الغزالة في عرين الاسد الفصل الخامس وثلاثون 35 - بقلم فيّد عبدالله

هلاووو شلونكم اخباركم،،،البارت اليوم لعب بية طوبة كتبت اكثرر من نص وانمسح ورجعت اكتب فتأخرت اعتذر،،،،،،متابعة طيبة

البارت الحادي والثلاثون
فيد عبدالله

علي،،عمي انتة شتفصل نلبس كتلكياهة وهذا رايك على عيني وراسي بس مثل ما كلت رايهة المهم وانة اتشكر منك هواي عبن تفكر بيهة هيج وحاسبهة اكثر من بنتك

حسنين،،وحمزة شراية بهالحجي

ابو حمزة،،حمزة انسحب منة الراي هسة ما جاي نخيرة جاي نكلة كافي تشحطط ابنهم بينهم وهمة كلمن راكب راسة ومعاند وهالحل يراضي الكل

كاظم،،ان شاء الله خير عمي الصدك رايك هذا عين العگل خاصة واحنة نشوف حمزة معاند ورايد مرتة وابنة واختنة هم تعبت من المشاكل يومية سالفة

حسنين،،اذا صار واقتنعت تردلك النة كعدة

حمزة،،انة شيكول ابوي على راسي وما اتوقع اكو حجي بعد ينگال ورة حجي الشيخ

علي،،الله كريم
،،،،،،،،

ريم،،ردوا الولد ويسولفون ويتناقشون صوتهم بالديوانية

كاظم،،انة اشوف راي عمي كلش خوش راي

حسنين،،شني التغير بالحجي مرتة ذيج بعدهة على ذمتة وهو يحجي معلك شتغير حتى تردلة

علي،،ما عليه بيهة هوة حتى هذا البيت بيتهة هذا اليخليني افكر اردهة الة

حسنين،،ليش تردلة علي

علي،،انتة بعدك ماصاير ابو حسنين ما تعرف شني ابن يكبر ويريد ابوه واحنة حارمينة منة

حسنين،،جاي يجي يشوفة كل يوم

علي،،مو مثل لو جوة عينة هذا باجر عكبة لو كبر يكرهنة من يحسنة سبب وهو من هسة فاطن ويعرف ابوه

حسنين،،بس علي

علي،،حسنين المفروض ريمة لتقرر هي التعذبت وهي التعرف مصلحتهة كبرت وتعلمت بعد مو زغيرة وهذا قرار خاص بيهة

كاظم،،وانة وي علي هي التقرر

ريم،،نومت اسد وافكر بالصار شحجوا شكالوا بافكاري وصوت عادل يصيحني

عادل،،تعاي ريمة علي يريدج

ريم،،كمت وكلبي يدك بساع خاصة صوت عادل مبين مزعوج،،دخلت الديوانية

علي،،تعاي ريمتي اكعدي بصفي وسمعيني

ريم،،اي اي اجيت، ،كعدت بصف علي قلقانة اتنفس بساع

علي،،اليوم عمي حجة بموضوعكم ورايد ردج باجر بلسانج تحجينة الة

ريم،،شگال

علي،،شايفة البيت الجان ينبني ورة بيت عمي

ريم،،بيت ابراهيم

علي،،لا هذا مو بيت ابراهيم هذا بيتج طلع

ريم،،باوعت بوجهة مستغربة، ،شون بيتي

علي،،عمي كاتب الكاع باسمج ووكملة الج ورايدج تكعدين بي انتي وابنج معززة مكرمة واتعهد حمزة مالة علاقة بيج ولا يتقربلج شبر ولايجبرج على شي

ريم،،باوعت لخواني ما اعرف شرد

علي،،فكري ريم هاي حياتج

ريم،،انتة شرايك

علي،،انة ما انطي راي انة كبرتج وعلمتج ووصلتي لمرحلة تاخذين شورج من راسج حرام علية احرمج من حياتج او اقرر ابنج شون يعيش يجوز احسنلة يربة بنصكم بس بشرط بلا مشاكل ومعارك تتفقون على حياة معينة بينكم انتي وابوه اذا كملتوا سوة ونسيتوا الراح لو كملتوا لخاطر ابنكم بس

ريم،،ما اعرف ما اتوقعت هيج الحجي خااف....

حسنين،،ماكوو خاف شتردين تكعدين وتحجيه كبالة وان ارتاحيتي تردين لبيتج انتي متردين وببالج كلمة خاااف اذا ترديلة ممسوحة من راسج هالحجاية

علي،،على كيفك وياهة حسنين خلوهة ترتاح وتفكر هاي حياتهة وحياة ابنهة روحي لغرفتج هسة وفكري عدل

ريم،،اي. تصبحون على خير،،كمت من يم خواني وراسي مفتررر، ،مددت وافكر ارد لو لا شراح تصير حياتي وياه ارد واكو مرة غيري زين لو كعدت بهالبيت وحدي ارتاح خاف حمزة يسوي علية سجن لا شنوو بعدني اخااف منة لازم لو رديت الي صوت وحجاية والا يدوسني زين ليش اردلة هو شتغير بي حتى اردلة،،ريم انتي قابل تدورين وياه حب وسعادة بعد اني اذا رديتلة لخاطر ابني وبس هو انتهى من حياتي بعد بعد كل السواه والاذية الصارت وجملهة رجع يشك اكو بيني وبين اسامة شي يعني ما اتغير شي حمزة نفسة شهالجحيم الي اريد اردلة برجلي مو شردت منة ومرتاحة يم خواني المن ارجع لجحيم حمزة ونارة،،للصبح ما غفت عيني افكر بالصار بس اتوصلت لقرار واتمنى الله يوفقني بي ويكون هو الصح الي ولابني كمت غسلت ورجعت رضعت اسد وبدلت ورحت للمعهد صدف يوم خميس سولفت لانسام

انسام،،والله عمج هذا وردة كون عندي مثلة متنطينياه ولج

ريم،،اي ماكو منة مو اكلج مثل ابوي

انسام،،والله عمي اكو ابهات متسوي مثلة الله يحفظة الج وانتي شقررتي

ريم،،قررت البي مصلحة ابني وهو يربة بين ابو وامة كلما يكبر يفتهم اكثر ويحتاج ابوه اكثر واني احس حرام علية احرمة ابوه وهو عايش وهالكد يحبة ويريدة بس طبعا بشروط اضمنهة يلا ارد

انسام،،تدرين احسن حل وكلة بفضل عمج هو الحل هالمعضلة وخاصة من سوة البيت باسمج جبر خاطرج هواي وعلة قيمتج ولو مكانتج جبيرة اكيد بس خلة محد الة حجاية وياج ولا منية من احد لو البيت لحمزة جان الوضع اختلف

ريم،،صح هو هذا الخلاني اقتنع ارجع انه صارلي بيت ووطن خاص بية وبابني واريد اكملة بحضور ابوه بس طبعا وجودة راح يصير لخاطر ابنة وبس الا اني وياه ورقة واحتركت مالنة خط رجعة

انسام،،لاتكولين هيج ان شاء الله ترجعون سوة

ريم،،ابد مالي نفس بي كسرني هواي ومسح كل ثقة بيناتنة

انسام،،الله يهديكم للبي صالحكم

ريم،،رجعت للبيت وامي مسولفيلهة الولد تلكتني فرحانة وتبوس بية هية وحسناء

ام ريم،،يمة الله يوفق عمج ويخلي الكم سند وذخر

ريم،،امين يمة

حسناء،،واحنة صارلنة شكد نقرض بثريا ورسمية طلع بيتج ولج هههه

ريم،،،شفتي بالله هم كلت اني

ام ريم،،راح تردين يمة شكلتي شصفى رايج عمج يريد حجاية منج

ريم،،عندي چم شرط اذا قبلوا بيهن ارد

ام ريم،،شتتشرطين بعد يمة شو بيت وحطولج باسمج ياهي الداروا خاطرهة كدج

ريم،،الله كريم يمة تعبانة وجوعانة مابية احجي اسد نايم موو

حسناء،،لا خذاه ابوه من الصبح

ريم،،من الصبح. خوش خليه يشبع منة البارحة ما شافة
طبيت بدلت وتغديت بشي قليل احس معدتي قافلة من التوتر توني اغفة وطب كاظم حط اسد بصفي

كاظم،،هذا يغفي ويريدج

ريم،،تعبتك ابو حسن

كاظم،،تتدللين چم اسد وام اسد عندنة

ريم،،كرص خدي وطلع غورگت عيوني لحنانهم هذولة اعوفهم وارد لحمزة وقسوتة شجابرني باوعت لاسد الي غفة على صدري وانتة شون بيك تريدني وتريد ابوك واحنة كلشي بيناتنة انمسح كون نكدر نكمل سوة لخاطرك انتة وبس، ،غفيت ودموعي بعيني شي بية مخنوك وحاير العصر كعدتني امي

ام ريم،،يمة ريمة كومي عمج اجة عليج

ريم،،طفرت من مكاني احاول اصحصح كمت بسرعة بدلت وغسلت وشربت چاي احس من كد التعب وما نايمة البارحة بالليل حتى ما اعرف هسة صبح ليل عصر ظهر تيهت الوكت والله شوية صحصت رحت عدلت شكلي رشيت عطرر ولفيت شالي ورحت للديوانية دكيت الباب وطبيت اتفاجأت حمزة موجود هم مو بس عمي كلت السلام عليكم. وردوا السلام

ابو حمزة،،تعاي بعد عمج بصفي

ريم،،رحت يمة بست جتفة،،وهمست شون صرت هسة عمي والله ادعيلك ليل ونهار وبكل صلاة

ابو حمزة،،زين يا بعد عمج ما دامكم بخير انة بخير

ريم،،الله لايحرمنة منك، ،كعدت بصفة متوترة افرك بايدي و عمي يمكن حس علية وشاورني

ابو حمزة،،اذا يضوجج جية حمزة نطردة عادي

ريم،،حصرتني الضحكة وكوة كتمتهة وابتسمت لعمي شلت راسي حمزة عاكد حواجبة جنة يدري الحجي عليه وظل يحاجي باسد النابص بحضنة بس هو كل شوية خازرنة اني وعمي لان عمي يحاجيني بصوت ناصي

ابو ريم،،بعد عمج كالج علي بالحجي البارحة

ريم،،اي عمي غوركت عيوني الله لايحرمني منك ويخليك الي سند حسستني بفرحة وحطيتلي قيمة وقدر عاليات هواي طيرني فرح

ابو حمزة،،گدرج عالي والله يگدرني واريحج واعوضج انتي وصية حسن نص روحي واندفنت واحسهة ردت بيج اشوفة بيج واشوفة دوم يوصيني عليج

ريم،،الله لا يحرمنة حنانك ويخليك النة ابو اني هم اشوفة بيك والله

ابو حمزة،،فكرتي يا بعد عمج موو

ريم،،اي عمي بس اريد اتأكد من چم شغلة يلا ارد مرتاحة من صدك

ابو حمزة بصوت واضح،،كولي بوية ما دام حمزة كاعد وخوانج كاعدين

ريم،،اباوع لحمزة نزل اسد من حضنة وانتبه علينة

حمزة،،كولي ام اسد اسمعج

ريم،،باوعت لعلي استمد قوتي منة ابتسملي براحة كانما يكلي احجي بزودج،،،جليت صوتي بعد حجي عمي البارحة الخلاني احمد ربي عوضني بي ابو مو عم شفتة هو البي مصلحة ابني وراحتة وخاصة هو كبر وكام يعرفك ويريدك يمة وبنفس الوكت يريدني صعب احرمة منك وانتة طيب وسالم وهم صعب ينحرم مني فالاحسن هو يظل بنصنة وخاصة هو ولد لو كبر باچر عگبة يريد ابو فوك راسة،،اباوع لحمزة ابتسم بطرف شفتة براحة

ابو حمزة،،عين العگل حجيج بنيتي

ريم،،مشكور عمي، ،هذا كلة الحجي لراحة ابني بقت راحتي اني وين وشووون،،باوعلي حمزة مستغرب رافع تك حاجب

ابو حمزة،،شقصدج بوية

ريم،،عمي اني تعرف تعبت ودرست وهاي اخر سنة الي ما مستعدة اضيع هالتعب كلة من وصل للحلگ اني اريد اخلص دراستي

ابو حمزة،،حكچ بوية

حمزة،،انة لو ما مقتنع من البداية تداومين ما جان خليتج

علي،،حمزة ترة هي راجعتلي وانة القررت اتكمل ما. مطلوب رايك

حمزة،،شون علي غير مرتي بشرع الله وعصمتهة بيدي بس انة من سمعت معهد بنات بس كلت خليهة تكمل براحتهة ولا تدخلت ولا جبت طاري تكعد فعادي تكمل هسة هية خلصت اخر سنة،،،بس اكلج من هسة تعيين ماكو ما محتاجة ولا راح اقصر وياچ

ريم،،باوعتلة وباوعت لعلي اشرلي اهدء،،سحبت نفس شسوي بالتعيين بيتي باسمي بجال عمي ومصرف اكيد ملزوم توفرلي كلشي اريدة عليمن اعوف ابني وابهذلة
وابتسمت بوجهة وهو صافن واصابعة جوة خدة ويدك باصابعة عاليدة مال القنفة

حمزة،،هذا خلصنة منة بعدد

ريم،،تلفوني يظل عندي احتاجة اني ولا تخاف حتى رمز ما احطلة شوكت ميعجبك فتشة

علي،،ررريم

ريم،،سكتت من حجة علي وحمزة بودة يذبحني على هاي حجايتي

حمزة،، ما يحتاج افتش وراج وادور اتوقع لو عندي شك بيج ما بقيتج على ذمتي

ابو حمزة،،لا بوية عيب هاي حجايتج احنة نعرفج كلش زين وانتي رباتنة

ريم،،كوة سيطرت ما بجيت غمضت قوي وحجيت عالعموم عمي اني احتاج الموبايل

حمزة،،خلي عندج حتى تعرفين گصدي

ريم،،وعمي من رخصتك افتح باب على حديقة اهلي الورة (وطبعا هالشي اخذت اذن علي بي قبل ما احجي لعمي خابرتة من المعهد لان انسام خلتهة ببالي كالت تداومين ابنج تجيبي توديه وقبل علي يلا حجيت هالموضوع)

ابو حمزة،،الاذن نطلبة من علي هو ابو البيت

علي،،كالتلي عمي وماعندي كل مانع بالعكس اكيف تروح وترد علينة بلا ما تطلع للشارع

ريم،،هاي هية عمي ما عندي شي بعد ارد اكعد ببيتي اربي ابني وما اريد اي شييي بعد كلشي ما اريدد واكدت على هالكلمة وعيني بعين حمزة اريد اوصلة انه كلللشي ما اريد منك ولا اريد قربك بحياتي الخاصة ابدددد

حمزة،،لعد اذا بس هاي شروطج بيج خير وتتدللين ام اسد كلشي طلبتي بلسانج اعتبري تم وانة هالاسبوع اكمل ترتيبات البيت واشتري اثاث وانتي جهزي امورج خميس الجاي بسلامة تردين لبيتج من رخصة ابوي وعلي

علي،،هاي هية ما دام اتفقتوا بيهة الخير بيناتكم ولد ولازم توفرولة عايلة تحبة وتحاوطة

علي،،انة ممنونك واعذرني اذا تلاسنت وياك بحجاية لو تكدر خاطرك مني انتة اخوية وابن عمي وحزام ظهري

علي،،كلة طايح جوة رجلك ابن العم اهم شي تدير بالك على ام اسد واسد

حمزة،،ان شاء الله

ريم،،تباوس وي الولد وتقريبا هدأو خواني وارتاحوا لاعتذارة حتى حسنين برد شوية بوست عمي اني هم واتشكرتة ووهو هم بوسني فرحان بية اني اترخصت منهم وطبيت للبيت وامي تلكتني تبوس بية

ام ريم،،بالمبارك يمة الحمدلله الله برد ناركم الله يسعدج ويوفقج

حسناء،،مبرووك ريمة تستاهلين كل الخير بس راح اشتاقلج تعودت عليج كلللش

ام ريم،،هاي وينهة بصفنة والباب مفتوح علينة

ريم،،هههه حسناء تنقل الاخبار بحذافيرهة

حسناء،،شسوي كتلني الخوف اريد اعرف شقررتي وشني هية شروطج يمفلوكة شون تحجي برهاوة

ام ريم،،تعاي يمصخمة شنو تكليلة تلفوني عوفة يمك فتش بي عوبة لسانج طولان

حسنين،،افيييش هالحجاية بردت گلبي حيييل يمكن لوما حاجيتهة ما خليتج تردين

ريم،،طب حسنين ويحجي مندمج وكفخني على كيفة

حسنين،،صدك ما اخاف عليج بعد لان وكفتي بوجهة وطلعتي حگ

طبوا بقية الولد

علي،،اي اي شجعهة عالغلط

حسنين،،لا صح مو هذا اساس المشكلة الكبرت بلا طعم

علي،،ميخالف ميصير تكولهة تشكك بروحهة وزحمة من عمي هم

ريم،،مقهوورة منة وحجيتهة

علي،،ميخالف لاتعيديهة بعد انتي محد يشكك باخلاقج ذرة وليسوي هيج ينمسح من هالگاع

كاظم،،مبارك ريمة الحمدلله الله هداكم للطريق الصح، ،،، ولو راح ارجع للحصار متعلم على صوانيج وطبخج

ريم،،البركة بسرور

حسنين،،يبوو راح يفگرهة كاظم محد عم عليج غير كاظم وكرشة

علي،،حسنييين

حسنين،،العفو اقصد ابو حسن وكرشة

ريم،،اباوع لكاظم نتر اسكت ولك و علي يحاول يكتم ضحكتة تالي ما اتحمل طك ضحك وكلنة نضحك وياه وكاظم تعصب

كاظم،،حقك مقهور من هيبتي وهيبة كرشي جنك قلم رصاص

حسنين،،الحمدلله والشكر ربي بقيني بهالحال والنعمة هالهيبة اليحجون بيهة ما اريدهة

عادل،،هااا اسمع كلمة هيبة اكيد كرش كاظم بالموضوع

كاظم،،ولكم انتو شو ما تستحون اخوكم الجبير وصرت ابو وتصنفون علية

عادل،،والله عبالي من جابت مرتة يردلنة هو هم فاش تالي اتذكرت الحمل مال كاظم طول العمر

حسنين،، هههههههه بشررفي قوية

علي،،بسسسس صدك ما تكبرون يلا سدوا الموضوع ما تنطون وجه لعد وين احمد شو اتأخر

عادل،،يم صاحبة يقرة شفتة ببابهم

علي،،وانتة ما ناوي تتخرج الاصغر منك لحگوا بيك وراح يتخرجون وانتة مسويهة طب علينة ولهسة مندري تتخرج السنةلاا

عادل ،،لا لا ان شاء الله السنة متخرج وخلصان هاي هية ناوي اخلص تعبت من الدراسة بعد

ريم،،كمل هالليوم والكل مرتاحين بس اني بقلق وحسنين هم احسه مو كلش مرتاح لرجعتي بس حاول يطمني بصحة قراري ويشجعني اواجه واحجي وما اسكت بعد ،،ثاني اخذتني امي كوة اريد ما اريد للسوك اشتريت لاسد ملابس جدد والي كم شغلة محتاجتهن من ملابس و عطور لحت علية امي اشتري مكياج وما قبلت شسوي. بيه رجعنة جانت سرور جاية بوستني وكأن شيئا لم يكن هاي شبيهة شاخطة معقولة هيج وجودي جان مضايقهة، ،،التهيت بدوامي وامتحاناتي يومين والثالث الظهر هستوني رجعت من الدوام جاي اتغدة بعدني و طبت ختام تهلهلل من الباب

ختام،،صدك صدك السمعتة من عمي ولج صدك حمزة ما مطلكج وصدك راح تشيلين وهذا بيتج وباسمج ولج راد عقلي يوكف من حجة عمي ما تحملت ما عولت طبوا للغرف واجيت ركض

ريم،،اي صدك طلع حمزة افندي رادني بلا ما ادري

ختام،،يا مفلوك وصارلة شكد خانس وما گال شمنتظر مثلا يبيض الديچ

ريم،،والله هاي راح تخبلني ليش ما حجة وكال

ختام،،منتظر الامور تبرد انة اكلج هو مسودن بيج ومبين ،،هيج يعوفج ويطللگ

ويم،،لعد ليش طلك من الاول خو جان ما رضة ودار وجهة وراح

ختام،،چا مو رحتي يمدولبة ورفعتي عليه دعوة وصادق گال بوكتهة ما دامة تزوج بلا علمهة تحكملهة المحكمة هو كلك عليش تجبرني المحكمة اطلگ فرهة هيج ولعب عليج

ريم،،اخخخ من تفكيرة

ختام،،همزين، ،شوفي بردتي وهالراح تردين وابنج يرد لحضن ابوه ولج ما مصدكة لهسة ومحمد ميتة فرح مو بس لهاي

ريم،،لعد ليش

ختام،،كون تشوفين وجهة عمتي من گال عمي السالفة وكاللهم حمزة يريد مرتة وما طلكهة وراح يردهة اسبوع الجاي ولج وجهة كام ميتفسر ونطت

ام حمزة،،وانة ما اريدهة تدخل بيتي مرة ثانية مو هية الرفعت دعوة على ابني ورادت توكف وياه بالمحكمة هيج عرامة ما تناسب بيت الشيخ

حمزة،،لا تخافين يمة هي ما تگعد وياج ابوي بنالهة بيت وراح تكعد بي

ام حمزة،،صخام بعيني بس لا البيت الگلت للخطار يحسين

حمزة،،ايييي خو يمة حتى سجلة باسمهة شفتي شوون

ختام،،يمة ولج شهكت شهكت حتى حياطين البيت فزن يمكن

ام حمزة،،شوووون يحسين صدك والله

بو حمزة،،اي صدك مو ما ترديهة ببيتج هاي متجي يمج

ام حمزة،،اي يلوكلهة والله ضلت تتمسكن وتتبجبج يمك لحدما سويتلهة بيت وانة عمر وياك ما فكرت تكتبلي ربع هالبيت للوكت

ابو حمزة،،ليش مقصر وياااج بعدين شني تردين تارثيني بالحيا انتي مالتيش اكتبلج باسمج شي اموووت وشبعي بالبيت بس لو متت انة وعفت هاليتيمة تنطيهة شي انتي والبستان مو من حگي بس وكلهة راضيتهة الا حسن ماقبل وتنازل وانة ضلت ببال وكفتة ذيج وهاي رديت حكة لهاليتيمة،،،،،وغير هاي ان فتحتي حلكج بعد بموضوعهة لو اذيتيه ميصير طيب وياج وحگ الخلقج

ختام،،ولج وهية دك وبجي وادور حمزة يشعوط بيهة

حمزة،،اي يمة شفتي بالله راح اروح يمهة كعيدي

ام حمزة،،تخسة انتة ابو البيت

حمزة،،لا يمة كعيدي عليج الله طلعيلي فراش باجر خاف متنطيني وانام عالكاشي

الجدة صالحة،،سودة بوجه العدو ياجدة هاي نضدتي متروسة واخذ

ام حمزة،يلوكلهة ام حلك غصبا عنهة تنام عالجرباية بغرفتك دخل تغلط وياك بحجاية اطيح حظهة

حمزة،،لا يمةةةة كل علاقة مالج بيهة من هسة انة اكلج سوالف كبل كلللهة تنمسح حرمتي وانة وياهة نتصافة محد يتدخل ولا ياذيهة بحجاية هالمرة نخرررب من صدك

ام حمزة،،شوف حتى هذا گلب بعدهة ما جاية مو خالية شو شساگيتكم احلف

ختام،،وخلت عمتي وكامت لغرفتهة وهية تهجر بس انة طرررت فرح واجيتج ركض

ريم،،الله لا يحرمني منج ،،زين حنان رجعت

ختام،،لا بعدهة يكولون ماجاي تطيب دوخة متفكهة وحمزة ماخذهة لطبيب ببغداد وطالع عندهة فطر بالجمجمة من الوكعات وباقية ترتاح يم امهة وخواتهة يدري بعمتي مترحمهة

ريم،،جريت نفس مقهورة عليهة الحمدلله على عيشتي اني بنص الجنة مقارنة بعيشة حنان الله يشافيهة ،،،،،خلص الاسبوع والبيت كمل وانفتح منة باب على اهلي واني كملت جنطي وغراضي اني واسد واخذتهن ختام خطية من الصبح جاية لان عمي مسوي عشة لرجعتي وعمتي كالعادة شايلة ايدهة انوب الي تطبخ عشة ما تحطني بالجدر وتسويني تشريب هههه،،العصرية واجة عمي وحمزة وياه ياخذوني واتشكروا من خواني وتباوسوا وياهم وعلي اخذ حمزة على صفحة يحجي وياه وهو ساكت هز راسة وباوس علي وطلعت امي تبوس بية ومدمعة وخواني هم ضايجين تعودوا علية وعلى اسد وكلهم كلمتهم وحدة (احنة حزام ضهرج لو شما يصير منعوفج وشتردين تجين وتطلبينة من عيونة ويجرالج )نزلت دموعي لمحنتهم مو كل اخو هييح الله لا يحرمني منهم من عمري لعمرهم وصلنة بيت عمي و كلبي يدك حيييل ما اعرف الجاي شنووو بس الاعرفة ريم الرجعت هسة مو مثل ريم الطلعت شاردة گبل من هالبيت،،،طبيت وجديتي وعمتي فرحة يهلهن وجديتي تطش جكليت حسيت شكد اني عزيزة عندهم اليزرع طيب يحصدة . سلمت عليهة وبست راسهة وايدهة

الجدة صالحة،،الحمدلله العشت وشفت هالليوم

ريم،،عمرج طويل جدة الله لا يحرمني منج،،تباوست وية البقية عمتي فرحة وختام وثريا وحمواتي هناك هم عادي خو فاطمة طايرة هناك ونزلت عمتي من فوك

ام حمزة،،هااا اجيتوا ما ادري كل الهلا

ريم،،باوستني من ورة خشمهة وهمست وهي تباوسني

ام حمزة،،لا تفرحين هم اطردج

ريم،،بنفس الحركة سويت روحي اباوسهة وشاورتهة جررربي اذا صددك وباوعت بعينهة رافعة حواجبي بتحدي هي تبلعمت وخزرتني وراحت للمطبخ واني طبيت لغرفة جديتي، ،كملنة هوسة العشا وشربنة چاي وتعللنة حمواتي راحن وثريا صعدت وعمتي من ورة العشا ما شفتهة وبقينة اني وختام وعمتي وجديتي نسولف تاخر الوكت واسد نعس وكام ينگنگ

الجدة صالحة،،نعس هذا مبين

ريم،،اي والله جدة تعب اليوم

الجدة صالحة،،روحي فرحة صيحي حمزة ياخذ عايلتة لبيتهم يرتاحون ولو جدة جنت اتمنى تضلين كبال عيني بس هيج اريحلج

ريم،،مو بعيدة جدة هاي فتحي باب الترك وتعاي علية واني امرلج شوكت ما فرغت

الجدة صالحة،،اي هو هذا المسكتني بس ختيمة المصگوعة من عزلت كطعت بية بعاد عنة صاروا

ختام،،شسوي جدة مو اتوسل بيج تجين لبيتي اشيلج بعيني وما تقبلين وعلى فرغاتي امررن عليكم

الجدة صالحة،،الله يوفقكم جدة هاي سنة الحياة

حمزة،،ها مكملين ترحون هسة

ريم،،فزيت لصوتة التفتت واكف بباب الغرفة لابس دشداشة نيلي وفوكاهة فروة بيجي ويفر بسبحتة برهاوة يباوع وشبح ابتسامة على شفتة،،،اي نروح،،،كمت بوست الكاعدين واتشكرت منهم وطلعنة من باب الترك وسدتهة ختام ورانة سحب اسد من ايدي بلا ميحجي وصلنة البيت الاضوية منورتة فتح باب المطبخ وطبينة دااافي وريحتة تخبل المطبخ كاونتر وسنك تركيات ابيض لونهن وميز طعام وثلاجة ومجمدة زغار منة دخلنة للصالة بيهة ديوان مرتب ماروني طووخ وذهبي وميز وبلازما وغرفتين نوم وحدة بيهة جربايتين ام نفر وبوفية زغيرة فوكاهة فراش وكنتور ابو بابين وغرفتي تركية بسيطة ابيض وماروني وجرباية اسد القديمة بيضة جانت هم مخليهة هو اصلا ما دزهة وي الغرفة اتفرج مكيفة وطايرة هاي مملكتي بعد صدك حلووو الاثاث والبيت ناازك ململم يفتح الگلب التفتت حمزة صافن علية وواكف وشايل اسد الجان نايم على جتفة خلاه بجربايتة بدون مينطق حررف والتفت علية وكام يتقرب ناحيتي رجعت ليورة شوية وهو يتقرب اكثر رفعتي اصبعي باشارة تحذير،،،ممنوع تتقرب علية ولا تلزمني ولا يجمعني وياك فراش واحد رديت اني لخاطر اسد وبس تقرب اكثر لزك بية الا شوية سحب البردة من وراي وعدلهة واني بحضنة تقريبا صرت ابتعدت بسرعة وخزرتة

حمزة،،مو كنالج يا بنت العم كلشي طلبتي بلسانج تم وانة احب اشووف شون الواحد يوكع بغلطات لسانة ويندم

ريم،،رفعت حاجبي وابتسمتلة، ابددد ما عرفتني شوون شلت الندم من فكري كلة الاحطة برراسي اسوي يعني اسووويه،،باوعلي وخزرني بغضب ما اهتميت ،،،ذبيت عبايتي وجريت شالي نزعتة وفتحت كماشتي نززل شعري الجنت مسرحتة ولونة يخبل صاير من الحنة والگهوة نثرتة بايدي بعنادة احرك بگلبة عبالة ميتة عليه اباوعلة عيونة ذبلت طفيت الضوة رأسا وكتلة تصبح على خير عود من تطلع سد الباب خاف يستبرد اسد ومددت عالجرباية ثواني وطلع وطبك الباب بعصبية،،،،ضووگ ياحمزة مرارة ايامك خلتني علگم،،،،،،،،،،،،،يتبع

حبايب گلبي حب انوه انه بدت امتحانات نصف السنة فالكتابة والتنزيل على فرغتي هالاسبوع واعتذر جدا وشاكرة تفهمكم