رواية الاصداف الفصل الثاني والعشرون 22 - بقلم بمبش

وبديت اقره الرساله

هلوو هلونه شلونج شخبارج حبيبتي
ضل بالي عليج صارلج يومين لا مرسال لا شي ولو مو صوجج صوج الحيوان العندج اللي ما مخلي بيدج تلفون
هيلين كافي تعبت واني انتضرج مو كلتي اتطلك منه ليش ما تطلكتي لسه ولج كلما اشوفه يحجي وياج كبالي احترك بنار ومن اشوف نضرته على عيونج اتعب حيلي يروح ما اريد غيري يشوف عيونج
حياتي انتضر منج رساله مو تنسين ترا اجيت اليوم عليكم علمودج وخابرت هيثم كتله دا اجي اخذ غراض افنان واجيت بحجة افنان
بس مو هم تتعصبين مثل رسالة اخر مره ههههه

حبيبة كلبي مشتاقلج المرسل يوسف

اقره وادموعي تنزل معرف شنو شعوري

جرت الورقه ساره وكالت... كافي تبجين اليوم نور الصبح من شافت الورقه ماخذتها وقرتها كدام اهلي المغرب من جا ابويه

ودزينه على يوسف شافها وكال هذا مو خطي واني هيلين اختي واذا علمود منو دز الرساله ماكو غير اختي لأن بس هيه جانت موجوده من خابرت هيثم واني هيلين كلشي ما اعرف عنها البنيه مجرد سلام بيناتنه مو اكثر

وراح للبيت اجه بليل جايب افنان وجهه ازرك يخوف كاتلها وكدام الكل اعترفت انو هيه كتبت الرساله

هيلين... ساره اريد تلفونج فدوه دشوف اهلي

ساره.. هاج اخذي واني اوكفلج عالباب اراقبلج من شخص يجي راح اكول ها فلان واطب يمج

هيلين... تمام

طلعت ساره وفتحت تلفوني باوعت الساعه شلون هسه الساعه مو 3واني كتله ب3بس لا مموجود ابحث على صفحته وادعي بكلبي كون الكاه نشط

طبيت لحسابه ما يطلع عندي النشاط لأن مو اصدقاء هوا وساره ف دزيت رساله الوووو وينك

ثواني واجاني الرد

منو حضرتج

اني هيلين تطمن

احجي شبيج هيلين

اتصلت عليه وسمعته كال الووو وبجيت

انسام... بس لتبجين وفهميني

هيلين... انسام اليوم اذا ما اجيتو واخذتوني باجر تسمعون بموتي حتكل نفسي

انسام... هيلين بلا هاي السوالف لتخوفيني عليج ولتبجين اذا تنطيني كلمه ترجعين مو مثل اخر مره فشلتيني حتى اجي
.

هيلين... لو يبجي دم كبالي هيثم هالمره ما ابقى
تعبت وكلبي تعبت اريد اهلي هما ميردوني اني اريدهم خلوني وحدي لهالناس كلي شلون انساهم كسر كلبي بعدهم وكسر كلبي هيثم

تأذيتتت شفت لجمات ما مرت عليه بيوم انساممم وبجيت

انسام.... اششش لتبجين اعتبري وقت الطريق واحنه يمج وهسه خليني اروح افول بانزين بسرعه واجي

هيلين.. تمام مو ما تجي

انسام... بويه اجي اشون ما اجي اختى تنشدني مو عيب عليه ما اجي يلا مع السلامه

مع السلامه

سديت منه الاتصال وحذفت كلشي وصحت لساره

ساره... هااا هيلين

هيلين... حروح لاهليي ساره كافي

ساره.. اخويه ما يستاهلج بس باعي لا تحجين كدام احد لا يدرون ومن هيثم يجي يكلوله..

تمام

بس ساره اثق بيها معندي ثقه بأحد هنا والبنيه اللي لاكتني بالشارع علمتني ما اثق بشخص لو مهما كان وجهه وملامحه بريئة

بقيت بأنتضارهم واحس الوقت صار سنه

تقريبا ب11بليل اجت ساره كالت هيلين اجو انسام وابوج

ركضت لبست عباتي واني ممصدكه مردت اخذ شي منهم خليني ارجع بس هذا الشي الاريده ما اريد غير شي وافنان خل ترتاح هاي الرادته صار وكلشي انتها بيني وبينه

ساره فتحت تسجيل صوت وانطتني تلفونها وكالتلي احجي ودعي عالاقل

ما رضيت وحلفتني حجيت....
مشكور على كلشي قدمته اليه من ضرب وأهانه وطعن وشكوك وهاي اخر جرح اللك بكتفي كلما اشوفه راح اتذكر اذيتك انت انسان عدمت شخصيتي وحولتني لأنسانه ضعيفه اول مره شفتك بيها شكد جنت جبير بعيني وهسه صرت ما. اشوفك بعيني

بجيت وساره سدت التسجيل وحضنتني وبجت وياي

كالت انزلت كبل لا يجي هيثم وعود يسوي مشكله وميخليج تروحين

نزلت سويت الدرج بايتين فتحت باب الاستقبال وباوعت
انسام ونضرته اليه بشفقه وابويه اللي نضرته جان نصدوم بضعفي وشكلي لأن شكلي تغير عدهم 180درجه ونضرة عمي جانت خجل من اللي سواه ابنه وعمتي اللي نضرتها تتوعدلي بنضراتها

باوعت لأنسام وحجيت... نروح

عمتي... وين تروحين وزوجج ما موجود

هيلين... ما كافيي خدامتكم استقالت جيبو غيرها

انسام... يلا مشينه

هيلين... اييي

ابويه باوعلي وفتح ايديه يعني تعالي احضنج صرت وره انسام ولزمت جاكيته وحجيت.... خل نروح انسام

ابويه... ليش خايفه مني

شلون تريد ما اخاف منك وانت سبب باللي جاي امر بي

تقرب حضني وكال بويه لتخافين

وخرت من حضنه وانداريت لأنسام وعيوني مغوركه
انسام خل نروح

انسام... يلا مع السلامه مشيت وعمتي تتحلف

انداريت رجعت للحجيه بستها وكتلها مشكوره على وكفاتج وياي يمه

وطلعت وراهم جانو ينتضروني بالسياره
دا اصعد بالسياره وقاسم  واكف على جام السياره يقنع بانسام يبقون ديحجي وأشر لأنسام يعني دقيقه ورفع تلفونه وجاوب

قاسم... وينك.. ضل بالنه... موجوده.... اي زينه.... ضل لا تجي وهيلين رايحه ويه ابوها

نزل التلفون وكال... يفصله بوجهي

اني كلبي انخرط كبل كلت لانسام

هيلين... فدوه لعمرك امشي قبل لا يجي انسام

انسام سلم عليهم ومشينه من طلعنه منطقتهم هيثم كال لابويه... شوق عمي مو كتلك اسمها فلان منطقه اني من دخلنه،، عليها قريت اللافته وعرفتها

من كال هيج حسيت شويه تطمنت

خليت راسي على جام السياره واباوع عيون ابويه بمراية السياره كلها ندم وأنسام يتوعدلهم اني بغير عالم عالم مليئ بالأهانه والضرب والجوع طلعت من هذا العالم بس مجاي اكدر اتجاوزه خايفه يلحكنه اي خايفه يلحكنه ويوقفنه وياخذني غصب ويرجعني لعالمه المخيف غمضت عيني وكلت ربي اكفيني شر عبادك يا ارحم الراحمين يا الله تعبت امتحانك صعب تمنيت الموت ما متت انتحرت ما متت يا ربي افتحها بوجهي وخلصني منه كافي تعبت يا ألله دمر حياتي وأحلامي وقف تفكيري سيطرة نزلو ابويه وانسام هاذهوا عشايرهم تسوي كلشي رحت بيها رجعتي على عذابج هيلين

نزلو ابويه وانسام شويه معرف وين اخذوهم وكف جندي شافني دا ابجي كال

هويه لا تخافين بس يدكون اسماءهم حاسبه

كلت بكلبي يا حاسبه وشنو هاي انوب

شويه وشفتهم جايين ومشينه بالسياره شويه وابويه اجاه اتصال جاوب واسمعه يحجي

الووو... وعليكم السلام... يعني اشوني شفت حالت بنتي اليرثى لها واتكلي اشونك...... لا تبرر افعالك ما ترجع وحتى اذا رادت هيه ورجع ما ارجعها..... وين انت دقيقه ضل وياي

باوع على انسام وكاله احنه وين

انسام.. عليش عمي

ابويه... هيثم جاي يكول دا احجي ويه هيلين

سمعته كال هيج لو تخبلت بعدني ما حجيت وكال انسام.... لا يجي ولا يشوفنه وجهو على شنو يجي

ابويه ما دار بال لانسام وكام يوصف لهيثم الطريق اني هنا صيحت وكف السياره وكفهااااااا اذا ما وكفتها هسه اذب نفسي

وكف انسام اني نزلت منها وركضت الشارع، عام

ولحكوني يركضون اركض بدون وعيي هسه يجي شايل سلاح ويكتلني خل اوكفلي سياره واروح، بمكان ما بي احد

ابويه كلت متندم بس الضاهر يريدهم وديوصفله الطريق

ما حسيت الا انسام، جرني من ايدي وابويه لزمني من جتفي واني صرخت، وبجيت

ابويه حس بلزمته جتفي ملفوف كال... شبي جتفج

رديتله... جتفي صار هيج بسبب الشخص اللي عيشتوني وياه هوا هيج سوه حان دا يذبحني واستخطاني

ابويه نضراته ووجهه ميتفسر وحلفلي يمين مقسم بس اصعد بالسياره، بعد ما يرجعني عليهم صعدت ومشت سيارتنه وهيثم رجع يخابر ببويه وابويه ما يجاوبه

طبينه محافضتنه واحس رجعلي النفس

السياره تمشي بشوارع محافضتنه واني دموعي ما وكفت طبينه لمنطقه باوعت انسام وكف يم بيت

هيلين... هاي وين انسام

ابويه... تحولنه بابا تحولنه لغير منطقة

ردت اسأل ليش بس ما اريد احجي وياه خليها عود اعرف من سهام

نزلنه واحس متكسره تكسر من الطريق

شي اكيد امي حتفتح الباب شلون احضنها وةني ما اريد احجي وياها لا هيا ولا ابويه

ابويه طلع مفتاح النسخه وفتح الباب الغريب انسام هم فتح باب اللبيت اليمنه باوعت باستغراب حجه

انسام.... هههه حقج تستغربين نكعد كعده طويله واكلج شجابنه لهنا

فتنه للبيت باوعت امي شافتني من شباك المطبخ وطلعت تركض عليه

باوعتلي وكالت يمه بنيتي وحضنتني وكامت تبجي

تصنمت شي بيه يريد يحضنها وشي بيه يكلي لتحضنيها خليها تحس بالتخلي مثل متخليتي عنها

مقاومت شوقي وحضنت امي وبجيت وياها حجه ابويه

شنو اني ما ترديني ليش متحجين وياي

مرديتله باوعت لأمي وكتلها.... سهام وينها

امي... ليش محجيتي ويه ابوج

اني اجيت من الضغط حتى انتو تضغطون عليه انداريت دا اروح لبيت عمي وحجه ابويه

... لا تروحين بمكان ما اجي يمج وحقج شما تسوين

امي... خل نطب جوه شويه ارتاحي يمه

طبيت جوه البيت غريب بس الاثاث اثاث بيتنه القديم

باوعت لعمتي متمدده بالهول وحالتها حاله تعباته وضعفانه شافتني وشهكت

سهام... هيليننن

ركضت عليه دنكت عليها وحضنتها وهيه ممصدكه تبوس بيه وتبجي

بقيت يمها شويه وامي كالتلي تعالي لغرفتج نحجي

رحت وياها فتحت باب الغرفه اثاث غرفتي كله موجود والغرفه نضيفه وحتى بيها ريخة بخور

امي.... احجيلي ليش رجعتي

هيلين.... هواي حجي بكلبي ارتاح واحجيلكم

امي.... ارتاحي يمه ارتاحي.. وعافتني وطلعت

واني نطيت عالتخت وممصدكه رجعت ركضت للكنتور فتحته وباوعت ملابسي معلكه

استغربت شعجب لهسه هنا والغريب ما متربات

خليت كلشي وره ضهري واتمددت عالتخت وغمضت وهاي اول مره من بعد زواجي اغفى بسرعه

حسيت على ايد على راسي فتحت امي يم راسي

هيلين... الساعه شكد

امي... الساعه 11ونص

هيلين.. حيلل شكد نمت

امي... من التعب

تعدلت وكلت لامي.... مشتاكه لطبخج

امي... تعرفين شطبختلج

هيلين... شنو

دولمه لفيت جدر اللج ولسهام وعافتني وكالت يلا غسلي وتعالي بين ما احضرها

جانت غرفتي سويت (حمام بداخل الغرفه) هاي ما بيها طلعت للحمام غسلت ونزل امي مخليه الدولمه بصينيه وخضره وزلطه وريحتها تجنن ابيت عيالي قليل يطبخوها

رحت كعدت يم سهام وشلت سلكايه اكلت

اجه ابويه من بره جايب علاكه خلاها عالقنفه وكال ها ايمت سويتي الدولمه

امي... قبل لا تعشيت
ابويه... مدام دولمه اني هم اكل وكعد كبالي ياكل
باوعتله ودنكت اكل احس الأكل بي طعم هناك عمتي من اكل تسممني بحجيها

ابويه.... هيلين

هيلين... هممم

ابويه.... باوعيلي بنيتي

هيلين... نزلت الخاشوكه وحجيت.... هسه تذكرت اني بنيتك

ابويه.... ليش شسويتلج بابا

هيلين... شسويتلي هسه ليش تخلوني افتح مواضيع واغثكم

امي... واني ليش تشمليني

هيلين.... اشملج لان وره زواجي بشهر نسيتيني

سهام.... محد نساج وكلنه كلبنه يمج كل جم يوم نكعد نبجي عليج لتغثين اهلج اعرفي ضروفهم وبعدين

باوعتلهم عافو الاكل شلت الصينيه ووديتها للمطبخ غسلت ورجعت واكفه وحجيت

امي... سهاممم انتي احكمي....

سهام اييي

هيلين... خابرت ابويه كتله هيج وهيج يكلي اسبوع الجاي اجي اخذج ويمر الاسبوع وما يجي
لعد تقبليها يتبره مني

صرخت ودموعي تنزل.... تقبليها ابويه يصدك الغريببببببب هوا من البدايه جبرني عليهم تهمني زوجي مرتين تهمني بشرفيييي.. مسحت دموعي وكملت حجي..... اخابره يحضرنيييي تقبليها ازعل عند الغربه وابويه عايشششش هااااا... رجعت مسحت دموعي اللي مجاي تتوقف وجريت دشداشتي..... تشوفين تشوفيننن زوجي اللي انطةني الا ابويه مختللل مو طبيعي راد يذبحنييي

اول ايام زواجي اقلب بصورهم وابجي عليهم وهما جابريني عليه

انتو شتعرفون عني تدرون بي من اتزوجني جان يحب غيرييييي فتحت ايديه واحجي.... تشوفين اضافيري اللي جنت ما اغسل اماعين من خوفي عليهن تكسرووو

وخرت الشال من، راسي وكلهم انصدمو بشعري.... دتشوفونننن بيده كص شعري ونزلت بالأرض ماسكه شعري وابجي

لحد ما ابويه تقرب كعد كبالي وحضني واني تعبت من البجي بس اشهك وامي وسهام يبجن وابويه يبجي صوت بجيه عالي شويه هدينه وامي كالتلي رجعي لغرفتج ارتاحي وطلعت رجعت تمددت وابجي اريد انسى كلشي

نمت فتحت لكيت نفسي بحضن هيثم وخرت عنه كال اسف ورجع حضني

صرختت وخرررر وكمت من يمه وحجيت... شجابككك يميييي

رد كال... مستحيل اعوفجج اجه يمشي باتجاهي واني صرخت، فزيت من نومي جان كابوس باوعت للساعه ب10وربع جوعانه نوم رجعت شربت ميه ونمت كعدت. على اذان الضهر سبحت وصليت ورحت للهول امي دتقره قرأن على عادتها القديمه كل يوم بهيج وقت تقره قرأن

وابويه رايح للشغل وسهام كاعده تباوع للتلفزيون

كعدت يمها وكتلها... سهومم ضعفانه

سهام.. يولي احلا

هيلين... خدودج. ذبلانه

سهام... ميخالف اهم شي ضعفت

غمزتلها وحجيت.... حقج تعبانه بعدتي عن حبيب الكلب

ضربتني بالريمون وكالت... انجبي انتي وسوالفج البايخه

جاي تحجي وجان تطلع ايه من المطبخ مالتنه وكالت كعدتي وأخيرا
كمت سلمت عليهن محاصن وبوس وكالتلي ولج شهالنوم من الصبح اني هنا البارحه ردت اجي وانسام كال تعبانه

هيلين.... شخبارج

كالت كلش زينه بشوفتج

طبينه للمطبخ اني وياها وحضرتلي ريوك

ايه... ولج اكلي شي بي سمنه حتى شويه تبرز انوثتج وترجع مثل قبل

ضحكت على سوالفها وكعدنه اكلنه وكتلها اريد اخابر براء

ايه.... تدللين... وانطتي تلفونها

اخذتها باوعت جايها اشعار... بسيطه أيه

هيلين... شبيكم انتي وياه

ايه... مكاونين ويتوعدلي واخذت التلفون مني طلعتلي اسم براء وخابرتها

بقينه يمكن ساعه نحجي وتعاتب بيه ليش خطي مغلق كتلها من نتواجه نحجي

وكضينه اليوم عادي ابويه وجهي ثكيل منه  أيه باتت عدنه وخابرنه براء بليل كضيناها مخابرات للصبح فاتحات اتصال وياها ونسولف وعمتي ويانه

وبقت ايه عدنه 3ايام يوميه نبات سويه ونصعد اتصال ويه براء ابويه محاجاني عافني براحتي وهيثم معرفة شي عنه او الصدك اني ما سألت عنه

كاعدين بالاستقبال نتعلل وبيت عمي عدنه وانسام ما جا وياهم تقريبا وراها بساعه طب انسام باوعلي وكال

انسام... طكووو الوصخين

هيلين... ليش

انسام.. دباعي.. وطلع من الكيس تلفون

ابويه.... هاي تلفون وهذا الخط مالتج

باوعتله بأستغراب... الخط مالتي القديم لو هذا جديد

ابويه... خطج القديم

هيلين... شجابه عليك

ابويه... اخذي هسه

انصدمت منه شلون منين ايمت جاب خطي

اخذته وانسام كال اشحني تلفونج وبعدين استخدمي

حجه ابن عمي العود المغرور... جيبه البلك يمي واخذه من انسام شكله عالشحن

بقو عدنه يتعللون وسوالف وضحك وراحو وره ال11وأيه هم راحت من راحو سألت ابويه عالخط

هيلين.... منين جبت الخط

ابويه... من هيثم

هيلين... شلون يعني يضل وراي وانت تضل منطي وجه

ابويه... لا هوا خابرني كال جبتلها الخط وتواجهنه بمكان وانطاني الخط

هيلين... خوما جاب طاريي

لا بس كال مرتاحه كتله اي وما جاب طاريج

هيلين... ايمت يطلكني

ابويه... ما حجينه بهيج موضوع

هيلين... احجي وياه وكله اريده يطلكني

ابويه... هاذهوا بنتي طلاك طلاك

ثاني يوم كعدت تقريبا ب1 كعدت اتغده وسألت امي على ابويه كالت ابوج راح علمود سالفة الطلاك

هيلين... شوداه عالديوانيه

امي... هيثم هنا

حسيت كلبي انكضب من قربه يعني بنفس المحافضه

كملت اكل وامي كعدت. تداويلي كتفي

ابويه رجع كعد امي انطته ميه وكالتله... ها بشرني

ابويه... يكول احجي وياها واذا ما اقتنعت هاذهوا اطللكها

باوعتلهم... شنو يحجي وياي

ابويه... بليل راح يجي يحجي وياج وينتهي كلشي هوا يكول اني اراضيها كتله تعال بس بنتي ما ترجعلك كال واذا هيه قبلت ترجع كتله تنجازون بس هالمره يا بنتي ما اجبرج على شي ما تردينه اطلكج منه كبل واذا يعاند اسحله بالمحاكم ابويه حان يحجي بعصبيه

رديتله.... ما يحتاج يجي اشوفه

ابويه... بنتي ما راح ياكلج بس يحجي وياج وصدكي ما اخلي يجبرج على شي

هيلين.... ليش دتجبروني اشوفه

ابويه... حتى بعد ما يضله اي حجه

هيلين... تمام خل يجي واني اعرف شحجي وياه

كلت خل يجي واقوي كلبي واواجهه
من خوفي من مواجهته حسيت الليل بسرعه اجه كاعدين واندك الباب ابويه طلع عالباب واني متصنمه بس طلعو انسام واخوه المغرور

هيلين..  يمه شعجب اجو يدرون بهيثم

امي... اي يدرون ابوج دز عليهم

هيلين... عليش وين الربط

امي... ما ادري

عمتي... يولي مو يخاف لا. يجرج وياخذج جبر وابوج جبير مو بحيله فكال اجيب الويلاد

باوعت امي اشرتلها بمعني لا تجفصين معناتها ابويه خايف من جيته مو بس اني

صبينالهم الجاي واندك الباب هيثم ما قربت للشباك من خوفي لا اشوفه واني مجبوره حشوفه كعدو شويه وصوته خشن واضح شويه وانفتح باب الاستقبال اللي صاير عالهول طلعو ابويه والويلاد

وابويه كالي. طبي يلا وبس يحاول يجبرج على شي صيحيلنه احنه هنت بالهول

هزيت راسي ب اي وتقدمت بخطوتي للباب
لزمت يدة الباب وخايفه تعصبت على توترت على انقهرت على خفت دخلت للأستقبال واني عيوني مغوركه وايديه وشفايفي ترجف

احس رجليه ما يشيلوني من خوفي

لهنا وينتهي البارت تصويتكم عمري مو تنسون 🥺✨✨✨✨✨✨✨✨✨✨✨✨✨✨