رواية المنجمة الفصل التاسع وثلاثون 39 - بقلم كفايه

﷽

#المنجمة
الكاتبة_كفايه

لاتنسون متابعة الحساب
تصويت وتعليق بين الفقرات لطفاً 🧡

ياعلي مدد ♕

________________________

_كواكب: الصار وياي حتى بحلم ماتحلمتة ولايوم تخيلتة بعد ما اجو اسامة وهاجر تغيرت الموازين كلها اجو عبالك خطار هاجر تطبخ وتنضف يكول البيت بيتها  .

سوت غدا ذاك الطبخ اليرد الروح رجعت تحجي وياي مثل ما اجيتهم واني اجاوبها واحاجيها بس مو بصيغة هي امي بصيغة هاجر المرة الشفتها وحبيتها تغدينا واسامة كعد ياكل ويتغزل بيها وبطبخها واني اخزر بيهم ضحك  .

_اسامة: ها بابا بس لاتنغارين لان اتغزل بيها
وانتي لا

_كواكب: اني اغار وناقصني غزل تالي عمري

_اسامة: ليش يابة اميرتي تستاهل كل الغزل

دنكت اكل مامتعودة على الكلام الحلو ولا الاهتمام
ساعدتها بتعزيل المطبخ وهو مشغل البلازما على الاخبار سمعتها بدت رحت اركض كعدت يمة اسمع
احترك دمي..

_كواكب: اهووو ديرة يابة هاي قناة الحدث والعربية اكبر مليشيات تفووو عليهن وعلى خيرهن

_عدهم تهويل الاحداث يحبون يبالغون

_ومسوين العراق خرابة وعبارة عن مليشيات وكاتل ومكتول امداهم ديرة على العراقية
احسن

_درتة اعصابج بابا مو اتفقنا ماكو عصبية
_يمعود احنا ماطول بالعراق يعني عصبين

بقينا نتابع اخبار خلص طلع برنامج وثاقئي كعدنا نتابع بهدوء جابت هاجر جاي وكعك خلتة كدامنا تربعت على القنفة صبتلي كوب جاي وخاطتة اخذتة واغمس بيه كعك واكل واسامة يشرب جاي ويحجي وياي عن البرنامج ويزيدني معلومات  .

_هاجرر: والله دخنا ديرو على مسلسل

_اسامة: المسلسلات كلاوات صايرة
_حبني واحبك يكول الدنيا بيها بس الحب ضال مايمثلون عن الصاير بالدنيا وبلاويها

_اسامة: صح لسانج بنتي والله الدنيا بيها اشكال وهم حايرين بغلان وفلانة

_هاجر: بطلت ماريد مسلسل بس اسكتو

ضحكت اباوع لاسامة يهز بيدة ويضحك الساعة تجر الساعة ولا امل اتابع تمددت على القنفة جابت غطا وغطتني على الدفو نمت كعدت لكيتها صايرة المغرب وصوت القران داوي بالبيت كمت لكيت هاجر ترتب بالملابس رحت يمها كعدت اباوعلها

_هاجر: رادلج ملابس شتويات الجو صاير بارد

_صح

_جوعانة

_اي والله كلش هو الواحد من ينام يكعد جوعان

_يخسى الجوع هسة اسويلج عشا ولو اسامة كلي لاتطبخين

اذن الاذان كامت تتوضا باوعتلي
_هاجر: تصلين؟

_اي اصلي بس لادكليلي مالابسة حجاب

ضحكت وكالت
_العافية بالتدريج يجي يوم وتقتنعين

_هو اني هم ما صارلي هواي اصلي على كولتج بالتدريج

توضيت رحت صليت بالاستقبال كملت شغلت الماطور روحي بالماي رشيت الطارمة وفتحت الباب طلعت غسلت الشارع انفتح باب الجيران طلعت مرت الحجي ضحكت ورحت يمها  .

_اكلج مو تدرين اني لكوني بالسوك؟

_ومنو المايعرف انتي مو بتهم ولكوج بالشارع

_ها والله ذكرتيتي شايفة هذا الرجال ابو سيارة السودة عالية كلش وذولة الولد الشباب يجونة دوم؟ ذولة اهلي واخوتي اليجون

بقت تباوعلي وهاجر طلعت مدت راسها من الباب كل عمري مقهورة منهن من اطلع للمدرسة سوى طلاب يكلولي وين اهلج ؟روحي لاهلج؟
واشكال كلة من اهلهم يسمعون تالي اتعارك وياهم ونيزك تاخذنا وتمشي وحدنا مانلتقي بيهم..

_كواكب: تشوفين ذيج امي اشرت الهاجر كتلها
ذيج امي خوش شكد حجيتن هسة هم ارجعي كلي للنسوان كواكب البنية الكلوها بيت جبار بالسوك لكت اهلها 

دكيت البيوت الحاركة دمي واحد واحد كتلهم نفس الكليشة هاجر واكفة وتبجي رجعت ارجف وهنا يباوعن دخلتها ومن شفتها تبجي انقهرت عليها

_اسكتي خالة هسة عليمن تبجين
_بس اني امج لا تحركين كلبي ودكليلي خالة
_بعد ما اكلج خالة وعد

جبتلها ماي اخذتة من ايدي اندك الباب رحت فتحتة دخل من شافها جانت تبجي باوعلي خفت لايكول من وراي بررتلة  .

_والله ما محاجيتها بس هي وحدها تبجي
هاي واسئلها

_يلا بدلن نروح نتعشى

رحت بدلت وكشخت طلعنا تلاثتنا شعور غريب يحاوطني ولسة اكول اني بحلم دخلنا مطعم راقي ونزللنا انواع المشويات اكلت من خاطري طلعنا افترينا نمشي وكفنا شربنا جاي من كشك واكف يبيع  .

_هاجر: اسامة اخذنا لمجمعات ملابس
كواكب ماعدها بس صيفي

_ماشايلة فلوس

ثنينهم خزروني واني حجيتها مو بقصدي هيج طلعت من حلكي لان صدك ماعندي فلوس اخذنا لمجمعات ملابس منزلين اشكال والوان هي تختار شي ومن دكلي الج اعبس وجهي..

_اني ماحب هيج غيرة

تالي اختاريت على ذوقي ومن شفتها متحمسة ماردت اكسر بخاطرها واخذت على ذوقها من كل قطعة موجوده من خلصت علاكة شكبرها متروسة ملابس اسئل بروحي معقولة هاي الي واني جنت لو  قطعة لو ثنين اخلص بيهن البردات!

وراحت تختار احذية واكسوارات وجنط واني بس اباوع من تختار تكلي حلو لو لا اكلها اي لان كلش متحمسة بقيت افكر واكول وي روحي هاي لو باقية يمها وماضايعة هسة اني وين وشلون حالي بس هم احب الحادث لان عرفني على اخواتي الروحي من الدنيا   .

رجعنا وهاجر اخذت الملابس ترتبهن باوعلي اسامة بنظرة يجس نبضي ويشوف ردة فعلي طلعت بيدها بلوزة بيضة وبنطرون رصاصي عريض
وبوت ابيض اللبسة تموت واني كل ما اشوف شي حلو الي اتذكر ملابسي قبل  .

بحماس وبفرحة ماتنوصف كلتلي
_شكد تمنيت اشوفهن عليج حبابة روحي جربيهن

واصير طايحة حظ وماعندي احساس اذا اكلها لا
اخذتهن من ايدها وطلعت البس بالحذاء احس بروحي جديدة  .

_ها شلونهن

_اسامة: تعالي باباتي

رحت يمة وكلمة بابا لو باباتي من يكولها يدهور وضعي جمدت بدمي من دنك يرفع بنطروني

_اسامة: طلعي الحذاء حتى يصير الوك ماعلية علامة خطا... هسة تموتين طلعتي نازكة وحلوة

سحبني باس راسي وهاجر عبالك اول بنية عدها صايرة وفرحانة بيها تصفك بحماس وتضحك

_هاجر: يخبببل ولايكلج كلش طلعتي تموتين
كلش راهم وي كصة شعرج

_اسامة: صح شكلج يصيح اجنبي لو تقتنعون
اسفركم

دخلت ابدل رجعت يمهم اسامة بالمطبخ يسوي كهوة  .

_اكلج شو محد يجي حتى اخواتي لا ذهب اجتني بعد

_هاجر: والله ابوج مايقبل يكول عوفونا وحدنا
جان مانع احد يجيج

_ليش بلة

_بينة الحجي يكول خل تجرب الوحدة الحقيقية
مو كل يوم احد رايحلها حتى ماتستاحش

_فقار: بعتي سوالفي بلاش

ضحكت واني كتلة
_هم كلت اخواتي شبيهن مايعوفني شعجب كطعن حتى اتصال مايتصلن

قدملنا كهوة بالحليب تخبل
_هاجر: عاشت ايدك

استحيت ما اكلة شي هم كتلة عاشت ايدك
_اسامة: ادللو حبيباتي

هما يحجون واني صافنة بيهم صعب بليلة ويوم اتقبل كلمة بابا وماما من احد بعد كل هالسنين
يحتاجلي وقت ومن صار الليل كتلهم نامو بالغرفة لو بالصالة

_هاجر: انتي وين تنامين افرشيلنا

_لا اخذو راحتكم اني نومتي مدري شلونها
يكولون بالليل اطلع سجينتي وادجج بيها

ضحكو واني ضحكت على سوالفي فرشتلهم بالصالة لان هما رادو ولا لحو فرشت بالغرفة ورديت الباب تمددت اجيبها وي روحي منا ومنا ماتخلص اريد انام ماكدر واني صايرة اشبع نوم
حسيت الباب ينفتح دخلت لكتني كاعدة كالت

_عادي انام يمج تعاركت وي اسامة

كمت كتلها
_اجيبلج فراش

_لا هذا مايحتاج

تمددت بصفي والهوى عالي برا حجيت
_تعرفين مثل هيج وقت اني بسابع حلم من التعب ارجع منتهية من غبشة اطلع على ركضة وحدة
لليل انتهي ومرات اكعد نص الليل راسي يسطرني

_واني مثل هيج وقت اكعد فازة من حلمي
تجيني لو تراويني ضربج لو تكليلي جوعانة
اتخبل بس تجيني انتي واختج بالحلم
بس اكثر شي انتي تجين نفس الحلم لو جوعانة لو تشكين مضروبة

_جنت اجوع اشتري مرة وحدة اكول هاي الفلوس المهن يفيدنا ومرات اتعارك وانضرب انام بالمخزن بدون ما اتعشى واكل شي لثاني يوم من الجوع كوة انام

_ماخليت تصدقت اسوي ثوابات يرجع الحلم نفسة

_سيماء شلون جانت حلوة سولفيلي عنها

بجت ومسحت دموعها
_اني ماريد ابجيج بس ردت اعرف عنها صرت اتذكر بنية حلوة تمشط شعري وتغني

_تمووت جانت شكرة نسخة قبس شعرها خيوط الذهب

_عندج صور الها ذيج المرة محد راواني الها صور

_عد فقار صورها مايقبل اشوفهن يخاف علية

_هو صدك فقار يحبها كلش
_اكثر ماتتصورين فقار يحب كل اخواتة بس هاي غير جانت صديقتة مو بس اختة

_واني

_يموت عليج جان الصغيرة كلها تحبج

نزلت دموعي مسحتهن ردت احجي بعد بس من سحبتني لحضنها سكتت ودموعنا نزلت بقهر
بوستني  بشوك ولهفة حضنتني  .

_هاجر: ماعرف شنو سويت عند الله ورجعتيلي بعد كل السنين والعذاب العشناة ثنينا صح انتي تعذبتي واني مو اقل منج الله يشهد كل فترة اوكع

_مرة شفتج بالمستشفى بجيت من شفت عيونج الحلوة تبجي

خلتني على صدرها تبوس بيه
_اسامة: عادي انام وياكم اخاف وحدي

_هاجر: عوفني وي بنتي روح نام وحدك

_لا هي سارة تحبني اكثر منج هسة تخليني

_لا سارة تحبني اكثر اني امها هسة شوف

صحت بيهم
_كواكب اسمي مو سارة ماحبة احب كواكب
لان موقعها بالعنان

_اسامة: تدلل كواكب

اجة نام بصفي واحس اريد افلت حتى لو الكاع تنشك وتبلعني نمت بسرعة من التوتر لان بنصهم كعدت قبلهم طفرت بسرعة غسلت وصليت طلعت للشارع سحبت دراجتي على كيف ورحت اشتريت ريوك وصمون مريت على الشغل هستوها تجي العمال سلمت على محمود واخذ مني صمونتين خليتلة بيهن جبن ورجعت للبيت دخلت طلع اسامة بوجهي باوع لايدي و كال  .

_لو منتظرة اشتري
_لا عادي اني هم مامتعودة اكعد بالبيت

لكيت هاجر كاعدة مسوية الريوك خليهن وكعدنا تريكنا طلع هو للشغل بكامل الاناقة وهي تغسل بالمواعين كل ماريد احجي وياها اريد اكلها خالة بعدين اتذكر واكلها  .

_اكلج ماتنغارين علية شوف شلون كاشخ
والعطر والاناقة هسة ياخذنة الشابات

_مرات افكر هيج واتخبل علية بس هو الرجال كلشي ماعندة يحب السفر والتفرفر
هي الشمس لازم تطلع على الحرامية لو عندة شي هم بين وانفضح

_صح والله

كشختة ذكرتني بالمثقف كعدت افكر بية واكول ليش ما اجة معقولة نساني مو يكلي احبج وخطبني من فقار معقولة لان رفضتة بعد مايريدني
سبيتة بصوت عالي من شفتها سكتت  .

طك كلبي على نيزك العصر بدلت وكشخت اخذنة اسامة ورحت الها طبكلي على الاسواق اشتريت حلويات لامير وصلنا فتح الباب ضرغام تفاجا
وامير تلكانة طاير شلتة ابوس بية.

_عيني خالتك شجابتلك

باسني بخدي يصيح فرحان
_نااانا ازت تواتب دابتلي هلويات تومة

طلعت نيزك تضحك بطنها بارزة اخذتها جوة اسلم عليها واعاتبها:: ليش ماتجين مو تدرين بيه مااكدر افاركج هواي

_حتى اني والله بس غير محد يقبل طردوني من اختي  الله فدوة لله شطالعة تخبلين هاي منو الحلوة

_ضرغام: وين ام دجة اشتاقيت الها ليش بدلتوها ترة ماكو منها هواي

_كواكب: السجاجين بعدهن عندي بالبيت
تريد ادجك كول لاتستحي

_ضرغام: رجال صاحب بيت ومرة منو الهم لو رحت بيش طالبتني يابة جهالي منو الهم

_كواكب: كواكب لديهم لاخوف عليهم
ادللهم

غمني وكعد يكلي
_تريدني اموت حتى تاخذ اختها وترتاح

ضحكت وبكلبي اكول اسم الله بيش طالبتك اختي منو الها غيرك هاجر تلعب بعلي وتبوس بيه منشنش وصاير يخبل اخذتة بستة وامير كعد بحضن ضرغام يكلي  .

_امير: نانا بيها اويد اسمية هاي

خلة اصبعة على راسة يفكر وضرغام كلة
_نسمية قسور

_كواكب: بعد جسور احسن

_ضرغام: هم خلت راسها بابا انتي شفهمج بمعاني الاسماء

_بس انت تفتهم بكلشي ما اسمية ابن اختي وبكيفي

_نيزك: اني هم اكول قسور اسم ثكيل

_ضرغام: اتفقن بعد حتى ما اسمية

_اسامة: طباب خير سموة ليث اسم حلو

سكت ضرغام خازرنة كامت نيزك تسوي جاي واني وياها بقو جو خلت القوري وسحبت ادية تبوس بيهن بالعادة اني ابوسهن لان تعودت من مريضة ابوسهن الها  .

_شلونج ضرغام شلونة وياج الجهال شلونهم

_الحمدلله الف الحمدلله
ضرغام ابونا صاير والله ياكواكب ماكو بحنانة علينة يموت على الجهال وعلية خو امير يبيعني ويشترية والحمل زين كلش هو مايخليني اتعب لو اعصب اخذني ذاك اليوم سويت تخطيط لقلبي
كال اكو تحسن ملحوظ بنص الخير اني بس بالي وياج انتي شلونج شلون الوضع وياج

_اجو كعدو يمي لان بقيت وحدي ومارحتلهم
نيزك كلش حبابين بس احس مو بتهم اني
حتى من يكلولي بابا اصفن وماكدر انطق واكلهم بابا لو ماما

_طبيعي هالشي بس انطي فرصة لنفسج
والهم خليهم يعبرون عن مشاعرهم تجاهج لاتصدينهم

_باعي اخذوني جابولي ملابس كلش مثقفين هما

_على طاري الثقافة المثقف شنو اخبارة

_والله ماعرف ولاشايفتة يمكن راح يتزوج من تف علية كون هو ومرتة

ضحكت ترتب بالاستكاين
_نيزك: شبيج محترك دمج مو ماتردينة ورفضتية هم يريد يتزوج كلها تزوجت بقة بس هو خطية

_عمي دطيرو اني مال زواج زفة وهلاهل يععع
_تردينة بس ماتردين عرس؟

_والله انتي مدري شلونج اروح يم اهلي احسن
مشيت صايرة اعصاب وهي دكلي
_ها صارو اهلج واحنا كش عاع

جابتلنة جاي ومعجنات ماطول كاعدة تسوي ولايكول هي مسويتهن بالبيت ابد اكلنا واخذنا شوية على السوالف كمنا  .

ثاني يوم كعدت غبشة صعدت فوك السطح
انداريت جيرانا عدهم حمام بالسطح كلت كون اطفر عليهم نزلت جبت خبز سوتة صغار وطشيتة يمي بالكاع صيحت  .

_كش عاع عاع تعالن ياحمامات هذا خبز اكلن بخيري ما اعيرجن وحتى اشربجن ببسي بدال الماي الوصخ العايفة الجن هذا

هنا يباوعلي ويمكن عبالهن اذبحهن واسويهن مركة ما اجني تالي غميتهن ونزلت لكيتهم بالصالة باوعولي سكتو ماحجو للضهر ضليت احوس اريد اطلع لبست شفقتي اخذت دراجتي هاجر تباوعلي منتظرة اكللها وين رايحة..

_رايحة لدراهم اشوفها خاف اتاخر مو يضل بالج

_تعالي اخذي تليفونج المن ضال مشمور

حتى ناسية اكو تليفون الي ولا مستخدمتة ابد ناسيتة ورايح من بالي اخذتة منها وطلعت سدت الباب وراي مريت بالسوك اخذت لحم ودجاج وسمج حتى لو مو دراهم تطبخ يجنها الفكريات يطبخلها وياكلن وياها عوافي على كلوبهن
اخذت مسواك كله لكط بيدي واتذكر ايامي من جنت ابيع مخظر هنا اخذت من كلشي وخفت لايوكع مني بالطريق  .

رحت لابو البسطية كتلة
_حجي انطيك فلوس واذا شفت ناس فقرة انطيهم مسواك بلاش رحمة لجبار ومرتة وام حربي

_الف رحمة عليهم يابوية والله هواي ناس تجي تعبانة

انطيتة مبلغ وادري بيه رجال خير وماياكل حرام جنت اشتغل واعرف شكد اكو ناس فقرة تتحسر على الفواكة كل مرة يجون ياخذون يا طمامة يابصل وعايشين الفلوس مالت الشغل خير من الله واخواتي ماياخذن ربع منها يكللي اتصرفي بيها شريد اصرف البيت وملك الحمدلله واني ماصرف هواي عاد هو تعبهم خل توصلهم صدقة  .

اكو رجال يبيع ماي وجاي جبير، وحالتة تعبانة شلت وانطيتة كلتة بثواب موتانة بقة يترحم عليهم واضل طول عمري اترحملهم ومن فلوسهم انطي صدقة عنهم  .

رحت لدراهم واخ يالاشتياق البعيجية راجعة وتارسة المنطقة من شفتهن عبالك شفت حبيبي نزلت المسواك ولزمت حصوات طحتلهن بس اريد اطيرهن وهنا ماقصرن بصوتهن العالي  .

_امهات الخيسة رجعتن بس والله المنطقة بدونجن ماتنراد بوسااااتي الجن

ضحكت فرحانة طلعت دراهم تسويلي بيدها
_دراهم: خبال مو صاحية انتي

_هلا بدراهم اجتج مديرة الاعمال والمشاريع
تردين اشتريلج بيت لو بس ابدلج باب وياج اغنى من سعد البزاز

_خاب ولي لا اريد هاي ولا هاي كفي مني

_لاا لا لاااا هو بس انتي عندي تالي ماترديني دشوفي شجبتلج من مسواك يلوك لهلحلك

اخذت المسواك دخلتة وجبت السلات فرغتة اخذت الدجاجة والسمج تنظفهن  .

_اكلج اني اروح اجيبلج عشا جاهز
_مو جبتي مسواك لو اله تفرفرين

_لا هذا مامستوي وانتي بيج حيل تطبخين
_انتي ماتصيرلج جارة وتحبين الدياحة مو بيدج

طلعت اضحك والله اختنك اذا ماطلعت افتريت اشتريت دجاجة كاملة مشوية وهي رزلتني

_مو جبتي دجاجة المن كاملة
_دراهم كواكب الفكرية راحت وراح زمانها هسة هاي كواكب الطاكة بت الطاكين والمثقفين اكلي اكلي هو عمر وخلصان

_ولج انتي مال ثقافة هسة تلكينهم يغمون برواحتهم لان انتي بتهم

_وعلي دراهم شنو من ناس جانو ولد سالم الخيسة يجيهم كلشي جاهز وهما خيسة ذولة يطكون بالكاع وهما يشتغلون خو ابوي بووووية دراهم شخصية كارثية مثل اليطلعون بالتلفزيون

_لو اني شابة جان خليتج تزوجيني اله

_حرامات بس هو طلع يحب مرتة الي هي امي
وكدام العالم علاقتهم ناشفة بس هما كلة عمري وحبيبتي

_الله يديمها بينهم دكولي امين فكس لهلعيون

_تنغارين مني ومن عيوني هو اني صوجي اجيج واسولفلج

اكلنا وسويتلها جاي رجعت الاكل الزايد بالثلاجة شربنا جاي  .

_اكلج دراهم ماتشوفين غضنفر هم يطلع من السجن اني حجيت وي فقار كال اوكلة محامي وبعد مارجعلي خبر

_هسة يطلعة لاتخافين

_ان شاءلله والله هالمرة انعل ابوة وبالنعال على راسة اذا ما جر عدل اخلي الشرطة تخلية بسجن جوة الكاع

ضحكت دراهم وكالتلي
_وضيمج وينة

شكد محملة علية بس واحد يسالني علبة انطلق مسبات وحجي علية فوخت كلبي ومن مشيت خليتلها فلوس كالت

_تونسي اطلعي لاترفضين الفرص يلغمة

_والله اذا كلولي صيري بالبرلمان اكيف ولا ارفض

_ام الوصخ وينج وين البرلمان
_اهلي ناس طاكين بس اكللهم يزورولي شهادة
ويقدمولي حتى ينتخبوني وحد عن السياسين هما بس يقرون ويكتبون مثلي

_طاح حظ العراق فوك حظة الطايح

_يزهو البلد بية وداعتج ما اخلي فقير بلليل افتر عليهم بدراجتي اجيبلهم مسواك

ضحكت من كل كلبها ودعتها. ورجعت ترقبت يحاجوني بس الحمدلله ماكالو شي كعدت وياهم على البلازما.

_اسامة: باجر ترحين وياي اسويلج جواز حتى نسافر

انصدمت وبقيت اباوع بوجوهم سفر خارج العراق ما اصدك وهم مارفضت كيفيت كلت خل اعيش مثل البشر مو كافي العشتة  .

من الصبح كعدت متحمسة عبالك طفل منتظر يصبح الصبح ويلبس ملابس العيد هيج شعوري بوقتها كعدت هاجر خليتها تختارلي ملابس على ذوقها اختارتلي بلوزة ناعمة بيضة فوكها سترة كوباي سودة وبنطرون واسع نفسها بوت ابيض وجنطة بيضة صغيرة لبستها صفح مشطت شعري لنص ركبتي مكصكص بعدة مايجي كصة وحدة
خلتلي التليفون بية واخذت فلوس لان ماعرف اطلع هيج جبت جناسي انطيتهن اله قرالها بصوت مسموع  .

_كواكب اسم الاب جبار اسم الام هيلة

تغيرت ملامحهم طلعت اخذت حلويات وياي
وطلعنا نسوي الجوازات احس روحي مو كواكب ذيج التدور شغل هاي كواكب ماعدها هم ولاشي تركضلة لبسها احلى لبس تريد تجرب اشياء جديدة شكلي والتعب البشرتي راح السواد الجوة عيوني من التعب اختفى حتى ادية صايرات بيض وحلوات   .

كملنا ودخلنا مطعم تغدينا ورجعنا سبحت وبدلت
لليل كال اسامة:: نروح نشوف امي جامعتهم كلهم
دكول راح اموت اريد اشوفكم

كلبي لزمني وملامحي غيمت ضحك هو يكلي
_شبيج هاي امي هيج تاخذ فترة تاخبرنة واحد واحد دكول هاي الكليشة تجمعنا ترزلنا تالي تمدح بينا

_هاجر: ماتحب يعوفونها ويبتعدون عنها ولدها

تحمست اروح واشوف المثقف ابو العطور كلبي طاك علية هاي من العرس بعد ماشفتة رحت لملابسي وكلت الا البس احلة لبس واصدمة جانت هاجر جايبة فستان شتوي كابوي رصاصي وردنة وصدرة بلوزة قنطية لون ابيض  بيها ركبة لنص الصدر توصل لبستها واخذت حذاتي الابيض يلمع
خليت شوية حمرة لشفتي ولخدودي رشيت عطر. وتمنيت ابوس نفسي كد ماحلوة اشوفها  .

طلعت وهاجر واسامة بلا ماكول مدحوني سحبني يبوس راسي ويكلي:: تخبلين بابا شنو من اناقة شنو من جمال اروح فدوة لعيونج الحلوة

_هاجر: هسه يلا ارتاح كلبي بهاي شوفتج الحلوة

سكتت وكلبي يدك بجنون وصلنا لبيتهم لو احس جسمي كلة يرجف ليش ماعرف  لاول مرة ادخل هذا البيت بصفتة بيت جدي وعمي مو غريبة
واني بنص اهلي جانو كلهم موجودين حتى ضرغام ونيزك سلمنا والانظار كلها علية واني كل همي اشوف ردة فعل ضيغم بعد ما يشوفني كل هالمدة
رفع عيونة باوعلي لو حسيت راح اوكع طولت بالنظر الة هو صافن علية واني صافنة علية عبالك محد موجود صوت ذهب خلاني افز واحس على نفسي بس بعد مافضحت روحي وكلهم انتبهو علية

_ذهب: تعاي يلعزيزة اخت العزيز

_ضرغام: تضاف للقائمة ام دجة صارو تلاثة
ابو ود بالصدارة لا عليش بالصدارة بعدها ابو ود بعدها ام دجة اليحاجيها بتفلة ترشة  "

خزرتة وهي تبوس بيه دكلة
_ضل كاتلتك الغيرة

_ضرغام: فافونة شسوي بيج وبمحبتج عندي مرتي تحبني بعدال الدنيا كلها تحبني

_ذهب: زين ومنها تحبك انت هم تنحب ضل لاطش بيها ماتحصل بعد وحدة تحبك منها لله

سوالفهم ومناكرهم ماتخلص وصدك بدت ذهب ترزل بيهم واحد واحد كاللها قبس،..

_ذهب انتي مو كلتي راح اموت واوصي وصية شو دك رزايل طحتينا هو اليريد يموت يرزل  ؟

_ذهب: خو انت تريدها من الله اموت وتاخذ حصتي بس موت ما انطيك شي منها

_قبس: هسة اني ميت عليج اشتريج واشتري حصتج

ضلت تنعي وتبجي والكل متاثر مسوي روحة
خلصت وضلت تسال بالبنات عن صحتهن وتدعيلهن يجيبن بالسلامة رجعت علية تباوع  .

_وانتي ولج صايرة فلك جنج بت وزير

_كواكب: راح اصير وزيرة بالبرلمان ابنج كال راح ارشحلج

_ذهب: ياااع صدك؟

_كواكب: اسئلي ابنج مو اني اتابع اخبار وسياسة
كلشي صرت اعرف بالبرلمان كال ارشحلج وهسة راح نسافر حتى يطلعلي الجنسية الامريكية

باوعت لاسامة يضحك من كل كلبة واني احس روحي احتريت كلهم اباوعلهم كاتمين ضحكهم
وبس ذهب مصدكة  .

_ذهب: وانا حبوبتج اجيبلج نسوان ينتخبنج بطانية

_كواكب: عليمن بطانية نطيهم مسواك

_ذهب: لا ولج بطانية لان شتة

_يلة افكر

باوعت لضيغم عيونة علية رفعتلة حاجب وقبس يخزرني درت عيوني منه  .

_اسامة: احنا ان شاءلله هالكم يوم نسافر نغير جو

_ذهب: انت ويامن

_اسامة: اني وهاجر وسارة

_وانا امك!!

_اخذج اكيد كلت مانروح الا وياج

_ذهب: راح تاخذنة للمصلخات ماروح ولي انت

_اسامة: هالسنة للحج اخذج
واروح

_ذهب: اي يبعد امك فدوة اروحلك بس انت ابني يروحولك فدوة وسبع فدوات

_ضرغام: عمي شتريد بعد روح رضت عليج

باوعتلي ولزمتني من بلوزتي
_ذهب: ولج ما دكولين حبوبتي وتجين تشوفيني بلة متت مو تضلين دكولين امدامي مارحت اشوفها؟؟

_انتي تموتين واني ابقى عايشة صدك تحجين اموت وياج فرد دفنة نندفن اني عايشة على انفاسج

_ذهب: يا فدوة شوفو ليش احبنها هالبت

_ضرغام: خوش تحمة طالعة عليج نسختج شلون ماتحبينها الدراما فول عدجن

_كواكب: ذهب اتبري منه واطردية المن مخليتة يجي باب جرجوبة أصلاً مايحبج

_ذهب: علمود اخوة عايفتة عليش مايستاهل اطرد اخوة واعوفة وحدة

_كواكب: صح خطية

رجعت ترزل بولدها وتسولف رحت يم البنات اسولف واشوف احوالهن كلتلهن على سفري فرحن
كلش  .

_ورد: اكلج ماتاخذيني وياج
_مو عندج دراسة ولي ادرسي
_امدة الدراسة تونس هي بس كابة
وانتي بووووية صايرة تموتين

_نجمة: هي حلوة من كاعها بس هسة صايرة تخبل واحلى

_كواكب: بس انتي على كلبي

عفتهن يسولفن وطلعت بالحديقة اشتم هوى افتريت اتذكر مكاني اني وياة الخايس حنيت وبكلبي غصة اله صارت خاصة من اتذكر ايامنة شميت عطرة جابة الي الهوى التفتت وراي صاير
طير شعرة الهوى رفعة ورجع نزل ضاج منه وكال

_الا ازينة صفررر يلا ارتاح
بلا وعي كتلة
_اموتك بس تزينة وادخل بيك سجن
_عاجبج شعري؟
_حلو ينلعب بيه بسرعة

للحظة سكتت وكلت اني شجاي اخرط ولج انجبي راح تفضحين روحج بعد اكثر تقرب اكثر توترت
_ماتلعبين بية؟
_انجب حرام ماتستحي صاير
_نتزوج من جديد

بلعت ريكي كلبي هاوية وروحي الغبرة متعطشة على شوفت عيونة الحلوة عطرة شعرة مشتاقة لشوفتة كل هذا واني اكلة  .

_ماريد اتزوج
_ليش
_اريد ابقى حرة اطب اطلع بكيفي انت تخنكني

شفت قبس طلع باوعلنة عفتة ومشيت بسرعة مريت منه كتلة بتوتر وجهي نار  .
_بس حجينا على السحورة

هو الولد أصلاً ما سالني بس استحيت ياخذ علية نظرة وهما عرفو جنا متزوجين دخلت جوة ولزمتني ذهب كدام اسامة دكلي

_ولج ليش ماترضين بابن عمج ضيغم

سكتت واسامة رد
_نرجع من السفر وافتحو الموضوع

حسيت روحي اشتعلت نار صدك ذولة يحجون عفت كل الافكار ومشيت يم البنات بالي مو يمهن
وردة كلتلي على تليفوني سجلت رقمها عندي كتلها
_ترة ما افتحة

_ميخالف من اتصل افتحي

رجعنا للبيت وبعدها سافرنا شعور جديد واني احس صرت شخصية جديدة قبل اشوف الناس تنقهر علية وتستعطف من تشوفني هسة احس الناس يباوعولي بعين الجبيرة لابسة بلوزة ردنها بف عريضة توصل وي الورك وبنطرون وباتة
اسحل بجنطتي واريد اطير بالمطار ومن صعدت الطيارة الناس تخاف تنام اني اضحك مامصدكة
اصعد طيارة بحياتي كلها وصلنا للبلد واني في قمة السعادة من اشوف المكان والناس كلشي راقي
الجو ثلج هناك لبست قمصلة وتوجهنا للشقة ارتاحينة نمت كم ساعة وبس كعدت لبست لكيت اسامة شافني كلي فرح ونشاط راح جاب قمصلة فوك ملابسي الثخينة لبسني  .

_اسامة: الجو ثلج برة

كالت هاجر ما اطلع تعبانة لبس قمصلة ام الكلاو وطلعنا نفتر كل واحد مخلي ادية بجيوبة ومجرد ما افتر فرحانة اشترالي اكلات حارة هواي جربنا واحنا نمشي صورني واني اكل واني امشي واحجي كلي  .

_ذكريات تبقى

واحلى الذكريات العشتها وياهم خلال هالسفرة تعلقت بيهم بشكل مو طبيعي وحبيتهم فعلاً عوضوني عن ذيج الايام باهتمامهم وحنيتهم ومستحيل تخيلت هذا الانسان الجامد هيج حنون
كل يوم نطلع نفرفر ونشتري وناكل يتصل بناتة ويحاجيهن واني هم احجي وياهن كلش فرحانات
يكلن لامهن  :: هسة رجعت اختنا سارة

سوولي واتساب وخلو ارقام الكل بيه اخابر اخواتي وادزلهن كلشي اصورة بتليفوني
ضافني بكروب مسويتة وردة كاتبة عليه
_نسوان بيت ليث "

من ادز شكد يدزن بصمات
ويحجن وردة ردت على فيديو دازتة
_ضليت علمود الدراسة انعل ابو الدراسة اروح اشوفلي ضابط بالواتباد اتونس على سوالفة

ردت عليها شهب
_ام الضباط ماتجوزين انتي من الضباط

_ورد: دباوعي لروحج ما اتابع المصلخين
والبطل ينزع قميصة اضل اباوعلة عاد اني بس اقرا كتابة ما اشوفة شلون يبوسها يلا ولي معليج بيه اقرا وفنة اليحاجيني هسة اشوف شيوخ
ويكتلها بعكالة عندج اعتراض

دزتلها غمات وطلعت وردة ضلت تحجي اشكال ضحكت عليهن من كل كلبي قبس وفقار يحاجوني وحتى ضرغام من اخابر نيزك نتعارك بس ونسة عدة العركة  .

دنيا الليل والجو بارد متلفلفة وبيدي التليفون كلهم اسمع صوتهم واعرف اخبارهم الا هو ليش ماكو
ماكدرت اتصل بيه صفحتة عندي واني ماعرف منو مخلية كلبت بالفيديوهات والصور العندي جان اكو فيديو رسلة الي ابوي اني اضحك بيه وخدودي حمر صايرة مطلعني حلوة بية دزيتة اله وعندي صور حلوات دزيتهن بدون ما اكتب شي كلبت ورجعت بلكت يشوفهن نعست واني انتظر يشوف فزيت من لكيتة كاتب  .

_ضيغم: اضحكي و ونسي روحج اني انسيت

طلع جاري الكتابة دز
_ جنت عبالي عزيز تالي اطلعت حال الغريب
كتبتلة: شبيك؟
_ماجنت متوقع نفسي مو مهم جنت عبالي اني الاهم  !

_شنو صاير شاعر؟
_الشاعر من احترك گلبة هاجت عندة المشاعر وصبح شاعر

_بيك شي انت؟
_مو مهم عندج
_شبيك مادكلي؟

اتصل فتحت
_شبيك اليوم
_مايهمج اني صارو عندج اهل واخوان شنو ضيغم بعد

_شنو تغار؟
_لا ليش اغار اهلج ذولة نسيتي الجان كاعد يم راسج للصبح

_تعيرني؟!

_اذكرج كواكب نسيتيني وصرت مو مهم
افتحي كاميرا

فتحت كاميرا انقهرت من كلامة جان ما لابس تشيرت بس فتحت ثبت التليفون كام للكنتور منطيني ضهرة والوشم طالع علية لبست تشيرت ورجع نام سحب باكيت جكاير طك الجداحة ورثها يدخن واني عيني على الجكارة  مدها الي   .

_تاخذيلج نفس واسحب وراج نفس
_ضيم

حجيتها بهمس منعسة
_روحي نامي لاتحجين كافي الجكاير تحرك كلبي مو ثنينجن علية

غمضت عيوني والتليفون كدامي فتحت وكتلة
_راح اسدة؟

_فدوة عوفية مفتوح ونامي

ماناقشت غمضت ونمت فزيت على كعدتة يدخن
فركت عيوني رفع شعرة عمداً احسة
همست احس روحي سكرانة مو بوعيي  .

_احبك ضيم

عدل كعدتة وشمر الجكارة من ايدة
_تحبينيي كوكبة؟
_احبك والله اشتاقلك هواي
_تشتاقيلي  !!!

_وهم اتذكرك كل يوم والله ما نسيتك
_يابوووية صدددك؟

_والله احبك واحب عطرك وشعرك
واحب اهتمامك وسوالفك

وكع التليفون مارفعتة بعد غفيت والصبح تريكت وبدلت اطلع دورت تليفوني لكيت مدة المكالمة
خمس ساعات بلعت ريكي وهو مصورلي مدت الغرفة محتركة كاتب  .

_نسيت روحي من كلتي احبك
شمرت الجكارة وهي مشتعلة كابة الغرفة نار واني صافن وما منتبة عليها لو محترك وميت
يفيدني حبج؟

ضحكت مارديت علية خلصت مدة سفرنا ورجعنا تلكونا بالمطار اخوتي بوسوني وهو يباوعلي عيونة تحجي رجعت للبيت وياهم هم اخواتي وهم اهلي منا بداية جديدة اكعد اني وابوي على التلفزيون اخبار وهو مو دوم يكعد بس علمودي يكلي سويتيلي واهس وين مانكعد نتناقش بالسياسة

_قبس: انتو شناقصكم عوفو الاخبار والسياسين
_كواكب: مو راح اقدم بالبرلمان
_قبس: ذهب الثانية بوية

ضحك ابوية وحضني البنات يباوعلي عيونهن تدمع
_اسامة: ماتعوف اختك تسولف وتتامل تكملين دراسة؟

_كواكب: لايابة بالي مو وياها بعد

ومن يروحون اكعد وي نجمة دك سوالف وهمبلة من يجن البنات خطار احسهن يغارن لان علاقتي باخواتي قوية كلساع وكالن  .

_ترة احنا اخواتج مو ذني

_صح ذني مو اخواتي ذني روحي من الدنيا

اسحبهن ابوس بيهن بقوة مو اريد اغورهن بس اريد اعرفهن هنا شكد مهمات عندي واني احبهن

_شهب: حجزلي قبس موعد عند الدكتورة بدلت ونزلت اخذت كتابي بيدي اقرا بيه احسن ما اضيع الوقت مني بكد ما اقرا ناسية الدنيا ومركزة على شي واحد شهادتي من اخذها يلا اطمن واحس روحي بخير  .

لكيت قبس يحجي وي كواكب وهي تاكل موز شمرتة وكالت:: الموز يذكرني بلقيس وميار العيارة الله يذكرهن بالخير كون اشوفهن بعد

ها انتي وين ماترحين بيدج كتابج ابنج يطلع يمتحن بدالج ياخذ ميات لان دارخ المواد

ضحكت. وطلعت طلعت ورانا مادة راسها وفنة اليكللها ادخلي مرة طلعت بدراجتها وتاخرت ثاري رايحة لدراهم وبس حاجوها صارت عصبية تصيح بيهم  .

_ادري بيكمم اني موتوني اخنكوني احبسوني ارتاحو هيج اني اطلع بعد ما ابقة يمكم صوجي اجيت

سكتو عنها وهي صدك تريد تروح تالي هاجر سكتتها دكلها خيولون وين ماتردين اطلعي
وصلنا للدكتورة وقبس نزل وياي كاللها اريد اشوف الجنين تمددت وخلت جل على بطني ومشت الجهاز  عيني بالشاشة وقبس مركز طلع الطفل جسمة كامل لزمت ايد قبس من الحماس ضغط عليها قوي يضحك  .

_قبس شوف شلون صغيرر

_ياروحي فدوه.. دكتورة شنو جنسة
_الدكتورة: بس لا تريد ولد

_قبس: كلشي الجان احطة بروحي

ضحكت وكرصت خدي كالت
_جايتكم بنوتة ماما

فرحتنا ماتنوصف بالخبر اخذ يبوس بيدي ماصدك يوصل للبيت بلغ الكل ونجمة حضنتني فرحااانة
_راح اصير خالة فدوووة

_كواكب: واني اصير نعالة هم خالة اصير

_لا انتي عمة
_انجبي خالة غير انتي اختي
_قبس: واني مو اخوج؟

_كواكب: لا لا اخوي اهووو يلا اصير خالة وعمة بس اني وي اختي وعلي اتعارك وياك واخذها بس تضوجها

باسني بخدي بقوة غمتة وراحت ضايجة لان كدامها وهي المصيبة تغار علينة بس من فقار ابد ماتغار اذا شافت ضرغام لازم ايد نيزك تكوم ماتتحمل  .

الكل بارك النا وفرح بالخبر بالليل طلعني وكواكب راد منها تجي كالت ولو اشوف البرامج احسلي

_قبس: خلي البرامج تخلي بجيبج

تونسنا ورجعنا كل واحد بغرفتة وكواكب عدها غرفة تطك بالكاع هي ود كلش متعلقات بعض
بس كواكب ماتنام وياها دكول خاف تتعود علية
وهي مخلية بالها غير شي  .

بدلت واجيت كعدت على الجرباية
_اختبرني بالرياضيات اكتبلي اسئلة واحلهن

سحبني علية
_اختبرج باسئلة صار
_بالرياضيات اريد

باسني بركبتي وايدة يمررها على بطني
_هسة اختبرج
اكلج خاف اذا احجي شي البت تتفوسد
_صح تسمع لاتحجي
_شلون بلة اشاورج

_مامليت كافي خليني ادرس
_انعل ابو الدراسة وقتي هذا ماتاخذج مني
لاهي ولا الدنيا بكبرها

الصبح كعدت من غبشة علمود الدراسة كعدت اقرا هو لبس ورايد يطلع تذكرت موضوع ما فاهمتة كتلة وبقة شرحة الي وكتبلي اسئلة من الكتاب كال حليها حليتها على السريع وانطيتها اله كرص خدي

_سنجوبتي شطورة ماشاء الله عليج

ضحكت بفرح شكد احب من يمدحني لان افهم واحل بسرعة ويكلي شطورة لليل كلنا مجتمعين نتابع تلفزيون وكواكب مندمجة كلش شلون صايرة اليشوفها مايعرفها سمنانة وحتى خدود صايرتلها
النهار كلة بس تاكل وين ماتكعد تاكل وهاجر تسوي اشكال علمودها عمتي شكد تغيرت من اجت جانت شكل وهسة شكل بوجودها وحتى عمي صار مايسافر هواي. ويكعد بالبيت علمودها يتونس ويضحك على سوالف كواكب المعروفة   .

ومن تكعد وي قبس شوية ويتعاركون لان تجفص مو مثل فقار كلش تحترمة وشيكول هو الصح
اندك الباب راح قبس فتحة ورجع دخلو ضيغم واهلة وذهب وياهم دخلو وكعدو سلمو كواكب لزكت بالمطبخ صارت تصب عرك رغم الجو بارد
عرفنا ليش جايين خطابة عليها  .

_ذهب: ها شكلتو هذا ضيغم السبع الحلو الشغيل جبير ابوة وحبيب كلبي وروحي يريد بتكم مرتة سابقاً وبت عمة

_اسامة: نشوفها شنو دكول ولو احنا مانريد نزوجها هسة

_قبس: بعدها صغيرة نريدها تكمل دراسة

_ضيغم: مو صغيرة منين صارت صغيرة وهي الدراسة شتسوي بيها مالها خلكها واذا رادت اني اخليها تكمل

_فقار: بلة كلبت عليها وكلت ماتكمل شلون ماترهم؟
لا خليها تكمل تتخرج هي عدها طموح تدخل علوم سياسية وبالواسطة نعينها

_ضيغم: شبيك فقار مو تعرفني ما اخلف بكلمتي ليش هيج وياي

_فقار: اختنا بعدنا ماشبعانين منها ومن سوالفها الحلوة مانريد نزوجها

_ذهب: شني بكيفكم والعباس ياخذها لا اهجولكم
بس انتو تزوجتو ونسوانكم راح تخلف جا ماتحسون دكولون ابن عمنا

_قبس: هسة ازوجة بس يكول

_ذهب: شوفو ولكم انعل سلفة سلفاكم ياخذها وغصب ماعليكم شني راح اموت ياهو اليزوجة وراي يضل عزابي هي وينهاااا ولج خايبة تعاي كليلهم موافقة

ضلت تعض باصابعها تطرد باخوااتة الوكفات يمها
_كواكب: روحن سمتنها فضحتنا

راحت وردة كالتلها
_ذهب دكول موافقة

هلهلت بصوت عالي وكلهم يخزرون ورد الا هو فرحان  .

_قبس: انتي اكبر جذابة ولج هي ماتريدة بكيفج

_ذهب: االفااااااااتحة اقروها ولكم
عزرايئل واكفلي نعلعلة والدية المايقراها

قروها الا اخوانها بقو يخزرون بية كمل ومسح وجها يكول:: امين يارب العالمين

_ذهب: يلا عكبة الخطبة باجر جهزو راوحتكم

_قبس: هو شنو بكيفج عكبة شو وحدج تحجين

_ذهب: راح اكوم اكسر راسك بهاي عوجيتي
وشكو واحد يحجي ادعي علية دعوة واحد يريد يموت ينفذها الة ملك الموت

كامت حتى لايحجون وسحبت ضيغم وياها حتى تخليهم كدام الامر الواقع.

_ذهب: احنا رايحين حط الفلوس حبوبا جوة الفراش حتى يجهزونها احنا اهل خير عروستنا نجهزها بفلوسنا

خلة ضيغم ضبة فلوس وخلة الكوشة عليهن وطلعو
كواكب لبدت ورة نجوم عود تستحي مدري صدك استحت شو ما اصدك تستحي وردة تريد تبقى

_قبس: دتعالي اعلمج على جذبج واكتلج كتلة

_ورد: هي اختك راضية بيه شعليك انت تغار من اخوي لان احلى واحسن منك

راحت تركض قبلهم وهو يصيح عليها طلعو وكواكب صعدت لغرفتها قافلتها عليها حتى من اندك الباب ماترد علينا  .

_هاجر: هسة ماعرفت هي تريدة لو لا

_نجمة: شلون ماتريدة هذا ضيغم صاحب الوكفات هو مواقفة تنسي وياها تريدة ماتشوفينها خنست لو ماتريدة جان طردتهم بالتفال..

ثاني يوم اجت نيزك وكواكب تخبلت علينة مانفهم شتريد نيزك تحاجيها بهدوء بس هي تعرف تطلعها

_كواكب: ماريد بدلة وماريد خطبة وحنة وعرس

_مو بكيفج بدلة اي عادي البسي قفطان بالخطبة وعود بالحنة فستان والعرس بدلة نشولفلج حلوة وتعجبج

_ماكو شي يعجبني

_لا اكو ندورلج

اخذتها وراحت وياها اخواتها وامها اشترلها قفطان وباقي التحضيرات ثاني يوم كلشي جاهز راحت صالون نجوم راحت وياها ونيزك رجعن مكيجات وهي تجن مركباتلها شعر ومكياج خفيف بس حمرة طوخ مثل ماتحب نيزك اجت فحطانة تصيح  ..

_شلعت كلوبنا وكلب ام الصالون

نجوم تصور بيهة وما تلحك اخذنا صور جماعية نيزك احسها فرحانة اكثر، من امها واهلها اجت ميس عازمتهة كواكب وبعد ماعازمين احد خطبة عائلية ماكو غريب اجو وخالاتة ماعاجبهم الوضع واسمعهن يحجن   .

_عاف البنات اشكال راجعلي على ام دراجة
الوشومة تارسة جسمها

_شهب: ميت عليها موتن قهر ما اخذ بناتجن
يلا وشتريدن موشومة وراداها يعرف كلشي عنها ودك روحة عليها

باوعتلي لان شافتني عصبية سوتلي شكو سكتت ادري بيها تتعارك هسة وياهن وتصير هوسة  .

_كواكب: صافنة اباوع لنفسي اكول اني بحلم؟
اني كواكب اصير لضيغم الرجال المثقف اول ماشفتة انعجبت بية معقولة؟ هواي ياربي علية
عوضتني باهل وهسة راجع تكافئيي باحسن رجال تعرفت علية ويحبني ورايدني من كل كلبة  .

ذهب يمي تباركلي تهوس وتصفك
فرحانة بس مو بكدي صح فرحانة وكلش هم بس ماكدر ابين مشاعري بدا يحجي الشيخ ضحكت من وصل .

_كواكب جبار هل تقبلين الزواج من ضيغم جواد

حسيت بيه تذكر من ضحكت ردت اكلة
صخمت وانت صخيمي اااخ جنت مريضة وطالعة روحي من الدنيا واهلها وهسة بكامل قواي العقلية
والجسدية كتلة بعد ماعادها تلث مرات

:: نعم موافقة بالزواج

بعد ما انطة موافقتة الهلاهل طرشت اذني والمباركات صارت تهل علية ارتبكت وكلبي صار طبول دخل الضحكة شاكة حلكة واذاناتة حمر صايرات ضميت ابتسامتي كوة اسوي روحي مامهتمة باس راس ذهب وامة وخالاتة باركلة وكف يمي يباوعلي عبالك ربحان جائزة غالية صدرة يصعد وينزل والفرحة تارسة وجهة ومبينة علية
وكفت همس بذني  .

_بالمبارك عليج مرتي

اختفت الاحرف من لساني وجسمي رجف موبس ادية لبسنة الحلقات واخذنا صور دخلو هجوم علينا ضرغام وقبس وفقار  .

_قبس: يلا كافي اخذتو صور كيك اخذ وياك وروح

_ضرغام: يلا عيني مادام لبست الحلقة ارجع لاهلك

_ياسمين: شنو السالفة بعدة هسة كعد

_سهلة: متفقين علية ولكم

طلعوة كوة حسيتة يريد يبقة بس ماراد يتعارك وياهم وكلهم:: اول وتالي اخذها ما تطول عدكم

احتركو حراك اخوتي برا اسمع صوت حسين ومحسن كلبي طاك عليهم وعلى سوالفهم لو مو العروس جان طلعت  اسمعة يكلة  .

_حسين: تتفق وياي موحسن
_اتفق وياك ضلعي

طلعت ذهب كلولها
_زوجينا احنا بصاية الحرمة
_ذهب: يا صار وعلي ازوجكم
_حسين: اخذينة وياج اعتبرينا بنكلادش نشتغل بلاش بس انطونة غرفة
_محسن: حياتنا مأساة حسن من ورة رفيلة
مايكعد بالبيت وبس شابع كتل واحنا وياة علواهس

_ذهب: نعلعلة ابيكم الجلب الا اخذكم
واشوفة يجي عليكم هالاغم من كون غمة التغمة
تعالولي حبوبا بس قنعو امكم

_حسين: والله انتي ذهب صدكي تتفق وياي موحسن

_اتفق وياك ضلعي

ضحكت واني بمكاني والله حنيت الهم ولسوالفهم
بدلت واخواتي يمي ومن اكول اخواتي اعني نيزك الغالية على كلبي حبيبة روحي ونجوم وشهب
قطعة من كلبي  .

لليل راحت بلشنا نحظر للعرس مستعجل الاخ
واني شايلة هم للعرس شلون البس بدلة
موبايلي مشمور ولا شفتة بعد احاول ابين نفسي طبيعية بس استحي منهم وطول الوقت ساكتة واني الجنت بس اسولف  .

رحنا نسوي العقد كشخت فستان وصرت اخبل دك ما ياخذني الا ابدل عاندت ورجعت نمت وشكد قنعوني عناد بية ما كمت وياة وراح اليوم  .

اجاني فقار جنت اكل وتارسة الكاع اكل عبالي يحجي على العقد بس صدمني وطير كلبي من كال

_غضنفر طلع من الشغل

غصت الكمة بلعومي ومن الفرح مو عارفة شسوي
نزلت دموعي مسحتهن ولزمت بيدة..

_فقار فدوة شوفلة شغل وكلة على بيتنا اذا يريد يكعد بية واني اجيبلة مرة

ضحك كلي
_مراحل حبيبتي هسة خلية يشتغل والله كريم

_دبرلة شغل محترم فدوة اروحلك والله هو خوش ولد بس من ورة اهلة

باسني براسي وكال
_ادللي ادورلة شغل بمكان زين واتابعةة

_دروح وعلي انت احسن رجال بالدنيا فدوة اروحلك

كرص خدي وراح وهذا احلى خبر صرت احس نفسي بمرحلة السعادة اجتني نجوم بالليل تكعد بية

_هاااا خيرررر

_رجلج خبصني جاوبية راح يموت

_منو هذا هذا ضيم ابو العطور اليتشيم

_الله يساعدة عليج والله زين وتذكرتية

_ولي يلا ولي

غمتني وراحت لو الزمها الة اكتلها كتلها
_الا اكل لخوي عليج مرت اخوي الحية سممم سممم افعى

ماتحملت طكتها بضحكة سحبت تليفوني لكيتة مشتعل مكالمات انرعبت دخلت علية ضليت الطم هذا مايمل شكد متصل اتصل جاوبت انهد علية  .

خليتة يحجي براحتة كال
_انزلي بالسيارة منتظرج

_ما انزل كول شرايد
_كوووواكب شنو شرايد هذا اسلوب
رجلج اني

_اليمنة لو اليسرة

لطمت حلكي وسديت التليفون بوجها كمت اشوفة من الجامة برا منتظرني يباوعلي غلست عنة خل احرك كلبة مثل ماحرك كلبي الموبايل خبصني عفتة ونزلت على كيف فتحت الباب وطلعت للسيارة ركضت اول وصلت سحلني من ايدي ودخلي عصر وجهي قوي بيدة صاير نار ينتر بية  .

_ليش تحركين بگلبي تستلذين بعذابي انتي؟

_اطلكك وعلي عوووفني

بصعوبة يجر النفس كتم عصبيتة من شاف عيوني دمعت وانهضمت منه. 

_باجر نروح نعقد بس البسي شي مو ضيك
_ماروح محكمة طلكني يلا

نزلت دموعي مسحتهن سحب وجهي دفعتة بقوة اخذ شفايفي وخر كوة يحجي عيونة ذبلت واني بين ايدة صرت كلني.

_باجر.. باجر كوكبة نعقد حتى نتزوج

دفعتة وهزيت راسي ركضت ماكدر اركض نحلت دخلت وسديت الباب وراي ماصادفت احد كبل لغرفتي كعدت الصبح لبست شي عريض وطلعت
بدون حجاب عاجبني شعري ماكدر البس  .

عقدنا وكلعادة مناطح ناخذ الطريق بدت التحضريات وفتح عين غمض عين صارت حنتي مثل ماخططت فستان فخم بتصميم يموت لون احمر كرزي يجنن قماشة متت بية سوينا حفلة
بس بنات صارت اخواتي بقن يمي يجهزن بية
ونمنا سوى حضنت نيزك الكرشها كدامها واني متعودة دوم احضنها وانام حاسبتها مثل امي بس اخواتي ينغارن عبالهن عمداً اسوي هيج كدامهن مايعرف طبيعة علاقتنة شنو  .

البيت صبح بية حزن على غيابي وامي تبجي شلون تفاركني صح ماعشت وياها هواي بس ثبت بالفترة القليلة هي امي حتى اني ضجت من شفتهم ابوي يبوس بية ويكلي بعد ويامن اناقش بالسياسة نزلت دموعي ودكيت رجلي بالكاع...

_انعل ابو الزواج بطلت ما اتزوج اني هم صوجي وافقت هسة يخنكني مايخليني اطلع بدراجتي لدراهم  .

بقو يقنعون بية اروح للصالون لان صدك بطلت كلت هسة المن قبلت اخذني فقار للصالون بسيارتة ونجوم ود ويانة نيزك رغم بطنها تاذيها بس ماعافتني حتى من كتلها لاترحين كلتلي  .

_اكو ام تعوف بتها وحدها؟

رفعت ايدها ابوس بيها
_نيزك وعلي معزتج بكلبي ماتنوصف

حضنتني وفقار يباوعلنا بالمراية نزلنا بالصالون وصى نجوم وذممها ماتخلي مكياج صارخ راحت ورجعت علية دكلة  .

_حباب عادي اخلي حمرة طوخ
_ممنوع بابا
_حباب استاذ حباب

عبالك طفلة وتحاجية ضحك وضرب على خشمها كلها:: ما اضمنلج نفسي اعوف العرس واخطفج

_بعد ما احط تسويها

ضحك وراح مرت ساعات يلة جهزت بدلتي كلش عاجبتني وميتة بيها وبتصميمها حابة المكياج وكلشي يجنن وحلو بس ماعرف شنو احس خايفة على متوترة على ماريد اتزوج واكول ابطل هسة
لو انزع البدلة واشرد من الصالون علساس مغصوبة

اخذنا صور واجة هو اخذ صور وياي بس لعبت بية طوبة كوة صورنا بالف عركة راح واجو اخواني طلعوني عيني على اخواتي وبالي اشوفهن وين
رجعنا للبيت واجو اهل العريس محاوطيني اخواني وابوي وضرغام وعلي كلهم وياي بوسوني اخواني وابوي وامي كوة ماتبجي هنا ردت ماروح واعوفهم لان تلمست شعور العائلة الامان المحبة الخوف الاهتمام كلة بيهم ووياهم عشت اجمل اللحظات السعيدة  .

دخل ضيغم وابوة وعمامة وذهب بالهوسات دخلت
ارتعش كلبي ابوي اخذ بيدي وخلاها بيدة نزلت دموعي وعيني صارت على اخواتي اليبجن وياي
اريد اكللهن شوفن نعمة ربي وعوضة اله
شوفن بعد التعب بشنو جازاني ردت بس اهلي اعرفهم منو هما انطاني اهل ردت بس استقر واصرف على اخواتي بعيد عن سالم اخذ مني اخواتي وطشرنا تذمرت وبجيت ليش هيج صار ويانة اخواتي عوضهن بزلم ينشد عليها الضهر
سالم اخذ حقة واني عوضني عوض ماكدر احمدة عليه  .

_اسامة: مبارك الكم حبايبي شايفين كل الخير
يارب السعادة والتوفيق يرافقكم وين مارحتو
العائلة السعيدة ان شاءلله اتمنالكم حياة مليانة حب وسعادة.. ضيغم ابن اخوي وحالك حال ولدي معتبرك اليوم كدام العالم انطيتك بنتي اميرتي المدللة تمنيت اكدر ادللها واسفرها واونسها اكثر
بس يلة ميخالف الايام كدامنة وانت رايدها بالحلال سلمتك غاليتي وجوهرتي الثمينةة
ديربالك عليها وراعيها

_ضيغم: مشكور عمي ماقصرت ورحمة الله والديك جوهرتك بالحفظ والصون بوسط عيني اخليها

_قبس: مو تضوجها وتحرك كلبها تراها عصبية

_ضيغم: اعرف واتحمل غصباً ماعلية

_فقار: مايحتاج اوصيك اعرفك شنو انت بالمبارك تاج راسي

حضنة يضرب على ضهرة باركولة الولد
اخذ ايدي ومسح دموعي من شافني ابجي مديت ايدي لاخواتي اريد احسسهن صح عندي اهل صارو بس انتن مو اقل منهم  .

باوعتلة نيزك وكالتلة
_ضيغم امانة الله بيها لاترفضلها طلب
ترة كواكب ماكو منها بس لاتعاندها

_بوية تعلموني بيها حافظها حفظ صرت

نزل الكبوس واخذ ايدي امشي وراة الهلاهل جكليت هوسات انطشن طش وراي
ما فد يوم تخيلت نفسي راح اتزوج والبس بدلة حتى بالاحلام زفوني للقاعة نفس القاعة التزوجن بيها اخواتي كلهن بس هالمرة العرس بسيط
مابية هواي ناس سلم على الناس واجة اخذني
لـ  فندق دخلت الغرفة من التوتر بس اريد انزع البدلة نزعت الباروكة اختنكت اريد شعري دخلت للحمام ونسيت اجيب ملابس طلعت لافة المنشفة لكيتة واكف ينزع بسترتة خزرتة بحقد عبالك مغصوبة علية وكفت اطلع بالملابس واشتم بالخلاهن طلعت شي براسة حظ نجمة مخليتة بالسكتة لان البنية انطتني تجربتها وكالت
اخذي ملابس ترتاحين بيها خلتلي تراكي العزيز الانام بية باوعتلة اضحك منتصرة علية

مشيت صار كدامي سحبني علية ولزم خصري
_كواكب: دروح خليني ابدل لا اسويها عركة

_على شنو العركة

ضليت صافنة بشترتة التلمع وعيونة التكتل وشعرة اليخبل لو عطرة اليسطر صاحبتكم نست عليمن تتعارك ونست الحجي أصلاً  .

لثاني يوم اني ما احجي من الخجل حتى اكل ما اكل هواي بدلت حتى نرجع هو ماجبرني على الحجاب ولا اغير لبسي لان شغلة منتهين منها لبسي عريض  .

سحبني باسني بكصتي طول نزل عيونة على خدي باصبعة يمررة ويهمس:: شكد شريفة وسبعة
كل الصار وانتي ماخليتي واحد يتقربلج

والله احسن شي بحياتي سويتة زواجي منج
تمنيت لو ملتقي بيج من زمان  .

دنك اخذ شفتي وخلاني اسبح من جديد هذا الخوينس ماعرف شلون يضحك على عقلي
رجعنا للبيت مسوين عزيمة واني فد مستحية اكول هسة كلها عرفت شلون اباوعلهم كوة طلعت وباركولي اهلي واخوتي للعصر اضحك واتشاقة وي البنات كاعدين بالحديقة وهنا يدزن بصمات بالكروب يحركن كلب شهب ونجمة لان اجيت يمهن
اجة ضيغم بس وجهة مايتفسر لزمت كلبي
كلت اكيد صاير شي على نيزك  ..

يتبع.....

_____________________

اللهم صلِّ على محمد وآل محمد

متتت بنات اريد الاحداث تخلص ماكو
بعد بارت اكتب
توقعاتكم وتفاعلكم

اي رايكم بالاحداث بشروووني

تابعوني انستا