الغزالة في عرين الاسد الفصل الرابع 4 - بقلم فيّد عبدالله

مساءالود حبايبي شلونكم شخباركم شلونة حماسكم للقصة ان شاءالله تحبوهة،متابعة طيبة

البارت الرابع
فيد عبدالله

ريم،،عدت فترة الخطوبة وما جانت طويلة اسبوعين وكضيتهة ركض بركض حتى الحك حضرت كلشي وسولي حنة وهوسة وكلهة التمت الكرايب ودك وركص واني طايرة بس نضرات مرت عمي ام حمزة ابد ما ريحتني وبالليل باتت جديتي يمنة وسولفت وياهة وسالته،،جدة شو مرت عمي نضراتهة تخوف ما فرحانة ابد

الجدة صالحة،،يا جدة اكولج وراح اكولج لان ادريج عاكلة وفاهمة وانتي الراح تخليهة تحبج من ايدج

ريم،،كولي جدة

الجدة صالحة،،هي من سمعت بيج تعرنصت منج

ريم،،ليش جدة شبية

الجدة صالحة،،مابيج ست البنوات بكلشي بس عبنج صغيرة كلش على حميزة

ريم،،ههههه حميزة

الجدة صالحة،،وصكع تتمضحك عالاسم وعافت الحجي كلة

ريم،،بس جدة واذا صغيرة مو زين اتعود واربة يمهم

الجدة صالحة،،تكول ما تدبر بيتنة وخطارنة ولا تعرف لرجلهة شيريد بعدهة وينهةووين العرس بس مو هاي الدك والمدكوك جانت رايدتلة بنت اختهة بس حميزة ما قبل بيهة تذرنح منهة ودك رجلة الا انتي لو ماكو كل عرس

ريم،،يمة جديتي اسولف واني كلبي انتفض هيج يحبني ويريدني لعد لعد شمالة لا مر لا سأل لا وصل يلا هم يجوز ملتهي يحضر هو شبقى باجر رايحة يمة كعدت الصبح على هوسة البنات كمت عالسريع سبحت وطلعت للصالون اخذنة حسنين كملت كلشي وجان مكياي شي خفيف لان هو موصي عمتي فرحة بس برزت عيوني ولونهن بالكحل طلعن يخبلن رجعنة للبيت واني بدء الخوف ياكلني ومن كالوا اجوي متت صرت ارجف وحتى بردت لفوني بالجادر مال البدلة ودخلوا الزلم تقدم هو ناحيتي بالزي العربي وعطرة مغرك روحة بي وكف بصفي ومن الجهةالثاني علي وكف واجة اخوه ابراهيم يكصلنة صور شوية وكالوا نمشي سلمني علي الة وهو يوصي بي علية واني دموعي صارت مطر وامي سودة علية شبعت بجي وحسناء وخالتي يسكتن بيهة طلعنة وهو لازم ايزي الي احسهة راح تذوب بين لمسات ايدة الدافية صعدنة السيارة واخذوا فرة بالمنطقة ورجعنة لبيت عمي نزلوني وذبحوا يم رجلينة لزمت ايدة حيل وغمضت انرعب من منظر الدم دخلنة للبيت وهم هوسات وركص طلع هو يم المعازيم وصعدوني للغرفة ورة شوية وعمتي امة وعمتي فرحة اخذوني لغرفتي جوة جانت بصف غرفة جديتي حلوة ومرتبة واخشابهة ضخمة وفرشة واضوية ومبخرة وباردة تريح النفس طلعت عمتي فرحة سيت النوم وخلتة عالجرباية وكالتلي بحنانهة المعتاد

فرحة،،كومي عمة بدلي هذا حمام ببطن غرفتج

ام حمزة،،علمتج امج شيصير

ريم،،اااي ودنكت خجلانة

ام حمزة،،اي بلا عيارة وتنغوص مو تفلفلن وساعة الصدك تتعايرن وتتبجبجن

ريم،،ان شاء الله عمة

ام حمزة،،يلا يفرحة ورانة معازيم كووام

ريم،،طلعن وكوة جريت نفس من حجي عمتي هاي شلون بيهة نزعت بدلتي بمساعدة غصون اخت حمزة الصغيرة واكبر مني جانت ومتزوجة ولبست السيت وتعدلت وتعطرت وكعدت على طرف الجرباية بخوف كلللش خفت منة ومن الراح يصير احس شخصيتة ترعب اني يمكن ورطت روحي ياا ريمة تخبلتي تحاجين بروحج هذا حمزة حلم السنين هسة تكولين تورطت جابن البنات صينة للعشا وطلعن وضليت اني ملزوكة بمكاني بين افكاري سمعت صوت الهلاهل يعلى ينذر بقدوم العريس ثواني قليلة واسمع صوتة يتشكر منهم واندارت قبضة الباب تعلن دخول الاسد واني هنا احس صار النفس اكبر جهاد رعب ملاني خلاني اتبنجت بمكاني واني المح رجلي وهو واكف مقابيلي بلعت ريك بخوف وافرك ادية بقلق

،،،،،،،

حمزة،،بعد كل التجارب المريت بيهة والعلاقات جزت روحي من النسوان وطاريهن وكلبي قفلتة وشمرت المفتاح بس ما جاي اعرف شيصير بية من اباوع بعيونهة صدك من سماهة ريم عيون الغزلان بس احلى بعد لونهن وسعهن رمشهن كلشي بيهن يخليني اصفن بيهن شجاني،، حمزة رد لعكلك لاتوكعك مرة ،اتحاشيت اروحلهم ابد ورة العقد مااريد اتعلك بيهة انة خذتهة صغيرة اصلا حتى تصيرلي زوجة بدون ما تدخل بحياتي ومشاعري لان لو جانت جبيرة وواعية جانت اكيد تطالبني بمشاعر ما اريدهة اصلا تنوجد بعلاقتنة هذا يمكن اكبر سبب شجعني اتزوجهة واتحدة حتى امي واعاندهة صار العرس ومن طلعتهة ولزمت ايدهة الباردة وترجف بايدة كلبي انتفض بصدري بالسيارة بس صعدنة هديت ايدهة واحاجي بروحي شجاك حمزة ما شايف نسوان متت بكضة ايد من وحدة جاهلة هذا انتة الشيخ العاگل شجاك تخربطت امورك طلعت رأسا بس وصلنة البيت يم الزلم شوية وبلشوا يصبون بالعشا وكالوا نزفك بعد دخلوا خواني وولد عمي يهوسون وامي وعماتي هم وصلت لباب الغرفة اتشكرت منهم ودخلت جانت كاعدة على طرف الجرباية ومبينة خوفتهة تقربت وكفت مقابيلهة وهي ما رفعت راسهة سحبتهة كومتهة اجت بيدي مثل الريشة ياالله هاي شكدوتهة وكفت كدامي وهي مدنكة جليت صوتي وكتلهة بهدوء تعالي نتعشى حسيتهة خايفة كلش مو مال اتقرببهة هسة خليهة تهدء هزت راسهة بموافقة وكعدت مااكلت لكمة كتلهة كومي غسلي وجهج من المكياج عود ما ردتهة تحلى بعيني الي اعرفة المكياج يحلي المرة راحت غسلت شو هاي طلعت احلى يربي شهالبلوة بيش ورطت روحي انة رحت غسلت وكعدت صليت وهي اجتي ركض وراية وكفت تصلي كملت صلاتي والتفتت عليهة لابسة جادر الصلاة لاف قرص وجهة وعيونهة مغمضتهن مكحلات برموشهة وانتهى نظري للرصعة البحنجهة بلعت ريك بصعوبة وبعدت نضري همزين هي مغمضة جانت من حست بية كمت كملت بسرعة وكامت تصفط بالمصلاية صرت بضهرهة وهي كامت ترجف ما اتحملت قربهة وعطرهة رجفتهة شدتني احساس ماحاسة كبل وية كل مرة اول مرة اشوف هالخجل والمستحة هذا خلاني اتلهف اكثر درت وجهة علية واتفاجأت دموعهة مغركة وجهة عكدت حاجبي متنرفز كل لهفتي انطفت من شفتهة تبجي اتخبل من المرة تبجي حاجيتهة ببرود ونترة، ،عليش هالبواجي بعدنة بالبداية راح اصيحلج عمتي فرحة تسكتج ارد الكاج عاكلةوساكتة واتجهت للباب

ريم،،عزة بعيني بس يصيحهة تعرف عمتي وتشن الحرب من صدك ركضت بلا وعي واني اشوفة وصل للباب وحضنتة من ضهرة وهمست لا حباب اسكت بس لا تصيح احد

حمزة،،جمدت من حضنتهة شلون متعلكة بية نفسهة الدافي المتسارع ويشهكاتهة يضرب بضهري درت وسحبتهة كعدتهة عالجرباية انطيتهة مي شربت كعدت بصفهة وهي راسأ ختلت جوة ايدي مثل البزونة الصغيرة خرررب بيومك حمزة زعطوطة دولبت احوالك ما اتحملت قربهة هالكد سحبتهة وتقربتلهة وهي من بس دموعهة تنزل صارت بس هاي لو اعوفهة تخاف اكثر خليهة تعرف ماكو شي يخوف مو متوحش انة بس هي الشغلة منطيهة اكبر من حجمهة وماتسوة هالخوف كلة ابتعد عنهة بست راسهة وكتلهة مبروك وكمت سبحت وطلعت وديت بياضهة لامي واشتغلت الهلاهل عفتهم وطلعت يم الزلم

ريم،،همزين طلع استحي اباوعلة بعد شلون احط عيني بعينة بعد الصار عزة العزاني هاي العرس هيج قلة مستحة بي امداني شو لعبت روحي من الشغلة حيييللل
كمت سبحت ودخلت عمتي فرحة وعماتي كلهن وجديتي ومرت عمي يهلهلن ويباركن خجلت كلش اجتي مرت عمي بصفي وهمست هسة استحيتي عشتوا جا عليمن فلفلتي عالعرس،،،،،،،يتبع