رواية الامارة الفصل السابع عشر 17 - بقلم 𝐙 𝐇 𝐑 𝐀

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

بكثر ما حاب اسمك واعشگ عيونك
وياك اللتفت من يصيحونك
وادور وجهك بعين لي يلاگونگ 💋

━━━━━━ ♛ ━━━━━━

"حبيبــة"
نزلت اشوف مرة ابوي گالت بس اكمل صلاة الليل وتعالي دوسيلي رجلي، طبيت لغرفتها وشفت علي الحـق گاعد يم رجليها وهي فاكة عيونها عليه..

-حبيبة: ها يمة تقبل الله

-رسمية: يممممة صواااب

ضربت على خدودها شاهگة، باوعت لـ حق گاعد ما تحرك من مكانه وعيونه مثبتهن على امي الله يستر بس لا حچالها على سوزان!

-رسمية: صخاام بوجهك يا عليي سودنتناا يا علي ولك تريد تموتنيي انتَ تريد تموتنييي

-علي الحـق: اموتچ لان اريد اتزوج؟ ليش؟ ليش كل هالعصبية والدگ واللطم انا شطلبت!

-حبيبة: يمة شبيچ على كيفج

-رسمية: تعااي يا حبيبة تعااي سمعي الفضيحةة تعااي سمعي الطياح حظ تعاااي

-حبيبة: يمة لا تصيحين دخيلج ابوي ما يتحمل هبطات

-رسمية: ولج يريد يتزوج من البرابـ** امهات السحوورة بنات المخبلات يبوووو على حظج يا رسميية

-علي الحـق: بسسچ يووم چن گتلج رايح اتزوج ****!!

-رسمية: ووولك خداامتك خدااامة هاي خداامة جوه رجليك تشتغغل خداممممة افهممم

-علي الحـق: لااا وعلي مو خدامة وتااج على روسهن احطهنا

-رسمية: نعاال برجلي اللبسها وروح ابووي

ركضت تريد تطلع من الغرفة مادري وين تروح وعلي الحق كضها يحضنها وچتف ايدها حييل..

-هدددني خلرووح اسبح بدمهااا

-وستر زيينب ما تصعدين وغلااوتج يا يمة ورااس ابووي لو رحتيلهاا بعلي هسة اروح اعقد عليهاا واگعدها شيخة بديوان ابووي

-عمتتت عينييي ووولك عمت عيننني ساحرتك هااي ولك سااحرتك عليي مسودنتك هذا موو علي الحـق وليددي العاقل

-العاقل تسودن بعشگها يمة هيددي ولا تخليني اكسر خاطرچ بهالليل

-وينننه ابوك ارووح لابوك اعززيكم اليووم طردتها على ايددي بت الشوارع هااي

عصرها بين ايده ونزلها على چربايتها اعاينلهم واتراعد من الخوف، اكل بأظافري وحايرة ماعرف شسوي..

-ماا تتزوجهاا عوود من امووت وانگبرر رووح تزوجهاا وخليها تخلفلك سرابييت يشبهووهاا

عافها تدعي عليها وطلعنا من غرفتها وقفل الباب عليها، نسمعها ما سكت لسانها ونحيبها وتعيد وتكرر..

-خداامة وجودها بهالبيت خدامة الله ياخذج يا مسودنة وليدي عمت عيننج وعين خالتج وعين امج وعشيرتج اللفووه

تحسر علي الحـق مغمض عيونه ويفرك بوجهه صار دم من العصبية، ضرب الحايط بقضبة ايده وسند راسه عليها من صرخت مرة ابوي..

-مو خوووش بت موو خوشش اليعوفوهاا اهلها بييت كله زلممم ما تتأمننن

-حبيبة: علي فهمنيي شصاير

-خررب روووحي خرررب

حط مفتاح غرفتها بيدي وعافني وطلع من البيت للساحة، ركضت وراه اريد اللحگ عليه ما لحگت طلع من باب الحوش فاير ضربت رجلي بالگاع ضايجة من الصار ورجعت للحوش..

گعدت بالصالة انتظرها تهدأ وبهالاثناء طلع علي الكـرار من غرفته يفرك بعيونه، اشر على باب غرفة امي وسأل وبعيونه النوم..

-هاي امي جاي تصيح لو جاي اتحلم؟

-لا ما متحلم هذا صوتها صدگ

-شبيها شصار؟

-حق گاللها اريد اتزوج

-چا واذا؟

-ما رضت بالبت الي يريدها

-حگها چا التشلتح واصل لابو موزة

-كرار روح نام روح

-ماريد انام ضايج رايح اشوف ابوي

-نام ابوي

-چا اروح اشوف تقي

-تقي هم نايم

-چا اروح...

-الكل نايم حبيبي انتَ هم روح حط راسك على المخدة راح تنام

-چا ماعندي حل غير اروح اضوج صابرين مرة مسعود بلچن تطلع من البيت

-ههههههه ولك اگعد راحة شبيك

-احبها واحب اللاشيها

عافني وطلع للساحة، عاينت للمفتاح بيدي وباوعت لغرفة مرة ابوي مادري اروحلها افتح الباب لو اغلس وافتحها الصبح؟ وگفت ببابها دقيقتين افكر وحسمت الموضوع فتحت الباب وطبيت انام يمها بالغرفة واقفلها علينا..

-رسمية: بس هاي العايزة بعد تسجنوني خاطر المسعدة عبق

-يمة وشبيها عبق ليش هيج وياهة

دگت صدرها وجحظت عيونها، ظلت تلطم چم مرة على صدرها وتنوعي وتجر بالحچاية بطور حزين..

-شفته گدامي مشه وبي انتخيت
گتله يا يمة انتظر تانيني
ومن شفت طوله وضحكته شگد بچيت
ونزلت دموعي جمر تچويني

-يمممة اسم الله شني السالفة!

-عاتبته وگتله اذكرك لو نسيت
سهري كله بكل ليالي سنيني
ارد اسأل من بعد حضني غفيت
وبحضن مريتك نمت ناسيني

-استغفر الله يوووم

-ولج گلبي محترگ راح اموووتن

ذبت روحها على الچرباية متخربطة وتلطم على رجليها، گعدت يمها افرك صدرها وعيونها تبچي شگد مقهورة..

-ولج طاووس هذا طاووسنا تاليته ياخذ خدامة عمت عينج يا رسمية لو رضيتي

-يمة العشگ مو عيب ولا حرام وانا اضمنلچ عبق ما عدها شي ويه اخوي

-سممم بگلبج يا سلووى بيوم الجبتيلنا هالنثية وولج اااااااخ شجاني وخليت اخوتچ يشوفوها شجااااني

-يمة كافي راح يوگف گلببچ

-حاچتني سلوى حااچتني گالتلي ام عليي البت حلوة وتجيب التايه لا تطلعيها وتشوفها عيون ولدچ تره تاخذهم بس ما سمعت اناا ما سمعت سودة بوجهيي

-يمة شتاخذ منهم چا زلام طول بعرض ما يعرفون يكضون رواحهم! شعليها عبق؟؟

-اي اي ابقي دافعيلها انتِ ابقيي ما اوصيچ هلهلي ودبچيله بيوم عرسه خاطر اكسرها لرجليچ وعلي

-يعني راح تخطبيها اله مو؟

-طييييف وعلي طيييف هالبت تدوس بيتي وهي چنة

-حرام عليج يمة

-اناا اخلي بت سلوى حالها حال نسوان اخوتچ؟؟ انا؟؟ سودة بوجهيي كون لو سويتها

-خلص خلص اهدي نامي يا حبيبتي مو زين لا يصير بيج شي

-اااخ صار بيه صااار بداهة امير ونهاها حق ااااخ يا يمة

-وشبيها تَـمني انوب!!

-چا شبيي وليدي وياخذ ارملة؟؟ شنااقصه؟؟

-يمة تزوجووا وبعدج تنحوين!

-لا ما انوح احبنها تَـمني خوش بت

-چا شكو بعد

-اي جاي احچي على گبل من چنت اضوج منها بس هسة شحلاتها حبابة

-وعبق حبابة وما عايزها شي

-اششششش اششششش وگررص سكتي وانطمري لا اطمرچ اناا

-يمة ليش تحاچيني هيج والله زعلت

گمت من چربايتها ومثلت زعلانة عليها بس حتى تهدأ وهالشي جاب نتيجة مثل كل مرة، گامتلي حضنتني لصدرها وبوستني تراضيني..

-لا تزعلين عليّ يا بعد امچ والله الضيم كاتلني على اخوتچ

-اخوتي كبار خلي قرارهم بيدهم واختيارهم بيدهم يا يمة لا تضيعين علي الحـق وتخلي ياخذها عناد بينا كلنا ويطلع من البيت تره والله تظلين بحسرته

-اسم الله الزهرة ام الحسن

-والله تره يصير هيج هاا اهاا جاي اشوفن المشهد بعيني حق طالع وكاض ايد عبق ووليد صغيرون يلعب بين رجليهم

-يمممممة

-هاا اهاا ذولة مكيفين وفرحانين وهاي چنها عبق حامل بالثاني اظنها بت

-سكتيي سكتيي فال الله ولا فالچ

-جاي اشوفن انا يمة شعليه

-سكتي خليني افكر شلون احل هالسالفة

-حلها تخطبيله عبق وبسس

-ولج اوووووف يا فشلتي گدام النااس شحچي شگول

-طُززز بالناس اهم شي وليدج فرحان ومتونس ويه مريته

-خدامة!

-خدامة لو شيخة بالحالتين ابنچ راح يخطبها وياخذها وانتِ تعرفين حق لو قفل على شي

-راسه يااابس ابن العوبة

-حشاچ يمة

-نامي نامي رفعتوا ضغطي انتِ واخوج

-يعني راح تخطبيله مو؟؟

-ناامي

-عليج علي جاوبيني

-چااا شبيدي غير اخطبله

-كللللللووووووووووووش كلووووووشششش شايففف خير ومهنى يا راعيهااا ما ينعرف خدها من تراچيهااا

-ولج نامي كافي

-خليني اروح ابشررره

-لا خلي انا من اخطبله افهمه بالسالفة وعبق لا تحاچيها بشي اذا افتهمت عبق تدري يا حبيبة بعلي ما اخطبها

-لا لا ما احچي لاحد فديتج يمة وفديت حنيتج علينا

-غصباً عليّ والله مو برضاتي

-راح تحبيها وراح تعجبج انتِ ما شايفة عبق واخلاق عبق شون مرتبة وبت بيوت

-شايفتها چان ما لفيتها ببيتي

-الحمدلله والله كللش فرحانة فدووة رحتلج

بوستها تبوس وهي تضحك على خبالي، من فرحتي احس طار النوم من عيوني فرحاانة كلش فرحانة وجاي اشوف حياة عبق شلون راح تتغير وترتاح اخيراً.. وفرحت اكثر من طلع ماكو شي بينه وبين سوزان وعبق الي راح تصير چنتنا الجديدة..

الليل كله ظليت افكر بيهم واتذكر من شفته بغرفتها وقافلين الباب، الملاعين يحبون بعض ويمثلون علينا اويليي لو اللزم عبق الا اشبعها عض..

ثاني يوم من الغبشة گعدنا رتبنا البيت وانا امشي واهز من الفرحة وعبق كل شوي تسألني شبيچ واجاوبها..

-فرحانة كللش للامير وتَـمني

-عبق: حتى اني يارب ينسعدون

-يارب يارب يوووووم الالچ عبووق

-حبيبة شبيچ صوتج شعلاته

-ههههه يارب اشوفج عروسة وللصبح اظل اركص بعرسج

ضحكت مستغربة وضربتني على ايدي تسكتني من اجه علي التـقي للمطبخ، راح يصب ماي من البراد وغمزلي وگال..

-طيور الحب شوكت يجون

-حبيبة: بعدهم بالفندق امي كالت على الغده يوصلون

هز راسه يشرب ماي، طبن رهف و سبأ بنات عمي مسعود للمطبخ ووگفن يتچن ظهرهن على المجمدة ساكتات ادري بيهن يضوجن لان ماعدهن وسيلة متعة غير الصفنة لا تلفون ولا تلفزيون بس يتفرجن بالوجوه.. ذبيت الوصلة ووگفت يم علي التـقي مبتسمة..

-حبيبة: وانتَ تقي ما ناوي تفرحنا وتتزوج؟

-ان شاء الله

-رهف: لو نويت تتزوج علينا العروس ابن عمي اخلي سبأ تخطبلك خاف العندك مابيهن خير

اللتفتنا كلنا عليها وسبأ وجهها بهت مصدومة من اختها وليش جابت طاريها بهيج سالفة، ابتسملهن تقي وطلع من المطبخ..

-سبأ: رهففف انتِ ما تستحين شكوو تجيبني بالطاري!

-رهف: چا مو انتِ جاي تخطبين لخوتچ اخطبي لـ تقي هم مو ابن عمچ

-سبأ: رهف لا تظلين تلوصين واحترمي انا اكبر منج!

فرت ايدها رهف مغثوثة وطلعت للساحة بينما سبأ ظلت يمنا وشگد اعتذرت على گباحة اختها وحلفت الا تشتغل ويانه.. خذت الوصلة من ايدي وراحت تجلف بالگاع وتگول..

-والله مستحية منچ حبيبة ومن اخوچ هاي رهف عبن ضايجة وتريد ترجع البيت جاي تسولف كلشي يجي براسها بس هي ماعدها شي وياكم والله وتحبج هواي

-حبيبة: ادري بيها ضايجة وانتن ما راضيات على الگعدة هنا لا تخافين تقي ما راح يزعل منها هو يعزچن

-رحم الله والديكم

ابتسمت ورحت اكمل شغلي وعبق وياي، لمعنا البيت تلمع حتى الحيطان جلفتهن اريد بس يمشي الوكت خاطر يجون امير وتَـمني..

-تالة: تردون مساعدة بنات؟

نزلت تالة من الدرج عطرها يهفهف والمكياج واللبس على اخر حباية، ضحكت عبق وتخصرت رافعة حاجبها..

-لا حبي نريد سلامتج تفضلي تفضلي ليش واكفة وتتعبين، گوليلي تردين چاي گهوة لو عصير برتقال طازج؟

-تالة: فريش اسمه عبق منو بعد يگول طازج اوي

ضحكنا على حركاتها تمثل بيدها عود هي من الطبقة المخملية ونزلت تمشي على اطراف اصابعها وراحت تگعد على القنفة تحط رجل على رجل..

-تالة: احم اريد حليب

-حبيبة: حبي الهايشة بره تنتظرج تحلبيها

-تالة: گعدن راحة ولچن هسة گولولي بشنو اساعدكم

-حبيبة: خلصنا والله بقى بس ننتظر الامير واميرته يجون

-تالة: واحنه كملنا نقل ملابس تَـمني لغرفة الامير

گعدنا ثلاثتنا سوه نسولف وطلعن شمس وابرار من غرفهن وبنات مسعود هم اجن، گعدنا دائرة بالگاع نكرز حب ونحش بالعرس البارحة واجتنا امي رسمية هججتنا رزلتنا رزالة جماعية وطفرتنا كلمن لغرفتها..

**

"تَـمني"
حسيت الصبح تعبانة وكأن ديدگون براسي طبل، مطيت ايدي بفراشي وبالغلط ضربت الامير بوجهه طب اظفري بعيونه..

-ااااااخ

-عزااااا

طفرت من مكاني من شفت روحي بحضنه نايمة، گمت مفزوعة ومفتشلة والاسئلة تدور براسي، غطى امير عيونه بيده متوجع وعاقچ وجهه..

-صباح فگسات العين ست فهاوي

-اني ليش هنا

-شنو

-ليش نايمة هناا ليش.. ليش على الچرباية اني نمت على القنفة شجابني هنا

-تَـمني

-اميرر احجي فهمني اني ليش على الچرباية وليش نازع قميصك وليش حاضنني؟؟

-انتِ لطشتي بيه شسويلج

-نعمم؟؟؟

-گمتي تبجين من وخرتج لزگتي بيه

-مو عيب تكذب!!

-تَـمني انا روحي ما طايقها لا تسويلي تكذب ما تكذب وتتماوعين احجي عدل

-عزاا انوب هو روحه مطايقها

-اششش

-لا تأشأشني!

گام من الچرباية ومط ايده فوگ، ظليت واگفة من الجهة الثانية وافرك بيدي افكر شجابني هنا وليش هيجي وضعنا واحد لازگ بالثاني..

-وين.. وين قميصك

-ما چنت لابس قميص للعلم

-المهمم وين ملابسك

مجاوبني وگام من الچرباية، عدل شعره ولحيته بيده وشال منشفة وراح متوجه للحمام..

-ويننن

-للحمام اسبح لو ما نسبح اليوم؟

-ليش تسبح؟؟؟

-انا كل يوم اسبح الصبح!

-لا.. لا تسبح بس غسل حباب

فر بيده ودخل للحمام وقفل الباب وراه، ركضت ادگ بالباب حيل فتحها وسوالي شكو بيده..

-ليش تقفل الباب؟؟

-چا شون

-لا تقفلها تجيب الشبهات لنفسك!

-تَـمني ترحين لا...

-لا شنو امير؟ يعني اني دايخة وراسي يوجعني وانتَ تهدد بيه مو حرام عليك

-روحي هناك يله خاطر ما تدوخين زايد

عفته ورحت اكعد على القنفة عيوني مفارقته من دخل الحمام لزگت عيوني بالباب متوترة كللش متوترة ودا اچفص واستغبي وياه من التوتر.. طلع من الحمام مغسل وشعره مبلل نشف وجهه وايده وراح للمراية يمشط شعره..

-احجي امير

باوعلي من المراية وذب حسرة يمة غير گلبي وگف، ركضت اوگف بصفه وهزيته من ايده..

-حباب لا تخرعني

-راح احچيلچ بس لا تتسودنين انتِ طلبتي مني

-شطلبت؟؟

-اسولفلج وتعرفين

بلعت ريگي منتظرته، گعد على القنفة واني گعدت على الچرباية وبده يسولفلي.. يحچي واحس بعيوني راح تطلع من وجهي من الصدمة حچالي حچي خبلني..

-اني سويت كل هذاا؟؟؟؟

-اي

-گول والله مدا تكذب

-والله ما جاي اچذب

-وبعدين نمت مو؟

-لا

-لعددد؟؟؟

-لطشتي بيه

-يعني شلون؟؟

ذب نفس وغمض عيونه وكملي السالفة عود اريد اخلف منه طفل حتى ميعوفني، گمت اكل بأظافري من الفشلة.. عصرت عيوني ماكدر اسمع الباقي بس بقى يحجيلي بالتفصيل شنو صار، ردت اموت من گال..

-وانا حرت وماعرفت شلون ارضيچ من اوخر عنچ تبجين ومن اتگرب منچ ماكدر اكض روحي وانتِ يمي ووضعنا معروف.. نَفسي تحكمت بيه وخلتني..

-امير والقراان لو صاير شي البارحة ما اباوع لوجهك بعد وحق الله!!

-ما صار شي لا تموتين!!

-ها؟

-ما اخذ وحدة تكرهني! لو اريد اخذچ! اخذچ وانتِ بكامل عقلچ مو بالحيلة واللعب!!

-امير اني..

-لا امير ولا انتِ، لا تشوفيني متلهف عليج حسبالج انا حيوان واستغلج وانتِ بهالوضع! لو كاتل روحي على هالسالفة چان من زمااان تزوجت وفضيتها!

-اسفة

-لا تعتذرين گومي بدلي خلينا نطلع

-منتريگ؟

فتح عيونه مصدوم مادري بشنو چفصت هالمرة بس يمكن لاني طلبت نتريگ وهو هستوه حچالي شسويت من فضيحة البارحة؟

-اني علمودك تره مو زين يبقى الشيخ جوعان

وهنا بعد ماتحمل وضحك داير وجهه عني يستغفر، ظل يهز براسه وما بطل استغفار، ابتسمت وهمست..

-مو الشيخ هو اسد العشيرة ولازم يبقى متغذي عيب اخذك لاهلك وجهك اصفر

-گولي انتِ جوعانة لا تذبيها براسي

-لا لا علمودك صدگني

-صدگتج

-اي يعني عيب اهلك يحچون عليَّ هسة

-خاف انتِ الراح تسويلي الريوگ عمت عيني؟

-ما اسويلك بس اخذك للمطعم واسويلك واهس تاكل

تنهد وبقى مبتسم، اخذت ملابسي ومكياجي وفتت للحمام اسبح وابدل، لبست فستان اوف وايت وشال نفس اللون حطيته على راسي وشمرته منا ومنا.. مكيجت مكياج ناعم وبرزته بحمرة حمرا وطلعت من الحمام، لگيته مكمل تبديل لابس دشداشة زبدة بيضة وواگف ديلبس ساعته ومحبسه..

-كملت اني

-تمام

رفع عينه يباوعلي ثواني ورفع حاجبه عبالك معاجبه، غلست على نظراته واخذت جنطتي ووگفت بباب الغرفة، اجه يفتح الباب وطلعت قبله للمصعد دسته وانتظرته يوصل..

-الامـير علي: استغفر الله ربي واتوب إليه

-شبيك؟

-اختنگ من الاحمر

-صدك؟

-اي

-ها خطية

-تَـمني؟

-ها

-ما احب الاحمر اتسودن منه

-اي افتهمت امير بعد هذا ذوقك وانتَ حُر

-چا انا ارجع للغرفة ما اگدر انزل للريوگ

-ليش ليش؟

-حاطة احمر وما اتحمله

-قصدك حمرتي؟

-لا حمرة امي تَـمني هذا هم لون رحمة لوالديج!

-هسة تروح من اكل، وصل المصعد خلينا ننزل يلا

-ماروح وعلي

-امييير

-اليوم لو انا لو حمرتج

-حمرتي

-وووولج

-امير شبيك هسة هي حمرة تحمل لخاطري حباب اني احب الاحمر

-تعاي للغرفة شوي دخت

راح قبلي للغرفة يرجع وهرولت وراه شكله صدگ دايخ وتعبان شنو السالفة كله من وره حمرة، دخلنا جوه وهو گعد على القنفة عاصر عيونه، گعدت بصفه قلقة عليه واتسائل..

-امير شنو صارلك ليش هيج دخت؟

-الاحمر.. الاحمرر

-انتَ بس تريدني امسح الحمرة مو؟؟

-مووو

-ما امسحها ماا

-تمسحيها!!

-ما امسحح

-تمسحيها لا امسحها بطريقتي

-امسحها بطريقتك خنشوف لو گدرت!

-تتحديني تَـمني!؟

-اتحداك!!

شهگت فاتحة عيوني من چتف ايدي ولمهن بحضني، صرخت من قرب نفسه عليَّ ودرت وجهي للجهة الثانية عاصرة عيوني..

-لا لااا راح امسحهااا

-يلا مسحيها گدامي

هد ايدي وجرلي كلينسه ينطيني، اخذتها من ايده مبوزة ومزعوجة كللش، مسحت الحمرة من شفايفي وانطيته گفاية مطنگرة..

-هم حمضت

-لعد شنو تخليني امسح الحمرة شنو هالتصرفات امير

-چا اتحسس شنو ترديني اموت؟

-رايحة احط وردي لعد

-لاااا بعلي امسحه بغير شي هالمرة

-هم عندك تحسس من الوردي؟؟

-اي!

-گول اغار وخلصني!

-اي اغار ارتاحيتي؟؟

-زين واذا احط بس ملمع هم گول اغار حتى اتخبل!

-اغار من كلشي يلمس شفافچ تَـمني

-تؤ تؤ هالكلام ممقبول عندي لازم اترتب والناس تشوفني حلوة

-كون الناس تشوفج هايشة بعيونهم بجاه علي

-اميييير كل هذا من وره الغيرة!

-تهي بهي تشوفين هاي غيرة؟ هذا كلان نعل عندي

-الله يستر من غيرتك الحقيقية لعد

گلتها بضحكة طبيعية وانگطع صوتي باهتة من جرني من معصم ايدي يلزگ وجهه بوجهي، بلعت ريگي مرتبكة اباوع لعيونه العصبية ونظرته الي احتدت.. نزل عيونه يباوع لملابسي ورجع رفعهن لعيوني ويدورهن بملامحي يتأملهن، گلبي دگ بعنف من گال..

-انصحچ لا تجربيها.. انا من اغار جهنم تتربع بصدري

حچاهة بنبرة صدگ انسان غيران ومشتعل، توترت وجريت ايدي منه وسحبت الدولكة من الطاولة اصبلي مي اللهي روحي، باوعتله من تحسر ساكت وانتبهت لفكه ينقبض كأنه معصب من شي، نزلت الگلاص من ايدي وگمت من مكاني واني اگول..

-يلا ننزل

رفع عيونه الي وهز راسه اي وگام ويايه، نزلنا للمطعم بس الامير ما حچى كلمة وبمرور الوقت وگعدتنا سوه اكتشفت سبب هدوئه هو لانه ضايج وعبالك ضايج مني وهالشي واضح..

-شبيك

-شبعتي؟

-بس انتِ ما اكلت شي؟

-ما اشتهي

يحچي گوة ويفرك بگصته، القلق غزاني دا اتخيل البارحة صار موقف او حديث بيناتنا يضوج والامير خفاه ما حچه بي..

-امير عندي سؤال

-همم

-برأيك شنو سبب حالتي؟ معقولة اني ونايمة سويت كل هالاشياء بدون لا احس؟

-لا

-لعد؟

-انتِ ما اكلتي شي البارحة بالليل مو صح؟

-اي ما اكلت شي

-ولا شربتي؟

-ولا شربت

-والمطارة الشفتها بالغرفة هاي شنو

-هاا اي تذكرت شربت العصير، خالة رسمية سوتلي عصير برتقال وگالت اشربه خاف اتخربط

-امي مسويته الج؟

-اي هي كالت عصرته بيدي

-امممم

-بشنو دتفكر؟

-لا هيج

-ليش احسك ضايج؟

مجاوبني وسرح بماعونه، ضجت وظليت ساكتة بس طگت روحي وبالاخير زفرت هوا متنرفزة.. رفع عيونه عليَّ وسوالي براسه حركة "شبيچ"..

-انتَ ملاحظ تبادلنا الادوار مو؟؟

-يا ادوار؟

-ادوار الضوجة! اني الي لازم اضوج منك وازعل مو انتَ!!

-من شنو تزعلين ليش انا شمسوي

-ابد بس البارحة فكرت بشغلات مو حلوة بيه وردت تتقرب مني!

-بس ما سويتها!

-بس فكرت!!

-چا حتى على التفكير نتحاسب؟؟

-ليش گتلي فكرت بيه هيج؟ راح تخليني اتوتر منك!

-تَـمني شسالفة هاي لان جنت صريح وياچ وحچيتلج كلشي ما يعجبچ؟ ثانياً أي زلمة طبيعي وتتقرب منه حرمة الشيطان يوسوسله وتجيله افكار هاي طبيعة البشر ما عليها چنتي انتِ لو غيرج چا ليش الله سبحانه ما يرضى الرجال يختلي ويه مرة وحدهم!

-اي بس..

-لا بس ولا شي انسي الصار البارحة واقسملچ قَسَم ازين شاربي لو عدتها بدون رضاچ

سكتت بدون لا ازيد النقاش وصعدنا فوگ نحضر اغراضنا حتى نرجع لبيت اهله، الطريق كله هادئ واكرر هدوئه ابد ما احسه بسبب نقاشنا بالمطعم عبالك اكو شي ثاني بباله..

وصلنا لبيت شيخ علي واستقبلونا بالهلاهل والترحيب الحار، ذبحوا جوه رجلي خروفين وجوه رجلين امير هم.. تسالميت ويه خالتي وتالة وام امير وكل البنات ما اعرف منو ديحجي ويايه ومنو ديباركلي من الهوسة الكل جاي العمات ونسوان العمام وبناتهم وفراقد وبنتها البيت مزدحم بالناس..

دخلنا للصالة شفنا شيخ علي گاعد على كرسي متحرك ورافع ايده، هرول عليه الامير بوسه وحضنه باركلنا بصوت ناصي واني بست راسه ورديتله المباركة..

-فراقد: بنيات ما تگعدن شمالچن تعبنا

-رسمية: تفضلوا خية محتاجات عزيمة

-فراقد: يلا فضوها صبوا الغدة متنا جوع

-حبيبة: بعد وكت خالة بالدعش هستوها

-فراقد: شني جايبينا تذلونا انتم؟؟

-غزوة: ما عاش اليذلج گومن صبن الغده

-فراقد: ما دام السوسة حچت ماريد بعد

-غزوة: انا سوسة؟؟؟

عوجت حلگها فراقد معاحبها، ضميت ضحكتي ونزلت راسي لا انفضح بس دائماً يضحكني هالثنين، بالعادة فراقد متحجي بـ كرهها لـ غزوة بس نظراتها تسولف شگد تموت منها مادري شعجب هالمرة بسمرتها..

گعدت بصفي خالتي قلقة ولزمت ايدي تسولف ويايه على البارحة، اشرتلها بيدي كلشي تمام ياله ارتاحت وجرت نفس..

-غزوة: سكتنن الشيخ جاي يحچي.. شني كلت خوية ما سمعتك؟

-شيخ علي: صـ.. صباحيتها

-رسمية: اي اي صار

راحت خالة رسمية لغرفتها گوة تمشي رجليها يوجعنها وطلعت من الغرفة بيدها علبة مقدفة، اجتلي وبوستني مرة ثانية وهمست بأذني..

-منتظرين الولد توتة

ابتسمت بدون جواب، وخرت عني شوية وفتحت العلبة گدامي طلعت منها سوار چف مال ايد سمتها "شباحية" يجنن يغطي الايد كلها يضمها ضم، اخذت ايدي لبستني وهلهلت والبنات يهلهلن وياهة..

-رسمية: مباررك يا بعد روحي هاي صباحية الشيخ لچنته

-حنين: الله يحفظه ويشافي ان شاء الله

تشكرت من خالة وردت اگعد والامير لزم ايدي يأشرلي بعيونه "بعد اكو گومي" استحيت من الموقف لان دتجي بأتجاهي عمتهم زهرة واني لبستها وگعدت شگد فشلة..

سلمت عليَّ عمتهم زهرة ولبستني محبس ذهب، اجت وراهة عمتهم ابتسام ولبستني سوار ووراهة اجت غزوة لبستني هم سوار.. من الخجل ماعرف شجاوبهم الامير يحچي نيابة عني ويگوللهم تزحموا ويتشكر منهم وهنه وگعن بي دگ بوس وكل الي تسلم عليه تغمزله وتگول..

-ننتظر الوليد

-الامـير علي: ان شاء الله عمة

باوعت للامير بمعنى اگعد لو اكو بعد؟ ضحك ونزل يهمس بأذني..

-چنچ طالبة العالم بطلابة شبيچ

-مو ماريد اتفشل

-بعد بعد اكو اخوتي

هزيت راسي وهو ابتسم لعلي الدر من بوسه وحط بجيبه فلوس، ما قبل الامير ياخذها بس در ما انطاه مجال واجه بدر وعاد نفس الحركة وهيج مشت لبقية الاخوان، تقي وراه ابا الحسن وراه علي الحـق وعلي الكرار.. سور ونور گالو مفلسين يموتون ضحك وگفوا بنص الصالة يدبچوله عود هاي هديتهم..

-الامـير علي: ههههه لعنة الله على ابليسكم والله تزحمتوا وماكو لزوم للهدايا وجودكم كافي

-علي الدر: يوم الولد الصالح حبيبي تستاهل كل خير

توترت من گدما كرروا سالفة الاطفال ونسوان عمامه هم لحن هووايه من سلمن عليَّ انحرجت من مرة عمهم صمد سألتني على البارحة گدام امير! هيج بدون خجل ولا حياء، صفنت بوجهها ماتحملت غمزاتها وحركاتها كلش لعبت نفسي ولولا الامير جارني من ايدي وترخص من مرة عمه عود يريدني چان رديتها..

-تَـمني: شبيها هاي!

-الامـير علي: لا تجاوبين هيج اسئلة عوفيهن

-تره هي حرجتني وتسويلي حركات بيدها!

باوعلي كوة لازم ضحكته انوب اني شفته هيج وطگيتها بضحكة، خزرني حتى اسكت بس مدا اگدر شكله يضحك من لازم ضحكته ويخزر بيه..

-رسمية: ضحكة خيير ان شاء الله حبيبتي ضحكة خيير

-الامـير علي: يمة نوومه فرحانة بأستقبالكم جاي تگلي اهلك هواي متكلفين

-تَـمني بهمس: ليش تكذب يمته گلت؟

گرصني بخفة حتى اسكت ورجعتله الگرصة، رجع گرصني ورجعتها اله.. هم گرصني ورجعت اريد اگرصه ولزم ايدي حيل يعصرها بين ايده واللتفت يباوعلي ابتسم وحچه بين سنونه..

-لا تفشلينا بعدين نكمل بعدين..

-ايدي اووي

-مرة عمهم صمد: هاا هاا عيني شنو هاي الحركات ههههههه

ضحك الكل وياهة رغم ميدرون شكو بس هاي المرة ولا حبيتها غثة، انطاهة امير نظرة وشگد اضوج من هاي نظرته يلزگها بوجه الميعجبه وميطيق تصرفاته.. فوراً سكتت مرة عمه اخيراً..

وره الصلاة مباشرة فرشوا السفرة وتغدينا ما اشتهي اكل والاكل كله ثريد وما احبه اني بس انحرجت منهم كل شوية واحد حاط شي گدامي والا تاكلين..

كملنا غده وگامن البنات يغسلن المواعين والولد كلمن طلع لشغله بقى بس الامير، كلما اريد اصعد فوگ عماتهم ميقبلن يردن يشوفني بعد..

-فراقد: چا ما شفنا هدية العريس لصباحية عروسته

حچتها بحاجب مرفوع غلس الامير عود ما سمعها وهي هم ما عادتها، شربنا چاي وبعد طفيت عيوني گوة فاتحتهم ترخص الامير منهم وگال احنه نروح نرتاح ولزمني من ايدي واخذني وياه وكذلك رگعونا بهلهولة من صعدنا الدرج سوه..

-تَـمني بضحك: هواي صرفن هلاهل

صعدنا سوه ومن وصلنا للطابق الثاني هديت ايده اريد اروح لغرفتي وصاح اسمي مستغرب وعاكد حاجبه..

-تَـمني وين رايحة؟

-اريد انام شوية

-چا شعندج هناك

-غير غـ...

-غرفتج يمي بعد يلا

-هاا؟

سحلني من ايدي لغرفته، خجلت كللش ورجليه جمدت متتحرك گوة عليَّ دخلت بس بسرعة راح مني الخجل من شفتهم ناصبين الغرفة الجديدة الي اختاريتها من طلعنا نجهز، دورت عيوني بالمكان مسوي بيها هوايه تعديلات ومشتري اثاث حلو.. تيبل لامب بالزاوية چبير يشبه لون الغرفة والستائر تول وكيبور مرتبات والزولية هم تجنن.. المفاجأة الثانية هي من فتحت كنتوري وشفتهم ناقلين ملابسي بي..

-تَـمني: شوكت سووا كل هذا؟

-هدومچ اليوم الصبح جابوهن بس الغرفة صارلها يومين منصوبة

افتريت بيها واكو فرحة بگلبي، فرحة ماعرف شنو سببها بس كلش جو الغرفة مريح واللوانها تهدأ الاعصاب.. مختارتها اللوان الاوف وايت والجوزي وهي شوية ضخمة بس گاعدة عدل بغرفة امير لان اصلاً غرفته چبيرة..

-عجبتچ؟

-كلش تعبان بيها عاشت ايدك

-تحمست زايد وردت اجيب بوفية بعد واخوتي نصبوا عليّ

-هههههههه بوفية هاي اليحطون بيها فرفوري واكواب؟

ضحك وهز راسه اي، ابتسمت وگعدت على الچرباية اتلمس الفرشة الاوف وايت الحاطيها، ذواقين بيت شيخ علي وهذا احلى شي بيهم يهتمون بالتفاصيل ومرتبين كلش وذوقهم نازك مو اوڤر..

-تنامين شوي؟ لان عازمينه على العشا بيت عمي مرتضى

-ابو منتصر مو ميت؟

-اي بس منتصر موجود بمچان ابوه

هزيت راسي اي واخذت ملابس وفتت للحمام ابدل، طلعت لگيته مظلم الغرفة ونايم على الچرباية بدشداشته ما غيرها.. استحيت انام بصفه ورحت اتمدد على القنفة الموجودة بالغرفة بس حطيت راسي عليها رحت لسابع حلم..

عگدت حاجبي من حسيت على ايد تصير جوه راسي وايد ثانية جوه رجلي كأنه يريد يشيلني، فتحت عيوني على كيف اشوف منو وانتفضت اصرخ من شفته عاصف!!

-هددددنيييي هدنيييييييي

-تَـمني.. تَـمني!!

-هدنننني شترررريد منيييي هدننييي اميييييير اميييييييييير

-انا امييير اناا هناا تَـمني گعدي انتِ نااايمة

-امييييير ليششش رحت اميييير

-گعدددي بوية انا هناا انا الاميرر تَـمني فتحيي عيوونچ

فزيت على راشديات تضرب وجهي، شهگت ميتة خوف من شفت الامير گاعد على ركباته بصفي ولازم ايدي.. حضنته من رگبته وبچيت مفرفحة روحي رايحة وجسمي كله مسنح من الخرعة..

-اسم الله بسم الله الرحمن الرحيم شبيچ ابوية

-ليش عفتني ورحت ليش

-ما رحت وعلي نايم على الچرباية ما طلعت من الغرفة

-خفت.. خفت

-حلم هذا حلم لا تخافين

بچيت على كتفه وسندت راسي عليه، نهضني يشيلني على حطتنا ثبت ايد جو رجليه والايد الثانية جوه راسي ما وخرني عنه واخذني للچرباية، نيمني بحضنه وجر اللحاف يغطينا.. منتبهت على روحي مشددة على ياخة دشداشته الا من هو شال ايدي عنه وحضنها بين ايده..

-بسم الله الرحمن الرحيم ، قل اعوذ برب الفلق ، من شر ما خلق ، ومن شر غاسق اذا وقب ، ومن شر النفاثات في العقد ، ومن شر حاسدٍ اذا حسد ، بسم الله الرحمن الرحيم....

اسمعه ظل يقرا هوايه ايات قرانية على راسي الى ان غفيت مرة ثانية.. حسيت من جديد وانتبهت لوضعي ساندة راسي على صدره وهو هم نايم، وخرت عنه بسرعة منحرجة وگمت للحمام اغسل وجهي وتوضيت..

باوعت لروحي بالمراية بعدها الرجفة بعظامي خايفة، شفت عاصف والله شفته وحسيت بلمسة ايده على جسمي وانفاسه تضرب وجهي چان يريد يشيلني من القنفة.. تعوذت من الشيطان وغسلت وجهي كم مرة الى ان هدأت وطلعت من الحمام، شفت امير هستوه گعد..

-شلون صرتي

حچاهة بصوت كله نوم ومطى ايده، هزيت راسي احسن وگعدت على القنفة اباوعله وهو يمغط نفسه، گعد على حيله يعدل شعره ودار نفسه الي..

-تگدرين تسولفين الصار؟

-اي

-احچيلي

-شفت عاصف

-ابن عمي مسعود؟!

-اي.. عاصف چان ديريد يشيلني من القنفة

فز يوگف بمكانه عاگد حاجبه، تقدم يوگف گبالي ضبط وحرك راسه نافي ويگول بعصبية مكتومة..

-حلم هذا.. چنتي تتحلمين مو حقيقة

-بس حسيته حقيقة حتى انفاسه حسيت بيـ...

-صلي على محمد يمعوودة صلي على محمددد

-اللهم صل على محمد بس والله حسيت...

فزيت من هرول عليَّ وسد حلگي بيده، فتحت عيوني مستغربة تصرفه واستغربت اكثر من باس خدي وراسي وظل يكرر..

-حلم هذا حلم لا تفكرين بي زايد يولي حلم

هزيت راسي اي ووخرت ايده عن حلگي، درت وجهي اباوعله ياا هذا شبي؟ هسة هو حلم صدگ چذب..

-تَـمني: تره حلم چان مو حقيقة

-اييي حلم

-لعد شبيك راح تموت

-شكوو تحلمين بذاك القندرة؟؟ شمعنى الا بي!!

-صراحة حتى اني مصدومة شكو احلم بذاك المزعج

-انسي الحلم وبعد لا تفكرين بي ابدد

-عود اشوف

-تَـمني!!

-هههههههههههههههه امير والله موتتني ضحك واني مالي خلگ عود صدگ تحجي انتَ؟

-صدك احجي بشني؟؟

-دترجف امير! لهدرجة تقار ابو القيرة؟؟

-يا غيرة ياا صخام سكتي

-هههههههههههه والله تصير كيوت من تغار

باوعلي بنظرة ابد مو كيوت بلعت ضحكتي وگمت من القنفة، فتحت كنتوري طلعت ملابس حتى ابدل وهو بعده گاعد على القنفة ما گام..

-لا تظل تفكر بالحلم شيخي

-خ** على الحلم

-هههههههههه

-ضحكي ضحكيي انا اعلمج الفاهية

-ههههههههه والله العظيم لطيف انتَ

-تحلم بنعال وقندرة چا ما تحلمين بيه لو ابزز انا؟؟!

-ههههه اي تبزز

-روحي بدلي طلعتيهاا لروحي رووحي

-سلامة روحك شيخ المستقبل اموري العلاوي

گام يريد يجيني وفلتت للحمام ابدل واتذكر شكله واموت ضحك، كملت وطلعت من الحمام ما لگيته بالغرفة، مديت چرچف بالكاع لان ماعرف وين المصلاية حاطيها وصليت صلاة المغرب، كملت وحضرت جنطتي اليدوية ونزلت جوه شفت الكل جاهز..

-تالة: گلت اليوم متنزل

-تَـمني: لا مو معزومين

-تالة: شلونها غرفتج الجديدة؟

-تجنن واسعة وحلوة كلش

-تالة بغمزة: وشلونه ابو الغرفة

-تَـمني: ههههههههههههههه ههههههههههههه

-حبيبة: ضحكة خير ان شاء الله

طلعت من المطبخ وعبق وياهة ثنينهن مبتسمات، سيطرت على ضحكتي وما بلغتهن الصار فوگ احس فشلة..

-تَـمني: عبق ليش ممبدلة؟

-عبق: اني ماروح لعزيمة منتصر

-تَـمني: ليش ولج!

-عبق: اريد ادرس اخاف ما اللحگ بنات

-حبيبة: جاي اگلج تلحگين شينرادله السادس لا تعظميها

-عبق: أخاف اخاف اريد اقرا عوفوني

-تالة: عوفيها حبيبة مراح ترتاح الا تدرس

-تَـمني: هلوو عينيي معرفتچ ست تالة؟

-تالة: احم احم مو محسوبتج صارت طالبة جامعية

-تَـمني: كذاابة طلعت القبولات؟؟؟

-تالة: اييي اييي الحمدلله

-تَـمني: اوكفي ليش انتِ قدمتي اصلاً؟ هاي شوكت؟

-وين نايمة انتِ لخاطر الله

-المهم يا كلية طلعتلج؟

-تالة: كلية علوم

باركنالها كلنا فرحانات بالنتيجة وعبق ترخصت وصعدت فوگ بينما الباقيات احنه كلنا طلعنا منتظرينا الزلم بالسيارات، توقعت راح نروح لبيت منتصر مچنت اعرفه عازمنا على بستانهم..

الاجواء تجنن والجو يخبل والنفوس طيبة، اللتمينا البنات سوه ورفل اقربهن الي ظلينا نسولف محاسين برواحنا الا من اجت حبيبة وگالت صار العشا.. رحنا نگعد وياهن على السفرة زلم وحد ونسوان وحد وگعدنا ناكل..

صارت گعدتي بصف سبأ من اليمين ورفل من اليسار، كل ثنين ثلاثة يسولفون سوه وياكلون من نفس السمچة الا سبأ مسمعت صوتها ولا سمعتلها هسس.. درت وجهي اباوعلها مبتسمة تاكل على كيفها ومبينة كلش خجلانة متقبل تمد ايدها على شي الا حبيبة تنطيها..

-تَـمني: تحبين اللحم سبأ؟ هاچ اخذي مالتي اني مو كلش وياه

-سبأ: لا سودة عليَّ حبيبتي بالعافية انا ماريدن

-لا حبي اخذي والله تره يبقى

ابتسمت واخذته مني وگعدت تاكل منه شبيه دمعت مقهورة مادري بس يمكن بسبب ملامحها وبشرتها السمرة التعبانة، سبأ بنية مبينة بسيطة ومتعوبة كللش، ملامحها عادية مابيها شي مميز وخطية ضربات الشمس مبينة بوجهها وتصبغات صاير عدها قوية.. انقهرت وتأثرت من امها اكثر من مرة صاحتلها "الجگمة" وواضح هالكلمة مأثرة بنفسيتها..

معاملة امها ويه رهف تختلف كلش عن سبأ، رغم رهف مجاية اليوم بس ما نزل اسمها من لسان صابرين.. رهف مدللة وكلش مهتمين بيها وما انكر البنية حلوة ومملوحة قوية و لسانها طويل وعدها حركات تجذب عكس سبأ.. بس من سولفت ويه سبأ هالليلة عرفت شگد الشكل مو مهم المهم الجوهر والقلب الطيب واللسان الحلو..

-تَـمني: گلتيلي عمرج 26 سنة؟

-سبأ: اي اظن لو 26 لو 28

-تَـمني: شگد مواليدج بالضبط؟

-سبأ: مو انا ماعرف لان كلما اگول عمري كذا ابوي يچذبني ويگول لا

-هاا

-وانتِ شكد عمرج؟

-اني راح ادخل الـ 19 بعد كم يوم

-بعد طولي شحلاتج

-هههه يعمري والله انتِ الحلوة

ابتسمت ونزلت راسها، كملنا عشا وگعدنا على جهة من البستان اني وياهة حسيتها تريد تحجي ويايه بعد بس تخجل لان ظلت كل شوية تفتح حلگها تريد تسولف وتسكت من يعبر من عدنا احد فـ قررت اني ابدي وياهة الحديث..

-تَـمني: شلون تقضين يومچ سبأ؟

-سبأ: ما اسوي شي مهم

-يعني شنو تحبين تسوي اكثر شي

-اكثر شي احبن اطلع للبستان واطبش بالنهر من يطلعون اخوتي

حچتها وعيونها تلمع بحماس، ابتسمت وهزيت راسي اأيدها..

-صدگ احسها وناسة بيت عمو علي هم عدهم بستان بس منطلع هوايه خالة رسمية متقبل

-اي ما ترضى عبن اخوتي يخبثون

-شلون يعني؟

-اخوتي شرانيين وهواي يخبثون ويه وليداتكم الله يحفظهم ما يحبوهم ويغارون منهم

-بس اكيد اكو سبب ميصير الكره من عبث

بلعت ريگها وباوعت منا ومنا، تقربت مني وهمست وهي تفرك بيدها المجرحة..

-السبب كله من فراقد هي راس البلا

-معقولة

-وعلي.. هي الفرقت بين الاخوان هي ما تحب لا ابوي ولا شيخ علي وتريدلهم السوء ثنينهم

-سبأ فراقد هوايه تجي لبيت عمو علي ماتوقع تكرهه؟

-چذابة تعلميني بيها فراقد ام البلاوي بس الكل مخدوع بيها

صفنت افكر بكلامها ومادري بي صدگ لو كذب بس سبأ تحجي بدون لا تحرك بيدها وچانت كلش حذرة بكلماتها، صدمتني من اردفت بخفوت..

-بسبب فراقد مات اخوي!

-عندج اخو ميت؟

نزلت دمعتها ومسحتها بسرعة، بلعت غصتها وهزت راسها تگول..

-اي سودة بوجهي اخوي ليث حنين اخوته.. چان يفگدنا ويخاف عليّ انا ورهف من الهوا الطاير بس معروف الموت ما ياخذ بس الزينين

-لا اعتراض على حكم الله حبيبتي بعد امر الله هذا

-امر الله اي بس فراقد السبب! هي الشعلت النار بالبيت وقفلت الباب على ليث وهو نايم!!

-يمممة

-حرگت گلوبنا گبل لا تحرگه بمچانه

-ليشش هيج سوت؟؟

-مادري ما نعرف السبب وماكو لزمة عليها بت اخوي الصغيرة تگول شافت فراقد تطلع من البستان بيوم الحادثة وحچت لابوي.. صارت گعدة يردون ياخذون حگ ليث وابوي قسم يذبح فراقد بيده ويشرب من دمها

-وتالي شصار؟؟

-صارت الگعدة وشيخ علي وگف ويه ابوي طول بس بنص الگعدة طبت عليهم فراقد تلطم وشگت زيجها گدام الزلم تحلف وتقسم هي مالها شغل ومو هي الحرگت البيت

-صدگوها اكيد مو

-مو بساع اجت گوامة طرف عشيرة ثانية و..

-شنو گوامة؟

-يتدخل طرف ثالث يحل المشكلة ويكون محضر خير، المهم اجوا وشيخهم بنفسه حچه ويه فراقد وابنها فرقد وشرحتله الصار وقسمت بروح ابنها وبنيتها هي ما حرگت شي وما تدري يمته شبت النار

-اي؟؟

-من شافتهم ما مصدگيهة استسلمت وراحت جابت سچينة وحطتها بيد ابوي وگلتله اذبحني بس تخش بخطيتي انا گرابتك وعرضك وتعرفني مظلومة اكتلني وخلي الدنيا كلها تگول ذبح اخته وهي مظلومة

-شلون موقف يا الله!

-ابوي تسودن وشيخ علي تدخل والسالفة هاي طولت چم سنة همه عداوة وابوي فلا برد نار گلبه على وليده بس عمي علي ما گدر يعوف فراقد اكثر خصوصاً من مات زلمتها وبقت وحيدة ويه ويلادها اجته نخته بصفته شيخ وهو تولاها

-وابوج حقد على شيخ علي مو!

-حقد اي بس مو هذا السبب الرئيسي لحقدهم اكو هواي سوالف ثانية

-شكلچ تكرهين فراقد سبأ

-اكرهها واشوف دم سنوني ولا اشوفها! ويا تَـمني احذرچ لو صارتلج مشكلة لو وگعتي بمصيبة بدنيتچ عرفي فراقد وراهة!!

-ليش تحذريني وتخافين عليَّ؟

-لانچ تعودين لـ حبيبة وانا احبن حبيبة

سكتت بسرعة ونزلت راسها تفرك بيدها من عبر من عدنا علي التـقي، ما انتبه لوجودنا لان صاير گدامنا كراسي واحنه گاعدات وراهن على الثيلة.. گعد هو على الكراسي مقابيلنا بس مبين باله سارح كلش ولا لمحنا، طلع جكارة من جيبه وگعد يدخن..

گمنا اني وسبأ نظهر نفسنا، اللتفت علينا يشوف منو وابتسم ابتسامة باهتة عكس عادته خو سبأ ما باوعلها اصلاً ولا عبرها..

-تَـمني: شلونك تقي

-علي التـقي: هلا بيج خوية

-تَـمني: چنه گاعدات وراك هنا بس منتبهت انتَ

ابتسم وهز راسه اي، ترخصت سبأ تركض بعيد واني هم ترخصت منه وردت اروح ورجعني صوته..

-انتبهي تَـمني

-شنو؟

-انتبهي المن تماشين لا تطوخين علاقتج ببنات مسعود

-متحبوهن انتو

-ماعدنا شي ويه البنيات بس ما نثق بيهن نخاف لا يوصلن حچي بيتنا لاخوانهن

-ماتوقع سبأ هيج

-شمعنى؟

-لانها لطيفة ومبين هي تكره اخوانها ومتطيقهم

-كلشي جايز

-اي

-عبق ليش ما اجت؟

-گالت تريد تدرس ماعدها وقت

-هي ماعدها خصوصي مو؟

-لا ماعدها

-ولا جهاز تكدر تقرا عليه؟

-لا خطية كلشي ماعدها على الملازم تقرا

-همم.. تگدرين تساعديني بشي؟

-شنو گول

عكست عينه ورايه كأن اجه احد، اللتفت اشوف واذا اللگاه الامير جاي بأتجاهنا رجع تقي عيونه عليَّ وگال بنبرة سريعة..

-اشتريتلها ايباد واريدج تاخذي الها علساس انتِ جبتي ابد لا تجيبين طاريي بشي اذا ما رضت تاخذه لحي عليها لحدما تاخذه، عفته الج بغرفتي على الميز عود اخذي من ترجعون لان انا اليوم اطلع واجب ما اجي وياكم

سكت بسرعة وحط الجكارة بين شفايفه يدخنها ويه ما وگف امير بصفي، باوع بيني وبين تقي وگال مستغرب..

-منتصر جاب نراگيل وحلويات تعال ليش گاعد هنا وحيدك؟

-علي التـقي: عافيات انا طالع واجب

-هسة؟

-اي ارجع للبيت اخذ اغراضي واطلع هم ياله اوصل گبل الفجر

هز راسه امير وودع اخوه، طلع تقي وره ما ودع الكل واني مشيت ويه الامير ارجعلهم جوه..

-شتاخذين من غرفته؟!

-شنو

-تقي عافلچ شي بغرفته شنو هو

-هاا لا هيج هاي

-اي شنو هو الهيج؟

ضحكت وخفيت ضحكتي هسة ليش اضحك من يحجي هيج مادري شكد سخيفة اني يربي، اللتفتت اباوعله وگلت بدون لف ودوران..

-تقي جايب ايباد لـ عبق ورادتي اخذه الها على اساس اني المشتريته

-لـ عبق؟!

-اي هوايه مهتملها اخوك

-خير ان شاء الله

-اكييد خير

-المهم لا تگعدون وحدكم بعد

-ها؟

باوعلي بنظرات جامدة، عدت تساؤلي عليه ووگفني بنص الطريق وحدنا الدنيا ظلمة وصوت الليل يدوي، جرني من ايدي وقربني منه وعاد بهدوء..

-لا تگعدين ويه واحد من اخوتي وحدكم تَـمني

-بس احنه مسوينه شي؟

-ادري بس لا تعيديها خاطر ما يسمموني بحچاية ويخلوني اغرد

-اكو احد حچه عليَّ گدامك؟؟

-اي

-منو حچى؟

-شعليج انا حليت السالفة لا تهتمين بس انتبهي مرة ثانية نوومه

-امير مچنت اعرف ممقبول عدكم احچي ويه اخوتك تفاجأت

-احچي طبيعي بس لا تگعدون وحيدكم بمكان اذا تحتاجين شغلة ضرورية منهم گليلي انا لو حبيبة نجي وياچ

-تمام.. شكراً لان فهمتني

-جسر للطيبين

ابتسمت وتركته اروح ووگفني مرة ثانية من سحبني من خصري هالمرة، سرت قشعريرة قوية بجسمي وبحركة لا ارادية درت وجهي عنه مستحية صديته.. ماتنبهت بهاي حركتي زعجته وشعلت بي نار رادت تحرگني لانه ما بيّن على وجهه وحررني من ايده بسرعة ورجع يبتعد خطوة ليوره..

-تَـمني: اخاف احد يشوفنا

گلتها كـ تبرير لردة فعلي الغبية بس مجاوبني عليها مجرد حرك راسه يوافقني، طلع من جيب دشداشته النيلي علبة سودة وقدمها الي..

-ردت انطيچ صباحيتج

-جبتلي هدية؟

-ما صارت فرصة انطيچ الصبح غفيت گبل لا تطلعين من الحمام بدون لا احس

-اممم خاف جبتها وره مسمعتك حچاية فراقد

ابتسم وضاقت عيونه، ضحكت على شكله مينمل وجهه من يبتسم، حرك راسه بـ لا وگال..

-لا والله مشتريها من يومين والوصل يثبت.. فتحيها شوفي

اخذتها من ايده خجلانة ومتحمسة اشوف محتواها، فتحت العلبة وكبرت ابتسامتي من شفتهن گلادة وتراچي نفس موديل بعض وبيهن كرستالة لونها ابيض ضايفة لمسة حلوة للذهب..

-عجبچ؟

-كللش حلوات شكراً امير شگد ذواق انتَ

اخذها من ايدي عرفته يريد يلبسهن الي، لفت انطي ظهري حتى يلبسني الگلادة قصيرة شلون الخناگي بس شوية راهية متخنگ، لبسني ووخر الشال من اذني يلبسني التراچي..

-تستاهليهن

عجزت اجاوب ماعرفت شنو ارد عليه، الخجل حاوطني ووجهي اشتعل من تقرب وباس خدي بوسة بريئة، مادري شبيه وشصارلي ووگفت على اطراف اصابعي وكمشت بدشداشته ارجعله البوسة على خده، غمض عيونه يضحك ووخر مني يگول بجزع..

-اشتعلنا يا وليان

-مادري.. مادري ليش هيج سويت

-چثريهن خايبة شبيچ

-لا ما اكثر شي اسكت عيب

-انتِ لو طخة لو اكسر مخه

-لا لا بس.. بس هاي يمكن اثار سحر المحبة

-ههههههههههههههههههههههههه

توترت من ضحكته ودفعته وركضت ارجع جوه، متنددمة كللش لان بسته مادري شبيه شگد فشلة شبيه استخفيت وياه تَـمني لا ياخذج الواهس گعدددي وسكتي!!

**

"عـــبق"
ملزمة الاحياء گبالي گاعدة وادرخ بالتعاريف من طلعوا لحد هسة صارت بـ 12 اني ما طلعت من المخزن، بقوا بالبيت شيخ علي و خالة رسمية ورهف بالاستقبال بطنها توجعها وما راحت وياهم همزين بقن ذني الثنين عاد زينات ويايه..

سمعت طگطگة بالصالة الفوگ توقعتهم رجعوا، گمت فتحت باب المخزن اشوف منو وبسرعة سديت الباب ورجعت جوه من لگيته علي التـقي، حطيت ايدي على گلبي ويه ضحكته وسمعته يدردم عليَّ.. لا ارادي ابتسمت على نبرة صوته..

-علي التـقي: چنها بزون هالبت ما راح ناكلچ تره

ضميت حلگي بيدي اضحك صدگ كلامه كلما اشوفه اعيد نفس الحركة، افز مخترعة واشرد ارجع منين ما اجيت بس والله تصير لا ارادي ما اتقصد..

-علي التـقي: تگدرين تسويلي چاي دكتورة؟

دگ باب المخزن وهو يگولها، كبرت ابتسامتي وركضت حطيت ربطة على راسي وفتحت الباب، مجاوبته بكلمات بس هزيتله براسي اي ونزلت الدرج بوجهي للمطبخ..

حطيت قوري الچاي على النار ورحت للفرن اطلع كيكة العصر گصيتله قطعة وحطيتها بماعون وادري بي يحب الحلو كلش فـ جبت نوتيلا حطيتها فوگ الكيكة..

-عليييي شون دلال هذا

ضحكت من دخل للمطبخ وهو يگولها ويباوع للماعون، رحت اجيبله استكان وترسته شكر مثلما يحب، صفگ بيده وگال..

-تريد تكتلني الدكتورة عاشت ايدج

-لا اسم الله شنو اكتلك بس انتَ مو تحب الچاي حالي؟

-صح

ارتبكت خطوتي من تقرب يوگف بصفي كلش ومد ايده ياخذ الاستكان، رجعت خطوة وره ورفعت عيوني عليه وبنفس اللحظة هو نزل عيونه بدون لا يركز بيه چان يباوع لايدي الترجف..

-علي التـقي: يمكن الوقت مو مناسب حتى احچي وياچ بهيج موضوع واحنه وحدنا هنا بس..

گلبي راح يوگف بأي ثانية، بلعت ريگي ناشف كلش واحس بشي مو طبيعي ديصير.. شعور مخيف مخالط بالارتياح ماعرف شلون اشرح بس دائماً ماعرف اشرح شعوري من اكون واگفة ويه تقي، وگف گلبي من اردف..

-يجوز راح تكرهيني بس ماگدر مـ...

-تقي بعدك هنا؟؟

اللتفت ويه صوت امه الدخلت للمطبخ، ركضت ابتعد اوگف بصف السنك وحطيت ايدي على گلبي اتنفس بسرعة جنونية والتوتر يقرا عندي مليون..

-علي التـقي: اي يمة گلت اشرب استكان چاي واطلع

-مودع يا روح امك انتبه على نفسك وليداتي

-بعيني

-اقرا اية الكرسي للحفظ واول ما توصل دگ عليَّ لا تخليني خايفة عليك

-صار بعيني

-چا يلا اگعد اشرب چايك انا اصبلك بيدي

گعد على الكرسي وخالة رسمية صبتله الچاي، اخذته اله وگعدت بصفه تسولف وياه واني من گدما مرتبكة لزكت بالسنك همزين عاد اكو كم ماعون وگفت اغسلهن..

-رسمية: شلون چانت العزيمة؟

-حلوة فاتتكم انتِ وعبق

درت بس وجهي وابتسمت ممتنة لانه افتقدني، درت عيني على رسمية شفت شكلها مو مثل كل مرة هالمرة بوزت ودارت وجهها عني معاجبها..

-رسمية: بقيت ويه ابوك مو مال اعوفه وحده

-شلون صار ابوي؟

-كلش تعبان ابوك تقي كلش

-شبي؟؟ مو كال الدكتور وضعه احسن؟

-ما اظن.. اليوم راد الامير خاطر يوصي

-دخيل علي صدگ تحجين يوم؟؟

-اي والله بس انا ما رضيت وما بلغت اخوك ما ردت تنكسر فرحته بعرسه

-لا يوم شني تنكسر فرحته هالسالفة ما تتأجل چان لازم تحاچين الامير

-مو...

قلقت من نبرة صوتها واذني تعلگت وياهم، سألها تقي شبيها وشنو الخافيته ومن لح عليها ياله گالت بصوت يرجف مكسورة..

-ما يريد الامير يستلم المشيخة من بعده

شهگت جوه انفاسي وتوسعت عيوني من الدا اسمعه! معقولة شيخ علي تنازل عن الامير وميريده يستلم الامارة من بعده؟؟ بس ليش!! عمو علي اكثر بشر استقتل حتى يكون خليفته هو الامـير علي!

-علي التـقي: يمة شهالحچي!! ليش ابوي جاي يسوي هيج شسالفة!!

-مادري ولك مادري يا يمة گلبي انخسف من سمعته چان مقهور كلش وگوة حاچاني

-وينه ابوي جوه هسة؟؟

-اگعد تقي لا تروحله هسة هو نايم، اظن ابوك تعبان وجاي يخربط بالحجي من وره الجلطة

-اكيد! مستحيل ابوي يتنازل وينطي المشيخة لغير الامير تره ما يصير هيج مو لعب جهال هو! ليش يكسر بالامير گدام الكل ويصغره بيناتهم!

-مادري تقي ماادري خلي الامير يرجع وافتهم شني سالفته

-ما ينسكت عن هالموضوع لا تظلين تأجلين اليوم تفهمينه السالفة يمة اليوم!

-ان شاء الله هذا هو

گام تقي يصعد فوگ واني رحت امسح المجمدة، بقت خالة رسمية فوگ راسي تأشرلي شنو انظف وشنو اعوف..

-رسمية: سوي لگمة لـ علي النور راح يرجع جوعان من العزيمة ادري بي

-صار

-اي اشتغلي زين لا تظلين بس بربخة ونوم

انصدمت من حچت ويايه بهالاسلوب وبهالنبرة بالتحديد، رفعت عيوني اباوعلها بس ما بينت نفسي زعلانة هزيت راسي اي وطلعت كبة من المجمدة اگليها اله..

-عوفي الكبة بعدين كمليها تعاي اريدج بشغلة

عفت من ايدي ورحت وراهة لغرفتها دخلت جوه وطبگت الباب علينا، اشرتلي اگعد سويت مثلما تريد ومية الف فكرة اجت براسي وكل الافكار الاجتني تخرع وموتتني من الخوف..

-عايني عبق..

انتبهت وياهة مركزة بشنو تريد تگول، بلعت ريگي افرك بيدي ولا ارادي عگدت الربطة حيل عليَّ اختنگت بيها..

-جابتچ سلوى هنا انتِ توچ موردة اظن چان صارلج شهرين من بلغتي وبين جسمچ صح لو انا غلطانة؟!

-صح

-جابتچ لبيتي ونبهتها بيتي كله فحولة زلام ونَفسهم تغريهم ما يگدرون يسيطرون على شهواتهم وملذاتهم.. شيخ علي ربى ولده تربية خله السلف كله يحلف براسهم بس بعد الزلمة يبقى زلمة وينجذب للحم المكشوف

صدمتني عبارة "اللحم المكشوف" بس معلقت وبقيت اسمعلها وين تريد توصل..

-خالتج كالت تجيچ خدامة تشتغل بالبيت واخفيها عن عيون الولد انا ما رضيت بالبداية بس بعدين قبلت تبقين هنا بشرط تحافظين على نفسج وما تتقربين من ولدي

-وهذا السويته خالة

-لا تقاطعيني!!!

نترت بيه نتره مخيفة، عضيت لساني ميتة قهر ماريد الدمعة توگع هزيت راسي وسكتت بالعة صوتي..

-عايني انا ما احب احاچيچ بهاي الطريقة بس خالتچ گالتها! گالت عبق تجي خدامة! وجودها هنا خدامة مو اكثر! وولدي يشوفوچ خدامة الهم شفتي تقي شون طلب منج تسويله استكان چاي؟ هاي لو حبيبة گاعدة بغرفتها ما يسووها.. محد يطلب منها شي ويزعجها يخافون عليها بس انتِ ولا شي بالنسبة الهم

لهنا وبس دموعي ماكدرت اتحمل احبسهن اكثر وصارن ينزلن وحدة وره الثانية، جسمي يرجف اريد اصرخ واطلع البيه بس ماكدرت، ماكدرت لان المرة الگبالي بأي لحظة تطردني من البيت وتهيتني بالشوارع..

-الي يسألچ شنو وجودچ هنا تگليله انا خدامة!! أي واحد من ولدي يگلچ انتِ ليش عايشة ببيتنا تجاوبي خاطر اخدمك وبس فهمتي؟؟؟!

شهگت بدموعي ونزلت راسي ابچي بقهر، گامتلي وگفت گبالي ولزمتني من زندي، تنتر بيه..

-فهمتي؟؟؟

-فهمت.. فهمت

-عايني عبيقة خاف عبالج تغرين واحد من ولدي واسكتلچ؟! لا وعلي ابن ابي طالب ما اسكت ولا اخليج تتهنين وانا ادري بأبني رايدج بس خاطر يشبع نفسه ويتونس بيج چم يوم ياكلچ لحم ويذبج عظم!!

رفعت عيوني عليها تغوش من الدموع ما اكدر اشوف ملامحها عدل، خضتني تحرك بجسمي وهزتني هز بكلماتها من گالت..

-علي الحـق يريدچ حليلته! تخدمينه وتصيريله ونسس بالليل! تصيريله جارية جوه رجليه! لا عبالج اذا ياخذج يصير راسج براس چنايني؟؟ لا وعلي ازوجه اغااتچ وانتِ تبقين الخدامة التنظف وتكرب للصبح ببيته!

دفعت ايدها عني محترگة حرگ، نااار بصدري مدا تخمد تمنيت اطلعها واحرگ البيت والي بي واحرگ روحي وراهم، گمت على حيلي وسندت روحي بالحايط راح اوگع من قوة الكلمات ومن حجم الاهانة الدا اعيشها..

-توافقين لو لا؟؟؟

خزرتها بحدة ودموعي عشرة عشرة تنزل، حطيت ايدي على گلبي راح يطگ النار جاي تصعد لبلعومي حاجبه حتى الحچي عني..

-فضيهااا

-لا

-شنو؟؟؟

-لا.. ما.. ما اوافق

-تفتهمين

عفتها وطلعت من الغرفة ووگفني صوتها من گالت بنبرة لطيفة تختلف عن قبل شوية..

-احبچ لانچ ذكية وتفتهمين.. اعرفي ليش جبناچ وشنو سبب وجودچ، اوصيچ عبق لا تعاينين فوگ خاطر ما تنكسر رگبتچ انا اعرف وليدي زين واعرف شني يعجبه.. علي الحـق ما يبقى عليج يبدلچ بثانية وثالثة ورابعة وتبقين ملطلطة ببيته وتحوسين بين فروخه

ما اهتميت لكلامها وصعدت للمخزن فتحت الباب ورگعتها حيل ووگعت بالگاع موتت روحي من البچي فقددت اريد بس ابرد نار گلبي اريد اريح نفسي صرت اضرب على صدري حيييل وابچي بصريخ، نزعت الربطة وشگگتها بيدي اضرب على وجهي وراسي وصدري ملخته تملخ محتاجة هووا راح الهوا مني اختنگت..

ما انتبهت من انفتحت الباب عليَّ ولا ركزت بمنو دخل، ظليت عاصرة عيوني واشهگ اريد اجر النفس وافرك بصدري.. احس بأيد شخص لازمتني من زندي يردون يگوموني دفعتهم عني وطلعت من المخزن وحدي ركضت للدرج..

-اوووگفي

-هـ.. هـ هدني هدني وخر

-ولج حاچينيييي

-هدني..

دفعته عني بروح رايحة ونزلت الدرج برجلين ترجف ماعندي قوة وماعندي نظر مجاي اشوف شي گدامي الدرجة تتحرك جوه رجليه من الوضع الاني بي، عيوني توجعني من الضرب وصدري ينزف، كمشت بمحجر الدرج عدل اخاف اوگع وبالغلط دست على ذيال دشداشتي وما حسيت على روحي الا واني واگعة من فوگ ليجوه..

حسيت واني اتدحرج من الدرج وحسيت من صاحت رسمية وحسيت من طلعت رهف تركض عليَّ وحسيت من علي التـقي نصى عليَّ شالني وركض بيه.. حسيت من صرخت بي امه ينتظرها تجيب عبايتها وتجي ويانه كله حسيت بي كلللله بس ولا گدرت انطق.. استسلمت بروح رايحة ونفس مقطوع وغمضت عيوني..

-تقييي شصااير شنوو شصااااااير

بچيت ويه صوته هذا هو.. هو اجه هذا صوت علي الحـق.. هذا علي الحـق وديجرني من ايد تقي يريد يشيلني وتقي يمنعه ويتعارك وياه..

-علي التـقي: وخررررر حققق وخرررر البت راح تموووت

-علي الحـق: ووووولك وجهها ازرررگ لييييش يممة شصااااير يووووووم

-رسمية: سودة بوجهي ماادري ولك مااادري

غصب، جبر، سلب نزعني من ايد تقي نززع وجرني عنه يحضنني لصدره ويركض بيه لسيارته، بقيت مغمضة عيوني اسيطر على الهوا الباقي بريتي محتاجة احافظ عليه محتاجة ابقى عايشة لازم ابقى عايشة ميصير اموت امي.. امي تضيع.. امي تموت لو صارلي شي امي..

-سووق السيارة اطللععع تقي

عاصرني بين ايده واحس بأنفاسه تضرب وجهي، يمسح ع وجهي ويبوس براسي وينطق اسمي بلوعة ويگول "عبق حاچيني يرويحتي"..

اغيب عن الوعي وافز افقد الاحساس حواليه واگعد لحظات وارجع افقد.. بقيت على هالحال الى ان وصلت للمستشفى مادري شصار بالضبط وشسوولي لان بعد بكلشي محسيت..

استرجعت وعيي بعد ساعات وقناع اوكسجين على خشمي وحلگي، فتحت عيوني وشفت تَـمني وحبيبة ورفل وليلة وكل البنات محاوطيني قلقات وخايفات وحبيبة تبچي مخترعة..

-حبيبة: عبق يمة بنيتي عبووقة

سحبتني تحضنني لصدرها وتبچي فوگ راسي، ما قبلت سلوى يبقون عندي البنات ورادتهن يطلعن ويعوفني وحدي حتى ارتاح، تحمدولي على السلامة وفعلاً بدن وحدة وره الثانية يتسحبن..

غمضت عيوني مرة ثانية وسرعان ما غفيت من جديد من التعب، صدري محتصر وريتي تحارب حتى تتنفس.. بعد مرور فترة من الزمن بديت ارجع للواقع واتحسن فتحت عيوني ببطئ وعگدت حاجبي من شفت علي الحـق بوجهي، گاعد على سريري بصفي ولازم طرف دشداشتي..

-الحمدلله على سلامتج

مجاوبته تلمست ادور على جهاز الأوكسجين بس ما لگيته شايلي عني، درت وجهي عنه ماريد اشوف شكله ماريد اباوع لعيونه واتذكر كلام امه الذبحني وسوه بيه هيج..

-قبق شنو صار وياچ؟

كذلك مجاوبت، كرر سؤاله مرة وثنين وثلاثة وبكل مرة ما أجاوب.. طگت روحه مني وجر ايدي يحطها بين ايده وهالمرة ما سحبتها منه ما عندي طاقة..

-شبيچ چبيدي؟ لا تسوين هيج عبق سولفي وياي

-مـ.. ماريدك

-هاي السالفة بعدين نسولف بيها بس صيري زينة وعلي الا اطيح حظج

اخذت ايدي منه بعنف وضميتها جوه الفراش، تقرب مني اكثر لدرجة رجله طخت بخصري باوعتله متنرفزة وتوقعت راح يسممني بحچاية مثل قبل بس فاجأني وگطع انفاسي من نزل نفسه قريب وجهي وهمس..

-لا تخزرين لا اشلع عيونچ واجومهن بغرفتي

-روحي.. رايحة ما.. اكدر.. اجاوبك هسة

-لا تجاوبين لان لو جاوبتيني ما اظنج تطلعين منا صاحية

-اطلع.. بره

-اطلع روحج گبل لا اطلع واعوفچ

-وينهم

-بجهنم

-احجي.. عدل

-مادري عنهم ليش رفضتيني؟!

-حلو.. وصلك الخبر

باوعلي بنظرة مطولة ولانه قريب عليَّ كلش گدرت اشوف كل لون يخالط قزحية عينه.. شفت الاخضر والاصفر والرصاصي، شفت رسمة عينه وشمرة حاجبه، انتبهت لانفه المرسوم رسم ولتحديد فكه الحاد..

-ها انسحلتي ان شاء الله؟

-شنو

-هواي صفنتي

-لا.. يمته

-شني لا بس عوزچ تشفطيني ببوسة

-تأدب

-انا والادب مو صحبان

-تره.. انتَ مو حلو

صدمني من ضحك ضحكة برزت اسنانه المصفوفة صف واحد.. دفعته بضعف من صدره ابعده عني ودرت وجهي عنه، غصيت بلعابي من نبت خشمه بخدي وجر مني نفس قووي وهمس..

-حلو لو مو حلو.. مو علي الحـق اليتنازل عن شي يريده، لو انا اخذج يا عبق لو الله ياخذج!

رجفت من صار يمشي بخشمه على وجهي دفعته عني بقوة وگام مني، طلع جگارة من جيبه وحطها بين شفايفه بدون لا يشعلها وگال..

-انتظرج بالمخزن عَبقي دايخ ومشتهي عطرچ يصحيني..

**

"لـــــيلة"
الليلة چانت طويلة ومتعبة روحي راحت من گالو عبق متخربطة، اصلاً اليوم كله چان مادري شلونه بديناهة بعزيمة الامـير علي وتَـمني الظهر ونغزات فراقد لعمتي غزوة، وراهة لعزيمة منتصر الي گضتها حبيبة تلوب لان حضرة جنات منتصر ميباوعلها ولا حتى عبر وجودها وهاي الغبية تنتظر منه نظرة!

-ليلة: حبيبة بطلي غباء بطليي شون راح يعاينلچ واخوتچ موجودين فهميني شوون

-حبيبة: شبيچ ما زعلانة على منتصر شكو بي انا بالي هسة كله ويه عبق

-عبق ما بيها شي شفتيها باچر تگوم چنها حصان

-عينچ طفيها ليلة من طفت ليلتج وخلصنا مننچ

-على طاري طفت ليلتي وخلصتوا مني انا افلت اجه اخوج

-طاح حظج اي والله

عفتها تدردم عليَّ وركضت اضم روحي بمكان ما يشوفني ابا الحسن بي، وهمت رفل اريد اشرب ماي ورحت للبرادات لطشت هنا ما انشلعت شربت ثلاث گلاصات ماي بس اريد اشوفه يطلع من الممر خاطر ارجعلهم بس ما طلع خررب حظج يا ليلة!

افتريت قريب البرادات وجذبني صوت ثنين يسولفون، اصواتهم مألوفة تقربت اشوف منو ذولة وانتبهتلهم هاي عمة رسمية والامير واگفين يسولفون بشي، بطبعي ماحب اتجسس ولا عندي فضول بس لاني واگفة هنا گدرت اسمع لحديثهم الي ما فهمت منه شي..

-الامـير علي: بيدج عصرتي البرتقال يمة؟!

-رسمية: اي والله بيدي شبيك يمة شني تشك بأمك!

-يمة فهميني شنو جاي يصير يااهو يريد يخبل مريتي

-ولك شيخبل منها فهمني امير!!

قلقت وزاد انتباهي وياهم، ركزت بكل كلمة گالوها واسمع لصوت امير يحچي ويه امه بنبرة قلقة وچنه خايف كللش على تَـمني..

-شنو سويتي للعصير يوم؟ ضفتيله شي ثاني غير الشكر والماي؟

-ما حطيتله شكر اصلاً برتقال على صحيته شبيك امير

-احلفج بداعتي صدگ ما حطيتي شي ثاني؟

-وراسك وراس اخوتك بس عصرته وصبيته بالمطارة وشيبة ابوك ما حطيتله شي زايد

-ورأساً ضميتي لو انتظرتي شوي؟

-مادري ماتذكر بس اظن ابوك رادني وراهة ضميته بالجنطة

-اااااخ يمة ااااخ

-شبييك

-يمة اكو واحد جاي يلعب علينا! يردون يسودنون تَـمني حاروا شلعبوا بيها وانا واگف بس اتفرج على ضياعها ماكو بيدي شي ما جاي اعرف ياهو الجاي يسوي كل هذا

-فهمني ولك گلبي كضني

-تَـمني جاي تهذي عقلها مو وياهة.. مو وياهة يممة بيوم المزرعة من مشت لاسطبل الخيل بدون لا تحس والبارحة هم خربطت بالليل علما گالت بسس

-صوااب دهري شصار ولك؟؟

-هواي چفصت چن مشربيها شي وما صارت هيج الا وره ما شربت العصير

-قصدك انا مسوية شي لمريتك امير؟؟

-لا يا يمة بس جاي اگول يجوز انتِ تعرفين شي

-لا ومعزتكم وسنين رباتي الكم مادري بشي وحگ هو علي مادري يا يمة

-ابا الحسن علي: شتسوين واگفة هنا وحدج؟!!

نزيت نزة گلبي تدعبل ووگع بيها، حطيت ايدي على صدري خايفة وذبيت نفس.. ارتاحيت ثواني واللتفتت عليه اگول بضوجة..

-اشوفلي رجل

-ليييييلة!!!

-ابا الحسن انتَ تجيب الاذية لروحك يعني ما تشوفني واكفة يم براد الماي جاي اشرب

-چا ما تحچين لو الا تنتفيني

-انتفك شني شيرة انا؟؟

-خايبين هالبت ليش ما تستحي ليييش

يضرب على راسه على كيف ويلشلش بالعالم، فريت ايدي وگعدت على الكراسي اللم جنطتي لصدري..

-چا استخدم مصطلحات صحيحة عيب تگول تنتفيني

-ليلة انتِ اكثر بشر مستفز شايفه بحياتي كلها

-ادري بروحي شكراً

-ما تستاهلين واحد يخاف عليج تدرين؟!

-ادري

-وراح يطيح حظج لو بقيتي على سوالفج هاي تدرين؟!

-ادري

-وراح انعل والديج اذا بقيتي تكولين ادري تدرين؟!!

-ادري

-لييييييلة

-شنيي شني ليلة وليلة كرهت اسمي والله كرهته

عافني وراح يوگف بعيد عني شگد اضوج من نفسي من احاجي بهالطريقة وانا اعرفه متلهف عليَّ وخايف يعوفني وحدي بمكان كله زلم، ظليت اباوعله واكف ويلوب ويتأفأف متضجور..

-ابا الحسن

دار وجهه الي بدون لا يحچي، گمت اوگف مقابيله ضبط وگلت بأستفسار..

-انتَ ليش ما تكرهني؟

-لاني مطي!

-هاا

-ااااخ يا ضيم گلبيي

-لا لا صدگ احچي.. شوف حسونات الحبابات اريد اگلك شي

-ليلة انتِ تردين تنكتلين؟ صارحيني بوية تره انا ما اقصر

-اهوووو ما يخلي البشر يسولفون وياه واليكتل يحچي علينا

-غردي

-سمعت اخوك امير وعمة رسمية يحجون ان تَـمني جاي يصير وياهة اشياء غريبة وعلى اساس تهلوس ومن هالسوالف التعبانة مال مزعطة.. بس يعني مو تَـمني زعطوطة السوه بيها هيج زعطوط وعلي لو اكضه الا ازوعه حليب امه وانعل امه على ابوه هالخايس المگطن الـ..

-الزبدة؟

-اي المهم، شوف انا ما متأكدة من كلامي بس راح احجي الي اتوقعه

-شني تتوقعين؟!

طفرت من طلع الامير من وره ظهري ووگف بصف اخوه يباوعلي بلهفة، مادري شمالني صابتني الرجفة وبهتت ما كملت توقعاتي..

-الامـير علي: احجي ليلة شنو تتوقعين؟!

-ليلة: تره ما جنت اتجسس مو عبالك بس اجيت اشرب ماي وسمعتكم

-ابا الحسن علي: احجي بوية شسالفة غريبة انتِ قابل

-ليلة: اظن اظن والله اعلم.. ان جاي يخبطولها شي بالاكل وما توقعت هيج بس لانك كلت لامك على مطارة العصير انا اتذكر بالمزرعة من رحنا صار ويه تَـمني هالشي على مرتين

-ابا الحسن علي: شصار

-ليلة: اول مرة چانت تهذي گامت من مكان نومها ونامت بصفي وكررت اسماء ماتذكرهن شني بس اسم عاصف اتذكره واسم عمة غزوة

-الامـير علي: خ** بروووح عاااصف ولللللك لييش تهذي بأسمممه

-ابا الحسن: امير اصبر خلينا نفتهم

-خبلتنييييي عقققل ما ظل براسيي هالخايييس لييش الاا هوو تسولف بي!!

من گدما عصبي خفت اكمل سكتت ووگفت على صفحة ولولا ابا الحسن مهدأه وحاچي وياه حتى يصبر وينطيني مجال احجي چان بلعت باقي الحجي وما گلته..

-ابا الحسن: كملي ليلة شصار بعد؟

-وراهة گامت للحمام وظلت تتقيء هواي، البنات چانو نايمات وانا ظل بالي عليها ورحت وراهة لگيتها گاعدة بالگاع وكاضه بطنها وتبجي

-ابا الحسن علي: چا ليش ربطتي الصار بالاكل؟

-ليلة: لان اليوم كله ما چان بيها شي من رحت انا جبت ببسي مدري چاي ماتذكر شني شربنا بوكتها بس متأكدة انا الصبيته بيدي تَـمني هيج تخربط حالها

-ابا الحسن: يجوز مو من الببسي بما انچ تگولين انتِ صبيتي بيدج قابل انتِ تحطيلها شي بالمشروب؟

-ليلة: لا لا مو هيج قصدت بس انا من صبيته صاحتلي عمة سلوى رحت اشوف شتريد وعفت الببسي بالمطبخ اظن حطوا بي شي من عفت الصينية هناك

حطيت اصبعي على گصتي عود شوفوا تحليلاتي وتفكيري الذكي بس ابا الحسن مو ابا الحسن اذا ما فشلني وكسر جناحاتي النافختهن وگال..

-ابا الحسن علي: ليلة كل الموجودين ببيت المزرعة من گرابتنا ياهو يفيده يأذي تَـمني

حركت اكتافي بطريقة "بكيفكم" بس انا ما يهمني ابا الحسن يصدگني المهم الامير ينتبه ولاحظته سرح يفكر لان الي شفته ببيت المزرعة وحالة تَـمني وخربطة وضعها شي مستحييل يكون طبيعي وعلى يومين تكرر هالشي يوم وحدنا بالغرفة ويوم راحت تمشي لاسطبل الخيل..

-الامـير علي: ابا الحسن انا رايح لبغداد عندي شغل عينك على تَـمني ولا تخليها تاكل شي من البيت جيبلها من بره كلشي

-ابا الحسن علي: ولك عريس انتَ شون تعوفها وتروح هيج

-مهم ابا الحسن والله ما جاي انام ليلي محتاج اروح واريح گلبي، خلي عينك عليها اخيك

-واذا عبالها انا انتَ وتحصرني

سمطه امير براشدي شعل خده فطست ضحك عليه هذا عصبي نار وذاك مستهتر ويضحك، عافنه الامير وراح يدردم على ابا الحسن ويسب بي..

-ليلة: خاف يروح لبغداد ويخونها هناك ولك حسون؟

-لا ولج مو هيج اموري

-شو مادري شلونكم انتم تخوفون

-وصمخ منيلنه سوالف نسوان احنه

-چا انتَ مو لاطشلي شني مو مرة انا

-صخلة انتِ وينج وين النساوين

-شوف شوف شون يحاچيني ويگول انا حقيرة والله ماكو غيرك حـ....

خزرني وانتبهت ردت اچفص وياه، تأفأفت ولبست الجنطة على چتفي وگلت من وره خشمي..

-ردت اگول ماكو غيرك حلو

-ادري بروحي حلو

-اي خوش خوش.. اگلك حساني اريد اصير محامية فدوة حاچي ابوي اكمل دراستي

-تزوجيني واخليج تكملين دراستج

-ووويع ماريد تراجعت

-قزرقط مو صوچچ صوچي انا البطران اريد اتزوجچ خاطر تكملين دراسة

-عوفك من الزواج، حباب اريد عصير احسني دايخة مادري شبيه

-صبر اشوف هذا ياهو يتصل

-شوف شوف يفضل الموبايل على بت عمه الفقيرة العطشانة

ضحك وحط ايده بوجهي يسكتني بدون لا يلمسني، ابتعدت عنه اوگف على جهة خاطر نرجعلهم سوه وما يفضحني لان عفته ورحت وحدي، فتحت جنطتي طلعت منها چكليته لان صدگ دخت يمكن من الخرعة على عبيقة سكري هبط، حطيتها بحلگي ودرت وجهي على ابا الحسن وگلبي نغزني من جحظ عيونه وصرخ والرعب مآكل صوته.......

يتبع 👑.....

━━━━━━ ♛ ━━━━━━

الجمال لو تشكل فـ راح يكون الامـير علي وتَـمني ذااايبة بهالثناائي اني 🙂‍↔️💋🔥

رسمية بهالبارت زعلتينا منچ ايييي والله زعلتينا 🥲

عبق المگرودة وعلي الحق العنوودي جدااً 🫢

شنو تتوقعون امير رايح لبغداد يسوي 🤔؟

توقعاتكمممممم 👀🩷🩷🩷🩷🩷