الامارة الفصل الثامن وأربعون 48 - بقلم 𝐙 𝐇 𝐑 𝐀

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

آنه اخاف مِن
الامان المّاهو يمچ
آنه كُل خنگاتي
چي مَجاي اشوفنچ
شلي بعيّوني؟
يَبعد عيوني اذا
مو بيها أضمنچ .♥️

━━━━━━ ♛ ━━━━━━

-حبيبة: يمممماااا امييييي يمممما كووومي يممماااا

عياط هوسة هرجة وصوت حبيبة يزرف طبلة اذاننا وگلبنا، ركضت خالة رسمية على سلوى السبحت بدمها وكل البنات ركضنا نتورشعها.. محد من الولد هنا بس علي الحـق واكف يتفرج ويرجف من العصبية تخبلت من الشفته مدا اصدك الصار!

-تَـمني: علي الحـقق تعاال خلينا ناخذذها للمستشفى!!

ويه عيطتي دخل تقي وجمدت رجله بالباب من شافنا بهالحال، ماطول ثواني وركض علينا ميعرف شيسوي شاف حبيبة بهالحال نايمة على جسم امها وتبجي افتهم الصار وتخببل..

-علي التـقي: تخبللللتتت ولك حققق تخبببلت انتَ

-علي الحـق: هدددني مااعليك انتَ وييييين عبببق ولج كووومييي

راح لجسم سلوى يريد يرفسها برجله وتقي دفعه بعيد يعيط متسودن..

-مااا تخاف ربك انتَ ماااا تخاف الله

-وووولك وينهااااااا

سحب اقسام من مسدسه يريد يكمل عليها خلانه نموت بمكاننا والله رجليه بعد متشيلني وخالة رسمية انهارت راح توكع علينا، لگف تقي السلاح من ايد اخوه على غفلة وشمره جوه الدرج وصار يتعارك وياه ويتصارع يريد يثبته ويعيق حركته ميكدر علي الحق صار انسان ثاني وعيونه متشوف غير سلوى يريد يذبحها..

-حققق اصحححى علي الحـق!!!

-ووخررر مااالك غرررض هددني تقيييي ولك تقيييي

-عليييي والله ابوك يذبحككك والله هييييد واعقللل

ضربه على صدره ضربة قوية خلاه ينرد ليوره واللتفت تقي على سلوى وحبيبة الي انتهت من البجي، جرها من امها جر ونصى على سلوى وشالها يركض بيها يطلع من البيت، هرولت رسمية تلبس عبايتها وجابت وحدة لحبيبة وطلعن سوه وره تقي، لحگتهن شمس تريد تروح وراهن وعاط بيها علي الحـق صووت فززنا..

-علي الحـق: اوكفي شمممس

اللتفتت تباوعله والدموع مغطية وجهها، باوعلها مخنزر عيونه راح تطلع من وجهه وتقدم عليها بخطوات سريعة واسعة..

-عبق وين؟!!!

-شمس: ماعرف

-شمس راح اسأل مرة وحدة وراح تجاوبيني بدون مطمطة! عبق وين؟؟؟؟

-شمس: مااعرف والله ماعررف

خزرها بحدة اكبر وهي ظلت تبجي وتهز براسها متعرف بس ما طولت هواي بسكوتها وما اللومها، خزرته وملامح وجهه تخوف حتى الممسوي جريمة يعترف على روحه ويكول سويت..

-شمس: علي الحـق يشهد الله ودااعة البطني ماعرف عبق وين بس اعرف بسلوى تكرهها وسوت المستحيل خاطر تأذيها

-شسوتتت؟؟؟

-عاين انا مادري اذا الموضوع.. اذا.. الموضوع اله ربط بـ عبق بس بآخر فترة.. بآخر فترة صارت تتردد علينا مرة و.. وتحچي ويه سلوى.. هي حرمة تلبس بوشي وتغطي حتى عيونها

-اي؟؟؟

-وعلى مرة شفت سلوى تنطيها فلوس ومن شافتني لگفتها خافت كلش ووجهها انخطف لونه وهددتني اذا حجيت تخرب بيتي

توسعت عيوني بصدمة ودرت وجهي لـ رفل المستغربة، بچت شمس اكثر بقهر واضح وجهها صاير كلش احمر ولازمة بطنها حيل خفنا عليها لا يصير بالطفل شي وهو هم ما طوخ وياهة بالاسئلة هز راسه وعافنا وطلع من البيت كله..

-ليلة: شمس ليش سكتي كل هالفترة وما حجيتي؟؟

نزلن دموعها مرة ثانية وكعدت على القنفة مهدود حيلها، هزت راسها تعبانة وكالت..

-شمس: هددتني.. انتم ما تعرفون سلوى شني من بشر ما تعرفوها

-رفل: نعرفها وعاشرناها سنين مو امس اجتنا سلوى

-شمس: لاا انتم ما تعرفوها سلوى شيطاانة ماعدها ذمة وضمير مرة يتعلم منها ابليس!

-سبأ: اي والعباس

-ليلة: حتى لو سلوى شيطانة جان لازم تحجين شمس جاان لازم تحجين

-تَـمني: على كيفكم بنات وياهة ثانياً هي شمعرفها الموضوع اله ربط بـ عبق؟ شنو تشم گفه ايدها!

-رفل: صحيح كلام تَـمني بس هسة لازم نعرف علي الحـق شسامع وطب علينا هالشكل وليش تهجم على سلوى هيج

هزينا روسنا مأيدين كلامها ونفكر شلون راح تصفى، سلوى راح تعيش لو لا؟ وعبق راح ترجع لو لا؟ وعمو علي شنو راح يكون موقفه من الصار!

تأخر الوقت وصعدت لغرفتي تعبانة رحت لتلفوني شفت خمس مكالمات فائتة من الامير ومكالمات من تالة وخالتي وكومة دازيلي رسائل.. فد مرة تعبانة وماعندي طاقة اجاوب احد كلمن دزيتله رسالة ابلغه راح انام وسديت تلفوني وحطيت راسي ونمت..

ومثل كل يوم دخلت بعالم الاحلام واستقبلني كابوس مرعب، صار اسبوع ما تغفى عيني اذا ما اتحلم بشي غريب او اتحلم بأضغاث احلام.. احلامي عبارة عن خربطة بخربطة اشوف محسن يبجي والامير يعيط عليَّ وخالتي تتعارك ويايه وولد مسعود يتفرجون عليَّ من بعيد وافز من نومي مخترعة..

بديت اتعود على هالوضع وصرت ما اشاركه حتى ويه خالتي.. كعدت ثاني يوم على صوت صياح ومن نبرة الصوت عرفته شيخ علي خفت حتى انزل من العياط المخيف شكدما عالي واصل عندي.. كمت بسرعة من الفراش بس غسلت وجهي وحطيت شال على راسي ومديته من المحجر شفت الصالة محتركة شيخ علي لازم عگاله بأيد والشماغ بالايد الثانية ويهدد..

-قسماااً بجااه الله لو شفتتته معتتتب باااب هالبيييت احش رجلييه حششش

-علي التـقي: بوية صلي على محمد شساالفة

-شيخ علي: ولااا چلمممة بعلييي اچفص ببطونكم ولددد العااار تسودنتووووا استفحلتوووا **** بچبيركممم المااعرف يضبكممم هاي وانا بعدني ماا فطستتت ووليتوناا ولييية چااا لو انگبررت شتسوون

-ابا الحسن علي: شيخنا اهده وجر نفس لا يصيرلك شيي

-علي التـقي: بوية علي الحـق غلط ادرري غلط بس لا تأذي رويحتك مو زين عليك

-شيخ علي: ويينه المسوووي روحه زلمة ونافخ عضلاته على نسوان بيتتته اسمع ولك تقييي بلغه وگله ابوووي ما يريد يشوف چهررتك بعدد روووح ولي بعيد عنه يحررم وجوده بهالبيت بعدد فهمت لو لااااا

-رسمية: فهم شيخ فهمم والعباس فهم بس ارتاح انت

-شيخ علي: ولج لووو ميتة وين نودي وجووهنا ويننن انطي وجهي ودخيلة بيتيي اعتدوا عليها ويييييين

-رسمية: ما ماتت ابوي انتَ ما صار بيها شيي علي الحـق مو غبي ويعرف وين يضرب

خزرها عمو خزرة سكتها وسكت حتى ولده الكل انضرب لاصق على حلوكهم ووكفوا على جهة خانسين وهو طلع من البيت واكييد متوجه للمستشفى.. توترت من الصمت وما ردت ابقى هنا وحدي ورجعت لغرفتي اتصفن بالحيطان وافكر وهيج مشى يوم جديد بدون عبق..

ثالث يوم رجعت سلوى من المستشفى واني مو لخاطرها اكيد رحت اتحمدلها على السلامة وانما لخاطر حبيبة الماتت على امها، كعدت وياهة اصبرها وادعي لامها حتى تكون بخير بس يا خير چنها صل كلشي مابيها كاعدة على حيلها ومن يجي شيخ علي تلزم بطنها عود متأذية لانها انضربت هناك..

للعصر اجن العمات ومثل العادة رجعت الحياة طبيعية كدامهن وخالة رسمية حبست سلوى بغرفتها متخليها تطلع، ارتاحيت من طلعن بسرعة بس شربن چاي وراحن لان عدهن واجب وحدة من صديقاتهن مزوجة ابنها ويردن يرحن يباركنلهم..

-رسمية: يا علي دخيلك تعبنا

-تَـمني: خالة ماكو تطور؟

-رسمية: خابرت تقي يكول ان شاء الله خير

-ليلة: يعني شنيي

-رسمية: مادري ما رضى يحجي زايد

-تَـمني: ان شاء الله خير

-رسمية: كومن يمه سون لكمة ناكلها صار چم يوم متبهذلين والويلاد جواعة بلچن ياكلون اليوم

-رفل: صار، يلا بنات

كمنا سوه للمطبخ نسوي عشا وماعدنا غير موضوع عبق نحجي بي، اباوع لـ حبيبة انطفت وجهها شاحب وعيونها ذبلانة تعبانة كلش لا تقبل تحجي ولا تشارك بالحديث..

-ليلة: حبيبة نسوي طماطة گلي؟ عبق جانت تحبها

هزت راسها حبيبة حزينة وشفت شفايفها تبرطم، انكسر گلبي وظل بالي عليها ما بقى شي لزواجها وانكسرت فرحتها بغياب اعز صديقاتها وبالصار بين امها واخوها.. تنهدت ضايعة مادري افكر بـ عبق عزيزة گلبي المعزتها وحبها من حب تالة اختي وبت خالتي لو افكر بمصايب هالبيت المتخلص سبحان الله شنو هالمكان الغريب والعيشة المنحوسة؟

-رفل: صوت باب الحوش اظن رجعوا الزلم

هدينا من ايدنا وكلمن راحت على شالها تلبسه، دا احط الدبوس بالشال وسمعت صوت الزلم من الباب يصيحون "يا الله"..

-رفل: تفضلوا تعالوا

-علي التـقي: سون درب يا نساوين

افتهمنا قصده معناها جاي ضيف ولازم نطب جوه، ركضنا وحدة وره الثانية نريد نطلع من المطبخ وبعدنا بالباب ما ملحكات نختفي ودخلوا علينا الزلم..

-حبيبة: يااا ياااا شمالهم اخوتي چا غيـ.... هاي عبق!

اللتفتنا كلنا على صوتها وشفنا المنظر الچنه نتمنى نشوفه صار ايام! شفنا عبق كدامنا لابسة عباية سودة وحاضنها علي الحـق لجسمه حييل..

-تَـمني: عبق يا رووحيي

ركضنا عليها نسلم ونحضن ونبوس وهي ترجع تحضننا وتبجي بصوت عالي، لزمتها حبيبة تضمها لصدرها وتمسح على راسها وتبجي بگلب محروك وتبوس براس عبق كأنها بنتها وجانت مضيعتها..

من الفرحة ماعرفت شسوي جسمي ظل يرجف موقف صعب ويرهب عبق رجعتلنا اي والله هاي عبق كدامي البزونة الحلوة رجعت نورت البيت.. مسحت دموعي وباوعت لـ علي الحـق المبتسم بس تعباان كلش تعبان ووجهه صاير ليمونة من الصفار وشفايفه بيض، حطيت ايدي على گلبي وتنهدت مرتاحة اخيراً خلص هالكابوس ورجعتلنا عبوقة..

دخلوها جوه والولد دخلوا وراهة، اباوعلها من بعيد وافكر وين جانت وشلون لگاها علي الحق وليش تهجم هيجي على سلوى؟.. استقبلتها خالة رسمية بالاحضان والتهليل ووكعت بيها اسئلة وين جنتي وشصاير بيج وليش هيجي ضعفانة وليش ذبلانة..

-علي الحـق: يوم على كيفج ويه البت ما تشوفيها مريضة

-رسمية: ولك گلبي خلص وين جنتي ولج عبيقة ويين

ظلت ساكتة متجاوب احد ورجعت لحضن حبيبة، سندت راسها على صدرها ومقبلت تبتعد عنها طول ما احنه ملتمين بالصالة ونسأل ونستفسر..

-رسمية: ما تحجي حقق وين جانت البت؟؟

-علي الحـق: ما راح تصدكين وين لكيتها

-رسمية: يعني صدك انهزمت ويه زلمة؟؟

-علي الحـق: لااا يوم شسالفة! انتِ مصدكة هاي الرسالة ال***! انا اول ما قريتها عرفت مو عنق الكاتبتها اعرف اسلوبها مو هيج

-ابا الحسن علي: اخذوا البت خليها ترتاح هسة مو وكتها

وافقه علي الحـق وراحلها يريد ياخذها وخالة رسمية اعترضت طريقه متقبل هو يصعدها وكالت لـ حبيبة وليلة ياخذنها وهو يبقى يفهمها الموضوع.. استجابن البنات بسرعة واخذوها فوك ردت اصعد وراهن بس فضولي عن وين جانت كل هالفترة تحكم بيه وخلاني ابقى جوه وأسمع لحديثهم..

-علي الحـق: لگيتها بجناح ^^^^^ بالشماعية!

دگت صدرها خالة رسمية شاهگة، عيونها صارت بگصتها وعلي الحق وجهه صار دممم.. دورت عيوني بيناتهم ممفتهمة وبدون وعي مني سألت..

-تَـمني: شبي هالجناح؟

سكتوا كلهم محد حچى، دورت عيوني بين سبأ ورفل وشمس استفسر بس كأن هنه هم ممفتهمات.. بعد ثواني من الصمت المميت تحسر علي التـقي يفرك وجهه بتعب وجاوب سؤالي..

-علي التـقي: هالجناح خاص للمرضى النفسيين الحالتهم تكون خطرة والي اغلب الاحيان يكونون هناك بسبب حالة جنائية

-تَـمني: يعني مجرمين او سجناء؟!

-علي التـقي: اي بس الي عنده خلل بعقله ويحتاج علاج نفسي يتواجد هناك، هذول مرضى يأذون نفسهم ومحيطهم واشبه بالمجانين كلشي بهذا الجناح غير حرس حواليهم ويعاملوهم بطريقة تختلف عن باقي المرضى توصل بيهم يهينوهم ويعنفوهم!

-سبأ: سودة بوجهيي

-علي الحـق: مو بس هيج! ما يسمحولهم يختلطون بالباقين بيبانهم حديد مزنجلة وشباچ صغير موجود بغرفهم ويكون بـ جام مضغوط خاطر ما يكدرون يكسرونه.. مكانه كسيف ويحرگ الافاد وعبق جانت هناك كل هالفترة!!!

-رسمية: عمت عيني عليج يا بنيتي شوداها هناك يا علي شوداها

-علي الحـق: شوداها؟؟ عليج علي تسأليني شوداها؟؟ ما اظن ينرادلها سؤال ليش ياهوو يندل درب الشماعية وشامر اخته هناك غير ذيج الب*****

-رسمية: زين شلون لگيتها علي الحـق؟؟

رخت اكتافه وتعكمشت ملامحه مال واحد متوجع، حط ايده على خاصرته واتوقع جرحه ديأذي لزمه تقي من جهة وابا الحسن من جهة وگعدوه على القنفة حتى يرتاح شوية..

-رسمية: سودة عليّ يوم بيه ولا بيك يا بعد هلي

-علي الحـق: اسم الله عليج يمة

-رسمية: ارتاح حبوبي نام وليداتي تقي جيبله مخاد خلي ينتچي

-علي الحق: لا ماكو داعي.. حسن سولف لامي شون لگينه عبق

-ابا الحسن علي: گبل يومين اجتني رسالة على موبايلي من حساب انستكرام كاتبيلي..

"الصوچ كله من العايشة بيناتكم وتثقون بيها"

-رسمية: يعني شني؟؟

-علي الحـق: بوكتها ابا الحسن شوفني الرسالة ورأساً اجت ببالي سلوى انا گلبي ناغزني منها اعررفها هي السبب واحلف عليها وداعتج يا يمة احلف هي الخطفت عبق!

-رسمية: وتالي؟؟

-علي التـقي: حق استعجل واجه تهجم على سلوى وسبب مشكلة ويه ابوي من وره الصار

-علي الحـق: تقي ابوووي ما يعرف طينة الحية العايشة بيناتنه مااا يعرف

-رسمية: ولكم جاوبوا هسة شون لكيتو البت؟ ياهو دلاكم؟

-ابا الحسن علي: يومين انا ادور على صاحب الحساب دخلت عليه وهكرته بس يقرالي الدولة بلجيكة مو هنا، شبه أيست اللگاله اثر بس استغربت لان وره هاليومين رجع دزلي عنوان وكتب..

"هنا موجودة التدورون عليها"

-علي الحـق: ودازله عنوان الشماعية الرحتلهم ثلاث مرات اسألهم عن عبق وما يدرون وينهي!

-ابا الحسن علي: وره ثلاث ساعات من تاريخ اخر رسالة رجع كتبلي موجودة بجناح ال^^^^^

لطمت صدرها رسمية مذهولة ومو بس هي مذهولة كلناا مصدومين من الموضوع كله! شنو هالتلاعب الديصير ومنو هذا اليعرف مكان عبق وين وشنو غايته من دزلهم رسالة يدليهم؟!

-رسمية: وما عرفتوا ياهو؟؟

-علي التـقي: جاي نشتغل على الموضوع

-رسمية: بعد عينييي ضباط ومحامي بعد عيننييي

-ابا الحسن علي: يوم ماله علاقة لا الضباط ولا المحامي احنه هكرنا الحساب وطلعلنا يقرا غير دولة معناها رقمه المسوي بي الحساب مو عراقي ولا يقرا موقع صاحبه الحقيقي خاطر ما ينعرف

-علي التـقي: تدرين شكد قضايا عدنا على هالسالفة؟؟ محققين صارلهم سنين بهالشغل وما جاي يكدرون يحلوها!

-رفل: يعني ما راح تنحل؟ راح يبقى اليتلاعب بيكم شخص وهمي؟

-علي الحـق: وراس امي ما اخلي هالعار يشم الهوا ما دامني موجود!

-رسمية: ااااخ راسي اااخخ

ماتحملت ردة فعل خالة رسمية وفطستتت ضحك، اللتفتوا كلهم عليَّ يباوعون واني اريد اللزم روحي بعد ماكدر ظليت اضمضم بحلگي وادير بوجهي عنهم واضحك بالسكتة.. شفت تقي ابتسم وخفاها بسرعة حتى محد ينتبه وخالة رسمية هم ضحكت تفر بيدها..

-رسمية: لا تعاينولها هيج صدگ والله حگها تضحك چا سنين جاي تكولون محققين يشتغلون على هالقضايا وما جاي يلگون مشعولين الصفحة يريد يجي وليدي المگنزع بيومين يلگاه

-علي الحـق: رحم الله والديج يوم تستهزأين بولدج بس ميخالف تمونين امي وتمونين

-رسمية: غصباً عليك

-علي الحـق: يمة شسالففة!

-رسمية: لا تعلي صوتك ولك

-علي التـقي: يمة حبيبتي انتِ ليش بعدج ضايجة؟ الحمدلله عبق ولگيناهة بعد شبيچ

-رسمية: انتَ انجب واوكف على صفحة

فتح عيونه تقي مصدوم واللتفت يباوع لـ سبأ الواكفة وراه ولگاهة هم صافنة، نصت رفل يمي وهمست بضحك..

-لا تضحكين لا يلوحنا طشار

-تَـمني: لا لا ماضحك

-ابا الحسن علي: ام علي ضايجة علينا شبيچ حبيبة گلبي شنو المزعلج

-رسمية: انتم

-ابا الحسن علي: افاا وانا اخو الامير زعلانة من عدنه؟

-رسمية: ايي زعلانة من هذا التمساح ولك حويق شون راح تراضي ابوك وترجع للبيت بوجوده؟؟

-علي الحـق: ابوي انا اعرف شون اراضيه لا تخافين يمة

-علي التـقي: ولك حلف ما تطب للبيت بعد

-علي الحـق: يصوم ثلاث ايام هسة شكو

-رسمية: انچب انچبب بعده صلف وعينه گوية ابن الغبرة

-علي الحـق: يمة انتِ ليش هيج وياي تره بعدني مريض وجرحي ما طاب وعلي كوة كاعد على حيلي

-رسمية: ايييي من اجيت يمي صرت كوة كاعد على حيلك هاي لو جانت عگروگتك هناا تظل تگمز منا ومناك خاطر تحصل منها حبه

وهنا محد تحمل يسكت والكل ضحك بصوت عالي ولا كأن قبل شوية چنه متأثرين بـ رجوع عبق، غلس حق على ضحكاتنا وكلام امه وعافنا وصعد فوك، طفرت خالة من مكانها وراحت يم الدرج وكفت على اول باية وصارت تصفك بيدها وتغني..

-تسرسر يمة تسرسر ولا تهتم النا تسرسر يمة تسرسر

-ابا الحسن علي: هههههه يمة شبيچ وياه شادة حزامج

-رسمية: عبنه سويقط ورادها من الله اجت البت ذبلانة خاطر يكدر يسوي اليعجبه

-علي التـقي: لا تظلمي يمة تره حق يحبها ما راح يسوي شي يضرها

-رسمية: ادري يحبها ادري وعبنه يحبها راح يستهتر تعلمني بأبن بطنيي؟

-ابا الحسن علي: عوفونا منه هسة، چا وينه نور ما مبين؟

-رسمية: خيولي ذاك الططوة لا يلفي عليّ مزاعلته

-علي التـقي: شمسوي بعد

-رسمية: يريد يهج من العراق ابن الفايخة

-علي التـقي: صدگ!

-رسمية: اي بعلي اجاني امس يبجي ويتبچبچ ماريدن ابقى هنا اريد اسافر

-ابا الحسن: يعني يروح يشوف سور وحويدر قصده مو؟

-رفل: لا ما يريد يعيش هنا امس بالليل اجه لعمتي وگاللها بس اخلص امتحانات اهجن وما تلكولي اثر

-علي التـقي: هاا

-ابا الحسن: اممم

-رسمية: شني هاا ومادري شني شو مكيفين انتم؟؟

-علي التـقي: لا يمة هاي هرموناته گابه مالج غرض

-ابا الحسن: غياب سور ضارب فيوزات عقله لا تخافين هسة بس يتشاوفون يرجعله الحنين الى الوطن

-رسمية: خايبين چا جيبوا سوير لا يروح هذا من ايدينا

-علي الكـرار: ياهو يروح من ايدج؟

دخل كرار الصالة وهو يكول هالجملة وشايل بيده علاكة ادوية خالة رسمية، حطها يم امه وكرر سؤاله..

-شو خنستوا ياهو اليروح من ايد امي؟

-رسمية: علي النور يريد يهاجر خارج العراق

-علي الكـرار: الله اييي خليني اروحن وياه چا

-رسمية: ووولك

-علي الكـرار: والله يمة اريد اهج انا ما اظل هنا

خزرته امه حتى يسكت وهو ممهتم، كعد جوه رجليها ومد جسمه بالكاع يكمل..

-اذا زواج ما ترضين تزوجيني شعندي ظال هنا كلنا نعرف محد يربط الزلمة غير مرته

-رسمية: ازوجك

-علي الكـرار: چؤ فات الاوان

-رسمية: خايب ازوجك احلى البنيات شمالك

-علي الكـرار: لا ما يفيد بعد راح اسافر

-رسمية: يا يمة يا وليدي وين تولي ياهو يلفيك بالخارج شعندك هناك اهل؟ سند؟ مرة؟ شغل؟ كلشي ماعندك تروح غريب وتنذل

-علي الكـرار: اتزوجلي اجنبية حاتة مناك تصيرلي اهل وسند وحتى شغل لا تخافين عليَّ ما احتاجكم

غندبت خالة رسمية معصبة ولزمته من اذاناته ثنينهن تجره منهن بكل قوتها، عاط متوجع ولزم ايدها يريد يفلت نفسه منها بس ميكدر لان كلما يتحرك تنجر اذانه وتتشگگ خالة لازمتها بقوة حتى ايدها مترخيها..

-علي الكرار: ااااااااخ يمة اذاناتي يوووم ااااخخخ هاي شبيييچ ترره بالعباااس اشرد منكمم وما تلكولي اثر ااااااااخخخ خرب روووح اخوتيي

-رسمية: هاي خاطر ماا تظل تكمز على راسي ابن الثولة يريد يبيع اهله بأجنبية

-علي الكـرار: يووم اتشااقه شبيچ وعلي اضحك ااااخ اذني ياا يمة انشكت اذنيي ولكم ساعدونييي راح اموتنن مو ام هاي هجوم المغول كله كاعد فوك راسي

عفناهم يتعاركون ورحنا اني وسبأ ورفل وشمس نكمل العشا، فرشنا السفرة وسوينا لفات وصعدنا لغرفة عبق لگينا حبيبة وليلة وعلي الحق يمها محاوطيها وهي نايمة..

-تَـمني بهمس: شلونها؟

-ليلة: من جبناها لحد هسة هي نايمة

-تَـمني: ميخالف اكيد تحتاج راحة

هزن راسهن اي واستحينا نبقى كلنا هنا وعلي الحق ويانه فـ عفناهم وطلعنا لغرفنا، لزمت التلفون الهاملته صاير امير يضوج لانه يتصل هوايه واني ماكو واذا جاوبته دقايق قليلة واسده فـ قررت اتصل بي هسة واسولف وياه مشتاقتله..

**

"حــبيبة"
ثلاث ايام مرت على رجوع عبق وعبق ما رجعت نفس گبل، لا تحجي ولا تكوم من فراشها بس نايمة لو من تكعد تبقى صافنة.. ثلاثة ايام انا يمها ما عفتها بس من انزل اتطمن على امي التعبانة واتكدر كلش من اروحلها واشوف وجهها ثگيل عليّ چنها مزاعلتني..

-حبيبة: يمة ليش ما تسولفين وياي

-سلوى: ماعندي سوالف

-انتِ زعلانة عليّ؟

-لا

-چا شبيچ

-ماكو شي

-احلفج بداعتي وغلاوتي عندج تسولفيلي البيج

عاينت لعيونها الدمعت وعقلي طار كعدت يم رجليها اتوسل بيها تحجيلي المضوجها وهي باقية ساكتة ودموعها تكت..

-يمة احجي

-مقهورة انا حبيبة

-شبيچ يرويحتي من شنو مقهورة

-انذليت وانا امج، انذليت ببيت الشيخ

نزلت دموعي وياهة وحطيت راسي بحضنها مقهورة ضعف قهرتها، مهضومة من الصار كله ومن الموقف المهين النحطت بي امي والمشكلة الذلها واعتده عليها اخوي..

-بيمن احلفلكم انا مالي غرض بروحة عبق عجزت وتعبت من هالسالفة، حبيبة صح انا اكره ام عبق الله لا يوفقها ولا يذكرها بخير بس عبق مالها ذنب

-تعبتي عبق يوم هواي تعبتيها

-ادري واعترف تعبتها بس ما توصل بيه اهجول البت واخذها للشماعية شني ماعندي رحمة؟ ماعندي بت بعمرها واخافن عليها؟

-يمة..

-مشكلتي كلها ويه شذى الله لا يوفقج يا شذى ولا يسهلج حياة وكون حرگة گلبي منج ما تضيع يم ربي

بلعت ريكي ماعرف شحجي خفت اگللها ام عبق طلعت من الشماعية اول امس وعلي الحق گعدها بشقتنا ببغداد خاطر ترتاح وتكمل علاجها بره وامي تنهار علينا..

-امج انذلت يا حبيبة ببيت ابوها وببيت زلمتها، داسوا على كرامتها وجرحوها عبنها حرمة طلعوا سباعيتهم على حرمة لا حول الها ولا قوة

-ما عاش اليذلج وانا موجودة يوم

-انتِ كله چم يوم وترحين لبيت زلمتج منو يبقى هنا يحبني ويخاف عليّ

-ابوي

ضحكت بتعب تحرك راسها بـ لا، رفعت نفسي من حضنها اعاين لعيونها واردفت..

-ابوي يحبج يمة ولا تشككين بهالشي

-ادري يحبني

-چا ليش حسبالج ما يوكف وياچ؟

-ابوج هم يجيله يوم يتعب ويضيج صدره من المشاكل ويشيل ايده مني ويسلمني لولده اليشوفون دم سنونهم ولا يشوفوني ببيتهم

-الامير يحبج وما راح يخلي لاحد يأذيج

-الامير؟؟ حبيبة امير اكثر واحد يكرهني وجان كاره وحاقد عليَّ بصغره لا تخليني احجي

-معقولة؟

-اي معقولة! باليوم الاجيتكم وشيخ علي عقد عليّ الامير سوه عركة الها اول مالها تالي حرگ البيت حرگ علينا وطلع بعد ما شفت وجهه غاب چم شهر من البيت ما راضي بالصار وترك حتى ابوه وامه

-يمة والله انا احبج بس حگه يضوج انتِ تعرفين اخوتي يكرهون عادات العشاير صح ربوا عليها بس ولا جاي يتقبلوها عقليتهم ما تقتنع

-اي قنعي روحج بهالحجي

-هسة الحمدلله كل هذا راح وانتهى خلينا نفتح صفحة جديدة عبق رجعت بالسلامة و..

-واخوج الراد يذبحني؟!! هم افتح صفحة جديدة وياه!؟

-دار عتاب طويل بيني وبين علي الحـق هواي حجينا كلش هواي وحلفلي هو مقلل كمية البارود من الطلقة خاطر ما تتأذين ويكون جرح بسيط وكال عرض نفسه للخطر من سواها عبن هذا شغل مختصين مو ياهو الجان يكدر يقلل البارود وما ينفجر بيده

-تهييي بهييي فوكاها مسوي عليّ منية

-لا يمة مو منية وانا لليوم ما احاچي ومزاعلته على سوايته بس علي الحـق ما يريد يذبحج والله ماريد يسويلج شي

-خوش خوش

-يماا

-لا تلحين كافي

-حاضر

-هذا زلمتج ما رجع من مصر شني ذب صرته هناك؟؟

-راح يرجع گبل العرس بيومين

-وراضية على هالوضع يا غبرة؟؟

-لا ما راضية وگتله بس كال اذا اجه وعاف الدورة يتعاقب وتره هو راد يعوفها لخاطري بس.. بس..

-بس شني؟

-بس انا ما رضيت وكتله عادي اكمل جهازي ويه امي ومرة ابوي

-اهمدااااج

غمت وجهي بكل حيلها وطردتني من غرفتها، تنهدت ماعرف شكول وشسوي ادري منتصر طولت سفرته ووكتها كلش غلط بس اعرفه مجبور يروح وماريد اوكف بطريق نجاحه وبنفس الوقت ابوي ما يرضى اطول الخطوبة اكثر ويريدني اتزوج ساعة گبل..

رجعت فوك اروح لعبق ووكفت بمچاني من سمعت صوت علي الحـق جاي من الغرفة والباب شوي مفتوح اكدر اسمعله من يگول..

-تره انا ما تغديت شوفيني شون ضعفان وفاشة عضلاتي

تمنيت اسمعها تجاوبه بس مثل الايام الفاتت بقت ساكتة ولا چن واحد يسولف وياهة، ابتسمت من اردف حق يگول..

-مو خوش مرة انتِ شفق عايفة زلمتج جوعان طاگة الجوع

مرة ثانية "صمت.." ماكو تعليق منها بس هالشي ما خلاه يسكت ويعوفها واستمر يسولف وياهة..

-هسة مال سمچ مسگوف وتمن احمر وطرشي ووياه راس بصل احوووووي

ضميت حلكي وضحكتي من اردف..

-وغسق تسويلي لگم وتوكلني بأصابعها المدوحسات وامطگ بيهن من تخلص وابوسهن واعضعضهن واملخهن و*******......

فكيت عيوني من نزل بكلامه يسولف بالطيحان الحظ وهي ساكتة لا ردة فعل ولا استنكار مو مثل عادتها من يفشر كدامها..

-علي الحـق: وراهة تجي سوزان وتفركلي رجليناتي بأيدها الترفة وتبوسني بـ.....

-عبق: اطلع بره!

شهكت فرحانة من حجت وبسرعة فتحت الباب عدل وطبيت للغرفة، عاينت لوجهها مغندبة وعاكدة حاجبها وعلي الحق واكف كدامها مبتسم بأنتصار چن مسوي انجاز من حچاهة وهو صدگ انجاز..

-علي الحـق: ما اطلع

دارت وجهها عنه ضايجة وچتفت ايدها لصدرها دليل انزعاجها، عاينت لـ حق المكيف على الوضعية وزادها من كعد على جربايتها وگال..

-سوزان اتصلت بيه اول امس كلت اجي ابلغج لا تسويلي سالفة بعدين

ركزت أنظاري عليها بلكت تسأله بس ما حجت بالعكس تمددت بالفراش وغطت راسها بالبطانية..

-علي الحـق: شكلتي من خطيبها الاغبر يريد يرجعها وجاي يهدد بيها ولاعب خلقة بالبت سودة عباة امي..

سكت يعاين عليها خانسة وباقية مغطية راسها بالبطانية..

-كتلها تكدر تشتكي عليه اذا عدها دليل على تهديداته وكالت عدها بس تحتاج زلمة عنده معارف وواسطات يعينها وانا تبرعت...

يحجي ويباوعلها يريد ردة فعل منها ماكو، حچى بعد عن وضع سوزان وداس بالحجي وعبق عبارة عن جماد منطيته اذن الطرشة وتوقعتها راح تبقى هيج بس تغير كلشي من كال..

-اللتقينا امس ببيتها رحتلهم و....

وخرت الباطنية من وجهها وفزت من مكانها فززة خازرته بعيونها الچبيرة وگازة على سنونها لدرجة راسها يهتز من العصبية، رفع حق حاجبه الها وزاد على النار حطب من كال..

-عنق راح اعترف خاطر تسمعين مني مو من غيري انا تعشيت عدهم امس و...

-عبق: اطللللععععع براااااااا

-چؤ

گالها ببرود قاااتل ومذبل عيونه التمساحية عليها يستفزها اكثر خله وجهها ينكلب احمر تسودنت الفرخة..

-عبق: حبيببببة اخذذذذي هذا الرجال برررررررا

-علي الحـق: واذا ما طلعت

-عبق: اني اطلع!

نترتها ووخرت البطانية منها خاطر تكوم من الفراش وهو ما سمحلها، شمر روحه على الفراش بصفها متمدد وحضنها بأيده ورجله يقيّد حركتها ويداهر بيها خلاها تلبط من القهر تريد تكوم ما تكدر.. استحيت من المشهد وحسيت وجودي هنا غلط وطلعت من الغرفة اخليهم وحدهم..

**

"عـــبق"
نااار بگلبي احس جمرة عملاقة حاطيها فوگ صدري اختنكت اني منا وضعيتي مو تمام والدنيا طالعة من عيني وانوب زادها عليَّ بسالفة سوزان خبلني خلاني اشوط من الغيرة..

-علي الحـق: ههههه ولج سوادين ثبتي ما رحتلها والله ماا رحت.. ولك عگروگ لا تدفر ما رحتت جذبت عليج

دفعته بقوتي البايدة بس ماكدرت اوخره مني طاقتي مصفرة ايدي كوة ارفعها وعظام رجليه ترجف، استسلمت بين ايده مهدود حيلي وهو اغتنمها فرصة شدد على جسمي بقوة وگال بصوت هادئ كلش..

-ما اللتقيت بيها ولا سولفت وياهة وعيونج الاحبهن لا جاوبت اتصالها ولا الي شغل بأي شي يخصها وكل الحچيته جذب بجذب تأليف مني

تنهدت مغمضة عيوني ماعندي تعليق على كلامه اصلاً عقلي فاصل تعبان وميكدر حتى يفكر..

-ماعندي غيرج قبق ولا راح يصير عندي اريدنج تثقين بيه ولا تتخيلين بيوم ابدلج بثانية وراس ابوي الماكو اعز منه انتِ وبس والباقي طماطة وخس

ضحكت خفيف على عبارته وهو هم ضحك ودارني خلاني انام على ظهري وهو استهتر طبعاً بنومته بس مابيه اتعارك هسة واوخره..

-اشتاگيت لشفق القديمة يمته ترجع

-هسة شوية وتجي

-ههههههههههههههههههههه خرب عرضج عبق

ابتسمت هالمرة وتحسرت وراهة، غمضت عيوني ودرت وجهي عنه بس وين يقبل اذا ميلطش وجهه بوجهي، جر وجهي وغصب عني خلاني اواجهه وافتح عيوني اباوع بعيونه..

-عبق تره انا ما احب النكدية ترجعين مثل گبل لا اطلگچ

-طلگ

-بت الاوادم ما صدكت على الله

-شتريد علي

-يروحلج فدوة علي بس حاچيني

-تعبانة اريد انام

-ميخالف تحملي شوي

-ماريد

-بداعة المسموط هشومي

-هههه علي وخر

-بعدج راح تتعاقبين على الرسالة صبريلي بس صيري زينة بعلي الا اطلعها من خشمج

-امم

-بزونتي

همسها يفرك خشمه بخدي وطبع قبلة خفيفة عليه، ذب حسرة عالية قبل لا يگول..

-هديتي حيلي بغيابج عبق كلما اصفن واتخيل ما راح اشوفج بعد گلبي يريد يوگف وحگ هو علي ابن ابي طالب

نزلت دموعي من تذكرت المر عليَّ وكتمت شهگتي بصعوبة، مسح دموعي بأبهامه واردف بخفوت..

-قسمت قَسَم ابقى ادور عليج لحد گطع النفس ما اعوفج وحيدج وين ما چنتي، حلفت اكضج حيل وادفنچ بين ضلوعي خاف تردين تنهزمين وتعوفيني بيوم والعباس ما اهدچ

-قابلة

-غصباً عليج

-ظلام ضلوعك ولا ظلام ذيج الغرفة

-يا غرفة

-الحبسوني بيها

-ما جنتي تطلعين منها؟

-لا

غصيت بدموعي منهارة، روحي دتتكطع من جوه حضنته من رگبته بكل قوتي واردفت برهبة خوفي العشته..

-ميقبلون يطلعوني علي الحـق توسلت بيهم وبجيت هواي.. هواي بحيت لحدما اغيب عن الوعي وارجع اللگه روحي على چرباية ومشكلين بيدي مغذي.. ماعرف شنو چان يصير بيه ريحة الغرفة تدوخ وتخليني اتعب جسمي ماكدر احركه من التعب اريد اهرب لأي مكان بس ما اللگه غير النوم اهربله وحتى اكل ماعندي شهية اكل و...

شهگت بدموعي ولزمتني الكحة رئاتي منتهية بسبب المكان الجنت بي احسني دا اتملخ من جوه، ظل علي الحق يضرب على ظهري وشربني مي ياله ارتاحيت شوية..

-علي الحق: عمت عيني عليج

-علي.. فكرت بيك كل يوم والله كل يوم افكر واكول هم راح ارجع اشوفك هم راح اكدر ابررلك واگولك انتَ الرجال الوحيد الحبيته والعشقته، الوحيد الشافني بكل حالاتي بضعفي وقوتي بكشختي وبقمة بهذلتي وحبني مثل ما اني.. علي اني.. اني احبك

-يا بعد اهل علي

-هههههه احبك امداك

-ههههه اليوم انعل والديج

لزمني من رگبتي حيل و...... ولوما راجعلي التركيز والوعي چان رحنا بعييد كلش بعيد بس هو الوخر بسرعة قبل لا احجي شي وفز من الجرباية يگوم على حيله يدگم بقميصه..

-عبق: علي شنـ...

-علي الحـق: رايح اجيب الغده خاطر ناكل سوه

طلع من الغرفة بسرعة مخلاني حتى احجي بالموضوع، بطني خبطت متوترة وخايفة ماعرف شصارلي غطيت روحي بالبطانية اتناسى واطمن روحي ما صار شي ولا افكر زايد وبدون لا احس غفت عيني وحسيت على ريحة اكل وعلي الحق راجع بالغرفة، رفعت عيني للساعة شفت مرت فوك الساعة..

-عبق: شو تأخرت

-علي الحق: غير نعلتي شرفي انتِ

حچاهة بـ ونة متحسر وقسم من الخبزة يحطلي بيها دجاج وقدمها الي، خنست خجلانة واخذت منه اللگمة بس ما قبل اخذها وجبرني افتح حلكي وهو يوكلني بيده صار يسويلي لگم ويحطهن بحلگي وهو ياكل ويايه..

شهيتي صفر وكتلني كتل يغصبني اكل حتى يرجع الدم لوجهي يجيب ويدحس بحلگي ويداهر ويتحارش مثل عادته كل ساعة ومسويله حركة يخليني اطفر..

عشرة ايام مرت اني بفراشي يا دوب اكوم اسبح وابدل ملابسي وارجع انام، نفسيتي تعبت مو شلون مچان وتعبت اكثر من عرفت بموضوع الرسالة الماعندي أي علم منو كتبها وشلون انكتب بخط ايدي ولگوها على چربايتي بالغرفة من اختفيت..

الرسالة وسلوى وعركة علي الحق ويه ابوه ومنافسته على ان سلوى الها ايد بالصار ووگف ضد الكل علمودي اذاني وتأذيت اكثر من دا اشوف معاناته واتصالاته ويه جماعته علمود يعرفون صاحب الحساب مال انستا منو بس مدا يوصلون لنتيجة..

بس كل هاي السوالف بچفة والعشته قبل بچفة ثانية مدا اكدر اتخطى الصار بيه عشت اسوء ايام حياتي بذيج الغرفة المظلمة، فارغة مابيها بشر ولا اثاث مينسمع بيها بس صدى صوت بكائي وعياطي المتواصل وابر المغذي تزرف بيدي..

علي الحـق تعب ويايه كلش خطية يوكفلي بالباب من ادخل اسبح ويطلع يوكف بباب الغرفة من اريد ابدل ما فارقني ولا دقيقة ولا طلع من غرفتي.. ماعرف شلون صالح ابوه وقبل يبقى بالبيت وميطلع حسب ما كالت حبيبة عمو علي حلف ميدخل حق للبيت بعد بس هسة اقتنع وعلساس صام عمو ثلاث ايام كفارة حلفانه..

عرس حبيبة عگب باچر وكل شوية تدخلي وحدة من البنات من يطلع علي الحق يهزن يم فراشي شوية ويردحن ويطلعن من يرجع مادري اشايفاتني ديسكو واجن يطلعن مواهبهن يمي..

-علي الحـق: يلا عگروگ كومي

-عبق: وين اولي

-نطلع نشتريلج نفنوف

-ماريد

-انجبي وكومي

-ماريد

-تكومين لا اكومج بطريقتي

-مابيه حيل ماريد

-ما انطيتيني حل ثاني

شهكت من مد ايده عليَّ يلمسني بطريقة محلوة خلاني اطفر واعيط مثل المخبلة، خزرته اريد اتعارك وياه بس قبل لا اللحگ افتح حلگي طلع من الغرفة يضحك واخذ البطانية والمخدة مالتي حتى ما ارجع انام..

نفخت هوا مزعوجة اني طالعة روحي مالي واهس اتحرك من الفراش مو انوب اروح للسوگ واصلاً كرهت شي اسمه سوگ! بس من فكرت بـ حبيبة وفرحتها ما ردت اعوفها وحدها بهيجي اجواء وهي دائماً واگفتلي، شجعت روحي ودخلت سبحت حتى اصحصح وبدلت ملابسي ونزلت للبنات شفتهن بالصالة، تفاجأن من شافني واكفة كدامهن وضحكت على ردة فعل تَـمني من شهكت وضمت حلگها بيدها بدرامية لطيفة..

-تَـمني: عبببق اخيراااً نزلتي يمنا

-شمس: والعباس هسة نورت الصالة

-ليلة: مرت الحلو چا ليش من اتوسل بيج تنزلين ما ترضين وهسة من صعدلج التمساح اجيتي ركض

-حبيبة: اششش اششش سكتن اكيد نزلت لخاطري موو

ابتسمت وهزيت راسي بـ اي، كبرت ابتسامتي من اجن يحضنني وحدة وحدة ويتحمدنلي على السلامة وختمتها خالة رسمية حضنتني لصدرها وباست راسي وگالت بلطف..

-چنتي البطة والله الچ غيبة

فرحت بكلامها ورجعت بوستها، دورت عيوني بالصالة ادور على سلوى بس ما لگيتلها اثر لا هي ولا رفل وما احتاجيت اسأل لان ليلة من وحدها كالت طلعن علمود يشترن نواقص صينية حنة منتصر..

-حبيبة: چا يلا ما نلحگ بنات بقت بدلتي ما تأكدت من قياسها اخافن ما يضبطوها

طلعنا سوه من البيت ووصلنا علي الحـق، بقى ويايه خطوة بخطوة ما عافني ولا دقيقة حتى من اعوش ويخرب واهسي واخبصهم اريد ارجع للبيت ميقبل يبقى لازم ايدي ويشتريلي اغراض وشنو يشتري يگول للجهاز مالتي بحساب عرسنا وره الامتحانات الي لسه ما فتحتلهن كتاب..

-ليلة: حق اريدن عبق شوي

-علي الحـق: اي جايين

-ليلة: وين جاي انتَ

-علي الحق: مو تردين عبق؟

-اي اريد عبق ما كلت اريدك

-چا انا وعبق واحد

-ليلة: من يمته عشتو؟

-من اول يوم شفتها بي

-ليلة: عاين خوية كلاوات المخطوبين مشيها على غيري هسة انطيني الفرخة اريدنها

هدني گوة ولگفتني منه ليلة قبل لا اشرد بعيد، لزمتني من ايدي حيل وگالت بخبث..

-كضيييتج

-عبق: ليلة ماريد مااريد

-هو انتِ شفهمتي وصحتي ماريد

-لان اعرف بسوالفج السخيفة مااريد

-بالعباس تردين امشيي

-ما اشتري ولج شبيچ تهيلكتي انتِ عيبب

-خاب انچبي هي راح تموت من الوناسة وتصيح عيب امشي يلا

جرتني جر تسحسل بيه لمحل للالبسة النسائة ودشدايش النوم وهالسوالف الطايح حظها ودكت رجل الا تشتريلي، وكفلنا حق بالباب بدون لا يدخل يغمز ويلمز ويسوي حركات واني غايصة بهدومي شلون ثنين اللتموا عليَّ..

ليلة الادبسزز اختارت وين المستهتر والمشلتح جرته وحطته على الميز، اباوعلهن كلهن مخازي بمخازي كله اسود واحمر وسوالف فساد، قكيت حلگي من اشرت على قطعة عيب اگول عنها دشداشة وگالت لام المحل نريدها ووكفت تحاسب..

-عبق: ما راح اللبسهن

-ليلة: تلبسيهن غصباً عليج

-ما اللبس هو بكيفج

-انچبي حبي

-ما اشتري وخري لا تدفعين شيي

-مو انا الادفع زلمتج راح يورق ويرجعلي ربع ربع بس بعدين

-عبق: بلا زحمة رجعوهن ماريدهن

-ليلة: لا حبي خليهن بعلاكة اريدهن انا

-عبق: اي اخذيهن الج اني ما اخذ تره من هسة اگلج

-خوش خوش

-ما دام هيج عيني انطينا السيت الماروني هم بلا زحمة والنيلي هم

-ليلة: ذن المن؟؟

-الج حبي

-انچبي عبق

همستها وگرصتني خازرتني ضحكت فرحانة لان متكدر تحجي كدام المرة وتتفشل واني استغليت هالشي وكمت اجيب واحطلها..

-عبق: بعد اسود عيني اي اي هذا ايييي فدوة لايدج يخبل هذا

-ليلة: عززا بعينج ولج عببق

انتعشت روحي احس بالانتصار عليها، خليتها بموقف محرج كلش ويه المرة وتاليها دفعت الحساب واخذتهن غصباً عليها وطلعنا من المحل..

-ليلة: اي شنو يعني حسبالج راح اللبسهم؟ تحلميين حبي تحلمين

-عبق: نشوف عود

-ليلة: هسة اخذ فلوسهن من ابو لسانين واحرگهن

-عبق: اي براحتج

-ليلة: هه عود هي جاي تحرجني ام بريص ولج انا لييلة تعرفين منو لييلة

-عبق: ليلة انجبي وامشي راسيّ يوجعني مالي خلگج

-ليلة: خوش وهسة دفعيلي فلوس سلاباتج

-اني شعليه اخذيهن من حق

-ليلة: اي هم صدگ بس فشلة اگله فلوس ملابس النوم راح اگله دفعتلج مال ملابس الطلعة لو شتكولين؟

-بكيفج

-خوش خوش.. وينك ابو الحقوووق

راحتله الرعنة تاخذ منه الفلوس وخلته يدفع اكثر من الحساب تگله هاي مال اتعابها وتقنيعها الي، فريت ايدي عليها افكر شوكت تكبر هالبنية وتبطل خبال مادري..

رجعنا للبيت لگينا سلوى واكفة تسوي بصينية الحنة ورفل وياهة مخبوصة وليلة وتَـمني طبن بنصهن يردن يشوفن اما سبأ ظلت واكفة على جهة وبس تباوع من بعيد.. تعبت من الفرفرة وصعدت للغرفة انام، غفت عيني بسرعة وحسيت نص الليل على شخص خانگني من عطره عرفته علي الحـق نايم بصفي وحاضني بقوة ورايح بسابع حلم..

باوعتله وابتسمت ما هان عليَّ اگعده واطلعه من الغرفة شكله نايم بعمق ومرتاح بنومته فـ غمضت عيوني ورجعت انام بحضنه مرتاحة..

-امچ طلعت من المستشفى

فزيت من مكاني اباوعله حچاهة مغمض عيونه، بقى على وضعه وابتسم عبالك ديشوف ردة فعلي المصدومة وشلون فاتحة عيوني..

-امي وين؟؟

-بشقة بغداد طلعتها گبل اسبوعين تقريباً

-اسبوعين امي طالعة وما گتلي علي الحـق!

-بعدها جاي تتعالج نامي نامي......

**

"لــــيلة"
خوف، قلق، توتر، اكتئاب، اوهام، انتقام، خبال، عصبية.. كل هالمشاعر جاي اعيشهن صار اسبوع راح انفجر، صار اسبوع من دزلي ناظم رسالة يريدنا نتشاوف بمطعم خاطر انطي الفلوس والموعد الحدده هو اليوم! بليلة عرس حبيبة!

لبت محتارة ماكدر احجي ويه احد ولا اكدر افضفض لبشر غير عبق ماكو غيرها تتفهمني بس عبق وضعها ما يسمح تفكرلي بحل البت يا دوب جاي توكف على رجليها حتى دراستها هملتها سودة عليَّ امتحاناتها بعدلها چم يوم وكتاب ما فتحت لحد هاللحظة..

غمضت عيوني بفراشي اريد انام بس شادة على اعصابي ومعدتي تفوور اريد اتقيء وكوة كاضة روحي، ارتاحيت من ابا الحسن اليوم اتأخر بلچن يرجع وانا غافية ما جاي اكدر حتى اتجاوب وياه واتعارك مثل گبل من وره الخوف وهو جاي يحس بيه..

طفرت من فراشي من حسيت بمعدتي تگلب وركضت للحمام اتقيء شكو شي اكلته بالعشا، شون بيه يا علي شيحلها هاي اذا ما اروح لـ ناظم يفضحني ويخزيني وبنفس الوكت ماكدر اروحله لا يلگفني احد و انفضح واتخزه!

غسلت بساع من سمعت صوت طگطگة بالغرفة معناها رجع ابا الحسن، طلعت من الحمام شفته بالشورت يفتر ويدور على حاجة ما حاچيته ولا سولفت وياه ورحت للجرباية نمت وغطيت روحي..

-ليلة شفتي حاسبتي ال Dell؟

-هاي

-وين

-هاي كبالك

-وينها

-هاي هاي شبيك على الميز يمك

-ماشوفها ولج وين

-اوووووووف

گمت من الفراش غصباً عليَّ ورحت يم الميز واشرتله عليها ونترت..

-هاااي

-وينها

-ابا الحسن لا تخبلني هااي هااي شوفها

-ماشوف اظن عبن ظلمة

-مستحييل صدگ تحجي انتَ؟؟ جا هاي شنيي

شلتها من الميز بكل قوتي وحطيتها بوجهه بعدني ما فكيت حلگي وحجيت شي انقسمت الحاسبة نصين وطاحت من ايدي..

-ابا الحسن علي: حاسبتيييي

-لطااام والله مادري ماعرف شلون هيج انكسرت

-لاا انتِ متقصدة ليلة! متقصددة! كل شغلي المهم بيهاا

-لا والله وداعة امي ما متقصدة صدكني حسن انا مالي غرض معليه

نصيت اشوفها الشاشة بمكان والكيبورد بمكان صايرة نصين حرفياً احس گلبي الي احترگ مو گلبه من شفتها بهالحال..

-ابا الحسن: وين انطي وجهي ولج باجر الشغل مطلوب مني

-حسن مادري والعباس مادري

-استغفر الله ياربي شلون ليلة هاي

-مادري ما قصدت والله ما تقصدت شلتها وطاحت من ايدي حسن

نفخ هوا وفرك وجهه محتار اول مرة اشوفه بهالشكل وبهالقهره، تأنيب الضمير موتني دخت وتهت ماعرف شون اتصرف واحلها كعدت اللملم بيها وادوس دگمة التشغيل بلكت الشاشة تعتلك بس ماكو ماكووو احتركت..

-عوفيها ليلة احتركت

-ابا الحسن انا اسفة والله اسفة

ما كدرت اسيطر على نفسي ودموعي صارت تصب ماعرف شبيه اريد اوكف بچي ماكدر الموقف صعب وانا شايفته يشتغل على هالحاسبة ليل نهار اكيد كلشي بيها ووگعتها هسة راح تأثر على شغله وانا السبب انا السويت هيج..

-ليلة جاي تبجين؟؟

-شسوي واساعدك

-ولج شني هاي دموع صدگية؟

-چا چذبية

-لا لا ما اصدك طلعت عندج مشاعر وتحسين؟

-لا تظل تضحك عليَّ وانطيني حل اساعدك بي

-ماكو حل ليلة خلاص راحت ختولي فدوة الج

-لا لا لازم اكو حل

-ماكو قضايا الناس راحت وكلشي خرب

-اكو حل لازم اكو چا انتَ شون محامي! شون تتخلى عن الناس هيج!

-شسويلهم ياهو گللهم يجوني

-يااااع

-والله شسوي عود اگلهم مرتي ثولة وطيحت الحاسبة

-ابا الحسن صدك جذب تحجي!

-اي ليلة چا شسوي؟ بالعكس زين طاحت اربع قصايا طلاگ عندي خليني اأخرهم چم يوم بلچن يتصافون ويرجعون سوه

-انتَ جاي تحشش؟

-لا احجي صدگ، المحاكم انترست بالمطلگين ياهو تكضه يگلك رايح للمحكمة اطلگ

صفنت عليه ماعرفت شحجي مسحت دموعي وترجع تنزل وهو يسولف ولا چن طاحت حاسبته وخرب شغله وانا هم غلست ما جنت اعرف حاسبته مكسورة من البداية وسوه هالفلم وياي بس حتى نحجي ويه بعض..

-خايبين انثبروا ببيوتكم تحملوا شكو بيها اذا الغده تأخر لو زلمتج ما طلعج اليوم لو زلمتج حلق لحيته لو كضيتها تبوگ من جيبك چا مو انتم واحد لو هو بس حچي

-اممم

-هي خربت من الزعاطيط كامت تزوج وتفتح بيوت

-احم اي

-اي وهسة نرجع للحاسبة شون بيه؟

-مادري توقعت ما متأثر كلش

-وشلون استنتجتي هالشي؟

-شو شفتك انفتحت بالسوالف عوزك بس استكان چاي وحب شمس

-خوش روحي سويلنا چاي وجيبي حب اليوم للصبح اشغلج عقوبة هالطيحة

-شسوي

-روحي سويلي جاي وتعاي اعلمج

ضيگت عيوني اعاينله بـ شَك شو احسه ملعب هذا وراح يسويلي شي بس همزين ما طولت ظنوني السيئة لانه خزرني ونتر..

-امشييي ما اللحگ الشغل باجر لازم اسلمه

-اي اي رايحة

جريت ربطتي وركضت جوه امسح دموعي بيها والله حرامات هالدمعات طاحن عليك يا حسيون هو اصلاً مادري ليش بجيت من يمته وجاي اعوي انا هاي هم هرموناتي گابة هالفترة..

سويتله چاي وصبيته بكوبين وصعدت مرة ثانية شفته كاعد على الجرباية وبحضنه ملفات ومجلد لونه اسود جبير ومتروس اوراق..

-تعاي

-ما جبت حب

-هذا عندي هنا تعاي هم ياله نلحگ

هزيت راسي وگمزت على الجرباية اربع رجليناتي، حط بيدي دفتر جبير اوراقه بيضة كلش وما مخطط چن مال رسم بس هذا اسمن انطاني قلم جاف وفتح كدامي فايل اشر عليه وكال..

-كتبيلي الموجود هنا

-كله؟؟؟

-چا نصه يلا ليلتي يلا اشتغلي

-طفت ليلتك يا حسيون

-يلا يلا بلا لغوة

خزرته ضايجة وبديت اكتب كلشي موجود وعلى نفس الترتيب ما ميلت خطي كله خط واحد امشي من گدما مركزة احس عيوني انحولت.. مرت ساعات على گعدتنا وكل شوية انزل اجدد الچاي واكرز حب وياه واسئله على القضايا ويسولفلي، فكيت حلگي من گال..

-مرة اجتني قضية وحدة تريد تطلگ من زلمتها عبنه مشعر

-مشعر يعني عنده شعر هواي؟

-اي

-چا ما تطگله مزيل وتستچن

-هههههههههه مسودنة وعلي

-والله شبيك هسة انتَ لو مشعر هم اطگلك مزيل شكو بيها

-چا ما تطگيلي

-اگعد هنه شعرتين بيدك وثلاث شعرات برجلك وينك وين الشعر

-عندي تساقط بشعر راسي

-طبهن طوب

-هااا!!

-والله ياهو ماعنده تساقط اكعد واسكت

-هم صدك

هزيت راسي وكملت اكتب وظليت كلما ارفع راسي انتبهله صافن عليَّ ومن يشوفني اللگفه يسوي روحه يباوع للورقة البيدي يتأكد من شغلي لحدما اخر مرة من رفعت راسي شفته صافن بس ما وخر عيونه عني وظل يباوع لوجهي..

-ليلة: شبيك

-تذكرت شي

-شنو هو

-من چنتي اصغر واسألج شنو تتمنين تصيرين من تكبرين تجاوبيني "اتمنى اللبس الروب الاسود واتعارك ويه القاضي"

-هههههه اي جنت انسى اسمها محامية بس اتذكر اتعارك ويه القاضي

-بعدج تردين تتعاركين ويه القاضي ليلة؟

-هاا؟

-بعدج تحبين تصيرين محامية؟

-مادري.. يعني اي.. مادري

-اذا رجعت اسألچ نفس السؤال هسة واگلج شنو تتمنين تصيرين ليلة شنو جوابج؟

ابتسمت ودرت وجهي اعاين للروب الاسود الخاص مالته معلگه على زاوية الباب وبدون لا احس على روحي رجعت اعاين لعيونه وكلت بصوت ناصي متحمسة..

-اللبس الروب الاسود واتعارك ويه القاضي

ضحك خفيف يهز براسه اي ورجع يشتغل بالاوراق البيده، مادري بروحي سرحت بأحلامي بعيد وظليت أفكر بالموضوع واتذكر ليش حبيت هالمهنة من الاساس.. انا حبيتها بسببه جنت اشوفه من يطلع من بيتهم وبيده الروب وعلى چم مرة شوفني فيديوات وهو يتناقش ويه المتهمين وانا جنت حسبالي يتعارك ويه القاضي وظلت براسي.. شفت نفسي بمچانه وتمنيت اكون واكفة هناك واكون شي جبير بهالدنيا شي اكثر من كوني بت كاعدة بين الحيطان تنتظر رجوع ابوها العصبي..

-ان شاء الله اسجلچ هالسنة ويه دفعة عبق

فزيت ويه جملته وعاينت لوجهه اتأكد من السمعته صدگ لو تخيلت؟؟

-ليلة: شنو

-نشوف معدلج يقبل جامعة حكومية لو لا واذا ما قبلوج نشوفلج الاهلي

-شني يعني مافهمت

-نسجلچ جامعة خاطر تكملين

-اكمل يعني اصير شني

-تصيرين مطي

-ها؟

-ولللج تدرسين جامعة تصيرين محامية و تتخرجيين

-عليك العباس؟؟

-اي

-ابا الحسن لو جنت تضحك عليّ والزهرة ما اعاين لوجهك بعد

-ما اضحك، عبق هالسنة راح تسجل وانتِ تسجلين وياهة انتن مو صديقات؟

-اي ايي

-چا خلص تسجلن سوه ونخلص منچن

-ابااا الحسننن بالعباااااس انتَ زلمممممممة

-تفلتي بنص عيني بس شكراً

-والعباااس انتَ زلمة وفححل تنگطط منك الرجولة هيج مناا ومنااك تنث كل مكاان ينراد احطن جواك زبيل اللملمها لا تطيح على الذكور وتجرح نعومتهم

-مو چنچ رحتي زايد؟

-اي صح عبن تذكرت انتَ تزوجتني غصب، خلص اسحب كلامي مو زلمة انتَ

-طاح حظج يا نذلة

-صدگ على طاري النذالة ورق خوية ورق

-خوا الخواج لشني اورق؟؟

-اشتريت نفنوف يشگ العين شگتين من جماله

-وشسويلج

-ورق چا مو زلمتي انتَ وجيبنا واحد لو هذا بس حجي

-جيبنا واحد من يصير فراشنا واحد

-استغلالي طماع

-هذا العندي

-هه عود حسبالك ما اخذ منك؟ والله اقطك قط اصلاً محفظتك يمي

-لا تجذبين

-والله العظيم

-ليلة رجعيلي المحفظة

-ما ارجع

-اخذي منها فلوس النفنوف ورجعيها

-هاا؟

-اخذيهن امري لالله

-اخذ فلوس الحذاء هم!

-اخذي

-وفلوس الجنطة الشتريتها

-استغفر الله اخذذذي

-وفلوس الصاية الجديدة

-مو چنها مصخت؟

-هم الك عين وتحجي؟؟ تره انتَ تزوجتني بلا مهر على هاي حطيت عينك!

-يلا يلا اخذيهن وخلصيني

-اريدن مليون

-شتسوين بي؟

-احتاجه

-لشنو

-مهري

-چا مهرج مليون؟

-لا عمي گال مهري 15 مليون وما ناسيتهن هم اخذهن بس هسة كلش محتاجة المليون ابا الحسن

-غير افتهم المن

-لامي محتاجة فلوس وابوي فگري ما جاي ينطيها

هز راسه متفهم وگام للقاصة حاطها بكنتوره، وگفت وراه ارجف ماعرف شبيه خايفة هالمليون اريد انطي لـ ناظم بلچن يسد حلگه ويعوفني وماعرف شلون راح اوديهن اله..

ثاني يوم من الصبح طلعنا للصالون وحطيت الفلوس بالجنطة، اليوم عرس حبيبة الكل ولعبنا لعب بالصالون كلنا رحنا وياهة وترسنا الصالون بس النا وسوينا كل اليعجبنا..

مكيجنا ولبسنا البدلات هنا حتى ياخذونا للقاعة الزلم وبقت حبيبة اخر وحدة بالمنزع ووياهة عبق وامها ورفل يساعدوها، وكفنا ننتظرها على نار نريد نشوف طلتها الاخيرة وما تأخرت دقايق وطلعت بالبدلة البيضة بطولها الحلو وسمارها الفاتح...

-تَـمني: اللهم صل وسلم على سيدنا محمد شنووو هالجمااال

-ليلة: ما شاء الله حصنتج بأسم الله حبيبتي ان شاء الله مهناية

مَلكة ماعرف اوصفها غير بهالكلمة، من صدگ ملكة بجمالها وفخامتها ومكياجها وبدلتها المنفوشة.. كلشي بـ حبيبة حلو خِلقة واخلاق صح انا ما مقتنعة بـ منتصر واشوفها تستحق احسن بس ما اتمنالها غير السعادة والراحة وياه ما دامها تحبه ربي يهنيها..

لبسنا احجبتنا بساع بساع وطلعنا بسيارات سوه، ابتسمت على شهگة تَـمني من شافت الامير واكف ينتظرها بسيارته ضحكت بصوت عالي مثل الجاهلة وراحت تركضله تصعد السيارة.. عرفت ما راح يگللها رجع راد يسويها الها مفاجأة بلغني ابا الحسن امس وكال كلهم راح يرجعون اليوم خاطر العرس ما يردون يزفون اختهم وهمه ما موجودين..

وصلونا للقاعة وبده العرس لعبنا لعب الفرحة تطلع من الحياطين مو بس من عيوننا واجسامنا، الفرحة بعيون حبيبة تتسولف عمررر جانت طايرة مثل الفراشة كاضة بنات منتصر كل وحدة من ايد وتركص وياهن بحب واضح..

-ليلة: سبأ چا رهيفة ما تجي؟

-سبأ: كالت تجي بس مادري شو تأخرت

دورتها بين المعازيم وياهة وشفناها من بعيد كاعدة على جهة لافة روحها بعباتها ما نازعتها بس ذابة الشال، اشرت لـ سبأ ورحنا نسلم عليها مشتاگتلها هالملسونة صار شكد ما شايفتها..

-ليلة: يا هلااا ومسهلا بأم لسان رهيفة

سبقتني سبأ وراحت تسلم على اختها تحضن وتبوس بيها بحرارة المسكينة صارلها شكد ما شايفة اهلها وبآخر فترة صارت تتواصل ويه رهف من موبايلي تتصل على صابرين امهن وتنطي الموبايل لرهف خاطر يسولفن..

-ليلة: خايبة وخري غاد خليني احبنها

وخرت سبأ تضحك وتمسح بدموعها ورحت لـ رهف، سلمت عليها وعاينت لوجهها وتفاجأت من شفت عيونها صايرات فصوص حمر يخوفنن جفن عينها مورم وبياض العين منگلب ماروني..

-ليلة: رهف شبيهن عيونج؟؟

-رهف: مابيه شي.. اظن حساسية

-سبأ: ولج غاديات جمر ليش هاملة روحج شلون بيج انتِ شلون

-رهف: مابيه شي بنات هسة اغسلهم

عافتنا وراحت للحمامات ولحگتها سبأ، عفتهن واللتهيت ويه العروس رگصناها ودبچنا وردحنا لحدما تعبت رجلينا.. شوي وگالو لبسن عبيچن يا نساوين راح يطب منتصر خاطر يلبسها الذهب..

لفلفت روحي بالعبا وحطيت شال فوك راسي وركضت اوكف بالنص خاطر اصور واخذلي هزة ويه البنيات من يدور وجهه منتصر عنه، سوينا مجال من صاحوا بالسماعات راح يجي العريس وخففوا الاضوية يسووله دخولية اظنهم تيهوا وحسبالهم هو العروس..

دقايق بسيطة ودخل منتصر بعگاله وبشته وطوله وعطره اليهفهف، ركضن بناته يستقبلن ابوهن وتلگاهن بحضن وشالهن كل وحدة من جهة مبتسم ويبوس بخدودهن..

گفلات، هوسات، ردح وفرحة استقبلنا العريس لحدما وصل لـ عروسته وحب راسها، ابتسمت حبيبة منزلة عيونها مستحية وكعدوا على الكوشة، سووا كلاوات العرسان مال وكلني واوكلك ولبسني واللبسك وحبني واحبك والمصورات بكل جهة يصورن الاجواء..

مشت دقايق بسيطة على وجوده هنا وچان يبدي الردح على اصوله.. علگت ام القاعة اغنية ترگص الصخر مع العلم خالة رسمية ما رضت يفتحون اغاني بس شيعاندنهن فتحن وخلن حتى العجوزة تدبچ بمكانها..

خففوا الاضوية خاطر النسوان تركص براحتها ومنتصر ما يشوفهن بوضوح وكلل صديقات ونسوان اخوة حبيبة طبن بوسط الستيج يرگصن وياهة، العروس داخت ما تعرف ويامن تركص وگضتها تضحك فرحانة ما تعرف تعبر عن شعورها غير بالضحك وانا من اشوفها هيج گلبي يرفرف من السعادة واظل ادعيلها واقرا المعوذات عليها..

تعبنا وفرغ شوية الستيج من بدن البنات ينزلن بس شفت وحدة هستوها اجت وصعدت تعتلي المنصة برزت بيناتنا، وكفت بالنص ضبطط گبال العرسان وجه بوجه صارت وياهم حاطة شال فضفاض على راسها والعباه على چتفاها وبدت تتمايل وتحرك بعباتها وايدها ويه نغمات الاغنية.. كل النسوان استغربوا عبنها واكفة كبالهم ضبط وشعرها طالع من الحجاب وتتمايل بدون قيود چنها اخته.. صار عندي فضول اشوفها عن قرب الاضاءة خفيفة ماكدرت اعرفها الا من تقربت كلش عليهم ياله انتبهت وكدرت اميزها... هاي رهف!

رهف واكفة هالوكفة تتمايل كدام الكل وتركص من كل گلبها ما مهتمة لحجي النسوان ولا لوجه منتصر الي انبلع بلعع من شافها، حاله كله تغير ظل يبلعم ويدور بعيونه عنها بس حبيبة جانت فرحانة ووكفت تركص وياهة تشاركها..

-رهف: مهنااااية يا بت عميي مهنى يا ابن عمييي عساه زواج الدهررر عسسى اشوفن الوليد بحضنچ يا رويحتييي

كضت حبيبة حييل ضاغطة على متونها وجرتها تبوس بيها وتكول..

-رهف: تستاهلين الاحسن واحسن واحسن واحسن واحسنننن من منتصر يا حبيبة عمري ويا حبيبتنا هنياله بيج الدكتوووور

-حبيية: هههههه حبيبتي رهيفة منتصر هم ماكو منه

-رهف: يااااا خية تعلميني بي زلمة والنعمممم منه ززززلمة ابن عميي

عكدت حاجبي مستغربة من نبرة صوتها تحجي بحرگة وشفت چف ايدها الشالته من زند حبيبة يرعش، دارت وجهها على منتصر ومدت اصبعها عليه تكول بصوت عالي خاطر يسمعها..

-حطهااا بعينك يا عوينتي حطها ببطن عينك ما تستاهل حبيبة تتوجع وينكسر گلبها!!

-حبيبة: بعد روحي رهف فرحتيني بجيتچ

ودعتها ونزلت رهف من الستيج، عاينت لوجه منتصر ظلت عيونه تركض وراهة ووجهه مگلوب گلاب بس حبيبة ما منتبهة حايرة تسولف ويه خوات منتصر الحاوطنها من كل جهة خاطر يلبسوها الذهب..

ظل بالي على رهف ماعرف حسيت بيها شي غريب، صح اعرف رهف اجرء وحدة من بنات عمي وتطلع منها هيج طلعات بس نبرة صوتها وحچيها ويه حبيبة چان بي شي ونادر احساسي يخيب بهيج سوالف..

رحت لـ سبأ شفتها كاعدة وتلوب مادري شماكلة ومعدتها ضربت جاي تتوجع، جبتلها سفن من مطبخ القاعة خاطر تشرب وكعدت يمها..

-سبأ: شكول اعراس وكشخة انا دشداشة ووصلة لافتها على راسي هواي عليّ

-ليلة: انچبي وشربي هسة تصيرين زينة

-اوووف جاي اتوجع ليلة مادري شمالني

-تحملي تحملي تقي بعده ما شافچ چا غير تراوي كشختچ

-اي اي

-النفنوف شافه لو بعده؟

-لا ما شافه ولا جاي نلتقي يرجع للبيت متأخر واغفى ما احس على روحي

-شجاچ سبأ!

-والله شكد اسهر خاطر نتلاگه بس ما اتحمل وانامن

-يلا ميخالف اليوم ان شاء الله تصير احواء بيناتكم

-ااااخ بطني خبطت سكتي ولج

-ههههه اگلچ اختج وين راحت؟

-مادري اظن اجوا عليها اخوتي

-هاا، چا شبيها احسها مو طبيعية

-شبيها؟؟

-مادري چن باچية هواي

-هاا لا خية حساسية تكول بعينها طاب تراب من نظفت السطح اليوم

هزيت راسي ما مقتنعة بس شعليه انا احط روحي خليني حايرة بضيمي، لازم اللگه طريقة اطلع بيها من العرس بدون لا يحسون عليّ انطي الفلوس لـ ناظم وارجع بسكات..

لبست الشال على راسي عدل وحطيت عباتي على راسي حتى اطلع بس الحظ سواها واجتني خالة رسمية تسحسل بچناينها تراويهن للنسوان وتعرفهن علينا..

-ليلة: تَـمني ماريد اجي انا غطي عليّ حبابة

-تَـمني: اني هم ماريد بس خالة رزلت شمس قبل شوية تگوللها ابرار بتعبها وبحالتها النفسية المتدمرة وهستوها رجعت من المطار وما نست الاصول وراحت تسلم انتن شبيجن

نفخت هوا مستسلمة ورحت وياهة اسلم على النسوان، احسني واگفة على ناار كل ساع اكول هسة يروح ناظم لابا الحسن وهسة يدزله كلشي عني ويطيح حظي خصوصاً وهو محمل عليَّ من عرفني تزوجت صاير سماني اكثر من گبل الله لا يوفقه..

مشى الوكت وبده يخلص العرس الحمدلله اخيراً، صاحوا بالسماعة راح يطبون ابوها واخوتها يودعوها وكلنا لبسنا ووگفنا على جهة محد تقربت من الستيج.. انتظرنا فترة بينما الكل تحضر وتلفلف زين ياله سمحولهم يدخلون وچان المشهد مهيب!

دخل عمو علي اول واحد بعگاله وبشته والسبحة حاطها بأيد وبالايد الثانية العوچية ووراه طبوا التوأم علي الدر وعلي البدر بلبسهم العربي وكشختهم ويسحلون بكرسي حيدر المتحرك.. تبعهم علي التـقي والتوأم ابا الحسن علي والامير علي وراهم دخلوا علي الحـق وعلي الكرار واخر شي شرفوا زوج المشاكل علي السور وعلي النور "زوج المطيرچية"..

وگفوا صف واحد بعدما سلموا عليها واحد واحد ومطروا منتصر بتوصيات تورشعوا من كل جهة مثل الصگوره واللتموا على فريسة، ظل منتصر يأشر على عيونه واقرا شفايفه يگول "احطها بعيني"..

رجعوا عمو علي وولده التسعة يوگفون گبال الكوشة وحبيبة صارت بنصهم، حاطين على چتافاتها عباية سودة وكاضتها حيل تخاف لا تطيح كدامهم عبن بدلتها مكشوفة.. وگفوا خاطر ياخذون صورة جماعية وضحكت من اشرتلي تَـمني على حويدر سودة عليَّ كاعد وبيده كلينسه يمسح عيونه وخشمه يبجي متأثر بزواج عمته..

كملوا تصوير ومشت خالة رسمية للستيج بيدها علاگة چبيرة مال ذهب، مدتها لعمي علي وهو طلع منها هديته لوحيدته وبنيته وحبيبته الاعز من روحه.. طلع منها سلاح ذهب ينلبس جانبي طوله متر هدية زواجها ووراه بدوا اخوتها يطلعون هداياهم كلمن جايبلها حاجة ذهب..

سلامهم ووداعهم لـ حبيبة طول اكثر من نص ساعة كل واحد بيهم حضنها على صدره بحنية يبوس بيها چن راح تسافر وتعوفهم واكو بيهم بچوا على فراگها وشفتهم يمسحون بعيونهم خصوصاً سور ونور ماتوا من البچي حتى وجههم صار احمر..

وگف علي الحـق گبالها متكدر ومكسور خاطره يخاف ما تودعه عبنها مزاعلته بسبب الصار، جرها من زندها وشمرها على صدره يحضنها ويمسح على ظهرها ويسولف وياهة شي ما نكدر نسمعه بس نشوف عيونه خبطت بالدمع متأذي وحبيبة بس تهز براسها ودموعها تنزل..

-تالة: اوووف متنا بچي كافي

-ليلة: هههههه شكد فاهيات

-تَـمني: بس الماعنده گلب ميتأثر ليلة الله يساعدهم شلون راح يفارقوها ولج احنه شلون نكعد على سفرة وحبيبة مو ويانه عمت عينك بسام

مسحت دمعتي گبل لا تطيح ودرت وجهي عنهن، خلصوا وداع وياهة وره ما خرب مكياجها وتخربط ويه كل واحد تودعه تبچي من كل گلبها وكل ساع امها منتبهتها على المكياج خرب من دموعها..

طلعوا الزلم ولبسناها الكبوس الابيض زين وحطوا فوگاه عباه وطلعها منتصر واحنه وراهة نروح زفافة، ما ردت اروح وكلت لابا الحسن يرجعني للبيت گلبي راح يوگف من الخوف اريدن بس ارتاح اخاف اتلاگه ويه ناظم بالزفة ويفضحني..

بس يا ريتني ما رجعت للبيت.. ويا ريت ما صارت الزفة.. وياريت ما تزوجت حبيبة وطاحت على مصيبة جديدة.. ولا تلاگت عين تالة وكرار وصد وجهه عنها.. ولا ضحكت تَـمني للامير علي وگالتله رجعني للبيت اريدن اشبع منك.. ياريتنا ما طبينا ذاك اليوم للبيت سوه وكلمن راح لغرفته.. وياريت ما اهتزت موبايلات التوأم برسالة اجت بنفس الوكت وقروها!.. يا ريتني ميتة ومگبورة ولا شفت عيون ابا الحسن تبحلگ بالموبايل هالشكل......

يتبع 👑....

━━━━━━ ♛ ━━━━━━

البارت الجاي..... 🥲🔥

معنى سلاح ذهب: هو عبارة عن زنجيل طويل كُلش ومشكل بي قصبات جبيرة ينلبس بشكل جانبي وهاي صورة توضحه (هذا مو مال حبيبة) 👇🏻