رواية المنجمة الفصل الخامس عشر 15 - بقلم كفايه

﷽

#المنجمة
الكاتبة_كفايه

لاتنسون متابعة الحساب
تصويت وتعليق بين الفقرات لطفاً💙

يا علي مدد ♕.

_________________________

انت خليك بمكاني
الصار بيك يصير بية
بنص نهر لازم تعبرة وتلتفت ماتلكة اديك
اني هذا الصار بية
بنص نهر عافتني ادية وعلجرف بس الشماتة
وانت كلي شلون اصيح؟

كواكب ..

ظلام وهدوئ الليل خربة صوت السيارات العالي زحمة السير والناس المنشغلة بامورها تركض حتى بالليل مشيت اوكف بمكان قريب من المستشفى وكفت لازمة گلبي بيدي مو يوجعني لا والله موتني من الوجع رصيت على صدري بثنين ادية ماعندي قوة ادية بايدة وترجف بشكل مو طبيعي .

سحلت روحي سحل كعدت على الكراسي الموجودة راسي بحضني تعبت راح اموت من التعب والوجع دموعي نزلت بغزازة من تذكرت شكلها وصدمتها بكلامي تمنيت ميتة تمنيت اشمر روحي كدام السيارات واخلص من الدنيا والاني بية .

كل العذاب العشتة بجهة وكسرت كلب اختي بجهة ثانية كسرتها اني كسرتها شلون راح تعيش بعد الكلام السمعتة مني ! كمت من مكاني امسح بوجهي دخلت جوة بس اريد اشوفها واسمع اخبارها انطيت اسمها دلونب مكان الردهة البيها مشيت رجلية ماتحملني علساعة اطيح على وجهي وصلت وخلص حيلي من وصلت .

ضرغام يفتر مثل المخبل وادية يرفعهن على راسة وينزلهن ضيغم يمة واكف بس يباوعلة شافني اجاني هادود وضيغم سبقة لزمة مانعة عني يصيح بوجهي يريد يملخني .

_ضرغام: شسووويتيلها ولج مابيها شي والله مابيها شي شصااار بس فهميني شحجيتييي وياهااا

مارديت علية بس اباوع بوجهة ضرب راسة بخبال يصيح:: همزين ماماتتتت ماتحبينها انتي لو تحبينها ماعفتيها وراج طايحة منتهية تعتبرج اختها امدددة هيج خوووة اختي اعوفها وراي مجلوووطة

صرت ما اشوف شي ولا اسمع اذني انطرشت والدنيا تفتر بية راسي موتني مشيت اريد ابتعد عنهم بس ابتعد كلامة هذا ذبحني ذبح ماشفت شي وكعت على وجهي من مكان عالي جسمي تكسر احس بية وصياح عالي يمي .

راسي وايدي يذبحني بية ذبح من الوجع حلكي يابس ميتة من العطش فتحت عيوني اصيح اريد مي دقايق يلا وضحت الرؤيا عندي وصرت اشوف
ممدودة على سرير وبيدي كانونة ومغذي ايدي ملفوفة ونيت بوجع ولزمت راسي بيدي الثانية .

_ضيغم: يا الله انتي زينة؟

بوجع كتلة:: مي اريد مي

هز راسة وجابلي مي عدل كعدتي ايدة ورة ضهري خلة مخدة وشربني مي تبلتت جاب كلنس يمسح بحلكي وركبتي رجعت راسي على المخدة وغمضت عيوني يوجعني ويحرگني ورة شوية فتحتهن لكيتة بوجهي واكف يباوعلي .

_كواكب:اختي شلونها ضيم
_زينة راح يطلعونها او يمكن طلعوها
_صدك تحجي
_والله زينة بس جنت يمج مارحتلهم هسة يمكن طلعت
_صدك نجلطت
_لا مانجلطت قريب من الجلطة

نزلت دموعي بالم دنكت راسي ودموعي ينزلن بحضني امسح بوجهي بعكس ايدي صدري يذبحني من الوجع فلتت المغذي وردت اشلع الكانونة لزم ايدي بقوة ماخلاني .

_ضيغم: عوفيها بس عوفيها
_مابية شي وخر مني
_يا مابيج شي كولي شنو المابيج ضغطج البارحة حيل ارتفع جان هم انجلطتي وكعتي من الدرج ولو ما الناس طحتي للكاع ربج للاستدارة ولزموج

_مابية شي
_لج هاي ايدج تنزف دم نريد بس نوكفها ماكو شمسوية ماتكولين؟ ايدج مخيطة بالجديد حتى خياطاتها بيها بعدها نصهن طاكات ونزفت نزف

كطع كلامة ولم وجهة بالم دفعت الغطا مني ماخلاني اكوم .

_عوفني اكوم
_رادلج راحة هاي ايدج ما تحركينها لاتلتهب ويكصونها انتي صاحية كولي بابا ؟
_وخر مني مابية حيل اعارك
_اختج طلعت لا تعبين روحج انتي تدرين من البارحة لليوم نايمة على اثر الابر ؟

شفتي ترجف اريد احجي اختنكت امسح بعيوني واحجي بصوت يرجف مخنوك .

_راسي هم يوجعني
_امشي وياي نسويلج مفراز
_مو هسة ورة اسبوع هيج بس اطلع

كمت من مكاني يابة يابة جسمي موتني احسة منمل وايدي كلش تاذيني هي شلون جانت انشكت بالسيارة بس ردتها تطيب، مشيت للحاوية بالزاوية صايرة درت وجهي انطينة ضهري شلعت الكانونة والدم صار يطفر كش وجهي اريد كلنس من شافني تخبل سحبني يجيب كلنس ويضغط عليها يرزل بية بعصبية .

_عقل ماعندج انتي شنو من بشرررر عوفيها لاااا شلون تعوفينها شلون الا تشلعينها يلا ترتاحين

_معليك انت، بية
_خليني لازم اعصااابي لاتحجين

شمرني على السرير صرخت ردت احجي وسكتت وجهة دم صاير اخذ كلنس مسحة بقوة واجة كعد كدامي نص كعدة باوعت بعيونة برود .

_شتريد روح صرت زينة راح اطلع منا شكراً الك

_ضيغم: انتي راح تخبليني مو اختج كاعدة عد خالها ماتكعدين وياها هاي المرة دراهم ماعرف شسمها شكو كاعدة عدها بس اريد افتهم ؟

_مو غريبة قريبة قريبة علية

_بس هي مو كرايبج سالت حتى اهلها مو منا هي

_اي اعرف

_هسة خابرت خالج شوية ويجي ترحين وياة روحي اكعدي يمة ارتاحي وغيري من حياتج والله كاسرة گلبي كل ما اتذكرج كلبي يوجعني

_لا ينكسر كلبك علية رايحة هالمرة من صدك مراح تشوفني

مشيت اعدل بملابسي وشكلي اكو مراية باوعت بيها واني امشي كصتي مشخوطة شخط طويل طلعت يمشي وراي يريدني ابقة وكفت اكلة بهدوئ

_اتصل بضرغام اسئلة على اختي

طلع تليفونة اتصل يباوعلي
_ضيغم: ها ضرغام وين انت؟ ها اي ام امير شلون صارت

هز راسة وسدة
_ضيغم: زينة بالبيت

طلعت الشمس عالية دنيا نهار
_ضيغم: خالج راح يجي انتظرية
_ماراح يجي
_شنو مايجي خالج شبيج فهمته وضعج خوش رجال هو
_راح يروح لنيزك
_بس نيزك مو وحدها انتي وحدج هسة يجيج

التفتتة عيوني مدمعة بجزع كتلة
_ماراح يجيني لاتلح مو خالي هو ولا اله اي صلة قرابة بية هذااا گلبة مايحن علينة فهمت

صفن بوجهي حتى مارمشت عيونة يريد يحجي ضاع منه الكلام عفتةعلى جمودة وصدمتة مشيت
وحدي

"اني الغريبة بين هاي الناس
لو طحت محد يکلي اسم الله

وكفت انتظر سيارات تمر انداريت علية من حسيت بية وراي عتني من طرف ملابسي .

_ماترحين لمكان وياي تمشين

درت عيوني عنة بعقلة شي هذا من صاح يلا انفعلت واني والله مابية حيل وتعبانة .

_رروح منااا روح لاتلحكني لايصير وياك شي مو زين

_اوكفي اجيب سيارتي اوصلج ونتفاهم
_تكسي وبلاش اكلك لا روح جيبها
احسن ما طاگتني الشمس انتظر سيارات طاكها
التعب وتسمط سمط

بقة متفاجا من كلامي ماكلت شي غلط هو مو يريد يوصلني وبلاش هلا بية خل يوصلني احسن ماصاعد ونازل واني تعبانة ولو اموت مااصعد تكسي وادفع .

شوية وجاب سيارتة طبكها كدامي صعدت ورة صاح بية :: تكسي اني
_تروح التكاسي فدوة لسيارتك الصاكة
_تعالي يمي اريد احجي وياج
مو وراي تنكسر ركبتي والله

صعدت بالصدر ايدي كوة مثبتتها وجعتني بس تحركت تقرب يسد الباب صار الباب بجهتها ماكدر اسدة عطرة تخلل بخشمي غمضت عيوني استنشق واتذكر بكل مرة اشتم هذا العطر يتعدل مزاجي

_شبيج

فتحت عيوني هزيت راسي لا
تحرك يمشي على كيف ويسال بية

_همام مو خالج شلون غير خالجن هو
_خال اخواتي
_انتي اختهن من امهن مو
_لا اني مو اختهن

حجيتها وباوعت بوجهة رفع حاجبة يكلي
_احجي الصدك لاتشاقين
_يمتها تشاقيت وياك من قبل؟
_شلون مو اخواتج تحجين صدك
_اي بس لا تكول
_ما اكول بس احجيلي وريحيني
_اني مو اختهن هما ربوني من صغيرة
_كرايبهم
_لا ما اعدولهم باي صلة غريبة عنهم
_اهلج وين؟

_اهلي گو*" شمروني ماعرف عنهم شي جبت عمري ادور عليهم بس هسة لا ماريدهم ولا اريد اعرفهم وبحترك گلبي من اشوفهم شلون عايشين الله لا يوفقهم ولا يتهنون بالدنيا والاخرة

غصيت ودرت وجهي على الجامة عضيت اصبعي ماريد ابجي بس غصب عني دموعي تنزل يحترك كلبي والله يحترك ويطفا كون مايتهننون وينشلع گلبهم ويتبهذلون مثل ما اني متبهذلة وطايح حظي دنيا واخرة خسرتهن ريتهم لا شافو الجنة وهما السبب بتهلكتي .

نزلت دموعي امسح بيهن ويرجعن ينزلن سبيتة وغلطت علية بحركة .

_لحييت لحييت الا تعرررف هاي عرفت خل ترتاح الدودة
_هاي لان طحتي من الدرج راسج انرج عاذرج
_اني لساني كوة لازمتة لاشفتني ماحجي هاي انت لان احسك مثقف اكول عيب والا لساني زفررر
_ينغسل سهلة واني ارشلة عطر تروح الزفرة

مسحت عيوني وضحكت
_الملطلط عود صاير حشاش هو انتو المثقفين منيلكم هالسوالف
_وحد عنكم شنو
_فاهين
_تعيشين وتشوفين الفاهيين شنو وراهم
_شنو وراهم بلة
_اسكتي الموشومة
_الغيور شفت وشمي ودكيت روحك
_هو لو مادبرتلج شغل بالمركز ادكين وشم؟

خزرتة ودرت وجهي عنة
_لو بية حيل جان عرفت شلون ارد عليك
_نامي ارتاحي شوية

غمضت عيوني ماحسيت على روحي من نمت بسرعة العلاج بعدة مفعولة بية بعز نومتي اختنكت اريد اكعد ماكدر الهوى ضاك بصدري شهكت بصوت عالي فزيت عيوني يريدن يطلعن بوجهي صاير ضيغم مثبت راسي عيوني صارن بعيونة بدون ادراك نطقت .

_خنكوني ايدهم ضخمة متت

عكد حواجبة سالني
_منو الخنگج
_هما
_منو هما؟

دفعتة عني ودرت وجهي اباوع من الجام هاي احنا بمنطفتنا كدام بيت دراهم شوصلني نزلت جلب بيدي بقوة بتعب ملت راسي الف علامة استفهام بوجهة بخوف على قلق وفضول كال .

_كولي منو وياج كواكب
_كابوس
_اساعدج اني
_كابوس
_احجيلي اني موجود
_احجيلك الكابوس؟

صفن بوجهي نترت ايدي ونزلت دخلت جوة حتى نسيت اشكرة وراي اجة يحجي .

_اوكفي هاج ذني
التفتتلة بيدي شريطين حبوب مدهن الي اخذتهن رفعت حاجبي مستفهمة .

_هذا مسكن للالم قوي مفعولة اذا تنوجعين كلش اشربي وحدة كاملة بس هسة نص مايصير اكثر وهذا للالتهابات اخذي منة

_شكد سعرهن
_اكلي زين وارتاحي لا تطلعين من البيت كلشي يوصلج بس اكعدي
_بيش ثنينهن

خلهن بيدي وكلب عيونة بضوجة راح حتى مايجاوبني حرك كلبي بهذا تصرفة .

_مو ويااك هاك فلا اشربهن مو كواكب التخلي الناس تصدق عليها تالي وكت

شمرتهن وراة ودخلت جوة ادية يرجفن والله اموت من هاي السالفه عبالهم ماعندي احساس هسة هو ياخذ اذا واحد انطاة لان هو ماعندة !

دراهم مو بالبيت جولة يصفر فتحت البوفية طلعت ملابس الي احس روحي وصخة بعدني على كعدتي دخل بالباب شمر الحبوب علية .

_ضيغم: الدكتور كتبهن الج ماتاخذينهن لييييش؟

برود جاوبتة
_اخذهن الك لو اشتريهن بفلوسي

ضرب على رجلة بعصبية ضيغم ابد مو عصبي بس وياي مرات اعصبة والا هو كلش هادئ كمت وملابسي بيدي مديت ايدي بجيبي طلعت خردة والالف حسبت حسبت هو كدامي يباوعلي يشوف وين اريد اوصل حسبت خمسة الاف رفعت عيوني

_الواحد بلفين ونص مو؟
_استغفرالله
_ضرغام قبلك هم يستغفر لان شريف النسوان لازكة يمة بالمعرض تتماوع وتشمر بروحهة علية
_شجاب طارية هسة
_مو ابن عمك وصديقك لو هسة صار عيع

سحب نفس داير وجهة ابتسمت بخبث اكلة
_شكم وحدة متزوج بينة الحجي ضيم
_شنو!
_اي سوي روحك فقير يكلك يامن تحت السواهي دواهي الخوينس وراك سوالف
_اخذي غيبتي
_يا غيبة هاي الصدك انت مو تترادد علية محصل منه صدك جهال عندك بالسر لا

_جنتي مواتة شو طلع لسانج هسة
_شبعت نوم كعدت اطلع حركتي بيك واستفزك
_ماتكدرين روحي اسبحي بدال وكفتج هاي
_ميخصك يلا اطلع منا

خليت الخمسة بجيبة واخذت الحبوب رحت ادور على مي بلعت حبايتين من شاف الشريط سحبهن مني يصيح .

_بس لسااان عقل ماكوو لج مايصير ينشربن يدون اكل وهذا قوووي نص بس تاخذين منة وكون ماكلة شي

_ما اشتهي

عفتة ورحت للحمام اسبح ايدي شلون بيها اسمع صوتة عالي من بعيد يجيني .

_لفي ايدج بنايلون لاتتبلل

طلعت همزين مابدلت باقية بتشيرت نص ردن ايدي احسها خربت رحت دورت على علاكة جبيرة اجيت انطيتها اله .

_شكها ولف ايدي

باوع للعلاكة وجهي يلا اخذها لف ايدي ونعلعلة عطرة يسطر سطر هسة يطلع بورقة لو اكثر،
ضبها ضب كوة حركتها صارت ثگيلة.

_ضيغم: مايدخللها مي هسة روحي
_شكراً وانت هم روح لاهلك لشغلك

هز راسة راح واني دخلت سبحت كملت فرشت فراش وخليت مخدات خليت راسي ودموعي نزلت وحدها خايفة على ناسي وعلى روحي وين اروح .

خليت ايدي على عيوني اتذكر الموقف بالتفصيل
مد اصابعة يكلي .

_عندج خيارين يا تشتغلين ويانة يا تشتغلين ويانة

ضحك ضحكة عالية مافهمت شنو رايد ولا ليش لاحكني والصدك اغلس عن الحقيقة هما شكولهم ولحكتهم الي معروفة اريد اتحرك وافلت ماكدر يطبكون علية اجيت وياة بهدوء .

_ماريد شغل شوف غيري

نزل من سيارتة بلعت ريكي من مشى يعرج بمشيتة
صار كدامي كلش خلة ايدة على الدراجة ساندها جوة حنجة يحجي برود واريحية .

_الاعرج: كواكب اسمج
جنتي عايشة بمنطقة ×××
يم سالم ال××
طردج من البيت عايشة بالسوك تشتغلين حالج حال الولد الناس تعرفج ولد بس انتي بنية
ذيبة تمرعد وهذا المطلوب

ب

لعت ريكي بخوف وبحذر جاوبت
_منو كلك؟ غلطان كلشي حجيتة غلط ما تقصدني

رفع حاجبة باستهزاء وضحك قرب وجهة قريب مني يهمس .

_الاعرج:تؤ تؤ مو هيج فرد مرة تنكرين لو ماهي احنا مراقبينج ونعرفج كل الزين

_هسة شتريد مني خليني امشي ما اشتغل اني

عدل وكفتة بصوت جهوري نطق كلماتة
_الاعرج: كتلج خيارين اختاري منهم واحد
_تضحك على منو انت ما اشتغل كتلكككك هنا خيارين اشتغل

ضحك بصوت عالي دار وجهة على السايق باستهزاء يحجي:: ها ماتعرف بعد الشغل شنو وهيج دكت روحها

قبل لا يلتفت شغلت الدراجة وشخطتها بكل سرعتي امشي وسيارتهم وراي كسرت علية ردت الوف وارجع الثانية وراي حاصروني گلبي احسة راح يوكف من كثر الخوف نزل وشكلة عصبي كلش نزلت بسرعة ركضت من الخوف ركض وراي سحبني من خصري بقوة يضغط مردة مرد رفست بيدة قبل لا اصرخ واحجي ايدة تسلسلت لرگبتي خنگني بقوة الهوى انگطع طككت عيوني ارفس برجلية اريد هوى بس هوى .

شمرني بالكاع على وجهي اتنفس بقوة والهث عيوني من الوجع يصبن دمع شاغت روحي من رفسني بقوة ودنك رفعني بيدة مثل الدمية يهدد ويعد ويصف..

_الاعرج: اليدخل براسنا مايطلع لو تطيرين بالفضاء نسحلج ونرجع لج بانيييييين خططط عليج تطيرين هيج هيج بسرعة

لزمت ايدة اتوسلة جسمي انتهى بيدة
_كواكب: عوفوني اني يتيمة وماعندي احد تعذبت من الصغر شوفولكم غيري يشتغلون وياكم

شمرني شمر انركعت بجسم صلب ضخم رفع راسي بيدة احس شعري يتكطع من قوتة باوعت بوجهة مابية اي رحمة يحجي برود فضيع .

_مانحجي هندي مو؟ يبدي شغلج هذا الاسبوع فهمتي

_كواكب: ما اشتغل وياااااكم عووووفوني

بس ردت افلت روحي منة ماكدرت من ايدة لايد الاعرج سلمني حتى حركتي مقيدينها شمرني بالسيارة وسد الباب اندر من الجهة الثانية صعد بصفي عدلت كعدتي وزحفت للباب اصير لزك .

_الاعرج: تعاي ما اسويلج شي بس اراويج ونتفاهم بكلشي

_مافيدكم اني عوفوني ماعرفكم

_نتعرف ليش لا

مد ايدة الي باوعتلها ورجعت باوعتلة بخوف،
_الاعرج: مدي ايدج لا اطيررر وجهج

من نتر بية خفت منة مديت ايدة بخوف لزمها ضاغط على اصابيعي بقوة يوجعني ركز بوجهي مبتسم بخباثة .

_الاعرج: يسموني الاعرج ايدي بالدهن معروف قديم بالشغل اليصاحبني اكتة بالفلوس كت اليخالفني يروح بيها هو وناسة امحي اثرة ولا احد يسأل عنة لا تحاولين باي شكل من الاشكال تشردين احنا ما شفناج هسة ولحكناج من زمان احنا نعرفج ماكو مهرب من عدنا

نبض كلبي بخوف وبتررد سالت
_منين تعرفوني

_اكو غير غضنفر

اشتعل صدري بنار رصيت على اسناني بحركة والم
ضحك واني نار مشتعلة مركزة وياة بس اريدة يكمل .

_الاعرج: غضنفر دخل بارادتة هسة ملك عايش مددلل بالخير صح شغلة خطر بس فلوس جاي يأسس حياتة

ضحكت باستهزاء رغم خوفي وموقفي ماسكتت
_كواكب: الحرام عمرة مايدوم شكد تلم وتبني يجي يوم ويتفلش فوگ روسكم

_تحجين بالحرام وانتي هذا حالج!

_شبية حالي ما اشتغل بملهى لو غير شغل حظي طايح اشتغلت شغل انتم الزلم ما اشتغلتو من صغري ولهذا يومي

نزلت دموعي بقهر والغصة بصدري رفعت ايدة اعدد واصف .

_كواكب: اشتغلت بالمخظر سنيييين اشتغلت بالتقاطعات مسحت جام سيارات اشتغلت بمخزن غذائية احمل اشتغلت بمركز تجميل وعفتة اشتغل اوصل طلبيات كلهن بالحلال مامديت ايدي لاحد ولا بكت ومشيت بدرب الحرام

مسحت وجهي بيدي هذا زمال مو مال احجي وياة لا يتأثر ولا ينقهر يكلب بتليفونة ويضحك رفعة يراويني توسعت عيوني والدم يبس بعروگي ضحك بصوت عالي حتى عيوني ماكدرت ارمشهن همست بصوت ماينسمع .

_نجمة

رجع الموبايل لجيبة يحجي بحقارة
_الاعرج: البنية الحلوة صدك حلوة ماتشبهج ابد

بحركة وبجزع صرخت اهجم علية ماهمني شيصير، بية .

_كواكب: انجبببب عوفهاااا عوفهااا

لزمني مقيد ايدية ورة ضهري يهمس ورة اذني بحقارة .

_الاعرج: ما نحتاجها نحتاجج اذا تختفين نرجعلها

_ماتعوووودلي شيييي والله مو اختييي والله

_وانتي مو اخت غضنفر ولا تعوديلة بشي شدخل مثل ماتعرفنة عليج من ورة غضنفر راح نتعرف عليها وعلى شكو واحد يخصج من وراج واولهم دراهم بس تعاندين وماتشتغلين واحد واحد نصفيهم هاي البنية تطلع دوم ذنيج ماكو قبل فترة تزوجن بالعافية عليهم شفتهن صاكات للنخاع

ضحك واني متتت بلحظتها رفست رفست يلا عافني وجهي وجسمي احسهم نار وارجف رجيف من كلامة حتى صوتي مايطلع .

_كواكب: عوفوهن مايعودلي والله مايعودلي

_الاعرج: مايخدمنة اذا اشتغلتي ويانة بس اذا ما اشتغلتي نكدر نستفيد منهم ونصيدهن باي مكان وزمان نستفاد منهن بهواي طرق

بلعت ريكي بخوف
_اشتغل اشتغل بس لاتتقربون الهن
_عفية بالشاطرة هيج نريدج ننساهن وانتي تنفذين

مد جسمة تقرب مني ابتعدت ضحك بقرف

_الاعرج: ماتدني روحي عليج اجيب احسن النسوان الناعمة وبطاعتهن ما باقي عليج هسة اسمعيني وافتحي عقلج تصفين حساباتج مانريد احد وراج تختفين تسافرين تبتعدين محد يطلع ويدور عليج يروح يسببلنة مشكلة

رفعت حاجبي مافاهمة كمل يفسرلي

_الاعرج: احنا ردناج لان ماعندج احد وعلى هالاساس اكطعي علاقاتج خاف عندج ماناقصنة هوسة ولا مشكلة الج والنة تعال هاي وين راحت ياخذون فترة يفتقدونج وجيب الشرطة ودي الشرطة على العموم احنا ما نضرر بس انتي وهما

مد ايدة على نقابي نزلة دفرت ايدة وصعدتة خافية وجهي ضحك وعدل كعدتة نظراتة وطريقة كلامة باردة مستفزة تمووووت .

_الاعرج:من الاخير شرطة بلاغ تخبرين احد منا منا انتي وناسج توكعون بيها واذا ماحصلناج هذني البنات يرحن بيها هنا مالهن دخل بس بسببج يتأذن هسة اطلعي واحنا مثل الجن نشوفج ماتشوفينا بكل مكان نراقب نجيج من نريد ونعوفج من نريد

فتحت الباب ايدي ترجف وكفت من رجع يحجي

_الاعرج: كتلج ماكو مخلص لاتورطين احد وياج فرغيلي روحج ماريد احد يسال عليج هو انتي تايهة اريدج هيج خطوة وحدة تنهين حياة غيرج شغلي عقلج واشتغلي بدون كلام زايد ولا بطولات

نزلت بسرعة ارجف خوف على حرگة الدنيا الوسيعة ضاگت بعيني منين طلعولي ذولة اني ناقصة ضيم ناقصة قهر علية العصابات تالي واهل المخدرات كلة من ورة الكلب ابن الكلب غضنفر اهلة شمروة نغمة على العالم الله لايوفقهم ويوفقة

اني شنو ذنبي شمرني بنص الخطر ادية تربطت مجبورة انفذلهم مجبورة ما اتخذ اي خطوة غبية خليت اخواتي بخطر مرة ثانيه واني كلشي سويت في سبيل ابعدهن عن الخطر رجعت دخلت بحفرة مالها مخرج دخيلك ربي مالي غيرج ساعدني صح اني مو ما اصلي ولا اصوم بس مأمنة بقدرتك وبوجودك لاتعوفني كلهم عافوني وحدي اني بخطر

اخوتي ياربي لاتفجعني بيهن من الدنيا بس هنا العندي اموت بس يتأذن بسببي صعدت بدراجتي صرت ماعرف اشغلها من الخوف راحو هما وبعدني اشغل بيها ماكدر اسوق جسمي يرجف وعيوني مغوشة بقيت على كعدتي افكر بكلامهم .

لازم ابعد اخواتي عني هنا صح بعيدات بس ماكاطعة علاقتي بيهن غضنفر شكد كتلة لاتجي وتورطني بمجرد مايجينة ورطني ماريد اخواتي بخطر منين ما اخذهن واكول حميتهن اكون غلطانة متاكدة من شي واحد هسة هنا بخير بس كون اعوفهن وهنا مايعوفن مكانهن ..

رجعت وياريت مارجعت طلعت اختي بوجهي والله روحي فرفحت من شفتها بس لزمت روحي وگلبي عنها ولاول مرة بحياتي اتعامل وياها برود وياريت بس هيج دست ودست ودست بگلبها وبروحهة

جنت ادري راح تتاذة متقصدة تتاذة الضربة الماتموتك تقويك اذيتها هواي حتى تفتح عقلها ومن ما تلكاني تعتمد على روحها وتنساني كل ماتريد تجيني تذكر كلامي وتبطل عني تبقى بعيدة هي واخواتها .

موتت كلبي بنظراتها تگلي اختج اني واني اكلها لا مو اختي هي روحي والله روحي مو اختي احن شخص بالدنيا شفاتة عيني نيزك تعرف بية مو اختها ودارتني مداراة الام ما تداري بنتها هيج
مريضة جبت صغري يم راسي تبجي لان متمرضة راسي نار يدوي صغيرة والله صغيرة وحنيتها ماتنوصف تسويلي كمادات وتقلد امها شنسة وشحجي عنها ..

كسرتها وعفتها مكسورة انكسرت اكثر من كسرتها حتى لو هي تطيب وتحقد علية اني ما اطيب لاني صاحبة الاذية اجت تشكيلي من ضرغام تريدني اهد واتعارك واهددة اخذها منتظرة نصيحة حضن اعلمها شتسوي انطيتها راجدي ورة راجدي سطرتها بيه ورجعتها لواقع مررررر .

وارجع واكولها ضرغام الوحيد بالوقت الحالي يحميها من الناس ومن شرهم يتعبها وتعبة اضعاف يتحمل وهو روحة بخشمة جنت منتظرة هاليوم الاشوف بية البعيجي مشلوع كلبة وخايف من ورة "مرة " ومثل ماوعدتة شفتة .

جسمي موتني يأذيني من سبحت هاج عندي الالم كمت دورت الحبوب اخذت وحدة من المسكن وشمرت روحي بالفراش ماحسيت بشي بس احس بين جسمي محترك بنار اتعرق بشكل مو طبيعي ماحس بنفسي اريد اكوم ماكدر كاني بغير عالم

ضيغم ..

طلعت من بيت دراهم بگلبي قهر جبير وحزن ..

شغلت سيارتي ورحت لاقرب مطعم جبت اكل هاي الغبية شربت علاجها بدون اكل وهو قوي كتلها نص حباية راحت وشربت حباية كاملة .

اخذت اكل ومريت بالاسواق تسوكت هسة تطردني اني والبيدي بس كون تعبانة ماتحجي، رجعت للبيت قديم كلش بية مشاعر وطاقة غريبة الطيور صوتها مزعج تحوم علية مو طيور عادية جانت .

نزعت البرجلي بقيت واكف بالباب شفتها نايمة فاتحة حلكها من التعب دخلت خليت الاكل بصفحة واخذت المسواك فرغتة بالثلاجة فارغة رتبتة وكعدت قريب منها رفعت حاجبي اهمس بخوف .

_اكعدي كواكب شبيج

اخذت شوكة اكل نايلون جاية وي الاكل نقزتها بيها ماتحس نايمة بعمق .

_اكعدي يابة اكلي وارجعي نامي
كواكب وياي انتي؟
اكل اكلي راح يبرد

بقيت انقر بيها ماتحس واني بمكاني احس بحرارتها ترددت امد ايدي على جبينها من خوفي عليها قست حرارتها نااار ناار صايرة .

حرت شنو اسوي اكعدها ماتكعد الغروب صار الجو صار يخنگ والبيت فارغ بس احنا بية لو رحت تبقة وحدها وبهذا وضعها كمت ادور بالبيت على طاسة طلعت روحي يلة لكيت ترستها مي دورت على وصلة طارت رحت للبوفية الملابس بيها نثر ماكو ترتيب عفتها فتحت الثانية طلعلي نقاب ثخين شتائي اخذتة بللتة وعرصتة خليتة على كصتها

رن تليفوني طلعتة من جيبي فتحت الخط صوتة تعبان اجاني .

_فقار: وينك اليوم
_موجود
_اي اعرف وينك مو اسال
_موجود رايد شي
_اكلة وين يكلي موجود خيررر شكوو

_كول يا الله شبيك تصيح
_من باجر يبدي اللعبان نفس مالي نية انقل غراضي
_تعال يمي اتونس
_علساس انت شلون تونس
_اركصلك تريدني
_ماكدر اتخيل سد الموضوع رجائاً

ذب نفس يفتر يجمع بالغراض يشيل ويركع اخذت الوصلة نكعتها بالمي عصرتها خليتها على رقبتها
نزت وبقت على وضعها .

_فقار
_عيونة
_صدك احنا فاهين
_شبيك شارب شي
_هسة اني اعتبر مثقف لولا
_ماعرف من اي ناحية
_بصورة عامة
_انت اي تنحسب على المثقفين بس ضرغام لا
_يعني احنا صدك مثقفين طلعنا
_اي صدك
_مو خوش

_ليش موخوش
_المثقفين مملين يكولون سوالفهم مملة

مشة يصيح:: بيك شي انت كول كول شارب، شي
_روح فقار انتظرك بيتنا
_قصدك المهجوم الينهجم على روسنا كلنة

سد الاتصال متنرفز ماعرف شلون تخلص السنة كلنا سوى كلنا متخوفين من ناحية مانفذ الوصية ونخسر الورث .

مرت الساعة والساعتين صار الليل ولا كعدت ولاخفت حرارتها ماكدرت اروح للبيت بقيت اسوي كمدات على كامل وجهة تاخر الوقت والموبايل احترك بالاتصالات جاوبت امي اخر شي اتصلت .

_ياسمين: ها حبيبي وين انت
_ما ارجع للبيت يمة

_شكو ماترجع وين انت
_يم ولد صاحبي
_صافي
_اي صافي

_ورد: عمرررري
_وردتي
_ورد: وين تبات عيني ابوي لايتخبل علينا وعليك
_روحي بابا مو طفل كدامج
_ورد: هسة فوك ما انصحك
_على طاري النصيحة لاتاكلين حلويات قبل النوم موزين عمري

_ورد: اي لا ما اكل اني تعرفني اكلك يمك ونسة
_فووووول
_الله كون اني ويااك
_شنووو؟
_اقصد كون ولد مثلك
_روحي وردة باي

ضحكت وسديتة منهم غفلتة حتى محد يتصل المهم انطيتهم خبر طلعت برا دخنت جكارة واني نادراً ادخن مو سوى حسب مزاجي رجعت شفتها ميتة عبالك خفت عليها من المسكن فتحت تليفوني اتصلت بدكتور كال حسب نوع المسكن رحت اجيبة حتى انطية الاسم وتفاجات من لكيت ماخذة وحدة ثانية .

ردت اشيلها واخذها للمستشفى بس الدكتور كال مايستوجب يخلص مفعولة وتكعد واني اعرف ماتكعد الليل كلة خفت حرارتها لربع الليل غطيتها وطلعت برا كعدت دخنت وطلعت افتريت بالشارع من تعبت كلش رجعت اقيس حرارتها تهلوس جلبت بيدي نترتها ابتعد عنها .

_كواكب: ابن النعال روح منا

فتحت عيونها باوعت بوجهي وصرخت

_ايدييي ابن النعال ابن الكلببب كلة من وراك شكيتها بس اعيش اموتك والله بسجينتي مثل مادجيت الولد وحمزة ادج واخلص منك اخذ ثااااارري

رفعت ايدي باستسلام بهدوء احاجيها
_ما سويت شي لايدج اني هي مجروحة

_لا لا من وراك انت ابن الكلببب روح منا روح والصبح تعال اكتلك

_اووف شمسوي

_خربت حياتي هي مصخمة مجيرة تجير عايشة بالدفعات اني خربتها علية غضنفر ابن النعال تف عليك وعلى اسمك الخايسسس

رفعت حاجبي بتعجب من كلامها تمددت تعبانة ماحاسة على نفسها بس تحجي بصوت ناصي ماينسمع تقربت منها اسالها .

_اني مو غضنفر شمسويلج غضنفر
_شكد ايدي وانطاني الهم
_هما منو

نامت ماجاوبتني اخذت الشوكة انقز بيها حكت مكان النقزة .

_ابن النعالة لاتكرص بيدي
_لاتغلطين مو غضنفر اني
_اممم منو انت الجني
_لا ضيغم
_ضيم
_ضيغم
_هو انت فكر ضيم وظلايم شفتك وشفتني بس عطرك طيب

_وين شميتية
_تخلي منة هواي ابن الكلببب وين شميتة
_لاتغلطين
_مثقف شعرك سرح ينزل وترفعة عيونك ملونة
_منو هذا
_ضيم
_اني ضيغم تقصديني
_اي اي مثقف مو نفسي

غفت بعد ماكعدت صرت بداية الغرفة نزلت فراش وتمددت ابتسم كل شوية من اتذكر كلامها علية رفعت شعري نزل على عيوني هو ينزل شسويلة
غفيت بدون ماحس على روحي كعدت على اصوات الطيور المزعجة غسلت ورحت ادور اكل متت جوع على نومتها صحت باسمها ماتحس بعدة العلاج ماراح مفعولة شكد حاولت اكعدها ما كعدت .

طلعت الشمس وصارت بالعشرة وهي نايمة سحبت الغطة منها شمرتة وشلتها اطلعها برا صار بوجهي غضنفر كلة تراب فتح عيونة على وسعهن ونزل عيونة لايدي بصعوبة نطق كلامتة وعيونة تصعد وتنزل .

_شتسوون؟؟
_مريضة شربت حبايتين مسكن قوي من البارحة لليوم نايمة اريد اسبحها بمي بلكت تكعد

عبرتة لزمني من كتفي بقوة دارني خزرتة بغضب

_ضيغم: وخررر ايدك

_شعندك هناااا
_بيتك هووو؟
_مو بيتي شعدك شايلهاااا من البارحة تكول شربت شمدريك بيها جنت يمها ؟؟
_اي

ماحس الا بوكس اجاني عيوني صارت بكصتي دخلتها خليتها على الفراش دخل يهجم اصد هجماتة بقوووة مثل الثور الهايج .

_غضنفر: شعندددك يمهااا شعندك باقي بالليل وحدكمممم

_ابن الكلببب شسووويت مررريضة لاتصير زمال

_هي مريضة بس انت مو مريض ماتدري نايمة

بعد كلامة هذا فلشت راسة بالحايط ودك بوكسيات بصدرة داخ مشة يتطوطح يصيح بوجع .

_غضنفر: ابن الكلببب شايف وعااايف راجع عليها اشكال البناااات

ضربتة بدون ما ارد علية بلساني رجع يضرب ضرباته بالهوى تروح ماتلوحني .

_غضنفر: دددوم تحجي هنااا شكووو ولك اذبحك عليها هاي الي ماتفيدددك عوفها نتوالم اني وياها مو من بيئتك هييي بس لسانها خارط ماتتحملها انت

لزمتة من صدرة بقوة كامش تشيرتة عيوني بكصتي صارن .

_ضيغم: لك انت زمال زمااال لاتحجي شي انت ماتعرفة

بعيون حمرة تعبانة توسلني اجاوبة
_غضنفر: ماسويت الها شي البارحة

_افلش راسك مرة ثانية؟ وكعتتت من الدرج بالمستشفى وضغطها معلكككك وكل هذا وايدها تنزف رجعتها للبيت شربت من المسكن حبايتين وخفت عليهاااا لاتموت بقيت انزل بحرارتها

لزم ايدة نترتة وابتعدت عنة الهث تعب كعد بالكاع
يباوعلها بحزن يحجي بين نفسة .

_تعبانة وتعبتها من وراي اني تعبتها

ماحجيت شي وياة شلتها طلعها برا طلع وراي يباوعلي شلت الدولكة مليانة مي شمرتها عليها نشغت مجلبة بقميصي قوي درت السطل كلة عليها كعدت وصحصحت عفتها ابتعدت متبلل قميصي

وكفت بالشمس اتنشف وانكت بروحي كامت تنكت بروحهة رادت تحجي ومن شافت غضنفر بهتت ملامحة دورت عيونها منا ومنا ادور على شي تحركت شالت بلوكة راح يطلع شمرتها بضهرة صارت كمل طريقة وطلع بدون مايرد عليها رغم توجع بصوت يرجف تغلط علية .

_كواكب: احتررركت امك يا*** لو مااهلك ** ما شمروك علينة

اخذت فاصل تتنفس خزرتني بقوة من شافتني اباوعلها نزلت عيوني سويت روحي ما اشوفها

_كواكب: دخلت جوة مستغربة وجود ضيغم شجابة هنا شيريد مني البارحة مو وصلني ورجع خل ابدل واشوفة شرايد وشنو صار هذا ليش نكعني مي شبية اني!

راسي يوجعني كلش بدلت ملابسي وطلعت افتح بالشاش تبلل رحتلة مبللل خطية رفع عيونة الي قميصة لازك على جسمة سكتت افكر شرايدة احجي جمعت الكلام .

_كواكب: ليش هنا انت؟ سبحتني شكو شصار

_ماصار شي بس من ذكائج شربتي حبايتين مسكن قوي ومن البارحة لليوم على نومة وحدة فحطتيني

مسحت كصتي وحركت راسي مامصدكة
_صدك
_حرارتج ارتفعت كلش شلون شربتي؟
_ماعرف يمكن توجعت بس كلي انت من شوكت هنا

_من جبتج مارجعت بعد

توسعت عيوني بصدمة نزل عيونة على ايدي ضاعت الكلمات مني

_كواكب: نمت بالبيت
_ايدج غيري الضماد

هزيت راسي فتحت الشاش ودخلت جوة دورت على غيرة عندي بس ضيعت مكانة كلبت الغرفة كلاب يلة لكيتة خليت طرفة بحلكي ولفيتة ماكدرت اشدة طلعتلة برا واكف يباوعلي رحت صرت كدامي مديت ايدي بدون كلام شدها .

عصرت عيوني من الوجع معدتي تموتني فتحت عيوني يباوعلي بقلق

_ضيغم: وجعتج؟؟
_لا بس. معدتي من الجوع
_حقج ماماكلة شي امشي اسويلج ريوك

رفعت حاجبي وابتسمت استفسر شرحتلة
_كواكب: ما اصدك ههه تسويلي ريوك
_بيها شي غير؟
_ماعرف
_غير مريضة لو مامريضة خليتج تسوين
_اني كلشي ماعرف اكلب المطبخ واطلع طاكة بس بيضة

ضحكت يمشي يكف بردانة مشيت وراة للمطبخ فد نضيف ومررررتب متعجبة بية الجنانوة تنظفة يمكن راح يدور على الطاوة وكفت اباوعلة انخبص
حك شعرة يباوعلي بلطف طلب .

_روحي جيبي الخضروات من الثلاجة اطبخهن

هزيت راسي بدون كلام فتحت الثلاجة تعجبت متروسة مسواك واكل موجود بعلاكتة يم فراشي استحيت كلش والله زحمة منة، اخذت بيض وطماطة خليتهن على السنك يثرم بصل واكف .

_كواكب: مايحتاج تجيب مسواك زحمة بعد لاتعيدها

ضحك يدير عيوني الي
_ضيغم: لو بيج حيل وشفتيني جاي طردتيني بلا شك الحمدلله جنتي نايمة
_ما اطرد بس مايصير تجيب
_مريضة لان مريضة مو يجيبون للمريض حلويات واكل هيج

اباوعلة يثرم وكل شوية يرفع قميصة لان لزك عفتة ورحت للغرفة كعدت ادور بملابسي عندي تشيرتات كلهن واسعات ولاديات اخذت واحد جديد اسود بية جمجمة كد ما احب هالتشيرت ما لبستة .

اخذتة بيدي التفتت من دخلت مديت ايدي باوع باستغراب .

_بدل بين ماينشف قميصك
نظيف والله جديد

غسل ادية نشفهن واخذة يفتحة كلش جبير واسع رفعة يقيسة رفع حاجبة متعجب .

_على قياسي هذا
_اي مو اني احب الواسعات
_حتى تضيعين فرد مرة

حجاها ودنك يفتح بازرار القميص نزعة ضهرة علية صاير فتحت عيوني على وسعهن منبهرة بالوشم الداكة بضهرة عبارة عن افعى سودة جبيرة بنص ضهرة مرسومة بدقة حتى خطوط جلدها واضحة لبس التشيرت ضيك شوية علية .

_مو ضيك؟
_لا
_حلو

رجع يكمل تحمحمت احجي
_حلو وشمك
_واخيراً شفتية
_هههههه اي والله طلع حلو كلش ماتوقعتة هيج

اندار علية بابتسامة ماكرة
_بعد اني اشوف وشومج

فتحت عيوني بغضب خازرتة ضحك يحرك بالطماطة طلعت وجهي صار حار ياوشوم هاي واني جسمي نصة وشوم ..

مارجعت علية بعد صاحني ولاكاني سمعتة ومن كمل طلع مخلي ايدة على خاصرتة والايد الثانية ساند الباب من الشمس مقلص عيونة .

_ضيغم: وين رحتي شبيج مو احاجيج
_شتريد
_ماريد

خزرني عيونة كلش واسعات يكول مخصصات للخزر بس بقيت كاعده والله ولا اروح وراة رجع بيدة صينية دخل للغرفة رحت وراة .

_ضيغم: خطار تعالي اكعدي
_متعودة يكمل الاكل واجي

اكلت بدون كلام ولا حتى اباوعلة حتى هو ماحجة شي كملت كمت غسلت طلع بيدة الصينية رجعها للمطبخ رجع يكلي..

_بقت بس المواعين مااغسلهن عليج
_بعد لا تجي

بهتتت ملامحة واختفتت ابتسامتة من كلامي
كملت اكد علية .

_اتمنى يكون هذا اخر لقاء وهو هيج هالمرة علمود نيزك التقينة لان صارت منكم بس بعد ما نلتقي حتى نيزك مايجمعني بيها شي

غسل ادية ماحجة شي رحت وراة اكمل
_شكراً مواقفك حلوة خوش رجال انت
بس بعد لا تجي

اندار علية باوع بعيوني ياكد بكلامة
_ضيغم: ما اجي بعد اخر مرة هاي نلتقي
_هو احسن
_صح

اخذ قميصة وطلع بدون مايحجي شي بلعت ريكي مقهورة هاي بدال ما اشكرة والله كبر بعيني على هاي سوايتة تمنيت يتوفق وينسعد بحياتة .

رجعت ماعرف ساسي من راسي شنو اسوي هسة وين اروح وما احتاجيت وقت اكثر حتى ادوخ جفت الاعرج للغرفة ماد راسة مبتسم .

"اجة شغلج يلة"

ورد..

وكفت اتنفس سريع وابلغهم اجو ولد حفصة سيارات تلاثة طبكن بابنة، رجعت من جديد اركض اريد اشوف شكولهم كلها طلعت تستقبلهم نزلت حفصة وعدنان ونعمان ذولة اعرفهم اجن نسوانهم صارت كل وحدة بصف رجلها
وعمي نعمان صارو بصفحتة تلث بنات ولد جبير يطلع بعمر علي واكبر عاكد حواجبة بغضب ماعاجبة الوضع بس يتأفأف .

من جهة عمي عدنان تلث ولد شباب وحسب ماعرفت بناتة متزوجات ولان عد عيال ماتنطبق عليهن الوصية وين اكو واحد يقبل زوجتة تعوفة

ومرة عمرها وسط هي وبنية شابة وياها اول مانزلو تعرف بنفسها وبيها .

_سندس: هاي بنتي دعاء

بعد السلام والتعارف الدام نص ساعة دخلنا جوة بالغرفة البيت صار هوسة بشكل مو طبيعي صارو يدخلون بالغراض غرفنا راحت انجمعنا بغرفة اني وجوري ورضا ويمكن البنات ذني يخلونهن ويانة

ضربت ايد بيد افتر لعبانة روحي جذب متحمسة هم شو احس حلو نتعرف ونعيش وي ناس مانعرفهم باوعت للبنات جامدات نيزك تعبانة ولا الها خلك لفت راسها ونامت وذني بومات يكول .

_ورد: شبيجن وجوهجن تسد النعمة
_جوري: شوفي الوضع منين ذولة الولد والبنات شلون راح نعيش وياهم بس اتخيلي

_ورد: تخيلت اسكتي خل نطلع على العالم الخارجي انتي ابقي راح تموتين

عفتهن ورحت فتحت الباب مطلعة راسي منه الشباب تشيل بالغراض وفحطانة يمة شكولهم تخبل خاصة ابن عمي عدنان خزرني وقبس صار بوجهي طبكت الباب بسرعة ورحت جوة اللطم شوية واندك الباب سحلت شهب تفتحة لان اعرفة هذا قبس .

_شهب: شكو اه ايدي
_رجلج ولج نسية صخيمة كليلة احبك اول ماتفتحين الباب

دفعتها على الباب يدك بقوة خرب ايدك شثگلها فتحتة صرت بضهرها باوعتلة هو صاير عصبي وطالعة روحة كرصتها من ضهرها اهمسلها

_ورد: كليلة احبك يلة
_شهب: احبك
_قبس: شنو
_شهب: ها
_قبس: شبيج جاي تهمسين بين روحج

دفعها ودخل سحبتها علية تغطيني حتى مايشوفني الحقير سحلني من وراها خلاني كدامة لازمني من ملابسي .

_قبس: اذا ماثگلتي مثل اختج اكضي بيج التوبة
_ورد: والله عيب عليك شسويت حتى تكول علية خفيفة
_قبس: وررررد انعل خيررة السماج وررد
_ورد: يعيب على اسمي واسمة بايكين منه نقطة

رجني رج يهز بية خرب روحة دوخني عود صاير عصبي الغسل .

_قبس: ام لساان بالقندرة اكصة الج
_ورد: قندرة ام الشفرة هاي لو بيها سجينة انتاج جديد؟

بلعت لساني راح يركعني بالحايط سكتت اسمعلة

_قبس: وحق ربج اذا بقيتي على لسانج هذا ومراددج اشمرج من البيتونة
_اي خوش حتى اوكع على طيارة وتاخذني وياها اخلص منكم

غصباً علية ابتسم عض شفايفة عود ماريد اضحك الخايس ابو لمعة رفع اصبعة يحذرنة .

_قبس: كلجن تسمعن من هذا اليوم لبس عرررريض مكياج ماكو ولا قطرة ضحك سوالف وياهم ماكو تشوفنهم بمكان ماتوكفن الشال مايطيح من راسجن سوالف ضحك خففن مفهوم؟

_ورد: خو كلي موتي

خزرني بقوة دنكت راسي ابتسم بهدوء
_ورد: صار عيوني صار

لزم قبس يحجي وياها وهي الفاهية تريد توكع على وجههة ماعت البنت .

_قبس: سمعتي شهبة طلعة من الغرفة وهما موجودين ممنوع مكياج لو تعرس ذهب ماتخلين وانتن اطك راس براس لو مكيجتنها

هددنا هزينة راسنة اي رجع يكمل

_خليت سهلة تفصلج كلاب ماعرف شسمها المهم مثل الفستان بس عريضات تلبسينهن ماريد اعتراض طلعة كدام ذولة ممنوع هسة ابقي يم البنات بعدين اعلمج .

طلع وهي ولاحجت حرف واحد اخذتها اكفخ بيها
_ورد: خرسة انتي شبيج دحجيييي
_شهب: شنو احجي شكلة

_ورد: هنيال امييي يمة قبيس منين
لكيت هاي الفاهية امداااني اي والله لج صيري نجرة طلعي لسانج كليلة مو بكيفك تريد تبهذلني ما ماااا مااا

سحبتها جوري مني تخزر بية الثانية
_جوري: ختولي لاتسمعين من هاي تحصلين بس الدمغ

_ورد: دولن

طلعنا من خفت الهوسة ركضت اشوف البنات واتعرف عليهن تلث بنات بكدي واصغر شوية
خجلانات خطية بس يباوعن رحت شمرت روحي عليهن حلكي يريد ينشك من الابتسامة .

_هلو هلو يحلوات شلونجن

جاوبتني جبيرتهن بلطف
_رفل: هلو حبيبتي

_ورد: بسررررعة نتعرف ماكدر اتنفس بعد اني ورد وردة الوردات يدلعوووني وانتن

_رفل: اني رفل واخواتي رهف و ريا
_ورد: انتن واساميجن صاكات واخوجن الصاك شسمة

صفنت بوجهي انتبهت لروحي خرب جفصتها ابتسم اعدلها:: قصدي الجاي شسمة

_رفل: تميم

_ورد: احمم هاا
_رفل: اي

درت وجهي اشوف البنية الثانية كاعدة يم امها

_اكلج ذيج دعاء اسمها
_رفل: اي بنت عمة سندس
_اممم

كامت من مكانها تكل لامها
_دعاء: راح اشوف غرفتي وارتب ملابسنا

فتحت حلكي شكو هاي شبيها غرفتها صارررت شنوو غير بيتنا استغفر الله .

_ذهب: جاهزة غرفجن الطابق الثالث الكم

_سندس: ياا جا احنة شيصعدنة فوك اني مرة مابية حيل اريد هنا

_ذهب: ميخالف اكو غرفة جوة اخذيها انتي وبنتج وحفصة غرفتها موجوده جوة هم

_نضال(مرة نعمان): اني اريد جوة اكعد مابية حيل اصعد فوك

_حفصة: خل الشباب فوك والجوة النا

_ذهب: براحتكم

يوم كامل خلص بس نرتب بالغرف لعبو بينة طوبة هلكنا هلاك يلة صفو واستقرو ولدهم فوك كلهم الطابق الثالث كم غرفة بية أصلاً جان محد كاعد بية سويناة علمودهم صار لولدهم فقار بالطابق الثاني وبنتة بس تبجي ضرغام روحة بخشمة حاير بامير وام امير اذا الحايط حجة هي حجت وردت علية .

صرنا كلنة بالطابق الثاني والباقي جوة البنات اجن يمنا كلش هادئات مالهن صوت كتبهن بيدهن يقرن وعرفت من رفل هنا توم بحيث حتى من رادن ينامن سوى بفراش نامن .

_رفولة جعت اني

_رفل: شنو رايدة ننزل؟

_اي نجيب اكل ونرجع اني اضمضم حلويات نروح ندورهن

وافقتني اخذتها ونزلنا البيت صنطة كلها نامت ركضت للمطبخ ادور على حلوياتي ورفل واكفتلي تباوع ادور واحجي متذمرة.

_خرب خرب وين راحن مو جنت مخليتهن هنا

سديت الجرارات ردت اطلع وكفت من شفت دعاء تفتر بتراكها وشعرها مفتوح بقيت فاتحة حلكي ماشافتني افترت ورجعت لغرفتها باوعت لرفل منصدمة .

_ورد: اكلج هاي شكو هيج طالعة مو ولد هنا
_رفل: هسة انتي مو لابسة تراك
_ها اي بس

علست الكلام وكلبت خلقتي تراكاتي عريضات واني متعودة بيتنا شوية واصعد مو افتر سكتت الضاهر ذني صديقات ماريد احجي كدامها، دورت بالثلاجة لكيت قواطي اخذت ثنين ورجعت على الكاونتر لكيت مدحوسات دحس طلعتهن واشرت لرفل .

_هسة كلها نامت من التعب امشي نكعد بالحديقة نكعد بالمرجوحة ناكل ونسولف شوية

ما كالت لا اجت وياي خليت حلوياتي وكعدت هي خايفة حقها لان مو بيتها مثلي ماخذة راحتي
انطيتها نص وفتحت اكل .

_ورد: اممم سولفي شلونكم اخباركم

ابتسمت
_رفل: زينين
_لا صدك جنتو عايشين سوى
_اي سوى
_اووو كلكم بيت واحد
_للاسف اي

ذبت حسرة بقهر سكتت
_ورد: وهاي عمتج سندس هي وبتها وياكم
_اي عمة سندس ارملة وعدها بعد بنية مطلقة عد عمامها هسة يمكن ترجع
_هم تجي هنا لا انلاصت

ضحكت وهي اختفت ابتسامتها حتى ما اكلت
_دكلي شبيج اكلي
_انسدت نفسي امشي خنكوم
_اممم بس اكمل

اكلت حلوياتي وحلوياتها خطية بقن ما اكلتهن خو ما اشمرهن حرامات بسرعة بسرعة كملت لان انكلب مزاجها نعست هسة اخذت الكواغد اشمرهن بالحاوية من رجعت شهكت لكيت ولد نسيت اسمة بس اخوها باوعلي من فوك ليجوة بقيت بس اصفن
مامستوعبة تحركت من مكاني ارجع شعري ورة اذني وكفت من كال .

_تميم: اختمن انتي
_ضيغم
_اها

سحبتني رفل من ايدي تمشي سريع بقت ركبتة مكسورة علية .

_رفل: كتلج خلنرجع بسرعة
_مصار شي
_بعد مانطلع بالليل وحدنا

راحت لفت روحها بفراشها جوري نايمة رحت اسد الشباك شفتة واكف بمكانة بقيت اباوعلة رفع راسة شافني ماعرف شلون رفع جكارتة حمرة باتجاهي مافهمت شيريد التفتت على صوت رفل تكلي .

_تعالي نامي سدي الشباك

رجعت البردات ورحت نمت بفراشي بس بقت بالي من رفع الجكارة شنو معناها .

نيزك..

اخذت امير من ضرغام منومة غطيتة راح بسابع نومة اخذت ملابسي على الجرباية محظرتهن رحت ادخل حمام متجاهلة نظراتة ولا الي خلكة .

سبحت وطلعت نشفت شعري كعدت امشط عفتة على النص تعبت اخذت العصارة ادهن صدري الدكتور كتبها لان صار عندي تشنج منطيتة ضهري بس احس بية يحوس الى ان صار وراي يمشط بشعري مارديت علية سرحة اخذتة منة الفة .

_ضرغام: هذا السحلني

بذوبان كالها باوعتلة برود وجاوبتة بابرد
_وشتريد هسة

كمت من مكاني سحبني علية يحجي بعصبية مكتومة ايدة تجوي جوي لازمني بقوة .

_رايدج طك گلبي عليج
_مالي خلگك
_لا تتجاهليني نازك تموتيني من تعامليني برد

رفعت شفتي واكتافي سوى دفعتة بلا نتيجة
_حاجيني شتردين مني
_عوفني تعبت

ذبلت عيوني بتعب ودمعت دنك باس عيوني دفعتة ومشيت رطبت ادية ولان ما انعس رطبت وجهي ورحت انام خليت راسي على المخدة وغمضت عيوني نار احسهن وبذني يصدع كلامها لليوم يحرك گلبي ويذبحني "ما اريدج مو اختي انتي"

من الوجع روحي قبل كلبي تنعصر بكل قوتي اعصر بالفراش عيوني احس بيهن جفاف ماتنزل دموع سحبني من ضهري لحضنة ادية على بطني يبوس برگبتي سحبت روحي وكمت احجي وياها بعصبية مكتومة رافعة ايدي بوجهة .

_ما اريددك لاتلزمني كووة اكلك ما اريدك عوفني

بلع ريكة عدل نفسة عيونة ذبلانة وتعبان يريد ينام

_ضرغام: ليش ماتريديني ماصار اسبوع على عرسنة
_كرهتك بعد عوفني مالي خلگك لاتلمسني
تلعب روحي منك هي كووة

سحبت الغطا ومخدتي علية فحطت واني اكلة
_لاتخليني اتخبل عليك بالليل لاتجي كربي
اكرهك

ابتسم بحزن وبهدوء نطق
_ماريد اتقربلج بس اشمج وانام
_نام مثل ماجنت قبل تنام بدون عطري وهاي السوالف
_حتى من هاي تحرميني؟

ماجاوبتة انطيتة ضهري ولفيت روحي بالغطا لميت روحي وكلامة يزيد من الوجع ماينقص .

_ضرغام: ما خنتج ولا تزوجت عليج ماضي وانتهى
ليش تحاسبيني على ماضي !

من ماجاوبتة ذب حسرة يكول بحركة
_صوجي اني كتلج احبج بكلمة ماتعاطفت وي وحدة منهن وهنا ذابحات رواحتهن علية
اني ك** طلعت ***

من يجيب سيرة الماضي تلعب روحي بالزايد وينعصر گلبي هو مو بس صدمني لا فتح عقلي وعرفني حقيقتي طلع من الغرفة بعد مارجع ماكدرت انام انتظرتة يرجع لنص الليل مارجع
گلبي صار نار وين راح الف فكرة اجت بالي .

غسلت وجهي بالمي البارد رايحة راجعة صرت نار اطلع ادورة وين الكاة بالبيت برا البيت اتصل بية هسة شيكول عدها انفصام ماتحملت اكثر ردت اختنگ شلت التليفون اتصل بية شوية ورد علية
بصوت نعسان .

_شتردين

_لا تگلييي شترردين وين انتتتت
_ارجعي نامي مو ماترديني وتكرهيني ها
وروحج تلعب مني.

_مايهم كلي وين هسة انت دنيا نص الليل
رجعت لسوالفك لو انت جذاب وما مطلك
رحت لوحدة منهن تكضي الليل وياها
_اممم
_شنووووو كوووول وين انتتتتت

شمرت التليفون حتى ماسمعت ردة صرت نار ركضت للحمام نااار احس بروحي وارجف من القهر
جان نايم عد وحدة متاكدة لان ما انطيتة مجال

خليت راسي جوة المي مديت ايدي على رگبتي تجوي نزعت ملابسي وفتحت الدوش بمي بارد شوية ارتاحيت جاي الف بجسمي دفر الباب ودخل وجهة تراب صاير تنفس بعمق من شافني خلة راسة على الباب يتنفس يردد بتعب .

_ضرغام: طار گلبي عبالي صار بيج شي

مارديت علية طلع لكيتة كاعد على الجرباية
طلعت ملابس رجعت بدلت اشرب حباية خلصت رجعت للفراش نمت بالصفحة الفارغة سحبني علية

_ضرغام: حاجيني احاجيج
_عوفني انطمر
_شتردين تعال تعال روح روح
_ماكتلك تعال روح وين مايعجبك خطية عفتها
وراك جان كملتها للصبح

_لاتخربطين جنت بالسيارة نايم

ضحكت وفريت ايدي باستهزاء حركتة حرررگ
صار فوكي عاصر وجهي بيدة.

_لاتخبليني واني مخبل
_ماتوصل لخبالي
_شنو تحدي منو الاكثر خبال نسوي
_بكيفك هسة انزل شثكلك اريد انام
_نيزك نيزك والخلقج اندمج
_شكو خيرر
_لسانج الزمية نيزك احجي عدل
_هاي لان كتلك ثگيل اوكي انت بخفة الريشة لاتطير عزيزي

وخر مني انطيتة ضهري ونمت كعدت الصبح على لمسات اموري الناعمة بست ايدة يهمس بصوت ناصي خايف لاضرغام يسمع .

_امير: هزا نايم هنا ليس
_امة طردته خطية يبجي نام هنا
_ما لابس ملابس ليس

ردت الطم على وجهي التفتت اشوفة صدك نازعهن غطيتة وضربتة بالغلط صاح:: خرب ***

_مو اميرر موجود يعني وتالي وي الفاظك
هاي
_بربوكة تعيلين بية ليش مو مطموووور
الليل كلة مانمتة من وراج لكتيني بالنهااار

كمت اخذت امير بحضني مارديت علية امير حاضني يهمس باذني همس:: نانا جوعان بطني توزعني

_ابطن ضرغام ولا بيك هسة اسويلك اطيب اكل

نزلتة رحت اطلع دشداسة طويلة طلع راسة ضرغام من الغطا طلعة ايدة يسب بيها ويحجي بعصبية ولو هو هيج عصبي دوم طبعاً هسة يلا اكتشفت جنت عمية عنة .

_ضرغام: كولي كولي نعلعلة روح ضرغام بعد اشتمي بية
_نام ارجع محد وياك
_احتركت روحج ررروحي روحي روحي مو روحج

دخلت الحمام اضحك علية من الصبح يخلس مايتحاجة راح ابني يتخلس اخذتة ونزلت جوة
الطابق الارضي يرج رج بالاصوات والهوسة
البنات مدارس كلهن مبدلات حتى وردة وجوري اجاها الخط راحت وذني كاعدات يتريكن .

فقار يوكل بنتة خطية ويمسح بحلكها مبدل يريد يروح للدوام صبحت عليهم وكعدت يم سهلة اخذت امير تريك بية نزلو شباب تلاثة بروح مرحة يحجون بينهم .

_حسين: عمتك تحبك اكول واطلع
_حسن: لا راح اتاخر وراي محاظرات
_حسين: موحسون نتريك سوية
_محسن: اتريك ليش لا اووو شلون جمعة

بصوت واحد سلمو حسن اكبر واحد بيهم مبين كلش هادئ ورزن طلع وامة ماقبلت سوتلة لفة اخذها اخوة وراة يركض شوية ورجع فحطان كعد بصف اخو .

_حسين: جاي مهيل من ايدج الحلوة يمة
_نضال: سهلة مرت عمك مسوية الريوك
_حسين: بلة وينها سهولة

يميل براسة يدورها ضحكت سهلة تكلة
_ها ولك هنا

_حسين: بوووووياااا هاي انتي مرة عمي والله عبالي بنت عمي

_نضال: لا يسمعك عمك اسكت ولك
_سهلة: وخل يسمع

_حسين: خل يسمع واذا غير، مرت عمي الصاكة
تتفق وياي موحسن

_محسن: اتفق وياك ضلعي

_نضال: يمة بدون لطلطة جديدين بعدنا

_حسين: ذهوبااا شلونج
_ذهب: بعد روحي بشوفتك صرت زينة
_حسين: ايبااا ذهب من صدك اكول جدي كتل روحة عليج تتفق وياي موحسن
_محسن: اتفق وياك ضلعي

سكت باوع علية سهلة صاحت بيه
_وراها مخبل لاتحجي وتبلينة
_حسين: استغفر الله هاي اختنا مرحبا اختي وياج اخوج الماجابتة امج

ضحكت بامتنان
_نيزك: هلا بيك خويه

نزل قبس مبدل عاكد حواجبة هو وضرغام يتنافسون منو اكثر نفسية سلم وكف على راس فقار .

_قبس: ماتكوم عيني
_فقار: شوية

اخذ بنتة يغسللها بيدة لاحظت ود ماتتعامل وي احد غير ابوها وهذا ضيم هو رجال وعندة شغل مبدللها ومشط شعرها رجعها بيدة باوع بالوجوة وكعت عينة علية صاحني بلطف وابتسامة .

_ام امير بلا زحمة عليج اريد احجي وياج شوية

كمت وراة ود اخذها قبس يلعبها ترتاحلة شوية
وكفت كدامة اسمعلة .

_فقار: تكدرين تهتمين بود هالفترة بلكت تتعود عليج وتتقبل الوضع

_اكيد عوفها بعيوني اخليها
_سالمة عيونج خوية بس ود حالتها خاصة ماتتقبل الهوسة والبشر

بتردد سالت
_بيها توحد؟

هز راسة لا وتحسر يباوعلها بحنية
_فقار: لا لا بس صارت بيها خوفة لو اني لو جدها اكثر ثنين ياريت تسحبينها عليج ام الحضانة هم هيج شوية شوية يلة تعودت عليها وجدها موجود بس تخبث هو ياخذها منج
_صار

مسح كصتة راد يحجي تردد مسح على لحيتة بعصبية وابتسم تسليك .

_فقار: اختج نجوم ما اداوم ومن اتصل بيها ماترد ياريت تتصلين بيها احاجيها

_صاير شي
_تحجيلج هي بس استعجلي اريد احاجيها

هزيت راسي وصعدت ضرغام نايم سحبت التلفون اتصلت بيها واني امشي جاوبتني .

_نجمة: نازوكة بيج شي راح ياخذونج للمستشفى يمااا
_شبيج يا مستشفى هذا فقار يريدج
_يما الاستاذ المدير يمج
_اي انتقلو

وصلت يمة اخذ التليفون من ايدي وهي تحجي

_نجمة::لج والله زين بعد شتردون اخذو منة شكولاتة لج نيزك مو عبالج من هاي العادية تموووت تموووت خل ينطيكم

_فقار: ماننطي منها بس لكم شخص

اختفى صوتها ضحكت عليها وهو مبتسم براحة

_فقار: نجوم اليوم تداومين العلبة بعدها مليانة منو ياكلها

_وزعها على الموظفات

_لا داومي واشتغلي واكلي منها

_ما اداوم ماريد

_ها يعني اجيب وحدة بمكانج وتاكل شكولاتج؟

سكتت ماطلع صوتها
_فقار: واسمج شلون تشمرة بالزبل
_نجمة: الله يحاسبها ويحرك كلبها كون ليش تشمرة
_نجوم داومي لا تشلعين كلبي كلهن فصلتهن
وجبت غيرهن موظفات لطيفات مثلج

_نجمة: ياااا استاذ صدك طيبة وغادة وذيج انفصلن؟

_بيومها فصلتهن
_احس خطية
_لا مو خطية جايج نجوم جهزي نفسج
_لا استاذ علي ياخذني
_علي غير بيتة مايجيج جايج

كالها ونهى المكالمة انطاني التليفون يتشكر مني دخل ضرغام يخزر بية وبية طلع ماحاجاة رفعلي حاجبة همست واني امر منة .

_اتصل بنجمة
_شعندة وي نجمة
_موظفة عندة
_وهو يمتها اله شغل بالموظفات ؟

رفعت اكتافي مادري ورجعت اكمل ريوكي وذولة يحجون ويضحكون كعد ضرغام يخزر بيهم ماعاجبة الوضع .

_ضرغام: جاي عيوني
نيزك: جاي عمة

رفعلي حاجبة غلست عنة صبتلة امة جاي اموري شبع وانطلق يلعب ورة رضا لحكة قبس وفقار طلعو اجة ضيغم يصيح .

_يمة يمة التشيرت الاسود وين
_ياسمين: ياتشيرت
_البارحة بلغرفة خليتة بية جمجمة
_ها خليتة وي الملابس اريد اغسلة
_لا تغسلينة مابية شي
_غير ذابة وصخ
_لا مو وصخ وينة كلتي

ياسمين: هسة مابية حيل اكوم عوفة اني ارجعة لغرفتك

_ضيغم: هسة اريدة يلة تاخرت
_ضرغام: شبيك خبصتنة على تشيرت جايبة من لندن
_ضيغم: اسكت انت لا تدخل

كامت امة لحكها شوية ونزل مستعجل البنات راحن لدوامهن وردة خانسة ماعرف شعجب .

رفعت راسي اشوف سندس تباوع لضرغام وتباوعلي خزرتها اركز بوجهة اشوفها شتريد

_سندس: انتي العروس الجديدة
_اي اني
_شو ولاجنج عروس
_ضرغام: تريدينها تبقى بدلتها وتسريحتها؟

_سندس: لا بس اقصد العروس مكياج وجهة مورد
_نيزك: مترب وجهي الله يساعدني من الضيم
_ضرغام: ما اقبل تخلي مكياج بس بغرفتنة

_سندس: الناس وين تطورت ولا عبالي، انتو هيج

_ضرغام: تريديني اتطور واصير مكرن مرتي كل اليجي يباوع بشكلها ويصفن واني ابتسم لان انعجبو بيها !

انلصمت لصم ماحجت بعد منا لمن كام ضرغام رجعت تحجي وي سهلة ولا كاني موجوده .

_سندس: شعجب اخذتي لابنج مطلكة وفوكها عدها ولد؟

_سهلة: يا وين نلكة مثلها ومثل ابنها حفيدي واعز باجر لو صار عندي احفاد ولا افرقة عنهم يبقى الجبير اميري

_سندس: حتى لو هاي خية ابنج بعدة شاب وفلوس عندة جان جبتيلة حدثة

_ذهب: دك روحة عليها مات بيها عشكها عشك صار يرجف عليها مايبدلها بنسوان الدنيا ام امير وين يلكة مثلها هاي

ابتسمت وسعادتة صارت بكلبي من كلامهن ودفاعهن عني اول مرة يدافعلي نسوان مايعايرني

رحت اعزل المطبخ اجت دعاء تساعدني طبعاً دعاء تخليني مرتين مو ضخمة لا جسمة كلش حلو وانثوي بشكل مبالغ بارز جسمها معانيها حلوة
صارت تعزل بدون صوت الها بس اسمع طكة علجها

_اكول دعاء انتي تاركة
_لا حبي متخرجة
_ماشاء الله ماعبالي
_اي شكلي صغير شنسوي بعد

طكت علجها بصوت عالي دخل ضرغام مبدل يريد يطلع سوت روحهة ماتشوفة وتحجي .

_دعاء: بالجامعة شكد خطبونييي وزحفو علية حتى بعد التخرج بس اني ما اقبل كل اليجي انطية بلوك بلوووك بلوووك هههههاااااييي

بقيت اباوع لضرغام بتعجب كمية العيارة بصوتها مو طبيعية اجاني يكلي:: محتاجة شي طالع

_للشغل؟
_اممم
_شوكت ترجع
_تريدين ابقى؟
_لا روح بس اسئل شوكت ترجع
_للضهر ارجع

سكتت ماجاوبتة وبقيت اغسل كرص خدي وراح طلعو حسين ومحسن امهم تحجي عليهم مايرحون للدوام .

_حسين: موحسن سولفلها مو المدير انجلط
والمدرسين يمة اضراب مايدرسون يخدمون بية
باقين

_محسن: اتفق وياك ضلعي منتظرينة يموت حتى ينصبون واحد منهم مدير

_نضال: ولكم ماخليتو موتو المدرس موتو المعاون هسة المدير ماصارت هاي داومو لا اكل لابوكم

_حسين: هاي شبيها قابل نجذب هسة اني اجذب للضرورة موحسن مايجذب حتى للضرورة

_محسن: اتفق معاك ضلعي ما اجذب اني لاي سبب

طردتهم فحطانة تصيح
_نضال: بس خلصو الخامس واطلعو منه
ولكم وراكم سادس شكد تنامون بية

_حسين: ناخذ، بطاطين ام النمر واحبك لموحسن
نام براحتنة
_محسن: ومخدات زينات ولحافات وجودليات

خطية طردتهم ورجعت فحطانة لا ارادي لكيت روحي اضحك على سوالفهم .

_نضال: فحطوني لو كايلة لابوهم عليهم اااخ

كملت البيدي نزلت شهب تباوع بالبيت العيون صارت عليها يخوزرن بيها اسمع بصوت ناعم خجلانة .

_شهب: صباح الخير

_سندس: يا دنيا الضهر ياصباح الخير هذا

_حفصة: صار الغدا منا وهيج

سحبتها للمطبخ لان تفشلت هاجر تحجي وياهن
_هاجر: ماعندنا شي براحتها تنام

_سندس: خية لاترخين الحبل تالي يطيح حظج
بنات هالوكت ماينطن عين .

همست يمها
_شبيج

_شهب: مبية شي بس قبس كلي ممنوع تطلعين والولد جوة

_يا

_والله يكول اجيبلج كلشي يمج
عندي ثلاجة من يجي كال امليها ويمج حمام
وموبايل بية نت

هزيت راسي وسكتت يغار عليها هي صغيرة
وذولة شباب مايعرفهم بعد يعتبرهم غربة .

عفتها تتريك ورحت اشوف ود واسحبها من جدها شوية كوة قنعها جدها تجي وياي .

_اسامة: العبي وي الوليد جدو
_ود: يضربوني
_اسامة: لا محد يضربج بالعكس حبابين يحبونج
_ود: ميكسرون العابي؟

_نيزك: لا ابد تعالي حبيبتي احنا ننطيج العاب

كوة اجت ماعدها ثقة بالناس اخذتها للحديقة
امير ورضا يلعبون من شافوني صاحولها بقت واكفة تباوعلهم .

_روحي مو يصيحولج
_ود: هما حبابين؟
_اي كلش تعالي تعالي نلعب

اخذتها العبها وياها اخذت وقت يلة استجابت وصارت تسوي مثلهم ذبيت نفس براحة اباوعلهم فدوه يخبلون كعدت على صفحة اتذكر من جنا صغار اني ونجمة نلعب وكواكب بس تباوعلنة كوة اجي اسحبها تلعب ويانة اااخ يا كواكب كسرتي گلبي والله كسرتية .

وين انتي شنو راح تسوين بدونة هسة؟
كطع صفنتي وتفكيري عدنان يخابر ويغلط ماعرف على منو اخر شي ختم الاتصال بـ

"اطيح حظ حظك لو ماترجع لشغلك "

من شفتهم تعبو وصخو نفسهم اخذتهم سوى بدلتلهم ود من شافتهم يلة قبلت ابدللهم نزلتهم وياي بالمطبخ اسويلهم اكل واجن البنات من المدرسة ذبت جنطتها وردة تصيح .

_يمة معتتتتت معتتتت حارة

_ياسمين: روحي اسبحي
_رايحة احتركت

اخذت امها جنطتها وراها ترزل بيها صعدن البنات بهدوء بدلن واجن يساعدن بالمطبخ اخذت الجهال اوكلهم سمعت هوسة برا نكتت ادية ورحت اشوف شكو .

لزمتني شهب ترجف وتدفع بية جوة
_شبيج شكو

نزلت دموعها وحضنتني تبجي ورد اجت مبرطمة نزلت دموعها تريد تحجي ماتكدر البنات يباوعن مصدومات عيوني صارت بگصتي لزمت گلبي بيدي و...

يتبع ...

_________________________

اللهم صلِّ على محمد وآل محمد 💙

متابعة لحسابي لطفاً Ch_Kfiah

توقعاتكم +رايكم بالبارت؟

تفاعلكم 👀
قدرو تعبي بارتين طبك هذا
صارلي اربعة ايام اكتب بية
تفاعلو على الرواية ككل 💔

تعالو نتناقش بالبارت تلي

وياكم الحلواااات
كلولي تخيلتوهم هيج؟

متابعة 👇🏻