رواية الاصداف الفصل الثامن والعشرون 28 - بقلم بمبش

لا يُغريني مدح ولا يسقُطني إنتقاد جميعهم آراء وأنا "القرار"

رفعت التلفون دجاوب... هسه شيكول عليه كاعده لهسه

حذفت التطبيقات ومن ضمنها الماسنجر
الماسنجر بي خاصية اذا تخرج. منه وتترك التطبيقات مفتوحه يضهر عند الاصدقاء نشط

وفتحت الوضع الصامت لأن مرات الاشعارات تضوجني اسوي تلفوني صامت

وغمضت ورجلي توجعني شويه واجاني منه اتصال ما رديت سمعت تلفوني اجاه اشعار اخذته باوعت من الاشعارات

ضرغام كاتبلي... ليش متجاوبين

رديتله... شتريد

ضرغام... اويلييي شكد تفيكين مو صوجج صوج اللي ديشوف شلون صرتي

شفتها وما رديت انوب احترك دمه

اشوفه يطلعلي يكتب... ويرجع يطلع نشط الأن.. ثلاث مرات مدري اربعه يكتب ويتراجع

اريد اعرف شيريد مني ليش ديراسل ويتصل

نمت واني افكر الصبح كعدت ابويه جايبلي عكازه اخذتها وطلعت غسلت ورجعت امي سوتلي بيض وحليب

علمود العضم يجبر بسرعه
صليت صبح لأن البارحه فاتتني

وكعدت اتريك جانت الساعه ب11 كملت ريوك وامي كاعده تبحث عالنت اكلات تجبر الكسر عمري شكد خايفه عليه

وسهام يمي مشغلات اني وياها فيديوهات كوميديه ونباوع ونضحك

باوعت لامي وحجيت

هيلين... اريد اسبح

امي... مو اليوم يا ماما خاف الجبس يصير عليه ماي

هيلين... معليه شي ينلف بكيس وامدد رجلي ما اخلي يصلها ميه

امي... لعد اروح اجيبلج ملابس واحضرلج الميه حتى اسبحج

فتحت عيوني على وسعهن... تسبحيني

امي.. اي ماما

هيلين... لا لا اني اسبح اكدر

امي... لعد ما تسبحين

هيلين... اهووو لوك ما اني طالعه روحي تردوني ما اسبح

امي... هههه ديلا هسه اجيبلج شي خفيف البسج اياه واسبحج

هيلين.... يعني قفلت الكرديه

امي... هههه من تقفل تقفل

راحت تحضرلي الملابس احنه نعرف الاكراد يتصفون بالعناد يعني من يكول لا يعني لا يقفل

شويه واجت امي اخذتني سبحتني واني اجرجر بملابسي اخجل ذكرتني بطفولتي

كملت وامي طلعت وكفتلي بباب الحمام بدلت وصحتلها ودتني لغرفتي كعدت بالارض وامي جابت السيار شكلت السشوار وكعدت تسشور شعري وحجت

امي... هيلين

هيلين.. ها يمه

امي... مرتاحه

هيلين.. الحمدلله

امي... ضرغام ابن جيرانه وين شافج واشون صار الحادث

هيلين... شيصيرلهم

امي... ابن جارتنه عايش هوا وامه واخته وجهالها

هيلين... ايي

امي... ما حجيتيلي شلون

معرفت شكللها... كتلها

هيلين... معرف اني بطارف الفرع اندعمت وهوا ساعدني

امي... ها يعني قريب منهم مو اكول شجابه عليج

هيلين... ايي

كملتلي شعري ونزلت جوه اندك باب غرفتي كلت... منو... وسمعت صوت براء

براء... اني

هيلين... فوتي الباب مفتوح

فاتت براء وركضت عليه حضنتني وتكول...

براء... سلامتج يروحي شجايج متت مصدكت اوصل من كالي انسام طكت روحي اليوم بالكوه قنعت اخويه يجيبني

هيلين... الله يسلمج

كعدت يمي باوعت لرجلي وكالت.. اشون احجيلي

حجيتلها كلشي لحد لمن خابر وما جاوبته

براء... ياااا صدك شالج

هيلين... ههههه اي

براء... يمه الرومانسيه

هيلين... يا رومانسيه هاي غير متت من وجع رجلي

براء... بس تعالي شسالفة العطر

هيلين... ما ادري

براء...هوا حاجاج بعصبيه ويعرف اسم عطرج السالفه بيها أنه

هيلين... براء عوفينه منه ابقي باتي حتى ندز على براء ونتعلل

براء... هوا اخويه بالكوه قبل اجي اشوفج

هيلين.... هوا يستحي من امي نخلي امي تحاجي

براء.... علواه يقبل

هيلين... معليج خليها عليه

براء... خاف يحبج

هيلين... منو

براء... منو غير ضرغام

هيلين... هم رجعنه لنفس الفقره

براء... ليش ولج شاب مناقصة شي وتصرفاته كلها تدل انو يحبج

دنكت باوعت لأيديه وحجيت... براء ما اريد احب ولا اريد اتزوج وارجع للضيم والعذاب

براء... مو كل اصابعج سوه

هيلين... حجيت وعيوني مغوركه مدنكه ما اريدها تشوفني مكسوره... معرف صرت اخاف من شي اسمه زواج وعيال مشفت منه غير الاهانه والضرب

براء... شو باعيلي.. رفعت وجهي بايدها... باوعتلها وعيوني مغرغره دموع

براء راحت سدت الباب ورجعت كعدت كبالي كالت... ضرغام مبين يحبج وانتي تكولين ميخليني ابجي يعني ماكو هيج حب انسام شكد يحبني يبجيني

دنكت وبقت ساكته... رفعت عينها بعيني عيونها مغوركه كالت...اني اذا تزوجت انسام وبجاني ما عندي اب الجأ عليه انتي ابوج موجود وكامت تبجي

كطعت كلبي تذكرت ابوها حضنتها وابجي وياها واحجي.... ابويه ابوج واذا انسام يحاجيج ميلوم الا نفسه اني بضهرج ولج شحده يندك بيج شو دشوفي يتخبل عليج تدرين ايه تكول كلما يشتريلي شي يشتري لبراء ويخلي بكنتورها

اني وامي وابوي بضهرج محد يندك بيج

ردت. اسكتها وخرت عنها وحجيت واني امسح بدموعي.... براء حتكأب اني بلا شي شصاير بيه من الكعده بالبيت خل نسوي شي نغير جو

مسحت دموعها وكالت اني خل اكول لامي دبات واوصيها ما تكول لاخويه حتى امج تكله

هيلين تمام..

بقيت يمها خابرت امها وكالتها ووصتها متكول لاخوها وامها كالتلها ابقي واذا اخوج ما قبل خابريني اني احاجي

هيلين... لعد ساعديني ننزل جوه

براء... تعالي

سندتني براء ونزلنه جوه امي وابوي وسهام بالهول. بابا ديكتب وسهام على تلفونها تقلب فيديوهات دائما هيج عمري تلتهي بالتلفون لأن متكدر تمشي هواي وتتعب

وامي كالعاده دتباوع مسلسل
هيلين... يمه اجيناج بشغله

امي... ها بنياتي شنو كولي

هيلين... خابري اخو براء وساحي خوش مساحاه حتى يخلي براء تبات

ابويه... جيبي تلفوني بالغرفه عالشحن ورديلي رقمه هسه اني اكله

براء... عمو وينه هسه اني اجيبه هيلين متكدر من رجلها

ابويه... بهذيج الغرفه اول متطبين كبالج مشكل عالشحن

راحت براء جابت التلفون وانطته لابويه ورجعت وكفت يمي طلعت رقم اخوها واستحت من ابويه كالت بهمس... هاج ردي لعمو الرقم

رديت لبابا الرقم

ابويه... الوووو.... اني ابو هيلين صديقة براء..... بيك المهلي..... بويه بنيتنه تعبانه ومريضه وتريدها تبات يمها...... اني باجر بطريقي للمحكمه اوديها..... لا لا ماكو شي بس اني دوامي هناك..... شكد صار... اي عادي محلوله.... اي خوش خابرني على هذا الرقم حتى اتلكاك اباب المحكمه..... ها شكلت.... مشكور مشكور.... لا لا وين يطلعن هيلين متكدر من رجلها... تمام ابني... سد الخط باوعلنه وكال

ما يقبل...

شكد ضجنه اني طكت روحي

رجع كال... هههه اتشاقه كال خل تبات

همستلي براء... ممصدكه بحياتي ما بايته عدكم

هيلين... احم احم وتشوفين الحب

براء.... ههههه ولج طايره من الفرح

كعدنه يم سهام وكلت لبراء بهمس....

هيلين... راسلي كليلو يجي يشوفج بليل

براء... يا صدك تحجين خاف ميصير

هيلين... راح تشوفينه بس خلي حدود بينكم لأن بعده ما يحل عليج

براء... خل اراسله لعد

هيلين... واني اراسل ايه حتى تجي

ضحكنه وراسلت ايه كالت اي اجي شوية اللخ بس اكمل شغلي

باوعت لبراء وحجيت... ايه شويه وتجي
وهمستلها... ها كلتي لانسام..

براء... ما شالها لسه لان ساد نت

هيلين... هسه شويه ويرد

وره ساعه تقريبا اندك الباب طلع بابا جان انسام وايه طبو

انسام كبل باوع لبراء بغضب ورجع التفتت لابويه يسولف وياه

براء... هاي شبي

هيلين... مدري بيكم شي

براء... البارحه لل 2بقينه نحجي

هيلين... اليوم يجي وشوفي شبي

سلمنه عليهم وشقه وسوالف انسام مقبل يبقى كال
انسام... ابن خال امي جاي علينه بالطريق هوا وولدهم وبناتهم

هيلين... فتحيه ام الست بنات

انسام... ايي

براء... بهمس.... هيلين يا ست بنات شكووو منو ذني

هيلين... بهمس... الغياره شكد حلوات لو تشوفيهن

براء... مو صوجكم صوج الجا يبات ويشوف هذا الزفرر

هيلين... لسانج لا يسمعج

براء... ما يسمع ما تشوفي مطنكر

هيلين... هههههه

انسام... مع السلامه

سلم وراح وبراء تطحن بنفسها من العصبيه

العصر سوينه كيك وشغلات للتعليله انطينه حصة امي وابويه وبقينه حصتنه وبراء خلت لانسام

بليل طلعنه لغرفتي اني وبراء وايه وسهام
واهلي نامو

براء انطيتها من ملابسي وكعدنه ناكل ونسولف ونتعلل ايه شويه صحتها تعبانه مو قليل الصار بيها وبراء همستلي

براء... هيلين انسام يكول عليش بقيتي

ضجت منه اشون يكللها هيج وهيه بقت وتريد تشوفه كتلها اكتبيله.... بقيت علمود كلت تجي بليل اشوفك بس هاذهوا اساسا صوجي يلا باي

براء... خاف يزعل ويروح

هيلين... خل يزعل كليله ومعليج

كتبتله براء... كتبلها بايات

خطيه ما تهنت بجيتها تالي كلت بنات عندي اقتراح

ايه... شنو

هيلين... شوفو خل نشغل اغاني ونركص

براء... ورجلج

هيلين... اني وكاعده اهز كتف ههههه

ايه ما جذبت خبر كامت شغلت اغاني عالبلازمه وتركص وسهام تصفك

هيلين... كومي براء اركصي لا تعقدينها من وراه

ايه... نصت البلازمه وكالت.... منو شكو

هيلين... انسام ضوجها

ايه... تعرفين ليش ضايج

براء... اي ليش

ايه... اول شي ضايج ما يريد فتحيه تجي ولأن ما كتيله اجيت
من راسلتوني كتله براء هناك ودتبات خل اروح عقد حواجبه وكال شعجب ما كالتلي

براء... كتله راح اجي باجر اشوف هيلين كال تعالي
وبعدين ليس يضوج من فتحيه

ايه.....ههههه زمرد تحبه ومن تجي تضل تتلزك بي وهوا يضوج

براء...مبين من هذا يريد يكابلها وحتى مطنكر

ايه..... هههه هسه شوي... بعدها ما كملت

براء كالت... هاي شرف الافندي ديراسلني

سهام... تريدين نصيحتي

براء... اي

سهام... لا تجاوبينه شاهدي رسالته ولا تردين انتي ما غلطانه بشي لا تعلمينه يعاملج بمزاجه

ايه.. ادفعوها بعد ههههه

براء... عابت لازم اني عربانه اكلي نعل

ضحكنه وبراء كالت تمام... هاي شاهدتها... وهاي طلعت من المحادثه وهاي طفيت نت... وهاي صامت... وذبت التلفون عالتخت وكالت

اني محد يعاملني بمزاجيته... احم احم اريد شال

سهام ذبتلها شال... انشوف براء شدت الشال على خصرها وكالت... شبيكم صفنتو...

ايه اخذت الريمون علت الصوت وكامن يركصن

سهام تصفك واني اهز بكتوفي الا تعبت باوعت تلفوني ديتصل انسام بس مسمعته من الاغاني

جاوبته وحجيت

هيلين.... الوووو.... دقيقه كلشي ما اسمع

اشرت السهام تنصي لأن الريمون يمها

البنات كالو ليشش

هيلين... دقيقه ما جاي اسمع انسام من صوت الاغاني

انسام... يا اغاني

هيلين.... اني والبنات مشغلين اغاني ودنركص

انسام... براء هم دتركص

هيلين.... اي كلنه براء مؤسس الحفل

اباوع لبراء تأشرلي يعني شكوو

انسام.... مو جاي اتصل عليها ليش متجاوب

هيلين... دقيقه ابقى وياي براء وين تلفونج

براء... ما ادري يمكن عالتخت

انسام... كليلها ليش ما تجاوبين

هيلين... هاك احجي وياها

انسام... لا كليلها انتي

هيلين... براء انسام يكول ليش ما تجاوب

براء....دا اتعلل وياجن واتونس

انسام..... اني جاي خل تنتضرني بالحديقه

هيلين... تمام

انسام... اني جاي ما اكدر ادك الباب خلي هسه تنزل باي

هيلين... باي

باوعت لبراء وكتلها... جاي شوفي الساعه ب1هسه اهلي بسابع نومه اطلعي بدون صوت وافتحي باب الحوش وانتضري بالحديقه

اشوفها دنكت باست سهام وكالت... فديتج على هيج فكره

ايه... هههه الا اكله عليجن

كلنه باوعنالها وطككنه عيونه وحجينه ايهههههههه

ايه... هههه اتشاقه شبيجن يمه تخوفن

براء... اني رايحه ما اطول

هيلين.. هههه روحي

راحت براء واحنه بقينه نتعلل كل شويه نكول هسه تجي براء ب1ونص سهام كالت اني رايحه انام تصبحون على خير غفلت

شكد ردنه تبقى مقبلت عاد كتلها

هيلين... اكلي كيك وروحي

سهام... هلونه غفلت الف عافيه

هيلين... اذا ما اكلتي ما اكل اني هم

سهام... نعسانه هسه حتى اذا اكل ما استطعم بي

عرفتها تتنقصلنه بي

هيلين... لعد اخليلج حصتج..

سهام... اكلو لا تخلين شي

هيلين... سهوم الكيك هواي لا تتنقصين بي واذا يخلص هسه نسوي انوب

سهام... لا بس غفلت خليلي حصتي يلا تصبحون على خير

ردينالها اني وايه... وانتي من اهل الخير

راحت سهام وايه التفتت عليه وكالت... هيلين

هيلين... ها عمري

ايه.. هيلين احس اكو شي مغبي انسام

هيلين.. مثل شنو

ايه..... سألني كالي اكو بنيه بعرس هيلين جانت لابسه احمر تعرفينها

هيلين... اي وشكتيله

أيه..... كتله هواي اجو لابسين احمر بس اني صدك معرفتها يعني هواي اجو لابسين احمر

هيلين... بس. هاي

ايه... لا

هيلين... شنو احجي

أيه.... شاكه بي خاف يحب غير براء

هيلين... هاي شبيج شيحب غيرها

أيه... ما اعرف بس مرات احسه كلش متغير

هيلين... لا انسام ميسويها ولا يفكر بغير براء

جاي نحجي وطبت براء تتبسم واني وأيه خفنه سمعتنه بس طمنتنه من كالت...

براء... ها سهوم وينها

ردتلها ايه... سهام راحت نامت

براء... بنات متت جوع يلا هيلين صبي عصير خل ناكل

صبينه كيك وكعدنه ناكل وسوالف وضحك للصبح بقينه نتعلل حجت براء...

براء.... هيلين اذا الشخص يتغير عليج يعني شنو

شجاوبها اذا اكللها يعني يبطل يحب خاف تقصد انسام

هيلين... معرف شلكيتيني هههه

ضحكنه وسولفنه اذن فجر صلينه ونمنا

كعدنه على صوت هوسه بالبيت نزلو البنات يتراكضون من الخوف منعرف شكو واني انتجيت ردت اوكف مكدرت اسحل برجلي مثل الطفل كاعده واسحل بروحي وصلت الدرايج البنات واكفات بالهول وسهام دتخابر

شافوني البنات وركضو ينزلوني جوه كعدوني عالقنفه ومددت رجلي بالارض وحجيت...

شكوو شصاير

ايه... ها كلشي مصاير

هيلين.. صحت.... احجوو شبيكم

وره ما صحت انفتح باب الاستقبال مدا اصدك اللي جاي اشوفه

هيثم واكف كبالي باوعلي ورجع باوع لبراء وحجه... جيبي عباتها

براء.. ش شنوو

هيثم... مو دا احجييييي

ايه اباوعلها اباب المطبخ كالت... هسه اجيب اخوتي واجي وراحت تركض

امي صاحت... عيب عليك تطب لبيت مبي رجال وبنتي ما تاخذها بمكان

هيثم.... بقلة صبر... بنتج بنتج.. صاح.... مو اني مكرنننن ومرتي واحد مكضيها يشيل بيها

رديتله... لا مرتك ولا اخصك خوش كلشي انتها وانت هسه ما احل عليك وانت مو ابن عمي حتى تحكمني
جنت زوجيي جنتتتتت

هيثم... الضاهر طلعت عينج اجه تقرب شالني وهوا كلش ضخم

ويمشي واني ادفع بس واصيح كأنو حايط وأمي تجرجر بي وبراء تبجي

طلع شايلني للحوش ولاكتني ايه تبجي وتلهث... ولج يصخامي لا ابويه ولا الويلاد بالبيت واتقربت تدفع بهيثم هيثم دفعها عالحديقه وايه بس صاحت أخخخ أيدي وصرخت

سهام وبراء ركضن على أيه يشيلون بيها

لهنا وينتهي البارت أنشاء الله تكونون استمتعتو بالقراءة +تصويتكم عمري

رواية الأصداف

بقلمي الكاتبة.. ♕bmbsh_beme♕