رواية المنجمة الفصل السابع 7 - بقلم كفايه

﷽

#المنجمة
الكاتبة_كفايه

لاتنسون متابعة الحساب
التصويت والتعليق بين الفقرات
لطفاً💙

يا علي مدد  .

________♦_______♦____________

_ها اليوم  هنا خير؟
_كواكب: هه اليشوف وجهك يشوف الخير برأيك؟
_غضنفر: دولي وجهي يخبل
_اي واضح تخبببل أصلاً انت
_شعبالج اسمراني اشگ شگ

ضحكت باستهزاء الثقة العندة عجيبة يحجي مقتنع من نفسة مية بالمية بس لو نجي للصدك غضنفر شاب حلو مرتب اي مرتب يمكن عبالكم مخربط لااا ابد شكلة وملابسة اليشوفة ينبهر بية بس يبقى كلامة واسلوبة مال ولد شوارع  .

_غضنفر: اوووو احوال صرتي كواكب

يكلب بالدراجة يتفحصها همزين السويج عندي جان شغلها وطار بيها حتى يحرك گلبي ويخليني اتوسل بية يرجعها  هزيت ايدي وكتلة:-ترة دراجة مستعملة وين الاحوال الصرت بيها؟ شمشترية مادكلي
_غضنفر: بس تريدين تشترين شي گليلي سهلة
_نعمة الله عليك ما اكل حرام اني

رفع حاجبة اجة صار كدامي يباوع بوجهي باوعتلة بجمود  .
_غضنفر: شعندج وي صالح؟
_يطلبني فلوس
_فلوسيش؟
_قنبلة صوتية اخذتها منه بالدين

رفع حاجبة بتعجب ورجع عكدهن كال:-شتسوين بيها القنبلة؟
_ذاك اليوم شمرتها على بيت سالم

ضحكت وزدت بالضحك من تذكرت ذاك اليوم وشلون علكتها بينهم  .

_غضنفر: بداعة دراهم سولفيلي شسويتي
_هاي ابن سالم سامر ماخذ فلوس من واحد ماعرف شغل لو هيج المهم العرفتة ما منطي عنوانة الولد اليطلبة  كليوم يجي يسال عنة اهل المحلات لان تدري بولد سالم معروفين الخيسة  بس العالم تخاف ادلية تكلك اني شعلية ادلية بلة يريد يكتلة لو عدهم ثار  اني اروح ابتلي

كطعت كلامي وكعدت على الدراجة هو مقابيلي مبتسم يسمعلي وعيونة متوسعات بفرح كملت بحماس   .

_بيومها رادو يكتلون اخواتي لان مهشمة راس يوسف و ماكو شي ينقذهن منهم سالم بس يلزمها يموتها اني رحت لمحمود يشوفلي ذولة الولد ويخبرهم على عنوان البيت واني سبقتة اشتريت قنبلة وقبل جيتهم بدقايق شمرتها عليهم حتى شكلك هما شمروها وسامر تخبل عليهم شلون تشمر علينة صوتية تعاركو بينهم وصارت بالقنادر تالي متالي صوب واحد منهم ودخل للسجن

_خرررررب ولج الشيطااان الشيطان هذا مامفكر بسوالفج هاي
_شعبالك غير تربيت بالشارع اعرف شلون الوفها واطلع منها
_لا هيج اثبتي انتي بت شارع اصلية
_بالضبط سالم التهى وي ابنة وي الناس بعد فصل الهم  ودفع سد الدين يلا يتنازلون عنة
_شفتة طلع من السجن سامر
_اي فلوس شعبالك فلوس اهلنا وين راحت سالم كلها ابطنة
_هم كالت اهلنا مو اهلج حبيبتي

خزرتة بضوجة وعدلت كعدتي طلعت من جيبي الفلوس وشمرتهن عليه كتلة:-ذني انطيهن اله كلة من كواكب
_وانتي وين رايحة؟
_منين ما اجيت

شغلت الدراجة وهو صار قريب مني كال بضحكة
_خل نتزوج شبيج خاب كبرت
_كواكب:ماتزوج لازمتتتك
_غضنفر:اي غير انتي ماتقبلين تصيرين العروسة شلون اتزوج
_ روح يابة رررروح
_كواكب

باوعت بعيونة من كال بخفوت جاوبتة بنفس نبرة الصوت:-تلاحك روحك لاتخرب مستقبلك عوف السم عوفة لاتشتغل بية
_شسوي شغلي هذا
_شغلك حرام وخطر انت جاي تضيع مستقبلك بيدك تدري؟
_ادري
_اذا تدري عوفة!
_ماكدر محد يعوفني يهددوني ويحركون ورقتي بس اطلع منهم
_تكدر صدكني تكددرر
_ماكدر
_زين هسة انت متندم لان تشتغل هذا الشغل؟
_لاااا ولا راح اتندم

شغلت الدراجة وشخطتها عفتة وراي خلية يغرك خلية الف مرة كتلة يعوف شغلة يكدر يشوف حل والله يكدر بس عقلة محجر قافل على الهلاك انقهر علية وانقهر على شبابة الراح والجاي يروح غضنفر شاب مامعروف اصلة من فصلة عاش بالشوارع يم اهل المحلات بين الارصفة والازدحامات كبر  .

دائماً اسئلة وين اهلك؟ شلون عافوك باي طريقة جوابة ثابت اني ابن حرام وشمروني ويبقى بداخلي رفض لهذا الكلام رفض كلش جبير مرات احس هو ابن حرام فعلاً والكلام اليكولة صدك بس احساس عندي قوي يكلي ماكو شجرة بلا جذر  .

كل شخص بهذا العالم اله جذور والة اصل حتى لو ابن غير شرعي هم عندة اب عندة ام ما انشكت الكاع وطلعتلة الة اهل كلنا النة اهل والنة جذور
ممتدة ولابد عندة اهل بهاي الدنيا الجبيرة المفروض يدور عليهم مايبقى هيج بس هو العكس يكول ما بحاجتهم من كبرت احتاجهم  !

بس الحقيقة مهما كبر الشخص و وصل يبقة اصلة مهم وشي اساسي  .

فريت بدراجتي لبيت دراهم مستحيل اعوفها لو اتاخر عنها وكفت دراجتي بالباب وهي مشتغلة فتحت الباب ودخلتها ماحس الا  طير حط  على عيوني والدراجة مشتغلة كمت ما اشوف وكفت الدراجة راساً ولزمت الطير بعدتة عن وجهي  جعصتة بيدي بعصبية اسود يشبة البعيجي بس هو مو بعيجي اكبر منة يشبهة الغراب اضافرة احسهن خرمشني من حركتي ضربتة بالحايط بقوة وهو صاح

رحت غسلت وجهي احس غشاوة على عيوني مسحت وجهي ودرتة اشوف دراهم واگفة  تباوعلة طايح بالكاع ميت والطيور المثلة حطن فوكة تقربت منها سالتها بذهول  .
_مات؟
_دراهم: مات

هزت راسها وابتسمت بحزن اني اعرف دراهم شكد تحبهن هنا يجن لبيتها لان يعرفن اكو اكل الهن ومحد يأذيهن بيتها بحيث بس يفترن بالساحة ويصيحن بصوتهن المزعج حتى ماتقبل علية من اطردهن  .
حاجيتها مبررة باسى  ..

_كواكب: مو قصدي اكتلة هو مات
_دراهم: احفظي روحج هالفترة مايصيبج خير

عكدت حواجبي بخوف كلتلها:-شلون دراهم؟
دخلت جوة واني وراها كالت
_كواكب: حطت عليج المصايب يكواكب وعيونج مايشوفن غير السواد بعد

كعدت واني بصفها اكلها تفهمني:-ادري بيهن شؤم ذني بس يحطن علية يصير شي وياي بس ولا مرة حطن على عيوني هيج
_دراهم: روحي يم اخياتج لاتظلين يمي

كمت منها وادري ومتاكدة الجاي مو خير الي والنا بس احاول استمتع بيهن ذني الايام طلعت من بيتها واني متلثمة تلثم بس عيوني طالعة حتى جفوف لابسة  .

الخوف شوكت يعوفنة؟ شوكت نعيش حياة طبيعية هادئة؟ عجزت واني ادور جواب لذني الاسئلة  .

رجعت للبيت بوجهي وقريب من بيتنا دورت شغل بالمحلات والاسواق الجبيرة هواي دورت عسا وان الکة شغلة جبت عمري اشتغل بالسوك ابد ماطلعت منه بالمخظر خلصت عمري اشتغل اعرف السوك كلة وناسة ومرات اذا شفت اخواتي محتاجات شي اشتغل وي محمود العصر بالشارع احصلي جم فلس اشتري بيهن الهن احتياجاتهن ابد مامقصرة عليهن شيريدن اجيبة اخلية جوة ملابسي خاف افنان تاخذة منهن وهيج جبنا العمر  .

مالكيت شغل اخر مكان رحتلة اشوف شغل بية جان مخزن غذائية اني اليشوفني يكول ولد مستحيل يشك لان مابية شي يدل على اني بنية الحمدلله جان اكلتني الشوارع و رغم هي شوارع بس ما مرة واحد اذاني حتى بكلام مامرة سمعني واحد كلام مو حلو وهي شوارع مادام اني محترمة نفسي وخافية هويتي محد تقربلي ولا اني اتقرب للناس على كد شغلي وياهم  .

ابو المخزن كيف من اجيت كال الله دزك علية جنت محتاج عامل ابتشرت بفرح وكتلة:-شوكت اشتغل وياك
_من هسة اذا ماعندك شي
_صار يابة

طبكت الدراجة وخليت السويج بجيبي دخلت للمخزن اكو ثنين عمال شباب وصاحب المخزن كاعد على السجلات هذا شغلة بديت بشغلي حتى ماسلمت على الولد مالي علاقة باحد اني 
جان شغلي احمل كارتون للسيارات التجي  .

شلت كارتونة والولد يحملي فوك الخمس كارتونات مال اندومي شلتهن فد مرة خليتهن بالسيارة ورجعت اكمل شغلي بدون صوت الي يسمع شيأمروني اني اسوي بسكوت  .

اني والولد الوياي حملنا فوك الاربع سيارات حمل ذاك العامل ينزل ويحملنة هلكت تعبت بس يا محلاة اني اتونس بالشغل الفلوس تسويلي واهس وطاقة الكعدة تموتني ماعرف اكعد، خلصنا الشغل
ومن ردت اطلع ابو المخزن شالي علاكة انطانياها كال:-هاي سويتلك علاكة اخذها لاهلك

ابتسمت بفرح واخذتها منه اكلة:-رحمة الله والديك يابة

طلعت انكت بملابسي رحت اشغل الدراجة ماتشتغل يمكن خلصت بانزين وصيت الرجال عليها ومشيت للبيت هو مو كلش بعيد كلت امشي  .

امشي بالمنطقة اباوع للبيوت ما شاء الله  راقية وبنائها حديث امنيتي اشتري بيت واجمع اخواتي بيه حلمي هذا من ذاك اليوم العشنة وي سالم ذبيت حسرة وكملت امشي الشوارع فارغة لا طفل لا مرة بالشارع يكول مهجورة مو منطقة بعد ناس مثقفة  يطلعون؟

وصلت قريب من  بيت ضرغام سيارة ابوة طابكة  والباب مالتها مفتوح تقدمت كدام اكثر علي واكف بالباب وابوة يشتغل بسيارتة ابتسمت لعلي ولوحتلة بيدي بمعنى هلو ردلي الابتسامة يهز براسة "زين" رفع راسة ابوة باوعلي انتبهت لنفسي ما رافعة النقاب وجهي طالع رفعتة وهو كال  .

_فرقد: لحظة لحظة

وكفت كتلة: تفضل يابة
تقدم علية كلي بابستامة: انت مو ذاك اليوم ردت ادعمك ورحت وياي للمستشفى
_كواكب: بالضبط
_والله ما انسة موقفك وياي لولاك اني هسة ميت الله يبارك بيك عمو
_ماسويت شي يابة

ابتسمتلة وكملت طريقي  شعور حلو زارني بكلامة شكد حلو من شخص يسويلك شي وتشكرة بكلمات حلوة الكلام الحلو يغير شي بداخلنة هوووواي يغير بس بعض الناس لو شما تسوي الها زين ولا كأنها مايغزر بعينها شي حتى كلمة حلوة ماتگول نسينة الكلمة الطيبة صدقة   !

اسمع ذهب طلعت تكلة:: يا دهر حتى دهر شتسوي طالع ما تطب جوة
_فرقد: اشوف سيارتي خاف ناقصها شي
_ذهب: يااا هاي ياهي التطرك طرگ ووولج هنااااااا

عرفتها علية تصيح ضحكت ودرت وجهي الها رجعتلها امشي :: شلونها ذهبنا الحلوة
_ذهب: دهر حتى دهر انتي بس تتغزلين بية ولا تستحين
_ذهب صافي مصفة ويلمع لمع

ضحكت على تعابير وجهة معقولة تستحي حتى كلامها يضيع من احجي وياها بهلطريقة يصير شكلها يخبل هالمرة  ،بحنية واهتمام كالتلي  .

_ذهب: وين جنتي حبوبا
_هاي جيتي من الشغل
_عمت عين الاغم من يسمع بطاريج اي والله وين تشتغلين؟
_شغل حجية هنا بالمنطقة
_يبعد جبدي محتاجة فلوس كولي جدامج بس احجي
_رحمة والديج ريتج سالمة
_اخياتج شلونهن؟
_يلسمن عليج
_يمن اروحلهن فدوه شلون بنيات

ودعتها رجعت للبيت اضحك لكيت كدامي نيزك من العصبية شايطة تصيح علية :-ووووين جنتي ؟

نزعت البراسي وخليت العلاكة باب المطبخ كتلها
_لكيت شغل هستوني حليت
_وين هذا الشغل؟ انتي ماتكعدين شلووون وياج
_هنا بالمنطقة قريب احمل كارتون سهل خوش شغل يونس هم ويخلص الوقت بسرعة

نزعت البرجلي ودخلت للمطبخ غسلت وكلت لشهب تحطلي اكل رحت كعدت واموري يشبك علية ويبوس بية جاي العب بية ونيزك فوك راسي واكفة تسال بخوف ونتر  .

_نيزك: وين دراجتج؟
_عفتها بالمخزن خلصت بانزين

كعدت يمي عاكدة حواجبها بعصبية تنتر بية نتر
_نيزك: وولج گلبي هذا گلبي ستوتية وتالي وياج وي غطاتج موتيني راح اموت ناقصة عمر من وراج
_هسة شسويت فوك ما اشتغل، شتريدين اكعد واسكت انسيها هاي كواكب ماتكعد ولا تعوف السوك

حجت مبررة تذكرني
_كواكب لا تنسين وضعنة عليج العباس لاتنسين
_هو اريد حل لهذا الوضع مو سالم الخيسة اشرد منه وخايفة اذا ما اخلية هو اليشرد مني فلا يطلع اسمي كواكب
_بس عوفي ساااالم عوفية شلون احنة وياج
_سالم قضيتي ولو يبقة اخر يوم بعمري ابجية
_حطي راسج وياة حطية ماكو غيرج يخسرررر، عوفية يولي واكعدي بالبيت موتينااااا

خزرتها ساكتة جابت شهب الصينية سرفنت ردني اكل واموري يجفص وياي اجت شهب توكلة وهي ساكتة اباوعلها اية من الجمال والهدوء الشعر مثل الشلال طايح واشكر كلساع ترجعة ليورة لو الوجهة اليبرگ برگ من البياض شهب شهبة كلش ومدبدبة خدودها صاعدة  ويريدونها لذاك الخيسة سراج مكبسل ومرتة اخيس منة عمت عيني لو خليتة يشوف شكلها بعد  .

كمت اغسل ونيزك سكتت عني ذبت حركتها بالشغل ادري بيها خايفة علية والله تموت من الخوف والتفكير بس اتاخر تحسب هواي تحسب واني ماعلية شي اطب منا واطلع منا منو اليمي بس ما الومها لان احنا مالنة غير بعض بالدنيا شتريد تخسر بعد   .

حضنتها من ضهرها اعض بيها وادغدغ صاحت بية ماخليتها الا ضحكتها ضحكت على ضحكتها منتعشة روحي والله افديهن بروحي وعمري لخاطر هاي الضحكة  .

دارت علية تضحك وتضرب بية بخفة واني اكلها

_هيج واضحكي خليني ابتشر
_نيزك: لاتشلعين كلبي واني دوم اضحك
_نيزك انتي تؤمنين بالمكتوب؟ يكولون المكتوب مامنة مهروب كلشي مكتوب يصير لو شما نسوي عوفي المياة تاخذ مجاريها بس باوعي عليها هي تصفى
_والله ولا عرفتج شلون تحجين
_اني صح خلصتها بالشوارع بس مو معناها لساني قذر لا بالعكس تعرفت على جميع انواع البشر واختلطت بيهم الفقير والغني والزين والموزين الدارس والامي كل البشر خالطتة وهذا راسي متروس ترس قصص وسوالف وحتى معلومات
_اي عفية استفيدي من الزين ماحب البنية التفشر
_افااا اني كواكب لساني ماكو انظف منه

راحت تضحك وتذكرني: اي بس ما نسيت سوالفج وي افنان وفشايرج عليهن
_خيسة هنا خيسة لو  ...

سكتت وهي باوعتلي باستغراب عفتها ورحت اتلكة نجمة جاية من الدوام شمرت دفترها على الكاونتر تصيح:: ارررريد اكل تلاحكولي متت جوع متتت

راحت شهب تصبلها ذبت شالها وجنطتها اجت يمي تباوعلي ضربتها على خدها وحضنتها:: شلونها النجوم
_زينة اني كواكب بس اسمي نجمة
_نفس الشي
_لا مو هيج كولي المفرد والجمع بالحالتين يضوي

ضحكت واني رافعتلها حاجب راحت لاموري تبوس بية نيزك تكلها:-اليوم بالجامعة؟
_نجمة: اي امتحانات طيحو حضنة بيهن
_نيزك: كدها انتي اكيد

كعدت تاكل واني لفيت راسي ونمت تعبانة وراي شغل  حسيت على نيزك تلعب بشعري وتحجي بصوت ناصي بعدها باست كصتي وغطتني كعدت وحدي على التوقيت البراسي بدلت وكتلهن طالعة
نيزك سكتت كالتلي:: لاتتاخرين

هزيت راسي وطلعت هنا يشتغلن واني رحت لصديق خالي اسال علية اجيتة بالوقت الصح صارلي فترة ادورلة والحمدلله لكيته سلمت علية وسالتة على خالي كال:: هذا الاسبوع يرجع من السفر

فرحت فرح مو طبيعي ماعرف ليش فرحت برجعتة بس جنت حاسة رجعتة تفيدنا بشي مناك رحت على الشغل زين مايتعب خلصنة من وكت واخذت يوميتي رجعت للبيت الدنيا مغرب والقران مشتعل صوتة يسكن النفس البخور تارس البيت نيزك تحظر عشا النة وتركض لشغلها اني ما اتدخل ولا اسالهن شكد طلعتن بس شنو المحتاجاتة اجيبة الهن اريدهن هنا يتعلمن يشتغلن وحدهن بس هي ابد ما تعوفني تشاركني شراح تسوي والطلبيات شكد طايرات فرح بالشغل واني فرحانة الهن الشافنة مو هين هسة حتى نفسيتهن تغيرت قبل نيزك نااااااار والنهار كلة عصبية حتى صوتها يرجف من الاعصاب مايعوفونها ترتاح وتتهنة عذاب نفسي مشتغليلها الانذال  .

اذن راحن تلاثتهن توضن ونيزك اجت كبالي ثبتت تباوعلي كتلها:: ها محتاجة شي

ذبت نفس وكالت:: شوكت تنوين تصلين فاتج هواي كواكب والانسان مايعرف شوكت يودع شلون تقابلين ربج وشدكليلة وين جنت عنك
_كواكب:: اعرف بس اني حاجية وياة هواي هو يعرفني ويعرف بيمن افكر مو هسة اموت اني بعد بعد
_محد يعرف شوكت يموت بيد ربج هذا
_اي بس اني متاكدة لان ادري بعد الدنيا تلوعني وتشلع گلبي يلا ياخذني الموت

لفت شعرها تحجي من جديد
_لا الشغل يخلص ولا المشاكل تخلص الصلاة ماتاخذ منج هواي دقايق دقايق هنا يعني الج وقت تسوين كلشي الا الصلاة؟!!
_روحي نيزك صلي راح يروح موعدها عليج

هزت راسها باسى على حالي وراحن يصلن اني الوحيدة بينهن ما اصلي ولا اصوم حتى الدين ماعرف هواي عنة ولا اتدخل بالدين زيارة هاي الزيارة ما اروح ليش لان يگللي "انتي نگسة ما يصير تدخلين عتبات" هاي اماكن مطهرة وانتي بت حرام  اكيد عرفتو منو اليگلي هذا الكلام اي اي صبيحة وافنان خلني اتعقد من هيج مواضيع حتى يكولن ابن الحرام مايدخل الجنة وبعد وبعد  .

اني اعرف نص كلامهن جذب بس تغير شي بداخلي وگلبي صدكهن بقة عقلي بس هو الرافض لكلامهن وارجع واكول للعالم اني عندي اهل ويجي يوم والكاهم" ماكو مهموش بلا جذر " دراهم كلتلي انتي مو بت حرام يعني مو بت حرام بس گلبي الحقير مو وياي عكس عقلي  .

باوعت للبنات بعدهن يصلن  كلت بين مايكملن اني اروح اجهز صينية نتعشة دخلت المطبخ كلشي ما اندل ولا اعرف وين المواعين
كملن واجن واني بس اطلع شي وارجع نكت ادية اصيح  ..

_صددك جذب وين الغراض دختتت
_نيزك: كدامج كلهن بس انتي مو شغلج هذا
_هم صح مو شغلي صارلي شكد افكر هنا شخلي وهنا شخلي

وكفت اباوعلها تصب والابتسامة على وجههة عيوني متمركزة بيها احس صدري قبط والعبرة خنگتني ما تحملت وطلعت للكراج اعصر بعيوني من الدمع رفعت راسي للسما ماحجي شي احسة يفهمني شريد اكول وعليمن اريد اوصية  .

وصيتة اخواتي كون مايصيبهن اذى ولا دموعهن تنزل بيوم دوم كون الفرحة والابتسامة على وجوهن مسحت وجهي ودخلت جوة نيزك تصيحلي 

كعدنا كلنة ملتمين على الصينية وشهب تدور بالقنوات على مسلسل نجمة تاكل وهي تصيح بيها

_شهب: عوفيلي اكل لاتبلعين بلع
_نجمة: مشكلتج حبيبتي تمنعيني
_شهب: ولج تصيرين دبة دددبة محد يكلبج
_اني نجوم عيني

خلتة على مسلسل تركي تباوع وتاكل فد فاهية وهاي نجمة تلف لف اموري يخبث واشوف نيزك كوة متحملتة كملت واخذتة شايلتة ابوس بية واحجي وياي...

_حبيبي الروح شتريد
_امير: اليد مصاصة ام الالوان
_بس هاي
_واليد اليد اليد

خلة ايدة على راسي يتذكر واني منتظرتة صاحت بية نيزك؛-تعاي عوفية يخبث انتي بيج حيل شايلتة
_اذا مابية حيل لابن اختي المن رايدة الحيل؟

ابتسمت بفرح واني ابوس بية مد ايدة يلعب بشعري ويضحك يرفع بية ماينرفع..

_امير: اتي مسل سعري صعير(انتي مثل شعري صغير)

ضحكت كتلة: اي بس انت شعرك احلة بهواي
مد اصبعة يتلمس بوجهي احسة يدغدغني لزمت اصبعة ابوس بية وهو مكيف بس يضحك كلي بزعل:-اليد تبس ابو النفاخ

رفعت عيوني بصدمة اكلة وين اكو جبس ابو النفاخ خالة
_امير: اتو بس اتي ماتيبين الي
_هسة اخذك وانت اختار البنفسك امداني اذا ماجبتلك شتريد

اخذتة ونيزك طلعت ورانا هو يسويلها باي وينطيها بوسات اشرتلها تدخل جوة هزت ايدها دخلت سدت الباب واني تحركت نزلت امير يمشي واني لازمة ايدة نطيرها بالهوى رحنا اشترينا كلشي يريدة اموري جابة ترستلة علاكة على ذوقة فرح واني فرحانة على فرحتة  .

رجعنة من الاسواق ابوس بية واكلة:: ها هسة تحبني؟
_اهبس بدد البيت

جاي اسولف وياة وطفر من ايدي يركض بسرعتة اباوعلة راح لضرغام هو ولد بالباب هستوهم جايين جلب بضرغام من ورة يضحك التفتت علية شالة كبل يبوس بية ويكلة  ..

_ضرغام: فصعون الفصاعييييين للككككك هلاااااااا مشتااااقين مشتاااقين

اموري حاضنة يضحك وهو طايحلة بالبوس رحت اصيح بية:: ديلاا جيبة اكتلة اكل شهل لعبان النفسسسس

ولا جنة يسمعني التفتت على صوت يكلي:: البوس لعبان نفس؟

خزرتة هذا ضيغم رفعت حاجبي اله ما حاجيتة وصحت بضرغام:: عمييي جيببب الوولد جيبة اكتلة
_ضرغام: هو ابنج شعليج انتي
_شوف مابية حيل اخرب خلقتك نزلة وخليني اولي
_ضيغم: ليش انتي هيج اعصاب؟
_كواكب: من ااااااااالله
_ضرغام: اخذها وياك من تسافر بلكت تغير جو وتتعدل شخصيتها العنيفة
_ضيغم: لو تتغير بالسفر اخذها اكيد
_مشكورين جزاكم الله الف خيرررر خلوني امشي

ذبيت نفس قوي اشوف اموري يباوعلي وياشر على ضرغام يكلي:-اهبة هباب امو
_ضرغام: يروحلك فدوووة عمممك

باسة بقوة وشمة عفست وجهي لعبانة روحي منه  نزلة يكلي:: ماتباوعين بوجهي هالمرة اريد اعرف المستقبل
_مزنجر وجهك شباوع بية

قبض على فكة بعصبية وابتسم بالجذب كال
_ضرغام: حبيبتي المنجمة الحلوة خلينا نبدي صفحة جديدة

حجيت واني امشي اكلة:: ماعندي شي وياك لو وب غيرك ماطول بعيد عن ناسي مالي غرض بيكم الله يوفقكم
_ضرغام: اشو حسيت بالذنب من حجيتي هيج

ضحكت اهز راسي ضرغام تركيبة عجيبة غير عنهم كلهم ماينعرف شينة من زينة،
دخلت البيت ورفعت اموري على السنك اغسل بوجهة اجت نيزك تكلي:: شبية امير تغسليلة
_كواكب: مابية شي بس البعيجي باسة جاي اغسل بوستة
_يااا صدك تحجين
التفتت رافعتلها حاجب كتلها:-شلون ابوسة فوك بوستة ترة لعبان نفس وحرام هم ينباس فوك البوسة

بقت صافنة اخذتة امسح بوجهة لكيت شهب ونجمة ممدودات ومتغطيات بنفس الغطا يتابعن مسلسل اجيت اني وامير كعدنة يمهن اموري يطلع من العلاكة وينطيهن وهنا ماصدكن ياكلن ويباوع اخذتة شهب خلتة بالنص بيدة نستلة ياكل بيها
تمددت يمهن وسبحت الغطا تغطيت شوية ونيزك غطتني وجابتلي مخدة كعدت يمي واني افتح واغمض كتلها..

_نعسانة اريد انام
_نيزك: نوم العوافي يروحي نامي
_يلا نامي انتي هم تعبتي طفي الضوة حتى انام

هزت راسها وراحت تسد البوبان شهب غسلت وبدلت لاموري نجمة نامت خطية تعبانة انتظرت نيزك اجت نامت يمي خليت راسي بحضنها غطتني
تلعب بشعري حجيت بصوت نعسان  ..

_نيزك لاتضعفين ابد اني حتى لو مو يمج بس احس بيج
_شكو
_ماكو شي بس اكلج خليج قوية خلي كواكب وجودها وعدمة مايأثر

دنكت باستني:: الجسد بدون الروح عبارة عن جثة يسارعون حتى يدفنوها وانتي روحي

رفعت راسي اباوع بعيونها افههما
_نيزك لاتبجين البجي مايحل اي مشكلة الصمود وحدة المهرب
_گلبي راح يوكف شضامة
_مو الا ضامة شي بس لانعيش بوهم وننسة المنتظرنة
_اسكتي لاتخوفيني والله لو ما انتي موجوده حتى مايغمضلي جفن وانام شايفة البيت بدون اب وام شكد ماينطاق وصعبة صعبة بنات يكعدن بيت مابية اهلهن بس والله من بعد الراحو حسيت انتي اهلنا صعبة بدونج نعيش

ضحكت وغمتت راسي بحضنهل نمت مرتاحة مافكر بشي اليريد يصير ما اوكفة كعدت الصبح لكيت شهب واموري نايمين لان بقو سهرانين يتابعون مسلسل  نجمة كاعدة  تتريك ونيزك تحظر بجنطتها وتسالها شتخليلها  ..

_خليلي عطر نازوكة
_نيزك:صار وبعد؟
_نجمة:كلنس وياج هم وحمرة خليلي

رفعت نيزك حاجبها وهي ردت بضحكة
_نجمة:شبيج خفيفة اخلي مو طوخ يعني واحد شفتة بيضة ماترهم بية مرض اسم الله
_نيزك:بعد جريدة احجي
_نجمة: غير افهمج
_موبايلج خليتة واخذت رقم ميس حتى اتصل بيها لو ردت احاجيج

كعدت تريكت وياها وهي تحك بيدها كتلها
_شوكت تفلينها؟ توجعج
_نجمة: لا بس تحكني اريد افتحها
_اذا خلصت المدة افتحها الج
_لا يمعودة انتي وين تلحكين اروح اني وميس اذا خلصنة من وكت

كملت اكل وطلعنا سوى وصلتها للشارع صعدتها بيدي  ورحت لشغلي خلص الشفت الاول من وكت كلش رجعت للبيت لكيت نيزك جاهزة تريد تطلع رفعتلها حاجبي قبل لا احجي شي  كالت مبررة   .

_خالة سهلة عدهم عزيمة وكالتلي اطبخ الهم اني انطيتها كلمة اروح
_عزيمة مال شنو هاي؟
_نذر الحجية مسوية
_وهما شنو ماعدهم نسوان تطبخ
_مادري والله
_اذا ماعدهم نسوان يجيبون طباخ ليش انتي
_واني هم طباخة واعرف اطبخ كلشي وبكميات فدزو علية لان يعرفوني

ذبيت نفس وكتلها:: روحي بس مو وحدج اني بعد شوية اطلع شهب تبقة وحدها نجمة مو هنا اخذيها وياج هي واموري

هزت راسها بتفهم وكالت لشهب حسيتها  طارت من الفرح خطية مامصدكة ركضت ركض لبست واجت سهلة تاخذهن وصيتها عليهن قبل لايرحن  ..

_خالة البنات امانة الله ماريد واحد يسمعهن كلمة لو حرشة منا منا
_سهلة: وياي منو اليحاجيهن
_هو اني لان وياج اخليهن تاخذينهن وترجعينهن امانة الله والرسول ذني اعتبريهن مثل بناتج خالة مو يصير عليهن شي

ضحكت المرة ونيزك كالت:: شبيج يمعودة وين رايحين احنة هسة نرجع

رفعت حاجبي بضوجة اشر على شهب اكلها
_اختج مو تعوفينها تغفل عنج ابقي كاعده يمها لاترحين منا ومنا واموري مو تعوفنة يطلع كعدنة وياجن ترة كلشي يصير
_نيزك: وبعد
_ديربالجن لاتحتركن بالجدورة ترة تسلخجن ابنج لاتخلينة يم النار وانتي لاتشيلين شي حار خليهن يساعدنج

طلعن وهنا يضحكن على كلامي وهوسي الزايد مو بيدي والله بس اخاف عليهن اتاذة من يتاذن ولو بيدي رحت وياهن بس عندي شغل، صعدن بالسيارة ذهب موجوده كعدن يمها فتحت الشباك تكلي  ..

_ذهب: ماتجين وي اخياتج حبوبا
_رحمة الله والديج ذهب عندي  شغل
_جا الشغل مايخلص مسوية عزيمة انا ما الله يهديج وتجين
_لا ماكدر بس جيبيلي غدة وياج دزية بيد البنات

اشرت، على عيونها تكلي:: صار من عيوني ولو ردتج حاظرة وي الجماعة
_غيرها بغيرها ان شاءلله لاتنسين تخيلي وذر لحم واخواتي امانة برگبتج
_ذهب: يا ولج انووب
_هو شنو انوب غير انتي اخذتيهن وياج ماطولهن وياج انتي مسؤلة عنهن امانة ذني ااااامانة

ضحكت بتفهم تكلي:: وانا اخلي الامانة بروحي  _تسلم روحج ذهب

خالة سهلة تضحك علينة  كعدت امير بحضنها تبوس بية   علي يسوق الهن سويت لاموري بيدي والهن اموري يشمرلي بوسات ونيزك ضلت عينها علية دايرتها راحت السيارة واني دمعتي بطرف عيني صارت  والغصة بلعومي دخلت للبيت سديت الباب وكعدت بالكراج خليت راسي بيدي ودموعي بدت تنزل بحركة بجيت من حسيت باحساس مو حلو احس راح ارجع ابتعد عنهن وهاي المة تخرب بقيت الوم بروحي  شلون وافقت يطلعن وحدهن بدون لا اعترض بلة صار شي عليهن ويرجع عقلي يتعارك وي گلبي ويكرر جملتة "المكتوب مامنة مهروب"  .

كمت غسلت وجهي وطلعت من البيت بعد ما طبكت  الباب وراي رجعت لشغلي واني بالي مو وياي
ياخذ ويودي بسوالف قديمة ويزودها بجديدة  .

_الدنيا دوارة يا ابو فلان صارت عليهم لو ماصارت

اسمع ابو المخزن يسولف وي واحد صدك الدنيا دوارة ويا يوم دور واشوف سالم شارد من عدنة ويخاف نلگاة هم يجي يوم ويعيش العشناة بسببة!

واني افكر بعمايلة السودة ويانة وشلون اخواتي تعذبن بسببة ومن ايدة امراض جسدية ونفسية صارت عدهن لليوم اعراضها باقية لو اني الخلاني افتر بالشوارع واحاول افكر بحل لامري احاول استوعب اني منو ولمنو اروح واني ماعرف احد

گلبي انقبض والنفس ضاك بصدري ايدي بادت وحيلي راح فاتحة عيوني بخوف  اسمع صوت سيارات الشرطة  تدوي بالمكان غريب مني بداخلي اكول مو يمي ليش الا اني مطلوبة للشرطة واني والله ماخفت على نفسي ولا اخاف عشت بالشوارع تخوفني شرطة وسجن بس خفت بعد ما اشوف اخواتي وافاركهن  وخفت عليهن منهم اذا لزموهن شيسوون بيهم يجرمون بيهم اجرام اني متاكدة

الصوت كلش قريب استجمعت قوتي و طلعت من المخزن اركض صارت بوجهي الدوريات والشرطة الملتمة حرت منين اطلع وهما محاوطين المكان والاسلحة مرفوعة بوجهي يكول عبالك كاتلة واحد
صارت عيني بعين سالم واكف وي الضابط يگلهم هي  وهما باشراة هجمو علية استحوذوني يكلبشون ادية نترت روحي منهم بقوة بس مو كادرة افلت منهم  وهو يضحك بانتصار ويگلي بوعيد   ..

_سالم: الا اخليج تخيسين بالسجون
هزيت راسي اگلة بوعيد والشرطة تكلبش بادية
:: يدور الزمن واخليك بمكاااااااني

ضحك بشماتة وحقد عيونة يلمعن بفرح كلي بين وسط الجنود والوضع الا اني بية  .

_راح اسوي سواية بخواتج الساق* لا صايرة ولا دايرة وتوصلج الاخبار

طگگت عيوني بعصبية احسهن يردن ينشلعن من مكانهن صحت بغضب وتهديد صوتي احسة انشخط من الصريخ   .

_كواكب: امثثل بجثتتتتك بس تأااااااذيهن المووووت ارحمللللك والله ارررحملك بس تبجي عيونهن لككككككككك سااااااااالم تعرررف كووواكب شتكدرررر تسويلللككك

ضحك بحقارة وشماتة كال:: اليوم هنا يطلبن مني ازوجهن ولدي وما ازوجهن

انشمرت بسيارة الشرطة واني ارافس واريد بس اوصلة واملخة تملخ بس مانعيني الشرطة والله لو ماهمة مقيديني جان مووووووتة ضربت على الجامة بحركة واني ارجف بعصبية وخبال  اصيح ..

_اخليكمممم ررررمااااد وانثررركممم جوة رجليهن بس توصلووووون صوووبهن  .

يتبع  .....

_____________________________

خفيفة على اللسان ثقيلة في الميزان صلو على محمد وآل محمد 💙

بارت خفيف على كد تفاعلكم 🫰

هسة خلوني اصمم على هذا البارت والقبلة وبعدين ارجع اكتب البارت البعدة واقرا الكوزات التراكمن علية 😂

توقعاااااتكم اكيد احب اشوفها ❤️‍🔥
طبعاً جنت نايمة لان كهرباء ماكو لكبتها مشتعلة كلت خل انشرة 😔