رواية الاطلس "دمليج أسود" الفصل التاسع عشر 19 - بقلم 𝐙 𝐇 𝐑 𝐀

#الاطلس "دمليج أسود"

بقلمي: زهراء السلامي 💛

لتنسون التصويت + التعليق بين الفقرات + متابعة لحسابي 🌼.

مازلت أندهش عند رؤيتكِ
رغم مجيئكِ ألف مرّة 🤍

• ━━━━━━❪♣❫━━━━━━ •

-اسيل: واللهي متزوجة واللهي بالحلال بالحلااال

-نانا: شلوون شلللون بالحلاال حاااملل انتِ حاامل اسيييل

تحجي وتضرب على رجليهه وعلى راسهه، اسيل تبجي بحرگة ولازمة بطنهه تتلوى وتعض بشفتهه..

-اسيل: واللهي حلال

-نانا: منوووو الحلال منووو منو زوجك!!

غطت وجهها بيدهه وصرخت من البجي تشهك وتحجي ممفهوم كلامهه اخيراً كالت..

-مسلم

نانا تخبلت صارت انسانة ثانية لزمت اسيل تهز بيهه حيل وتعيط عليهه، ماتحملت المنظر اسيل وجهها لونه اصفر وباهت خفت عليهه رحت عليهن اركض اجرهن عن بعض ونانا تعيط بيهه بالعراقي..

-ضحككك عليج وااخذذذج يا غببرة ولللج لللييش لييشش شنو عااايزج

-اسيل ببكاء: احبو

-نانا: حبتكك حييية ان شاء الله اخخ يااا گلبيي عدتي الززمن بينه اسييييل

تعيط وتفتح بصدرهه تصرخ وتملخ بروحهه واسيل منتهية من العويل، ماعرفت بيمن احير هاي البنية راح تغيب عن الوعي ونانا متخبلة شديصير!!

-نانا: اخذذج غصببب لو برضااتج؟؟ حاجينييي حاجينيي

-والله برضاي والله

اهتز گلبي على بچي نانا حرگت روحي بنحيبهه تبجي وتلطم عجزت اهدأهه وما سكتت الا من اسيل همست بتعب..

-جاي انزف

-نانا: شنو

-مريم: تنزفين يعني تسقطين؟؟؟

هزت راسهه اي وكالت بگبلب ملچوم..

-اسيل: تعبانة

-نانا: كومي كوميي بسررعة عسى يطيح ونخلص كوومي

كومتهه واني ساعدتهه مجرد وكفت وكعت عليه رايحة روحهه..

-مريم: نانا نحتاج احد يساعدنه

-نانا: لا لاا ما ننفضحح لااا اني اشيلهه

-اسيل: اطلس

-نانا: لااااااا لااااااا تكسرين وجهي كداامهمم بيااا عين اوااجهه

-اسيل: اطلس يدري

همستهه بتعب، فكينه عيونه ممصدكين اسيل بين الصاحية والغشيانة دكت نانا على خدودهه تصحيهه وتحجي مفرفحة..

-يدرري شنوو بشنوووو

-مريم: يدرري بيج حامل؟؟؟

-اسيل: يدري متزوجة لگفنه مرة

كعدت نانا على ركبهه تدك وتلطم تبجييي وتملخ بقميصهه وتعيط بعلو صوتهه شكلهه يكسر الروح غطت وجهها وتولول بمكانهه..

عين عليهه وعين على اسيل صحت بيهن يرجعن لوعيهن حتى ناخذ اسيل للمستشفى كامت نانا رفعت اسيل وشالتهه شيول وتحجي بلوعة..

-شناقصچ وتتزوجين هيج زواجه ليييش كسرتي نفسجج ليييش

-مريم: حبابة مو وكتهه خلينه ناخذهه للمستشفى هسة

-نانا: ابقي هنا مريم لا تجين

-لا لا شلون

-ابقققي

عاطت بوجهي خفت منهه وبقيت بالبيت وهنه طلعت للمستشفى، روحي تلوب افتر بالصالة وافرك بأيديه ياربي شنو هالورطة خاف مسلم ميعترف بالطفل واسيل تنفضح يارب يارب كون وياهه..

اثناء دوراني حول نفسي سمعت صوت موبايلي يدك بالجنطة، طلعته اشوف منو وجان المتصل "طوطي" هدأت نفسي وبلعت ريك جاوبته..

-الو

-ها عيني وينج؟

-بالبيت

-اممم

-ليش تسأل شبيك استاذ؟

-خفت ترحين تشوفين ملوكة

-لا مو كتلك امي متقبل

-جيد

-اي، استاذ امي دتصيحلي اسفة لازم اروح

-اخذي راحتج

سديته منه بسرعة خفت يحس على توتري وتوقعت نانا راح تتصل بي وتحجيله على موضوع اسيل اي اي اكيد تحجيله مو؟..

**

"رقية"
روحي راح تطلع بيدي الموبايل يرجف صارلي اكثر من اسبوعين حاطته على گلبي خايفة ومرعوبة، اخيراً رن ركض وطلعت من الغرفة اتسحب الساعة 9:30 يعني الكل بغرفته، نزلت على كيفي ادور عليه بعيوني وصلت لنهاية الدرج وهو ماكو..

رحت ادوره وصلت للمخزن ونزيت من همس..

-ها وينه

-رقية: يمة رااح اموووت خرعتني

-حمزة: اسف رقاوي، هاا وينه التسجيل؟

انطيته موبايلي بأيدين ترعش داخلي يهتز شنو هالمجازفة السويتهه..

-حمزاوي فدوة ميصير غدير تعرف اني سجلت كلامهن

-معليج محد راح يعرف، انتِ سمعتي التسجيل؟

-لا هو سويت نفس ما كلت عفت موبايلي بالباب وطلعت

-حمزة: ما سمعتي رقية؟ هاي صار اسبوعين معقولة ما سمعتي؟

يحجي يشكك بيه ضجت وزفرت بصوت..

-والله العظيم ما سمعته انتَ مو حلفتني

-اي كفو عليج حبيبتي رقاوي

-اخاف حمزة تهددنه غدير تأذينه

-معليج يمي السالفة يله روحي ارتاحي

هزيت راسي ورحت اريد اصعد وفزيت على صوت غدير حرت وين اروح ظليت اكمز بمكاني باوعت للمخزن وطفرت بي وسديت الباب عليه..

-غدير: هاي حمزة هنا هلو حبيبي

-حمزة: هلا

-غدير: اني اسفة على الصار قبل فترة وانصدمت لان ضربتني هذا مو اسلوبك

-اعتذر منج حقج عليه بس ماحب من تقللين من خواتج

-اي صح حقك اني بس لان جنت معصبة منهه هسة رجعنه حبايب

-اكيد حبايب انتو خوات

-اي، وين سافرت هالفترة اختفيت؟

-سفرة عمل عندي جانت

-ها.. احم  حمزة

-نعم

-تعال شوية خليني احضنك

حجتهه بصوت خجلانة اكدر اشوفهم من الباب مشطبة وبيهه فتحات اهووو خاف يصير موقف فاسق ويأثر على نظري..

تقدم عليهه حضنته حيييل اني اختنكت هاي شبيهه اختي، ياا ياا شكد فشلة خية تره انتو مطلكين..

-حمزة: احم يله اروح اني

ما خلته لطشته تتحارش بيه خرب هاي اختي متتحمل بعد گوة دفعهه عنه يمسح بلحيته ويعدل ملابسه..

-غدير احنه تطلگنه لو نسيتي؟

-اي بس بالعدة اني بعدني يعني عادي ههههههه

-يعني حابه نرجع سوه

-اتمنى

-يله تعالي

جرهه من ايدهه وياه ماقبلت بقت واكفة انطتني ظهرهه ماشوف ملامحهه..

-ماكدر حمزة روح الله وياك

هز راسه وطلع من البيت بقيت محصورة بالمخزن ميته من الخنگة لما يقارب ساعة لان غدير خاتون عجبهه تكعد بالصالة..

**

كعدت اللوب انتظرهم يرجعون كل شوية امد راسي من الشباك اشوف ماكو طولو، عبرت الساعة 11 بالليل وهمه ماكو اتصلت على نانا كم مرة ترفضه بدون لتجاوب قلقت حيل..

اخيراً سمعت صوت خرخشة المفاتيح كمت بسرعة اتلكاهم بس خايلي جسم ضخم كأن رجال وياهم ركض ركض رحت للممر الي يفصل غرفتي عن الصالة ومديت بس عيوني وجان اتفاجئ!

عمر دخل وبيده اسيل شايلهه لصدره وهي مكمشة برقبته ومغمضة عيونهه ونانا وراهم تمشي، اباوع لعمر عيونه دمم والوجه احمر ممرود مرد حطيت ايدي على گلبي متألمة من منظره اكيد عرف بيهه حامل..

-نانا: تسلم عمر تعبناك

-عمر: وين اوديهه؟

يحجي بجمود اشرت نانا على غرفتهه واخذهه هناك، شوية وطلع وكف بالصالة وذب نفس..

-بلقيس محتاجين شي؟

-نانا: لا سلامتك

-راح ابقى هنا شوية خاف تتعب

سكتت نانا وترخصت منه راحت لغرفتهه ويه اسيل وعمر اخذله مقعد على القنفة، يفرك بوجهه حيل ويعصر عيونه يذب نفس وايده ترجف ما ثبتت..

ضميت روحي اكثر ماريده ينتبهلي كعدت بالكاع اباوعله گلبي تعلگ ويه دموعه النزلت وذب نفس يهدأ روحه ويحرك برجله، عض شفته ودموعه تنهمر من عيونه عجيب شكد مكسور..

جر كلاص مي موجود على الطاولة شربه كله صكة وحدة ورجع يحرك برجله سريع، كور قبضة ايده وعض عليهه ويبجي بقهر ووجع گلبي انعصر ماتحملت دموعي خانوني كممت حلگي امنع شهگتي وعيوني عليه دموعه سيل على خده ما وگفو كل دمعة تنزل اكبر من الثانية محملة حزن وهموم..

مسحت عيوني من دگ موبايله باوع للشاشة وبلع ريك جاوب بهدوء..

-ها علاوي.. لا اني ببيت اطلس.. اي بيته مو بيت اهله.. لا ماكو شي.. تجي؟ لا شعندك لا تجي.. جايك اني.. لا تجي اني اجيك.. خلص براحتك

سده وذب الموبايل على الطاولة نزع جاكيته وذبه بجانبه اخذ كلينس كومة ومسح وجهه ومسح على لحيته عيونه جمرات الوجه ذبلان والحال تعبان الله يساعد گلبك عمر..

لدقائق تسائلت بيني وبين نفسي ليش عمر هنا وشلون عرف بأسيل؟ ليش ما اتصلت نانا بمسلم هو مو زوجهه مو اولى يجي ليش استعانت بصديقه؟!

بقيت بين الحسرة والونة موبايلي بيدي مسويته صامت وريتاج تدزلي رسائل عن الشغل تركتهه ما اجاوب حضنت رجليه لصدري وعيوني معلگة على عمر الي ما بطل بچي اكتافه تهتز وكلما يصفن يمسح دموعه ويهز براسه هادئ ويرجع يبجي مرة ثانية..

اندكت باب البيت كام يفتح عمر ونانا طلعت تشوف منو فزت من شافته علي دخل سلمت عليه وترخصت منهم ترجع لغرفتهه، خفت من ظل علي يدور عيونه بالبيت خفت يلمحني بس الحمد لله كعد بجانب عمر على القنفة..

-علي: شبيك عمير

-مابيه شي

-شبيهه عيونك ولك شبييك

-صوتك علي مرت اطلس هنا مابيه شي

-وينهه؟

-تكول بلقيس بالغرفة نايمة

-هاا

سكتو شوية وعلي يلوب عيونه تاكل بعمر ويحمس بروحه اخيراً ماتحمل لزمه من متنه وداره عليه..

-شبيك منو وياك حاچيني

-ماكو شي عليوي لا تلح

-شعندك هنا شنو المناسبة جاي اطلس هنا؟

-لا بلقيس جانت بالمستشفى واتصلت بيه اروحلهم

-تروحلهم؟؟ منو اكو احد متأذي؟؟ شصاير احجي

-اسيل

اختنك بأسمهه وضم وجهه بين ايده يشهك ويعض على ايده ميريد يطلع صوته، علي تخبل لزمه يهز بي حيل عيونه طالعة راح يوكف گلبه على اخو..

-شبييهه ولك شبيهه شصاااير

-اسيل حامل ولك عليي حاامل اااخ يا نار گلبيي

فتح عيونه علي مصدوم اخذله صفنة طويلة ياله نطق..

-شنو حامل شنو منين تحمل شنوو صار شي بيناتكم عمرر احجيي

-لا لا

-چا منين تحملل منيين انتَ مو حبيبهه!!

-منين صررت نعاال حبيب اني احبهه هي ماتدري بيه

يحجي بنتر هامس علي تخبل لزمه من خوانيگه وينتر بوجهه..

-چا منين ولك مننين

-مسلم

جمد على وضعه وعمر ساكت ويباوع بعيون اخو دفعه علي من صدره وكال بقهر..

-علي: شلون يخونك هيج يطعن بصااحبه الچلبب

-مايعرف كلشي ما يعرف الغلط مني عليي اني دفنت مشاعري وما ظهرتهه الوادم تشم گفه ايدهه

-وعااف بنات الناس كلهه وحط عينه على التعشگهه!!

-لو يدري بيه هو يكول نفس الحجي عفت بنات الناس كلهه وحطيت عيني على مرته!!

-مرته!؟

-متزوجين علي ولك متزوجين

ضرب على رجله حيل وذب حسرة شگت روحه عصر عيونه وعلي كعد بجانبه يجر بوجه اخو وهذاك رايحة روحه..

-عمر ما تستاهلك وعلي ما تستاهل خلي مسلم يفيدهه عساهم لا تهنو

-لا تدعي عليهم لا تدعيي ولك صاحبنه هذا

-مادري شجاي امسلت ياربي شنو هالقهر

-كافي علي گلبي خلص

كعد علي شكد يصبر بي ويغلط على مسلم ويحجي عنه ويكول شهرين ميبقون سوه وعمر ساكت ميحجي شي وهذاك يفزع لاخو وما ملحك..

-عمير جاوبني ولك لا تظل ساكت

-شسولف خوية خليهه بالگلب تجرح ولا تطلع برا وتفضح

-حاجيني اني اخوك ولك ابجي احجي لا تسكت

ميقبل ينهار كدامه صامد وساكت حابس دموعه..

-علي: عمر تحبهه صارلك سنين وما ترضى تعترف تخاف عليهه زين هسة من خذاهه غيرك شكد كتلك سولف انطقق اعترف ياخي تستحي تحاجيهه كتلك اني اروح احاجيهه اگللهه اخوي يحبج ويشهك بأسمج ولك ليش سكتت ليشش

-ااااخخخ گلبي ولك شلعت گلبيي من مكانه كاافي راحت رووحيي عليووي

كالهه وانفجر يبجي وعلي حضنه حيل جسمهم يهتز كامو يبجون سوه علي يضرب على ظهر عمر بقسوة ويلوم بي وهذاك منهار مينفهم كلامه بس صوته يقطر ندم..

كل هذا واني عيني على الباب بأي ثانية تطلع نانا ليش تأخرت اكيد وصلهم الصوت بله يمكن اسيل نايمة متسمع نانا ليش ما اجت؟؟

كمت اعوفهم ورجعت للغرفة اشهك وحدي وابجي على حاله وحالي نمت على فراشي عيوني ما ضاگت طعم النوم هاي الليلة فرحت باجر جمعة عطلة على الاقل ارتاح شوية..

بين النايمة والكاعدة انفتحت باب غرفتي فتحت عيوني اشوف منو واذا اللگاهه نانا اجت جابت مخدتهه ونامت بجانبي على السرير..

-شلونهه اسيل؟

-زينة

-شبيچ ناناتي

وكأن جانت منتظرة احد يسألهه عن حالهه بجت بجي بيضت عيونهه تلطم على رجلهه والدموع تجر من عيونهه..

-اااخخخ اسيل اااخخ

-نانا الصار صار ميفيد الندم والله ميفيد

-نانا: بس اتصلت بي فزز واجانه شهك من كتله اسيل تعبانة وبالمستشفى اجه يركض ركض مثل المجنون يدورهه

-منو؟

-نانا: عمر.. عمر يحب اسيل وسولفلي عن حبه ما رضيت گتله خليهه هي تقرر بس لا تگلهه هسة بعدهه صغيرة

-يعني راد يخطبهه؟

-اي.. راد يخطبهه شفتي الغبرة شفتيي ضيعت شلون واحد فص اللماس علمود تتزوجلي بالسرر من واحد لو تمووت ما تصيرله وما يعترفون بيهه اهله

-واهل عمر راح يعترفون بيهه اذا صارت قسمتهم؟

-ابو عمر متوفي بس امه موجودة وما تهتم والله جان عاشت احلى عيشة بس اوووووووووف ويه حظنا اوووووف

-نانا كله قسمة ونصيب

-لااا اختياااار كله اختيار عقلج شغلي لا تخلين الحب ياخذج وتنسين نفسج منو وشنو ولج مريم ذولة هواااامير تعرفين شنو هوووامير!!

-نانا..

-روووس كبااار تجااار يمشون ويذبون بالفلووس يمشون ويدوسون على الروس ما يهتمووون لبششرر ما يهتمون حتى لأبنائهم عدهم الفلوس اهم من كلشيي

-اهدي حبيبتي

-شلوون بيهه اذا ماقبلو يتزوجهه بالعلن شلللون تعالي باصريني مريم ولج رااح امووت تبقى بالسرر تطمطم وتضمضم بأبنهه وتخاااف الناس يجيبون اسمهه بالعاطل

-نانا حبيبتي الله يخليج اهدأي ربچ ييسر

مسحت على كتفهه اهدأهه بس ما بطلت بكاء هاي الليلة غفت وهي تسولف عن سلطتهم وفلوسهم وامكانياتهم وشلون ميهتمون لأبنائهم وشلون يأذوهم ويعذبوهم..

كعدت الظهر راسي منفوخ من البجي كمت غسلت وطلعت اشوف نانا واسيل وين تسحبت بره البيت فارغ ماكو احد من الزلم رحت دكيت باب غرفة نانا اجاني صوت اسيل..

-مريم: صباح الخير، شلونچ

-اسيل: صباح النور

ابتسمتلهه اباوع وجهها احسن اليوم وبجانبهه بوكيه ورد جبير كلش وعلبة، من انتبهت لنظراتي كالت بأبتسامة..

-اسيل: مسلم جابهن

-مسلم اجه هنا؟؟

-اي البارحة بات يمي والصبح فتحت عيوني على هذا الورد وهاي

اخذت العلبة فرحانة وطلعت منهه كلادة ذهب بفص احمر تخبل، باركتلهه الوب اريد اعرف شنو صار وياهه البارحة..

-اسيل: البارحة دوخناچ

-لا ابد، بس نانا وين راحت البارحة باتت يمي

-طلعت الصبح لبيت عمو محمد خالة حصة تريدهه

-اسيل ممكن سؤال

-اي تفضلي

-شلونه طفلج؟

ابتسمت وحطت ايدهه على بطنهه كالت بعيون تلمع..

-هو زين بس كالت الدكتورة لازم ارتاح

-بيا شهر انتِ؟

-بعدني هستوني

-شوكت عرفتي بروحج حامل

بلعت ريك ساكتة وخرت گذلتهه من وجهها وكالت..

-قبل لنروح للسفرة بكم يوم

-وزوجچ چان يعرف؟

هزت راسهه لا وفوراً كالت بفرحة..

-البارحة عرف ماتوقعت راح يفرح هالكد عبالي يتعارك ويايه لان احنه متفقين منسوي طفل الا من نعلن زواجنه

-ليش تزوجتو بالسر غريبة

-امه ماقبلت يتزوجني حاول وياهه هواي وويه ابوه وكل مرة يتعاركون وياه ويطلع من البيت زعلان يجيني يفرفح مسلم هواي يحبني مريم كلش هواي

هزيت راسي ساكتة والله لو تعرفين عمر شكد يحبج الليل كله يبجي عليج يمكن تتخبلين..

-مريم: عمر جان هنا بالليل مو؟

-اسيل: مادري اني فزيت بالثنتين على لمسات مسلم وسوالفه

-شعجب هو ما اجاچ للمستشفى؟

-كلت لبلقيس ما مستعدة اواجهه خفت

-ليش خفتي انتِ تكولين يحبج كلش

-بس احنه متفقين منسوي اطفال وخفت من ردة فعله مريم تدمرت من عرفت بنفسي حامل افكار سوداوية صارت بعقلي خفت يعوفني او ميعترف بزواجنه خصوصاً احنه بس عقد سيد

-مريم: اني لاحظتج بالسفرة چان وضعج مو تمام وحاولتي..

فركت ايديه مترددة اكول لو لا ذبيت نفس وكملت..

-حاولتي تنتحرين صح؟

نزلت راسهه ونزلت دموعهه ساكتة يعني فعلاً جانت تحاول تنتحر..

-اسيل: غبية اني

-مريم: فعلاً

رفعت راسهه متفاجئة من اجابتي اردفت فوراً..

-تنتحرين علمود رجال اسيل؟ بله عليج هذا هم عقل ليش معلگة روحج بي؟ هو ابنه وغصباً عليه يعترف بي راد يجذب ويكول مو ابني هذا تحليل DNA موجود وتلصمين حلگ الكل

-مريم انتِ متعرفين تفكير اهل مسلم شنو بالخصوص امه الله يرحمهه كلش قاسية وتخليهم امام الامر الواقع مثل ما سوت بـ حمزة وهسة من ماتت اجه الدور لمسلم رادو يخطبوله رقية

-تره همه زلم شلون ينجبرون على زواج مدا افهم

-ماعدهم شي اسمه زلم ونسوان كلهم واحد ماطول الزواج بي ربح للاهل غصباً ما على الاولاد يخضعون ويقبلون

-صارلكم شكد متزوجين؟

-وره ما ماتت امه بفترة قبل ثلاث سنوات

-ثلاث سنوات!!؟؟

-اي

-كل هالمدة متزوجين وما انكشفتو؟؟

-اطلس كشفنه قبل اربعة اشهر

-عزززه

سكتت خجلانة اصريت عليهه تحجيلي الموقف حچت گوة..

-چنت بالمطبخ بالليل اشتغل ومسلم وياي يساعدني ويحارشني بعد متزوجين ومسلم روحه حلوة، كلش تعبت من الشغل كعدت على الكرسي واجه كعد بجانبي يفركلي ايدي ونزل يريد يفرك رجليه ماقبلت عاند واصر واني..

بلعت ريك وحكت مكان حاجبهه عيوني مفتحتهن عليهه اريدهه تكمل..

-اني من فرحتي بي جريته احضنه وبنفس اللحظة دخل اطلس علينه وشافنه بهذا الوضع

-يممةةةة

-جان موقف ما انحسد عليه مريم صارت دماية بيناتهم دك كتل اخذه اطلس للحديقة ودمره دماار واني اللطم وابجي خايفة اعترفت بزواحنه وحجيتله كلشي تعارك ويايه عركة جبيرة وهددني يحجي لبلقيس توسلت بي ميكول ومسلم واعده راح نعلن زواجنه هالفترة بس اطلس ماقتنع عافنه وطلع من البيت ومن ذاك اليوم لهذا اليوم هو ميحاچيني

-وشوكت تعلنون زواجكم؟

-البارحة مسلم كال راح يفاتح ابوه وحمزة بالموضوع وشيصير خلي يصير

-ان شاء الله تنحل بسلام

-يارب

كمت اريد اروح وجرتني من ايدي كالت بعيون دامعة..

-اسيل: مريم اني خوش بنية والله ما سلمته نفسي لمسة ما لامسني قبل زواحنه وروح امي

-مصدكتج حبيبتي

-تزوجته لان احبه عوضني عن هواي شغلات مريم حياتنه متشبه حياتكم ابد، گلبي انعمى عن الكل بس هو اشوفه كدامي

-ادري ارتاحي

-ما حجيتيلي سالفتج اني ما كلت لـ بلقيس كلت خاف متقبلين

-اي عفية بس ترتاحين اجي اسولفلج كلشي

تركتهه براحتهه وللعصر رجعت يمهه حالتهه افضل بهواية جانت تحجي ويه مسلم على الموبايل تضحك وفرحانة مبين ديتغزل بيهه.. ابتسمت على وضعهم وطلعت جبتلهه عصير ورجعت اصرت احجيلهه موضوعي وفعلاً حجيتلهه كلشي..

تعجبت وما صدكت وحلفت اطلس يعرفني وديمثل بس من حجيتلهه مستحيل يعرفني واني مغيرة لقبي ومعلوماتي صدكت..

-اسيل: ههههههههه والله سالفتج متتصدگ

-مريم: حتى خواتي ما صدگو من حچيتلهم بس هذا الجاي يصير

رجعت لغرفتي اتصلت بأمي وخواتي وهيج مشت الايام اسيل عدنه بالبيت ونانا مزاعلتهه واني اوديهه الاكل والشرب حتى متتعب ومسلم كل يوم يجينه بالليل كلش يدخل عليهه الغرفة واسمع اصواتهم للصبح يسهرون ويه بعض..

نانا تنام بغرفتي واطلس حاول يراسلني ويتصل گتله وضعي مو تمام هالفترة اكتفينه بشوفات الدوام وسوالف الدوام، وبيوم اني دا اروح للكافتيريا اكل خرعني صوته..

-وينج

-مريم: يمة بسم الله نززتني استاذ

-وين بالج سارح

-بالشغل

-اي اي بالشغل

كملت طريقي وهو يمشي وراية ويحجي بهمس..

-هسة لو نمشي سوه شبيچ

-ماريد استاذ انتَ متزوج عيب

-اهوووو انعل ابو اليتزوج

انداريت عليه خازرته رجعلي الخزرة ونتر..

-الا اطلكهه

-اي طلكهه شعليه اني

-بس صبر انطيني مجال خلي تمر سنة على زواجي وانعل والديهه

بلعت ريكي گلبي رجف من شاف وضعي فرك وجهه حيل وكال معتذر..

-اسف مو اسلوبي اغلط على زوجتي بس ما رايدهه ولا اطيق شوفتهه

-اممم

وصلت للكافتيريا كعدت اطلب اكل اليوم تينا وضحى ثنينهن مجازات وحدي كاعدة، كعد هو بالطاولة المقابيلي طلب قهوة واشوفه يشربهه ويتفرج عليه..

اشرتله شبيك ضحك بدون لا يجاوب، صارن كدامه بنات ثنين عارضات من قسم التصوير يااابة التماوع مالتهن وصل يمي الضحك والتكهكه مالتهن ينرفز يحجن وياه ويلعبن بشعرهن..

-موسيو عنجد عم تحكي

-الاطلس: اي علي خلي يرتبلكم الاجازة

-بس نحنا جيناك لالك بدنا تساعدنا موسيور

-الاطلس: مو شغلي

-انتَ المسؤول ولوو

-الاطلس: لكن علي مديركم

يحجي وياهن وجهه ميگصه السيف لا ملامح ولا حتى ابتسامة وهنه دگن روحهن بالصوندة يلعبن النفس اللبس والتماوع وكل شوية جارة قميصهه من عند صدرهه ردت اتقيء..

-الاطلس: من رخصتكم آنسات

گام للمصعد اخذه وراح اباوعلهن وجههن انطعن ضايجات يدردمن بالفرنسي، كملت اكلي وكعدت اتصفن فترة ورجعت للمكتب مالتنه شفته فارغ دورت على البنات ورحت لمنار كالت داخلات عند الاستاذ عدهم اجتماع فردي..

-لعد غير تكوليلي مناار صارلهن شكد وياه جوه؟

-يعني تقريباً اربعين دقيقة

-معقووولة يبوووو يعني راح اترزل

-مادري بعد هو ما صاحچ

-اغلس؟

-اي حبي غلسي رجعي لمكتبج

فعلاً رحت للمكتب مالتي لكيت عمر واكف يدور على ملفات من شافني ابتسم، هاي اول مرة اشوفه من موقف مال حمل اسيل لسه..

-عمر: وينهن صاحباتج؟

-اجتماع ويه استاذ اطلس

-وانتِ؟

-ما طلبني

-ها، مريم عدكم ملف حسابات يخص حازم يمكم هنا مو؟

-اي اي البارحة اشتغلنه عليه

رحت اطلعه وهو وكف ينتظرني بحوشت بي ولكيته ما كامل استحيت اكوله وحرت..

-عمر: ها عيني

-استاذ بعده ما كامل

-لااا مريم

-هسة اكمله وانطيك هسة دقايق

-ليش كل هذا التهاون يا عيوني

-اسفة والله هو مو اني اشتغلته بس اكيد وحدة من البنات صار عدهه ظرف دقايق وانطيك

هز راسه ووكف ينتظرني واني اشتغل بي، سجلت البيانات كلهه بالحاسبة ايديه ترجف مستحية ومحترة وخجلانة منه لهيب اشتغلت على هذا الملف..

-مريم: استاذ استريح لا تظل واكف

-اشكرج

كعد على كرسي وماد راسه ويايه بالحاسبة يباوع بتركيز توترت اكثر من قربنه ايدي كامت ترعش وخربطت انتبه عليه ضحك وكال..

-يابة ما طلعت سالفة هاي

-مريم: هاا شنو قصدك

-بس جاي اباوع وياچ ما راح اسويلج شي

-هههه اي اي ادري اكيد بس ماعرف اشتغل واحد يباوع ويايه

ضحك وغمض عيونه ودار وجهه عني ابتسمت ورجعت اشتغل، ذب نفس عميق وكال..

-شلون علاقتج بأطلس

-هاا

انداريت عليه ابتسم واشر بيده معتذر..

-اسف على التدخل بس قلقت اشوف وضعه مو تمام

-لا احنه تمام انتَ شلونك استاذ

غابت ابتسامته ورجع يباوع للشاشة مالتي اني هم انطيته ظهري وكملت شغل، دقايق مرت ياله كال..

-اسيل ومسلم متزوجين وهي حامل هسة

سويت روحي متفاجئة وغطيت حلگي بأيدي هز راسه اي وكمل وهو يلعب بساعته..

-عمر: اي يعني الله يسعدهم ويوفقهم سوه

-شوكت عرسهم صار؟

-ما صار بس راح يصير بالفترة الجاية عود اعزمج ههههه

-ربي يعوضك استاذ

رجفت شفته فوراً عجيب ولا يكدر يسيطر على نفسه من يتعلق الموضوع بيهه، مسح عيونه قبل لا تنزل دموعه وكال بضحكة چذابية..

-ههههههه نويت اجيبلهم هدية ثلاجة وبراد شنو رأيج؟ لو انطيهم فلوس يجيبون على ذوقهم؟

-لا حلوة هديتك

-اي بس لازم بعد شي ماعرف اجيبلهم كاروك لابنهم؟؟

-استاذ

-لو كنتور للطفل؟ لا لا كاروك زين حلوة الهدية صح؟

صوته يرجف من يحجي حابس الغصة من شافني ساكتة عصر عيونه وكال..

-عمر: اكو هدية ثاني ببالج؟

-استاذ لا تعذب نفسك هيج

-لا وين معذب نفسي هذا واجب لازم انطيهم هدية اني صديقهم همه الثنين

-ماشي

-مادري شنو اجيب بعد حاير علي ما ينطي من نفسه ما يجاوبني عود زعلان عليه المطي هههههه

-هديتك حلوة وكافية

-هيج رأيج؟

-اي

ابتسم ابتسامة حزينة وهز راسه، كملت الملف وانطيته اخذه مني وكال..

-ان شاء الله يجي يوم واحير بهديتكم

-هديتنه؟

-انتِ واطلس ونجمعكم ببيت واحد

سكتت خجلانة نزلت راسي ضحك وطلع من المكتب، انترست هم وغم تعبت على تعبه عمر عزيز على گلبي حيل عزيز..

مشى الوقت البنات بمكتب اطلس ما طلعن هوايه طولو كملت شغلي وكمت اصلي صلاة المغرب اليوم ليلة الجمعة كملت صلاة ولزمت القران اقره..

-ريتاج: هففففف هلكنااا

-لهيب: عقلي وگف وربي والله لوما مسيو اطلس صاك چان گتله مسيوو اعتقناا ما طايقين نشوف چهرتك

اسمعهن واضحك صدقت وانداريت عليهن اشوفهن يجهزن اغراضهن يردن يطلعن..

-لهيب: بس الحلو خلانه نطلع من وكت اليوم

-مريم: شعجب متطلع من الاستاذ هيج طلعات

-ريتاج: لان نفخ راسنه بالشغل ولج متنه نيالج مچنتي ويانه

سلمن عليه وطلعن باوعت للساعة بعد ساعة يخلص الدوام بقيت كاعدة على السجادة مالتي واقره قران بصوت مسموع حتى المكتب يتنور بكلمات القران العظيمة..

-تقبل الله

اللتفتت على صوته ساند روحه على الباب ومبتسم هزيت راسي ورجعت عيوني اقره تقدم مني كعد على كرسي ريتاج يصير وره ظهري مباشرة..

-الاطلس: شتقرين؟

-مريم: سورة "ص"

-شنو؟

-سورة صاد متعرفهه؟

-لا اعرفهه بس شعجب

-اليوم ليلة الجمعة

-اي؟

سديت القران واللتفتت عليه مبتسمة حطيت حذائي من الجهة الثانية وتربعت..

-تقرل الروايات الي يقره سورة "ص" كل خميس بالليل، يعني ليلة الجمعة رب العالمين ينطي ما لم يعطي لـ نبي او وصي

ميل شفايفه وفتح عيونه مبهور اشر براسه وكال..

-يعني شنو ينطي مثلاً؟

-كلشي شنو يخطر ببالك، مال، جاه، رزق، عافية، صحة، نجاح، توفيق، زواج للي ممتزوجة، ذرية للي ماعنده، كلشي يخطر ببالك استاذ شوف شنو الله منطي للأنبياء والاوصياء ينطيك بعد اكثر لان مذكور "ما لم يعطي لـ نبي او وصي"

-عجيب

-واني صارلي سنيييين اقراهه وفعلاً الحمد لله تخرجت بمعدل عالي صح معهد بس لان ماكدرت اروح كلية بعيدة عن بيتي وتوظفت هنا احسن وظيفة وحياتي ماشية صح رغم العكر الي موجودة بس الحمد لله دائماً الله ينقذني

ابتسم على طريقة كلامي وحماسي، حچى بنفس الطريقة وعيونه تقطر صدق..

-اريد اقراهه وياچ

-سورة ص؟

-اي يصير مو

-طبعاً طبعاً يصير اكيد والله راح يوفقك شكدددد وكول مرايم ما كالت

ضحك وهز براسه نزع حذائه ومد ايده يريد القران انطيته وبده يقراهه..

-مريم: اقره بصوت عالي استاذ

-ليش

-حتى المكان يتنور ويتعقم

-ههههههه يتعقم شنو

-اي من السلبية والشغلات المزعجة

-ها ماشي..

بده يقراهه بصوت عالي واني صافنة عليه ابتسمت على طريقته صوته حلو ويعرف يقره قران كلش زين لا يغلط بكلمة ولا بحركات كأن متعلم يقره هواي..

كمل وطلبت منه يقره زيارة عاشوراء هم قراهه واني اقره وياه وكل شوية اللتفت عليه ابتسم وهو يضحك ويأشرلي لتباوعيلي..

-استاذ صوتك يجنننننن

-اي اي

-ههههه وربي يخبل حنون كلش

-اممم

وجهه صار احمر خجل من اطرائي، غير الموضوع من سألني..

-مريم خلينه نطلع

-وين؟

-نتعشى سوه

-لا لا عيب استاذ شنو هالسوالف

-بس مرة بنفسي اكعد وياچ بمكان عام

-لا فشلة ماقبل

-زين بالسيارة؟

-لا

-هنا؟

-لا

-بالشارع؟

-لا

-ببيتكم؟

-لا

-اجيب امي واجيكم؟

-لا

جاوبته وفتحت عيوني عليه مبتسم ويباوعلي نظرات حانية هادئة دگ گلبي بقوة وتخربطت احوالي..

-شنو قصدك

-يعني نجي نتعشى عدكم

-شنو المناسبة

-هيج

-شنو هيج يعني شلون

-نتعرف على بعض اكثر

-بس؟

-اي

-لا!

حجيتهه بنتر وكمت ضحك وجرني من ايدي سحبتهه منه بسرعة وكال يتأسف..

-اسف بس شسويلج ما ترضين تطلعين وياي

مجاوبته ورجعت اكعد على المكتب مالتي اشتغل وداخلي يهتز من كلماته حسيته راد يكول شي وتراجع، بقيت اشتغل ومغلسه عليه هو حاط ايده على خده وصافن عليه طول الوقت..

رفعت عيوني عليه من صرنه عين بعين ضحكنه، عدل گعدته وسحب ياخته ورباطه يرتبه رفعت حاجبي واني اشوف ترتيبه واناقته واجه ببالي سؤال..

-استاذ ليش چنت قاسي ويه البنات الجوه

-أي بنات؟

-العارضات الحچو وياك بالكافتيريا

-مو قاسي حجيت طبيعي

-لا تنتر بيهن جنت

-لا هو اسلوبي هيج

-ادري ملاحظة بس ليش؟

-ما جاي افهم سؤالج مريم

-ليش قاسي ويه البنات مؤدب وخلوق بس قاسي متنطي من نفسك

-لان ماحب البنات

-هااااا

-ههههههههه مو هيج اقصد ماحب البنية التذب روحهه اتقزز منهه

-نورسين هيج

-نورسين ما تمثل هو طبعهه هذا من الصغر

-وين نورسين ما جاي اشوفهه هالفترة

-مسافرة ويه ابوهه

-امممم يعني راح ترجع

-اكيد اي

-هاا، زين شلون تحب البنية تكون

-ما يهمني صراحة ولا ادقق بس كتلج ماحب التذب روحهه شي ينرفز واظن كل الشباب هذا تفكيرهم

-بالعكس يكيفون عليهن

-اي يكيفون عليهن بوقتهه وره ظهرهه يحجون عليهه ويطعنون بيهه

-صدك!

-رب الصدك

-يعني انتو هيج؟؟ زين ليش تتقربون منهن من البداية

-عن نفسي ماتقرب ما جاي احجي حتى ابينلج اني ملاك صالح لكن هي هاي شخصيتي، بس اغلب الولد كشكل عام عدهم فضول ناحية الجنس الاخر يحب يستكشف يحب يتعرف يحب يروي فضوله

-ومن يمل يعوفهه

-مو كلهم بس الاغلب نعم

-حرگة گلب!!

-مريم احجيهه الج بصراحة مو تكرهيني بس احجيهه الج للزمن يمكن تنفعج المعلومة، ماكو رجال بهاي الدنيا كلهه منين ما تفترين ماكو رجل يتقبل او يحب زوجته تكون منفتحة بطريقة "مشمئزة" بـ حجة الانفتاح واحنه بزمن التطور مريم ركزي ماكو "رجال"

-اي؟

-يعني الرجل ما يحب التذب روحهه عليه يحبهه نچرة وقوية مو صلفة ولا جسرة ولا لسانهه طويل وتغلط وتفشر، لا قوية ما تنطي مجال لياهو الچان..

-عمرهه ما انقاست القوة باللسان الطويل وقلة الادب استاذ

-صحيح وهذا الي اريد اوصله، قوية بشخصيتهه متكلمة تعرف شلون تتصرف، الچفصات طبيعية بما ان المرأة كائن صريح وزلة لسانهه شغلة عادية ولطيفة بأغلب الاحيان

-اممم

-ومحد يحب السهلة حتى النسوان اتوقع انتو نفسنا تحبون الزلمة الصعب الي ما يضحك للهوا الجَدي بمواقف ومرح بمواقف مو ممل بس مو تافه

-صحيح

-وهاي طيرنه نص ساعة سوالف بعد شتردين آنستي

-ما حسيت بالوقت والله

-اليوم ضروري تجاوبيني بالليل لا تظلين مفحطتني

-ماكدر صدكني امي متعوفني

-اللكيلج حل مريم حتى لو رسائل شبيچ منشفتهه وياي

-اوك احاول

ابتسم وطلع كملت دوام وردت اجر تكسي وماقبل الا هو يوصلني دك گلبي خايفة وانطيته نفس العنوان القديم الوصلني عليه خليته ينزلني بعيد وتحججت بأهلي تفهم الوضع وانتظرته لحدما راح اخذت تكسي ورجعت لبيتنه..

وهكذا مشت ثلاث اشهر اخرى من حياتي ويه اطلس يوم اعشق الوقت اليمشي وياه وانسى كلشي واريد بس اعترف واگوله اني زوجتك وازيد فرحته ويوم اكرهه كره اعمى من يحجي عن زوجته الي هي اني..

اسيل بقت يمنه زواجهم مدا يضبط ابو مسلم معاند وراكب راسه ميقبل يزوجهم سمعت حمزة تعارك ويه ابوه وحاول يتدخل بس ابوهم ماكو بأذنه ماي..

مالك اكثر من مرة حاول يتواصل ويايه الى ان حضرته وبعد اختفى ارتاحيت بس ما دامت راحتي لوقت طويل..

اليوم 4/17 عيد ميلاد اطلس الـ 33 حجزت كيكة صغيرة وطلبت منهم شكل معين اخذتهه من المحل وطلعت للدوام شايلتهه بيدي ماريد احد ينتبه عليه..

وصلت للمكتب مالتي كعدت ويه البنات والكيكة ضميتهه جوه المكتب الجو صاير كلش حلو ومايل للحرارة خفت تموع الكريمة بس جازفت بيهه..

اثناء عملنه تعدت من بابنه نورسين رجف گلبي من شفتهه داخله بكعبهه العالي ولبسهه المغري المفتح..

-ريتاج: منتبهات صايرة هواي تجيله

-لهيب: اي لگفتهه مرة تبوسه

-مريم: تبوووسه؟؟؟؟

-لهيب: والله مرتين صارت هنا تبوسه

اشرت على جوه شفايفهه بلعت ريك ارجف ماكدر ابين وضعي واكشف نفسي ريتاج تحجي مقهورة..

-ريتاج: الله يساعد مرته شنو هالعذاب عيشتيش عايشتهه

-لهيب: زوجهه يخونهه كل يوم وهي نايمة ورجليهه بالشمس

-ريتاج: شفتي هاي غرامة التزوج واحد حلو وغني

-لهيب: اي والله

يحجن بيناتهن واني بوخت نااار اشتعلت بيه ماكدرت اكعد اكثر نزلت اشوف تينا وضحى كاعدات بالمكتب، الحلو الهن مكتب وحدهن سوه..

-ضحى: هاي شنو واني اكول ليش قسمنه منور

-تينا: اه مرايم على كيفج تره اني مختوبة بالجديد ماتحمل

-ضحى: اهووو راح تخبصنه

-تينا: اوووي يگلبي هذا ختچيبي يتصل عليه اوووي يروحي

جاوبته تسولف وتضحك وياه وتعدل بحلقتهه، تينا خطبت صارلهه اسبوعين كلش فرحانيلهه شهرين احنه نقنع بيهه تنطي فرصة واخيراً وافقت وصارت خطبتهم بين اهلهم بس والعرس تريده جبير..

-ضحى: النهار كله تحجي بي ختيبي وختيبي

-مريم: عوفيهه مكيفه بي

-تينا: اوكي تيمو احاچيك بعدين

سدته وكالت وهي تفر بالحلقة..

-اووووي هاي شنو عوانس يمي وخرن لا تأثرن عليه

-مريم: هه هه هه عوانس بعينج

-ضحى: رجاءً اني مو عانس اني منفصلة ثانياً عفنه الزلم الجن اني جربت ولعبت روحي منهم

-مريم: بعده يركض وراج طليقج؟

-ضحى: الله ياااخذه الله يشعل گلبه الله يموته الله ينتقم منه الله يشرده الله يشگ گلبه مثل ما شگ گلبي من شفته يخوني ببيتنه

-تينا: امين امين امين خيولي ضحى لو يبوس رجليج لتهتمين

-ضحى: اوووع اني ارجعله هذا ابو النسوان الاملح راسه چنه راس فجل

-مريم: الزلم كلهم هيج اووووف

-تينا: هاي شنو حبي على كيفج ماسمحلج ختچيبي تامر مو هيج لا لا مريم ما اسمحلج ابددد

-مريم: اي حبي منقصد تيمو مالتج مستثنى

-ضحى: الله يقرررضهم كولن امين

-تينا: لا مو امين انجبي شلون نعيش بدون الزلم

-مريم: صراحة اي اني ويه تينا بهاي احنه واحد يكمل اللاخ خو مو كل الزلم خاينين ومقرفين

سولفنه شوية ورجعت لقسمي كعدت على الكرسي الوب سألت على نورسين گالن بعدهه عنده، اخذت ملف وكمت..

-ريتاج رايحة اودي للاستاذ وراجعة

طلعت وتلاكيت ويه عمر وضعه كل يوم اتعس من القبله ضعفان كلش شكله يقهر ابتسم من شافني كتله رايحة للاستاذ هز راسه وكال هو هم..

طرق الباب ودخلنه بسرعة واذا اشوف نورسين كاعدة على المكتب مالته تباوعله جسمهه قريب من ايده وهو كاعد على الكرسي يشتغل بس شافنه رفع راسه وكال بأبتسامة مرحبة..

-يا هلا

-عمر: هلا بيك ضلعي شصار ويه المجموعة الجديدة؟

-الاطلس: ما بقى شي 5/1 تنطلق ان شاء الله

-نورسين: واااو قلبي شنو هالانجازات هاي

رفع حاجبه عمر يضحك وباوعلي ماهتميت وتقدمت على المكتب حطيت الملف ووجهي قدر المستطاع حاولته يكون طبيعي وما ابين قرفي منه..

-الاطلس: شنو هذا مريم؟

-مريم: شغل انتَ طلبته من عدنه البارحة

-اها لطيف

گلب بي وعين عليه وعين على الملف مانطيته اهمية وانداريت على عمر واكف ينتظر شي، گلبي يدگ ملاحظة نظرات نورسين عليه احسهه راح تاكلني..

-الاطلس: جيد حلو عاشت ايدكم آنستي

-وايدك استاذ

-نورسين: يصير اشوف بيبي؟

-الاطلس: اكيد لا هذا شغل خاص

حچاهه بالضحك هي ضحكت وجرت خده عضته منه فتحت حلگي وهو هم انحرج كلش ووجهه تعرق انداريت على عمر عوج حلگه وهمس بدون صوت "هي جريئة" ردت اعيط لا هاي مو جريئة هاي ادبسز!!

-نورسين: اريد اشوووووف

-الاطلس: لا نورسين ما يصير

-متثق بيه اطلس

-اثق بس هذا عمل ما ندخله بحياتنه الشخصية ابوج منافس النه

حجاهه بلطف ضحكت ورفعت حاجبهه وخرت شعره من يم گصته بلع ريگ وعينه عليه وخر ايدهه عنه مبتسم وهي كالت بنعوصتهه..

-اني اعلمك بعدين

-عمر: شتعلمي بيبي

-نورسين: عمووور شعليك بينه هههههه

-عمر: مو بيبي صار عندي فضول اعرف شتعلمي بلكت اني هم اتعلم

-نورسين: تربية سزززز ههههههههههههههه

ضحكت ضحكة شعلوهه ظليت بمكاني فاكة حلگي مو غيرانة متقززة منهم ولعبانة نفسي!!

-مريم: من رخصتكم

-الاطلس: مريم.. مريم لحظة

گام من مكانه الي واني وكفت انتظره يحجي تقرب مني خطوتين وصارت بوجهه دارسين..

-نورسين: اكلك شوكت نطلع

-الاطلس: نشوفلنه وقت.. مريم تعالي احاچيچ

-مريم: استاذ عندي شغل هواي

-نورسين: لا تعالي حبيبي عيب هو مديرج، يله اني اروح باي

تقربت منه بطريقة جسرة بطريقة مليانة صلافة وباسته بوجهه بطريقة جريئة دار وجهه عنهه يتحمحم وعمر بس يفر بيده..

-نورسين: باااي

ردت اطلع بسرعة بس راح ابين روحي ضعيفة وغيرانه خيولون ميستاهلون والله ولا انغث منهه هاي الجربة..

اخذت جنطتهه وطلعت راقبتهه بعيوني لحدما وصلت للباب يم عمر رادت تطلع وتخصرت كدامه..

-نورسين: ضعفان عمر

-عمر: اي حبي دايت

-نورسين: لا حلو جسمك جان شجاك لتخربه

-عمر: بعد نغير شوي

-نورسين: ها براحتك يله باي بيب

-عمر: شنو بيبي ماحصل نفس بوسة اطلس

ضحكت وضربت كتفه وطلعت وهو طلع وراهه، انداريت وفزيت اشوف اطلس بوجهي جرني من رداني وكعدني بصفه على القنفة..

-تعالي تعالي اعاين عليج

-اي اشبع بيبي

-شنو

-اشبع مني شوف اريد اروح

-وين ترحين

-اكمل شغلي متلل لفوك راسي

-اي ميخالف يتأجل احم.. شلونچ

-بخير

-شبيچ منفسة

-مابيه شي

-مريضة؟

-لا

-چا ليش گوة تسولفين وياي

-مابيه شي شبيك شنو تريدني اخذك بالاحضان

-لا بس ضايجة من نورسين مو؟

-لا شعليه بيهه

-مريم مو عليه هاي سوالفج تره نورسين صديقتي ورب العزة

-اي اوكي شكلت اني

-هي تصرفاتهه هيج والحسين الشهيد ماكدر اسيطر عليهه حركتهه سريعة بكلشي

-اي الله يحفظهه الك

-اااخخ مريم ااخخ منج شبيچ جاي اكلج بس اصدقاء احنه

-هسة شكلت اني يا عيني

-شوفي من باستني وغلاة امي وماحلف بيهه جذب هاي حركتهه من احنه وصغار سولتهه تبوس منا چم مرة كلتلهه بطليهه ما ترضى

-اي ماشي

-مررريم

-شكو تعيطط هسة اني شكلت خلص افتهمت

-تأثري عصبي غااري صخميي سوي أي شيي شنو هالبروود

-شبيك استاذ شسالفة

-كم مرة كتلج لا تصيحيلي استااذ من نكون وحدنه!!

-ماحب

-اني احب اسمع اسمي بحلگچ لا تبخلين عليه ما طالب غير تصيحيلي اطلس وعوفي استاذ

-اوكي

-يله كولي

-ماشي اطلس

-عشگت اسمي بحلگچ

-اممم

-لا تبقين ضايجة وعلي ابن ابي طالب ماكو شي بيناتنه

-والبوستين الصارت قبل يومين

-يا بوستين؟ ماكو هو نفس هاي ماكو شي ثاني

-اممم

-بويييية حلفت بالله وحلفت بغلاة امي وحلفت بعلي بعد بيمن احلف

-لا خلص لتحلف مصدكتك

-احلفي

-ماكو داعي راح اروح اني

-مريم ماكدر لزعلج بشنو احلف وتصدكيني

-لتحلف اطلس انتَ لو فعلاً مزعوج من تصرفاتهه تلگه حل وتخليهه تتركهن

-حاچي وياهه كومة وگايللهه ومحذرهه بس تعاند او تنسى مادري

-انتَ حاچيلهه عنه؟

-لا ما حاچي لاحد

-شعجب

-اعرف شوكت احجي

-ماشي

-مرمر لا تظلين زعلانة وعد احجي وياهه ونحل هاي السالفة

-ماشي

كمت اريد اروح جرني من رداني اقوى وطلب ابقى وياه بعد، ذبيت نفس وكتله عندي شغل ماكدر طلعت روحي ممرودة صار بوجهي عمر بعده واكف ويه منار..

-عمر: مريم

-مريم: نعم استاذ؟

-عمر: تعالي شوفي هذا

بيده ملفات تقدم بجانبي يراويني ويمشي نطلع من مكتب منار..

-عمر: هي نورسين هيج

-مريم: كال اطلس

-عمر: شكلج ما مقتنعة بس وغلاوة علاوي اخوي هي هيج من صغرهه هاي تصرفاتهه وياه جريئة علاقتهه بي

-اممم

-لا تزعلين مرايم اليوم عيد ميلاد اطلس لا تخربون فرحتكم

-ماحتفل بي ماا

-لا خطية لا تخلين لامثال نورسين تخرب عليكم

-تحسهه تدري؟

-اي

-يعني عناد بيه تصرفاتهه

-اي شكيت وهذا السبب اگلج لا تخليهه تأثر عليكم

هزيت راسي مبتسمة بقى يحلف ويقسم اطلس ونورسين ما بيناتهم شي ما عافني الا اقتنعت، رجعت للمكتب انتظر وقت الغده حتى ينزلون البنات واني ابقى، اخيراً راحن يتغدن واني طلعت الكيكة والهدية من جوه الميز ورحت اهرول لمكتبه..

طرقت الباب سمحلي ادخل شفته كاعد دياكل لفة اول ما شافني نزلهه وابتسم..

-الاطلس: واني اكول ليش گلبي فز من اندكت الباب

-اي اي عود خوش

-ما تعرفين شكد فرحت بشوفتج والعباس شوفتج عيد

-امممم

-بعدج زعلانة عليه مريم

-لا مزعلانة عمر وضحلي

-هاا نعال طلع بي خير

-اسكت لتحجي عليه تره هو الي مخليني صابرة عليك يدافعلك ويفزعلك

-فدوة اروحله هههههه

ضحكت وكعدت على القنفة اجه يكعد بصفي تسائل على البوكس البيدي ما جاوبته..

-استاذ روح غسل وتعال بيك ريحة شاورما

-هم كالت استااذ هم كالتت

-يله محيطي روح غسل وتعال

ضحك بقوة وكام للحمام مالته بسرعة بسرعة طلعت الكيكة وحطيت بيهه الشمعة دا اعلكهه وطلع بس شافني جمد بمكانه..

-كل عام وانتَ بخير محيطي الاطلسي

ضحك فرحان كلش وتقرب مني حاير ميعرف شيسوي يريد يحضني ومتردد من ردة فعلي العنيفة اخيراً جر ايدي وباسهه حيييل وحطهه على گلبه مكيف لان ما بعدته..

-يا روحي.. گلبي مرمرتي مصدر سعادتي وضحكتي

-كل عام وانتَ بخير

-ولج شنو انتِ شلون مفاجأة هاي ولا حسيت

-طبعاً عيني شلون تحس غير من الصبح مرتبتهه

ضحكت اكمم حلگي وخر ايدي من شفايفي وبوسهه هوايه ويحطهه على وجهه ويبوس بيهه ويشمهه..

-تعال اقسم الكيكة

كعدنه بصف بعض حاوط خصري بخفة ورفع راسي اباوعله غمز وكال..

-صايرة حبابة

-من يومي حبابة بس بطل حركاتك حرام اطلس

-انتِ محجبة

-ايييي لو نسيت

-لا ما انسى بس خليني اليوم عيد ميلادي حالات خاصة

-اويلي منك ومن حالاتك

-ابوسج يصير؟

-عززه وخر شبيكك

دفعته وهو بس يضحك، اجه يقسم الكيكة قبلهه نفخ الشمعة، قسملي قطعة وحار وين يحطهه قدمتله صحن بلاستك جايبته ويايه ابتسم وكال..

-مرتبة لكلشي

-طبعاً غير اليوم عيد ميلادك محيطي

-گلبي مفرفح على بوسة

-ماكو تأدب

-نتفه

-ماكووو

استسلم وكعدنه ناكل كيك ونسولف مرت نص ساعة واني انخبصت ماقبل اطلع وكال ابقي بحجة عدنه شغل أيدته وكعدنه نكمل سوالف..

اطلس انسان مثالي مرح، ايجابي، حنون، بسيط احياناً واحيان اخرى مغرور ومعجب بنفسه هواي، يحب الحياة ويحب امه يعشق امه عشق جنوني، واهمها عيونه مليانة حب ورغبة الي يتحمس ومتعطش على لمسة من ايدي، من اللمسه حتى لو بالغلط تصير يبقى اليوم كله يحجي بيهه فرحان..

تمنيته زوجي من كل گلبي حاولت اكثر من مرة اقربه من زوجته الي هي اني اوقات احلم نلتقي بالبيت بالصدفة ويشوفني وينتهي كلشي بس ما صار هالشي ولا مرة..

كملنه عيد ميلاده كمت اريد اطلع وتذكرت، رجعت اكعد وكلت بأبتسامة..

-اليوم عيد ميلادك ولازم اجيبلك هدية

-اي صح

-اي بس ماعرفت شنو تحب فـ جبت هذا

-ولج اشاقيچ

ضحك واني ماهتميت انطيته العلاكة الورقية الي بجانبي خليته يفتحهه واول ما شافهه عطر بلم وجهه..

-جايبتلي عطر

-اي ليش ميعجبك

-شنو قصدج بهالتصرف

-شنو ما اقصد شي بس اشوفك تحب العطور كلش مهووس بيهن كلت اكيد راح تفرح بي

-لطيف

-اطلس صدكني هذا قصدي والله شبيك

-اممم

-شبيك ليش ضجت ما عجبك؟ خلص جيب ارجعه واجيبلك عطر ثاني

-ولج شنو تجيبلي عطرر تردينه نتفاارك

-شنو نتفارك؟

-العطر فراااگ

-منيلك هاي السوالف مال بيبيتي

-حقيقة اني مجربهه اخذي ماريده لا تجيبلي شي

-هاي شبيك طلعته من عيني والله ماركة وغالي

-هههههههه گلبي مو هذا الاقصده بس ماريد افارگچ ماكدر اخذه

-زين شلون نحل السالفة

-مادري

صفنت افكر وهو هم، شوية وطلع محفظته انطاني فلوس وكال..

-كأن اشتريته منج

-تره هو مو بخمسة!

-بس هيج هاي حيلة، هو مو هدية

-هااااا والله عندك سوالف اطلس

-حركة معروفة هذي مو اني اخترعتهه الي يريد يهدي هدية عطر الطرف الثاني ينطي فلوس

-صدك

-اي

-ماشي يله شمه حلوة ريحته؟

-تملخ

-شمه شبيك وين شميته انتَ

-شميته شميته

-لتجذب شمه

ضحك وفتحه من العلبة شمه وعكمش وجهه كح وكال..

-كتلج يملخ

-مااااعجبككك

-صوتج اشششش

-مو طيب مووو كله من تينا هي اخذت لخطيبهه نفسه

-هاا هااا

-شكوووو

-لا هيج

-راح اغيره الك

-لا والله حلو شبيچ

لحيت عليه هوايه وأصر عجبه العطر خلص اليوم وخلص الدوام رجعت للبيت واول ما وصلت اتصل بيه ويشرح عن فرحته ووناسته اليوم..

-الاطلس: خوب من لمستج يا علي گلبي راد يطلع من صدري ماردت اوخر منج بس انتِ نحسة

-هههههه اطلس مو زين خليتك تحاوط خصري شوف حصلت كومة حرام

-اني اتحمل الذنب ما يهم

-اويلي منك

ذب حسرة عالية وما حچى، حسيت بي شي مو طبيعي تسائلت..

-وينك انتَ؟

-بالبيت

-شو ماحسك بالبيت

فوراً طگلي صورة بس رجليه طالعة وميز التلفزيون مالتنه ودزهه الي ضحكت من شفتهه..

-صدگت بس حبيت اداهرك

-هسة شوي وطالع

-وين تروح؟

-اسهر ويه جماعتي

-امممممم

-اي

-وين تروح

-نشوف وين يعجب عمر القندرة

-يعني تمشون بشور عمر

-اساساً السهرات كلهه لخاطره وضعه مو تمام هالفترة

-شبي؟

-ماعرف مايحجي بس عليوي يكول لا تلحون عليه ولازم نغيرله جو

-اي خطية كون وياه دائماً لتعوفه

-اكيد

-اطلس انتَ زين؟ شو گوة تحجي ويايه

-مريم اني حاير

-بشنو سولفلي

-ابوي وامي جاي يضغطون عليه هواي

-بشنوو

-يردون طفل

-منين

-مني ومن مرتي يعني منين

جمدت ساكتة وهو هم ذب حسرة عالية ورجع يكمل..

-يلحون بهذا الموضوع ويردوني اجيب مرتي ونروح نعيش وياهم

-وانتَ شتكول

-ماريدهه اني

-اممم

-بس ما يفتهمون ما جاي يستوعبون انطاني ابوي مهلة منا لسبوع لازم اني جايبهه الهم وقانعهه

-اسبوع!!!

-اي

-اطلس اسبوع شنو انتَ تكول ما ملتقي بزوجتك برأيك اذا ترجعلهه وتحاچيهه راح تقتنع بيك؟؟ راح تقبل تروح وياك؟؟

-غصباً عليهه اشايفه روحهه

-اطلللس شبيييك

-لان اكلو راسي اكل ابوي يهدد من جهة وامي تلوب وتاكل بروحهه من جهة تعبت منهم وكرهت الساعة السودة التزوجت بيهه

-وتالي؟

-راح احاچيهه باجر

-لزوجتك؟!!!

-اي اشوف شلون راح اقنعهه تجي وياي بس نمثل كدام اهلي

گلبي كام يدك وايدي ترجف يبوو يبوو شلون ورطه هاي..

-مريم: انتَ كلت يردون طفل؟

-مو وكتهه نشوف شلون نرهمهه

-شلون ترهمهه يعني

-لا تخافين ماخونج وياهه ههههههه

-اطلس اني احجي جد سولفلي الي براسك

-ماكو شي براسي فارغ باجر اروح اشوف ست الحسن واجرهه وياي لبيت اهلي واخلص من هالسالفة

-واني

-انتِ بنص گلبي

-اني شنو يصير بيه تعوفني؟

-اعوف روحي وماعوفج مريم شتحجين انتِ

-وزوجتك؟

-طززز بيهه ما تهمني

-تكسر گلبهه علمود بنية ثانية

-شنو اكسر گلبهه شبيچ اني حتى ما شايفهه مو زين ملفيهه ببيتي

-مسوي عليهه منية

-لا مو هيج اقصد بس تعبت منهه ومن طاريهه اريد اخلص من هالورطة

-واذا جانت تحبك

-شلون تحبني وهي ما تعرفني

-مادري اكول يجوز

-لا تفكرين هيج وتشوشين عقلج

-اني رايحة اطلس امي تصيحلي

-ماشي تصبحين على خير يا خيري

-تلاكي الخير

ذبيت التلفون افور كمت على حيلي وافكر شلون بيه باجر راح نلتقي شنو اكول شلون راح احل هالسالفة؟؟ اكيد راح ينصدم اي واذا انصدم راح يفرح بشوفتي وراح يكيف اني مرته ويريدنه نصير سوه بس يعني لازم اني اتقبله وانطي اليريده؟؟ شلون بيه ياربي شلوووون......

يتبع ♠️💸....

• ━━━━━━❪♣❫━━━━━━ •

دخيلك يا علي دخيلك يابو الحسنين يا علي 🥲🥲🥲🥲

توقعاتكممم الخنفشارية وتعالو انستاا بسرعة 😭💕🫸🏻