رواية الكسار (سلاسل الغوث) الفصل الرابع والخمسون بقلم لـ ميامي

أضُم چم ليل من روحي
واسيرلك گُمر مَتعوب

-صلو على محمد والِ محمد الأطهار

-متابعة للحساب+تصويتكم+تعليقاتكم⭕️

~~~~~~~~~~~~~~~~~~~~~~~~

دموع:مرت الأيام وقربت ولادتي بديت اجهز لطفلي والكسار ينتظر النتيجة حتى ياخذ الجثة يدفنها جهز القبر وجهز كلشي

باقي هالأيام بس صافن ويدخن گوة يروح لشغلة وگوة يحچي خفت يموت من القهر ديكتم بداخلة

وصلت طلبية الطفل الي طلبتها من عرفت ببطني ولد بسرعة طلبت
استلمها وهيب خليتها بالصالة وصعدت متحمسة نسيت كلشي لگيتة كاعد بالغرفة وصافن

لزمت ايدة وحچيت بفرحة
دموع:وصلت طلبية الطفل الي طلبتها تعال شوف

سحب ايدة بهدوء وكال
الكسار:مالي خلگ انزل متأكد كلشي طلبتي حلو

اختفت ابتسامتي وحكيت رگبتي بفشلة
دموع:تمام

درت وجهي وطلعت من الغرفة اتنهد بعدني منزلت وفتح الباب وتقرب لزم ايدي ونزلنة سوية رجعت فرحت وتحمست يشوف

كعدنة بالصالة وصرت افتح بالأغراض واشوفهم كلهم
دموع:هذا جبتة بناتي حتى بس البسة مال بنات ويرتاح گلبي راح اموت على بنية وهذا اخذتة هم

بقيت افتح وارجع ليورة لأن هواية طلبت شفت الكسار بدا يتفاعل وياية يضحك ويسولف لو ياخذ من الأغراض يشوفهم

حسيت شوي نفسيتة تغيرت
لميت الأغراض واخذتهم فوك حتى ابدي ارتبهم اجة باهر على وهيب والكسار سوولهم نراگيل وكعدو بالحديقة

ساعة وصعد الكسار ذب نفسة على الچرباية وفتح تلفونة يباوع لصورة حسن ويتنهد

نسيت مجبت مي نزلت جوة وكلت اروح اشوف هالأثنين
وكفت بمكاني استمع لحوارهم

وهيب:باهر سد الموضوع احسلك

باهر:بس اسمعني شبيك ليلة وحدة جرب وشوف اذا تتقرف من العلاقات او لا ترى اني لحد هسة ممستوعب انتَ چنت عايش بقذارة العصابات بس ولا مرة جربت بنية

وهيب:اني دخلت بهالقذارة بس مصرت قذر ولا راح اصير لو تقنع بية منا لباچر حتى اسوي هالفعل المقرف مراح اقتنع اني هالشي بالحلال رفضتة اروح اخذة بالحرام

باهر:بس فكر وياية لو تشوف بنية حلوة لابستلك هشك بشك صدگني راح تذوب بس انتَ متخوف من الزواج شايف اذا تزوجت تعيش امير والله كل يوم تجيك لابسة شكل تتغزل بيك اخخخخ شوكتتتتت اتزووووجججج

شفت وهيب سطرة راشدي خلا يصحى من احلامة الوردية
وهيب:انلصم عيب تحچي هيچ وغلط أصلًا

باهر:مو اريد احمسك للزواج شوف ترى اني شايف وعايف بس هسة اريد اتوب واستقر لشوكت ابقى ابو نسوان اسمع مني وفكر بالليالي الحمر

وهيب:الزواج مو بس ليالي حمر وعلاقة زوجية انتَ من تتزوج راح تتعلم تحترمها وتحترمك راح تحبها تدلعها تتغزل بيها تذكرها بالطيب متباوع لغيرها تقدر اوضاعها النفسية والجسدية وهيَ تقدر تعبك الزواج مشاركة وبعدين يجيكم اطفال وانتو سوية تتعلمون تربوهم زين مو تترك التربية عليها ومو بعد الزواج بسنة لو سنتين تهملها ويعجبك تبتعد من تتزوج لازم تكون گد مسؤولية نفسك وتبقى مثل ما انتَ متتغير

باهر:اعرف والله لهذا اني ردت اتزوج لأن اعرف نفسي گد هالشي

سكت وهيب وباهر شيسكتة
باهر:بس بعدني اريدك تجرب ليلة وحدة

وهيب:اكل تبن

باهر:على راسي حبيبي انتَ والتبن على راسي تعال ابوسك

وهيب:انتَ تدور ولد؟

لزم ايدة وحچة يعض بشفايفة
باهر:من اول مطلعت من السجن عيني عليك انعجبت بيك نتزوج؟

وهيب يهز براسة يسمعلة بس كمل كلامة دفر الكرسي مالتة خلا يوكع والفحم وكع على ايدة طفر متأذي

باهر:اشتعلووووو وانشوو تف عليك

وهيب:هاي حتى تتعلم تتأدب اني النسوان ما احبهن اروح احب زلم؟ وياريت زلم حلوين شو چنك سومو

باهر:شبييييك انتَ وهاي وداد ترى اني احلى منكم مو صوچك صوچي عايف خطيبتي وجاي كاعد يمك مع السلامة انطيني بوسة خلي اروح

سحب وجهة وهيب وباسة حيل وركض يضحك
وهيب:كلب ونذل مو بيدك ترستني سلاچ

اخذت مي صعدت فوك اضحك واهز بيدي باهر مخبل الله يعينچ يروزا
دخلت للغرفة لگيت الكسار ينزع ملابسك يريد ينام

باوعلي وحچة بنتر
الكسار:ليش نازعة حلقتج؟؟

ضربت راسي
دموع:يااااا نسيتها انطيني

ردت اخذها بس سد ايدة وكام وكف كدامي
الكسار:من شوكت تنسيها انتِ

دموع:ترى عادي نزعتها بالغرفة من سبحت لأن تعرف بية بكل اسبوع اسوي عناية واخاف انزعها بالحمام وتضيع هالمرة من فرحتي بملابس الطفل راحت عن بالي

سحب ايدي بقوة ودخلها بأصبعي ايدي رادت تنكسر
الكسار:لتنزعينها

دموع:ايدي اخخخخ شوووف انجرحت بيها وخررر

وخر ايدة واني اباوع لاصبعي شوي انجرح لأن لبسها اليه بقوة باوعتلة حابسة دموعي بعيوني

دموع:شبيك وياية

ضل يباوعلي ويبلع ريگ مسح وجهة يهدأ نفسة وتقرب علية اكثر حاوط وجهي بأيديناتة وكال

الكسار:اسف اعتذر منچ حزن گلبي

برطمت شفايفي ونزلت دمعتي ومديت اصبعي بوجهة
دموع:اذيت أصبعي

بسرعة اخذة يبوس بي برغم جرح كلش بسيط جاب لاصق جروح وحطة على الجرح

الكسار:اسف

مسحت دمعتي امداني بسرعة ابچي ابتسمت وسحبت ايدي
دموع:عادي مصار شي يلا روح نام انتَ تعبان

هز راسة وكال
الكسار:باچر العصر نروح لدكتورتچ مو تنسين

دموع:اي حتى نعرف شوكت عمليتي هم

ابتسم وراح لأكتافي نزل الصاية على كيف بقيت بس بالتراك حط ايدة على بطني يحركها على كيف

الكسار:التراك يخنگچ ليش متلبسين ثوب احسن؟

دموع:اختنگ اذا صار شي على بطني البجامة مال التراك اكدر انزلها عن بطني

الكسار:تردين اطلع وتاخذين راحتچ بالغرفة؟

دموع:لا اني مرتاحة والله

دنگ باس خدي وباس الثاني سحبني على كيف للچرباية خلاني اتمدد وغطاني وتمدد بصفي

الكسار:شنو نسمي ثالثنة برأيچ؟

دموع:ماعرف شتكول انتَ؟

الكسار:ماعرف نختار اسم وهيب لأن چان عاجبچ لو نسمي ادهم لو الأكبر

دموع:الأكبر حلو وهم اسم وهيب حلو

الكسار:اختاري براحتچ ما ضل شي وينور هالدنيا

ابتسمت وهزيت راسي حط ايدة على عيونة يريد ينام ردت اسأله على قرارة وتراجعت حطيت راسي ونمت

ثاني يوم العصر لبست فستان وردي وشال ابيض اشتهيت احط مكياج مادري شنو سالفة هالحمل كلش حبيت المكياج خليت شي خفيف

چان ينتظرني جوة نزلت بس شافني عگد حواجبة
الكسار:رايحين عرس؟

دموع:ليش

الكسار:دموع لبسي شي ميبين بطنچ بي

دموع:ممبينة هواية وترى هذا فستان حوامل يعني عريض ومستور

فرك وجهة وطلع كدامي مزعوج رحت ورة صعدت بالسيارة كدام وايدي خالتها على بطني احركها والطفل لأن بالأشهر الأخيرة صارت حركتة قليلة

واحنة بالطريق شفت محل مرطبات كاعد بسرعة لزمت ايدة اهز بي
دموع:جيبلي موطة بالفراولة واكو وحدة بالتوت هم اريد

هز راسة وتوجه للمرطبات نزل جابلي الأنواع الي ردتها وكعدت اكل واني من قبل متعودة اذا اكل شي اوكلة وياية

اخذت شوي بالخاشوگة وقربتها لحلگة باوعلي واكلها وخلصت الطريق اكل واوكلة وياية
وصلنة للدكتورة مسحت ايدي وعدلت حمرتي ونزلنة ويا نزلتي سمعت صوت عالي يكول

:اروح فدوة للحامل ياريت اني ابو الحامل بي

بسرعة التفتت للكسار چان واكف كاز على اسنانة يباوع للولد بدون تفاهم سحب سلاحة من خصرة ووجهة على الولد

الكسار:اكل نعل يا كلب يا ابن الكلبببب اجي اترس حلگك قنادر

الولد من شاف السلاح شرد مادري وين اختفى حط السلاح بخصرة تقرب علية ولزم ايدي حيل

الكسار:اني ليش مسلتت وكلتلچ غيري هالصخام امشي كدامي حسابچ بالبيت الي اشعل وانعل

بقيت ساكتة احنة بالشارع بس اني شعلية اذا الولد طايح حظ
دخلنة وكعدنة ننتظر دوري هوَ شاف اكو نسوان حوامل اجو كام وكف بعيد وخلاهم يكعدون بمكانة

اباوعلة يهز برجلة ومعصب وميكدر يدخن
وكفت كدامي مرة عجوز كالتلي بصيغة الأمر

:كومي خلي اكعد على ما تدخل مرت ابني متشوفيني مرة چبيرة

باوعت لمرت ابنها تعلچ
دموع:اني حامل خالة وهذاك كرسي فارغ

:والله متستحين تچذبين وتكولين حامل بس حتى متكومين امداچ وگبر لفچ

بقيت اباوع للكسار عيوني مدمعة رزلتني كدام الكل وصوتها عالي بس الكسار ابد ما سكت تقرب روحة طالعة

الكسار:شنوووو تدعين عليهاااا عجوز على عيني وراسي والچ احترامچ بس احترمي المقابل مرتي حامل وحملها خطر متشوفين بطنها هذاك كرسي فارغ تكدرين تروحين مو ذوق تكومين مرة حامل وتعبانة من مكانها

سكتت تهز بيدها وراحت كعدت بالكرسي
الكسار:لتبچين والله راح تموتيني موضوع صغير تبچين شكو

دموع:فشلتني كدام الموجودين

الكسار:عوفيها مرة چبيرة العجايز مينحملون

مسحت عيوني وهدأت نفسي
صار دوري دخلت على الدكتورة وانطتني موعد للولادة بنهاية التاسع تكول افضل طلعت من يمها وكلت للكسار نروح ناخذ علاجاتي وعلاجات ادومي ما كال لا لزم ايدي يمشيني ورحنة للصيدلية اكو ولد بالشارع عيونهم زايغة بس هالشي مو ذنبي الكسار عصب كلش كلت هسة ينفجر علية

الكسار:والله اليوم اشعلچ شعل بس خلي نرجع

دموع:اني شعلية

الكسار:سكتيييي اوكفي هنا ماكو ولد راح ادخل اجيب العلاج واجي لتتحركيييين فهمتيييي

عاط بية حزت بخاطري بقيت واكفة هسة اني شعلية
ردت ابچي بالشارع كلت خلي اروح للسيارة احسن

مشيت شفايفي ترجف ومانعة دموعي تنزل مچنت منتبهة للطريق حطيت رجلي اريد اعبر وحسيت بأيد قوية تسحبني رجعت ويا السحبة وعبرت سيارة حمل من هاي الكبار بقيت صافنة لو ماشية خطوتين بعد چان انمردت مرد

حطيت ايدي على گلبي واشوف الكسار اجة يركض بكل سرعتة خايف وابو المرور الي سحبني يصيح بوجهي

:ويييين بالچ انتِ انوب حامل بلا دايستچ السيارة مو تموتين انتِ والطفل مو راسچ يتطشر ليش بابا ليش هذا طريق من امشين لازم تباوعين

خفت من الكسار حتى بچي مبچيت من الخوف وهوَ بس وصلني سحبني لصدرة وگلبة يدگ حييييل

الكسار:مووو كلتلچ لتتحركيييننن

چلبت بملابسة ارجف تشكر المرور واخذني للسيارة وبس صعد انهد بية
الكسار:زااااد حسااابچ كلللش زاددد مااا تستحييييين رجل كرسييي اني مو گلتلچ لتتتحركيييين كلتتتت لو لاااااا لچ اليوم احير شسوي بيچ اليوم احرم بيچ

ضل يغلط ويغلط واني منزلة راسي وابچي وصلنة للبيت وما اهتم لا للأطفال ولا لوهيب وكف بالصالة يعيط علية ويرزل وعند وهيب اجة يريد يفهم شكو ومن عرف صف ويا صار يرزلني خوالي اجو وعرفو بالسالفه حطوني بالصالة همَ داير مدايري واكفين واني بالوسط وكلهم يرزلون بية ويحچون انوب الصدفة جابت ابو الكسار ومن عرف ضل يحچي وياية هوَ الوحيد حچة بهدوء

احتاريت اباوع لمنو واسمع لمنو دخت دخت اتمنيت ولا هالضغط النفسي الي داتعرضلة كعدت على التخم مغطية وجهي وابچي

دموع:كافييييي كافييي راسي حينفجرررر اني غلطانة بس كافيييي

سكتو عني واني ابچي كعد بصفي وهيب وحضني
وهيب:احنة خايفين عليچ بنتي دمعتي لو صاير بيچ شي اليوم غير نموت يلا بعد منحچي شي مسحي دموعچ

مسح دموعي بأصابعة
دموع:يعني اني خايفة هواية شبيكم وياية متشوفوني اليوم ردت اموت لو ميتة هم ترزلوني

جناح:نرزلچ ونطيح حظچ هم هاي سواية تسوينها

دموع:وخرو عني كافيييي مليت منكم بس ترزلوني

رفع ايدة بوجهي راد يضربني چان كلش معصب ومقهور شفت وهيب لزم ايد خالي حيل مخنزر بوجهة عصرها بقوة اصابعة انلوت وحتى سمعت صوت شي طگ بيها

وهيب:لو مو تصير خالها اكسرها وعلي

نتر ايد وهيب ولزمة من ملابسة
جناح:لا انتَ ولا اختك تستحون انتَ ما عندك احترام لأحد واختك متسمع من احد

دفع خالو على كيف
وعيب:منو انتَ حتى تحاسبها؟ منو انتَ حتى تضربها كلك خلگ اخو شهيناز العار واول البارحة يلا عرفناك

خالو فهد بعدهم عن بعض ومبين محد قابل على كلام وهيب
فهد:شنو انتَ بعدة شايل بگلبك علينة؟

وهيب:ولا راح يصفى والي اشوفة يحاسب دموع لو يأذيها بكلمة احسب الله ما خلقة

بقيت كاعدة واكل بأظافري خايفة يتعاركون بسببي خالو جناح رجع لزم وهيب من ملابسة والأثنين معصبين

جناح:اخر مرة تحچي على اختي فهمت؟ انتَ متقبل احد يحچي على اختك ولا اني اقبل

ضحك بطريقة مستفزة
وهيب:تقارن اختي دموع الشريفة الطاهرة بأختك العار

خالو رفع ايدة وضرب وهيب بكل قوتة كمت بسرعة صرت كدام وهيب ارجف

دموع:ماريددددد تتعاركووون ليش تضربةةةةة خالو

مجاوبني التفتت لوهيب لگيتة يباوع لخالي بحقد رفع اصبعة بتهديد
وهيب:هالمرة مديتها بس اذا حاولت ترفعها بوجهي بعد اگطعها گطع

بقيت اباوع للكسار بتوسل بس حتى يتدخل ويفاككهم قرب لزم خالو بعدة عني مادري شنو يهمس بأذنة بس خالو دفعة حيل

جناح:احترم خالككك لا اكسر راسك نعرف مريض واحترمنة هالشي بس اذا انتَ مخبل نعرف نصير مثلك مخابيل

انعصر گلبي عصر من كال هيچ بسرعة بقيت اباوع لوهيب الي ملامحة باردة بس عيونة نظراتهم سودة

وخرني عن طريقة وبحركة سريعة طفر على خالو وكعو بالأرض لزم رگبتة وصار يخنگ بي

وهيب:انييييي مخبلللل مووووو لعدددد ما علية حرج خلي اشوفك المخبل شنو ممكن يسوي

حاولو زياد والكسار وباهر يسحبو عن خالو بس مكدرو وهيب من يعصب يصير حيل قوي وكأنما ينسى نفسة ويفقد

سحبو كلهم لازمي وخالو يكح مصدوم من عملة وهيب
وهيب:احرگ گلبك والله احرگ گلبكككك لحدددد يعايرني بشيييي انتو واختكم سببة اني مرييييض بسببكممممم عوفونيييي

جناح تندم على كلامة
دفعهم عنة وكام ميشوف كدامة طلع من يمنة مادري وين راح باوعتلهم كلهم ابچي

دموع:موضوعكم وياية ليش تزعلو وتقهروووو ليييش تعيرو بمرضة

تنهد وتقرب علية
جناح:مچان قصدي والله بس عصبني

دموع:حرام عليكم تأذو هيچ هالشي مو بيدة مچنت اتخيل بيوم من الأيام انتو تسوون هيچ بس لأن دافعلي

قبل ليرد احد على كلامي دخل حسوني يبچي
الحسنين:ماما خالو وكع راسة ينزف

شهگت وضربت على صدري ركضنة كلنة لبرة لگينة وهيب متمدد بالحديقة ينتفض ودم نازل من راسة وخشمة رجلية بادت مكدرت اتحرك تجمدت بمكاني من الخوف

بسرعة الكسار ذب نفسة حاوط جسم وهيب رجلة وايديناتة وباهر سحب راسة خالو ضل حاط ايدة على راسة

هدأ جسم وهيب بس حلگة ضل ينزف دم عبالنة عض لسانة بس همزين عاض جزء من داخل حلگة

مريض الصرع مرات تصير عندة ردة فعل قوية بعد انتهاء النوبة وهذا الي صار برغم تعب وهيب بس برجلة دفر الكسار ببطنه بكل قوتة وكام على حيلة ثواني ورجع وكع دار وجهة للجهة الثانية وصار يتقيئ

زياد راح للكسار يشوفة خطية تأذت بطنة وخالو فهد وباهر ويا وهيب يطمأنون عليه حسوني جاب مي باهر غسل وجه وهيب

كام عنهم دايخ ويعرج راسة وحلگة كلهم دم حچة بكل تعب
وهيب:عوفوني ماريدكم ماريد احد

كال هيچ وراح يمشي للشارع راد باهر يلزمة يروح ورة بس الكسار أشرلة يتركة بحالة

الكسار:عوفة خلي يرتاح هسة معصب تالي نحچي ويا

باهر:خاف يسوي بنفسة شي

الكسار:لا يريد وقت يرتاح بي عوفة

هز راسة غطيت وجهي ابچي راد خالو فهد يجي يعتذر مني يس تركتة ورحت صعدت فوك مقهورة على وهيب ليش هيچ يتعير بمرضة قابل هوَ بيدة

نزعت فستاني وغيرت ملابسي دخل الكسار وراية خطية كسر خاطري حصل ضربة طايرة

الكسار:اهدي بالليل يجي ونحاول نحچي ويا

دموع:طلع من البيت يعرج هسة رجلة راح تبقى ايام تأذي ومندري وين راح ليش هيچ خالو قهرة والله گلبي انعصر عصر شحال گلب وهيب هسة حرام والله حرام

الكسار:عذريهم الأثنين عصبو وصار الي صار عوفي هسة يهدأ لتخافين

دموع:يعني اكيد يدافعلي استخسرو يشوفون شخص يدافعلي هوَ اني منو الية غيرة اذا مو هوَ يدافعلي منو يدافعلي

لزم فكي بسكل خفيف وحچة بغضب
الكسار:يعني اني ما ادافعلچ؟ هيچ صارت دموع بس وهيب يدافعلچ لو جناح ماد ايدة عليچ چنت راح اكسرها اله

دموع:عوفني ضايجة منكم كلكم وخالو بعد ما اريدة راد يضربني وضرب وهيب وقهرة عوفوني بحالي بعد

الكسار:يعني فوك ما انتِ غلطانة؟

لزم جسمي رجفت
الكسار:هذا كلة چان طابع ومبين من ملابسچ صدرچ هم وبطنچ ردت اتخبل وانتِ عاندتيني ومشيتي هيچ وهذا الكلب ابن ستين كلب انطيت رقم سيارتة وبس احصلة والله اموتة

ضل يعصر بجسمي معصب ومقهور بسبب الي صار
الكسار:ردت اموووت ردت اموت من كلامة بس الزمة اكسر سنونة بحلگة النذل

دموع:بس اني معلية

الكسار:لا اني كلتلچ غيري ملابسچ ومغيرتي عاندتيني من الزمة واطيح حظة راح اجيچ هم واطيح حظچ

دموع:شسوي؟ تضربني؟

دنگ علية مقرب وجهة لوجهي
الكسار:برأيچ الضرب الحل الوحيد لو العقاب الوحيد؟

وترني هوَ ونظراتة
دموع:لعد؟

الكسار:اخليها مفاجاة الچ

ابتعدت خطوتين من نظراتة ابد مو مريحة رحت كعدت على الچرباية عاقلة وهوَ اتصلو عليه وطلع اني حاولت اراسل وهيب بس ميرد ابد

اكتئبت هواية وخفت على وهيب مادري وين راح
الكسار هم مادري وين راح

نزلت سويت عشة للاطفال خطية شنو ذنبهم يبقون بدون عشة خليتهم ياكلون ويفرشون اسنانهم واخذو ايباداتهم وصعد لغرفتهم
رتبت البيت وسويتلي عصير وكعدت بالمطبخ اشرب

وصلتني رسالة من وهيب كاتب بيها
وهيب:لتقلقين علية اني رايح للنجف محتاج فرحتي راح اغيب شكم يوم بس دموع لتكولين لأحد بس لزوجچ كولي

دموع:تمام يروحي بس شلونك

وهيب:كلش زين انتبهي على نفسچ وعلى الأطفال راح اغلق تلفوني أمانة الچ ولزوجچ ماريد اخد يعرف مطايق واحد من خوالچ

احترمت رغبتة ميريد احد يعرف وين هوَ
سديتة من عندة من دخل الكسار عيونة بيها نظرة ابد مو مريحة

الكسار:رجع اخوچ

كمت احچي بصوت ناصي
دموع:هستوة راسلني رايح للنجف بس كال أمانة لتحچون لأحد حباب لتحچي لشخص خلي هناك يبقى شكم يوم يرتاح

تقرب علية رجعت ليورة
دموع:شبيك شنو هالنظرات

الكسار:لزمتة وحرگتة بالسانة الي تغزل بيچ وهسة اجة عقابچ حتى انوب تسمعين كلامي

خفت من عندة ردت اركض بس لزمني من زندي حيل وصار يجرجر بية لغرفتنة ساكت

دموع:وخر عني اصرخ والله اصرخ عوفني يااااا

دخلني للغرفة وقفل الباب سوة احماء لأيديناتة وطگطگ رگبتة
دموع:شتريد

الكسار:شيريد الرجال من مرتة؟

فتحت عيوني وصرخت بي
دموع:والله اذا تقربت اموتك احنة راح ننفصل انوب اصير حامل ومتقبل تطلگني

ضرب راسة وكال
الكسار:انتِ حامل شلون تصيرين حامل مخبلة انتِ

دموع:والله بس تتقرب اشمر نفسي من الشباك

الكسار:وين تطلعين انتِ وبطنچ تعلگ بطنچ بالحديد

خليت اصابعي بحلگي متوترة لا نظراتة راحة ولا هوَ راحة حركت ايدي على بطني اذكرة اني حامل وأصلًا ميصير يطخني لأن حملي واكف على شعراية

دموع:والله اذا تقربت اطلع تابوتك من الغرفة اوككفففف بمكاااانكككك

يتقرب ولا مهتم لزگت نفسي بالحايط ابلعم واباوعلة
دموع:ا اني حامل

ابتسم بطريقة مستفزة
الكسار:واني المحبلچ

سحب وجهي والتهم شفايفي حاولت ادفعة بس لزم ايدية طبگهن على الحايط
يحاول يبعد جسمة عن بطني واني ماكدر اوكف ظهري يأذيني من ثگل بطني

ابتعد واني حچيت بسرعة
دموع:عوفنييي حاامللل متفهمممم

رجع يبوسني وايدة الثانية تتنقل على جسمي عرفت ماكو مفر من عندة قررت اجاري بس حتى يفك مني

وخر عن شفايفي وراح لرگبتي نبتت اطافري بزندة
دموع:ظهري حينكسر ماكدر اوكف اخذ كلشي تريدة بسرعة حتى اروح ارتاح

توقف عن الحركة وابتعد عني يباوعلي وجهة يرجف حيطگ من العصبية عرفت بنفسي چفصت لزم رگبتي

الكسار:شنو اخذ الي تريدة؟ شهالأسلوب دموع خلي اذكرچ اني منو اني زوجچ اصحي على نفسچ

دموع:ردت بس تبتعد لأن اني حامل مچان قصدي شي

الكسار:واني ماعرف حامل؟ لا اعرف واعرف حملچ ضعيف واعرف ميصير اتقربلچ ولا چانت نيتي أصلًا اني اتخذت هالموضوع حجة بس حتى ابوسچ واكون قريب منچ لأن مشتاقلچ ردت حجة بس حتى اخذچ بحضني

باوع لشفايفي ومسحهم بأصبعة على كيف
الكسار:طلعتي متستاهلين كلشي دموع متستاهلين حبي الچ ولا تستاهلين اترك شغلي علمودچ ولا حتى تستاهلين احاول اصلح علمودچ اني مو حيوان مباقي وياچ علمود شهوة بس انتِ لأن احبچ تردين تدوسين على راسي

دموع:والله من تعبي حچيت هيچ بس لأن ظهري متأذي ماكدر اوكف حقك مدتحس بشنو احس

الكسار:روحي نامي

دموع:بس

باوعلي بخزرة وعاط بية
الكسار:روحييبييي ناميييييي

فزيت من عيطتة ولزمت ايدة
دموع:اني اسفة بس لتعيط علية

مسح على وجهة يعدأ نفسة ورجع باوعلي
الكسار:دموع دستي بمصاريني اكو فرق بين اشتاقلچ وبين افكر بيچ غير تفكير كلامچ غلط بحقي چنت اريد احس بقربچ ردت ادوخچ وانومچ بحضني وشوفي انتِ شنو تكولين تعرفين شكد مشتاقلچ ومشتاق لحضنچ گلبي راح يطگ عليچ تعودت انام بحضنچ وبقربچ وانتِ حارمتني حتى من ضحكتچ برأيچ اني استحق هيچ

دموع:شفت عيونك مو راحة وايدك مو راحة

الكسار:غير مرتي!! قابل مباوع لو لازم وحدة غريبة اذا ما اسوي هيچ لمرتي اسوي لمنو يعني حلالي انتِ متزوجين على سنة الله ورسولة تعبتيني والله تعبتيني

عافني وراح تمدد على الچرباية حاط ايدة على عيونة يريد ينام واني طفيت الضوة ورحت اندحست بحضنة بسرعة حضني

دموع:ترى بس اليوم انام بحضنك

الكسار:خرب بيومي اني بدون كرامة كدامچ بحضنچ اضعف

ابتسمت وغمضت عيوني وهوَ يشتم بشعري
الكسار:مشتاقلچ والله گلبي ممرود على بس حضنة منچ وانتِ بدون احساس

دموع:اشبع من حضني هاي سماح الك لأن ورة ولادتي نتطلگ

سكت محچة شي واني غفيت وهوَ ضل كاعد
لثاني يوم الصبح من فزيت الكسار بعدة كاعد يحض ويبوس بية حسيتة من صدگ مشتاقلي صارلنة اشهر واحد بعيد عن الثاني

من حس بية كعدت كام طلع من الغرفة واني بقيت شكم دقيقة استوعب اني منو وانوب نزلت جوة

كعدنة نتريگ الكسار يباوعلي ويبتسم واني اسرق نظرات ماريد اباوعلة بعدني زعلانة ليش يعيط علية

راح لشغلة صرت اكفكف بالبيت واطبخ الهي نفسي راسلت وداد من يوم الي راحت مراسلتني ومختفية اكيد بعدها ترتب بالبيت وهيَ وحدها خطية

حاولت ادز لوهيب بس ماعندة نت ضجت عليه
لحد العصر وصلتني من عندة رسالة ومن قريت المكتوب بقيت اتراجف

وهيب:دموع راح اكول شي بس لتخافين ولتگولين لشخص ماشي اني بالسجن لزموني بالنجف الدفان اشتكى علية لأن فلشت قبور سياف ومرتة العارات وگوة انطوني التلفون ماريد تقلقين علية ولنگولين لأحد ماريد منية احد علية وبالأخص خوالچ

ويا هالكلام دخلو خوالي ومن ملامح وجهي عرفو
فهد:اهدي راح نطلعة الدفان خابر علينة ودزلنة فيديو وهوَ يفلش بيهن رايحين للنجف نطلعة ونرجع

دموع:لا انتو لا لترحون خلي يروح باهر بس لأن هوَ يحب باهر وصديقة دزلي رسالة ميريدكم تعرفون خلي باهر يروح

جناح:ليش ميريد نعرف

دموع:يكول ماريد منية احد

كز على أسنانة معصب
جناح:من شوكت منينة عليه دموع اخوچ راح يخبلني والله العظيم

دموع:خلو باهر يروح حبابين

باهر هز راسة اخذ سيارتة وتوجه للنجف وخوالي يتصلون بالضباط الي يعرفوهم حتى يحلون السالفة حيل خفت على وهيب مادري شبي هالفترة

بقو خوالي بالبيت ينتظروهم وكلها تخابر كلش ضجت شلون هيچ سوة
4 ساعات واحنة على فد كعدة لحد ما انفتح الباب ودخل باهر ويا وهيب محچة ويا احد ولا نطق كلمة صعد فوك ولا كأنما شايفنة

باهر:لتخلو يطلع هاليومين خلي ياخذ علاجة بأنتظام ولازم نفسيتة ترتاح اخوچ تعبان دموع

دموع:دياخذ علاجة بوقتة بس هوَ من ينقهر لو يعصب تسوء حالتة

جناح:روحي صيحيلة بلكت الله يسمع كلامنة

دموع:خاف يعصب خالو

الكسار:صعدي صيحيلة دموع بس منچ يسمع خلي نحچي ويا بلكت عسى ولعل نحل كلشي اليوم

هزيت راسي وصعدت دگيت الباب ثواني وطلعلي ينشف شعرة باس راسي وابتسم ولا عبالك مسوي شي

وهيب:مشتاقلچ بس خوالچ هنا ماريد احچي بوجودهم

لزمت ايدة وتنهدت
دموع:خلي ننزل الكسار يريدك حباب لخاطري

ذب المنشفة وراح يمشط بشعرة
وهيب:من يروحون خوالچ انزل

دموع:لخاطري

زفر نفس بقلة حيلة سحب التيشيرت مالتة ولبسة ميحب احد يشوف ظهرة
لزم ايدي ونزلنة سوية كعدني وطلع من جيبة الككو الي احبة وكعد بصفي متجاهلهم ويدخن

فهد:ممكن نفهم ليش سويت هيچ؟

وهيب:عجبني

فهد:هالشي غلط بابا هاي عود انتَ الي اكول عنك عاقل

وهيب:من شوكت صرت عاقل؟ اني مخبل لتخلون خبالي يطلع عليكم

باهر:وهيب خلي نحچي وياك لتجاوب السؤال بسؤال

عدل كعدتة وكال بكل صراحة
وهيب:ميستحقون يصيرلهم قبور ميستحقون واحد يترحملهم ابو ياقوت اني تمرضت بسببهم صرت مخبل بسبب هالأثنين الي هسة زعلانين على قبورهم اني لو بيدي احرگ كل عشيرتي وهم ميبرد گلبي بداخلي جمرة مشتعلة من انولدت لحد هسة ومستحيل تنطفي اتمنى هالجمرة احرگ بيها كلشي ويمكن بيوم من الأيام تحرگني الية

خالو تنهد واجة كعد بصفة وطبطب على كتفة
جناح:اني اسف چنت معصب وهذا هم مو مبرر بس انتَ نظراتك النة حقودة ليش تكرهنة

وهيب:اني ما اكرهكم ولا عندي شي وياكم بس لتأذون دموع بكلمة دموع واطفالها نقطة ضعفي الي يحرگ گلبها احرگ گلبة

جناح:اعتذر منك ماردت هيچ يصير

لزمت ايدة وابتسمتلة بلكي يقبل الأعتذار هز راسة وكال
وهيب:مصار شي بس لحد يجيب سيرة سياف ومرتة

جناح:تدلل يلا احنة نروح بعد

كام وهيب وتحاضنو هوَ وخوالي الحمدلله تصافو
قبل ليطلعون من البيت رجعو دخلو يباوعون للكسار بأسف

فهد:حمض غيث تطابق مية بالمية ويا الجثة يعني هاي جثة حسن

تنهد يبلعم ميريد يبچي حط سلاحة بخصرة وراحو كلهم يستلمون الجثة وحتى وهيب وياهم

طلعت الجثة الثانية بنت علاء دافنها قبل ليقتل حسن بشهرين دافنها وهيَ وعايشة لأن شايفتة خاطف بنية ويعتدي عليها وهالبنية هم قاتلها بس القذر ذابها للذيابة تاكل لحمها وهسة ما الها أثر وهاي كلة بأعترافاتة

الأنسان لو شكد ميصير ظالم وطاغي راح يوگع ويتعاقب لأن الله سبحانه وتعالى يمهل ولا يهمل هوَ واختة انحكمو اعدام

ساعة بس وصار تشييع مهيب لحسن صعدت فوك السطح اباوع الناس ماعرف منين اجت الشارع صار ميبين شالو التابوت الكسار وغيث وزياد وباهر لأن بقيت واكفة وابچي واترحملة

اخذو للنجف دفنو بصف امة ورجعو وانصبت مناحة بالحديقة مال بيتنة غيث حضن الكسار وصارو يبچون اجة شهاب يواسيهم

مرت هاي الأيام المرة گوة نفسيتنة تدمرت
ننتظر فرحة تفرحنة وتطلعنة من هالجو الكئيب

بعد اسبوع كامل كدرنة نتقبل الوضع
بس الكسار حيل معصب هالفترة

رجع ابن عمي دگ الباب وراد بس يحچي الكسار ويا بس طردة من الباب اني اريد افهم شنو يريدون ورثنة ورفضنة ناخذة

سد الباب معصب
دموع:خلي اطلع احچي ويا بس افهم ش...

قبل لا اكمل عاط بوجهي
الكسار:انطمرييييي دخلي جوةةةة لا والله ادفنچ انتِ ويا

دموع:بس خلي نفهم شيريد شبيكم تاخذون الوضع بالعصبية غير نفهم ونتفاهم

الكسار:ماكو تفاهم دخلي جوة يلا واذا شفتچ حاچية ويا اطلع فرخچ من حلگچ يلااااا من كداميييييي

باوعتلة بخزرة
دموع:اخذني بصياحك وعصبيتك وكلشي منفهم عفية ابقى عصب

تركتة وصعدت فوك بس دخلت شفت بريعصي فوك الچرباية يمة شصار بية ردت ادوخ راد يغمى علية من الخوف

چان اكو حديدة مال ماسحة مكسورة ردت انزلها ونسيتها لزمتها بيدي وصرخت بعلو صوتي وعود اريد اضرب البريعصي واني بعيدة وحتى البريعصي خاف من صوتي واحتار وين يروح

دخل الكسار مفزوع واني اصرخ
دموع:ابو بريييصصص

ويا هاي حچايتي رفعت الحديدة وشمرتها بقوة مادري وين وكعت والبريعصي شرد من الشباك

خليت ايدي على حلگي بصدمة من شفت الكسار يباوعلي بخزرة وگصتة تنزف دم

الكسار:الله يطيح حظچ على هالعملة

دموع:مو بقصدي

الكسار:اي واضح وخري من وجهي

كال هيچ ونزل واني ورة امشي واحچي
دموع:مو بقصدي اوكف خلي اشوف جرحك والله مچنت اقصد اني ممتقصدة

الكسار:راسي انفتح يا ممتقصدة رايح اخيطة

طلع من البيت واني ارجف راسة يخوف كلة دم الجرح صغير بس مفتوح هواية مبين أذيتة بس والله مو بقصدي

ساعة ورجع مخيط گصتة محچة وياية شي صعد فوك لف راسة ونام
تندمت والله وانوب عبالة متقصدة بس والله ممتقصدة كلة من ابن عمي الي طلعلي هسة تعاركنة وعبالة تقصدت اضربة

كعد بالليل راسة يأذي احتاريت شلون اصالحة وهوَ بس ساكت ويدخن لثاني يوم اني افكر شلون اصالحة واقنعة مچنت متقصدة اضربة ردت اضرب البريعصية

سويتلة كيكة هوَ يحبها اسمها التريليتشا تركية برغم هوَ ابد مو ابو بطن بس فكرت هالمرة اصالحة ببطنة

اخذتلة قطعتين وصعدت لگيتة يخابر ابتسمت بدلع ورحتلة كعدت على رجلة تحمحم وكمل كلامة بالتلفون اخذت شوي بالشوكة وقربتها لحلگة باوعلي وحرك حاجبة يعني داحچي

همست
دموع:اكل طيبة

اكلها من ايدي واني اكلت ورة اعرف نقاط ضعفة واحب استغل هالشي حطيت راسي على كتفة وحركت اصبعي على تفاحة ادم توتر ضل ميعرف شيحچي

سد التلفون وطفة جگارتة
الكسار:مو تشوفيني احچي

دموع:مچنت متقصدة اضربك والله هاي سويتلك الكيكة الي تحبها عربون صلح

ابتسم
الكسار:مصار شي يلا لعد اذا عربون صلح انتِ وكليني منها

هزيت راسي وصرت اوكلة وهوَ بس يباوعلي ويبتسم تصالحنة على الضربة ونوعًا ما خفت المشاكل بيناتنة بس ابد مرجعنة مثل قبل

من ننام واحد بعيد عن الثاني سوالفنة باردة عكس قبل

مرت الأيام وبعد على ولادتي ايام قليلة
چنت كاعدة اجهز جنطة ولادتي من هسة حتى خاف انسى اتذكرة وارجع اخلي بالجنطة

دخل الكسار وبسرعة تقرب علية ومدلي اوراق اخذتهم من ايدة مفاهمة
دموع:شنو هاي

الكسار:استقالتي من شغلي باچر راح اسلمها

فتحت عيوني على وسعها وفتحت الأوراق اقرة وصدك هاي استقالة مكتوبة بالعربي والأنگليزي سندت نفسي بالأرض وكمت وكفت كدامة

دموع:ليش؟

ابتسم وسحبني لحضنة
الكسار:لعيونچ كلشي يروح فدوة حبيبتي الكسار وشغل الكسار شي تافه كدامچ انتِ اهم من حياتي كلها اني اريد اعمر هالعلاقة مو ادمرها

ابتعدت عنة
دموع:چنت احچي هيچ بس حتى اشوفك شنو تختار ممجبور تترك شغلك علمودي

الكسار:هذا الشغل دخلتة علمود حسن وهسة لگيت حسن ودفنتة بيدي ماكو داعي لبقائي بهالشغل ومدام مرتي بنتي حبيبتي طلبت مني اعوفة راح اعوفة الكل كالو انتَ استسلمت اي اني استسلمت علمود سعادة وسلامة عائلتي

بقيت اباوعلة وگلبي يرفرف ترك شغلة علمودي
رجعت حضنتة حيل

دموع:مچان عبالي حتترك شغلك

الكسار:كلشي يرخص كدام عيونچ الغالية وهسة صافي يا لبن؟

دموع:صافي يا قشطة

ضحك بفرحة وحضني حيل وصار يبوس بيك
الكسار:طگ گلبي عليچ تجهزي باچر عازم اهلي واهلچ وسليوة سحير الليل راح تجي وروان هم ويمكن امي تجي اريد اشوف وجه سحير الليل شلون يصير

دموع:هلا بيهم

ليلتها بقينة كاعدين للصبح نسولف واحد يشكي للثاني ضحكنة وبچينة ممصدگين احنة رجعنة وانتهت كل الخلافات

ثاني يوم سوة العزيمة وبدو يجون طلب اكل من برة لأن اني وين اكدر اطبخ اني بطني شكبرها

اجت سلوى واخوانة واجة ابو وغيث وروان وزياد ومرتة ووخوااي هم اجو باهر جاب خطيبتة هم يريدها تتعود على العائلة فد حبابة تنحط على الجرح ويطيب

اجت ام الكسار الحقيقية هيَ حبابة وطيبة ويانة بس علاقتها مو كلش قوية بالكسار وحتى ميكللها يمة كلة حجية وسلوى اشتعلت نار رادت تنفجر

بعد الغدة كاعدين نسولف ونضحك نحاول ننسى الحزن الي احنة بي
سلوى:كالو بعد ما تطلگين لعد مو وصلت بيناتكم للظالين

عدلت كعدتي وحچيت بنفس اسلوبها
دموع:والله احنة منكدر بدون بعض نتخاصم ونتصالح هوَ يحبني واني احبة

ضحكت وهزت ايدها
سلوى:قصدچ متگدرين تعوفي لأن ماعندچ اهل تروحيلهم هوَ لو عندچ اهل صدگ چان من زعلتي ورحتيلهم سوالچ عراضة مال زلم لبيت اهلچ ويصالحچ ويرد اعتبارچ بس انتِ بدون اهل ولهالسبب متروحين وتعوفي

سكتتني وحرگت گلبي صارت عيوني تتنقل على الكسار الي باهر لازمة عنها وعلى وهيب الي كاز اسنانة وعلى خوالي الي عاگدين حواجبهم ويباوعولها

كالت ام الكسار وهيَ تحط رجل على رجل
عبير:على الأقل دموع ما اخذتة من مرتة وابنة وتسببت بتشتت عائلة دموع تحب ابني وهوَ يعشقها حلوة يحلون مشاكلهم بين بعضهم وميتدخلون الفضوليين والحشورين بيهم

خرستها كامت تعدل البشت مالتها بوستني وهمست بأذني
عبير:سلوى متتغير ولأن تكرهچ تحچي هيچ لتاخذين بخاطرچ انتِ احسن منها بألف مرة

هزيت راسي وهيَ ودعت ابنها وراحت لبيتها خالو وكف حط ايدة على متني وكال بكل هدوء

فهد:أخر مرة اسمع شخص يكول وهيب ودموع معندهم احنة اهلهم وعندهم عمام يسدون الشارع من كثرتهم

باوعت للكسار مبرطمة شفايفي ابتسم وأشرلي
الكسار:راح ارد اعتبارچ ومن هاللحظة روحي ويا خوالچ وبالليل أجمع كل عمامي واجيبهم مشية عليچ وارجعچ لبيتي مرفوعة راس

ابتسمت ونزلت دموعي وهيب يمسح بيهم ويباوع لسلوى احسة يريد يمسحها بدل دموعي

فهد:مثل ما كال يلا امشي ويانة وان شاء الله ترجعين وانتِ راضية ومرفوعة راس بنتي

هزيت راسي وسلوى بقت ترجف من العصبية مچانت تدري زوجي واخوي وخوالي سند الية من بعد كلشي شفتة بحياتي

لبست على السريع ورحت وياهم فرحانة لأن يريد يكسر شوكة سلوى لأن دوم تكول مادري منين جابچ مادري من يا قذارة لو تكول ماشوف احد من اهلچ وتقهرني بهالكلام

العصر دزلي بيد وهيب ملابس جدد فستان حوامل وموصي سيدرا تمكيجني ماعرف شنو ببالة سوتلي مكياج وبنتها عند وهيب متقبل تعوفة

بس صارت الساعة 8 بالليل الشارع انگلب بالهورنات خوالي جهزو الضيافة بالأستقبال وضيافة بالصالة وخابر لأبو روزا واقارب امي حرفيًا صارت مثل مشية الخطوبة

دخلو الزلم بالأستقبال واجو نسوان عمامة وعماتة وبناتهم سلمت عليهم وكعدن يحچن وياية ومتعجبات على الكسار

:يا دموع لم زلم علمودچ كلها شيوخ وعمامة محظوظة بأبن اخوية انتِ

اني بس ابتسم فرحانة حيل شلون رد اعتباري كدام الكل
ساعة كاملة واصواتهم عالية بالأستقبال شوي وسمعت اصواتهم تقربت علينة ودخل الكسار ويا وهيب وباهر وخوالي وزياد ماعرف شنو شايل

تقرب علية باس راسي واني اباوعلة طايرة فرح
الكسار:اسف واعتذر منچ وان شاء الله متنعاد وهالشي ميرجع يبدر مني تقبلين تسامحيني

هزيت راسي ونزلت دمعتي بسرعة مسحها وباس اصبعة عماتة يهلهلن أشر لزياد يتقرب وفتح علبة مجوهرات چبيرة طلع منها كرسي جابر بقيت مصدومة هوَ يعرف ما احب الذهب ليش كلف على نفسة وكرسي جابر حيل غالي

لبسة الية وسحب ايدي لبسني اسوارات واخر شي لبسني محبس ذهب
الكسار:ماكو شي من قيمتچ كلهن رخيصات كدام عيونچ

همست بدون لا احد يسمع
دموع:هواية هيچ

باس خدي
الكسار:قليل بحقچ

راد يغمى علية من الفرحة
دخل ابو واعتذر مني وهوَ خطية رجال چبير ما اله بالمشاكل بس سلوى الله يعينها على نفسها

وصدگ سواها رجعني لبيتي معززة مكرمة مرفوعة الراس ورادة اعتباري كدام اهلة كلهم

بس دخلنة لغرفتنة حضنتة ابچي وهوَ يهز راسة ويضحك
الكسار:اكسر كل الروس والخشوم علمود خشمچ يضل عالي انتِ مو شي عادي انتِ دمعة الكسار

بس ابچي متأثرة بالشي الي صار وهوَ يهديني
نمت واني فرحانة ومستعدة لولادتي الي بعد يومين

قبل يوم رحنة سوينة السونار والتحاليل علمود العملية وطلع كلشي سليم الحمدلله والطفل جاهز للولادة راسلت وداد كلتلها راح اولد شافتها وماردت كلت براحتها

ثاني يوم اخذت جنطتي واجو وياية كلهم المستشفى انملت همزين الكسار حاجزلي جناح خاص

رادو يدخلوني للعمليات بس الكسار حضني حيل ويبچي
الكسار:رجعيلي دموع اني واخوچ والأطفال منتظرين رجوعچ النة

بستة بخدة بوسة قوية
دموع:ادعيلي

رادو ياخذوني همست بأذنة
دموع:احبك

ابتسم بوسط دموعة وشفايفة تهمس بكلمة احبچ

دخلوني للعمليات وخدروني بس ربع ساعة وبعدها محسيت بشي
ماعرف شگد مر وقت وفزيت على وجع قوي الممرضة يمي من عرفت متألمة انطتني مسكنات

باوعت لگيتهم كلهم يمي الكسار اجاني يركض يبوس بخدودي
الكسار:الحمدلله على سلامتچ يروح روحي

باوعت لحضن وهيب بيدة طفل عرفتة ابني بدون وعي بقيت ابچي واضحك چان چبير مثل متوقعنة ابيض تقرب علية حطة بصفي وهوَ وياية يبچي

وهيب:شوفي دموع هذا الي عيشنة بقلق صار 9 اشهر عيونة زرگ والله فتح عيونة وطلع لونهن مثل فرح

بقيت ابوس بي وهيب فرحااااان اول مرة يحضر ولادتي وثاني مرة يشوف طفل وهوَ هسة مولود لأن اول مرة شافتي من انولدت

الكسار:اختاري اسمة خلي وهيب هوَ يأذنلة

وهيب:بس احنة الأذان مالتنة يختلف

الكسار:مو هواية بس انتو تنطقون الشهادة الثالثة واني ما احس بفرق اريد هالطفل انتَ تأذن بأذنة حتى وين الله وتأذن بأذن طفلك عن قريب

ابتسم واني لزمت ايد الكسار
دموع:اذا وهيب يأذن بأذنة انتَ سمي

طلع من جيبة ثلاث ورقات يضحك
الكسار:كتبت 3 اسماء نسوي قرعة والأسم الي ناخذة نسمي

هزيت راسي وصدك سوة قرعة وطلع اسم الأكبر فرحت لأن اني ويا حابين هالأسم ومقررين نسمي

اخذة وهيب بحضنة وصار يأذن چان الأكبر بدون گماط وهيب منزعة لأن يكول ليش مسوينة دولمة

ايد الأكبر تتحرك على خد وهيب لو رگبتة يموت ضحك
بعدة ممكمل واندگ الباب بسرعة باوعت وابتسمت بفرحة

مدت راسها من الباب وبيدها ورود
وداد:افرحوووو اضحكووو وداد الجميلة عادت لكم

كلها ضحكت تقربت علية بوستني مشتاقتلها شافت الطفل بحضن وهيب وهوَ بعدة يأذن وايدة ترجف مادري ليش باست الأكبر وراحت تسلم على الباقين ضل وهيب نيعرف وين باوع

باهر:لا هلا ولا مرحبا مو خلصانين منچ شسوين جاية

طگت علچها وتخوصرت
وداد:تأدب هاي محافظتي انتَ البغدادي أم انا؟

باهر:استقر يالجواهري

ضحكو سوية
دموع:لعد وين اختچ

وداد:نايمة بالسيارة اجيت اسلم عليكم ماكدر اتأخر اريد اشوفلي فندق نأجر غرفة اني ومريام وابن عمي يروح لبيتة

دموع:ليش تأجرين غرفة تعالي عدنة حبابة والله مشتاقتلچ

رفضت توسلت بيها گوة قبلت وهوَ اني مراح اطول هنا اريد ارجع للبيت
انطاني وهيب الطفل والتفت مبتسم

وهيب:شلونة الكاجو

ضحكت بدلع
وداد:الكاجو زين العتوي شلونة

وهيب:هم زين

بقت تضحك وهوَ يبتسم
احاني باهر انطاني تلفونة ميت ضحك

باهر:اخذي بس انتبهي تضحكين وتنفتح عمليتچ

فتحت الفيديو وصفنت مصورني واني بالبنچ وداد مدت راسها وياية چان الفيديو خزي حرفيًا

لازمة الكسار وابوس بي لو اغلط على الكسار لو مرة اضحك لو ابچي واكول ببچي

دموع:الكسار ميحبني طلگوووونييييي

رادت تنفتح عمليتي من الضحك اخذو التلفون مني الكسار راد يحذفة بس اني مخليتة اريد اشوفة ورة ما اطيب

دموع:شكد تبقين ببغداد

وداد:ماعرف لحد ميخلص شغل ابن عمي هنا ونروح

دموع:ابقي هنا بعد 15 يوم عرس باهر

بسرعة باوعتلة
وداد:عود صدگ لا زين البنية ما طفرت الله يعينها

غمها وهيَ تضحك شوي وكالت رايحة ويا ابن عمها وتالي ترجع للبيت
واني بقيت ساعات معدودة ورجعوني لبيتي مزينين البيت كلة

ومن هنا بدت مسيرة الطفل الي مينام بس يبچي والكسار واكع بيها هوَ يسكتة ويساعدني ارضعة متزكني وحدي ويا بس مرات يخبث وياية وهوَ يكعدة ويضل يبچي

وداد بقت عدنة وهم گوة قابل ابن عمها بس هيَ متريد تروح لعمامها وبيتها مبي لا اثاث ولا كهرباء بقت هنا وخطية ساعدتني بالأطفال وهيب خلاها تاخذ راحتها ميجي للبيت هواية

بدت تجهيزات عرس باهر اشترة غرفة على اختيارها
اجتني برغم ابد مو فارغة ومشغولة جابتلي هدية واجت وكعد باهر يتناكر وياها وسوالفة قليلة أدب

باهر:هاي مال استحي مادري شنو متمشي وياية اني ما استحي

خزرتة يحچي كدامي بدون خجل وهيَ تگرص بي
روزا:نشوف لو اني لو انتَ اطلعك مزورگ من الغرفة

باهر:خلي نشوف منو يزورگ الثاني

هزيت راسي بعدم رضى همزين بس احنة لأن باهر معندة بريك

بعد 15 يوم

اليوم عرس باهر واني الحمدلله تحسنت حالتي بس الحركة القوية متصيرلي
رحنة للصالون واني ابني وياية ولأن القاعة مختلطة لبست حجاب وفستان مال محجبات

بس وداد لأن ممحجبة لبست فستان مخصر على الجسم وسوت شعرها تسريحة بسيطة طلعت تجنن كالعادة وسيدرا هم نفسي لبست

بعد ما كملنة توجهنة للقاعة زياد اخذنة ابنة صاير يجنن
وصلنة وكعدنة بالطاولة الي مخصصيها لأهل العريس ابتسمت من شفت اسم وداد ويانة باهر صح يخبث وياها بس بسرعة اعتبرها من العائلة

كعدنة اني والكسار واحد بصف والثاني وچان اسم وهيب ويا اسم وداد حسيت باهر متقصد يخليهم سوية وصدگ كعد يمها ومبين متوتر

وداد:شنو هاي عتوي طالع حلو

وهيب:شكرًا

أشرتلة عليها لأن حسيت الشكر ناشف بلع ريگ وعدل ملابسة
وهيب:وانتِ هم طالعة حلوة

الضحكة شگت حلگها وحسيتها انتعشت زعلت عليها صعب تحب من طرف واحد

صار وقت دخولية العرسان
طفو الأضواء وصار الضوة عليهم بس ودخلو روزا لابسة بدلة وحجاب بطلب منها وطالعة تجنن

كعدها على الكوشة وتجمع هوَ وزياد واصدقائة المخابيل وصارو يرگصون ويهوسون راد يسحب وهيب بس رفض رفض قاطع اخوية فديتة ثگيل

رجعو كعدو عرسهم حيل حلو سوو عرس وحنة سوية
رگصو سلو واصدقاء باهر بأخر القاعة واحد حضن الثاني وصارو يرگصون سلو عود يقلدوهم

چانت هالرقصة خاصة بالعرسان والرقصة الثانية كل المتزوجين كامو باوعت للكسار مبتسمة وارمش بعيوني بسرعة كال

الكسار:لا

اختفت ابتسامتي
دموع:ليش؟

الكسار:اكو زلم

دموع:شعلينة بيهم حباب حبااااااب

نفخ بقلة صبر ميريد يكسر بخاطري كام ومدلي ايدة لزمتها وصرنة نرگص خالو هم اخذ سيدرا وصارو يرگصون ويانة

شفت وداد تحچي ويا وهيب وهوَ يهز راسة اجة اخو روزا ماعرف شنو كالللها وهيَ باوعت لوهيب وهزت راسها رادت تكوم بس وهيب لزم ايدها وكومها واجو يرگصون واخو روزا ضل ماد ايدة مصدوم

اني هم صدمني وهيب شلون وافق وهوَ أصلًا ميعرف
وداد محاوطة رگبتة وهوَ عود مخلي ايدة على خصرها بس ملامسها ابد هوَ صح غلط تلمسة وحرام بس وداد متهتم لهالأمور عندها عادي

الكسار:اخوچ يحبها

بسرعة باوعتلة
دموع:ماعرف من حچيت ويا كال بس مستلطفها ردتة يخطبها ورفض ماعرف بعد

الكسار:اذا يريدها خلي نخطبها اله ليش هيچ يصير بيناتهم تلامس حرام

دموع:هيَ اليوم بس نرجع للبيت حترجع وهذيك المرة حچيت ويا كال ماريدها وهوَ متخوف من الزواج

الكسار:يصير خير المهم شهالجمال

ميلت رگبتي بدلع
دموع:حلوة طالعة؟

الكسار:ترجفين الميترجف اوف عليچ وعلى حلاوتچ

باسني بخدي واني اضحك اتدلع عليه
رجعنة كعدنة وداد ووهيب يتعاركون

وهيب:خليتيني غصب اكوم كلها تباوعلي

وداد:ردت اروح ويا هالولد الحلو الي اجة وانتَ مقبلت وكمت بمكانة اني شعلية وبعدين واذا باوعولك غير كدامهم رجال وسيم عيونة صفر ومعضل وطويل وصوتة حلو وشخصيتة تجنن خرب بعرضك شكد حلو

ابتسم يهز براسة وداد مثل باهر بدون بريكات
كمل العرس وچان يجنن زفينة العرسان واني عوضت صرت ارگص بالسيارة وزياد مگابل سيارتنة ويهلهل نزلو هواية بالطريق

وصلنة لبيت خالي نزلو العرسان ذبحوو خروف جوة رجليهم ودخلو لغرفتهم وباهر شوي وطلع للشارع وكمل الهوسات والرگص ويا اصدقائة

روزا محد اجة وياها امها مريضة اني وسيدرا مخلينها تحس بغياب امها وهيَ ترتاحلنة

رادو يزفو طلعنة وهوَ قبل ليدخللها لزمتة اوصي عليها
دخل لغرفتة وبعدها احنة كل واحد راح لبيتة

وداد تخابر ابن عمها يجيها حتى يطلعون لبيتهم وهيب يباوعلها بالمراية ويهز برجلة

وصلنة لبيتنة چان اكو سيارة واكف كدامها رجال عرفتة ابن عمها
دخلت جابت اغراضها ودعتنة وراحت لبيتها

وهيب طلع ماعرف وين واني صعدت فوك ارضع ابني والكسار اخذ الأطفال ينومهم

دخل علية واني غطيت صدري
الكسار:المن متغطية شايف الأكو والماكو

ضحكت اجة كعد يمي الأكبر يرضع وهوَ يبوسة
الكسار:اكبر بسرعة احب الطفل الي عمرة بالأشهر

دموع:ملحگ يكبر لتستعجل

شبع خليتة بمكانة والكسار وكف ينزع القميص
الكسار:بدون مقدمات سبع بوسات وسبع حضنات

دموع:سبعة؟ سهلة

رفع حاجبة وذب نفسة علية
الكسار:وهاي الچ الف بوسة بس تعاي عليتي گلبييييي

ضحكت بعلو صوتي وسحبني يبوس بية
دموع:لتخليني اضحك

الكسار:ضحكي جعل محد غيرچ يضحك يواهس ليلي

بستة بخدة وهوَ عبالك انطيتة الأشارة الخضرة حتى يهجم علية

ثاني يوم جهزنة الريوگ ورحنة لبيت خالو
فتحلنة الباب باهر من شفتة فكيت حلگي وضحكت من كل گلبي هوَ خزرني چان حاجبة مجروح وصاير زراگ تذكرت كلامهم ومتت ضحك محد فاهم شي بس اني وهوَ

باهر:وسم حتى سم سكتيييي

گوة سكتت نفسي ما اضحك
دخلنة جوة چانت روزا كاعدة بالصالة شافتني وهيَ هم ضحكت اني هنا بعد مكدرت اتحمل لزمتها وصرنة نضحك وباهر يستغفر وضايج

همستلها
دموع:كفووو گد كلمتچ

روزا:منو الزورگ الثاني

دموع:انتِ

بقت مبتسمة مسحت دموعي مال الضحك وتساعدنة اني وياها صبينة الريوگ وما اباوع لباهر

من كملنة رحنة للمبطبخ
دموع:عود صدك مخليتي يلزمچ

روزا:هوَ تحداني وعبالة اني فقيرة هذا عقاب اله

دموع:لا بس خطية منتظر هالحظة من زمان

روزا:كدامنة العمر كلة حبيبتي

دموع:الله يديمكم

بيومها بقينة عندهم واجت سيدرا هم لأن هيَ عروس ومحد وياها والناس تجيهم خطية وحدها تبقى

صار الليل كل واحد رجع لبيتة
ومرت الأيام والحمدلله تحسنت احوال الجميع

وصلنة تبليغ من المحكمة حتى ناخذ الورث مالتنة وهنا اضطرينة نروح للمحكمة ونستلم كلشي يخصنة من ورث

الي صدمنة اهل ابوي اغنياء شي دكاترة شي مهندسين واني مچنت اعرف عندي عمام بس وهيب يعرف لأن متبرين من ابوي

وهيب اشترالة سيارة وديحاول يقنعني يطلع بيت وحدة بس اني ماكدر اعوفة عود من يتزوج اذا يريد يطلع عادي اقبل

ولهنا انتهت قصتي
صح رجعنة بس مو مثل قبل حسيت شي انكسر بيناتنة ومديتصلح بس الحمدلله عايشين بسعادة وتخطينة كل المصاعب واكيد حنتخطى هالشي تعبنة بس المهم نهايتنة سعيدة
ادعولنة ميرجع الحزن يمر علينة...