الامارة الفصل الحادي وأربعون 41 - بقلم 𝐙 𝐇 𝐑 𝐀

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

طلع من عيني ذاك الچان تارسها... 🥀

━━━━━━ ♛ ━━━━━━

-المن بعتي شرفچ ليلة؟!؟

سكتت عاجزة عن الاجابة شگول وشلون ابرر لنفسي، راح يصدگني لو يچذبني ويجرني لابوية مثل الحيوانة يذبحني جوه رجله..

-جاوبييييييي

-ما بعته والله العظيم ما بعتته ما سويت شي غلطط والله حسن والله العظييم

ضرب على تاج الچرباية وعاط بوجهي متخبل...

-لااا تظلين تحلفيلي احچيي وفهمينيي

-باوع والله راح افهمك عاين عليَّ لا لا اقصد لا تعاين ماكدر اشوف عيونك كارهتك هسة

-لييييلةةة

-راح احجي شبيك بس هدني ولا تلطش بيه

عصر ايدي اكثر ورفع ايدي اليمنه على التاج گلبي وگع بين رجليه من الخوف، خذتني الرجفة من عيونه خازرني ومتحلف بيه شر خفت منه اول مرة اخاف من ابا الحسن وما گدرت اقاوم اكثر كتيتهن عليه كت..

-ابا الحسن انا بريئة بالعباس بالحسين بالانبياء بالشرفاء بالعلماء شرريفة والزهرة ما مكضوضة من زلمة

-مكضوضة من زلمة شني

-يعني ماكو زلمة كاضني

-لييييلة

-وووولك شبيك خليني احجي راح اموتننن

-احچي خلصينييييي

-اذا صحت بعد ما احجي

صحت صوت يفزز الميت من گبره من لزمني بطريقة ما عجبتني، استجمعت قوتي ودفعته عني رجع يريد يكضني ودفرت ايده بعيد وكمت اركض يم الميز اصيح..

-راح اسولف بس لا تجي لاا تكضني بداعة امك

-اخر مرة اگولها ليلة راح تحچين لو..

-لا تهدد راح اسولف..

حطيت ايدي على گلبي وجسمي كل ساع يكزبر، اتذكر المريت بي من شوي والخوف العشته واحس بروحي تفرفح.. بلعت ريگي ووخرت شعري من وجهي وگلت بدون لا اعاين بعيونه سبب خوفي من الزواج بس اكيد مو كل الاسباب انطيته اكتفيت بسبب واحد وخفيت موضوع "ناظم"..

-انا طول عمري ميتة خوف من الزواج بسبب سؤالك "المن بعتي شرفچ" بس يا ابا الحسن وحگ خاتم الانبياء والمرسلين محمد ما مسوية العيبة انا.. طحت بصغري وانا اعبر حايط بيتنا

-طحتي؟!

-اي طحت بمكان غلط والدم تولاني بس خفت اگول لاحد وبلعتها وسكتت بس من كبرت وبديت استوعب عرفت غلطت غلطة عمري من ما حچيت لاحد وظليت حاطة ايدي على گلبي خفت اتزوج وينكشف امري وياهو يصدگني انا بريئة وشريفة خصوصاً وانا اعرف عقلية ابوي شني والله يذبحني ويسوي ضعف السواه اليوم..

-ليلة

-والزهرة فاطمة ما مچذبة بچلمة وحدة وانا شريفة وما مسوية الحرام والغلط!

-ليلة..

-جاي اگلك طحتت ولك طحتت والله طحت وطااح حظي عبني سكتت اهمداني واهمده حاليي عبني ما حچيت لاحد بس عقل جاهلة وخفت لا امي تكتلني بوكتها

-ليلة اليوم...

-اسكتتت لا تكمل ما اسمحلك!! انا شرريفة اسكتتت

-خليني اكل زبالتييي واحجي

سكتت من شفته معصب كلش وخفت لا اللوص اكثر فـ سكتت للوقت الحالي..

-ليلة انتِ شريفة

-طبعاً!

-قصدي انتِ بت!

-چا زلمة اكيد بت

-انچبيييي ولا تشلعين گلبي

-انتَ انچببب

-ولج بت العااار انا اعلمج اليوم

هجم عليَّ يريد يكتلني وفلتت منه فتحت باب غرفته وشردت جوه وهو يطارد وراي يركض ويهدد بيه..

-اليوم انعل والددديج اليوم

-امشي لللك

-تعاااي ولج بت الـ...

-بت الكرام الأشراف الحبابين..

عبرت الصالة وطبيت للمطبخ طبگت الباب وراي ودورت على المفتاح ماكو أيست اللگاه وطفرت للساحة اطلع اتلفت على مكان اختل بي خرب حظي حتى نعال ماكو برجلي ادافع بي عن نفسي..

-وين ترووحين اليوم ويييين

صحت خايفة من شفته وراي يمشي بخطوات بطيئة ومتحلفلي، حصرت روحي بين الحايط وقفص الدجاج القديم مالتهم ماعرف وين اولي ماكو مكان اشردله..

-حسن حسيوون حساني الحبابي شبيك انتَ شمالك خوية ساطرك الحمزة شمالك مو چنت شحلاتك گبل

-ماكو ماات ابا الحسن القديم رااح مات الگدامچ واحد ثاني

-لا حسيون عيب ما حبيتها منك شون تسمح لزلمة غيرك يحاچيني...

ما كملت جملتي وكفشني من شعري بدون لا يعورني يطلعني من قفص الطيور، طلعت مستسلمة خايفة لا يملشني ويگطع شعراتي ومشيت وياه لحدما طببني للبيت..

-ااخ يا ليلة من طفت ليلتج وخلصت منج

-چا طلگني واخلص ياهو كاضك

-سكتي وامشي لا املشچ

-شني ولك شو تهدد انتَ

-انلصميييي

-اااخ شعري بالعباس ما اسامحك بعد وديلاا

مشاني يعبر بيه الصالة وصعدني على باية الدرج وانتفضنا ثنينه على صوت عمو علي يصيح بأسمه..

-ابا الحسن!!

هد شعري واللتفت لابوه المبين عصبي ونزل من الدرج بساع يروحله..

-ها بوية

-شبيكم بوية شني هالصياح شمالك ويه البت

-لا بوية ماكو شي بس تدري بليلة لسانها طويل

-اي ادري

فكيت عيوني وحلگي ثنينهن عليهم وعمو علي ضحكلي يسويلي بيده على كيفج، هسة المشكلة مستحية منه بعدني ماكدر اجاوب هاي لو گبل اغرد براحتي بس هسة انا بوضع ما يسمح..

-شيخ علي: شلونچ بوية

-ليلة: مو زينة عمي

-افاا وانا ابو علي ليش؟

-ابا الحسن مو زين وياي

-شيخ علي: هسة املص اذاناته ما عليج منه

-ابا الحسن علي: بوية شسالفة صدگتها انتَ!

-شيخ علي: شوف ولك حسون لا تزعل بنيتي ليلة ما ارضى عليها

ابتسمت ونزلت راسي خجلانة صح جاي يحاچيني بس احسه مو مثل گبل چان كلش يشاقيني ويداهرني ميانتنه تخبل وهسة اشوفه متغير وما اللومه..

ترخصت منهم وصعدت فوگ اركض اريدن اروح لـ عبيقة گبل لا يجيني ابو لسانين بس ما لحگت افلت واجه وراي يركض اسرع مني وگبل لا يخليني افتح باب المخزن جرني من خصري بحركة ادبسزية خفيفة وشالني على ظهره وطببني لغرفته يقفل الباب علينا..

-هدني ابا الحسنننن لا تكضني هييييج

هدني بساع طيحني بالگاع ويعاينلي ويتنفس سريع يلهث انرعبت من نظراته وركضت للحمام طبيت وقفلت الباب عليَّ.. تنهدت تعبانة وگلبي تعب من الهبطات، گعدت بالكاع ساندة ظهري على الباب واسمعله يسولف من بره بنتر..

-طلعي خليني احاچيچ

غلست عليه ما جاوبت وهو هم سكت، غمضت عيوني مرتاحة من خنس حِسه يارب طلع وقرر يعوفني واخلص من هالسالفة الورطت روحي بيها بس طلعت غلطانة وما راح ولا عافني بالعكس حسيت بباب الحمام الألمنيوم تتحرك شوي چن واحد دفعها وانتچه عليها عرفته هذا هو گعد نفس گعدتي مرتچي على الباب من الجهة الثانية..

-ليلة..

گال اسمي بصوت ناصي وسكت فترة من الزمن، نزلت دمعتي تچوي خدي من اردف بصوت ناصي..

-ليلة انتِ شريفة وما عليچ غبار

شهگت ضامة وجهي بين ايدي ابچي اكثر من كمل..

-انا سألتچ عبن شفتچ خايفة وتنتفضين بيدي.. ليلة انا متت بدمي من گلتيلي نزلهم يذبحوني ولا تلمسني

-يا ظالم!!

گمت من مكاني ارعش من فوك ليجوه، فتحت الباب خاطر اواجهه واحط عيوني بعيونه اشوفه وهو يسولف بهالموضوع بكل برود ولا چن نزع گلبي من مچانه..

-انا ردت اختبرچ بس واشوف من شنو خايفة

-تهمتني بشرفي ولعبت بحاليي ودمرتنيي خليت روووحي تطلع ومية الفف حسبة اجت ببالي شنو راح تكون تاليتي وتالي تجيني تگلي چنت اختبرچ؟؟ شرف الناس لعبة ابا الحسن؟؟؟ اتهام بت بهيج مووضوع يونس؟؟؟ لو واحد اجه وسوه هيج ويه اختك راح ترضاها؟؟ راح تسكتله؟؟؟

-اختي ماا تطبب زلمم غرب للبيت من ابوها واخوتها طالعين!! ماا يجووهاا ساقطيين وولد شاااارع يوگفولهاا يم حايط بيتها خااطر يشوفوهااا ويسولفون وياهة!! لا عبالج انتِ بريئة ليلة وتعيشين الدورر!!

-الزلمة الابوي گاللكم اجه يشوفني لاا اعرفه ولا يعرفنيي!! ماكوو أي شي بيناتنه ولااا شي واسأل رفل واذا تريد جيبه بنفسك حاچي!! اسمه ما اعرفه وراس امي الماعندي اعز منها!

-چاااا شجاابه يم حايطكممم شجااابه!!!

-مااادري والعباس مادري مااادري انا من شفته رووحي راحت من الخوووف وهمزين رفل چانت موجودة چان الله يعلم شسوالي

-سبحااان الله ماا اجه اله لبيتكم والا علييج شووف الصدفة

-عاين ابا الحسن انا تعباانة بما يكفي ما عندي طاقة اناقش بشي انا جاهلته وماعرف شون اوصلك واثبتلك انا ماعرفه ويبست بمچاني من شفته

-والرساايل الشافهم ابوج بموبايلج شتقسريها؟؟؟

-رسايل بيني ويين صديقتي ومراسلتني من رقم اخوها! واذا تجيبلي موبايلي هسة اثبتلك هالشي!!!

-هذاا موبايلج بجيبي يله ثبتيلي

جحظت عيوني مصدومة من طلع موبايلي من جيبه ومده الي، الف فكرة اجت براسي شلون لو مراسلني شلون لو دازلي شي والله اروح بيها دهر الدهرچ يا ليلة على هالطرگاعة الجبتيها على راسچ!

-فتحييي يله

اخذته منه بأصابع ترجف، فتحت البصمة مال الموبايل واحس بمعدتي راح تطلع من حلگي، دعيت بگلبي بجاه ستر الزهرة كون الله يسترني وتخلص هالليلة على خير.. طلعت اسمه ولگف ابا الحسن الموبايل من ايدي ونتر..

-جيبي اقرا انا

خذاه من ايدي وصار يقرا ويصعد بالمحادثة مال اليوم انا يوم بيومه متعودة احذف محادثتي وياهة وهي همات تحذف عبنه موبايل اخوها..

-هاي شني كاتبتلج هنا؟؟؟

-احبج

-ليش كاتبه احبج؟؟؟؟؟

-چا صديقتي ليش ما تحبني يعني!

-ولج انا اخوووي ما اگله احبك هذاا الامير هذاا توأمي وروحي معلگة بي ماا اگله وانتن توزعن احبچ للرايحة والجاية؟؟

-هسة انتَ جاي تحاسبني لان كلت لصديقتي احبج؟؟

-لا!! ليلة جاي تحچين وياهة بأسلوب ولد! شني تقشمرين عليّ انتِ؟؟

-هذا أسلوبنا احنه متعودات نحاجي بعض بصيغة المذكر عاين حتى هي تحاجيني بهالطريقة عاين عاين شون كاتبتلي "شلونك حبيب"!

-وشنو اليثبت؟؟؟

-اصعد شوي تلگه بصمة افتحها واسمع صوتها

صدگ صعد شوي بالمحادثة ولگه بصمة دزتها الي صديقتي تسولف شنو راح تسوي غده وصوت الجدوره شعلوه..

-هااا تأكدت هاي بت لو بعدك شاك؟؟

-ليش تحاچيها من رقم اخوها؟!!

-ماعدها موبايل

-ومتوازيات! الا تسولفن!

-شعليك ابا الحسن والله حلوة هاي يعني انا وصديقتي ونسولف عادي البت ماعدها موبايل وتراسل كل صديقاتها من موبايل اخوها

-غلط!! ما يصير هالشي ماا يصير ياما ويااما بنات تصخمن وتعزن من وره هالسالفة

-وانا هم تصخمت وتعزيت ووصلت الفكرة فهمت ما يصير خلص

-فوگاهة ما يعجبها وتحجي معلگ!

طگت روحي من النقاش وياه وعفت موبايلي بيده ما مهتمة، جريت بطانيته وفرشتها بالكاع واخذت وحده من مخاده حطيتها ونمت عليها ولفلفت روحي بالبطانية الجواي منطيته ظهري..

-گومي من الگاع باردة

ما اهتميتله وغطيت راسي منطيته اذن الطرشة، حسيت بي يصعد على چربايته وينام بالطرف القريب مني صار فوگاية مباشرةً اكدر احس بتحركاته.. غمضت عيوني وشكد ردت انسى الصار اليوم بس ولا نسيت ماكدر اتخطى الصار يوجع الروح گبل الگلب..

نزلت دمعتي جوه البطانية وتنهدت ادعي ربي يسندني ويخلصني من هالمصيبة، انظلمت يا ربي والدنيا ضاجت بيه ماعرف منين طلعلي هالزلمة ابو الوردة الحقير وشون عرف اسمي واسم اختي وليش اجه من حايط بيتنا بالتحديد وليش هو الي اجه مو ناظم! بس اكيد وراه بلاء هذا والله يستر منه!

مسحت دمعتي وفتحت شوي من البطانية اتنفس اختنگت، عصرت عيوني استذكر المنتظرني كل الصار بيه بصوب والجاي بصوب ثاني شلون بيه لو عرف ناظم انا تزوجت والله يگوم الدنيا ما يگعدها ويفضحني فضيحة لا صايرة ولا دايرة..

-گومي من الگاع

نزيت على حسه اجه من فوگ راسي ضبط يعني لو وخرت الغطه من وجهي نصير وجه بوجه، درت وجهي من الجهة الثانية ساكتة وهو اردف..

-ليلة تمرضين هيج گومي

-مالك غرض

-بطلي عناد

-لا تحاچيني مالك غرض

-طبچ مررض خوووش؟؟

-مرض اليمرضك

همستها بحس ناصي خاطر ما يسمع بس والله ولا اعوفها بگلبي اموت ماتحمل، بدت عيوني تغفي وافز كلما تغمض عيني واتخيل ناظم يجيني لهنا ويكملها عليَّ وهيج بقيت للصبح هلكت من التفكير هلكتت..

**

-ما احچيلهم بشرط

-سبأ: گول شرطك خلصني

ضحك بخبث وحقارة ورفعلي حاجبه يستفزني، انهاريت متت هاي صارلي من العصر لحد هسة راح يأذن الفجر وانا اتوسل بي يسكت وما يحچيلهم الشافه ويستر عليَّ بس من ياهو طلبت يستر عليَّ؟ من ابن سلطان اليكرهني ومسويني چيس ملاكمة!

-سامر: شوفي انتِ عمتي وانا شوي احبنچ فـ راح استر عليج وما اگللهم شفتج ويه زلمة على النهر بشرط

-سبأ: نصي صوتك سامر شمالك لا يسمعووك

-خوش خوش لا تدوخيني

-گول شنو شرطك؟

-بس من هسة اگلج اذا ما رضيتي افضحج واخزيج اخلي صوندة جدي تصعد وتنزل على ظهرج وابوي الي يدفنج بيده

-احچي گوول

-تعاي..

تقرب مني يهمسها بأذني بالبداية ما فهمت قصده وظليت افرك بيدي عاكدة حاجبي بس من شرحلي اكثر كلل جزء من جسمي صار يرجف فرفحت روحي وبطني خبطت من اليريده..

-ايااا چلب ياا خسيسس انا عمتك يا عاار عمتك

دفعته عني اطگه بكل حيلي على ظهره وصدره بيدي ثنينهن اريد افوخ گلبي بي واطيح حظه على هالتربية السگطط بس ليش مصدومة هذا ابن سلطان شتخيله يطلع وصي؟؟

-بت النعاال انا تطگيني ولج

كض ايدي ثنينهن ورگعني على الحايط عاصرهن ويرگع بيه بكل حيله ظهري تفصخ وچتافاتي طگن من قوة ضرباته، بچيت خايفة ولعبانة روحي منه من نتر بصوت ناصي بيني وبينه..

-والله لندمچ يا سبأ على السويتي! وراس جدي لخليچ تتمنين المووت وما تحصلينه!

صحت كاتمة صوتي بيدي من عتني من شعري وطلعني شمرني بره غرفته، طحت بالكاع حيلي مهدود وزاد ضيمي من تفل عليَّ ونتر..

-ولج بهذا وجهج لباب البيت ما اطلع مو اروح اواعد زلم واللعب بذيلي بس بسيططة يا سبأ بسيططة!!

رفسني برجله وطبگ الباب وعافني هنا اكل بروحي، لطمت على وجهي ملخته تملخ من العصر لسه شفت المووت الف مرة راح انجلط الوسواس اكل عقلي وراسي مادري شسوي بروحي مادري..

گمت گبل لا يطلع احد ويشوفني وصعدت للغرفة شفت رهف نايمة ما تدري بشي وكعدت وحدي على چربايتي ابچي بسكات، نسيت وجع عيني الطگني عليها ابوي واللتهيت بوجع گلبي..

بعز تعبي وانهياري سمعت صوت اذان الفجر، مسحت عيوني من دموعها وگمت للحمام غسلت وتوضيت وعاينت لروحي بالمراية عيني خابطة وحجمها صاير اصغر بعد بس هذا الچان عايزني ويكمل بشاعتي عين عوصة!

نشفتها من الماي گامت تحرگني اكثر ورجعت لغرفتنا شلت مصلايتي وطلعت لصالة الطابق الثاني فرشتها وگعدت وحدي بسكون الفجر على سجادتي صليت ودعيت هواااي دعيت من كل گلبي دعيت ربي يستر عليَّ ويچفيني شر اهلي ويعوضني خير عن كل مرارة عشتها وياهم طول هالـ 28 سنة المضت..

بچيت لحدما عيوني طلعت توسلت بربي ينصرني ويحفظ علي التـقي من شرهم وكون ياربي حتى لو سامر سولفلهم وتعذبت وانذبحت ما يهمني بعد راح اصعد يمك وانتَ رب كريم وتعرفني مظلومة بس لا تخليهم يتدنون على تقي ويحطوه براسهم ويبهذلون حاله...

ما گمت من السجادة الا من طلعت الشمس تعبت وحيلي باد، رجعت لغرفتي وبقيت بيها ما نزلت الا من صبح الصبح ونزلنا انا ورهف نسوي الريوك واجت مرة سلطان ضايجة وگالبة وجهها..

-رهف: شبيج المچلوب سوالچ شي؟

ما جاوبت وصبت استكان چاي وراحت للغرفة بدون لا تسولف نعرف بأخونا همجي وعيشته تگصر العمر الله يساعد مرته عليه طلگ مرتين وهاي الثالثة وهم ما تاب كلها فترة وهم راح تطلب منه الطلاگ ويرجعون جهاله يديحون..

-رهف: شبيچ سبأ؟

-مابيه

-چا ليش ايدج ترجف؟

-اعصابي تعبانة

-من شني

-ولا شي رهوفة ولاشي.. شون صرتي انتِ؟

-ابوي امس جابلي العلاج الكتبه منتصر بس بعدني ما صرت زينة

-اي چا هو علاج مو سحر

-اي بس الوجع ما ينحمل چن طلوگة وانا مو حامل

-كله بأجره خيتي

-صابرين: يلا يلا وكت سوالف شني ما شايفات بعض وين صار الريوك ابوچن خبصنا نعله عله شرفه

-رهف: هذا كمل يمة

اخذنا الريوك الهم وگعد ابوي والولد كلمن بصفحة مشمرين يردون لفات محد يطيق يگعد ويه ابوي لانه ما ينجرع وسبحان الله سلطان نسخته المصغرة وهذا السبب ابوي مفضله على الكل..

-مسعود: سليطين البضاعة امس وصلت وينك ما اجيت

-سلطان: بوية بنيتي مريضة وخذيتها للطبيب

-مسعود: هو يومية طبيب شني هاللعبان الرووح

نترها بعصبية وگسم من خبزته يطمسها بالعسل وياكل، طول فترة الريوك عيني على سامر لگمة ما گدرت ابلع بسببه كل ساع اكول هسة يحجي وهسة يفضحني وهو ساكت مغلس عليَّ بيده الموبايل ياكل ويضحك على فيديوهات مطلعهن..

-مسعود: عويصف

-ها

-مسعود: دزيت لاخوك سيف فلوس؟

-عاصف: ما انطيتني عنوانه شون ادزله بزاجل

-مسعود: وصمخ خوب اسألني على عنوانه!

-عاصف: ما ادزله خلي زيد يروح للبريد

-زيد: بوية شو انتَ حاير بالفلوس وعايف سالفة بيت علي!

-مسعود: ما عايفها اسكت خلينا نتزقنب

-صابرين: الامير جاي يدور على مچان سيف كله مسألة وكت وراح يعرف وينه ويروح يذبحه وانتَ حاير تاكل؟؟

-مسعود: خلي يذبحه يستاهل

-عاصف: اذا امير ذبح سيف يصير انا اذبح الامير رد ثار؟

-سلطان: لا لان راح يرجعون ياخذون دم من عدنا

-عاصف: شسالفة چا غير تصير وحدة بوحدة

-غفار: خايب سيف الي اعتده على نسوانهم اول وداس بيتهم ولو نحروه گدامنا هم ما يصير نفك حلوگنا

-زيد: ضروري ندور وراهم ونلزم عليهم لزمة ونهددهم بيها خاطر نرجع الطوبة لملعبنا

-مسعود: وهذا الراح يصير بس انطوني صبر.. گوم عويصف شوف شصار ويه العمال

گام عاصف طلع والباقين كملوا ريوگ، گمت اشيل السفرة بحيل مصفر مابيه ارفع ايدي والدوخة ضاربة راسي من التفكير والخوف، شلت ماعونين وگعدت بالمطبخ ماكدر ارجع بعد راحت رهف بدلاً عني ويه مرة سلطان وانا بقيت على گعدتي انتظر خبر موتي..

**

-شبيچ شصار؟؟

-تَـمني: مصار شي

-چا ليش طفرتي هيج؟

-اريد اغسل

ركضت ادخل للحمام وقفلت الباب عليَّ ارجف رجف ماعرف شبيه وشصارلي هيچ فجأة كأن كهرباء نتلني مو لمسة من ايده، فتحت البوري غسلت وجهي والمي يتطشر كل مكان بالكاع ميثبت بأيدي..

تنفسي سريع وگلبي يدگ بطريقة عنيفه يوجع صدري، حطيت ايدي عليه وغمضت عيوني احاول اهدأ نفسي واخليها تنسى الصار بيه قبل وتركز على الحاضر، تنسى من چنت اختل بالكنتور خايفة من لمسات بسام واشرد للسطح خايفة من ضرب نعمة الي لحد اليوم اثارها بجسمي.. فزيت مخترعة على طرقات الامير لباب الحمام يطرقها طرقات سريعة وصوته اجه ناصي يحچي وياي من بره..

-نوومه فتحي الباب وسولفيلي شبيچ؟

نويت ما افتحها لحدما اهدأ وتروح مني هالنوبة اعرفه راح يخاف اذا شافني بهالوضع وتراوده افكار غريبة..

-ضوجتچ انا؟ يجوز لحيت وياچ؟ سويت شي غلط تَـمني جاوبي؟؟

-لا.. لا امير لا

-چا ليش گمتي هالشكل؟ بس فتحي الباب خليني اشوفج

غسلت وجهي لاخر مرة وفتحت القفل وهو الي فتح الباب وجرني من ايدي يطلعني من الحمام، هديت ايده بسرعة خفت يحس برجفتي وكعدت على الشازلون..

-شبيچ ابوي

گنبص گبالي وغصباً عليَّ حط ايدي بين ايده وضغط عليهن، توترت وارتبكت ماعرفت شگول ويجوز يفهمني غلط اذا عبرتله عن الدا احسه والخوفة البگلبي، بللت شفايفي بلساني وگلت الكلمة الوحيدة الاجت على بالي..

-جعت

صفن ثواني وغاصت عيونه بأبتسامة حلوة مستوعب الگلته، ضحك بخفة ورفع عينه يباوع للساعة وگال بحاجب مرفوع..

-چا صار سبع ساعات اگلچ جعنا وانتِ ما ترضين ننزل

-اي اكل نميات شكو نازل

-كليناهن وخلصوا ترديهن يفرخن

-عندي بعد بالكنتور

-كافي مو بطني عفن من الچبس يمعودة

ابتسمت بالچذب وشلت رجلي اتربع بمكاني، گام من الگاع يكعد بصفي وجرني يحضني لجسمه ويمسح على شعري..

-راح تسولفيلي شبيچ لو شني

-گتلك جعت ونزل ضغطي

-تَـمني سالفة جعت مشيها على الدبة مو عليّ

-امير

-ابوي

-اريد اگولك شي ومترددة

-گولي

-لا تضوج من كلامي بس..

-گوليها

-اني غلطت

چان ديمسح على شعري ووگفت ايده من گلت اني غلطت، بلعت ريگي وتشجعت اكمل..

-ماعرف ليش هيج سويت وشلون تناسيت فكرة انك تزوجت عليَّ وتقبلت هالشي

بقى حاضني ما وخرني عنه بس حسرته العالية وصلتني، دفعته من صدره ابتعد عنه وشلت گذلتي من عيوني الفشلت تحبس دموعها..

-اريد اروح لخالتي

زفر نفس يفرك وجهه ولحيته وغمض عيونه مال واحد جزعان وملان، بلعت ريگي مترددة وهمست بصوت ناصي..

-حباب

-تَـمني شسوي وياچ انا شسووي

-ما ابقى يمها بس محتاجة اروح هناك

-وانا محتاجچ يمي

مد ايده يمسح دموعي بأبهامه وثبت عيونه بعيوني وقبل لا اخلي يحچي گلت..

-تفهم وضعي الله يخليك

ذبلت عيونه بحزن وصارت تفاحة ادم تصعد وتنزل عنده عرفته عصب وبأي لحظة راح يگوم يكسر الغرفة على راسنا..

-امير اني اعرف انتَ سندتني ووگفت ويايه وساعدتني واحتضنتني من احتاجيت ظهر انتچي عليه وانتَ انطيتني ابسط شي الچنت اتمناه وهو الامان.. اني ما احس بالامان بس يمك وحواليك

-چا ليش تعوفين هالامان؟! ليش تكسرين ظهر هالامان المستعد يسوي المستحيل خاطر تبقين يمه وما ترحين ليش؟؟

-ما اروح والله ما راح اروح انتَ فهمتني غلط امير ما اعوفك بس احتاج اشوف خالتي واسولف وياهة

-سولفي وياهة من الموبايل

-انتَ ليش متقبل اروحلها؟

-لان ادري بس تعتب رجليچ بره هالبيت ما ترجعين! راح تبقين تهوجسين وفكرة تاخذج وفكرة توديج وتنسيني!

-والله ارجع لا تخاف گتلك بس ازور خالة وتالة واجي

-لا تَـمني لا! انا مو ضد ترحين لخالتج وتتواصلين وياهة بس بهالفترة عذريني الوسواس يذبحني وعلما ترجعيلي انا حيلي مهدود

هزيت راسي ساكتة ووخرت ايدي من بين ايده وگمت من الشازلونه للكنتور طلعت منشفه وقررت ما احچي بهالموضوع بالوقت الحالي الى ان يهدأ لان شكله ميبشر بخير بس مخلاني لانه گام من مكانه وجرني من زندي بقوة ضربني بجسمه وگال بحرگة..

-تَـمني ماعرف شلون اگدر اثبتلچ انا شاريچ ورايدچ والصار جوه شي خارج عن ارادتي! انا شالوني وحطوني بنار واول شي اجه براسي من جاست ايدي هالنار هو انتِ! انتِ اول بشر اجه ببالي!

باوعت لعيونه ووجهه بسرعة صار احمر، شرارة العصبية بعيونه تحرگ ماكدرت ابقى اباوع بيهن وضيعت نظراتي عنه ويه ما كمل..

-چنت اعرف لو سويت اليردونه اخسرچ! اخسر البت الوحيدة الگلبي تسودن عليها وصرت اضرب كللشي متعلمه من صغري وكل عادة ربيت عليها بعرض الحايط لخاطر عيونها لا تبچي وتزعل!

-امير

-تَـمني انا مشتريچ بدم گلبي وشرفي واغلى ما عندي لا تبيعيني برخيص!

تشجعت وثبتت عيني بعينه، بلعت غصتي وحررت دموعي وحطيت ايدي فوگ ايده اللازمة زندي وگلت بنبرة صادقة..

-ما ابيعك امير ولا تتخيل راح يجي هاليوم.. اني اشتري الحَبني وحافظ عليَّ وكتم سري والسكت وتحمل نظرة ابوه القاسية بيوم عرف بحملي وعباله الحامل بي ابنه والنام على رجل امه يشرحلها المريت بي ويقنعها اني مظلومة.. مستحيل ابيع الرجال الارتاح بوجوده وانسى كل شي حقير مريت بي

-چا لا تروحين

-لا تتخيل اذا گتلك اروح لبيت خالتي معناها راح اهرب منك او ما ارجعلك لا والله ومثلما تاخذني بيدك راح ترجعني بيدك وبنفس اليوم اتطمن

-تـ..

-لا لا لا راح نأجل حديثنا بعدين وهسة خليني اجيبلنا شي ناكله لان راح اتخربط من الجوع

ضحكت بآخر كلامي وفلتت نفسي من عنده وفتت للحمام بس الرجفة بعدها بيه محتاجة فترة ارتاح بيها واستوعب الموضوع وهذا السبب الاساسي ليش اريد اروح لخالتي وتالة..

سبحت بسرعة وطلعت من الحمام بس شفته مموجود، گلبي تخربطت دگاته وجريت برنص لبسته وطلعت من الغرفة اني وشعري المبلل يقطر مي.. عبرت صالة الطابق الثاني اركض وادور عليه مثل المخبلة، مديت راسي من محجر الدرج وصييخ نار صار بگلبي من شفت رفل گاعدة ويه خالة رسمية وسلوى وشمس يشربن عصير ويسولفن..

-تَـمني: خالة وين الامير؟؟

رفعن روسهن كلهن يباوعنلي وخالة رسمية لطمت على خدها وگالت..

-صوااب شني هالحال يمة ليش طالعة هيج لا يجي واحد من الولد

-تَـمني: ماهمه هسة بس كوليلي خالة وينه اميرر

-الامـير علي: تَـمني؟؟

انداريت ملتفته على صوته اجه من ورايه، شفته لاف منشفة على خصره ووحدة على صدره وشعره مبلل..

-تَـمني: ههه هذا انتَ هنااا

فتح عيونه مصدوم واشرلي اروحله بدون لا يتحرك من مكانه ويبين نفسه گدامهن، رحتله مبتسمة بخجل وسحبني وياه يرجعني للغرفة وقبل لا يفتح حلگه ويرزلني سبقته وكلت..

-ضيعتك وطلعت ادورك

-ضيعتيني؟؟ شني نعال انا!

-امير شبيك اقصد طلعت من شفتك ماكو وظل بالي

-ليش يظل بالج شني گاعدين بچول، رحت اسبح بحمام الصالة و...

-رحت تسبح بحمام الصالة؟ مو عيب؟؟ شكدد تصرف عيب يصدر من شيخ مستقبل!!

-چا الشيوخ تخيس ما تسبح؟؟؟

-حمام بغرفتك وتسبح بي شكوو طالع تستعرض بعضلاتك بره هاا؟؟ بله شافتك رفل؟؟ بله شافتك شتسوي بعدين شلوون تستر نفسك عنها؟؟

-ولج انتِ اخرر وحدة تحجي عن الستر طالعتلي ببرنص الحمام تتبختر!! ولج اااااخ مسحتي بشواربي كاشي البيت جيبيلي المووس خل املطهننن

-هاي شبيك تره مچان اكو احد

-وانتِ شمعرفچ ماكو احد؟ شمعررفج!!

-امير اني اعرف وتأكدت صدگ كذب معقولة تفكر ممكن اطلع هيج واخوانك موجودين

-والله كلشي گمت اتوقع منج المسوودنة جيبي الموس ادگ شواربي صفرر واخلص من هالطيحان الحظ

-لا لا بشرف حبيبة الطاهر لا تتهور امير شبييك خلينا ريلاكسس

-انعل ابو الريلاكس لابو اليمشي وراج ولج عليتي گلبي عليتيي بفهاوتتچ

-مع الاسف عليك امير تزعلني منك والمفروض اني الازعل بس هو صوچي مزعلت عليك وخليتك انتَ التزعل وتزعلني

تنهد يرخي اكتافه تعبان ويهز براسه مأيس، عفته واخذت ملابس ومشط ودخلت للحمام ابدل ومشطت شعري هنا وطولت شوية بقيت واگفة اباوع لروحي بالمراية اضيع وقتي لحدما دگ باب الحمام واجاني صوته يگول..

-شني عصيتي

-اي

-طلعي اريد احاچيچ

-ما اطلع زعلانة

-طلعي اراضيچ

-ما ارضى زعلانة

-صيري حبابة امنية

-شوكت متصير انتَ حباب اني اصير حبابة

-حباية بعين العدو طلعي مو طلعتيها لروحي

ذبيت المشط من ايدي وفتحت الباب مثگلة وجهي عليه ضحك من شافني بهالحال وانوب ضوجني اكثر..

-شلون فرخة عنودية عندي

-شايفني دجاجة وتصيحلي فرخة؟

-اي وجبتلج ريش وياي من بغداد

عكدت حاجبي ممفتهمة قصده بس ما طول تساؤلي ثواني لانه طلع من جنطته الاخذها وياه لبغداد بجامة ستن لونها بنفجسي طوخ وبردانها ريش نفس اللون..

-هاي الچ فرختي

انطانياهة بأبتسامة واسعة دفنت عيونه، اخذتها من ايده اگلب بيها امانةً البجامة كلش حلوة وقماشتها تخبل تسوي واهس والريش مو اوڤر بالعكس ضايفلها لمسة حلوة.. هزيت راسي راضية عنها وهستوني دا اريد اتشكر منه واجتني لحظة ادراك جنطته شلون اجت هنا؟

-نزلت جبت جنطتك امييير!!

-خرب راسج عافت البجامة واللتهت بالجنطة حبيبة جابتها الي

-كذاب كذااب

-تَـمني راسي دايخ واشوفج ثنين هسة من التعب تسكتين لا اگلبها حرب البسوس!

-ما اسكت واريد اثبات مو انتَ النزلت!

-هاا تردين اثبات مو؟؟

-اي!

-خوشن

-لا لا غيرت رأيي بطلت

ركضت اشرد منه بره الغرفة ومخلاني اطلع سحلني من كبوس البرنص يرجعني للغرفة ويعض بأصبعه ويگول..

-وين طالعة هيييج وووولج

-نسيت والله

-تعاي ولج تعاي يمي

سحسلني يگعدني ع الچرباية غصب وهو رجع لجنطته شالها من الگاع وطلع منها علاگة صغيرة وگال بنبرة واحد معاجبه..

-هو صح انا مزاعلچ بس يلا ميخالف اكسب بيج اجر

-هلووو؟؟؟ منو المزاعل منو عيني؟!

-هههههه سكتي وغمضي عيونج

-ما اغمض

-ليش ولج

-انتَ مو امان

-لا أمني هالمرة وغمضي

تحمست وماكدرت اخفي ابتسامتي، غمضت عيوني وطلب مني ارفع ايدي اغطيهن هم خاف اشوف.. ظليت افكر شنو ممكن راح يراويني وبقيت على هالحال دقيقة كاملة الى ان گال بصوت ناصي..

-فتحي عيونج

فتحت على كيفي مترددة ومتحمسة بنفس الوقت ولا ارادي توسعت عيوني وفتحت حلگي مبهورة من شفت بيده علبة مقدفة وبوسطها خاتم بشذرة شفافة تلمع لمعع..

-يجنن اميرر يجننن

-عجبچ؟

-كللش يا الله يخببل

-جبته هدية لامي

غابت ابتسامتي الجانت من الاذن للاذن وانطفي حماسي بس كلش استحيت من تصرفي فـ فوراً عدلت على الموقف وگلت..

-هاا بالعافية تستاهل خالة

-راويتج كلت اخاف ما يعجبها وردت رأيج

-كلش حلو راح تفرح بي هوايه

-امم.. شو قيسي على ايدج

هزيت راسي معترضة اقيسه قبلها بس ما انطاني مجال وسحب ايدي يلبسني المحبس اجه على اصبعي فيت، خجلت اتأمله بيدي زايد لا يفهمني بطريقة غلط فـ نزعته بسرعة وحطيته بيده..

-اصابعي ارفع من اصابع خالة اتوقع صغير عليها لو تبدله

-لا ما يحتاج نبدله وهالمحبس الچ امنية

-لا

-شني لا

-كلت هيج من شفتني فرحانة بي مو؟

-هههههههه لا طبعاً يعني تتوقعين اجيب لامي هدية واكلج غمضي عيونج ولا تفتحيها؟

-گول والله

-والله هالمحبس الچ وما يلوگ الا بأيدچ

ضحكت خجلانة من لبسه بيدي مرة ثانية ويه الحلقة حطه، عضيت على شفتي من باس ايدي واصابعي واحد واحد وگال..

-الالماس للاماس

-هذا اللماس؟؟؟

-اي

-كذاااااب

-اهوووووو

-لا لا اسفة مو كذاب بس انصدمت

-ليش تنصدمين چا مو بنفسچ الالماس

-هاي شمعرفك؟ اني مگايلة لاحد ابد

-گلتيلي تمتم وبوكتها حچيتي وانتِ نايمة

-صدگ عود لو تضحك عليّ؟

-لا والله صدگ لسه اذكر گعدت من النوم لكيتچ گاعدة على الشازلونة وحدج خفت صاير بيج شي وكمت اشوف شمالج هناك بنص الليل بس شو من اجيتج احاچيچ اللتفتي عليَّ مبرطمة وتگليلي امير ليش ما تجيبلي محبس اللماس لو انا ما استاهل؟

-هههههههه وشلون عرفت جنت نايمة حچيت وعيوني مغمضة؟

-لا انتِ تفتحين عيونج وتمشين بنومج تَـمني تفترين وترحين وتجين وتتعاركين كله چن گاعدة بعدين افطن انتِ نايمة وهم اوقات ابقى حاير نايمة لو متخدرة

-هههههه وتالي شسويت ويايه بيومها؟

-خذيتج للفراش انيمج و ظليتي تلغين وتسولفيلي احلامج تگليلي من اتزوج مرة ثانية الا اخلي يشتريلي محبس اللماس

-عزاااا شكد عيبب

-تمنيت ادفرج دفررة بيومها اطلع ضيم كلبي كله بيج

-حتى واني نايمة افكر اتزوج مرة ثانية خرب حظي

گز على اسنانه ولزم راسي يخضه يودي منا ومناك ويضربني كلات براسه متت ياله هدني، جريت تلفوني وشالي وفلتت اطلع من الغرفة انزل جوه..

نزلت الدرج وشفتهن على گعدتهن والضحك واصل ليوين ولا كأنما البارحة صارت مصيبة، سلمت وعبرتهن اروح للمطبخ اشوف شمسوين غده لگيت الجدورة فارغة متغدين ومكملين گوة لميت التمنات وسويتهن ماعون وجريت خبزة گصصتها وثردتها للامير عدهم تشريب دجاج..

حضرت الصينية ودا اصب التشريب بالچمچة وجمدت ايدي من دخلت رفل للمطبخ، گلبي انقمت وعقلي فصل عن كلشي وبقى مركز بس بحركتها من راحت للثلاجة وطلعت منها بطل لبن وكالت..

-تشربون لبن؟

مجاوبتها اجت هي تحطه بصفي على الكاونتر وباوعتلي مبتسمة، وجهها بي اثار ضرب ازرگ ورگبتها محزوزة ويابس الدم هناك بلعت ريگي اسيطر على اعصابي وغيرتي حتى ما اهجم عليها واسوي مشكلة..

-هاي خضرة هم اذا تردون

-منريد

-تَـمني اني اعرف انتِ زعلانة ومقهورة بس اگدر احچي وياج شوي؟

-نريد نتغده

جريت بطل اللبن بأيدي اليسره اشوفها حلقتي الالماس الجديدة مثل الزعاطيط الما شايفين ولو بيدي احطها بعينها واراويها بس تمالكت نفسي وثكلت، حطيت البطل بالصينية وكلت بأبتسامة چذبية..

-اميري يحب اللبن شكراً رفل

رجعتلي ابتسامة وهزت راسها بمعنى العفو، لزمت ايدي اليسره وماعرف ليش هيج سوت باوعتلها مستغربة خصوصاً وابتسامتها مغابت ومدا افهم معنى ابتسامتها شنو لانها دارت ايدي تشوف المحبس وتگول..

-يجنن بالعافية كلش لايگ لايدج

-هاا

-المحبس جديد مو؟ يمكن هاي حلقة لان شايفته بالافلام الاجانب يلبسوه كـ حلقة

-احم.. اي صح

سحبت ايدي منها وحطيت الطرشي بالصينية وجبت كلاصات حطيتهم، اشتغل سريع بسرعة دگات گلبي الترجف..

-تَـمني امير طلگني

-ادري

-يشهد الله ورسوله اموري اخوي الما جابته امي واعزه اكثر من اخوتي الحقيقيين

-امممم

-ما عاينتله بيوم بنظرة اعجاب ولا هو والصار امس كله غصب عننا هو نحط بموقف صعب وانا..

-ادري رفل! گتلج ادري! امير حچالي كلشي وافتهمت الصار

-توقعتچ متعرفين بسبب تصرفاتج

-تصرفاتي؟ شنو تتوقعين اسوي؟ اهلهل وارگص واخذج بالاحضان؟؟ حطي نفسج بمكاني شتسوين لوحددة زوجچ عقد عليها البارحة ودخلوهم لغرفة؟؟

-اموتها

-اهااا وهاي انتِ گلتيها تموتيها واني مسويتها لاني اعرف انتِ مظلومة وامير گلي انتِ متردي وتوسلتي بي حتى ميسويلج شي بس بعده گلبي مداا تطفي ناره ومداا اتقبل الصار!!

-حگچ بس تَـمني انا الحياتي تدمرت وانا النهانيت وانجريت گدام الزلم مفرعة وانا النحزت رگبتي وانا العقدولي على اخوي! لا تلوميني على شي صار غصباً عني

سكتنا ثنينا بعد كلامها وجال الصمت بيناتنا لفترة، عيوني تحرگني من الدموع الحابستهن وعيونها تلمع بدموعها، دارت وجهها عني تمسح عيونها بأصبعها تردف..

-ليلة لحد هاللحظة مصدومة لا ترضى تاكل ولا تشرب من امس نايمة بالفراش ما صحت

غمضت عيوني اتنهد وافكر بحال الكل شلون انگلب برمشة عين، كم شخص تبهذل وكم شخص انجبر وكم شخص انهان وانداست كرامته كله بسبب عادات متهورة..

-تَـمني: وانتِ شلونچ

نزلت دموعها ورفعت راسها تبتسملي، فاجأتني من جرتني عليها وحضنتني ودفنت وجهها برگبتي تبچي.. صدمتني بحركتها ما توقعتها منها ابد خصوصاً بعد الصار البارحة بس حسيتها بعدها تعتبرني صديقتها القديمة تَـمني القضت وياهة ايام حلوة..

تنهدت محتارة من طولت بحضنتها وصارت تسولفلي الصار وياهن وحجم كسرتها وفشلتها وشلون ابوها راد ينحر رگبتها گطعت گلبي واذتني فوگ اذيتي وما كدرت اعوفها بهالحال بدون لا ابادلها حضن دافي واطبطب على ظهرها..

دام حضننا المتبادل ثواني وفزت رفل توخر مني بسرعة من دخلن حبيبة وسلوى للمطبخ يتسائلن عن صوت البچي، وگفت ورايه تمسح دموعها بأيدها و اني الجاوبت بدالها..

-دنسولف اني ورفل

-سلوى: حسبالي شو شنو صار

گلبت عيوني مزعوجة ذرة احساس ماعدها هالمرة، اجت حبيبة تشوف رفل وتسولف وياهة وبسرعة استجابت رفل وضحكن سوه متناسية موقفنا قبل شوية..

-حبيبة: تَـمني شلونچ ظل بالي من ما نزلتي امس

-تَـمني: جنت تعبانة شوية

-حبيبة: عايني راح اشرحلج كلشي صار تره الامير ورفل ما تزوجوا لا والله ما تزوجوا رفل گالتلنا وبساع طلگها عبنه...

-تَـمني: اعرف كلشي صار حبيبة امير شرحلي

تنهدت مرتاحة وهزت راسها فرحانة، لزمت ايدي وايد رفل ومشت بينا للصالة يم الباقيات، ما گعدت دقيقة لان تذكرت امير فوك بلا غده فـ أخذت الصينية وصعدتله بس هم ما لگيته بالغرفة!!

حطيت الصينية بالگاع وركضت اطلع ادوره وتلاگينه بالباب اني وياه، اشرلي افوت للغرفة بلا ما يحچي لان بنفس اللحظة طلع ابا الحسن علي من غرفة تقي وامير مبين چان يمهم..

-تَـمني: شصاير امير؟

-مصيبة

-يا ستار شنو الموضوع

سد باب الغرفة علينا وگعد بالكاع گبال الصينية، شله ردانه ومد ايده ياكل بنهم مال واحد ميت من الجوع، لگمة وره لگمة يحطها بحلگه مينطي مجال يبلع الاولى وياكل الثانية..

-ههههه لهدرجة جوعان امير

-فاطس

-بالعافية

-تعاي اكلي انا هم نسيت من الجوع انعمت عيوني

-اُكل اُكل اجيت اني

رحت للحمام غسلت ايدي وكعدت بصفه صبيتله لبن بالگلاص وصكه دفعة وحدة ورجعت صبيتله مرة ثانية..

-تقي شايف بت عمي مسعود سبأ على النهر ولاگفهم ابن اخوها

-عزااااااا

-هو بعد بس عوزنا مسعود يجي يردح بديواننا ويفضحنا

-شچانو يسوون يم النهر؟

-موگفها محاچيها على سالفة تخص حبيبة

-يا الله ما وگعت الا بسبأ الفقيرة! بس بلكت ابن اخوها ميحچي وتفهمه ان الموضوع عادي؟

-موضوع عادي؟؟ تهييييي بهيييييي

فر بيده مستهزأ وكمل ياكل، استغفر الله انوب انظمتلنا مصيبة جديدة والله يستر من عواقبها..

-شوف امير من الاخير اذا گلولك تتزوجها بعد لاا اعرفك ولا تعرفني!

-وانا شكو اتزوجها لو هو امير صاير حايط ياهو اليجي ينتچي عليه

-اني بس اريد افهم شغلة وحدة انتَ مو يردوك تصير شيخ؟ هو الشيخ مو بكيفه يحل ويربط ووظيفته يرتاح ويسوي كل اليعجبه لو شنو؟؟

-نوومه چنچ فاهمة فكرة الشيخ غلط

-فهمني شيخ المستقبل

-الشيخ مو بس چرچوبة يحطوه بنص الديوان ويتفرجون على كشخته ويشمشمون بعطره ويتباركون بعباته، تَـمني الشيخ قاضي وچلمته سيف تفصل بين الحگ والباطل ياما وياما عشاير انعوجت بسبب شيخهم وياما ناس تذابحت وانفصلت ظلم من وره شيخهم الطماع

جر كلينسه يمسح ايده وكمل بنبرة جدية بدون عصبية..

-انا بعمري ما تمنيت اصير شيخ وكاره ونافر من المشيخة لان الشيخ يكون محط انظار الكل ولو ما اتخذ موقف او مشى بدرب يرضي محيطه توصل بيهم يمسون رجولته وهالشي صعب اكثر مما تتخيلين.. وهاي من غير التجارب والاختبارات الي يخوضها خاطر يثبت بيها كفائته ويبرز حكمته وقدراته على حل الامور وفض المشكلة

-معنى كلامك الشيخ مظلوم لان من ابسط غلطة تصدر منه يصير علچ بحلوگ الناس

-بالضبط وهاي من غير كل مشكلة وكل سالفة وكل طلابة وگعت براسه وتعال يا فلان خلصنا وتعال يا علان انصفنا.. المشيخة شي چبير بس اكو وادم ماخذين فكرة على ان شيخ العشيرة والعشاير كشكل عام وظيفتهم بس يفصلون بالوادم وينحرون بالبنيات ويجوز اكو منهم صدگ هيج بس مو كل اصابعنا سوه امنية

-مثل عمو علي شلون رجال حباب

-عمچ علي وغيره هواي الدنيا متروسة ناس خيرة وتخاف الله بس دائماً الخير والمعدل ما يحب يبرز نفسه وينغر ويميل لحل المواضيع بودية وهدوء عكس الملطلط والزايعته الگاع يجاهر ويسولف ويستقتل خاطر يبين روحه والوادم تعرفه وطبعاً هالشي ينطبق على كل فئات المجتمع مو بس بمجتمعنا العشائري

-بس امير اذا الزين سكت بكل مرة منو يعلم الناس ويوجهها؟ منو يظهر الحقيقة وينطي عبرة من تجاربه؟

-انا ما اگلچ ان بكل مرة لازم نسكت ونحلها بهدوء لا ليش اچذب عليج عدنا گعدات صارت شهرنا بيها وكل امارة موجودة بالعراق يعرفون هالگعدة والطلابة تابعة النا وحنه الحليناها بس مغزى كلامي مو بكلشي البشر لازم يسولف بي ويخلي الدنيا كلها تفتهم اكو مواضيع بس تحچين بيها تضيع هيبتها

-وانتَ متريد تصير شيخ حتى متضطر تكون جزء من هالمعاناة والدوخة كلها؟

-انا مو گدها وغيري اولى بيها

-انتَ گدها امير

-لا تَـمني الحچي سهل ويجوز اكون گدها لو چنت عزابي مو متزوج وعندي مرة مايعة ونعووصه تصيح لو كضيت ايدها زايد

-يااا امير تره انتَ قاسي بس متنتبه على روحك والله توجع من تلزم ايدي خصوصاً من تجرني احسها راح تنگطم

-مو انا اعرفچ بزر نستلة ما تشوفيني ما هاوي المشيخة

-لا تذبها براسي انتَ من قبل متريد تصير شيخ

-عبنها مو ثوبي واكو احكام نضطر نمشي عليها ما ترضي الله بس ترضي عباده وانا ضدها وما جاي اقتنع بيها ابد

-ابقى ضدها لان مع احترامتي الك يا امير الامارة الجاي بس اكو عادات تمشون عليها تقهر عبارة عن جهل وقلة وعي وتخلف

-رحم الله والديج

-ولوو بالخدمة

-سديتي نفسي ام خدمة شيلي الصينية ولحگيني

-عزا بعيني وين اللحگك

-امشي بلا حجي زايد

-وخرر ما يااا عزاا.. امير لاا لااااا....

**

"حــبيبة"
عجزنا ويه ليلة لا ترضى تاكل ولا تشرب الصخونة تدگ بيها ونايمة بالكاع ملفلفة روحها بالبطانية، تعبنا وانهد حيلنا وياهة وما راضية تكوم ناخذها للطبيب..

-رفل: ليلة كومي والله گلبي خلص گومي يا خيتي تعبت

-عبق: بنات عمو علي گال نزلوها هو ياخذها للطبيب اذا متقبل بأبا الحسن

-ابا الحسن علي: هو بكيفها!! شصخمم وياچ ابا الحسنن وهيج كارهته شسوووالج

-رفل: ابا الحسن شوي شوي عليها شمالك يا خوية مو هيج

-ابا الحسن علي: دمرتنيي طيحتته لحظيي من امس لليوم ماا تااكل ما تشرب وعلاجها ما جايسته شنيي تردين تموووتين؟؟ ولج ترديين تموتين حسبالج هيج تعاقبيني؟؟؟

-حبيبة: حسن اطلع بره اطلع فدوة لطولك خلي اختها تحاچيها بلچن تقتنع

دفعته اطلعه بره شلع گلبي ما يتزحزح نابت بالغرفة ما يرضى يطلع، اعرفه من جوه ميت عليها وخايف ورجفته تفسر هالشي بس بعده معصب منها وضايج بنفس الوقت وعصبيته جاي تخليها تعاند اكثر..

-ابقى هنا حسون لا تجي فدوة

-حبيبة تعاي بس احاچيج تعاي

جرني من ايدي يسحبني بعيد عن غرفته ومد ايده بجيبه يطلع منه شريط حبوب، حطه بيدي وگال بصوت يتوسل..

-شربوها عصير وطحنولها هذا العلاج بي بلچن تصير احسن وترجع على حيلها

-صار حاضر

-حبيبة لا تعوفيها ابقي وياهة وعينج على موبايلج كل شوي راح ادگلچ طمنيني انا هنا كاعد ماروح لمكان

-ابا الحسن نام بغرفة تقي وعوفها خليها ترتاح

-سوي الكتلج عليه حبيبة ولا تتعبيني

اعرفه ما يتعاند فـ سكتت وهزيت راسي موافقة، گعد بالصالة على القنفات وعينه على باب غرفته رجعت للبنات بس ما خلتني رفل ادخل كالت ليلة كامت وتريد تسبح بلكي تفك منها الصخونة..

-حبيبة: خوش چا هاج هذا العلاج كسري الحباية وحطيها بعصيرها جبريها تشربه

-رفل: تمام

طلعنا من الغرفة وبقت بس رفل ودخل ابا الحسن هم شوية وطلع عرفتها كملت سبح وماقبلت تشوفه.. رجعت لغرفتي ميتة تعب الصار امس خذه ثلثين حيلنا لا نوم ولا راحة بس نفتر مثل المخابيل ماندري شنسوي وشلون راح تفض..

جريت ملزمتي اليوم جان عندي امتحان صعب وما رحت وادري بالدكتور مو سهل ويصفرني، گلبت بالملزمة اشوفها وافكر شون ارفع سعيي بالشهر الجاي ما بقى شي على الفاينل لازم ابقى محافظة على درجاتي..

فتحت موبايلي وراسلت صديقتي اسئلها على الاسئلة اليوم وصدمتني من كالت اكو مؤجلين ويجوز الدكتور يقبل يعيدلي الامتحان.. إبتسمت فرحانة اخييراً شي يفرح صارلي خلال هالاسبوعين الطوال..

دگ موبايلي بيدي "حور" حييل صار چم يوم ما متشاوفات خطية رجعت لبغداد عدهم معاملة نقل اخوها وكلهم راحوا سوه، جاوبتها وبالبداية تسالمنا وسألتها عن حالها ووراهة بدينا بالاخبار الدسمة..

-حور: راح تنخطبين؟؟؟؟؟

-حبيبة: اي حور

-صدگ تحچين حبيبة لو تشاقين؟؟ باعي لو شقه والله ازاعلج

-لا ولج ياريت شقى صدگ راح انخطب

-لمنتصر؟؟

-شمعنى گلتي منتصر؟

-ها.. مو مادري يمكن لان ابن عمج توقعتج مخطوبة اله

-لا مو لمنتصر لزلمة يصير ابن صديق ابوي اسمه زين العابدين

سكتت فترة ما تجاوب عبالي انگطع الخط بس شفته بعده مشتغل..

-الو حور وينج؟.. الو؟؟ حويرة وينج.. شني نمتي؟

-اجيت اجيت اوكفي بس دقيقة اوكفي

مبين سوتلي كتم من يمها لان كلشي ما ينسمع بعد صارت سنطة، عفتها براحتها وتحسرت اتذكر خطوبتي الما بقالها شي الندم ماكلني وكلما اتذكر اختنگ من السالفة شون مشيت على كلام رفل ورضيت شوون ما رفضت الزلمة گبل لا توصل للحلگ ونحجي بالمهر!

-ها حبيبة اجيت اني

-هلا بيج خية

-شوكت انخطبتي داده؟

-حيصير شهر تقريباً

-ها

-اي خية

-حبيبة اذا شسمه.. اذا.. اوكفي باعي ماعرف شلون اگولها بس لا تفهميني غلط و...

عكدت حاجبي مركزة وياهة وفجأة راح صوتها چن شخص سحب الموبايل منها وما چذب احساسي لان اجه صوت مرة من الموبايل عرفتني عن نفسها وگالت تصير ام حور بس صوتها مال شابات..

-شلونچ حبيبتي حبيبة شخبارج؟

-حبيبة: بخير خالة الله يسلمج انتِ شلونچ

-بخير اني الحمدلله، انتِ مرحلة ثالثة تحليلات مو صح؟

-اي

-حلو بالتوفيق يعمري، حبيبة ادري صارت بسرعة ومو من الاصول نحچي بالتلفون بس تعرفين احنه ببغداد وتوازينا بخبر خطوبتچ، واني امانة الله حبيتج وحور هوايه تحجي بأخلاقج العالية واخلاق اهلج والنعم منكم واحنه حابين نناسبكم ونطلب القرب منكم

فكيت حلگي سبع امتار ويه جملتها وانوب كبرت صدمتي من اردفت..

-ابني حاكم دكتور ومبقاله شي وياخذ البورد وما امدح بأبني اخوانچ يعرفوه شنو وابوه المرحوم منو وواضح حاكم شايفچ وباقية براسه ههههه وحورية صارلها شهرين تسولفلي بيج ومن السوالف حبيتچ يا حبيبة فـ بيها مجال نزوركم بالبيت باچر؟

استمريت جافلة وماخذة وضعية الطرنة، غير اريدن الچلمة تطلع من حلگي ابدد لزگت ما تنطق عندي راح صوتي والمرة ظلت تصيح الوو الوو بالموبايل وتگول..

-هاي يمكن انگطع الخط حورية

وحور تجاوبها..

-لا ماما ممگطوع الوو حبيبة؟ الو؟؟ صدگ هاي يمكن انگطع

طبگن الخط وگبل لا يدگون عليّ مرة ثانية طفيت النت وبساع فصخت موبايلي وطلعت الشريحة ذبيتها بعيد ولفيت راسي ونمت ماريد افكر بالموضوع ولا چن صار شي ولاا چن ام حور هسة خطبتني للسلنگح ابنها!

غمضت عيوني وبساع خذاني النوم من التعب وما گعدت الا على صوت علي التـقي جاي من الصالة واصوات سور ونور تتداخل وياه، گمت غسلت ومشطت شعري وطلعت من الغرفة شفتهم گاعدين بصف تقي كلمن من جهة وكاضين ايده يتوسلون بي..

-علي السور: عليك العباس ما تفشلنا ويه جماعتنا وتجي ويانه لاربيل تقي ابوي گال ما ترحون وحدكم الا تاخذون واحد من اخوتكم الكبار واول واحد اجه على بالنا انتَ

-علي التـقي: ماروح لمكان ولو عن وجهي

-علي النور: تقي ترضى نروح منا زعلانين ومكسورين خاطر؟ ترضاها؟؟

-علي التـقي: اي

-علي السور: لا لا ما ترضاها ادري بيك تشاقينا

-علي التـقي: تشوفوني اضحك؟ لا! يعني ما جاي اتشاقه فـ ادعبلوا

-علي النور: تقي اذا اجيت ويانه نبوسك

-علي التقي: صددگ؟؟؟

-علي السور: اي والكعبة

-علي التـقي: الله شنوو هالاغراءات صدگ سور ونور تبوسوني اذا اجيت وياكم؟

-علي النور: واضح طاگك الجفاف يا خوية عمت عيني تدلل ابوسك بوستين وحدة منا ومنا غالي والطلب رخيص

-علي السور: وانا هم ابوسك بعد شتريد بس لازم تجي ويانه ما نوزع بوسات مجانية

-علي التـقي: لا صدگ!

-علي السور: اي بعد هاي الدنيا كلشي بمقابل

-علي التقي: خاب گمممم ميتت على بوستكم الخايسة ولووو نزلوا لاا اگطع نعالي عليكم

-علي السور: ما تستاهل بوستنا المباركة وعلي

-علي النور: ياما ويااما زوجت ناس هالبوسة وطرحت البركة بالوادم واولهم حبيبة بسناها گبل شهر وبساع انخطبت

هزيت ايدي عليهم وعلى ثقتهم اليذبح مقتنعين برواحتهم ونزلوا يدردمون چن تقي فوت بوسة ملاك منزه مو بوسة سور ونور التشفط الخد شفط..

-اظن زوج المطيرچية ناصبين علينا

-اي اكيد

-اگلچ

-ها گول

-علي التـقي: ماعندج تواصل ويه بنات مسعود؟

-لا ماعدهن موبايلات البنات ليش؟

-هيج

طب لغرفته وطبگ الباب وراه هذا هم متغير وصاير غامض تقي اول تالي تقتق يضم عليَّ ويعبرني بدون لا يبوسني ويحضني ويطيح حظي بالتجعص بس بعد هي كلها تغيرت بقت عليه..

نزلت جوه شفت الكل هنا، شمس وبدر گاعدين بصف بعض يسولفون بالهمسات وشمس تضحك ميتة من الضحك وبدوري صافن على ضحكتها.. ومن الجهة الثانية كاعدين المعاكسين الهم علي الدر وابرار واحد داير وجهه عن الثاني ويفكرون بهمهم..

-رسمية: صددگ چذب وينه امير من امس ما شايفته!

-سلوى: نايمة على خوانيگه بت السحار حارمته حتى من امه!

گعدت على القنفة بصف عبق ساكتة مابيه اسولف وامي مستمرة تصد وترد هي و امي رسمية..

-رسمية: يجوز مريض وما يحچون؟ روحي رفل رووحي يمة شوفي زلمتج

-رفل: اوووع عمة شني زلمتج الامير طلگني لو نسيتي؟

-سلوى: طلاگكم باطل مابي شهود

-رفل: ما يهمني بكل الاحوال انا حاچيت عمة رسمية وفهمتها ماريد هالزواج ولو ابقى عايشة عمري كله هنا هم ما اصير لامير مرة

-رسمية: اي اي خايبة شبيچ بساع تگبين اليسمعج يكول امير كاتل روحه عليج هاي وهو عنده مرة تخبل چنها لعابة

-رفل: اي چا شكو بعد خلي يحافظ على لعابته احسن

ضحكت على تناقض مرة ابوي ما ينعرفلها ساعة ويه تَـمني وساعة ضدها بس بكل الاحوال هي تحبها وصدگ احجي والله تحبها وما ترضى احد يحجي عليها، اوقات تحجي عليها اي، تزوج الامير بكيفها اي بس مال واحد ثاني يتدخل بيناتهن ما ترضى وتصده بساع..

نزلوا المعاريس من فوگ اخيراً، تَـمني طالعة تخبل كاشخة بـ بشت وردي فاتح وحاطة شال اوف وايت على راسها وبيدها جنطة اوف وايت ومكمشة بأيد امير ما هدته لحدما وصلوا لنص الصالة سلموا علينا وگعدوا حد بعض وبعدها ايدها بيده..

-عبق بهمس: الحب يتطاير من ذولة الثنين تدلاحظين لو اني ابالغ؟

-لا حبي ما مبالغة كلامج صح

-رسمية: هلا يمة هلا اموري زين من تذكرت امك

-الامـير علي: عذريني يوم حگچ عليّ بس اللتهيت بالمرسم

-رسمية: عفية هالمرسم لا شفناه ولا عرفنه شبي

ابتسم وگام من مكانه باس راسها وايدها وگعد بصفها يحضنها لصدره بسرعة تغيرت ورجعت تضحك وياه وويه تَـمني..

-تَـمني: ليلة شلون صارت؟

-رفل: بعدها على حالها والله

-السلام عليكم

وگفنا كلنا من رجع ابوي من بره وطب علينا رحتله بست ايده وجر وجهي يبوس بخدودي، نزع بشته حطه على چتافي وگال بأبتسامة..

-شيخة الشيخات

ابتسمت بدون لا احجي شي ونزعته اخذه لغرفته علگته وره الباب ورجعت للصالة بس حسيت بالوجوه تغيرت وابوي مو طبيعي چن بحلگه حچي..

-شيخ علي: شونج تَـمني بوية؟

-تَـمني: بخير عمو

-شيخ علي: امير تعال للغرفة اريدك

-الامـير علي: صار

گاموا سوه واندار ابوي على رفل واشرلها يگول..

-تعالي رفل عمي انتِ هم اريدج

انتبهت لوجه تَـمني ينخطف ورفل ظلت جامدة بمكانها وفاتحة عيونها، صاحلها ابوي مرة ثانية ياله گامت وراهم وطبوا ثلاثتهم للغرفة وطبگوا الباب وراهم..

-تَـمني: ليش اخذوا رفل وياهم؟؟

-سلوى: چا غير عرسان جدد ويريد يباركلهم

-تَـمني: عرسان شنو؟؟ امير مو طلگ رفل لو اني غلطانة؟؟

-رسمية: اي يمة طلگها

-سلوى: ابشرچ يالمايعة طلاگهم باطل

-تَـمني: باطل؟؟ شنو باطل هو طلگها شلوون بعد باطل

-رسمية: يا يمة صلي على نبيچ واستهدي بالرحمن

-حبيبة: اي حبي صلي على محمد وارتاحي اكيد ابوي صاحلهم على شي ثاني ماله غرض بالزواج

-تَـمني: حبيبة جاوبيني انتِ متكذبين عليَّ صدگ طلاقهم باطل؟ صددگ؟ جاوبووني اخوان امير احچوو

ظلوا اخوتي ساكتين محد بيهم فتح حلگه ومرة ابوي تصلي على محمد بصوت عالي وتقرا الفلق والناس وتنفخ بالبيت..

-سلوى: بااطل امي بااطل ماكو شهود من طلگها

-تَـمني: شيسوون بالشههود لا تخبلووني يعني امير كذب عليَّ؟؟

-علي الدر: خوية استهدي بالله ولا تستعحلين بالحكم عليه يجوز الزلمة راح من باله وحسباله وقع الطلاق انتظري خلي يطلع ويفهمج كلشي

بقت تلوب وعيونها مدمعة، گامت تريد تطب للغرفة الراحولها ورجعت لمكانها تروح وتجي تراوح وما تعرف شتسوي، گمنا انا وعبق والبنات نهدأها بس گالت مابيها شي ووضعها زين بس عليمن تضحك حرگتها ونار الغيرة الجاي تطلع من گلبها وصلت لكل نفر موجود بالصالة..

علما طلعو من الغرفة ابوي وراه رفل والامير البت طلعت روحها وماعت بين ايدي رادت تطيح، ركضلها الامير يسندها ودفعت ايده وگالت..

-مبيه شي وخر

وگفت عدل ورتبت شالها التزحلگ من راسها وداروا اخوتي وجههم عنها، اللتهيت وياهة اساعدها وقاطع حركتنا صوت ابوي القوي من گال..

-شيخ علي: بوية ما دامنا منجمعين عندي چلمة اريد احچيها وياكم

-علي الدر: گول بوية نسمعك

-شيخ علي: الصار امس چبير وما ينسكت عنه.. الامـير علي ستر علينا ورجع كرامتنا انا اعترف حطيته بموقف صعب وحطيت مريته بموقف يوجع الگلب بس بعد البشر ينعرف بالشدات واموري زلمة ورفع راسنا وحافظ على شرفنا وشرف بت عمه.. اجيت خاطر اگول گدام الكل الامـير علي ما كض رفل ولا لمس ايدها والبت شريفة وينحلف براسها وطلگها بنفس الساعة احتراماً لمريته وكفو منه بس يا جماعة الخير طلاگهم باطل وما يصح الا بوجود شهود..

سكت ابوي وتوزع الصمت بالمكان منتظرين تكملة الكلام منه بس مو هو الاردف يكمل الامير حچى بداله وگال..

-الامـير علي: بوية انتَ دائماً تگول المرة الزينة تنعرف من يطيح زلمتها بشدة والزلمة الكفو اليقدر وگفة مريته وياه وانا اگولها وگدامكم كلكم تَـمني وگفت وياي وتفهمت موقفي وسندتني والنعم منها ومن اصلها وانا مكتفي بيها وما ابدلها بنسوان الدنيا والاخرة.. ورفل تبقى بت عمي واخيتي وتاج على الراس شرفها من شرفي وگدام الكل ارجع كرامتها واعتذرلها عن تصرف ابوها واگللها كلنا وياچ وبظهرچ وما عاش اليمسچ بحچاية يا بت عمي..

ابتسمت رفل ونزلت دموعها تهز براسها، باوع امير لـ تَـمني الجافلة بين ايدي ورجع عاين لرفل، بادلها ابتسامة راقية وگال گدامنا كلنا بهدوء وبدون أي تعصب..

-رفل انتِ طالق

-سلوى: ياااا يممممة

خزرها ابوي على عيطتها العاطتها بنصنا ودگت على وجهها، ما اهتمت لخزرة ابوي وركضت على رفل تحضنها وتبچي وتصيح..

-سودة عليّ شذنبج تتطلگين بهالعمر شذذنبج

-شيخ علي: سلوى!!

-سلوى: شيخ علي ما رجيتها منك تفضل الغريبة على بت اخوك

-شيخ علي: شهالحجي؟؟ شبيچ انتِ؟ البت ما تريده وهو متزوج ومكتفي بمريته والصار كله خاطر نسد حلوگ الوادم ونرجع كرامتنا الداسها ناصر

-سلوى: حتى لو شيخ حتى لوو تبقى بت وانكسرت

-الامـير علي: ما تنكسر اخيتي وانا موجود وما اكسر بمرتي لخاطر سوادين عمي فـ هاي المسرحية مالها داعي واحتفظي بدموعچ لغير وكت

گالها وگعد على القنفة يحط رجل على رجل واشر لـ تَـمني تگعد بصفه، گعدت بدون صوت وبدون لا تصدر منها ردة فعل عبالك بعدها مصدومة من خبر طلاقهم چان باطل وما رجعت لوعيها حتى من فرشنا سفرة العشا وكعدنا ناكل سوه..

-شيخ علي: رفل ابوج حسابه يمي بعدين وبكيفج عمي تبقين ويانه هنا عايشة معززة مكرمة لو ترجعين لبيتكم انتِ حُرة

-رفل: ما تقصر عمي رحم الله والديك

كملنا عشا وگامن شمس وابرار وعبق يشيلن السفرة، تَـمني شالت جنطتها تريد تروح لبيت خالتها وامير مبين عليه كلش مزعوج وما حاب روحتها بس ما اعترض وطلعوا سوه گدامنا..

-رفل: انا اصعد اشوف ليلة شون صارت

-حبيبة: جاية وياچ

صعدنا سوه وشفنا ابا الحسن كاعد بالصالة وكدامه ملفات جاي يشتغل بيهن، فز رافع راسه من شافنا ونتر بينا معصب..

-هااا هسة شرفتن؟؟

-حبيبة: شني شبيك

-ابا الحسن: ما ترحن تشوفن البت شبيها صدگ ما عدجن احساس!

-رفل: رايحات خايب شبيك محمل علينا

عفناه ضايج وطبينا لغرفته ضحكني ما يروح هو يخاف لا تگب بيناتهم، فتحت الضوه وشفت ليلة على نومتها راحتلها رفل تحط ايدها على راسها تقيس حرارتها واندارت عليَّ فازة..

-ولج تسمطط سمططط

-حبيبة: كشفيها يمعودة

كشفتها بساع وجفلت رفل تعاين لاختها، مديت راسي اشوف شبيها وگلبي وگف من شفتها سابحة بدمها! دم كل مكان دمم البطانية السودة ناكعة والفراش وملابسها مدمورات والبت روحها رايحة ما جاي تصحى!

-رفل: يمممة اختييي ليللة ليييلة كعدي ليييلة

طب ابا الحسن يركض للغرفة مبحلگ عيونه يريد يفتهم شكو وجمدت رجله بالباب من شاف ليلته بهالحال، تخبلت من شفته صافن ما يتحرك بس فاك عيونه وشارد بيها..

-حبيبة: ابا الحسن تعااال شبيييك خلينا ناخذها للمستشفى!!

طلع تقي من غرفته على صوتي ودفعه ابا الحسن بعيد ما يخلي يطب للغرفة وركض على ليلة، لفها بالبطانية وشالها على وضعها ونزل بيها يركض مثل المخبل وانا ورفل نركض وراه، صاح ابوي بي يوگف يريد يفتهم شصاير بس ما انطه لاحد مجال وطلع بيها لسيارته، ما لحگنا نطلع وراهم ونستوعب وگعة ليلة واجانه اتصال من منتصر وگف گلوبنا......!

يتبع 👑...

━━━━━━ ♛ ━━━━━━

آلتعب يقرا مليون