الغزالة في عرين الاسد الفصل الثلاثون 30 - بقلم فيّد عبدالله

مسااا ال 🌸🌸🌸🌸🌸 شلونكم ورداتي،،متابعة طيبة

البارت الثامن والعشرون
فيد عبدالله

ريم،،رجعت للبيت وكبل للحمام ابجي بخبال صرت انقهرت على حنان وعلى روحي وعلى ابني نص ساعة ورمت عيوني طلعت اخذت ملابسي وطبيت سبحت اريد النار البية تطفى، ،،كرهي لحمزة احسة تضاعف والله ما توقعتة هيج يكدر يسوي هيج يهين انسانة وياذيهة شذنبهة هية ليش مستمر بظلمك شنو انتة بس انتة بالوجود محد تحسبلة حساب ،،طلعت اجتي حسناء وختام

ختام،شكووو رحتي وبعد ما شفناج شكالتلج حنان

ريم،،ما كالت شي

ختام،،لا صدك وعيونج المورمة هاي غثتج مو الا اطيح حظهة

ريم،،لا لا عوفيهة البيهة مكفيهة خطية دير بالج عليهة مريضة ومتتحمل لا كلكم عليهة

ختام،،اووف والله مرضهة يقهررر

حسناء،،اي خطية يجوز حتى ما اصارت حامل جيف هيج مريضة

ريم،،باوعتلي حسناء مرتبكة، ،ابتسمت بوجهة،،،الله يباوعلهة تعالن للحديقة الورة طلعت وكعدة ولمة واسد دز عليه ابوه وديتة وي ختام طبينة سرور بالمطبخ تأفأف

سرور،،عود عليش متكولن تعاي ويانة

ريم،،تنهدت ليش الا نعزمج يا سرور انتي غير منة وبينة وصرتي وحدة من هالبيت انتي وحدج تجين تكعدين مو الا نعزمج

سرور،،ما احب هيج تكولن بعدين اني لزكة

ريم،،لا منكول انتي اختنة الثالثة

حسناء،،لا تعزلين روحج سرور انتي منة وبينة

ريم،،كامت ما عاجبهة الحجي طبيت للغرفة امي تصلي رحت توضيت ورجعت اصلي كملت امي تسبح وتباوعلي،،،كولي يمة عندج حجي خزرتج هاي تخوف هههه

ام ريم،،عليش عازلات مرت كاظم ريم لا تسوين فتنة بالبيت

ريم،،يمة اني اسوي فتنة شسويت يمة هاي جيف طلعت شميت هوة شوي وية البنات وبعدين من طلعنة هي نايمة اروح اكعدهة من نومهة واخذهة

ام ريم،،لا انة منتبهة عليج انتي وحسناء حزب وعازلات سرور ادري تحبين حسناء انتي وبس

ريم،،صار يمة منا وهيج كلشي اشارك سرور بي هاي هية

ام ريم،،اي الله يرضة عليج

ريم،،تتدللين يمة،،كملت وكمت اسوي بالعشا وحسناء راحت تكوي دشداشة علي كملت العشا كلة ووديتة للصالة ورحت صحتهم ككلت وطبت سرور للمطبخ تعزل بي كتلهة عوفيهن اني اغسلهن

سرور،،شهالمحنة النزلت فجأة

ريم،،ما رديت عليهة حاولت اعبررر كالعادة واخذت المواعين وغسلتهن وكملت المطبخ وجابوا اسد اخذتة ابوس بي شايل بيدة علاكة صغيرة عبالي حلويات كالعادة من ابوه يرجع محمل من ياخذة حمزة اخذتهة باوعت ببطنهة علبة حمرة اخذتهة للغرفة سديت الباب وفتحتهة مستغربة ببطنهة كلادة اسمي كلبي دك بسرعة ليش دزهة وشعجب ما دازلي اي شي قبل خاف مو منة لا اذا مو منة ما دزهة وي اسد ارجعهة احسن خلي ارجعهة اي اي ما اريدهة اصلا عيب اقبلهة على روحي وعلى خواني يهديني كلادة ليش ضميتهة بسرعة ورجعت ابدل لاسد وصافنة اليوم شكد صارت احداث عقلي اتشتت نمت بسرعة ما اريد افكر بكل الصار كعدت وي الاذان شبعانة نوم كمت صليت و عجنت اجاني الواهس ورجعت اقرة قران بين ما اختمر وامي يمي تسبح وتستغفر كمت اخبز للريوك وسمعت صوت ختام تصيحني من الحايط

ختام،،ولج من المطبخ وشميت ريحة الخبز الحار

ريم،،هاا بتي هنا لازم

ختام،،اي عنفص صادق شسويلة اهم شي عندي بيت ارجهلة انطيني خبز اتربك منة

ريم،،هههههه هاج هاي الف عافية،،شلت صفطة خبز وانطيتهة لختام ورجعت اخبز النة

ختام،،اذا ضليت للعصر امرلج

ريم،،كل الهلا تعاي اتونس والله،،كملت الخبز وطبيت امي تسوي بالريوك هي وحسناء ونسمع صوت كاظم علة بالغرفة

كاظم،،ميصير هيجي انتي شني حضرتج اميرة وانة ما ادري

ام ريم،،يمة شكو صلي عالنبي

علي،،يمة عوفيهم مرة ورجال

كاظم،،لا خل تجي تاخذ هاي من وجهي لا والله ادفنهة عدلة موتتني

ريم،،فتح الباب كاظم ويصيح اعصاب نار اول مرة اشوفة هيج عصبي

علي،،استهدة برحمن يخوي مو هيج عيب تظل بنت عمك

كاظم،،صار شد اداري واعلم واكول خطية وميخالف لا عليهة بية لا باكلتي لا بهدمتي هاك اريد اطلع ماكو دشداشة مكوية يوم كعدت سوت ريوك وكفت طبخت زعطوطة هية مو بكد ريم

علي،،ميخالف عيب بيناتكم بيناتكم ميصير

كاظم،،لا خليهة تفشل كدامكم وتتعلم البيناتنة ميفيد بعد

ريم،،طبيت وسديت الباب وهي كاعدة عالجرباية تبجي،،كعدت بصفهة

سرور،،شدعواه هيج كتلة اكويهة هسة بساع ميسمع مو عيب يصيح وفضحنة بنص البيت

ريم،،ميخالف همة من يتعصبون ميسمعون احد،،بس بدون متزعلين هم حقة ما اشوفج مهتمة بي لا باكلة يحبهة تذكري لا بلبسة توكفين تكوين اني ما اتدخل اكول تتحسسين بس حياتكم واستقراركم يهمني

سرور،،ما بية حملي بس نوم شسوي

ريم،،ميخالف بالليل اغسلي هدومة اكويهن رتبي غراضة واذا تعبانة صيحيني وياج اهم شي يلكة راحتة يمج حتى يحب الكعدة يمج لا تخليه يكره كعدة البيت خلي ميعول يخلص شغلة ويجي متلهف الج نضمي وكتج وهم جايكم جاهل اعرفي شون تنضمين كلشي انتي راح ترتاحين اعتبريني اختج وجاي احاجيج لا تضوجين مني واذا تعبتي تعاي وكليلي اعاونج مابيهة شي احنة بيت واحد وواحد يشيل الثاني لو تعب مو صح

سرور،،امم صح

ريم،،يلا كومي غسلي وجهج وتعاي تريكي شذنب البطنج هو يبرد وتردون مثل كبل واحلى

سرور،،شكراا

ريم،،العفوو ،،،اخذت دشداشة كاظم كويتهة عالسريع وكعدوا يتريگون وسرور بقت بغرفتهة ما طلعت كاظم بدل برة الغرفة ومشط وطلع وامي طبت لسرور تحاجيهة كملت اني شغلي وطبخت وعادي مر اليوم بروتينة سرور ضايجة كلش وماطلعت من غرفتهة ادري ضاجت لان حجة عليهة كدامنة وحقهة كل مرة تضوج يحجي زوجهة عليهة كدام الكل العصر فرشنة بالحديقة واجتي ختام رحت صحت سرور اجتي كعدت يمنة ختام كعدت بصفي وحجت بصوت ناصي

ختام،،اكلج البارحة حمزة شدزلج بيد اسد شفتة من طلع بيدة علبة حمرة خلاهة بعلاگة شني شبيهة

ريم،،عزةة لا يسمعون محد يدري راح ارجعهة اصلا

ختام،،شنية هية

ريم،،كلادة باسمي

ختام،هممم وشكو بيهة ليش ترجعيهة مو ما قبلتي تاخذين مصرف الج كل شهر

ريم،،ما محتاجة كلشي منة خلي كلادتة وفلوسة الة خواني مامقصرين وعمي كلما يمر ينطيني بعدين شفطنة حلمان هذا

ختام،،خاف عيد ميلادج

ريم،،صفنت اتذكر، ،تدرين ولا ابالي ولا ادري شكد بالشهر اي البارحة عيد ميلادي صدك

ختام،،لا اني من شفتهة ضليت احوس،،،شفتي شون يتذكر،،ولج ماكو الصبح من انطيتيني الخبز خليتة عالميز وسوينة الريوك وخليتة عالسفرة

الجدة صالحة،،هاي خبز ريم موو

حمزة،،اي جدة

ختام،،هو رد بدون ميحس على روحة غلس وسوة روحة ياكل

ريم،،هسة من ترحين ارجعهة ويتج الكلادة ترة

ختام،،شعلية اني دزهة بسد ابنج رديهة بيد ابنج حاشرتني شنوو

ريم،،ما اريد هالكلادة احسن ارجعهة

سرور،،يا كلادة

ريم،،هاي كلادةعود اشتريهة من اخت ختام وما عجبتني

ختام،،اي كلت تلوكلج حلوة

سرور،،خل اشوفهة يجوز اخذهة عندي جم فلس جوة ايدي

ختام،،هاا مو بطلت متبيعهة

ريم،،بقت تباوعلي سرور بشك،،خفت تظل تلح وخفت ارجعهة بيد اسد ويحسون خواني شنو دازة علاكة بيدة ما صايرة گبل شسوي شهالورطة، ،لليل ودز حمزة على اسد ردت ادزة وياه كلهة كاعدة بالصالة بقيتة وسرور صارت تلف وتدور تسأل تالي كلت ارجعهة بيد ختام واليصير يصير بدت السنة وبلشت اداوم وادرس ملتهية سرور وكاظم رجعوا حبايب وبدت تهتم بي بس ابد ما تصفة وياي رغم شكد صرت زينة وياهة تطلع سالفة وتزعل وحدهة اسامة كلش صار وية الولد صحبة وطبات وسهرات ويتعلل يمنة ومرات يبات كام وسرور تحترك لو اجانة عبالهة بيناتنة شي واني الله الشاهد ما اباوعلة غير اخو والله بس هي عبالهة اكو شي خاصة من يدز كتب بيد حسنين تتخبل وبمرة جان بايت يمنة صدفة جمعة كعدت عجنت مثل كل مرة وطلعت اخبز شوية وحسيت واحد يتحمحم وراية التفتت اسامة واكف مبتسم واديه بجيوب تراكة جان حتى ميلبس دشداشة مثل الولد

اسامة،،صباح الخير هاي شجاي تسوين

ريم،،صباح النور،،ها اخبز عادي

تسامة،،والله زين يعني شاطرة دراسة وشغل موو

ريم،،الحمدلله هسة اسوي الريوك، ،ردتة يدخل زحمة ما متعودة اسولف وياه

اسامة،،لا اني اشتهيت خبز حار

ريم،،ااي تفضل دنك قسم خبزة

اسامة،،شلونج هالسنة، جاي توصلج الكتب موو

ريم،،زينة،،اي اي شكرا بس ما الحك اقرة هواي ادرس

اسامة،،اي عفية شدي حيلج حتى تطلعين معدل هالي وتتعينين وظيفتج استقلاليتج صح خوانج ميقصرون بس براتبج تحسين روحج ما محتاجة احد

ريم،،هاا ما مفكرة اتعين

اسامة،،ليش لعد اليتخرج يصفط الشهادة ويكعد المن التعب لعد

ريم،،ردت اغير من نفسي بعد الصار اغير روحي

اسامة،، احسن خطوة كملي كلية وكملي ماجستير اثبتي نفسج

ريم،،لا هوب يمعود وين اكمل موزين اقتنعوا اكمل معهد ميقبلون حتى ابني يحاربوني بي لو فكرت بالكلية

اسامة،،شعليهم ليش تضلين جوة ايدهم محد الة حق يتدخل حمزة بعد طلعتي من عصمتة مو طلكج

ريم،،اي

اسامة،،ميحقلة يتدخل اذا تردين اني احاجي

ريم،،لالا هو ميتفاهم وي خواني نوبة تتدخل انتة،،ما ابالي اصلا كلية

اسامة،،حرامات يلا اتعيني لا تضلين كاعدة

ريم،،ان شاء الله، ،انتة تخرجت موو

اسامة،،اي وانتظر يطلع تعيني،،ادعيلي

ريم،،ابتسمت الله يوفقك

اسامة،،شكلج كلش يتغير من تضحكين لا تخلين احد يزعلج

رم،،خجلت كلش دنكت ما رديت

اسامة،،اعذريني ترة اني متعود احجي بصراحة اسف اذا يزعجج اسلوبي

ريم،،ميصلح هنا

اسامة،،هههههه انتي هم صريحة

ريم،، شلت راسي واشوف كاظم وسرور بوجهي، ،كاظم يباوعلي بغضببب

اسامة،،صباح الخير يابة شلونكم، ،ها دعبلة شونج

سرور،،زينة الحمدلله رحت اكعدك ما لكيتك بالديوانية

اسامة،،كعدت من زمان وطلعت اتمشة ولكيت ريم تخبز ظلينة نسولف

ريم،،بكلبي اكول عزة شتحجي انتة اسكت

كاظم،،تعال للديوانية بين ما يحضرن البنات الريوك

ريم،،كملت الخبز الباقي بساه وطبيت للمطبخ واباوع امي بودهة تاكلني

ام ريم،،تعاي وراية للغرفة

ريم،،غسلت ورحت ورة امي

ام ريم،،شعندج واكفة وي اسامة بالترك متستحين انة تالي عمري تجي سرور تكلي تعاي شوفي شون بنتج واكفة مو زحمة ولج الزعطوطة توكف بوجهي وتكلي هيج من وراج

ريم،،شسويت يمة ابن عمي وواكفة اسولف وياهة شبيهة قابل

ام ريم،،البيهة زحمة وعيب يا يوم هيج وكفتي انتي وي ولد عمج

ريم،، يمة ترة والله ما سويت غلط والله هو اجة يسولف اطردة قابل، ،ما حسيت الا امي ضربتني راشدي

ام ريم،،چلبوچ خوانج انة اعرف شون اطيح حظج بعد

ريم،،طلعت امي واني انهاريت ابجي امي ما بيوم ضربتني هسة تجي تضربني من ورة شنو شصار هوة،،ما طلعت من غرفتي للظهر رجعوا خواني واسمع كاظم يصيح ويكللهم الولد طبعة غير طبعنة ورابي ببغداد واحنة هالحجي ميصرفنة

علي،،وشصار منعرف اختك

حسنين،،هي هم غلطت ليش توكف وتاخذ وتنطي وياه يالحجي متعرف اكو ناس بكلشي تدقق وتحرك

كاظم،،شقصدك مرتي،،هي من حرصهة غيررر

حسنين،،لا مو من حرصهة كلش زين تعرف هي تخاف لا اخوهة ياخذ اختي شني بوية مو من مقامة خاف منو يطول اظفرهة شناقصهة

سرور،،شمالني اخلي اخوي بشهادتة ياخذ وحدة مطلكة وعندهة جاهل

كاظم،،سروور ادب سز تكولين على اختي هيج

ريم،،وكاظم لزم سرور ضرب وكتل وهي حامل وكوة جروه منهة وهي اتخبلت من ضربهة وطبت للغرفة تلم بغراضهة وتدعي علية واني كرصت بغرفتي حاضنة ابني وابجي شوية واسمعهة تصيح هسة توديني لاهلي مالي عيشة يمك

علي،،اخذهة كاظم

كاظم،،تنجب وتكعد

علي،،كااااظم وديهة

كاظم،،نمشي برايهة

علي،،جاي اكلك ودييييييهة

ريم،،يمة صوت علي خلاني اررجف اسمع كاظم صاح بيهة يلا جدامي بلكن عمي يعيد ترباتج حسبالي منة وبينة صرتي

ريم،،هدأت الاصوات واني خفت بالزايد شوية وانفتحت الباب طب علي والتفت

علي،،عوفونة وحدنة

ريم،،يمة متت بدمي طبك الباب علي وكعد عالجرباية واني واكفة وحاضنة اسد حيل ،،علي والله ما صار شي يسوة لكل هالهوسة متعرفني اني شنو

علي،،اني اعرفج اي غيري ميعرفج المفروض متحطين روحج بهاللغوة كلهة

ريم،،والله هوة وكف وسولف سوالف عادية عن دراستي ويشجعني والله بس هيج

علي،،بس هيج

ريم،،اي

علي،،وسالفة ضحكتج حلوة هم من ضمن سوالف الدراسة

ريم،،سكتت ودنكت

علي،،ترة كاظم السامعهة وهم راد مطيح حظة بالديوانية

ريم،،رديتة والله كتلة حجيك ميصلح

علي،،ريم ريم لا تنطين مجال لاحد ابد ابد شفتي المنج وبيج شون ينتهز الفرص يوكعج

ريم،،دنكت وطاحت دموعي،،كل هاي عبن اتطلكت واذا شذنبي والله ما سويت حرام ولا ماذية احد
علي،،كافي لا تبجين،،باعيني ريم اتعلمي من هالدرس اتعلمي وزني تصرفاتج صدي وواجهي والمايعجبج تحجين وياه كوليهة بوجهة والما ترتاحيلة كوليهة بوجهة لا تجاملين وتوكعين بمشاكل هسة عاجبج الصار هذا كلة

ريم،،ما قصدي والله ما قصدي

علي،،الله كريم نشوف لباجر شتصفى هم الي حجي وي عمي على حجاية بنتة

ريم،،كام علي بس ضايج مني مبين، ،،امي طب تحجي علية موتتني بكلامهة ليكول متعمدة

ام ريم،،من وراج انخرب بيت اخوج شجاج تجيبين الحجاية لروحج عوبة انتي

ريم،،يمة املخ روحي شسويت شسويت،،كمت املخ بشعري وادك على وجهي وحسناء تلزم بادية واسد يعيط خايف احس اعصابي فلتت كوة بديت اهدء ودموعي ما نشفت لليل علي راح لعمي حسين كلة على سرور زعلانة ما تطرق لتفاصيل العركة وكلة اريد اتدز عليثى عمي اسماعيل نتفاهم بنتة هم تجاوزت المهم ثاني يوم واني ما اكلت شي من قهرتي احس كلهة محملتني اللوم بس حسنين يطمن بية ويكلي ما غلطتي هي هالخبلة من زمان تدور عليج الزلة علي يكلي انتي المفروض متحطين روحج بهيج موقف المفروض تعلمتي لهاي ضايج مو مسألة ثقة او غلط كاظم ما علق عالموضوع ضايج وساكت هم خطية مرتة وحامل وضربهة بلحظة غضب وطلعت من بيتهة،،لليل دز عمي حسين عالولد وجاي عمي اسماعيل وولدة يتفاهمون بمضيف عمي حسين

علي،،السلام عليكم

الكل،،وعليكم السلام

ابو حمزة،،بوية احنة خوان وهالسوالف تصير بكاثل البيوت هي المرة هم مايصير تتجاوز على زلمتهة وتصيح بوجهة بنص خوانة

اسماعيل،،ليش شكالولك حسين ما عرفت اربي

علي،،العفو عمي ما كلنة هيج بس احنة حاسبيهة منة وبينة ليش تطلع سوالف عوج وتطعن باهل بيتهة غير احنة بيت واحد

اسماعيل،،بوية هي ترة ما تسوة وكبرتوهة قابل اسامة شعندة وي ريم خوان همة ترة ومن وكف وحجة وياهة حاسبهة اختة والله الشاهد

اسامة،،يابة ما حاسبهة غير مثل خواتي وحجيت وياهة ما تسوة والله وهم شتردون اني حاضر اتعذر الهة لخوانهة ولو ما صار شي والمفروض احنة ولد عم وخوان

حسنين،،اباوع لحمزة لمعت عيونة بغضب،،وانة بودي اكوم اخنك اسامة اليجفص

حمزة،،ليش هو شصار غير نفتهم

ابو حمزة،،علي من اجيت وحجيت ما جان هيج الحجي شني اساس المشكلة

علي،،عمي شغلة ما تسوة وكبرت

حمزة،،اي نسمعهة هي شنية الما تسوة

اسماعيل،،بوية الصار واكف اسامة حاجي وي بنت عمة وهية تخبز حجي عادي بين الخوان يصير شونج دراستج خوانهة ما راضين

كاظم،،شني عمي ما نعرف اختنة احنة قابل، ،لا كول لبنتك لاجتي كعدتني من نومي تعال شوف اختك ترضاهة عمي شبيهة اختي شني ما نعرف رباتنة

اسماعيل،،هاي هية تعرفون بنتكم وتعرفون ابنة عليمن هالزعل وطاگهة وهي حامل وجايبهة الي زعلانة

حسنين،،عمي بنتك من حجتهة تشكك باخلاق اختي ووصلت بيهة تستعر منهة تاخذهة لخوانهة جيف نصيبهة ما كمل وتطلكت ومنو كاللهة نطيهة لولد العم بعد وباوعت لحمزة خزرتة باوعلي وحجة

حمزة،، ومنو كللكم متطلگة هية

علي،،هالشي منتهي ماجاي نتناقش بي

حمزة،،وصلتكم ورقة طلاگ مني

علي،،حجيتهة بلسانك وخلصت والورقة من تحتاجهة تطلع لان ورقتي جانت حجاية زلم

حمزة،،مو كتلك علي مو انة الانغصب على شي ما مقتنع بي ماصفنت ورةما بردت ماجنت مقتنع اطلگ رديتهة وهي بعدتهة واكو شهود

ابو حمزة،،شتكول انتة شتخربط ولك

حمزة،،والله هذا الصار بعد مرتي ورايدهة وبيناتنة ولد عليمن اطلگهة

ابو حمزة،،ما حجيت لعد صارلك سنة وفوك ذابهة يم اهلهة

حمزة،،اي خليهة هسة انة كايللهة ردي خليهة عند اهلهة بس هي مرتي تسمت باسمي ولغيري متروح لو تمووت متصير لغيري

علي،،هي كنتوررر لو قطعة هدوم وذابهة حمزة انتة تخبلت

حسنين،،ما اتحملت تلازمت اني وحمزة وتضاربنة وهو يصيح مرتي واريدهة محد يغصبني على شي ما عاجبني

حسنين،،نذلل تطلك وغصبا ما عليك والله ارفع عليك دعوة بالمحكمة وتطلك

علي،،ولك تلعب وياي حمزة حاسبك اخو يا حيف يا وسفة

حمزة،،انتة لو اتباوع تشوف انة شكد متمسك بيكم وشكد شاريهة ما يهونلي اعوفهة،، وعايفهة يمكم تبرد وترد لبيتهة علي حرمتي واريدهة ما اطلك ليش اطلكهة ربيتهة على ايدي كل عقلك اطلكهة

حسنين،،جذاب تريد تكسرهة جيف وكفت بوجهك تريد تذلهة متخاف الله انتة عايفهة صارلك سنة وتسمع حجي وتتأذة وتالي حضرتك ما مطلكهة اصلا عايفهة تتعذب وانتة عايش حياتك

علي،،عمي شبيك عمييي

حمزة،،بووية بووية رد علية،،طاح ابوية بحضني فقدت عقلي صحت بلا وعي عليي شغل سيااارتك بساااع ،،،،،يتبع