رواية المنجمة الفصل الثاني وثلاثون 32 - بقلم كفايه

﷽

#المنجمة
الكاتبة _كفايه

لاتنسون متابعة الحساب
التصويت والتعليق بين الفقرات لطفاً 🧡

ياعلي مدد ♕

‏أمَس مَا مريت بيّه
راح أتانيّك اعله باچر
أخاف بَاچر مَا تجينِي؟
عگبَه منصُوبه الچَوَادر .

________________________________

_ميس:: طلعت من شقتي ايدية ترجف واحس راح انفجر من العصبية صعدت بسيارتي حاولت اهدي نفسي بيه بيه ماتحملت وانفجرت اكسر بالسيارة بيدي فتحت الباب ورجعت للشقة خلص بعد ماكدر اتحمل كلشي الا متى متحملة هالمهزلة فتحت باب الشقة ودخلت لكيتة كاعد بيدة تليفونة وكفت كدامة وبعصبية حجيت  .

_شوف طارق من الاخير انت شنو غايتك من هذا الزواج؟

_طارق: كتلج ماعندي غاية

_ماعندك غاية  !!! تجذب على منوووو هاا؟
انت تزوجتني حتى استلم الشركة مالت بابا وانت تصير المدير وتسيطر على الوضع

قاطعني:: كل ما بالموضوع اريد ارجع للعراق لا اني ولا انتي عاجبتة العيشة هنا اهلي واهلج هنا شنو يصير لو رجعنا نستقر بالعراق؟

_ارجع للعراق مايهمني وشركة بابا من سابع المستحيلات اقنع ابوي تشتغل بيها لان اعرف شنو غايتك عبالك ماسمعت من تحجي وي هاي النعالة ام شعرررر الاحمررر وين ماتروح وياك بحجة صديقتي

فارت اعصابة وكام يصيح
_لاتضلين تصيحين ترجعين للعراق ونشتغل بشركة ابوج انتهت السالفة

_ماااااا انتهتتتت وباحلامك

ماحس الا ضربني راجدي دار وجهي صفح لزمني من شعري تكطع بيدة واني اسحب بيه بقة يغلط ويسب طلعت نفسي منه ودخلت لغرفتي قفلتها علية وهو يضرب للباب اتصلت بابوي فوراً جاوب وهو صوتة بعدة عالي ماحجيت شي وخليتة يسمع تهديدة وعيدة الي من البداية اني تسرعت بهذا الزواج بس ماتصورت راح يطلع بهالفشل والجمود كلت ممكن يحبني وينسيني كلشي بس طلع العكس

بارد، مهمل بجميع واجباتة وياي حسيت ماخذني لغاية بس ماعرفت طمعان لان اني الجبيرة وابوي ماعندة ولد جبير ويريد يقنعني حتى نرجع ونستلم مكان بابا لو جان انسان زين ويحبني ومتهم بيه وابن حلال وافقت بس هو ابد مو هيج يجي
تالي الليل سكران وماعرف وين جان لعبانة روحي منه وميتة ندم على الساعة الغبية الوافقت بيها على الزواج   .

حجة ابوي بقلق وكال
_شكو بابا شنو صاير؟

_سمعت كلامة ويتهدد يريد يضربني
هسة اني قافلة الباب علية منه
كوة طلعت نفسي من شعري تكطع

حجيتها وبجيت ماتحملت عرك عرك مشاكل
وحدي محد يمي المن اشكي واستحي حتى احجي لان هذا قراري  .

_ميس بابا اجيج لاتبجين فدوة هسة اخابرة واطيح حظة وحظ اهلة

_طلكني بس طلكني لعبت نفسي منه
ماتعرف شنو من بشر هذا تالي الليل وي النسوان
يتخشخش بس طلكني اترجاك والله اني متندمة وكارهة نفسي لان وافقت

_سهلة بابا اهدي بس اهدي ولا تطلعين من الغرفة بين ماحجي وياة

طفيت التليفون شوية واختفى صوتة لميت غراضي بجنطة وكل مستمسكاتي اخذتهن انتظرت شوية طلعت ما موجود يمتها انوجد وكعد مثل البشر سحلت جنطتي خليتها بالسيارة وشغلت اتصل بابا جاوبتة  .

_حاجيتة بابا ورزلتة يكول شغل بين متزوجين
عاد اني ماسكتتلة كتلة الايد التنمد على بنتي اكسرها وكلمة وحدة اخلي الشرطة التركيا تسحلك وجيب اليطلعك

_هاهية عاشت ايدك اني طالعة بعد مارجع
واتمنى منك اذا تحبني وتريدلي الخير تطلكني
وتخلصني لان هو ماخذني على طمع

سولفتلة عن كلامة وياة وكل تصرفاتة وطلعاتة
السكاتة عنهن واكول بلكت يتغيير وينعدل بس ذيل الجلب يبقى اعوج طفيتة من بابا وخابرت نجوم
ردت صوتها ناصي:: جنتي نايمة مو؟

_اي
_عفية عليج كعدتي من النوم رجعتي تنامين

سكتت ذبيت حسرة وكتلها
_حضري نفسج نطلع

سديتة منها وصلت بقيت انتظرها جوة اجت تمشي الابتسامة مختفية من ملامحها وحتى مشيتها ثكيلة مال واحد مالة خلك كلشي وين جانت تطفر وتضحك للهوى  .

_وين طالعين لو عايفتني نايمة مو احسن

_ماشبعتي نوم خزنتي امشي نفرفر على كولتج
طالعة روحي

_شكو وجهج احمر
_الحيوان ضربني

_كسر بيدة كون لو كواكب هنا الا جبتها علية
اخليها تشرح ايدة مثل مادجت سراج وطكت ضهرة بالسجينة من الطول للطول

_والله اشتاقيتلها واول مارجع
اخذج الها حضري نفسج نطلع

_منو كال اريد ارجع أصلاً؟

_شكو حبيبتي سالمين شو مجلبة هنا
على شنو باقين اني وراح ارجع

_مالي غرض بيج اني هنا وي خالي
ماعندي غيرة وهم ماريد ارجع للعراق

_نجوم اتخطي كافي ليش تبقين عايشة بذاك اليوم

_كل ما اكعد وحدي ارجع اتذكر واختنك واني كاعدة ارجع انام اتحلم بالصار وافز مكطوع نفسي
شلون اتخطى والصار بحياتي مامتوقعتة ولا انسى
اني ضحية لحقدهم وعداوتهم  .

_حاقدة على فقار لان تعتقدين الصار بسببة

دارت وجهة وهزت راسها اي
نزلت دموعها من كلتلها  .

_لج الرجال شعلية يعرف بيه مخلي عينة عليج هالنكس، حتى مايعرف خاطبج يمكن لو عارف زيد يريد يخطبج ماقبل بس هو انصدم راح ورجع لكاج على ذمتة شيسوي نجوم فوك حركة كلبة محملتة السبب

_ماريد اسمع بطاريهم اسكتي

_لا اسمعي كافي لهنا وحليها
ديربالج تضلمين فقار بتفكيرج الرجال
لاتجاوز وياج بشي ولاحجة كلمة وحدة مو زينة حافظ عليج وماتقرب للحرام وهاي من شيم الرجال يكدر يحجي كلام معسول حتى يبين حبة بس ماسواها لان هالشي رخيص وعدكم كمسلمين حرام ليش تلومين رجال مايتقرب للحرام؟؟

_كافي ميس لاتذكريني اريد انساهم

_هسة انتي من قافلة تليفونج وماتردين علية
شنو يسمونها نجوم ليش تحقرين وتقسين كلبج الماكو احن منه شوفية شنو يريد شعندة من حجي
والله عيب عليج ابد ماتوقعتها منج يعني كل يوم يتصل بيه ويسال عليج وانتي ولايمج
تعرفين زيد لحد هسة مامداوم من ورى السواة بيه
وشنو خسرو من صفقات علمود يتنازلون ويطلعونة
لو تعرفين شكد انسجن كل هذا لخاطر منووو غير لخاطر عيونج  !

_بس هو حباب ما انساها
ولا انسى كلشي سواة بس هم ماريد ارجع
واباوع بوجوهم بعد الصار وياي كل ما اتخيل شافوني بذاك الحال والله اموت من القهر والفشلة

خفت عليها لاتنهار بعدة جرحة جديد وهي كلش حساسة والصار مو هين بنية تكتشف الرجال اليريد يتزوجها ماخذها حتى ينتقم من الشخص الماتعرف بيه يحبها أصلاً  !

انطيتها كلنس تمسح عيونها وشغلت اغاني نطلع من الجو طبكت السيارة بالكراج ونزلنا نتمشى يتصل طارق قفلتة مااجاوبة لو يموت ولاارجع بعد واخلية يشوف شكلي  .

_وين رايحين
_ميس: انتي مو تردين تشوفين الممثلين الاتراك

فتحت عيونها بفرح وابتسمت ملامحها لزمت ايدها
_صدك ميس نشوف ذني الحلوات اليمثلن

_هههههههه ماعرف بس المنطقة المثلو بيها مسلسلهم الجنا نتابعة سوى هي هاي

فرحت من كلتلها هيج ومشت بيه سريع تتلفتت بكل مكان وتضحك مامصدكة   .

_باعي ميوسة شلون قديمة وحلوة
هنا البطلة تطلع من بيتها للشغل وتلاكي البطل واكف منتظرها يباوعلها ويدخن

مشينا وحدة تذكر بالثانية احداث المسلسل ونضحك نسينا كلشي ورجعنا من جنا قبل ماعلينا هم كل همنا البطل والبطلة خربت علاقتهم

_نجمة: اكلج خل نسال ذني النسوان عن المسلسل
اوكفي احجي،، هلو خالة شلونجن شخبارجن احنا من العراق وحبينا نسال هم الممثلين بعدهم يجون لهنا لو انتهت وي المسلسل هسة حتى لو انتهت
مارجعو يتذكرون المشاهد سوى

سحبتها علية النسوان مافهمن شي بس العراق
_نجمة: دحجي وياهن بالتركي اني ماعرف

ماكسرت بواهسها وحجيت وياهن بالتركي نص الكلام الكالتة حتى مانصير الهن مضحكة هزت ايدها العجوز وكالت بالتركي

_ذكرتيني بايام المسلسلات يابنتي راحت
بزمنها

_نجمة: اكلج هاي شكالت

ترجمتلها ومشينا هواي صارت نجوم كل ماتشوف بيت كالت هذا بيت البطلة فلانة وهي جذب بس مصدكة بسرعة صار الغروب وضلمت الدنيا اشترينا اكلات سريعة من اهل العربانات ونجوم حبت تجرب المحار ومن اخذتة ما اكلتة اخذت وعصرت علية ليمون اكلتة تباوعلي عافسة ملامحة فتحتلها وحدة كوة جربتة انوب سكتت لا كالت طيب ولا مو طيب رجعنا بس اني وين اروح  حتى شقة ماحاجزة  .

_نجمة: مو بعدكم متعاركين ترجعين
_يحلم الخايس ارجعلة ويشوف شكلي
هسة يرجع سكران ويعبي البطل براسي

_امداج ماتصيرين مرة وتسحبين سجينتج علية تخلية يرجف منج

_نجمة تعرفين هاي السوالف مو جوي
_هسة وين تروحين باتي يمنة وباجر لو ناجر شقة لو ابوج يجي

_يجي يطلكنا ماروح اذا ما اتطلك واخلص
_والله احسن خيولي اني من اجيتج بس يباوعلي

_حتى تعرفين ليش اجيج اني ما اخليج تجيني
_يعععع قذرر شبيها هاي الزلم شكد قذرين
هسة انزلي وياي يلا

_خالج خاف مايقبل لو مكانكم ضيك انام بالسيارة اقفلها بين مايطلع الصبح

_دنجبي وانزلي

راحت قبلي دكت الباب فتحتة مرت خالها تسال بيها وتكرص بخدودها اندارت صاحت علية
_ماتجين

مرت خالها رحبت بيه انسانة كلش محترمة بقيت الليلة يمهم بغرفة نجمة ومرت خالها اجت ويانة كلساع مسوية اكلة شكل حقها نجوم ماتعوفها لان صراحة ماكو منها  .

طلعت نجوم وفتحت تليفوني هواي اتصالات ومكالمات اول شي سويتة حظرت طارق حتى بدون ما اشوف مسجاتة ابوي متصل ومراسل طمنتة اني بخير كاتبلي باجر يمج وهالشي ريحني
اخر شي شفتة فقار مراسل يسال عن نجمة مثل كل يوم دخلت هي تضحك  .

_نجمة: خل نطلع المسلسل ونشوف نفس المكان لو يشبهة

طلعت المسلسل قديم كلش من جنا بالاعدادية شفناة بقت تذكر ايام جنا نسولف بيهم وتضحك فتحت بصمة وصوت ضحكتها عالي هي ماتدري مندمجة بية دزيتهن لفقار بسرعة شافهن رجعت دزيت هي تسولف نزلت عيوني كاتب

_اروح فدوه لضحكتها

بعدها مادز شي ولا اني لثاني يوم اجة طارق للشقة يريد احجي وياة تفشلت من الناس طلعت ماحاجيتة صعدت سيارتي وصعدت بدون لا اسمعلة صوتة نشحط يهدد مايطلكني ويحجي بكيفة شغلت بسرعة وخابرت ابوي كال وصلت رحت تلكيتة وبعد سلام وكلام تواجهنا اني وطارق وصارت بينهم مشاحنة ورادو يتضاربون
حجز ابوي شقة وكعدنا اسبوع بهذا الاسبوع ابوي يمشي باجراء الطلاق ووكل محامي شاطر ماجان عندي دليل على خيانتة راسلت جلبتة
وكتلها..

_اني اطلع من حياتج بسهولة ويبقى بس الج
بس اريد دليل على هو يخوني حتى ما نتاخر بالطلاق

بعد كلام دزتلي ماشفتة بس دزيتة للمحامي لان اعرف شنو بيه بفترة قصيرة تطلقنا غصب عنة ماجان راضي ابد واخر همي لان اعرف شنو مصلحتة لو عفتة  .

انتهت مسيرة اغبى قرار اخذتة ورجعت محملة اثار نفسية الحمدلله طلعت منها وخلصت حاولت ارجع نجوم وياي للعراق بس رفضت وتريد تستقر
بتركيا بابا كللها اذا ردتي شغل ادبرلج وهي وياة على تواصل علمود الشغل  بقت .

_شهب:: رجلي كلش مضوجتني اريد امشي افتر ماكدر من وراها من الصبح كعدني قبس وراح كال للعشرة ارجعلج حضري نفسج طلع ورجع جاي الف بشعري دخل يباوعلي  .

_مو طلعت شكو رجعت؟
_عبالي رجعتي نمتي
_شنو السالفة غير وراي مراجعة

_يامراجعة يا دنيا النوم عندج اهم من كلشي
_اتفق

_تريكتي بعدج؟
_بعدني

_يلا نازل اجيبلج واجي

طلع من الغرفة مشيت بعكازتي وصلت للكنتور طلعت ملابس بدلت وهو بعدة ماجاي لبست كب
دخل جاب الميز وخلة الصينية علية ومن ترتيبها تفتح النفس بيض سلك مسوية شرايح بيض طك وحدة زلاطة حليب واجبان وصمون زيتون
ماياكل اذا مايرتب هيج سحبت الصينية اكل مد ايدة ياكل وياي..

_اني ذني ما استنضفهن صايرات يطبخن
الريوك جهزلي صينية كتلهن ما اشتهي واني ميت جوع

_يعني رجعت علمود الريوك وهذا سويتة علمودك مو الي

خزرني واكل
_شهب: عبالي حنين وتسويلي

_ليش هاي اول مرة اسويلج؟

سكتت ماحجيت صدك هو دوم يسويلي مرات مااكل يفتر ويروح يسوي من وحدة ويجيبلي اكل رفعت عيوني من كال  .

_احب اكل بالبيت واحب اكل وياج

كملت اكل اخذ الصينية ونزل الصاية صايرة ضيكة علية صايرة سمينة كلش من الكعدة وهاي الصاية الوحيدة الارتاح بيه واطلع باوعت لنفسي بالمراية ونزلت دموعي هو اني جان جسمي مليان هسة زايدة وزن من دخل مسحت عيوني بس مبين باجية وجهي احمر التهيت اكلب بالصايات العندي نصهن الوان وذيج هم نفس القياس لزمت اعصابي عن لا انهار  .

_شبيج سنجوبة

ماكدرت احجي الغصة بلعومي رفع راسي يباوع بعيوني:: عليمن تبجين فترة قصيرة وترجعين تمشين

_مو هيج
_لعد شنو الهيج؟

رفعت الصاية بيدي ومسحت دموعي النزلن
_صايرة سمينة ماكو شي يكفيني هسة بيش اروح كلهن ضيكات علية

_وعلمود هاي تبجين هسة اشتريلج
عشرة منهن

_ماريد اروح صايرة سمينة وشكلي يضحك
هو هيج كوة امشي اخذني لخبيرة تغذية اريد اضعف خل يكتبولي مانع شهية وجدول

_من كل عقلج وينج وين السمن

_تستهزا بيه حضرررتك هذا كلة وتكول مو سمينة  !!

ابتسم واني دموعي تصب دفعتة مجلبلي رفع راسي يكلي:: دبوب شبية الدبوب غير يخبل
والعالم ذابحة روحهة علية دباعي الخدووود

جر خدي ضربت ايدة
_وخررر بس وخرر حتى اخدوي صارن كبار
بس تسحب بيهن

_مو قبل شوية تكولين سمينة هسة صارن كبار من المط ليش الجذب ليش مو من شفتج وشفتيني خدودج صاعدات

_وولي وليي انت بس تضحك علية
والله الا اضعف واضعف وجهي بسيطة

_حتى احبسج بغرفة بيها اربع ثلاجات لمدة شهرين
كلشي ماعوف يمج بس اكل وحلويات واخليج
ترجعين سمينة

ضحكت بين دموعي اتوعدلة
_مو بكيفك والله اضعف وهاي الثلاجة
اشمرها من الغرفة انطيها لدراهم كلة من وراها
خلتني سمينة

_خدوود خدوود كرش كرروش

جعص بطني اني بيا حال والله مقهورة وهذا عاجبة الوضع سحبت روحي منه وطلعت
اروح لغرفة البنات بعدني ما داخلة لاكتني ولاء ابتسمت واجت تركض  :: هلو شهوبة ام خدود

_هلو

كلتها ومشيت ادخل هسة بس يشوفني قبس يطلعها سم علية عبالك رجال مو بنية
دخلت للغرفة فارغة البنات ماكو ولا وحدة
حتى ماكدر اطلع رحت لكنتور وردة ادور على صاية عريضة والباب انطبك التفتت شفتها هي واكفة ورة الباب ونظراتها وابتسامتها تخوف
صارت، ما هتميت ورجعت ادور بملابسها كعدت اكدر فوك ملابسي اجت يمي تساعدني وايدها تطخ بحسمي رفعت عيوني خزرتها  .

_يلا البسي ايدج منا
_اني اعرف اللبس شكراً

كعدت تباوعلي من شفت نظرتها لصدري الطالع غطيتة  .

_شبيج مستحية ترة عادي

مارديت عليها يمكن هالصاية تطلع على قياسي
رفعت عيوني الها من كالت  .

_انتي مو كلتي راح تطلكين ليش باقية يمة
هو مبين يحبلة وحدة خيولي مايفيدج

_لا تدخلين يسمونها امور شخصيةة
_منو سولفلي غير انتي هسة صارت امور شخصيةة

_غير صديقتي عادي شكتلج هو انتي سئلتي وجاوبتج ماكتلج هواي بس العركة

خلت ايدها على فخذي تجعص بيه نترت ايدها
_عوفية تطلكي الزلم مابيهم فايدة
هسة اني مو تطلكت

كطعت كلامها واصفر وجهها من سمعت صوت قبس يصيح كامت طفرت وكالت بخوف
_اني راح ادخل بالحمام مو دكولين اله اني هنا

هزيت راسي واخذت الصاية هاي شبيها كمت ودك الباب فتحتة وطلعت حجة وراي

_اشتريلج صايات اروح؟

_لا نتاخر بعدين

بين ماوصلت فحطت بدلت على السريع ونزلت وياي خطوة بخطوة وياي ينزل الدرج ولازم ايدي خاف لا اطيح امير جلب وياي يروح اخذتة وردة
تكلة:: نلعب غميضان ونروح وياها

طلعنا للدكتور صفنة تاخذني وصفنة تجيبني مقهورة على جسمي حجيت:: تاخذني لخبير تغذية

_كافي حبيبتي مايحتاج أصلاً انتي مو سمينة بس متروسة

_لاتجذب سمينة قابل اني عمية وما اشوف
_فحطتيني شتردين تصيرين سلبوح مهلسة تهلس
هم راد لحمة

_يلا اسكت اني هم صوجي احجي وياك

شكد حجة بعد مارديت عليه وصلنا للدكتور فحصنا وطلعنا كال العظم متلائم بس يحتاجلة بعد  .

_شفتي الحليب الاسوية الج ماطاح بالكاع
لو ما الحليب ما التئم كلاص الصبح كلاص
بالليل

_هسة تعيرني لو شنو

_صايرة تغثين اعضج عضة هم ما ارتاح امشي يلا

صعدت جابلي مي فحطت شمس وحارة
واني كوة امشي حرك وطلع نسيت سالفة الصاية بس تذكرت من طبك كدام مجمعات ملابس نزل فتحلي الباب ساعدني انزل واخذني لازم ايدي من الصفحة الثانية لان امشي بعكازة وحدة اخر فترة

دخلنا المجمع ملابس نسائية اسود والوان عندي هواي ملابس بيت بس اريد صايات عرضلي الصايات العدهم ماعجبتني طلعني لمجمع كامل مختص بالعبايات والصاية بقينة بالنص ساعة
يلا اخذت وحدة كاعدة اباوعلة يكلب بيهن ويطلع يباوع بالحجم ويرجعهن بيدة ثنين لازمهن منا ومنا عرضهن الي وكال...

_شنو رأيج بذني

انصدمت بذوقة شكد نازك ماعبالي يعرف نسائي
_قبس: شنو نوع القماش هذا؟

بقة يسال بالرجال ويشوف القماش اخذهن على قياس الاخذتهن كمت كال:: بعد تاخذين غيرهن

_لا ماريد هذني هواي

طلعنا وسألني
_بعد تمشين تشترين ملابس
_لا عندي ماريد هسة امشينا

صعدني بالسيارة وراح ما انتبهت لان جنت اعدل بشالي انتبهت للجامة اشوفة طلع من المحل بيدة علاليك صعد وخلاهن يمي كال...

_ذني بعدين شوفيهن مو هسة

بقة عندي فضول اعرف شنو بالعلاكة مافتحتها رجعنا طبك على محل مثلجات وهو بالسيارة حاجة الولد كلي:: بيا طعم تردين؟
_بكيفك

خزرني بقوة تذكرت، من كال اختاري بنفسج بسرعة حجيت،:: اريد من كل الالون

گال للولد وانطاة فلوس جابلي عبلة حجم جبير كل الالون اكلت ماقبل ياكل  .

_تلعب نفسك ماتاكل لو شنو؟

_لا ماحب الحلاة

_يعني ماتلعب نفسك من اكل برا
_طبعاً ما اكل من كل مكان اكو مطاعم نعرف نضافتهم وهما شنو يلا ناكل وهاي تقريباً كلنا هيج

_هو اكل وكل الناس تاكل وحد انتو

_وسواس النظافة عند الكل

رجعنا للبيت نزلني انطيت الموطة لامير وصعدني للغرفة نزل جاب الغراض خلاهن على الجراباية وكف كدام المراية جدد العطر  وكال  ..

_رايح للشركة محتاجة شي
_لا

من طلع اجتي نيزك راويتها الصايات كالت يخبلن
شلت وحدة وانطيتها الها:: شسوي بيها يمعودة
البس عباية بعد خليني متعودة

حاولت وياها لان تلاثة هواي واني عندي غيرهن
سحبت العلاكة الجايبها فتحتها اشوف شبيها
طلعت اول قطعة  تراك ستن لون اسود نص ردن
شكلة كيوت حتى نيزك حبتة وبعد دشداشة قصيرة
وثنين دشداشات وشالات وياهن وقميص نوم طافر هذا وين على كدي شمرتة بعلاكتة فوك الكنتور ونيزك تحجي علية...

_انتي ماشايفتة يضحك علية يريدني ابقة سمينة
حتى باجر يكولن ايععع هو رشيق ويخبل ومرتة جنها دبة حميسة

_انتي بس خففي حلويات وعلس وانتي تضعفين

_كلة من ورة الثلاجة خل كواكب تاخذها لدراهم

وبس طلعت فتحتها اكل ماكدرت جعت وضليت ابجي لان اكلت انوب كلت يلا من باجر ابدي بالرجيم  نمت وكعدت العصر على صوت البنات صوتهن عالي يضحكن اني فوك نادراً ما اسمع الهوسة جوة الفوك هادئ  .

كمت سبحت وبدلت كعدت كدام المراية اتعطر وارطب واسمع شخص ينضرب بقوة وصوت ونين انخمش گلبي اخذت عكازتي وطلعت حتى مالبست شال فتحت الباب طلعت راسي باوعت منا ومنا فتحت عيوني بوسع من شفت دعاء لازم اختها كاتمة صوتها وصايرة كدامها تضرب بيها بقوة وذيج بس تون وهاي تسب بيها  اسمعها تكلها  .

_ولج طايحة حظ راح نخسر الاول والتالي من وراج بس اصبرلي تكمل سنة ماتصبرين
ذولة يسكتون يموووتونج مووت من يدرون بيج
تحبين البنات

شعر راسي وكف وي هاي كلمتها دفعتها بقوة من يمها دعاء فحطت وجهها احمر انهدت عليها تضرب بيها وتكلها بصوت عالي  .

_ولاء:: انتي شعليج بيه شترردون
هي ماتحاجينييي اني عجبتني
باقية وحدها مريضة ورجلها مو بحالها

عصرت حلكها بقوة خنكتها تكلها
_دعاء: وانتي شعليج بيها شعليييج
هي نفسج طايحة حظظ بنات ملتزمات
هي معاقة وتصلي لو ك** مثلج
سكتت عنج بس هاي تجيب اخرتنا لان مو من صنفج

ضربتها بقوة ودعاء رجعت الضربة كسرت اصابعها
_دعاء: باجر ترجعين لبيت عمي لا اطيح حظ حظج

_مو بكيفججج ام الزلممم صايررة شررريفة
برااسي كل يومية مصاحبة واحد وقاطتة

سحلتها بقوة واخذتها للحمام دعاء اضخم واقوة منها راح تكمل عليها بالضرب سديت الباب راسي انسطر ذني شنو من بشر هسة يلا عرفت ليش قبس يكرهة جنت اشوفها بنية فقيرة وحيدة ماعدها صديقات لان مطلقة هيج طلعت ورة فترة اندك الباب من سمعت صوت نيزك كمت نيزك كلشوية تجيني تشوفني شنو محتاجة  .

_شلون صرتي؟

_نيزك: نفسي تلعب وطالعة روحي

طلعتلها عصير، وجبس فتحتهن تاكل وسولفتلها الصار بقت فاتحة عيونها بقوة وتضرب، على رجلها

_نيزك: هسة لو نزلت وفضحتهن منو اليصدك حتى دليل ماعندي خيولن برابيك ديربالج تحجين وياهن
لو تباوعين بشكلهن

_لا يمة بعد من اشوفها اشرد مخبلة

للعصر كلش اجة قبس جنت اتابع برنامج من شفت الكارتونة البيدة طفيت التليفون وبقيت اباوعلة عافة على الميز وطلع ملابس راح سبح رجع ينشف يشعرة واني عيني على الكارتونة سحبها وكعد يمي باوعلي وابتسم صفح  .

_شعندج تباوعين هنا

رفعت اكتافي بماعرف
_هيج بس شنو بيها اول مرة تجيب كارتونة

_هاي الج مو الي

رفعت حاجبي بتعجب وانصدمت اكثر من فتحها
وشفت بيها كتب اول كتاب شافتة عيني احياء الثالث متوسط جمدت ماكدرت استوعب هاي الكتب الي طلعهن واحد واحد كلهن جديدات بعدهن بدون جلاد:: اسلامية، قواعد، ادب، انكليزي

يعدد واني عيوني ماترمش
_قبس: من هسة بلشي ادرسي وبس تمشين داومي معهد اذا مايفيدج وتفهمين علية اخليج بمدرسة اهلية وتمتحنين على الخارجي

هو يحجي واني دموعي نزلت ماحجيت شي بس حضنتة وگلبي يخفق بجنون معقولة راح يتحقق حلمي واكمل دراسة واتخرج  !

رفع راسي مسح دموعي وباسني بكصتي
_اول ماطلعنا وحجيتي عن الدراسة كلت
وعد اخليها تكمل دراستها وتدخل جامعة
حتى لو ما استمر زواجنا احقق حلمها

____________

_نيزك: اجة ضرغام من شكلة عرفتة صاير نار ماتقربت منه راساً صعدت لغرفتي اني هم مالي خلك وتعبانة من الحمل مابيه حيل روحي  .

تمددت انام غفيت وانفتح الباب احس الغرفة انكلبت طفرت من النوم مفزوعة اشوفة يكلب بالاخشاب والغراض وصوتهن عالي يطكن بالكاع
واني بمكاني صحت بيه...

:: شكوووو انقلاببب
كسرررت الغررررفة ماتشوفنييي منطمرة شررايد

بصوت يلهث ومستمر يكلب بالغراض ويكسرهن
صاح بيه:: اسكتييي صووتج مارررريد اسمعة

كمت من مكاني استفزني وصرت ناررر
_طراطيرررر كاعدين هنااا تجي تطلع سوادينك علية البيت عايفة  ومخبل وراكبك جني بس ويااااي

_هسسسة شتردين غرررفتي واكسررر بيها
مشتريتها من فلوسج؟

_لا والله غرفتك صدك كسر براحتج

رحت للكنتور وهو ملتهي يشتغل ويفصخ
طلعت جنطة لميت ملابسي وملابس امير بعد طاقة وصبر ماضل عندي صبرت هواي ومكان مابقالي هنا
لفيت شالي نزع تشيرتة والوشم صار بعيني
تاريخ زواجنة تاريخ عيد ميلادي تقربت منه رفع
راسة عيونة حمر وشراين ركبتة ناطة اشرت على الوشم وكتلة...

_انت دكيتهن لان تعرف راح اصيرر ذكرى بحياتك
دكيتهن ماردت تنسى اول ليلة النا سوى
ولا ردت تنسى تاريخ ميلادي من يصير احتفل
بيه وحدك وماراح تنساني اوعدك

خليت عيوني بعيونة وابتسمت عكس مضهري اليرجف:: قوافل من النسوان ما تنسيك عيوني
خليها بالك  .

كلتها وانداريت انطيتة ضهري رجع يكسر سحبت الجنطة ونزلت البس بعباتي اخذت امير وكواكب اول ماشافتني فزت اخذت امير واشرت بيدي نطلع
اجتني تتفحصني بخوف  .

_شبيج ضربج؟
_لا امشينا

_ذهب: وين حبوبا رايحة بهذا الوكت

ماحجيت شي مشيت اسحل بكواكب حتى شهب مارحت وكلتلها بس. اريد اطلع اختنكت كلهن يحجن ماسمع كلامهن وشة صارت باسمي بس اميز صوت كواكب عالي ولحكتني سهلة وذهب طلعت مجلبات بيه...

_نيزك: كواكبب ما ابقى اكعد بالشاارع والله هسة تاخذيني

_ذهب: حبوبا وين ترحين خالج ومو هنا

_هو استحكرتونة خالي وخالي
وباقين

صحت بكواكب بس احسها ماريدة تطلع ولا احترك دمها من شافتني صايرة نار اخذتني على صفحة بصوت ناصي تحاجيني  .

_كواكب: بس اليوم ابقي
_لج انتي صدك تحجين هسة المفروض تطيرين بيه طيووور

سكتت ماردت عفتها وطلعت البيه مكفيني
اجت وراي تحجي بخفوف  .

_كواكب: هسة وكتج درجعي على باجر
روحي

عفتها ومشيت ولو يكولون بس تطلعين من البيت تموتين اطلع مشيت لحكتني صاحت على علي هستوة اجة اخذنا لبيت دراهم وهاي اني الاكرة بيتها واكرهة وماحبها ابقة يمها ولا هالذلة مسحور سحرة بس علية يطلع لعبت روحي من كلشي
وحتى دراهم من شافتني تعجبت ماحجت شي ولا اني حجيت شي وياها طلعت مختنكة اذن الاذان اريد اصلي هنا ماكدر من شافتني كواكب هيج حضنتني  .

_ماكدر اكعد بيتها كواكب اختنك من بيتها شلون ابقة وياها نفس الغرفة وماكدر ابقى بيتهم اطلع بالشارع احسن

طلعت بالشارع بهذال ابهذل بروحي بس مو بيدي اريد بس ارتاح بنفس اللحظة شخطت سيارة ضرغام ونزل بسرعة خفت من شفتة اخذت امير ورحت اركض ودموعي تصب وهو يمشي سريع ويصيح اوكف ماوكفت ماردت اسمع صوتة
احس وحش يركض وراي وكعت على وجهي واحس بطني تكطعت بجيت من الوجع وزدت اكثر من لزمني اسحب بروحي واصرخ منه وكواكب تدفع بيه اخذتة ماعرف شتحجي كمت اخذت ابني
نمشي وين ماعرف عقل ماضل براسي كواكب تركض وراي واحس دم نزل على رجلية رفعت ثوبي ومن شافتني تخبلت صاحت على ضرغام

_كواكب: تعاال الحككككك اخذهاااا للمستشفى الطفل راااح

اجة يركض مصدوم يصيح بيها ياطفللل

_كواكب: ولك حامل راح تسقط

اخذوني للمستشفى ابجي على حضي اكثر من الوجع حالوني على دكتورة نسائية وفحص وسونار
تالي ماحسيت غير الكانولة بيدي والمغذي مشكل
كواكب كاعدة يم راسي وبس شفت ضرغام اشرتلها يطلع طلع بدون مايرد  .

_كواكب: شلونج خو مايوجعج شي
_وكع

حجيتها والغصة بكلبي ماجان على بالي هذا الحمل رغم هذا فرحت بية  .

_كواكب: لا والله ماصار اسقاط بعدة بطنج
لاتخافين

اخذت اموري بوستة ورجعت نمت
من كعدت رادو يطلعوني كتلها ارجع لبيت دراهم بس ترجعيني لضرغام اشمر روحي بالشارع

_لا ماخذج اله بس امشي وياي

طلعنا امشي على كيف ضيغم لاكانا راحت كواكب تحجي وياة وتفاجات من اخذنة بسيارتة
وضرغام اختفى خليت راسي على الجامة وغمضت
اسمعة يكلها  .

_ضرغام هذا مخبل بس لايتخبل عليهم
ويخرب كلشي

_كواكب: كلبي يوجعني اسكت

من وصلنا كعدتني نزلت اتفاجات هاي احنة وين
اخذتني تمشي بيه:: وين جبتيني؟

_هذا المكان فارغ بيت بوسط البستان لضيغم ماجرة بعدة من زمان ضلي بيه على ما تصفى

دخلت كالت تمددي على ضهري خلت مخدتين وطلعت  .

_كواكب: خليت ادية على راسي وعقلي راح لبعيد واكفة والف فكرة تجيني احسن شي صار جبت نيزك عنها بين ما تدبر هالفترة اجة هو محمل مسواك تلكيتة:: المن جايب هالكثر صدك تحجي

_جبت عشة الكم
_متزوهرة اني
_مايصير اكلي حتى لو شوية واختج وكليها جبتلها معلاك ومشويات

_اخ ضيم ااخ ماعرف شحجي وياك اوكف انتظرني مو تروح

اخذتلها العشا كعدت يم راسها اسويلها لفات ولابنها قبل لاينام..

_نيزك: عيب من الولد كواكب مو هيج
_هو خوش ولد شعليج بيه خل يخسرر

_دكلي ماعرف اكل

اخذت تاكل اكلت شوية وسويت لفة جبيرة برغيف خبز من كلشي:: بعدة موجود هنا
_اي طالعة انطية هسة تلكينة ما ماكل

اخذت بطل لبن ومي رحتلة لكيتة واكف ويدخن
بخفة ايدي سحبت الجكارة منه بقة خازرني

_دكل هاك يلا صير سبع ورانا شغل بالليل

فتح عيونة ودنك راسة
يريد يحجي عرفت نيتة ضربتة على صدرة
_خايس عقلك وين شطح ولك اقصد على السحورة وبس اخلصهن اطلع من بيتكم وحياتكم

_عبالي كلت تطالب بليلة حمراء
_نعلاء وجرداء تسكت لا اخلي سم بالفة
هسة جبت كلشي دجيب سم

_من اريد اموت اجيبلج
_ديلا اكل لاتروح

دخلت خليت المسواك بالثلاجة وانطيت نيزك علاجها نام اموري غطتة وياها واني امشي كلتلها حتى لا اسمع ردها  ...

_المكان امان كلش كلش نامي رغد
اني رايحة لبيت عيالج شوية وراجعة

سديت الباب وطلعت وي ضيغم لبيتهم واني متاكدة هاي خطواتنا الاخيرة وصلت بوقت يكون كل واحد بغرفتة باوعلي وكام.

_ضرغام طاح كلش واخذو للنجف بدون محد يدري

_ليش طاح هيج من وحدة لو شاف شي
_محد يعرف طاح بعد
_سامعة يسبحونة ماعرف يغسلولة بصابونة ميت
_لا بالمغيسل

نزلنا دخلنا البيت فارغ كل واحد بغرفتة داخل والضوة مطفينة صعدت فوك لغرفة شهب رجعت هسة اكيد نايمين لاكيت ضيغم كال  ..

_ادخلي راح قبس وياهم
_وذهب راحت؟
_لابقت واستغربتها

فتحت بابا شهب مسدود من جوة تاخر الوقت اكيد نامت مشة وكال:: امشي لغرفتي

مشيت وراة دخلت جريت كرسي
خليت الباب مفتوح والكرسي كبال الفتحة اليمر يصعد فوك اشوفة  .

_كواكب: يلا شعندك راح اطفي الضوة

_بس اخذ ملابس

اخذ وراح للحمام طفيتة وكعدت البلضلمة يشوف البلضوة بس هو مايشوفة ايدي على خدي وهذا وقتهن يطلعن قبل الاذان بساعة او اكثر لازم
وعيوني صارت تغفي فزيت على ايد ضيغم يرفع شعري من كصتي  .

_كومي نامي عوفي هاي السوالف
_انتهت شغلتهن اليوم يسون اعمالهن
روح نام انت تعبان بس انطيني موبايلك
نحاسبهن بالقانون اذا عدنا دليل حتى فرد مرة هنا وسحارهن

بس سكتت خطفن يمشن على كيف لزمت بضيغم وكمت رجلية ماشالتني بعد:: امشينا يلا

بس راحن بدقايق صعدنا بيدي تليفونة فاتحة كاميرا لازمة بضيغم من نمشي واحد يطك بالثاني باب السطح مفتوح ونسمع صوت طكطكة خفت
يلا صعدنا نمد روسنا كاعدات ويلفن بوصلة
سندس وحفصة ثنينهن بيدهن بطل صغير جنة دم ينثرن فوك القماش ويتردد بصوت مسموع

_حفصة:: موت موت موت دم دم

رشت سندس ماعرف شنو وتكلها
_مرض مايطيب منه للموت
داء وبلاء تفرقة وتنازل عن الورث

بقت تكرر هاي الجملة الاخيرة كلة صورتة ضيغم راد يروحلهن صارت ايدة نار لزمتة بقوى مانعتة

_روح كعد ذهب وعمامك بسرعة

دفعتة ينزل ماقبل الا اني من شفتهن يقرن كلام مامفهوم دفعتة ينزل راح بقيت عيني صارت بالكامرا فتحت عيوني على وسعهن من شفت خيال ضخم اسود  بالحقيقة لو تخايلي ماعرف بالضبط ايدي رخت راد يوكع الموبايل من ايدي رجعت ليورة وغوشت عيوني رددت

" يا علي مدد "

دفعن التانكي وشالن الطابوك دافنات جواة طلعنة يخلن فوكة ماحس الا كلها صعدت فوك احس صار هجوم دورت بعيوني ضيغم دخت كوة سيطرت وانطيتة التليفون سدة وخلة بجيبة يضرب على خدي:: بيج شي

_لا لا

عفتة واشوفها كلها تصايح الله اكبررر ماكو غير هالكلمة يرددونها سندس سحلوها سحل وذهب بعصتها راحت لحفصة كسرتها عليها بذاك للغلط والفشاير ذيج هم قوية تدافع وياها دفعت ضيغم يروح يلزمها واني وذهب لزمناها ملخناها يطبها الف طوب مرة جبيرة وهيج تسوي هسة لو اسيل مو هي ذيج عاد وعقل مابراسها والغيرة كاتلتها

سحلو امهم ونزلوها ذهب تصيح هسة تطلعن
وكعدت المرة وعيني راحت على العمل اشوف اجة عدنان يريد ياخذة محد يشوفة صايرة هوسة ضربت ضيغم وصحت علية  .

_ولك الحككك

شلت العوجية شمرتها اجت براسة وضيغم لعبانة نفسة يدفع بية ما خلاة يقترب لو اخذة ماينفك بعد نزلو بقو ولد ذهب يتصايحون صحت بيهم يجيبون دراهم هسة وهما من يشوفون السحر تلعب روحهم بس ريحتة تعط وحتى لحم ماعرف هيج شي اشوف بيه فرعت ذهب تدعي عليهن
والبيت انكلب جوة سندس اخذت بناتها وطفرت
واسيل باقية تباوع للوجوة نعمان يصيح بامة ما قابل وجناينها مصدومات صاح بيهن اسامة
يلمون ملابسهم ويطلعون وعدنان يصيح بيى

_مو هييي على كيفك

رادو يتمالخون ودخل بيهم ضيغم اخذ ابوة وطلعو لدراهم ماكو مسافة الطريق ويمنا البيت انكلب هوسة اجت دراهم ورجال لابس دشداشة سودة وعركشينة سودة فوك راسة وجهة ابيض وسبحتة بيدة دراهم تصيح بالبنات يدخلن بغرفة وصتني

_خليهن يشغلن قران على صورة البقرة بصوت عالي

شغلتلهن وطلعت وراهم راسي انفجر وضيغم نزل سحلني بطريقة واني اريد اصعد صاح بية وشالني
_لج بلة صار بيج شي راح يفتحونة

_مايصير بس خل اشوف

ولا عاف ايدي لغرفتة دفعني حسيت نفسي ضاع
سد الباب اريد اطلع بقة لازم ايدي غمض عيونة
سحبني حضني بقوة صرت جوة ذراعة
وشفتة على كصتي يبوس بيها من كثر ماراسي يوجعني ماسمعت كلامة  .

ماتحرك ولا اني تحركت بقينة هيج حسيت راح اغفة دفعتة عني حجيت وياة
_خابر محامي دزلة هذا الفيديو وفيديو السحار حتى ينسجنن

_خل نخلص بهليل اخابرة

وفعلاً كعد يتصل وين يلا جاوبة اسمعة كلة
__خل يطلع الصبح

_ضيغم:طلع الصبح كوم يلا اشتغل راح ادزلك كلشي صوتيات ولي انطمر

بقة وي المحامي ويبلغلة بمكان السحار حتى تشيلة  الشرطة  طولو فوك ومحد نزل وضيغم نزع يبدل حتى ماكلي واطلع طلعت بسرعة البنات يتراجفن وصار الصبح وكلها على وكفة وحدة ضيغم كال رايح اشوف القضية ونخلص منهم هما الخالفوها

طلعت اصعد فوك  عمهم ماقبل اصعد
بس صار عندي فضول اشوف شغلهم وشلون يفكونة شنو من سحر لحد هذا الوقت ومانفتح
بس خطيت كم خطوة وتجمدت بمكاني على صوت هز البيت هزززززز  .

يتبع....

_________________________

الللهم صلِّ على محمد وآل محمد

البارت مو طويل
جنت بالمستشفى تاخرت يلا رجعت اكتب
هسة تتوقعاتكم

باجر  نتناقش بالبارت
🧡🧡🧡