رواية اقسمت على حبكِ عند الأمير الفصل السادس عشر 16 - بقلم ضوء القمر

#اقسمت على حبكِ عند الأمير
للكاتبة ضوء القمر

تاهن اسنيني اعله مودك
وجيت ادور عالسنين
الگيتهن خرزات سبحه
إطشرن والدنيا طين .

منار كاعدة وره الباب واسمع كلام السيد وصل للمرة الخامسة وهنا لازم انطي موافقتي جسمي كلها يرجف وحتى بردانه يمي عهد وتكلي احجي تشجعت وكلت: نعم اقبل وانت وكيلي
مجرد ماكلت هيج بدت هلاهل هنا گلبي دكاته الف وجسمي بعده يرجف واحس ببرودة باركولي العلوية عمتي وامي والموجودين كاعدة بالكوشة وصافنة على روحي بالمراية ماادري ليش الخوف ماانتبهت على شي بس من منسا خلت شال تول على متني
..هاا
منسا :يمعودة لا يسوينه عركة اذا شاف هالزنود طالعة
منار :ههه هو صوجي كان مفترض اجيب مستور احسن
منسا : لك يحلو كلشي حلو عليك
منار :فديتها للعلوية مرت الشيخ
عدلت الشال واصلا ويه الفستان الي كان لو سمائي وتصميم حلو اشويه وسمعت هلاهل دخل جان لابس  قاطة نيلي مدري گحلي جان مبين عليه الخجل بس كان صاحب شخصية وثكيل سلم على العلويات وكعد يمي اجاني عطره الي كان يفرض شخصية صاحبه حسيت بانفاسه يمي
كرار بعد ماحجيت وياها صح ضجت من قوة ميانتها بس عجبني شخصيتها مبينه قوية على الرغم ممبين عليها بس بقت ببالي لحد مااردو الموافقة وهنا اني كدرت اسيطر هنا لازم ابدي اغير بعض من تصرفاتها واولهن ميانتها ويه ولد اخوتها صح هيج شي حلو بس مااريد اي احد ياخذ ميانه وياها واحنه شبابنه من نوع باخذون ميانه من يشوفون هيج شخص فلازم اغيرها هاي الي وبس حضرتها اتفقنه على موعد العقد وباقي الامور  واجه يوم المشية السيد اخذ مشية مو اقل من الي اجه بيها اخوها واحنه اصلا اهواي وصلنه الهم ودخلنه لديوان كان الحضور اهواي سلمنه وبدو يحجون بالسالفة وقرينه الفاتحة وعقدلي ابوي مجرد ماانطت موافقتها سمعنه الهلاهل وتم العقد وبعدها رجعنه للديوان وسلمو عليه وباركولي وكعدنه واجاني اتصال من العلويه علمود ادخل شفت هاشم ترخص وكمت وياه دخلني وراح دخلت عيني ثبتن عليها هاي صدك يحجون ولاعبالك كلت اريد فستان مستور استغفرالله كعدت يمها واباوع ايدها ترجف قربت راسي من اذنها
...مبروك
منار :الله يبارك بيك ومبروك الك
كرار : اشبيج ترجفين
منار :هاا ماكو شي
كرار :تمام اشرت لمنسا
منسا :هاا عيني
كرار :بس اريد افهم منو مختار هالفستان الها
منسا :اني وياها ليش عفيه لاتكول محلو ولا تكول غير مستور تره بس اليدين طالعه وهم خاله شال
كرار :اللهم صبرج يروح لج صدك تحجين وذني الزنود شنو والص خررب اخذيها تغير الفستان اريد اخذها ناخذ صور
منسا : لا عفيه شنو تغيره وبعدين ليش متاخذون هنا بالحديقة مكان روعه
كرار :اشلون بله عاجبني اخذها ونطلع نتعشه هاا
منسا :عفيه كرار بس لا تعصب ومن اطلعون هي تغيىه اكيد هسه دلبسها
كرار :ماشي راح امشيها هسه بس اني اعرف شغلي
منار هههه هنا عرفت ليش معصب وعاكد النونه الفستان اوييلي على عقلي فديته بعدك مشفت شي سيد خلي نشوف منو يوكع منو اني لو انت لبسنه الحلقات ويضحك وفرحان باسبحان الله متقلب المزاج اخذنه صور جماعية وبعدها كال نطلع بصراحه ماردت اطلع لان تعبانه بس استحيت ارفض طلعنه للحديقة اول شي ناخذ صور طبعا منسا هي تصور اخذنه اكثر من لقطه وكلهن حلوات واكو وحدة كعدت على المرجوحه وخاله المسكه بحضني وهو يباوع عليه ومخلي ايد بجيبه زالثاني مرتچي على المرجوحه واكو وحدة ثاني اجه من وره وخله اديه اديه الاثنين على كتفي وجاي يحجي وياي معبالنه ناخذها منسا بس اخذتها وكانت حلوة بعدها اجاه اتصال وكال غير مرة نطلع فعلا اترتاحيت  كمنه كل يوم تنواصل ونتعرف على بعض وحجالي عن نفسه مرات تعارك ومرات لا صافيه بس والله تعودت عليه مااحس بيومي كل اذا مانحجي ونتعارك بس هو احلى شي بعد كل عرگة مااكدر على روحي خاصه اذا عادنته اضحك وهو يفور من العصبية اوويلي يطگ عرگ الهواشم بسرعة طبعا صار اسبوعين على خطوبتنه ويعني ومتفاهمين ولو احس اكو شي ضامه عليه بس اوويلي من يعصب لو طلب شي وماعجبني هذا هو يزعل واحمد الغبي دوم يخبث عليه فديوم من الايام جاي احجي وياه وهذا خبلني بالرسايل
..كرار بس اشويه خلي اشوف هالغبي شيريد
كرار :شكو منار ومنو هذا
منار : احمد اشبيك بس لحظه وفتحت اتصال وياه والافندي اجانه صوته
احمد :عميي شسالفة ليش متردين هااا ااخ لو يمي جان عرفت اشلون اخليج تردين
منار :احمممد تره مكالمة جماعية اذا جفصت اموتك سامع
احمد :لا يالحمزة صدك والله واجت لعندي اشلونك سيد سلام عليكم
كرار :هلا وعليكم يابه تره جانت يمك معقولة اشتاقيت لعمتك
احمد : هههه لا سيد هنا مااقبل اني اشتاق والمن لعمتي هو خلي انسه شكلها وبعدين اشتاق
منار :هاا هيج صارت خوش لعد خلي اشوف الي يجاوب عليك لو ردت شي
احمد :ههههه اكول سيد انت اشلون تقدمتلها مقتنع راح اتعبك هاي
كرار : ليش تحجي عليها مااقبل احد يحجي عليها واب اكيد مقتنع
منار :فديت هاا مستر احمد اجاك الرد سريع لولا عندك اعتراض
احمد : ههههه والله عمي زين سحرج فاد بي
منار :عزززا يمعزه لك ياسحر هذا اعوذبالله
كرار :على كيفج يابه تره صدك انتي سحرتيني بس من نوع ثاني
احمد :هااا سمعتي هو كالها خطية ههه
منار هالغبي كام يجفص :اكوول احمد تره التقرير كمل بس ماسويت الك وهسه وكت مابقى اشوكت تسوي لروحك
احمد :لا يالحمزة صدك تحجين اني شكلت هاا واني انتظر وصار ساعة اتصل وانتي حضرتج كاعدة دك سوالف واني
منار : طبك طوب اني شكو وبعدين انت شكو اسولف ولو لا ويله ادعبل حير بروحك
احمد : اوويلي عليج عود هاي اني ابن اخوج يهون عليج باجر انطرد لو الدكتور يصيح عليه واتفشل
كرار :وانت اشبيك ماكتبت تقرير
احمد :هلا انوب السيد هم صاف وياها ههه مووجنت مشغول
منار :ايي خطية يله ولي ولك والا اكلك راح انهي الاتصال احم سيد وسديت الجهاز وخابرت على كرار
..الوو اسفة على قطع الاتصال
كرار :ههه لا عادي بس ليش قطعتي
منار :يمعود هذا مراح يحل عنه لحد مايخليني انطي وعد اكتب
كرار : هو انتي صدك تكتبين اله
منار :اي بس مقسمين التقرير هو عليه الترجمه واني اكتب الانگليزي اصلا مكملتهن بس الغبي مشافهن
كرار :امم تمام اي اشوكت تكملين
منار:ليش بعد تقريبا شهرين
كرار : لازم تبدين تجهزين لان بس تكملين نتزوج
منار : هاا وليش مستعجل
كرار :لعد شكو خما تبقى سنه واصلا لو بيدي هالشهر نتزوج
منار :لا عفيه شنو هالشهر وين الحگ وبعدين دوامي وماعندي وكت اصلا
كرار : لعد متشوفيني مأجل لحد متكملين واني ماعندي شي مكمل كلشي والعلوية جاي تجهز والغرفة هالشهر توصل
منار : امم اوك ماشي مثل متريد بس دوامي اشلون
كرار : اشبي داومج
منار :ابقى ببغداد
كرار :لا خوش عليج مگرن وابقيج هناك لا انقلج بالنجف شلي بدوخت الراس
منار مابيه اجادله اكثر واصلا مو مال اجادل صعبة تصير روحتي ورجعتي اتفقنه بس اكمل نتزوج

گمرهاشم كاعد بالديوان وافكر بعمي كاظم حالته ماعاجبتني كلش كلت اروح اله والهم شسالفة واو اعرف هو تعبان من ولده بس هذا حظه ماحصل على ولد يرفع الراس بيهم قلقان كلش عليه خايف يصير بي شي ساعتها ماادري شنووممكن يصير رحت عليه هو ظل كاعد ببيته الي بالبستان هو يحب يكعد هناك دخلت البستان لكيت كاعد يقره كتاب
..سلام عليكم حجي
كاظم :هلا وعليكم السلام هلا بولدي هلا بالشيخ نور البستان
گمرهاشم : والله المكان منور باهلها اي عمي اشلونك شخبارك
كاظم : الحمدلله كاعد وحدي ومرتاح لا من قيل وقال ولا طلايب كافي الي شفته اكمل الي بقى من عمري وحدي احسن
گمرهاشم اباوع بعيونه حزن جبير واشوفه اشلون مهموم الله يساعد على بلائه كلشي ماحصل لا زوجه بيها ولا ولد ينرفع الراس بيهم
..عمك خيرك ليش المهم اشوفك متعوب
كاظم :اااخ يابن اخوي شحجي وشكول هو الي مثلي وولده منزلين راسه هم يرتاح لا وانوب مفشليني وياك وويه اخوي وين انطي وجهي اتمنى الموت كل يوم بس شبيدي الموت ياخذ عزاز ومااخذني وياهم هنيالهم ارتاحو وبقيت للهم وحدي اااه يهاشم اصلا ماعندي وجه اباوع بوجهك واكعد وياك وعمايل هالبزرة الگشرة من عسى الموت اخذهم وجهي اسود كدامك شگل لاخوي من التقي بي اگله ولدي يگيدون لولدك
گمرهاشم : لا عمي لا تكول هيج انت وجهك ابيض واني مزعلانه منك وعمري ماشلت عليك وانت تعرف اشكد اعزك وانت بمثابت المرحوم واذا على ولدك هاي السالفة اني وياهم لا تشغل باك لابد تصف الامور والدنيا متدوم لاحد
بقيت اسولف وياه بس كوة يرفع عينه بعيني اشكد تألمت عليه حسافة هيج خلفته سبحانك ربي على حكمتك بعدها توسل بي يجي وياي ماقبل هو هنا يرتاح
كاظم : لا وليدي خليني هنا مرتاك كلش وهم المكان يرد الروح
گمرهاشم :والله بدي تجي وياي بس مااكدر اجبرك واني ادري كل الزين اشكد تحب هالمكان صار لازم امشي محتاج شي 
كاظم : سلامتك كلشي مااريد
گمرهاشم :يله اودعناكم
توني مشيت وجان استغرب نبرت صوته
كاظم :هاشم انتبه على مرتك تراها بخطر
گمرهاشم :شنووو عمي شتحجي انت شنوو مرتي بخطرر سااامع شي كلللي
كاظم : خلي عينك على مرتك ولا تسأل كل الي اعرفه هي بخطر لا تخلي احد يوصلها ويجبيها  غيرك
گمرهاشم اني هنا اريد اسيطر على اعصابي مااكدر كلشي ولا العلوية هنا خط احمر ركبت سيارتي وشخطتها واتصل عليها مترد
..خرررب لجج ردي
معقولة توصل بيهم المواصيل يأذون مره حتى واني كان عداوتهم وييااي اني محد الا دخل غيري اااخ لو احد يفكر لو مجرد تفكير يقرب منها اگلبها عليهم اسويها دم هسسه لو بس تجاوب طلعت للمستشفى اريد اطمن گلبي نار عليها مااريد افكر بشي غير تكون بخير من كد عصبي همزين ماسويت حادث خلال نص ساعة وصلت المستشفى ركنت السياره ودخلت مستعجل المشكلة مااعرف باي غرفة سأل الاستعلامات
..خوي بلا زحمه عليج التخديرية منسا وين
..هلا اخي تقصد العلوية
گمرهاشم اشكد باردة واني ناار صاير: اي
..حاليا هي بغرفة العمليات صار ساعتين نتكدر نتظرها بالاستراحة
گمرهاشم من كال بالعمليات ارتاح گلبي اشويه وكدرت اخذ نفس :هاا اوك واشكد اطول
..مااعندي علم بهالشي ان شاءالله ميطولون
گمرهاشم تشكرت منها وطلعت بالحديقة اشتم هوى لان نفسي ضاق عليه اااخ لو يصيرون بيدي اشوفهم الموت الاحمر اشلون يصير

سلام : غسان انت متكلي اشوكت ناوي نتفذ الي گتلك عليه هاا
غسان :وشكو مستعجل تره السالفة تحتاج تخطيط على الكيف مو هيج هااي حرم  الشيخ المصون يعني موحي الله اصبرلي انتظر الوكت المناسب
سلام ضحك بخبث على كلام اخوه :ههههه عفيه عليك اريد كون يمنتى الموت ميحصله الا اشربه من نفس الكاس اني اصير جوة ايده
غسان :هسه عوفنه من هاي السالفه وگلي هذا شناوي عليه
سلام :منو تقصد
غسان :يعني منو غيره شيخ عدنان لازم نسوي مشكلة بينه وين هاشم وهنا نضرب الضربة الجيبرة
سلام وهو يطبطب على كتف اخوه :هه اطمن السالفة كلهن يومين بالكثير وتگب العرگة وحقگ الا اعلگها بينهم
غسان :هو هذا المطلوب
سلام ايي ياهاشم بدينه العد النتازلي كافي اهواي عليت اجه وكت احنه نعله خرا بشرفك انت تصير شيخ لا بالحيف اعوفك

منسا بعد ثلاث ساعات بصالة العمليات طلعنه جنت تعبانه كلشي دخلت للغرفة شربت مي واخذت تلفوني واشوف عشرين مكالمة من هاشم
..عززا هاي شصاير وهي داك خابرت عليه كبل واجاني صوته
گمرهاشم :انتي متگليلي وين
منسا : هاا بالعمليات ليش صاير شي عليك الله
طمني اكو شي
گمرهاشم :انتي وين بويه شو ريحي گلبي
منسا كان يحجي وهو كوة يجر النفس حسيته خايف ومتوتر
..اني توني طلعت انت وين
گمرهاشم : جيبي غراضج وتعالي انتظرج بالحديقة
منسا خفت صاير شي :هااشم بروح العزاز صاير شي وگلبي نار
گمرهاشم :وغلات العزاز يگلبي ماكو شي بس اطلعي وفضيها
منسا بسرعة بدلت واخذت جنطتي وطلعت لكيته واكف بالحديقة وجان يخابر رحت عليها هو من شافني ابتسم ونظرلي بنظره مااعرف شنو افسرها خوف على حب على قلق

گمرهاشم سديته منها واتصلت بحازم يجهزلي كم حارس بعدني احجي وياه وجان تجي الخوف جان بعيونها واشوف رجفه بجسمها ااخ لوما المكان كان لميتها لحضني وطمنت گلبها ابتسمت الها بكل حب
يله خلي نطلع
منسا :هاشم
گمرهاشم غمضت عيوني هيج اسمي حلو : عيونه بس خلي نشمي للسيارة وبعدين اسألي
منسا ركبنه السيارة وگبل التفت عليه  :هاااشم بداعت العزاز طمني شصاير شي
گمرهاشم :وغلات العزاز وانتي منهم  ماكو شي بس جنت مار منا وگلت اجيبها بدربي
منسا : بس انت متصل عشرين مرة وانت متسويها
گمرهاشم جريت ايدها وقربيتهن من شفايفي وطبعت بوسه هادئة على اديها : ههه هسه انتي على الاتصال تره عادي لان ماجاوبتي اول مرة خفت واتصلت اشبيج بويه اطمني ماكو شي
منسا بقيه يهدي بيه صح مو ذلك الخوف بس حاسته ضام شي وصلنه للبيت سلمت على الحجية عمتي فدوة لعينها اشكد حنينه والشيخه الي هي بركة البيت وصعدت لكيت هاشم توه مكمل اتصال اشكد يخابرون عليه هو شافني وابتسم
گمرهاشم : منسا بعدج خايفه
منسا : ااه يعني
بس كلت هيج اجه عليه وحضني تفاجئت
گمرهاشم :اطمني ماكو شي ماطول راسي يشم الهوى لا تخافين واني موجود يله ادخلي اسبحي وصلي وانزلي نتغدة

منسا: ان شاءالله
دخلت سبحت اشويه ارتاحيت صليت ونزلت تغدينه بس هاشم وضعه معاجبني والشيخه هم حست بهالشي
الشيخه : يمه هاشم علامك صافن وحاير
گمرهاشم :اطمني شيخه ماكو شي بس حسبة ببالي لا يظل بالكم
ام جاسم :يمه دير بالك على نفسك مو كله طلايب الناس وحل مشاكلهم تفرغ لنفسك لرتاح
گمرهاشم هه تكلي تفرغ هو اني كلما احاول اخذ نفس لابد ان يصير شي وهالمرة خايف اهواي :الله كريم يمه

منسا بليل بعد ما الكل راح نام جان هاشم لسه مجاي كاعد يمه سيد عبدالله كلت انام لان اكيد راح يطولون بالكعدة توني خليت راسي وجان اغفه ماحسيت على شي وره فترة حسيت على شخص يحاوطني عرفته من عطره بقيت نايمه بس وره مدري اشكد حسيت عليه يغير ملابسه استغربت كعدت على حيلي
..هاشم هاي وين رايح
گمرهاشم :ماكو شي ارجعي نامي عندي شغلة افضها واجي
منسا باوعت على الساعه كانت بالثنتين بليل
..انت صدك تحجي شنو الشغلة الي تخليك هيج وكت تطلع وانوب وحدك
گمرهاشم : اطمني بويه اني اعرف شغلة ومو وحدي لا تخافين ارجعي نامي تقربت يمها وبستها من گصتها جلبت بيه
منسا : هااشم شنو تروح مااخليك عفيه لا تحرك كلبي والله خايفه حل ايديه من دشداشته وباسني مره ثانيه وراح خايفه اهواي مدري ليش احسه اكو شي راح يصير وهم مو زين سترك ربي

يتبع...
اسفه اذا قصير بس الجاي اطول 😁😘