رواية المغرورة و الأعمى الفصل الثاني 2 - بقلم بسمة البياتي

#المغرورة-و الأعمى -
( بقلم -بسمة البياتي )
-بارت الأول -

نظرت الى مرآتي لعلى اجد شئ اسعدنى فى حياتى
او ربما انسى اليوم واعود بعقلى الى الماضى
لطفولتى حيث البراءة
وأبدا اتذكر عذوبه احلامى واتذكر كيف كنت
اضحك وكيف كان كلامى ..
----------------------

واكفة كدام المرآيا ارتب شعري باوعت على نفسي

جنت لابسة فستان لون اسود تحت الركبة مخصر على الجسم بي حزام فضي متناسق ويا جسمي ولون بشرتي البيضة

دخلت اختي بان للغرفة يلا أيلول ماما دتصيحج
امشي قدمي العصير للناس

ايلول.. بملل اوك جاية

بان... هاي شبيج يمعودة ترة جايين يخطبوج مو يعدموج

ايلول..والله مدري شبيه ممرتاحة ابد

بان ...كافي هاج اخذي الصينية تعوذي من الشيطان وسمي وقري الفاتحة وادخلي

ايلول...باوعت عليها بطرف عيني
اي مو داخلة معركة
اخذت العصير ودخلت سلمت عليهم وقدمتلهم العصير اباوع عليهم يباعون عليه بتكبر وبالكوة ردو السلام
حتى العصير اخذوا مني ورجعوا على الطبلة مشربوا منه

ماما... تعالي ايلول اكعدي

ايول...رحت كعدت يم ماما
جانوا جايين نسوان ثنين امه وخالته وثلاث بنات جناينهم ثنين والثالثة اخته بس حيل كشخة وطامسين بالذهب

ام يوسف... اني جاية اطلب بنتج هاي واشرت عليه الأبني يوسف

ايلول...حيل انزعجت من طريقة كلامها عبالك اني حشرة كدامها ردت احجي ماما لزمت ايدي
غمضت عيني وجريت نفس وبقيت ساكتة بس على اعصابي

ام يوسف كملت كلامها ابني مهندس وعندة وظيفة وراتبة زين وعندة بيت اكبر من بيتكم هذا بمرتين
على ذوقة بناء مؤثث بأحسن الأثاث
وسيارتة حديثة
يعني الحمد للة مناقصة شي
جنت هواية اريدة يزوج بس جان رافض رغم جبتلة كومة بنات كولهن شهادات ومن عوائل راقية

أيلول .. اني كلما اريد احجي ماما تلزمني هاي جاية تخطب لو جاية تهيني

خالة يوسف.. انتي اشكد عمرج

ايلول ...بالكوة جاوبتها من اعصابي
عمري 25
خالتة... هاي شنو انتي جبيرة شعجب ممزوجة لهسه بناتنا بعمرج حتى اطفال عدهم

ماما ...عيني ترة هواية يجوها بس خوما ننطيها الياهو الجان اكيد نريدلها قسمة زينة و 25 مو جبيرة هو هذا السن المناسب للزواج

ام يوسف ...اني جناتي ثنينهن اصغر منها هسه الشباب تريد بنت ال 17 و 18

ماما ... لعد جان اخذتيلة بنت 17 ليش جاية على بنتي

ام يوسف ...بضحك شسوي اذا هو من يوم الي شاف بنتج بالعرس وقفل عليها

اخت يوسف ..حجت وهي تتنعوص زين انتي مخلصة دراسة لو ربة بيت
ايلول ... بنفاذ صبر اني خريجة معهد قسم أدراة قانونية

ام يوسف .. وهي تعوج حلكها وتحجي بصوت ناصي بس مسموع طلعت معهد حتى مو كلية

ماما.. وشبي المعهد المهم عدها شهادة

حجت جنتهم رادت تغير الموضوع لان الجو توتر اكول حبيبتي هذا شعرج لو تركيب

ام يوسف... عزاا بس لايطلع تركيب

ماما ...جاوبت بعصبيه لا طبعآ شعرها
بناتي ميحتاجون هاي الشغلات لان من الله هنا حلوات

جنتهم ضاجت كالت ترة مقصدت شي بس لان شفتة طويل كولش وسرح كلت يمكن تركيب

ماما... كولي ماشاء الله عيوني

جنتهم.. ما شاء الله وعوجت حلكها

وبقوا يحجون ويا ماما واني كاعدة على اعصابي اخير شي كالوا هذا رقمنا وننتظر منكم جواب سلموا وطلعوا

ايلول... كمت على السريع دخلت للغرفة واني شايطة من الأعصاب بديت أبدل ملابسي بعصبيه دخلت ماما عليه
ها بنتي لولة شنو رايج بالولد

ايلول..باوعت عليها بعصبيه
كتلها قصدج شنو رايج باهلة

ماما... وانتي شعليج بأهلة راح تزوجي هو لو اهلة.؟

ايلول... مختصر الكلام اني مموافقة

اشو ماما كبت نار والى متى هذا ما اريدة هذا ميعجبني لج صار عمرج 25 وانتي بعدج على قلبي

ايلول...حزت بنفسي كلمتها بس مبينت الها
باوعت عليها بقهر ماما رجاءآ كتلج ما اريدة وخلص

ماما...ايلول كافي انطيتج عين هواية الولد ميتعيب متلكين احسن من هاي القسمة واذا على اهلة هو راح يكعدج بيت وحدج انتي شعليييج بيهم كافي راح تموتيني ترررررة

طلعت من الغرفة واسمع صوتها تحجي ويا ود اختي بالتلفون ودردم عليه مهتميت الكلامها جيت كعدت مقابيل مرآيتي وأخذتني الصفنة
فزيت على صوت طبكة الباب قووي شفت ماما كدامي

ماما...هووو هذاااا الي انتي فالحة بي ليل ونهار كدام المرآيا
شوفي حتى قسمتج انسدت هلكد متباوعين عليها

ايلول...فدوة ماما متعبتي من هذا الكلام هم رجعتي على موضوع المرآيا

ماما... ليش هو اني شوكت انتهيت منه حتى ارجع لج لو مزوجة جان هسه اطفالج بالمدرسة شوفي خواتج وشوفي نفسج تختلفين عنهم بكولشي لا عبالج هذا جمالج يفيدج ومغرورة بي ترة الجمال مصيرة يزول واني وابوج مدايميلج لحكي روحج وتزوجي بلكي يصيرلج طفل طفلين يسندوج من تكبرين

ايلول...وكفت وباوعت عليها بكل شموخ خلصتي لو بعدج شوفي ماما لو تكطعيني مراح اوافق على هذولة الناس مو ايلول الي تقبل تنذل ويتباوع عليها بعين الصغيرة

جان اكو دولكة مال مي كزاز شالتها وضربتها قووي بالمرآيا

ايلول ..اني بسرعة رفعت ايدي حميت وجهي لان الكزاز طفر علية
شلت ايدي لكيت ماما جامدة بمكانها يمكن هي هم انصدمت من هذا تصرفها
باوعت على زندي اماكن هواية يجري منها دم
بس مهتميت انداريت على مرآيتي شفتها متكسرة والزجاج منثور بكل مكان
حسيت وجع بقلبي عبالك روحي النكسرت مو المرآيا

خواتي بان وماريا واكفين يم ماما مصدومين ويبجون

ماما وعيونها كلها دموع تريد تقترب مني
اشرتلها توكف

ايلول... اياج تقتربين مني اطلعوا بره

ماما.. وهي تبجي ايدج دتنزف بس خلي اشوفها

ايلول...عطت بعلوا صوتي وشلت كزازة وخليتها على ركبتي
كتلها بس تقتربين اذبح رررررروحي

ماما ...وخواتي بقوا يعيطون ولج ايلول ذبيها من ايدج لاتتخبلين

ايلول ..صحت بصوت اعلى اطلعوا بررررررررررررا

وبهاي الأثناء دخل بابا للغرفة جان مموجود الظاهر هسه جاي من الشغل
شافني تخبل

باباتي أيلول ذبي الكزازة من ايدج اني ضاغطتها قوي بيدي حسيتها كصت ايدي والدم ينزل
جان يقترب بابا مني

بابا..ويهون عليج ابوج تريدين تتركي وتحركين قلبه عليج

ايلول ...هو كال هاي الكلمتين واني انهاريت بالبجي اجه بسرعة حضني واخذ الكزازة من ايدي اني بقيت ابجي بهستيريا بحضنه الحد مفقدت الوعي ومصحيت غير واني بالمستشفى والكانولة بيدي ومشكليلي مغذي وبابا يمي

بابا... ها باباتي شلون صرتي

ايلول... بصوت مبحوح الحمد لله
باوعت على أيدي مضمديها واكو لاصقات مال جروح على زندي

ايلول... بابا فدوة اريد ارجع للبيت اني بطبعي كولش اكره المستشفيات من اشم ريحتها ادوخ ونفسي تبقة تلعب

بابا شاف ممرضة صاحها كال شوفيها اذا اكدر اطلعها قاست ضغطي لان صاير عندي هبوط بالضغط

الممرضة .. ضغطها تمام فصلت المغذي وشالت الكانولة
ايلول.. طلعت أمشي ويا بابا وجنت بعدني شويه دايخة
شفت عيسى زوج ود واكف كدام باب الردهة شافني تحمدلي بالسلامة

بابا ...يسال عيسى شكال الدكتور تكدر تطلع أم قدر لو لا

ايلول ...اني سمعتة هيجي كال فزيت نداريت عليه بسرعة ليش شبيها ماما

بابا .. لاتخافين مبيها شي بس شويه اختنكت بسبب الحساسية والربو العدها

قبل لايكمل كلامة بسرعة دخلت جوه وجان اشوف ماما سودة علية نايمة على السدية ومخليلها اوكسجين ومبين عليها التعب وأختي ود يمها ركضت عليها لزمت ايدها أبوس بيها ماما حبببتي فدوة اروحلج شبيج اني السبب هيجي صار بيج شالت الأوكسجين من وجها وحجت

ماما ...لاتخافين عمري مبيه شي انتي شلون صرتي

ايلول ..مسحت دموعي كتلها اني الحمدلله مبيه شي

وره ربع ساعة رجعنا للبيت
بس حسيت بابا ضايج مني و اختي ود وجهة ثكيل عليه ومتحجي وياي نزلت من السيارة دخلت للبيت بان وماري اجو يركضون حضنوني ويبجون

أيلول ... هاي شبيكم تره كولشي مبيه لاتخافون ما اموت

كالوا اسم الله بس والله خفنا عليج

بعدين شافوا ماما تعبانة ركضوا عليها يبوسون بيها دخلنا للبيت خطية جانوا البنات مسوين عشه تعشينا بعد العشه ماما راحت تنام لأن أدوية الحساسية اكثرها تنوم

بابا.. ايلول يلا حجيلي شنو صار وليش هيجي سويتي وردتي تنتحرين

ايلول ...اني خجلت ومعرفت شجاوبة عيسى راد يترخص ويروح بابا مقبل كال ابقة انت مثل ابني مو غريب

بابا... يلا جاوبي كال اني عرفت جايج خطابة بس هذا مو بسبب يخليج تفكرين بالأنتحار
اني دائمآ اشوفج قوية واكول ايلول عندي بمية رجال تالي هيجي تطلعين ضعيفة ومهزوزة مع الأسف عليج خيبتي ضني بيج

ود.. ترة ماما حقها من تتعصب عليها جايتها خوش قسمة والولد ميتعيب كامل والكمال لله

بابا.. احجي ايلول ليش ساكتة

أيلول..جريت نفس عميق وحجيت بغصة اني مجان عندي اعتراض على الولد بس اعتراضي على اهلة

بابا ...بستفهام ليش شبيهم اهلة ؟

ود ..بابا ترة ماما حجتلي الولد عنده بيت وحدة هي مراح تعيش ويا اهلة

بابا.. اشر الود حتى تسكت كال معليج انتي خلي ايلول اجاوب

ايلول..بابا اني مستحيل اكدر اتحمل ناس يباعون عليه بتكبر ويشوفون نفسهم احسن من عدنا

بابا.. بستغراب شلون يعني فهميني

ايلول حجيت كل كلامهم من اول مدخلوا الحد مراحوا
بابا ..وعيسى بقوا مصدومين

أيلول.. بابا هو لو حتى راح يكعدني بيت وحدي بس يبقون هما اهلة وغصب عني لأزم اختلط بيهم هذولة اذا من هسه هيجي يحجون لعد من اصير جنتهم شراح يسون بيه

باوعت على بابا الشرار يطلع من عيونة تعصب وضاج منهم

بابا ... انتي لو منتظرتني الحد ما ارجع وكايلتلي هذا الكلام مستحيل أقبل انطيج الهم انتي جوهرة غالية الي ميقدرج ويثمنج ويخليج على راسة ما أنطيج اله
بس رغم هذا الي سويتي غلط لوحتى تتعاركين ويا امج مجان أكو داعي تكسرين الأغراض وتأذين نفسج

ايلول ... فتحت عيوني وباوعت عليه بصدمة
وحجيت بداخلي
خرب بابا عبالة اني كسرت المرآيا وجرحت نفسي مكدرت اكولة مو اني محبيت تصير مشكلة بينه وبين ماما

بس نسيت اكو بلبل فتان كاعد

ماريا ..بسرعة لا بابا ترة مو أيلول كسرت المرآيا

باوعت عليها خزرتها سويتلها حركة حتى تسكت ماكو فائدة مترتاح اذا متغرد

بابا كال لعد منو ؟

ماري.. ماما من تعاركت ويا ايلول وشافتها واكفة كدام المرآيا تعصبت عليها وكالت انتي هلكد متباوعين بيها هيجي قسمتج واكفة وشالت الدولكة وضربتها بالمرآيا والكزاز طفر على ايد ايلول لان جانت واكفة قريب من المرآيا وايلول من شافت مرآيتها انكسرت كامت تبجي ورادت تنتحر حتى ماما لاتقترب منها

ايلول ...اني غطيت وجهي بيدي الله يلعن بليسج ماري مبقت شي محجته
شفت بابا صار نار من الأعصاب

ايلول .. بابا حبيبي ترة الصار ساعة شيطان والغلط جان بيه اني عليت صوتي على ماما

بابا.. بعصبيه كال شنو هاي المهزلة امكم تخبلت عود هي الجبيرة العاقلة هيجي تتصرف ناس جاين يهينوها بيتها وتريد تنطيهم بنتها زين من ضربت الدولكة مفكرت ممكن الكزاز يجي على عينج لو وجهج ويشوهج

ايلول ...اني وعيسى والبنات بالكوة خلينا بابا يهدء شوية

بعدها رجعوا ود وعيسى البيتهم واني دخلت للغرفة حتى انام جنت حيل تعبانة وضايجة بقيت شوية افكر وبعدين نمت

نص الليل فزيت على صوت حركة يم جربايتي باوعت واني بالكوة فاتحة عيني من النعاس شفتها ماما
ماما.. بصوت هامس سويلي مكان وجان تتمدد يمي ونومتني بحضنها اني هم حضنتها قوي

أيلول.. شعجب هيثم اليوم مخليج تجين تنامين يمي

ماما...ضحكت كالت اصلا هيثم منطيني ظهرة ونايم مبين زعلان مني علمود بنتة

ايلول... هههههه والله مو اني حجيت هاي البلبل نقلتلة جميع التفاصيل

ماما... عادي اصلا اني جنت راح احجيلة كلشي تعرفين بيه ما اضم عليه شي

جان تتنهد قوي وكالت ما اعرف شلون سويت هيجي

ايلول... خليت ايدي على حلكها فدوة اروحلج انسي انتي حقج تريدين مصلحتي وخايفة عليه

باستني من راسي وبقيت نايمة بحضنها للصبح