رواية اقسمت على حبكِ عند الأمير الفصل الاول 1 - بقلم ضوء القمر

#اقسمت على حبكِ عند الأمير
للكاتبة ضوء القمر

عفتني بوكت وجـــــروحــي هامت
وكـمــت اصفـن وافكر عدل  هامت
شكثر مــــرتن ناس اطـــوال هامت
وانت يالكصيرون ماحن گلبك علية

لواني زمــــــن بشدة مــــــن اذاني
وخلاني اتحصر  الشوفة من اذاني
كمت اوكف واندعــي منسمع اذاني
عساالله ياخذحوبتي من الخان بيه

الشيخ كاعد بالديوان وهو يفكر بالي سواه صح لو لا خايف يأذه ابنه بس ولده رجال الكل تحلف بي

سيد صادق:ابو جاسم خير يخوي علامك صافن
الشيخ أبو جاسم :والله يخوي افكر بالي خبرتك بي
سيد صادق: تقصد موضوع المشيخه
الشيخ أبو جاسم: ليش هو اكو غير هالسالفة كلي سيد اني على حك بسالفتي
سيد صادق: شيخ اسماعيل انت شيخ وتعرف الي يفيد العشيرة وابنك كمرهاشم الكل تشهدله بوكفاته ودوم هو بصدر الديوان انت خايف من شي
الشيخ أبو جاسم: اخذ نفس وهو يفر بالسبحه
سيد خوفي عليه من ناس كريبه علينه وخايف تصير مشاكل تدري بيه انه مابيه بعد حيل للمشاكل
سيد صادق: لا ابو جاسم بعدك بحيلك والله يكويك اشوكت ان شاء الله تنقل المشيخه
الشيخ أبو جاسم: إن شاء الله هاي الجمعة انه مخبر الكل يحضر وهم ابو احمد يجي من بغداد
سيد صادق: خير إن شاء الله همه يعرفون بالسالفة
الشيخ أبو جاسم :أي يعرفون وهم موافقين
سيد صادق: على بركة الله

كاعد بالمكتب وافكر ليش هيج قرر بسرعة وليش اني اووف هاي اشلون سالفة راح تبدي المشاكل مستحيل سلام يكعد راحه انتبهت على صوت
..هاا سيد شكلت
سيد عبدالله:هاا اشبيك هاشم خير الرجال اجه يسلم ويسأل وانت بس صافن خير

اخذت نفس واني حاير اشلون راح اتحمل كل هذا
..والله ماادري يخوي الشيخ يريد يسلمني المشيخه واني حاير اشلون
سيد عبدالله:وليش حاير انت مو اول مرة الشيخ يخليك بمكانه واصلا مستحيل احد غيرك يكدر لهالسالفة
..عبدالله انت جاي تفهمني شكول بويه نسيت ذولك الجماعه لو لا
سيد عبدالله:اهوو هم ذولك الجماعه يمعود ليش هيج منطيهم مجال هاا هاي اول مرةهيج اشوفك منطي احد مجال
..يعني ولد عم شسوي متگلي اتگاتل وياهم واذا منطيهم مجال مو لاسواد عيونهم لا وغلاتك بس عمي يوگف بعيني خوش رجال مع الاسف هيج خلفته
سيد عبدالله:ايي خطية عمك ماكتلي جاسم ومهدي شرايهم
..همه اصلا من البداية قابلين لا وبعد باصمين بالعشرة اول شي جاسم مو فارغ ابد يا جامعه يا ندوه يا مناقشات وهم ميكدر يروح ويجي صعبه عليه اما مهدي هذا وحدة دربه مشايفه كافي عليه القضايا بالمركز مو عاد سوالف الديوان ومشاكل العشيرة
سيدعبدالله:هذا هو ماكو غيرك توكل بالله وان شاءالله التوفيق
..ايي ان شاءالله

انه ابن الدله والفنجان  انه ابن الديوان والمضايف والكرم انه تربات  الشيوخ انه الي يگصدني ميرد خايب من ابونه علي تعلمنه الكرم وادينه دومها للمحتاج

اعرفكم عني گمر هاشم ابن الشيخ اسماعيل ابن الشيخ حامد احنه شيوخ ابن عن جد اصحاب مضايف وهلا ومرحب عمري ٣١ خريج كلية هندسة معماري عندي شركة انشائيات وبناء  اني وصاحبي سيد عبدالله راح تگولون ليش هيج اسمك اني ولدتني امي بليلة ولادة قمر بني هاشم وابوي على محبة مولاي ابو الفضل العباس  سامني گمر هاشم  بس الكل يسموني هاشم شكلي صاحب جسم العب حديد بشرتي بيضة لون عيني عسلي حالي حال اي شاب مو ذلك الجمال بس الكل يكول انت على اسم ابو الفضل الله انطاك من جماله شعري بي طول بس شب بسيط شخصيتي نااار فنه الي يدوسلي على طرف بس اكدر اسيطر على اعصابي تعلمت من الحجي ضبط النفس من اني صغير ويه ابوي بالديوان من الصغر متعلم على الديوان ووين  ميروح ابوي اني وياه لحد ماتعلق گلبي بالديوان وصار الكل تعرفني بحكمتي ونباهتي ودوم ياخذون بحجيي اني وسيد عبدالله دوم سوه هو نفس عمري هذا اخوي وحزام ظهري وشيال همي طبعا العائله متكونه من الشيخ  الله يحفظه والشيخه جدتي والوالدة الله يطول بعمرها واخوي الحبير جاسم دكتور جامعي ببغداد متزوج بنت عمي وعايش هناك ودومه مشغول وعنده ولد اثنين وبنات اثنين  اما الي واره اختي الجبيرة  عهد هاي اختي نفس طبع جاسم متزوجه ابن عمتي وعايشه هنا يمه هي معلمة عدها ثلاث ولد بس وراها اخوي مهدي مهدي نقيب بالداخلية متزوج بنت خالي وعنده ثلاث ولد وبنيه كل وكته بالمركز كافي عليه مشاكل الدوام وهو يتخبل من سوالف الديوان صح يكعد من تصير گعدة بس ابد ميدخل
بعده اني ووراي الغالية وبنتي منار هاي بنت گلبي ربيتها على ايدي اهواي متعلقه بيه طبعا الكل يسمعلي حتى اخواني الكبار يسمعون وياخذون بكلامي ودوم ياخذون  رأي اذا صار شي اني ممزوج لان مااحب اربط نفسي بمرة اشكد يحاولون الوالد والوالدة والشيخه بس من افقل بعد هذا هو لو شيصير مااتراجع اذا ضغطو  عليه الا من وحدي وهسه ابوي راح يسلمني المشيخه وهاي بحد ذاتها تاخذ كل حيلي وهم شغلي يعني مفارغ لسوالف الزواج وهم مالي خلك لمشاكل النسوان القيل والقال هيج بالي مرتاح طبعا احنه عايشين بالعمارة من زمن جدي
بعد الظهري رجعت البيت لكيت خطار بالديوان اريد فد يوم ارجع مالگه احد مستحيل  دخلت للديوان سلمت عليهم
هاشم:سلام عليكم
الشيخ والموجودين ردو عليه:وعليكم السلام هلا بالشيخ
الشيخ ابو جاسم:حي الله الشيخ گمر هاشم
گمر هاشم:الله يحيك شيخنه كعدت يمه
الله بالخير
..الله بالخير والعافية

الشيخ ابو جاسم:اي ابو جابر وهسه على شنو ناوين بالمحصول
ابو جابر:شيخنه احنه گلنه هسه نحصده ومناك نوزعه على الباعة وهم اكو من طلبو زيادة بالكمية هالمرة
الشيخ ابو جاسم:خير ان شاءالله هذا هو بويه سوو الي تشوفو وهم مااوصيكم مثل كل مرة لا تخلون احد متنطو خوش بويه
ابو جابر:تأمر شيخنه على امرك
گمرهاشم:بقيت كاعد لحد ماكامو ودخلنه اني والشيخ للبيت
..اكول شيخنه اشوكت ناوين تبلش بمزرعة النخل
الشيخ ابو جاسم:والله يوليدي انتظر عمك ناظم كال هم يريد يرزع وهم عليش مستعجلين ماورانه شي وليدي ان شاءالله الجمعة لازم تكون فاظي لان الكل راح يجي
گمرهاشم:صاار حجي تأمر
دخلنه وكعدنه يم الشيخه وصبو الغدة وره الغدة صعدت لغرفتي اهواي تعبان هالايام اگضيها كله تفكير غيرت ملابسي وخليت راسي انام وجان تنكد الباب اعرفها ماكو غيرها تكد الباب هيج
..تفضل
منار:اكدر ادخل
گمرهاشم:هو انتي بعد دخلتي تعالي بعد اخوج
منار:هلا والله ولو راح اضوجك لان تريد تنام بس شسوي لازم احجي
گمرهاشم سندت جسمي على التاج ورفعت حاجبي ادري بيها متعرف تظم عليه على الكل تظم الا عليه
..ايي ست منار كولي شوراج
منار  وين وراي ماكو هههه هشوم حبيبي
گمرهاشم:لا استلمنه ماطول بيها هشوم ولج راح اصير شيخ هم تبقين هيج تمسيني
منار:والله هذا الي عندي وبعدين اني بنتك من حقي ادلعك همه ليش يغارون المهم هسه خلي اخبرك بسالفة وتغدة بيهم قبل لا يتعشون بيك
گمرهاشم:لزمتها من راسها ولج انتي اشوكت ناويه تعقلين هاا والله خاف عليج هذا اللسانج مو دوم تتعاركين بي سمعتي
منار:اوو هاشم شعري ليش خربته وبعدين شمسويه هو اني شعندي غير لساني فديته سلاحي الفتاك هسه المهم خلي احجي
گمرهاشم:احجي فضيها
منار:احزر اليوم من اجه على نبع الحنان ولعب بعقلها
گمرهاشم:هاا منو وليش نبع الحنان هينه
منار:يمعود هاي لو تطلب من امك روحها تسلمها
گمرهاشم:اهووو بس خالتج المصون
منار:اووف اكو غيرها سعديه خانوم المهم يردنه يزوجنك والعروس خلود ونبع الحنان تعرفها اشكد تحب خلوده
گمرهاشم:ههه والله عبالي وحدة بيها خير خلود هاي اني لو منها ادفن نفسي عود شايفه روحها حلو
منار:اكوول شيخ هاشم هااي اشكد قديم روح شوف هسه اشلون صايرة غير صايرة چنها نناسي
گمرهاشم:لفيت راسي وكلت لو تصير زليخه مااگلبها هو جعفر ولابس حجاب خليني ساكت هه صايرة نناسي روحي خليني انام وراي شغل وهم انتي على شنو مخليج انتي احجي لو لسانج بس بالمشاكل انتن حلنها مالي خلكجن
منار: ياا شو نمت هشوم تره صدك احجي اهووو خرب بالحظ هو صوجي كتلك لو بس اعرف هالحجر هم يجي يوم ويحب اااخ بس خلي يصير اللي بالي الا اسبوع ان ارگص
وجان يشمر المخدة  بوجها وطلعت وسدت الباب وراها

بعدمرور يومين اجه يوم الجمعة اليوم الي راح يسلم الشيخ ابو جاسم المشيخه لابنه گمرهاشم

منار:اوووف شنوو هاي والله ظلمم يعني اني شمحصله بله منهم هاا
الشيخه:يمصگوعه علامج بس تتدردمين هاا اشتغلي وانتي ساكته
منار:حبوبه حتى انتي عليه والله نوم مشابعه يعني تاكل دجاج ناس تتلگه العجاج هاا يصير بعدين وين الطباخين مو عساس يجون
حسنيه:وللج مناار اليوم اموتج لو بس تشتغلين كد ما تحجين جان الشغل خلص ولج يمعزايه هسه يجون اخوانج يريدون الاكل وانتي بس تتحطمين امششي كملي شغلج
منار:صاار نبع الحنان هو اني اكدراحجي والحكومه هناا اوييلي عليج يانفسي جان يجيني صاروخ من امي خلتني اگمز ورجعت اشتغل هيين اني اعلمكم هين يشيوخ بسيطه

گمرهاشم:اليوم الكل راح يجي الشيخ عازم العشيرة كلها وهم كل الشيوخ الفخذ من الصبح اجوي طبعا من البارحه منايم بس افكر اشلون راح اكدر اشيل كل هالمسؤولية وحدي ربي عليك توكلت سبحت ولبست دشداشه نيلي وشماغ بيجي بنيلي رشيت عطري،Boos الاسود ولبست محابسي وسبحتي بايدي وساعتي بقيت صافن على شكل بالمراية
..ايي ياهاشم گدامك درب طويل اشلون راح تكدر عليه جهز نفسك من هسه للمشاكل انتبهت دك جهازي
..الوو صبحك الله بالخير يخوي
سيد عبدالله:صبحك الله بالنور هلا بالشيخ البارحه منمت مو
گمرهاشم:ايي والله سيد منايم
سيدعبدالله.اوويلي ولك هونها يخوي ولك الي يسمعك يكولن مستحيل هذا الشيخ هاشم علامك مصعب الامور كل احنه وياك
گمرهاشم:عبدالله هسه اختلف الوضع هسه الكل نظره عليه واهواي ينتظرون الزله عليه وهم گلبي مامطمن
سيدعبدالله:هاشم على بختك شو خلي گلبك بحالة يمعود استر علينه  ماكو غير العافيه ويله جهز نفسك اكيد الشيوخ على وصول
گمرهاشم:هاي اني مكمل انت جاي مو
سيدعبدالله:اي اشلون لعد
گمرهاشم:هلا بيكم
طلعت من الغرفة دخلت للمطبخ شربت چاي وطلعت اليوم كلش مالي شهيه اخواني جانو جاين عمامي وزلمنه وشيوخ وبعد راح يجون اباوع لابوي طاير اليوم من الفرح طبعا سلام العار بس يخوزر لا ياچلب ونذل ااخ مع الاسف انت ولد عمي صار الظهر والكل اجه الديوان غص بالشيوخ والسادة بعد تسليم المشيخه نچبو الغدة والكل حمد بكرمنه والحمدلله بعدها الشيوخ وابوي حجو والكل وافق على انو استلم المشيخه كام ابوي ولبسني صايه جدي وعباته هذني متوارثات من جدي لكل شيخ يسلمتها يلبسهن مجرد مالبسني الصاية والعباية حسيت بثقل المسوؤلية الي صارت برگبتي
بارگلي
الشيخ ابو جاسم: الف مبروك  المشيخه عليك شيخ گمر هاشم ان شاءالله  تكون گدها
گمر هاشم: تسلم شيخي وتاج راسي ان شاءالله  بفضلك وبفضل هالوجوه الخيرة
بعدها الشيوخ كامو يسلمون عليه وكل الموجودين كعدت بصدر الديوان وكم شاعر كامو يمدحون

بعد شهرين الشيخ حالته صارت بالنازل وكل التحاليل تكول گلبه تعبانه لحد مافد يوم جنت معزوم بمشيه رحت اني وسيد عبدالله  وابوه السيد صادق  وحمايتي وكم زلمه جنت كاعد وهناك ودك جهازي خلاني اكوم من مكاني والكل تفاجأ بيه الاتصال خلاني مااعرف دربي
سقت بمل سرعتي اني ادعي الله مو الي ببالي بس ااخ هذا گلبي احسه راح يلچم

 

مرحبا طبعاهذا اول بارت وهالمرة بيها الطابع الديني وكلها شيوخ وسادة اليوم القصة من اهل العمارة هل الكرم والجود والنخوه اصحاب مضايف اذا عجبتكم اكمل وياكم وشوفوني تفاعلكم
يتبع..
محتاجة دعم لهالقصة مجاي تطلع عند البحث عنها ادخلو على حسابي واضيفوها 🙏🙏🙏🙏 واريد تصعدوها وتصوتون الها فضلا وليس امرا