رواية الاصداف الفصل التاسع 9 - بقلم بمبش

بقلمي.. الكاتبة (bmbsh_beme)

مشهد1......

رفعت التلفون اشوف شنو هالرقم اللي جاي يتصل
هيلين... الوو
الشخص... يبنت الحلال لا تدمرين حياتج وياي الأفضل تخربين كلشي

اجيت للبيت وعسه ما اجيت...
طلعت مفتاح البيت النسخه الثانيه قتحت الباب وطبيت للبيت بابا يوميه اجي بالحديقه اليوم ماكو

طبيت للمطبخ مسوين الغده ومتغدين والبيت هدوء

قفلت باب المطبخ وفتحت الجدور الغدا بورانيه وتمن وجدر صغير شوربة

طلعت للهول امي وعمه نايمات
رحت. لغرفة اهلي نايم بابا
طلعت لغرفتي سبحت وطلعت مشطت شعري ما نشفته ونزلت جوه للمطبخ

فرغتلي اكل وشغلت البنكه مال المطبخ لأن جيت من بره حاره بديت أكل شويه واجه بابا للمطبخ

بابا... ها هلونه ايمت جيتي

هيلين... مصارلي شي شعجب نايمين

بابا...كعدت على. صوت الطركعه مالتج
شغل الطباخ خله القوري عالنار وكعد يمي

هيلين... بابا جان كتلي اني عملت الجاي

لا بنيتي خوما اكومج من الاكل علمود الجاي وهوا جاي وبس احمي جاي الغدا

جاي اكل وبابا حجه

هيلين بنيتي اسبوع الجاي جايين بيت ابو باسم
.... يقصد الرحنه عليهم

هيلين... اي بابا كل الهلا بيهم

بابا... بنتي جيتهم مو خاليه وابو باسم يكول جايينكم بطلب وانشالله ما تردونه....

اني من النوع اللي كبل الكطها وهيه طايره

هيلين... بس لا البالي

بابا... شنو البالج

هيلين... جايين يخطبون

بابا... حسيت حجيهم هيج

هيلين.... اي هلا بيهم

بابا... يعني اذا يخطبوج توافقين

باوعت على بابا تعجبت بسؤاله المفروض هوا يكلي ما انطيج

بابا... خايف خايف وتعبان خايف يخطبج

هيلين... وشنو اللي مخوفك بنت الحلال والزينه الناس تخطبها واني تعرفني ما اقبل فمن شنو خايف

بابا.... ما اكدر ارفضو اذا خطبج تعرفين كبل راح يكولون خوش قسمه ليش ما تنطوها ويلحون

هيلين... وما يلحون شنسويلهم ترضيهم وتنطيني واني ما موافقه

بابا... الله كريم

من كال هيج تخبلت احس بركان بداخلي يفور شنو يرضي صديقو ويكسب خطيتي وين اعش عدهم اني 

عفت الأكل ورحت لغرفتي طبيت وقفلت الباب شغلت المكيف احتريت من العصبيه طبيت للحمام غسلت وجهي وطلعت تمددت  ابويه صح محامي ويحبني وكلشي ما مخلي عليه قصره بس عندو ارضاء اصدقاءو اهم الكل

وعندو اهم شي سمعتو وشخصيتو كدام الناس رغم شكد فقير بس هالشي مخربو ولو يهجمون الدنيا ما اوافق اني ما اعيش بينهم

ما ادري شلون نمت كعدت على دكت الباب عمه سهام كعدت فتحتلها الباب طبت يمي كعدت وكعدنه نسولف. بس اثنينه ما جبنه طاري شي

وعرفتني واصلني باص لأن طاكه روحي اني من النوع اللي من اتعصب احس وجهي يصير نار باوعت للساعه ب8 كمت صليت مغرب وعشه ورجعت يم عمه سهام سولفنه سويه على دوامي

وراحت همه سهام تنام واني مكدرت انام تقريبا لل2 بقيت اقلب بالفيس بوك ضوجتي راحت واعصابي هدت ومدايره بال بابا ما يسويها ويجبرني

نمت وبقيت عالروتين نفسه لحد ما اليوم بليل جاي نتشغل بالغده لان باجر يجون

عملنه الحشيه مال الكبه  وعملنه جدر دولمه وعملنه اللحم بالثراما هلكنه وبابا كل شويه يروح للاسواق يشتري شي مره راح جاب ربطه ببسي وبعدين كال نسيت اجيب  حلويات راح وجا جايب  بقلاوه وزنود الست وعش العصفور

والبيت نضفنه ورتبنا من الليل وابويه خبص امي لا يوكع شعرايه بالاكل لا يخرب هالشي اخر شي امي تعصبت كالتلو روح عالاخبار من تضل فوك راسي اعوف الشغل انتو تكملون واني وعمه نهدي بيها لأن ما ندبر شي بلياها

هلكنه بليل كبل نمت حتى بنو ما تراسلنه اني وياها

الصبح امي تكعد بيه باوعت للساعه

هيلين... يمه دشوفي الساعه شكد هسه وكت كعده

امي.. دكومي ب 10يصلون ابوج يكول يطلعون من هناك غباشي

هيلين... يمه ب 9حبابه  اكعد

امي.... اني نازله اعمل الريوك اكمل الريوك واجي اذا لكيتج نايمه اصب عليج ميه

باوعت لامي وبالكوه افتح.. عمري من شافتني هيج كالت

امي.... نامي ب8اكعدج هاي ساعتين نامي بيهن والله لوما احتاجج ما اكعدج خطيه عمتج هم ما تكدر توكف

كتلها... اممممم وغفيت

كعدت باوعت للساعه يااااا الساعه 9ليش ما مكعديني
حتى ما سبحت رفعت شعري ونزلت ركض للمطبخ
امي وعمه سهام كاعدات يعملن الكبه والزلطه عالميز مكملاتها وماما وترتيبها

هيلين.... ليش ما كعدتوني
أمي... ما صخيت اكعدج
هيلين... لا اعاونكم
امي... ما احتاجيناج

رحت غسلت ورجعت كلت لعمه

هيلين... عمه عوفي من ايدج
عمه سهام.. عمه بعينج شحاجيه اني وشكايله

هيلين... هههه سهام
صح تريد احاجيها بأسمها احترمها ف اكللها عمه
وهيه كلما اكول عمه ترزلني وبديت اتعود اكول سهام بس مرات انسه

هيلين... عوفي من ايدج هلكتي اني اكمل
امي...والله خطيه سهام  ايدها وايدي اشتغلنه سوه
سهام... شسوينه يمعوده سوينه الزلطه وبدينه نكبب

من يجون بس نشيش الكباب ونخلي حامض الدولمه ونسلك الكبه

باوعت جدوره عالطباخ

هيلين... هاي شطابخين فتحت الجدوره مركة بامية على لحم  وتمن وطبخ ماما كلش طيب

طلعت الخبز والجبن والمربه وكعدت اسويلي لفات واسولف وياهن فرحانه اكيد حتجي ساره

هيلين... يمه جايه ساره غير

أمي... جايين  ابو باسم وام باسم والحجيه وباسم ومرته  وهيثم

هيلين... باسم اخو هيثم الجبير ومرته ما شفتهم

امي... احنه هم ما شفناهم من رحنه هما عازلين

هيلين... واني مكيفه عبالي يجن البنات وياهم

امي. لا مو من اطباعهم

هيلين... عوععع شكد معقدين

سهام... لا هيلين عيب هيج تكولين هما هواي فما يكدرون يجون كلهم

شويه واجت ايه

هيلين... ها ولج شنو شميتي ريحة  لحم.... اني وياها ميانه

ايه... بوياييي طلع بيها لحم عبالي بس كباب

هيلين... شمدريج مناخيرج، غيررر لو شنو

ايه.... حلمت بيكم تسوون كباب وكبه واجيت

هيلين... ههههه علينه كولي امج دزت عليه علمود اعاونكم فيكاتج ما تعبر عليه

ايه... ههههه اي امج من البارحه كالتلي باجر تعالي

كعدنه نسولف ونكبب ويه امي وسهام

كالت ايه... سهوممم

سهام... ها

ايه... اخبار حموداتج

سهام... رفعت الخاشوكه.... ترا هسه افتح وجهج سدي حلكج ما تستحين

ضحكنه اني وأيه وامي رزلتنه... انجبن عمتجن لا تضوجنها كومن ما منجن فايده شوفن المغسل بي صابونه وخاوليات يمه

كمنه نشتغل ونسولف وخابصتني بالحب مالها

ب11الا ربع سمعنه صوت هورن بالباب بابا طلع فتح الباب واحنه لبسنه شالاتنه وطلعنه نسلم
ويه طبتهم اجه انسام بابا دز عليه علمود الجاي وتوزيعه احنه نسوان ما نكدر يتعاونون هوا وابويه

كرصتني. أيه وهمست... باعي شكد حلوين ذوله الاثنين... تقصد باسم وهيثم يتشابهون سبحان الله نسخه من هيثم بس شعره ولحيته بيهن شيب

سلمنه عليهم وطببناهم للاستقبال ورجعنه للمطبخ
اجه انسام اخذ الميه وراح، رجع جاب الدولكه وأشرلي يكلي اجن النسوان باوعت طبن للهول رحبنه بيهن ودليتهن عالمغاسل يغسلن واحنه بدينه نحضر الغدا

ونقلنه الأكل للنسوان وانسام وابويه نقلو للزلم
كملنه نقل الغدا كملو ولمينه وراحن النسوان يم. الزلم صبينه الجاي وماما اخذته وراحت

واحنه رحنه لغرفة اهلي واخذنه الاكل متنه جوع هههه اكلت ب10 وجوعانه اني من النوع اللي كل شويه اكل بس اكل شي قليل

رحت دكيت باب الاستقبال طلع انسام كال ها شتردون

تعال تغده

انسام... ما جوعان

هيلين... امشي عالواهس

انسام... ما جوعان اكلو انتو الف عافيه

هيلين.... بداعت بنو

انسام... خرببب امشي وبعد لا تحلفيني بيها

هيلين.... ههههه دمشي يلا

رحنه تغدينه ولمنه الاكل شغلت المكيف ورشيت معطر جو بالغرفه وطلعنه سهام طلعت نامت
وأني وأيه كاعدات اني اراسل براء وهيه تراسل حبيبها

هيلين... حيجي يخطبج

أيه... هيلين

هيلين... سدي حلكج وجاوبي لا تضلين فطيره
أيه... مبله يجي بس يصير عنده فلوس

هيلين... شوفي من سألتج تردين اسد الموضوع ليش لأن تعرفين هذا مو عذر

ايه... اليحب يصبر ويضحي

هيلين... يطلب منج صور

ايه... اي

هيلين... مو كتلج لا تدزين

ايه... منو كالج دزيت

هيلين... حجيج ابد ممقتنعه بي

ايه... شقصدج اجذب

هيلين... ما ادري بس والله حيجي يوم تندمين هذا لو نيته زواج جان خطبج هاي شكد صارلكم اليحبج ما يرتاح الا تصيرين حلاله ويضمن مياخذج احد منه

ايه... انتي هيج تكولين

هيلين.... اي والله

ايه... وشسوي

هيلين.... كوليله تعال اخطبني اذا طلعله عذر انهي كلشي وعوفي

ايه... واذا عذره صحيح

هيلين... كليله بس تعال اخطب لا تلبس حلقه ولا كلشي

ايه... خوش

ارتاح كلبي من قبلت بنصيحتي اخاف عليها محد يتأمن هالوقت

لهنا وينتهي البارت

تصويتكم عمري...

بقملي الكاتبة (bmbsh_beme)