رواية الاصداف الفصل الحادي وأربعون 41 - بقلم بمبش

بقلمي الكاتبة ♕ردّديbmbsh_beme

حروف الهوى فَكِلانا في هواهُ معذّبٌ مقتولُ، لا تَقولي سَينتهي فهو اختيار وقدرٌ فلن يَردّهُ المستحيلُ.

........................................................................ شافني لو عيونه صارت بكصته

مهتميتله مشيت عبرت من يمه لزم ايدي وكال
وهو صاك على اسنانه ووجها احمررررررر حتى عيونه حمر من العصبيه

شعندي وهيج طالعه رجعي غيري

نترت ايده وحجيت

هيلين...عيب منا العالم تريد تفضحني
ومشيت

حسيته صعد بالسياره ومسه وراي اول ما صرت خارج الفرع وعالشارع العام وكف سيارته ونزل باوعلي وكال

ضرغام... اصعدي ما ترحين هيج

ما رديتله

ضرغام.... تالييي مو دا احجييي اصعدي

ما رديتله جرني من زندي وسحبني يجر بيه واني ادفع بي وصلني لباب السيارة نترت ايده وصعدت وسديت الباب قوي

افتر صعد تأفأف واندار عليه صار قريب مني. وصاح بكل صوته

ضرغام..؟. شنو هاييييييي لبسججججج

هيلين... رفعت حواجبي وباوعتله...شبي لبسي

ضرغام...هيلين جاي تتعبيني

هيلين... قربت شفايفي يم وجها وحجيت وهو عيونه تباوع لملامحي وحجيت...شتريد

ضرغام.... هيلين كافي بطلي هاي سوالفج جاي تتعبيني

هيلين... ليش شسويت

نفخ نفس بعصبيه

اني توترت وكلت

هيلين... شبيك عبصي العفو عبصي العفو عصبييي

ضحك وكال...

ضرغام... عبصي بسببج غير انتي

هيلين.... ههههه

ضرغام... شو الوجه يضحك اليوم

هيلين... ما اعرف

ضرغام.... te amo

هيلين.... يسلمو

ضرغام... ما ترجمتيها

هيلين... اي ترجمتها

ضرغام... شنو معناها

هيلين... احبك

ضرغام... واني هم احبج

هيلين... لا قصدي

ضرغام.... قصدج غير بهاي العشر ايام. لاجت روحج تدوريلي بالوجوه

هيلين....بس لا صدوك

ضرغام... اي والله صدك والف صدك

هيلين... وانت شمدريك

ضرغام... هههه يعني صدك

هيلين... لا مو، صدوك

ضرغام...عيوني هو انتي يوميه من تطلعين عيونج تدور يم بابنه شنو عبالج ما اشوفج وكامرات الباب وين راحت،

كلت بكلبي امداج هيلين على هذا، الغباء

ضرغام.... اكلج

هيلين... هممم

ضرغام... شبيج البارحه بليل

هيلين... كلشي

ضرغام.... تريكتي

هيلين... اي

ضرغام... كلت نتريك سويه

باوعتله بغرور وحجيت

هيلين.. شنو شو عاجبك الوضع اريد اروح لدوامي يا ريوك وبعدين

ضرغام... باوع بعيوني وحجه... اي وبعدين

هيلين بتمتمه.... وبعدين اذا جوعانه اروح اتريك وحدي انت شنو تجي وياي

ضرغام..... يلا على باجر

هيلين.... الله كريم هسا يلا امشي خل اوصل دوامي

ضرغام... تروحين هيج

هيلين... اي

ضرغام... شنو اي

هيلين... اروح هيج

فر السيارة ورجع باوعت للشارع وحجيت

هيلين... هاي وين

ضرغام... نرجع تروحين تبدلين

هيلين... شعليك بلبسي

لا رد

هيلين... ضرغام هسا اهلي مراح يكولون ليش تغيرين ملابسج

شو شفته وكف يم المرطبات راح واجه جايب عصير برتقال واجه يمشي اباوعله

زي الدوام والبيريه وشواربه وحواجبه العريضه وعيونه تضرب بيهم الشمس لونهم يجنن

دمارات ايده اللي شايل بيها العصير يمشي وينفض بأيده الثانيه واني اباوعله وهايمه

اول ما صعد بالسيارة اني سويت نفسي العب بأسوارة ايدي

كعد واخذ نفس عميق لأن بره حاره نار والسيارة تبريد اخذ شهيق قوي ورجع زفير بهدوء وكال...

ضرغام.... ها هيلين شقررتي

هيلين... شنو

ضرغام... ارجعج تبدلين

هيلين... اهلي شراح يكولون اذا رجعت وبعدين انت شعليك

مسح شواربه واخذ العصير فتح العلبة وفرغها على بنطروني

شهكت

هيلين... لااااا ضرغام

ضرغام... هسه اذا سألوج تكليلهم تكبه عليه العصير

صكيت على اسناني وحجيت

هيلين.... اوففف ما اللك جاره اوففف اوففف
والتفتت فتحت باب السيارة، دا انزل رجليه واتذكرت اشون اروح هيج

غمضت وفتحت بعصبيه ورجعت تعدلت بمكاني وسديت الباب قوي

وصلني للبيت واني جايتني البجيه بسبب تصرفه كلش انقهرت وتنرفزت

دا انزل كال ضرغام... انتضرج مو تتأخرين من كد ما ضجت كتله

هيلين... روح ما اجي انت خليت بيها دوام ونزلت حتى قبل. لا يحجي امي شافتني كتلها تبده عليه العصير ومراح اداوم خابرت انسام انطيته خبر

طبيت لغرفتي سبحت وسويت جهازي صامت ونمت كعدت جسمي متكسر تكسير باوعت لتلفوني واني اتثاوب شهكت حيل شكد نايمه باوعت الساعه 11ونص وضرغام حاركها بالاتصالات

ما اهتمت كمت شغلت ضوه الغرفه ونزلت جوه كلهم نايمين اكلت شي خفيف وشربت جاي ورجعت لغرفتي كاعده اقلب بالاستوديو وسمعت باب البلكونه اندك تعوذت الشيطان

شوية ورجع اندك شجعت نفسي وتقربت من الباب اول ما فتحت باب البلكونه تفاجئت بضرغام. واكف كبالي

هيلين... هاي شجابك

ضرغام... شو دوخري واني ابالي صايرلج شي..وشلح حذاءه تكرمون وراح تمدد على تختي

رحت وكفت يمه وحجيت

هيلين.... انت شو ما تستحي

ضرغام... رفع ايده وكال تعالي يقصد بحضنه

اني تذكرت باب الغرفه بسرعه رحت قفلته وكعدت يم اللابتوب.وضرغام ماخذ راحته تقريبا نص ساعه بقه متمدد ويباوعلي واني مسويه نفسي ملتهيه

بعدين كال...

ضرغام... مدام تطمنت عليج اني رايح وخلي ابالج كلما يضل بالب وما تجاوبين اجي هنا واذا دكيت الباب وما طلعتي اجيكم من باب الحوش

هيلين... ضرغام

ضرغام... عيون ضرغام كلب ضرغام

خجلت منه حتى استحيت اكله شي

هيلين.. لا سلامتك بس جنت نايمه يعني ما ادري التلفون صامت

ضرغام....ديلا خوش يلا مع السلامه وراح للبلكون بسرعه كمز وصار بالشارع اني لحكته من صار بطرف بيتهم التفت واشرلي اطب جوه

عرفت شكد نيته صافيه يعني حتى ما تقرب مني اجه تطمن وراح

طبيت وسديت باب البلكون وكعدت تعللت لل2تقريبا ونمت ثاني يوم كعدت من وكت نزلت للبيت طلعت فولت السيارة بانزين ورجعت للبيت اكلت وتحضرت واجيت اطلع ضرغام بالباب

ابتسمتله وصعدت بسيارتي مشيت واشوفه بالمرايا يمشي وراي بمسافه شوية بعيده

ومن رجعت من دوامي مجان موجود

خلص الاسبوع وهو يوميه اشوفه يمشي وراي بس ابد ما يراسل.

الخميس بليل اجتني رسالة باوعت من ضرغام فتحتها كاتب

ضرغام... اشونج

هيلين... الحمدلله تمام وانت اشنك

ضرغام....ليش متبطلين هاي سوالفج

هيلين... مفهمت

ضرغام... ليش متراسليني الا اراسلج

هيلين..... ليش

ضرغام... اني جاي اسألج ليش

هيلين... معرف يعني يوميه من اطلع اشوفك على شنو اراسل

ضرغام... اهاااا

هيلين... اييي

ضرغام... باجر ما عندج دوام اجي اخذج نطلع

هيلين... شنو نطلع ضرغام

ضرغام.... هيلين ايمت تفهمين نيتي وياج شنو يعني شراح تستفادين من هذا غرورج

هيلين... اني مغروره

. ضرغام.... اي

هيلين... شكرا شكراااا

ضرغام... عفوا ولو

هيلين..... اني اترخص

ضرغام... وين بعد هستونا حجينه

هيلين... تعبانه انام

ضرغام... تمام باي

هيلين... باي

ثاني يوم الجمعه صادف رحت لبيت عمي تعشيت عدهم واتعللت ورجعت

وراها بيومين بليل سبحت ومعطرات ومرطبات وشعري عفته مفتوح لبست بنطرون عريض خفيف مريح باللبس وتيشيرت ضيق واندك باب البلكون

عرفته ضرغام قفلت باب غرفتي وفتحتله الباب اول مشافني قرب وجها باسني من خدي ووكف بالغرفه يتلفت

باوع للميز مالتي وراح عليه شال العطر شمه ورجع بخ على ملابسه وباوع للمرايا عدل شعره بالمشط واني مندمجه اباوعله لابس تراكسود(تراك) رصاصي
نص ردن وعضلاته بارزه مندمجه اباوعله وهو التفتت لحيته يبقى يحددها ورموشه اللي ماخذات كل عيونه ونضراته الناعسه عليه شافني مندمجه واجه يتمشى باتجاهي وصل يمي واني مندمجه اباوعله تقرب حسيت على نفسي. من لف ايدينه على خصري

ايديه على صدره ووجهي يم حنچه (ذقن
واباوع لرموشه

حرك حنچه على انفي دغدغتني لحيته وانتابني شعور كلش غريب ضحكت
ونزلت عيوني اباوع لايديه اللي مخلتهم على صدره باس راسي غمضت عيوني كال..

ضرغام...هيلين

باوعتله وحجيت... هممم

ضرغام... رموشج رباني لو اصطناعيات

هيلين... مديت ايدي على رموشي جريتهن وحجيت.. لا. رباني

من سويت هيج كال باهتمام

ضرغام... لا تلزميهن

ضحكت وكتله... عادي ما عليهن شي.. واتلمستهن

مسك ايدي وخرها عن عيوني وباس عيني ورجع باس عيني الثانيه

باوعتله وكلت

هيلين... كافي بوس بوس بوس ما مليت

ضرغام...هههه لا ما مليت وكام يبوس بخدودي

رجع باوعلي وجر ايدي ومشه باتجاه التخت كال

ضرغام... تعالي

هيلين.. طككت عيوني.. ويننن

تمدد وجرني كال...

ضرغام... تعالي بحضني شبيج

هزيت كتوفي يعني لا

ضحك وكال...

ضرغام... حسام متزوج

هيلين... لا

ضرغام... ولا خاطب

كعدت عالتخت يم رجلينه وهو متمدد وحجيت

هيلين... لا

ضرغام... هيلين بطلي ميانه وياهم

هيلين... انسام اخويه بالرضاعه يعني عادي بس حسام لا ما اتشاقه وياه رغم هو يشاقيني ويضوجني يقلد عليه

تعدل من مكانه وكعد يمي ونزل رجلينه عالارض وكال

ضرغام...بعد لا تتواجدين بالمكان اللي حسام بي

هيلين... ت

ضرغام... لا تقاطعين يطير عقلي والا واحد يقاطعني ما تطلعين كدامو مفهوم

هيلين... لا

ضرغام.... هيلين لا تعصبيني لان تشوفين غير وجه

هيلين... امنعني من الدنيا كلها ومن بيت عمي لا تمنعني

ضرغام... ما منعتج حبيبي بس حسام لا تتواجدين بمكان هو بي

هيلين.... احاول

ضرغام... ما عندي شي اسمه احاول ضرغام ما تطلعين كدامه

هيلين... تمام

رفع رجلينه واتربع عالتخت وجر ايدي كال..

ضرغام... احبج ام عيون الواسعه

دنكت وابتسمت كلش خجلت

مد ايده على رقبتي مسك قلاده لابستها شكل فراشه كلش نازكه كال

ضرغام... اشلحيها

هيلين... ليش

حجه وهو يباوه لرقبتي.... اشلحيها

مسكتها بايدي وحجيت....

هيلين... لا محتفضه بيها من زمان ما اشلحها

ضرغام... حجه بصوته اللي مليان بحه... اغاررر

هيلين.. بس هي كلاده

ضرغام... عقج حواجبه... حبيبي اشلحيها

هيلين... ما اشلحها

دا يحجي واندك باب غرفتني هنا اني تصنمت ضرغام كبل كرص خدي وطلع من البلكونه وسد الباب واني فتحت باب غرفتي

طبت امي باوعت للغرفه تتفقد وكالت

امي.... ويا منو جنتي تحجين

شجاوبها تلفوني عالشحن واللابتوب مسدود

باوعت للدبدوب وحجيت

هيلين... مع دبدوبي

امي... عقدت حواجبها واتلمست كصتي... ماما خوما تعبانه

هيلين... لا ماما مبيه شي

باستني وبستها وكالت...

امي... اني رايحه تصبحين على خير وعوفي الدبدوب لتحجين وياه

طلعت امي واني قفلت باب الغرفه ورحت اتفقد البلكون هستوني فتحت باب البلكون وشفته بوجهي شهكت خفت دصيح من خوفي وسد حاكي واني اباوعله مطككه عيوني من الخوفه عبالي راح

ضرغام... اهدئي شبيج هلكد خوافه

غمضت عيوني وفتحت بهدوء وخر ايده من حلكي وحضني كال..

ضرغام.....حبيبي ما لكيتي غير الدبدوب تشبهيني بي

ابتسمت لان بعد بيه خوفه كال...
روحي نامي وانوب قبل لا اجيج اتصل اكلج جاي حتى لتخافين

هزيت راسي بمعنى اي وهو باس راسي وراح

طبيت للغرفة قفلت باب البلكون ونمت ثاني يوم من رجعت من دوامي طبيت امي وسهام وايه كاعدين يسولفون

هيلين... ها اشون الحبايب

الكل... هلا هلونه

طلعت بدلت ونزلت كعدت اكل كالت ايه

ايه... ولج خطوبة انسام شهر الجاي

هيلين...اي بيها الخير

ايه... شراح نلبس

هيلين...ننزل للسوك ونشوف اليعجبنه

ايه.... خوش بس تدرين من هسه انلبكنه

هيلين... حقكم هاي الاعراس كلها هيج

ايه... اي والله

هيلين... وكبل يزف لو اشون

ايه.. اي الخطوبة وبعدين العرس

هيلين... اشون اقتنع اخو بنو

ايه... خلينه ابوج يخابره وتعرفينه اخو براء مصلحجي ومعرف شعنده بالمحكمه ما يكدر يرفض لعمي طلب

هيلين... زين لعد نسويلها حنه هم حتلو بيناتنه

ايه... اي هم هيج الخطوبة وبعدين الحنه

هيلين... خوش لعد

ايه... اني لازم اخيط كردي ما عندي

هيلين... اي اني هم ودوب تلحك الخياطه

امي... باجر نروح عالسوك نشتري قماش ووراها على خياطه مضبوطه بنهاية الفرع تخيطهن

ايه.... خوش لعد

سهام... ايه كولي لامج هم علمود كردي الحنه مال براء حتى نمر ناخذها

ايه... تمام

اني وضرغام بيناتنه المراسلات قليل اراسله دائما هو يراسلني نحجي بشغلي وبشغله بس حجينه كله عن الشغل مرات يكعد يتغزل واني اخجل منه كبل اترخص منه وهو يضحك يكول ضلي انهزمي تاليتج بحضني عود نشوف وين تترخصين

طلاقي ابد ما ذكرته ما اريد افتح مواضيع هيثم اضوج وانقهر واكضيها مغثوثه يومين ثلاثه

بليل

راسلت ضرغام كتبتله

هيلين...ضرغام

جاوبني كبل

ضرغام... هاا

هيلين... باجر حروح ويه امي للسوك

ضرغام...منو انتي

ضحكت ورديتله...

هيلين...هههه

ضرغام... مو دا اسأل منو انتي

هيلين... ضرغام شبيك

ضرغام.... اني خطيبته منو انتي

ضحكت ورديت

هيلين... هههه بطل هاي سوالفك

اجاني بصمه فتحتها صوت بنيه تكول

البنت... خير شرايده من خطيبي شنو ما تستحين انتي بعد لا تراسلين حتى هو كالي هاج التلفون جاوبيها ما ليه خلكها ترا بزعتني وسمعت بنهاية البصمه صوت مره تكول

.... شنو جنتي هنا ايمت اجيتي وخلصن البصمه

اسمع بالصمه ودموعي تنزل عالشاشه شفت الرسائل صارت تنحذف لدى الجميع راحت ايدي للحضر حضرته وذبيت التلفون ورحت لباب غرفتي قفلته ورحت لباب البلكون قفلته وكعدت عالتخت خليت راسي عالحائط ودموعي تنزل ليش هيج اني ما عندي حظ اذا خاطب ليش يضحك عليه ما فكر بحبي تعلقت بي وحبيته اول مره بعمري احب ليش يخذلني ويكسرني ما فكر كال ليش اضحك على بنات العالم

بحركة كلب رحت، لتلفوني حذفت الخزنه لان صوره بيها

ورحت حذفت محادثاتنه سويت جهازي وضع طيران وطلعت. من غرفتي نزلت للهول

شغلت البلازمه، واتمددت حتى بدون غطه رغم الهول بارد، ثلج من المكيف

احس جسمي نار وشعور بداخلي مقرف احساس فضيع لا اكدر انام ولا اكد اصيح واطلع حركة كلبي تمددت اباوع للبلازمه طالع فلم اجنبي بقيت اباوع ودموعي ما. وكفت

حسيت صوت، امي كبل درت وجهي للحايط وسويت نفسي نايمه امي طلعت للمغاسل ورجعت جابت غطه غطتني وسمعتها كالت..

امي... يا يمه سوده عليه نايمه بدون غطه

وراحت لغرفتها من طبكت الباب اني تكشفت اختنكت

كلت اني ليش ابجي خلي يولي
بقيت اباوع للفلم طفل كام يبجي بالفلم واني بجيت وياه اتمددت كرفصت بردت بس كلبي احس يطلع منه نار ودكات كلبي مو نضاميه بقيت دموعي تنزل لحد ما سمعته يأذن فجر كمت توضيت وصليت ورجعت تمددت نمت كعدت على صوت ماما تندهني

امي...هيلين هيلين ماما

هيلين...بتعب...همممم

امي...شبيج ماما متكليلي ليش هيج نايمه بدون غطه

هيلين بخنكه...عوفوني اريد انام

امي...وليدي ورانه روحه للسوك ودوامج خوما نسيتي

هيلين بخنكه ....يمه تعبانه اريد انام

احس غصه ببلعومي متوقعته هيج حيسوي بيه بس هسا تأكدت انو بعد ما اثق بشخص

امي مدت ايدها لمست كصتي ورجعت لمست بطني وحجت

امي... ابو هيلين مصخنه لشتها نار

ابويه.... لبسيها عباتها خل اخذها

هيلين... ما اروح بمكان خلوني انام

ابويه... يلا بابا لبين ما اشوف انسام انتو تتحضرون راح ابويه وامي جابت العبايه لبستها وجسمي احسه ثكيلللل ومتكسره تكسير وكلبي رايح وراسي يريد ينفجر امي جابت عباتي لبستني اياها بالكوه لبست

وابويه طب هو وانسام وايه وحسام

كال...

ابويه... سهام اجو حسام وايه يمج لبين ما نرجع

سهام... بس طمنونه عليهت عود

امي... اي اني عود اخابركم

انسام... هل هلونتنه مريضه

ابتسمتله بتعب

طلعوني وكايديني كتلهم... اكدر امشي وفعلا طلعنا للسيارة رحنا للطبيب علاج وابر اني اكره الابره ف بابا كاله شدلها كانونه بالوريد تضربهن شديت كانونه من طلعنا من المجمع حسيت دخت اتكيت على امي لزموني

رجعنا للبيت نزلو وامي نزلت فتحتلي الباب ولازمتني اجت عيني بعين ضرغام يم بابنا هو وحسام

درت عيني عنه ما اريد اشوفه وامي لازمتني طبينه للبيت

بقيت يومين علما صرت زينه واتحسنت تلفوني ما اجيت يمه وحتى قماش كالن ما نشتري الا تصير زينه هيلين ونروح كلنه

ثاني يوم الصبح طلعنا ويه انسام مرينه اخذنه براء واني الدنيا طالعه من عيني كلما اتذكره اكره نفسي لان ثقيت بي وحبيته

وصلنا السوك مشينه ندور بالمحلات براء تباوعلي تريد تحاجيني ومتكدر طبينه لمحل وامي وعمتي واكفات يقلبن بالقماش وايه تسولف ويه ابو المحل على لون هي رايدته

براء اجت. يمي وكالت

براء... شبيج يولي شو احسج مو على بعضج

هيلين... كلشي ما بيه بس تعبانه

براء... هاي سوالفج ما تعبر عليه حافضتج حفظ من ترجعين للبيت نتخابر وبعدين تعالي شبي تلفونج مقفول

هيلين... وضع طيران مسويته من تمرضت

براء.... ها خوش من ترجعين نتخابر شيلي وضع الطيران

هزيتلها راسي بمعنى... اي

اشترو قماش واني عجبني لون اسود واحمر اختاريت للكردي لون احمر وللصايا لون اسود

من طلعنا اشترينه احزمه مال كردي وامي ومرت عمي اشترو مجند هم

رجعنا. للبيت بليل فتحت وصع الطيران بس مفتحت نت لان ميكدر يراسلني غير عالماسنجر ما عنده رقمي

اتصلت على براء جاوبتني

حجينه وكالتلي

براء... ما حجيتيلي شبيج

هيلين... براء ضرغام طلع خاطب

براء... عزاااا صدك تحجين

هيلين... راسلته دا اكله علمود نطلع للسوك لمن جنه متفقين نطلع قبل كم يوم

براء... اي

هيلين... حجيت والدمعه بطرف عيني

جاوبتني بنيه كالت منو انتي اني اول شي عبالي ضرغام يتشاقه بس الأكدلي دزتلي بصمه

براء... وانتي من هاي مقهوره، ليش تخليني انزل بي مسبه ولو ابوه شنو ذنبه شكد حقير شكله يبين رزن وما. عنده هاي السوالف خيولي لا تغثين نفسج البسي واكشخي

حسيت راح ابجي فغيرت الموضوع

هيلين... ممصدكه راح تصيرين قريبه علينه يولي راح تصيرين مرت اخويه

براء... هيلين فدوه لخاطري لا تبجين الغصه اللي بصوتج تبين شكد انتي مغثوثه منه عمري فدوه لا تبجين ولا تغثين نفسج

كالت هيج لو احس جروحي انفتحت بجيت وحجيت

هيلين.. ليش ما عندي حظ تعبت براء تعبتتت

براء... ميخالف يا عمري هسا اني ما افيدج توكلي على ربج صلي واقري قرأن وهو يريح كلبج ويفرجها واذا كملتي قرءان خابريني نحجي

هيلين... تمام بنو باي

براء.. بايات هلا يروحي

سديته منها وسويت مثل ما كالتلي صدك من قريت قرأن ارتاحيت بس ما خابرت براء خطيه بس اقهرها فتحت نت اجاني رسائل من حساب مكتوب

ليش حاضرتني

فتحي الحضر
وينج

ليش ماكو

شبيج مريضه،

ردت اراسله بعدين كلت على شنو احجي وياه ميستاهل اخليله قيمه وارد حضرت الحساب

وره ربع ساعه اندك باب البلكون دكه خفيفه رحت وره الباب وحجيت بغضب

هيلين... روح منا

ضرغام... فتحي الباب

هيلين... شتريد مني

ضرغام... اريدج

هيلين... بطل تمثيل وروح منا

ضرغام... اذا ما فتحتي الباب اكسره وبكيفج

هيلين... ما افتح الباب روح

ضرغام... وخري من وره الباب لا تتأذين

.......................................................................

ضرغام خاطب لو لا اذا كان خاطب ليش خطب وشنو السبب او يمكن ميكون خاطب حنعرف هالشي بالبارت القادم وكلشي راح يتوضح

لهنا وينتهي البارت تصويتكم عمري

رواية الاصداف

بقلمي الكاتبة

bmbsh_beme