رواية المنجمة الفصل السادس والعشرون 26 - بقلم كفايه

#المنجمة
الكاتبة _كفايه

متابعة الحساب لطفاً
اعرف بيكم ماتعلقون على الفقرات
بس صوتو 🗿

يا علي مدد ♕ .

مُطرت سمانا باقي
بَس لُقانا
وَشوارعنا ماليها المُطر
ما بُقى الا حُضنك
والعُطر .

___________________________

المطار الساعة السادسة صباحاً
عدلت سترتي وعيني على الجواز البيدي والحقائب التمر تطلع صوت وهمسات بين المسافرين
تعلى بين الحين والاخر مديت ايدي لزمت ابن خالي
وضبيت عليها بقوة يمكن خايفة لا جذب بس متوترة شوية لان اول مرة ادخل مطار  .

تغيرت ملامحي من صارت عيني على مرت خالي تعبانة وجهها ذبلان رجع المرض عليها من جديد خالي يسولف وياها ويخليها تبتسم بين فترة والثانية لاحظت شكد علاقتهم قوية مو بس زوجة يعتبرها اجاني اشعار لتليفوني دنكت اقراه من "الاستاذ الحباب "  .

_ها نجوم وين بعدج بالمطار
_اي استاذ

التفتت من سمعت صوت النداء من السماعات غلقت التليفون مرتبكة بدون ماحجي شي و
تحركنا متوجهين للطيارة بعد اجراءات صعدنا
احساس غريب يرافقني ماعرفت اميزة كعدت بصف بنت خالي خايفة لاتوكع الطيارة بينة واكع بالبحر اشبع مي وياكلني السمج، غمضت عيوني وبالي اتذكر الاشياء الصارت اخر فترة واكثر شي مفرحني تطمنت على كواكب من شفت الها فيديو ضيغم مصورة الي جان راسها على المخدة ومخلية ايدها على عيونها وهو يسالها  .

_كوكبة شتعنيلج نجمة

ابتسمت وكالت بحنية
_ام العلوم الفطيرة والله اشتاقيت لعلومها
هههههه

_هسة هي لو تشوفج شنوتكليلها
_احبها بس كون تبطل علوم ولو سالم وانكلع بعد منين تجيب علوم

طلع وجهة الكاميرا على وجهة رفع شعرة يمشي
_ضيغم: عن قريب نجمة تعرفين كلشي
بس اطمني مابيها شي هاي كدامج حجت

ولهذا اليوم مايقبل اشوفها لو يحجي قصتها وين جانت يكلي هي تسولفلجن بالوقت الممناسب اطمنت لان عايشة وبخير طلبت منه يصورها مقطع ثاني بدون مايطلع صوتة اريد اراوية للبنات وفعلاً صورلي ودزلي جانت تسولف وحدها وتضحك لابسة تراك يجنن عليها استغربت لان هي ماتشتري هيج نوعيات بس شكيت بيه هو مشترية الها
من شافتة نيزك بجي كلبتها اخذت الموبايل تبوس بيه متتت قهر عليها تمنيت باسرع وقت ترجعلنا لان كلش محتاجينها  .

ابتسمت من مر علية شريط الذكريات ومن كتلهم راح نسافر ونعيش بتركيا شلون صارت ملامحهم جنا كلنا كاعدين نشتغل شغل مشترك واني فجرتها حبيت اشوف ردة فعلهم تالي خفت من نظراتهم كلهم مطككين عيونهم علية رفعت ايدي وكلت

_جذب مو دوم نبقة بتركيا فترة ونرجع

_فقار:بعد لاتجذبين مو حتى كلوبنا وكفت
_خل تمشي وين وكفت

خليت ايدي على حلكي اضحك وهما يخزرون بية
_سمار: حشاشة ااه ااه ااه جوي واجوائي

دنك راسة يلم بالاوراق من خزرة فقار حبس ضحكتة هذا يريد يكتلنا شنو كملنا شغل كل واحد رجع لمكانة كدامي بطل مي مفتوح وقطعة شكولاتة اكل منها شوية واشرب مي فزيت من لكيت استاذ فقار فوك راسي ابتسمت وبجدية كال

_شكد راح تبقين؟
_والله ماعرف استاذ خالي ماحدد اكطعو من راتبي
_منو جاب سيرة الراتب يا بنتي
_عبالي
_مو تطولين اسبوع واحد هواي هم
_ها
_مكانج راح يبقى فارغ وحشة عليج
_اوي صدك خلي روان بمكاني
_لا محد يكعد بيه غيرج ما اقبل
_لاعادي استاذ هو مكان
_شنو جمالة وانتي مابيه؟
_اي والقران منو ينطنط عليك شوية ويكلك استاذ شنو هذا استاذ هذا ماعرفلة وانت جنت مندمج بشغلك طب اخربة عليك

ضحك يكمل
_احلى طب بحياتي
_اي وبعدين تبقى تحك براسك محتار اطردها واخلص من شرها ونكها
_لا حشاج احتمال گملت اطردج شلون

ماتحملت ما اضحك ضحكت بالحقيقة اتذكر ملامحة بوقتها نمت بعد ما قلعت الطيارة تعبانة ونعسانة ماحسيت غير وصلنا مطار تركيا  .

طلعت تليفوني ميس تتصل بية جاوبتها واني امشي:: ها ميس ها عمري
_وصلتو نجوم
_اي هستونا
_لعد منتظرتكم بالمطار
_تمام

بين ماخلصنا مشينا مسافة لمحت ميوسة كاعدة مخلية رجل فوك رجل لابسة بنطرون جينز وتشيرت نص ردن تلعب بشعرها النص ماصدكت اشوفها ابتسامتي ملت وجهي مشيت سريع سريع من شافتني طفرت من مكانها عفت جنطتي ورحتلها ركض فتحت ادينها شمرت روحي زرك

_ميوووووسة الصااااكة اشتياااق اشتياااق بكد المجرررات

_نجومي الحلوة مو بكد اشتياقي الج

بعد سلام حار تحركنا واخذتنا بسيارتها خالي ماقبل يروح الا لشقتة وصلتهم واني بقيت توسلت بخالي اروح وياها شوية وارجع وافق  .

_اكلج شو وحدج وين رجلج بشرفج عرفيني علية
_والله هسة يا نجوم عندة شغل غير وقت
_بس مو تغلسين بس اسلم عليه واشوف ذوقج بعد مارفضتي شباب طول بعرض تشك شگتين

رحنا لكافتريا اكلنا وجبة سريعة واني لو بيدي اتمدد بالشارع المكان الرحنا اله يموت مو بس يجنن النسوان تمر مني اللبس شنو الشعر كلة شورتات واكو بيهن لابسات محتشم طفيت اخذتني ميس لشقتها واني مترددة كلش  .

_حبابة رجعيني بلة اجة رجلج هم عيب وفشلة
_مايجي نجوم كتلج عندة شغل اخذي راحتج
_كلش كلش
_كلش كلش

نزعت شالي ورحت سبحت جايبة وياي لبسة خلصت وطلعت لكيتها كاعدة على القنفة جبت مشط وكعدت كدامها تمشطلي  .

_شكو ماكو
_ماكو شي
_شو تحجين من ورة خشمج
_اسكتي نجوم انطمري تعبانة انتي
_امداج اي والله

لفيت شعري وشمرت روحي على القنفة
_انام هنا عادي
_نامي
_اكعديني من يجي سر سعادتج

نمت ماحسيت غير تكعدني نهضت غسلت لكيتها مسوية اكل كعدنا ناكل التفتت اباوع بالبيت

_اكلج سر سعادتج ماكو
_مو هسة يرجع عندة شغل
_يلة بعد احسن
حتى تاخذيني تفرفريني

كملنا اكل بدلت وطلعنا نفتر امشي واصور وادز للبنات جمعتهن بكروب والزك الهن بهلصور كلهن يتفاعلن بقلب الا وردة ادز بصمات صوتية  .

_خلي اجي وياجن اتونس
اخ لو ميس صديقتي
يلا اخلي ضيغم ياخذني بس يفرغ

خلص اليوم بعد ماتونسنا واكلنا وفرفرنا وشبعنا صور ومقاطع ثاني يوم رحت للمستشفى وي مرت خالي والبعدها بقيت وي الجهال سويت اكل ورتبت الشقة سويتها تلمع والجهال سبحو مشطتهم وضفت لمساتي كعدو هادئين بين ما اجو غسلو وصبيتلهم اكل كعدو ياكلون  .

_همام: عاشت ايدج الاكل ولا غلطة
_بالعافيه
_خالو الناس خبصتني بالاتصالات تعبت منهم
والله انطيني كلمة
_شنووو
_زيد عمة خابرني يكلي شوكت نجيكم

بلعت ريكي وبقيت اصفن مثل المطي وهو يحجي
_همام: والله يا خالو ما تلكين مثلهم وانتي تعبتي
عاد ترتاحين لو بالج واحد فگر؟
_لا والله ماعندي بالي شي
_الحمدلله انطيهم خبر
_ماعرف هسة
_اريد كلمة منج لباجر

كمت من مكاني دايخة حايرة ماعرف شسوي اتصلت بنيزك وسولفتلها كالت صلي صلاة الاستخارة

_يريد كلمة خالي شكلة
_انتي بالج مقتنعة بية؟.
_ماعرف
_شوفي الولد احجي وياة ماطول خطبج اكثر
من مرة الولد يحبج وشاريج
_ها هيج تكولين؟
_اي وانتي بعد بكيفج اني ماعرفة
شوفية يستاهل

لثاني يوم افكر وراسي صدع كعد وياي خالي يحجي علية  .

_بعد شغلج بالعراق واخواتج ماتكدرين تبقين هنا اكثر اني راح اقدم اقامة احول كلشي بتركيا مو مال اروح وارجع فالقرار الج تبقين هنا وتخسرين شغلج وتبدين من الصفر؟

مجرد فكرت بيها كلبي وجعني ودموعي نزلت شلون اعوف شغلي وهو روحي مكتبي مكاني زملائي اخواتي ماكدر اطول عنهن كلشي احبة بالعراق ماكدر اعوفة وبكلامة الاخير خلاني ارجعلة خبر "الموافقة  "

باركلي وخابرهم بلحظتها اباوعلة ملامحة تبتسم بفرح ويحاورهم مشيت ماعرف احس نفسي خايفة
رجعلي يكلي:: بس نرجع للعراق نسوي الخطوبة

_هسة هسة ماريد
_لعد يمتها تردينها يا خالي
_واخواتي مو وياي شنو بس وحدي
_لعد ياجلونها بين ما اختج تطيب وتمشي على رجليها غير حجي هذا رادلها اشهر
_لا ماريد اسوي خطوبة
_شنو رايج خطوبة صغيرة بس الكم؟
_هيج تمام

اتصلت ابلغ اخواتي وسديتة راح يصير اسبوع الي بتركيا اجت ميس اخذتني طلعنا تغيرلي جو ومن تعبنا رجعتنا لشقتها كاعدة اباوع فلم كارتون وهي تجهز اكل شهكت وطفرت من مكاني من دخل رجال للشقة باعلى صوتي اصيح  .

_يماااا حرررررامي ولج ميس انبگناااا

شلت اليرموت ضربتة بية وبالمخدات ضربتة طلعت ميس سحبتني تكلي:: ولج مو حرامي زوجي

من الصدمة شردت للمطبخ بعد ولا طلعت وهي تضحك علية اكلت الاكل المسويتة ونكت ادية

_ميوسة فدوه اخذية للغرفة حتى اطلع وانتي الحكيني

_نجوم بس اريد اعرف وين اكو حرامي لابس لبس مرتب وانيق
_دولي شدراني اني نسيت انتي متزوجة عبالي بتركيا الحرامية هيج يلبسون

كطعت كلامي من دخل للمطبخ وجهي صار يطلع حرارة تقدم صار ياكل من الاكل ويحجي  .

_شلونج نجمة
_هلو اني اترخص
_لاوين بعد وقت ابقي نتعرف
_لا خالي راح يبلغ الشرطة عبالة ضعت اروحلة

كمت من مكاني بسرعة يمة استحي طلعت ميس وراي وصلتني  .

_اكلج متزاعلين
_لا
_شو مامبين انتو احباب

سكتت ماردت علية وهي مبين مليوصة بينهم بس ماكدر اسئلها اكثر لان تعودت هي تحجيلي من ذاتها وماحب احجي بالخصوصية شلتلها هم احسها مامرتاحة وكلشي مو بعينها  .

مرت السفرة تجي ميس تاخذني تفرفرني شوية وباقي الايام لو بالمستشفى لو بالبيت الى ان رجعنا وجانو متحظرين للخطوبة مالتي الا اني ماجنت متحظرة لهيج يوم  .

________

_احنا نعرف شغلنا وياها
لاتدخل انت مو شغلك هذا  .

صارت حركة واختفى صوتهم دكيت على الباب بقوة بس اريد اعرف منو ذولة وشنو جاي يحجون
تعبت كعدت بالكاع راسي بين ادية خليتة انتهيت اني من زمان ماعرف المن باقية عايشة فز جسمي من انفتح الباب طفرت من دخل دفعتة اريد اطلع لزمني من ايدي بجيت ضربتة على صدرة وعاتبتة
_وينك انت وينك ليش عفتني بهذا حالي

_اعتذر والله اعتذر عندي شغل

رفع راسي امسح دموعي بقسوة
_اسف كوكبة
_طلعني اختنكت

هز راسة اي وسحبني من ايدي سحبت نفس طويل جنت مختنكة لبسني برجلي وسحبني لازمني واني ماعفت ايدة اخذني للحمام غسل وجهي بماي بارد غرفة من البرميل ورفع شعري ليورة مسحت وجهي بتشيرتي عاف ايدي مشيت كعدت على صبة كعد كدامي يحجي وياي ويباوع بيه  .

_اكلتي شي؟؟
_وين جنت انت؟
_بالدوام

سكتت اباوعلة لابس قميص ابيض  مكفكف ردانة وبنطرون نيلي مدخل القميص جوة والحزام والحذاء يلمعن لمع  .

_اليوم اسويلج معلاك وتكة تحبين هيج تاكلين؟
_بكيفك

دخل للمطبخ طلع مثرامة وسجينة وشيش
وكلشي يحتاجة فرش وكعد يثرم تقربت منه نزعت البرجلي وكعدت اباوعلة  .

_منو الجان هنا قبل لاتجي؟
_محد بس اني
_لا جان واحد يحجي وياك سمعتة اني
_متوهمة
_ما اتوهم اني
_كواكب بعد
_لاتستهزأ
_استغفرالله وين اكدر استهزأ بيج

ملحهن وصار يشيشهن سوى نصهن وانطاني الشيش واللحم كلي:: كمليهن بين مااعلك النار

عافني وراح واني ادية يرجفن حتى حيل مابية
بس حاولت اشيل واخلي بالشيش قوة ماعندي اضغط وهو يشتغل يباوعلي ويكمل شغلة جمع حطب ورش عليهن نفط راد يشعل صحت بية وكمت  .

_اني اشعل انتي وخر تصير بيك ريحة دخان
وقميصك يخرب

_عادي ولايهمج
_لا مو عادي اني اشعل

سحبت الجداحة منه وعيوني بعيونة اخذتها وشعلت سحبني من ضهري لان بقيت واكفة ماتحركت من اشتعلت النار بقيت اباوعلها مامنتبهة ايدة مطاوقة خصري وضهري صاير بصدرة مباشرة

_شايف الحطب شلون يحترك اني هيج
احترك مرة من الوجع واحترك مرة لان عفت اخواتي واحترك مرة لان ماوفيت بكلامي
وانتقمت

_ضيغم: ازدهري لاتحتركين وكلشي يصير بخير
_صعب

انتبهت لايدة دفعتة وخرت منه مصدومة سوى روحة يشوي واني اخزر بية باوعلي ضام ضحكتة
_اضحك اضحك
_هههههههه والله عيونج خزرتهن تكتل ملونات انوب عليمن طالعة عيونج تمساحية
_ماعرف
_ها تذكرت المهم لون عيونج نادر
_حتى انت لون عيونك حلو

رفع شعرة بغرور ضحكت وهو يحجي بجدية
_احنا عائلة عيونة حلوة
_قبس ملونة عيونة بس البعيجي لا
اكلك صدك شلونهم وي اخواتي زينين؟

_كلش كلش
_والله تجذب اني اعلمهم خو البعيجي
يابووووووية كلبي مورم منه

_النسيب هذا
_هو ماعرف شلون اخذ اختي وهي ولاتباوع باحد بس حظوووظ الازرك محترك هيج اخذ خلقة

_بس لاتخلين عينج عليهم
_اهم شي اختي مرتاحة مايهمني

تمددت اباوعلة تعبانة والهوى طكني بارد غفيت
فزيت من كعدني عدلت كعدني مجهز الاكل ومرتبة باوعت للخبز محترك رفعتة.

_هذا ليش محترك
_ردت احمية واحترك
_لاتصير نادر مرة ثانية
_صار
_ولاتنطيني على كد عقلي
_هم صار

خزرتة اكل واباوعلة وكفت عن الاكل
_شبيج تخزرين
_ليش ماتسويلي لفات شو صاير تفكر بس بروحك
_احسن

رفعت حواجبي مامصدكة هيج يكلي ولايمة كمل ياكل ويخزر بية:: اكلي اكلي
_اكل ولا منيتك الخايس

اشر على نفسة مصدوم
_اني خايس؟
_اي
_ومنو يتغزل بعطري والذايبة بية

فتحت عيوني على وسعهن اشرت على روحي بعصبية احجي:: اني كواكب ااااني اتغززززل واذوب بعطررررك  !!!!!

_واليشم بركبتي علمود العطر هم كواكب
_اني اشم ركبتتتتك اااني اليوم لو كاتل لو مكتول شو انت تشمر بالحجي وتحجي من يمك

_اكعدي اكلي مجذب عليج قابل
غير هاي الحقيقة

اشر على ركبتة يكلي
_هنا خليتي خشمج تشتمين عطري

طفرت من مكاني شعر راسي وكف
_والعباس اكتلك كتلة هنااااا  اخلي الشياطين تصفن على جثتك ولك اني مو منا منا كواكب اني

دنك راسة يهز بية وياكل مبتسم مرررتاح المثفف ابن المثقفين سحبت الصينية من كدامة ومشيت

_اليجذب مايستاهل ياكل يلة ولي
_غير اني مسوية ولج
_ولي ولي الجذاب ابو العطور الوصخ

كعدت بعيد عنة اكل التفتت كاعد بمكانة خازرني
اخذت خبزة سويت لفة وكمت مديتها الة
_هاك هاي لان تعبت بيهن
_مو سويتي فضل علية؟
_لا الفضل لله يلة اكل وبيك خير اشمرهن
وادلل المدلل مثقف محد كايلة لا شبيك لبيك عايش اللبس والدلال بخت تكعد تلكة اهلك يخلون خاشوكة ذهب بحلكك

_بعد احسديني
_عيوني ملونة ما احسد يالفهيم
اكل يلا اكل

خليتها بيدة ردها يكلي شبعت
_اشمرها حتى الله يغضب عليك يا غضب

مشيت وهو يحجي وراي
_اني غضب صرت  ! هسة ضيم وعبرتها الج
كلت اسمي صعب انوب غضب لا والله انتي الغضب

كعدت اكل واكلة
_بس اطيب اعلمك منو كواكب
_مايحتاج اعرفها كلش زين

اكلت وشلت الصينية لكيتة يغسل اشرلي
_روحي اغسلي الصينية
_والله عيب عليك غير اني مريضة
ادية ترجف رررجف مال اغسل مواعين

خزرني ماعاجبة المثقف هي صينية ومنا منا اغسلها تمددت وهو يغسل باوعت لادية مقهورة شلون هيج صار بيهن كمل كعد يمي شافني العب بيدي سحبها بقهر كتلة  .

_راحت ايدي نعلعلة ابوة ابن الجلب ***
اسويلها وشم بس ارجع اشتغل
_انجبي
_انجب انت لا تغلط

سحبني من اذني بقوة فتحت عيوني مصدومة
_اااخ ااخ اذني شبيك
_لا تغلطين لا اموتك
_موتني ابقى اغلط بس بالغلط ها

هز ايدة ذب نفس متنرفز غلست عن الجفصة وكملت احجي احس صار عندي واهس وطاقة
_وين راحت صبا
_بالجحيم شعليج بيها
_ماتزوجت
_لا
_ها عود انت ماتهمك وتعرف اخبارها
_سمعت غيري الموضوع
_ماعندي سالفة عندي سوووالف
_احجيهن
_مابية حيل

خليت ايدي جوة راسي غمضت رفع راسي بحضنة خلاة ويرفع بشعري بصوت هادئ مريح للاذن كال  .

_شوكت كصيتي شعرج اول مرة؟ جان طويل؟
_جانت امي هيلة تسوية تسريحات وتضفرة جان طويل شوية
_ليش كصيتية؟
_مو صرت اطلع للشارع سالم وافنان تكلي اشتغلي
مايدخلوني للبيت الا انطيهم فلوس
هناك شفت نظرة علية اشتريت مكص وختلت بضهر السوك اكصص بية من حركة كلبي ماهمني شكلة بس ردت اصير مثل الولد حتى محد يحاجيني

_تعرضتي للتحرش
_هو هذا شكلي مال يتحرشون بية شو جني خشبة
_لا زين
_اي هسة زين لان البس تشيرت مو كلش عريض خو انت شايف لبسي كلة واسع واسود وشعري مكصكص والبس شفقة عادي محد يحاجيني
اشتاقيت لمحمود تدري وام حربي هم اشتاقيتلها هواي مو شلون ماكان

_محمود اعرفة ولد صغير
_اي مو كلش جبير خوش ولد شاغول هسة اكيد يسال عني ويدورني يكول هاي ماتت عاشت
اخ يالزمن  .

مسح على كصتي ورفع كذلتي ليفوك اخذت نفس وهو مكمل يسالني وبلا ما افكر اجاوبة  .

_اول ماطلعتي للسوك شلون جان احساسج شلون اشتغلتي وخطرلج الشغل هذا

_اني احب السوك ماعندي مكان غيرة
دخلت اسئل ادور على شغل بصف ام حربي اشتغلت وي زلمة بس طلع لوتي ماينطيني هواي وهو شكد علية سحب تالي ام حربي صاحتني تحجي وياي حبيتها ومن غير هذا الزلمة شغلة اشتغلت وياها والله ياضيم لو تعرفها ماتنساها دووم الله يرحمها وعلي گلبي احترك عليها تمنيت كلهم يموتون ولا هي

خليت ايدي على عيوني من نزلت دمعها مسحتها ماريد ابجي شحجي عن ام حربي وحنيتها علية
_جانت تقسم الفلوس بيني وبينها ماقصرت وياي بس حنيتها كافي

_الله يرحمها
_امين
_بعدين صرتي تشتغلين بالشارع تمسحين جام سيارات؟
_اطلع وي محمود هو علمني اشتغل فوك شغلي
يلا اجمع فلوس نيزك تتخبل ماتطلب منهم فلوس وابنها صغير لو حليب لو حفاظات يوسف يصير لوكي ويجيب الها وهي تكلة لو يموت ما اخذ منك

_هي ليش تكرها هو حباب

_جبان مو رجال جان يحبها وامة ماتريدها خلاها تزوج وهو يريدها من تزوجت وشافت الويل بتها ماتتت بحضنها رجعلت مخبلة والله مخبلة ماتعرف شي بالدنيا
بس تخيل وياي يومين محجوزة هي وبنتها ميتة بحضنها ترضع بيها ميتة خبلو اختي خبلوها

سكتت اختنكت ماكدرت اكمل كلبت على الصفحة الثانية ومسحت وجهي  اكمل بحقد  .

_شايف شلون حركت بيتهم وخليتهم
يطفرون بس يردون يطلعون مايكدرون النار محاوطتهم الباب محترك منين يطلعون تالي كلهم ضاكو الحرك وخليت بيهم اثر حگ اختي اخذتة
والله ماهمني شي حركت محلاتهم صارت رماد
فرفحتهم تفرفح

جمدت بمكاني من طبع بوسة على كصتي طول بيها فتحت عيوني صارت بعيونة بيهن لمعة ابتسم

_بنية تسوين شواربهم
عمت عين الاغم من يسمع بطاريج
ملوحة الكاع كلها بيج

ابتسم وكمل..
جنج بغداد شكد شافت حرب بس لامة العراقيين

غمضت عيوني واحس كلبي يدك بقوة
راح يسمع دكاتة ويخزيني
_ابقي سولفي لاتنامين
_شعندك بعد
_كملي شلون تعرفتي على دراهم

_هاي سمعت نسوان يسولفن يم ام حربي
يكللها اكو وحدة تكشف بالمكان ويوصفن مكانها
نيزك جانت تعرفها تخاف منها وتكول كاشفة لمدري منو تكول جذابة هاي منجمة وكذب المنجمون وان صدقو جان  الها كرايب يمنا امي هيلة  شايفتها بس اني ما اندل بيتها وحتى ماتعرفني  رحت تكشفلي وين اهلي اني بت منو بالحرام صدك لو يجذبون علية

سكتت اتذكر ذاك اليوم ورجعت اعيشة من جديد واسولفة بحذافيرة لضيغم  .

_رحتلها كعدت كدامها كلتلها كشفيلي
باوعتلي وضحكت استغربت وتوترت منها
_دراهم: انتي منجمة تكشفين

صفنت افهم كلامها واعيدة بعقلي مافهمتة ورجعت كتلها:: شنو يعني مافهمت
_انتي تتوقعين يصير هيج بالمستقبل من تباوعين بعيون الواحد

صفنت بكلامها اتذكر من جنت احجي على جبار واكلة على اخوة..

_هذا يكرهك وحاقد عليك المن تنطية فلوس
هو يأذيك يريد

جان يضحك ويكلي
_لا بابا لاتحجين هيج سالم يبقى اخوي
_موو اخوووك اليكرة مو اخووو الحاقد على اخوة مو اخوة

عبالة لان اكرهة جان سالم يحجي علية لان عايفني عندة دوم يلومة ويكلة اطردها خليها تروح منين ما اجت ويسميني بت حرام  .
ونيزك دوم احذرها من يوسف ماتسمع مني جنت اكلها هذا يبجيج دم ويجي يوم تكرهين تسمعين صوتة وهي تضحك تكلي يحبني واحبة
كل هذا ما يوحي اني منجمة ماحجيت شي قوي وتحقق بس اصرت تكلي انتي  "منجمة  "

_كواكب: دراهم كليلي اني بت حرام بس كشفيلي عندي اهل لا؟؟

_مو بت حرام لا مو بت حرام

احس گلبي يدك بقوة وعيونة ماشوف بيهن من الدمع:: اهلي وين عايشين؟ شلون اكدر الكاهم.

_السوك السوك لاتعوفينة هناك تلكينهم

مانطتني غير هذا الحجي ومن يومها ماطلعت من السوك اشتغل بية على امل يجي يوم ويسألون علية كل هذا ويبقة كلام الناس مترسخ بعقلي هي بت حرام اكول صدك اني بت حرام لان ماكو اهلي
وخاصة بعد ما جبار وهيلة ماتو صدكت بالكلام بس اخواتي يكللي لاتصدكينهم انتي اهلج موجودين

_ضيغم: وين ضيعتي اهلج
_ماضيعتهم هما ضيعوني عافوني بالسوك
ومحد رجع سال عني
ضليت اشتغل وكلامها براسي اني منجمة شنو يعني بيوم ماشفتك باوعت بعيونك تخيلت كلشي وحجيتلك من يومها انت اختفيت وصرت اسال عليك يم ابن عمك وهو ما ينطيني حجي طاحت رجلية وانت ماكو 33 مرة اجيت عليك وانت ماكو اخبار عنك

_تالي اجيت من صار كلامج حقيقة وانكشفت اوراقهم عندي
_شلون عرفت
_كلامج خلاني اشك بيهم صار يدك براسي ومن جابولي اوراق حتى يوكعني بس اوقعهن انكشفو

_بس رجعتلي وكلت كلامج صحيح هنا صدكت بكلام دراهم وصدكت اني منجمة
_للكل تكشفين
_لا بس الاباوع بعيونة واركز واني بالي اعرف شيريد هذا الشخص
_ماتكشفين لروحج
_ما مباوعة بعيوني مايصير ههههه بس احس هذا خطر احساسي صح يطلع

_بركات احساسج... كملي لاتنامين

_رجعتلها لكيت يمها ولد اسمة غضنفر
بسرعة يذب ميانة والتقينا بالسوك وبالشارع هواي صارت صدف جمعتنا هو يجي لدراهم شارد من الشرطة يمها ضامتة خطية ومن عرف هي وحدها وماعدها احد صار يجيها ويجيبلها اكل

خطية غضنفر يكول اني ماعندي اهل واني اكلة عندك اهل جذاب صدك طلع عندة اهل بس مايردونة كون ميتين احسن عاد ماينقهر يشوفهم عايشين حياتهم بشكل صح وهو متبهذل

فحطت سكتت وسحبت نفس طويل ويثكل نفسي من ايدة التتحرك على كصتي بهدوء تصعد وترجع تنزل يسحب شعري وياها  .

_ضيغم: هو يحبج غضنفر
_يكول احبج رادني نتزوج
_ليش ما وافقتي
_ماترهم وهم احسة مايحبني متعلق بية
مالكة بنات كدامة مدري شحب بية يمكن حبني لان اغلط علية ولساني وصخ
_ماحبيتية
_تؤ
_هم ماحبيتي دوم
_قابل اني ضيم اروح اتمعشگ ومرتاحة فلوسي تارسة جيبي
_شعليها هاي بهاي قابل انتي ولد
_المهم مامرتاحة وفارغة مثلك صبا صباووي اووي

_عفية سولفي بعد لاتسكتين

_سالم طردني بيومها لكيت ابن النذل متحارش باختي والله موتة وكتلوني طردوني باليل هذا الليل وين اروح تالي رحت للسوك للبسطية هناك نمت ام حربي بالشتا تجيب بطانية تتلفلف بيها وتشتغل نمت بيومها بالشارع واجت اختي بنص الليل تخبلت من شافتني بيومها تمنيت مارحت وياها سالم اخ سالم والله اذا ما اخلي الحيوانات تعيش احسن منه طردني واختي تصرخ وراي كتلها رايحة لدراهم تخبلت بوكتها

جانت دراهم هستوها راجعة من اهلها دخلت بيتها من شافتني بدون ماحجي رحبت بية وكالت بيتج هذا ونعم المرة كعدتني بيتها اكلت من زادها

اخر كلام حجيتة وغفيت مادري بشي ثاني بعد
من كعدت لكيت روحي بفراشي والمبردة ثلج صايرة ماعرف شكد نمت كمت ودخل ضيغم بنفس الوقت للغرفة شافني كال  .

_يلا كومي علي

فركت وجهي طلعت لكيت ولد يمة اتذكر ملامحة نفسة الدكتور طلبت مني امد ايدي وقبل لا اسال ضيغم كال يشرحلي   .

_ضيغم: ناخذ دمج نشوف نسبة المخدرات قلت وشكد نسبتها حتى نغير الادوية

باوعت للدكتور ومديت ايدي سحب دم اخذ العينة باوع بيها ورفع راسة لضيغم  .

_العلاج ماخذ مفعولة استمرو هسة احلل واشوف النسبة اغيرلك العلاج

_ضيغم: ممنون منك
_اني الممنون منك على جهدك وملاحظة صغيرة
هاي مو المرحلة الاخيرة هاي المرحلة ماقبل الاخيرة راح تكون شوية صعبة اتحملو

_كواكب: هما منو اليتحملون غير بس اني لو تحجي وي الجنانوة ما اشوفهم اني

ابتسم ودنك راسة وضيغم يخزر بية
_وانت لاتخزر عود عبالة اخاف رجفتني عيني دكتور احجي وياي بصيغة مفرد اودعناكم

مشيت واسمع ضيغم يكلة
_اعذرها  مو بوعيها
_معذور يابة

_كواكب: مخبلة بعد سويتني بعدني بعقلي ترة
محد ضربني على راسي

كعدت وحدي جوة الشجرة رجعت احس بدود يمشي على جسمي بس تحملت وماحكيتة هو شباقي بية مشخط صفنت افكر واخاف من الدولة اخاف انسجن  واموت اريد اعيش مثل البشر الخوف راح يكتلني ضيغم اشرلي بيدة وكال

_تعالي راح اطلع اني
_ماتروح شعلية بيك
_امشي للغرفة
_ماروح اريد اشتم هوى

رجع يمي بقة واكف واني صافنة رفعت عيونة اله وبهدوء كتلة:: روح اني من وحدي ادخل جوة
_لا

_ما اسوي شي لروحي عادي تعودت هسة يحكني بس ما احكة مو عديمة السيطرة على نفسي عندي قوة

_احبج من تحجين هيج

_لاتحبني احسن
_باعي اني رايح اذا عندي وقت اجيج
حتى لاتفكرين بالالم اسبحي طلعي الغراض الجبتهن الج حاولي تلتهين بيهن اكلي فواكة عصاير
اطلعي هنا افتري شوية وادخلي كلشي مجهزة الج حتى علاج وحتى لاتملين جبتلج تليفون

طلع من جيبة تليفون باوعتلة بعيون مدمعة ملت راسي غصة بلعومي صارت كتلة بصراحة  .

_اني ما متعودة على هيج
_شنو
_شخص يهتم بيه احسهن هواي وهسة شلت هم شلون اردلك جميلك
_ماريد منج شي بس صيري زينة
_اني بس اخواتي يحبني ولو يطلبن روحي انطيهن
عاد انت علية لاتصير هواي

ابتسم ماعرف شنو يكول اخذت منه التليفون بقة معلك بيدة  .

_والله ضيم ما انسة كلشي سويتة الي
اجيب عمري اركض بس اردلك هذا الدين

_اكول اسكتي احسن
_عبالي تكلي انجبي احسن
_لا اني رجال  مثقف ما اكول انجبي
_صح اني مو مثقفة اكول انجب

سوى بيدة خبالات وراح يمشي بخطوات ثابتة اول مرة اباوعلة من يمشي واركز وياة بقيت وي افكاري مليت رجعت للغرفة طلعت تراك دخلت سبحت وكلشي اشوفة اخلي من عندة ريحتي صارت تعطت ضحكت على روحي ودخلت جوة طشرت الغراض اكو مراية سحبتها باوعت لوجهي ماعرف اذا متغيرة لو لا دوم ما انتبة للمراية مشطت شعري وبقيت اكلب بالعلب واقرا  مرطبات واشكال ماتنعرف فتحتة اخلي لادية واضحك على روحي مامصدكة نفس هيج وقت الحرارة براسي

تعجبت علية حتى مرطب شفايف ومورد جايب هذا بية كتلة بس خطية هم فوك ما جايبلي خليت منه من الملل والوجع الهي نفسي حتى لا افكر بشي مؤذي بعد ماخلصت واحس روحي كلني عطور و ورد احساس مختلف ما حاسة بية من قبل  تمددت على الجرباية رفعت رجلية على الحايط والتليفون مفتوح كعدت على الخط الاحمر جعت بيدي الموبايل طلعت من الثلاجة كلشي وكعدت اكل واباوع هاي الغرفة احسن من ذيج مهجورة تخوف حبيتها كعدت ماحسيت بالوقت والعلاج بية نسبة جبيرة من المهدى يخلي الواحد ينعس نمت وحتى التليفون ماعرف طفيتة لو عفتة مفتوح  .

كعدت الدنيا الظلمة وراسي يوجعني نفسي مكطوع تنفست بصعوبة خفت واستغرب من نفسي ليش اخاف شعور يجيني احس راح يجون وياخذوني لو عصابة لو شرطة الاشياء الشفتها بذيج الفترة مقتل الرجال بالسيارة والرجال الضربتة ومنظرة مايطلعن من راسي الاشخاص التعاملت وياهن والشعور الحسيتة بذاك الوقت
يرجعلي هسة  .

كمت شربت مي والتليفون لكيتة مفتوح على مجرم لابس اصفر احس كلبي وكف شمرت التليفون اخر الغرفة ولزمت راسي بقوة مرت ساعات  نمت ماكدرت اطلع برا فزيت مخترعة من حسيت ايد علية فتحت عيوني بخوف ورعب ورجعت غمضتهن من شفتة  .

_شبيج ماردت تفزين

اخذت نفس طويل وبصعوبة حجيت
_هو اني نمت مثل الناس متت كلساع اموت واكعد

نزلت كعدت بالكاع خليت ضهري على الجرباية
_هي النومة جانت بالكاع تخبل من نمت على الجرباية ماطگتني راحة بعد  .

سحب مخدة وخلة ايدة على المبردة يشوفها باردة لو لا  باوعلي وبتردد كال:: ماتتخطين بسهولة ينرادلج دكتور نفسي
_ماتخبلت
_اليروح لدكتور نفسي مو معناة مخبل
هو بس تعبانة نفسيتة وانتي هواي مرت عليج سوالف

_هسة خل اتعالج من السم وعود الله كريم
صدك شكالك الدكتور
_اكيد بالعلاج الجاي تاخذينة وي الاكل وبشكل حبوب خفف نسبة المخدرات العندج
_يعني شكد واطيب
_ماعرف
_يعني اسبوع اسبوعين شهر
_لهاي الدرجة مستعجلة
_واكثر ماريد اسببلك مشاكل وي اهلك
لو عرفو بالموضوع محد بيهم يتفهم وراسك يصدع خل ننهي السالفة لامن شاف ولا من درى

_ليش تصير مشاكل اذا اهلي عرفو بالموضوع؟

_مشاكل يابو مشاكل
اولاً يكلولك انت شعليك بيها شنو مسوي جمعية خيرية لا وانوب اني وين ماروح يكولون هاي بت الشوارع هاي بت الحرام لو غيرها كفنا شر هذا الموضوع اني هم شايلة هم احد يعرف وتتاذة من وراي

_رجال منو يحجي وياي
_كفو منك بس هم ماقبل تصيرلك سمعة يصيحولك ابو نسوان وجيب اليخلصك

ضحك وشمر راسة على المخدة
_تفكرين للبعيد كلش حلو
_اكلك اريد علاج مهدى شي بعد ماكدر

رفع راسة يشوف ملامحي المتألمة حتى حرارتي ارتفعت  .

_ضيغم: ضروري؟
_اي كلش بعد ما اتحمل

عيني على ايدة مدها بجيبة طلع اشرطة حبوب وردي وابيض قرة واحد منهم وانطاني حباية اخذتها منه شربتها وبقيت افتر كعدت يمة تمدد

_ليش اجيت
_ماعندي شي
_واهلك
_ابوي يريد يزوجني وحدة من بنات عمي
_اي بالعافية
_علمود الورث يا عافية
_وانت شخسران ماتزوجها
_ما دام ما اقبل واحد يتزوج اختي علمود ورثها مايطلع للغريب واني اتصرف بية وازيد املاكي اكيد ما اتقبلها

_بطران اتزوج وزيادة الخير خيرين يعني هم مرة وهم فلوس وهم حامض حلو وجكليت
_نامي لا اركعج بالمخدة

_عريسنا جكليتة حامض حلو باكيتة
_ترة شربتي علاج مو مخدرات شبيج تخبلتي
_غير افرح بيك مبارك عرسك يالهيبة

رفع راسة خزرني بقوة ضحكت وابتعدت اكلة
_ما تزوج كافي عمرك راح يصير بالاربعين يمتها تلحگ على جهالك

كام من مكانة شردت لزمني من تشيرتي سحلني علية وقفل الباب نترت ايدة  خليت ضهري ورة الباب وجهة علية صاير كدامي مخلي ادية منا ومنا

_ضيغم: ترديني اتزوج واجيب جهال؟
_اي والله جهال حلوين مثلك
_هم صح كبرت راح ادخل بالاربعين
_اي
_بعد ما الحك ابدي من هسة
_عاشت ايدك

اريد اصفك واكول مبارك عرسك يالهيبة صكيت بمكاني فاتحة عيوني على وسعهن من قبلني
النار صارت تطلع من وجهي اول ما ابتعد ضربتة راجدي من قوتة غمض عيونة فتح عيونة على وسعهن صدري صاير يصعد وينزل وتنفسي مسموع رفعت اصبعي بوجهة وبعصبية كتلة  ..

_تحترم نفسك لا ادجك بعلي
_تضربين تتجاوزين بالكلام تتعاقبين
_خفت منك

لزمتة من ياخة التشريت لويتها وايدة صارت على خصري سحبني بقوة ورجع يبوسني ضربتة بدية ثنينهن طفرت بعيد شلت المخدات شمرتهن بوجهة فتحت الثلاجة طلعت بطالة مي شمرتهن علية يخلي ايدة على وجهة ويصيح فتحت واحد رفع ايدة صاح.

_لا تشمرين بااارد ولج ماجايب ملابس
_خلي الفساد والبوس يفيدك يا فاسد ابن عمك ضرغام ابو النسوان شتطلع وصي نبي
_نعلة ولج انتي دستي ابطني
_هاي فوك ما فرحانة بيك واريدلك الخير صرت ادوس بالبطن  !

تقربت علية وسبحتة بالبطل تسبح اجة علية شمرت البطل براسة وطفرت برا شلت طابوك وطحتلة بدون ما اباوعلة   .

_ضيغم: ولج خبلة لااا فشختيني
_تستاهل يالفاسد ابو البوسات همزين صبا عافتلك تدري بيك فاسد وانتقمت منك

فحطت ماكدرت بعد حتى اركض بقيت بمكاني وهو اجة علية رفعني من ملابسي لزمت بيدة اكرص بية ضربني راجدي بخفة ضربتة بقوة بيدة على شفتة
فتح عيونة مصدوم ولزم حلكة  .

_كواكب: حتى اتوب ماتبوس
_اني *** اذا تقربتلج
_نعال احسن الفاسد صار يفشر المثقف ابن المثقفين
_المنعل ابن المنعلين

سحلني للغرفة هددت بية واني اسحب روحي منه
_والله اكتلك كتلة لاعبالك بنية ادجك ترة داجة غيرك

_امشي لج
_لج بعينك
_انتي مو بوعيج يمكن الحباية غلط هذا مو علاج
_والله لو مافحطت جان هسة مشبعتك كتل
وهذا حلكك اخلية كلة دم ينزف يلجلب المدلل

نزع تشيرتة راح لمكانة ينام دفرتة برجلة
_كواكب: شكو خير شو نزعت ترة ماكو
بنات هنا بس اني

_ضيغم: المهم بنية
_حلگك اشكة وهاي عظلاتك ادججهن
هسة يفشن ابو النفخ زلم تالي وكت تنفخ
امداك شكبرك بعد تصير.
_تطلعين لو اخليج جواي واخنگج

عيبت علية وشلت مخدة شمرتها علية وطلعت اركض لا يلحكني ويكتلني هذا صار ينخاف منه
والله جان حباب وفقير جنت اشوفة يوسف الصديق   .

الجو بعدة مظلم ماعرف بيش الساعة بقيت اتلفت حسيت واحد وراي بيدة ابرة شهكت گلبي صار بلعومي التفتت ماكو احد رجعت فزيت من حسيت الاعرج ورة ضهري بيدة مسدس يريد يغدرني
ركضت جوة سديت الباب وسلقيتة احس گلبي راح يوكف كد مايدك بقيت فترة انظم انفاسي حسيت الباب راح يندفر واني اوكع على وجهي ركضت للجرباية خليت المخدة فوك راسي نزلتها تخيلت واحد يخنگني بيها بقيت كاعدة اباوعلة نام برجلي نغزتة وبصوت تعبان ناصي كتلة  .

_ضيم كوم ضيم
مارد علية كعدت بالكاع قريب منه وحجيت
_كوم شبيك والله خفت جاي اختنگ

نزلت دموعي من مارد علية على صوت شهكاتي وبجيي رفع راسة كوة يفتح عيونة سحبني من رجلي وصلت يمة مسح دموعي بصوت نعسان

_ضيغم: نامي شبيج شوية ويطلع الصبح
_اخاف احس بيهم بكل مكان حتى بالجرباية

تمدد وسحبني اله صار راسي على المخدة وهو نايم مغمض ابتعدت شوية همست قريب منه
_دير وجهك

بدون مايجاوبني انطاني ضهرة بقيت ساكتة اذني تركز بالاصوات البرا صوت الطيور وصوت الليل علكت عيوني بالسكف اسمع تحركت من مكاني سمعت حركة شخص برا بايدي ضربت على ضهرة

_ضيم اجونة العصابة راح يموتونة اكعد اكعد

من سمعت حركة اقوة ضربتة اقوة صرت ارجف
_ولك اكعد راح يموتونا ذولة عدهم عادي القتل
بس دمنا يبقة يطشر

التفتت علية فاتح نص عين
_الحارس هذا
_يا حارس ياصخام ولطام الطمنا العصابة ذولة
_اش نامي ماكو احد تعبان والله تعبان خليني انام

خليت ايدي على وجهي ابجي اتخيلهم يدخلون علينة سحبني لحضنة يمسح بوجهي ويدك على ضهري مثل الطفل الصغير ويردد  .

_نامي اش ماكو شي

جلبت بزندة قوي اصابعي احسهن نبتن بية من الخوف غفيت بحضنة من كعدت بقيت صافنة
اني بحضنة وايدة مطاوقتني لا والمصيبة مالابس تشيرت طفرت بسرعة وطلعت برا افتريت بالبستان الطم على راسي هاي شلون تقربت منه  .

مر وقت يلا شفتة لابس تشيرتة فرك وجهة درت وجهي منه ماكدر اباوعلة  .

_امشي اتريكي واخذي علاجج حتى اروح
راح بقيت شوية عود كلت ماروح بس كتلني الجوع الريوك بيض عسل حليب وزلاطة حليب ابيض وخبز كعدت اكل وهو واكف اكل شوية من كملت انطاني علاجي شربتة ورجفت ايدي من  كال  .

_غضنفر
_شبية

دنك راسة باسئ وكال..

______________

ورد..

اتوسل بيها الزم بديها وهي تصرخ لمت البيت علينا كلها تباوعلي واني حتى شالي ماعرف وين طار تمنيت الكاع تنشك وتبلعني ولاشفت نظراتهم وسمعت كلامها مثل الطلق يصوبني ويشلني بمكاني  .

_سندس: ولكم بنص بيتكم يتحاضنون ويتباوسون لكيتهم هنا منتهين لو مالحكت عليهم

اهز راسي لا اريد احجي لساني نعكد ماعرف شكول بعد هاي الالتهامات والكلام التحجية سحبتني تطلع بركبتي وتكلهم:: شوفو خو ما اجذب عليكم

سحبني واحد من عمامي بعدني ماحاجية ماكايلة شي والضرب النزل على راسي مثل المطر كفخات على مسبات وغلط علية وعلى تربيتي اصرخ اريدهم يعوفوني موتوني راجدي اجة على عيني طفاها وراسي انركع بالحايط  .

_عدنان: ولج س** تعلمين بناتنة على الطيحان الحظ وي الولد ***

كل ضربة والخ تجيني تدمرني وسندس مستمرة تحجي وتشحن بيهم يزيدون ماينقصون تخليهم وكعت منهم بالكاع وكلهم فزو على صوت قبس

_شكاااعد تسووووووون

_تعال شوف بت عمك ***** و ****

سحبني منهم يتعارك وياهم ويصيح بصوت عالي
_قبس: تسوووواكم وتتشرررف راسكممممم يا عديميين الشرررررف والرحمة ملتمين على طفلة تبيعين بطولات براسها

سحبني ابو تميم يريد يكتلني ويبرد كلبة بية عبالك اني القشمرت ابنة سحبني من ايدة قبس ودفعة بكل قوتة انهد علية وذاك يغلط وقبس يرجع علبة
راح يركض نعمان على ابنة من شاف ضرغام لازمة يدك علية بوكسات ودفرات امة تصرخ وتملخ بروحها وابوه وعمة يردون يطلعونة من ايد ضرغام مايكدرون خنكة صعدة بيدة ليفوك وضربة بالكاع وكلب علية ضرب اقوى من الضرب الاكلتة خلة دمة ترس وجهة اندارو على ضرغام منا ومنا يلا طلعو اندار علية قبس بس شفتة لزمت خشمي وكعدت على وجهي قبس دنك شالني ويصيح شالها خلاة على راسي وطلع بية يركض عافني بالسيارة وطار بية للمستشفى خشمي يصب دم  بنص الطريق فقدت وعي  .

_نيزك: ضرغام بذاك الفشار والغلط انهد عليهم تميم شرد بقو هما يتعاركون ضرغام تخبل يدفع بيهم ويصيح  .

_اذا ما اكتلة واخليكم تعرفون شلون تحجووون بالشرررف فلا اتسمى باسمييي

_نعمان: لك فوووك ما تكتلوهاااا ترجعوون علينة هو بالغصب ماخذها لو بارادتها هي شامرة روحها علية

_لوووو اشووووفها بعيني ماصدددك ولك ورد تسووواكم وتسووواة عشيرتكم كلكمممم ماتوصلووون لنظافتها وطهارتهااااا

_سندس: بعيني شفتها هي منطية روحها وركبتها رايحة من التبوس

هي كالت هيج لو فقد كام مايشوف ويميز كدامة براجدي طيررر وجهة صفح لزمها يخنك بيها وهما انهدو علية بوكسات وبعدة مجلب بيها يصيح

_سندس: لججججج تسووووواج اشكككك حلكججججج هذا التحجين بية عليها

شمرها بالكاع طاحت تجر بالنفس ركضن جابلها ماي شمرنة عليها وضرغام ثنينهم علية بوكسات منا ومنا ماتحملت اشوفه هيج ركضت للعوجية مال ذهب خطية شامرتها وباقية جامدة بمكانها وسهلة تفرج بيها ركضت اضرب بيهم على راسهم  ردت اضرب عمة بس اندار صارت بية التفتت شافني فاتح عيونة بقوة واني العصا بيدي رافعتها هزيت راسي لا ومن عمة راد يغدرة ويضربة هفيتة براسة لزم راسة يصيح وضرغام عافهم يصيح بية

_وخرررري غااااد لاتنضرربين

شمرت العصا وشردت بعد اجو اخوانهم يفاككونهم وصارت هوسة بس سندس وبناتها ماخذات صفحة طشروهم كوة واحد يصيح بيهم "منا العالم انفضحنا"

وامهم تدخل بيهم تجمعو بالاستقبال وضرغام قميصة تكطعن دكمة بقة مفتوح وذني الجلبات يباوعلة ركضت جبتلة تشيرت وانطيتة اله نزع قميصة انطانياة يلبس بية  .

_عفية بالسبع عفية هذا اخذ راحتك بيه بالعرك
وردة خطية دافعلها اخوهامو هنا

_دعاء: تحيلين بية يا س***
هد عليها ضرغام سحبته وهو يصيح علية

_تسووواج وتسوووى راسسسج السانج اكصة بس تحجين عليهاااا

_سندس: يبووووو يا عاااالم الحكوووولي كتلوووني وكتلوووو بناتييي حتى حصتي تضل الهم يبووووووو خل تلحكلنا الشرررطة

راحت دعاء تصيح بعصبية
_الا اخابر الشرطة واشتكي عليك اخيسك بالسجون

دفعت ضرغام من ضهرة ولا يسكت لسانة عافني ودخل جوة يمهم ركضت جبتة مي بارد كلاص وانطيتة اله شرب وغسل وجهة يصيح بيهم

_ضرغام: اليحجي بورد احطة واخلي دمة بطووولة سمعتووووو لو اعيدددد

وابو تميم يرد علية شايط سكتو من دخلت امهم حفصة تسكت بيهم كعدو واجو جواد يسولفولة بدو وضرغام يريد يهجم عليهم  .

_عدنان: من الاخير بنتك وتميم بعلاقة
بعدهم شباب نزوجهم ونفضها

_ضرغام: مو هي بكيفكمممم تزوجون وحدكم
عجبكم تزوجون زوجتو

_نعمان: تقبلها ابن اخووك يتجاااوز علينا يغلط ويفشررر وكتل اختنا يمد ايدة على عمتة

_ضرغام: كل مرة، ماتستحي اطيح حظها
واعلمها المستحى وطولة اللسان

من يمي خفت من ضرغام وشخصيتة الماشايفتها وياي صح يتعصب بس ابد مايضربني احجي براحتي ولا اخاف منه لان ادري مايضربني
طلعت عيوني مدمعة من دفاعهم عنها هي هاي الولد العم لو ماتنراد شكد اكو فرق بينهم وبين ولد عمنا اليريدون يكتلونا من لاسبب  .

ورة فترة ررجعو ضيغم شايل ورد بحضنة وهي مخلية راسها بصدرة وفقار وقبس وراة يمشون صعد بيها فوك وهما دخلو للاستقبال اصواتهم علت صعدت وراة فوك خلاها على جربايتها خشمها مضمدينة وجهها مورم باسها براسها جلبت بيدة بحنية طمنها  .

_نامي وارتاحي عندج اخو ولد بضهرج يشگون حلك اليجيب طاريج لاتحجين ولاتبررين لاحد

جوري من ورة حضنتة وجهها من البجي مطعون دم سحبها يبوس بيها ويمسح على راسها كللها
_اقفلي الباب عليجن لاتفتحنة ديربالج على اختج

طلعت قبلة نزل والباب طبكنة كلبي وجعني على وردة شنو ذنبها وشمسوية هاي الفقيرة هيج يصير بيها مريت على شهب وجمدت بمكاني من شفتها فحطانة من البجي اول ماشافتني عاتبتني والشهكة لازمتها  .

_ليش محد تجي علية.... والله گلبي وكف من الصياح... شصار كتلو سراج منو اخذوه هسة

_ياسراج يانعال غير سجنوة بعد يخيس فوك خيستة والعشيرة من زمان كسرتهم بقو مشمرين جنهم نعلة انسيهم انسيهم.

_لعد شكو جوا

سولفتلها مختصر زادت بالبجي على وردة
جمدنا بمكانة من سمعنا صوت سيارات الشرطة بيتنا عفت شهب ونزلت اركض كلهم طالعين برا يحجون وي الشرطة بصوت عالي  .

_عدنان: الله بالخير عليكم عركة بينة اهل بيت واحد شوكت صارت الشرطة تجي على عركة بيت

_االشرطي: اجانا بلاغ معتدين على النسوان بالضرب ابتعدو نشوف من شغلنا

طلعت دعاء تصيح
_سيادة الضابط مايخلونا نطلع كطعونا

لزمها عمها عدنان سد حلكها بيدة وعلى راسها يضرب بقوة اختنكت وصارت حمرة بيدة اخذها جوة يغلط عليها ويضرب  .

_عدنان: برابيك رايحات للضباط والشرطة علينا انوب  بينا هاي السوالف رايحات تشتكن تالي وكت

امها راحت وراها تركض وتصيح
والشرطة بعدها بالباب وضرغام يحجي وياهم
_يابة نسوان تعاركن وتعرفون بسوالف النسوان تفضلو اشربو جاي ماي عصير بارد وتوكلو

_االشرطة: ماجايين نضيفكم بيت الليث مشهودة ضيافتكم بس اجينة على الشكوى

_ضرغام: حسين روحو جيب علاكة عصاير باردة وموطات للولد جكاير وياك يا نوع تشربون اغاتي
هاك هاي خمسة وعشرين خليلهم كرزات يكرزون بيها بالطريق

دخلو وضرغام طشرهم بقة يحجي وياهم وشغلو رجع دخل يسب ويغلط عليهن ضيغم طلع اختفى ونعمان يخابر بابنة ويكلة

_راح يجونك خوما كفتك الكتلة ينعلون سلفة سلفاك اشرد ترة ذولة مايرحمون

ضرغام من سمعة صاح علية
_خل يجي النثية لو بية حظ ماشرد لو زلمة يجي يواجهنا

_ام تميم: شيواجة منكم هو كل واحد بيكم ياكل يية السبع عشر ايام مشية عليكم اهل البيت عوفو هسة انتو شفتهمتو غير تسمعون منهم بالاول

_ضرغام: بريء منكم اهل البيت وطاريهم
خلية يجي بالاول مو يشرد

خزرني سحبني يكلي
_اصعدي فوك بعد لاتنزلين جوة
_مو
_انزلي وشوفي

صعدت فوك عفتها عالكة والحجي والصياح دعاء بصفحة وامها بصفحة تالي صاح عليهن عدنان
_الاسمع منها صوت اجي اكسرررها

سكتن ولاصوت بعد طلعن صعدت يم شهب فتحت شالي فحطت احجيلها الصار طلعت عصير من البراد شربت وانطيتها تشرب  .

_شهب: اريد اشوف وردة حبابة
_مااكدر اخذج رجلج خاف تنلجم وهسة تعبانة ماتكدر حتى تحجي للصبح ان شاءلله
هسة اروح اشوفها بلكت يفتحن الباب

طلعت اشوف ذهب صعدت لغرفتها وسهلة وياها يدكن بالباب  ..

_ذهب: خيبة وريدة افتحي الباب خل اشوفنج
جويري افتحي الباب حبوبا اشوف اختج

_جوري: ضيغم مايقبل
_ذهب: ولج اكتلها مو كلبي ممرود عليها بس اشوفها

فتحت الباب خايفة لايجي واحد يصعد
دخلت وياهن خطية نايمة ترجف بنومتها كعدت ذهب يم راسها مسحت على شعرها باستة وتكلها

_منين اجتج حبوبا انتي الفقيرة

خلت ايدها تقرا عليها ايات قرآنية شوية وطلعت ياسمين وجهها اصفر والهوسة مافضت تعبت وفحطت رجعت يم شهب خليت راسي على المخدة

_شهوبة اخذج للحمام

_شهب: لا.. خليت ايدها على عيونها وطفت الضوة حضنتني تلعب بشعري همست بصوت ناصي  .

_يعني لو صرت زينة وكمت على حيلي وين نروح برأيج؟

_نيزك: صدك تردين تطلكين لو بس حجي اني من احجي هيج حتى احرك كلبة ماعبالي صدك

_لا صدك والله زواجنا غلط هو تزوجني مجبور عندة ماضي ثاني يوم العرس كشفت حبة القديم شفت صورهم ذكرياتهم ضحكهم سوى حلوين والله حلوين سوى هو من كالي انتهت صدكت وعبرتها اله بس هسة من رجعت وطلعت مريضة مو ماتريدة بدون سبب اني ماريدة ولا اريد ارجعلة تعبت من كلبي وكرهتة والشي الجان يجمعنا راح
وانتهى مثل علاقتنا بس اني افكر بشغلة وين نروح
خالي راح يستقر بالخارج واحنا

_نيزك: لاتفكرين لباجر ورب العالمين موجود بلحظة تتغير الاحوال مابالج بايام

_نيزك اتمنى عندي اخو جان هسة رحنا يمة

_قدر الله وماشاء فعل هذا نصيبنا من الدنيا عوفيها على الله والج الصافي

_بس اني مسحيل ارجع صرت طرف ثالث باجمل علاقة

حضنتني حيل نزلت دمعتي بهدوء كلبي محترك
اريد بس مكان اروحلة مكان يحتويني والله ما ابقة لحظة دزت نجوم صور وفيديوهات تونسنا عليهن قبل لا انام وبين النايمة والصاحية اندك الباب ندهت نيزك كعدت خطية تكلي:: شكو

_كومي الباب يندك شوفي منو
_هسة لو تنكلب ماكوم غلسي

بقة الباب يندك يندك شوية وانفتح بالمفتاح الغرفة ضلمة شغلت التيب لامب من ضلة قبس غطيت راس نيزك شغل الضوة وصاح  .

_هاي تطلع لو شلون وياها اكعديها تروح لغرفتها
_شهب: ماتطلع روح لمكانك
_مو هي على مزاجج ومزاج هاي الكملة ام لسان
_شهب: اطلع خلينا انام وطفي الضوة بدربك
_قبس: البسي شالج راح اجيب ضرغام

كالها وطلع ضربت نيزك ولاتكعد اخذت شالها لبستة ودخل ضرغام:: مسويات طش الشمل بنات جبار

_شهب: لاتحجي على ابوي ميت
_ضرغام: ابوس تراب كبرة بهليلة شعندي وياة

وهي بغطاها شالها وطلع بيها بقيت مصدومة فات قبس يحجي وراة:: الصبح اخذ ملابسها ارجع خلصني منها

_ضرغام: تأمرني امررر

سد الباب احس الدم فار براسي وجهي صخن
_شكووو اجيتتت شكووو اطلع منا ماريد اشوووفك اطلع ارريد اختي ليش اخذتوها مني

راح يطلع ملابس بيت اجة يهز براسة وبرود يحجي كانما ماصاير شي  :: هسة شلبس ليش هيج مسويات بملابسي مارركات ذني ضرغام يخسرهن الي الربح بيمن

_االربح بسفراتك ارربح بيهن اطلع منااا لاتجي

شلت المزهرية شمرتها علية ذب نفس ورفع ملابسة
_بس اسبح وانام انشكيت شگ

دخل للحمام نزلت دموعي بقهر يروح ويرجع بمزاجة لان يعرفني ابقة يمة ماعندي احد اروحلة
رجلي ثكيلة كلش عبالك طابوكة تموتني ثنين يلا ينهضوني على العربانة العكازات قريبات مني جابوهن اتعلم عليهن مو هلكد بيهن امشي من حركت كلبي اخذتهن ونزلت رجلي خليت وحدة منا ومنا وكمت رفعت رجلي من الكاع ومشيت على كيف خطوة خطوة اخاف لا اوكع ورجلي تدمر
وصلت للباب حاولت افتحة بيدي عفت العكازة ماحسيت الا زلكت شمرت روحي على رجلي الصاحية وايدي صارت جواي بس صرختي تشرح المي بوكتها حسيت بعجز مو طبيعي ماكدر انهض نفسي اجة قبس يركض من الحمام ينكط مي رفعني وشالني للجرباية خلاني على كيف وعدل برجلي يتفحصها خليت راسي بالفراش ابجي من كل گلبي فرفحت روحي وهو يكلب بيدي ويحجي وياي يريد بس احاجية مارديت حتى راسي مارفعتة  الم گلبي اكبر من الم جسمي  .

احس بحركتة قريبة مني سحب ايدي يبوس بيها والثانية مضبرة بعدها نترتها منه بصوت مخنوك صحت بية  .

_روح والعباس صرت احس روحي رخصية من تجيني ماريدك عوفني لاتستغل اعاقتي لو عندي رجلين شردت اعيش بالصحراء وماعيش وياك

وذب نفس بصوت عالي وسحب راسي اوخر بية ماريدة يشوفني مو بس اني اشوفة ثبتة بيدة يبوس بكصتي ويمسح بعيوني  .

_حقج علية شماتحجين والله حقج علية
_ماريد منك شي مبري الذمة بس لاتتقربلي ماريدك لاتجيني بين ما اطيب واطلع منا

_والله الحجي سهل عندج
اسكتي بلا رحمة لاهلج

_هو لو عندي اهل ما هيج سويت بية مرمرت كلبي تمرمر

_واني مامتمرمر كلبي؟ كلها تحجي علية محد حط روحة بمكاني حتى انتي مرتي عمت عيونج الغيرة ماشفتي مشاعري نسيتي كلشي كلامي وياج تعاملي اسلوبي ايامنا الخلصناها سوى تنامين بحضني وانتي تضحكين مايوم نمتي تبجين كلهن نسيتيهن وطلعتيني خاين

_اني طرف ثالث اعتذر منكم دخلت بعلاقتكم القوية واطلع منها مثل مادخلت ماخلي الي اثر

_انتي مرتي شكاعد تحجين يا طرف ثالث هذا
استعوذي من الشيطان وارجعي شوفي بعقلج وبكلبج

_كلبي مات بيومها والشيطان انت ما استعاذيت منه وعفتني ابجي عليك وانت نايم يمها ليش لان حبيبتك

سد حلكي بيدة يگلي
_ماسويت شي بس واجبي تجاه الايام
العشناها حق الزاد والملح البينة سويت واجبي ورديت لو سمار مريض ورحت وياة تحجين تزعلين اكيد لا حتى تنقهرين علية وهاي نفس سمار

ضربت على ايدة وخرها انتفضت بحركة اصرخ بوجهة:: بس هاي مو سمااار هاي حبيبتك التبجي دم عليهااااا حبك الاول هاي الخطبتها كذا مرة بس حتى تقبل بيك ومن رفضتك رفض قطعي شفقت علية واخذتني اني عتبي على شي واحد بس واحد
عتبي على المشاعر العيشتني بيها عتبي عليك لان عيشتني بوهم مادامك تعرف ماراح تحبني ليش هيج علقتني بيك وخليتني احبك

عاملني معاملة مو حلوة حتى اتاكد انت مو الي ما احبك هالكد حتى كسرتك سهلة علية اني هنااااا قهرري هنااااا روح بعد ماكو شي بينا هو الطفل الجنت فرحانة بية مات وانت روح شوف حب حياتك رجعلك افرح ااافرررح كمل علاجها واتزوجهااا

غركت عيوني بالدموع حتى ايد ماعندي واضرب بيها شطت من الحركة وبس دموعي تنزل سحبني حاضني وايدة تكرص بخدودي دموعي غركت وجهي ودموعة نزلت على زندي بغصة يهمس

_راحن خدودج سنجوبة حتى ماينمطن

بجيت بحركة دموعي شلال ضم راسي لصدرة يبجي ويبوس براسي  ..

_محد محترك كلبة بكدي انتي متاذية متاذي بكدج مرتين واكثر عبالج سهلة عندي ابني وفرحتي حتى مامختارلة اسم خسرتة ومرتي ذبلت كدامي

_انت السبب بكلشي دعيت عليك هواي دعيت واني الطحت بيها

_دعائج بمكانة اني احترك گلبي بيج

مسحت دموعي ورفعت راسي خليت عيني بعينة
وبوعيد كتلة:: والله لاحرگ گلبك مثل ماحرگت گلبي والسن بالسن انتظرني وشوف الفاهية شنو تسوي  .

____________

_ نيزك: حسيت بثكل واني نايمة دفعتة عني وكعدت افرك بعيوني ضربتة على بطنة
_هاي انت شجابك الي

فتح عيونة رجعلي الضربة
_انتي مو جنتي نايمة يم اختج
_ايييي
_هاي غرفتي البارحة اجيتي تبوسين بية ضرغامي
فدوة احضني مشتاقتلك اني حبيبي والله ميتة على حضنك

كمت شلت المخدة ركعتها بيها
_سوالف هاي عاجنتها وخابزتها هذا ابن عمك المسموم بقة يم اختي وطردني والله لاروح ارزلة واكطع نومتة علية

ادور شالي مالكيتة رحت اشوف بالكنتور
بلكت مبقية شي حضني من ورة وبعكس ايدي اضرب بية راصة على اسناني واحجي

_عوفني لا ادور احضان اشتاقيتلي خو شبعت بيها هسة راجعلي شكوووو

_شبعت نعل من وراج وشعبت صخام ولطام وحركان كلب وراس مصدع ذني الحصلتهن من وراج منطمر بغرفتي وقافل بابي علية خاف وحدة تتحرش بية واني اهلي مربيني صح مرتي هاجرتني وماتباوع بوجهي المزنجر بس ابقى وفي الها وهي يكول بية جرب شاردة مني لا اعديها

_ااخ لو عندي سطلة اااخ
_اكتليني اكتليني هو زلمة شكدني ماتستحي على روحهة تمد ايدها علية فارة تروح لاسد هاي جريمة

_ماريد ارد عليك دنيا الصبح
_هسة عرفتي دنيا الصبح مو جنت غاركة بحضني صلاة الفجر ما صليتيها مخلصتها احضان وهسة ماتريدني ال***

مارديت علية ادري بية يريد يهلهل من الصبح لسانة شطولة اذا حجة بعد مايسكت  .
لكيت شال لفيتة ورحت لغرفة شهب دكيت الباب
بقووة ولا يفتح انوب مقفول دكيت دكيت التفتت ضرغام مرتجي على الباب ويباوعلي بتشفي لان باقية برا وين يلا فتحلي المسعد الباب دخلت من جوة ايدة صاح بيه  .

_وين وين ماتعرفين خصوصية صخام كبل زركتي روحج

_يلا اطلع منا وبعد سوالفك انت وابن عمك لاتعيدونها

_شلون طركاعة عايف امة وابوة لاحك مرت ابوة روحي لرجلج لابنج لاحكة صخام على صخامة

_االيشوفكم يكول والله مثقفين وانتم همج
_بلسانج هذا لو عندي كصيتة الج
_هسة اصيح ضرغام عليك

طلع بدون مايرد علية انداريت على شهب مغيرة ملابسها لابسة دشداشة واسعة ومستورة عكس التلبسهن كليوم سحبتها علية مضيكة عيوني كبل لا احجي سبقتني تبرر  .

_ولله العظيم ماصار شي أصلاً مستحيل اتقبلة بس بس اخذني للحمام غسلت وجابلي دشداشة كلي بعد ممنوع تلبسين مثل ذنيج

ردت انزل اجيب ريوك الها صعد بيدة صينة يخزر يية والله مال دفرة رحت لغرفة وردة الباب قافلتة نزلت جوة يحجون بالسالفة  ..

_ابو تميم: خل نزوجهم اخير النا والكم
_ضيغم : هو منو كال تحبة بكيفكم انتووو تزوجون الرجال يحجي بالزواج

_جواد: ضيييييغم كافي زودتوها
خلينا نحجي شعليك انت اني ابووووها لو انت

_مثل ما انت ابوها اني اخووووها
_االحجي يمي انت مالك علاقة اطلع منها
_مو هي بكيفكمممم ورد ماازوجها يعني ما ازوجهة انتهتتتتت واليقترب عليها انت لو هما احرك البيت عليكم كلكمممم

طلع من البيت يرجف من العصبية وفقار وراة
ماكو دقايق ودخل تميم صار بسد عمة وجهة ازرك يحجي بصوت عالي  .

_تميم: اني غلطت وهي غلطت المفروض ما لازم نختلي وحدنا وهسة هاي كتلكم احنا نحب بعض واريدكم تزوجونا احسن ما نشررد

_حفصة: لا حبوبا نزوجكم هاهية
_عدنان: نحظر الشيخ
_جواد: براحتكم هاهية البت الكم

ماعرف منين سمعت ورد ونزلت تصرخ وتبجي بحركة:: والله جذااب ماحبة والله هو كلي جيبيلي ميي هاي فوك ماجبتلك ياحقير هيج سويت بية سحبني علية هيج سوى بركبتي

كام ابوها يريدها تصعد مايباوع بوجهها لو اطيح بيدة يكتلها سحبها قبس يكلها:: كافي استكي ذولة يحجون وحدهم

_تميم: وردة لاتخافين كولي احبة محد ياذيج
بعد لاتنكرين من الخوف اني رايدج وانتي رايدتني

_قبس: راح انزلك اكسر ضلوعك ياحيوان
_تميم: وانت شعليك حاشر روحك
_قبس: ما ننطي بتنا الك لو تموووت
_جواد: اني ابوها وانطيتها اله ومحد اله كلمة وياي

استمر الوضع هيج الولد متشوطين ومصدكينها وهي تفرفح من ابوها يريد يزوجها فقار سافر وضيغم محترك حراك وكل مايدخل يتعارك ويطلع خالي رجع للعراق وفتح موضوع خطوبة نجوم وبسرعة بسرعة صار الولد يريدها بينة تصير ونجوم هم هيج تريدها  بين ماحنا نجهز للخطوبة وكف كلبي وعداد عمري من انداك الباب ورحت فتحتة  .

يتبع.....

_________________________

اللهم صلِّ على محمد وآل محمد

توقعاتكم
من الطارق 🌚
تعالن عيني ليش ما اتابعن الحساب
ها انمونة من اجقين متابعة وتغيرين الرقم Ch_Kfiah
كدامي ادخلن تعابعن حسابي لا ماكتب هيج بارت طويل 🤬🔪

سؤال خطر بالي شنو اكثر حلم تحلمون بية 💀

تعالو نتناقش بالبارت
تصبحون على خير عمري 💙