تحميل رواية «الأمواج السوداء» PDF

اسمى حميدو، عندى 37 سنة، شغال صياد، ومن وأنا صغير والبحر ده مكانى الوحيد اللى بحس فيه بالأمان، عارف إن ناس كتير هتستغرب الكلام ده لأن البحر بالنسبة لمعظم الناس خوف، لكن بالنسبة لى كان العكس، كنت بحس إن أول ما المركب تبعد عن البر وكل الأصوات تختفى وصوت الموج والموتور كنت بحس إن روحى بترتاح، يمكن عشان البحر عمره ما كدب عليا، وكان بيدينى رزق، غير البشر عمرهم ما كانوا واضحين زيه بالعكس دول بيقطعوا الارزاق،

–

كنت شغال على مركب صيد كبيرة تبع الريس حامد راجل محترم ومشوفتش منه غير كل خير، بأطلع رحلات طويلة بالأسبوع والاتنين وأوقات بالشهر، نصحى قبل الفجر ونرمي الشباك ونفضل مستنيين رزق ربنا، والشغلانة كانت صعبة لكن كنت بحبها، المشكلة إن الحب لوحده عمره ما بنى مستقبل، كل سنة تعدى كنت بحس إنى ثابت مكانى، أرجع البيت ألاقي نفس الحال زى ما هو، لا فلوس اتحوشت ولا بيت اتعدل ولا حلم قرب، وفى ليلة كنت راجع من رحلة طويلة، دخلت البيت تعبان وهدومى كلها ريحة بحر،

–

لقيت مراتى هدى قاعدة مستنيانى، أول ما شافتنى قامت وقالت حمد لله على السلامة، ابتسمتلها وقعدت لكن فضلت ساكت، هدى بصتلى وقالت مالك يا حميدو؟ قولتلها مفيش، قالت لا أنا عارفاك كويس، سكت شوية وبعدها قلت يا هدى أنا تعبت، استغربت وقالت تعبت من إيه؟ قولتلها تعبت إنى أشتغل للناس، تعبت إنى كل يوم أطلع البحر وأرجع وفى الآخر المركب مش مركبى والتعبى مش بستفيد منه، أنا كده عمرى ما هعمل حاجة للمستقبل، هدى سكتت شوية وقالت طب إنت نفسك تعمل إيه؟ بصيتلها وقلت نفسى أشترى مركب، مركب تبقى باسمى، حتى لو صغيرة أبدأ بيها وأكبرها واحدة واحدة،

–

هدى قالت طب ما تشترى، ضحكت وقلت أشتري بإيه؟ الفلوس اللى معايا متجبش نص مركب، هدى قامت دخلت الأوضة، رجعت بعدها بدقايق ومعاها علبة صغيرة، حطتها قدامى وقالت افتح، فتحتها ولقيت دهبها كله، بصيتلها وقلت إنتى بتهزرى؟ قالت لا، خد ده وبيعه، أول ما ربنا يكرمك هتبقى تجيب غيره، قولتلها مستحيل أبيع دهبك، قالتلى وتعبك إنت كمان مين هيعوضه؟ فضلت أرفض وهى تفضل تلح، وفى الآخر وافقت، تانى يوم الصبح نزلت بدور على ورش المراكب، دخلت هنا وهناك، سألت على مركب بعد مركب، يا السعر غالى يا الحالة تعبانة يا عاوزة تصليحات أكتر من تمنها، فضلت ألف لحد المغرب وللأسف ملقتش حاجة مناسبة، رجعت البيت وأنا مخنوق، هدى أول ما شافتنى قالت حصل إيه؟ قولتلها شكله مفيش نصيب، قالت اصبر ربنا بيجيبها فى وقتها، قولتلها على الله، وقتها مكنتش أعرف إن اليوم اللى بعده هيبقى بداية حاجة لو كنت أعرف نهايتها… مكنتش فكرت أمتلك مركب أصلًا.

–

تانى يوم الصبح نزلت على القهوة، كنت مخنوق ومش طايق حد، قعدت على الكرسى فى الركن وبصيت للناس وهى داخلة طالعة، كل واحد بيتكلم فى رزقه وأنا دماغى كلها فى المركب، بعد شوية لقيت خالد صاحب عمرى داخل، أول ما شافنى قرب منى وقال مالك يا حميدو؟ وشك تعبان كدة ليه، قولتله مفيش، قعد جنبى وقال لا فى، احكيلى يا صاحبى، فحكيتله كل حاجة من أول كلامى مع هدى لحد لفى على الورش وإن مفيش مركب فى حدود فلوسى، خالد سكت شوية وبعدين قال طب ما تشترى مركب عم ناصر الله يرحمه، أول ما قال الجملة دى بصيتله، وقولتله انت نسيت الناس كانت بتقول إيه على المركب دى؟ خالد ضحك وقال يا عم حميدو إنت لسه مصدق الكلام ده؟ كلها إشاعات، عم ناصر مات موته ربنا، المركب مالهاش دعوة، الناس بتحب تعمل إشاعات، وبعدين المركب بقالها شهور واقفة محدش قربلها، فرصة حلوة ليك،

–

فضلت ساكت شوية وبعدين قولتله تصدق عندك حق، خالد ابتسم وقال طب يلا بينا قبل ما حد يسبقك ويشتريها وتفضل ندمان، قولتله استنى أفكر، قال مافيش وقت، وقام وقف، لقيت نفسى قمت وراه، مشينا لحد بيت الست مديحة مرات عم ناصر، البيت كان بشكله يخوف اساسا، وقفنا قدام الباب وحسيت بضيق من غير سبب، قولت لخالد استنى، لكنه مد إيده وخبط، بعد ثوانى الباب اتفتح، ست كبيرة فى السن يمكن سبعين أو تمانين سنة، جسمها نحيف ووشها كله تجاعيد، خلانى أبص بعيد عنها، قالت أنتم مين؟ خالد قالها أنا خالد وده حميدو، إحنا صيادين وكنا نعرف عم ناصر الله يرحمه، وجايين نسأل على المركب، الست فضلت باصة علينا شوية وبعدها فتحت الباب على الاخر وقالت ادخلوا، دخلنا وقعدنا، البيت كان كشله مش مطمنى بصراحة، بصيت لقيت صورة عم ناصر معلقة على الحيطة، والمرعب إنى حسيت إنه باصص ناحيتى، قطعت تفكيرى وقلت للست مديحة أنا كنت عاوز أشوف المركب يا حجة،

–

بصتلى وقالت تعالى بكرة الساعة 11 بالليل، هيكون ابن أختى رجع من الشغل وهبعته معاك تشوفها،

قولتلها طيب وانتى عاوزة كام؟ هنا الست بصتلى بطريقة خلتنى أخاف بجد، وقالت أنا مش عاوزة فلوس، بلعت ريقى وقولتلها أمال عاوزة إيه؟ قالت: أنا عاوزة أشوف المركب شغالة فى البحر من تانى، الجملة كانت عادية… لكن الطريقة اللى قالتها بيها خلت قلبى يدق، قولتلها متقلقيش لو خدتها هترجع تنور زى الأول، الست قالت: ماشى، خرجت أنا وخالد ومشينا، طول الطريق ساكتين، لحد ما قولتله الست دى مش مريحة خالص، خالد ضحك وقال يا عم ده انطباع، دى ست طيبة وشكلها نفسها تشوف حاجة من ريحة جوزها، قلت يمكن ربنا يعدى الأيام دى على خير

روحت البيت لقيت هدى قاعدة مستنيانى، أول ما شافتنى قامت بسرعة وجريت عليا وقالت خير يا حميدو؟ عملت إيه؟ بصيتلها وقولت: الحمد لله لقيت مركب، وشها نور وقالت بجد؟ قولتلها بجد، ابتسمت وقالت الحمد لله يا رب، قعدت جنبى وقالت طب مركب مين؟ وقولتلها مركب عم ناصر الله يرحمه، أول ما سمعت الاسم ابتسامتها اختفت مرة واحدة وبصتلى وقالت مش دى المركب اللى، قاطعتها بسرعة وقولتلها سيبك من الكلام ده، كله إشاعات، المركب كويسة جدًا ومفيهاش حاجة، وعم ناصر مات موته ربنا زى أى حد، هدى فضلت باصة لى وقالت والصيادين اللى كانوا بيقولوا إنهم شافوا حاجات بعنيهم؟ قولتلها يا هدى الناس بتحب تحكى، لو صدقنا كل كلام الناس عمرنا ما هنعمل حاجة، وبعدين دى فرصة عمرى،

–

قالتلى بس أنا قلبى مش مرتاح، قولتلها قلبك مش مرتاح عشان إلاشاعات وخلاص، المهم إن خلاص هيبقى عندنا مركب، وهتنزل البحر باسمك إنتى يا هدى، أول ما قولتلها كده ابتسمت ابتسامة صغيرة لكن مكنتش مرتاحة، قربت منها وحضنتها وقولتلها متخافيش، كلها كام شهر ونكون فتحنا باب رزق كبير، بعدين دخلت غيرت هدومى ودخلت أنام، الليلة دى كنت تعبان جدًا لكن الغريب إنى أول ما غمضت عينى حسيت كأنى لسه واقف على المركب، فتحت عينى لقيت نفسى فى الأوضة، رجعت نمت، وبعد شوية صحيت على صوت خبط خفيف… تك… تك… تك… فتحت عينى وبصيت للساعة كانت 3 الفجر،الصوت سكت، قولت يمكن تهيؤات، غمضت عينى تانى، لكن بعد ثوانى رجع… تك… تك… تك… المرة دى كان أوضح، قمت من السرير وخرجت أشوف، هدى نايمة، مشيت ناحية الشباك وفتحت الستارة… الشارع فاضى، كنت هقفل لقيت حاجة خلتنى أتجمد مكانى، آثار رجلين مبلولة طالعة من باب البيت… وخارجه من البيت.

–

لبست الجاكت بسرعة لأننا كنا فى عز الشتا، شهر واحد، والبرد كان قارس بشكل يخلى النفس يطلع دخان، فتحت الباب وخرجت، آثار الرجلين المبلولة كانت واضحة قدامى، كأن حد لسه خارج حالًا من البحر، فضلت أمشى وراها وأنا مش فاهم إزاى حد يدخل البيت ويخرج من غير ما أحس، الشوارع كانت فاضية و والجو هدوء، لدرجة إنى كنت سامع صوت نفسى، كل شوية أبص يمين وشمال مفيش حد، وآثار الرجلين تكمل قدامى، لحد ما لقيت نفسى واقف عند الشاطى… نفس الشاطى اللى عم ناصر كان دايمًا يقف عليه قبل ما ينزل البحر، وقفت وبصيت قدامى، البحر كان ضلمة والموج عالى بشكل يخوف، لكن فجأة شوفت حاجة خلت جسمى يعرق رغم السقيع.

–

شوفت راجل واقف فوق المركب… ركزت أكتر… واتجمدت مكانى… عم ناصر… أيوة عم ناصر بنفس هدومه اللى كنت بشوفه بيشتغل بيها، نفس الملامح، نفس الوقفة، لكن وشه كان مختلف، كان غضبان بشكل عمرى ما شوفته، فضل يبصلى ورفع إيده وبقى يشاور وهو بيقول من بعيد بصوت مكتوم: ابعد… ابعد… ابعد… جسمى كله تجمد ومقدرتش أتحرك، وفجأة حسيت بإيد اتحطت على ضهرى، اتخضيت واتلفت بسرعة وكان جسمى هيقع فى البحر، لكن حد مسكنى وقال متخافش، بصيت لقيته خالد، بصيتله بذهول وقولتله إنت إيه اللى جابك هنا؟ خالد استغرب وقال أنا؟ إنت اللى إيه اللى جابك هنا فى الوقت ده يا حميدو؟

–

قولتله وأنا بنهج من الخضة أنا شوفت عم ناصر، خالد بصلى وضحك وقال يا عم كفاية تهيؤات، قولتله والله مش تهيؤات، أنا شوفت آثار رجلين طالعة من بيتى واتتبعتها وجابتنى لحد هنا، خالد قال طب فين الآثار؟ قولتله تعالى، وشديته من دراعه وفضلنا ماشيين راجعين وأنا طول الطريق ببص على الأرض، لكن كل ما نمشى مكنتش لاقى حاجة، وصلنا البيت… ووقفت… الأرض ناشفة… مفيش أثر واحد… خالد بصلى وضحك وقال فين يا حميدو؟ مش قولتلك تهيؤات؟

–

قولتله والله العظيم شوفتها كانت خارج من البيت، خالد طبطب على كتفى وقال ادخل نام، شكلك مرهق، وبكرة احكيلى كل حاجة، ولف ومشى، دخلت البيت لقيت هدى صاحيه، أول ما شافتنى قامت بسرعة، استغربت وقولتلها إنتى صحيتى ليه؟ بصتلى وقالت: إيه اللى إنت عملته ده؟ قولتلها عملت إيه؟ قالت هتعمل نفسك مش عارف؟ قولتلها والله ما عملت حاجة، هدى مسكت إيدى ودخلتنى جوا، وأنا مستغرب، أول ما دخلت الأوضة شاورِت على الأرض… وهنا شوفت حاجة خلت الدم ينشف فى عروقى.