رواية أخطاء لايُمحيها الزمن الفصل الثاني وثلاثون 32 - بقلم أنثى 🪽 ملائكية

انثى 💜 ملائكيه

أخطاء لايُمحيها الزمن

الدكتور... بنتي روحي للسديه لنشوف....

جوري...كعدت واني متوترا وگلبي يدگ سريع وهو نزل عليه ضوه بمجرد بس شافهن بدون فحص فتح لثتي الجوه بيده يباوع واني حجيت... دكتور يحتاج تقويم...

الدكتور... فر براسه... لا منو كلج يرادلج تقويم ..

جوري...فتحت عيوني... ع يااساس اني جايه غير دسوي تقويم ودكتور امير دزني عليك..

الدكتور..... بنتي اني ماعندي اشكال اسويلج بسس شاكك عندج كيس بس احنه نتأكد بالاشعه يلا نكدر نقرر شنو...

جوري....نزلت من سديه مشيت ع كيف اشو الخوف قيدني ومتوتره حيل ماعرف شبيه...

علي.....دكتور شوكت يعني تسويها ..

الدكتور... هسسه خلي تسويهه متاخذ وقت...

.. وصف النه مكان وننزلنه طبعا عفنه سياره بلكراج ورحنه مشي لان كال قريب لحد ماوصلنه كذلك جان مجمع من دخلنه هووسه وضجه ناس تروح هيج وناس تجي هيج والمكان مزدحم وزلم هواي علي خلاني كدامه ولزم اجتفافي ونمشي ميريد احد يطخ بيه
لحد ماشفنه دكتور الي يسوي اشعه...

.. كال.. اتفضلو ..
مخلي ويا وحده مساعده
كاالتلي.. تعاي حبيبتي....

.. رحت جوه وعلي بقه بره ينتضر...

كالت ...اي شي من حديد نزعي مثل دنبوس اذا كلاده تراجي متصير بلاشعه..

جوري.. تمام ذبيت دنابيس مال شال وكلادتي ورحت ..

كالت ...خلي راسج هنا ..
تقصدع مكان الي يسون بي الاشعه وشي خلته بين اسناني  وراحت التقطت الي الاشعه شوي ورجعتلي...
وكالت ..هاهيه ..
دفعنه لفلوس وطلعنه بره ننتظر الاشعه والتوتر سيد الموقف بين ماتطلع تقريب وره نص ساعه او اقل وصاحت اسمي اخذنه الاشعه ورجعنه للدكتور ..

..وهنا جانت الصدمه..

دكتور بقه يباوع بلاشعه رجع باوعلي وجان يكلي

الدكتور.... مثل متوقعت انتي عندج ورم باااجر وباااسرع وقت نسويلج العمليه  وتعالي بمستشفى مدينة الطب تررره موزين يبقه اكثر ينتشر عندج..

....اني وعلي مدنصدك بلي دايحجي دكتورر ..

علي ...شنووو دكتور..

الدكتور... ايي عندها العضم متهشم تهشم وهذا مررض خطرر عليها...

جوري...اثناء مجان دكتور يحجي اني هنا انهاريت ماعرف شصار بيه بلحظاتها دموعي بس تجري دموع وايدي على حلگي اكتم شهگاتي  احس ع لحظه اوكع ...

..دكتور نطانه موعد باجر ساعه 8الصبح كون احنه بلمستشفى..طلعنه منه صرت كوه امششي ماحس برجليه ليششش ياربي ليششش والله صعب اختبارك جنت احجي ويه روحي وبجي

علي ساكت اكيد نصدم من الي سمعه ركبنه سياره واني ادهك وبجي جنت متأمله انو هلشهر اني حامل هسه حته حمل هم مايصير تذكرت اني مسويه لقاح عزززه خاف حاامل نوب لاويلي عافيتي ولاويلي اني حامل وبيه مرض صارت فكره جيبني وفكره توديني سلمت امري لله علي طول طريق يهدي بيه وهنا ويدك موبايل ..

علي ...ها يابه..

ابو علي...ابني وين انته ..

علي... جنت يم دكتور...

ابو علي.. شكو خير...

علي.. جوري باجر عمليتها ...

ابو علي... شنوو قابل شبيهه يمعود عملتيش..

علي.... يابه مو مال موبايل ارجع ونسولف...

.. وهنا هم امي خابرتني عبالك كلبها حس بيه وماردت اقلقها..  رحت دكتور ونطاني علاج...

ام جوري... لا اكو شي متقبلين تكليلي ليش صوتج مال وحده باجيه مخنوكه...

جوري....بجيت رئستن وكتلها... ماما اريد منج بس دعاء يمكن باجر عمليتي...

..اني كتلها هيج لو هيه تخبلت دكت بنفسها..

ام جوري... ولج يمه شدتحجين عملتيش يمه

جوري....احس صوتها صار مثل يرجف كتلها.... ماما اطمئني ماكو شي انشاءلله.....

ام جوري.... وين انتي هسه وشلونج شنو يوجعج يمه ...

جوري... ماما لاتخافين ولايضل بالج انشاالله سهله.... جنت هيج اكلها امي بس اريد اطمنها لان موزين عليها هبطات والقهر اخاف عليها بس هيه تبقه والده تفكرر وتنقهر....

..لحد مانهيت منها الاتصال واني روحي لايبه خاايفه هواي اخاف اطلع حامل شلوون ياللهي ساعدني انته المعين ربي  جنت ابجي واتوسل بالله  خليت راسي ع جامه مال سياره اباوع الجو كلش برد وصارت تنث وتمطر مطر خفيف  وسيارات تمشي سرعه لان ماكو زدحام علي مشغل اغنيه..

طفوج القدر ياشمعتي خلاني اجر بحسرتي شلي بهل العمر يادنيتي محسود ع حضي وقسمتي..

....رجعت راسي ع كشن وبقت دموعي تجري مثل شلال ويه الاغنيه.. بداخلي صرخه وعتاب وألم گمت احجي بداخلي بكل حزن ليش اني مامكتوبلي الفرح بيوم ليشش ساعات اصفن واكول بسبب اخطائي ساعه اكول لا هذا اني مكتوبلي القهر ماعرف شعوري شنو بذاك اليوم اتمنى يكون حلم واصحه منه ...

..  رجعنه للبيت اثناء مانزلنه سياره جانو واكفين يسولفون زوجها تبارك وزوج عمتي ندى وعمي صلاح..اول مشافوني كلهم تفاجأو...

..كالولي خير شبيج..

جوري ... لان وجهي منفوخ من البجي عيوني اصلا مبينات باجيه..هزيت راسي بمعنى ماكو شي هذا زوجهه تبارك حجه وياي ..

.. اطمئني ماكو شي ابن عمتي هم طلع عنده كيس وفتحو لثته ع طولها وشالو يعني شغله بسيطه لاتخافين وهنا وحجه ع كيف مثل همس وكالي يحلوه ويركصلي حواجبه..

جوري.....مجاوبته شي لان نفرزني ولايبطل سوالفه بس كلت بداخلي هذا زين شمدري شبسرعه طش الخبر اكيد هذا عمي ابو علي ميضم سالفه ترخصت منهم ومشيت صعدت لغرفتي  البيت هدوء عمتي بلدرس محمد بغرفته وعمي طالع....

..علي ضل واكف يم جماعه ذبيت حجابي باوعة نفسي بلمرايه عيوني حمر دم رجعت ابجي تذكرت حجايته من يكلي يحلوه هه اي صح حلوه وشنو فائده ماعندي عافيه وشنو مفتهمه من حياتي بس دكاتره اباوع لنفسي واحجي وبجي لحد ماسمعت صوت عمتي وعلي يحجون مسحت دموعي اسمع عمتي تحجي...

يسر.... لاتاخذها لمستشفى الطب تره يموتها خالتك ندى مو ماتت جوه ايدهم وربك عاين حال بناتها ورجع النبض بيها....

جوري....صدك احننه كلنه نتشائم من هاي مستشفى الطب منا اشكال بيها الامراض ومن يوم صار بـ عمتي ندى وسو بيها بعد ولاعترفنه بهل مستشفى  رجعت اسمعها تكله ...

يسر....مستشفى تعليم الي بلكاظميه خوش مستشفى..

  ابو علي... اي اخذها للتعليمي وهناك دكتور احمد...

..ع فكره دكتور احمد مضمد الي ضربلي الابره مال منشطه....

علي ... يابه عندك رقمه خلي اخابره استفسر منه  

ابو علي .. لحظه اشوفه..

علي...لكه رقمه و خابرته وحجيت ويه..

دكتور .. تعالو الاحد والله كريم...

.صعدت فوگ واشوف جوري طاگه من البجي شوكت نرتاح ماعرف مكتوبلنه الحزن.... الاحد نروح للمستشفى يعني بعد يومين...

جوري... غرغرت عيوني بلدموع... علي خااايفه وبس افكررر كليي شلووون...

جر حسره وباوعلي بنضرة حزن جرني لحضنه بقيت اشهك وبجي بحضنه وهو حاضني بقوه رجع بعدني ومسح دموعي...

علي... كاافي ياااعيني ماريد اشوف هلدموع هاهيه كولي الحمدالله تنكضي وتصير سوالف سلمي امرج لله هو الي مدبر الامور....

جوري....هزيت راسي بمعنى اي صارت ساعه 12بليل علي نام واني ضليت كاعده مانمت بس افكر وابجي ماعرف شنو بعد مضموم الي لحد ماتعبت ونمت...

...بعد يومين جان يوم احد...

...كعدنه الصبح ساعه 8 الجو يكص كص بلبرد..كمت غيرت ملابسي لبست بنطرون كايبو وبدي احمر بي فرو وكلاو..خلصت تبديل اخذت لغسول والمرطب ونزلت غسلت وجهي وسويت ترطيب صعدت علي بعده نايم كعدته ...علي اكعد صارت ثامنيه... باوعلي بنعاس ويفرك بعيونه .. صباح الخير ..

علي... صباح النور خلصتي لو بعدج...

جوري...  لا بعدني..

علي... يلا بساع ونزلي سوي ريوك ..

جوري... ماشي عاد ع سريع خليت ميكب خفيف ولبست الشال والساعه وعطرت نفسي ونزلت يبقه بس ريوك نزلت للمطبخ نصبت قوري الجاي وطلعت اجبان من ثلاجه مشفته اله نزل وهو مبدل ومخلص سحب الكرسي وكعد واني دصب الجاي باوعلي من فوك ليجوه ورفع تك حاحب وشكله ضاج ..

علي... شنو هذا لبسج...

جوري.. شبي يعني...

علي... شلون تنزلين هيج مو كايل ممنوع تنزلين بلبنطرون ...

جوري... علي هسه قابل منو اكو هو بس اني وياك...

علي...بخزراا... ومحمد مو هنا....

جوري.. اووو تلكا نايم بسابع نومه مينزل لل ١٢ضهر حبيبي اكل واسكت هسه رايحه البس فوكا ستره....

علي.. ديلا امشي روحي ومن طلعين عبااايه...

جوري.. فريت بعيوني كتله ..صار.. صعدت اخذت عبايه خليتها ع جتفي ونزلت اني ماحب اشرب جاي سويتلي نسكافه شربتها خلصنه وطلعنه بسياره رحنه من ع الاعظميه ومناك نطلع ع الكاظميه من الصبح وازدحام كلش نوب تفتيش سياره سياره  واذا كان نسوان ينزلن للتفتيش همين... علي هاي شلون دوخه هسه وكت تفتيشهم...

علي..  هيه هنا هواي يدققون ...

جوري .....وصل النه سره نزل جامه علي وحجه ويه الحرس كله هويتك واجازة سوق وماعرف ايش يطلب منه وعلي يطلع اله يشوفهن ويرجعهن الحرس باوعلي وكال...

.. بس الاخت تنزل للتفتيش لان سياره دفتشوها ....

جوري...عاد نزلت اباوع تفتيش بعيد شوي والله مابيه امشي نوب بارده جنت كارسه بلسياره ودافيه اباوع كل سيارات واكفه وشكو وحده بسياره ينزلوهه للتفتيش....

.. صرت امشي وراهن اثناء مجاي نعبر اني وصلت نص شارع وجتي سياره تمشي وطوط طووووط ني هنا جلفت من مكاني ومشيت سريع لحد ماوصلت يم المحيط  نوب سياره وكفت قريب مني نزل جامه وواسمع واحد يكول... انه امووتن ع هاي الفهاوه البيج ..كلت عززه هذا ويامن التفتت وجان اشوفه يباوعلي كتله... كبر كبرك... مدري سمعني مدري لا رجعت درت وجهي ومشيت الغبي شلون فززني فزه من عاب شكله بقيت ادردم عليه...

....رحت للتفتيش تفتشت وطلعت انتضر علي اباوع كومه سيارات بعدهم يفتشوهم لك علي وين صرت شكد بقيت واكفه لحد مااجه وركبت ويا وطلعنه صعدنه ع الجسر....

.. طبعا اول مره اشوفه هلجسر سالت علي هذا يا جسر...

علي.... جسر الائمه الي يفوتون منه زاور بوفاة الامام موسى بن جعفر ..

جوري...اباوع الجسرر كله مشدد بلرايات دخيل موسى بن جعفر دخلنه الكاظميه بشارع 60 هناك المستشفى علي طبك سياره بلكراج ورحنه للمستشفى مشي مسافه احنه وجاي نمشي جتي اسعاف نزلو منها مريض اباوع ناس كلها مخبوصه بلمريض ينقلو احنه دخلنه واشووف اسم الله اشكال بيها ناس هذا المعاق وهذا المكسر كوه يمشي وهذا الي كاعد ع كرسي متحرك تباعون كلشي بيها مستشفى شكد ماحمد الله وقليل اله العافيه....

علي اتصل ع دكتور احمد التقينه بي سهل النه امر لان زدحام ع الاستشاره الدكتور....

..عاد وكفنه وره ساعه دخلت اطباء  مو دكتور واحد يعني كادر اكثر من واحد اجه واحد منهم كلي احجيلي من شنو تعانين بديت احجيله كذا وكذا ورحت اكثر من دكتور ماعرفولي اخر شي رحت لدكتور احمد كلي عندج كيس كلي وين الاشعه نطيته الاشعه باوعهه واجو دكاتره التمو يباعون الاشعه ضلو يسالوني من شوكت صرتي هيج
ومن شنو....

كتله دكتور ماعرف بس قبل فتره من كمت الاحظهن الاسناني يتعوجن.

..بعدين اجه واحد دكتور طويل عنده عضلات ورافع شعره عليه فد شخصيه اباوع دكتورات والممرضات اكلنه اكل بنضراتهن اباوع عليه معاجبه وبس يئفف اجاني وديفحص اسناني اخذ ادوات الاسنان..

دكتور..  شنو اسمج..

كتله جوري ..

دكتور... عاشت للاسامي جوري راح افحص اسنانج واحد واحد الي تحسين بوجعه كليلي والي ماتحسين عليه همين كليلي تمام..

جوري ...كتله.. تمام.. اجه خله شي ع اسناني يسوي وززز ععطت من الوجع آآآي متحملت رئستن دفعت ايده من الآلم متحملت ابد هو هم وكف وباوعلي....

الدكتور... بسم الله هاااي بعدنه يااالله شوي انطيني مجال ...

جوري...غرغرت عيوني بدموع وغمضتهن حيل ورجعت راسي ع سديه ورجع اشتغل متت كلهن بيهن وجع الفوك وكل شوي يسالني... ها اكو وجع.. اكله اي نزل ع اسناني الجوه هنا ماحسيت بوجعهن سالني...

الدكتور... اكوو وجع..

جوري...  لا ابد ..

الدكتور... عندج الي هنا 4اسنان مابيهن وجع والباقي شوي اكو مو..

جوري...  بلضبط دكتور...

الدكتور... انتي طالبه..

جوري...  لا متزوجه..

الدكتور..  شكد عمرج ..

جوري... 19..

.. كتب ورد سال ..عندج اطفال..

جوري..  لا...

الدكتور...يعني مصاير عندج حمل ..

جوري... بلآ صار عندي اسقاط ومره لا ولدته وتوفه....

الدكتور. الله يعوضج ولو هو انتي بعدج طفله... ببتسام...

جوري....خجلت ماكتله شي..

الدكتور... وهسه خو ماكو حمل..

جوري....هنا تذكرت من كلي اني مسويه لقاح كتله... دكتور مسويه لقاح اصتناعي قبل شي 13يوم ماعرف راح يبين او لا...

الدكتور.... راح اكتبلج تحليل روحي سوي اليوم حتلو 13يبين عادي..

جوري.....كتله.. ها وكدد اخذت الورقه منه اجه دكتور هذا المدير ملتهم ع ماعتقد لان رجال كبير بلعمر سحب كرسي واجه ليمي وشاف لثتي واسناني صار يفحص بيده...

دكتور... حته جوه لسانج اكو ورم..

جوري... اشو خوفني اكثر نوب اخذ مواد مال اسنان ماعرف شنو واجه من جوه اسناني شك لثتي شوي يابه هنا شاغت روحي دكاتره داير مدايري واكفين كلهم ع راسي ..

دكتور اياد ...بس كليلي وين جنتي ليش هامله نفسج ...

جوري... ابتعد عني وكال روحي غلسي لان كام يجري دم طفرت ع مغسله ذبيت الدم غسلت ورجع اشتغل شوي ..

دكتور... هاهيه...

جوري... خله قطن لو اني ردتت اتقيئ مدري ليش لعبت نفسي نوب دم مانكطع خليت كنينس عاد حجيت كوه ...دكتور والله مادري هيج حالتي وجان كل ضني اسوي تقويم حته دكتور امير كلي ع تقويم ولمن دزني لدكتور احمد كالي كيس فاجئني وني رحت سابقاً اكثر من دكتور وجانو يكللولي تركيهن لاتاكلين ع هاي اسنانج سويتله اشاره عليهن بس اني ماطبقت الي كالولي عليه الى ان شفت اسناني يوم عن يوم تزيد دكتور ساكت يسمعلي...

. علي... دكتور هيه جانت تاكل ترب خاف منها...

..دكتور باوعله ورجع باوعلي كاال... ترب شنو ماعرفها ...

جوري...عاد وضحله انو تربه الصلاة...

دكتور... ها لا مو شرط منها ..

.دكتور وسام .. اكيد عندها نقص حديد لان ليش تاكلين ترب..

جوري... كتبولي بعد تحاليل عامه عاد اخذت الاوراق طلعت بره علي ماعرف ليش ضل جوه يسولف ويه دكتور..

علي ...ضليت واگف وجاي اسال دكتور اياد ع حالة جوري ارد اعرف... ليش صار عندها ورم ...

دكتور..صراحه منعرف بس هيه حاله نفسيه كلش الها تأثير  وصراحه مثل حالات جوري يطلع بيهم مرض خبيث يعني انته خليها بالك واحنه همين نتاكد انشاءلله بتحاليل...

.علي... من بعد ماسمعت للدكتور كلش خفت ع جوري حسيت ع لحظه راح اخسرها بقيت صافن وافكر بيها دخيلك احس دنيا ظلمت بعيني رفعت عيوني ودموعي تجمعن ربي هاي وين جانت النه....

جوري....اني بعدني واكفه بره تعبت من الانتظار ودوخه صارت براسي شفت اكو كم كرسي فارغ وباقي كراسي كاعدين عالم رحت كعدت وايدي ع حلكي مخليه كلينس وكوه متحمله الآلم وع ياساعه اتقيئ دقايق مشفت اله علي اجه اباوع شكله مو عل بعضه اشرتله بيدي .. شبيك... ابتسم ابتسامه خفيفه ..

علي.. شبيه كلشي مابيه...

جوري....مشينه طلعنه خارج مستشفى ورحنه للمختبر كلش قريب بصف مستشفى سحب مني دم وكال ساعه ويطلع تحليل عاد انتظرنه بره لان داخل مختبر مزدحم فـ اكو حديقه وكعده بيها وهناك ضلينه كاعدين علي غثيث يضحك عليه ويقلد وصار ياخذلي صور واني شلون مخليه ايدي على كامرة...

علي.. ولج وخري ايدج ..

جوري... مااا... واخلي ايدي ع كامره وهو يضحك...

علي...گولي جيزز ولج بس سنووونج اصورهن ..

جوري.. درت وجهي عنه ورحت ليغاد واكول معجبه هسه اله يطكلي صوره واني هذا وضعي شكد خبيث..بس يحب يحشش عليه صاح وراي...

علي... وين تعاي عمي بطلنه ماصورتج والله...

جوري... اي عفيه صير حباب... رحت يمه ورجعنه كعدنه ع مصطبه نباوع طلاب الطب صارت حلتهم من الجامعه وتجهو للمستشفى شكدد طلاب بنات وشباب جامعتهم قريبه ع مستشفى ف وحده من بنات هيه ماشيه وتباوع لعلي مشالت عينهه اني نتبهت عليها درت وجهي عليه اشوفه هو هم يباوع والكا يباوعلها نار وشبت بيه ادري لـ بنيه حلوه رشيقه وشعرها طويل ومشيتها وهيه تتموع خليت ايدي ع خده ودرت وجهه عليه وخنزرتله...  باااوع هنااا لافگسهن لعيونك...

علي... ههههه شكو انتي مضغوطه...

جوري... موشفني ساكته ومتوجعه لااا وعلي اكوم هسه اسحلها من شعرها... رجعت باوعتلها وخنزرت بوجهه هيه دارت وجهه كلت... اي من بدايه صيري خوش ادميه بس اريد اعرف هيج شكولات منو يگبلهن ... علي بس يضحك ..

علي...ولج هسه واذا مباوعت شنو يعني..

جوري... العتب موعليها العتب عليك وانته شكو تباوع هاا ...

علي... يمعوده شتريدين لعد اغمض هاي شلون بيهه ياربي...

جوري...  اي ربنا كايل بلقران غضو ابصاركم يعني شنو ...

علي... هاي كايلها للنساء مو النه...

جوري...لاتخبلني البيه مكفيني لا الكم ...نوب شلون ينفرزني شلون مااجي ميجي ويايه  بقينه نتشاجر لحد ماسكتنه رجعت سالته... اگول شنو جنت تحجي ويه دكتور شكالك من جنت اني بره....

علي... فضوليه موبيدج....

جوري...گلبت عيوني... اي اريد اعرف لان شي يخصني.....

علي... يكول حالتها نفسيه مامرتاحه عود بعد ابجي زين ونقهري خلي يفيدج البجي...

جوري....صفنت تذكرت حجايت ماما تكلي ديربالج ع صحتج تره موزين هلكد تبجين وتنقهرين تأثر عليج بعدين لميت شفافي... اي صح حته امي جانت تكلي هيج....

علي...شفتها ملتهيه تسولف وهي طول تحجي ومامنتبهه عليه مخلي فوني بيناتنه وشوي رافعه وفاتح كامرة  ودايصورها كوه كاتم ضحكتي....

جوري... اني نسيت وجريتها الايدي والكنينسه ومن شفته مبتسم لااردي ابتسمت كتله... شكوو شبيك اكو شي يضحك ...

علي.. هااا اي كملي معليج...

جوري... عقدت حاجبي.. شكمل ..شفته سحب موبايل وديباوع ويضحك مديت راسي اباوع سحب موبايل كتله... هاااا مصوورني ...

علي...طكيتها بضحكه... فدوه لهاي سنون ووصرت أقلد ..

جوري...داسحب منه موبايل اكله امسحا يلا ..

علي ...لا مامسحا شبيج تخبلين ههههه..

لحظات ودك موبايلي دكتور احمد يتصل....

دكتور.. هااا وين انتو طلعتو من مستشفى لو لا ..

علي... لا والله دنتظر تحليل بعدنه..

دكتور... لعد هسه جايكم..

جوري....دقايق واجه د احمد طبعا هذا دكتور الحلوو عنده راعي همه وكلش حباب مرح وطبعه يضحك ويشاقه هو من عشريتنه وصديق ابو ل علي فـ عنده عادي ميانه ويا وهو شغله بلمستشفى دقايق واجه اباوعه من بعيد لبس صدريه بيضه هو طويل بشرته حنطاويه عمره بل ثلاثينات يمشي و مخلي ايديه بجيوبه من البرد وصل ليمنه ويسوي اششه باوعلي ..

دكتور... هااا سلامات..

جوري .. ابتسمت وكتله.. الله يسلمك.

دكتور... ادري مبارده كاعدين هنا...

.علي...  لا وين اكو برد وهنا احسن ...

جوري...باوعلي وغمز افتهمته لان بنات يفوتن مكيفلهن.رجع باوعلي د احمد..

احمد...  اي شكالو مكالو ..

جوري...اني سويتله اشاره بمعنى شكو لثتي ..اهئ ..

احمد.. هههه اوويلي ياااب يلا تكبرين وتنسيها ههههه..

جوري... بقه يضحك ويانه واني ولله مالي خلك اضحك وضحكت ع سوالفه بعدين علي اخذ د احمد ع صفحه بقو يسولفون واني ماعرف كلشي مثل الاطرش بلزفه عود يعني ليش ميحجون كدامي ..

علي واكفين اني ود احمد ع صفحه ماردتت جوري تعرف وتضل تخاف وتوهس ودكتور وسام وصاني انو لازم ماتدري شبيهه مابيهه وهذا شي من الزينات الها .

.. د احمد..لازم اليوم ياخذولها العينه حته تعرفون هلشي موجود وله لا...

علي.. الله كريم..

.صاح ابو تحليل اسم جوري رحت ستلم تحليل ..

جوري..شوي واجاني ..

علي..  يلا تعاي..

جوري.. رحت وراه وجان ويانه د احمد قره تحليل كله ماعندها حمل اني بيني وبين نفسي حمدت الله الف مره  تذكرت الايه القرانيه وعسى ان تحبو شيئاً وهو شراً لكم وعسى ان تكرهو شيئاً وهو خير لكم..ضليت 6اشهر ابد ماكعدت واني اسعي علمود الحمل وسويت المستحيل 3مرات اسوي لقاح وماينجح رب العالمين مجاي يكتبلي الحمل لان يعرف هلشي مو بصالحي واني بيه مرض واحتمال ورايه عمليه صدوك لو كالو كلشي بيها اراده وحكمه ونحمد الله ونشكره...

..رجعنه لدكتور اياد شاف تحليل ورجع كتبلنه تحليل للعينه حته يعرفون بيه ذاك مرض او لا ..

اياد ... ترحون فلان دكتور  المختبر العنوان الاعظميه شارع ضباط سبوع وتجونه مراجعه ع الاحد جاي دد

علي..زين يحتاجلها عمليه ...

اياد...طبعاً عمليه بنج عام عندها ورم موزين بس نكمل الها الاجراءت بعد الله كريم....

جوري...كناله مشكور دكتور ...وطلعنه من مستشفى جانت ساعه 11الصبح رجعنه للبيت اول شي علي راح يجيب فلوس وني رحت لهلي كلت اسلم ع امي اكيد بالها يمي اول مطبيت البيت شتميت ريحة دولمه اويلي شافتني ..

ام جوري... هلا يمه شلون صرتي..

جوري... حمداالله ..

ام جوري... شكالولج هناك ..

جوري... كمت اسولفلها وكتلها هسه رايحه للدكتور ياخذلي العينه..

ام جوري... اجي وياج ..

جوري... لا ميحتاج علي وياي... راحت صبتلي دولمه ويا خضره وخيار كعدت اكل لان صدك جنت جوعانه هنا وجتي عمتي ندى بيدها فلوس حجت ويه امي تكلها..

ندى... وين حسن اريد ادزه للمحل يجيبلي مبروش وسمسم دسوي كليجه ..

ع فكره عمتي ندى خطيه حالتهم ماديه موو كلشش تمام وهيه ماعندها ولد بس بنات فـ صارت تشتغل تسوي كليجه لوو سوي كبب وتبيع فـ بذاك اليوم رايده كميه من شغلات تحتاجهم اخواني ماكو بلمدارس ضلت تكول شلون منو يروح رجلها ميقبل تطلع هيه تشتري شفتها حايره خطيه وهيه ع باب الله ...عمه  اني اشتريلج بعيوني...

باوعتلي فرحت .. صدوك خاف زحمه
حبيبتي ...

جوري...لا ليش زحمه ...عاد نطتني لفلوس علي جان توه طالع من بيت نطيته علم راح اطلع ..

علي..ع سريع لاتتاخرين حته دنروح للدكتور ..

جوري...كتله ..لا ماتاخر.. هنا اكو محلات غذائيه قريبه علينه طلعت عبرت شارع ودخلت المحل واكفين زلم بس شافوني ابتعدو يسون طريق واكف ولد كتله... خويه اريد  كميه مبروش وسمسم... عاد نطاني ودفعت لفلوس درت وجهي بعدني مطالعه المحل جاان صاحب محل مخلي كراتين وماعرف ايش بلطريق ومنا واكفين زلم واني شكد ماجنت مرتبكه ومستعجله نثولت وماشفت كراتين وشغلاته وهنا وجان اعثرر يااابويه شصار بيه تمنيت الكاع تنشگ وتبلعني ع هاي الفشله ..

نوب اسمعهم يكولون  الله الله ع كيفج واحد منهم اجه ليمي..

كال ...بيج شي ..

جوري...كمت واني انفض بملابسي مدنكه راسي كتله... لالا مابيه.. متت من خجل واحس حرارة صارت بوجهي ودمعت عيوني ... بس بقيت بكلبي ادردم ع صاحب محل اغبر اكو واحد يخلي كراتين بلطريق بس والله ردتت ابجي طلعت من المحل ورجعت للبيت شافوني...

هااي شبيج صاير وياج..

جوري..ابتسمت كتلهم ...مابيه شي... نطيت غراض لعمتي همزين مشدودات بلكيس وماطشر المبروش وسمسم...

...شفت علي كاعد بلسياره ينتظرني اترخصت من اهلي ورحت للسياره طلعنه نوب منطقتنه مزدحمه بسبب الجنازه جان واحد ميت من منطقه فـ يصير ازدحام كوه طلعنه من منطقتنه وصلنه لاعظميه للمختبر صعدنه درج اول مادخلنه فارغ المكان ماكو احد كاعد سكرتير جان ديكتب ...

علي ...سلام عليكم ..

جوري... سكرتير رفع راسه رئستن باوعلي يووومه اني باوعت بعيونه عززه شنو من عيون حته لون عيون البزون مو هيج سبحان خالق لاهنه خضر لاهنه زرك لون عيونه غرريبه  مشايفه مثل عيونه رد سلام هو طول مايحجي عين ع علي وعين عليه ويبتسم ويكتب ....

يتبع

انثى 💜 ملائكيه

اخطاء لايُمحيها الزمن