الغزالة في عرين الاسد الفصل العشرون 20 - بقلم فيّد عبدالله

مسااااء الورد ورداتي شلونكم

البارت العشرون
فيد عبدالله

ريم،،لا علي فدوة اسمعني

علي،،اخذ مرتك وتوكل ابن العم

ريم،،علي علي فدوة،،لحكتة لزمت ايدة وابجي،،علي والله لخاطر ابني بس اسمعني لا تعوفني حباب اني ريمتك،،باوعلي عييونة جمرررر حسيت خنت ثقتة ورباتة وكسرت حجايتة اتملخت بس اني ام ياناس شلون اعوف ابني وادري ميغفى غير على ريحتي وميشبع غير على صدري وبس يبجي ،،،علي لزم ايدي خلاهة بين اديه وعصرهة بحنية وطب بدون مينطق حرف انكسرت اكثر من كسرتي انكسرت من كسرت باخوي سحب حمزة اسد من حضني وطلع ضليت مفرفحة منو اختار بس امومتي غلبت كلشي وطلعت خاطري مكسوور لكيت حمزة واكفلي بالباب شهكت وطبيت ابجي بس هو ولا رفلة جفن دخلت بوجهي لغرفتي طبيت شمرت روحي عالجرباية وابجي بقهرر احس هواي علية الجاي يصير ما اتحمل هيج شسويت اني لكل هالاذية طبت جديتي وعمتي فرحة شايلة اسد خلتة بصفي اخذتة لحضني وابجي وجديتي تسكت بية

الجدة صالحة،،كافي جدة كولي ياللله هو اعصابة تلف هالايام تحملي يبرد وترد الامور كلهة عدلة اصبري يا جدة لخاطر هالوليد

ريم،،هو اني لخاطرة اتحملت ورديت لو علية والله ماارد هواي تاذيت

الجدةصالحة،،كلشي شفنة يا جدة من الزلم كلشي

ريم،،جدة اذاني حيييل كسر كلبي

فرحة،،ميخالف عمة لخاطر وليدج والله فرفح عكبج

ريم،،بقيت يومين معتكفة بغرفتي ما اطلع اصلا استحي اطلع بيا وجه انضرب وارد هيج محد تدخل واصلا عافوني اهدة وحدي بس عمي يطب ويطلع يسأل ويوصيلي معلاك وعمتي فرحة مافاركتني كل شوية تطب علية حمزة ما شفتة وعمتي فرحة كالت راح لبغداد وكايللهم ممنوع اطلع باب البيت وياي اسد انقهررت كللش اختنكت حمزة بدة بعقابة القاسي والله اليعلم شنو الجاي ثالث يوم جنت نايمة الظهر وحاضنة اسد وحسيت واحد ينده بية بحدة فتحت عيوني حمزة واكف كدامي

حمزة،،كووومي بساع سويلي غدة وحضريلي الحمام

ريم،،ما حجيت كمت حضرت ملابسة و لبست وطلعت حضرتلة صينية الغدة وجبتهة للغرفة طلع ينشف بشعرة

حمزة،،شيليهة بالصالة

ريم،،دنكت شلتهة ووديتهة للصالة ورجعت للغرفة شفت اسد نايم بعدة طبيت اسبح وطلعت واكفة امشط وطب للغرفة

حمزة،چاااي بساع

ريم،،طلعت سويتلة جاي شلت الصينية غسلت المواعين وخدر الجاي وديتة الة لكيتة نايم وشايل اسد بجربايتة رجعت الجاي ورحت كعدت بالكاع شبعانة نوم اصفن والف فكرة براسي شنو التالي للعصر كعدوا طلعت يم جديتي شوية وسمعت صوتة يصيحني،،رحت للغرفة لكيتة شايل اسد ومطفي

حمزة،،هاااج اخذي شوون تعوفيه وتطلعين

ريم،،مديت ايدي اخذ اسد من ايدة وهو صفن بوجهي الجان مسويه خريطة ما اهتميت بالعكس استهضمت طلعت لغرفة جديتي لكيت عمتي كاعدة عمتي الماعرفت تجي وتشوفني عدلة ميتة بالجذب اني ام حفيدهة

ام حمزة،،هاي انتي عدلة طلعتي والله همزين وشفناج

الجدة صالحة،،اخررب بيتي مو انتي المعدلة الكابلتيهة وكعدتي كلتي خطية ابني ماذيهة اشوف هالمكرودة الجار عليهة ابني

ام حمزة،،تستاهل اكيد حمزة ما يضربهة هيج اذا مو هي العايلة شو جان يباوع لحلكهة شوف شكشف شلكة مدري الذهبات طلعن عندهة

ريم،،انتفضت افوور،،عمة يا ذهبات شني تبوكيني

ام حمزة،،جا ليش طكج بليلتهة شوف شلكة

فرحة،،اتقي ربج رسمية انة فتشت وما لكيناهن عند كل احد لو لاكيهن جان ردن لبت اختج ذهباتهة

ام حمزة،،الله اعلم

الجدة صالحة،،كفي الموضوع لا اكل لحسين يشوف شغلة

ريم،،ضحكت ضحكة حقيرة وكامت تفر بيدهة واني ملخت روحي،،سمعتي جدة شفتي هسة كلهة هيج تكول مووو

فرحة،،خل يولون عمة معليج

ريم،،ليش يربي شسويت اني انحمست حمس انوب هاي سالفة جديدة طلعت اذن وصليت يم جديتي وطبت عمتي

ام حمزة،،يلا خية ما طلعتي السبعة كومي وياهن للمطبخ مو يشتغلن جوة ايدج

فرحة،،ما تشوفيهة كوة تمشي

الجدة صالحة،،لا ما بيهة شي هسة تكوم وتلزم مطبخهة وخطار رجلهة

ريم،،اعرف جديتي شني قصدهة تريد تسكت الحجي وتبين كلشي ماكو كمت للمطبخ واكفة ختام

ختام،،ها ريم ليش اجيتي تعبانة بعدج

ريم،لا لا صرت زينة

ختام،،سودة علية شصاير بوجهج الحلوو يلا ميخالف خية ياما وياما شفت من صادق امر وامر لخاطر جهالي جنت اسكت لحدما وحدة بطل وصار كلش زين

ريم،،الله كريم،،اختنكت بعبرتي بس ما اريد ابجي لكل حجاية نسوي بالعشا وهو فات طالع للمضيف وعطرة ترس المطبخ، ،امداج ريم كلبج يرفرف لسة على ريحتة شوية وطب للمطبخ

حمزة،،حسبوا حساب ثنين ويانة عالعشا بالمضيف

ختام،،الخير هوواي

ريم،،مانطقت، ،،،كملنة العشا واخذة هو وابراهيم الجان يباوعلي بقلق كملنة هوسة العشا ما اشتهيت اكلت لكمتين وكمت لليل جاي وهوسة متأخر يلا فضت طبيت للغرفة ونومت اسد وغفيت تعبانة حسيت بي يكعدني

حمزة،،كومي خلي اسد بفراشة لا تعوديه عالحضن

ريم،،شلتة بلا حجاية وديتة بجربايتة ورجعت لزمني من زندي حيل

حمزة،،من احاجيج ردي لا تخورسين كلش اشوف هسة لسانج سكت

ريم،،باوعت لايدة ورجعت عيني بعينة،،همست وصوتي يرجف خانكتني العبرة شبيك حمزة

حمزة،،ما خليتي حمزة

ريم،،نتر ايدي وطلع ما كدرت انام للفجر وهو طالع صليت وكوة غفيت اقل الساعة واندكت الباب مال الغرفة

ام حمزة،،كومي يمسعدة حضري الريوك عمتج فرحة ضغطهة اليوم

ريم،،استغفر الله هاي لكت فرصة تطلع حرگتهة بية كمت لكيتهة محضرتلي معجانة شكبرهة متروسة عجين

ام حمزة،،يلا اطلعي خبزي للريوك وردي حضري الريوك ووراهة كملي الخبز عود

ريم،،ما رديت ومالي خلك اصلا ارد كارهة حتى روحي طلعت خبزت ورديت سويت الريوك وطلعت اخبز الباقي

ابو حمزة،،تعاي بوية تريكي عوفي الخبز

ريم، ،مااشتهي عمي الف عافية

ابو حمزة،،شون حجي بوية لاحكة

ريم،،الف عافية عمي وداعتك مااشتهي،،كملت الخبز وشلتة وطبيت حمزة كاعد يتريك وين جان شوكت اجة ماادري طبيت خليت الخبز ورحت اغسل وجهي وادية لحكتني عمتي

ام حمزة،،حطيت اللحم عالنار وراح اروح لغصون اطبخي الغدة انتي عمج عندة خطار عالغدة

ريم،،هزيت راسي وما حجيت فات حمزة ما باوع اصلا وصل الغرفة وصااح رررريم،،رحت وراه

حمزة،،هدومي حضريهن

ريم،،صار،،رحت حضرتهن واخذت اسد بدلتلة وخليتة على صدري ارضع بي وطلع هو من الحمام

حمزة،،كومي صبغي حذائي الاسود وحضريلي بنطرون وقميص بالجنطة

ريم،،اي، ،حضرتهن وكاعدة اصبغ حذائة وكف كبالي واني ضليت مدنكة امسح بحذائة ما رفعت راسي دنك لمستواي وكعد كبالي ما باوعت اصلا بس ادية وكفت

حمزة،،تدرين ما جاي اتحمل اشوفج حجايتج تررن باذني لهسة

ريم،،حجيت واني مدنكة،،والله بلا وعي طلعت بلحظة عصبية ليش تحاسبني على شي مو بارادتي انتفض وكام

حمزة،،الغضب يكشف معدن الانسان وانتي باول زلة غلطتي غلط جبير ما اكدر انسااه

ريم،،وانت هم بس اتعصبت ضربتني واذيتني حيل لو صدك تحبني ما تاذيني هالكد

حمزة،،الاحترام كبل الحب يجي وانتي ما حشمتيني اتذكري ريم بعمري ما صحت بيج ولا اذيتج انتي الجبتي الاذية لروحج واغلاطج وحدة اكبر من الثانية وما تنسي

ريم،،بقيت ساكتة اصلا هو قافل اني كل الغلط مني وهو كلشي ما مسوي عليمن اناقش وارجع بلا نتيجة طلع وركع الباب كملت وكمت حضرت جنطتة وطلع لبغداد وهاي الفترة سكن بغداد يجي يوم يومين ويرجع وهاليوم اليجي بروود مو طبيعي باسلوبة ومرة عن مرة اعصابة تزيد واسلوبة يصير اقسى نتر وصياح وكدام الكل مرات واتحمل واصبرواحسة يتعمد ياذيني كدامهم واني السكوت الحل عندي حتى دموعي نشفت ويوم عن يوم صرت ابررد من ناحيتة واحس الحب البداخلي لحمزة يتلاشة ويحل مكانة بررود صار اهم شي ابني عندي مرتاح،،جنت ضامتة لابني بنص كلبي ودائمااحضنة وانام صار هو عوض ابوه الاخذتة الايام مني وهو لو طب وشافة بحضني ينجن ميقبل بمرور الايام عزلت حتى فراشي عنة برودة زاد المسافة البيناتنة والزعل كبرر وصار بيناتنة فجوة جبيرة ماجاي تنلحم ،،،صفيت نص وزني وجملهة قهرر عمتي الاستقوت علية واتسلطت اكثر وهو كام يشوف ويغلس صرت اضوج منة مو لهدرجة شنو هالجرم السويتة معقولة هذا حمزة شدعوه هالقسوة لو يحبني ميقسة هالكد صرت اشكك حتى بحبة مر شهر تقريب وهو يزيد بعصبيتة صرت ما اعرف شيريد على كلشي يتعصب كلشي ميعجبة،،،،تعبت من هالبعد وجديتي لاحظت جانت قبل متدخل بس من شافتة هيج صاير مينحمل خصوصا بيوم الصبح وصبتلة عمتي جاي عالريوك وكاللهة بارد حمي

ام حمزة،،لا يمة حار والله

ريم،، طبيت شايلة الخبز وهو جر الاستكان ركعة بالكاع وطلع حتى ما تريك،،باوعتلي عمتي

ام حمزة،،كلة من وراج يا طركاعة خبلتي الولد

ريم،،ما حجيت ولا تريكت طبيت لغرفتي سبحت وبدلت وطلعت جرتني جديتي للغرفة

الجدة صالحة،،وتااالي شهالعناد ثنينكم روس يابسة واحد منكم يطخ ويمشي السفينة

ريم،،ليش جدة اني الما مشيتهة لو هو شو اميل واتحمل واكابر ولا افتح حلكي شيريد بعد رديت بيدي للذلة والمهانة الة ولامة وعفت حتى اهلي المانعني اروح وابني وياي اروحلهم دقايق وارد واخوي وزعلة علية جيف كسرت حجايتة ولهسة ما يباوع بوجهي شكد ما توسلت واتعذرت وهم كلت يهوون ما احجي واتحمل كل عيطة وغلطة الجان متطخ لسانة وعمرة ما غلط علية وكل نترة بية تشلني شل واعدي واكول لخاطر من خاطر وكل هاي وهو يزيد مينقص شسوي بعد

الجدة صالحة،،واذا تتحمليه رجلج هذا وابو ابنج اذا صدك ليش عازلة فراشج عنة

ريم،،جدة شترديني ايهين بية واركض وراه ارخص روحي جدة اني مو هيج

الجدة صالحة،،هو الفراش يگرب ويبعد انتي گربيه لا تخسريه هو هم متأذي ما تشوفيه شلون متسودن

ريم،،ما يكول يحسسني هو رايدني شو كل حجاية وكال تكش روحي منج اضوج من اشوفج تردين عكب هالحجي اروح اركض وراه والله لو امووت

الجدة صالحة،،ضلي ضلي يمصخمة بعنادج ولو خسرتيه تعاي تبجبجي

ريم،،جدة لحد هسة اني المجلبة بي وهو الشارد لو راد يخسرني صدك هاي بيدة ترة هم يجي يوم وامل واعوف كلشي

حمزة،،وما تعوفين منو مجلب بيج هسة

ريم،،التفتت حمزة بباب الغرفة واكف ،،سكتت ودنكت مليت ما احجي بعد ما بية

حمزة،،احجي احجي كملي اسمع عليش متحملة وساكتة ومجلبة بية جابرج احد تردين ترحين لالهلج الباب يوسع جمل عوفي ابني وتوكلي شايفتني ميت عليج

ريم،،باوعت بعينة اذتني حجايتة مو حمزة هذا، ،،واني باقية هنا كلة لخاطر ابني مو لخاطر اي بشر ثااني واتوجهت اطلع لزمني من ايدي ودفعني لداخل الغرفة

الجدة صالحة،،اتهدة جدة مو هيج البنية هم تعيبانة لا تاذيهة بس

ريم،،جدة هي حجاية الحك تزعل وصرت كلشي اتوقع من حمزة ،،اباوعلة كوور قبضة ايدة بغضب

حمزة،،،بعدج ما شايفة شي رريم

ريم،،باوعتلة بغضب

حمزة،،جدة اخذيهة من كدامي لا اذبحهة ومحمد

الجدة صالحة،،شجاكم جدة يلا ريم اتعذري من رجلج وكفوا هالعرايك عيب ثنينكم كبار

حمزة،،لا جدة ريم بعمرهة ما راح تكبر ويبقى عگلهة صغير وميوزن كل تصررف

ريم،،لعد ليش اخذتني اذا هيج اني زعطوطة بعينك

حمزة،،شبيج انتي شو متخبلة اعگلي وردي لطباعج

ريم،،اتقربت منة وعيوني متروسة دموع حمزة كاافي اني ذيج ريم نفسهة افتح عينك وارجع لبيتك كافي بعد وهجرر كلنة نغلط وانت هم غلطت خل ننسة ونبدي صفحة جديدة،بقة ساكت وابتعد يطلع صحت وراه،،ظلل لعد بعنادك طلعت متستاهل كل الحب الشلتة بكلبي الك متستاااهل شي رجع ضربني راشدي وجديتي فاارت

الجدة صالحة،، فوكاهة ترد تضربهة انتة متسودن رسمي امشي اطلع من البيت

ريم،،اكرهك حمزة اكرهك

الجدة صالحة،،اشش انتي الثانية

حمزة،،انجبي واحترمي

ريم،،جدة خل يطلع خل يعوفني اكرهة ما اريد اشوفة

الجدة صالحة،،اطلع من البيت ولا ترد الا لمن ترد لعكلك جنت اكول انت العاقل الراكز طلعت ما تعرف تتصرف عدل لو ردلك عكلك وعرفت تحجي وتتصرف تعال احجي

حمزة،،شني جدة تطرديني من بيتيييي

الجدة صالحة،،مو بيتك يلا ولي منا لا حلت عليك بركة تصيح بوجهي وتضرب مريتك وراكب راسك انت نبي

ابو حمزة،،حمزززززة شني هاي صوتك تصيح على جديتك كبرت علينة

ريم،،طب عمي للغرفة ناار ويصيح وحمزة دار وجهة ما عاجبة الحجي

ابو حمزة،،انت شني مالك رداد اكسر راسك ترررة

ريم،،ما انحس الا عمي ضرب حمزة راشدي خلاه واكف مصدوم

ابو حمزة،،هواي سكتتلك جرت على هالمسكينة واذيتهة وخليتني ااذي اخوي بترابة وحرمتهة من ابنهة وردت غصب وتخاربت وية ولد عمك وهسة بعدك معاند واتاذيهة لو شما صارر بيناتكم ينحل وجمالة اليحاجيك ما تحشمة لا جديتك لا ابوك امشي اطلع من وجهي ولو رديت لعگلت ارجع يلا امشي من وجهي

ريم،،طلع حمزة بدون مينطق حررف واني ضليت ابجي بحضن جديتي مقهورة عليه لان طردة عمي ومقهورة على روحي لان هواي اذاني وهانني،،،،،،يتبع