رواية الابواب الخمس الفصل الثاني وستون 62 - بقلم ريام هادي

#الابواب_الخمس
البارت الخامس عشر /الجزء الثاني
للكاتبة Reem

يناعور التعب بسک تترسنه وتبدينه ؛
ولك بالعشرين ردنه نگوم ما عانتنه رجلينه !

ناي : بعد شهر اباوع من الشباك على حال مهدي الضايع كاعد بلحديقه ويدخن نزلت بعد مامسحت المكياج وره رجعتي من العرس
تمشيت بهدوء وظهره عليه حطيت ايدي على جتفه رفع وجهه وعيونه دم وكتله كوم امسح عيونك كافي تبجي عليها راحت بعد لبيتها مو قسمتك

قبل شهر :
طلعت سدره واني عيوني صارت على حوراء المتعرف تظم ارتباكها وقلقها
هاا شبيج
حوراء : مابيه
ناي : اخاف تفكرين بمهدي من يسمع شراح يصير بيه حقج اخوج وتخافين عليه وابتسمت بقهر هي انصدمت ومتعرف شون تخربط بلحجي
حوراء : يامهدي وشعلي مهدي هاي شبيج ناي
ناي : عبالج مااعرف اخوج يحبها
حوراء : شبيج كولي ياالله هيه بت خاله وحسبت اخته
ناي : تضحكين عليه لو على نفسج شوفي وجهج الكام يگلب الوان ومتعرفين تضمين صدمتج من الاخير ياحوري اني سمعت رجلي بأذني وهو يكلها احبج لتوجعين گلبج ولا ادورين جذبه تخطي على الموضوع الشغله محسومه من زمان واني ادري بيوم مراحت لجامعتها يعني اكثر من شهرين وبالعه لساني وساكته

حوراء : وهيج الموضوع عادي عندج
ناي : شنو الاسوي اتعارك اعيط مراح احصل شى البنيه محترمه نفسها وطيبه ويايه من اول يوم شفتها بيه ومهدي تزوجني بأمر من خاله يعني حتى اذا تعارك راح يكولي انتي السبب كله من وراج لوما متزوجه مجان هيج صارلي يعني بالاخير اطلع اني ام الصوج اكو شغلات متفيد بيها العركات
حوراء : انتي متعرفين الصار مالج ذنب تره
ناي : اني ما محمله نفسي الذنب تدرين ليش لان صوج اخوج لو هو يحبها من صدك جان المفروض يحارب الدنيا على مودها وياخذها ويرفضني لو يصبوني ذهب اني مااريد اعرف الصار حتى لا ادوخ نفسي وابقى افكر خليني مقتنعه بأن اني انظلمت حالي حال سدره هي متزوجت الي تحبه واني اتزوجت رجال گلبه ويه غيري

حوراء : خليني احجيلك كلشي
ناي : مااريد اسمع لتزيديني أذيه كافي عليه مهدي واني اشوفه متلوع بحبها ومن راح يسمع راح يتخبل
اروح اكمل غسل هدوم
حوراء : لج ناي اوكفي
ناي : هسه امج تجي وتسوينا عرس خلي اكمل وانتي فكيها طفيتي فرحتها لسدره انتي اختها واقرب صديقه الها وكبرتو سوه  صيري حقانيه واوكفي وياها متعرفين هيج ايام البنيه شكد تحتاج اقرب انسانه الها لازم تفرحين الها دام ماهيه فرحانه

عفتها ورجعت اكمل شغلي طبيت للحمام اكمل غسل ملابس وكفت على المغسله وذبيت مي على وجهي بارد وبعز هذا البرد اذب ومااحس برودته لان النار البوجهي وگلبي تخلي حتى البروده مااحس بيها اني ليش اختنكت وحاصرتني البجيه غيري وحده تركص لان حبيبة رجلي راح تتزوج معقوله اغار على مهدي كمت اباوع على المرايه وصافنه على تصرفاتي ظاهري ثلج وداخلي نار مهما كان يبقى زوجي وتعلمت عليه وهو طيب ويايه ليش مااغار لزمت الملابس وذبيت حركتي بيهن اريد اهدا حتى مااحسس احد لان اكيد راح تصير شغلات تغثني

طلعت شريت الملابس وهدومي كلهن مي صعدت السطح والهوا يكص وانفض بحركة وافكر من راح يعرف مهدي بخطوبة سدره شنو ردت فعله توقعت ردت الفعل صدمه اله

نزلت بدلت وتعاملت طبيعي حتى من اجه سبح وطلع كعد صبيت الاكل اله واكل جان هادئ مثل كل يوم مبين محد مبلغه كمل اكل وراد يصعد ينام اجت عمتي وكالت صلاح بلباب يريدك هنا لزمت گلبي لان راح يحجي
غسلت حوراء المواعين وعيونها عليه واني امثل دور الهادئه اجذب على نفسي قبل مااجذب على الداير مدايري
طب مهدي يركض بدل ونزل واني حتى ما صعدت وراه وبيومها بقيت انتظره يجي ومااجه ودك تلفون على امه كال الها ابات بره عرفت الدنيا ضاكت عليه وميريد يشوفني ااااخ ياناي شكد صبوره تدرين برجلج ديحترك على حب غيرج وانتي ساكته

بدلنا كلنا لبست فستان حلو من حوراء اخذته وطلعت ذهب النيشان مالتي ولبسته وشسورت شعري وحطيت مكياج خفيف شافتني حوراء
حوراء : لج طالعه كلش حلوة ولا عرفتج
ناي : وانتي هم حلووة ومرتبه عمه وين
حوراء : راحت گبلنا يله خلي نحط الشالات على روسنا ومن نوصل هناك انذبه
رحنا لبيت خالهم خطوبة وقطع المهر مال سدره صار يومين ومهدي مابين ولا اني سألت لان اسمع امه تطمن عليه يعني هو زين بس ميريد يحضر خطبتها وطلع حجه وهج
دخلنا لغرفتها واني كمت اهلهل وحوراء هم جانت طالعه تخبل اباوع على شكلها وشعرها وجمالها رشاقتها حقه يحبها غير اني بنيه واصفن على حسنها
سدره : ولجن شون طالعه شو معاجبني شعري
ناي : تخبلين والله
حوراء : محلوه وتلعبين النفس واكرهج
سدره : ههههههه تموتين عليه واحلى منج شوو تعاالي جرتها وحضنتها
حوراء : حقيره شون تزوجين وتعوفيني لو اني مسويتها مجان طيحتي حظي
سدره : طبعاً اطيح حظج بس انتي فقيره تسكتين
حوراء : شون راح ابقى بلياج
سدره : مأمنه ناي يمج وتعوض عني
حوراء : احبها لناي بس مو مثلج لتزعلين نايه
ناي : هههههه ماازعل الله يحفظكم سوه يله فضن هاي السالفه راح يجون الناس

بدت مراسيم المشيه والشارع ترسوه ترس سيارات جان مشيه هيبه وشيوخ ومعكلين ابتسمت على حظي مو حسد لا والله بس كلت حتى ابسط حق ماحسيته عمامي جانو كاعدين يطعنون بيه وبشرفي وشرف اختي ويردون يخلصون من عدنا بلوكت المفروض يعززون بينا
علت صوت الهلاهل وعقدو شيخ الها وطب العريس جان شاب مرتب حيل ولبسها النيشان الكل فرحان ويهلهل حيل فرحت الها ولان حسيت ابتسامتها من گلبها مو مصطنعه
حوراء ماكعدت تردح للكاع كل الناس فرحانه وتسولف وتضحك اله اني افكر بمهدي وضعه

صافنه واشرت مره جبيره بلعمر عليه بمعنى تعالي كمت من مكاني ورحت يمها
الحجيه : انتي جنة وداد
ناي : اي حجيه اني
الحجيه : شحلاتج يمه بلخير والبركة شجاها وداد المخبله تكول عليج عوبه
ناي : ابتسمت ودنكت
الحجيه : اني عمتهم الجبيره ومااجيت لعرسج لان جنت مريضة وتعبانه
ناي : هله بيج بكل وكت
جان تمد ايدها بجيب دشداشتها وطلعت فلوس ملفوفه بكلينس
وحطتهم بيدي
هاج يمه هاي مال عرسج
ناي : لا عمه فدوة اعتبريها واصله
الحجيه : شنو واصله هاي سوالف بنات بغداد ماتمشي عدنا الاكبر منج ميكدر يرد ايدي ترديها انتي هاااج حطيهم بصدرج لتجي عمتج وتاخذهم منج
ناي : ههههه لا متاخذهم بستها من راسها وتشكرت منها تحركت ارجع لمكاني جان تلزم ايدي ودنكت عليها وكالت
الحجيه : اصبري يمه ماضاقت اله مافرجت كلشي مكتوب ولازم تعيشي وماكو شى يصير بليه سبب خلي عينج بعين الله وهو كريم قادر يغير من حال الى حال

ناي : صفنت بوجهه وهي ابتسمت واشرت براسها يعني ارجعي لمكانج
جانت نبرتها غريبه وبنفس الوقت احسها مقهوره عليه رجعت لمكاني وكعدت
وعيوني مافاركت هاي الحجيه لحد ماطلعت
كملنا المهر ورجعت اني وحوراء عمتي بقت هناك نزعت ذهبي وبدلت وحطيت الفلوس بلكنتور وبقيت كاعده صافنه على حالي
وعدت الساعات وهاي الليله هم مبين مهدي

ويه اليوم صار اسبوع هاج من البيت واني باقيه اطحن من جهتين جهه لعدم وجوده وجهه من عمتي الماترحمني كل شويه عايطه علية ومسويتني خدامه عدها
كاعده بلغرفه اتفرج على التلفزيون وبالي مو يمه افكر بمهدي ومشتاقه لشرهب ويونس عقلي الف فگر بيه
اندكت الباب اعرفها حوراء لان عمتي مدكه گبل تدخل مداهمات
تعالي حوري
سدره : مو بس حوري اني هم وياها ندخل
ناي : عدلت كعدتي هله بيكم تعالو ياريت ضايجه وحدي
حوراء : نريد نحجي وياج
ناي : وجوهكم ممرتاحه الها خيركم

سدره : حوري اريد اسولف براحتي لو تسمعين وتغلسين لو تنزلين
حوراء : احجي داده مالي دخل اذن من طين والثانيه من عجين
ناي : خوفتوني شصار
سدره : اليوم الصبح اجت حوري عليه وكالت على سالفه انتي تدرين بأن مهدي
ناي : باوعت عليها وكتلها يحبج مو
سدره : اسمعي السالفه مني كلها واحكمي
ناي : واني مردت اسمع ليش حوراء هيج سويتي
سدره : ميخالف اسمعي حتى ليشيل بگلبج عليه اني حالي حال هواي بنات تربيت وفتحت عيني على ولد بلبيت جان مهدي دوم يمنا هو وعبدالرحمن وعبدالله اخوه السافر كلهم شله وحده
وجنت اعتبرهم اخوتي بحكم عشت وياهم

لحد مايوم اجاني خطابه  جنت طالبه خامس اعدادي ادرس وملتهيه واهلي رفضو لان صغيره وخاصه ابويه جان امنيته ادخل كليه صاحتني حوراء اجيت عادي لبيتهم تفاجأت مهدي ينتظرني ويريد يحجي ويايه سامع بسالفه الخطابه واعترفلي هو يحبني ويريدني وجنت صريحه وياه اني ماعندي مشاعر اتجاهه واعتبره اخويه بس هو رفض هذا الشى وكال تحبيني بمرور الوكت من تشوفيني مو اخ حبيب سكتت ومحجيت لاحد بس حوراء تعرف وبحكم اني بنيه مراهقه بدت مشاعري تتغير وخاصه من اشوف نظراته وخوفه عليه وغيرته وهو دوم كدامي وابن عمتي ومو غريب واعرف اطباعه
ومرت السنين وكبرت ودخلت كليه من رحت لبغداد وعاشرت صديقات وبيئه غير بيئتي واسمع اشكال عن المتزوجات وحياتهن بدا عقلي يتفتح

ناي : حبيتي لمهدي
سدره : مااكذب عليج حبيته وقنعت نفسي هذا الانسان هو الراح يكون شريك حياتي
الي تغير عقلي تفكيره وكمت اتخيل لو اني اعيش ويه عمه وداد شراح يصير بيه واني فتحت عيني على عمتي وحده متسلطه شايفه نفسها متحب الخير لغيرها تغار على ابنها من الهوا ولسانها متبري منها ولخاطر مصلحتها تبيه الدنيا يعني راح تشوي على راسي بصل
موتزعلين حوري
حوراء : عادي داده استمري اليوم امي رچلها تنبشها نبش من الحك

سدره : من رجعت اول سنه من الكليه مهدي كال لازم اخطبج مابيها مجال بعد وهو كمل كليته واستقر بشغله يعني ماكو شى يعطل زواجنا اني شرطت اعيش بيت وحدي يعني مااعيش يم عمه وداد وهذا من حقي ليش ادفن نفسي وشبابي ويه وحده اعرف بيها راح تشوفني المر والضيم واعرف مهدي يحبها وراح يعيش بين نارين
هو سمع تخبل شون اعوف امي واني هلواحد شون اخليها واطلع
كتله هذا شرطي واذا تريد ناخذ كاع عمي عمران لان قريبه علينا نشتريها منه بعد ٥ دقايق نبنيها مشتمل ونكعد وانت اذا تحب روح وتعال عليها شو مشي تتمشى هلكد ماقريبه هو مقبل وبدا يطلع حج على امي وحدها وهي خلصت عمرها لاجلنا ومتزوجت وشون اجازيها هيج واطلع منها اني عذرته وبنفس الوقت نفسي اهم 

ناي : شصار وراها
سدره : تفاركنا سنه كامله هو برأيه واني مغيرت شرطي حتى عمي عمران ادخل ومكدر يقنعني بلعكس عمي وكع بلنص مره يطبك ويايه ومره وياه يشوف الطرفين كلامنا منطقي اخر شى سحب ايده
ناي : ليش مضحيتي انتي مو تحبي
سدره : وليش مو هو يضحي ليش اني
ناي : جان احتمال عمتج تتغير وخاصه انتي بت اخوها

سدره : غلطانه عيني لتشوفين عمتي ساكته هسه وتقبلتج زوجة لمهدي عمتي الف حساب بالها واعرفها زين  لو مو بت اخوها هااي بتها لاعبه بحالها مو اني زوجة مهدي ويحبني ويدللني وكدام عينها يبووو شسوي بيه شفت الوضع مايتلزك لو شكد متلزكي رفضت ومثل ما مهدي متمسك بأمه وراحتها اني هم اتمسك براحتي اتصوري كتله نبقى بنفس البيت بس نعزل وانزل درج هم ماقبل القهرني منه وخلاني اصرف نظر واتمسك برأي بأن هو اكثر واحد يعرف امه شنو ويعرف من نتزوج راح تأذيني وراح اطلع دلال اهلي من عيني
وكل ميحجي يكول عمتج لازم تتحمليها يعني قدم راحته وراحه امه على حساب راحتي جان بلجذب حاول او طيب خاطري هو بقى متزمت برأيه وصفني بالانانيه ومااستاهل حبه  وحرامات بيوم حبني هاي جانت العركه الاخيره بينا من سمعت هيج كتله انت من طريق واني من طريق ومالك دخل بيه بعد ورجعت للكليه وبديت اتأقلم على عدم وجوده بحياتي وكل مااحن اتذكر كلامه ويرجع گلبي يقسه عليه

ناي : ماادري شكول يمكن الي بوضعي تشوف السبب تافهه وهيج نهيتو كلشي
سدره : والي بوضعي اشوفه سبب مهم وعظيم لان اني مناقصني شى ومامجبوره اتحمل عمتي وخاصه اني تربيت بعز ودلال ليش اخلص شبابي بذل وعركات وطلايب اعتذر لان هيج احجي بس هذا واقع
ناي : صحيح حقج وتالي شصار

سدره : رجعت لحياتي ودراستي لحد ماشفت عمر خطيبي وشفتو شون خلوق وعائلته كلش توالمني واول شى شرطت عليه اكعد وحدي وهو مباشره وافق
ناي : ومهدي وزواجي منه ما اثر عليج منقهرتي منهزيتي لتقنعيني الوضع عادي عندج
سدره : لا مو عادي بلبدايه تأذيت وبجيت من سمعت خطبج بس القسى گلبي اكثر مارفضج حيل وتمسك بيه عود والله عمو عمران جبره ياجبر هذا الي يحب ياناي ومتمسك يفدي روحه لحبيبة ومهدي يحبني بس يحب نفسه وامه اكثر وهيج شى ميصرفلي
لهذا شمرته وره ظهري وكلت لازم اواجهه واواجهج واتقبل الصار واكيد رب العالمين يعوضني واجيتج وبعرسج هلهلت وركصت وبيدي جهزتج اله رغم جنت منهاره ردت اجوي نفسي حتى ماامد ايدي للنار بعد وبعدين حبيتج وروح بابا الغالي حبيتج وشفتج شكد طيبه واعتبرتج اختي ومانظرت لمهدي غير ابن عمتي احتراماً لنفسي والج

واليوم اجت حوري وكالت انتي تدرين ردت اجي احجيلج كلشي حتى متضنين السوء بيه
ناي : وعمتج عرفت مهدي جان يريدج
سدره : عمتي بلذات من درت تخبلت لان اني بنظرها وحده شايفه نفسها وقويه وراح اتعبها وخاصه مراح تكدر تفرض سيطرتها عليه وراح اخذ مهدي منها يعني بين قوسين قبطانين بلسفينه تغرك

اني ماالوم مهدي يجوز هو صح لان امه بس بنفس الوقت اني هم صح كلمن يشوف الصح بطريقته الخاصه لهذا انتهى كلشي وانتي اليوم مرته واني على ذمه رجال يستاهلني ومهدي ابن عمتي وبس سمعتي وبس
ناي : الله يسعدج انتي تستاهلين كل خير
سدره : مزعلانه مني
ناي : لا بلعكس اني اول يوم شفتج حبيتج وماتغير بگلبي شى اتجاهج انتي وحوراء وجودكم هو الخلاني صابره على حياتي وعلى فراك اختي وعلى عمتج المطيحه صبغ صبغي وناعله عشيرتي من الاخير الله يحبج طفرتي من وديد على كولت بيبيتي

سدره : تعالي احضنج
حوراء : واني ولجن صار ساعه شلتن امي ولطيتنها يمكن راح اطب الجنه من وراجن  واني ساكته على الاقل طيبن خاطري قشمرني بحضنه بوسه مابيجن خير اثنينجن زعلت
ناي : ضحكنا اثنينا وحضناها واندغدغ بيها وهي ميته ضحك نزلنا تلاثتنا بلمطبخ وسوينا كاستر وچلي وكعدنا ناكل ونضحك برد گلبي من سدره ودعيت من گلبي الله يهنيها وبقيت انتظر مهدي شوكت يرجع لبيته

وبعد ١٠ ايام رجع جان مبين التعب عليه والارهاق محاولت ابد اتقرب منه عفته براحته جان عليه صبر اويلي محد شايله اشوف رجلي يتلوه الليل كله ومينام واعرف يفكر بيها واني هادئه
وبساع اجه يوم العرس لان الوضع جان موزين وكالو يتزوجون خلال شهر واحد خطوبه وزواج
واليوم واكفين نودعها من وكت صارت زفتها بعد صلاة الظهر جانت عباره عن اميرة بالابيض طالعه تخبل وزوجها طاير بيها ويركص وياها من دخل وكل شويه حاضنها مثل الواحد الممصدك ومن طلعو يغطي بيها حتى لحد يشوفها
وطلعت سياره العرس واخذت سيدره وامها حاضنتها ام عبد وتهدي بيها واني حاضنه حوري واهدي بيها گلبنها مناحه
ورحنا لبغداد وياها اني وحوراء وامها وام عبد عمتي كالت تعبانه مالي حيل الطريق كيفت لان مراح تجي احسن
صعدنا بسياره عبد لان خالو مقبل نروح وياهم وحدنا اله واحد من الولد ويانه وميصير صلاح ياخذنا لان اخوها ومهدي اكيد خالو ميحطه بهيج موقف ماكو غير المكرود عبدو وطول الطريق يكول راح اشكل اريل زاف بت عمي اكو اتعس من هيج واحنا نضحك عليه

وصلناها للبيت جان مشتمل مرتب حيل وبمنطقه راقيه يعني العيشه الي تستاهلها ومن مستواها مابقينا غير دقايق بوسناها ورجعنا لان ورانه طريق ونخاف رجعت وطول الطريق بالي يمه
وصلنا لديالى خلال ساعه وحده لان عبدو يمشي سريع والطريق فارغ
دخلت للبيت ادور عليه ملكيته صعدت لغرفتي فتحت الشباك عسى المحه ماكو بدلت ومسحت المكياج رجعت فتحت الشباك لكيته بلحديقه ضليت اباوع شون يدخن عفته مرت الساعه والساعتين وهو نفس الكعده وتطفه جكاره تشتغل الثاني خليت ونزلت
طلعت تمشيت بهدوء وظهره عليه حطيت ايدي على جتفه رفع وجهه وعيونه دم وكتله كوم امسح عيونك كافي تبجي عليها راحت بعد لبيتها مو قسمتك
عاااط بيه شكو نازله اصعدي لغرفتج

دنكت وكعدت كباله وهو على الكرسي وكتله
بصوت مبحوح وقهره بلگلب
شايف مره تجي تكول لرجلها امسح عيونك لان تشوفه يبجي على حبيبتة وتحجي بهدوء شايف اكيد مشايف ماله داعي تعيط عليه مو اني الضيعتها منك انت الضيعتها يجوز انجبرت على زواجك مني بس مو اني الجبرتك تعوفها
مهدي : انتي شمدريج
ناي : ماكو شى ينضم
مهدي : شتردين مني لخاطر ربج عوفيني لوحدي
ناي : اريدك تكوم تغسل وتاكل اكيد مماكل  كعدتك هنا متفيدك
مهدي : انتي ليش هيج
ناي : شبيهه
مهدي : انتي تكرهيني موو
ناي : لا بلعكس گبل اي اكرهك بس بعد معاشرتك شفتك طيب وحنون وماشفت منك بس الخير ليش بعد اكرهك
مهدي : اني مااكدر احبج وراح أذيج ويايه
ناي : شكد متكون اذيتك اكيد اهون من اذيه عمامي ونسوانهم الكدامك شافت ضيم لو احجي الك تشوف سالفتك ويه سدره افلام كارتون يضحك كوم توضى وصلي وعوف الجكاير لاانت اول واحد مااخذ الي يحبها ولا اخر واحد

لمحت صلاح اجه كمت وكفت همزين الشال على راسي
صلاح : السلام عليكم
ناي : وعليكم السلام
صلاح : امشي نطلع نغير جو عبدو ينتظرنا
مهدي : مالي خلك
صلاح : امشي اكلك
مهدي : كتلك مااروح مااروح وشمر الميز حييل وكعت النفاضه والميز بلكاع
صلاح : لا شو تمشي وغصب عنك
ناي : عوفه صلاح عفيه شوفه شون لازم راسه
صلاح : تخبلت شجاك
مهدي : اي تخبلت عوفني وانتي طبي جوه
لزمني من ايدي ودفعني حييل ردت اوكع على وجهي
صلاح : شبيك جان وكعت البنيه مطي
بقيت واكفه اباوع عليه اخذه صلاح من ايده
وراح

طبيت للبيت صاحتني حوري وطبيت لغرفه بيبي وسألتني مردت احجي بس هي كالت بيبي تعرف وحجيت كدامها جان تكول بيبي
ام ذكرى : بختج بخت امج ماخذت لتحبه ولاتزوجت رجال حبها الله يرحمها خلصتها تعلعل الك بيها اراده ربي
ناي : بقت على هاي يابيبي
ام ذكرى : كون ينعدل وره مراحت البت ويشوف شماخذ والله ماخذ ماسه مايعرف قيمتها شكد حجيت وياه راسه يابس جنه ابوه تاليته يضيع كلشي
ناي : اروح نام تعبت
ام ذكرى : الزمي سبحتج بيبي وسبحي عسى النار المشعوله بيج تطفه
ناي : ماكو نار بيبي عادي تره مو كدامج
ام ذكرى : هذا حجي بنتي قشمري بيه نفسج المره كلشي تتحمل اله شوفت رجلها يحب غيرها وينوح عليها هاي نارها تسعر الروح ومايطفيها ماي الدنيا كلها

ناي : تهون بيبي
ام ذكرى : اخوج ميجي اريد اشوفه
ناي : اذا اجه اخلي يدخل عليج ويسلم
ام ذكرى : حتى لو اني اطلع اله اريد اشوفه ولو مره
ناي : الله كريم
عفتهم وصعدت وتمددت بلفراش لانزلت اتعشى ولا كدرت احط لكمه بحلكي ردت انام ومافاد واراقب الساعه لحد مصارت بال١١ ونص طب سويت نفسي نايمه هو نزع ملابسه وتقرب مني وهمس بأذني
تحمليني تكدرين
ناي : فتحت عيني وانداريت عليه وكتله اتحمل وسحبته من ايده تمدد وغطيته ومديت ايدي العب بشعره استغرب على تصرفي وياه شون هيج اتصرف ولو ماعندي غير حل بقيت العب بشعره حتى مكام يشخر وغط بلنوم

ومن يومها رجعت لحياتي وياه ومتغير اي شى اثنينا هادئين وموضوع سدره ماانفتح ابد
مر شهر وامه رجعت لموال متخلفين عاگر مابيج خير راح تحرمين ابني من الخلفه اله ازوجه ويوميه من الصبح تاكل راسي واني ساكته
لحد مايوم تعبت بيبي ام امي وصحتها ادهورت ركضو بيها للمستشفى جانت حيل تعبانه
قبل لتطلع من البيت شايلها مهدي وعبد باوعت عليه وابتسمت ونزلت دمعتها بنفس الوقت لزمني گلبي ركضت عليها وبستها جان تلزم شعري وشمته
ولزمت وجهي وباسته وشالت ايدها وطلعو بيها للمستشفى

انداريت على حوراء الجانت ناطه من البجي وحضنتها واهدي بيها كلش حوري متعلقه بيها مرات احسها امها مو بيبيتها
للعصر ماكو اي خبر لحد مدك تلفون عمتي عافته هنا بلبيت النا شالته حوري جان تعيط وادك وتلطم اريد افتهم منها ماكو سحبت التلفون منها لكيته عبد حجيت كال انطتكم عمرها الله يرحمها

بجيت عليها متوقعت راح اتأذه رغم شكد جنت بعيده عنها واتهرب منها واتجنب الكعده وياها بس على الاقل من اشوفها اشوف امي لان كل متشوفني تصيح تعاي ذكرى وراها ترجع تصيح ناي اسم امي ينذكر دوم
حوراء انتهت من اللطم والبجي التمو الكل علينا خلال ساعه وحده نسوان اشكال والوان مااعرفهن ولا شايفتهن انترس
كالو باجر من الفجر يشيعوها خابرت على مرتضى حتى يبلغ يونس لازم يجي تبقى بيبيته حتى لو ممعترف بيها وماتت وجانت امنيتها تشوفه

ثاني يوم من الفجر اجوي وانگلبت الناس علينا معارفهم هوايه وناس كرايب ناس وناس متزوجه من ناس صايره طماطه جنت ابجي على حال حوراء وهي تعيط تيتمت مره ثانيه رغم امها واكفه وهمزين عمتي تبجي مدري شعجب رغم الشهاده لله جانت عمتي تعامل بيبي معامله طيبه مرات تزهك وتعيط بس اكثر الاوقات زينه وياها

يومين الفاتحه ماكعدنا انهد حيلي ونسوان ويانه يساعدون وهم تعبت هلكت سدره مخلتها امها تجي خافت عليها لان عروس وتخابر حوراء تبجي
اني مكاني المطبخ مااريد اطلع ويبقن النسوان يسألن وعمتي تبسمر گلبي خلصان خلصتها اشتغل وبليل اصعد لغرفتي
اجه يونس وبقى ويه مهدي طول ايام الفاتحه وينامون بلجادر واخر يوم بليل اجه حتى يسلم كال من الصبح اطلع لبغداد تأخرت على الشغل واكفين باب المطبخ نسولف
صدفه حوراء فاتت لابسه اسود والعيون تعبانه وحاطه شال على راسها صحتها حووري اجت تسحل بروحها
حوراء : هاااا نايه
ناي : اخويه يونس ابن عمتج
حوراء : اهلاً وسهلاً
يونس : البقيه بحياتج
حوراء : حياتك الباقيه مشكور
يونس : محتاجين شى
ناي : لا حبيبي محروس بأسم الله انتبهه لنفسك هااا لحظه صعدت ركض واتذكرت الفلوس الي انطتهم الي الحجيه نزلت وانطيتهم ليونس كتله وديهم لشرهب هو مقبل كال اني انطيها ومقبلت لان اعرف يوميته بسيطه ومااريد يزيد الحمل عليه واني ممحتاجه خلاهم بجيبه وباس راسي وراح

حوراء : اكلج اخوج ليش هيج يمشي مجروح لو شنو
ناي : اوووف هاي الكزله مال رجله سببها راد يعيشنا ورادنا نكمل مدارس وهذا الحصله
حوراء : شون يعني
ناي : تعاي احجيلج
وكعدت سولفت الها وهي دمعت عينها عليه
حوراء : خطيه مبين حنين
ناي : كلش فوك متتصورين
حوراء : الله يحفظة الج
ناي : امين روحي نامي تعبتي
حوراء : شون انام وبيبي ماكو بلغرفه مااكدر
ناي : اليوم انام يمج
حوراء : ياريت ومهدي
ناي : هو وينه مو كدامج خلصها بلجادر وعنده خطار امشي انام اكيد هم نسوان يجون باجر
بقيت يمها وكوه نامت حيل تعبت حوراء على فراك بيبيتها تخيلت بيبي عمشه يصير شى عليها غير اتخبل اووف شكد مشتاقتلها

طلع السابع يله خفت الرجل علينا ومن التعب اصارت الالام عندي بطني حييل مغصتني عطت واجت ام عبد عليه جانت كاعده يم عمتي اسمع عمتي تكولها عياره مابيها شى تريد تتهرب من الشغل
ام عبدالرحمن: يمه ناي شبيج

ناي : خاله اتوجع حييل
ام عبدالرحمن: راح اصير رجلج
ركضت صاحته واجتي واني كعدت بلكاع وحوراء تفرك بظهري وخايفه مثلي
مهدي : شبيج ناي
ناي : اتكطع عفيه مدري شبيهه
مهدي : تكدرين تمشين لو اشيلج
ناي : لا اكدر لبستني حوراء عبايه واتجيت على ايده واجت حوري ويانه وللمستشفى جنت اتكطع واعض بيدي
لحد ماوصلنا كلت راح اموت
دخلنا للاخصائيه طلبت تحاليل ونوموني واني اتوسل بمهدي اي مسكن بس الالم يهدا
مهدي : تحملي شويه
لزم ايدي حسيت بيه خايف عليه اي عيونه متكذب ويدور على الدكتوره المدري وين راحت لحد مااجت التحاليل ضربتني ابره الممرضه مال تقلصات وبدا الالم يخف
جان تكول مرتك مهدده بالاسقاط لازم تنام على ظهرها مبين تعبانه
مهدي : يااسقاط
مرتك حامل ومبين تعبانه لو شايله شى ثكيل خلي تنتبهه وحاول توديها دكتوره نسائيه اتابع حالتها اني هسه وقفت التقلصات العدها وبلراحه والالتزام ان شاء الله يتمم الها على خير

ناي : فرحت اي موبيدي هاي غريزه بكل بنيه ودعيت من الله ميوكع اريد بحياتي فرحه اريد افرح ليش اخلصها ضيم وهذا الطفل هو فرحتي باوعت على مهدي مجان حيل فرحان او توقعت يطير من الفرح مثل الافلام جان عادي كلش اصلاً حوراء فرحت اكثر منه وتصيح راح اصير عمه
وره نص ساعه طلعنا ورجعنا للبيت عمتي وام عبد وام صلاح موجودين
واول مدخلنا كالت
وداد : مو كتلكم عياره كلشي مابيها هاكم تمشي على رجلها
حوراء : ماما ناي حامل
وداد : عزه العزاج صدك حامل
ناي : فتحت عيني عليها هاي شبيهه من كل عقلها سحبني مهدي بدون حتى ميرد امه او يكول الها ليش هيج تحجين وصعدت للغرفه تمددت
مهدي : ارتاحي وباجر نروح طبيبه تشوف وضعج
ناي : مفرحان موو
مهدي : لا بلعكس بس كدامج وضعنا وصار جم يوم منايم مثل الاوادم وناس طابه طالعه
تقرب وباس راسي وكال الله يكومج بلسلامه
ناي : اااخ يامهدي شوكت تتغير ياترى العله بيك لو بيه

يونس : جنت اشتغل واتعب ودوم ابو المحل يعيط عليه ويكول بطئ بلشغل اني مو بطئ بس رجلي مرات متعيني ومن اتعب حيل تثكل يوميتي كمت اضمها واصرف شى قليل منها كلش على كد الاكل والشرب ودوم اگلي بره مااكل من ايد صالحه ابد سويت البيت فندق كد المنام اما سما دوم تحاول تتقرب مني
حطيتها بالي وخليتها تتقرب ومااعيط عليها ولا ادفعها بلعكس من اشوفها ابتسم ومرات احسسها اني ادور عليها
واكف ازين بلمغسله لكيتها ورايه جنت بلفانيله والبنطرون مدت ايدها على ظهري

سما : محنيت مشتاقيت مكلت سماوي مشتاق لحضنها
يونس : سماوي هي الباعت مو اني
سما : لتكول هيج تعرف بيه احبك وانجبرت على زواجي
يونس : وين امج
سما : طالعه تجيب معجون وتمن وتجي
يونس : انداريت عليها شرايده سما
سما : اريدك الك اريد حضنك بوساتك
يونس : لزكت جسمها بحضني وبدت تبوس برگبتي
اني تأثرت وحضنتها وبديت اتلمس بجسمها ولد شاب واجت تتحارش بيه بنيه وخاصه مو وحده عاديه جان اكو حب بينا تأثرت بلمساتها همست بأذنها اريدج تباتين بحضني
سما : شوكت واهلي شون

يونس : مااعرف شون انتي دبريها تعالي من ينامون اهلج وباتي يمي وجهه الصبح ارجعي لغرفتج
سما : واذا حسوو
يونس : ميحسون ابوج نومه ثكيل وامج من تنام هم متحس سوي نفسج نايمه من وكت اكيد راح اطب مره مرتين عليج للغرفه وتشوفج غافيه تطمأن هي ساعه ساعتين اطفي ناري ونارج وارجعي محد يحس
سما : اشتاقيتلي
يونس : كلش واريدج من تجين تلبسين سيت نوم
سما : شمعنه
يونس : اريد اشوف جسمج وانوثته لان متغيره وصايره تموتين حضنتني بدلع وتبوس بخدي
سما : صار حبيبي يالون تريده
يونس : ابيض مال عرسان واريده مشلتح حتى اتغرل براحتي بيج
سما : ههههه من عيووني اليوم بليل انتظرني

يونس : روحي اصعدي لا امج تجي وتشوفج واني ازين واطلع اكمل شغلاتي وارجع
سما : انتظرك حبيبي
يونس : كملت زيان وسبحت وطلعت رحت لشرهب انطيتها فلوس الدزتهن ناي بلبدايه مقبلت لان تريد تشوفها وتعرف بيها زعلانه اني كتلها اخذيهم هسه وبعدين اصالحكم
تعشيت ورجعت وصعدت لغرفتي وبقيت احسب ساعه ساعه لحد مصارت بال ٢ بليل انفتح الباب وطبت سما لابسه سيت ابيض شبهه مصلخه وفوكاه الروب طبت وسدت الباب ومبين الخوف عليها وكفت وتقربت منها ونزعت الروب منها وبقيت اتلمس بيها وهي ذابت بيدي وانتهت وتبوس وتصيح احبك يونس اشتاقيتلك اني مرتك حبيبتك الك وهي مغمضه ومنطلقه بغير عاالم جان اجرها من شعرها حييييل وهي عاطت ضربتها على حلكها حييل ايدي جبيره صارت على حلكها وخشمها وبرجلي على بطنها وكعت بلكاع وتصرخ من الالم وكمت اسحلها امشي سحلللل

سما : وين ماخذني عوفني عووفني 
يونس : طلعت من الغرفه واعيط حييييل هزيت البيت من العياط وهو هدوء وصدى يصير الصوت رنان
عمووً عمووً وينككككككك
طلع يركض وصالحه وياه وعيونهم مال نعاس
شافو سما لازمها من شعرها ومصلخه بسيت النوم وذوله تخبلووً سحلتها وشمرتها عليهم
اخذ بتك ربيها جايه عليه بنصاص الليالي تعرض نفسها حتى انام وياها لو مربيلك كحبه هم جان تابت الله يعينك على بتك السكط
صالحه : انجب هاي انت تحارشت بيها
يونس : سما تبجي وتعيط وتكول هو تحارش كتلهم
لو اني متحارش جان شفتوني طالع من غرفتها او على الاقل لابسه شى مستور بتكم شوفو حالها جايتني بسيت النوم تعرض جسمها عليه تنلام بيبي من تكول اخاف عليك منها كوه خلصت نفسي  عمي الزم بتك لتروح تتحارش بواحد بلشارع لو ادخل رجال عليكم للبيت وتكسر عينك اكثر ماهيه مكسوره

لزمها عبيد ودك على راسها وبطنها كطعها تكطع جر شحاطه باب غرفته وين ميوجعها خلاها خركه وهو ايده قويه ضربته اعرفها بحيت صالحه تريد بس توخره منها مكدرت حتى صالحه ضربها اني خليت وطبيت
للغرفه واسمع الطاب والطيب والفشار عليها ومنها ماينسمع غير البجي والعياط لحد مااختفى صوتها اسمع صالحه تصيح كليتها راح توكف حرام عليك راح تموت خليت المخده على راسي حتى مااسمع ونمت
حتى اتوب تتقرب مني

يومين واني مشايف لا سما ولا امها ورجعت بليل لكيتها واكفه والوجهه مطكع وحالتها حاله تعرج ضحكت وكتلها صرتي مثلي تعرجين بس الفرق اني دائماً انتي مؤقت
سما :  هيج تسوي بيه يونس
يونس : اسمعي لج اخاف هلمره خليت جوحي بلشحاطه يكطعج مره ثانيه اخلي يذبحج
سما : لهاي الدرجه تكرهني
يونس : اني نفسي تلعب منج انتي وحده قذره والي مثلج حرامات عايشه ولو شترجى من ابوج العاار راضي وساكت اني اكدر العب عليج واشبع بيج واذبج ذبه الجلب بس نفسي تشمأز منج مااكدر اتقرب لوحده قذرة مثلج وهم عندي عرض وخوات وانتي وحده حتى حرامات اتحمل ذنبها
من اليوم اذا وكفتي بوجهي تجنين على نفسج

سما : شكد تغيرت وصرت حقير
يونس : لا الحقير احسن مني اذا حطيتج مره ثانيه بالي وربج تسكتين الكبور روح ولي ودفعتها
جنت اتلذذ من اهينها لان هي سبب ضياعي حبي الها خلاني اخسر نفسي وخواتي

يونس : جنت بلمحل اشتغل ومكسور ظهري كلت خلي ارجع من وكت اليوم اخذت رخصه ورجعت وصلت لمحل يبيع فلافل داكل واجر مرتضى يمشي سريع هااا ولك تعال اكل
مرتضى : مو وكتها هسه خلي اروح لخاله صالحه
يونس : شكوو شبيك مو على بعضك شصاير
مرتضى : لك خالي جاسم
يونس : شبيهه العار
مرتضى : مااااات

يتبع ...