رواية الاصداف الفصل الثلاثون 30 - بقلم بمبش

بقلمي الكاتبة..
bmbsh_beme

حبيتك بعد بس لا تگلي شلون
ولأ تسئل حبيبي شلون حبيتك
خليني على بالك بيه فكر زين
لان من البدايه بالي خليتك
صحيح انته غريب وما اعرفك زين
بس روحي عنيده وحيل هاويتك
بروحي السكن عايش مع الروح
واقرب من أحساسي ألبيه حسيتك
احبن بيك مسجك الشفاف
واحب هاي الوكاحه أللي مخاويتك
صدگني احس هواي الك محتاج
واكثر ضرف هذا البي احتاجيتك
لان ماكو أللي يگلي شبيك
وتجي تمسح دموع العين ياريتك

اجت امي للمطبخ كالت...

امي.... هيلين يمه تريكي حتى تتحضرين دا تروحين
ابوج خابرني يكول

هيثم خشمه فطر وحاجبه مفتوح من صاحي

كايل اريد اشتكي انت يالدكتور روح عالشرطه اللي بالمستشفى جيبهم

المهم جايبهم ف ابوج كايل الحق ويه ضرغام لأن هيثم طاب للبيت ومحاول يخطف بنتي

راد هيثم كايل مرتي وابويه يكول اكللهم مو مرته قافلين كايلين لابوج تحضر البنيه الراد ياخذها ونتأكد منها

اذا طلع زوجها ف احنه راح نعتقل الرجال الضاربه

كلت لابوج ما ادزها يكول عيب الرجال لوما هوا جان هسه هيثم اخذ هيلين ووصل الديوانيه

ف كتله عادي بنتي عيب الرجال ساعدنه يروح ينسجن من ورانه ولا انسه ابوج وصاني على اوراق الطلاق والمستمسكات

معرف شسوي معندي غير حل الجنت خايفه منه ما صار جنت ابالي يريدون يرجعوني عليه

كاعدات نتريك اني وايه تسولف اني مبقالي واهس احجي بسبب الصار كلش خفت

ايه...ولج للحضه صرت مثل الابطال ركصت لبيتنه هجمت الباب محد طلع اتصلت بأبويه جاوبني كبل كتله وينكمم

كال شكو

وسمعت حسام اخذت التلفون من ابويه ما ادري بس هوا جاوبني كتله الحكنه

بس بطل عفطي ما فدتكم بكلشي

هيلين... عمري انتي ردتي تتاذين علمودي

اكلت بدون واهس وامي جابتلي عباتي والشال لبستهم تقريبا نص ساعه مدري اكثر اجه حسام

أيه بقت يم سهام واني وامي رحنه ويه حسام
حجت امي.. وينكم يمه شصار بينه

حسام.... فتحيه وسوالفها اللي متخلص البارحه الليل كله تدك على اهلي تريد تروح سفره ابويه كاللهم باجر اخذكم ب9نتغده هناك ونرجع

وطلعنا شفت ابويه ديخابر ووكف لحيله كال شكووو
جريت منه التلفون سمعت ايه كالت الحكنه صعدت سيارتي ومشيت نسيت حتى اهلي بقو ابويه هجمها عليه بالاتصالات

اخر شي من وصلت المستشفى وطببو هيثم يفحصو جاوبته عمي اشرلي يعني لا تحجيلهم

لهسه ما يدرون شصاير كتله جاي هيثم وايه مخابرتك خايفه ياخذ هيلين وهيثم راجع

رحنه والطريق كله خايفه ما. اريد اشوفه وصلنه المستشفى راح حسام جاب كرسي متحرك واجه امي نزلتني عليه

راد حسام يدفع الكرسي بس امي ما قبلت
طبينه للمستشفى طلعنه بالمصعد واني كلبي دكاته ألف

فتنه بممر مليان غرفه وريحة المستشفى شكد مكروها باوعت ابويه واكف يم غرفه وصلنه يمه شافنه كال لحسام...

روح بويه صيحلهم

راح حسام بابا باوعلي وكال...

اشونج بنتي خوما ضربج اذاج

رديتله...لا ما ضربني

شويه واجه حسام ووياه شرطي وصلونه ابويه انطاهم اوراق الطلاق حتى يتاكدون ما يربطنا شي

الشرطي شكله شراني باوعلي وكال بخبث....وشمدريني جايبين زوجته يجوز مو هيه خل نطب نسأله ونشوف

طبينه للغرفه جان هيثم متمدد شافني وبقه ساكت ما حجه شي

توقعت راح يهجم عليه بصياحه وعصبيته بس هادء معرف شبي من مرات اكول يمكن عقله بي شي هالمره بدون اليمكن اكيد

حجه الشرطي.... هاي زوجتك

هيثم... اي

ابويه... سيدي هاي الاوراق تصفحها بنتي مو زوجته طليقته وبالقانون وبالشرع بنتي ما تحل عليه هوا طاب للبيت ما بي رجال

حجه الشرطي... شو انطيني الاوراق... اخذهم قره منهم شويه وباوع لهيثم وكال... من ناحيتنه منكدر نعتقل الرجال الضاربك

طلع الشرطي وابويه كال لامي انتو ارجعو ابووباسم جاي بالطريق يشوف هيثم اني من يجي ابو باسم اجس للبيت

رجعنه احنه وصلنه دننزل ساعدني حسام نزلت باوعت جان ضرغام واكف بالباب ايده ملفوفه وديدخن بيها

باوعلي بنضره معرفت افسرها طبينه جوه انسام موحود وحسام طببنه للبيت وراح يجيب اهله

بقينه كاعدين نسولف كال انسام...ضرغام فد رجال كفو ماكو منه بس تنخاه

امي... لو شايف شلون كتل هيثم اني كلت مات صدك رجال حوك واخو خيته لوما هوا جان هسه شحالنه

شويه واجت عمتي وعمي وهيام

دنكت عليه هيام بوستني وكالت... البارحه ردت اجي اشوفج بس اجت فتحيه وخربتها واليوم راح ارجع لعيالي ومشتاقتلج ولج

حجه عمي.... شنو السالفه وين ابو هيلين

امي... بالمستشفى

عمي.... يا مستشفى... اندار على عمتي... شوفي ام حسام مو كتلج كلبي حاسني بيهم شي... باوع لامي... شكو بالمستشفى شصاير خوما بي شي ابو هيلين

حجتله امي كل الصار وكام يغلط على هيثم وكال اني رايح اتشكر من ضرغام واروح للمستشفى

واحنه بقينه كاعدين نسولف وحسام راح ويه عمي بقه انسام كاعد يقلب بالتلفون

امي كامت تطبخ غدا عمتي كالت احنه متغدين وايه كالت. اني سويت اكل لسهام بالكوه قبلت تاكل لوما علاجها ما تاكل واني قبل لا رحتو للمستشفى تريكت

امي كالت اني ما بقالي نفس لعد اسلك بيض لهيلين كتلها ما اكل احس الريوك صارلي سم ما اريد
انسام وكف وكال...

اني طالع هنا بالفرع ويا صاحبي وطلع

الحبايب كعدن يسولفن واني تمددت وغمضت تفكيري مشغول ليش هيج هيثم سوه شيريد مني ليش بقه ساكت ما صيح عليه معقوله بي شي عقله

زين اني لوما ضرغام جان هسه اني ابيتهم واتخيل نفسي هم يلزمني يكتلني وعمتي تاخذني احلب البقرات

حسيت على شخص غطاني باوعت امي درت عيني للساعه حيل الدنيا مغرب رحت توصيت ورجعت صليت ورجعت تمددت تغطيت وغمضت مشبعانه نوم نمت الفجر وكعدت مشبعانه نوم ما اعرف ايمت غفيت

كعدت على صوت امي تكعدني دا اكل

كتلها ما جوعانه ورجعت نمت
كعدت اخذت تلفوني حيلل شكد نايمه الساعه ب11
باوعت الهول فارغ كلهم رايحين نايمين

استندت عالحايط ووكفت رحت للمطبخ خليت الجاي عالنار وغسلت وخليت بالصينيه جبن ودبس شويه اعوض كلشي مماكله

اخذتهن ورحت للهول شغلت ضو الهول. وشغلت التلفزيون وكعدت اكل كملت اكل فتحت تلفوني طبيت للماسنجر

طبيت للمحادثه مال ضرغام باوعت نشط طبيت للصفحه مال الفيس اقلب بحسابه واشوف التعليقات شكد معلقاتله بنات ياايي هاي التكله احبك وهاي التكله فدوه هههههه

جاي اقلب بحسابه واجتني رساله منه

ضرغام... كاعده

لازم ارد واتشكره موقفه مو قليل رديتله

هيلين... هستوني كعدت

ضرغام... ها ليش خاف مريضه

هيلين.... لا بس البارحه سهرت ويه البنات وكعدت من وكت فنمت المغرب

ضرغام... نوم العوافي

هيلين.. الله يعافيك

ضرغام... اي شدتسوين

هيلين... كاعده ما دا اسوي شي

هيلين... ضرغام

ضرغام... هااا

هيلين... مشكور وكفتك اليوم ما انساها معرف شلون اجازيك

ضرغام...بس من اراسلج لو اخابرج لا تتجاهليني كلشي ما اريد

هيلين... ليش

ضرغام... تحبين تعرفين

هيلين... اي

ضرغام.... من اكل العيش

هيلين... ههههه هاي شنو

ضرغام....ترا ميصير رجال غريب يلزمج

هيلين... منو لزمني

ضرغام... حسام شفته اليوم

هيلين... متكول لنفسك لمن شلتني

ضرغام... جنت مجبور غير شلعتي كلبي شكد سمينه

طبعا اكثر شي اكرها شخص يكلي سمينه

هيلين...اني سمينه

ضرغام.... هههه على كولة جهالنه دبة حميسه

دزيتله ايموجي الغاضب دزلي ايموجي اللابس نضاره سوده وايموجي اليضحك

حجيت عود دضوجو مثل ما ضوجني.... انت هم سمين وكرشك شكبره... كل بكلبي جذب ما عنده كرش

رد عليه ببرود حرك دمي.... عادي اصلا اخبل

هيلين... شحلاتك وواثق

ضرغام... هههههه ضجتي لأن اكلج سمينه

هيلين... لا عادي ما اضوج

ضرغام.... ههههه الدبه ام كرش

هيلين... يووووه شكد تنرفز باي

ضرغام.... هههه باي

طلعت من المحادثه نرفزني بقيت اتعلل الا نعست ونمت

كعدت الصبح روتين يومي خابرتني براء العصر حجينه شويه وضوجه وملل لعبان نفس طكت روحي ممتعوده اكعد هيج ما اشتغل شيخلص الاسبوعين

الدكتور كال الكسر خفيف اسبوعين وتشيلين التجبيس واسبوعين لفاف

بليل اجت ايه تعللت عدنه هي وحسام كاعدات نسولف كالت.....

ايه بهمس... هيلين

رديتلها.. ها

ايه... هيلين راسلني

هيلين... منو حبيبج

ايه.. اي

هيلين... وشسويتي

ايه... مسويت شي دزلي رسالة من رقم غريب عالخط

هيلين... وشكاتبلج

ايه.... كاتب اسف واعتذر واني غلطت واريدج تسامحيني

هيلين... رديتي عليه

ايه.... لا اجيت اخذ رأيج ارد لو لا

هيلين... اذا سمعتي كلبج راح ترجعين تتأذين والشخص اللي ساعدنه كال خلي تحضرو، يعني اذا، انوب هددج بيا وجه اكلو واذا اكلو حيكلي شسويلها
ايه شخص هددج... صكيت على اسناني وطككت عيوني عليها واحجي بهمس... هددج تعرفين شنو هددج يعني شبيج انتي وترديله خيولي اتبعي عقلج لا تبقين وره كلبج

أيه... ادك كلبي بن.... وما ارجعله بس اجيت اسألج اذا، اردله شي يجرحه لو لا

هيلين....تجاهلي خيولي

ايه... هذا هوا بعد حتى ما اجيب طاري خيولي ابن نع.....

هيلين... لتغلطين اهله مالهم دخل يجوز حتى ميدرون باللي ديسوي ابنهم

ايه... لو مربينه ومشبعينه ما يهدد

هيلين... عمري انتي الفقر مو عيب اذا ابو فقير الفقر مو مقياس الشخص واحترامه بعد لا تجيبين طاري وامحي من حياتج رب العالمين يعوض كل شخص مخذول ومتأذي ومكسور بس الشخص يكون صبور والصبر مفتاح الفرج

ايه... عوفينه منه اخبار براء اشونها

هيلين... زينه

ايه... همزين ما نسيت هيلين منو اللي ساعدنه علمود الصور والتهديد

هيلين... شخص متعرفي

ايه... خاف عاشكه ومتقبلين تعلمين على حبيبج

معرف ليش ضجت وتنرفزت اني لا احب ولا شي لأن بعدين انكسر رديتلها..

هيلين....بطلي هاي السوالف اكره هالشي لتجيبين هيج طاري كدامي والشخص الساعدنه هكر عالنت مشهور يساعد شكو بنيه تتعرض للتهديد وحجيتله كلشي وساعدنه

ايه... تدرين هيلين شصار بيه من هددني من جهة اكول لو انشرت، صوري شنو وجهي من ابويه واخوتي وراح اذا، يمشون بشارع منزلين روسهم اني شلون انزل روسهم

تدرين... بعدها ما كملت واندك الباب طلع حسام شويه وطب كال لابويه ضرغام بالباب ردله ابويه... خلي يطب للاستقبال هياني جايكم.. يا الله يا رب عليك توكلت ووكف لحيله كال... سوو جاي.. وراح للاستقبال

حجت ايه... هسه اني اسوي جاي...

خطيه ايه من انكسرت تضل تساعد امي
رديتلها... لعد ساعديني اجي وياج للمطبخ

ايه... يلا تعالي... اجت سندتني رحنه، للمطبخ

حجت أيه وهي تخلي جاي بالقوري... تدرين جنت يوميه قبل لا انام ابچي شخص كلش احبه ليش هيج سوه

تدرين مجنت بيوم اتوقعها منه اخلي راسي عالمخده واكول شلون كلبه انطاه يهددني شلون هانت عليه سنين العشره ابقى ابجي لحد ما انام تخيلي نفسيتي تعبت بس فكرت

ميستاهل على شنو قاهره نفسي واني خلصت منه لو متزوجين جان هسه معاناتي اكبر اليهدد بنيه كلشي يسوي يبوك ويخون ويطعن وكلشي التهديد مثل شخص يبوكج كبال عينج ومغصوبه تسكتين

كرهته كره ما اصدك شخص كره مثل ما اني كرهته

هيلين... الله ينتقم من كل ضالم وعوض الله جميل

اجت كعدت يمي خلت صينية الاستكانات وخلت ايدها على خدها وكالت... تدرين كرهت شي اسمه حب صرت اخاف احب واكول اتزوج زواج مدبر ولا احب كرهت الحب

باوعتلها وبديت اصفط الاستكانات كالتلي...

أيه... هيلين تحبين هيثم

باوعتلها وحجيت بهدوء واصفط بالاستكانات.... ما اعرف اذا حبيته او لا بس يكولون الميغار ميحب واني لمن اتزوج ما اهتميت ومرات جان يهتم بيها ديغيصني بس ما اهتم ولا اعبرهم

ايه... ما يوم بجيتي عليه لأن شفتي وياها

تذكرت مره شكد جان قريب منها وما اهتميت بس لعية نفسي رديتلها.... لا

ايه.... لعد ليش من اتطلكتي تعبت نفسيتج

كملت الاستكانات وخرت الصينية بصفحة تنهدت وحجيت.... لأن ضميري أنبني عليه ولأن تدمرت حياتي بسببه صرت انسانه ضعيفه بسببه

أيه... راح يجي يوم تحبين

هيلين... ابد ما احب ولا افكر بهالشي

ايه... حيجي الشخص اللي يداوي جروحج جرح جرح ويحبج وينسيج الماضي

هيلين... جروحي عميقه متشفه ولا اكدر انسه الماضي

جاي نحجي وطب حسام كال...

حسام... ها وين الجاي

ايه... بعد شويه

حسام... فضونه عيب شكد صارلجن

ايه... شكد صار هستونه خليناه عالنار

محجيت شي ضايجه واحس كلبي معصور يمكن لأن جبنه طاريهم

ايه... روح اني من يصير الجاي ادزلك رساله

راح حسام وايه راحت فتحت الثلاجه كالت

اويليي برتقال العشق
طلعت برتقالتين كشرتهم وخلتهم عالميز ورجعت اخذت الجاي صبت جاي ودزت رساله لحسام يجي ياخذه

اجه حسام اخذ صينية الجاي باوع كال... ليش هاي الاستكانه ما بيها خاشوكه جيبي جيبي خاشوكه

ردت أيه وهيه تدور خاشوكه بطاسة الاستكانات.....

هاي انت لأن ما عندك مره نسيتك.... وخلت الخاشوكه بالاستكان

حسام ابتسملها بس ما. حجه كلما اشوفه انقهر عليه ما اخذ اليحبها كلها متأذيه بسبب الحب

ايه هددها

حسام يمكن خانته

سهام تحبه ومتريد تتزوجه بسبب الروماتيز

بقينه كاعدات نسولف وناكل برتقال لحد ما سمعناهم يم باب الاستقبال يسولفون يجوز ديروحون راحو

وحسام وبراء راحو اني طلعت لغرفتي بقيت اقلب بالتلفون راسلتني ساره

ساره.... الووو هيلين

هيلين... هلو ساره..

ساره... شلونج

هيلين... الحمدلله وانتي اشونج

ساره... زينه الحمدلله اكلج

هيلين... كولي

ساره... التقويم اشكد واشيله

هيلين.... حسب اسنانج

ساره.... هيلين تعبني يعني وره كل وجبه اكل انضف اسناني مثل مكلتي بس يتعبوني بالفرشاة الصغيره

دا اردلها واجاني اشعار عالماسنجر...

ضرغام دازلي اكلج

صار عندي فضول ف رديتله... كول

ضرغام... اشونج

هيلين... زينه الحمدلله كول شنو تريد تكلي

ضرغام... اني هم زين الحمدلله

خوش بسمار

هيلين... دومك بس ما كتلي شنو

ضرغام... شكد فضوليه دزيتلج اياها حتى تردين بسرعه

شفت الرساله ورحت رديت لساره

هيلين... ساره فرشات الناعمه عادي كل. يومين استخدميها بليل قبل لتنامين

ساره... اي خوش اكلج شغله بس لا تزعلين

رديتلها.... كولي

ورحت رديت لضرغام.... شتريد يعني ليش مراسل

ضرغام.... ما اعرف يعجبني

رحت شفت ساره كاتبتلي... هيثم يريد يحجي وياج

تنرفزت هذا شيريد ايمت اخلص منه رديتلها... اذا صدك يحبني ويقدرني خلي يعوفني بحالي ولا يتقرب مني بعد

رحت للماسنجر ضرغام كاتبلي.... مشغوله رديتله... اي جاي احجي ويه صديقتي

رد بسرعه... اها لعد اخذي راحتج
دزيتله باي ردلي باي

رحت واتساب ساره كاتبتلي.... يكول هاذهوا بعد ما اراسلها ولا اجي يمها اهم شي هيه ترضى

رديتلها... بلا هاي سوالفه اعرفه كلش وين ديتمسكن علمود اقبل ارجع بس عالسوايه السواها صدك اثبتلي انو اذا ارجع عليه ف اني بلا عقل وساره خلي بيناتنه الصداقه احسن ما تخرب بسبب هيثم

ساره... لا هاذهوا سدي الموضوع

حجينه وكالتلي على مراجعتها بعد اسبوع ف كتلها قبل لتجين بيوم ذكريني حتى اراسل براء اوصيها وتروحين عليها

ساره.... ها تمام

ترخصت منها ونمت

كعدت ب9 شبعانه نوم كضيت اليوم عادي وهم ايه اجت تعللت عدنه بابا كال

ابويه.... هيلين بنتي سيارتج لهسه بالتصليح يعني يومين ثلاثه انوب اجيبها

امي... طيبي بسرعه حتى ترجعين لدوامج وسيارتج رد ابويه

ابويه.... بس اجيبها انزلها ابيعها

شهكت... ليش بابا شنو تبيعها

ابويه... دتشوفين سيارتج من اجت للبيت ما شفنه الخير يا بابا اسويلج اشتراك او انتي وانسام تروحون وترجعون سويه

هيلين... لا بابا عفيه تعودت عليها ابد كلام بعد لا اسوق سرعه وامشي بهدوء

ابويه...باوعلي بغضب والتفت لأمي يسولف وياها شكد انقهرت طكت روحي

بليل هم راسلني المزعج دزلي.... اشون الحلو

شو هذا مسيطر ويتغزل واني طافره روحي عالسياره رديتله... شنو شلون الحلو ليش تتغزل

ضرغام... ههههه يعني هاي تسميها غزل

هيلين... اي غزل

ضرغام... لا هاي مو غزل الغزل عندي بي هواي طريق تردين اعلمج

هيلين.... اروح انام احسلي كلكم اليوم تقهرون بيه

ضرغام... منو كلنه ليش منو مضوجج

هيلين... ابويه يريد يبيع السياره

ضرغام... اذا محتاج فلوس اني انطي

هيلين... لا تسلم مو عالفلوس بس يكول ما ارتاحينه من جبناها لهسه

ضرغام... ليش تضوجين لعد غير خايف عليج

هيلين... كلمن يموت بيومه هيه موته لو موتين

ضرغام... ما تموتين بس تتكسرين

هيلين... لا تذكرني كلما اشوف رجلي تطك روحي تدري صار عندي ملل

ضرغام.... لعد المشلول والمعوق الله يساعده

هيلين... اي والله الله يساعده

ضرغام... اكلج هيثم شيقربلج

هيلين.... ابن صديق ابويه

ضرغام... لا قصدي هوا كايل اني زوجها وابوج ما تطرق لموضوعه انتي زعلانه عند اهلج هوا زوجج

ضجت شسالفه اليوم كلها تجيب طاري مره ايه مره ساره مره ضرغام رديتله

هيلين... لا مو زوجي سد موضوعه

ضرغام... شكو ضجتي سؤال وسألتج

هيلين.....معرف اني هيج

ضرغام.... هههه هوا هاي السمين شتكله يضوج لأن السمنه تخلي بسرعه يحتر ويتعصب

رديتله... هيلين.... انت كلما احجي وياك تنرفزني شكد غثيث

ضرغام.... هههه

هيلين... ت ع خ

ضرغام... شنو هاي انوب

هيلين... معرف باي

ضرغام.... ههههه باي

يووه دائما يعصبني ميكدر اذا، ما يعصبني واني بسرعه اتنرفز

لهنا وينتهي البارت تصويتكم عمري.. اليكول البارت قصير نتزاعل اني وياه طولتلكم البارت لعيونكم الحلوه وانتو دائما تطالبون، ببارت طويل فكلت انزللكم

رواية الأصداف

بقلمي الكاتبة..
bmbsh_beme