رواية اقسمت على حبكِ عند الأمير الفصل الثالث عشر 13 - بقلم ضوء القمر

#اقسمت على حبكِ عند الأمير
للكاتبة ضوء القمر

من تعاتب عاتب الروس  الثگال
ولا تجامل صيت  بفياي الچذب
ماتخيط  العنبر  خيوط  النخال
الطير يحزن لو كسر عود الشلب
.....
وشيل راسك من يمر بيك النغيط
ودهدي سترك لوشفت ذنب المرز
وخلي محچالك على زمور  النياب
وهيه  حيره الگاع  تطلگ من  تنز
ولاتذل روحك بصبخه وانت فيض
على المامش  راهيه  خيوط  الدرز
الما يطيب بسمسم  حلوگ الحصاد
يبات  عدنه  ونگدر  نطيبه  بحرز
......

وبالمضايف لا تغث حلگ الدلال
ودير بالك لا تداوي بكل عشب
ولا ترخي جدامها ابوكت النزال
بالمزامط تطفح ضهور  الشهب

منسا :بليل جنه كاعدين عالعشة وبابا حجه
سيد هادي :أي علوية الجماعة اجوي
فاضلة :بلي سيد اجوي والكلام وياهم يريح اشكد ارتاحيت الهم انت شرايك سيد
سيد هادي : والله للامانه شيخ گمرهاشم ونعم منه صاحب أخلاق رفيعه وابن أصول والكل تحلف بي كافي هو ابن الشيخ اسماعيل الله يرحمه بس الرأي الأول والأخير الج بنتي
منسا :اباوع على بابا احس عنده حجي بس مثل الحاير اشلون يحجي بعد العشه نظفت المطبخ وثعدت لغرفتي واني افكر ليش تقدملي بس اكيد امه والشيخه الي مخططات لهالشي بس هو شنو موقعه زين اني شنو اريد اقبل لو ارفض ليش احس بابا موافق هو بصراحه الي سمعته انو الكل تشهدله وتحلف بي وشهامته ورجولته بس ليش من شفته بذلك اليوم حسيت بگلبه قاسي وشكله هم على الرغم جماله احسه لغز صعب حله
بقيت افكر لحد ماغفيت ثاني رحت للدوام كان يومي عادي حاله حال باقي الايام بعد الظهر رجعت للبيت جابني رضا بس جان صافن وهم ماحجه اي شي وهم  مو من عادته واني هم عفته رجعنه للبيت اول مادخلت سمعت كرار يصيح تفاجئت لان احنه صوتنه ميطلع
..رضا شكو شصاير
رضا : ماكو شي ادخلي
منسا : اشلون ماكو شي وكرار يصيح اول تالي صوتنه يطلع
دخلنه الوضع جان متوتر بابا مبين عليه العصبية ومصطفى هم اما كرار فصاير كتلة نار سلمت ردو بس بثكل تفاجئت وهم بقيت ساكته اني بهيج مواقف ابقى ساكته اصلا محد ياخذ مني كلمة توني صعدت الدرج وسمعت كلام كرار

كرار : منسا انتي قابلة بالسالفه كلها
منسا  طبعا حجها بغضب التفت عليه ردت اجاوبه بس بابا سبقني
سيد هادي : كررار مو وكت هالحجي هسه روحي ارتاحي بنتي
منسا اني بقيت بين متحيرة بين ابقى واسمع الكلام وبين اصعد اغضل اصعد صعدت لغرفتي بس جذب سمعي كلامي 

كرار : سيد بس فهمني كل السنين وانت ساكت ليش احنننه موو اخوتها هاا ياناس راااح اتخبل اربع سنوات هااي وين صايرة

منسا : بقيت صافنه شنو اربع سنوات عن شنو يحجي لازم اكو شي اني مااعرفه والا كرار ميعصب هيج دخلت غرفتي وكعدت بكل هدوئ واني افكر بكلامه حاولت اوصل لنتيجه بس فشلت من التعب والتفكير كوة كمت غسلت وغيرت ملابسي ونمت مااريد اسمع او افكر بشي من التعب بسرعة غفيت

سيد هادي : سيد كرار مو هيج الحجي يكون اهدئ وكلشي ينحل
كرار :اشللون ماتكلي اشلون
مصطفى :كرار شسالفة يخوي شنو قابل السالفة عيبه الناس طلبوها وهي جانت طالبة واكيد السيد مينطيها وهي طالبة واذا على سيد تحسين مصار شي قسمه ومصارت شنو يعني  بعدين اصلا العلوية مقابلة
كرار : ابو امير انتو ليش مجاي تفهمون يعني حلوة بحقي اسمع من السيد مخطوبه من گلي بقيت صافن اريد ارد مااكدر والله صعبة اختيي موگفيها اربع سنوات واني ماادري ادري احنه مالنه كلمة
سيد هادي : كرااار لا تنسه الامر اول واخير الي واني لوما متاكد من الجماعة فلا انطيها طول هالاربع سنوات والشيخ كلما يجي يحجي بالسالفة لا عبالك سااكت بس اختتك طالبة ودراستها مو اشويه وهم اني الي رفضت انطيها بعمر صغير واءا على السيد محلوة منه يگلك اختك مخطوبة هي عاي الاصول  اني انطيت كلمة للشيخ من زمان والي طلب بنتي رجاال الي تحلف براسه واخلاقه مو اني الي اشمر بنتي وين ماجان هاي وحيدتي ونبض گلبي اني لو بيدي ماازوجها بس مااكدر سنه نبينه هاي ومو من حقي ابقيها يمي العمر كله

كرار  هنا كل هذا الحجي ماعجيه وهم مقابل بالسالفة كلها 
كرار : بما انو انتو مقررين ومنطين كلمة اني ماعندي اي كلام بس خلووها ببالك بعد عقدهم اعقد على اخته وخلي اشوف اشلون ماينطيها

سيد هادي : اشللون هالحجيي سيدد على اي اسااس تريد تعقدد على اخته هااا تريد تخليها راس براس
كرار بعصبية بس صوته مارفعه بوجه السيد: ايي لريد راس براس وشتردون تسمووها سمووها هذا الي عندي وبقت يمكم بعد اترخص اني
سيد هادي : وييين تعال خلي نكمل حجينه
كرار : سيدنه حجيت كل الي عندي وما عندي غير هالحجي
سيد هادي : مال تاخذها راس براس هااااي سالفة تريد اخطبها الك بالاصول بس بعد زواج اختك وكااافي عصبية اني مااخذ قرارتي منكم اعرف شنو الي يناسب بنتي واما صديقك احنه مانطينا اي رد حاله حال غيره اجه ومصار نصيب مفهووم

مصطفى : اكيد سيد القرار الاول والاخير الك وللعلوية واحنه وياك واني لوما اعرفه لهاشم هم فلا اقبل على رغم صعب عليه اشوفها بعيدة عنه بس احنه نشتري الرجال الي يصون المرة وانت سيد كرار كل عمرنه ننصح بالناس هسه تريد تاخذ اخته وحدة بوحدة هذا مو حجي

فاضلة : سيد اني من يوم ماشفت بنته للشيخ جان بخاطري اخطبها لواحد من السادة وبما انو سيد كرار هيج قرر نخطبها اله
سيد هادي : اني ماعندي مشكلة نتشرف ناخذ منهم كريمتهم بس بهاي الطريقة مستحيل سمممعت كرار تريد تفشلني وياهم
كرار مااعرف ليش هيج كلت هاي مو اخلاقي ولا تفكيري بس منسا عندي خط احمر وغالية اهواي عليه اختي مو اشويه ومو اي احد يستاهلها واكيد اخته كريمته هم غالية عليه اصلا اني مجان عندي علم عنده اخت بس من سمعت العلوية ومنسا يحجون ببت الشيخ واشلون امي تريد تزوج واحد منه اجت على بالي يله هو اني اخءت قرار ومستحيل اتراجع عنه
..لا سيد معاش الي يفشلك استغفرالله المهم اني كلت الي عندي اشويه ماتفهموها فهموها طلعت وعفتهم على الرغم مصار اهواي من راجع من بغداد  ضجت اهواي يعني اختي من اربع سنوات موگفيعا هسه يله اعرف هسه لو ابن عمي مااكول شي بس غريب حتى وان كان صديق الوالد السالفة صعبة مدري اشلون وصلت لمرقد الامام فعلا محتاج ارتاح اشويه توضيت ودخلت لحضرته لفحتني اجمل عطر بالكون الراحه النفسيه هنا مو طببعية هنا دوم اذب همي صليت وطلبت من ابونه يوفقني بقراري مااريد بيوم اتندم على قراري بس اني ورطة روحي بعد استغفرت ربي وبقيت كاعد لحد المغرب رجعت للبيت جان السيد وسبد مصطفى كاعدين بس الوالد ضايج مني رحت يمه وبست راسه
..السموحه سيدنه حقك على راسي رفعت صوتي بحضرتك اعتذر منك بس مو سهل عليه وانت تعرف العلوية اشكد غالية عندي
سيد هادي : اني مزعلان منك وليدي حقك تعصب وتضوج لان ماعندكم خبر بس اطمن العلوية بأمانه رجال الكل تحلف بشهامته وانت هم اريدك تقدر كريمته ادري بيك مو من كل گلبك هذا القرار بسانت قررت بعد ولازم تتحمل قرارك
كرار : ان شاءالله مولاي
صعدت لغرفتي وكعدت بسريري ومخلي راسي بين اديه وافمر اشلون راح اتعامل وياها ماجنت متصور هيج قرار اخذ يخص حياتي بحالة عصبية اخذته مااكدر اتراجع بعد اشويه واندكت الباب
.. تفضل 

منسا : وره ساعتين كعدت على صوت اشعارات شفت الاشعارات وبقيت كاعدة اشويه واندكت الباب
..تفضل
جان بابا ياهلا بالغالي اليوم منورني
سيد هادي : اشلونها غاليتي
منسا : عدلت كعدتي واجه كعد وخليت راسي بحضنه دوم اسوي هالحركة احس نفسي بعدني صغير وهو يلعب بشعري..دامي اشوف هالبسمه على وجهك اني بخير
سيد هادي : عسى دوم بخير اخبار الدوام اشلونه
منسا : تمام روتين عادي حلو دوامي سيد ممكن سؤال
سيد هادي : جيدا جواب
منسا : سيد كرار شجان يقصد بكلامه
سيد هادي : السالفة طويلة واني جاي احجيلج
منسا بقيت بحضنه واريد اعرف شنو هالسالفة الي خلت كرار هيج يعصب لابد اكو شي جبير

سيد هادي : السالفة يا بنت ابوج قبل اربع سنوات تذكرين من كلتي ساعدة رجال بحضرة الامام
منسا :أي بلي اذكر هو مو نفسه الشيخ ابو جاسم
سيد هادي : بلي هو بعد ماساعدتي وتعرفت غليه قوت علاقتي بي كان شيخ ونعم منه اخلاق عالية صاحب حنگه وحكمه الحجي وياه يشرح النفس وهو هم اهواي يحب يحجي وياي المهم مااطول من خلال هاي الاشهر عرفت طيبة گلبه وحنيته وفد يوم فاجأني بطلبه الي هو طلب ايدج هاي جنت انتي اول سنه للج بالجامعة اني بوقتها بقيت حاير انتي بعدج صغيرة والشيخ اعرف اخلاقهم واصلهم وابنه هم مو اقل من ابو گتله انطيني كم بوم واردلك خبر وهو اكيد كان جواب براحتك المهم ثاني يوم صار فصل وطلبو مني احضره وطلبت من الشيخ وسيد صادق يجون وياي والله هناك الشيخ ماقصر كلامه كان ذهب وكدر يحل السالفة بدون ظلم فاكو واحد من شيوخ كال اني انطيك بنتي كنه الكم هنا الشيخ انحط بموقف محرج هو مياخذ ابد هدية ومن باصول الديوان اذا انطت مرة هدية موسهل تنرد بس الشيخ عرف اشلون يرد الهدية كلامه كان سد حلوگ للكل كال مرت الشيخ  ماتجي عليها ضره ومحد ياخذ مكانها هي الشيخه فقط هنا كان موقفه كلش عجبني رغم مامو اي شي بينه على ذيج السالفة بس كافي موقفه بعدها كتله هي بعدها صغيرة وتوها جاي تدرس كال واني راح انتظر اليوم الي تشرف بيتنه وتحمل باحفادي اتفقنه يوگفج للشيخ ابنه گمرهاشم واجت ايام وراح ايام واشهر وكال بكل مرة التقي بي يذكرني بيج كال دوم يسمج چنتي العلوية وجان مقرر على العام الفات يتقدمو رسمي بس الي صار كان صدمه وهي تدهور حالته الصحية وانطه المشيخه لابنه والصدمه الاكبر هي وفاته الي مكان بالحسبان واشكد جان يتمنى يوم يشوفج ببيته بعد وفاة الشيخ هنا لازم يكون النه حجي ثاني لازم نعرف راسنه من رجلينه ومن حجيت ويه سيد صادق  خبرني انو الشيخ حاسب لكلشي يعني اكيد كاتب بالوصيه واني بقيت انتظر والسيد صادق انطاني خبر بانو بعد سنوية الشيخ يجون
وهاي همه اجوي صح هو مااجه لان يريد السالفة تتم على خير وبحلال واني قبلت بهالشي لان اعرف اخلاق هاشم

منسا : بابا يحجي واني مصدومه كل هذا صار واني ماادري زين اني صاحبت الأن اشلون يظمون عني
..بابا شنو افهم من كلامك يعني موافقتي او رفضي واحد
سيد هادي : لا طبعا الج حق الاختيار
منسا كمت من حضنه وخليت عيوني بعيونه : اشلون اي حق الاختيار بابا انت منطيني وهم منطي موافقة مبدئيه الهم يعني كل هذا مجرد اشكاليات
سيد  هادي :  لان اعرف شنو الي يناسبج والجماعة ماعدهم علم صح هاشم بس يعرف والا اصلا همه جاين يخطون ميعرفون بالسالفة غيره واني اعرف بيج مراح تفشليني
منسا حرت شجاوب يعني اني مجبورة اقبل انب مامعترضه عليه لا شاب ونعم منه بس سالفة اربع سنوات موگفيني هنا المشكلة  :وشنو لازم احجي
سيد هادي : فكري ورديلي خبر واني واثق من قرارج
منسا: باسني براسي وراح بقيت صافنه بكلامه شنو لازم اكول يعني متاكد مني راح اقبل لا مستحيل افشله او ارفضله طلبه حايرة محتاجه احد يساعدني ويفكر وياي  بس منو راح يفيدني بعاي السالفة فكرت اجه ببالي سيد عبدالله
..اي والله ماكو غيره بي اشلون احجي وياه استحي اشلون سالفة هاي
تشجعت وخابرت وانتظرت يرد

سيد عبدالله : الووو
منسا : سلامُ عليكم
سيد عبدالله : وعليكم السلام ورحمة الله وبركاته ياهلا بالعلوية اشعجب مرينه على بالج
منسا : انتو على بالي سيد
سيد  عبدالله : هههه والله اني اشوف بس نرجس على عالبال
منسا : غير صديقتي واختي وانت اخوي اسأل عليكم دوم بس صدك مشغولة بالدوام
سيد عبدالله : تسأل عليج العافية هسه تجين يمنه وكل يوم نشوفج
منسا : شتقصد لازم تعرف بالسالفة
سيد عبدالله : اي اكيد اعرف اشلون لعد هاشم اني وياه الروح والقلب
منسا : اكدر اسأل
سيد عبدالله : عن هاشم مو
منسا : اكيد
سيد عبدالله : اي تفضلي شنو تريد تعرفين ولو افضل تعرفين كلشي منه بس كولي بالخدمة
منسا : خادم ربك هو سؤال واحد مقتنع بالسالفة الي صارت قبل اربع سنوات وهم يعرفها
سيد عبدالله : اشوفي اكلج شي هاشم مو لان صديقي وعشرت عمر وياه لا ابد بس رجال ونعم منه عمري ما شفته منه العيبة دومه رزن وهيبة صدكني شخص مثل هاشم الف من تتمنى  اشكد حاولن وياه بنات بس دوم يبعد نفسه اصلا خلص الجامعة بس اني وياه حتى اصدقاء مو أي واحد لا يختارهم من بين الكل واذا على سالفة هاي هو مجان يعرف صح ابوه جان يلمحله بس أي معرفه ماعنده غير قبل ست اشهر يله عرف وهو ماعنده مانع اصلا واثق من اختيار ابوه بعد شنو عندج

منسا :أشكرك سيد تعبتك وياي ان شاءالله خير
بعدها سديته وافكر بكلامه يعني هم مثلي انجبر ولو ماكو رجال ينجبر بس حياتي اشلون راح تكون

المغرب اجه كرار رحت لغرفته ودخلت لكيته كاعد بس شكله ضايج
..مرحبا
كرار : مراحب تعالي ليش واكفه
منسا : ضايج
كرار : اجذب اذا كلت لا
منسا : بسبب هالسالفة
كرار : اني صح انقهرت لان ماعندي علم بس شاهد الله اني هاشم اعرفه خوش زلمه بس لو علاقل عاقدين الكل يعرف بدل ما كل هالوكت احنه مندري اهم شي ان انتي ترتاحين انتي قابلة بالسالفة
منسا شگوله رأي اصلا مراح يقدم او يأخر نفس الشي : الرأي الي انتو تكولو اني اكوله
كرار : يعني موافقه ولو منكدر بعد نكول غير هيج
ابتسمت الها من اشوف عيونها كل حزني يروح احس براحه
..لج انتي شنو اشلون راح اكدر بدونج اوووف الله يساعدنه على غيابج
منسا :هه فديت اخوي اني اجبره كل يوم اجي ههه
بقينه نسولف ووره يومين انطيت موافقتي شفت الفرحه على وجه بابا وماما وحتى رضا وكرار

منار :ولللك احمد حقييير وينك
احمد :من مات احمد كود شكوو تصيحين هاا
منار :هههه اريدك تساعدني بالركص الشيخ راح يعرس كلوووش عرس الزين هيل وطش بالولايه
احمد :خررب بحظي تريدني اني الدكتور أحمد اركص لا ربحنه
منار :طننن لعد اني شنو جيس حب غير دكتورة هم عابت ولك لو منك هسه اروح اجيب فرقه
شهاب :خيير شكو شسوون بالفرقة
منار :استلم اجه الثاني ولكم هسه مفترض منكم تركصون الشيخ وأخيرا راح يعرس
شهاب :هههه هو هم هيج راح اركص للصبح بس بالعصا مال الشيخه ومنو السبب انتي
منار :الله ساعتها اطير من الفرح هيج وكود تسويها والله احبنها للعصا ههههه
احمد : خو انتي تكيفين بس ولا يهمج انتي ويانه خما وحدنه ننكتل
منار : هههههه
بدينه نجهز للمهر بس هاشم ساكت اصلا اعرف بي يضحك جذب اشكد جان ابوي يتمنى هاليوم تجمع بعيوني الدمع بس مسحتهن فرحت اخوي مااريد شي يخربها اسبوع كامل نجهز كملنه كلشي بحيث ماما ماخلت شي مسوته الكوشة وباقي التجهيزات واصلا عهد راح هي وزوجها الهم علمود تكمل التجهيزات اما هاشم وصه على بدلة كال هو مو بدلة كلش لا فستان بس تصميمه كلش نازك ستور وحلو لونه اوف وايت وبي ورد ناعم على الصدر
بيوم المهر الكل مخبوص خطار وشيوخ كومه يوو من غير أصدقائه والناس
..ادري عرس بس مو هيج تره هاي خطبة بالعرس شيسووون
ام جاسم : اشش ولج الناس منا اشتغلي وانتي ساكته هم يله
منار : هو اني اكدر احجي صاار حجية تامرين
طبعا هاشم عزم الامه كلها شكو شيخ عزمه مشاء الله الناس مالت الديوان همزين جاب طباخين احنه بالدعش كملنه كلشي عماتي يمنه وخالاتي يعني هوسه معدله المهم صبو الغدة وكملنن كلشي خلال ساعة لان هاشم كال الجن ساعة وحدة تكملن كلشي ههه مو عباله عدنه العصا السحرية ونكمل كلشي بس والله عماتي وخالاتي والنسوان الاكبار خلال ساعة او اقل كملنه كلشي واحنه رحنه نبدلت لبست فستان چويتي والردان كله نقش ذهبي والشال هم كلش حلو احنه كملنه ونزلنه وننتظر ينزل العريس واشتغلت الهلاهل يمه فدوه لطوله هو كل عريس عريس

گمرهاشم : بعد ماردو الموافقة هنا اني ماادري بشنو حسيت بس ماجنت فرحان ماادري ليش لان متوقعت هيج يكون زواجي اصلا لوما الوصية فلا اتزوج بس اااخ الوصية حكمتني المهم خلال اسبوع جهزت الحجية كلشي ودزيت عهد وعامر عليهم يكملون كلشي الحلقات اصلا اجني هديه من شهاب الافندي مقبل اشوفهن بس اشلون عرف قياسها اكيد منار ساعدته
واكف كدام المراية واباوع على صورة الشيخ اشكد جان يتمنى هاليوم اهواي محتاجه بهذا اليوم بس الزمن اخذه مني غمضت عيوني بقهر واخذت عهد على نفسي مااقصر بحقها اريد الشيخ دوم يبقى راسه مرفوع
عدلت غترتي بيضه وبيها خيوط ذهب واسود ودشداشه اوف وايت ومن الياخه ذهبي وساعتي لون ذهبي وسبحتي هم لبست محبس كان للولد هداليا يوم سلمني المشيخه عقيق ازرك كملت ورشيت عطري Boos اسود ونزلت وبلشنه بالهلاهل الي متخلص ماعدنه وكت طلعنه بسياراتنه اخذت مشيه كلها شيوخ هذا كال طلب الشيخ السيد كال يمي كاعد وعمي هم المهم طلعنه من العمارة تقريبا اكثر م من ثلاثين سيارة طبعا بقيت حاير وين راح اكعدهم وذوله عشيره بس لازم عنده علم باني راح اجيب اهواي بعد ثلاث ساعات وصلنه النجف ودخلنه منطقتهم سدينه المنطقة والحماية استقبلونه السيد واخوانه ونسابته وعشيرته كان ناصب چادر هم خوش سوه المهم بعد السلام وكلام اني خليت سيد صادق وعمي اخوي جاسم ابو شهاب همه يحجون والسيد قبل طبعا بعد الفاتحة السيد كال نعقد المهم طلعنه وياه ودخلنه لغرفة جانت مجهزة بتخم نازك واصلا مبين كعدة بس مكان صراحه عجبني كعدنه واشويه ودخلت ووياها الشيخه ومرة جبيرة مبين عليها الوقار جانت هاي اول مرة اشوفها كعدت قريب عليه مبين عليها التوتر هو اني ناقص توتر وتجين تكمليها حسيت بشعور حلو مااعرف سنو اسمي بس اول مرة بده السيد يعقدلنه والي صدمني المقدم والمأخر اني جنت حاط خمسين بخمسين مو علمود شي بس هيج حطيته وهو مجرد رمز بس من كال

العلوية منسا هادي عقيل هل تقبلين الزواج من گمرهاشم اسماعيل على مهر مقدمهُ قران ومأجرلهُ رؤيت الامام المهدي عجل الله فرجه ان قبلتي قولي نعم
كررها خمس مرات على عدد اصحاب الكساء بصراحه اول مرة هيج اسمع بنفس الوقت عجبني كلش ردت بصوت اني من يمي بقيت حاير اشكد ناصي
منسا : نعم اقبل
بعد ماجهزنه كلشي واجه يوم المهر سمعت ان جايب مشيه سادة المنطقه اهواي خفت جنت لابسه فستان الي جابه الي عجبني ذوقه وهم مستور وهذا جان احلى شي كالو راح نعقد لبست عباه بيضه هم هو جابها ودخلت للكعدة طبعا وياي بيبي ام ماما والشيخه دخلت ولفحت خشمي عطر مبين عطره لان مميز وهم عطر بابا اعرفه كعدت يمه متوتره اهواي طبعا بابا مثل ماطلبت على المهر وانطيت موافقتي بس شنو اشلون طلعت مني ماادري
باركلنه بابا وسيد صادق والشيخه وبيبي بعدها ردت اطلع بس الشيخه كالت اكعدو اشويه هنا اني دوروني متلكوني عززا نبقى وحدنه لا على بختج شيخه

گمرهاشم : لا يمه خليها على راحتها اشويه وادخل البسها الحلقة
شفتها متوتره مو مال نبقى وحدنه بس تقدمت يمها وقربت راسي يم اذنها وهمست
..الف مبروك علوية ان شاءالله اكون كد الامانه
وترخصت وطلعت
منسا : يمه هو هيج كال لو اني جمدت همزين طلع رجعت بالهول وبدت الهوسات وكل هذا واني صافنه بصوته صوت كله رجوله وشهامه تحس بقوة هالشخص من تسمع صوته اشكد شهم لعد على صفتني سمعت هوسه من وحدة كالت

براية حيدر وبالايد شديناها
ومن الصغر للكبر ماهديناها من محمد وعلي والزهرة ردناها

منسا : رفعت راسي ودخل بكل هيبة وعطر سبقه يفرض شخصيه صاحبه رجولته الي تجبرك توگف اله دخل بكل رزانه ومشيه هادئه وبسمه بسيطة على وجه هو حلو وعماته وخلاته يهوسله والشيخه باس راسها وامه هم واجه كعد يمي حسيت بخوف ورجفت احتلت كل جسمي باوعت على ايديه كال مزينها محبس الشذة عقيق ازرك وبي كتابه
گمرهاشم : اسف ماسلمت اول مرة سلام عليكم والف مبروك مرة ثاني
منسا : وعليكم السلام مبروك الك هم
گمرهاشم : طبعا مشاء الله صدك حلوة والشيخ عرف يختار عمي حقه السيد يخاف عليها بس هي اشلون اداوم مفترض تلبس بوشيه عليها عيون دخيلك ربي غصب عنك تصفن بيهن
لبسنه الحلقات طبعا اديها ترجف وثلج هم ههه بويه تعالي شوفي گلبي صاير قالب ثلج لبستها ذهب واجاني عطرها غمضت عيوني واني اتنفس عطرها اشكد هادئ على صاحبته طبعا الفستان كله مستور الي شغلة وحدة بي ههه هو من وره الفتحه اشويه نازله يعني يبين اشويه من ظهرها من جاي البسها الكلادة شفت  اجمل شامه مثل جوهرة سودة على قطعة من الكطن

يتبع...
انتظروني انزل التكملة