رواية الاطلس "دمليج أسود" الفصل العاشر 10 - بقلم 𝐙 𝐇 𝐑 𝐀

#الاطلس "دمليج أسود"

بقلمي: زهراء السلامي 💛

لتنسون التصويت + التعليق بين الفقرات + متابعة لحسابي 🌼.

أصفُن عالضوة الملموم حدر الباب
هلبت ظلّچ يكسره. 🔥

• ━━━━━━❪♣❫━━━━━━ •

-تينا بصدمة: لا مستحيل

-ضحى: جاي تشوفين!

يحجن بالهمسات ومبحلقات عيونهن، بقيت اوزع نظراتي بيناتهن كلشي مافهمت طخيت تينا بقسوة واخيراً نطقت بنفس النبرة الهامسة المدهوشة..

-تينا: سارة وفاهد على علاقة!

-ضحى: امشن بنات بشرفكم احنه معلينه امشو لا يلوحنه شي

-مريم: منو هاي البنية؟

تسائلت عن البنية الواكفة قريب فاهد منزلة راسهه وشعرهه الاحمر واكع على وجهها.. همه نوعاً ما بعاد عني ورايحين لغير عالم يمكن حتى ما لاحظو احنه بعدنه موجودات..

-تينا: سارة تصير اخت الاطلس!

فغرت فاهي ممصدكة معقولة؟؟ اخت الاطلس تحب عدوهم وبيناتهم علاقة غرامية؟؟

-ضحى: بناات بشرفكم خلونه نروح هسة ينتبه علينه فاهد ويكرهنه عيشتنه

-تينا: اووف لو اللزمهه هاي الفصعونة الحمرة الا املخهه تملخ بأسناني

-مريم: بنات مو علاقة استبعد حب بيناتهم شوفوهه شلون لاوية رقبتهه ومنزلة راسهه

كل هاي التحليلات ووكفتنه وهمه ما منتبهين علينه هو صح احنه بعيدين بس أي شخص راح يلاحظ اكو احد ديراقبه بس همه كلش ماكو..

-تينا: هذا السبب فاهد لاطش لمسيو حمزة ومكرهه عيشته

-ضحى: شوف شوف ولجن يلزم ايددههااا عزه يممةةة

-مريم: عززه باعن شلون انتفضت منه!!

-تينا: امشن راح تفضحونه امشن هسة يطيحون حظنه

ايدتهه وطلعنه نتسحب من الحديقة وگف گلبي من صارو بوجهي الاطلس وعمر ابتسمو من شافونه وگال عمر..

-عمر: حمزة يدور عليكم بنات

-تينا: اءء اي.. اي.. اي اي اي جايات اي

عكد حاجبه عمر عن حالتهه وجهها لونه مخطوف وانوب ضحى تتنافض واني ماسولف عن حالي عبالك مسويتلي مكسورة ورجلي لگفني..

-مريم: اساتذة ليش انتو اجيتو تصيحولنه.. ههه جان أي واحد اجه بدالكم

-ضحى: اي صح اي ليش تزحمتو العفو منكم

-الاطلس: ما اجينه نصيحكم عدنه شغل هنا

-مريم: بشرفك لتروح استاذ

باوعو واحد على الثاني والاطلس رفع تك حاجب، ما سلمت من تگرص تينا زورگت ايدي ادري چفصت بس راح اموت بدمي من الخوف..

-الاطلس: انتَ زينة مريم؟

-مريم: اي.. يله بنات امشو

سحبتهن وياية وطلعت اهف بره صاحني عمر بس ماهتميت ماعندي قدرة اشوف شنو راح يصير لولا تينا جارتني وكالت..

-تينا: اريد اشهد الفلم وخري

-مريم: تينا عوفي الموضوع حبابة

-ضحى: بنات دتجذبون الانظار علينه باعو مسيو عمر شلون يباوعلنه

هو والاطلس واكفين بالباب ما راحو للحديقة بقو يباوعولنه ويبسبسون، واني على وگفتي تذكرت الطركاعة اهل اطلس هنا ونانا هنا خاف تشوفني وانفضح!!

-مريم: خلونه نرجع للحديقة وشيصير خلي يصير

-تينا: اي خية اي امشي

تمشينه ووگفنه گبالهم حتى يسوولنه مجال نفوت، سد اطلس الباب علينه بجسمه وكال..

-شبيكم؟

-ضحى: ههههههههههه شنو مسيو شبينه

-تينا: مسيو طالع سبايسي اليوم تدري

-ضحى: والله صح كلش واو

-الاطلس: شكراً آنساتي

حچاهه وعينه عليه كأن ديقره ملامحي، تينا ضحكت بمياعة واضحة ذيج وينهه تمثيل..

-تينا: ههههههههه مسيو شنو راح توگفنه هنا عاجبك تتفرج على طول مريم

بهتت ملامحه وعمر ضحك وضرب كتف الاطلس..

-عمر: شنو واگف حرس هنا انطيهم مجال مسيو اطلس

هز راسه بسرعة وابتعد، فلتنه بالحديقة ادور على سارة وفاهد بس اختفو مالهم اثر، ذبيت نفس مرتاحة ورجعت اكعد على المسطبة..

-تينا: حرامات راحو توقعت يصير فد شي هندي نتابعه ونكرز حب

-ضحى: وتضربين واحد بحذائج

-مريم: اسكتو گلبي راح يوگف شنو هاليوم المتعب الغريب

-تينا: اكلچن حسيتو بمسيو اطلس

-مريم: شنحس؟

-تينا: مادري حسيته متوتر شلون الي جاي ومتعني يريد يحجي ويانه طبعاً چذب سالفته مال عنده شغل بالحديقة

-ضحى: حتى اني حسيت لان اذا صدك عندهم شغل وينهم شو ما اجو

-مريم: اي لاحظت توتره وارتباكه

-تينا: معقولة معجب بيه بنات؟

-مريم: يجوز

-تينا: لا بنات ماكدر اخون حمزاوي گلبي مينطيني

-مريم: بعد هاي قسمتج حبي شتسوين

-ضحى: هسة يله مو زين تصيرين ويه الاطلس حاصلچ

-تينا: اوك بس من هسة اتفق وياه اريد توأم بنات اسميهم رند وريناد

-مريم: خوش

-تينا: لا بنات شو ممرتاحة احسنه منناسب بعض

فطسنه ضحك على سوالفهه وهي كملت بأحلامهه واني اسمعلهه واضحك.. بقينه كاعدات فترة طويلة كلش محاسات بشي نكرز حب ونشرب عصير وتينا تسولفلنه عن خطيب اختهه وشلون يحبهه ومدللهه..

-مريم: يا روحي الله يديمهه عليهم

-تينا: امين يارب، بنات ساعة بيش منو لابسة ساعة

-ضحى: اويلييي بالـ 12:30

-مريم: عزه خاف ترجع امي للبيت ومتلكاني

-تينا: يمعودة انتِ مو كلتي طالعة

-اي ولج بس هسة ترجع وتطيح حظي اذا متلكاني

كمت بسرعة انفض قفطاني وضحى تحجي..

-ضحى: اذا راجعة جان اتصلت بيج

-مريم: اي صح بس حتى لو خلينه نرجع اكيد الكل راجع هسة خاف نسونه هنا ويقفلون باب القاعة

-تينا: لا حبي الايفنتات تطول كلش

كمنه ويه بعض ورجعنه بالقاعة چانو الناس البيهه قليلين كلش بس لسه كاعدين، تأكدت من اهل الاطلس راجعين شوية ارتاحيت كالت تينا خلينه نكعد شويه نستمتع بعد حبيت الفكرة وكعدت بس قبلهه راسلت نانا وكلتلهه راح أتأخر ويه صديقاتي على امل متطلع هالطلعة من عيني من ارجع..

-جميلة: هاا شو بعدكم هنا شنو السبب

-ضحى بهمس: اجت الغثة

-مريم: نفس السبب المخليچ لسه موجودة

ضحكت وگلبت عيونهه مستهزأة، جرت كرسي وكعدت ويانه..

-جميلة: چنكم ما سمعتو بالصار

-تينا: شنو شصار

-جميلة: عركة شكبرهااا صارت بالبوابة

-ضحى: چذب ويامن؟؟

-جميلة: يااا معقولة ما سمعتو غير صارت ممالخ بين حمزة وفاهد مسيو حمزة لزم فاهد سواه وصلتين

-تينا: عزززه بس لا لنفس السبب بنات؟؟!

-جميلة: لگفو اخت الاطلس.. استغفر الله استغفر الله استغفر الله تسوي ذيج السالفة ويه فاهد بالحديقة الخلفية

لطمت صدري وتينا صارت تضرب على خدودهه..

-مريم: جذب جذب لا مستحيل هالشي

-جميلة: بعيني شفتهم سوه الله لا يچذبني طلعو سارة متخربطة وخارطة روحهه

-تينا: ولج هاي شوكت؟؟؟

-جميلة: هسة السالفة ما صارلهه نص ساعة

-ضحى: يعني العركة لحد هسة؟؟!

-جميلة: اي تركتهم واجيت اني تعبت تدخلت الشرطة ورادت تسحلهم بس من عرفوهم تركو الموضوع

-تينا: جميلة الرب عليج صدك بين فاهد وسارة اخت الاطلس علاقة؟؟

-جميلة: لج اييي ذيچ السالفة بيناتهم حتى سمعت البنات يتهامسون شاكين سارة حامل منه

صرت گوة اجر النفس مدا اكدر اطيق هيج حديث يحجي عن شرف بنية، طفرت تينا تريد تروح للبوابة واني جمدت بمكاني ماكدرت اكوم، صاحت جميلة بصوت عالي..

-لحگن على التوشيله ههههه

-مريم: انتِ ليش هيج فرحانة!!

-جميلة: احسن خلي ينكسر خشمهم شوي

-مريم: ولج حرام عليج انتِ شعليج بالعالم شبيكم انتو!

-جميلة: اهووو راح يبدي الاستشراف

عافتني وكامت بقيت اتگله بمكاني ماكدرت اعوفهه ردت اروح اتعارك وياهه وحسيت بـ ضحى تجرني وتكول خنشوف شسالفة ونرجع لجميلة بعدين..

طلعنه بالبوابة واشوف الدنيا مگلوبة السيارات سافطة ببوابة القاعة وهوسة هوسة هووووسة فوضى وناس تتصايح ويه ناس وناس تهد على ناس مدا اشوف شكول معروفة كلهم ناس اول مرة اشوفهم بحياتي..

-تينا: وين جماعتنه بنات؟

-مريم: مادري..

بقيت ادور الاطلس بعيوني قررت اتقدم شوية عسى افتهم شي ولمحت علي مشگوگ قميصه ووجها صاير ازرگ من الفرفحة يهد وينثني وعمر لازمه يريد يهدأه..

بقت عيني عليهم بس ماكدرت اتقدم اكثر انسحبت بره من البنات ما خلوني ادخل، صوت الاطلس كلش عالي ومبين يفشر ويسب بيهم بس مدا نكدر نشوفه واضح العركة حامية ردت ارجع اشوف وتينا ماقبلت..

-تينا: معلينه احنه مريم امشو ندخل للقاعة

-ضحى: لا خلونه نرجع لبيوتنه بنات

-تينا: من تفض عود شوفي حتى الطريق سدو امشن

جرتنه جر للقاعة بقت عيني معلگة عليهم وروحي تلوب ماكدرت اكعد متوترة وبالي كله ويه اطلس اخاف يتخربط مثل ذيج المرة.. حست عليه تينا وكالت بعصبية مكتومة..

-كافي مريم الله يخليج لا توتريني زايد!!

-مريم: بنات ليش كل هاي المشاكل ليش هيج ليشش

-ضحى: همه هيج من يوم يومهم عداوات وعرك

بقيت رايحة راده بالقاعة موبايلي بيدي ومنتظرة أي ثانية نانا تتصل عليه ترزلني بس ماكو ما اتصلت ولا حتى دزت رسالة.. صارت الساعة وحدة بالليل وماكو لا حس ولا نفس والعركة مانتهت بالعكس كلما جايهه تكبر اكثر واكثر..

اختنكت كلش ورحت للحمامات اغسل وجهي اباوع لروحي بالمراية صايرة صفرة من الخوف ما مرتاحة اكو شي بداخلي يكول اكو هواي اغلاط دتصير بس ماعرف منين مصدرهه..

بنفس اللحظة اتصل موبايلي جانت "نانا" اني شفت الاتصال لو كمت ارجف وضعي تخربط بالزايد ماعندي حتى طاقة ابررلهه تأخري صارت الساعة وحدة شعندي لسة بره..

قررت اغلس على الاتصال وارجع للبيت شلون ومنو يوصلني مادري عسى ما اكول لأي واحد واكف ياخذني المهم ارجع للبيت بأسرع وقت ممكن..

طلعت بره للمرة الثانية وانتبهت هالمرة شرطة كومة واكفة حاولت اتعده العركة واجتاز الشرطة عيطت بيهم حتى يبتعدون عن طريقي بس ماكو صايرة لحم بالباب..

وكفت حايرة واللطم بصمت نانا بقت تتصل عليه واني ارفضه تندمت ما جاوبتهه جوه على الاقل شوية هدوء، شفت عمر واكف بعيد اشرتله بيدي ممنتبه صرت اصيح بصوت عالي بأسمه وماكو بغير عالم..

-اكدر اساعدج انستي؟

اللتفتت على الحچه چان رجال شاب شكله حباب، كتله اريد اطلع من هاي الهوسة هز راسه واشرلي اتبعه.. تمشيت خطوتين وصار صوت مثل الطلق قوي بالجو تخبلت صرت اصيح وسادة اذاني..

ماحسيت غير بنفس الرجال يحاوطني بأيده حيل ويمشيني انتفضت وردت ابتعد عنه بس ماكدرت كمت اعيط بالكتمة وادفع طلعت روحي والخرعة بيه وهذا لزكلي..

-ولكككك كللللللبببببب

گلبي مو بس وگف لا گلبي انسحن وانداس من الرعب، ثواني چانت واشوف الاطلس فوك راسي يعيط يهد وينثني..

-شعندددددجج ويه هذذاااا الس****

ما خلاني اجاوب ماكدرت اجاوب اصلاً حسيت روحي انشمرت على بنيد سيارة انركع ظهري حيل انخسفت خسف، صحت بألم بس ماكو وقت للالم الاطلس تخبل وانكلب شيطان على الرجال..

لزمه فصخه تفصخ وصارت دماية مسلم شافهم واجه يركض ووياه زلم ثنين وذاك جاب زلامه وصارت لخة واني اباوع واللطم انتبهلي مسلم فك عيونه وعاط بيه..

-شكوووووو هناااا شكككوووووو

كمت ارگص بمكاني من الخرعة ماعرف شسوي همه شافوني هيج لو الاطلس صار محيط هائج تخبل كام يلطم على راسه وعمر وعلي اجو لزمو الرجال ودك بوكسيات وذاك ما قصر جاب الزلم مالته وصارت كضني واكضك..

-عمر: شعنددددك ويه بتنننه ابن العووووبةةة

-علي: روووحييي لا توكفين كدامي هيج روووحيييي لا تخبلينننه

رحت اركض مادري وين عفت الهوسة وراية وصرت اركض بالشارع وحدي ظهري يموتني وخايفة مرعوبة ما متخيلة بحياتي امر بهيج تجربة بس مو بيدي الصار وذولة شبيهم هيج انرعصو!

واني اركض وگعت على وجهي چفي وسندت روحي بأيدي متت من الالم تجرحت ايدي لابت روحي تحرگني، كمت گوة ابچي وادور بعيوني على سيارات اريد تكسي هالمنطقة مكطوعة لاحظت هالشي اول ما اجينه صايرة بوسط غابات..

لزمت موبايلي بأيدين ترعش وقررت اتصل بـ نانا واحچيلهه كلشي قبل ما احس بأيدين قوية تجرني من متني وصوت رجعني رجج صار بوجهي..

-ووووييننن رايحة وحدددج وييننننن

-استاذ.. استاذ.. شنو صار.. شنو شبيك شبيكم..

كوة احجي لساني انبلع ويه طيحتي، شدني عليه اكثر وجرني بأتجاه العركة والهوسة توقعته يريد يرجعني للقاعة بنچرت بمكاني ماقبل اتحرك..

-ماروح مااريددد لازم ارجع للبيت لااازم امي تنتظرررني

-اي امشي اني اخذج امشييي

-مااا ماااا ميصير مااكدرر عزه بعينج يا مريم صخام الصخمج يمصخمةة

-مررريمممم لا تخبلينييي امشي صعدي بسيارتييي امشييي

سحلني سحل من ايدي واني معاندة ما اصعد وياه على يا صخام وجه اروح شلون يوصلني لبيتي راح يعرفني وانفضح..

-استاذ اطلس ماروح وياك حباب اخذلي تكسي فدوه لعيونك اروح فدووة

-الاطلس: مريممم روحي واصلة لخشمييي امشي وياااي لا تفحطينننه

-فدوة فدوة خلي عمر ياخذني فدووة

-انععععل ابووو عمرررر امشييييييي

-ما ما ما عمر حباب عمر ياخذني اني اريد عمر

-انتِ هذااا التردددي هذا الكاتلججج تردين عمررر اني اعلمج امشي وياي

مشاني وحطني بالسيارة گوة صعدت رجليه ترجف هذا هو اليوم نهايتي انفضحت وتخزيت راح يعرفني ويندل مكاني.. صعد السيارة وطبك الباب مالته حيل راح تنشلع..

داس بانزين بكل قوته وطار بينه، معدتي كامت تكلب يمه صار عندي اسهال يمكن صواب دهرچ يمريم ودهر حالج انتِ شكد فگر شكد نحسة القهر لاحكج لاحكج..

-استاذ خفف من السرعة فدوة لعينك حباب خفف

زاد اكثر بالسرعة كمت اعيط راح يفوت بشجرة لو بلوح راح اموت الدنيا ظلمة هندس بس ضوة سيارته يشع الطريق..

-مريم: يبووو عليه يبووووو استااااذ اوكف على جهة نزززلنييي يبووووو استاااااذ

-صوتج ما اسمعه مررريم صوتج

-شبيك انتَ شبيييك شعليك بيه شنو تخبلت عزززه راح نموووت ولك ماريد اموووت ربييي ماريد اموت..

عضيت لساني من الخوف متت من الوجع كوة يطلع الحجي من حلكي كمت اتشاهد راح تطلع روحي، صحت بصوت عالي اوصي خاف اموت..

-عندددي قضاءء شهرررين صلااااة شاكة بيهن صليلي حبااااب لو كول لاحد يصيليلي فدوووة وعندددي قضاءءء عشرة ايام مال شهر رمضااان ما صمت لسه

-منو كالج ما تصلين وتصومين اكليهه

-ولك مال الشهرررية تجيني الشهرررية يبووووو

-اششش سكتي دوختيني

-خفف بربك اذا تحب الله خفف

بعد جملتي خفف وكام يضحك وره ما خرطت روحي وقوتي انهارت، ذبيت روحي على الكرسي لا ايد ولا رجل انتبهلي وكال..

-الاطلس: مريم شبيچ

-الله ياخذ مريم

-شو.. شبيچ عايني عليه شو

يحرك بوجهي وينفخ عليه، احس بي بس ماكدر اجاوب ولا اكدر ادفع ايده عني هبط ضغطي، طلع بطل مي من صندوك السيارة فتحه وشمره بوجهي..

نزيت نزة تسوه عمري طب المي بخشمي واختنكت راح يموتني هالرجال راح يجي يوم ويموتني..

-شنو اختنكتي شجاچ خرب حظي خررب شلون حظ نععلل

-وخر لا تلمس وجههي!!

-الحمد لله رجع لسانج يعني انتِ تمام

-استااذ انتَ شبيك مخبل؟؟ عقلك بي شي؟؟ فهمني شبيككك

-انتِ شبيچ شكوو طالعة واصلاً ليش لحد هسة انتِ هناا شعندج ليش ما رجعتي للبيت؟؟؟

-بكيفي

-مرريم جاوبييي

-اللتهيت وراح الوقت عليه وعلى تينا وضحى ثانياً جميلة هم هنا ليش متحاسبوهه شمعنه جايين عليه

داس بريك قوي ردت انلطم بالشباك لولا لازمني وحاميني بيده، دفرت ايده وصحت..

-مريم: تريد تموتنه ياله ترتاح!!!

-شعندج ويه ذاك ابن القندرة!

-منو ابن القندرة منو ذاك!!

-انييي ابن القندرة شعنددددج ويااااه

-غير انتَ جريتني وجبرتني اصعد سيارتككك

-مريم!!

-استاذ رجاءً عدل اسلوبك ويايه!

-شعندج ويه مالك

-منو نعااال

-مريم لا تغشمين روحج وفضيني احجي

-شحجي اهوووو وخر اريد انزل

جرني عليه حيل ماتحملت اسلوبه ضربت ايده جوه نظراته المصدومة وبعدتهن عني وحجيت مهدده..

-ما اسمحلك تلمسني بهالطريقة مرة ثانية

-ما اللمسج بس جاوبي شعندج وياه حاضنج وتمشون ليشش؟؟؟

-منو هذا اصلاً اني هم مستغربة من تصرفه الوقحح يمد ايده عليه ويحضن شكوو

-مريم فاض صبري مررريم

-حتى اني فاض صبري شنو جايبني تحقيق!!

-يعني ما تعرفين مالك؟!!

-لااااااا ماعرررفه لااعععع

-خوش.. لطيف.. لطيف..

-استاذ فهمني شكو

-تعرفين منو مالك؟؟

-لا

-مالك وفاهد اخوان آنسة مريم

-عزه صدك شو ميتشابهون

ضرب وجهه بيده حيل جزعان وكال..

-مريم الله يخليج انتبهي ويه منو تماشين فهمتي لو لا!

-اي فهمت بس انتَ شبيك اجيتني چنك باتمان جريتني ودخلتني سيارتك ميصير هيج استاذ عيب هذا التصرف وتجاوز عليه

-بعدين تعرفين شبيه

-اله هسة اعرف يله الوقت تأخر وامي تتصل عليه

-خليني اوصلج وين بيتج؟

-ماريدك توصلني

-هاااا تردين عمرر؟؟؟

-اييي اريد عمر بكيفيي

-مرررريم اااخخخ يا مررريم اااااخ

-استاذ نزلني هنا بداعة امك خليني اولي لبيتي واستلم رزالة امي هواي اشرفلي

-يله نزلي ودوريلج سيارة توصلج

-لا ارجع لاستاذ عمر

-مررررريممم

ضرب الستيرن بكل قوته وعيونه تجدح ناار من العصبية والغيرة هيهيهي اي اي اريدك هيج تتخبل وتنجلط..

-استاذ شبيك واذا وصلني مسيو عمر

-وشكو يوصلج قندرة!! اني شبيه؟؟ لو سيارتي ما تعجبججج خاتوون

-انتَ هواي تعيط

ذب نفس متعب وهدأ نبرة صوته حچه بصوت اشبه للهمس..

-هيج زين؟

-اي

-وين بيتج يالمفحطتني

-استاذ!

-بيتج وين مريم

-امشي واني ادليك

شغل السيارة وكل حسرة يذبهه شعلاتهه، شغل المسجل على اغنية ناصية كلش علاهه شوية كلامهه يبچي الصخر ورومانسية للنعال ماتحملت طفيتهه وگلبت وجهي..

-ليش طفيتي

-ماحبيتهه

-اممم، لطيف

-شنو لطيف استاذ مو حلوة الاغنية

-اي لان راكبة وياي مو ما تعجبچ

ضميت ابتسامتي بكف ايدي ودرت وجهي على الجامة شو هذا تخبل من سكوتي صار يزفر ومنفس وعاكد حاحبه راح ينفجر متت ضحك ومدا اكدر اسيطر على نفسي اخاف اضحك واللوص الوضعية..

-الاطلس: عمر مرتبط تره

-مريم: لااااا صدك

اندار بكل جسمه عليه وعاف الطريق، فاك عيونه ممصدك ردة فعلي انطعن وجهه وكام ينطي اللوان من الغيرة..

-الاطلس: لا ما مرتبط لا يوكف گلبچ!

-اي همزين

-مرررريمممم

-نعم استاذ

-اااخخخخخ مريم ااخخخخخ

يضرب على الستيرن ويأخأخ شبي هذا دراما شو دولي اني بيا حال، اخذنه الطريق هدوء محد يحجي بس هو لو اطخه ينفجر عليه..

دك موبايله وظهر على الشاشة الي بالسيارة اسم "عمر" رأساً باوعلي وخنزر جاوب الاتصال وفصل الموبايل عن السيارة..

مافهمت شي من المحادثة بس سب وغلط وتوعد وتهديد ويصيح ابوية وين وحمزة وين وسارة شصار بيهه واني جاي وراح ارجع ووو..

بقى حاير ميعرف شيسوي وجهه يتلاطم مال معزايات راح يموت بمكانه، صراحة خفت كلت خاف تجيله نوبة صرع وانوب اني اغيضه واضوجه بالزايد..

-استاذ نزلني هنا بلا امر عليك

-شنو ليش هنا بيتج؟

-اي هذا الشارع مالتنه

باوع للشارع وهز راسه راد يفوت وما خليته أصريت ينزلني على بُعد وچذبت من كلت..

-اخاف اهلي يشوفوك ويسوولي هوسة

هز راسه متفهم ونزلني، ودعته من لوحتله بيدي وسديت الباب قبل لا اسمع شگال، بقيت اباوعله وهو منتظرني ادخل للبيت حرت وياه شلون هسة..

-استاذ روح انتَ

فتح الجامة مالته وكال..

-انتظرج الى ان تطبين جوه

-لا استاذ حباب اكو كامرات هنا اخاف يشوفوك

-بيتج بعيد من الفرع؟

-لا لا هنا هو قريب

هز راسه وسد الجامة وانطلق، تأكدت ان ابتعد بالقدر الكافي ورحت اهرول على الشارع العام اخذت تكسي ودليته وين بيتي..

جذبت عليه ووهمته اني عايشة هنا مستحيل انطي الشارع الحقيقي هالشي يمكن ينكلب ضدي وراح يربط ويعرفني..

وصلت للبيت وانتبهت لـ نانا كاعدة على دچة الباب البرة غميت روحي واستعديت للرزالة..

-هلو نانا

-انتيييي وين؟؟؟؟

-نانا بس خليني افهمج شوفي صارت هوسة واضطريت اتأخر والله صدكيني

-اوووف مرايم اوووف الا يجي يوم تجلطيني

-نانا شبيچ ويايه انتِ الثانية شبيكم

-هم الج عين وتحجين امشي ولي جوه يله

-ليش كاعدة بره تعالي ويايه

-معليج روحي جوه

-راح اكعد انتظر وياچ

-مرريممم

عاطت بيه واخذتهه ركضة جوة البيت، سبحت وبدلت ونانا لسه ماكو اباوع للساعة راح تصير بـ 2 بالليل شعدهه بره مديت راسي من الشباك لاحظتهه على نفس گعدتهه..

رجعت لغرفتي بس بداخلي الوب قلقت عليهه شكلهه ما مرتاحة وملامحهه جانت حزينة السبب مو من تأخري لا گلبي يكول اكو شي ثاني..

كمت مرة الثانية اطلع ووكفت رجليه بالممر من سمعت صوت رجال غريب بالبيت، گلبي نبض بقوة ومديت راسي اشوف منو وجان انتبه هذا عمو محمد!

بقيت بمكاني ماريد اسلم يمكن اقاطع حديث خاص بيناتهم رجعت لغرفتي وطبكت الباب واجه ببالي ابوية ليش ماتصل بيه مو كال اني ادك عليج، نمت والتلفون بيدي منتظرة اتصاله ما كعدت الا نانا جرتني من رجليه وسحلتني للكاع..

-شلعتي گلبي مريم كوميي عندج دوااام

-نانا خمس دقايق والله

جرتني من كفشتي ياله كمت سحلتني للحمام وخلتني ابدل وهي وياي ماعرف شبيه اليوم خاملة كلش وتعبانة عضامي توجعني ومالي خلگ لشي..

-نانا: مو تتأخرين اليوم الاطلس راح يزورني

-مريم: شعنده جاي ابو ريحة يومية مسير علينه

-يشتاقلي هههه

-هه هه هه هه

وجع شبيچ

-متنرفزة منه شكد غثيث

مجاوبتني وسبقتني للمطبخ رحت وراهه شفتهه دتلفلي لفة وتصبلي چاي..

-مريم: نانا سمعت البارحة چان عدهم حفل وانتِ رحتي

بقت تصب الچاي مجاوبتني حسيتهه توترت بس اني هم متفاجأة منهه لان ما گلتلي اروح وياهه حتى لو بالجذب او مجاملة تحجيهه، چنهه قرت الي براسي لان رأساً كالت..

-نانا: تمنيت اخذج بس...

ذبت نفس قوي ما احتاجيت هواي حتى افتهم الاطلس اكيد الي ما رضى تجيبني..

-مريم: نانا اعرف الاطلس ميطيقني وهو الي ما قبل اروح

-والله حاولت يَـ بنتي گتله وياي وبيدي تبقين بس ماكو قفل

-ليش

-نانا: مادري شبي كلما جايله يعاند اكثر واكثر بموضوع زواجه

-ههه يمكن خايف افشله

-لااا مريم لا تحجين هذا الحجي على نفسج ما اقبل!

-نانا هاي الحقيقة لليوم ترن بأذاني كلماته بيوم عرسي وهو يكول عني بنت ليل وما اسوه قندرة من قنادره

-كافي مريم لا تأذين نفسج

-لا ممتأذية عادي طز بي ميهمني اني اعرف ربي ويايه وميعوفني ممحتاجة احد غيره اساساً

-ونعم بالله

عضيت من اللفة مالتي وهي وكفت تتأملني ابتسمت بوحهها بادلتني الابتسامة وكالت..

-نانا: البارحة صارت مشكلة جبيرة بالحفل

-مريم: شنو سببهه؟

-عدوهم من الشركة المنافسة اجه ويكولون متحارش بـ سارة اخت الاطلس

-عزه بعينه!

-اي والله ابو الاطلس تخربط ونقلو مستشفى بالليل والاطلس وولد عمته وخالته بقو بالقاعة للثنتين بالليل يتعاركون

-وتالي شصار بعدين؟؟

-نانا: لازمين فاهد مگطعي تگطع گوة جرو حمزة عنه راد يقتله خلاص لوما متدخل اخو الجبير مالك وكايل بعد ما يتدنون علينه ياله هدأت السالفة شوية

-مريم: مالك زين؟

-هو زين بس يبقى عدو والاطلس ما يحبه جانو ويه بعض بالمدرسة قبل ويكول من يومه حقير

-مريم: سارة وفاهد شصار وياهم تتوقعين سارة موافقة على تصرف فاهد؟

-مادري ما لحكت اشوفهه واحجي وياهه حمزة بنفسه جرهه واخذهه للبيت ورجع للقاعة واني اجيت هنا انتظرج خفت عليج ترجعين وتستاحشين

-سمعت صوت عمو محمد اجه هنا البارحة بالليل هاي وره ما طلعو من المستشفى؟

-اي

سكتت بعد ما حجت شي ردت اسأل عن سبب جيته بس استحيت..

-نانات اني اكول لو باقية هناك ومفتهمة شصار

-اليوم اروحلهم واحجي ويه سارة

هزيت راسي بستهه وطلعت من البيت ركبت تكسي وانطلقت للشركة، اول ما فتت استقبلتني عركة جديدة بوجهي بس هالمرة بسيطة وجانت بين الموظفين..

كالعادة صاحو لاستاذ حمزة اجه يحل الموضوع نهى السالفة وراح، عفية استاذ حمزة شكد مسكين هالرجال بكل عزه لطامه..

رحت لمكتبي وبديت بشغلي واشوف ريتاج تلوب رايحة وجاية ما كعدت سألتهه شبيچ ولهيب هم سألتهه بس متجاوب تركتهه براحتهه بس شكيت الموضوع متعلق بـ عمر وفعلاً ما خطأت..

-ريتاج: بنات مسيو عمر صارله كلش هواي ميجينه تعرفون السبب ليش؟

-لهيب: لا مادري

-ريتاج: معقولة مسيو الاطلس اله علاقة بالموضوع

-مريم: يعني تقصدين هو خلاه يبتعد عنه؟

-ريتاج: اي اي

-مريم: لا شنو السالفة

بعدنه دنسولف وشفنه عمر طل علينه، ثلاثتنه البنات ضحكنه وصراحة فرحنه بشوفته سبحان الله شكد شكله بي قبول..

-عمر: ها هاي شني شكو شو تضحكن يمصلبخات

-ريتاج: مسيوو عبالنه منشوفك بعد

-عمر: بس لا متت ومادري بروحي

-لهيب: هههه لا مسيو بس يكولون انقلت منا لغير شعبة

-عمر: لا ما انقلت بس لازم افلت منا فترة عدنه مشروع جديد واني المسؤول عنه

-مريم: ربي يوفقك استاذ

-عمر: شكراً مرايم، اي وهسة راح ارتاح وراسي يبرد لا اكو نسوان تحن براسي ولا مريم تنوح وتبجي

-مريم: استاذ شنو هاي اني يا يوم باچية

ضحك وكمل..

-عمر: متونس على هذا المشروع ادعولنه يتم على خير

-لهيب: متونس لان متشوف وجوهنه بعد موو مسيو مو بله كول كول احنه ستر وغطا

-عمر: بيني وبينجن اي وعلي فرحان ومكيف ومتونس

ضحكت لهيب بس ريتاج كلش مقهورة خطية اني دا اللاحظ تعلقهه بي وعيونهه عليه متوكع حتى من چنه نشتغل قبل عين على الشغل وعين عليه..

اثناء مداهر عمر ويه لهيب اجه مسلم ماتحملت وفطسنه ضحك كلنه من كال..

-مسلم: اييييي عمر تضيعه وتلگاه يم النساوين شنو خوية ذابين صرتك بحمام نسوااان انتَ

-عمر: اجه الحلو خير يا طير

-مسلم: سلامتك كبد بس المشروع شني چنك نسيته

-عمر: دخلينه نشبع من هاي الوجوه الحاته

-مسلم: ماكو وقت راح يجي عمي محمد ويسوك علينه

-عمر: خوش، ها بنات حانت لحظة الحقيقة لحظة الوداع

-لهيب: اوووي مسيو كلش راح نشتاقلك

-عمر: حتى اني بس بعد هاي الدنيا لازم نتطلك

-مريم: استاذ شكد يطول مشروعك؟

-عمر: ما معلوم والله

-ريتاج: مسيو مو متزورنه

-عمر: لا اجي لا تخافون

-مسلم: بنات كل شغلكم يتحول لـ اطلس أي مشكلة تواجهوهه أي سؤال عدكم ترحوله وهو راح يشرف عليكم لان اني هم ويه عمر بالمشروع ما اكدر افيدكم

-ريتاج: مسيو اطلس عصبي كلش نخاف منه

-مسلم: ميخالف ميخالف تحملن بس هالفترة

-مريم: الله يوفقكم

**

"رقية"
مر شهر ضبط سارة متطلع من البيت وكلما احد يفتح وياهه موضوع فاهد تنهار من البچي، الي عرفته وافتهمته ما سوالهه شي لكن حاول يتحارش بيهه وهي صدته وتلاحگلهه حمزة..

اما حمزة.. لا ماريد احجي عن حاله شنو صار انسان ثاني دائماً متوتر وقلق ويسأل عن سارة بشكل يومي حرص عليه اهتم بيهه ومافتح وياهه هذا الموضوع ابد خوفاً عليهه...

الفترة المضت الاطلس شبه استقر يمنه وصار اهتمامه بـ سارة مضاعف شكلهم خايفين من شي بس مدا اكدر اوصل لـ راس خيط..

-رقية: اسيل احس راح تصير مصيبة

-اسيل: يارب خير لا تكولين هيج رقية

-رقية: صدكيني بيتنه مخبوص صارله شهر لعد واحد حقير راد يعتدي على اختي ويأذيهه

بقت اسيل ساكته وطلعت من غرفتي، طلعت اتمشى بالبيت وصارت بوجهي غدير هستوهه طالعة من غرفة سارة..

-رقية: ها غدو ماكو تطور؟

-غدير: لا تعالي رقية اريد احاچيچ

رحنه نكعد بغرفتي وصدمتني من كالت..

-اني وحمزة راح ننفصل

-شنو!!!

-رقية بس اسمعيني ولا تهوبزين، اريد حمزة يتزوج سارة

-شنوووووو

-اششششش انلصمي وسمعيني زين اريدج انتِ تقربين حمزة من سارة وانتِ تبنين علاقتهم فهمتي لو لا!

-ولج شنو هذا خباال

-غدير: بسفرة راس السنة راح ترحون كلكم مثل كل سنة وهناك اريدج تبدين تكتيكاتج وسوالفج اريدهم راجعين وهمه مقتنعين ببعض ويرجعون مخطوبين فهمتيني لو لا

-رقية: خاف متأثرة بالمسلسلات التركية يبعد گلبي

-رقية!!

-اي والله هاي مادري بيا مسلسل صارت هاي الكلاوات الاخت تقنع زوجهه بأختهه الله شلون عنوان شيّق

-انچبي رقية ماكو مسلسلة هيج جاي احجي صدك اني!!

-شنو انتِ متغارينن على رجلچ اني معليه وشبت بضلوعي نار

-اسكتي لا تزيديهه عليه كافي

-غدير ايم سوري لكن هذا الخبال بعينهُ اني ما اتدخل باي

-غدير: والله افضحج واخزيج واروح لمسلم اگوله رقية ميته عليك

شهكت ودكيت صدري لا مستحيل هاي شدتسوي بروحهه وبيه..

-رقية: تساوميني غدير!!

-اي والله هسة اروح اكوله هو جوه كاعد

-لا مستحيل انتِ مو طبيعية اني ماريد اتدخل بهيج مواضيع مال مخابيل غدير بشرفج عتقيني ماااريد اني ماااريد

-غصباً عليج تسويهه والله اروح هسة احجي ويه مسلم واطلع كل خياسج

عقلي وگف هاي اختي عبرت مرحلة الجنون..

-رقية: كافي غدير حبابة لا تضغطين عليه اصلاً سارة تعرفيهه متقبل بحمزة شلون تقبل برجل اختها شلوون

-معليج سارة عليه بس اريدج تأثرين على حمزة

-رقية: خوش اثرت عليه وبعدين؟؟ تتوقعين ابوية يقبل يزوجهم ولج العالم شتكول علينه!!

-معليج كلشي اتركي عليه بس قربيهم من بعض حتى لو تدخليهم غرفة وتقفلين الباب عليهم عوفيهم سوه

-عزه عزه والله العظيم شفت هالشي بمسلسل تركي

-رقية!! بطلي هالسخافة وسوي الكتلج عليه غبية هالشي راح يساعدج تتقربين من مسلم همات

-لا ماريد اذا اتقرب منه بهيج سوالف ماريد شنو اذب روحي على الرجال!

-لا اني احجي وياه شبيچ والله واقنعه ينتبهلج وهاي السفرة استغليهه وانفردو ويه بعض

-حتى امي تعزيني ولج شنو من اخت انتِ

-طاحظج غبرة متفتهمين انتو وحدكم لا من شاف ولا من درى اني مجاي اكلج سويلج مكسورة بس تقربو من بعض وابنو علاقتكم

ماتحملت عقلي كام يوجعني غدير وضعهه صعب راح تجرنه كلنه للتهلكة انفصالهه من حمزة راح يدمرهه بالزايد واني اكول شبيهم متوترة علاقتهم وهي بايته يمنه صارلهه شكد.. واكيد ماكدر افتح حلكي واكول لاحد لا تنتقم مني بطريقتهه المسمومة..

**

الفترة المشت كل شغلنه عند الاطلس چان الشغل ماشي بسلاسة وكلشي تمام.. تفاجأنه بهدوئه وصبره ماتوقعناه هيج باله طويل يعوف الي بيده ويكعد يعلمنه خطوة خطوة..

خصوصاً اني ولهيب كل چفصة نچفصهه اكبر من روسنه ويكعد ويانه ويعيد الشغل من جديد بدون ملل صراحة اوقات اني اجزع من روحي بس هو يلاقي كل الامور بهدوء وسكوت..

-ريتاج: تدرون بنات صارلنه شهر نشتغل ويه مسيو اطلس والشغل حلو وماشي تمام ماتوقعت المسيو هيج مسيطر

-مريم: استاذ عمر كال الاطلس عبقري بشغله خصوصاً بالحسابات

بقينه نسولف ونتمشى ورحنه نكعد بالكافتيريا ناكل، تينا وضحى مجازات اليوم وقضيت بقية الوقت ويه ريتاج، مر شهر على الحفل وعقلي لسه ويه سارة نانا اكدتلي سارة ماعدهه علاقة بـ فاهد وهو الي حاول يتجاوز حدوده بس احس اكو حلقة ناقصة..

رجعنه للمكتب لگيت الاطلس كاعد على الكرسي مالتي ويدقق فايل، مانتبه لوجودنه واحنه ما سوينه صوت كعدت يم ريتاج ونززني من كال..

-تعالي مريم كعدي بصفي

-مريم: هاا لا استاذ اني مرتاحة هنا

رفع عيونه عليه واشر براسه..

-تعالي

كمت وتقربت من عنده سحبت كرسي وحطيته بجانبه بيناتنه مجال يكفي كرسي، انتبه على المجال البيناتنه ضحك وفر بيده..

-الاطلس: مريم هذا الشغل غلط

-مريم: ليش استاذ انتَ مو كلت هيج سووا

-اي اني غلطت مادري دايخ اسف اخذت من وقتج

-لا عادي هسة اعدل عليه بس علمني

بده يعلمني واني استمعله حسيت بي يقرب كرسيه عليه غلست وكملت وياه، قربه اكثر صار كلش قريب عليه بعدت كرسيي عنه وهو يشرح ومندمج وره فترة رجع تقرب عليه..

ادري هو ما متعمد بهذا التصرف الكرسي الكاعد عليه بي چروخ وياخذه الواهس بس شنو مدا يشوفني ابتعد عنه..

-ريتاج: مسيو يصير نطلع للبيت خلص وقت الدوام

-اي تفضلو

كمت اريد اروح وصاحني كال نكمل هذا ونطلع سوه، رجعت اكعد بمكاني بقينه وحدنه بالمكتب فترة طويلة كلش توترت وگلبي ينبض بسرعة وقوة سحبت كرسيي عنه اكثر راح انلزگ بالحايط ماكو مفر بعد..

-الاطلس: مريم شبيچ

-هاا

-ليش تشردين؟

-اشرد شنو.. ليش اشرد منك ما شاردة اني

-جيد تعالي نكمل

-استاذ يصير باجر نكمل فدوة

-ليش تعبتي؟

-لا.. بس يعني باجر احسن

-لا خلينه نكمل

سكتت بدون تعليق، تچه ظهره على الكرسي وداره صار ظهر الكرسي عليه لزگ بيه لزگ حسيته بحضني حط رجل على رجل وكال بهدوئه المعتاد..

-مريم

-هاا.. ها استاذ

-شبيچ ترجفين

-وين راجفة

دار وجهه عليه من قربنه انفاسه توصلني ولعت يووه شبيك انتَ مهيلگ، احس ديتعمد يغثني بتصرفاته لان شكله مستمتع بس ليش هالحقارة هو مو يعرفني ملتزمة ليش يجبرني اطلع من طوري!

درت وجهي عنه وسويت روحي ملتهية بالفايل بس داخلي يحمس من العصبية..

-الاطلس: نكمل باجر يله

اوووف اخيراً حس كام من الكرسي واني طفرت من مكاني اخذت جنطتي وطلعت اهرول للمصعد ركبنه سوه ودگات گلبي يسمعهه الاطرش صرت اعصر بجنطتي وحاضنتهه لصدري حيل..

-شكد عمرج مريم

قاطع افكاري السوداوية سؤاله، باوعت لظهره وجاوبت..

-1/1 اصير 25 سنة

-اممم

-ليش تسأل استاذ

-فضول

اللتزمت الصمت ونزلنه من المصعد بقيت اتمشى وراه وسمعته يكول بصوت ناصي..

-ما مبين عليج 25

-قصدك شكلي مال اكبر؟

-اصغر

-هاا اي يمكن لان ناعمة

-حتى عقلج مال اصغر

عقچت وجهي ضايجة اشايف روحه هذا، كمت اسحل بحذائي وامشي گوة من الضوجة كلش حزت بخاطري حچايته وعصبتني راح انفجر شنو يعني اني زعطوطة!

وكفت من انتبهتله اندار عليه وحط ايده بجيبوبه وزع نظراته بوجهي وگال..

-خاني التعبير جنت اقصد تصرفاتج مال اصغر

-نفس الشي بكل الاحوال دتستهزأ بيه!

-لا ابد العفو ماقصد هيج

-واضح قصدك استاذ

تركته ومشيت سريع انتبهت عليه يسرع خطواته ويحچي..

-الاطلس: آنسة مريم ليش تحبين تتعاركين

-لان بس عوزك تكول عني زعطوطة بعد

-مريم لا تگوليني حچي افتهمي الكلام عدل تالي علقي

-يله فهمني

-تصرفاتج طفولية وهالشي حلو ماقصد اسيء الج، هواي يتصرفون بطفولية متصنعة ويمثلون هذا المو حلو

-يعني اني متصنعة!!

-ياااابة انتِ مو متصنعة انتِ حقيقية وطبيعية تتصرفين على فطاريتج وبرائتج

-هاا

-افتهمي الحجي مريم لا تعذبيني

-استاذ انتَ تجيبهه لروحك هسك ضروري تكول عن عقلي طفولي

ضحك وهز براسه، كمل بصوت جازع..

-والله صح اني اجيبهه لروحي

-بس شكراً على اطرائك لطيف كلش

ضميت حلگي واجتني نوبة ضحك مثل المخابيل وهو يباوعلي ومبتسم اشر على ايدي الي مكممة بيهه حلگي وكال..

-اتعمد اتغابى حتى اشوفج تضحكين

بقيت اضحك خجلانة من تصرفي الى ان قاطع ضحكاتي المكتومة دخول اخر شخص اتمنى اشوفه، اجت نورسين!!

-نورسين: بونسوااار

-الاطلس: بونسوارين هلا شلونچ

-نورسين: من شفتك صرت بخير

حچتهه بمياااعةة تلعب الروح تقربت من عنده وكالت وهي تتلمس دگمة السترة مالته..

-نورسين: صارلك هواي كاطع منتشاوف

تحمحم وعدل وگفته دگم السترة مالته وكال برزانة..

-شغل والله تعرفين ابوي يريد كلشي مضبوط ومرتب

-اممم صح زين شنو رأيك نطلع نتونس اليوم

-مريم: حمحم احمممم!!

-نورسين: ااه باردون مانتبهت لوجودج مريم شلونچ حبي

-مريم: اني زينة حبي بس حقج متنتبهين ما شاء الله موووسيوو اطلس ساد عني الشاشة بضخامته

-نورسين: اي ههه هوتي (hottie) مو بيده

رجعت تضحك بمياعة وعيونهه كلش صلفة لاحظت هالشي تنظرله بنظرات شهوانية مادري يمكن لان اني اكرهه هيج اشوف لو صدك هي هيج ادبسز؟

طلع الاطلس جكارة وشعلهه حطهه بحلگة، باوعلي وغمض عيونه يمكن تذكرني اتحسس هستوه ديجرهه من حلگه يمكن يريد يطفيهه واخذتهه من حلگه نورسين..

ضحكت ضحكة لعوبة وسحبت منهه نفس وذبته بوجهه، ابتعدت عنهم متقززة من تصرفاتهه وخفت اختنك..

ابتسم الاطلس واخذهه منهه عارضت وبرطمت شفايفهه بس همسلهه بشي ماسمعته.. طفاهه وذبهه بالباكيت..

-الاطلس: يله احنه طالعين تحبين اوصلج بطريقي نورسين؟

عقچت وجهها وذبت نفس يمكن ماتوقعت منه هالجملة..

-نورسين: شعجب اليوم طالع من وكت كل مرة للعشرة انتَ هنا

اممممم واني اكول ماشوفهه تجي الصبح الظاهر من يطلعون الموظفين صايرة تجي وتبقى وياه للعشرة..

-الاطلس: تعبت كلش اليوم احتاج ارتاح

-اي تعال

شهكت بگلبي ياا رعنة!! هاي منتبهه على روحهه وعلى كلامهه لو بس اني الي دا انتبه؟؟

-الاطلس: صدكيني ماكدر اذا تحبين نلتقي غير وقت

طنكرت وصارت تململ بمكانهه، دگمت قميصهه المفتوح وكالت بضوجة..

-عود نشوف

-مريم: من رخصتكم

-نورسين: اي حبي الله وياچ

عفتهم واكفين وكملت طريقي لبوابة الشركة ماكو ثواني وصارو يمشون وراية واسمع نورسين تتحلطم..

طلعنه من البوابة وطلعو ويانه موظفين ثنين الظاهر متعاقبين فوك دوامهم، تمشيت شوية عن الباب وانتبهت لشي مشمور من الجهة الثانية..

انداريت على اطلس الملتهي يراضي نورسين وصحت..

-استاذ هذاك شنو؟

دار وجهه يشوف شكو وعكد حاجبه دليل على جهله بالموضوع، تقدم هو وياهه يشوفون شنو رحت وراهم بوسط الظلام بس اضوية قليلة متناثرة جاية من الشركة منوره المنطقة..

-مريم: استاذ لتتقرب خاف شي خطير

-اوگفن هنا بنات

-نورسين: انتبه بيبي

باوعتلهه هاي شبيهه رعنة اموت من هيج بنات مهيلكات..

تقدم بخطوات ثابته على الشي المشمور عبارة عن شي طويل مغطي بقطعة قماش سودة، تقرب عليه اكثر ونزل على ركباته، كشف عن هذا الشي اجتله ردة فعل لا ارادية وانتفض من مكانه وهو كاش على ملامح وجهه..

-نورسين: اطلس شنو الموضوع شبيك؟؟

رجع كعد بدون لا يجاوبهه وصار يتفحص المكان بدون لا يلمس شي، تقدمت اشوف شنو ونورسين هم اجت ويايه وثنينه شهگنه مرعوبات من المنظر..

-مريم: عزززه هذا شنوو

گام من مكانه ووجهه بي الف سؤال تسائلت مرة ثانية ياله جاوبني..

-الاطلس: چلب حراسة ميت

-مريم: لعد ليش هنا مشمور ومنو مغطي؟؟

-الاطلس: معذبي وشامري هنا

-نورسين: ليش؟؟؟

مجاوب بقى يباوع لجثة الكلب ويتنفس سريع ردت اتقرب اشوف وجرني من ايدي وگال ناهيني..

-الاطلس: لا تتقربين مريم

-نورسين: مريم ابتعدي يمكن يكون بي مواد سامة تأذيج

-مريم: استاذ تتوقع مقصود هالشي يمكن تهديد هذا؟؟؟

-لا

حچاهه ببساطة  وابتعد كم خطوة حسيته ديچذب او يمكن ميريدني احجي كدام موظفين الشركة ويطش الخبر..

سوه اتصال وبلغ عن الموضوع وتعداني ووياه نورسين، بقيت بمكاني بدون لا اتحرك بينما هو ابتعد مسافة عني، من انتبه اني مو وراه رجع يباوع لأتجاهي وصاحني..

-الاطلس: امشي مريم

-اي استاذ

-الاطلس: وين رايحة؟

-للبيت

-تاخذين تكسي؟

-اي

-تعالي وياي

-نورسين: اذا بيتج على الطريق احنه ناخذج

-مريم: لا شكراً ميحتاج

مانطيته مجال يحجي فوراً اخذت تكسي وانطلقت للبيت جسمي يكش كلما أتذكر شكل الكلب معدتي تكوم تكلب، الطريق كله بالي وياهم واحترك ماعرف هذا شعور غيرة لو حقد لو قهر ماعرف بس شعور حطمني وأذاني..

وصلت للبيت فتحت الباب ودخلت شمرت الجنطة مالتي على الكشوانية ودخلت للصالة، عيوني شخصت من الشفتهه كدام عيني..

-غدير!!

كاعدة على القنفة رجل على رجل متأنقة بلبس فخم ميناسب هيج زيارات، كدامهه فنجان قهوة ونانا كاعدة على بُعد منهه..

-غدير: اخيراً نورتي

-مريم: مادري بيج جاية يمنه

-نانا: تأخرتي مريم

-مريم: اي والله عذريني بس المدير احتاج شغل مني

-غدير: اوووه حلو راد شغل وشنو نوع هذا الشغل بلا زحمة

تنرفزت من اسلوبهه مليان تشكيك وظنون مقرفة..

-مريم: تخص الحسابات بقينه اني وصديقتي بالمكتب نشتغل

-غدير: امم، صايرة امرأة عاملة وكذا

-مريم: اي طبعاً خوما ترديني احط ايدي على خدي وانتظر الاطلس يحن عليه

تباوعلي بأستصغار واستهزاء كلش انقهرت من نظراتهه هاي شبيهه شايفة العالم جوه رجليهه..

-غدير: مغيرة ستايلج

-اي

-نانا: مرايم روحي بدلي حتى تتعشين امي

-غدير: لا اوكفي اجيت انطيج هذا

كامت على حيلهه وتقدمت مني حطت ظرف بيدي وكالت وهي تحرك بأصابعهه المصبغة..

-غدير: هاي فلوس ابوية كال خاف محتاجة لو تريد تدز لاهلهه

-شكراً ما محتاجة

انطيتهه الظرف ضحكت وكالت..

-حبي عوفي سوالف عزة النفس على صفحة واخذي الظرف يفيدج احسن مما تبقين لنصاص الليالي مادري شنو تشتغلين

-مريم: غدير اخذي الظرف ماريده

نترته من ايدي عليهه باوعتلي وكالت بوجه متقزز..

-غدير: بيئة، حقك اطلس متعجبك

-نانا: غديرر شبيچ مو عيب!

-مريم: عوفيهه نانا هي مبينه اجت تسممنه بحچاية وتطلع خليهه تحجيهه لا تتسمم بيهه وتموت واحنه النبتلي

-غدير: هااا ولسان هم، هههه حلو خوش مواصفات جامعة بيئة ومبهذلة ولسان طويل ينرادله گص

-مريم: على الاقل محترمة نفسي وكافية خيري شري عنكم

-غدير: اي واضح واضح كاعدة ببيت اخوية متأملة يفوتلج للغرفة بيوم

-مريم: احتررمي نفسجج فهمتي لو لااا اكسر رجليه اليفوت عليه للغرفة اني باقية بس حتى اخوج مينطررد من رحمة ابوه وينحرم من الورث يعني اني المتفضلة عليه مو هو

-غدير: كلش مصدكة نفسج انتِ

-نانا: غدير رجاءً هذا البيت محترم وما اسمحلج تحجين ويه چنتي بهاي الطريقة

-غدير: هههههههههه چنتچ؟ والله ومصدكة روحهه بلقيس ومتخيلة الاطلس ابنهه

-مريم: لا عزيزتي هو متخيلهه امه ويموت على التراب التمشي عليهه

-غدير: ديلا يلا ضحكو على رواحكم، شو دوخري خليني افوت

تحرك بيدهه بالهوا حتى افسح عنهه المجال، ابتعدت روحي شايطة ردت احجي زايد ونانا لزمتني وهمست بأذني..

-لا تحجين شي بعد

احتراماً لـ نانا سكتت مهما يكون هي تشتغل عدهم وخاف يأذوهه لو يطردوهه، طلعت المسمومة غدير وبقيت احوم واللوب بداخلي نار ما طفت بداهه الاطلس وكبرتهه غدير..

دخلت لغرفتي ونزعت ملابسي وبقيت ادور حول نفسي وافكر شلون ارجع كرامتي كدامهم واضح الكل مفتهم الاطلس عود متصدق عليه ومكعدني ببيته اخخ يا نار گلبي!!

بقيت بين الحيرة والحسرة لوقت متأخر بالليل عيني ما غمضت ولا هدالي بال من وره السمعته لازم اللگه حل وبسرعة هم، اريد اخلص من الوضع تعبت وكرهت عيشتي..

رحت اسبح وراسي مشتعل بالافكار، طلعت من الحمام لفلفت روحي بالبرنص وذبيت الخاولي على راسي، بطني مغصتني تذكرت ما متعشية كلت اروح اشوف شنو نانا مسويتلنه اكل..

اخذت موبايلي وياي وعلكت قران هو الوحيد الي يريحني من اكون منهارة، عليته وحطيته على الكاونتر ووكفت احمي الاكل وفجأة يبست عظامي من اسمعلكم صوته بالصالة!!

-نانا؟ وينج نااناا

وكفت بمكاني ماعرف شسوي وين اروح وين انطي وجهي، ماكدر اطلع من المطبخ اكيد نلتقي بالطلعة صوته جاي من الصالة.. بقيت بمكاني اللطم بصمت الى ان صار صوته يقترب من المطبخ..

-نانا وينج گلبي

غمضت عيوني واني على وگفتي هذا هو انفضحتي يمريم راحت عليج عرفج الاطلس........

يتبع ♠️💸.......

• ━━━━━━❪♣❫━━━━━━ •

التوتر مليووووون 😬😆↖️↖️↖️↖️

التعليق الكم ماعندي شي اگوله 🥲
بس سؤالي الكم تتوقعون لو يعرفهه الاطلس هسة افضل لو بعد مرور وقت اكثر؟

لتنسون التصووويت 🥹💚 وهذا حسابي الانستا حياتي 💕🍃