الغزالة في عرين الاسد الفصل الثاني والعشرون 22 - بقلم فيّد عبدالله

مسااء الورد ياورد ما هان علية اخليكم تنتظرون لباجر حضنت الصوبة 😅وكعدت كتبتلكم باارت حلوة مثلكم،،احبكم، اتمنالكم متابعة طيبة

البارت الحادي والعشرون
فيد عبدالله

حمزة،،طلعت من البيت بداخلي حقد وكره وغضب رهيبات ردت اتخبل انة تالي عمري انهان وانضرب،، ريم كسرتني وانذليت هواي بسببهة سوايتهة صعبة تطب عقلي الما متعود عليهة تكسر حجاية وچملتهة بتجاوز وحجاية خلتني افقد كل ذرة عگل بية اذيتهة وغلطت بس انة ما متعود اعترف بغلطي وهالشي استصعبتة على روحي حيل لان بنضري غلطهة اكبر ومينغفر صرت كلما اريد انسى واسامح الكاني زايد بالقساوة وهي ساكتة هالشي خبلني بالزايد اريدهة توكف بوجهي ترفض تحجي تناقش تكلي غلطت، ،، السوتة عزلت فراشهة اتخبلت اكثر وصرت ما اميز من الاعصاب ورجعت غلطت مرة ثانية واتجاوزت على جديتي وعلى ابوي وبضربتة جان يحاول يصحيني وين رايح انة شجاي اسوي،بس الوكت التربيت بي وكرامتي الجنت مخليهة فوك كل احد حتى فوك نفسي ثارت وخلتني اتفرعن طلعت من كل البيت رحت لبغداد ما اعرف شريد وشسوي ومشكلتي انة ما اشور احد ولا اخذ رأي احد عندي رأيي وبس هو الصح

حسام،،شبيك حمزة اليوم مو على بعضك

حمزة،،لا ماكو انة وابوي شوية اختلفنة

حسام،،الله يصفي النفوس ميخالف اتحمل هذا ابوك شما يسوي لمصلحتك اني اتمنى ابوي يرجع يوم واعوضة شكد شلعت كلبة الله يرحمة

حمزة،،الله يرحمة

حسام،،شنو رايك نروح نسهر بمكان مرتب

حمزة،،عوفني من سهراتك بطلتهن

حسام،،منسوي شي بس نباوع بعيونة

حمزة،،صدكت انت شكد حباب عاد

حسام،هههه مشكلتي انت قاريني

حمزة،،اطلع بس لا تلعب نفسي بملحتك

حسام،معليةبيك والله

حمزة،،رجعت للشقة ورة ما خلصنة الشغل وهي تصير قريبة عالمعرض كلش وماخذهة لان شغلي يحتاج ابات وابدل واطلع وارجع،سبحت وبدلت وقفلت تلفوني،، لسة النار بية تجووي مر علية حسام بسيارتة

حسام،،والله تخبل بالرسمي دذب الدشداشة

حمزة،،اسكت وسوق

حسام،،حاضر بابا مو البنغلادش مال الخلفوك اني

حمزة،،ههههه خررب ببليسك

حسام،،والله عندك سنون عبالي طايحات وتستحي تضحك

حمزة،،اذا متسكت اخليك انت التستحي تضحك ،،وصلنة لمكان مرتب ،،طلع عندك ذوق

حسام،،شعبالك دنزل وشوف القطع الجوة

حمزة،،حساام ترة ارجع تدري ما جاي لهيج سوالف

حسام،،يمة خفت، ،يلا يلا لا تخزر راح ابلل ملابسي ومالي خلك ارجع ابدل

حمزة،،باع السوالف التعبانة، يلا انزل،،نزلنة والمكان هادئ ومرتب حسام طبعا يشرب نزل شرب عادي انة جربتة بنزوات قبل بس ما حبيتة ولا اتقربتلة بعد يمكن عيب بحقي اذكر هالتفاصيل بس ترة ماكو انسان كامل انة جاي اعرضلكم كل اغلاطي بكل صراحة،،فيد عبدالله،مااعرف ليش اعصابي والضغط والصار خلاني احب اجرب يمكن ردت انسى واريح عگلي ولو شوية شربت شوية وعفتة احس النار البية متطفى باي شي شوية وكمت

حسام،،ها بسم الله وين رايح

حمزة،،طالع ما يعجبني اظل بعد،طلعت ولاكاني حسنين

حسنين،،يا اهلا بابن العم

حمزة،،هلا حسنين شتسوي هنا

حسنين،،نفس الجابك بس انة عالاقل ما عايف وراية حرمة وابن بعدني بطيش الشباب

حمزة،،حسنين الزم حدك

حسنين،،مااشي يا ابن العم مااشي

حمزة،،يلا حسااام

حسام،،جاي جاي،،هلا حسووون ها تعودت رجلك عالجية

حسنين،،هلا حسام،،من رخصتكم

حسام،،شبي هذا ابن عمك ،،شبيكم انتو اليوم كلكم وجوهكم مكلبة

حمزة،،يلا حسام

حسام،،يلا يلا امشي

،،،،،،،،،،
ريم،،طلع حمزة وعمي ضااج حيلل ما يهون عليه يضرب ابنة الجبير

الجدة صالحة،،يستاهلهة يا حسين ابنك تفرعن وزادهة

ابو حمزة،،خلي يرد لعگلة ويعرف يتصرف عدل عگبهة نحجي

ريم،،طبيت سبحت وكعدت اصلي وادعي الله يصفي النفوس،،مرت يومين وحمزة ماكو مختفي وجهازة مغلق عمي بدة يقلق اخر شي دك ابراهيم على حسام صاحبة وكلة يمي بالمعرض نشتغل ارتاحينة شوية بس اني احس روحي بالضلمة مااعرف شجاي يصير ووين راح اروح،،بالليل اختنكت كلش طلعت بالحديقة اني واسد نشتم هوة شوية واجة ابراهيم شايل علاكة حلويات لاسد اخذة مني يبوس بي ويوكل بي

ابراهيم،،يلا ريم انطلقي وغردي شعدج

ريم،،باوعتلة عيوني متروسة دموع،،بس انتة تفتهمني

ابراهيم،،غير اخيتي

ريم،،واكثر من اخو

ابراهيم،،لا تعقدين الامور على روحج وتكبريهة وتاكلين روحج

ريم،،مو بيدي ابراهيم شايف شكد جاي تتعقد شكد احاول امشي الامور واعديهة بس بيهة وما تتعقد اخوك صعب وعنودي بس هو الصح بكلشي واحنة الغلط بكلشي احس تعبت مالي طاقة

ابراهيم،،ما ادري شصار بيناتكم وليش وصلت الامور هيج وكبرت المشكلة بس الاكلج حمزة مو بسرعة ينسة اذا تحبيه ينرادلة صبر طويل

ريم،،اني لو ما احبة باقية وياه لهسة بس صرت اخاف من الجاي وياه مينحزر تدري خايفة يرد هسة من بغداد متزوج اموت ساعتهة واعوف كلشي واشرد

ابراهيم،ههههه مايسويهة منين يلكة هالمرة ويرد متزوجهة،،حمزة تنهديلة بنات شيوخ نسبهم شرف وما يقبل عود يجيب اي وحدة بس حتى يقهرج لو يعاند اتطمني من هالناحية

ريم،،زين ومن يرجع شالحل والتالي نظل هيج

ابراهيم،،انت بيدج ريم كلة بيدج لا تضلين تبجين ومستسلمة خليلج وجود بحياتة

ريم،،ما اعرف الله يسهل ادعيلي عليك الله

ابراهيم،،باجر المغرب افتح زيگي وية الاذان وادعي اكول ربي عقل هالمخابيل الثنين ترة لعبت رواحنة من ورة مشاكلهم

ريم،،صدك صاير البيت جحيم من ورانة مو

ابراهيم،،احنة عايلة واحد بشيل الثاني ويوكفلة بكلشي

ثريا،،هاي انت هنا برهومي ادور عليك

ابراهيم،،تعاي اكعدي يم هذا القرد اكلي وياه حلويات

ثريا،،ياا ليش ما جبتلي علاكة زعلت والله

ابراهيم،،اكلي وياه واسكتي بلا تنعوص

ثريا،،والله لو ما ابنك فلا اكل بس هو مشتهي حلاة

ريم،،قربت العلاكة عليهة ابتسمت بوحهي ومدت ايدهة تگلب بيهة،،ثريا احس داخلهة نظيف بس المحيطين هواي يأثرون هليهة كلمة تجيبهة وكلمة تردهة طبينة ورة شوية كلمن راح لغرفتة ولهة نامت وهدأت الا اني اتنگعت مخدتي بدموعي مثل كل ليلة، ،،اسبوع مر يلا رجع حمزة جنة كاعدين نتغدة واني كالعادة اكل لكمتين واكوم كمت اخدر بالجاي بالمطبخ وطب هوة ،،اصلا ما باوع ولا سلم علية طب للصالة كال السلام عليكم اخذ اسد وطب للغرفة صاحت عمتي وراه تتغدة يمة ما رد طب وطبك الباب

الجدة صالحة،،على كيفك يمة خلي يتهدة على كيفة لا تحرك بروحك

ابو حمزة،،الله يهدي

ريم،،كملنة هوسة الغدة واخاف اطب للغرفة اسمع اسد يهوس ويكركر بعدهم،فيد عبدالله، كاعدين طبيت لغرفة جديتي

الجدة صالحة،،هاا خية شعدج جايتني جدامي لغريفتج

ريم،،جدة بعدة كاعد

الجدة صالحة،،واذا لا تنطيه عين روحي وكعدي كبالة يلا بساع

ريم،،طلعت وصلت غرفتنة اخذت نفس وفتحت الباب طبيت هو سكت من سوالفة وي اسد بعدة بملابسة ما مبدل، ،همست احضرلك الحمام باوعلي وما رد دار وجهة يحاجي باسد اخذت ملابس الي طبيت سبحت وحضرتلة الحمام اجيت اخذ اسد

حمزة،،عووفي

ريم،،عفتة يمة ورحت امشط وكعدت عالفراش بالكاع سكت اسد كلت يجوز نام التفتت نايم اسد وحمزة يمسح بشعرة وصافن علية اجتي عيني بعينة جانت نضرتة باردة خالية من الحنية التعودت عليهة بنضراتة التهيم بية من يباوعلي دنكت كوة اتنفس

حمزة،،تعاي شيليه

ريم،،كمت شلتة وهو كام يسبح فرشت بالكاع ونمت طلع هو من الحمام لبس وطلع وما رد بعد لليل دكت ال12وهو ماكو ما اعرف شوكت غفيت كعدت هو نايم عالجرباية شوكت رد ما اعرف،،استمر ببرودة وكلماتة المعدودة اسبوع وطكت روحي صارلنة بالشهرين تقريب على هالوضع كالعادة بضعفي وفطاريتي وحجي الباقين ارد واميل على روحي جديتي وعمتي فرحة ظلن يلحن علية اكسري الشر برد هسة اتحضريلة اكيد مشتاقلج وراح ينتهي كلشي بس تصيرين بحضنة سمعت الكلام واتحضرت بملابس نوم جديدة ومكياج وسرحت شعري على طولة نومت اسد وكعدت انتظرة تأخر كلش واني اتحملت كوة مفتحة بس اريد انهي هالبرود تعبت بالثنتين تقريبا وسمعت صوت الابواب تتقفل كمت ركض رشيت عطر وعدلت شعري وشغلت الانارة الخافتة دخل للغرفة باوعلي وعگد حواجبة

حمزة،،شكووو

ريم،،ركضت لحضنة بسرعة وحضنتة حيل،، بقة جامد ما بادلني الحضن ابتعدت وباوعت لوجهة وهمست والله اشتاقيتلك ما اشتاقيتلي انتة كانما هالكلمة جانت اشارة البدء للاعصار الاخذني اتقربلي بس جان عصبي كانما جاي يأدي واجب،، ابتعد عني وسحب المنشفة ودخل للحمام واني لبست وطلعت للحمام البرة سبحت ورجعت لكيتة نايم اتقربت حضنتة ونمت، ،كعدت الصبح لكيتة يبدل، ،صباح الخير كلتهة بابتسامة،فيد عبدالله، باوعلي ورجع دار ضهرة ورد وهو يتوجه للمراية مشط شعرة ولبس ساعتة اتقربت منة وكفت بصفه همست،،شبيك حمزة لسة ضايج مني

حمزة،،وشنو التغيرر ،ان جان قصدج على الصار البارحة فانتي اجيتيني وردتي حقوقج وانطيتجياهة اما اني ما رايد منج شي ولا الي كل نفس

ريم،،بقيت واكفة بمكاني احس حتى دخت لزمت حافة الميز،،وهو كمل اخذ جنطتة وطلع لبغداد ، ،،طبك الباب وانفتح الحضر عن دموعي نزلت تحرررگ رخصني كلش واذاني وجرحني بنص كلبي زرع خنجر مسموم بحقدة وانانيتة كعدت بمكاني ابجي ما كدرت اوكف حتى على رجلية احس كرهت روحي كللش ولعبت روحي من نفسي كمت للحمام اتقيأ وماكو شي بمعدتي غير العصارة احس انتهيت كعد اسد يبجي ويتنعوص حتي ما بية اوصل واشيلة وكفت يم الباب وصحت عمممة عمممة فرحة

فرحة،،ها يبعد عمتج

ريم،، طبت عمتي حجيت واحس كلبي يركض وكوة اتنفس، ،عمة اس اسد ووكعت بيدهة ما اكدر احجي او افتح عيوني بس اسمع والنفس كوة اسحبة اسمع عمتي تصيح يمةة رسمية الحكولي

الجدة صالحة،،يا ستار يا ربي دخيلك شبيهة البنية

ريم،،فقدت يومين صخونة دكتني احس عضامي انطحنت اخذوني للطبيب وكوم علاجات وابر وكانولة وحمزة ببغداد ميدري شسوة بية لا مو هو السوة اني السويت بروحي، ،،رابع يوم يلا بديت اصحصح شوية شوية شلت الكانولة وطبيت سبحت طلعت مددت بغرفة جديتي وطب ابراهيم يحجي وي عمي وصوتهم واصلنة

ابراهيم،،بوية مو هيج انتة ما تعرفة لحمزة شون يعاند

الجدة صالحة،،شصاير يمة

ابو حمزة،،ماكو يمة

ريم،، راح عمي لغرفتة ورجعت جديتي سحبت ابراهيم للغرفة وسألتة

الجدة صالحة،،احجي انت يمصگوع راح يجلطوني اولاد حسين

ابراهيم،،ابوي خابر حمزة ورزلة جيف عايف مرتة مريضة وما يدري ولاسال واتعصب عليه وصيح ورد غلط عليه

ريم،،يبوو عليج يا ريم يبوووو كل هالتدخلات تخلي يعاند اكثر ،،يومين عدت وراهة يلا رد حمزة مو هوة الجوة عيونة اسود ولحيتة طولانة ما مزينهة طب للغرفة بس سلم علينة بجمعتنة وطب ورة نص ساعة طبيت للغرفة لكيتة نايم بهدومة عفتة وطلعت للعصر التهينة مشية بمضيف عمي عشيرتين عركة بينهم على كيعان وضاربين بيهة بيت وحدة من العشاير وجتيين لعمي يحلهة التهينة نحضرللهم بالمي والجاي قواري كبار نخدرهن وندزهن ومي اكو بصف المضيف مثل المطبخ صغير بي عين ومجمدة صغيرة نحضر كلشي وندزة هناك كل كعدة والولد يصبون وينگلون مناك لان يبرد لو ياخذوه من المطبخ بعيدة المسافة كملنة الاستكانات والصواني والشكر وكلشي نگلوهن صادق وابراهيم كهد حمزة بهالخبصة،فيد عبدالله،

حمزة،،شكو صادق هم كعدة

صادق،،اي يخوي بين عشيرة.....وعشيرة...

حمزة،،ها ها مال الگيعان مو

صادق،،اي

حمزة،،ابدل ولاحگم

ريم،،طب سبح وطلع مبدل ومزين وعطرة سابقة كاشخ على اخر حباية واني اباوع على روحي جني شبح صايرة وضعفاانة كلللش رايحة يمكن والله وزني ايامهة بالاربعين صار ووجهي اصفر،،،طبيت سبحت وبدلت وكعدت يم جديتي للمغرب كللش وطب عمي يصيح صوتة بالمطبخ وصوت حمزة يحجي وياه ركضنة كلنة واني شايلة اسد الجنت ارضع بي وخرتة وكمت وصلت للمطبخ جديتي تسحب بعمي

الجدة صالحة،،بسك يمة اتهدة خل نفتهم شمالكم راح تنجلط هدي يمة

ابو حمزة،، شهدي يمة ابني حزام ضهري وجبيري متخبل وما عاد يحشم احد ولا يحشمني حتى انة

الجدة صالحة،،شسويت يمفلوك راح تموتنة انتة شمالك رديت ردود تكبر لو تصغر

حمزة،،جدةة انة جبير وشوري من راسي وحجايتي انة كدهة ومسؤل منهة ما اعرف وين الغلط بالسويتة وليش ابوي هيج متعصب

الجدة صالحة،،هو شصار يا حجاية راح تموتوني احجوا

حمزة،،هدولي مرة وانة قبلت بهديتهم وباجر جايبيهة،،،،،،،،يتبع