رواية الاصداف الفصل الثامن عشر 18 - بقلم بمبش

معرفت شسوي شلت علاكه الحلويات ذبيت الأكياس بالزباله

ورجعت تمددت وغطيت وجهي لأن ميته خجل

حجه هيثم... لا تختنكين

هيلين.. لابردانه

ما احس انجر الغطه وجرني بحضنه باس راسي وحجه

... انتي ليش دائما تسامحيني

رديتله... لأن اذا يوم غلطت بحقي بعد كل هاي المسامحات من اعوفك ما اهتم واكول طلعت من حقه وانطيته هواي فرص

يعني يجي يوم تعوفيني

اذا غلطت بحقي مره ثانيه كبل اعوفك لأن هواي سامحتك

هيثم.... بس اني بعد ما اغلط بحقج

نشوف

احسج ما مصدكه

طبعا ما اصدك لأن كل مره اصدك بيك وارجع انصدم

مو فتحنه صفحه جديده ونسينه الصار

لتكول فتحنه صفحه جديده الماضي العشته وياك ما نسيته ولا انساه بس اتناساه واجذب على نفسي واكول انساه

الله كريم شنو لسعج بردانه

ايي

ههههه عليج سوالف طبعا لمن اكول فاهيه تكليلي ليش

حضني قوي حسيت حتتكسر عضامي باسني وكال... يلا نامي استخطيتج مريضه

ليش شمسويه اني هااا

ههههه ما مسويه شي هههههه نامي نامي

نمت وكعدت الصبح لكيته مموجود وين راح اليوم جمعه معنده دوام غفيت وكعدني صوت باب الغرفه حسيته حيتكسر

وعمتي تصيح... كافييي نوم عفنتي يلااا كومي كومييي

كمت من فراشي فتحت الباب واكفه بوجهي ومخصره والاصابع محنيه والعين مكحله وتباوعلي
حجت بنتر وتكبر

.... كافي نوم يلا اني نازله لحكيني عود دنروح نحلب الهوايش

ياااا هاي يا هوايش

شنو ما تعرفينهن

بلي اعرفهن هههه اغسل واجي وراج

نزلت هيه واني غسلت وجهي وصليت صبح بليل من تعب الصخونه ما كعدت على صلاة الفجر

ونزلت وراها باوعت هيثم يم الحجيه يشوفها مقاطع بالتلفون ويضحكون

وافنان. ونور عالتلفونات
وساره وقاسم نايمين

اخذت المكنسه اكنس الهول حجت عمتي... عوفيهن وامشي نشوف الهوايش

هيلين... عمه يا هوايش اخاف اتقرب منهن اخذي نور

افنان... ترا الهايشه هيه تخاف منج
وضحكن هيه وعمتي ونور

حجت الحجيه... عوفيها وين ماخذتها هيه وين والهوايش وين

عمتي... انتي لا تدخلين اني وجنتي ننجاز

يمه انصدمت شهالصلافه خطيه الحجيه سكتت ما حجت حجه هيثم

هيثم.... اني شمنبهكم

عمتي... يمه ما تشوفها شلون تحاجيني

اباوع لهيثم اللي سكت ابدما عنده كلمه

عمتي... يلا انتي اللخ لبسي عباتج طلعت جبت عباتي ورجعت واكفه تنتضرني

شلنه السطوله وطلعنه ثاني مره اطلع الاولى عالمستشفى وهسه عالــبقرايات هههههه

مشينه جانت شمس بس الهوه بارد ما مشينه هواي ووصلنه بساتين مكان كلش جبير

طبينه للبساتين جان بي شلون الغرف

حجت عمتي... اخذي السطلات وروحي كدامي عالدامات اشوف عمج واجي

هيلين... يا دامات

أشرت عالغرف الكبالي اخذت السطوله ورحت باوعت ثلاث بقرات يمه شنو هاي

وكفت بعيد عنهن وكل شويه اكول راح يهجمن عليه شويه واجت عمتي كعدت يم البقره وكالت روحي كعدي يم هذيج انتي

هيلين... عمه والله اخاف منهن

عمه بعينج هيلين عليش جبتج اني

خليني كلشي اشتغل بس لا تقربيني منهن اخاف

دتعال تعالي... كامت من مكانها وخلتني اكعد بمكانها وكالتلي الزميها حلبيها يلا

يااا شنو شلون تمسكون صدرها ودوها عالمعل يحلبونها بأجهزة

اباوع لعمتي مسكت بطنها وتضحك

واني معرف شنو السالفه صدك يعني واحد يصير عنده خجل شلون يلزم صدرها

عمتي حجت والضحكه شاكه حلكها..... حلبيها شنو مشايفه واحد يحلب هايشه

لا بس شايفتها بالمعامل
عمتي اخذت سطل وكعدت كبالي وتعلمني واني اتهوع وجلدي يتكصكص من صدرها وخطيه البقره ما تحركت من القهر حقها شلون بيها واحنا نلزم بصدرها

جان شي غريب وهم حسيت بلعبان نفس

شفت السطل امتله حليب حسيت مسويه انجاز
وعاونت عمتي بالباقي

دنطلع عمتي طلعت كدامي كالت اودي السطوله للبيكم واجي

واخذت السطولل للبيكم باوعتلهن وكلت... ترا مجبوره الزم صدرجن عمتي تخلي رجلي يضربني واحنه ما نتحارش بيجن ترا علمود الحليب تعيشن ورحمالله والديجن... اجت عمتي كالت يلا دزيتلهن بوسه بالهوه وطلعت ويه عمتي هم رجعنه، مشي وصلنه البيت واستلمته شغل وتنضيف وعمتي واكفه تطبخ الغدا

كملنه غدا وكعدو يشربون الجاي واني واكفه اكنس

حجت عمتي.... اكول لمرتك العود حلبي الهوايش تكلي شلون الزم صدرها خطيه

الكل كامو يضحكون على شنو ما ادري

كملت كنس وصلينه ضهر واتغدو وكلمن طلع لفراشه نام ينامون الضهر

اني ما نمت بقيت كاعده عملت كيك وحلويات وأكلنه اني والبنات وافنان تكول مطيب وهيه فاكه حلكها مترين وتاكل

اخذت كيك الهيثم وطلعت جان نايم همزين لأن لو مشتم ريحتي اسبوع ما ياكل من وره البقرايات

طبيت سبحت وطلعت اسشور كعد على صوت السشوار

كال... شنو هذا الصوت

دا انشف شعري

واحد ما ينام

جبتلك كيك

وينه

هههههه هيانه انطيته الصحن ورجعت كملت شعري ورحت تمددت

اتمددت على صفحه صرت كباله جان ياكل
حجيت بضوجه... انت ما تنعطه وجه كوم روح لفراشك نام

هيثم... مو تراضينه

ما نتراضه الا تجيبلي التلفون

هيثم... ترا جان دروب انصب عليج بي علمود انومج بحضني

هيلين... هيثم اريد اخابر اهلي

اخذ تلفونه وكالي هاج خابريهم

وكروب الدكاتره

يا كروب شنو هذا انوب

جنت داخله بكروب ويه اصحابي بالمجمع الدكاتره والدكتورات ودائما اتواصل وياهم عليه

عقج حواجبه وخله صحن الكيك عالميز الوراه وحجه.. يعني جنتي تتراسلين ويه شباب

هيلين... مو وياهم بس هوا كروب شباب وبنات وكلنه نحجي بي

كام من فراشه وراح لباب الغرفه قفله وكال... يعني مرتي من اتزوجتها لهسه هيه تحجي ويه زلم عالكروب واني ما ادري

اني وانت ما اختلطنه دكلك

حجه وهوا صاير احمر من العصبيه

واذا ما نختلط تخونيني يعني

شدتحجي يا خيانه

تقرب مني ولزم شعري صاك على سنونه وحجه... جاي تتشاقين مووو

هيلين... بس خليني افهمك مثل الاخوه ومنتطرق لمواضيع غير الدوام اساسا يا خيانه بو اريد مجان كتلك بس اني على نيتي حجيت لان ما بيها شي

كلت هيج لو كفرت ولزمني شبعني ضرب اخر شي نزل يمي واني بالكاع منتهيه رفعني من دشداشتي وصاح... كل هذا من وراييييي

واني دايره وجهي عنه دار وجهي بيده وصاحح
انتي مو مال احتراممممم وضربني على راسي ركعني بالكاع وعافني وطلع

جسمي تكسر صح يضربني جان بس ما يقسى هالمره ضربني بقساوه

بجيت وكمت حيلي مهدود ادور تلفوني دخابر اهلي ماكو تذكرت تلفوني كسره

ركضت لتلفونه بي رمز شكد حاولت ما عرفته
ابجي واشهك

واصيححح بكل صوتييي اريددد اهليييي وابجي واصيح

لحد ما تعبت واني ابجي غسلت وبدلت لأن دشداشتي اتمرمحت(اتدمرت)

بالممر وسمعت صوت هوسه بالهول نزلت جوه البيت مخبوص بيت اهل افنان هوسه وسوالف

وعمتي استلمتني مثل الحيوانه اشتغل جوه ايديهم اخاف احجي ويرجع يضربني تعبت

جاي اكنس كالعاده الجهال وصخين وكل شويه كنس لفت انتباهي صوت عمتي وهيه تكول لام افنان

شبيج حبيبه اليسمعج يكول احنه شكد ضالمين
غرفت هيثم لبنيتج وهيلين تاخذ الغرفه القوك اليمها

ساره... وشنو خشاب هيلين شلون

عمتي... يبقى لأفنان هيلين خبزتها وانخبزت وخلص العرس من شهور كافي عاد هم لو مستفادين منها لا خلفه ولا شي بلكي افنان تجيبله طفل

ذبيت المكنسه وانداريت عليها وحجيت... شنوو غرف هيلين لأفنان بأحلامها تطب غرفتي عروس جديده اللي تدور مره ثانيه لابنها خل تدبرله غرفه خشاب غرفتي ما اطلع منها

افنان... لا بالقصد غرفتج اخذها

اذا اخذتو غرفتي دقيقه ما ابقى هنا

جاي احجي ونزل هيثم مبدل وكاشخ ولا كأنو هستوه ضاربني حجه... شنو هذا الصوت خير شكو

توني دا احجي وعمتي كامت تبجي وتكله

تقبلها تصيح عليه كدامهن وتهيني

حجيت بخوف وبعدم انتباه للحروف الطلعة من حلكي بسبب خوفي منه... تجذب والله ما صيحت عليها

ضربني بالمسباح على وجهي وصاح منوووو يجذبببب اولييي واتقرب جرني من شعري طلعني للغرفه وهوا يجرني من شعري طببني ردت. اطلع دا احجي سد الباب على اصابعي حسيت تكسرو

صرخت وبجيت

خل بس يفتح باب الغرفه اشرد منهم احسن شي

ضليت بالأرض لليل وبلا اكل حسيت بي طب للغرفه ما اهتميت سويت نفسي نايمه شالني خلاني عالتخت وغطاني وتمدد يمي

صارت بيه رجفه من خوفي نام هيثم ومعرف شسوي هسه بس اتحرك يحس عليه نومه خفيف

تكشفت وبرودة الغرفة تضرب بالعضم نزلت عالكيف من فراشي وهنا متت بدمي من سمعته كال

بصوت نعسان بين النايم والكاعد.. شعندج كاعده

حجيت واني اتمالك نفسي... دطلع للحمام

انداريت شفته غطه راسه ونام

طلعت من الغرفه والرعب بكلبي وصلت غرفة الحجيه واخذت الصايه مالتها ولبست من شالاتها معرف شلون تنلبس خليتها اشون مكان

مشايله فلوس شلون بيه
باوعت لحلقتي رميتها يم الحجيه والحجيه تشخر عالكيف اخذت 100من جنطتها باوعت شلحت كلادتي اسمي يم الحلقه علمود اخذت الميه حتى لا يصير عليه حرام

مراح اروح لعمامي لأن حيجون ياخذوني

طلعت وصلت المطبخ وسمعت قاسم يحجي

ولككك لا فنشوك

ها دروبب يمعودددد

ويصيح. يمه لا يحس عليه خرب حضي

طلعت عالكيف والجو ثلج فتحت باب الحوش سوه صوت بس ميسمعوه

وطلعت باب الحوش وجان ادكها بركضه وهيه هالركضه لحد ما نكضت وحلكي نشف بقيت امشي والجو بارد ثلج اصابعي تجمدو

ولابسه حذاء ثكيل تعبت متت

امشي واوكع امشي واوكع

لاكتني سياره

خفت انوب وكفت

سمعت صوت بنيه كالت

يا بنتت يا بنت لتخافين ما اأذيج

انداريت بنيه موكفه السياره ومنزله الجام وتحجي وحدها جانت

البنت... وين رايحه

مشيت حسيت صوت باب سيارتها
نزلت وصاحتلي
لتخافين ترا وحديوين تريدين

هيلين... بجيت وخشمي جامد من البرد
لمحافضه............

اكدر اوصلج للسيطره مال المحافضه وانتي تكملين طريقج لان ما اكدر اطلع خارج المحافضه

ردت بس ابتعد عنهم كتلها... تمام

صعدت وياها جانت السياره كلش دافيه
حجت.... انتي ليش هنا وحدج

هيلين... تيهت الطريق

لا تخافين واوثقي بيه وارتاحي

اخذت نفس قوي شهيق وزفير وخليت ايدي على راسس ورجعت راسي للكشن...

انتي اكو احد مأذيج

هزيت راسي ب اي واني مغمضه

فتحت على صوتها وهيه تكول عمري بس اشتري من المحل وارجع

كتلها تمام ورجعت غمضت عيوني فتره طويله والبنيه ما اجت خفت لا صارلها شي والسياره تصير براسي عود والف تهمه تكع براسي البيه مكفيني

فتحت الباب دنزل ما ينفتح صرخت ماكو احد الناس قليله

بقست فتره احاول افتح بباب السياره وما احس الا اجو منتسبين معرف عسكريين ووياهم نسوان اثنين ضخمات وصاحبة السياره بأتجاه السياره كمت اصيح حتى يجون ينزلوني واجو فتحت صاحبة السياره الباب

وتقربو مني النسوان نزلوني

لوهله جمد الدم بعروكي رحتي بيها هيلين باوعت للبنيه وعيوني تتوسلها بس للأسف غدرت صوجي ثقيت بيها

جرجروني واني ابجي للمركز

وكف كبالي رجال وحجه

انتي شنو منو احجيلي

بجيت وكلت ااااريد اهلي

احجي لا تخليني استخدم وياج غير اسلوب
بجيت وكلت... اريد اهلي

ما احس الا وضربني راشدي ونت اذني جر اذني وحجه.... ايمت نخلص منجن يوميه وحده لو مهزومه لو ك....

مسك فكي وصاح احجييييي

واحد من المنتسيين جان واكف يمنه حجه... سيدي ترا ميصير تضربها....

انت اطلع بره برهههههههه

دنك راسه وطلع وبقه هذا الضربني

حجه... وين اهلج وشطلعج

بجيت وحجيت اهلي....... محافضه

ومن هناك جيتي للديوانيه

هزيت راسي ب لا... اني اريد اروح لاهلي

فهميني

طلعت من بيت عيالي دروح لاهلي

عيالج عدهم علم

كذبت وهزيت راسي ب اييي

صاحححح لا تحذبينننننن بنت الك..... منو زوجج انطيني اسمه الثلاثه رديتله الأسم عافني وطلع

تقريبا نص ساعه وانفتح الباب طبو عمي وقاسم

عمي عيونه تريد تطك من العصبيه وقاسم هم

اخذوني وطلعنه

حجه عمي... ليش هيج تسوين ما فكرتي بسمعة زوجج

لا رد

قاسم... بويه راح اطلع لبيت خالتي لأن قاسم سلاحه بيده وكلشي يسوي

هاي يا خاله ما ادري واول مره اسمع عدهم خالات

رد عمي.. اي امشينه نوديها لبين ما يهده

سمعت بيها سلاح احس كلبي راح اني تاليتي مكتوله على ايده هذا هيثم

عمي... ما تردين ما احاجيج ليش سويتي هيج بويه

بجيت

كال.. لا تبجين بويه لا تبجين اعرف هذا مو خوش ادمي

وصلنه بيت صغير نص قطعه
نزلنه وعمي اخذ السياره وراح

دكينه الباب طلعت مره كلش جبيره بالعمر

سلم عليها قاسم بس وجهه ثكيل وطبينه جوه للهول جان اكو شايب مقعد لهجتها مصلاويه تبين

قاسم... خاله هيثم اليوم ما بوضعه الطبيعي وتعرفين انتي

الحجيه... ليش اشعمل

قاسم... خل نطب واحجيلج وهيلين بس مكان تبقى بس لبين ما يهدى هيثم

الحجيه... روحي داده لهاي الغرفه واشرتلي عالغرفه ارتاحي ونامي

رحت للغرفه طبيت وسديت الباب

واني احس دماغي ما عاد يفكر شلون حرجع لاهلي شلون حخلص من هيثم

تمددت وغمضت ودموعي تنزل بدون صوت

للصبح كعدت على صوت الحجي
يقره قرأن

طلعت لكيته بالهول جاي يقره قرأن ويجود صوته كلش حلو

طلعت غسلت ورجعت باوعت الساعه ب10لعد اني شكد نايمه وبيتهم هادء شافني الحجي أشرلي بمعنى اكعدي

كعدت يمه

اباوع لأيديه تجاعيد الكبر مبينه عليه وشعر ايديه ابيض وبيهن نمش ناعم

اجت الحجيه كالت... داده البيت بيتكي شتردين تاكلين طبخي وكلي واني اشتريتو لبن وطحينيي وبيض سلقتو وحززتولكي طماطه بس احمي الجاي وتريقي

حجيه ليش تعبتي نفسج

ماكو اي تعب داده الحمدلله

صدق الحجي وسد القران خلاه يمه وباوعلي جان وجهه نوراني حجه...

اشبيكي وجهكي تعبان وانتي تعباني مأذيكي عيالكي احكيلي فضفضي

حسيت بي حنية بابا وأحن من بابا لأن بابا شكد توسلت بي وجبرني عليهم وبالجذب ما يخابرني يسأل عليه..

حجت الحجيه عزملها حتى تاتاح نفسيتها

خله ايده على راسي وصار يقره قرأن بصوت عالي واني متحملت دموعي صارت تنزل

كمل تعزوم نفخ على وجهي وكال.... الله يريح قلبكي

مسحت دموعي.. حجت الحجيه.... هاي بيت اختي كلهم مو خوش اويدم بس امي بنصهم مثل الغزال بنص قطيع من الاذياب ومسحت دموعها

حجه الحجي... احكيلي اشبيكي

بجيت وكلت عمو اريد ارجع لاهلي تعبت عدهم الله يوفقكم رجعوني

الحجي... انتي بأمانتنه وما ترجعين لمكان الا برضاتكي

وتقربت الحجيه ساعدته خلته عالكرسي المتحرك

وعدلت شيلتها وكالت

داده انتي اعمل الجاي واتريقي اني اروح اودي الحجي علمود الجلسه مال علاجه

هزيت راسي ب نعم.. بس ايمت ترجعون

الحجيه... حسب دورنه ايمته يجي بس لو العصر لو المغرب

راحت الحجيه وعلمتني اشون اقفل الباب وراحت واخذت الحجي

توضيت وصليت ضهر واني بخوفي لا يجي هيثم وياخذني

وافكر ليش حجيهم يبين موصلي معقوله من الموصل زين شجابهم لهنا وليش ميتواصلون ويه بيت عيالي وليش وحدهم الف فكره ببالي

معرف من يجون احاول اسأل الحجيه واعرف

لهنا وينتهي البارت +تصويتكم عمري