هم ما غلطت على زُبير هذا واقع حالنا هسة ما نشوف شيخة الا بعد سبع الأف سنة !.

- طيبة الرجال يريد يحافظ على بيتة و شيخة اذا ما مرتاحة ما تتحملة

- ايييي صحح

- بطليي تحجين على الناس تاخذين بس أذنوب ليش تردين تشبعين كتل بأسياف من نار بيوم القيامة بس لان حجيتي سالفة صغيرة على أحدهم وعيونج بناتي محد يستاهل والله استغفري ربچ ولا تحجين ابد

- ان شاءالله يمة

- حبيبة روح امچ يلا هسة عويناتج على الطباخ رايحة اشوف اختي وين صفى بيها الدهر

- امي تلكيها بغرفة المعتز باالله تقرأ قرآن مساع سمعتها

- صاعدة الها عويناتچ على الطباخ بس هدري وطفي

- تمام يروحي

راحت العلوية واني بقيت أكلب بالأكل المسويتة على النار !!
ونصيت النار ( هدرتـة )

ورحت كعدت على الطبلة طلعت ملخص فيلم على اليوتيوب بصوت مِستر افلام
وصرت عين أباوعلة وعين على النار عشر دقائق ولازم اطفي كُلياً يعني بس ينتهي هذا المخلص ...

______________________★______________________

""""" عَـلي البـاقِــر """""

أستقبلنا الشيخ أبو ابراهيم أخر استقبال وانطانى بيت ننام بي هذا الليلة ولان عزوز وصفد جانوا بأقسى انواع التعب اول ما فاتو للبيت شمرو نفسهم وناموا

واني جنت احاول انام يمهم اخر شيء نمت على ظهري وحطيت ايدي على جبهتي وغمضت عيوني واجى تصور الواقعة الصارت ويانة كلها حدث بعد حدث
كأن مسلسل انعرض براسي

وصارت ترن بأذاني صرخات اخواني صوت ادموع امي فتحت اعيوني
هه امبين اعيوني طلگن النووم مابية نومة هسة ابداً

تركت الزلم نايمين وطلعت برة البيت صرت محتار ..
أفكر بِ غدير الله المات ابنها وراح حلمهاا ان تكون ام عمرها كلة
لو افكر بِ أريج الله السلبو شرفهاا وضيعو مستقبلها ونحن ما كدرنا نسوي شي !

السالفة امنين ابتدت شنو الصار وشلون صار وبلش هذا البلاء

منو الغلط منو الصح بهذا القصة ؟؟
منو الحق منو الباطل !!

زين رب العالمين واكف وي منو اذا نحن الجاي نتعاقب نحن الجاي نخسر معقولة نحن الغلط ؟

نحن أهل الباطل نحن الضالمين ورب العالمين جاي يحاسبنا على فعايلنا ؟

زين اختي هسة وين ؟ ماضلت ديرة ما لجأت الها وجان المفروض نلگي اريج الله دخيلة عدهم بس طلع العكس

أوو

ياا صددك اريج الله ممكربة من هاي الناحية أو المريت عليهم واحد منهم جذب علية ويمكن خاف عليها لان هي دخيلة عندة ونكر من اني سألتة

هي وحدة من هاي والثاني اني متأكد منهاا واحد من هاي القرى المرينة عليها اريج الله عدهم بس خاف عليها

صرت أمشي واني احجي وي نفسي

وبعد لحضاات

انكطع كلامي وي روحي لمن فتت للبستان تابع لهل الديار وصرت أسمع صوت نحيب اتبعت الصوت والصدى منين يجي ولمن عبرت وقطعت مسافة شفت رچال چاعد وحاط راسة أبين رچليه ويبجي

رحت كعدت يمة وحطيت ايدي على ظهرة رفع راسة وصار يصد الي وهو يمسح ادموعة أردفت وياه ورد علية

علي الباقر :: الله يريح صدرك وبالك ويشيل هذا الغم من كلبك

- موش انتَ الضيف الگصد لينة ؟!

- اي انا بدمي ولحمي

- ناگصك شيء شياات محتاچ مساعدة ؟؟

- انا ما ناگصني شيء بس يمكن انتَ الناگصك وانتَ المحتاچ مساعدة موش انا

دار عيونة عني وچر حسرة حيل غميچة وأردفت وياه

علي الباقر:: شني همك شني هاي الحسرة ؟؟

- انا همي ما يشيلة بشر ولا يتسولف

- كبرها تكبر صغرها تصغر

- انا ما مكبر شيء مصيبتي هي جبيرة و جايدة

- اكدر اعرفها لو ما تريد تسولف بيها ؟

- اني محتاچ أسولف

- وانا اسمعك سولف بكثر ما تريد

- چا خوية حضر روحك لتستقبل طِرگاعتي الوگعت على راسسييي

كعد الرچال عدل وصار يسولف موضوعة وبأختصار سالفتة هي ان هو

جان يحب وحدة من السلف مالتهم بس لمن شاف وحدة احلا منها ترك الأولى وراح ورة الثانية

ولمن الله انطاه الرزق راح واتزوج الأولى واتزوج الثانية وماكدر يسيطر على روحة
لمن شاف وحدة ثالثة انعچب بيها بس ما تزوچها دنت روحه على الحرام

وسوة وياها علاقة محرمة وهو جان مواعدها على اساس يتزوجها بس عافها ولمن عرفت البنية ان هو جاي يضحك عليها وهيج جان وياها لتلبية رغباتة واخذ اليريدة وراح يعوفها ويروح

راحت وفضحتة يم الشيخ ولهذا أنطى مهلة أسبوع يلم اجولاتة ويترك السلف هو ونسوانة الاثنين ...وللعلم ان نسوانة الاثنين حالياً زعلانات عند اهاليهن

ولمن سكت باوعت لوچه واردفت وياه ؛

علي الباقر :: شنو أسمك أنتَ ؟!

- أسمي عامر ..

- عاشت الاسامي عامر

- تسلم

- زين عامر الشيخ ابو ابراهيم انطاك بس مهلة تطلع من السلف ؟

- اي لو اطلع من السلف لو اتزوجها و استر عليها

- زين هي شلون فضحت روحها هيچ أبين الناس

- ما فضحت نفسها السالفة هي صارت من راسها لراس أبو ابراهيم وهو جابني وحجة وياي يا اتزوجها واستر عليها لو اتجرد من العشيرة

- زين نسوانك ليش اتزاعلن اذا ما يدرن بهي السيرة ؟

- هچن مني لان كلتلهن راح اتزوج كل وحدة صارت تصيح اني بالگوة متحملة شريچتي تريد تجيب ثانية وزعلن وراحن لهلهن وانا هسة ابچي على حالي !!

- تريد الصدك عامر

- ايي

- تستاهل كلشي صاار وييااك

- ليشش ؟؟؟

- شني اليش ؟ انت هسة صرت مثال للحيوان لان ما تفرق عنة بشيء لأن صرت عبد لشهواتك ورغباتك ..

- ليش تحجي وياي هيج فوك همي !!!

- بااع عامر راح اسولفلك سالفة وانتَ راح تفهمني ليش اني احجي هيج وتبقى يمك يا تشغل عقلك يا تضل هيج حيوان تركض ورة شهواتك

- شنو هي سولف !

- الله عز وجل من خلق السماوات والأرض وخلق الملائكة والبشرية والحيوانات خلا كل واحد بينا يفرق عن الثاني

- شلون يعني وضح أكثر ؟؟

- هو انا اريد اوضع عرفتك ما فهمت شيء

- زين

- رب العالمين لمن خلق الملائكة خلقها عقل بدون شهوة ولمن نزل وخلق الحيوانات خلقهن شهوة بدون عقل ولمن خلقنا نحن البشرية خلا عندنا عقل وشهوة لهذا القرار الك يا اما تصد عن شهوتك وتشتغل بعقلك وتصير إحسن من الملائكة أو تصد عن عقلك وتتنازل الى شهوتك ويصير حالك حال الحيوان

بقى ساكت بعد سكوتي وجنت الاحظة كأنة جاي يدرك الكلام الحجيتة وياه واني ما حجيت بعد هيچ جنت منتضرة يصدر منة شيء لحد ما رچع باوع علية وأردف

عامر :: شلون أصير احسن من الملائكة اذا مشيت ورة عقلي وطنشت شهوتي وهي الملائكة أحسن مني لأن الله خالقها بس عقل !!

ضحكت وصرت أباوع للكدامي وحجيت وياة

علي الباقر :: سؤال حلو .. باع عامر
الملائكة من البداية خلقها الله وفضل عليها وتركها عقل بدون شهوة يعني نكول لو الله عز وجل منطيها عقل + شهوة جان يمكن شفت اغلب الملائكة ما تسيطر على شهوتها ورغباتهم مثل البشر كذالك بس الله انعم عليهم وعصمهم من الخطأ هذا وخلقهم فقد عقل
اما نحن البشر الله خلقنا عقل + شهوة لهذا لازم يصير عندك جهاد ضد النفس الامارة بالسوء ولازم تسيطر على روحك علمود هيج اذا كدرت تسيطر على شهوتك والشعور بالنشور واتجهت خلف عقلك وطعت ربك انتَ هيج اتفوقت على الملائكة بأيمانك ..
جاي تفهمنيي ترى جاي احااول اوصل الفكرة بأسهل طريقة مُمكنة

- لالا جاي افهمك والله

- خوش هسة السالفة يمك طريقتين ماكو ثالث لو تصير حيوان لو تصير احسن من الملائكة

- زين شلون اجاهد النفس الامارة بالسوء ماكدر احس شيطاني حيل قوي ومسيطر علية كلش

- ماكو شيء بهي الدنيا كلها شيء أسمة شيطاني قوي عامر الشيطان ابد ماعندة سلطة عليك هو مجرد يزين العمل بعينك هاي هي كل شغلتة وانتَ الي تركض وراها واذا جنت مسيطر على روحك اصلاً ماراح تسمع صوتة ما قارئ بالقرآن أية
﴿ ولسوف أغوينهم ألا عبادك الصالحين ﴾
شوف الشيطان ماكال راح اتسلط عليهم واصير قوي ومايكدرون علية كال اني مجرد راح اغويهم واذا هو صالح ومسيطر اني ماراح اكدر اوصل الة اصلا ولا هو يحس بية بس اذا جان طالح اني مو بس اسيطر اني راح اركبة هم

- زين شلون أكدر اسيطر وما اخلي الشيطان يسيطر علية ؟

- جاهد نفسك حاول لمن روحك تريد شيء مو ضروري تركض وتسوي الها
مثلاً اعرف سيد ماي حضرني أسمة هو من الشيرازيين جان لمن يحس بالشهوة او تمر علية فكرتها يعاقب روحة يروح ويحرك اصبعة بالنار حتى بعد ميعيدها ويسمي هذا تأديب لنفس

- تعرف اني هسة أجاني احساس ..

- وشنو هذا الحساس ؟

باوعلي عدل ورفع أصبعة بوچهي واردف بطريقة قوية وكأن متأكد

عامر :: انتَ أبن سيد لو أبن علوية ؟!

ضحكت وباوعتلة عدل وجاوبتة بملامح غير مفهومة

علي الباقر :: مافهمت شنو يعني !!

- الكاعد كدامي سيد لو ميرزا ؟

- هههه لا عمي وين طرت انتَ اني لا هذا ولا هذا مجرد رحالة بدون وحتى هوية ماعندي

- ما اصدددك والله ايدي على راسك انتَ سيد لو ميرزا ؟

- الحچي ابيناتنا يضل ؟

- هسة اني وثقت بيك وسولفتلك سالفتي وانت هم ثق وسولفلي شنو سالفتك ؟

- اني سيد ابن سيد ابن علوية

- وابو فاضل عرفتك وشگيت بيك من طريقة كلامك ووعيك وأيمانك

- المهم هسة اني اتمنى اكون وصلتلك فكرة ولو صغيرة عن هذا الشيء الأنتَ تعاني منة

- ابوس ايدك مولاي وعلي شكراً الك هواي لكلشي سولفتة وياي وأن شاء الله راح ابتدي التحدي وي نفسي

- انتَ أمبين فطير وتركض ورا دنياك مادامك بعدك شاب صغير وبداية عمرك وحياتك لحگ نفسك التزم بصلاتك والله كلشي تسوي ماكو ألة أي فائدة اذا ماچنت ملتزم بصلاتك رتب صلاتك تترتب حياتك واتعلق أكثر برب العالمين وحبلة الممدود النا وروح زور الامام الحُسين واطلب التوبة منة وبلش صفحة جديدة لان الطريق للحسين الطريق لله عز وجل
الامام جعفر أبن محمد ﴿ عليهم السلام ﴾
يكول ( من زار الحُسين كما من زار الله في عرشة )

وانا احجي وياه بلش الرجال يبجي واني هذا الردتة ردت يحس بذنبة أكثر
رغم أذنوبة بس بعد بي أمل صغير يتوب لمن سكتت وبقيت أباوعلة همس وياي وهو مدنك ويبچي

عامر :: اخااف الحُسين مايريدني على السويتة واذا رحت يطردني

علي الباقر :: لااا لاا دير بالك تسولف هيج الحُسين ما يطرد احد اصلاً تلكي الحُسين هسة بكل وقت يباوعلك وانتَ تسوي ذنوب وتزيد الجروح ابصدرة وهو بس يباوعلك ومنتضر منك تزورة وتتغير علمودة
عامر .. الامام الحُسين جان يمشي بالصحراء متجة بكربلاء وفجأة كال للقافلة اكسرو الطريق وامشو منا وهي جانت كلهاا صحراء
لمن مشو طلعت بطريقهم خيمة صغيرة بنص الصحراء جانت راجعة لشخص أسمة وهب الانصاري يعني مسيحي وسلم على الامام والتحق بالركب مالتة
وهوو مسيحييي أمامنا أستقبل المسيحي ماتريدة يستقبلك وانت يكفي أسمك مُسلم ..
وكذالك الامام لمن وصل لأرض كربلاء صار وجه بوجه وي الحر ابن يزيد الرياحي الي هو جان قائد الجيوش الطالعة لقتال الامام
واتواجة وي الامام اكثر من مرة کَ عدوو بس لحد ليلة العاشر والحر عدو الحسين ويريد يقتلة بس لمصباح العاشر
أجى الحر يبجي للامام وندمان ورگع كدام الامام ولمن شافة الامام ضحك وابتهج وحضنة وكالة { كُنت في انتِظارك } وطلع قماشة جانت من ريحة أمة الي هي سيدة نساء العالمين وسواها عصابة للحر وشد راسة بيها
شوف ,,
لحد أخر لحضة الامام يستقبل
ورجع الامام انطانى درس ووصل النا مدى رحمتة ومدى هو يريد التوبة مننا هو لمن الامام العباس شاف الامام الحُسين يبچي وسألة عن السبب ؟
أجاب الامام الحنين وهو يباوع لجيش العدو ورد على الامام العباس وكالة
﴿ يؤلمني ان هولاء جميعاً سوف يدخلون النار ويتعذبون فيها بسبب قتلي ﴾
لا تكول الحُسين ما يريدني
المسيحي احتضنة
التركي احتضنة
الخرج ضدة (الحُر الرياحي ) احتضنة
العبد الاسود احتضنة
وبمجرد تروح للأمام وتلزم شباچة وتكلة يا ابو علي لا تهدني بس تهدني اضيع
اضمن الك راح يحتضنك بصدرة الي رضتة الخيل

سكتت اني والرجال غركان بدموعة وكلبي جان مرتاح اني جنت اريدة هيچ يبچي وهيج يندم وما سكتت ردت اختم وياه كلامي بنصيحة
﴿ يمكن تفيد الكُل مو بس عامر ﴾

علي الباقر :: شوف عامر كل جمعة اعمالنا تنعرض على صاحب العصر والزمان اذا قبل انت جنت مذنب واعمالك اليشوفهن الامام كلهن سودة ويحس الامام ان انت الجاي تأخر ضهورة من باجر بلش اشتغل على نفسك
انتَ تلفونك اذا بي شيء مو زين تستحي وتخاف لا امك او ابوك يشوفه چا ما تستحي من ربك الي يشوف كلشي ؟ ما تستحي من امام زمانك وهو يكلب بالكتاب مالتك وشوف اعمالك عمل عمل ؟؟
الامام جعفر أبن محمد ﴿ عليهم السلام ﴾ يكول :
﴿ شيعتنا كونوا زيناً لنا في يوم القيامة ولا تكونوا شيناً علينا ﴾
وصدگني حتى هاي الملائكة الي على يمينك ويسارك ويسجلون أعمالك اذا غيرت نفسك وتبت توبة نصوحة رب العالمين راح يستر عليك سوء ما فعلت بالماضي
وراح يخلي حتى هي الملائكة التسجل بكتابك تنسى السويتة ويمحي من كتاب الحساب
مو بس راح تبدي صفحة جديدة وي نفسك رب العالمين راح يبدي وياك صفحة جديدة مقابل توبة نصوحة هااا مو لعب صغار
راح اخليك فكر بينك وبين نفسك وراجع كلامي كلة وكرر هذا السؤال لروحك
_ بِ شنو أذاني رب العالمين و بِ شنو قصر وياي ويا يوم طلبتة ورجعني خايب حتى أزعلة هلكثر واسوي كلشي هو ما يرضى بي
كرر هذا السؤال ولازم تلگى حل الة ولنفسك ....... اشوفك بخير ان شاءالله

تركتة وكمت ابتعدت عنة وطلعت من البستان وصرت اتمشى عادي
شفت مرة جبيرة بالعمر شايلة طن كتب وتنحثل بيهن
رحت ليمها واردفت وياها

علي الباقر :: الله يساعدچ امي اكدر اشيل عنچ نص اساعدچ بيهن ؟

- لا ماريد اتعبك اوليدي

- ماكو تعب بالعكس راحة انطيني

- الله يوفقك ويسترك لشبابك حبوبة هاك اوليدي شيل هذني عني

اخذت نص منها وشلتهن على كلبي ومشيت وراها
ولمن وصلت لبيتها الچان كلة من طين وكفت تفتح الباب واندارت الي
وأردفت وياي ..

- حطهن يمك هناا حبوبة

علي الباقر :: صار بالخدمة اني هاچ يلا اتوكل اني

- اوكفلي حبوبة خليني افوت اجيبلك أمية تبلل بيها ريچك عندي ابنيات احديثات بالبيت ..

- هههه خوش امي فوتي جيبي انتضرچ اني

ضحكت اني وفاتت هي
اعرف ما يصلح الواحد يروح عطشان من بيت بي بنات بعدهن ممزوجات لهذا هي خافت عليهن وفاتت تجيبلي ماي علمود اروح واني مرتوي

وبقيت منتضرها لمن طلعت وهي بيدها طاسة حديد صغيرة مدگوگ عليها من جوة سورة يسٰ اخذتها حطيت ايدي على راسي وشربت ماي

وسلمت على الامام الشهيد العطشان وعجلت لضهور صاحب الامر

ولمن خلصت رجعت الطاسة الها أردفت وياي وهي ترفع شيلتها لحنچها

- حبوبة مشكور تعبت ارويحتك وياي وانتَ ضيف عدنا چان لازم نحن نتعب وياك موش هيچي ..

علي الباقر :: هههه لا امي بالعكس شرف الي ساعدتچ

- روح دادة الله يستر عليك وينطيك التريدة ويفتحها ابوچهك وين ما تغدي

ابتسمت ورفعت راسي من الكاع وباوعت الها أمبين عليها من اهل الله ضحكت ابوچها وأردفت وياها

علي الباقر :: امي بلگي تطلعين من المسموع دعائهم فدوة اندعي اخواتي يضلن أبخير وهم اندعيلي يصير نصيبي واخذ ابنية روحي وعزيزة قلبي

هنا الحجية رفعت ايديها لسماء واردفت بصوت عالِ

- يارب يا رحمٰن يا رحيم بجاه كلمن اله جاه عندك تحمي وتحرس وتوفق اخيات هلزلمة الخير هذا وعسا بحق محمد وال محمد تخلي البنية اليريدها من صالحة ونصيبة بجاه المصطفى الامين واهل بيتة

علي الباقر :: يابعد نحري وصمام كلبي يا يمة

- روح حبوبة عسى دعائي الك مسموع وعسى ربي يجعل البنية من نصيبك وتترس البيت كلة من اعيالك بجاه أم البنين تتكفل بكلبك وما تخلي ينكسر ربي يحرسك ويحميك يمة ..

ضحكت من كلبي واتقدمت اخذت راسها وقبلتها بجبهتها واردفت

علي الباقر :: يبعد صمامي الرئوي يا امي

- امبين انت خوش زلمة وتستاهل حبوبة

- وعلي هاي دعواتچ خلص بعدهن ماريد شيء ملكت الدنيا والبيها

- الطيب يستاهل الدعوة الطيبة مثلة

- اشكرج كلبچ الطيب امي ... متوكل اني

- الله وياك اوليدي عسى ربي ينور طريقك وكلبك

تركت الحچية ورحت واني الراحة الصايبتني مو طبيعية معقولة هيج ممكن لشخص يرتاح من يساعد الاخرين ؟

دعواتها الي بلسم لجروحي
الف الحمدلله والشكر الك يارربي
الف الحمدلله انطيتني هاي الفرصة وخليتني اسمع دعواتها ويصير الي نصيب منهن

رجعت للبيت ودخلت لكيت عزوز وصفد فاقدين على حطة ايدي ولا مهتزة منهم شعرة هزيت راسي ورحت كعدت بمكاني وفتحت الجنطة مالتي الصغيرة وطلعت الچكاير والچداحة
وبديت ادخن وافكر ....

يا ترى طيبات أكلت ؟
شربت العلاچ ؟
خلصت صلاواتها بوقتهن ؟
شنو جاي تسوي هسة ؟
درست اليوم لو غلست ؟
رجعت تحجي وي أدم لو لاا ؟
حجت وي علي الصادق لو على اخر مرة من جانت يمي ؟

اخخ يا طيباات يا طفلة كلبي
شنو اسويلج خاطر تشوفيني بس اني كدامچ ؟
شنو اسوي خاطر تعشگين علي الباقر لدرجة تصيرين ما تلتفتين لغيرة ؟!

ادري بيها تحبني بس هذا حبها مو كافي ماجاي توفي الة
ادري بيها لهسة تچذب علية ببعض الامور وادري ما گاطعة التواصل وي أدم

ويمكنن هسة هي محتارة ما بيني وبينة لان حالته مراهقة هسة وماتعرف شنو تريد وكل شوي قرار

ولهذا انا خايف منها واريدها تعدي هي فترة مراهقتها سلامات حتى لو جانت ما تريدني بس أهم شيء نخلصها بدون ما تورط نفسها بشيء ورطة

بقيت ادخن بدون ما احس على نفسي باوعت لروحي لكيت نفسي مدخن ثلاث وحدة ورة وحدة !!!

طلعت تلفوني حاولت اشغلة بس ماكدرت يمكن مخلص شحن
رجعتة للجنطة ورجعت ادخن واني صافن وراجع نفسي وفوك الثلاثة رجعت شربت خمسة

شمرت كرتون الجكاير بعيد عني ورحت حاولت انام وكذالك ماكدرت لان شعور القلق الصايبني مر طبيعي يمكن لان نحن بديرة غريبة ! ماكدرت أمن وانام

خليت اخواني ينامون بالنيابة عني واني بقيت كاعد ومليار فكرة تطري على راسي وبقيت هذا حالي لحد ما سمعت صوت الاذان كمت طلعت ملابس من الجنطة وغيرت ملابسي

وطلعت لبرة وكفت وصرت أشوف شروق الشمس من أي اتجاه وعلى ايدي حددت القبلة ودخلت للبيت كعدت أصلي وحاولت اكعد الولد بس جنهم ميتين عفتهم وصليت

ولمن صار الصبح كعدت صفد وعزوز علمود نشد الرحال ونرجع لديار وبوقت ماجانوا عزوز و صفد يغيرون ملابسهم واني اجمع اغراضنا

أصفاد الحق :: راح نرجع للبيت ؟

علي الباقر :: ما طلع گدامنا بس هذا القرار

المعتز باالله :: شنو يعني راح تخلي أيدينا على اخدودنا ونبقى نتصفن لحد ما عبد الحسن يلگيها ويذبحها النا ؟؟؟

- كتلكم ما طلع كدامنا شيء شنو نسوي اكثر من هيچ ؟ اذا جانت أريج بوحدة من هذني القرى المرينة عليهم معناها هي ماتريد تطلع حتى النا نحن اخوتها ..
خلونا نرجع هسة ونفكر شلون ننسي العالم ونصفي سُمعتنا

أصفاد الحق :: وهم لازم نخلي الناس كلها تعرف ان هي ضلمت اختي ولازم نلگي صديغتها وبنفس الوغت لازم نعرف هذا الحيوان الي تجرأ واتمادة ويانة هيچي

سديت سحابة چنطتي وباوعت الهم وجاوبتهم بأبتسامة خفيفة ..

علي الباقر :: كلشي راح ينكشف والماي راح ترجع لمجاريهَ بس لازم نصبر حكم الله قادم بكل شخص تسبب بأذيتنا والله اعدل الحاكمين

هنا سمعت الباب يندك رحت فتحتة لكيت كدامي الشيخ ابو ابراهيم وخلفة واكفة الحچية أم الكُتب الصادفتها الليلة الفاتت
وجانت شايلة بيدها صينية بيها ريوك كامل ..

ابو ابراهيم :: خو ما ازعچناگم ضيوفنا ؟؟

- لا بلعكس اصلاً نحن ناوين نمر عليك نتشكر منك ونودعك

الحجية :: دهرر شنهي تغدون !!؟ وانتم ما ماكلين شيء من أمس

أصفاد الحق :: ما تغصرون بس والله طريغنا طويل هم ياالله نطلع هسة نوصل احنا والليل

ابو ابراهيم :: بس مو حلوة تطلعون من ديرتي بدون اكل والضيف حگة علينا ثلث ايام وضيافتكم بعدهي بيومها الاول وهذا التصرف الراح تسوونة هساع موش زين لمقامي

علي الباقر :: عمي والله العظيم كرمكم سابقكم يكفي ضيفتونا الليلة بنصكم ونتمنى نضل بعد بس الله شاهد مابينا نتأخر سمعت اخوي الطريق طويل وهم يالله نطلع من هسة

الحچية :: زين اكلو كم لگمة وراكم طريق طويل ولازم تغدون منا ماكلين زين

المعتز باالله :: خلص ماكو مشكلة نتريك ونطلع

ابو ابراهيم :: حطيلهم الزاد هنا أم جعفر

الحجية :: يدللون علينا نخدمهم بعيوننا

المعتز باالله :: الله ينطيكم الصحة والعافية

حطت الاكل ام جعفر وطلعت بقى الشيخ يمنا يودعنا لان عرف مجرد نخلص أكل راح نتوكل أردف ويانة

ابو ابراهيم:: ارتاحوا واتريكو على كيفكم وبراحتكم وان شاءالله توصلون بالسلامة وهم يرتاح كلبكم برجعة المستورة ورقم اخوكم صار عندي اذا كصدتني اي وحدة بالمواصفات محروستكم راح اتصل وارد الكم خبر وعسى بالكم يرتاح
واذا ضاكت بيكم الدنيا بوية هاي صارت ديرتكم عرفتو الطريق بس تعالوا لهنا أكلوبنا تشيلكم اذا ابيوتنا ما وسعتكم
كل الهلا بيكم ابوي من دياركم لدياركم ماكو غريب بس ابليس ..

كام أصفاد الحق على حيلة وحضن الشيخ واني كذالك كمت وبستة براسة وحضنتة
ولأن المعتز باالله متصوب بأيدة مايكدر يرفعها
الشيخ هو حضنة وباسة بكتفة الي متصوب بي
وتركنا وطلع

كعدت اني كدامهم وطلعت الچكاير وأردف وياي أصفاد الحق

أصفاد الحق :: شنيي ما تنزل تاكل ويانة ؟؟

- لاا اكلو انتم الف عافية اني مالي نفس

المعتز بالله :: مالك نفس تاكل بس الك نفس تدخن ؟

- ايي اني مرتاح هيچي انتم هسة اتريكو خاطر نطلع

عفتهم يتريكون وكمت صرت أحوم ابيناتهم لحد ما خلصو ودعنا الأهل بالسلف وطلعنا

ولمن وصلنا الستوتة أردف أصفاد الحق

- عزووز بلا هم روحك وانتَ تسوغ النا هسة

علي الباقر :: هههه وين يسوق ما تشوف أيدة مشلولة تريد تودينا يدهيسة ؟

المعتز بالله :: چا وعلي الا انا اسوق واعلمكم شنو يعني تكولون أيدي مشلولة

أصفاد الحق :: لا عمي اني اسوغ جنت اشاغة وياك اكيد ماراح اخليك تشوغ وتتعب ايدك حبيبي انتَ ههههه

عاند المعتز باالله واخذ السويچ مِن أيد أصفاد الحق وصعد يسوق النا
ونحن عبرناها الة شمرنا الجنط ورة وصعدنا
ودكيت على الحديد الستوتة وأردفت

علي الباقر :: امشي ياالله خوية واتوكل واذا اتعورت ايدك اوكف نبدل

المعتز بالله :: ان شاءالله

ومشينا وقطعنى مسافة مو قليلة ورجعت طلعت تلفوني حاولت اشغلة وهم ما اشتغل رغم ما اتذكر صفر شحنة ؟ مدري شماله

انتبه علية أصفاد الحق واردف وياي

أصفاد الحق :: بيك شي ؟؟

- لا بس اريد اشغل التلفون وما جاي يشتغل يمكن مخلص شحن مادري عطل!

- هاك هذا تلفوني محتاج شيء ؟

- اريد اتصل على علي السجاد

- ثواني افتحة الك ...

اخذ فتح تلفونة ولغى الرمز وانطانياه دكيت رقم علي السجاد واتصلت علية ورد علية

علي السجاد :: ياهلا بصفد وينكم ياخويي ؟؟

- انا علي الباقر وياك ..

- هذهَ وينكم يخوان شلونك ابا الحسن بقى بالي ويم الزلم وين صرتو ؟

- بطريق راچعين ان شاءالله ينحري

- حصلتو شيء ؟

- مثل ما رحنا أجينا

- استغفرالله زين شكد باقي وتوصلون ؟

- المغرب احنا يمكم

- توصلون بالسلامة

- شلونكم انتم ابوي وصل الكم ؟

- لا يخوي بعدة ابيت عمي ونحن بخير بنعمة الباري

- طيبات شلونها ؟

- كلنا بخير ياخوية

- يعني هية زينة منتبه لنفسها ؟

- اي ياخوية هي عفتها يم العلوية بالمطبخ وطلعت وسألو عليك

- زين غدير شلونها ؟

- هسة اني رايح الها

- خوش من اوصل يصير حچينا

- ان شاءالله قزح عيوني بالكم لنفسكم

غلقت التلفون وصرنا نمشي بطريقنا مكملين

وبنص الطريق اتوقف عزوز وصعد أبمكانة صفدي
صار هو اليسوق

وبقينا متأملين الوصول وجنت اتمنى هذا الطريق اني جاي اگطعة بمرافقة اخيتي اريجة بس قدر الله وما شاء فعل

المهم هسة نحن نبقى ورة السالفة لمن نلكي جذورها لان بعد عدنا طيبة الزهراء و وهج الطف ما متزوجات والسمعة الراح تصير عليهن

لازم بعد الاربعين نلكي حلل لاازم ونرجع اختي معززة مكرمةة ...

______________________★______________________

""""" ألأنبار : ﴿ خَــلــيــفــة العـُــمـَري ﴾ """""

صعدت فوك لحجرتي دخلت لكيت امي جاي ترتب بيها أخذت اسحب بأوراق المحاسبة ..
وأردفت وياي

عائشة :: أكول خليفة ..

خليفة :: كولي يمااه

- عرفت ان ابوك خطب الك والجماعة ردولة خبر وكالولة بعد شهر نگدر نروح الهم ونخطب رسمي

بقيت صافن للحضات انداريت الها وأردفت وياها

- ايي اعرف

شمرت الغطى الفراش من أيدها وتخصرت كداميي ونترت ابوجهي

عائشة :: خليفة وأنتَ اموافگ ؟؟!

- وليش حتى ما اوافق الناس كلش خوش ناسس والنا الشرف نناسبهم

- خليفة هذول حياتهم مختلفة جذرياً عننا شلون بلة تريد تندمج مع بنتهم وهي مختلفة عنك بالثگافة والطائفة وحتى المستوى المعيشي

- و ايشش دخل المستوى المعيشي ؟!!

- اشلونن ايش دخل خليفة اميي البنت عايشة عند اهلها أميرة انتَ شايف سياراتهم شايف عيشتهم ؟؟ اذا انت تزوجتها راح تخليك تركض بأيدك ورجلك لشغل وماتلحك لطلباتها لأن الخانم متعودة تصرف وما تهتم ولا تفكر

- عَجل نحن شمالها عيشتنا يمااه ترى نحن تُجار الحمدالله مستورة وما ناقصنا شيء !!

- وتبگى هي متربية أعلى من مستوانا والاحسن الواحد ييمة ياخذ من ثوبة!

- يماه لوين تردين توصلين ؟ جيبيلي من الأخير ..

- شوف يمة حبيبي مثل ما اني خطبت لأخوك شاهين وزوجتة احجي انتَ وي أبوك وخليني أزوجك بنت اختي سراء انت شايفها ومكلبها والاهم البنية مننا وبينا ..

- ههه هنااا الحجي من البداية وكولي اريد ازوجك بنت اختي سراء ليش كاعدة تلفين وادورين ومستوى معيشي ومو من ثوبنا ولا طائفتنا

- وهسة اني كتلك احجي وي ابوك واني اروح وازوجك سراء وتعيش إمير وياها شوف حياة اخوك شلون مرتاح وي بنت اخوي و انتَ راح ترتاح اكثر منة صدكني اني ماريد غير مصلحتكم يا امي

- يمااه اني اريد البنية الختارها ابوي أنتِ زوجتي شاهين على كيفچ خلي ابوي يزوجني على كيفة

- هيچ الحجي خليفة توگف وي ابوك ضديي ؟؟

- اوكف بصف ابوي ضدج شنييي كاعدين بجولة مصارعة ؟؟
يمااه ابوي سولف وي الرچال واخذ موعد وياه وبعدين هو صاحبة ترديني أفشلة مُستحيل أسوي هيچي !!!

- خوش خليفة خليك راكض ورة ابوك وباچر من تتزوجها وتخليك تزين شعر راسك من طلباتهاا عود اتذكر وكفتي هذهِ وكلامي وياك وكول والله كالتهاا امي واني ما سمعتت ..

- ثقي باالله فكرتچ غلط خليني اجيبها الج وتعيشين وياها الا تحبيها اكثر من بنت اخوج زوجة شاهين

- عوود الله كريم

شمرت الغطى واندارت تريد تطلع وأردفت وياي ..

عائشة :: عود أنتَ كمل ترتيب افراشك

عافتني وراحت واني رحت رتبت افراشي وكملت ترتيب الارواق
وبعد دقائق دخل علية للغرفة ابوي
كعد كدامي وهتف وياي ...

عمر :: شنو حجت وياك أمك ؟

خليفة :: الي ببالك رادت تقنعني اخذ سراء وارفض الانت تريدها

- خليفة ماريدك ولو لثانية تحس روحك مجبور لو مضغوط عليك توافق بس لأن اني حجيت وي العالم اكعد وي نفسك وفكر واذا تحس روحك ماتريد اني اتصل عليهم واخرب كلشي وبتالي هو صاحبي وعشرة اسنين نبقى اهل وحبايب ماريدك تحس روحك متقيد ومجبور ..

- والله يبوي بالبداية خفت من هذه القرار بس لمن عرفت أنتَ مختار منو لا والله بالي وگلبي مرتاحين هسة اني اكلك اريدها للمحروسة واذا رفضوا اهلها اضغط عليهم لأن صدك أريد من هذة العائلة

- ريحت كلبي لا تخاف قبل وگالي بعد ما تنتهي المشاية نروح الهم

- الله يقدم البي الخير

- ايي والله .. صحيح خليفة اجيتك بشغلة اريدك تكضيها

- أبشر اشنو اهي ؟

- اريدك تسافر لبغداد تلتقي بالسيد علي الباقر وتشوف شغلنا وين صفى بية الدهر وبنفس الوقت اريد انطيك امانة توصلها لمُكان

- اعتبرها صارت و مكضية بعد اشوي اطلع لبغداد

- لا شسالفة مستعجل ؟

- لا بوية احسن حتى الصبح اني هناك معليك خليها يمي

- عجل اجيبلك الأمانة وانطيك تفاصيلها حتى توصل لمطرحها

- تمام بوية

تركني ابوي وطلع واني كمت جهزت الاغراض الراح احتاجهم هناك
رتبت الاوراق الشغل وحطيتهم وي اسوالف التلفون والشاحن وهذن الاغراض الخفيفات بس مهماات

ولمن كملتهن كلهن وكعدت اباوع الهن خاف ناسي شيء دخل أبوي علية وبيدة ضرف وكف كدامي وخلى الضرف بيدي وهتف ..

عمر :: هذة الضرف والامانة الي بيدك تحطها بين أيدين العلوية فاطمة الزهراء بنت السيد احمد الصادق

خليفة :: عمة السيد علي الباقر؟

- اي بالضبط

- سهلة انطيها لسيد علي الباقر هو يوصلها لعمتة

أبوي هنا نتر ابوجهي بطريقة مو معقولة وصاح

عمر :: لااااا

- شنو يبوي ؟؟

- خليفة علمي يوصلك ويتعداك دير بالك احد يعرف لو يدري بهي السالفة الضرف هذة من أيدك لأيد العلوية

- ومنين راح اندل بيتها

- هي ساكنة ابيت اخوها السيد صفاء الحسن اني اكتبلك عنوانة وأنتَ روح بدون علم احد وارجع واكلك من أيدك لأيد العلوية

بقيت اباوع لأبوي ليش هلكثر مصر محد يشوف هي الأمانة
ولا واحد يعرف بيها شنو السالفة شنو شايل هذة الضرف المغلق ؟

أخذت الضرف من ابوي وشمرتة وي أغراض ورجع أردف وياي

عمر :: خليفة ماكو داعي أوصي بعد مو ؟

- اعتبرها مكضية الضرف ماراح يوكع الا بيد العلوية

- ادري بيك نچر وتگدر الها

- سهالات لتفكر بيها

- خوش هساعين كمل اغراضك و توصل بالسلامة

- الله يسلمك يالغالي ..

عافني وراح ابوي واني كملت لملمة اغريضاتي حطيتهم بجنطة ظهر و ودعت ابوي بالغرفة بعد ما جابلي الضرف ونزلت لجوة

لكيت امي وشاهين واختي آمنة وزوجة اخوي سارة كاعدين بالصالة رحت بست راس امي واردف وياي شاهين

شاهين :: وين رايح ؟!

خليفة :: طالع لبغداد .. آيام وأرجع الكم

شاهين :: بالك لنفسك خوية وتوصل بالسلامةة

آمنة :: توصل بالسلامة يلملعون

- راح اشتاقلج خبلةة ههههه

حضنت اختي وابتعدت عني صرت اباوع لامي شلون ضلت كاعدة وما انطت اي رد فعل ان انا راح اسافر ..
اخذت وأردفت وياها

خليفة :: ها يماه ماتردين تكولين شيء ؟!

عائشة :: انتبه لنفسك ودير بالك من الطريق اذا حسيت روحك نعست اصفط ونام لا تكمل وتضغط على روحك ولا تتأخر بالرجعة بالي راح يضل يمك ترجعلي بالسلامة أوليدي .

- بعد روحي امي غاليتي ان شاءالله بس اوصل اتصل عليج واطمئنج ..

ودعت اهلي وطلعت صعدت سيارتي وطلعت ابوجهي لبغداد
ولمن تعبت بالطريق وكفت السيارة ونمت بيها ساعتين ..

رن المنبه كمت صحصحت وكملت طريقي الفجرية دخلت
وصرت على مشارف بغداد
وبعد ما وصلت رحت للمحل مالتنا

اتصلت على السيد علي الباقر طلعلي مغلق ..
رجعت واتصلت على السيد المعتز باالله وهم طلعلي مغلق

سديت الخط وصرت ادور على رقم السيد علي الهادي
ولمن لكيتة اتصلت علية
وبقى يرن ثواني وبعدها فتح الخط ..

علي الهادي :: الوو ؟

خليفة :: شخبارك سيد شلونك ؟

- يا هلا بخليفة اني بخير أنتَ شلونك أعلومك ؟

- انا بخير لكن بالي يمكم

- ليش خيرك سامع شيء .؟

- اني هسة ابغداد واتصلت على السادة علي الباقر و المعتز باالله وطلعلي مغلق فكرت صاير شيء ضلل بالي ..

- لا يخوي ماكو بس الخير بس اني اكلك الولد طالعين علمود هيج غالقين أجهزتهم

- اهاا واني اجيت لخاطر السيد علي الباقر عندي شغل وياه

- ماكو مشكلة تعال نضيفك اليوم يمنا وهو بالطريق الرجعة حالياً

- اهاا يعني منا لليل هو موجود ؟

- تقريباً يوصل المغرب او بداية الليل

- عجل دامة هيج اني راح اخلص شغلي كلة وامر عليكم الصبح

- وين راح تنام خليفة ؟

- باع خوة اني حجزت فندق لا تحلف ولا تتعب روحك مزهب روحي انا

- لاا منقبلها منك شنيي توصل بغداد وتنام بفندق؟ ادري اذا بيتنا مو سايع الك نشيلك بعيوننا ..

- والله ادري بيكم اصحاب كرم ومعزبية وما تقصرون بس والله اخذت الليلة هاي باجر الصبح اني يمكم لان مااكدر اتاخر هنية

- براحتك خوة بس راح يزعل علي الباقر اذا عرف انت هنا وحاجز فندق

- شنو خوية علي الهادي اني چاي لهنا أچربكم ؟ ادري بيكم ما تقبلون بس انتم هم أعذروني والله راح ارتاح اكثر بالفندق

- براحتك خوة

- من يوصل السيد بخير وسلامة وصلة سلامي

- ان شاءالله واصل

- مع السلامه .

سديت التلفون من السيد علي الهادي ومشيت بسيارتي لعنوان بيت السيد صفاء الحسن الكتبة الي ابوي

استغليت الفرصة دام السادة ما موجودين ..

الحلوة بيهم بيوتهم على الشارع ما تتضيع وصلت للعنوان ونزلت من سيارتي وكفت كدام الباب وضربت علية

لحد ما سمعت صوت جايني من خلف الباب يكول ...

فاطمة الزهراء :: منووو ؟؟!

رديت عليها بأسمي ..

خليفة :: اني خليفة العمراني ..

رجعت هي وأردفت وياي من خلف الباب بدون ما تفتحة ..

فاطمة الزهراء :: خالة ماكو زلم بالبيت اعذرني مااكدر افتح الباب گلي شنو حاجتك واتوكل ..

من كالتلي خالة عرفت التحجي وياي مرة جبيرة بس ردت اتأكد هية نفسها العلوية لو لاا

يمكن يطلع غيرها رديت عليها بسؤال ..

- خالة أنتِ العلوية فاطمة الزهراء بنت السيد أحمد الصادق ؟

سكتت لثواني وبعدها ردت وانا جنت حيل متوتر ..

- اي انا هي اتفضل ابني شنو محتاج ؟

- افتحيلي الباب ضروري لازم احجي وياج وجه لوجه وانطيج حاجة

- كتلك البيت مابي زلم مااكدر ادخلك وأنتَ زلمة غريب ونحن نسوان بطرك أرواحنا

- يمة أنتِ عرفتيني اني منوو لو لا ما طريت على بالج ؟

- لاا ماعرفتك ..

- يمة اني خليفة عمر أبن عمر صديق ابوج السيد احمد وبنفس الوقت صديق زوجچ الشهيد حسين كاظم وانطيچ العلامة الأكيدة حتى يرتاح كلبچ ابوي عمر صديق نسيبكم الانبــ .......

ردتت اكمل كلامي اتقاطع صوتي وي صوتها وهي تكول ألي ..

- انتضر يمةة ثواني بس البس عباتي واجي ..

سكتت وبقيت منتضر دقيقة وبعدها انفتح الباب واجاني صوت العلوية بكلمة ﴿ اتفضل ﴾

ولمن دخلت وكعدت بالبراني قدمت الي العلوية اكلاص الماي وأردفت وياي ..

فاطمة الزهراء :: تفضل خالة

خليفة :: زاد فضلچ ..

- اعذرني وكفتك بالباب بس شوفة عينك بيتي هندس من صوت زلمي وخفت منك

- لا بلعكس حقج واكثر من حقج هيج تسوين هذة الوقت بالاخ ماكو امان

- اي والله

شربت الماي وبعد ما خلصت أردفت وياي

فاطمة الزهراء :: جيتك هاي قاصدني بيها ليش ردت تشوفني ؟؟

خليفة :: أجيت لان عندي شغل وي السيد علي الباقر وابوي دز أمانة بيدي ونبه علية لازم تنحط بأيدج ومحد يعرف بيها

- عمر يدزلي أمانة ؟؟ شنو هيةة

- يشهد الله ماادري لان هي من ايدة لأيدج لا فتحتة ولا شفتة أشنو .. بس ثواني اطلعة الج ..

فتحت الجنطة وطلعت الضرف وسلمتة الها
اخذتة مني وصارت تكلب بي وهتفت وياي

فاطمة الزهراء :: يعني أنتَ ما تعرف شنو بي ؟

- كدام عينچ على سدة أيد ابوي

- جعلة خير ان شاءالله

- وبعد عندي سالفة وي بنت السيد صفاء الحسن

رفعت حاجبها الي وجاوبتني بملامح ما راضية

- وَهج الطف قصدك ؟

- اي العلوية وَهج الطف عندي سالفة وياها

ابتسمت ودنكت وبعدها رجعت باوعت إلي وجاوبتني

- لا خليفة هنا تعذرني ماكدر اخليك تشوفها اني لبست عباتي وشفتك لان عمرك بعمر أصغر اولادي الميزرا المصطفى القاسم بس شغلة ادخل وَهج الطف أعذرني

- لا خالة معذورة ..
على العموم اني راح اروح بس وصلي لـِوَهج الطف هاي الكلمات

- شنو هي ؟

- ﴿ النچمة ألي بالسماء تلالي تعتذر منچ وتكلچ لا تزعلين لأن ما اخذتچ بالسفر ويانة بس الطريق جان طويل وچنت مفكرة روحي راح ارجعلچ بس طلع الدرب كثرانة بية الذيابة النچمة تسلم عليچ وتريدچ تبقين الوهج الها لان هي بدونچ ما الها معنى بالسماء ﴾

بقت صافنة العلوية علية لأن ما فهمت شيء من كلامي وبعد صفنتها أردفت وياي

- شنهي هي عيد كلامك ؟؟

- ﴿ النچمة ألي بالسماء تلالي تعتذر منچ وتكلچ لا تزعلين لأن ما اخذتچ بالسفر ويانة بس الطريق جان طويل وچنت مفكرة روحي راح ارجعلچ بس طلع الدرب كثرانة بية الذيابة النچمة تسلم عليچ وتريدچ تبقين الوهج الها لان هي بدونچ ما الها معنى بالسماء ﴾

- شنهي هذي طلاسم لو فك شفراات ؟؟

- والله يا علوية علمي علمچ اني مجرد مرسال وصلت الرسالة والامانة خلص اتوكل هسة انا

- خوش يمة الله وياك درب السلامة ..

عفت العلوية وطلعت من البيت صعدت سيارتي ورحت ابوچهي للفندق
خلص سلمت الامانات هسة انطوني النووم يلا اريد بس أنام

الطريق جان عبارة عن مواكب ويالله طلعت من ازدحامهن ووصلت الفندق وصعدت الى حجرتي وشمرت روحيي ونمتتتت .......

______________________★______________________

""""" وَهـــج الــطِـف """""

جنت حيل خايفة على عمتي بقيت انتضرها بالأستقبال لحد ما دخلت وهي لازمة بأيدها ضرف أجت كعدت واني بتوتر كعدت كدامها
وأردفت وياها

وَهج الطف :: شنو صار منو هذة العلى الباب ؟

- ابن صديق قديم النا

- اهاا زين وشنو يريد چاي لهنا ؟

- وصل ألي هاي الامانة وبس

- اهاا بس هيچي ؟

- اييي وَهج الطف يعني شتردين يسوي أكيد بس هيج

- وشبيج عصبتي علية هيجي شحجيت انا ؟

- لحيتي هوواي كلتلچ وصلني أمانة وهي السالفة فاتحة وياي تحقيق لو شني ؟؟

- منو انا حتى افتح وياج تحقيق بس توتري عليج سالتج هيج وطولت وياج اعتذر اذا ضوجتج حيل وحسيتي ان انا لحيت ..

عفت عمتي وصعدت فوك لغرفتي سديت الباب وصرت اباوع لروحي بالمراية
جاي احاول امنع نفسي اخذ من هذا العلاچ بس اعراضة چاي تطلع علية

وينك يا علي الباقر شوكت نروح لدكتور اريد أتخلص من هذا السم الورطت روحي بي شسووي هسة أخذ حبة وحدة ؟

ايي ماراح تفرق شيء اذا اخذت بس حبة وحدة لان مااكدر ابقى هيچ ..

لاا وهج لاا وحدة تسحب وحدة وترجعين لنقطة الصفر صالي اسبوع گاضة نفسي
وما متقربة منة ما راح اخرب على روحي راح ابقى صامدة لمن يرجع علي الباقر
ونروح لموعد الدكتور ..

كمت واتاكدت من الباب مقفول عدل ورحت لمخدتي فتحتها وطلعت من جواها صور أمي ورسائلها الأخذتهن من ذاك الرچال الي گالي راح ارجع اتواصل وياج وما رجع
بعد ..

حطيتهن على افراشي ونمت يمهن وصرت أباوع بالصور وقرأ رسائل امي وعيوني تصب ..

وبقيت على هاي الحالة اخذت صورة امي وصرت احجي وياها ...

وَهـج الطف :: كسرتي ظهر بنتچ بهذي الغيبة وينج يابعد حيلي ميتةة خلص اقتنعت أنتِ ميتة بس وينة گبرچ ؟ ليش من دون البشر لا اني الشايفتچ ونايمة بحضنج ولا اني العندي گبر الچ اروح الة واشمر نفسي علية اذا ضاگت بية الدنيا چا هيچي يا بسمة ؟؟ هيچي تگطعينها وي أبنية كلبچ و وحيدتچ لا طيف منج ولا بالحلم تمرين علية تشوفيني بية !!
چا يمة غير من خصال العاشگ الوصل وين وصلچ الي ؟
شنو أنتَ مو عاشگة الية هيچي افراگي سهل عليچ ؟
منو عندي الجأ الة وافضفض يمااااه ضميني لصدرچ مخنوگةة
ولچ يماااه تعاااي اخذيني تعبتني دنياايي
والله مابية حيل الفرگة ابوس ايدج تعاي اخذيني خليني اشوفج لو لمرة وحدة خليني اسمع صوتج مرة وحدة بحياتي خليني أحس ان اني صدك عندي ام حالي من حال البنات ..
بيا ذنب گاعدة واتحسر عليچ ؟ بيا ذنب اتوسل بالرايح والچاي بس علمود يسولفلي عنج وشلون جنتي عايشة وشلون جنت تكضين وقتج !
يماااه امنيتي اسمع منهم كلمة تشبهين امچ حتى افرح واحس اني ماخذة شيء منج بس يتقصدون ما يذكونج كدامي ..
ولجج يماااه تعالي وين عفتيني لا منج ولا من ابوي وحتى اخواني سلبو مني طفولتي وخلوني أعيش شعور ابد مو لطفلة عمرها 6 سنوات
ولجج يمااااااه وينجج
اخخخ يايمةةة منين اجيبها وين ما ادير وجهي القسمة مو ألي يمــــ.....

واني اسولف وبنص انكساري وادموعي على خدي انقطعت افكااري وسكت صوتي وي صوت دكة باب غرفتي ووياة صوت

فاطمة الزهراء :: وَهــج الطف افتحي الباب بسرعة ..

كمت ردت اضم الصور والاوراق بس ما لحكت قوة الضربة على الباب عرفت بيها مستعچلة

جمعت كلشي وحطيت البطانية علية ومسحت وجهي عدل
وكمت اتنفست وفتحت الباب الها

لكيتها كدامي لابسة عبايتها وحجابها
ومجهزة روحها تريد تطلع سحبتني من أيدي واردفت وياي

وَهــج الطف :: هاا عمة ؟؟

- تعاي وهچي شوفي راح اطلع سدي الباب وراي وبالچ تفتحي لواحد لو ابوچ يطلع من گبرة ويكلچ اني السيد صفاء الحسن لاا تفتحينةة كليلة تجي عمتي واهي تفتح الباب وهم اقفلي باب الشارع وراي وفوتي اقفلي هذا باب الاستقبال عليچ خووش !

- تمام بس أنتِ وين رايحة ؟

- رايحة لعبد الحسن المهم تعاي سدي الباب وراي وسوي الكلتلج علية ؟

- ان شاءالله

- وَهج الطف لأبوچ لا تفتحين الباب

- هو خلي يجي ابوي افتحلة روحي موش الباب

عمتي هنا التفت وخزرتني وضحكت وحطيت ايدي على كتفها وأردفت ...

وَهــج الطف :: خلص والله اتشاقى لو يجي ابوي ماراح افتح الباب راح اقفلة واصعد لغرفتي اكمل نومتي الأنتِ كسرتيها روحي وأنتِ مطمئنة ..

اخذت وضمتني لصدرهاا حيل ووي حضنتها باستني بشعري وهمست بأذني

فاطمة الزهراء ؛: راح ترجع حياتج طبيعية اخذي وعد من عمتچ احبج حيل يا بنت روحي مو بنت اخوي .

بعدتني عن حضنها وطلعت
قفلت الباب وراها واني مافهمت اخر شيء شنو ترجع حياتي طبيعية ؟
شبيها حياتي ؟

وصددك منو هذا الاجى وشنو انطاها شنو كاللها ليش انكلب حالها هيچ ؟

اي يا خبر اليوم بفلوس باجر ابلاش انتضر واشوف تاليتة لوين
صعدت لغرفتي ورجعت كعدت وي الصور والمراسيل واني بطرك روحي بالبيت

كمت شغلت باسم الكربلائي بالتلفزيون وسويتة بأعلى صوت وكعدت اعاين صور امي واهوچس ........

______________________★______________________

""""" فــاطِــمة الزهراء """""

طلعت من بيتي واني ما اشوف كدامي من الكارثة
القريتها بالرسالة الجانت بالضرف الوصل الي من عمر

وكفت تكسي على الماشي وصعدت بيها ورحت لبيت اخوي الحسن المجتبى
ولمن وصلت انطيت لأبو التكسي الكروة ونزلت وكفت كدام الباب

عدلت عباتي ونزلت معاصمي ودكيت الباب وماحسيت أجى واحد رجعت وضربت اقوة من الاول وسمعت صوت يصيح ﴿ ايي ايي جاييين ﴾

انطيت ظهري للباب وانفتح وسمعت صوت يكول ( نعم اختي اتفضلي )
افترگت الة جان على بالي غريب لهذا انطيتة ظهري بس لمن شفتة طلع هذا مؤيد أبن عمي عيسى ..

نزعت المستحى وطلعت من اخلاقي لان اعصابي جانت براس خشمي وحجيت وياه بنتر وتكبر وقلة ادب ..

- اخووي عبد الحسن موجوود ؟؟؟

مؤيد :: اي جوة كاعد وي أبوي

- أكو غريب وياهم ؟

- ماكو غريب بس الشيطان بنت عمي محد بالبيت بس نحن الثلاثــة

- وين كاعدين ؟

- بالاستقبال ..

بعد ما جان مؤيد واكف كدامي كدام الباب
حطيت ايدي على صدرة ( على قميصة )
وسحبتة من ياختة على صفحة

ودخلت لجوة وبوجهي فتت عليهم للأستقبال
ماجان متوقع جيتي الهم اول ما شافني عبد الحسن وعمي كامو مصدومين ورحت انا بكل جسارة

وكفت كدام عبد الحسن ونترت ابوجهة بعلو صوتي ....

- اتخيلت كلشي واتوقعت يطلع منك كلشي يا أبن امي وابوي بس شيت توصل لهاي الدرجة من دنائة النفس وجسارة الگلب أبد ماا توقعتهااا يا عبد الحسن

هنا عمي رد علية و عبد الحسن جان مستغرب لكلامي
وعلى بالة احجي عن موضوع أريج الله ..

عيسى :: اذا جاية لموضوع أريج الله نحن خلصنا ومانحجي بي بعد اذا لكيناها راح نذبحها

- لاا يا عمي مو لموضوع أريج اصلاً موضوع بنتي أعلى وأشرف من ان انزلة واحجي بي وياكم لان كفر أسم بنتي ينچاب على السانگم المايعرف الله وكلشي جنتم تسوونـة من عبادة وصلا هوو رياء

عبد الحسن ـ بنتر ـ :: فاطمة الزهراء خلي النفس هادئة عليچ واطلعي ارجعي لبيتچ ..

- هههه وليش ارجع لبيتي ؟ انا اجيت خلونا نحجي بكلشي واستفسر عن هواي أمور هنا وما خايفة منك اذا اغتاضت روحك علية لو بقت هادئة

عيسى :: والله وطلعلچ السان يا فاطمة وصرتي تعرفين تحچين ..

- اي عمي يطلعلي السان اذا نسيت مو مشكلة جبير وماعليك عتب اذكرك الواكفة كدامك صح مرة بس هي بعدال الف واحد مثل عبد الحسن لان بأختصار تربية السيد احمد الصادق اني ..

مؤيد :: شعندچ جاية وهادة علينة ؟؟؟

فقدت اعصابي حيل بكلام مؤيد لهذا صدك نزعت اخلااقي وطلعت الهم السيد جوودة البداخلي مو العلوية فاطمة الزهراء

- كلاميي وي عبد الحسن فقطط مو يمكم انتم الاثنين وعود من أشمر الكم عضم بذاك الوقت افتحوا حلگكم ..

عبد الحسن :: فاطمةة .....

رفع أيدة عبد الحسن وراد يضربني بس لزمت ايدة ودفعتة لورة ..
وكع وكعد على القنفة ونترت أبوجهة

- اذا على بالك الكدامك أختك التضربها وتبلع موس وتسكت أرجع واكلكم الكدامكمم بنت السيد احمد الصادق

عيسى :: شتردين هسة ؟؟

- اجيت احجي وي عبد الحسن وينتهي وينكطع كلشي هنااا

عبد الحسن :: احجي وفضينااا !!!

طلعت الورقة من جنطتي وشمرتها ابوجه عبد الحسن
ورحت كعدت كدامهم

اخذ الورقة اخوي وبدة يقرأ بيها ولمن انتهى رفع عيونة صار يصد بيهن ألي

وعمي اخذ الورقة من أيد اخوي صار يقرإ هم ليشوف شنو مكتوب بيها
وأردف وياي عبد الحسن ...

عبد الحسن :: منو انطاچ هي الورقة ؟

- ههه شنو يا خوية ما سامع اليكول حبل الچذب گصير شنو اتوقعت لشگم سنة راح تضل هي چذبتك صامدة ومستورة ؟

عيسى :: وانكشفت هسة شنو المطلوب شتردين ؟

عبد الحسن :: اني ما سويت شيء غلط جنت اريد مصلحة العائلة وكلشي سويتة لمصلحة العائلة خاطر تبقى متماسكة وما تتفگگ ..

كمت من مُكاني ونترت ابوجهَ عبد الحسن بكل صوتي وعصبيتي ..

- لااا عبد الحسن غلطاان يا مصلحة التحجي عنهااا ؟؟
مصلحة العائلة تخليك تتبرة من اولادك وتضيعهم ؟
مصلحة العائلة تجبرك تجبرني ياخوي ؟
مصلحة العائلة تخليك تخفي بنت اخوك لسنين ؟
مصلحة العائلة تخليك تمشي ورة بنتك وتريد تذبحهااا ؟
مصلحة العائلة تخليك تصد مرة اخيك وتمنعها من الوصول لبيتها وماتخليها تربي بنتها ؟
مصلحة العائلة تكلك صير جلد الگلب ولا تسمع احد وامشي ورة رئيك وقناعتك !!
سولفلي يا خوية هاي مصلحة العائلة بنضرك ؟؟

عيسى ؛: ايي هي هاي مصالح العائلة ولولا قرارات عبد الحسن ومحافضتة على المحبة ابينكم جان انمحت عائلة اخوي احمد ..

- لاااا عمي متوهم هواي انت
نحن لو ضالين على قرارات أبن اخوك هذا جان ضعنا من زماان
قصدك لولا تربية ابوي لاحفادة السادة الي هم أرباب السيد احمد والتمسك الطلع منهم حتى ميضيع تعب ابوي جان ما شفتني كدامك ولا شفت عائلة احمد هيج متماسكة وروح بروح
الفضل مو لعبد الحسن الي ضياع العائلة من راسة
الفضل لأحفاد ابوي الصابرين و الصامدين على جلد كلب عبد الحسن ومتحملينة ومتمسكين بوصية جدهم

بقى عبد الحسن يباوعلي ردت يطلع منة شيء بس كلعادة يا سادة مثل ما عهدنا بقى ساكت وما مهتم لأي حرف من كلامي

لان خلص هو مخلي شيء براسة ومُقتنع بي وجنت اعرف أغلب تصرفات عبد الحسن الحقودية هي نتيجة لتسميم عقلة من قبل عمي عيسى

لان عبد الحسن ناتج من تربية عمي عيسى ..

ورجعت انا وأردفت وي اخوي على امل احرك ولو ذرة مشاعر بعدهِ قامتة بكلبة

- هي سالفة يا أبن أمي وأبوي اذا على بالك مثل قبل تسوي كلشي تريدة ومحد يكلك على عينك حاچب هذهِ المرة لاا
السادة كبرو حيل وصارو زلم وراح يوكفون ابوجهك بكل قرار يطلع منك وما يرضيهم واذا صار عندهم علم بموضوع حرمة صفاء الحسن الأنت متورط بي هنا رسمياً راح يصيرون ضدك 100٪
وتحلم بعد واحد يوكف وياك لو يحترمك صحح خطأك يا أبن أمي صحح الخطأ ..
وكافي اترك المشي ورة عيسى و الشيخ مُحمد ترى ماراح ياخذوك بس لطريق واحد وهو الهلاااك

كمت من مكاني وبعد ما جانت عبايتي واكعة على متني رفعتها وحطيتها على راسي
وسحبت الورقة من أيد مؤيد وطلعت من البيت

اعرف تأثير الشيخ مُحمد وعمي عيسى كلش قوي على اخوي والكلام الحجيت بي سمعة منا وطلعة منا بس جنت احاول

ماكو مشكلة بالمحاولة حتى لو جانت الاخيرة ..

صعدت التكسي ورحت للمستشفى
دخلت لهناك واتوجهت لغرفة ابنيتي غيمة ﴿ غدير الله ﴾

بعد ما اشتريت الها علبة الحلويات التحبهم هي
دخلتت ولكيت علي السجاد يمها وضحكت اول ما شافتني

من جعل محد غيرها يضحك .....

فاطمة الزهراء :: الأميرة شلونهاا ههه

غدير الله :: فطومةة هههههه

- يروح فطومة شلونج يروحي .. شلونك ابا التقي حبيبي ..

علي السجاد :: يا هلا بعمة السادة ..

حطيت العلبة على الطبلة ورحت سلمت على غيمة وبستها براسها
وكام علي السجاد حضني وباس أيدي وسلم علية

ورد كعد بمكانة بعد ما سحبلي الكرسي وكعدت كدام غدير الله ولزمت أيدها ..

- شلونچ بنيتي ؟

غدير الله :: اني بخير الحمدلله بس محاجة شوفتكم .. ومحتاجة هذول يحنون علية ويخرجوني من هذة السجن .

- لازم نطمئن عليچ اكثر وبعدها نطلعچ لأي مكان تردينة بس اتحملي هسة ..

غدير الله :: عادي اتحمل بس غير انتم وياي تضيعون الوقت الي
وبعدين اني زعلانة منكم شني نسيتوني هنا لا واحد يسأل ولا يتصل شني السالفة

هنا علي السجاد صار يباوعلي ورد على غدير الله
حتى ينطيني أشارة ان هو شنو كاللها

حتى ماتعرف شي بخصوص أريج الله والصار وياها
لأن حالتها هسة ماتسمح تتوتر لو تقلق ..

علي السجاد :: شمالچ غيمة فقدتي الذاكرة سولفتلج بوية نحن كلنا بالمواكب لصبح بالخدمة والنسوان ملتهية ماتعرفين امي واقرايااتها وهم أبوي مايقبل وحدة تجي لوحدها ..

غدير الله :: افهم كلشي بس ماكو اختراع واصل الكم أسمة تلفون ؟
وانتم بالموكب ارفعوا السماعة واحجو وياي يابة شلونج
ترى ما تكلف وافلوس الرصيد اني انطيها الكم من اطلع

- ماكو أي مشكلة حبيبتي خدمة الحُسين خلتنا ننسى حتى أنفسنا وهسة نحن يمچ وماراح نعوفچ بعد لا تتدلعين كافي ولچ

غدير الله:: والله اتحلفت بيكم وكلت بس اطلع اسبي راسهم بس مشكلتي گلبي رچيچ ما اتحمل بس اشوفكم ارضى بدون شيء ..

علي السجاد ؛: هههه اروح فدوه لأم گلب الرچيچ

- چا يمة ليش وحدچ هنا رچلج وينة ؟

غدير الله :: ما اعرف طلع قبل أشوي ولحد هسة ما راجع واصلاً أنمار كلش متغير هي الأيام

علي السجاد :: شلون يعني متغير ؟

- يعني خوية صاير حيل جاف وياي ومن احجي وياه يرد على گد الحرف وهم صاير هواي يعوفني ويطلع ويتركني لوحدي .

فاطمة الزهراء :: يعني هو صار يتصرف وياچ هيج بعد الحادث معقولة اتغير لان طيحتي الطفل يعني حاز بخاطرة ؟

علي السجاد :: أكسر ظهرة غير شنهي يگلب خلقتة على اختي لان سوت الحادث چا اهي بيدها ؟؟

غدير الله :: لاا سجادي لاا عمتي ترى كعدت وچان طاير من الفرح لا مهتم للطفل الراح ولا شيء واصلاً هو بس هي اليومين هيچ منگلب حالة مدري شجاه ..

فاطمة الزهراء :: عادي يايمة هسة يطلع الرجال مابي شيء بس لأن تعبان من الشغل ووضعج هذا تعبة وانتِ صرتي تتحسسين من تصرفاتة اما هي رد فعل طبيعي على الجاي يمر بي

- ماعرف بعد يمكن صدك اني صايرة اتحسس لأن كاعدة هنا لوحدي وبس هو جان كدامي

علي السجاد :: لا معليج هسة اشوفة واحجي وياه شني يسوي هيج بيچ المفروض حتى لو تعبان يعوف تعبة على الباب ويفوت عليچ انتِ ماعايزة حتى حضرتة يزيدها عليج ..

فاطمة الزهراء :: لاا ابو التقي اكضب الكاع واتهدة هي وزوجها يتصافون لا تدخل ولا تحجي وي واحد

- بس عمة ماتسمعين ؟

- اشش علي السجاد حتى لو تبقى هي وزوجها كلشي ابيناتهم مالنا غرض نحن

سكت علي السجاد ودنك راسة لان مامتعود يحط عينة بعيني ويجادلني

بنفس الوقت اخذت أيد غدير الله وصرت احجي وياها ...

فاطمة الزهراء :: اسمعيني غيمة مو كل وحدة اتزوجت يعني هي تكدر تأسس بيت وعائلة وتطلع جيل متماسك ومتكامل لااا يعني جاي نشوف ياما بنات يتزوجون وعلى حبب هاا ويكون حبهم دام اسنين بس لمن يتزوجون مايطول زواجهم الشهر المشكلة هنا وين متكاملة ؟

شفت غدير الله ركزت وياي حتى علي السجاد رفع راسة وصار يراقب كلامي بأنتباه
وهنا أردفت وياي غدير الله ..

غدير الله :: وين المشكلة ؟

علي السجاد :: بالزلمة المشكلة لأنة عديم المسؤلية لو يتزوج وهو مامكون نفسة

فاطمة الزهراء :: لا يمة مو بس بالزلمة نشوف اكو بيوت صح الزلم بيها كاعدين وما مهتمين لمسؤولياتهم بس البيت تشوفة متماسك لأن خلف الرجال عديم المسؤلية مرة عظيمة تركض بأيديها ورجليها خاطر تبقى أعمدة بيتها صامدة والعكس موجود تلكي بيت بي رجال ماخذ دورة ودور مرتة ومتحمل كلشي وصابر عليها لجل بيتة

غدير الله :: مافهمت چا وين المشكلة ؟

- مشكلتهم مثل مشكلتج هسة وحدتهن من كلمة ولج تتحسس وتضوج واكو يطلبن الطلاك لان بنات هذا الجيل حيل مهملات وحتى الزلم بهذا الوقت حيل صايرين افهى من النسوان

غدير الله :: بس اني ماراح اوصل مرحلة اطلب الطلاك من أنمار لان هيج يسوي وياي

- حتى لو ضوجتج وتفكيرج هذا مالة داعي ومن البداية جان مالازم تكبرين هذا الموضوع وتنطينة أكبر من حجمة ومخليتة ياخذ حيز من راسج الجميل وتفكرين بي ..

علي السجاد :: يعني عمة هسة سالفتج هي كلها بس لان غيمة سولفت على رچلها ؟

- اي اني حبيت اسولفها وخليها تعرف مادام تزوجت وروحهَ ارتبطت بروح غريبة لازم تتعايش وياهَ وتتحملين كلشي هي وحدة من الأثنين لو تهملين رچلج وبيتج وتكعدين وتخلين رجل على رجل وتخلينة هو يسوي كلشي بس بالمقابل توكعين من عينة وشحدچ تحجين وياه راح يكلج اخذي دورج بالبيت بعدين احجي يصير حتى خيانة يخونج وجدام عينج وأنتِ العليچ تلصمين وتسكتين
اوو
لاا تصيرين أنتِ الكل بالكل ابيتج وتصيرين انتِ الزوجة وانتِ الأم وانتِ خيمة البيت وعمودة المستند علية الخيمة صدكيني راح يصير هوة مايكدر يحجي وياج واذا سواها وحجى يحق الج تكومين وتحطين أيدج بنص عينة وتفضحينة فضيحة ..

ضحك علي السجاد وصار يباوعلي ويباوع لأختة .. الي ابتسمت وكالت ...

غدير الله :: والله اني مكفية و موفية ابيتي وحتى من جنت حامل رغم الحمل وشلعان الگلب يجي انمار ما يلكى مني غير الگلمة الطيبة والضحكة الصافية

علي السجاد :: چا هاي هي اذا غلط وياچ لو زعلج دووسي ابطنة وتعااي حطي روحج ورانة ونحن نكمل عنج نلزمة ونكطعة الج ..

فاطمة الزهراء :: هههه شنهي ناويهااا علية ابو التقي ترى نسيبك وحامي عرضك لا تحقد علية هيجي ..

علي السجاد :: اني لا حاقد ولا ناوي بس اليگرب اختي حفرة عميچة واشمرة بيها وانعل سلفى سلفاه

غدير الله :: يمعودين كافي الوضع صار حار ذوانمار أمبين مامنة جية واني ميتة من الچوع ..

علي السجاد :: يخسي الجوع شنو تردين اجيب الج مشتهية شيء معين .

- ماكو شيء معين حبيبي كلشي أكل اهم شي شيء ينحط بالحلك وينعلس حتى لو طين ..

علي السجاد :: راح انزل للمطعم اشوف شعندة واجي الكم ..

- اني راجعة للبيت لا تحسب احسابي ..

غدير الله :: بعدني ما شابعة منچ وين تردين ؟

- عايفة وَهج الطف لوحدها بالبيت بالي يمها لازم اروح الها ماكدر اتاخر

غدير الله :: اني اطللع واعلمكمم

- هههه ونحن ننتضرج تطلعين وتسبينا سبي

علي السجاد :: عمة اذا ترحين اني اوصلج بطريقي

- خوش .. تعاي يمة ابوسج بالج لنفسج يابعد عمتج ..

غدير الله :: وصلي سلامي لوَهج الطف

- واصل يابعد چبدي

ودعت غدير الله وطلعت
واني امشي بالممر ماعجبني وصع غدير الله حيل

اخذت وأردفت وي علي السجاد

- لشوكت راح يضل وضع غيمة هيچ ؟؟

علي السجاد :: شبي وضعها !

- شنهي شبية ؟ سجاد اختك نايمة هنا وماتدري اختها برة انهتك سترها ويردون يكتلوها وهسة هي متهچولة من ديرة لديرة .

- اول وتالي راح تعرف بس مو هسة لمن تطلع وتجي للبيت خلها تعرف بالبيت ولا تعرف هنا

- واني اشوف الأحسن هسة تعرف شما تأخرنة شما راح ينفطر كلبها

- موش زين عليها هساع ماصدكنا حالتها استقرت تردين تدهور بهي السالفة لاا عمة بعدين تعرف وشما تزعل خلها تزعل المهم صحتها ..

انا هنا همست وي نفسي بصوتت نااصيي حيل

- هسة انا انشلش بطركاعة عبد الحسن لو انشلش بسالفة غدير الله واذا عرفت ؟

هنا علي السجاد سمع همسي وحجة وياي ..

- شني عمة شمالج توشوشين احجي بصوت عالِ

- ماكو شيء عمة بس عاتبت حضي كفارة يا ذنب نحن سويناه خاطر يصير بينا هيجي

- انتِ كلتيها الجاي يصير بينا كفارة ذنب من أذنوبنا الله وحدة اعلم خليها ورة الله وهسة صلي على النبي أعظم المصائب تنحل وتنفرج بالصلاة على النبي

- اللهم صلِ على مُحمد وآل مُحمد

كملنا طريقنا ووصلني للبيت ودعتة ونزلت من السيارة طلعت مفاتيح البيت من جُنطتي ردت افتح الباب لگيت الباب مفتوح ..

دفعت الباب ودخلت لكيت باب الإستقبال متشرع على كُبرة
شمرت كلشي من أيدي ودخلت أركض لكيت كلشي على حطة أيدي

ماكو شيء متحرك بِـ الأستقبال صعدت اركض لفوك لكيت باب غرفة وَهج الطف مفتوح فتت وأردفت وي نفسي

فاطمة الزهراء :: يمةة بنتييي وهج الطف !!!!!!!! يمةة عزيزة روح اخوي

نزلت أركض واني ادور على تلفوني اتصل واشوف چارة بهي المصيبة !!

______________________★______________________

""""" طيــبـة الــزهراء """""

كعدنا اني والعلوية وأمي وأم البنين بالصالة نتسامر
ودخل علينا علي الرضا يريد يصعد لغرفتة
و سلم علينة على الماشي ...

علي الرضا :: السلام عليكم ؟

العلوية :: اوكف اوكف يرووح امك وين رايح عوود ؟؟؟

- صاعد لغرفتي وين رايح يعني!

أم رحمة :: لا يروح أمك عوف الحجرة مالتك وابوجه‍ك للمطبخ

- شني ؟ وشعندي بالمطبخ ؟

العلوية :: ينتضرك العچين على الطبلة يلا شنك واخبز من زمان علي السجاد عاچنة .

أم البنين :: اي والله روضي نريد خبزة حارة على الغدة بعد ايدي ايدك ..

- تردون مني اطلع بهي الضهرية واخبز بهي الشمس وهم وي حرارة التنور والنار ؟

العلوية :: بعد هي مشكلتك مادام علي الباقر ما موجود انتَ تخبز ابدالة مو حضرتك تريد تاكل وتنام وتمسح ايدك بالحايط ..

- يمةة جوقة نسوان عندچ شني ترديني انا اخبز ؟

ام رحمة :: وهذا الشغل لزلم يعني تريد بنين لو اني لو اختك طيبة نوكف بالشمس ونخبز ؟ تقبلهاا على نفسك يعني ؟

- لا اله الا الله

العلوية:: كلشخص هناا بالبيت يسوي شغلة وهو ساكت لا تضل تتأفف ماتريد تخبز عادي ابوچهك للحمام اغسل ملابسك وملابس اخوانك بناتي تعبت ايديهن وغسلن ملابسهن مو خدم هن هنانة لازم يطبخن الكم وينضفن ويمسحن ويغسلن ..

- أمرييي لله شسووي !!! بنانة كومي جيبيلي صينية الطحين والحكيني للمطبخ

العلوية :: لااا محد تساعدك شغلك أنتَ سوي مو متعود تسخر جيب صينية الطحين لنفسك وبالك ثم بالك تطيح ذرة طحين بالكاع اخليك تغسل المطبخ كلة لأن علي الهادي هستوة خلص تنضيفة وطلع

- تدليين ياالست الوالدة اوامرج طلبات ..

عافنة علي الرضا وراح للمطبخ وهنا أمي حجت وي العلوية

أم رحمة :: بس ترى صدك خطية علية راح يخبز بالشمس خلي وحدة من البنات تسحب التنور والقنينة للحديقة الخلفية خلي يخبز بالفي ابرد الة

ام البنين :: اي والله هسة اسويها الة واحولهن لهناك ..

رادت تكوم أم البنين لزمت ايدها العلوية وكعدتها وأردفت وياها ..

العلوية :: أنتِ متزوجة مو زين على بطنچ اكعدي وهيدي ..

ام رحمة :: صح طيبات يمة كومي أنتِ حوليهن

ام البنين :: شنو الفرق يعني ؟

- اسمعي كلام العلوية واكضبي نفسج واسكتي مو زين على الرحم تشيلين شيء ثچيل ..

بقيت اباوع عليهنن وكسرت رگبتي وسولفتت وي أمي ..

طيبة الزهراء :: وهااا تضحين بية ؟؟؟

العلوية :: هههه شنضحي بيج ولج عود من تتزوجين هم ما نخليج تشيلين شيء

- بعديشش راح تطيحون حضي من هسة اروح للرچال بس گفر ..

بقن يضحكن وامي ضربتني على راسي واردفت وياي ..

ام رحمة :: ولجج روحيي سوي الكتلج علية وارجعي اقري ولا تحجين هيج اسوالف اكبر منجج ..

العلوية :: يااا ازهار شمالج عوفي البنية جاي تحجي ويانة وماخذة راحتهاا لا تتعاملين وياها هيج ..

- اي والله خالة احجي وياها حسرة علية احجي احجاية ..

ام رحمة :: لاا يختي لا تتعود يصير عدها عادي تحجي هيج كدام العالم

- ياا عالم هي جاي احجي بس يمكم لا طالعة ولا شايفة الشارع من مهد المدرسةة متندمة لان جنت اطلب العطلة !!!!

العلوية :: ياهيي ما شايفة الشارع من مهد المدرسةة ؟؟؟ يمةةةة طيبة ما عرفتج ولج منوو يكول 24س هايتة من بيت لبيت هااا

- كلمة التنكاالل خالة لا تصيرين ضددييي

العلوية :: هاا صح ههه ايييي ازهاار بعد لا تحجين وي طيبات شتريد تحجي خلها تحجي براحتهاا ..

ام رحمة :: صايرة تدافعيلها خيرجج ؟؟

العلوية :: هههه چَنتي بالمُستقبل شلون ما ادفع الهاا غير امرية اوليدي ..

بقيت صافنة على خالتيي وحسيت روحي صخنت ..
بسرعة عفتهن وكمت رحت لطارمة الامامية وسحبت التنور للحديقة الخلفية

واني افكر معقولة علي الباقر محاجي أمة بموضوعنا ؟
جا شلون تحجي هيج كدام امي وبثقة يعني تريد تخطبني الة اي اكييد ..
يجي علي الباقر وافهم منة ماكدر احجي وي خالتي

رجعت سحبت دبة الغار وحطيتها شوي غادي عن التنور ورحت شگلت المنظم علية لان اعرف علي الرضا مايعرف يشكلة

رجعت فتت ولكيت العلويات يضحكن فكرت على سالفتي بس لاحضت مغيرات الموضوع كعدت يمهن وأردفت وياهن ..

طيبة الزهراء :: كاعدين تضحكون ضحكوني وياكم ؟

ام رحمة :: ماكو شيء بس ام البنين كالتلي اندعيلي يصير عندي طفل ومتت من الضحك تريد مني اندعيلها ..ماتدري اني لبناتي ما اندعي ..

ام البنين :: چا عمة انتِ مو علوية شنيي ما تندعين ؟

العلوية :: ولج بنانة أزهار تخاف عليچ ما تعرفين شنو يصير اذا هي اندعت

- خير يمة شنو يصير اذا اندعيتي ؟

ام رحمة :: خليها سكتةة واستري علية هههههه

العلوية :: اسولف الكم بأيام زمان لمن سناء بنت جيرانة طلبت نندعي الها

ام رحمة :: لااا علوية اسكتييي واستريي علية الله يستر عليج اششش

- ههههه لا خالةة فدووة احجي يمةة عوفيهاا اريد اعرف شنو صار خالة احجي

ام البنين :: ايي عمة فدووة احجي شنو ؟؟

العلوية :: هاا ازهاار احجي ؟ ههههههه

ام رحمة :: احجيي خليتي بيهاا سر انتِ .

- احجي خالة معليج بَ أمي

العلوية :: هههههه هاي قبل لا نتزوج تعرفن انتن ان انا وأم البشير قيصر اتزوجنا بنفس اليوم وبعدنا بأربع سنوات رجع عمي السيد احمد وخطب ازهار لسيد الحسن المجتبى . فا هذا الحدث صار لمن جنا اني واسراء مخطوبات

ام البنين :: زين

العلوية :: جنا نحن الثلاثة ( العلوية : ام رحمة ؛ ام البشير )
كاعدين يم أمي ودخلت علينة سناء بنت الجيران لان جانت امي معروفة بالمنطقة بالجاه تندعي ما ينرد دعائها

طيبة الزهراء :: زين اجتكم تريد دعاء

العلوية :: بالضبطط البنت جانت تريد تتزوج دخلت وكعدت يمنا وكالت لأمي اندعيتي لبناتج وهسة هن الاثنين مخطوباات لاخوان سادة اريد تندعيلي بلگي تنفتح قسمتي ويجيني الزلمة الزين ..

طيبة الزهراء :: ههههه دامها طلبت من جدتي شدخل أمي بالنص ؟

أم رحمة :: لان امچ ما تبلع السانها وتلصم وتسكت لااا شلون الا تسمع حسهااا

ام البنين :: كملي عمة شنو صار وراها ؟

العلوية :: ايي طلبت من أمي تندعي الها هناا ازهار اتليگفت واندعت للمرة امي من شافت ازهار اندعت من گلب ورب سكتت وماحجت وسناء فرحت كامت وطلعت وهية اسبووع بس سمعنا بيها خطبت

ام البنين :: ياالله من حلكچ الدعوة لباب السماء يا عمة هههه

طيبة الزهراء :: ايي حلوو استجاب الدعاء چا شبيج يمة ؟

ام رحمة :: خلي تكمل السالفة ..

العلوية :: نحن هنا فرحنا وامنة وصرنا نكول ازهار من بعد امي دعائها ما مردود
ومن أجت سناء النا سألناها على الخطيب
طلعت المكرودة بعد دعاء ازهار اسبوع بس بهذا الاسبوع اتقدم الها الي بعمر ابوها
واتقدم الها الاعمى واخر شي اجاها المعوق وهو الخطيب مالتها

ام البنين :: لا اله الا الله كلهم جمعتهم هذول ؟

طيبة الزهراء :: هي امي لو مخليها تشد حيلها ذاك اليوم بالدعاء چان حتى الميت من الااف السننين طلع نفط من گبرة واتقدم للمگرودة هههههه ..

ام البنين :: ههههههه ايي والله جان طلعلها موميااء

العلوية :: ولكم ومن ذاك اليوم وهي ماداعية لواحد الها ما تندعي ..

ام رحمة :: اي والله والمشكلة همزين اجت وكالت النا لان اتحمست من انخطبت وردت اندعي لروحي بس سترت على نفسي وسكتت ما تشوفن انرزقت الحسن المجتبى ..

طيبة الزهراء :: بس ورطتي المسكينة !!

- قسمتهاا هاي شعلية اني ..

العلوية :: ايي صحيح قسمتها يبعد اختج

ام البنين :: صحيح عمة ما سألتكم اني انتم ثلاث اخوات جدي احمد شلون خطبكم لأولادة هيج تقليدي ؟

العلوية :: هم مو غربة ترى عمي احمد يصير أبن خال ابوي لمن راد يزوج عبد الحسن وصفاء الحسن طلعنة احنا ابالة لأن جنا أكبار نصلح للزواج اجة وخطبني لعبد الحسن لان اني الجبيرة وهو جبير وخطب اختي اسراء الوسطانية لصفاء الحسن
وبوقت العرس الاخت هنااا شافت الحسن المجتبى وطاحت بي وهو هم انعجب بيها بس جانت صغيرة انتضرها السيد أربع اسنين
اني صار عندي علي السجاد و علي الباقر وبوقتها جنت حامل
بِ علي الصادق و علي الكاظم
واسراء جانت عدها البشير قيصر و حامل بالفاروق الاعظم
يالله عمي احمد خطب ازهار للحسن المجتبى واتزوجوه

طيبة الزهراء :: يعني بس امي اتزوجت عن حُب ابينكم ..

ام رحمة :: ايي بس حُب نضيف چان مو حبكم مال هذا الوقت ابدال ما تكلة دز اهلك كاضينها دزيلي صورتچ شهلجمال اريد اسمع صوتك تعالي كامرة ..
السيد انتضرني أربع سنوات وهو شافني بس بالعرس ومو شوفة شوفة بس لمحني لا حجة وياي ولا شافني مرة ثانية بس بوقت العرس كالي
" لا تتزوجين انتضريني اتخرج "

أم البنين :: زين هو شكد جان عمرچ حتى انتضر أربع سنوات ؟

العلوية :: الحسن المجتبى جان عمرة 21 و ازهار جانت 16 وابوي عندة قاعدة البنت ما تتزوج الا تعبر الـ 20 لهذا انتضر هي تصير بعمر مناسب وهو يتخرج ..

طيبة الزهراء :: زين خالة انتم شكد جان عمركم من تزوجتو ؟

العلوية :: عبد الحسن جان عمرة 25سنة واني 23سنة
وصفاء الحسن جان عمرة بعمري 23سنة .. واسراء جانت 21سنة

ام البنين :: كلش حلوة اعماركم كلكم متقاربين .

أم رحمة :: ايي جانو متوالمين حيل

طيبة الزهراء :: زين خالة شلون عشتي وي عمي عبد الحسن اندمچتي وياه بسرعة لو تعذبتي يعني هو هسة صار هيج صعب لو من زمان ؟

ام رحمة :: وين اندمجت غير جانت كل يومين تجينا زعلانة لان اضلوعها متكسرة من الضرب !!

ام البنين :: عززةة ! وجنتِ ترجعين الة ؟

العلوية :: جنت اني حيل مدللة ابوي وعبد الحسن جان كلش صعب بالتعامل بداية زواجنا اتعذبت وياه عذااب بس الله يدري بي جنت حيل اكسر كلامة وبدون قصد وهو يضربني واروح زعلانة لهلي ويجي يضحك على عقلي ويرجعني واتخيلن جان يرجع يضربني ان ليش رحت لهلي زعلانة جان يريدني انضرب واكل تبن واسكت
وبعد زواجي بِ سنة اختي صار عدها البشير اني بعدها بخمس اشهور جبت علي السجاد ورجعت ريمة لحالتها القديمة عصبيتة وضربة الي وابد ما خاف من حوبتي ولا يكلك اني علوية ماكو صار علي السجاد عمرة سبع اشهور حبلت بِ علي الباقر وكذالك لزم روحة عني مو لسواد عيوني لا جان يريدني اجيب ابنة بخير وسلامة واني شيصير بية خلي يصير اهم شيء ابنة
وجبت علي الباقر وجبرني اترك الجامعة وصرت خدامة الة وأم اكثر من حنونة لأطفالي رغم هو جان يدري بية اني متربية بيا حضن وشلون جنت مدللة ضوة الشمس جان ما يتجرء يطخ وجهي ورغم هذا بسبب اعصابة دمرني
لهسة اتذكر لمن هو جان مانعني اشوف اهلي ولحد ماصار عرس ازهار يالله كدرت اروح وجنت ما اجيهم الا زعلانة ..
وجان لمن يشوفني ابوي يسألني منو انتِ !!
اكثر شيء جااان يقهرني ابوي الي هو ابوي ماكدر يتعرف علية منكثر ما متغيرة من ضيم عبد الحسن ..
وكضيتها هيج وياه علمود اولادي الجنت ما ارتاح من واحد احبل بالثاني حتى اتخلص من ضرب عبد الحسن لان جان يلزم روحة وياي بس من احبل وبقيت هيج
لحد ما سطرتهم عود سند الي لكبرتي
وهاي كبرت وصرت اشوف شلون السبحة الي كضيت عمري اجمع الخرز بيها شلون انگطع خيطها وصارت توكعلي خرزة ورة خرزة صرت اشوف شلون تعب عمري يتطشرون كدامي وماكدر اسوي شيء !!

طيبة الزهراء :: لو اني منچ من اليوم الي رجعني بي ورجع ضربني اعوفة واطلك وانعل العيشة وي هيج زلمة مو صاحي ..

أم رحمة :: ماكو هيج حجي قبل ماكو عدهم بنت تزعل بنت تطلك ما تشوفين لمن اجت زعلانة ابوي رجعها وحتى جانت لمن ما تسير ولا تتصل ولا نسمع صوتها ابوي جان ساكت لان مقتنع مادامها تزوجت خلص طلعت من ذمتة ومالة دخل بيها .

ام البنين :: شلون مالة دخل بيها يعني عادي يشوف بنتة تنضرب وتنهان ويضل ساكت والله العظيم لو علي الهادي نبرة صوتة يرفعها ابوجهي انعل ابو الحب لا ابو كلبي لا ابو الززواج افضحة فضيحة احرك البيت علية كلشي والا حد بس انتن لان جنتن تسكتن عن حقجن جانوا هم راكبين على كرامتجن

العلوية:: اتحملت عذاب عبد الحسن لجل بيتي وهاي كبرنا والحمدالله ما يهمني عبد الحسن بكثر ما يهمني اولادي ومستعدة احارب لجلهم .

طيبة الزهراء :: لا خالة متوهمة ماحاربتي علمودهم والدليل
علي الصادق وعلي الكاظم وينهم ؟
اريج الله وين هي ؟
غدير الله وين هي ؟
علي السجاد وينة ؟
اني اكلج عبد الحسن انتِ سكتي الة وقويتي شوكتة
ضيع علي الصادق و علي الكاظم
وضيع أريج الله بهي الدنيا
وضيع غدير الله وعلي السجاد بقرار زواجهم
ضيع اولادجج الي انتِ اتحملتي علمودهم ضيعهم وطشرهم

ولأن العلوية بدت تبجي حضنتها أمي وادرفت ويانة ..

ام رحمة :: كافي بنات كل وحدة تكوم تشوف روحها سدن الموضوع هذا وكومن ياالله ..

تركتهن اني وكمت بست العلوية براسها وصعدت لغرفتي
كعدت ادرس شوي وبعد ما طكت روحي

اخذت التلفون لكيت أدم متصل علية رجعت اتصلت علية لأشوف شنو يريد هذا !
وبعد مارد علية ..

آدم :: ياهلا وغلا ياهلا وسبع الاف هلا

طيبة الزهراء :: خيرك أدم تتصل وماكو خيرك شنو محتاج ؟

- اسف والله بس حيل اشتاقيت وما كدرت الزم روحي اتصلت اشوفج اسمع صوتج .

- ادم لو واحد شايف رقمك شكلة بلة ؟ انتَ تعرف اخبالةاخوي تريدة يرجع يكتلني ويسحب التلفون مني ؟ فگني من شرك الله يخليك

- طيبة ترى حيل مشتاقلج

- مو مشكلتي لا تشتاق رووح هسةة

- شوفي اني راح ارجع واخطبج بِ فرحة الزهراء

- ادم روح

- سمعتيني رااح ارجع واخطبج طيبة !!!

- تمااام رووح يلة ..

سديت التلفون ابوجهة لو ادري ما اتصلت
تعال اخطب خايفة على رجليك راح ارفض بس تعب لروحك والله يالله

بعد ما دخلت للبرنامج واكلب بالفيديوهات صاحتلي امي للأكل نزلت تغدينة
وصرت اضيع وقتي منا ومنا لحد ما صار الليل وخلصنا عشى

صعدت لغرفتي ودخلت سديت الباب ورحت للمكتبة طلعت كتاب " فن اللامبالاة "
وكعدت اقرأ .... ولمن خلصت ورقتين منة صرت اسمع هوسة جاي من جوة

فتحت باب الغرفة وصرت اسمع عدل وعرفت ان علي الباقر والولد وصلو

ما نزلت لجوة ماريد احجي وياه كدام الكل
كعدت بالغرفة ادري هو راح يصعدلي .

بقيت منتضرتة على نار ورجعت اقرا الكتاب ومرت ساعة كاملة لمن مليت كمت لبست الشال وحطيت ايدي على مقبض الباب حتى اروح انفتح الباب

ابتعدت عنة ودخل للغرفة علي الباقر وكف كدامي وأردف وياي

علي الباقر :: أمبين الست طيباات ما مشتاقة إلي ما نزلتي تشوفيني كاعدة هنا ومرتاحة خووش حچي والله

ما لزمت روحي ضحكت وياه دنك هو وباسني بكتفي وابتعد عني
وأردفت وياه

طيبة الزهراء :: شكدد مشتاقتلكك مشتاقة لهذا عطرك وصوتك وشوفتك واخيراً رجعتلي علي الباقر الي اني اعرفة واموت علية !!!
شكد خفت عليك يروح كلبي انتَ اتصل وما ترد علية وأرسل وهم ماكو رد
خليت بالي ينشغل بيك ماتكول عندي طفلة تخاف ويضل بالها يمي ماا تحسس بية ؟؟؟

لزم طرف شالي باسة وشماه وضحك واردف وياي ..

علي الباقر :: بعد هذا الشعور ماريد احس بغيرة .

سحبت شالي من ايدة وصرت اباوع لعيونة
المتحول لونهن من اللون الخضر الى الاحمر من التعب

وامورماات همم حطيت ايدي على خدة
وصرت امشي ايدي على حاجبة وانزل للحيتة

وأردفت وياه ؛

طيبة الزهراء :: تعبان يا شوغات روحي ؟

علي الباقر :: ابشوفتچ طاح التعب كلة

- هم زين

- مشتاقتلي صدك ؟

- چا شمفكر بية ما اشتاق الك ؟

- مادري يمكن آدم ساد مكاني عدل و ماعندج وقت تفكرين وتشتاقين ..

- ترىى كااطعة التواصل وياه

- اوووو صددكك نسسيت صح ما تتوصلين وياه !.

- شنو علي الباقر تشك بية ؟

- لا اعوذ باالله ما اشك بيچ

- كلش وااضح ترى ماعندك ثقة بية ..

- ترى انا واثق بيچ وثقة عمية هم بس ماعندي ثقة بمراهقتچ

- امم ودامك ماعندك ثقة بمراهقتي ليش ما تخلص روحك من هذا الخوف وتخطبني وتكضني ابين احضانك هاا ؟

- راح اخطبچ واتزوجج واخليج تترسين البيت اطفال تشبهج وعلى عين الكل بس بعد وقت ..

- يمتة الوقت يعني ؟؟

- احل موضوع أختي ياالله التفتت لنفسي مُستحيل ازوج وافرح وأريج الله ماموجود

- لكيت شيء عنها ؟

- راح الكة ان شاءالله

- زين هي بخير ؟

- ما اعرف !!

- تمام يا شوغاات كلبي روح نام يروحي امبين تعبان

- ما نايم من إمس

- سودة ابوچهي .

- اسم الله عليچ ابوية

- يلا حبيبي روح نام وارتاح يروحي انتَ

لمن التفت ديريد يطلع رجع باوعلي واردف وياي

طيبة الزهراء :: هاا متريد تروح ؟

- اريد اسألج قبل لا اروح

- اسال ..

- تحبيني ؟

ضحكت ورحت يمة دنك الي ولزم اخدودة وعصرت وجهة بيدي واني اضحك وياه وأردفت وياه

طيبة الزهراء :: ولك انتَ فتحت گلبي وچودرت بس أحبك شني قديمة

ضحك وياي باسني براسي و تركني وطلع سديت الباب
ورحت شمرت نفسي على الفراش

يبوووي على الراحةة والفرحة التصيبني من هذا البني أدم
شكد احبة وارتاح يمة يارربي شلون هيج زرعت حُبة بكلبي ؟

الله يتمم علينة ان شاءالله وتعودلنا أريجاااات بحق الحبيب الولي ..

______________________★______________________

"""""" آريـــچ الله """"""

طلعت من الغرفة مخنوگة حيل بعد ما تركت اهلي
صار عندي عادي امشي بالضلمة واكعد بيها

الضلمة نفسها الجنت من تنطفي الكهرباء ابيتنا أركض
وأشمر روحي بحضن ابوي أو امي هسة لا ما اشمر روحي بحضن احد

اتعلمت اصادقة واتعايش وياه وعرفت ماكو احلا من الضلام صديق هو يخفي ادموعك ويخفي الكسر ويخفي كلشي عن عيون الناس

ينفعني الضلام هوااي خلي تشبع دمع عيوني جانت شابعة من شوفة اخواني لچن جانت نضرات يومية

ابودي اصرخ واصيح ابصووت لچن علية ما ترهم ماريد اهل هاي الديرة يشوفوني شلون ابچي بحركة واتألم ماريدهم يشوفون شيء مني ولا اريد عيونهم تصد الي

صرت امشي بنص الليل أبين البيوت ولكيت مكان شوي غميچ بالقرية جان عبارة عن بيت مهچور ومتفلش نصة ..

دخلت وكعدت جوة وجان مفتوح من كل مكان حتى من السگف مالتة مفتوح نصة
صرت اباوع بالحيطان جانت تفوح منهن ريحة حنية رغم مُكانة بالقرية

بقيت كاعدة وكمية الامان الحسيت بيها بالبيت مو طبيعية

اخذت واني كاعدة قريت سورة يسٰ لان ما بقى شيء للأذان
حسب نضرتي للسماء راح يتفتح الصباح

وبعدها رفعت راسي وغمضت عيوني ورفعت ايداناتي
وقريت دعاء الامام الحُسين ﴿ علية السلام ﴾ يوم عاشوراء
مروي عن سيد الساجدين و زين العابدين الامام علي أبن الحُسين ﴿ عليهم السلام ﴾

آريج الله :: اللهم انتَ ثقتي في كل كرب وانتَ رجائي في كل شدة وانت لي في كل امر نزل بي ثقة وعدة كم من هم يضعف فية الفؤاد وتقل فية الحيلة ويخذل فية الصديق ويشمت فية العدو انزلتة بكَ وشكوتة إليك رغبة مني إليك
عمن سواك ففرجتة عني وكشفتة وكفيتة فأانتَ ولي كل نعمة وصاحب كل حسنة ومنتهى كل رغبة ..

لمن خلصت فتحت عيني ولكيت الجو كشف و الضوة صار يدخل البيت الأنا بي والنسمة الباردة مال الفجر بدت تطري علية

وصرت اشوف الاشياء الحواليني وشفت شلون البيت متفلش أثاثة بالنص وكأن واحد حاط عقلة بهذا البيت وكاعد وداكة دك بالچاگوچ

ولمن صرت اتمعن بالحيطان انتبهت اكو نقش على واحد من الحيطان جان محفور علية أسم جوة أسم وبديت أقرا

- جميــل ، شمـسـة ،
متعب ، كاتر ، حيرام ، ودق ، ڤنر ، شاسع ، منسة ، مماس ، صفاء ، وناس

بقيت صافنة هذا البيت يعوود لأهل داســِم معقول ؟
واذا ما جان هيج شنو يخلي اسماءهم منقوشة على الحايط ؟

واذا يعود الهم ليش هيج امفلش ؟ ومهجور !
شنو مخفي ورا هاي العائلة محد ينولد كافر بهي الوحشية اكيد صاير شيء وي حيرام وخلا يتحول من شخصيتة العادية الى داســِم ..

بس ثواني ثووانييي
جميل و شمسة امبين هم الاب والام
واني التقيت ب جميل ابن متعب يعني لحد الان اني اعرف حيرام و مماس و متعب ومنسة

بس منو هذول المنقوش اسمهم بعد
منو كاتر ؟
منو ودق ؟
منو ڤنر ؟
منو شاسع ؟
منو صفاء ؟
منو وناس ؟

وين هذول ما سمعت بيهم مماس ماجابتلي طاري بس منسة اختها
معقولة ويانة بالقرية ؟ بس ما صح الي اشوفهم او هم ما دحچو روحهم وياي ؟

عقلي كام يوچعني شعلية بيهم اني هسة ؟ اسليمة تگرفهم كلهم نااس تنهدي وتدخل الاسلام وناسس تنغسل وتطلع منة

طلعت من البيت وحاولت ارجع قبل لا يكعد احد لان ماجنت اريد اشوف واحد
واني بطريق جاي امشي

لكن المشي مالتي جان بطريقة هرولة
طلع كدامي من العدم داســـِم !!!!!!!

صاح بية وسمعتت صوتة ...

داسِم :: اووكفيي ..

اختلست ابمكاني واردفت وي نفسي

اريج الله :: بسم الله الرحمٰن الرحيم يارب اذا ناوي اذيتي هذا المخلوق الغريب العجيب رد كيدة بنحرة يا كريم يا سميع ..

اجى داسِم و وكف كدامي وصار يباوع لعيوني
ويباوع لوراي لطريق الإجيت منة
ورد علية ؛

داسِم :: حجيتي شيء ؟

رفعت حواجبي الأثنين وفتحت اعيوني حيل وأردفت وياه بخرعة ..

اريج الله :: مااكوو ماحجييت شييء !!!

كسر رقبتة وركز علية وشكلة حسيتة يكول ما مقتنع ما مقتنع
دخل أيدة بجيبة واردف وياي ..

- وين جنتي ليش اجيتي مناك ؟

اتوترت حيل وحسيت راح تصير وياي مشكلة اذا عرف انا جنت أبيت اهلة
بلعت ريچي وأردفت بصوت يرجف لان اول مرة اجذب بكل عمري ..

- جنت حيل مخنوكة لهذا اجيت افتر منا ومنا لان الكل نايم تعرف اني اتوتر اذا الناس موجودة .

- هنا السالفة .

- ايي واني هسة راجعة لحجرتي ..

عبرتة وردت اروح سمعتة صاحني بأسمي النطاه الي ﴿ آقمار ﴾
التفتت الة وهتفت وياه بِ ( نعم )
رد علية

- اخر مرة احذرج لا تضلين تحوسين بالقرية وماريد اصادفج مرة ثانية هيج مصادفة بهذا المكان ..

بقيت اباوع الة وهو دار وجه عني واتجه للطريق الاجيت منة
انا بلعت اللساني ورحت لحجرتي

وعرضت عن موضوع البيت واذا يعني جانوا ساكنين بالبيت وانتقلوا ماكو اي مشكلة
نزعت حجابي وفلتت شعري وغيرت ملابسي لبست الثياب الحضرتهن ألي مماسة

وصرت اباوع لروحي بالمرايا شعري بلون شعر غيمة ياعمري شكد مشتاقة الها ماصح الي الوقت اشوفها واحضنها واودعها قبل لا أروح !!

ندمانة على كل لحضة جانت بيها اختي كدامي ومارحت وحضنتها او اسولف وياها
اسفة لكل لحضة ضوجتها بيها وزعلتها
لهفانة عليها هواي ..

كمت بعد ماخلصت لف شعري وصرت انضف منا ومنا بالغرفة
واني افكر يا ترى اشكد راح ابقى هنا ؟!

واني جاي إلف بالغطى اندك الباب شمرت الغطى على الفراش
ولبست الحجاب والعباية ( الصاية )

ورحت فتحت الباب وطلعت كدامي مرة جبيرة بس تخوف عيونها بيهن طن گحل
ابتسمت الي ابتسامة صفرة ودفعتني ودخلت لجوة بقيت اباوعلها صارت المرة تباوع بأركان الغرفة ..

وأردفت وياي ...

غيــرة :: اتمنى تكونين مرتاحة بهي الغرفة
بس هم اتمنى ما تكونين مثل صاحبتها القديمة

باوعت الها بأستغراب وهتفت وياها ..

اريج الله :: شنوو منوو حضرتج ؟؟

غيرة :: انا غيرة خالة الكُل هنا واكدر اصير خالتچ أنتِ هم

- اتشرفت بيچ .

اتقربت مني وحطت ايدها على وچهي وأردفت وياي ..

غيرة :: وصلني الكلام ان انتِ فاقده الذاكرة وابن اختي داسِم انطى الچ أسم اقمار

- صحيح لان ما اذكر أسمي

صارت تدقق ابوچهي وهي تتلمسة بأيدها وأردفت وياي

غيرة :: حق لــ داسِم يطلق عليچ " أقمار " لان الجمال الشايلتة فلقة من القمر

كلبي صار يدك دمام ابتعدت عنها وضحكت ابوجها مجاملة
لان تصرفاتها وهيئتها تخرع اخلص من داسِم تطلعلي غيرة !!! شنو مسوية بحياتي خاطر هيج اتعاقب ياربي ؟؟؟؟؟

غيرة :: شوفي داسِم هنا صح الجبير بس هو مِن بعدي لهذا ماريد شيء يصير من خلفي

- ما اسوي شيء اني ماكو كاعدة بس بحجرتي واذا طلعت اكعد بس وي مماس بس هي اعرفنها

- زين واذا تحبين تعالي الي شوفي محد من قبلچ منطيتة هذا التمييز بس انتِ حبيتچ

- اجي شنوو اسوي ؟

- بكيفج تردين اعلمج على الاشياء الاسويهن تردين انطيچ معلومات عن حياتنا تردين اعلمچ تقاليدنا واعلمچ شلون تقتلين عن بعد واخليج تصيرين احسن من داسِم ..
ههههههههه شبيج انخطف لونج لا تخافين كتلج حبيتج ماراح أذيچ

- هاا لاا مابية شيء خالة اذا صار عندي وقت فراغ راح أمر عليچ

- انا هسة رايحة

- الدرب اخضر

عافتني وطلعت طبكت الباب وراهة
وصرت اقرا الايات الحافظة بلكي تحفضني من هي المخاليق ..

اعوذ باالله اعوذ باالله
يارب دخيلك خليني اكدر عليهم ومايكدرون علية يارب انت ادرى بحالي اذا طلعت عيون ابوي راح تصيدني ماكو عندي بس هذا المكان بحق حبيبك مُحمد ياالله استر علية واحميني ..

مسحت ادموعي ورحت كملت ترتيب واتناسى الموقف الوحشية العشت بيهاا

______________________★______________________

﴿ بــــــــعــــــــد ايـــــــــــــــام ﴾

______________________★______________________

"""""" علي الباقر """"""

لبست الدشداشة السوداء اخذت الغترة الخضراء لفيتة على راسي سويتها چرواية واخذت تلفوني وفتحت الباب ونزلت لكيت العلوية والسيد علي الرضا
كاعدين ومنتضريني
اول ما نزلت الهم نهضوا

علي الرضا :: نروح ؟!

علي الباقر :: اطلعونا يلا

العلوية :: أقروأ سورة الفاتحة لأم البنين لتسهيل أمركم وانتم طالعين للشارع

- ان شاءالله يمة ..

طلعت العلوية چدامنا ونحن طلعنا وراها صعدت السيارة وصعد أخوي يمي والعلوية صعدت ورة واول ما شغلت السيارة وطلعت من الكراچ
ونزلت الشارع أردفت العلوية

العلوية :: توكلنا على الحي الذي لا يموت ..

كملت طريقنا ولمن وصلنا المستشفى
اليوم هو خروجية غدير الله ورحنا نچيبها لأن امي تريدها يمها وتداريها

ولمن وكفنا نزلت امي ونزلنا أحنا وصارت تمشي بنصنا وهي لازمة ايدي
ودخلنا ورحنا لغرفة غديرات وأول مادخلنا لكيت الممرضة امجهزتها وجامعة اغراضها .

بعد ما دخلنا وشافتنا اجت وحضنتي اول شي واردفت بحضني ..

غدير الله :: ياالله شكد مشتاقة لريحتك ومشتاقة لحضنك ليش هيچي تچفيني ؟

علي الباقر :: وهي انا اچيتج يا صمامي الرئوي وماراح اعوفچ

رفعت راسها من صدري وراحت حضنت امي وصارت تبجي بحضنها وتعاتبها

غدير الله :: چا يمة هيج تكطعينها وياي ؟ مو تدرين بية هواي محتاجتج !
يمة هواي ردتج وردت اول ما اكعد ابجي بحضنج يمة أذوني هواي واني ما اعرفهم ولا مسوية الهم شيء ذبحوا ابني وكطعو النفس منة قبل لا يجي ويعيش يمةةة

انهارت غدير الله بحضن امي
وامي صارت تبجي وياها واردفت ..

العلوية :: صلي على النبي ماماتي اذكري الله

- ولج يمةة طلعت حامل ببنية يمة فرحت بيها هواي وحلفت ادللها مثل ما دللتوني واربيها مثل ما ربيتوني واحسدها لان راح يصير عدها خوال نفس اخواني
بس يمة خطفو ضحكتي وروحي دخلو السچين ابطني وهم يكولون ؛
" حتى نتأكد الطفل مات "
يمةة عاملوني كأن عدهم ثأر وياي يمةةةة يمةة

انداريت عنهن وصرت ابجي وامسح ادموعي بالغترة
وعلي الرضا بلگوة لازم روحة عسى الموت يلفيني ولا اشوف اخواتي بهذا الحال
وحدة متدودها ومتهچولة
والثانية مكسورة ومدمرة حياتها ..

العلوية :: غيمة بعد چبدي بناتي امسحي ادموعچ يمة واذكري دوم الله ماخلق عبد حتى ينساه صدكيني يمكن انتِ هسة تبجين على بنتچ وتكولين الله حرمني منها بس بالحقيقة يمكن تلكين الله رحمچ منها
شعرفچ راح تطلع خوش يمكن جانت راح تطلع عاق وتعيق كلبج اذكري الله
ولا تنسين دوم كولي الله كريم والحمدالله على كل حال ..

هنا علي الرضا اخذ غيمة حضنها وباسها براسها واردف وياها ..

عل الرضا :: لا تبچين يا بعد عيوني الله يعوضچ بعدال هي الطفلة عشرة لچن أصبري ياحبيبة روح اخوج

غدير الله :: واني متحملة وصابرة لان مطمئنة الله راح يعوضني ويجبر كسري .

العلوية :: اي امي هيج اريدج مؤمنة صابرة على البلاء لا اول وحدة ولا اخر وحدة تسقط وتخسر اول طفل

- صح يمة مو أول وحدة بس محد سبق الها وسقطتت بالطريقة الجحدة هي .

حطيت أيدي على راسها واردفت وياها

علي الباقر :: خلص ابوي أنتِ الصار مكتوب من ربنا الج ولا اعتراض على حكمة لا تسوين هي السوالف ..

رفعت راسها من حضن علي الرضا ومسحت ادموعها واتنفست وارتاحت على الأخر
لان بجت + حجت كلشي مكتوم بصدرها لهذا ارتاحت وصارت تتنوع النا ومبتسمة وأردفت ..

غدير الله :: يلا نروح طك كلبي اريد اتخلص من الريحة والمستشفى

العلوية :: چا غيمة رچلج وينة ما شفتة ؟

- رچلي طالع من الصبح وكال الي اروح وياكم للبيت ومن يفرغ يجي وياخذني

العلوية :: يلا يمة تعالي نطلع اذا هيچي ..

رحت اخذت عبايتها من على السرير ووكفت چدامها ولبستها الها و علي الرضا شال الجنط مالتها وامي عاونتة وطلعوا قبلنا
واني لزمت ايدها وطلعنا ..

ومن صرنا نمشي بالممر لزمت عبايتها واردفت وياي ..

غدير الله :: أبا الحسن

- نحرة وصمام گلبة

- شعجب ابوي ما أجى وياكم وهم ترى ابد ما زارني بس من صحيت شفتة

بقيت صافن عليها وساكت شأكول ؟ الها شأرد عليها ؟

ابوها التنتضرة يريد يذبح اختها الوحيدة .
ابوها التريدة يجي نفسه الاختها انهزمت منة ؟

رجعت واردفت وياي ...

غدير الله :: خير سكتت صاير شيء ؟؟

ابتسمت تسليك وايدي حضنتها من ظهرها
وايدي الثانية لزمت ايدها واردفت وياها

علي الباقر :: شنو صاير يعني ؟ ماكو مشكلة بس عبد الحسن وانتِ تعرفينة وي الشيخ محمد وملتهي
بس اكيد راح نلكي بالبيت منتضرچ ..

ماردت على كلامي وكملنا طريقنا وصعدتها بالسيارة
صعدت يم امي واني رحت وصعدت وشغلت السيارة ورحت للبيت

واول ما وصلنا نزل علي الرضا وفتح الباب ونزلهن وعلى خيالة فاتت البيت امي واختي واني دخلت وراهن

ولكيت الكل منتضرها واول ما دخلن راحت خالتي وحضنتها وصار يرحبون بيها

ماكدرنا نسوي حفلة ولا استقبال الها لان شهر محرم الحرام
بينا وبعد ماكعدت أردفت وهي تباوع بينا

غدير الله :: چا شنهي اريج الله وينهي ليش ما موچودة ؟ وابوي هم وينة ؟

علي الهادي :: اريج الله راحت وي الميرزا حامِد المتقين للبصرة لان عدها طلبية توصيل

- ومن يمتاا اختي اريج هي التوصل طلباتها ؟

ام البنين :: مو خوة الطلبية هواي وهي ركزت توصل لهلهة على الوقت لهذا راحت الصبح

علي الهادي :: وهي ماتعرف انتِ راح تطلعين ..

- زين هسة اريج الله اختي وي الميرزا بالبصرة فهمتها
ابوي وينة لا للمستشفى أجى ولا اتلكاني هناا ؟؟؟

ام رحمة :: غديرات ابوچ عندة شغل وهم هو ما يعرف بيچ طلعتي لأن علي الباقر على غفلة مساع كام وكال راح اروح اخرج غدير من المستشفى حتى ما لحكنه نسويلج شيء ..

- ماريد تسوولي شيء بس على الاقل اتصلو علية ميكلف ترى !!

صار الكل يتصفن ابوجه الثاني لحد ما
أمي انقذت الموقف وحجت وي طيبة الزهراء

العلوية :: يمة طيبة صعدي غديرة لغرفتها خلها ترتاح ..

- لاا اكعدي طيبة ما يحتاچ اني راح اصعد برجلية ... تضل يمكم العافية

عافتنا غدير الله وصعدت لفوك
واردف ويانة علي السجاد ::

علي السجاد :: لشوكت راح نضل هيج نجذب على غيمة جانت بالمستشفى ونكول بعيدة هسة هي بنصنا ! خلص لازم تعرف

العلوية :: راح تعرف بس مو اليوم

علي السجاد :: شوكتت كل يوم تكولون مو اليوم على الأقل هسة تعرف منكم ولا تخلوها تعرف من غيركم ..

علي الباقر :: ما صدكت على الله طلعت ومشت على طولها ترتاح اليومين هي واني اصعد الها وتعرف مني .

ام البنين :: صح وضع غدير الله ما يسمح الها نضغط على روحها خلونا ندبرها وياها هسة والله كريم لباچر ..

علي السجاد :: انتم جاي تصعبون الأمور خلو غيمة واحجو وياها وهي جبيرة و واعية وراح تعرف وتفهم ومو بس هي مكسورة واحدنا كسرة اكبر من الثاني

علي الباقر :: ابا التقي كافي غيمة اذا راح تعرف راح تعرف مني ومنا لذاك الوقت لا ينفتح الموضوع

علي الهادي :: علي الباقر السالفة مو سالفة بنت جيران حتى نكدر نسدها لو غيمة تنساها السالفة تخص اختنا يعني لا تنسى لا تنسد
وكل ساعة غيمة راح تكول شوكت تجي اتصلوا عليها وهيج انتم جاي توترونها لان راح تحس اكو شيء مو غبية هي ..

طيبة الزهراء :: المصيبة تبقى مصيبة اذا عرفت اليوم لو باجر التأخير والوقت ماراح يخفف من شدتها ..

العلوية :: كلام طيبات صحيح شما تتأخرون تبقى نفس صدمتها ونفس وچعتها

علي الباقر :: صح تبقى نفسها المصيبة بس غدير راح تصير اقوة خلها لمن ترتاح واحجي وياها

علي الرضا :: خلها تسمع منك احسن أنتَ تعرف تتصرف وي غيمة

- هوو هيچ لا تفكرون بيها بعد يمي ..

العلوية :: الله يفرج هذا الكرب الله يحلها النا يارب العالمين بحق محمد وآل محمد ان تصلي على محمد وال محمد وأن تشرح صدر اولادي وتيسر الهم وتفرج هذا الهم والغم عننا برحمتك يا ارحم الراحمين ..

بقينا چاعدين وحاولت اتصل على ابوي بس ما رد علية !!

رجعت واتصلت على انمار وطلع مغلق !!!

غلقت الاتصال ودخلت على الرسائل ورجعت أقرأ رسالة أريج الله للمرة المليون حفضتها على كلبي من كد ما قريتها

ومع ذالك رجعت وقريتها وكلبي يتفطر عليها اتصلت على الرقم طلع مغلق
وبقيت منتضر هي تتواصل مثل مكالت .. بس راسي جان يفتر وين هي معقولة صدك بخير ؟ شوكت راح ترجع شلون راح نحل هي المصيبة ؟ شلوون شلون

______________________★______________________

"""""" لــــــيــــنـــا """"""

طلعت من الغرفة لكيت غدير الله هستوها صعدت رحت كدامها وأردفت وياها

لينا :: الحمدالله على السلامة ؟

غدير الله :: الله يسلمچ عيني ؟!

ضحكت ابوجها وماادري ليش خطر على بالي اغثها

لأن جوابها الي جان من ورة خشمها رغم تعبها وطلعتها من المستشفى بس بعدهي تمشي وتكول يا أرض شدي محد كدي

غدير الله :: تعبانة ورايحة ارتاح اشوفچ بعدين ..

لينا :: جان بخاطري أكول الج الله يعوضچ بس الحمدالله على كُل حال لا تيأسين هواي عندچ طرق تخليچ تصيرين أم ..

رادت تروح ولمن سمعتني وكفت واندارت الي وأردفت وياي برفعة حاجب !!

غدير الله :: شنو گلتي ؟

حطيت ايدي على كتفها وسويت الها الملامح الحزينة ..

لينا :: حبيبتي غديرة لا تفكرين ان خلص بعد ما يتحقق حلمچ وتصيرين ام صح الحادث أثر عليچ بس ثقي انمار ماراح يتخلى عنچ رغم كل رجال زوجتة مايصير عدها اطفال بعد يحق الة يهجرها ويطلكها او يتزوج عليها بس اخوي مو هيج فا لا تخافين

انطتني ابوجها ملامح الاستفهام وهتفت ابوجهي بنتر ..

غدير الله :: شكاعد تحچين !؟ ترى كُلش مالي خلگچ .

- جنت اتمنى الاحجي خيال لان كلش يهمني مُستقبل اخوي ومنى عيوني اشوف اولادة بس شنكول !!

- شوفي لينا اذا عاجبج تبلشين من هسة وتردين تغيضيني وعيونج ماراح تستفادين شيء ومااصدك كلامج ولا اغتاض ابد ..

دارت وجها لتروح عني ابتسمت وهتفت وياها ..

لينا :: تمام لا صدكيني بس جربي انزلي لهلچ هسة وسأليهم شنو صار بيچ من بعد الحادث وشنو انطاچ اضرار على الرحم !!؟
وبدربچ اسأليهم اخيتج أريج الله وينها وليش ابوچ يريد يذبحها

حجيت وياها هذا الكلام ورحت دخلت غرفتي وما اهتميت شنو راح يصير جوة اخذت
تلفوني وفتحت الرسائل لكيت رسالة من أبوي " قصطير "

يطلب مني ارجع واعوف السادة لان انتهى كُلشي !!

صرت اباوع لصور زواجنا اني وعلي السجاد وعيوني راحن لأطفالي شنو راح اسوي هسة اعوف اطفالي وزوجي وارجع لأبوي ؟

لو اعوف أبوي وابقى على حطة ايدي هي بس علي السجاد بدأ يشك بية اذا اتأكد من شكة راح يكلب الكون !!!!

بس مااكدر اترك بيتي كلبي وروحب صارت لهذا السيد
ليش صرت احبة اني جاية لهنا حتى ادمرهم مو حتى احب واعشق !

مااكدر اصلح شيء بعد ولا اكدر ارجع الراح ماي وتبدة شيرجعة ؟

السادة هم المسؤوليين عن كلشي بالسابق كتلو اهلي وحرموني وهسة حبيت واحد منهم وراح يكسر قلبي

شلون فكرت اني شنو گلت لروحي ؟ بلة من حبيت شيعي كاتل اهلي .

والله لو اشعل نار واحط الشيعة كلهم بيها ماراح يرتاح كلبي ولا يشفى غليلي

للحضة حسيت الحزن والقلق اختفى من كلبي
وبدأ نار الثأر والانتقام تشعل بية ما اكتفيت بالسويتة اريد اسوي بعد ..

شنووو هذاا التناقض البية ساعة ماريد اتركهم واريد ابقى هنا
وساعى رجعت واشتعلت منهم واريد اشعلهم ..

يارب هذا الجاي اسوي صحيح ؟؟

اذا صح وفقني بي واسترني واذا لاا خليني اتحااسب على كُلشي سويتة

هنا بجت نور الزهراء عزيزة قلب ابوها
رحت وشلتها بسرعة لا تكعد اخوانها وصرت انهد الها

وبعدها كعدت على الجرباية فكيت أكماطها وكعدت ارضعها حليب طبيعي

وبقيت بدوامة افكر ....

اعوف بيتي واطفالي والحگ ابوي !!

لووو

اعوف ابوي واضل وي زوجي واطفالي

وهنا صرت أسمع اصياح غدير الله من جوة جاي
ابتسمت ودنكت العب بخدود طفلتي

تستاهل غدير الله كُلشي يچرالها محد عتب عليها وكللها تحط راسها براسي !!

______________________★______________________

"""""" غَـــدير الله """"""

سمعت كلام لينا وانخطف لوني وكلبي
اخذت التلفون واتصلت على أريج الله طلع مغلق

اتصلت على انمار كذالك طلعلي مغلق !

نزلت لجوة لكيت الكل نفس حطتهم
شافتني العلوية واردفت وياي

العلوية :: هاا يمة غديرات ليش نزلتي ؟؟

ما رديت عليها وكملت نزلتي بالباية الاخيرة ووكفت كدامهم مثل الجسد بدون روح

ام البنين :: خيتي غدير بيچ شيء ؟ يوجعج شيء سولفيي خية ؟؟؟

كامت الي ام البنين ولزمت ايدي وصارت تحجي
وخرت عنها ورحت كعدت كدامهم واردف وياي علي السجاد و علي الهادي

علي السجاد :: غيمة قزح عيوني خيرچ ؟

علي الهادي :: توج شحلاتج شكلب حالچ ؟ ليش هيج انخطف لونج

علي الرضا :: اختي تاج راسي تردين نرجع للمستشفى تحسين روحچ بعدچ تعبانة ؟؟

طيبة الزهراء :: ياا هاي شمالچ غدير احجي شييء شكو بس صافنة ارواحنا شكفتيها !!!!

وي كلامهم واني بس اسمع وصافنة حتى بدون ما ارمش حرفياً جنت ميتة بدون روح بس هيج شكلياً كاعدة
نترت بية خالتي ..

ام رحمة :: شمالچ غيمةة ؟ سولفي شنو صابچ السانج وين راح بلعتي لو نسيتي شلون تحجي ؟

كذالك بقيت ساكتة وما رديت عليها
لحد ما اردف وياي علي الباقر

علي الباقر :: بناتي غديراتي .

رفعت عيني واتنوعت لعيون علي الباقر وأردفت وياه

غدير الله :: هاا بوية !

- شمالچ يا نحري ؟

ما سيطرت على نفسي نزلت ادموعي مسحتهن ورفعت راسي وحجيت وياهم

غدير الله :: 19 سنة واني عايشة هناا 19 سنة واني مو بس بنت العلوية والسيد عبد الحسن لاااا اني جنت بنتج يا خالة وجنت بنت عمتي وبنت اريج الله وبنت رحمة الزهراء وجنت بنت عمامي وبنتك يا علي السجاد !
وهم جنت روحك ونحرك وغالية كلبك يا علي الباقر
بعمري ما جذبت عليكم بشيء ولا انتم متعلمين تجذبون علية وتضمون عني
بس كلولي شنو التغير هسة ؟ شلون صرتو بمرحلة تخليكم تحطون عيونكم بوسط عيني وما تحجون الحقيقة
شلون صرتو بهذي الوضعية تكدرون كل شخص بيكم يأخذ دور ويتقن التمثيل
وتطلع منكم أحسن مسرحية واكون اناااا
المشاهد الوحيد

سكتت وبقى الكل ساكت واحد يباوع لثاني
رجعت مسحت ادموعي النزلن ورجعت اردفت وياهم بكلمات ..

غدير الله :: شنو صار لأختي ؟

العلوية :: هوو !!

قاطعت صوت امي بالنتر مالتي واردفت بصوت عالي

- بدوون جذذب سولفولي كلشييي من الألف للياء بدون نقصاان

علي الهادي :: علي الباقر راح يسولفلچ ..

- سولفلي علي الباقر سولفلي اخُتنا اريج الله وينهي ؟ سولفلي .

بقيت اباوع لعلي الباقر واني منتضرة منة يحجي
سحب كارتون الچكاير واخذ ورث چكارة

وبدة يسولف الي المصيبة النازلة عليهم واني نايمة ورجلية بالشمس !!!

شلون الناس انگلبت ضدنا ؟
شلون اختي وكعت هيج وكعة
مُستحيل اريج تسوي هيچي شيء والكلام الطلع عليها كلة خطأ بخطأ اختي واني الادرى بيها ..

بقيت مرعوبة من الكلام السمعتة والشعور العاشوا بي ادموعي جمر نزلت على خدي بعد ما سولفلي كُلشي

كمت اريد ارجع اصعد امي أردفت وياي
ورد عليها علي الباقر ...

العلوية :: يمة غدير الله !!

علي الباقر :: لا يمة عوفيها لوحدها شوي ..

تركتهم وصعدت لغرفتي فتت وغلقت الباب وانتجيت على الحايط ووكعت بالكاع اصيح بصووت

وبقيت بالـ النص ساعة واني بس اصرخ لمصيبتي ومصيبة اختي

بعدها كمت ورحت للميز فتحتة وطلعت ألبوم الصور وطلعت منة صورتي اني وأريج الله بديت اباوع عليها وابجي ضميتها لصدري وخاطري مكسور

راحت الچانت تسوالها سلف گلة شيوخ ..

حطيت الصورة كدامي وبديت احجي وياها

غدير الله :: ما اريد اعتب عليچ يا اخيتي وماراح اعتب واكلچ ليش چفيتيني هلكثر !
أدري بيچ حالچ هسة متعوب أكثر من حالي
بس أريج الله ومُحمد چاي تلچمني المحنة لا مرسال منچ ولا خبر وصلني تودعيني بي
سهل عليچ ترحين وما تتذكريني ؟
بس اريد اشوفچ خاطر ارتاح اشوية !!
تدرين بية شنو حالي ؟ شنو لوني ؟
ولج اني بغيابچ هسة مكسورة فوك كسري وبقيت اهوچس بيچ
واخوتنا هم بقوا يفترون ديرة ديرة علمود كلمة وحدة علمود بس يعرفون شلونچ !
اريجتي اذا ما ناوية الرچعة ولا ناوية توصليلي شيء منچ راح اتفهمچ بس خيتي خاف أموت من وچع الليل وافراكچ
مابية اعتابچ وتكليلي ليش عفتيني ورحتي !!
تعي يلا كاافي الفرگة تذبح
وحك الجفوفة طاحت على الماي لچل أخية يا أريج الله
عفتي اخوانج من بعدچ كلهم گلبهم مشلوع وبالهم مشلوش

سكتت وصرت أكلب بصور الألبوم واني احس النفس جاي يشعل نار بصدري !

بعد ما خلصت سديت الألبوم ورجعت اتصلت على انمار ورد علية ..

غدير الله :: أنمااري !!

- شبي صوتچ ؟

- أنماررييي

- يروحة لأنمارچ شبيج يا بعد تربيتي ؟؟

- وين أنتَ ؟

- هسة سولفيلي شبيچ ليش صوتچ مخنوك انتِ وينچ ؟

- انا ابيت اهلي انماار ..

سكتت لثواني قليلة وبعدها رد علية ...

انمار :: يعني عرفتي بموضوع اختج ؟

سكتت وطكيت صفنة شنوو شنوو دقيقة دقيقة !!!!
انماااار يعرررف !!!؟؟؟
رچع وحجة وياي ..

آنمار :: هاا نبع شرياني وين رحتي ؟

- انمار حتى أنتَ تعرف بسالفة اختي ؟

- عرفت بعد الحادث بيوم من رحت لأخوانچ حتى اسألهم ليش ما يسيرون عليچ .

- منن ذاك الوقت لهسة وانتَ حتى ما فكرت تكلي ؟؟ وجنت كلما اسألك عليهم تكلي هم بخير لا تفكرين ..!!!

- شنوو جان بيدي غدير؟؟ وضعج جان مزري مو زين من عندي جنت اخليج تسولفين وتتعبين روحچ لچ انا ما صدكت على الله فتحتي عيونچ ترديني اجي واكلج اختچ يردون يذبحوها ؟؟؟ صدك تحجين

اخذت وسديت التلفون ابوجه انمار حتى بدون ما ارد علية
جنت حيل مجروحة ليش يضمون علية يعني انا الوحيدة المضحوك علية هناا

طلع الكُل عندة علم ويدريي وجاي يمثل علية ..

رحت وشمرت روحي على الفراش ونمت على وچهي وصرت ابجي ( نحيــط )
واتخيل الصأر بأختي اريج وشنو من شعور عاشتة
واتذكر الصار وياي وشلون هلأنذال قتلولي طفلتي ووجنت حتى انا حروح بيها !!!

______________________★______________________

""""" وَه‍ـــچ الــــطَــف """""

نزلت للمطبخ أخذت أكلاص ورحت للبراد حتى أشرب ماي
اجت عمتي وچرتني من ايدي وأردفت وياي ..

فاطمة الزهراء :: ما ناوية تكليلي وين رحتي ذاك اليوم ؟

- سويت جريمة يعني من طلعت ؟

سحبتني حيل وقوة من ايدي وصاحت ابوجهي

فاطمة الزهراء :: اييي چريمةة شني ردچ هذاا !! اني كم مرة وصيتچ قبل لا اطلع ان الباب ما تنحدري يمة وتفتحي ؟ اجي الكيچ طالعة حضرة چنابج ؟؟؟

سحبت ايدي وشمرت الكلاص وحجيت وياها بحدة

وَه‍ج الطف :: وين ما عساني اروح ما تحاسبيني لا امي ولا أبوي

- ان عمتچ احاسبچ واكسر رقبتج وكولي وين رحتي !؟

- خطر براسي اطلع اشم هوى وطلعت شكوو بيها ؟؟

- أنتِ دواچ الفاروق الاعظم راح تجبريني اتصل علية واكلة تعال شوف اختك !
لان اني كلش تعبت وجاي احس بعد مااكدر احتويج .

نضرت الها نضرات باردة وهتفت وياها ببرود تام ..

وَهج ألطف :: اليطلع بأيدج يطلع برچلج سوي التردينة واذا حابة اني ادزلچ رقم الفاروق الاعظم خاف مضيعتة لا تهددني بأخواني ترى ما تخوفين چلبي !!

عفتها وطلعت من الطبخ صعدت لفوك دخلت عرفتي واخذت التلفون من الشحن
ودخلت على جهات الاتصال وطلعت الرقم واتصلت ......
واول ما فتح الخط جاوبني ...

- هاا شنو قرارچ ؟

وَهــج ألطف :: موافقة

- فكرتي يعني ؟

وَهــج ألطف :: شوف واسمعني زين اني حالياً خسرانة كلشي بحياتي وماعندي شيء اخاف علية فكرت وقررت اوافق على طلبك مُقابل شرطين ..

- وشنو هن ؟

وَهــج ألطف :: عائلتي لا تداحچ بيهم و تكون كد كلمتك بعد ما ينتهي التريدة تسوي الأريدة ..

- هههههههه سهلة هي وانا على چلمتي بس ضلي وياي واسمعيني راح يصير التردينة

وَهــج ألطف :: اذا هيچ متفقين بس هاا اذا شميتت لو شگيت اكو ريحة غدر بالموضوع الله يشهد يطلع مني الما يعچب !

- لا تخافين ما اكسر چلمتي النطيتها انا

وَهــج ألطف :: يصير خير

سديت التلفون بعد ما نطيت قراري الأخير
مستعدة اسوي كُلشي لجل اوصل لغايتي ومُبتغاي ..

ردت اتصل على البشير قيصر بس اتراجعت ورحت اتصلت على جميلة وطلعلي مشغول سديت الاتصال وكلت انتضر بضع دقائق وارجع اتصل

ولكيت المعتز باالله دازلي رسالة حطيت وحضرت رقمة
وطلعت للستيديو مسحت كُل الصور والفيديوهات مالتنا ورجعت مسحت كُل المحادثات

اذا حُبي للمعتز باالله يصير حاجز كدامي وكدام هدفي !
مستعدة ازيحة وازيح كلبي وياه ..

______________________★______________________

"""""" آريــچ الله """"""

گضت ايام وما صار شيء وياي عزلت نفسي عنهم وكضيت أكل وي مماس فقط خضراوات وانا اسويهن بأيدي

واتچاهلت اجيب الها طاري البيت والأسماء وحتى طاري المرة الفاتت الي " غيرة "
ماحجيت عنها شيء ولا سالتها منو هي المرة
ماريد دوخة راس ..

وبعد ما حسيت صارت القرية هدوئ
فتحت باب حجرتي وطلعت صارت عندي عادة اطلع بنص الليل وامشي اتنفس شوية

بس بهي الليلة غيرر عن كُل الليالي

حبيت اتجرء شوية وطلقت من قرية رماد ورحت للبحيرة اليمها
صالي خمس ايام ما شايفة داسِم ولا مخليتة يلمحني لأن هو هيچ يريد
وانا هم اريد هيچي حتى اخلص من شرة

بس لمن وصلت للبحيرة وشفت الشجرة وشفت الفرس قاتم اذكرت داسِم لأن الفرس هذا حلالة

رحت يمة وصرت امشي ايدي على راسة واني لازمة السرچ مالتة بأيدي الثانية
وراح بالي للأسطبل الجان عند اخواني !!!

اخذت وقبلتة ابين اعيونة ورحت كعدت على طرف البحيرة رفعت الصاية طلعت رچلية ودخلتهن بالماي
وصرت بأيدي اللعب بالماي واني ابجي ..

دمعتي ما وكفت ولا لحضة

كُل حياتي لا حقدت على احد ولا غثيت احد ولا خبثت على احد
ليش هيج يصير وياي ماا فهمت !!؟

صديقة عمري الماعندي غيرها لو ما هي غدرت بية چان اني هسة كاعدة بغرفتي و يمي علي الباقر يقرأ معوذات حتى انام مرتاحة

شنو سوييت الهاا خاطر هيج تجازيني وتأذيني هلكد وتضرني ؟ حتى لو وحدة حاقدة علية جان ماسوت اسوية صديقتي !

وهل جزاء الأحسان الا الاحسان ؟؟

بقيت اراجع ذاتي واحاول اتخطى الليلة الگشرة المرت علية للأن كوابيس تروادني عليها رفعت راسي للسماء وصرت اشوف النچوم وضحكت والدمعة بعيوني

اتذكرت يوم چنا اني و رحمة الزهراء ننام فوك السطح وي جدي !!
وجنا نحسب النچوم وجان جدي يخوف بينا يكول النا لا تحسبن النجوم هسة على كد الحسبتوهن راح يطلع حب بوجهكم !!

ماعرف شنو الربط ابين النچوم والوجة !!

بس اتذكر جنا نصدك ونختترع وننام من الخوف ومن نكعد ننزل ركض للمراية ههه نشوف صدك طلع لو لا

والمشكلة جان جدي بكل مرة يسويها ويانة وبكل مرة نحن نصدك بي !!!

لو اتذكر جنا من ننجمع كُلنا ونصير انا ورحمة الزهراء نحسب الموچودين
وهم جدي يكول النا ماايصير تحسبوننا راح نموت ونحن چنا نبجي ونعتذر ونحرمص الهم لا تموتون بعد ما نعيدها والله هههههه

صرت استذكر أيامنا بزمن چدي شكد چنا مرتاحين فوك هذا راحتنا !!

لو جان موجود ؟

جان ماخلا جنس مخلوق يمس " ريحانة علوياتة " بحجااية ..

وانا جاي افكر واحجي وي نفسي

اجاني صوتت من خلفي جان صوت زلمة خشن أردف وياي ..

- العلوية أريج الله ؟

التفتت برعب وكمت على حيلي وشفت كدامي شكل بهيئة انسان يعني زلمة حقيقي واككف كدامي
اختلست ابمكاني ورجع هو وأردف وياي وكال ..

- العلوية أريج الله بنت السيد عبد الحسن !؟

______________________★______________________

- أنا ريشة يابسة في قفص فلا تطلبوا مني أن أطير

⟨ يَــــتــبِـــع 💢 ⟩

¹⁷,⁰¹⁸ کــــلمــة

______________________★______________________

وَزاتــي 🥹✨

عَــقيقات السـادة
لهنا انتهى البارت ⁴⁹,
لا تنسون تتركون أثركم قبل الرحيل بِ
¹ تصويت ⭐ ² تعليق حلو مثلكُم 🎀✉️
توقعاتـــكم ورئيكــم يهمني ❤️‍🩹

أشــوفــکم بالبـــارت ⁵⁰
ومنا لذاك الـــوقت إلى اللقاء

استودعـــكم عنــد الذي لا تضـــيع عندهُ الودائـــع ✨❤️‍🩹

ربُمــا الکـــاتِبــة "" رُقــَيّــة الأكــــبِــر ""