الغزالة في عرين الاسد الفصل الرابع والعشرون 24 - بقلم فيّد عبدالله

مساااء الانجمااد جمدت اصابيعي اليوم والله كوة كتبت بس هم لخاطر لهفتكم للقصة تتدللون،اطوووول باااااااااارت انكتب لهسة دعموه بتصويتكم ،متابعة طيبة

البارت الثاني والعشرون
فيد عبدالله

ريم،،احس نملت اطرافي من سمعت حجايتة اچذب باذاني واگول ماگال هيج متوهمة اباوعلة واريدة ينطق كلمة ثانية تخليني اچذب روحي ما سمعت هيج

الجدة صالحة،،صخام بوجهك صگد سويتهة شناقصهة مريتك وتاخذ عليهة

حمزة،،مو اول واحد ولا اخر واحد جدة ولاهوة عيب ولا حرام

ام حمزة،،وشني واذا ابني عينة الزلم وحگهة الناس تركض وراه وتهديلة نسوان وگادر يفتح عشر بيوت

ابو حمزة،،انتي انطمي لا اذبحچ بمكانج

ريم،،احس حتى دموعي عاندت متطلع تحجرت بعييني انطيت اسد لختام الواكفة بصفي احس حيلي راح لزمت الباب مال المطبخ خاتلة بسدة

ابو حمزة،،اذا تريد تتزوج اخذهة برة بيتي

حمزة،،افة بوية هذا بيت الشيخ وهية انهدت لبيت الشيخ وانتة كبال الكل سكتت قابل شنگللهم هسة الشيخ رجع بكلمتة

ابو حمزة،،انچب، ،ما عرفت اربيك صدك،،،تف عليك وعالشوارب البوجهك

حمزة،،تموون شيخ حسين تموون،

ريم،،طلع وصل باب المطبخ والتفت

حمزة،،انة رايح هسة،اجيبهة باجر واخليهة بالغرفة الفارغة الفوك مو بوية

ريم، ،ما سيطرت على اعصابي بعد وكعت من طولي

ختام،،رررريم عززة

ريم،،فتحت عيوني بشهكة من المي البارد على وجهي ،،دفنت راسي بحضن عمتي فرحة والله استحيت وخجلت اني الخجلت اباوع بوجوهم شبية وراح يتزوج علية شناقصني،،،

الجدة صالحة،،بسكم خلوهة ترتاح وانتة حسين كض ابنك وردة عن هالسواية لا اذبحة بيدي ومحمد

ريم،،جنت اسمع الحجي ومأيسة هاي هي انتهت محد يعرف عناد حمزة بكدي من شغلة صغيرة مسح كلشي بيناتنة بعنادة هسة يتراجع عود، العجيب الله ذب علية برود رهيب ما نزلتلي دمعة كلهم مستغربين ردة فعلي هاي حتى استغربتهة من اتذكر اكول اتخبلت يمكن ،كمت لغرفتي توضيت وصليت وعمتي فرحة بذيلي عبالهم راح ااذي روحي ميعرفون رجعتي يمة جانت اكبر اذية لروحي ولكرامتي لدرجة ما لمتة عالسواه اني الجنت اكلة اذيني ودوس كرامتي لان ما حطيت لنفسي قيمة من الاول اني الركضت وراه وما وكفت يوم وناقشتة وكلشي حاضر وصار مو صح هذا الغلط بعينة اني الما خليتلي قيمة لدرجة من راد يتزوج ما شافني موجودة اصلا شكد كررهتة بسااعتهة عجيب الحب البداخلي الة شلون تبدل بساع بكره وحقد طلعت تعشيت وكلهة تراقبني بصمت كملت وغسلت اخذت ابني وترخصت منهم وطبيت لغرفتي،،نزلت دموعي مسحتهن بعصبية،، خلص ريم لهنا وبس انتهت حياتج بهالبيت والجحيم اطلعي منة كافي تدوسين على نفسج وتتحملين لخاطر فلان وعلان من هاللحظة عيشي لنفسج وابنج وبسسس حمزة ميستاهل حبج لان باعج باول زلة وهيج رجال مستحيل يصيرلج سند بيوم على شنو باقية وياه نومت اسد ومددت دكت الباب عمتي فرحة

فرحة،،تكول امي تعاي نامي بالغرفة يمنة

ريم،،عليمن هذا فراشي واسد نام مابية شي عمة بس اذا تعزيني انطيني حباية ڤاليوم اريد انام بلا ما افكر بشي

فرحة،،اي عندي هسة اجيبلج واجي انام يمج

ريم،،شربت الحباية ونمت ادري بروحي بس اهيج الافكار عالمخدة يمكن انجلط نمت واردد ربي بس عدي هالليلة على خير،،صبح الصبح وانشلعت من مكاني على صوت هلاهل ترست البيت باوعت الساعة 12واسد وعمتي ماكو حييل هالكد نايمة،،مو چني سمعت هلهولة احس جنت بغير عالم فاقدة اتذكرت الصار الهلاهل احس سجينة بنص گلبي لزمت كلبي حيللل والنفس ضاگ فاتت عمتي فرحة تمسح بدموعهة بشيلتهة وهي شايلة اسد،،،همست شكو عمة جابوهة مو

فرحة،،لا جابوا الاخشاب

ريم،،اممم رجعت نمت وغطيت راسي

فرحة،،عمتج تخبلت تهلهل الصلفة

ريم،،ما رديت تقوقعت بفراشي شوية وعمتي فرحة طلعت وخلت يمي اسد، ،،شبيج ريم المن باقية شتنتضرين هاي اخشاب الغرفة جاي يشدوهة
تخبلتي تضلين بعد ولج انتي منو نسيتي بتمن واختمن كمت فقلت الباب سحبت جنطة جتف عندي جبيرة شوية فتحتهة وعبيت بيهة ملابس الي وملابس لاسد شي خفيف وذهبي وفلوس جوة ايدي جانن سحبتهة وخليتهة ورة الباب بالتعلاگةفتحت القفل وطبيت سبحت وتوضيت وكعدت اصلي نسيت روحي برحمة ربي واسد يمي يكمز، ،،والله يا امي لخاطرك الا اصير لبوة بنص هالاسود خلص من هالساعة الغزالة ماتتتتتت،،، جابت عمتي فرحة الغدة تغديت بشي بسيط اقوي روحي ونومت ابني ونمت للعصر فزيت هو يفتح بكنتورة ومنطيني ظهرة،،،قويت صوتي غصبا عني لازم لازم ريم لا تهينين روحج اكثر،،كتلة مبررروك ابو اسد منك المال ومنهة العيال،،،التفت علية مضيق عيونة

حمزة،،مشكوورة

ريم،،احضرلك ملابسك

حمزة،،شبيج

ريم،،شبية وكمت من الجرباية والله العظيم والله العظيم ما اعرف منين اجتني هالقوة ولزمت روحي اني موريم جنت لحظتهة كتلة من الحقد والكره والغضب بحيث ذني طغن على ضعفي،،اتوجهت للكنتور سحبت دشداشة من التعلاكة ولزم ايدي

حمزة،،انت صاحية لو شاربة شي

ريم،،لا بالعكس والله هسسسسة صحيت على وكتي وعرفت اني وووين وانتة وين

حمزة،،انتي الوصلتينة لهالدرب

ريم،،اي والله صدك اني، ،تدري شوون من ملت على روحي زايد من زغرت روحي كدامك حيييل وخليتك تدوس علية من صدكت انتة حبيتني وكمت اطيعك بعمى تحملت اعصابك وامك الماتنجرع

حمزة،،لا تتجاوزين

ريم،،دومك تضوج من الحقيقةبس انت الصح، ،ليش امك تنحمل مو امك الكتلت ابني الاول ومو هية الجبت ابني سبيعي من وراهة ومو هي الشوفتني نجوم الظهر بعيشتي واتحملت كلة لخاطرك لان عبالي اني شي مهم بالنسبة الك طلعت فد صغيييرة وما ادري بروحي،فيد عبدالله،

حمزة،،انتي لهسة تكابرين وما تعترفين باغلاطج

ريم،،يا اغلاط هااا شسويت كلي صح غلطت بس ما تجي ربع اغلاطك بحگي وهم سكتت وملت على روحي لخاطرك هوواي ورجعت انتة لعنادك تدري شسويت بية من كتلي تقربتلج لان انتي تردين،،خليتني احس روحي رخيييصة حييييل

حمزة،،بسببج انتي وعنادج انة انهانيت هواي من ابوي كلة بسببج انتي الوصلتينة لهنا ويمكن صدك انتي ما ترهمين لعمري وعگلي

ريم،،اي صح ما ارهم، بعمرنة ما نتراهم،عادي اذا يعجبك تطلك ما اهتم لان لو تصير نبي بعد ما اريدك عافك الخاطر وخليت عيني بعينة ،،شال ايدة ورجع نزلهة و رگع الكنتور كسر الباب مالتة وايدة دخلت بالخشب وطلعهة مجرحة،،،بساعتهة صدك ما اهتميت لو كبل واشوفة متاذي يمكن افرفح هسة لااا اتمناه بالازيد

حمزة،،والله لاخليج تحفين عالراحة ومتحصليهة مترديني مو لو نبي مترديني لا غصبا عنج تعيشين وياي وطلاك مااكو اصلا ما حاطة ببالي وانة لو اموت ما انغصب على شي سمعتي

ريم،،دفعني حيل وطب يسبح بدل وطلع واني كمت احترررك وصلتني نار الغيرة رييم دير بالج تضعفين هنا اصبري اجتي عمتي فرحة وجديتي وختام يمي وعمتي وحمواتي الصلفات رايحات يجيبن العروس ضليت متلفلفة بالغطا ما اتحركت سنتيم وجديتي تقرة ايات على راسي جريت ايدهة بستهة وخليتهة جوة خدي وغفيت ما اريد افكر ما اريد اموت اذا فكرت شوية وسمعت صوت هلاهل يطررش

الجدة صالحة،،لا هذني تسودنن الا اكسر روسهن

ريم،،طلعت جديتي واسمعهة تصيح

الجدة صالحة،،رسمية ووجع تخبلتي

ام حمزة،،عرس ابني حجية شسالفة ما افرح

الجدة صالحة،،عرس الاخر مو معرس ومخلف اثكلي ترة حسين على اعصابة،،صعدنهة لغرفتهة بسااع وانتن لبيوتجن سمعتنننن

ريم،،همست لختام اريد اشوفهة

ختام،،تخبلتي ريم شبيج شتشوفين منهة

ريم،،صعدوهة وجديتي طردت البنات ما خلت احد يبقى بس زلم بالمضيف وطبعا ميتجرأ حمزة يكول طبخوا جايب من برة عشا شكد كررهتة وكرهي يزيد ويزيد، ،اذن وراحوا يصلون كتلهم عوفوني وحدي اريد اصلي اخذت اسد لحضني شوية صار هدووء مديت راسي كلهة بغرفهة لبست عباتي وشلت ابني والجنطة بجتفي واتوكلت على ربي وطلعت بساع من المطبخ للممر البصفة نزلت للبستان وادعي ميشوفوني بس يدري ميخليني اطلع وي ابني ويلزمني من ايدي التوجعني واني مستحيل افاركة لحظة انوب وي مرت الابو واهلي الكسرت بيهم ميتدخلون لان اني الكسرت حجايتهم ورديت وياه برجلي للذل غبية جنت غبية احاجي بروحي واركض،،من البستان وعبرت لبيت اهلي السياج ناصي عبرت الجنطة وشلت اسد خليتة عالسياج وكمزت عبرت واخذت ابني وجنطتي بس انجرحت رجلي وما اهتميت طبيت الهث كسرت باب المطبخ تكسر فتحتلي حسناء الباب مخروعة

حسنااء،،رييم شبيج شكو،

ريم،،لهنا وخلصت قووتي كعدت بالكاع،،،ليش ما سمعتوا الهلاهل ترست البيت غير حمزة عررس

حسناء،،صخاام ولطام شوون شوكت ومنين مو البارحة انتي هنا ما كلتي عزة بعيني عزززة خااالة

ريم،،المغرب يلا خطب الافندي وين امي، ،يمةةةةة الحكي لبنتج يمةةةةةةة ولججج يمةةةة،اجتي امي تركض بچادر الصلاة

ام ريم،،اسم الله بنيتي يمة شبيج ترجفين اسم الله الرحمن

ريم،،يممممة عررس حمزة عرس وجاب علية مرة الهديت الدنيا لخاطرة عررس وكسرني التحملت كلشي لخاطرة ما تحمل غلطة مني وراح عرس وحررك گلبي

ام ريم،،صخام بوجهك يا حمزة الله يفرفحك كوون

ريم،،ان شاء الله دعوة يتيم مقهور ومظلوم حسبي الله ونعم الوكيل بيك

حسناء،،منين هالمرة هيج فجأة تجي ابوه امة جديتة شكالوا

ريم،،هدوهة الة وقبل قبل حتي يذلني اكثر

ام ريم،،يولي هو الخسران،، كومي يمة كلشي الة حل ابنج انصدف والدنيا غروب

ريم،،كومتني امي وباوعت جواية الگاع متروسة دم

ام ريم،،صخام شبيج يمة هذا الدم منين

ريم،،شالت امي دشداشتي ورجلي مجروحة كد شبر يجوز من الساق من عبرت انجرحت بس ما اتوقعت هيج قوي دخلت للحمام غسلتهة امي ورجعت عقمتهة سودة علية وشدتهة جاي تلف بيهة بالشاش وطب علي عيونة حمرررر وصاير نااار،،كمت وكفت كبالة خجلانة حيل لو سامعة حجايتك يمكن ما جان صار كل هذا

علي،،ولچ صدك السمعتة حمزة عررس

ريم،،هزيت راسي بقبول وما اتحملت بعد ركضت لحضنة وانهددديت بچي طلعت كل دموعي الحابستهن من البارحة حسيت كلبي راح يوكف كدما بجيت،،وهو حضني يريد يدخلني بضلووعة ويمسح بشعري حدما احس فرغت ضعفي وحرگة گلبي كلهة بحضنة بديت اهدء والكل ساكت محد حجة شي، ،باوعتلة وهمست،،كلة مني چان لازم اسمع حجايتك ما اروح وياه وانتظرك بالمحكمة تجيبلي ابني

علي،،ميخالف ريمتي ادري سويتي هيج حتى لا نتخارب بس چان لازم تعرفين انة وحمزة تخاربنة من ساعة الما اخذ حگچ من امة من روحتلچ اول جاهل من ساعتهة حسيت واهم انة يجي احد يحبج ويخاف عليج بكدي ،،عبالي هو مثلي بس وسفة

ريم،،يعني ما زعلان مني موو عليك الله تعوفني

علي،،اشش انتي بنيتي اكو ابو يزعل من بنيتة، ،والله لاخلي يحفة وما يطول منچ اظفر وابنچ غصبا عنة يظل بحضنج بس اريد اعرف انتي لو اجاچ بعد تردينة

رين،،ابد والله لو يصوغوه ذهب ما اردلة اذاني يخووي حيل اذاني وداس علية ومسح كرامتي واني كرهتة ولو اعرف اكتل روحي وما اردلة

علي،،خلص يا ريمتي اعرفي وراج زلم ياكلون الاخضر واليابس واليرشچ بمي نرشة بدم

ريم،،الله لا يحرمني منكم

علي،،اريدچ سباعية ما اريدچ تبچين لو توكعين انتي ربات علي سمعتي ربات علييي

ريم،،راح تشوف رباتك شني يخووي ،،بهالاثناء طب حسنين يجرجر بي ولازمة كاظم

حسنين،،هدووني عليه ليش تسكتوني ولكم هاي تاليهة ابن عمنة هيج يسوي باختنة لو منطيهة للغريب اهوون ولكم شسوووت هية

علي،،عييب حسنين احنة مو هاي اخلاقنة ولا تربينة نتكاتل وي ولد العم

حسنين،،هسة تروح وياي نجيب ريمة متظل يمه وان ما اجت اطيح حظهة واسحلهة

رين،،طلعت لصالة كوة ادوس على رجلي،،هاي اني اجيت حسنين برجلي شردت من بيتة ما اريدة بعد واريدكم تخلصوني منة

حسنين،،همزين اشتغل عگلچ هالمرة وشفتي بعينج وعرفتي منو اليفيدچ

كاظم،،كافي حسنين عووفهة بيا حال وتلومهة انتة

حسنين،،لا خل تصحة على وكتهة والله اذا ذبيتي دمعة عليه احرگچ

علي،،حسنيييين كافي طب غرفتك

ريم،،بهالاثناء وانهجم الباب هجم

علي،،هذا حمزة شووفي لو نتذابح معلللليج لا تتدخلين اخذي ابنج وطبي

حسنين،،احرگهة لو عتبت الباب

ريم،،طلعوا الولد واني ادعي الله يعديهة على خير،،سمعت صوت حمزة يصيح

حمزة،،وينهة خلي تجي ترد لبيتهة

علي،،مو هنا الحجي طب للديوانية ترة بعدنة اهل حمزة

حمزة،،والنعم ،،

ريم،،طبيت للغرفة ما اريد اسمع حتى صوتة شوية واسمع صياح بالديوانية وحسناء ركضت للباب تسمع غطيت روحي واخذت اسد لحضني ارضع بي احس مالي خلك افكر حتى وين متوصل توصل اهم شي هسة اني ببيت ابوي

حسناء،،ولج رجلج راح يتخبل يريدج تردين وياه

ام ريم،،شيريد بعد مو عررس وما يريدهة لو عناد يريد يردهة للذل

ريم،،ولا رديت،،شوية وطب علي

علي،،كوومي وياي خل يسمع منج انتي ما ترديه بعد موو ريم

ريم،،لااا علي ما اريدة اعيط بعد واكللكم اكرهة اكرهة ما اريد اشوف وجهة اصلا كمت وكفت بباب الغرفة وصحت بصووت حممزززة لو تظل اخر واحد بالدنيا ما ارديك ما اريدك عندك كررامة تكول حس وعوفني،،لزمني علي وطببني وسد الباب

علي،،مو هيج لا تتخبلين وتضيعين حگچ بعگل بعگل

ريم،،طلع علي وكفت بباب الغرفة اسمعة يكلة سمعت باذنك تصيح متريدك مو جبر يا ابن عمي مثل ما دخلنة بالمعروف نطلع بالمعروف

حمزة،،وانةما اطلگ لو تموت كبالي ما اطلگهة مو اول ولا اخر زلمة اخذ الثانية وترد يعني ترد

علي،،حمزة لا تعاند خلي حگ للعشرة

حمزة،،انتة ما خليت حساب مساندهة عالغلط

علي،،لا موغلط هذا هو عين العگل انت ما تستاهلهة وسفة خربت الخوة وما صنت الامانة الامنتك عليهة تتذكر شكتلك من خطبتهةكتلك هاي بعز روحي لو مسيتهة بشعرة اهد الدنيا عليك،انتة خسرت حرمتك الصانتك وحفضت بيتك وخسرت اخوو وابن عم علمود مرة روح يا ابن العم عروسك تنتظرك وانسة الك بهالبيت حرمة

حمزة،،علييي تعرفني ما انغصب على شي وطلاگ ما اطلك مو معزة بيهة بس ما دامهة هيج تصيح وتتحدة اخليهة تندم وترد برجلهة

علي،،اتوكل حمزة

حمزة،،ابني وينة انطيناه وارجعهة لريم ارجعهة

علي،،تخسة تلزمهة بي مثل ذيج المرة ابنهة بحضنهة يظل واشوف الزلمة الياخذة من حضن امة وصلهة للمحاكم هم تظل حكم المحكمة الهة واضنك دارس وتعرف الابن لامة وامة متريدك

حمزة،علللي انطيني ابني هسة لا تخلينة نتخارب فد نووب

علي، ،تخاربنة من زماان

ريم،،صارت هوسة وعلة الصوت وحمزة يصيح وعلي وما نفتهم شكوو اخر شي،صار الصوت بالحوش وحمزة يصيح هييين يا ولد العم، ،طبوا الولد وعلى خشمة طالع منة دم عرفتهم تضاربوا رحت علية وبيدي خاولي ابچي وامسح بالدم

علي،،اشش ممنوع تنزلج دمعة هاي اولهة خليچ قوية انتي رباتمن

ريم،،ربات علي، ،ومسحت دمووعي،،،كوة نمت بليلتهة مو بيدي اتخيلة يلزمهة ويتقربلهة انذبح وجع بس الوجع بروحي ما اعرف شلون اطيبة واسكنة هالوجع مابي كل حنين لايامي وياه لان رخصهة وهو الباع اكو بداخلي ندم هوواي ووجع وخذلان وغدر من واحد اعتبرتة اقرب شي الي اعتبرتة روحي وكلشي سويت لخاطرة بس انانيتة وحب الذات جانت اكبر من كلشي عندة، ،كعدت الصبح جديتي وعمتي فرحة يمنة،،كعدت غسلت واجيت سلمت عليهن

الجدة صالحة،،شونج يا جدة سودة علية حالج

ريم،،ليش جدة شبية ترة ما بية غير العافية

فرحة،،والله ومحمد ولا تقربلهة ولا طب غرفتة نام بغرفتكم

ريم،،شي بداخلي ارتاح ما اعرف ليش يمكن غروري الارتاح ،،وشعلي بي عمة حمزة ورقة وشگگتهة

الجدة صالحة،،شهالحجي جدة هو رجلج وبينكم وليد

ريم،،وشني ابني يمي وشوكت ميريد يشوفة هلا بي بس رجعة لجحيم حمزة لو امووت بالچفن ما ارد الة

الجدة صالحة،،اسم الله شبيج جدة هاي انتي العاقلة هاي بعدج حار صوابچ الايام تطيب الجروح

ريم،،لا جدة ماكو جرح يطيب كلش كل جرح بي اثر وحمزة جرحة غميج

فرحة،،عمة وين اسد مشتاقيلة شايل البيت ورايح

الجدة صالحة،،شبيهة رجيلتج يجدة

ريم،،انجرحت البارحة من عبرت سياج اهلي العالبستان

فرحة،،عزة بعيني طفرتي السياج من البستان

ريم،،اعبر الشط ولا ارد لحمزة

الجدة صالحة،،جيبي الزغيرون اشوفنة

ريم،،كمت جبتة ورجعت امي كعدت يمنة بس جانت مثگلة وجهة كلش ولا حجت ولا فتحت موضوع اصلا شوية واترخصن وكامن،فيد عبدالله،

فرحة،،اخذة لابوه يشوفة واردة

ريم،،لا عمة علي ما يقبل

الجدة صالحة،،هيج الحجي صار بيد علي امشينة يا فرحة نرد ولو عگلت هالبت نطب هنا

ام ريم،،من رخصتج عمة ترة مو بنتي الغلطانة وجايين تحملوهة اللوم ابنكم الرفس نعمتة بيدة

الكدة صالحة،،ما كتلچ ما غلطان بس مو هيج تنحل

ريم،،لا جدة هي مالهة غير حل ابد،،طلعت جديتي ضايجة وما اهتميت يجي يوم ويقتنعون ويعرفون منو الغلط بعد ما اميل على روحي لخاطر اي بشرررر، ،مر يومين واجة عمي وكعد وية الولد وجانوا كلهم رافضين ارجع لحمزة

ابو حمزة،،صيحولي بنيتي اريد اكعد وياهة وحيدنة

علي،،تامر عمي،،تعاي ريمتي عمي يريدج

ريم،،رحت كعدت يم عمي

ابو حمزة،،شونج بنيتي شون صرتي،،

ريم،،زينة عمي عايشة

ابو حمزة،،فشلان من يمج ياعمي ومن اخوي الما حفضت وصيتةولا صنت امانتة الامني عليهة عبالي حمزة يحافظ عليج

ريم،،ليش عمي ابوي شوصاك

ابو حمزة،،كاللي ما اريد ريم تروح لغيرك عبالي ولدي كدهة تالي زغروني جدام اخوي

ريم،،استهضمت حيلل، ،يعني انجبر علية حمزة موو عمي

ابو حمزة،،لا عمي مو زغير وينجبر بس هو ما عرف يصون النعمة

ريم،،مسحت دموعي، ،عمي خلصت بعد والصار صار وسوة اليريدة لهنا وعيشتي وياه تخلص

ابو حمزة،،شتردين بوية يجرالچ وغصبا ما عليه ابنيلكم بيت وحدكم وارتاحي بي لو اعزلج من الفوك وينزل ذيج مرتة جوة

ريم،،وجعتني كلمة ذيج مرتة، ،دنكت اخفي كسرتي،،لا عمي ما الي كل ردة لحمزة،، اذا انتة صدك تعزني وتعتبرني بنتك ووصيت اخوك العزيز اتطلكني من حمزة بلا هوسة وابنة يمي وشوكت ميريد يشوفة بكيفة

ابو حمزة،،شهالحجي عمي ما افرط بيج ابد

ريم،،عمي بداعت ابوي بداعت ابوي ولزمت ايدة اتوسل بي،،،اذا تعزني عمي بداعت اخوك ريحة بترابة اذا اظل وي حمزة اظل مشلوع گلبي وگلب ابوي علية بعمرهة ما راح تنشف دموعي وي حمزة لا تعذب ابوي بترابة،،سحب ايدة مني وخلاني جوة ايدة بحضنة وباس راسي،،ارتاحي يا بعد عمج ونرد نسولف ولا صفيتي على هالراي ساعتهة يجرالج الترديه ومن هالشارب ،،طلع عمي واني انتكست بيومهة ما ادري شصار بية كوة اتنفس كمت ولگوا ضغطي صاعد كللش ودگات گلبي ترركض ركض للصبح يلا طلعت من المستشفى،،وصلنة لبيتنة وشفتة واكف بصف سيارتة احترگت بشوفتة كوة سيطرت على دموعي انقهرررت كلش نزلت وعلي ساندني اتجه علينة مشة شوية ووكف دخلت بسرعة وهو صااح عليييي بقة واكف علي واني طبيت طب للحوش واني بقيت بالمطبخ اسمع الحجي

حمزة،،شبيهة ريم

علي،،ما بيهة جنهة ورد

حمزة،،علي بلا عناد خل ترد لبيتهة

علي،،من رخصتك حمزة اتأخرت عالشغل حييللل

حمزة،،مااشي عليي مااااشي

ريم،،عدة عالموضووع شهرين بديت اتاقلم على وضعي وبعدة حمزة معاند ميطلگ رغم جم مرة راحوا خواني يحلوهة بهدوء بمضيف عمي بس معاند جان وعايفني معلگة اعرفة مو معزة بية بس يحاول يرضي عزة نفسة الترفض كلمة لا بقاموس حياتة ،اسد جان ياخذة،فيد عبدالله، حسنين كل يوم العصر للمضيف يشوفة ابوه بوجود عمي الي يكول حسنين كوة مسكت حمزة لان ما قبلت ادزة الا تعهد عمي يرد لحضني ،،،، جنت كل ضحكتي الچذابة وسوالفي وقوتي تنهار تالي الليل على مخدتي وتغرگ بدموعي للصبح كوة اغفة جروحي اكبس عليهن واكول ريم هو الخسر مو انتي لا تضعفين وتحنين ابد انسيه ريم وابدي من جديد الحجي سهل بس الفعل صعب هذا حب السنين شون امسحة بغمضة عين ما اعرف اذا راح انسة حبة بس المتأكدة منة ما ارجعلة بعد لو اعرف اموت وراه هم ما ارجعلة ،،خاصة ورة ما شفت مرتة بالصدفة تتمشة بالبستان وي ثريا جنت مخلية اسد عالسياج وصاعدة على طابوكات اباوع واشم هوة طيب اختنك المغررب جنت عرفتهة هية من وصف ختام جانت حلوة بيضة كلش وعيونهة ملونة وطويلة رشيقة اشرت ثريا علينة بسلام رديت عليهة بايدي اتقربن علية يتحاجن

حنان،،انتي ام اسد موو اهلا وسهلا

ريم،،بيج اكثرما عرفتينة ثريا رغم داخلي يفوور بودي اكطعهة بسنوني بس اتظاهر القوة واللامبالاة

ثريا،،حنان مرت

ريم،،سكتت ثريا،،هلا بمرت الشيخ حمزة،،اعذريني حبيبتي ما لحكت اكعد وياج واباركلج بقت تباوعلي البنية متفاجئة

حنان،،اهلا بيج

ريم،،اترخص بس ها كبل لا انسة دير بالج على روحج حبيبة واكلج شغلة نصيحة من وحدة عاشت وي حمزة گبلچ ،،لا تميلين على روحج زايد لخاطر اي احد ترة الاخذتيه ما يغزر كلشي وياه من رخصتكم ،،،نزلت واخذت ابني وطبيت بوجهي للحمام سبحت اريد ابرد روحي الاحتركت،،مرت الايام و تعبت من الوضع رغم محاولات عمي وجديتي ارجع جنت رافضة نهائي الرجوع قررت اخرهة اني اواجه ما اعتمد على احد،فيد عبدالله، بمعركتي وياه، ،رحت لعلي المغرب ورة الصلاة جان بغرفتة

علي،،تعاي ريمتي نورت الغرفة توهة

ريم،،تقبل الله

علي،،منا ومنكم،،كوليلي شونج

ريم،،تعبانة اريد ارتاح

علي،،تهون هالشهر اذا ما طلك نرفع دعوة بالمحكمة

ريم،،علي كبل لا ترفع الدعوة من رخصتك اريد اكعد واحجي وياه وحدنة

علي،،للللليش عليمن

ريم،،اذا تعزني خلي احاجي لا تخاف علية انة ربات علي مووو جر نفس وتنهد

علي،،خاف يغثج

ريم،،خلي حتى اكرهة اكثر

علي،،ههههههه، ،ماشي لعد اخابرة اذا فارغ يمر ورة العشة

ريم،،كمت بست راسة ،،الله لا يحرمني منك،،صدك ورة العشة خابرة علي واجة ورة شوية

علي،،هاا ريمتي جاهزة

ريم،،اي ولزمت ايد علي حيل استمد قوتي منة

علي،،انت ربات علي لا تنسين

ريم،،لا ما انسة ابتسمت واخذت نفس وطب علي وطبيت وراه،،،،،،يتبع

انتظروني احبتي مساء الجمعة لحينها ترافقكم السلامة