رواية الاصداف الفصل الثالث 3 - بقلم بمبش

♕
بقلم الكاتبه ♡(bmbsh_beme)♡

كاتبة روايات تابعوها
@hhooo66اذكر المستخدم

كضيناها سوالف وضحك براء ما راسلتني كلت حقها مشغوله بحنة أختها
وكان نفس الروتين يوميه اخت براء تزوجت

بعد مرور ٣شهور

كاعده اكتب وانتضر مسج من براء يوميه نتخابر
ما بينت طبيت لمجموعة الدكاتره مموجوده وبمجموعة الشلة هم ماكو اتصلت عليها يتصل الأ يفصل ماكو بقه بالي يمها شويه واجاني مسج منها

كاعده

اي كاعده مدا تشوفين حركتها عليج اتصالات وضل بالي

جنت اغسل اماعين

هيلين/اهااا اكلج

براء/كولي

هيلين/باجر شكد عندج مراجعين

براء/ما جيكتهم

هيلين/شبيج شو مو على بعضج

شهكت وكالت هيلين مخنوكهه مخنوكهه حموت وربي

ليش عمري شبيج

أريد بابا مشتاقتله شمعة البيت بدونه البيت ضلمه وما بي طعم اليوم اجتي اختي زعلانه بعد مصارلها شي من تزوجت تبجي واحمد ميقبل يريد يرجعها تكله اني زعلت اشون ترجعني يكللها ارجعج لعد عليش تزوجتي وتبجي تكول خوما فد مره بلا كرامه اني وهيج اخوي يسوي لو زايده بالبيت لو ابويه موجود جان هوا لمني بحضنه وكال بنتي مترجع واكسر خشمه وما ارجعها طلعنه صوره من التلفون اني وياها وأمي ونبجي هيلين ابويه من راح كسرني كسرني بعد ما بقالي سند أحمد يريد يزوجني يكول لأمي المهر مالها ويه مهر بيداء اختي اتزوج بي اني

أني بعد حزني على ابوي بكلبي واتمنى افرح بعرسي مو يكون حزن بكلبي تشهك وتحجي لعد تقبليها اكول لأمي اصبغ غرفتي مليت من لونها يكلي ارحلج ما تبقين براء يريد ينطيني لصديقو لأن زنكيل مره حاجه ابويه كاله وابويه تخبل كال واحد ساقط ما انطي براء وبوكتها احمد يكول لابويه فشله من صديقي وقبل كم يوم يكلي بس يرجع يحاجيني اكلو كبع وأخذ استحلو البيت من توفه ابويه وامي تعرفينها مقعده ما تكدر تسويلهم شي واني لو اعرف اكتل نفسي ما اخذ غير أنسام

بجيت وياها ما تحملت شهكاتها براء عمري اني باجر اكول لأنسام يخطبج

خاف عيب

لا مو عيب اكله امنتني ما احجيلك واحجيله

اي عفيه مجبوره ما، اريد اخذ غيره
كافي تبجين كطعتي كلبي والله

يجي انسام يخطبج وتعقدون ومحد يكدر يندك بيج

ت ت تمام اروح اغسل واجي

اني هم اغسل، واجيج رحت غسلت ورجعت حجينه شويه وهديتها وبقيت وياها عالخط الا نامت سديته ونمت

تحضرت ثاني يوم. ونزلت انسام بره يمسح بسيارته

أنسام /يلا نمشي
اي

مشينه والطريق كله انسام ساكت وضايج

اكلج براء ليش ما ترد عليه ولا. تخابر..

انسام متمكن تكدر ترجع تخطبها

اي علواه

انسام اخطبها واستعجل اعقد عليها اخوها يريد ينطيها لصديقه البارحه خابرتني وتبجي تكول اكتل روحي وما اصير لغير أنسام

أنسام/خل واحد يدنالها الا انسي اسمه بسيطه احمد زوج بيداء واندار على براء اليوم الا اشك....

ترا هيه مو بالعركات بعدين يخبث وياك روح اخطبها بالاول وعوف العركات والهمبله على جهه

اليوم احاجي اهلي وباجر نروحلهم اني من زمان محضر كلشي بس لا هذا الأفندي يخربها ويطلعلي بسالفه

منوو

يمعوده حسام صار اسبوع من فلش الخطوبه بس لا تحجين لاحد لأن ما يقبل

واشدخلك بي انت

مو هوا الجبير لازم يتزوج كبلي من حاجيت اهلي على براء كاللهم ما ياخذها الا اني اتزوج

هذا ششايف روحه اخوك

اسكتي ترا طاك كلبي منه صاير من يتحاجى من فلش الخطبه لهسه

ليش فلشها

شمدريني بس مغثوث والله اول يوم الخرب الخطوبه اهلي ضغطو عليه كام يصيح لا تدخلون وطلع بره رحت وراه لكيته يكهد ويبجي وتخيلي يعني رجال مشورب يبجي لوما مكسور ما هيج يبجي

الله كريم لعد معذور

براء ما اجت للدوام كملت شغل ورجعت حتى ما اكلت وكل شويه ادوخ وأنسام بطريق الرجعه كله ينافخ
من رجعت للبيت اهلي متفقين يروحون باجر لبيت صديق ابويه وثاني يوم طلعنه من للديوانيه لبيت صديق بابا معزومين جان يضل يعزم بابا وبابا ميقبل لحد ما هالمره كال اطلعكم هم نتونس اخذت اجازه وكلت لبراء تخابر الحاجزين تأجل المواعيد
وصلنه الديوانيه جانت مكان يجنن بمعنى الكلمه

هلكنه من الطريق
اول موصلنه بابا كال

هذا بيت ابو سيف

باوعتله مو بيت هذا ابو مو بيت قلعه الله مصلي على محمد بيت شكبره ويجنن

وحديقه يمه وبساتين عالجهه اليمنى

الصراحه يعني مصدكت انزل من السياره دستكشف المكان

نزلنه تلكونه شباب جانو كلهم لابسين دشاديش يا اخي هيبه والله تحسهم هيبه

نزلنه بابا سلم عليهم اني بقيت مدنكه امي كبل كالتلي دنكي راسج عيب هههه واذا نطلع لمكان تكلي من نلاكي شباب امشي وراي عمري شكد تريد مصلحتي

فتنه للبيت تلكانه رجال بعمر بابا رحب بينه
وتسالمو هوا وبابا

وهوا ماما هم تسالمو وتسالمو هوا وعمتي
واني عيني على ولد جان منطينه ضهره بالمطبخ ضخم وايده سمره ولاف عليه مسباح اريده يندار دشوف وجهه

بابا كالي

هيلين بابا سلمي على عمج

اجيت سلمت 🤝وكتله اشونك عمو

والله الحمدلله عمي انتي اشونج

والله الحمدلله

اشون الطب وياج خوب ما متعبج

والله متعبني بس احبه

بابا خله ايده على كتفي وكاله

تدري هاي هيلين شكد تعبتني علما كبرت شكد خفت عليها من كلشي جنت اوسوس عليها هسه هيه البكر مالي

الله يحفضها ماشاءالله

اجت مره جبيره تسالمو هيه وامي
واجه هذا الولد الاسمراني
صفنت عليه صفنه لم يصفنها الصافنون من قبل صفنة طويلتا ههههههه انوب الله مصلي على محمد

العيون خضر طالعه توب ويه سماره
والعكال

هاي هيج اهل الديوانيه حلوين الله شكد تجي عليه حالات ما يوم شفت بجماله ورجولته ها رجال حوك مبين والله كلهم هيج

خربو صفنتي عليه كالو طبو ارتاحو
............. ........

حبايبي دا احجي بلهجتنه لأن ما متعوده احجي بلهجتهم
............ ...............

طبو عمي طبو ارتاحو
طبينه ارتاحينه جامو كلش ناس كريمين بمعنه الكلمه اول مره اطلع بمكان وارتاح بي لان نفسيتهم حلوه

كلهم العيون خضر قليل عيونهم مو خضر

طبعا كعدنه النسوان وحد والزلم وحد اجت مره جبيره بالعمر وياها بنيه كلش حلو سلمنه عليها العرفته هاي ام صديق ابوي

كالت لام سعد زوجة صديق بابا شمالجن يحبايب خلهن يطلعن يبدلن يرتاحن

ام سعد اي خل يرتاحن ويكومن

الحجيه ارتاحن ارتاحن تطلعن تبدلن

امي... اي والله ياريت

اخذتنه ام سعد طلعتنه لطابق ثاني جان البيت كلش جبير يضيع بي الشخص طببتنه لغرفه وكالت ارتاحن
ام هيلين اروح اجيبلجن ماي

طلعت وسدت الباب

ماما شكد حنبقى هنا

ابوج كال شكد متردون

حيللل هواي

انتي مو اخذتي اجازه

اي بس عيب هلكد نبقى

اسبوع انوب إذا خلونه نرجع زين ذوله ناس عيونهم فضيه ويكيفون عاليجي عليهم ابوج يضل يسولفلي

بدلنه لبست فستان قصير بس مو كلش يعني فوك القدم بشبر هيج

امي مقبلت الا تلبسين جواه ستريج

جان الفستان نمور لبست عليه شال اسود وعدلت مكياجي عيوني كلش اعتنيت بيهم ولابسه عدسات خضر كثفت رموشي بالمسكاره وكعدت يم امي

جعت

والله بنيتي اني هم جوعانه

تعبانه

تمددي الى ما يجون

خاف عيب

لان من احد يجي نسمع صوته وعود تعدلي

ههههه على هاي الجهال يا صوت

ميخالف ريحي جسمج شويه

تمددت خليت راسي بحضن ماما
اجتني رساله من بابا

ها بنيتي ارتاحيتو خوما ضايجين طلعتي ويه البنات عالبساتين

هههه حبيبي بابا بعد هستونا اجينه وين اطلع وهم جوعانه متت عصافير بطني كامت توصوص

هسه بابا ما بقى شي ماما وين

ماما يمي

هاه بوسيلي اياها

ههههه ولا يكعد راحه روميو

ههههه يلا ارتاحو عيب ابقى لازم التلفون

هلا بابا اخذ راحتك

بابا من النوع السبورتي ومرتب وامي كذلك

خطيه عمه من طبت هيه هلكانه بسبب الطريق

كاعدين وجابو الأكل تعدلت كبل استحيت
ماشأءالله الصياني والزلطه صح اكلهم دهين بس دنت نفسي عليه وانوب جوعانه والحلو بيهم خلو الأكل وطلعو وسدو الباب خلونه وحدنه

اكل وافصخ لعمه لحم وهيه بالكوه تاكل تعبانه بس اني مسويه دايت واكلت اكل كتلت نفسي ههه اجو بمو الأكل وكالو نامو ارتاحو شويه نمنا وامي نزلت جوه ويه النسوان

هيلين هيلين

ها عما

كعدي ديأذن عصر عيب كافي نوم

وانتي ايمت كعدتي

هستوني واريد اتوضه دصلي

كومي لعد اساعدج تعدلت ذبيت شالي شلون ما كان وسندتها وطلعنا لأن متكدر تمشي الا شخص يسندها

طلعنا جانو جهال صغار ماشألله حتى بطابق الفوك جهال سألت ولد صغير

وين المغاسل

اشرلي بيده باوعت حمام سبح

وين المغاسل قصدي

شنووو عماا

ردت عمتي

يمه وين تواليت تكرمون

اي عما ههههه تكول حمام عبالي

رحنه للحمام غسلنه واني هم غسلت مكياجي وتوضيت دصلي وساعدت عمتي هم

رجعنا وطلعت بدون شال عمتي كالت شالج كتلها اووو نسيته بالحمام من غسلت

روحي جيبي عيب هنا مو ناس منفتحه مثلنه

وانتي اشون

هسه اسند نفسي عالحايط

كتلها تمام ورجعت اجيب شالي ممر طويل وبي غرف وبنهايته حمام هيه تكدر تمشي بس الدرج الا احد يساعدها وخفت عليها بس الممر مبي درج ورجعت اجيب شالي

لفت نضري من دا اعبر غرفه مفتوح بابها جان مسدود من اجينه لفتني الها عطر البخور

فتحت الباب عالكيف وطبيت ماكو أحد باوعت بيها حمام سويت والغرفه خشاب تجننن ذهبيه ومرتبه كلش باوعت صورت هذا الحلو معلكه صفنت عليها شلون لابس دشداشه وشايل سلاح والجراويه والمسباح

وقف صفنتي من طلع من الحمام لاف الخاولي على راسه انداريت عليه صفنت شلون كافل ارادنات الدشداشه يمكن جان يتوضه ديصلي

داير وجهه عنه ويحجي والبحه بصوته خشن يحجي طبيعي بس كأنو جاي يصيح

شنوو مضيعه وووو وحجابج عيب منا احنا ما نحل عليج

اااا اسفه اسفه بس ارتخص العفووو ارتخص خرب طلعت كبل حتى لساني انعوج هاي شبيج هيلين احجي وامشي

عمتي...شو رجعتي وينن شالج.

يربي انصطرت درت وجهي ورجعت اجيب الشال باوعت بنيه شايله شالي وكله ماي رحت ركض اخذه وجان احس راسي ضرب بشخص رفعت عيني نفسه

باوعلي واستغفر ومشه

حجيت شبيككك هلكد شايف نفسك

شكلتي

مو وياك على شالي

وراح نزل الدرج ويسمعني نهروان لبسو شالاتكم

اخذت شالي من البنيه ورجعت توضيت لأن شافني خرب وضوئي ورجعت

ها عمه وين غطيتي
جنت احجي ويه البنات

اييي يلا صلي حتى ننزل يمهم عيب

مو خفه بس بنت مدينه اول مره اشوف هيج لبس درست وتخرجت والاقسام والدكاتره الوياي بس اول اصادف هيج شخصيه

صلينه واجيت اخلي ميكب

هسه واحد شلون يخلي ميكب ومرايتي شكدوتها

لازم عمتي هههه هاي معلكه مرايه بالحايط

رحت للمرايه باوعت لوجهي ورجعت اطلع الميكب وادردم
شوفي وجهج وجه خبله وشافج وعيوني عين بيها ايلاينر وعين ممسوح

شبيج تدردمين

لا هيج ههههه

خلي شي خفيف عيب منا العالم

مو تعرفيني دائما الميكب خفيف

خليت شي خفيف ميكب ولبست دشداشه اسود لونها وجاي الف شالي وطبو بنات خمسه مدري اكثر

طبو تسالمنه وسلمن على عمتي واجت بنيه وكفت يمي
انتي هيلين موو

اي

امج تناديج جوه تكول صار شكد اتاني خل تجيب عمتها وتجي

تمام نازلين

ونزلنه وساعدت عمه هم ونزلنه امي بالهول الهول شكبره

الحجيه.. هلا حبيبة تعالي اكعدي بسدي
باوعت لأمي أشرتلي بمعنه اكعدي يمها
الحجيه هاي بس عدكم مووو
امي. اي حجيه هاي كبرتنه

ليش ما خلفتو انوب اكو احلا من الضنا

امي. والله حجيه احنه هم نريد حتلو طفل واحد بس ما صار عدنه غيرها

جان رحتو راجعتو دكاتره ساده

والله حجيه ما خلينه الله وكيلج ما خلينه دكتور يعتب علينه

خاف احد مساويلج سحر شي

لا حجيه ماكو هيج شي

شعجب شايبج ما تزوج عجل

اكله دزوجك ما يقبل يكول هيلين تكفي
زوجي يحبيبه زوجي قنعي خل يتزوج جا والورث غير تخلفولكم وليد

امي وابوي كلش حساسين من هاي الناحيه وينقهرون وانوب حجيها ابد معجبني هاي العجوز

حجيه اهلي مرتاحين والف الحمدلله وهاي كلها مكتوبه من رب العالمين

يمكموعه تردين الورث بس اللج حجتها وضحكت عود بالشقه
نسوان تطب ونسوان تطلع احسهم متعجبين بينه والبنات كلهم اشون تطولين اضافيرج هيج واشون ما تسمنين اني من النوع اللي جسمي رياضي ابد ما اترك الرياضه واكلي كله صحي فصاحبة خصر وجسمي كلش حلو وشكلي مبين على عمري اكو بيهم صغار يبينون كبار وكبار يبينون صغار اني لا اليشوفني كبل يعرف عمري بالعشرينات

بقينه سوالف وشقه وضحك لحد ما مغربت الدنيا وبدو يحضرون العشه صار العشه وصبو عشه هالمره تعشينه كلنه النسوان سويه

بناتهم هواي هسه اذا اعدد ادوخكم فراح اعرفكم عليهم كل شخص بدوره

تعشينه واني كضيتها اشرب شنينه هما يسمونها لبن كلش طيبه واكلت هم ضربت الدايت واني من النوع اللي مو خجوله عادي يعني أكل ما استحي هههه

بدو يلمون الأكل أمي كرصتني يعني كومي عاونيهن بديت اعاونهن وكلهن خطيه يكولن لا تشتغلين وانتي جايه تتونسين

اجيت اعاون بنيه جانت تغسل أماعين عيونها لونهن أخضر وذابه الشال ذب شعرها اشقر وبيضه ثلج من شفتها صليت على محمد جمال ورشاقه ومبينه فقيره كلش

جيبي اعاونج

لا تسلمين معندي شي اكعدي وانسينه بس

نور بنت صديق بابا كالتلي

حبيبه عوفي من ايدج افنان تشتغل اكعدي العرفته افنان بنت عم نور بس هيه باقيه عدهم اليوم كاعده وياهن وطب هذا الولد

ها فنونه ايمت اجيتي

اجيت المغرب

ما شفتج

جنت فوك توني نزلت

تعشيتي

لا اشتريت كيك من جيت بالطريق وما اشتهي

اهااا نور الجاي ثكيل شويه خففي

اخذو هيلين وياكم ب8هيج للبساتين خلها تشوفهن

منين عرف اسمي ما ادري ومن حجه هيج شفت افنان التفتت عليه ورجعت التفتت عليه

نور... هيثم خاف الشباب يطلعون للحديقه

لا ما يطلعون اني ما اخليهم حجه هيج وراح

معرف شعجب هيج حجه واصلا منين عرف اسمي

بقيت يمكن اشوفهن يتفنن بالتنضيف سريعات وما يتعبن

نور.. يلا امشو نروح للبستان مدام خلصنه افنان روحي شوفي البنات اذا خلصو شطف دنروح

أجاني مسج من براء

لهنا وينتهي البارت تصويتكم ومشاركه للروايه
عمري انتو
♕
بقلم ♡(bmbsh_beme) ♡

«تصويتكم لتشجيعي على الاستمرار»