تحميل رواية ألاعيب حواء بقلم منى عبدالعزيز pdf

—- ألاعيب حواء —–

واقفه على كرسي ماسكه فوطه وملمع خشب وبتمسح الدولاب وبتغني بفرحه وبتقول

يا بركة رمضان خليكي خليكي فى الدار يا بركة رمضان.

رن تليفونها نادت على بنتها وقالت… جوهرة يا جوجو نوليني التليفون يا حبيبتي اشوف مين تكون تيته نوجه بتصل.

بنتها جات معها التليفون وقالت… انا عوزه اسمع الكرتون كلمي تيته مرة تانيه.

اتكلمت الام قالت… علشان خاطري يا جوجو اديني اكلمها واعوضك الوقت اللي هكلمها فيه هحسبه وازودلك وقتك بدل ما هخده بعد نص ساعة ها زود الوقت.

اخدت التليفون اللي مش بيبطل رن بصت فى التليفون شافت اسم اخت جوزها قالت… خير يارب ياترى فى اي سيئات قصدي حسنات متصله ليه الساعة دي ربنا يستر متكونش مصيبة ولا كارثة فتحت الإتصال وقالت… صباح الخير يا حسنات.

حسنات بتكلمها… كل دا يا منال برن عليكي مش بتردي.

منال… التليفون كان مع جوهره وانا بكلمك دلوقتي وانا واقفه على الكرسي بلمع الدولاب لو عاوزه نينه ابعت التليفون مع جوهرة تكلميها.

حسنات… لو عاوزة ماما كنت كلمتها على تليفونها انا متصله عليكي انتي.

منال… خير يا حبيبتي.

حسنات… هو ناصر بعت تحويل الشهر ليكي وللبنات الشهرده.

منال بحسن نيه… ربنا يرزقه ما يحوجه يارب بعت يا حبيبتي وقال انه بعتلك انتي وحنان وحورية ونادر ولنعيم حتى نينه بعت.

حسنات بعصبية… وانتي لازم ترصيلي اللسته ما الكل عارف انه محول لنا كلنا عشان مش هيعرف يجيب هدايا المرة دي وهو نازل وبعدين انا سألت سؤال تردي عليا باه او لاء، مش بتمني عليا بفلوس اخويا.

منال بذهول… انا قولت ايه لكل دا يا حسنات وايوا يا ستي حول.

حسنات… صرفتيهم ولا لسه.

منال بستغراب… ايوا رحت سحبتهم واشتريت لبس العيد للبنات .

حسنات… حولك كام وصرفتيهم كلهم ولا لسه معاكي حاجة.

منال بحسن نيه… اللبس كان غالي اوي انتى عارفه الاسعار ولعت والفستان بقيت بالشئ الفلاني يدوب قضينا لولا عملت حسابي وكنت شايله مصاريف الدروس واجرة الباص على جنب مش عاارفه كنت هجبهم منين.

حسنات… كويس اوي يعني اللي معاكي حسبه قد ايه مش مهم كام المهم هبعتلك اميرة بنتي تديهم لها.

منال… اديهم لاميرة ليه يا حسنات مش ناصر محولك معانا.

حسنات بضيق… انتي مالك محولي واتصرفوا انا بقولك ادي الفلوس لاميرة تقومي تدهم لها.

منال… معلش يا حسنات مش هقدر يا حبيبتي دول مصاريف المدرسين والبنات عندهم درس انهاردة وهادي المدرسين فلوسهم غير اني عاوزة اجيب لنفسي عباية حلوة البسها فى العيد.

حسنات… مش مهم تجيبي انتي مش صغيرة وعندك هدوم مشونه فى الدولاب ولا هو بعزقه فلوس الشقيان فى غربته انا محتاجة الفلوس البنت خلاص تلاقيها قربت من البيت عندكم .

منال… اتصلي بنينه ولا ياسمين مرات اخوكي ولا نادر اطلبي منهم اكيد هما لسه معاهم فلوس لكن انا مش هقدر متدفعش فلوس الدرس الناس دخله على عيد ومش هقدر مدفعش حقهم.

حسنات… هو انتي هتدفعي من جيبك وجيب اهلك المقشفين دا مال اخويا اخد اللي انا عوزاه فى الوقت اللي اعوزه.

منال بضيق… انا مفيش مرة طلبتي فلوس غير وانا مدياكي بدل المرة الف مرة اظن اخر مرة قولتي هترجعي القديم والجديد ولحد دلوقتي لا بعتي ولا حتى انا طلبتهم لانهم بتوعي خصية نفسي لكن عند فلوس المدرسين وناصر عامل حسابه وبعتهم اقوم اصرف فيهم وناصر يرجع يلاقي الناس بطالب بحقهم اسفه يا حسنات معيش يكمل.

حسنات بحده… كدا يا منال اما وريتك مبقاش حسنات بنت غاليه والنبي ما حلاﻜي انهاردة اما عرفتك قمتك مبقاش حسنات.

قفلت التليفون بصت منال للشاشه وقالت… يا ساتر يارب هو فى كدا دا حد يطلب من الناس فلوس بالطريقة الهمجية دي مش كفايه كل شهر عاوزة فلوس وياريت بترجعها دي ما بمبدأ انا اسفأنكم وبعدين الراجل متغرب ومتبهدل وطافح الأوته عشان اصرف فلوسه عمال على بطال

جوجو يا حبيبتي خدي التليفون اهو ساعه واحده وهاخده بس فرجي اخواتك معاكي عاوزة اخلص مش كل شويه واحده فيهم تجي تشتكي.

جوهرة… انا هصور ماسه وغاليه وهم بيلعبوا.

منال… اعملي اللي تعمليه بس سبيني دلوقتي خليني اخلص قدامي شغل كتير.

رجعت تغني وتقول… يابركه رمضان خليكي فى الدار.

وكملت مسح وتلميع الدولاب

صوت خبط على الباب قطع انسجامها وقالت… يووه هو في ايه انهاردة مش بلحق اطلع امسح الدولاب ده غير والباب بيخبط يا التليفون بيرن والله تعبت حرام هو انا مليش نفس ار وق شقتي وانضفها زى باقي الناس افف.

نزلت بشويش من على الكرسي وبتردد… استغفر الله العظيم يارب طيب طيب يالي على الباب جايه اهو.

بصت يمين وشمال… هو الاسدال راح فين بس كان هنا من شويه.

الباب خبط مرة تانيه… يووه خلاص يا منمن البسي خمار من بتوع البنات وافتحي وخلاص.

اخدت خمار صغير من على الكنبه ولبسته بسرعه وفتحت الباب لقت حماتها فى وشها بتكلمها بعصبية… فى ايه يا ست منال سنة على ما تفتحي الباب وبعدين قافله على نفسك ليه وشايله المفتاح من الباب بتعملي ايه وخايفه حد يدخل عليكي ويشوفك.

منال بذهول… شاورت على نفسها وقالت انا قايله لحضرتك امبارح يا نينه هوضب الشقة وامسح العفش كل سنة وحضرتك طيبة العيد بعد بكرة ومبقاش غير الشقة اللي متوضبتش وناصر هينزل بكرة إن شاء الله عشان يعيد معانا لازم الشقة تبقي متروقة.

حماتها بغل.. انا مش قولتلك عندنا خبيز العيد وتنضيف طيور عشان الغداء يوم العيد واللي عيالي هيخدوه وهما مروحين.

منال بذهول… يا نينه انا ليا اڛبوع كل يوم بقف من سبعه الصبح للعصر وانا بنضف طيور وافرز فى الفريزر مبقاش فى طيرة فى الحوش على وش دبيح حتى الحمام والخبيز بكره إن شاء الله هعجن من بعد السحور على طول عشان يبقى طازة وطري يوم العيد.

حماتها جزت على سنانها… وانتي يا هانم هتمشيني على شورك وكلامك انا قولت هتعجني، دلوقتي يبقي دلوقتي.

منال… بس يا نينه حضرتك شايفه الشقه تضرب تقلب وغسله السجاد وسيباه يصفه عشان اطلع انشره فى التالت لو نزلت اعجن واخبز المغرب هيأذن وانا يدوب مخلصه، معلش يعني نخلي الخبيز بكره السجاد هيكمكم لو بات ومتنشرش غير الشقه يرضيكي ناصر يرجع بعد السنة يلاقي الشقة بالبهدلة دي.

حماتها… انتي المعفنه سيباها متبهدله ورميه هدوم هنا وهنا لكن لو بتنضفي اول بأول زى بنتي كنتي لقيتها زى الفل اديكي بتسمعي اختك بتقول ايه على نضفتها ونضافه شقتها، يا بختك المايل يابني مش كفاية متجوز بومه وشها يقطع الخميرة من البيت لا و معفنه فى شقتها وفى نفسها.

منال بخنقه البكاء… انا معفنه يا

نينه انا.

حماتها… مش انا اللي بقولك يا عنيا بصي حوليكي ولشكلك فى المرايا وانتي هتشوفي بعينك، كانت ساعة سودة اللي ابني شافك فيها وخطبك مش عارفه كنتي رشه ولا كتبه ورقه توقعي اي واحد وتتجوزيه ولبخت ابني المهبب يدخل يسلم على اخته ويبارك لها والعمل يعميه ويشوفك.

حطت ايديها على قلبها وحاسه بنغزة قويه فيه وقالت بوجع وبكسرة…. انا يا نينه اعمل كدا وانا الحافظه القرآن ومبفوتش فرض تقولي، عليا برش واكتب ورق حضرتك عارفه اني مش كدا وعمري ما عملت حاجة تغضب ربنا .

٠حماتها… والله دا مش كلامي دا كلام اختك لبنتي قالت انها مستغربه ازاي مرة واحدة ناصر اللي زي فلق القمر وطول وعرض يبص لمنال من اول نظرة يتقدم وانك ولا مرة جالك عريس يبقي ايه يا ست الحسن.

منال… عنايات اختى قالت كدا وليه يتقال الكلام دا دلوقتي بعد خمس سنين جواز .

حماتها… قولي لنفسك يا ختي واسألي اختك ودلوقتي قدامي يا ست الحسن على الخبيز.

منال… اسفه يا نينه مش هقدر اسيب الشقة متبهدلة كدا ان كان ولابد خبيز انهاردة يبقي تقولي لياسمين اهي تخبز وتعجن مرة.

حماتها بعصبية… انت ايه يا ختي وياسمين مين اللي تحط اديها بالخبيز انتي فاكره ايديها مقشفه زي ايدك ولا مأرحه زيك ومين انتي عشان تؤمري وتتحكمي مين يخبز ومين يعجن انا بس اللي اتحكم انا بس اللي اقول مين يشتغل ومين يستت مين يخدم ومين ينحط فى بترينه انتي هنا تخدميني بأكلك وشربك ولو سمحت بده فاهمه يا بوز الاخص ويكون فى معلومك ناصر مش هيطلع الشقة ولا هيهوب منها هياخد اجازته عندي تحت وخلي نقبك يطلع على شونه واللي فى دماغك مش هتحققيه هو احنا ناقصين تجبلنا بنت تالته عفشه شبهك كفايه من الدست مغرفة عاوزة تربطيه بالعيال جبتيهم وراء بعض يدوب ربعنتي فى الاولي شلتي التانيه والتالته تلاته فى خمس سنين ياقلب امه قهرته باينه على وشه كل ما يجي ملهوف يوم الولادة ويقول المرة ولد ينصدم لما يلاقيها بنت وياريتها حلوه زيه الا يا قلبي يلاقيها شبهك ميكملش اجازته من الحسرة والحزن على نفسه وفرحته اللي ضاعت. .

منال دموعها نزله على خدها وبألم… ناصر روحه ف البنات يانينه دا لما زعلت ان غالية جات بنت قالي انها وش خير عليه واترقه فى شغله ولولا انه واخد اجازة صغيرة عشان يحضر الولاده كان فضل اكتر دا لو يوم عده مكلمهمش بيصحي بدري عشان يسمع صوتهم قبل ما يرحوا الحضانه وهو يروح الشغل.

حماتها… كله كوم والحضانه دي كوم تاني وقال ايه باص ومدرسين داخلين وابلوات طالعين ياختي مهما عملتي وعلمتي هيقعوا فى قرابيز ابني ماهو محدش هيبص فى وشهم اللي يقطع الخميرة من البيت الا لو رشتي وكتبتي ورق زي ما عملتي مع ابوهم.

منال بقهر… حرام عليكي يانينة تقولي الكلام دا على البنات دول لسه صغيرين وحلوين ولو انا زي ما بتقولي سحرت لناصر وعارفه ومتاكدة من دا ليه ما رحتيش للمشايخ اللي رايحه جايه عليهم كل يوم يفكولوا ليه، اقولك ليه عشان اللي بنا انا وناصر سحر حلال محبة ربنا حطها بنا وكبر بالموادة والرحمه بنا تقدير ليه ولظروف شغله وخدمتي ليكم هو مقدرها ومعترف بيها لكن الرش والورق دول مش انا اللي بعمله.

حماتها… يا نهارك أسود بقي انا بروح لمشايخ يشبشبوا دول انتي واهلك يا سحارة والنبي ومن نبي النبي ما انتي قاعده فى بيتي دقيقة بعد اللي قولتيه.

مسكت منال من ايديها وراحت فتحت الباب وصرخت وقالت… يا نعيم يا نادر الحقوني يا ولاد الحقوا امكم.

خرجت ياسمين مرات نعيم وقالت… فى حاجه يا خالتو نعيم مريح شوية قبل الفطار.

ادخلي يا ياسمين صحيه خليه يجي حالا.

منال بتحاول تفك ايديها من حماتها وببكاء… سيبي ايدي يا ماما ميصحش كدا سبيني حرام يشفوني لبسه كدا.

حماتها… حرمت عليكي عشتك بقي يا مقشفه حسنات تطلب فلوس تعيريها وتبكتيها اما خليتك تشحتي اللقمة بس يجي ابني حبيبي اما خليته يرميكي راميه الكلاب مبقاش غالية.

منال بتفك ايدها… حرام والله دا كذب كل اللي قولته ان القرشين اللي معايا يدوب مصاريف ال دروس بتاعت البنات مش هقدر اتاخر عنهم، هو انا امته اتاخرت عن وحده من منهم وكل شهر بديهم اللي بيطبوه وزيادة.

حماتها…من خير ابني اللي هو اخوهم يا عنيا مش من بيت ابوكي فقي الجبانه

منال… الفقي عمره ما بص لمال حد ولا اخد شقي حد ربا عياله على القناعة وإن اللي فى ايديهم مش ليهم مش بناتك اللي بيستبيحوا عرق وشقي اخوهم الغلبان ويصرفوهم على اجوزهم الانطاع.

حماتها… انا رجالة بناتي انطاع يا جربوعه والله لادبك واخليكي ماتسوي بصله بصلة ايه دي البصلة اغلي منك دا انا هخليكي انتي والزباله واحد وهفرج عليكي خلق الله.

منال.. سيبي ايدي البنات قلبهم انفطر من البكا حرام عليكي دول بنات ابنك.

حماتها…حرمت عليكي عشتك انتي وياهم ربنا يريحني انا وابني من وششكم العكرة.

يانادر ساعه بنادي عليك.

نادر طلع يجري على السلم وقال… فى ايه يا ماما مالك.

منال استخبت وراء حماتها وتتحايل عليها… والنبي يانينه سبيني ادخل البس حاجه مايصحش كدا لبسي خفيف وضيق .

حماتها… تعالي يا نادر شوف امك يا نادر فينك يا ناصر تشوف أمك والجربوعه مراتك البيره بتقول ايه على امك.

نعيم بعصبية خارج من شقته … فى ايه يا ماما مالها العقربة دي بتقول ايه.

ياسمين مسكه تليفونها وبتصور وضحكتها ماليه وشها وبتفول… حسنات حنان فايتكم نص عمركم خالتي مسكه منال ومبهدلها لو تشوفها لبسه ايه جلبيه مقطعه وقصيرة وهترشق عليها هههه عامله زى الكتكوت المبلول بصراحة تصعب على الكافر، انتي قولتي ايه لخالتو يا حسنات خلتيها ممرمطها بالشكل دا، بصوا يا بنات انا هبعتلكم الفيديو على الشات بتاعنا فى الوتس اقفلوا دلوقتي انا عاوزة اتفرج بمزاج .

منال بتشد ايديها بقوة وجرت ناحية اوضة نومها، صرخت حماتها…بقي ب تزوقيني يا سحارة.

منال لسه هتدخل اوضه نومها صرخت وايد مسكتها من شعرها وصوت نعيم شددها وبيشخط فيها ويشتمها… ياعقربه يابنت 🐕 الكلاب بتمدي ايدك على ستك اللي مأويكي فى بيتها دا انتي يومك هباب يا بومة.

منال بتحاول تبعد ايده بايد وبايدها التانيه مسكه الخمار الصغير وبتصرخ ابعد ايدك مايصحش اللي بتعمله دا حرام عليك انت معندكش نخوه ولا رجوله.

نادر بحده… اخرسي يا كلبه بتعرفي الحرام دلوقتي بقي تمدي ايدك على امي وفكره اننا هنسكت لك.

منال… ابعد انت كمان ايه معندكمش ذره دم فى عروقكم بتشتروا على وليه يا معدومي الرجوله يا دلديل.

حماتها … سيبنها تغلطت فيكم ووقفين تتفرجوا عليها.

نادر مسك حزام البنطلون بتاعه وبعلو ايده نزل علي منال بيه صرخت منال بوجع … اه .

بنات منال بيصرخوا وهم

شايفين امهم بتصرخ جوهرة مسكه تليفون امها ورايحه عليها زقها نعيم بقوة وقعت على الارض صرخت بوجع ، منال بتصرخ وبتبعد ايد نعيم عن شعرها بقوة ونادر نزل عليها بالحزام مرة ثانية صرخت بصوت عالي وبكل قوة ضربت نعيم فى بطنه خلته يبعد عنها بألم جريت منال على جوهرة بنتها… والله ما سيباكم ولاوديكم فداهيه لو جري لبنتي حاجه.

سكتت وهي شايفه التلفون مفتوح بشويش اخدت التليفون من ايد جوهرة وبحنان قالت…جوهرة اتعدلي يا حبيبتي انتي كويسه.

حماتها بغل رفست رجلين منال وقالت…اهي زى القطط بسبع ترواح.

منال مسكت التلفون بأيديها وبصريخ… بعد الشر عنها هى واخواتها ان شالله اللي يكرهم وهما لاء.

حماتها… شر لما يشيلك انتي وهما.

منال…

والله لاقول لناصر كل حاجة.

حماتها…قلك القل وتعب السر.

منال وهي بتعدل جوهرة اللي بتصرخ من الوجع … حسبي الله ونعم الوكيل ربنا ينتقم منكم البنت ذنبها ايه

نادر خلاها مديه ضهرها ليه ونزله على ركبها بضم جوهرة بنتها ونزل جامد على ضهرها بالحزام اكتر من مرة وراء بعض وجوهرة تصرخ بأعلى صوتها… ناصر الحقنا يا ناصر الحقني انا والبنات من الانطاع اخواتك .

نعيم ابعد يا نادر خليني اربي بنت 🐕 دى.

امهم… متوسخش ايدك يا نعيم انت ونادر ارموها بره البيت هى ومقاصيف الرقبه بناتها شوطه تخدها هى وهما فى ساعة واحده ونرتاح منهم ومن قرفهم.

نعيم وهو بيجرجر منال من شعرها… انا هرمي بنت الكلب دى بره البيت وانت جيب السحالي التلاته وارميهم معهم.

منال بتصرخ ونعيم نازل بيها السلم وبايدها بداري رجليها اللي باينه من رفعة الهدوم… سبني يا كلب سبني يا خسيس يارمه سبني واقسم بالله لخليك تندم على كل اللي عملته فيا .

حماتها… اخرسي مين الكلب يا كلبه يا سحارة اما خليتك تبوسي ايد ورجل نعيم وتترجيه عشان يسامحك وحسنات اللي بتتجبي عليها بفلوس اخوها اما خليتك تترجيها عشان تسامحك وناصر ابني لاجوزه بنت عنايات اختك يوم طلاقك.

بصت ل نادر وقالت … دخل السحالي عندي فى شقتي و ارمى الزباله دي بره البيت.

نادر… حاضر يامه ادخلي ارتاحي انتي صايمة وضغطك عالي.

امه… هرتاح بعد ناصرما يجي ويطلق بوز الاخص دى وتغور من قدامي.

البنات بيصرخوا وراء باب الشقة ومنال نعيم زقها بره البيت فى الشارع اتجمع الجيران على صوت صريخها، نعيم بزعيق اتفو عليكي يا سحارة غوري فداهيه.

منال قامت وقفت بتداري رجليها وبتشد الجلبيه اللي لبساها وبتصرخ باسم بناتها جريت على البيت نعيم زقها وقال .

نعيم… لو رجلك هوبت عتبة البيت يا زباله هقطعهالك غوري في داهيه .

منال خبطت على الباب وبتبكي… افتحوا جيبوا بناتي حرام عليكم جيبوا البنات مش ماشيه غير لما تجيبوا البنات جوهرة يا حبيبتي افتحي يا نور عيني افتحي يا ماسه .

قربت جاره منها وقالت… خدي يا منال استري نفسك يا بنتي تعالي ادخلي عندنا في البيت.

منال اديرت للجارة… قوليلهم يجبوا البنات يا خالة نعمه ابوس ايدك جبيلي بناتي.

الجارة نعمه.. تعالي طيب جوه البيت بدل الناس اللي عمالة تتفرج عليكي.

منال… ناس مين انا كل اللي يهمني بناتي ياخاله سامعه صراخهم ابوس ايدك ياخاله جيبيهم.

نعمه… تعالي وقولي إيه الى حصل وهخلي عمك الحاج عبدالحليم يجي يجيب البنات.

جارة تانيه قربت منهم… فى ايه يامنال وايه الكلام اللي بيقوله نعيم دا.

منال ببكاء وتلف جسمها بالشال اللي ادته نعمه ليها وقالت… ربنا يعلم ان كل كلامهم كذب حسبي الله ونعم الوكيل.

نعمه… صبره مش وقته ومنال نعرفها من وهي عيله صغيرة ونعرف امها وابوها ومن يوم جوازها وعمرنا ما سمعنا عنها حاجه وحشه.

صبره… هوانا قولت اي يا نعمه.

نعمه… لا قولتي ولا قولت يلا يا منال يا بنتي تعالي ندخل البيت.

منال… لا ياخالة مش هقدر ادخل غير ببناتي.

نعمه…. يابنتي مايصحش وقفتك كدا وانتي بلبس ده تعالي ادخلي البيت واوعدك هخلي عمك الحاج يجبلك البنات.

منال دخلت البيت مع نعمه ومعهم صبره جارتهم قبلهم جوز نعمه وقال… ادخلي يا منال يابنتي ارتاحي وفهمينا ايه حصل وليه نعيم قال اللي قاله.

منال بكت بقهر وقالت… بعد اذنك يا عم الحاج تاخدني على المستشفي انا تعبانه اوي ورجلي مش قادره ادوس عليها.

الحاج عبدالحليم… لبسيها حاجه يا نعمه وجبيها وتعالي على ما وقف توكتك.

صبره… انا جايه معاكم يا جماعة تحتاجوا حاجه اسعدكم.

عبدالحليم… خليكي ياست صبره جهزى فطارك احنا إن شاء الله مش هنتأخر خلي بالك من الدار على ما نجي.

رجعت صبره. بيتها ومشيوا التلاته للمستشفى دخلت منال تكشف اول ما شافت الدكتور قالت لو سمحت يا دكتور عوزة تقرير طبي بالي فيا.

الدكتور كشف عليها وقال… ايه دا يا مدام مين عمل فيكي كدا انا لازم ابلغ الشرطه دا ضهرك كله علامات ضرب والاشعه على دراعك ظاهرة شرخ لازم يتجبس.

بص للممرضة وقال… دينا بلغي الشرطة الموجودة تحت .

ادير لعبدالحليم… تبقالك ايه المدام يا حاج.

عبدالحليم… جارتي يا دكتور.

الدكتور… تعرف مين عمل فيها كدا.

منال… انا عاوزة تقرير يا دكتور لو سمحت وانا هعمل بلاغ فى اللي عمل فيا كدا.

لفت لعبدالحليم… هتشهد معايا يا عم الحاج.

عبدالحليم بص لها بحزن… اشهد بايه يا بنتي احنا مشفناش غير نعيم وهو بيكرشك بره البيت وبيقول كلام لا مؤخذه يعني.

منال… خدني للمركز ياعم الحاج وهتعرف كل حاجة.

الدكتور… انا خلاص بلغت الشرطة يامدام وهيجوا ياخدوا اقوالك انتى محتاجه علاج يعدي اكتر من 21يوم.

جم الشرطه اخدوا اقوال منال وبعد ما مشيوا.

عبدالحليم وهو باصص لمنال قال… احكلنا يا منال يابنتي الموضوع كلامك مع امين الشرطة مفهمتهوش اوي بصراحه شايف ان اللي قولتيه يخلي الجماعة يعملوا اللي عملوه.

منال ببكاء ووجع قالت… وديني المركز ياعم الحاج .

عبدالحليم.. المركز هيعمل اي يابنتي محضر هتعمليه هيعملوا قصاده عشرة، معلش يعني انتي بطولك لا ليكي اب ولا عم ولا اخ وهما عيله كبيره مين هيقف معاكي ولا يصرف على المحاضر والقواضي وانتي بطولك والمواضيع دي عاوزة فلوس كتيرة جوي.

نعمه… ما تشوف سعيد قريبك ياحاج.

عبدالحليم… سعيد امين شرطة هيعمل ايه بس، والكلام اللي اتقال يدين اكتر ما يساعد.

نعمه

متزعليش من كلام عمك الحاج يا منال يابنتي بس كلامهم منطقي حتى ضربهم ليكي اي حد هيسمع كلامهم حتى البوليس نفسه هيقول من حرقتهم على اللي عملتيه.

منال مسحت دموعها وقالت… ورب الكعبة ما هعدي اللي عملوه فيا من يوم جوازي للحظة دى بس اخد بناتي، ومتشكرة ليكم يا جماعة تعبتكم معايا انا هروح المركز واعمل بلاغ بالتقرير دا ومحضر المستشفي واللي ربنا رايده يكون ومش هيوقفني عن اخد حقي غير الموت ولو فاكرين انهم بضربهم ليا واتهامهم الباطل وطردهم ليا واخدهم بناتي هيلوا دراعي يبقوا ما يعرفوش منال بنت

الشيخ يوسف، هما وعنايات اختي.

نعمه… عنايات اختك ما تفهمينا يا بنتي.

منال… مره ثانيه ياخاله اعذروني تعبتكم معايا واخرتكم على تجهيز فطوركم.

عبدالحليم… متقوليش كدا يابنتي متفتكريش اننا مكدبينك بس بنوعيكي على اللي هيعملوه.

منال بتفكير… وديني المركز فى الاول يا عمي وبعدها وديني لامي تلاقي قلبها محروق عليا.

عبدالحليم… ما ترسينا يابنتي على اللي فى دماغك عشان اعرف افهم سعيد الفوله ويساعدنا.

منال.. بعد المركز هتعرف كل حاجة.

عبدالحليم بحيرة… انا محتار بصراحة كلامك وكلامهم فيه حاجة ناقصة.

منال بعد وقت خرجت منال وعبدالحليم ونعمه وراحوا المركز وقدموا بلاغ فى حماتها واخوات جوزها نعيم ونادر.

وقدمت التقرير ووصلها عبدالحليم ونعمه بيت امها.

امها اول ما شافتها شهقت وخبطت على صدرها… يا ندمتي مين عمل فيكي كده يا منال يابنتي.

نعمه… خليها ترتاح يا ام عنايات وبعدين تبقي تحكيلك.

امها… ارتاحي يابنتي متأخذنيش يا جماعة اتلهيت لما شفت منال اتفضلوا جوه وبالله ريحوا قلبي بنتي مالها.

منال وهي بتخرج التليفون من كم جلابيتها اتنهدت وقالت…انا بخير يامه الحمدلله اطمني هحكيلك كل حاجة .

عبدالحليم… اطمني ياحجه ام جوهرة بخير شرخ بسيط فى دراعها وجرح فى رجليها الدكتور كتبلها علاج يومين وهتبقي عال العال.

بص لمنال… احنا هنستأذن مبقاش غير ساعتين على الفطار يدوب نلخق نجهز حالنا.

ام منال… مش عيب ياحج تقول كدا وانت فى بيتنا فطاركم عندنا انهاردة.

عبدالحليم… يجعلهم عامر ياحجه بس مش هنقدر نسيب البيت اكتر من كدا وعيالنا يقلقوا علينا لما ميلقناش.

نعمه… اتكلمي يا منال وقولي اللي عندك خلينا نفهم.

منال بصت لامها وقالت بحزن…

خمس سنين عمري ما قولت لاء لحد فيهم اغسل وانضف واخبز واعمل اكل وعمري ما فتحت بقي، ناصر يبعت فلوس لكل واحد عمري ما قولت له متبعتش ولا أدخلت بالعكس كنت بقول دا حق أخواته عليه، خمس سنين كل ما يبعتلي قرش لازم يشاركوني فيه مع انهم والله ياعم الحاج بياخدوا زيي واكتر مني انا والبنات كل شهر يا حسنات يا حنان يا حورية يا أمهم يأخذوا مني لاعمري اشتريت حاجة لنفسي ولا حوشت حاجة من اسبوعين ناصر قال هيجي يعيد معانا ومش هيقدر يجيب هدايا عشان عنده شغل كتير اوي لازم يخلصه قبل ما ينزل عشان صاحب الشغل يوافق يديه اجازة طويلة بعت لكل واحد مبلغ وحولي مبلغ كبير قالي اشتري دهبك اللي بعتيه عشان اسافر بس بلاش توريه لحد خبيه لحد ما ارجع عشان محدش يزعل لو جابه معاه.

رجعت هلكانه من التعب بقيت اخلص اللي ورايا تحت عشان تاني يوم الحق اروق شقتي قبل ناصر مايجي قمت من بعد الفجر اروق واغسل سجاجيد ورنت حوريه عليا الاول كنت مشغوله طنشتها بصراحة عشان عارفه هى عاوزة ايه كملت شغل والساعة تسعه لقيت حسنات بترن عليا قولت تلاقي حوريه اشتكت فتحت عليها ومن اول كلمة سألت على فلوس التحويل وعاوزهم .

حكت لهم كل حاجة حصلت من البداية لحد ما طردوها من البيت.

امها ببكاء… يا قلبي يا بنتي كل دا حصل لك قومي بينا نروح المركز ونطلع على العمدة نشتكيهم ونعرفه عمايل قربته.

منال… اقعدي يا ماما ارتاحي متتعبيش نفسك انا لسه راجعه من المركز اشتكيتهم وإن شاءالله بناتي هيجوني انهاردة.

عبدالحليم… بصي يابنتي انا سمعت منك والعدل يقول اسمع منهم مش عاوزك تفهمي كلامي اني مكذبك ومش مصدقك انا مصدق كل حرف قولتيه بس انا لازم اسمع الطرف التاني عشان احكم وكمان اجيب البنات.

امها… تفتكر يا حج عبدالحليم ناس بالشكل ده مفيش فى قلوبهم رحمه هتعرف تاخد حق ولاباطل معهم دول مش بعيد يكذبوا ويتهموا بنتي اصلك متعرفهمش غير من كام سنه احنا نعرفهم من سنين ونعرف الاعيبهم.

نعمه… اهدوا يا جماعة خلينا نفهم دلوقتي جوزك يا منال كلها كام ساعة وتلاقيه جاي هتعملي ايه معاه.

امها… والله لو انطبقت السماء على الأرض ما هي راجعه بيت الحيايه دا تاني انا كنت لاقيها فى الشارع.

عبدالحليم وقف وشاور لمراته… طيب خلينا نتكلم فى الموضوع دا بعدين.

ام منال… طيب استنوا افطروا ويانا ما يصحش كده.

منال… متنساش بناتي يا عم الحاج.

عبد الحليم إن شاء الله خير يا بنتي بعد التراويح هروح بيت حماتك واكلمها لحد ما تديني البنات.

مشى عبد الحليم ونعمه ومنال قعده مكانها بصه فى تليفونها امها بعد ما قفلت الباب وراهم قالت… هتعملي ايه يابنتي قوليلي.

منال وعيونها على التليفون… هعمل ايه ياماما هستني البوليس يقبض عليهم واستني ناصر ينزل اجازته السنويه وبعدين اشوف هيعمل ايه.

امها لوت بوزها…. ناصر ناصر يا حبيبتي اللي مستنياه ياخد حقك تبقي قبليني لو اتحرك

دا لوح تلج مش عارفه حبيتيه على ايه.

منال.. ناصر طيب ومحترم والعيبه ما بتخرجش منه كفاية فلوس الدهب اللي بعتهالي.

امها.. اهو دا اللي قلقني اكثر أكيد وراه مصيبه واهو بانت بشايرها خرجوكي من البيت واخدوا بناتك نسيتي حركتهم ايام فرح نعيم لما حماتك اتخنفت معاكي وتالت يوم الفرح جات صلحتك عشان توضبي البيت وتغسليي اطنان المواعين ولا فرح حورية لما حسنات خلتك واقفه قبل الحنه بيوم وعملت معاكي خناقة وكلمة منك على كلمة منها حلفت عليكي حماتك مانتي قاعده وغضبتك رجعتك امتي يا منال… بعدها باسبوع وقالت لك لولا ناصر هيسافر کمان اسبوع مكنتيش داخله البيت غير لما تعتذري لحسنات تفتكري سي ناصر في كل اللي حصل دا مكنش عارف يوقفهم عند حدهم يا بنتي اقطع دراعي ان مكنش على علم بكل اللي حصل ومديهم اشارة كمان ماهو ربنا عرفوه بالعقل خمس سنين بيسافر

مش عجب يبعت فلوس الدهب اليومين دول وليه حسنات مش حنان ولا حورية تعمل المشكلة معاكي وامها تطلع تكمل زي ما حصل.

منال هزت رأسها وقالت… لا يا ماما أكيد كل دا جه صدفه ما.

امها سكتي ليه بتفكري في ايه وكل شويه تبصي في التليفون.

منال بتفكير… دا لو بجد ناصر له يد اقسم بأيات الله ما مهنياه على حياته وعمره لحظه أبداً، وبجملت بقي ناصر وعنايات.

امها … كله كوم وعنايات كوم تاني دخلوها في الموضوع بسهوله.

منال… متقوليش انها ملهاش يد ياماما وخليها متعرفش اللي هيعملوه.

امها … قولت لك يا منال في حاجة مش مريحه في الكلام وبعدين بنت عنايات

لسه صغيرة والعمر قدمها ايه مخليها موصرة تتعرف على جوزك

منال… ماما هى عنايات عرفت موضوع الدهب.

امها بلجلجه …. أصلة بصراحه ايوا

شفتهم من يومين وحلفتها على مصحف ما تجيب سيرة الدهب ولا تسأل عنه

منال ابتسمت بحزن… دى مش بس وفت بالوعد لا دي بصمت عليه بس وعزة الله وجلاله ما هنسى كلمة قالتها ولا حرف من اللي سمعته وهاخد حقي تالت ومثلت خليها بقي تفرح بنسابهم.

امها … يابنتي ما تصدقهمش اکید عنایات تقصد نادر العازب وتخليه يتقدم لبنتها هتعمل ايه بجوزك المتجوز ومعه تلات بنات.

منال… ماما سؤالي واضح عنایات عرفت موضوع الدهب ازاي وعملت ايه.

امها معرفش عرفت ازاي هى امبارح بعد ما مشيتي علطول جات روقت معايا الدولاب وشافت العلبه وانا قولت لها ان جوزك شيع فلوس وجبتي بيهم الدهب.

منال… عملت ايه بعدها يا امي فتحت العلبه وشافت الدهب

امها اتخدت وبلجلجه… یووه يا منال انتي حنبليه اوي ايوا يا ستي شفتهم

بس انا مسكتها المصحف وحلفتها عليه متقولش لحد ولا حد يعرف بالدهب.

منال… هي فعلاً مقالتش عليه بس عملت الاوطى من كده لعبت لعبه وانا منتظرة

اشوف اخرتها معها ورب الكعبة يا امي ما سايبه حقي ولا حق بناتي فيها لااخليها تقول جاي وتبوس رجلي قبل ايدي عشان اسامحها وبعد اللي عملته وسمعته وشفته اللي بيجري في عروقي بقي مايه.

امها قامت وقفت… طيب استهدي بالله وقومي صلي العصر خلاص المغرب على اذان هجهز الفطار عشان تاكلي لقمه وتريحى شويه.

هزت رأسها وبتفكير قالت.. هو انا هرتاح واشوف الراحه وانا بناتي بعيد عني ولا حقي ومدت ايديهم عليا وشتمتهم فيا وقبل منها طلاق التلت حيات والعقربة باسمين.

مسكت تليفونها وطلعت رقم یا سمین وقالت… إن كان ليك عند الكلب حاجة قوله يا سيدي وانا مش بس هقولك يا سيدي دا انا هقولك قاموس سيدي وستي وست الناس وبعدها هأدبك الادب اللي اهلك مربهولكيش.

اتصلت عليها اول ما سمعت صوتها بترد بشماته وبتقول… بترني عليا ليه يا منال عاوزة ايه يا سحارة يا بتاعت التلت

ورقات.

منال بهدوء … خمس دقايق وافتحي الواتس وبعدها نتكلم.

ياسمين بضحكة … وانا ايه يجبرني اسمع كلامك لا مؤخذه.

منال بتجز على نيابها قالت… المصلحة يا ياسمين المصلحة واه نسيت اقولك حمادة توكل بيسلم عليكي هو وصابرين اخته تخيلي حكولي حاجة كدا وادوني اسم دكتورة حببتك.

قفلت منال التليفون وقالت … يعلم ربنا اني سنين وانا حفظه سرك واقول من ستر مسلم ولأخر نفس فيا عمري ما هستغل اللي عرفته وسرك هيروح للتربة معايا بس مفيش قدامي حل غير اخوفك بيه عشان اوصل لبناتي

جالها اتصال تليفوني من ياسمين وقالت… هههه صحيح الجبن سيد الاخلاق لما كنت بتعامل معاكي بطيبه واحترام كنتي بتمسحي وتشوطي بيا بلاط البيت يدوب كلمتين لا هيتعادوا ولا

هنطقهم مرة تانيه خلوكي ترني في ثانيه.

فتحت الاتصال وقالت… افتحي الواتس وشوفي اللي بعته وقولي رايك.

قفلت معاها من غير ما تسمع رد وقالت وهي بتخرج صورة من المعرض لغويشه دهب وبعتتها لياسمين واتس وقالت…. عشرة جرام موضه السنه دي فاتورتها من غير اسم ليكي هدية مني ليكي بتلت شروط

حسنات واخواتها والفيديو اللي سجلتيه والبنات يباتوا في حضني.

ثواني وجالها اتصال من ياسمين ابتسمت وقالت… اللي ما يجيش بالذوق يجي بلوي الدراع وانا من هنا ورايح هاخد حقي بالطرق المشروعة وغيرها بس باللي يرضي ربي وضميري

فتحت الاتصال وقالت… موافقة ولا.

ياسمين… بناتك لو عاوزة تاخديهم تعالي خالتي ونعيم ونادر البوليس جه اخدهم من شوية والبنات قاعدين معايا اهم عاوزاهم تعالي خديهم.

منال بفرحه قالت بسرعه وديهم بيت الحاج عبد الحليم وهو هيبعتهم ليا بمعرفته.

ياسمين… وانا ايه يضمني بعد ما اعمل كدا مش هتقولي لحد عن اللي تعرفيه.

منال… اربع سنين ونص عارفه في يوم لمحتلك بحرف ولا جيت على طرف ليكي

انا عندي بنات واخاف ربنا فيهم ودي البنات للحج عبد الحليم ووكيلك ربنا وبعدها احكيلي كل اللي حصل من وقت ما مشيت لحد البوليس ما جه.

ياسمين هاغير واروح اوديهم واجي بس اخاف حد يشفني يقول لخالتي ولنعيم.

منال… متخفيش الناس دلوقتي مشغوله بتحضير فطارهم.

ياسمين… ماشي شويه وهرن عليكي.

ياسمين لبست اسدال الصلاة واخدت غاليه الصغيرة شلتها وقالت… جوهرة امسكي ايد ماسة وتعالوا هوديكم لماما.

جوهرة بتبكي من وجع ايديها سكتت ومشيت معاها ودتهم ياسمين لبيت عبد الحليم اللي سالها وقال… جبتيهم ازاي

ياسمين… امهم اللي طلبت مني وخالتي ونعيم ونادر البوليس اخدهم من يجي ساعة والبنات مفصلوش عياط والبت جوهرة دراعها باين عليه مكسور مش مبطله تقول ايدي

بتوجعني.

عبد الحليم… ماشي يابنتي ربنا يبارك فيكي هوديهم لامهم.

ياسمين رجعت البيت واتصلت على منال وقالت… البنات الحاج هيجبهملك في ايه تاني مطلوب.

منال… حسنات ايه اللي يكسرها بعيد عن ولادها .

ياسمين… على جوزها لايف على هالة زميلته فى الشغل وبيلعب عليها وهالة مطنشاه عشان عارفه انه خيخه وهيتجنن وياخد ريق حلو منها، وحسنات عارفه وقومت البيت حريقة وخالتي قالت لها تهدي وهتشوف صرفه تغور هالة من قدمها وتشفلها جوازه و کلمت نادر بس نادر زي ما انتي عارفه عاوز بنت العمدة.

منال في نفسها … يارتني سمعت كلامك يا ماما وروحنا للعمدة اشتكنا له عشان جوازته تبوظ.

ياسمين … منال معايا.

منال…

حنان وحورية.

ياسمين… دول امهم بتحركهم بصوابعها

وقرشين يشتروا اللي يختروه ملهمش في حاجة بس حنان اليومين دول بتقنع امها تجوز وفاء اخت جوزها لنادر بس خالتي بتقول ناصر ممكن نادر لاء.

حوريه ايه عندها ….

حوريه غلبانه امها اللي بتحركها

ومقوياها غير كدا ملهاش في حاجه.

تعرفي تجيبي رقم جوز سيئات.

ياسمين… ليه عوزاه.

منال … مع انه ملكيش فيه بس هقولك لازم يعرف مراته بتعمل ايه فيا والفلوس اللي بتخدها مني غير مصروفها من اخوها.

ياسمين… بشوقك اعملي اللي تعمليه

دلوقتي عرفتي كل حاجة الغويشه.

منال… هشيعهالك مع الحاج عبد الحليم انا مبكولش حق حد قوليلي حصل ايه بعد ما مشيت.

ياسمين…. نعيم سأل عملتي ايه خلاها تصوت وتنادي عليهم وتقول ضربتها.

حكت لهم اللي عملتيه مع حسنات نادر صرخ فيها وقال… تنحرق حسنات مش واخده فلوس زيها زي الكل ليه تطمع في فلوس غيرها وازاي تعمل كدا وتخليهم يضربوكي وهما فاكرينك بترشي سحر على السلم وهى كشفتك، وخالتي قالت…. فيها ايه لما اخدتلها علقه تعرفها مقامها وتعيش خدامه في البيت نادر قالها افرضي بلغت

قالت انك مقطوعه واختك الوحيدة بتاكل فيكي مين هيوديكي ويجبك وحتى المركز لو قدمتي بلاغ هيعملولك عشرة لما البوليس جه اخدهم كانت هتجنن انك قدرتي تعمليها.

منال قالت… هقفل دلوقتي معاكي وعرفيني هيعملوا ايه اول باول.

ياسمين…. منال انتي.

قطعتها … الفيديو اللي كنتي بتصوريه وانا بضرب ابعتهولي واوعك تحذفيه عشان هقولك تعملي بيه ايه.

ياسمين بذهول… انتي ازاي بتفكري في اكثر من حاجه في وقت واحد اللي يشوفك يقول عليكي على نياتك.

منال… سمعتي بالمثل اللي بيقول اتقي شر الحليم اذا غضب انا بقي لسه مغضبتش دا لسه بفتح العلبه.

قفلت معها و هي بتقول… منال اقفلي خالتي والجماعة جم.

منال سيبي الخط مفتوح سمعيني حصل ايه.

ياسمين طفت الشاشة وسابت التليفون شغال وقامت وقفت تقابلهم… حمد الله علي سلامتكم ها طمنوني عملتو ايه.

حماتها … مش وقته حكاوي دلوقتي حطي الاكل المغرب على اذان خلينا ناكل لقمه الاول.

ياسمين… اكل انا معملتش اكل.

نعيم … نعم معملتيش اكل.

ياسمين… نعيم بتزعق ليه ايوا معملتش محدش قالي وبعدين انا مش خدامه عشان تقولولي اعملي ومتعمليش دي منال اللي تعمل كدا مش انا يا نعيم.

نعيم بحده … انتي اجننتي يابنت هي اللي تعمل اكل لجوزها واهله تبقي خدامه.

ياسمين… بقولك ايه اياك تغلط في ابويا مرة تانيه الاه والله العظيم اندمك ندم السنين انت فاهم.

نعيم قرب منها ورفع ايده ونزل على وشها بقوة صرخت وقالت وهي بتاخد تليفونها وطلعه شقتها … اما عرفتك تمن القلم دا ايه مبقاش ياسمين ابو زيد.

نعيم لسه هيروح وراها وبينادي عليها تقف

حماتها … بس بقي يا نعيم خلونا نفكر هنعمل ايه فى المحضر اللي بوز الاخص منال مقدماه شفلنا محامي ولا حد من معارفك يخلصنا من الموضوع زي ما امين الشرطة صحبك طلعنا على ضمنته.

نادر… يامه لولا البلاغ اللي عملناه مكناش طلعنا دلوقتي كنا هنتعرض على النيابه ويتحقق معانا بنت العفاريت

عمله تقرير طبي ومحضرين محضر في المستشفى وواحد في القسم يعني ااقل حكم حبس سنتين تلاته.

امهم خبطت على صدرها … يا مصبتي والبومه دي عرفت كل دا منين

نادر… النت هو في غيره البنات والنسوان قاعدين على النت ليل نهار ينزلوا عمايلهم وتجاربهم والنسوان ماورهمش غير اللت والعجن.

نعيم… كل دا مقدور عليه ناصر لما يجي یامه هنعمل ايه ونقوله ايه.

امه… ناصر سبوهولي انا عارفه هقوله ايه واقنعه ازاي.

انا قايمه احط الموجود نفطر عليه ونادي مراتك يا نعيم.

نعيم… خليها مرزيه فوق إن شاله عنها ما كلت.

نادر بقلق بعد أمهم ما دخلت … نعيم تفتكر المحضر اللي عملناه في منال هينفع.

نعيم… هو حل واحد بس تتنازل عشان نتنازل احنا تلاته

رواية ألاعيب حواء الجزء الثالث 3 بقلم منى عبدالعزيز

ألاعيب حواءرواية ألاعيب حواء الحلقة الثالثة

امهم نادت عليهم تعالوا يلا كلو لقمة وبعدين نفكر برحتنا.

بصت حوليها وقالت… هما البنات فين مش ليهم حس من وقت ما جينا ما سمعتش صوتهم.

نعيم … تلاقيهم ناموا وريحونا من ذنهم.

عند منال في بيت أمها حاضنه بناتها اللي جبهم عبد الحليم وادته غويشة ياسمين امها قالت… افطري يابنتي واكلي بناتك وكفاية بكا البنات قلبهم نشف من البكا.

منال… اجيب النفس منين يا ماما انا قلبي قايد نار على جوهرة خايفه دراعها يكون مكسور وانا مش قادرة اعمل لها حاجه

امها … نفطر وانا هاخدها ونروح العبودة المجبراتي يشوفها بس افطري الاول وخدي علاجك.

منال… ماما ممكن تتصلي على عنايات خليها تجي.

امها بقلق… عاوزة منها ايه يا منال الساعة دي قولتلك انا هكلمها واعرفها غلطها بلاش تكلميها يا حبيبتي تخسروا بعض انتم اخوات ملكمش غير بعض.

منال … انا مش هسامحها يا ماما وهاخد حقي منها.

امها … منال ايه حصلك يابنتي مكنتيش كده طول عمرك طيبه وبتسامحي.

منال… كنت الاول لانهم كانوا بيأذوني انا لكن دلوقتي اذوا بناتي واللي يهوب خطوة ليهم اكل كبده بسناني واولهم عنايات.

عند ياسمين اتصلت على منال وقالت…. منال انا بعتلك الفيديو.

منال… وصلني بقولك ايه تعرفي تنزليه على الفيس بس تداري وشي.

ياسمين… بس دا فيه خراب بيتي يا منال ويمكن نعيم يطلقني فيها.

منال بتفكير… خلاص بلاش انا هتصرف بس قوليلي هو نادر هيروح يخطب بنت العمدة امته.

ياسمين… يابنتي دول قروا الفاتحه من كام يوم والشبكة تاني يوم العيد.

منال قالت.. الغويشه مع الحاج عبد الحليم روحي ليه هيدهالك.

ياسمين…. اخدتها يا حبيبتي هو انا كنت هصبر انا فضلت واقفه لحد ما شفته

واخدتها منه هي والخاتم مع انك ما تفقتيش على الخاتم.

منال… ياسمين بقةلك ادخلي شقتي درج النيش اللي في الجنب الشمال ناحية الارفف هتلاقي كيس ملفوف فيه فلوس خديه خليه معاكي لما ابعتلك عليه وفي کیس تاني اسود دا ابعتيه لحسنات كانت شيلاه معايا .

قفلت منال مع ياسمين وفتحت تليفونها على الواتس شافت الفيديو اللي بعتته ياسمين ودموعها مغرقه وشها وبعدها دخلت الفيس على صفحة ياسمين لاقتها منزلة الفيديو مقاطع شهقت وقالت … اقسم ما راسي تلمس مخده الليله دى غير وانا واخده حقي منكم واحد واحد نادت على امها وقالت…. ماما ساعديني اغير هدومي عشان نروح نشوف ايد البنت

امها … انا هروح بيها خليكي انتي مريحه

منال… معلش ياماما انا مش هقدر استني هنا وبنتي معرفش فيها ايه.

امها .. يا بنتي انتى تعبانه وإن شاء الله بنتك ما فيهاش حاجه استهدي بالله وارتاحي خدي بالك من اخواتها وانا هطمنك في التليفون.

منال.. ياماما ريحيني قولت لك مش هقدر كمان عاوزه اروح مشوار لحد العمده زي ما قولتى اشتكي له واعرفه اللي عمله المحاكم سكتها طويلة، وانا فكرت قولت ما فيش قدام غير القعده العرفي والجيران هتشهد معايا الصريخ كان مالي الشارع غير الضرب والكسور اللي فيا هتشهد ولو كذبوا هطلب يمين منهم على كلامهم بس لازم اخد حقي قبل ناصر ما يرجع انا بصراحه مضمنش ممكن يعمل ايه ويتصرف ازاي.

امها … ماشي يابنتي يلا بينا قبل ما يروح يصلي التراويح.

منال بدلت هدومها ونزلت سانده علی اید امها والبنات معاها شاوروا لتوكتك وراحوا بيت العمدة دخلو المندرة

العمدة رحب بيهم وقال… الغفير لسه قايلي من شويه على اللي حصل، وبصراحة يا منال يابنتي خيبتي ظني انا عارف ابوكي وامك من سنين طول عمرهم بتوع ربنا.

منال مدت اديها السليمه بتلفونها وقالت…. بص يا عم الحاج فى الفيديو ده جوهرة بنتي كانت بتصوره لابوها هو معودها هي وماسه يصورا نفسهم ويبعتوله كل

يوم انا بالصدفه شفته من شويه قولت دا ربنا نصرني بيه.

انا كنت واقفه بشتغل في امان الله وقت ما حماتي طلعت شوف واحكم بنفسك.

سمع العمدة الفيديو وقال بذهول… كل دا حصل اومال الكلام اللي اتقال كان ايه.

منال… دا حجه عشان الناس متعتبهمش ومتغلطهمش الحمد لله شفت بنفسك وسمعت كل حاجة.

بعد اذنك التليفون هفرجك على حاجة کمان دا فيديو اتصور وقت ضربي وبعتوه لبعض.

العمدة اخد التليفون وشاف الفيديو وسمع صوت ياسمين وهي بتكلم وقال بعصبية … يا محمد روح بسرعه جبلي نادر ونعيم رجلك على رجلهم وجبهم على الجامع لازم البلد كلها تعرف الحقيقة.

منال… بعد اذنك يا عمدة انا مش هقدر افرج حد على الصور شايف لبسي وجسمي باينين.

العمدة … اكيد يا بنتي بس انا ليا عتاب عليكي ليه مجتيش ليا قبل المركز وانا كنت جبتلك حقك منهم.

منال… انا مكنش فيا عقل افكر يا عمدة كل خوفي وهمي بناتي والخرعه اللي اخدوها واول ما هديت وربنا رجعلي بناتي جيت ليك على طول.

العمدة.. عزرك يابنتي بعد اللي شفته وسمعته يمكن ربنا سبب الأسباب عشان نعرف حقيقه الناس دي وربنا ينجي بنتي

ونجني من النسب المقرف ده.

منال بتمثيل الذهول… نسب نسب ايه يا حاج.

العمدة … ليه متعرفيش ان نادر خطب صفاء بنتي وقرا فتحتها

امها … وتعرف منين يا حسرة دول بيخبو عليها كل حاجة حتى فرح نعيم وحورية

غضبوها ومجوش يصلحوها غير بعد الفرح ما يخلص عشان تنضف وسخهم.

العمدة … في كلام في الفيديو مستغربه شويه.

منال… هو ايه.

العمدة … اختك يا منال مالها ومال اهل جوزك.

منال … عنايات طمعانه تجوز بنتها وفاء بعد طلاقها من نادر ولما نادر رفض ديرة العطا على ناصر.

العمدة بذهول… دي اتهبلت ولا ايه هي متعرفش ان دا حرام ازاي تجوز بنتها لجوز اختها.

ام منال بدفاع عن بنتها … دا كلام حماتها یا عمدة بتوقع بين

الاخوات عنايات غلبانه ملهاش في حروب غاليه وبناتها.

العمدة … ولو يا حاجة دي كبيرة وجدة ازاي تقول اللي قالته دا دي مش بس بتهين اختها وتتهمها بالباطل بسحر انا مش عارف ازاي دي تربية الشيخ يوسف وجوزها سيبها ليه.

انا لولا مش عاوز الموضوع يكبر كنت شيعت لها هي وجوزها وعرفتهم غلطهم بس مليش ادخل في خصوصيات غير كدا الناس هتسيب كل حاجة وهتمسك في كلمتين بتوعها ويكبروهم.

امها بسرعه … انا هكلمها يا عمدة واحقها واخليها تتأسف لاختها وتبوس راسها.

العمدة … ناصر جوزك اتصل بيكي سال على اللي حصل.

منال هزت رأسها بلا

امها … ولا بعت رساله يا عمدة.

العمدة … شيعتيله الفيديو يا منال يابنتي.

منال… لاء يا عمدة مبعتش حاجة دا في غربه وبيجهز نفسه للسفر مقدرش ابعتله

حاجة تعكر نفسيته يجراله حاجة اعيش بذنبه وذنب بناتي.

العمدة … اصيله يا منال يابنتي بس مش خايفه اهله يقلبوه عليكي.

امها … دول مش بعيد يكونوا كلموه وحكوله كلام كذب.

منال… ناصر راجل

يعرف ربنا كويس وعندي ثقة في ربنا انه هيقف معايا ومهما قالوا عليا ناصر مش هيصدق ولا

هيسمع من طرف واحد، رغم إن امه عنده فوق الكل واخواته لكن كلمة الحق ما بيسكتش عليها.

امها لوت بوزها وقالت… ولما هو كدا كان بيوافق ليه وبيسكت لما اتخنقوا معاكي وغضبوكي في فرح اخواته.

منال… مكنش عارف الحقيقة واول ما عرف صلحني واعتذر مني ناصر كويس اوي ياماما.

امها … ربنا يخلف ظني المرة دى وميكونش مرتب كل حاجة مع اهله عشان يخرجك من المولد بلا حمص.

منال… لو دا حقيقي وقتها انا هاخد حقي منه لكن لحد ما يجي هو بريئ وحقه عليا ارد غبته خمس سنين عشتهم معه عمره ما زعلني ولا هاني.

العمدة … ونعم يا منال يابنتي ونعم والله ياريت فى بنات كتير من عينتك بيحقوا جوازهم وقت المشكله كانت الدنيا اتعدل حالها ومكنش في طلاق ومشاكل كتير كدا، شيعيلي الفيديوهين بالبلتوث يا منال يابنتي عشان اقدر اوقف اشباه الرجال واخرسهم لو اتمادوا في غلطهم عليكي.

منال فتحت البلوتوث وبعتت الفيديوهات وقالت… بعد اذنك نستأذن احنا عشان نلحق عبودة المجبرتي يشوف دراع بنتي.

خليكي قاعده هشيع غفير يا نادي عليه عشان يطمني انا كمان ولو قال عاوزة اشاعه ابعتكم مع حد من الغفر في عربيتي للمستشفى.

بعت العمدة غفير جاب المجبراتي ولقي دراع جوهرة منقول من مكانه رده ليها وقال… الحمد لله دراعها رجع لو كان باتت على كدا كان ازرق واحتمال يترد بعمليه ابقي خلي بالك منها وهي بتلعب يابنتي مرة تانيه.

منال وهي حضنه بنتها اللي بتبكي….

مفيش حاجة تخدها تخف وجعها.

عبودة … هي شويه وهترتاح الوجع هيروح وحده وحده

العمدة انا همشي الصلاة وجبت واعتبري حقك رجع يا منال يابنتي

منال… متشكرة يا عمدة بس في حاجة عاوزة حضرتك تساعدني فيها لان مش هقدر اروح المركز.

العمدة … امرني يا بنتي رقبتي سداده.

منال… سلفتي ياسمين مرات نعيم دخلت شقتي سرقت خاتم وغويشه وفلوس كنت مخبياها في النيش ودي فلوسي انا من ورثي من المرحوم ابويا بعد اذنك تبلغ المركز قبل ما تصرف فيهم الفلوس خمس تلاف جنيه والخاتم والغويشة فواتيرهم اهي وفي كيس تاني فيه فلوس التحويل وهتلاقي معهم الحوالة بالمبلغ وكمان في عشرين دينار جوه الفلوس .

العمدة بتفكير… طيب لو جبتهملك من غير ما تبلغي المركز ياسمين قربتي وعيب في حقي ابلغ عنها انا هعوضك بس استري عليها.

منال بتفكير…. هتنكر يا عمدة مش اول مرة تعملها لو مش عوزني ابلغ يبقي تاخد ناس ثقة وابوها وتفتشوها هتلاقي كل حاجة معاها غير هدومي اللي نقلتهم دولابها ولو ملقتهمش عندها هتلاقي

الفلوس عند حسنات.

العمدة … هاخد ابوها واخوتها عشان تتربي وتحرم تعمل كدا.

رجعت منال البيت مع امها اللي قالت…. انا مش فاهمه ايه خلاكي تدافعي عن ناصر وكل حاجة قدامك واضحه وباينه زي الشمس انهم متفقين مع بعض.

منال… معنديش اثبات على كدا وناصر مش بتاع لف ودوران لو ناوي على حاجة هيعملها عيني عينك مفيش حاجة تجبره انه يلف اللفه دى كلها دي غاليه وسيئات بنتها حبوا يكسروا شوكتي بس وسعت منهم وانا اخدت حقي من نادر وخطوبته من البنت اللي بيحبها اتفشكلت وجوازته باظت نعيم كفايه عليه عشته مع مراته غير السجن إن شاء الله على ضربه ليا ولبنتي وحسنات انا خلاص عرفت ها خد حقي ازاي منها وعنايات مش هحلها يامه بس اسمع منها.

امها.. يا بنتي بلاش تخلي الشيطان يدخل ما بنكم وبعدين دى اختك الكبيره بينك وبنها خمستاشر سنه.

منال.. وهي ليه ياماما مقلتش دي اختي الصغيرة ومليش غيرها ليه تقل مني وتهني وكمان مستكترة عليا جوزي عاوزة تخده لبنتها مستحرمتش ليه بناته الصغيرين اللي يدوب طالعين للدنيا، ليه كل كلامها عن شكلي ولوني مقالتش دي خلقه ربنا ومن عاب ابتلي، عنايات ياماما مخلتش ليها مكان في قلبي يشفع لها.

امها … يعني ايه يا منال.

منال مسكت تليفونها وبعتت رسالة كتبت … عمي طلحة لو فاضي لو سمحت تيجي عند ماما في موضوع مهم اوي عوزاك فيه.

امها … ردي يا بنتي وريحي قلبي

منال اخدت نفس قالت … يعني خلاص ياماما انا انهاردة عليا وعلى اعدائي زمان كنت بسكت واخبي كسرتي استحملت مرمطه وبهدله حماتي واهانت وتحكم حسنات فيا عشان اللي مني طول عمري بيقلوا مني استحملت اعيش خدامه واتعامل زي الجاهلة عشان خايفه يقولوا اطلقت عشان شكلها وحش وابقي مقلته بين اهل البلد استحملت اهانه ياسمين ونعيم وتريقته عليا في الطالعه والنازله

عشان وفاء اللي زي القمر اللي جمالها ملوش وصف اطلقت انا الوحشة هيتقال عليا ايه انا خلاص يا ماما مبقتش باقيه على حد غير نفسي وبناتي وعزة الله ما هيوقفني حد عن اللي هعمله في اي حد داس لي على طرف انا وبناتي حتى ناصر نفسه رغم حبي ليه ودفاعي عنه لو بس جه وفتح بقه بحرف انا اللي هخلعه ومش هبقي عليه.

امها … استهدي بالله يا منال

منال اتصلت على اختها وقالت لها …. منتظراكي في بيت ماما تيجي حالاً.

عنايات… انا طالعه السلم ثواني وهكون عندكم.

قفلت الاتصال منال قالت … طالعة السلم.

انفتح الباب ودخلت عنايات وقالت… دا اللي سمعته طلع بجد.

منال بصت لها وقالت… وايه الفرحة اللي ماليه وشك يا ختي.

عنايات بلجلجه … فرحه دا انا مقهورة وزعلانه دي حنان من وقت ما قالتلي وانا وما ليكي عليا يمين بستفتها ورامي كان مصمم يغضبها بس ابوه قاله عیب تاخد ذنب مراتك بالي عملوه اهلها.

منال… والله لو فعلاً رامي كان هيعمل كدا فهو اصيل عن امه اللي بتتريق على اختها وبتتهمها انها سحارة.

امهم… صحيح اللي بتقوله اختك يا عنايات.

عنايات بتوتر… لاء طبعاً انا مقولتش الكلام دا دي حنان هي اللي.

منال… حنان قالت ايه يا ختي ولما هي قالت ليه ما سكتهاش ووقفتيها عند حدها اقولك مقولتيش ليه تسكت عشان الكلام على هواكي، فاكره ان بعمايلك دى بتراضي غاليه وهتوافق تجوز ناصر لبنتك ناسية ان اللي بتكلمي عليها اختك واللي عاوزة تجوزيه لبنتك جوز اختك يعني بكل الطرق حرام شرعاً للدرجادي معندكش ضمير والحقد مالي قلبك.

عنايات بغل… ايوا انا قولت وقولت اكثر من كدا من يوم يومك مرزقة كل اللي بتتمنيه بتخديه شاطرة في دراستك

كملتي تعليمك اتجوزتي احسن جوازه راجل البلد كلها بتحسدك عليه اجمل منك مليون مرة بيتمنالك الرضا ترضي انا يوم ما قولت يا علام ابويا قال مأمنش عليكي انتي فيكي الطمع قعدني ويوم ما قولت يا جواز رفض كل اللي اتقدمولي وجوزني طلحة ابن عمه اكبر مني بسنين حاله عدم بيكح تراب ولما الحال اتعدل ركبه المرض عيالي الاتنين تعليمهم متوسط مفيش واحد فيهم عده السنه بسنتها الاتنين بيخدوا السنه

في سنتين رامي عشان يضمن يسافر والدنيا تلعب معاه اتجوز حنان ام بوز اقطم ووشها يقطع الخميرة من البيت وقولنا اللي وراها يغني عن حلواتها، يوم خطوبته كنت مخططة اجوز وفاء لناصر وانا بنفسي اللي قولت لطلحة يبعت اخته ووقفت وفاء جنب حنان عشان يشوفها عينيه متجيش غير عليكي وقبل العشاء كان كلم ابوكي وخطبك منه اغلى مهر واحلي شبكة وفرح البلد كلها اتحاكت بيه سنة ووفاء تنخطب لابن عمها فقري زي عمه وياريته عدل الا انه بخيل ونتن يعني بخت بنتي نفس بختي على راي المثل حظ الملايحفي الارض طايح وحظ القبايح في السماء لايح.

اديرت على صوت من وراها بيقول … بقي انا حالي عدم وبكح تراب وابن اخويا نتن زيي وحظك طايح وانا هعدلهولك يا عنايات.

عنايات بتهته … طلحة انا اصل.

طلحة … انتي ايه يا نكارة الخير يا كفارة العشير انا اللي كنت عملك خدي مداس تقولي عليا كدا بس ملحوقة يا عنايات انتي طالق طالق طالق بالتلاته فاهمه طالق طالق طالق.

عنايات ببكاء … لاء يا طلحة انا عنبه حببتك.

طلحة بص لحماته … متزعليش مني يا ست الناس بس هي مخلتش قدامي حل غير كدا سامحيني واي وقت تعوزيني هتلاقيني.

منال بصت لعنايات وقالت… سبحان الله حفرتي لي حفرة ووقعتي فيها.

عنايات ببكاء… شمتانه فيا يا منال

منال بسخرية … الشماته دى متجيش حاجة قصاد حزام نزل على ظهري ولا جرجرت نعيم ليا على السلم وجسمي باين وياسمين بتصورني ولحمي عريان وضحكتها من الودن دى للودن دي وياريتها اكتفت بكده دي نزلته على الفيس فكراني معرفتش بس حسابها جاي جاي.

…

رواية ألاعيب حواء الجزء الرابع 4 بقلم منى عبدالعزيز

ألاعيب حواءرواية ألاعيب حواء الحلقة الرابعة

العمدة وصل الجامع لقي نعيم ونادر واقفين مع الغفير بقلق

نعيم قال … فى حاجة يا خال الغفير قال انك عوازنا ضروري فى الجامع.

العمدة تعالوا ورايا هنصلي العشاء والتراويح وبعدين اقولكم

.

نعيم باستغراب قال… طيب ريحنا وقولنا.

العمدة… قولت بعد الصلاة.

بعد انتهاء صلاة التراويح وقف العمدة وقال الراجل اللي يمد ايده على مرات اخوه يبقي ايه يا رجاله، الراجل اللي يرمي لحم اخوه بهدوم خفيفه وعريانه قدام الرايح والجاي يبقي ايه.

الراجل اللي ينكر عملته عشان يتهرب منها يتهم ست محصنه فى عرضها وشرفها عشان يسومها على التنازل يبقي ايه.

شيخ الجامع قال… يبقى ديوث مش راجل ولا يتحسب على الرجالة.

اهل البلد بيبصوا لبعض وبيهمسوا لبعض.

العمدة قال… انا اتكلمت هنا فى الجامع مش عشان اللي عملوه بس لا انا بعاتب كل اهل البلد اللي سمعوا صريخ البونيه وشافوها مرميه في الشارع وطلعوا تليفونتهم وصوروا بدل ما يدخلوا ويدفعوا عن حرمه.

فضل العمدة يتكلم ويهين فى نعيم ونادر، وقال تاخد اخوك وتطلعوا على المركز تتنزلوا على البلاغ اللي عملتوه.

هشيع معاكم اتنين غفر يتاكدوا نفذتوا ولا لاء

وانت يا حج صبحي رايدك ويايا مشوار ضروري

صبحي…قلقتني يا حاج مشوار ايه.

العمدة… امشي هحكيلك كل حاجة فى الطريق هنروح بيتك

بيت ناصر واخواته اتصل على ولاك وواحد فيهم يجيب مراته معه.

وصلوا البيت وطلعو شقه ياسمين ونعيم .

العمدة شاور لمرات اخوها وقال… فتشيها.

ياسمين… فى ايه يا خال ويفتشوني بتاع ايه.

العمدة… من سكات جيبي الغويشه والخاتم وكيس الفلوس بتوع منال سلفتك.

ياسمين بلعت ريقها قالت… انا مخدتش منها حاجة ومستعدة احلف.

ابوها بكسرة قال… جيبي يا ياسمين الحاجه.

ياسمين برعشه قالت… هى اللي مديهملي يابا انا.

ابوها نزل على وشها وقال… دى اخرت تربيتي فيكي بعد العمر دا كله بنتي تطلع حراميه وانا اللي عمري ما حرمتها من حاجه وهي فى بيتي وهي في بيت جوزها طلباتها اوامر، اخص عليكي اخص من الساعة دى لا انتي بنتي ولا اعرفك، وبيتي متحرم عليكي طول ما انا عايش.

اخوها… كسفتينا قدام الناس بقي بنت الحاج صبحي محروس على اخر الزمن تبقى حراميه اخص ومليون اخص من الساعة دى لا انتي اختي ولا اعرفك يلا يابه مالناش قاعده فى البيت دا اللي كل اللي فيه يعروا.

ياسمين… بابا والله ماعملت حاجة دى منال ادتهملي عشان.

ابوها… متحلفيش واسم ربنا متذكرهوش على لسانك انا بريئ منك.

العمدة بص لياسمين وقال… احمدي ربك اننا احنا اللي جينا لوليا كان زمان المركز هنا قبضين عليكي.

ياسمين ببكاء.. والله.

العمدة… بلاش تحلفي الحرامي بشلته، بينا يا حج صبحي وسامحني انا كنت جاي وجيبك عندي أمل انها تبقي بريئه بس للاسف طلع الكلام كله صح بينا نروح للبلوه التانية.

بعد وقت قصير وصلوا بيت حسنات فتحت بنتها كانت قاعدة بتعد الفلوس وبتقول… مين يا اميرة اللي رن الجرس.

العمدة وهو عيونه عليها قال… انا يا حسنات.

حسنات وقفت بسرعه الفلوس وقعت على الأرض

بص العمدة عليها وقال… جيبي فلوس مرات ناصر يا حسنات.

دخل جوزها من بره وقال… اهلا يا عمدة نورت البيت انت والجماعة اتفضلوا اقعدوا وقغين ليه.

العمدة بص لجوزها… انت مش راجل مكفي بيتك ولا انت لا مؤاخذة.

جوز حسنات… فى ايه ياعمدة مالك داخل فيا شمال كدا ليه وبعدين انا راجل مكفي بيتي من مجاميعه.

العمدة… مدام مكفي بيتك سايب مراتك تمد ايديها لاخوها وياريتها بتشبع دي بتسرق فلوس البنات ومصاريف اكلهم وشربهم.

جوز حسنات قرب منها بعصبية وقال… ياليله اهلك سودة ايه الكلام اللي بسمعه دا والفلوس دى بتعملي بيها ايه هو انا منقصك حاجة ولا مقصر على البيت والعيال حاجة عشان تفضحيني كدا.

حسنات… استني بس هفهمك اصل انا بشاور البنت وبجهزها والفلوس اللي بخدها بسد بيها الاقساط.

العمدة … بتسدي من قوت عيال اخوكي ومن عرق الغلبان اللي متغرب.

حسنات… اصل.

جوزها… انكتمي فضحتيني و قلتي مني اسمع يا عمدة الست دي من الساعة دى طالق ومتلزمنيش الست اللي تقل مني وطلعني راجل مش ولا بد متلزمتيش.

حسنات بصريخ… دا انا اقطعها بسناني والبيت بيتي انا وعيالي انت اللي تمشي ملكش قعاد هنا..

العمدة… امشي يا ابو اميرة دلوقتي على الامور ما تهدي وابقي جيب اخواتها وحلوا الموضوع.

عند منال قاعدة فى بيت امها بصه على عنايات اللي بتبكي وامها بتبكي على بكاها سمعوا جرس الباب قامت امها تفتح وبتقول… ربنا يستر من الجاي انا قلبي نغزني.

فتحت الباب لقت غاليه حمات منال جايه وعيونها كلها شر وبتزعق وبتقول… عملتيها يا منال خربتي بيت عيالي امشي قدامي اعترفي بعملتك لسيد جوز حسنات وللحج صبحي انك انتى قولتي لياسمين تاخد الفلوس والدهب.

منال قعدﭢ مددت رجليها على الكنبة وقالت… وانا اعترف بحاجه معملتهاش مش قالوا الحرامي بشلته

.

غاليه… قومي بقولك قدامي بدل ما اجيب اللي يشلوكي مربعه ويودكي غصب عنك.

منال… اعمليها كدا وإن شاء الله هتحصلي عيالك فى المركز اصل الخبر لسه موصلكيش.

غاليه بقلق… قصدك ايه.

منال… جوز الانطاع اللي مخلفاهم اتقبض عليهم فى المركز بعد ما اتنازلوا على البلاغ واعترفوا انه بلاغ كيدي عشان يجبروني على التنازل والظابط طلع ابن حلال وقبض عليهم بتهمت ضرب ادي الي اصابة وعلاج اكتر من واحد وعشرين يوم، لسه من خمس دقايق بالظبط الصول قريب الحاج عبدالحليم بعتلي رسالة.

غاليه لسه هتقرب منها… منال قالت… عندك انتي فى بيتي وجايه بنفسك لحدي يعني تهمه مع سبق الاسرار والترصد ودي ااقل حاجة خمس سنين بس انا عشان اصيله وعامله حساب انك ام جوزي وجدة بناتي هضيفك واطلب من وحده من بناتي تجبلك بق ماية ترطبي على قلبك.

غاليه… انتي ايه حيه امتى وازاي خطتتي لكل دا.

منال بحزن قالت… انا لو عشت عمر قد عمري مرتين عمري ما كنت فكرت فى كل دا بس الظلم وحش اوي علقم والمظلوم اللي زيي اللي كان راضي بعشته ومكمل حياته وعايش عشان غيره لما يلاقي ان كل تعبه وتضحيته راحت بلاش دماغه يا اما بتهرب ويبقي منعزل وعمال يتحسر ويركبه المرض يا اما دماغه تشتغل ويفكر ويخطط وكل واحد على قد ظلمه وانا اتظلمت مش من واحد ولا اتنين انا اتظلمت من كتير منك ومن بناتك واختي وعيالك ومرات ابنك شوفي بقي واحده كل دول ظلموها وكسروها ااقل حاجة تفكرفيها ايه متتعبيش نفسك وتردي انا هقولك لما روحت المستشفى انا كنت هرجع على بيت امي واستني ناصر ينزل يخدلي حقي، لكن لما قعدت مع نفسي واديت معها قولت لاء مش هستني حد ياخدلي حقي، انا هاخد

حقي بنفسي، فكرت فى كل واحد ازاي اخد حقي منه وكل واحد على قد ظلمه ليا نعيم ونادر روحت للعمدة وحكتله وفرجته على الفيديو اللي ياسمين صورته وانا عارفه ان العمدة راجل حقاني ودايما ليه حكم واحد يأدب الغلطان ويحقهم قدام اهل البلد عشان غيره يتعظ ماشي بمبدأ اضرب المربوط يخاف السايب وحصل جاب نادر ونعيم وحقهم قدام البلد كلها وانا هعوز ايه احسن من انهم ينكسروا وعيونهم تبقي فى الارض قدام البلد كلها زيوا ما كسروني قدام الرايح والجاي.

تاني واحده

اختي بعدت رسالة لعم طلحة وقولتله يجي بسرعه عوزاة عند امي وبعدها رنيت على عنايات قالت انها طالعه السلم سمعت عمي طلحة كلامها عنه وبنفس خطتها اطلقت وياسمين اللي صورت لحمي ونزلته وخلت الناس تنهش فى لحمي وتهني واللي يقول تستاهل واللي تقول خرابة بيوت، ومدام كدا ولا كدا انا فى عيون الناس سحارة وخرابة بيوت مفهاش حاجة لما اخرب كام بيت ولا هو حلال عليهم يخربوا بيتي وينهشوا لحمي وهما يعيشوا متهنين ولا كأنهم عملوا حاجة لا ورب الكعبة ما يحصل وكل واحد او واحده فكروا يؤذوني راسي ما لمست المخدة غير وانا واخده حقي منهم وقبل ما اطلق وبيتي ينخرب لخرب بيتهم واقعد على تالهم.

غاليه بصريخ… انا هطلع بروحك

… امه

اديرت بسرعة ناحية الصوت وبفرحة قالت… ناصر جيت وربنا جابك تعالي شوف

منال بذهول وقفت اول ما سمعت صوت اللي ناده على امه وقالت بته… ناصر

ناصر مشي ناحية منال وامه اللي جات تقرب منه انحنا وباس ايديها وقال بصوت هادي… ازيك يا امي.

غالية… حمدالله على سلامتك يا حبيبي مش كنت جاي بكرة.

ناصر وعيونه على منال قال… ايوا كنت جاي بكرة فى طيارة الفجر بس لما شفت مراتي وبنتي بيضربوا وينسحلوا من اخواتي كانهم انعدموا راجلهم يبقي لازم ارجع حتى، لو جيت مشي لما الامانه اللي سبتها وانا مطمن انهم فى امان مع اللي مني وطلع اللي مني هما اللي نهشوا عرضي لازم ارجع الم لحمي اللي اتعره قدام الخلق.

امه… ناصر انت.

ناصر قرب منال قال… سامحيني يا ام جوهرة سامحيني انا المذنب سبتك وسفرت وانا فاكر اني سيبك فى امان ومع سند بس عتبي عليكي ليه مكنتيش بتقوليليى على اللي كان بيحصل معاكي لولا جوهرة كلمتني فيديو مكنتش عرفت حاجة ولا عرفت اللي حصلك.

امه… ناصر انت بتقول ايه دي خربت بيت اخواتك وسجنت نعيم ونادر.

ناصر… أخواتي يستحقوا اللي حصلهم لو هيا ما سجنتهمش اقسم كنت انا سجنتهم.

امه… انت بتتكلم جد يا ناصر لا دا انا بصمت باالعشرة انت مش طبيعي انت مسحور.

ناصر… فعلا مسحور بس سحر حلال انكتب يوم ما كتبت عليها وعهدت ربنا وابوها اني هحافظ عليها انكتب لما عشت معاها ولقتها ملاك مبتفوتش فرض حافظة كتاب ربنا وانا اللي كنت بصلي على سطر واسيب عشرين كانت كل ليله تطلب مني اسمع لها وردها لحد ما انكسفت على نفسي وبقيت احفظ عشان صورتي قدمها فاكرة يا امي السبع شهور اللي قعدتهم فى البيت بعد الفرح مكنتش قاعد عشان اجازة دا المشروع اللي كنت شغال فيه كان خلص وكنت مكلم كذا حد يشفلي مشروع تاني ولا عقد عمل سبع شهور وانا بصرف من القرشين اللي رجعت بيهم ومن نقوط الفرح تعرفي يامه سفرت ازاي منال

باعت ليا دهبها وورثها واشترت ليا عقد العمل خمس سنين ولا مرة قالت دهبي، وورثي ربنا رزقني منها بتلت ملايكه رغم تعبها وشغلها ليل نهار بتحفظ البنات القرآن غير دراستهم عرفتي يا امي السحر اللي سحرتني بيه.

منال دموعها نازله ناصر قال لها… اوعدك ورايح دموعك مش هتنزل غير من الفرح، انا كنت جاي وهاخدك انتي والبنات معايا هنعيش مع بعض، ولا يمكن هسيبك أبداً.

امه… ناصر انت بتقول ايه.

ناصر بص لمنال وقال… اسف يا امي هما اخواتي ايوا لكن مش هضغط على منال لازم يخدوا جزائهم.

منال مسحت دموعها وبحنان… انا هتنازل يا ناصر عشانك.

ناصر… حبيبتي يا منال ربنا يديكِ على قد نيتك الصافيه واوعدك هعوضك انتي وبناتي.

ادير لامه وقال… عرفتي ليه يا امي انا بحبها ومتمسك بيها لانها بنت اصل ومتربية رغم اللي حصل لها الا انها اتنازلت وحده غيرها كانت قالت حقي ومش متنزله عنه وانا واهل البلد كلها مش هنقدر نعيب ولا نلوم عليها وقتها لانها مغلطتتش.

امه بخجل… ربنا يهدي سركم يابني سامحنى يا حبيبي لو كنت غلطت ولو عايزني ابوس راسها واترجها.

منال… حضرتك على عيني وراسي ومقامك كبير وعشان حضرتك جدة ولادي وام جوزي وابو ولادي استحالة هقل من حضرتك كرماله لانه يستاهل ماكسرهوش بس اعذريني ورايح حضرتك جارتي وصباح الخير يا جاري انت فى حالك وانا فى حالي

تمت.