رواية اقسمت على حبكِ عند الأمير الفصل السادس 6 - بقلم ضوء القمر

#اقسمت على حبكِ عند الأمير
للكاتبة ضوء القمر

انا بلياك كَلبي شما يدگ يبرد
يا باب الفرح ، والحزن مد الشوف
خايف لا يهب عالي الهوى وتنسد
يا أسود رمش هنيال لون الليل
چي لنه ويه عينك دوم يتودد
فضلك عـ الحسن إنت آخر العنكَود
وبستان الورد لولاك ما ورد
يا زفه عرس ضحكتك تالي الليل
ويا عين الصكَر بالزعل من تحتد
يالتدلع غنج واليحب مو كَصاي
وأنت اعله الچتل مبخوت تتگصد
يا صوغة هدايا وفضفضاك الليل
لا تلتم بديه لا هوى وتنشد
عودني إعله بعدك وانت أبو الطيبات
بلكت عالصبر يمعود أتعود
كَالولك حلو وخلوك بيه إتجور
والكلك شوصف بيك وشعدد
أشو لامو حلو وما تشبه الغزلان
ولاريح الگرنفل بيك لو ورد
ولا عينك مسافة وبسمتك سلوان
ولا كل اليشوفك عمره يتجدد
ولا الله إبتلاني وخالط الجيلين
ولا عمري إعله شربه ماي يتفرهد
ولا تزهي بشبابك ، ماخذك طغيان
ولا إنت العزيز البيك بس أركد
ولا صوتك شجي وحچايتك ناكَوط
ويشفافك نظاره الماحواها أحد
ولا غاوي ولذيذ وتشبه النعناع
طيبه وطيبتك كل يوم تتجدد
ولا طولك مصيبه ومثل كل الناس
حسنك مو حسن وخدك مو مثل كل خد
ويا أسهل من إسمي وصعب حد الغيظ
وطلاسم لو ردت وياي تتشدد
صدكَني أحبك حب غريب الطور
وأحب صبرك علي وما گلت لحد

منسا :من شفت كدامي حالته اخوانه واهله اجه ببالي ذلك اليوم الي جان اسود علينه يوم مستحيل انساه اووف الله لا يرجع ذيج الايام عشنه بذلك اليوم اخوي مصطفى هم تعرض لطلق ناري وجان بوكتها غدر واجت الرصاصة بطنه يومها أنكلبت الدنيا علينه وخاصه هو مجان هنا جان بمنطقة وصاير عركة بين عشيرتين بيومها بابا وماما خطية اهواي تعبو وتأذو شفنه أيام بس الله يعلم بيهن شهر كامل واحنه حالتنه حاله لا ليلنه ليل ونهارنه نهار وخاصه من كال الأطباء مأذيته كلش بعد شهر من الفره من طبيب لطبيب قرر بابا واخواني يسافرون بي وصدك خلال الأسبوع كملو كل الاجراءات وسافرو وبقو هناك شهر ونص لحد ما الله شافا والحمدلله صح تعبنه وعشنه ابرق وقلل وسهر هو اني اشلون كدرت امتحن ماادري جنت بوكتها سادس بس الشي الوحيد الي جنت خالته ببالي الله ميعوف احد والحمدلله صح المعدل الي جيته مو نفس الي جان رايده مصطفى بس الحمدلله دخلت طب قسم تخدير وهم حلو قسمي واهواي مرتاحه بي وخاصه جنت الأولى على دفعتي والفضل يرجع لله ثم صوفي ابو امير من اشوفه بعد التعب الي شافه اهواي ارتاح هو مو بس اخوي لا ابوي الثاني من جنت صغيرة جنت متعلقعه بي انتبهت على اشراق
..هاا حبي تحجين وياي
اشراق:أي اشبيج صافنه خير
منسا: ماكو بس تذكرت أيام جانت عصبه علينه
مهرة :أي صدك لاحظت عليج التوتر والقلق على الشاب الي سوينالنه عملية
منسا:ايي الله يشافي لان عشت نفس هالحالة واجوي ببالي اهلها اخواته اكيد هسه كلبهن نار عليه 
مهرة :ليش انتو شنو صار الكم
منسا:امم احنه قبل اربع سنوات اخوي الجبير تعرض لطلق واجت الطلقة ببطنه شهرين ونص احنه نعالج بي يله اشويه تحسن جنه خايفين يروح من ادينه بس الله رحم بينه ونجاه النه
اشراق :يمه اسم الله الف الحمدلله بس اشلون صار
منسا:جان معزوم سم صديقه جان وكت الظهر فسامعين طلق وعياط وكذا فطالعين وجان اكو عركة مدري فصل عشاير وجايه طلقة بي ااااه اسكتن لا تذكرني والله أيام مااتمناها للعدو
مهرة :يعمري اسفين معبالنه هيج المهم هو بخير وهذا أهم شي والحمد لله
منسا:أي والله الف الحمدلله
اشراق :هسه عوفونه من الحزن وذيج الايام راحت خلونه بايامنه هسه وكولولي شنو البس بالمهر

منسا ومهرة: شنووو عاااا وأخيرا
اشواق :اييييي ولجن ممصدكه تدرن جنت خايفه من بابا وعمامي بس الحمدلله من مااعترضو اوو جنت شايله هم
منسا:حبي اذا من قسمتج والله راد شي لو من  كان  يكون ميكدر يمنعكم
اشواق :لج انتي عسل والله فديتها للي تنطيني كلام كله طاقة ايجابيه

مهرة: واحنه عيني ننطي سلبي

اشواق :ههه لا يعمري هو اني شعندي غيرجن غالياتي المهم هسه محتارة شنو البس فستان لو بدلة
منسا:امم شوفي البدلة والا الفستان الاثنين حلوات  نصيحة اشتري فستان هم يفيدج بأكثر من مناسبة والبدلة اجريها مو احسن

مهرة :أي والله واني هم من رأيها اضربي عصفورين بحجر

اشواق :خوش لعد لعد خلي اشوفجن فستان عجبني

منسا: بعد هالاستراحه كملت دوامي واجه بابا عليه وطلعت ركبت يمه
..السلام عليكم
سيد هادي:وعليكم السلام ورحمة الله وبركاته اشلونج بنتي
منسا:الحمدلله تمام انت اشلونك
سيد هادي: ما طول انتو بخير اني بخير
منسا:عساك دوم بخير يا تاج راسي ويحفظك النه ياغلاي
سيد هادي: آمين ههه شو تعبانه اليوم
منسا:أي والله الصبح جان عدنه عملية طولت اربع ساعات ونص وهم جانت العملية كبرى لان المريض جان على شعرة من الموت بس الله نجاه
سيد هادي: الحمدلله بس شنو حالته
منسا:متصوب والطلقة جايه بكلبه إلا اشويه والفقص الصدري واحد من ضلوعه صار بي فطر
سيد هادي: سترك ربي شنو جندي لو لا
منسا:لا بابا شيخ من الجنوب أي صدك سيد صادق جان موجود جاي وياهم والي عرفته هو ابنه للشيخ الي رحتو قبل شهرين مدري ثلاثه تعرفه
سيد هادي: لا صدك معقولة ابن الشيخ اسماعيل متاكدة بنتي
منسا:مااعرف بس السيد كال هذا الشيخ ايي اسمه جان كمر هاشم
سيد هادي: لا صدك مو خوش سالفة هاي
منسا:مااهتميت وصلنه للبيت سلمت على ماما وصعدت بدلت ما نزلت اتغدة لان متغدية سبحت ونمت ماكعدت إلا قبل المغرب بساعة نزلت جوه يم ماما
..سلام
فاضلة :وعليكم السلام صح النوم
منسا:صح بدنك ماماي اشوكت طيارتكم
فاضلة :هذا الخميس ان شاء الله
منسا:خليت رأسي بحضنها..راح اشتاقلكم اهواي ماادري اشلون راح اقضي ذني الايام بياكم
فاضلة :يروح امج لوما دوامج جان حجزتلج ويانه بس انتي توج بديتي بالدوام وهم مااكدر من هسه اخليج تاخذين اجازة مطولة

منسا:لا ياغلاي اني هم هسه مااكدر وان شاء الله تنقسملي عمرة واروح
بعدها كمنه سوينه عشه الي عرفته من ماما بابا ومصطفى رايح على صديق الهم اجوي على العشه ماسهرت اهواي بالدعش صعدت غرفتي ونمت ثاني يوم الصبح طلعت للدوام وصلوني الولد وراحو دخلت ويه دخلتي طلع بوجهي نفس الشاب الي شفته ويه ايسر بعدين عرفت من البنات هو دكتور طبعا كلما اشوفه وعيونه عليه واني اتخبل من هالشي والكل يعرفني اني ما احب هيج سوالف نزلت رأسي ودخلت ومااهتميت اله فد نوب طبعا طول هالاسبوع وهو عيونه مافاركتني ويحاول بقدر الامكان يحجي وياي البارحة سافرو ماما وبابا اهواي ضجت لان ابقى وحدي هالشي اهواي زاعجني من اني صغيرة عايشه وحدي جنت اتمنى تكون عندي اخت بس مامقدر الي يكونلي اخت اليوم جنت اهواي ضايجة مدري ليش هيج اني اذا ضجت بعد هذا هو اقفل جان عدنه عملية نحجت الحمدلله طلعت بره اشم هوى وهم اخابر ماما

أشرف: بس اريد اعرف اشوكت راح ترفع راسها من اباوع عليها و الله صرت اتمنى نظره منها اااخ
ايسر :انت خبل لك بابا اصحه هاي مو أي بنيه ولا حي الله لا ٧اي العلوية منسا الكل يحلف برأسها خليك بمكانك أحسن تره متحصل شي
أشرف: لك ايسر اشلون اخذته لكلبي ولك احس يومي ناقص بدونها هو اني شنو اريد عمي بالعباس ليش شوفت عيونها كافيه هنه غير عذاب اوويلي وكل شتطلب اني جاهز بس خلي تباوعلي

ايسر :أشرف خلي نكون واقعيين اني وانت تعرف اهلك منو يردون شنو نسيت بنت عمك لو شفت غيرها مو كتلت نفسك عليها
أشرف: يمعود يابت عمي يابطيخ هي بيش الكيلو ولك هاي تسواها بس اااخ من اهلي هو اني فد يوم  ردت شي وصار

ايسر:اشرف نصيحه مني يخوي عوفها تره تطبع خسران من الحرب وهم احسبها عدل اشلون تقبل تزوج وحدة اهلك مراضين عليها وبت عمك احسن من الغريب ولو احنه دوم نطرب عالغريب
اشرف:يعني افهم منك انسها
ايسر:اي

گمرهاشم:بعد الي صار مااعرف شصار وراها بس آلم موتني احس سچاچين بصدري وصدري كله يون عليه فتحت عيوني بس كوة وهم مااشوف النظر عندي مشوش بعد عدة محاولت فتحت عيوني باوعت غرفه بيضة واضوية اهواي ماكو احد يمي بقيت صافن بالسكف وافكر منو الي هيج غدر بيه معقولة الي ببالي بس اشلون عرف بروحتي واني مگايل لاحد وره اشويه دخل عليه دكتور وممرضين وياه

د حسين:الحمدلله على السلامة شيخ
گمرهاشم:الله يسلمك دكتور
د حسين:گلي تحس بآلم قوي لو لا وهم تذكر الي صار
گمرهاشم: آلم مموتني احس بثكل على صدري اي اتذكر اشكد صاري هنا
د حسين: مو اهواي اجيت بالعشرة الصبح وهسه بالخمسه العصر
گمرهاشم: هاا طلعتو الرصاصة
د حسين: طبعا طلعت من الموت بقدرة الي مصوبك جان ضابط المكان بحيث الرصاصة مأذيه القفص الصدري  صح ماكو اي كسر بس اكو فطر باحد الاضلاع وهم كانت على شعرة من مركز القلب وعمليتك جانت كبرى وآلم عادي انت طالع من الموت والرصاصة مكانها اهواي خطير بس الحمدلله  كدرنه نطلع الرصاصة وان شاءالله  مابيك غير العافية
گمرهاشم: تسلم دكتور بس مطوله كعدتي هنا
د حسين: ليش حاب تعوفنه ههه اطمن شيخ حاليا نكدر نكول انت بصحة زينه بس راح تبقى هنا تحسبا لاي مضاعفات وخاصه نبضات گلبك بعدها مو مستقرة وهم السفر عليك هسه مو زين راح  تبقى اسبوع وبعدها  نشوف الشرطة هنا راح يطلبون اقوالك
گمرهاشم: ميحتاج ثاري اخذه بيدي وهم هذا من ولايتي اعرف اشلون اخذ حقي
د حسين: مثل متريد براحتك شيخ گمرهاشم  تشرفنه بمعرفتك الله يخفظك لشبابك
گمرهاشم: اشكرك دكتور
بعدها دخلو ابو احمد وابو مرتضى والسيد وعبدالله  وعمامي واشوف الخوف بعيونهم
جاسم: الف الحمدلله  على سلامتك يخوي منين اجتنه هالنصيبة
گمرهاشم: الله يسلمك يخوي الحمدلله  جان مكتوب هالشي بس الله شگفها
مهدي: سلامتك ياشيخ طمني اشلونك
گمرهاشم: الله يسلمك  يالغالي احسن
مهدي: وغلاتك ووروحه للغالي ان ما خليتهم يتمنون الموت فلا اطلع ابن ابوي
گمرهاشم: تسللم ابو مرتضى ونعم منك ادري بيك بس خليهم اعرف اشلون اخذ ثاري
مهدي: انت بس گلي منو هالعارات خلي اشفي غليلي منهم ولو گلبي موچر منهم شفتهم
گمرهاشم:لا مشفتهم بس اعرف منو
ابو سلام: ابني منو خلي ناخذ بثارك
گمرهاشم: باوعت على عمي اااخ يالقهر حسافة ذولة الساقطين ولدك انت ذهب بس اشباه الرجال الي من ظهرك لا والله ذولة مو منك ذولة ولد الشيطان  غمضت عيوني بقهر
..مووهسه عمي كلشي بوكته حلو خليهم هسه متنوسين الي جايهم موت احمر
بقو اشويه وطلعو بقى بس عبدالله اباوع عليه اشوف بعيونه خوف بنفس الوكت اهواي اسئله
..خير اشبيك صافن متجي تسلم

سيد عبدالله:اخذت نفس ممصدك بعد المنظر الي شفته بي كلت ميطلع منها لحد هسه الرجفه بجسمي خوفي عليه خوفت اب على ابنه من دخبنه عليه جان تعبان بس يمثل القوة بس عليمن عليه الي اعرفه مثل مااعرف نفسي هذا روحي هذا عضيدي اني وياه روح وحدة طلعو كلهم وبقيت يمه سحبت كرسي وكعدت يمه
..انت شتكول شنو لازم اسوي هسه

گمرهاشم:هههه تبجي على صدري ههه
سيدعبدالله:لا ياا استغفرالله ليش تخليني اغلط واسب وكل شفت الموت تعرف شنو مثل مشفته اني شفته لك لحد هسه الرجفه بجسمي من شفتك حسيت هذا هو عمري خلص اااخ لو هسه اعرف مكانهم جان وعلي بن أبي طالب الي هسه كاعدين بارضه ماابقي احد منهم
گمرهاشم:ونعم من السيد اين السيد كفوو والله هذا حزام ظهري الي اشد حيلي بي ادري بيك تعلميني اني وياك روح وحدة سبحان الله من جمع بينه هالخوة سيد كلي الشيخه والوالدة عرفو
سيدعبدالله:لا اطمن ماعرفن بس احمد عرف
گمرهاشم:لا معناها هي عرفت
سيد عبدالله:هاشم اول وتالي راح يعرفون
گمرهاشم:ايي وياك بس ذني تلگاهن ناصبات عزا هسه تلفوني وين هسه تلگاه حارگينه بالمكالمات

منار:هسه غير يرد ايي ليش ماشيله خررب
احمد:هاا اشبيج تحجين ويه روحج سالمين
منار:اسكت انت
احمد:هااا ليش يابه شكو
منار:ولك عمك هاشم ميرد على اتصالاتي واني گلبي نار عليه
احمد:هاا لا ان شاءالله ماكو شي هسه اشوف على منو اتصل

طلعت وعفتها طبعا اني عرفت عمي متصوب سمعت حازم يسولف وخابرت ابوي وكلي من كلي وكع گلبي كلشي ولا عمي هاشم اهواي احبه بس لو اعرف الي غدر بي ااااخ جدتي والشيخه حسن اكو شي بس خبرهم ابوي انو مخابرهم وكايلين اله ماكو شي بس الشكبة عود مو زينه وهم عدهم فصل هنه بين الصدكن وبين لا

منار:العصر جنت كاعدة يم حبوبتي اقره وجان تندفع الباب بكل قوتها وتدخل الي متسمه وجان تذب ذلك الحجي الي خله امي توكع من طولها اني من سمعت نار وشبت بصدري مدري منين اجتني القوة وجان اخنگها

يتبع...