الامارة الفصل التاسع وثلاثون 39 - بقلم 𝐙 𝐇 𝐑 𝐀

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

انا العايش على عيونك.. انا المايدري وين يروح من دونك ♥️!

━━━━━━ ♛ ━━━━━━

-انتِ تخبلتي رفل تخبلتييي!!

-رفل: لا تخبلت ولا شي انتِ المخبلة الكاتلة روحج على ارمل وعنده بنات ثنين

-حبيبة: عمي ماريد مااريده بعد بهالطريقة ماريده!

-ليلة: بس فهميني شلون اقتنع؟ منتصر دكتور يعني دارس وفاهم ومثقف مو زعطوط تجيبه وتودي حچاية

-رفل: بعدني ما قنعته بس گال راح يفكر بالموضوع

-حبيبة: صخااام ولطاام بوجهج يا حبيبة راح تعادين اخوتج ويه ابن عمهم ياا حبيبةةة

-رفل: لا يتعادون ولا شي ومنتصر مو اكيد يسويها هو صح انا گتله النهوة شي وقتي ويگدر يفكها وره يومين من الخطبة وتنتهي هالسالفة وما يتأثر ولا انتِ تتأثرين بشي حالچ حال الااف البنات النهوا عليهن ولد عمهن من اجه غريب يخطبهن

-حبيبة: احنه مو هيج رفل!! ابوي ما يرضى لا بالنهوة ولا الفصلية لان ثنينهن حرااام وتقلل من قيمة البت واهلها!

-ليلة: چا مو ابا الحسن نهى عليَّ

-حبيبة: ليلة ابا الحسن نهى عليج منا فكها مناك ما طول ساعة لان يدري بأبوي ما يرضى وراح يجيبله وجع راس اله اول ماله تالي وبالاخير ينجبر يفكها

-ليلة: هم صح

-رفل: حبيبة انتِ ليش ضايجة؟ خلي هسة راح تبين اذا هو هاويچ لو ما مهتملچ خليج مرتاحة وحطي ايدج ورجلچ بماي باردة

تحچي ببرود ولا خايفة ولا چن راح تصير طرگاعة لو نهى عليّ منتصر اووف منج يا رفل شگد گوية عين.. عفتها ورحت اگعد وحدي اتصفن وافكر شني تاليتها؟ منتصر صدگ ينهي عليَّ ويعادي ابوي واخوتي لو ما يجازف بعلاقته بيهم؟

تعبت من الفكرة وجسمي كله صار يرجف، جريت بطل ماي اشرب ونصه تبده عليَّ من الرعشة، سديته وحطيته على جهة والافكار تروح وتجي بعقلي.. گوة كاضة روحي ماروح اسولف وياه واگله ما عليك من رفل هاي ما تعرف عواقب فعلته شني بس من اتخيل يجوز بسبب عملته نهايتي اصير مرته وببيته ابرد واسكت..

نفضت عقلي بلكي انسى وطلعت موبايلي اگلب بالاشعارات مال صديقاتي، امي ما خلتني اكول لاحد اجيت للشمال تخاف من العين بس حور گلتلها وفتحت رسايلها..

"حور: ها الگاطعة شو ماكو"

"ملتهية والله.. شلونچ خية"

"ضايجة بدونج"

"يله كله يومين ونرجع ان شاء الله.. بشريني بس لا العصبي هم تعارك وياچ من رجعتوا للبيت؟"

"ههههههههههههههه"

"شو تضحكين"

"ما تعارك هههههههه بالعكس"

"چا شسوه؟"

"گالي حور هاي حبيبة شگد وكحة عبالك امير ودا اسولف وياه الفرق بس هاي بنية وصوتها ناعم وجميلة كلش"

فكيت حلگي اتخيل الجملة بصوته خرب عرضج حور ولا عدها بريك وكلشي تسولف ما تهتم..

"اخوچ السلنگح ما يستحي شون يعاين على اخت صاحبه"

كتبتها مبتسمة شافتها وما جاوبت حسيت چفصت وخاف تضوج عبن گلت عليه سلنكح بس صدمتني من كتبت..

"ههههههههه يگول لعد اغمض عيوني"

"ولج كلتيله؟؟؟؟"

"كاعد بصفي والله هو شافها اني معليه"

"خايبة شبيچ لا تخلين اخوج يقرا محادثتنا"

ما جاوبتني كتابة دزتلي بصمة فتحتها وضحكت من سمعتها..

"حبيبة اني شعليه هذا حاكم فضولي ومو اگوله لا تباوع بتلفوني يگول اخاف عليج من صديقات السوء"

"وانا صديقة سوء؟"

رجعت جاوبتني بصمة بس هاي شوي طولت بيها، فتحتها وشهگت من اجاني صوت حاكم يگول..

-صديقة سوء لانچ تعليمها تخبي على اخوها ليش ام بجامة المطي ليش هيجي؟ مو اني اعرف اخوج حباب وخوش رجال ويحبني انتِ شبيچ شايلة سيف عليَّ وتتعاركين كلما مريت من يمچ

-حور: حاكمم عوفها كافي

-دزي البصمة حور

-ما ادزها عيبب

-دزيها دزيها

-ماا ادز

-جيبي اني ادزها

وخلصت البصمة واندزت الي، كتبتلي حور وراهة بسرعة..

"اسفة ما سيطرت عليه مو هو عصبي"

ضحكت على سوالفها وضميت موبايلي بجيبي ورفعت عيوني على صوت رقية وسكينة بنات منتصر جاياتني يركضن وبيدهن تفاحات معضعضات، ابتسمتلهن وفتحت ايدي هالسفرة صايرات يحبني فديتهن..

-حبيبة حبيبة حبيبة

-ها يا روح حبيبة

-رقية: ابوي يگول.. يگول.. يگول اءء يگول.. نسيت

-حبيبة: هههههه يلا چا ختولي

-سكينة: لا لا ابوي يدول من نرجع للبيت سبحينا ميخالف؟

-حبيبة: من عيني هاي گبل هاي غير تدللن عليّ

-رقية: اي صاح هيچ گال.. لان عمة ماكو انتِ صيري بدالها عادي؟

-حبيبة: طبعاً عادي

-سكينة: بس شلون

-حبيبة: شنو شلون؟

تقربت مني وهمست بأذني وطبعاً ترستني تفال بس ما اهتميت للتفال بگدما اهتميت من كالت..

-سكينة: عمة هدية تدول حبيبة مو حبابة وما تحبتم (تحبكم) وانتم لا تحبوها ديربالتم (ديربالكم)

-حبيبة: هدية هيج تعلمچن؟؟

-سكينة: اي تدول عنچ مبتوته

-حبيبة: شنو مبتوتة؟؟

-رقية: يعني مبخوتة

فكيت حلگي مصدومة وهنه وحدة تباوع للثانية ويهزن بروسهن، شگد ردتهن يحجن بعد ويسولفن عماتهن شني يعبن براسهن بس قفلن ما قبلن يحچن شي اكثر وبقن يعضعضن بالتفاحة..

شگد ضجت وحزت بنفسي ليش يعبن براس جهال صغار وهسة عبنهن ما موجودات بساع حچن ونسن توصيات عماتهن.. ماعرف ليش بنات عمي مرتضى الوحيدات من بنات عمي ما يحبوني ودومهن يبسمرن بيه خصوصاً هدية وصفا يكرهني كره العمه واكثر من مرة سمعتهن بأذني يحاچن عماتي عن دلال اهلي الي ويگولن لا تنطوها عين زايد لا تكسر وجوهكم بعدين..

**

-رجلي ااه رجلي

-وين توجعج وين؟

-تَـمني: هنا شوف هنا اووي ورمت باوعلها

كف شوية من البنطرون ومغطيني بكل جسمه مع العلم احنه بختلة ضامتنا شجرات صغار ومصطبة، تلمس رجلي بأيد ومركز بكل حواسه يقارن بين رجلي اليمين واليسار..

-تَـمني: اكو ورم مو؟

-لا

-لا اكو!!

-ماكو نوومه الحمدلله يعني ان شاء الله مو شي خطر

-خطر واتوقعها كسر

-لاا خالوو كسر شني

-امير متوجعة

-يا بعده شبيدي عليج

عصرت عيوني اريدهن يدمعن بس يربي ماكو مدا تنزل الدموع بعد بردت، ماعرف شجاني وشلون اجه على بالي اكول رجلي انلوت بس من انتبهت عليَّ سلوى عيوني وره الامير ورفل وبدون لا احس الدموع تنزل ميتة من القهر اخترعت وسألتني شبيچ گدام الكل وما اجه ببالي غير جملة "رجلي انلوت" وطگيت من البچي وراهة مفرفح گلبي..

گام جاب بطل مي بارد كلش وحطه على رجلي يعني فوگ برودة الجو ورطت روحي برجل ملتوية ولازم اتحمل برودة مضاعفة عليها حتى ما افضح روحي!

-تَـمني: يووجع ماريد ماريد

-لازم تَـمني خاطر ما يصير تمزق

-لا ميصير نحطلها شي بارد مو زين امير وخرها

-لا عليج علي؟ هاي وانتِ اختصاص رياضة ما تگليلي شتسوين من ترحين للجامعة

-احط حمرة حمرا واصور

-خرب راسج وراس حمرتج

-عادي المهم صوري تطلع حلوة

ذب حسرة يدردم معترض على تفكيري وثواني ورفع راسه خازرني، هزيتله راسي بمعنى شبيك وفاجأني من گال..

-انتِ تطلعين من البيت بلا حمرا! ترحين هناك تحطيها؟؟؟

-هاا

-وجعاا

-لا تعصب حباب، اصبر وافتهمني امير

-امير لو صبر عليج بعد شوي يزين شاربه ويگعد يم امه!

-احس دتهينني بطريقة مبطنة فـ اذا زعلت لا تكول شبييچ

-واذا نتفت شاربي اليوم لا تكولين ليش ملطت روحك

-تملط روحك علمود حمرة حمرا؟ مع الاسف عليك شيخ المستقبل شلون تكعد بالديوان بشوارب محفوفة

عطت من لزم راسي يخضه ويودي منا ويجيبه منا وصار يضربني كلات خفيفة ويرص على اسنانه متحلف..

-وولج انتِ وووولج

-راسي راح ينگطممم

-ما ينگطم وارتاح منج

-الله وماكو بعد تَـمني بحياتك

-سكتي اشش

-لا تأشأشني

-سكتي ولج

-ليش تسكتني

-هسة غير تنلصممم

-عيب تلصمني

لزم شفايفي بين اصابعه يطبگهن وحدة على الثانية وخزرني عود سكتي، حركت چتافي بمعنى ميهمني ووخرت ايده من حلگي وسندت ظهري على المصطبة..

-بعد ما اخاف منك

-لا صدگ

-والله اصلاً متسويلي شي حتى من اضوجك

سكت يتنهد وسند ظهره يگعد بصفي، طبگ رجل ومد الثانية واخذنا الصمت محد بينا حچى شي لا هو ولا اني.. كل دقيقة تمر اگول هسة يگول شي بس ماكو مرت اكثر من عشر دقايق وهو على وضعه ما تحرك ولا فتح حلگه..

-احم

حمحمت اجذب انتباهه واشرتله على رجلي وگلت بتردد..

-رجلي توجعني

حرك راسه متفهم وگام من مكانه، رفعت راسي اشوف شديسوي ولزمت بيده بقوة من لاحظته راح يروح ويعوفني..

-وين رايح

-اجيبلچ شي اللف بي رجلچ

هديت ايده وراح مبتعد عني، اوووف تَـمني لازم تلگين حل تكسرين البرود المحاوطكم مو برودة الجو لاا برود مشاعركم بس شلون؟؟

گعدت اعصر بعقلي افكر شسوي وشنو ممكن يجذبه؟ كلام حلو؟ لا لا اني فاشلة كلش بهالشي وبس احط عيوني بعيونه اظل اچفص واخربط تخربط فـ نستبعد هالفكرة.. زين اسولفله شي يونس؟ مثلاً شلون زوج نرمين صديقتي اخذها سفرة للعمرة ومن راحوا هناك بلغته هي حامل؟ لا لا هسة يگول هاي تسمعني تريد تسافر وبس تريد تستغلني.. زين اگله...

-هاي جاروبة مال امي طولها سبعين مترة بلچن تفيد

لصمت افكاري ويه رجعته، نزل يگعد گبالي وبيده جاروبة سودة ثخينة وطويلة كلش متنعرف جاروبة لو كالون هاي.. اخذ رجلي بين ايده ولف الجاروبة عليها الله شعور يجنن ورجلي بدت تدفى..

اللتهى يلفها ويرتبها شلون الباندج وانتبهت لاصابع ايده صايرات زرگ من البرد ومن بطل المي البارد شگدما ظل لازمة وحاطة على رجلي، گلبي وجعني وكفختني مشاعر حنونة وماتحملت ما ابوسه على خده دليل الامتنان وهم بلكت نتصالح..

تقربت منه منصية اريد اسويها مفاجئة اله وبنفس اللحظة هو ديرفع راسه الي وانضرب راسه بخشمي شاااطت روحي من الوجع وعطت بصوت معزايات..

-خشمييييييييي

-خرررب ولج مادرري بالعبااس مادري شكووو حاطة وجهج يم راسيي

-ااااااه راح امووت دا انزززف داااا انزززززززف

-صووتج ولج صووتچ

-نزززززيف ددددم كل مكااااااان

-انفضحناا يالكاظم انفضحناا يااا عليييي

ما اعرف شديسوي وكلشي ماشوف ضربة خشمي اثرت على نظري وعيوني تزخ دموع وبس اشوف دم ينزل من خشمي، حسيت بي يحط شي على وجهي ويخنگني حيييل النفس گطعه تخبلت وظليت ارافس دفعته عني اعيط..

-راااااح اموووووووووت

-تَـمني بسس صوووتج

-خوية شصاير هنا ان شاء الله خير؟

فتحت عيوني ملصومة ويه صوت زلم ثنين اجه من ورايه يحاچون الامير، اشوف وجه امير انگلب ازررگ وگوة يجاوبهم شاد على اعصابه ويمسح على گصته عرگان..

-الرجال: هذا دم دينزل من وجهها؟ خوية محتاجة مساعدة؟

-الامـير علي: خالوو ماكو شي جاي اگلك خشمها طگ دم مابيها شي

-الرجال: اعذرني خوية شفت رجلها ملفوفة وملابسها ووجهها كله دم وسمعتها تحجي عراقي واخذتني الغيرة عليها

-معذور ورحم الله والديك

عافونا وراحوا وامير لو اطخه ينفجر عليَّ ويطيح حظي هنا فـ قررت ابلعها واسكت لا انفضح بالزايد.. طلع كلينس من جيبه وحطه بحضني اخذتهن ومسحت خشمي المدا يوگف نزيفه انخبصت وانترست دم ماعرف شسوي..

-رفعي راسج

خفت ارفعه سامعة هالشي مو زين فـ بقيت منصية وامسح بي، ماتحمل ينتظرني اكثر ولزمني من فچي ورفع راسي غصب وضغط على خشمي بالكلينسة ويستغفر طالعة روحه..

-شجاچ ما تگليلي شجاچ

همهمت متوجعة ومقهورة ليش مدا تضبط ويانه وتخرب بكل مرة؟ مو حالة هاي تره ومادري ليش عقلي راح لغير مكان وتذكرت يوم العقد مالتنا..

-امير

-نعم

-سحر المحبة دينگلب ضدنا

-ااخ يا تَـمني

-احنه بعدنا متزاعلين؟

نزل عيونه عليَّ ورفعت عيوني اله ابتسمت بين دموعي تحرگني وما بطلت تدمع، لزمت ايده الفوگ خدي وهمست بخفوت..

-خلينا نرجع اصدقاء

-خ** على الاصدقاء

-لعد نرجع اخوان

-تَـمني سكتي لا تجلطيني سكتي

-يااا لعد شتريدنا

-انا زلمة ما تمشي وياه اصدقاء ونعولة غير الحبايب ما اريد

سكتت وكالعادة مثل الغبرة لساني لو ينبلع لو يظل يچفص مثل الغبية..

-بردت

-وبردتتهمم

-امييييير

وخر مني جزعان ونزع جاكيته وحطها فوگاية، گعد بصفي منفس ورغم الاجواء يمنا متوترة بس ماعرف ليش ضحكت على وضعنا.. اني كاعدة ملوية رجلي بالچذب وخشمي يبس الدم عليه ولابسة قمصلة رجالية شكبرها وهو گاعد بطرگ البلوز ابو رگبة الجوزي وراح ينفجر من الضوجة..

-تَـمني: هههههههههههههههههه هههههههههههههه

-تضحك الفاهية

-ههههههههه امير انتَ ملاحظ شي

-ماريد اللاحظ أي شي

-اووووي امير هاي شبيك منفس

-فشيني بطريقتج

-اوكي

تقربت منه وبحركة سريعة بسته بخده ورجعت لمكاني اضيع عيوني عنه مستحية، عضيت شفتي اللعب بأظافري وافرك بيدي متوترة من ردة فعله ومنتظرته شنو راح يگول بس ما گال لان بنفس السرعة البست خده بيها لزمني من وجهي وباسني بنفس الطريقة وطول بيها لدرجة جسمي كزبر من شمني ونزل يوزع قبلات خفيفة على باقي وجهي..

-اشتعلت روحچ الحارمتني منچ

گلبي ينبض بجنون والنفس بده يضيع مني خفقان قوي تعبني وقربه الي اخذني لغير عالم.. لوما هو منتبه لمكاننا ويخاف لا احد يجي ويشوفنا ومبتعد چان اصلاً نسيت اني وين..

وخر مني يمسح على لحيته وشواربه وغمض عيونه يهز براسه محترگ، تحسر يزفر نفس قوي ودور على الڤيب بجيبه بس القديمة عند رفل فـ طلع وحدة جديدة من الباكيت وقبل لا يحطها بحلگه لگفتها من ايده واخذت منها نفس..

فتح عيونه مصدوم من حركتي واني مصدومة من نفسي بعدها ما مشتغلة ومابيها دخان ما اختنگت بس تصرفي چان متهور وما فكرت بي بس ظلت بنفسي اسوي هالحركة وسويتها اخيراً..

-ايا بت الـ... الحلو!

-بنفسي اجربها شيخي

ضحك وبعده فاتح عيونه متفاجئ، استحيت من نظراته واحترمت نفسي ورجعتها لحلگه جر منها نفس وهي بعدها بيدي، انتظرته يزفر الدخان بس بلعه وطلعه من خشمه..

-لك اوووف

فكيت عيوني مصدووومة من كلمتي وهو هم طگها بضحكة عالية كللش عزا العزااني على هالجرأة! لا لا اني ماكدر ابقى كاعدة هنا اكثر راح انفضح.. گمت من مكاني اركض بعيد عنه وهو يصيح عليَّ..

-ولج چاا ورجلچ!

-هاا هاا تذكرت آآآآيييي رجلي

-ايا ملعوونة

-رجلي امير اوووي ماكدر امشي ماكدر

-رجلها ام الكلاوات ما تكدر تمشي سوودة عباة امي

بقيت امثل دا اعرج وفلتت منه بالعة ضحكتي اختنگت، رجعت يمهم والكل انخبص بيه شلون صرتي وشلون صارت رجلچ والامير يباوعلي ومضيگ عيونه..

-تَـمني: اي متت وجع بس بعد قدر وصار الحمدلله

-حنين: شجاچ ماما الحمدلله والشكر من عدت على خير

-زهرة: عوينة خيتي اجتكم ووگعت بالفرخة سودة عليّ

-حنين: اي والله يجوز

-الامـير علي: من نرجع ذكريني ابخرچ امنية

-تَـمني: عن الحسد؟

عض على شفته ونصى عليَّ يسوي روحه يريد ياخذ بطل المي الي بصفي وگال بصوت ناصي..

-خاطر ما تنحسد صلافتچ

-اميرررررر

-خايبة انا همستها همس وانتِ فضحتينا

-ابتسام: ههههه شعدكم ولكم هاا تضمون علينا موو

-علي الكـرار: اگلچ يوم..

-رسمية: بالعبااس يا كرير لو كلت زوجيني هسة ادچك بهالسچين

-فراقد: اسم الله على الوليد رسمية شمالج

-رسمية: اي والله مادري شصابني اسم الله عليك يبعد امك تعال حبوبي بحضني

حضنته وبوسته وقرت على راسه وشالت السچينة وضربتها بالگاع ثلاث مرات وشمرتها بعيد، فروا بيدهم باقي الولد وعلي التقي گال..

-يمة لا تخافين على حبوبچ العار عرج ما يصيبه

-زهرة: اسم الله عليكم يمة لا تحچون هيج

ظلوا الولد يداهرون بعماتهم و گعد امير بصفي، مد رجله وعگد حاجبه يسوي روحه متوجع..

-اااخ اااخ رجلي ااخ

-تَـمني: لا تقلدني يا مقلد

ضحك خفيف وگال بغمزة..

-هاي بعد نحب نقلد الحلوين

-على طاري التقليد انتَ منتبه لملابسنا

نزل عيونه مستغرب باوع للبلوز مالته وباوع لملابسي، هو لابس بلوز رگبة عالية لونه جوزي واني هم وفوگاه لابس هو قمصلة جلد سودة واني لابسة جاكيت طويل اسود..

-يا مقلدة

-هاي بعد احب اقلد العيونهم چقل

ضحك يرجع راسه ليوره وضحكت على ضحكته اضم وجهي بقمصلته، ما انتبهت بالكل مركز ويانه الا من صوفروا سور ونور وحيدر الي حچى بيناتهم..

-حيدر: عمي امير مرتاح يم بعض الناس وبس يمي عاگد نونته

سكت امير عن الضحك يمسح على وجهه ويعدل حواجبه مغلس على نظرات الكل، رجع گال حيدر بأبتسامة لواگة..

-عمي چا ما تضحكنا وياك

-علي الدر: انتَ شني ولك شكو مدخل روحك بيناتهم

-حيدر: بوية مو روحي طگت انتَ سفرتني علاج وعمي امير اجه وياي وگضاهة بس معصب ويتعارك ويه الممرضات

-علي التـقي: يتعارك ويه الممرضات ليش؟

-حيدر: يردن يساعدني ابدل ملابسي وهو ما يرضى هسة يا عمي انتَ لا ترحم ولا تخلي رحمة الله تنزل علينا

-علي الكرار: لا امير لااااا ما حبيناها منك

-علي النور: ليييش تگطع سبيل المعروف اموري صدددگ چذب انتَ التعلمنا على المساعدة

-حيدر: اي بعلي وشون چانن مؤدبات عمت عليهن يشگن الراس شگ

-علي الكـرار: مؤدبات ويشگن الراس شگد ما يتناسبن بجملة وحدة حويدر

-حيدر: يتناسبن والله شني السالفة لو شتكولين يوم؟

-ابرار: بكيفك يمة

-حيدر: اي هذا هو يتناسبن

-علي النور: اشرحلنا عنهن اكثر حيدر يعني شني گالن شون يحچن

-علي السور: انا اسولفلكم.. طبعاً هنه شني شگر حمر والعيون زرگ والوجه چركاية والخد گيمر عرب والايد...

-علي التـقي: انتَ جاي توصفلنا لو تجوعنا؟

-علي السور: اي والله يا خوية هناك معمل كيك وكله يحچن وياك هلوو مستر وهلوو سير

-علي الحـق: اكيد چان قصدها سير نعال مو؟

-حيدر: بالضبط نعم صحيح

-ابرار: ههههههه

كلناا اللتفتنا على صوت ضحكة ابرار ولا ارادي انرسمت الابتسامة على وجوهنا، صار اياام مفتقدين صوتها وضحكتها ابرار موجودة بس مموجودة بس هسة فعلاً حسيناها ويانه ومنتبهة لابنها شديكول..

دمعت عيوني على علي الدر شلون يباوعلها وفرحاان ومكيف على ضحكتها صار يوزع ابتسامات للهوا والله تمنيت انبهه واراويها شلون سعيد لانها ضحكت وتبطل تشكك بحبه الها..

-علي النور: وعلى شرف ضحكة ابرار يگول ابو شادي الزبنطوطي الضحكة الحلوة ما تجي الا من حلگ ........ لا لا بطلت ما اكمل لا يكتلني علي الدر

-علي الدر: لا كمل

-لا ما اكمل

نزع حذائه علي الدر وگام متحلف..

-علي الدر: بعلي الا تكمل!

-علي النور: وعلي ما اكمل وقندرة فوگ ابو شادي الزبنطوطي الصايع

-علي الدر: اليوم قندرتي اگطعها علييك وعلى ابو شاددي البر****

فلت نور يركض وعلي الدر شال حذائه وشمره وراه بس ما لاحه، ضحك علي النور فرحاان وصار يدبچ ويرگص بمكانه يضحك ويهوس لروحه على هالانتصار..

-علي النور: كلللووووششش مااا لاحني وكللوووش ماا لاحنييي

گامله شيخ علي يصيح عليه فضحنا بين الناس صارت الدنيا كلها تباوعله ويضحكون وعلي السور يسويلهم حركة "اهدوأ" بأيده ويگول..

-ميخالف ميخالف عذرونا عنده مرض اسمه طيف التوحد الالنگي عمت عيني عليه هواي تعبه

وتجاوبه وحدة من العجايز الگاعدة على بُعد عننا..

-ياا يمة شون شاب خطية ما تشوفوله چارا

-حيدر: والله خالة عمي امير حاول يگشرها بس ما رهمت بلچن ياخذه لشريفة بت الحسن دخيل اسمها عسى يثگل شوي ويرجع ادمي

-فدوة لاسمها اي يمة لا تخلونه هيج

انهارينا من الضحك البنات صارت وحدة توگع على الثانية انوب العجايز مصدگات ويگولنله شلون يگشرون عقله وعلي السور گعدلهن ركبة ونص يفهمهن هذا مرض العصر الجديد..

-علي الحـق: ههههه شگد ادبسزية ذولة

-تالة: هههههه اني بس شغلة وحدة لاحظتها ان من تعاقبوهم لو تتعاركون وياهم ميزعلون بالعكس يضحكون ويلزگون بيكم اكثر

ضحكوا الولد يهزون براسهم وجاوبها علي البدر..

-ماكو زعل بين الخوان واحنه نداهرهم عبنهم بزر گعدتنا ونتونس على سوالفهم

-علي التـقي: سور ونور ولدنا ربوا على ايدنا لحد هسة اتذكر من امي گالت حامل بسور علي الحق شسوه هههههه

-علي الحـق: اسبوع انا هاج من البيت استحي أعاين لوجهها

-علي الكـرار: وختمتها من حبلت بـ علي النور گعدتنا من النوم تلطم و تزلغ بخدودها وتگول گعدو ولكم گعدوو امكم الغبرة حاامل گعدوو

-علي البـدر: الله لا يعوده ذاك اليوم ابا الحسن شوي وينجلط والزهرة

ضحكنا كلنا وعبالي ديتشاقون بس طلع صدگ ابا الحسن تخربط من الخبر ونقلوه للمستشفى يركضون بي يگولون ارتفع ضغطه وبوكتها زاعل امه ميحچي وياهة..

-رسمية: ويلادي شبعوني رزايل بوكتها طايحين الحظ

-ابا الحسن علي: يوم چا سور مشكل بصدرچ وواحدنا زلمة خاطة شواربه وتجينا تگليلنه حامل مرة ثانية شني منتظرتنا نهلهلچ؟

-فراقد: چا فايخة شني على گلبها امكم گاعدة ومترندحة وتزق بهالويلاد واحد وره الثاني

-ابتسام: شلون ويلاد جابتلنا فدوة لطولهم وشهامتهم عاشت ايد الربتكم يا يمة والكبرتكم.. طلبكم ابوكم من علي ورادكم تمشون على نهجه سلام الله عليه

-علي التـقي: بعد روحي عمة

-شيخ علي: اااااخ ظهرري ااااخ يا بوية ظهرري.. درر بدددر

فزينا على صوته وگاموله الولد كلهم يركضون يشوفون شبي، رفل عوجت حلگها وهمست بيناتنا..

-ما عدت دقيقتين وطگو ابو الويلاد عين شلت ظهره

-عبق: فاطمة بت عمة زهرة فد دقتنييي

-تَـمني: شسوت؟

-عبق: موتتني من البارحة لليوم تبسمر بيه وتگول گليلنه عد منو سويتي السحر واخذتي علي الحـق هي تحجيها بالضحك بس هاي خامس مرة تعيدها عليَّ

-ليلة: ختولي هاي خية عينها ضيجة عكس امها

لملمنا المكان ورجعنا للسيارات وره ما ارتاح عمو علي شوية خطية صار عنده تشنج بظهره وتأذه بسببه، رجعنا للڤلة وطبينا ويه صلاة المغرب بسرعة الكل راح يتوضى ووگف عمو علي يصلي بينا جماعة.. وگف ليگدام وولده تسعتهم وعاشرهم حيدر على الكرسي وراه وباقي النسوان خلفهم..

ابتسمت من كملنا صلاة المغرب والولد صاروا واحد يصافح الثاني بدوا من شيخ علي وعلي الدر ونهوها بين حيدر وعلي النور وكلهم بدوا يسبحون بيدهم ويه ابوهم حبيبة گالت اسمه تسبيح الزهراء..

تنهدت مرتاحة وبدون لا احس حطيت راسي على كتف حبيبة وجريت ايدها لحضني، نزلت راسها الي وهمست..

-ها معتي؟

-هممم

-خية موعي على اخوي مو عليّ لا تتيهين

-عابت

وخرت منها وگمت اكمل صلاتي نسيت الجماعة وبعد ماكدرت اگطعها ظليت واگفة هيج بيناتهم چني شمعة فگر والكل يتفرج عليَّ واسمع حيدر يسأل كرار..

-حيدر: اگلك اخواننا ما يتعبون من يچتفون بالصلاة؟

-علي الكرار: والله مادري ما مجرب اسأل تالة

-حيدر: تالة لو عمة ههههههههههه

-تالة: متضحك تره.. ولا منتعب

-علي الكرار: عذرينا تالة هذا هم لاحه طيف التوحد اللالنگي

ضحكت تالة واني بقيت اصلي حتى ماعرف شدا اكول من الخجل يمكن حتى شيخ علي ديباوعلي هسة ويحسبلي ركع..

كملت شلون مچان وركضت للغرفة بينما همه كملوا صلاة العشاء جماعة، اخذت منشفة ودخلت اسبح كملت بسرعة خاف يخلص مي الحار وغيري يريد يسبح وطلعت ابدل..

لبست فستان اسود بينصل وسترة صوف فضفاضة توصل لنص الفخذ فوگاه سودة ومقفلة بأبيض، نزلت اللبس جواريبي الصوف الحمر ولفيت شال جرجيت اسود على شعري ولاا اسيطر عليه يظل يتمزلگ والكب مادري وين يروح.. مادري شوكت اضبط الحجاب مو بزعت روحي من روحي..

رجعوا البنات وهم اللتهن يبدلن راح نطلع نتعشا بمطعم راقي على ذوق سور ونور يردون مكان بي صاكات وطبعاً هم گاملهم شيخ علي يهددهم بعصاته وتخبوا بظهر الامير..

-عبق: تَـمني اريد مسكارا منج

-حبيبة: خاطر حق يملص عيونج كعدي

-عبق: هم صدگ واني مالي خلگ نتعارك اليوم وافرح فاطمة بت عمة زهرة

-تَـمني: بنات احد شاف وين حمرتي الحمرا؟ نفشت الجنطة نفش وماكو

-حبيبة: احاا انوب الثانية تريد تگببها اليوم وتجلط اخوي

-تَـمني: لا احطها خفيف اسويها طبيعية بس لان جواريبي حمر تطلع حلوة

-رفل: انا بحياتي ما شايفه حمرة حمرا تصير خفيفة هاي بس عد تَـمني

نفخت بوجهها وگمت ادور بالجنطة الجبيرة بس ماكوو مالها اثر، دورت بجنطة تالة خاف متخربطة وصايرة عدها بس هم ماكو طلعت من الغرفة ورحت للامير اطلب جنطته هاي اكيد حطيتها هناك اني من رتبت اغراضنا اليوم الظهر.. شفته گاعد بالصالة يشرب چاي ويسولف ويه ابا الحسن..

-امير تعال شوية حباب

صحتله على كيفي واشرتله يجيني، نزل الاستكان من ايده وگام يرجع موبايله بجيبه واخذته ويايه للمطبخ نحجي..

-ها تَـمني

-احم.. باوع بس مو تعصب تره سؤال عادي جداً جداً

-الله يستر من سؤالچ

-شفت فد شي لونه اسود وطويل واگع بجنطتك؟

رفعلي حاجبه مستفهم يربي شلون راح اگله حمرتي الحمرا يمك لو لا يمكن يشمرني من الشباك لو گتله..

-شوف هيج يصير قلم اسود ومكتوب عليه بالاحمر كتابة انكليزي

-ما شفت

-ها؟

-ما شفت، شني قلم اسود ومكتوب بالاحمر قلم جاف هو

-يوووه امير حمرتي الحمرا هاي

-ما شفتها

-احسك كذاب

-ما شفت خالوو ليش اجذب

-اوووف خربت كل الستايل امير كله من وراك ومن وره عرضتك

-انتِ لو تالة تعورت صحتي كله من وراك

-عوف تالة وگلي شنو اسوي هسة؟

-تَـمني

-ها

-انتِ ليش تافهة بوية؟

-حراااام عليك

صم حلگي بأيده ونتر بصوت ناصي..

-خررب صوتها ينوص وشعلوه

وخرت ايده مني وعفته اطلع من المطبخ ورجع جرني، باوعتله منتظرته يسولف شفته كأنه يريد يكول شي ومدا يعرف يكون الجملة..

-شنو شبيك

-هم راح تحطين هاي الخرابيط على وجهج؟

-يا خرابيط؟

-اقلام الجاف

-اكيد قصدك حمرة و اي راح احط بيجي شسوي

-لا بيجي شني چن مطلعيج من الگبر بكفالة

-لاا امير والله كلش يلوگلي اصلاً احلى لونين عليَّ البيجي النود والاحمر كل صديقاتي يگولن

-لا مو حلو وحرامات تخربين شكلج

-زين احط وردي

-لا وردي شني چن ماكلة علچ بوبي

-يااااا

-والعباس مو حلو

-لعد اخلي جوزي من هذا الـ...

-جوزي شني؟ ماكلة ككو وناسية تغسلين؟

-كافي امير خربت واهسي

-امنية ابوي انتِ ما تحتاجين لا وردي ولا احمر انتِ من الله حلوة وتجيبين التايه ليش تخربين وجهچ

-لعد التايه غير ادلي امير هم خطية؟

بعده ممجاوبني وفلتت نفسي منه وشردت اضحك، عفته يعيط ويهدد بصوت عالي بالمطبخ وحدة..

-بالعبااااس امسسحه لو شنيي يصير لونه احمررر اصفررر ينمسح يعني ينمسححح وبطريقتييي خووب ما يحتاج اعلمچ بيهااا

عفته ودخلت للغرفة على ضحكتي وسكتت بسرعة من شفت النسوان كلهن يباوعن عليَّ وسلوى تعوج بحلگها وتفر بيدها معاجبها العجب مادري شوكت يجي يوم وتنعجب بشي غير بنتها هاي.. قررت فعلاً ما اخلي حمرة هالمرة على گولة حبيبة خفت لا ينجلط وما ردت اضوجه زايد فـ تنازلت هالتنازل العظييييم!....

**

-طاااااح حظكم طااااح حظكم من خلفة انااا الله بلاني بيكم بلوووا الله لااا ينطيكم يا بيت عليي يا كفاار يا زنادديق ياا راعين الملاهي والحاتات الله لا يوفقكم لعبتوا بحالنا وكسرتوا ظهروناا

-سلطان: يمة تعبنا كافي رحمي بحالنا بسچ ما مليتي صارلهم اسبوعين من ردوا من الشمال وبعدج تنوحين

-صابرين: املن؟؟ لا بالكاظم ما امل واظل گومة گعدة ادعي على بيت شيخ علي وعلى ولدي المرعبلين!

-زيد: يوم جاي نگلج ما گدرنا نسوي شي الولد اربعة وعشرين ساعة محاوطين بنياتهم ما عافوهن ولا دقيقة ما گدرنا حتى نتگرب

-صابرين: انتَ انلصم وينه غفاار وينه العاار وينك ولك طلعلي وجهك اعاين عليه خاطر اتفل بنصه

-غفار: سمعي من الاخير ولا تدووخيني انا گلبي موجر منهاا ومطيحة حظي متشيخة على راسي عبنها تشوفني عاشگها بس انا اعلمها لووما كسرت جناحهاا وگعدتها يمج تخدمج ما يطلع اسمي غفار

-صابرين: ههههههههههههاايي سمعتها من سنتين يروح امك سمعتهاا وما شفت غيرها الكسرت جناحك وخشمك

-غفار: الا انهي عليها وانعل والديها بسيطة

-عاصف: اگعد ولا تفشلنا وتفشل روحك اگعد

-صابرين: لاا ليش يكعد چا حگه ابن عمها ورايدها رووح انهي عليها يمة

-عاصف: يروحلج كامل يرجعلچ وصل وصل وبكيفج بعد

-صابرين: ولك انتَ هم الك عين وتسولف ولك عويصف؟؟ العار ابن العاار فوت شوون رمانة وحطهاا بحلگ الامير! يا اغبر بيت شيخ كوشووا على كلشيي خذوا مرت نعمة العار وخذوا فلوسه وبيته وكل املاكه وانتَ كاعد هنا مگابلنيي!

اسمعهم وروحي طگت من طاري بيت شيخ علي وحسد اهلي عليهم، هاي يومية احنه على هالرنة تعبنا ولعبت رواحنا.. صار اسبوعين من رجعوا زيد وغفار من الشمال علساس مسوين خطة مدري شني خاطر يحاچون حبيبة مادري يخطفوها والله مادري شني الخريط الرادوا يسووا بس فشلوا واصلاً گبل لا يرحون چنت اعرف راح يرجعون وايدهم فارغة..

طلعت من الصالة وصعدت لرهف سودة عليّ رجعت تلوب من وجع بطنها هاي تاخذلها چم يوم تصير زينة وترد توجعها، المسكينة بطنها انترست علاجات وحبوب ومرة وحدة ابوي جابلها طبيبة وحلف ما يكررها..

نزلت لابوي بلچن يلين هالمرة ويقتنع ناخذها للمستشفى، طبيتله للغرفة شفته كاعد يگلب بموبايله وبصفه حاط تعلاگة خفت اتگرب منه لا يهفني بيها فـ وگفت بعيد عنه ونزلت راسي وصحتله..

-بوية

رفعت عيوني على كيفي اشوفنه يعاين عليّ لو لا وشفته ما اهتملي، رجعت اصيحله وهم ما عاين لوجهي اخير مرة من صحت بي عاط..

-وجعععععع ما تحجييين

-ها.. بوية اعذرني حسبالي ما سمعتني

-ليش اصمخ وما اسمع؟؟؟ اللغي كولي شكو

-بوية رهف كلش تعبانة بلچن ناخذها لطبيب لو تخلي....

ما كملت جملتي وشال التعلاگة وشمرها عليَّ الچنكال مال التعلاكة طب بعيني واحسه شخط البؤبؤ رووحي فرفحت وعيني صارت تهمل كضيتها ارفرف و ابچي بسكات..

-بت النعاال انا مو كااايل مااكو طبيببب شنييي ماعدناا شرف والزلام تكضكض بأختج

جريت نفس اسيطر على روحي لا تطلع شهگتي كدامه وانكتل اكثر وجاوبته بساع..

-محشوم بوية.. بس والله متفرگعة من القهر عليها لو تشوف حالها انتَ ما ترضاها وعلي وانتَ معروف بگلبك شگد حنين ومدللنه وتخاف علينا وما تتحمل تشوفنا مريضات وتعبانات وتجيبلنا احسن العلاجات...

تعمدت اسولف هيج خاطر ارضي غروره، سكت يسمعلي وصفن يفكر بچلامي بينما كملت..

-انا اگولن لو نجيب طبيبة هنا احسن خاطر تسويلها فحوصات ومدري شني واذا تطور الوضع حتى لو ناخذها لهذا المستوصف اليم بيتنا مال منتصر

-خووووش

-يا بعد عيني يا بوية فدوة رحتلك

ركضت على ايده بستها ومدلي الايد الثانية، بست ايده وعيني المضروبة تذب دمع، طبت امي للغرفة وشافتني فرحانة راحت لابوي كعدت على الجرباية وكالت..

-شني شكو

-مسعود: راح اجيب منتصر يشوف رهيفة شمالها

شهگت امي داگة صدرها ومبحلگة عيونها، وگفت على طولها وصاحت..

-صابرين: تحچي صددددگ مسعوووود تجيب هالچلبب يكشف على بنيتتتك

-مسعود: هو طبيب وخلي اخوتها يكونون موجودين

-صابرين: لاا انتَ تعرف ولدك بس يتلاگون ويه منتصر يتناطحون انتَ تريد تعزينا وتصخمنا؟؟

-سبأ: يمة چا شون تبقى هيج

-ختوليي عرج ما بيها دلع بنات هذا هسة اسويلها نومي بصرة تصير زينة

عاينت لابوي اتوسل بعيوني ومادري شلون ما اهتم لچلام امي وگام اتصل بمنتصر يجينا وخلاها واكفة تدك وتلطم..

-صابرين: بالعباااس لا انا اشوفنه ولا ولددي عود انتَ گابله واگعدد

-مسعود: امشي ولي امشيي بت الزمال تهدد الرعنة

عافته وطلعت من الغرفة وانا رحت اريد اللحگها ووگفني ابوي، نزع دشداشته ولبس غيرها وگال..

-اوگفي فوگ راسه ولا تخلي وحده ويه اختج

-انتَ ما تجي؟

-لا عندي شغل

انصدمت منه شلون يعوفنا ويه منتصر وحدنا واخوتي اكيد امي ما راح تبلغهم هو جاي خاطر ما تصير الحرب العالمية الثالثة هنا، قررت اغلس على الوضع وما اهتم واروح اللبس رهيفة شال وانزلها للاستقبال..

-رهف.. رهف گومي خية راح يجي الطبيب يشوف شبيچ

ما جاوبتني وبقت تلوب متت قهر عليها وجريت شال لبستها وسحلتها جوه للاستقبال، نامت بساع على الگعدة بالكاع وغطيتها بچرچف، لبست ربطتي وعباتي وكعدت انتظر منتصر..

الحمدلله بيته مو بعيد منا ما طول خمس دقايق ووصل، تغشيت بالشال والعباه ضميت عيني ودخلته من باب الاستقبال ولا اخوتي ولا امي بينوا، سلم وطب جايب وياه جنطة سودة..

-هلا بيك خوية

-خير شبيها رهف؟

طب متوجه عليها ونصى يعاين على وجهها من شاف وجهها اصفر حط الجنطة بالكاع وگعد على ركباته يحاچيها..

-رهف.. رهف تسمعيني؟ رهف؟؟

فتحت عيونها على كيفها واستغربت من شافته گبالها، فزت من مكانها مخترعة ولملمت الچرچف على جسمها مخنزرة..

-سبأ: مو كتلج راح يجي الطبيب

-منتصر: مو وكت خزراتچ هسة گولي شبيچ شصاير وياچ؟

-رهف: بطني توجعني

-بعدها؟

-اي

-وما رحتي طبيب مو؟

-لا

-ولا سويتي فحوصات

-لا

-ولا..

-خايب گتلك لا شني السالفة

ضحك مأيس من لسانها الطويل وفتح جنطته يطلع سماعاته مال طبيب، لبسهن على اذاناته وحطهن على بطنها وصدرها انتبهت على حركته البطيئة ومركز يتسمع على كيفه ويتنهد من ثانية لثانية..

گعدت على جهة منتبهة لتحركاته ونظراته بنفس الوقت، عيونه ما وگعت من وجهها وعيون رهف تدور بالاستقبال ما تخليهن عليه الا من همس بأسمها واللتقت نظراتهم.. صفنوا واحد بوجه الثاني لحظات وعكس عينه منتصر منها بساع مرتبك وضم السماعة بالجنطة..

-منتصر: احم.. بلا زحمة تكدرين تجيبيلي ماي سبأ؟

-اي صار

كمت بساع حضرت الدولكة والكلاص وحطيتهم بصينية وخذيتها الهم، وگفت بالباب ما طبيت من سمعتهم يبسبسون يحچون بشي ويه بعض، ركزت وياهم بكل حيلي وگدرت افتهم شجاي يسولفون..

-تتمرضين من عنادج

وهي تجاوبه بضوجة..

-معليك انتَ

-صيري ادمية وجاوبي زين لمرة وحدة بحياتج

-شتريد منتصر؟ شبيك اجيت خاطر نتعارك لو تعالجني؟!

-مو شكول نعمة وحگ هو علي

طبيت للاستقبال انطيته الماي خذاه وشرب ثلاث كلاصات واحد وره الثاني فحطان، اعاين على اختي متوترة وتلعب بطرف الچرچف وتبلع بريگها حسيت بيهم مو طبيعيين واكو حركة غريبة بيناتهم..

-منتصر: تحتاج تحليل بس على الاغلب عدها رمل بكلاتها هذا سبب وجعها، راح ادز رسالة العلاج لعمي مسعود يجيبه و خليها تكثر من شرب الماي والسوائل كشكل عام

سد جنطته وشالها بدون لا يعاين لوجهي وگام يريد يطلع وعيون رهف وراه تركض، بعده ما خاطي خطوة برة الاستقبال وصاحتله..

-منتصر

وگف بمچانه يسمعلها بدون لا يلتفت عليها، نزلت عيونها على الچرچف البيدها وگالت بصوت ناصي..

-بوسلي رقية وسكينة

رجعت عيوني عليه شفت ملامحه العصبية تتغير وابتسم بس خفاها بساع وطلع من البيت، فكيت حلگي مصدومة ذول شبيهم ما جاي افهم سالفتهم؟

-سبأ: ولج رهيفة

-رهف: نعسانة راح انخمد

-ولج گووومي حاچيني

-نعسانة نعساانة

لفت راسها ونامت خرب حظج رهيفة راح تخليني افكر بيج واألف قصص بكيفي، عفتها نايمة ورحت اسويلها عصير برتقال وحطيته بالثلاجة.. عاينت للساعة عبرت الاربعة العصر واليوم ثنين معقولة اشوفه على النهر منتظرني لو مثل كل ثنين اروحن وارجع خايبة ما اللگاله اثر..

حطيت امل واحد بالمية يجوز يجيني وقررت اروحن ما دام امي واخوتي ملتهين يشنون حرب على بيت عمي علي، لبست عباتي على راسي وطلعت من البيت متوجهة للنهر، امشي وادعي بجاهج يالزهرة كون اشوفنه ولو من بعيد..

وصلت للنهر وشفته فارغ مثل عادته بهيج وكت، گلبي وجعني والحسرة ترست گلبي.. من يوم حادث حيدر لهذا اليوم انا ما شايفته لا يجي ولا يتگرب من النهر وانا مثل المطية مثل الغبية كل ثنين انتظره! انتظره مثلما انتظرته عمرري كللله!

افتريت بالمچان عسى اللمح طيفه وافكر بي.. من يوم دافعلي وانا بت السبع سنين من عيبوا على وجهي المچلح ولد عمي ناصر وطگهم لخاطري وانا گلبي اتسودن وتعلگ بي.. ما انسى شون وگف بصفي بيومها ومسح على گصايبي وگال..

"لا تهتميلهم ذول الحيوانات واحدهم وجهه وجه القندرة حشى خلقة الله ويعيب"

اتذكر من ضحكت خجلانة وشون غطيت سنوني المتكسرة مستحية منه، اتذكر من ضحكلي وطلع من جيبه چكليته ومدلياهة ينطيني وگال اكليها بسكات ولا يشوفج احد لا يحسدوچ..

خذيتها من ايده بگلب جاهلة فرحانة وشخص اهتملها، بوكتها ما كليت الچكليته وضميتها بين اغراضي فوگ الست سنين صارت الچكليته حجارة وما كليتها، اطلعها اعاين عليها اضحك وياهة مثل المسودنة واضمها بين اغراضي وچان بقيت محتفظة بيها لهذا يومي لوما رهيفة چانت طفلة شافتها وچلبت بيها تريدها وامي كتلتني خاطر انطياهة..

بچيت وانا اتذكر كل هالذكريات الحلوة وگلبي يتگطع، مهضومة عبن تخيلت اخيراً راح نرجع نتلاگه سوه وتتكرر بس ما اجه علي التـقي.. ما اجه وما راح يجي وحگه شيسوي جاي لوحدة وجهها محترگ ماكلته الشمس وايدها كاتلها الضيم من الحرث والحش..

گعدت بالكاع لميت عباتي على جسمي وخذيت راحتي بالبواچي افوخ گلبي واخلص من الغصة والحسرة الكاتلتني، عيني تون عليّ توجع وزيدتها بدموعي المالحة بس طزز عساني بالعمى عسااني ميتة ولا هالعيشة الكافرة..

-ليش تبچين؟

فزيت من مچاني مخترعة وگمت على حيلي، تعثرت بعباتي ردت اوگع وگوة سندت روحي ووازنت نفسي.. گلبي صار يدگ حييل وتخربطت احوالي مادري شسوي ماعرف وين اضم وجهي المكروب صرت اتغشى بالعباه وامسح بدموعي وخشمي وانطيته ظهري ارعش واتنفس سريع..

-علي التـقي: هاج

حسيت بحرورة جسمه يتقرب مني ويمدلي كلينسه من فوگ چتفي، خذيتها بساع وركضت بعيد عنه ولو بيدي اطبن للنهر واتغطى بي..

-تره ما راح آكلچ والله

-اءء.. انتَ.. انتَ هنا

-لا خيالي اجه

طلعت عين من عيوني ودرت وجهي اعاينله وبساع انطيته ظهري مرة ثانية مبتسمة، غمضت عيوني اتنهد وامسح على گلبي اليرجف التعبان..

-اجيت اسألج سؤال واروحن

بلعت ريگي متوجعة يا ظالم شلحگت اشوفك وتريد تروح بس هم رضيت الحمدلله والشكر شفته من بعد غياب مابي شي ويمشي على طوله الحلو كلشي ما رايده الحمدلله والشكر..

-اسأل لو ما ترديني احاچيچ؟

اللتفتتله بساع واعرف ليش سألني هيج عبن منطيته ظهري، وخرت العباه عن وجهي وگبل لا افتح حلكي واجاوبه جفلت من گال..

-هاي شبيها عينج؟؟؟

-مابيها شي.. فگستها انا بالغلط

ضميتها بأيدي ووترني من تقدم بخطوات سريعة يمد وجهه يريد يعاين عليها، ابتعدت منه خطوتين خايفة وبساع رجع هو لنفس مكانه من شاف ردة فعلي..

-شوفيلها قطرة ملتهبة عينج

-ان شاء الله

-المهم على سؤالي.. راح اسألچ مرة وحدة وجاوبيني بدون لف ودوران سبأ انتِ تعرفين العداوة البيناتنه وماريد الوضع يسوء اكثر

بلعت ريگي وهزيت راسي انتظر سؤاله بس صدمني من گال بنبرة واحد ما طايق شي..

-غفار اجه للشمال راد يسوي شي لاختي حبيبة مو؟!

-لا

-لا تجذبين!

-لا لا.. لا شني شيسويلها يعني

-شفته مرة من رحنا لمصيف چان يحوم! ومن راحت للحمامات شفته مرة ثانية يمشي وراهة ولوما انا ملحگ عليها چان حاچاهة لو الله يعلم شسوه! احجي شنوو براسه؟؟؟

خفت من نبرة صوته يعيط بيه ويحجي بنتر مو نفس تقي الاولاني چن واحد ثاني بس ما اللومه ولا اشيل بگلبي عليه المروا بي مو هين والسواه سيف اخوي دمر شكو شي زين بيناتنا..

-سبأ: ماكو شي براسه غفار يحب حبيبة

-ااااشششششش هااااي السالفة ماااا تعيديهااا خاطر مـ......

-صخااام الصخمنيي

لطمت على وجهي واللتفت على المكان الجاي اعاين منه وانصدم! انصدم من شاف ابن اخوي سلطان واكف بعيد ويعاين علينا.. انهاريت بعد ماعرف شلون اكف عباتي مااعرف شلون اضمن وجهي واركض بعيييد.. صرت اركض مثل التايهة ما اندل دربي عفت تقي واگف يحاچيني وماريد اسمعه ماكدر اوكف وافهمه بالمصيبة الطاحت على راسي.. اركض واطيح وارجع اوگف وهم اطيح ماعرف وين اروح وين انطي وجهي شسووي بروحي وشراح يصير بيه شسوي!!!

**

-وين رايحة ليلة؟

-هااا

-وين رايحة وشبيج طلعتي تسحبين من الغرفة؟!

جفلت مخطوف لونها واعرف ما ينخطف لون اختي الا من تكون مسوية مصيبة، مصيبة راح تطيح حظنا وتدمرنا ثنيناتنا..

-احچيي شكو!!

-رفل راح اگولن بس عليج العباس لا تعاركيني

-فضيني كولي شكو

-راح يجي.. يريد يجي ويحاچيني

-يممممممة

لطمت صدري بكل حيلي متخبلة، ركضت عليّ تتوسل وتگول..

-من الحايط تعاي وياي انتِ من الحايط يحاچيني تعاي وشوفي بنفسج

لبستني شال وجرتني جر وياهة وانا صافنة شني جاي يصير! شني السالفة ياهو هذا واول مرة ينضرب على عقلي وطلعت وياهة بدون لا اسألها شنو الموضوع بس يمكن صدمة اختي تريد تحاچي زلمة غريب من الحايط اثرت عليّ..

طلعت وياهة للمنور وره البيت وشهگت من شفت زلمة ماد راسه من الحايط يطلع اكبر من ليلة بثلاث سنين واگف وبيده وردة حمرة، لطمت على وجهي متسودنة وبدون حچي جريتها من ايدها ارجعها للبيت والحظ خلانا نصير وجه بوجه ويه ابوي..

-ناصر: شعدچن هناك

حچاهة بحس ناصي وبنفس اللحظة صاح الزلمة البره بأسمنا ويااا بوية وياااا يابة مااعرف شلون انگلبت الدنيا فوگ راسنا بلحظة.. طلع ابوي للمنور وشاف الزلمة واگف وكضه يريد يكتله وهرب من ايده واندار علينا.. كضنا وحطنا وحدة فوگ الثانية وكتلنا كتتل مووت شفت نجوم الليل بعز الظهر!..

جر موبايل ليلة من ايدها وجبرها تفتحه، ظلت تبجي وتلطم على وجهها ورجع يكتل بيها بخبال موتها، خلاني انا بنفسي افتحله الموبايل ومادري شني شاف ماادري بس الشافه سودنه علينا وراح جاب سچينة من المطبخ..

-رفل: بوووية والعبااس والزهررة والحسين الشهييد و.....

-ناصر: بتتتت العااااار شااالج العباااس شااالچن ابوو فاضل نزلتننن رااااسيييي

كضنا يجلد بينا بكل حيله بحزامه گطعه على ظهري وظهر ليلة، راح اموتن روحي طلعت احس الهوا ضاع مني صرت اشبح بيدي بس اريد احد يساعدني ويطلعني من جوه ايده اريد اساعد ليلة الراح تغيب عن الوعي من الكتل اريد اچلب بأمي الطاحت من طولها من شال ابوي السچينة وحطها على رگبتي..

-ناصر: اذبببحج من الوريددد للوريددد وروحه لابووي اذبحچننن واسويچن عبررة لمن اعتبررر

-رفل: تذذبح بنااتك هااي تاليتهاا هيييج بوووية تذذذبح بناتك الشريفاات بـ...

ضربني على حلگي بكل حيله احس الدنيا دارت بيه وطحت بالكاع، تعب جسمي من الكتل وتعبت واني اعاركه واحاول احمي روحي واحمي ليلة الورطتنا وجابت الزلمة لحايط بيتنا تحاچي مناك..

-ناصر: ولللجن اذبحچننن واغسل عااارچن گووووومنن گوووومن اغسل عاااري وارجع ماااي وجهههي گووومنننن

جرني من شعري وليلة من شعرها ويسحل بينا مثل الحواوين، شمرنا بالساحة على الصبة ما مخلي بينا روح ندافع على نفسنا.. جاب حبل وصار يربط ايدي واندار على ليلة يربط بأيدها وجرنا من شعورنا مرة ثانية يطلعنا من البيت..

-ام رفل: وووين ماااخذهن يا الماا تخاااف ربببك حسبييي الله ونعم الوكييل بييك يا ناااصر عسسسى حوبة هالبنااات ما تعددديلك عسااااك حطب لجهنممم

-ناصر: ررراجعلج انتِ ررراجعلج تفوووو عليج وعلى بناتج ال*****

جرنا يطلعنا بدون حجاب بدون شي يسترنا، عتنا بنص الشارع والله ستر علينا والشارع چان فارغ، طببنا للسيارة وتفل علينا وركب بكرسي السايق وطلع بينا لمادري وين.. مادري وين ماخذنا ماشوف بعيوني دم راسي جاي يطيح عليها وتحجب عني الرؤيا..

مسحت عيني بيدي بس اريد اللمح ويين ماخذنا بس لا البالي صدگ بس لا راح ياخذنا يغسل عاره! ظليت اطگن سن بسن من الخوف وحضنت ليلة حطيتها على گلبي.. شابگتها بكل حيلي وجسمي يهتز برد وخووف ورهبة وكل شعور يخوف جاي اعيشه..

لمحت بيت عمي علي وروحي تعلگت بي صرت اصيح وابچي بكل صوتي واضرب على چتاف ابوي اريده يوكف ارريدن اضم روحي بحضن عمي علي اريده هو يسندني ويوگفلنا ويساعدنا..

كض ابوي ايدي ولواها يصيح ويفشر عليَّ وعبر بيتهم، تسودنت وظليت اتعارك وياه بأيدي معارك.. وگف السيارة يخاف لا نسوي حادث واللتفت يريد يرجع يطگني وگبل لا يلوحني فتحت باب السيارة وشمرت روحي منها وليلة وراي..

ركضنا مثل المخبلات نشرد منه وچن رادها من الله ابوي جيتنا لبيت عمي علي، شهگت واحس بروحي تريد تطلع من كضني من شعري تگطع بيده وليلة سحلها من ايدها وخذانا لبيتهم.. تخبلت عقل ما ظل براسي من دفر باب الحوش برجله وتلگتنا عبق بالساحة واكفة ويه سلوى يتعاركن وسكتن من شافننا..

-عبق: عزااا ليييلة رررفللل

-ناصر: ووووخري انتِ

دفعها وگعها بالكاع من اجت تريد تحامينا وجرنا جر لديوان عمي علي، رجلي ظلت تطگ وحدة بالثانية والدنيا دارت بيه طحت بالكاع وگومني يجرني من ياخة دشداشتي وطببنا غصب لديوان عمي بهالحال! بالدشاديش وبدون حجاب، ايدنا مربطة ومدامايات من فوك ليجوه والسچين بيد ابوي يريد يذبحنا..

طحنا بنص ديوان عمي واحس بروحي تريد تنسحب والعباس ابو فاضل ملك الموت احسنه واگف فوك راسي مو ابوي الرباني.. وگف عمي علي على حيله وچان عنده زلام ثنين گاعدين وابا الحسن وعلي السور موجودين.. وگفوا كلهم مصدومين ومبحلگين عيونهم عاجزين يكولون چلمة..

-ناصر: اجيييتك يا خوووي اغسل عااري جداامك اجيت اگللك بناااتي رخييصات وبااعن شرفهنن طيحن ماي وجهيي وسودنه وموو ناصرر اليسكتت على بناااته الكسررن وجهه!!

-شيخ علي: نااااااصر صلييي على محمد واستهددي برحماانك

-ناصر: ابدددد بعلييي اليوووم لو انااا لو هالبنيات المااا عرفت اربيهننن وطينن وجهيي بيننن الناس!!!

يتبع 👑.....

━━━━━━ ♛ ━━━━━━

توقعاتكم.... 👀🩷🩷🩷🩷🩷🩷؟؟