رواية المليحة والمهووس الفصل الثاني والثلاثون 32 - بقلم Shaqraa

المليحة والمهووس
الجزء التاسع والعشرون

جفلت منها شبيها هاي..
اسفة مادري الج لان امبين مالت مطبخ..
شبي مالت مطبخ لو تستهزأين بيه ولج..
شوفي لا عبالج خذيتي جوا جناحج وفريتي عقله اعوفج..
الا اهجج من بيتي وازوجه وحده تسوى عشيرتج..
ويلا صبي الجاي وتعاي فضيها مو صايرة رقيقة براسي..

طلعت من المطبخ واني فاتحه حلكي صدك عود هيج !!!
مو طبيعية هالمرة..
اخذت الجاي واني مصفنه..
مرتضى انتبهلي وسالني..
كتله لا بس مصدعه شويه..
ورا ماراحو وصعدنا..
حاول يفهم مني شبيه بس اني ماحجيت..
ماردت من اول يوم اشكيله واصير قال وقلت..

مرت كم يوم وهي نفس اسلوبها وازيد..
اكل تكلي لتاكلين هواي..
رغم هم حالتهم زينه بس احسها مشايفه خير ونعمه..
من وقت حجت ع اكل ضليت مااكل..
هو ينبهلي اكله ماشتهي..
ضل برجعته يجيبلي سناك..
وهم مااشتهي..
كلما يسالوني شلونج اكول باحسن حال..
واخواني يكلولي لتخافين من شي احجي..
لتتحملين شي اكثر من طاقتج خاف تفكرين بالطلاك ولان مرة ثانيه تتحملين اذية..
معليج بالناس اهم شي راحتج..
بس اني اشوف مرتضى يسوي كلشي لراحتي..
مايهونلي احجي وتبقى امه وتتمنى الافضل لابنها..

اطياف هي سلوتي والمهدئ مالتي..
تكلي رديها لتخليها تصعد عليج..
وصح اني اردها بس مو بوقاحه..
لان مرة بكد بيبي حتى استحي..

اكلي كلش قليل صار وبيوم كالت..
صعدي لغرفة المخزن نظفيها..
صار خاله تدللين..
صعدت فتحت الباب الاغراض صارت فوكي من الهوسه..
رتبتها ونظفتها بحيث حيلي انهد ..
تراب وخنكة ووصاخه واني اصلا تعبانه لان مااكل..
حسيت نفسي تعبت كلش بقى بس اشطف الارضية..
كلت انزل ارتاح وشوي وارجع..

لزمت بالدرج كوة ونزلت مسطورة شافتني امه..
ها خلصتي بالخير تعالي بلشي بالغدا..
مرت حماج توة طلعت..
خاله دخت بعدني الفوك ممكملته..اريد ارتاح واصعدله..
شنووو ولج الفاهيه شعدج فوك صار ساعة
ولي كملي شغلج واذا صعدت ولكيتج ممكملة ابليج..
اجيت اجاوبها بس كلت ماكو فايده..

صعدت وجاي اكمل شغلي واحس الدنيا تفتر بيه..
دست ع نفسي يمكن عقاب الها يمكن ماعرف..
الا ان بلشت الدنيا تظلم بعيني وفقدت..
ورا فترة كعدت ع صوت مرتضى يحاجيني..
نايمه بغرفتي ووجهي وملابسي مبلله..
ضغطج كلش هابط انت متاكلين؟
مادري دايخة كلش بس اكل اني..
حوراء وضعج مو مالت وحده تاكل..
شايفه نفسج شصاير بيج؟؟
ماشتهي كلش..

بعدين العصر اخذج احللج واجيك وضعج..
بس لتطلعين حامل ولج ترى اني ممسوي شي معليه..
هههه من هسه تبريت منه يمكن انت مرتاح للسالفه ..
ههههه لا حبيبي اتشاقه اريد اضحكج..
كومي ابدلج حتى تاكلين شي تعبانه انت..

لا لا لا اني ابدل..
ع كيفج وعلّا شبيج مو زوجج اني ترى مانيتي شي بس اساعدج...
لاا شوفني جني حصان بوم بوم...
هههههههههههههه لج شجاب الحصان ع هالصوت هذا مخبله..
يلا اني نازل خلصي وتعالي..
ورا ماراح شوي ونزلت شافتني امه..
ها سلامات يكول مرتضى لاكيج واكعة بالمخزن..
اي شوي دايخه تعبانه..

اييي حبلة يجوز طولتي ترا..
اني انتظر هاليوم واشوف جهال مرتضى..
جاوبها مرتضى يوم ضغطها هابط مو حامل..
ترى بعد وكت ماريد طفل هسه!!
من كال هيج استغربت؟؟هو مو يكول عقيم..
يعني ميدرون اهله!!
بقيت افكر تمنيت اسأله شلون اكتشف نفسه عقيم بس ماريد اجرحه..

رحنا العصر لدكتور يعرفه وسوالي فحص عام..
صح ضغطي ودمي نازل كلش..
مرتضى ضل يحجي عليه لان مااكل واشترى لحوم وفاكهة ..
وكال لامه رغميها تاكل اذا اني مموجود..
هه ميدري هي المنعتني اكل..

خلال هالفترة عرفت رواء جايبه وذابة الطفل لمنتصر..
واصلا منتصر ببغداد يعني يبقى يم امه ..
مشت الايام واجه موعد الدوام..
داومنا اني واطياف يوصلنا مرتضى اني وياها..
علاقتي بمرتضى جانت كلش حدية..
يمكن اني صرت شرسه بسبب الماضي..
بحيث مرتضى ميجازف يتقرب هواي..

امه لا زالت تحاربني وتلح شوكت تحبلين وشوكت..
بيت اخو طلعو من البيت بقيت بس اني جنة..
الى ان بيوم المغرب اسوي عشا بالمطبخ وسالتني ..
اكلج انت تطلكتي لان متخلفين مو؟
يا خاله مو تعرفين حامل ست اشهر وابني مات ببطني..
جذابه احنا شمدرينا بالحجي..
اليوم اخذج للدكتوره واريد اطلع جذباتج بس اذا طعلتي عاكر ماخليج وياه يوم واحد..
الا اهجج منا ..
مستمرة تعيط وتحجي بدخله مرتضى سمع..

شكو هنا شصاير؟؟
تعال شووووف مرتك الخابصني بيها شتكول..
ماكلت شي اني خاله ترى ..
ولج تجذبيني اني وشيباتي؟؟؟
حوراااء روحي للغرفه كافي..
صار..
رحت للغرفه واني ميته قهر شبعتي بجي..
ومستغربه لان تصرفات امه تدل هي متعرف بي عقيم..
بين صفناتي فات مرتضى..
عصبي ووجهه صاير دم !!
راح اودي امي لبيت اختي واجي حسابج بس ارجع..

للحكاية بقية..
بقلم شقراء(قمر كانون)