#المنجمة
الكاتبة_كفايه
لاتنسون متابعة الحساب
تصويت وتعليق بين الفقرات لطفاً🧡
ياعلي مدد ♕
ختامها قائلاً
وانت يا كل الفرح
______________________________
_كواكب: طلعت الزفة واني وي ضرغام ونيزك جان فرحان كلش عبالك هو العريس زفهم بقيت بالسيارة وي الجهال نيزك نزلت لنجوم وهو يهوس فحطان سترتة نازعها احتر من الركص اختنكت وعلي بس يبجي شلتة وطلعت بيه اهز .
_ها شكو طالعة
درت وجهي خزرتة وانطيتة ضهري التفتت علية خليت علي بحضنة::حير بيه عمة على اساس
_ضيغم:ادخلي جوة ماتشوفين ولد
_اشوف واروح اركص واهوس وياهم عندك اعتراض؟
_اخلي راسج وادوس علية شنو الاعتراض
_دروح لا اجرك بزيج اخليك ماتطلع من البيت على الفشلة
_انعدلي وادخلي جوة
_سمااااارررر
جان فايت التفتت علية اجة وضيغم صارت عيونة بكصتة حتى ماجنت اريد احجي وياة .
_سمار:اهلا اهلا اهلااااااا لك منو هاي اليوم اخت العروس الصاكة
_ضيغم:تنجبببب لا اركع راسك بالحايط
_سمار:وانت شكو
_كواكب:سمار شلونة الازرق الابستة
_سمار:بيرفكتتتتت فوك البيرفكتتت
عشرة على عشرررررة تشقين شققق
_ضيغم:سماااااااااااااارررررررر
الكل انتبهة على صوتة وجهة يريد ينفجر من العصبية سمار خاف بسرعة يبررلة
_والعباس اختي كواكب حاسبها
_ضيغم:انعل ابووووك يابووو اختك
اجة ضيغم وقبس يصيحون شكو والباقين عدهم فضول يعرفون السالفة لزم سمار بقبس يكلة
_مدري شبية تخبل
_قبس:شوف وجهة شكايلة ولك
_ضيغم:اخذ ابنك ضرغام خليني ازوعة حليب امة هالخايس بيك بخت بالطفل بحضني جان طفيت عيونك
سمار ركض لسيارتة شغلها وضرغام اخذ منه ابنة راح يلحكة ضيغم ما لحك بقو ضرغام وقبس يخزرون بية الساني انبلع من صوتة..
_ضرغام:شبيهم ذولة
_ها ماعرف
_قبس:مو صارت العركة كدامج
_ماجنت منتبهة عليهم
_ضرغام:اكص ايدي اذا مو عليج
اجة ضيغم صاير عصبي المثقف يصيح بيهم
_شدولكممم كررررون ماضل واحد ماشافها
بفستانها الازرك انتووو هم حاسبين روحكم على الزلم
_قبس: لاتضل تخربط
باوعلي وعض ايدة بقوة وجهة انطعن
_ضيغم: اذا ما الزمج اطيح حظج واطلع السربتة من عينج
_كواكب: تجبرني اجرك زيك؟
ديلا يلا عوزي المثقفين تالي وكت من صرت اللبس فساتين وعاجباتني
_ضيغم: انتتتت اخ نعااال ماتصيح بيها
نعلعلة عليكم مابيكم واحد يبرد الكلب
_كواكب؛ بعد ما شاب ودوة للكتاب دولو
مو صوجكم صوجي اني مكابلتكم
عكدت حواجبي وعفتهم وراي خاصة المثقف
يحجي علية يربد يكفخني يلا يرتاح شفت ميس صعدت وياها شافتني ضايجة سالتني .
_ميس: شبيج لج هذا شعندة وياج اشوفة محترك
_هاي من البارحة لبست الفستان الاحمر
ولعب بيه لعب بالرزايل هسة على هذا لج هذا فد واحد ينغار وحااااقد يموت اذا يشوفني طالعة حلوة
_ضحكت وكالت
_غير يحبج وينغار عليج
_انتي اسكتي ترة كوة لزمت روحي وماجريت زيج
اليوم لابسة مستر بت الهوامير ها شكو عيني
_عجبني
_عجبج لو علمود عليش لبستية
سكتت والابتسامات اخذتها ماحجت وصادفت سيارتة يم سيارتنا باوعتلة تبتسملة وماعرف شنو يحجون بالاشارة مشت والبنية احمرت خدودها
ماكدرت اسكت وحجيت .
_ها ولج شو صار بينكم حب وحبايب
_ماكو هيج شي
_لا اكو ولادكليلي ماتحبينة
_ياحب هذا عيوني مصارلي فترة طلعت من قصة زواج فاشل للنخاع
_تفال هذا مو زواج ولج انتي مدري شبيج
ديلا لانجيب طاري الموضوع انتي وذيج الثولة بس رحت عرستن لو موجودة خربتها
شغلت اغاني بالرجعة الونسة وياها فول رجعت للبيت ميس راحت بدلت طلعت لكيت نيزك جاية وتبجي بالاستقبال ضرغام حاضنها خفت لامسويلها شي بس وكفت من سمعت كلامها .
_نيزك؛ عافونا ولاحضرو اعراسنا كلنا زفتنا الناس الغربة ندور على اهلنا بالزفة عبالي اشوفهم وي الناس... لو ما انت اجيت وزفيتها اله جان ماتحملت وانهاريت
_ضرغام: كلهن اخواتي ولو يزعلن بيتي مفتوح الهن والله اليحاجيهن اوكف بصدرة لو اخوي
اخذ حقهن
وانتي بنتي ومرتي وام جهالي وصديقتي ومعشوقتي وفاتنتي
كلشي اصيرلج اب وام واهل وعشيرة وسند
سحب راسها يبوس بية ويمسح بدموعها ماتحملت ابقى رحت للغرفة امسح بدموعي وكلبي ارتاح من ناحيتها ضرغام حياتة صارت نيزك والجهال يا جايبها يا مرجعها حتى مايطلع ويعوفها وحدها
طلعت لكيت يمسح بالبيت رفعت حواجبي مصدومة ضرغام يمسح ما جاي اصدك عكد حواجبة وخزرني بعصبية عود شوفيني اني هيبة
_ضرغام: مرتي نظيفة دكت روحها الا تمسح واني اخاف عليها لاينزل طفلها
_كواكب: امسح هسة كايلتلك ليش تمسح
مشيت شوية ورجعت كتلة
_اكلك ضرغام ليش ماتسجل سيارة باسمي حتى احبك واسويك بس انت وبس وبعد احترمك واصيحلك ابو امير لو ابو علي ها شكلت؟
_ضرغام: لا ابقي تكرهيني احسن هي الدراجة وسابية الناس سباية بيها حتى الرصيف تكشط كثر ماتفترين بية
_شفتي نيزك حتى لا تزعلين علية هو لو يحبج ويحبني جان سجل باسمي سيارة قابل قحط علية بس رجلج بخيل واحد فكر وحقود
عود ابن عمي اذب دمي واخلية بدالة مي خابط
اذا نفس الدم
رحت للمطبخ ادور اكل والناس بقت بالقاعة تتعشى بس احنا رجعنا شغلت البلازما واني راسي مسطور نيزك خلت بفساتيني بالجنطة وكالت ضرغام راح يرجعهن ماكلت لا حتى مابية حيل اطلع كعدت نيزك يمي تريد تحجي وماتعرف شلون تقنعني .
_احجي
_كواكب بس حاجيني بالمنطق والعقل تبقين وحدج نجوم واتزوجت وانتي ياريت مثل قبل ماعندج احد طلعولج اهل وعمام ولد عم وبيبيتج عايشة وين ماترحين يستقبلوج ليش ماترحين يمهم وهم تذكرين وتعوضين الحرمان
_ماريد اريد راحتي وراحتي بعيدة عنهم
هسة لو شكد تحجين ما يفيد لا عقلي ولا كلبي يتفقون على هذا القرار
_وتالي تبقين وحدج التسوينة حرام
_كلشي صار وياي حرام اسكتي نيزك
لليل بينت الوحشة على نجوم والبيت صار يخنك عليها صرت اتعارك وي روحي لان ماريد ابجي نيزك كلش ضايجة من ما اقتنعت واني ماكدر اسوي التريدة .
ا
جت شهب من الحفلة متعشية وضايجة لازمة بطنها كعدت تبجي ومن سالناها كالت..
_شهب: تزوجت نجمة راح اشتاقلها
_نيزك: هي وين رايحة غير وياج بنفس البيت
رفعت عيونها دايخة بزمانها مسحت دموعها تضحك الخبلة ...
_شهب: نسيت والقران عبالي مثل المتزوجات
وبعد ما اشوفها اجي هنا الكاها ماكو
اعذرني بنات دايخة من الدراسة والحمل
بقت شوية وقبس اجة وين ما اروح يباوعلي يريد يحجي وياي بس يتردد ويخاف لا اردة باسلوب قاسي نيزك راحت بقة كاعد يهز برجلة اجيت افوت وكفني بكلامة ..
_قبس:تمشين وياي للبيت
_اريد انام
_نامي هناك بيتنا الج غرفة وحدج ها؟
هزيت راسي لا والغصة خنكتني
_قبس:ليش لا احسن ماتبقين وحدج
تعالي يمنه اخواتج هناك عيشي وياهن بنفس البيت
هزيت راسي لا درت وجهي ودموعي نزلت سديت الباب علية وهو يقنع بيه باقي .
_قبس:والله مايصير تبقين وحدج جربي يوم واحد تشوفين عيشتنا جو بيتنا يوم واحد بس
ليش تعذبين بينا والله گلبي نار عليج اختي موجوده وعايشة لا اكدر احجي وياها كاخ لان مامتقبلتني ولا اكدر احضنها اسولفلها واليموت ماكدر اخذها وياي لان ماتريدنا ومامتقبلتنا بحياتها
جاي تموتين بينا اني ماكدر اعوفج وحدج
_كواكب: وقبل تكدر وعادي عدكم وحدي ابقى
وين الناس الغربة محد يمهة موضوعي بس فجاة من عرفتو اني من دمكم صرتو احنان لو صدك انتو اخواني جان حنت كلوبكم واحترك دمكم وكلتو هذا الكلام من قبل مو هسة من اكدتلكم التحاليل
ما اكدت كلوبكم ! روح قبس روح تعودت وحدي
بكلشي لاتخلوني بالكم اختكم ترحمولها التحالليل غلط مو اختكم اني
مارد علية كتمت بجيي والله جاي يحترك گلبي بنار من احجي هيج وهم يحترك لو بقيت ساكتة وما احجي
اختفى صوتة ومن ابتعد عرفتة راح كعدت ودموعي نزلت صح تمنيت اعرف اهلي منو بس مو محبة بيهم والله بس ردت اثبت للناس ولنفسي اني مو بت حرام بس ردت اسكت اليحجون علية ماردت منهم شي لو عرفتهم .
تمنيت وردت اخواتي يمي تمنيت نكعد سوى بيت واحد رغم اني فرحانة هنا استقرن بس هم اتمنى كلنا نبقى بيت ونعيش سوى مثل ماردنا وخططنا واحنا كلنا امل يجي هذا اليوم ونستمر علمودة
تمددت على القنفة ودموعي ينزلن وحدهن مشاعري المكبوتة طلعت احس كلشي ضدي حتى نفسي ضدي معارضتني مو ادية مقيدة مشاعري المقيدة.
بعز هوسة المشاعر سمعت الباب يندك خطر على بالي ضيغم بس هو اليجي بهيج وقت وحلفت هالمرة الزمة بالنعال اطلع حركتي بيه شلت النعال ورحت فتحت الباب بدون ما اكول حتى منو بس من شفتة تغيررت ملامح العصبية للصدمة النعال وكع من ايدة ولساني انبلع من كال..
_اسامة: تسمحيلي ادخل؟
بدون ما اعترض هزيت راسي فتحتلة الباب دخل كدامي بطولة الفارع واناقتة وعطرة سابقة
عبر الاستقبال ودخل للمطبخ حتى يعبر للصالة
كعد هناك استقر على القنفات شمر ادية ورجع ضهرة على القنفة بكل اريحية يباوع بالبيت بقيت واكفة كلبي نار معقولة هذا ابوي بعمري ماتخيلت شكلة هيج .
_اسامة: اكعدي ليش واكفة
كعدت عبالك انفذ اوامرة استحي حتى اباوعلة عكسي دنكت راسي اصبر بروحي ابقة على حالي
رفعت راسي من كال .
_شلونج بابا
هالكلمة شكد تمنيت اسمعها قبل وهسة من سمعتها حسيت نفسي انكطع كوة طلع صوتي ورديت
_زينة...... انت شلونك
_شنو تحسين
_زين كلش زين
_احساسج غلط
_اني انام من وكت كمت انعس ليش جاي هسة
_اشربي كهوة حتى تصحصحين اكوم اسويلج
كام راح للمطبخ مشيت وراة بروح خاوية وكفت اباوعلة وكلساع ادير وجهي عنة وادعي الصبر
هو يفتح بالجرارات تالي كلي .
_ماعندج كهوة مو؟
_ماعرف
_هو مو بيتج وانتي عايشة هنا شلون ماتعرفين!
_صح تذكرت ماحبها وما اجيبها
_عكسج اني كلش احبها امشي نطلع نجيبهاواسويها الج حتى تقيمينها
لا يتامر ولا جاي يسالني حرت باسلوبة شلون هيج
اروح وياة بدون اعتراض مني لبست نعال وطلعت
شغل سيارتة عالية اخر مديل لون اسود ترددت اصعد بس من شفتة يباوعلي منتظرني صعدت ساكتة وحتى وجهي دايرتة منه .
_تدرين من جنت بعمرج العب ملاكمة
كلش احب الرياضة جنت رغم ابوي مايقبل ويريدني اصير رجل اعمال مثلة وعدتة تبقة الملاكمة مجرد هواية هم عندج هوايات؟
_هواياتي اشتغل اجمع فلوس انتقم
وافرفر بدراجتي
_كلش حلو هالشي جامعة اهم تلاثة
تعرفين هواياتج نفس هوايات رجال الاعمال
_شلون
_جمع المال والشغل من اولوياتهم الانتقام يمشي بدمهم واخر شي يحبون يمتعون نفسهم بالشي اليعجبهم ويرتاحولة
_حلو
_كلش حلو
_زين انتي تعرفين عربي وانكليزي
_انكليزي لا بس عربي
_كلت اخذج اسفرج لدولة اجنبية اذا عرفتي الاساسيات
_وليش حتى تاخذني؟
_احب اخذ شخص مرافق وكل مرة شكل مرة رجل اعمال مرة صديق
_ومرة صديقة حبيبة
_صديقة اي عندي بس حبيبة لا زوجتي هاجر تزوجتها عن حب لسنوات
_يمكن الحب يختفي بمرور الوقت
_صح ويتحول الى كرة مو بس يختفي بس حبي لهاجر غير حبيتها ولليوم احبها واتمنى تطلع من جو الحزن العجزت ان اطلعها منه.. وصلنا
طبك السيارة كدام اسواق واني ما حاسة بالطريق فتحلي بابي كال:: انزلي يمكن محتاجة شي بس تشوفينة تتذكرينة
نزلت واني مصدومة ومتفاجاة من كلشي جاي يصير دخلنا سوى الاسواق سلم واخذ سلة بقيت بمكاني شوية ورحت وراة ماعرف شنو يشتري أصلاً خلص باوعلي كلي .
_ليش ما اشتريتي شي
_ماريد
رحت اطلع برا اباوع للسما واضم ادية لصدري طلع التفتت علية بيدة علاكة جبيرة صعدنا وهو يكول
_اشتريت عشوائيات جنت مفكر بس كهوة اجيب
تذكرت اني بدون اكل..... انتي طبعج هادئ هيج؟
_لا ابد
_واضح دمج حار وعصبية كلش بس تعرفين العصبية تاذي الانسان كلش وتتلف اعصابة
على الخالي بلاش
وصلنا وهو يحجي على اضرار العصبية وشلون الواحد لازم يبقى هادئ وبارد كلت هنيال كلبك اقل شي يفرفح روحي تفرفح..
كفكف ردانات قميصة وغسل ادية اكثر من مرة
طلع الغراض الجايبهن معلبات وحلويات فرغهن بالثلاجة رتبهن واني مثل الصنم باقية .
_تحبين اسوي مخلمة لو تشريب باكلة؟
_بكيفك
_اني ما اكل بالليل هيج اكلات بس اليوم نكسرها يلا مخلمة مو كلش ثكيلة
طلع الطماطة جلفها جلف وصار يثرم بيها
_اسامة: طلعي طاوة احميها وخلي قليل زيت
سويت مثل ماكال
اجة خلة الطماطة وبهارات وملح بس استوت طك البيض فوكهن بس خبطهن قبق الطاولة واخذ صحن خلة بية زيتون خدر جاي وطلع اجبان ومربى فرغهن ورتب صينية تفتح النفس وبس خلص شالها واخذها جوة كل هذا واني بس اباوع علية فرشت بالكاع كعدت كبالة اكل وهو يسولف عن شغلة واني اسمع ساكتة واكل لحظة وادركت اني كاعدة اكل وي ابوي وهو يسولف علية رفعت عيونة باوعت بشكلة وتفاصيلة هو يسولف ومندمج ياكل بنزاكة رفع راسة شافني ابجي وعاف لكمتة .
_شبيج بابا
طفرت من مكاني للمطبخ اغسل بوجهي واخنك بروحي لايطلع صوتي واني ابجي ابوي كاعدة وياة اكل ابد ماتخيلتها غسلت وجهي اكثر من مرة جسمي كلة يرجف وعيوني تصب دم مو دمع احسها شفتة كدامي لو حرت وين اضم روحي
شردت لزم ايدي سحبني علية .
_تعالي احجي لاتضمين بكلبج
مسحت عيوني بعنف وباوعتلة من كل كلبي كتلة
_جنت ادعي عليك كل ما اتاذى ادعي الله ينتقم منك وماتشوف الراحة مثل ما اني مبهذلة كلكم دعيت عليكم لان تبهذلت لو ماصايرة وجبتوني احسن .
_قدر مكتوب شنو بيدنا
_جبت عمررري الناس تصيحلي بت حرررام وزنا
سالم يشمئز يباوع بوجهي يكلولي نكسة انتي
شيطانة جبت عمري احارب روحي احاربهم
واحارب روحي وافكاري تمنيت عندي اب يدافعلي من راح ابوي جبار صدك تمنيت يطلعلي اب ثاني
وياخذني من العالم
نزلت ايدي ودموعي بللن ملابسي اخذني لحضنة بقوة حضني احس كسر ضلوعي ماطال شوية وانهار بالبجي واني مو اقل منه سحبني يغسل وجهي ويرفع شعري فحطت والنفس كوة اسحبة غسل وجهة وبقة لازمني من ايدي مثل الطفلة المشاغبة خاف لا اشرد بيدة شربني مي ومسح وجهي باس راسي ورجع حضني رجعت اشهك بدون صوت .
_اسامة: مايهون علية الصار وياج لجم روحي
والله يابنتي يصعب علية وانتي بهذا الحال
_لو ماصاير الحادث
_جان هسة انتي مدللتي الصغيرة اخذج وياي بكل سفراتي افررج العالم وشنو تطلبين اجيبة الج
حضني لصدرة يبوس بيه واني ابجي انهاريت من صدك .
_اسامة: اعوضج عن كلشي وعن السنين العشتي بدونا بيها وتعذبتي ياروحي بابا كافي بجي
مدد رجلية وخلاني بحضنة يلعب بشعري الشهكة لازمتني احس نفسي بحلم واذا مو حلم بغير عالم
يبوسني ويوعدني بلاافضل غفيت ومن كعدت لكيت روحي بحضنة لزمت بية مامصدكة نايمة بحضن ابوي ومامنة غفيت تمنيت ما اكعد نمت ولاول مرة انام مرتاحة
واكعد احس بروحي خفيفة ريحة الاكل تارس البيت غسلت ورحت للمطبخ لكيتة يجهز بالريوك تارس الميز بابتسامة ونشاط كال..
_صباح الخير اميرتي الحلوة
اكعدي حتى تقيمين اكلي وترتيبي
راح واني كاعدة بحالة صدمة بعدني نكع التشريب بالباكلة وذب علية البيض الحار اجة كعد ياكل
كل شوية اباوعله واصفن بيه اكول معقولة كواكب هذا ابوج؟ كطع كلامة وابتسم سويت روحي اكل ما اباوعلة .
_اسامة: هم مرة تخيلتي شكل ابوج؟
_اي وهواي هم كل مرة اتخيلة شكل مرات عصبي عديم المسؤلية سكير وصخ ومرات لا حنون يحبني
وخوش رجال بس مو هيج مثل انت
ضحك بقوة يكلي
_يعني اني مو خوش رجال
_لا لا بس مو هيج تخيلت
_تمام افتهمت هسة ماكلتي شنو رأيج
باكلي
_والله انت خوش طباخ ومرتب ونضيف
_حار ومكسب وبلاش
ضحكت وهو يباوعلي ويضحك كملنة اكل كام غسل يخابر بقيت منتظرتة يكمل مخابرة لان صار عندي فضول اسمعة شيكول وخابت توقعاتي وانصدمت اكثر من كال .
_اسامة: نلتقي غير مرة اميرتي
هيج هيج بدون لايكلي روحي وياي بدون لايحجي شي عافني ومشة يوم كامل تخربطت اوضاعي كلها ولا طلعت برا الصالة ابد حتى اكل ما اكلت بعد ولاتحركت حسيت جاي اتخيل كلشي صار
وهم تمرضت فجاة والحرارة طلعت من عيوني اخذت التليفون البنات جابنة ومخليات بيه ارقام الكل كلهم شفتهم واسال روحي ليش محد سال علية اليوم ولا واحد حتى ضيغم عافني وما سال عني ! ردت اتصل ومنعت روحي قفلت باب الصالة علية ونيت من الالم نمت واحس العرك يصب مني صخنت نايمة بالكاع الباردة بدون غطة وملابسي خفيفات كعدت منتهية والاحلام دمرتني .
تحلمت روحي بالسجن ويعذبون بيه فزيت نمت تحلمت على مشنقة الاعدام فزيت مختنكة ومن المرض نمت تحلمت بغضنفر يصيح علية يبجي يكلي
_طلعيني كواكب لاتنسيني انتي كلتي اطلعك
ليش تجذبين وين وعدج الية ام دجة ماتجذب طلعيني اريد اعيش
كعدت عيوني ما اشوف بيهن من كثر الدمع
بجيت لمن تعبت التليفون بصفي فتحتة طلعلي رقم فقار اتصلت علية بدون تردد عدلت صوتي انتظرتة يرد كال الو رديت .
_هلو فقار شلونك اني كواكب
_
هلو كواكب انتي شلونج....
_اريد تساعدني
_صار بشنو..؟
_ماكدر احجي
_جاي وافهم منج السالفة ما اطول
قفلت التليفون ونمت بالحلم احس الباب يندك بقوة ويندفر مابية حيل اكوم ولا اكدر افتح عيوني من الصخونة اسمع يصيحون باسمي بصوت عالي
شلت راسي الباب يندفر بس مقفول ماينفتح ولو شيصير ماينكسر من قوتة زحفت كوة كمت فتحتة ورجعت لمكاني ذبيت روحي واحس انرفعت من الكاع وصوت ضيغم يصيح بخوف .
_انعل ابهاتهممم من كالو عوفوها وحدها
حتى تستاحش وترجع
فقدت ماحس بشي بس ارجف كعدت مبدلة ونايمة على فراشي نيزك والبنات يمي وهوسة بالبيت نمت وكعدت بالليل كلش نيزك طفرت وراي تسالني شلون صرت ماحاجيتها بس افر بعيوني غطتني تحجي وياي سوتلي اكل لثاني يوم صرت زينة بشرتني ماخذة سونار وبيها ولد كلش فرحت .
اخذني فقار من ايدي باسني براسي كال روحي بدلي اخذج نجوم طلعتلي ملابس لبست وطلعت وياة بس وحدنا ولهسة احس بروحي نحلانة اخذني لمطعم
طلب اكل نزل اكلت شوية سألني .
_فقار: كولي شنو رايدة انفذة
دنكت راسي اتذكر الردتة منه رفعت عيوني وقررت احجي :: عندي صديق بالسجن وعدتة اطلعة هو سالفتة سهلة مو قتل بس مخدرات وتهريب
تكدر تطلعة واني ادفع فلوس
_غضنفر ماغيرة
_اي هو
_كواكب غضنفر شنو يعنيلج
_صديق بس
_صار اشوف قضيتة واوكل محامي اله
بعد شنو تردين اسويلج
_ماريد
_ماتردين تجين وياي
_لا
_ليش انطيني سبب ماتحبينة؟ احنا مو زينين؟
_لا بس مو مثلكم اني اتقيد عدكم
ماتخلوني اطلع براحتي اتقيد يمكم
_زين ضيغم طلبج مني
_شنو طلبني شيسوي بيه
_يحبج يريد يتزوجج
اشتعلت خدودي نار وغصيت بالاكل
_كواكب: ابو النسوان خل صبا تفيدة الوصخ ماريدة
_ضيغم ماعندة سوالف نسوان وصبا ماتعنيلة شي
_ماريدة يجذب عليكم مايحبني
أصلاً ليش يحبني ماكو سبب
_ليش ماكو سبب يحبج مو فترة انتو سوى
_جنت مريضة بس اهتم بيه
_هسة شنو اكلة ماتردينة
_اي
حجيتها واني بداخلي سوالف اكول لو هو جاي وحاجيلي جان تعاركت وياة وغلطت الى ان يقنعني بس ماصار هيج طلعنا اني وفقار نتمشى ونسولف هواي اخذنا اكل للبيت ورجعنا .
_فقار: ماريد اجبرج بس اريد تجين وياي
سكتت واني بنفسي ماكدر اعيش وي ناس
حياتهم تختلف عني شلون اخذ راحتي صح كعدت وياهم فترة السحر بس جانت ذهب موجوده وهواي اشخاص موجودين مو بس عائلتهم .
رجعنا وهما راحو كلهم وتعجبت من اجو هاجر واسامة بيدهم جنط ملابسهم .
_اسامة: تستقبلينة نعيش وياج هالفترة
ماكدرت اكول لا وابتدت فترة هما وياي بنفس البيت .
_____________
_ورد: كلنا رحنا للزفة وجنا كاشخين كشخة تطك بالكاع فساتين ومكياج فتحت شعري وخليت فوكة الشال وبقة طالع منا ومنا جوري عكسي لابستة كامل وهادئة بالسيارة فتحت الجامة سيارتنة مايمها واحد من ولد عمي بس ناس غربة اصفك واهلهل بصوت عالي جني ذني المصريات وي الاغاني اغني السايق عمي فرقد ومعروف عنة مايحجي ملتهي بالحب والحرب سهولة .
_ورد: افررح لابن العم تحتاج ايامة كلوووووووولش فقار ياجكليتة حامض حلو باكيتة
زفيناة وخلصنة منه بعد اخوي الاصغر منه
واهلهل واطك اصبع وجوري بس تخزر بية حتى لو تحجي ما اسكت مرت منا سيارة بيها ولد طاكين يباوعولي ويطكون اصبع وكف الازدحام والولد يصيح:: اررريد اتزوج زوجوووني ما اتحمل بعد
بس اني اسمعة لان بصف جامتي خنست وعدلت شالي هذا مو راحة من السايد الثاني اسمع واحد يتعارك وياهم ويغلط بينهم صار غلط وهو يكلهم
_شعليييك انت
_انعلللل ابووووك اليوووم ساقططط *****
فتحت عيوني بصدمة هذا صوت صافي صديق ضيغم عليمن ذولة تعاركو نزل الولد من السيارة وفرقد هسة يلا حس ونزل صاح بيهم رزلهم كل واحد رجع لسيارتة بس مشة الازدحام صارت مسابق بالسيارات رجعت اونس روحي بالاجواء هو فقار كل يومية متزوج دخل افرحلة يستاهل ابو ود
على كولة ذهب .
خلصت الزفة ورجعنا للقاعة مت من الجوع كثر مادبجت بالكاع وي ذهب اكلت حسيت بطني تنفجر عدلت مكياجي وشالي طلعت اشوف الاجواء برا
تمنيت ادخل بالقاعة مال الشباب واشوف ونستهم نفس قبل من سحلت نجوم وياي والله ايام .
واني اباوع منا ومنا واضحك للهوى طلع بوجهي صافي يكول كتلت ابوة بالحلم اول ماشافني اجة يصيح بيه.
_صافي: امشييي ادخلي جوة شكو طالعة ماتستحين انتي
_لا
_والعباس اكول لاخوج عليج
_روح گلة يلا
_ادخلي لا ابتلي بيج
_حبيب امك روح امي روح شوفلك غيري
طكطك عليها هاي السوالف
عفتة متشعوط ودخلت هم ناقصني هاي الشكول مدري منين اجاني هذا النوب بعد ما خلصت رجعنا للبيت تعبانين كلش مر اسبوع تقريباً واجة ضيغم
كلش ضايج وما يتحاجة كاعدين اني وجوري خزرني كمت اطكطك وجوري تباوعلي بخوف عبالها مسوية شي بس انخلست من كال..
_اطلعي وردة اريد احجي وي جوري
_ورد: احجو كدامي ما اكول لاحد
_ضيغم: وردة حبيبتي اطلعي
_جوري: كامت وردة عبالي هي مسوية شي انوب من بقيت وياة غطيت بهدومي شمسوية يربي كلش ضايج معقولة سويت شي ومادري بروحي كعد يمي مسح وجهة بقوة وذب حسرة كال .
_وين شايفج سمار
انبلع وجهي وضاع الكلام مني ويني وين سمار
كمت اعتعت وارتبكت وهو يخزرني منتظر احجي
_جوري: والله ماعندي شي وياة والقران والمقدسات ضيغم ما..
_اعرف لاتبررين بس اريد اعرف وين شايفج
_يمكن بالعرس بس والله..
قاطعني وجمد دمي من كال
_خطبج مني لح لححححححح يريدج
كمت من مكاني وجهي يريد ينفجر غسلت مرتين وردة لازكة بية رغم سمعت كلامة اعرفها تسنط
ركضت لغرفتي كلبي يدك بقوة اتذكر شفتة بس يباوع وصافن علية نظراتة ربكتني بوقتها .
بعد ماشفت ضيغم ولا طلعت امي اجت حاجتني
_ياسمين: البارحة خطبج سمار صاحب اخوج من ابوج يكول شنو رايها؟
_اريد ادرس ماريد اتزوج
_يلا هو اخوج هم مدري شبية ما قابل
انسد الموضوع من يومها والاجواء شبة مستقرة عدنا هاجر واسامة استقرو يم كواكب لان ماتقبل تجي يمهم وهم يعودنها عليهم ويخلونها تتعرف عليهم وتتعلق بيهم شوية .
___________
_نجمة: عرس روان واستاذ حسن اليوم كعدت من الصبح واحلى وانزك فستان لبست تمكيجت وانتظرت فقار يجي ود تلعب بغرفتها واجت شهب دكلي .
_اكلج هاي جمانة اجت
_شتريد
_تريد ود
اتصلت بفقار وبلغتة كال جاي نزلت سلمت عليها وباركتلي تسوي روحها فرحانة بس احس عينها بيها حزن تحاول تخفية ود يمها تسال بيها عادي عدها احس تعودت على غيابها اجة فقار سلم هي كامت
قبل لاتحجي كال .
_فقار: اخذيها لليل اجي اخذها
صعدت جهزت جنطة ملابسها اخذتها وراحت صعدت لكيتة يحلق بذقنة بقيت واكفة يمة .
_اكلك فقاري
خزرني وضحك
_من استاذ لفقاري
_بعدني ما طالعة كلمة استاذ من حلكي هسة كلي حباب وبصراحة ليش تطلكتو
_هستوج تذكرين هذا السؤال
_ليش خليتني افكر يلا حبيبي جاوب
اخذت من ايدة المكينة ركز عيونة بيه
_خل احلقلك
_تعرفين
_عادي اذا جرحتك جرح الحبيب مثل اكل الزبيب
_قصدج كتل الحبيب
_فقاررر جاوب واني احلق
خنس واني على كيف اشيل الشعر الزايد من وجهة رغم ماعرف بس خلاني اجرب مامنعني وكعت المكينة من ايدي ضحكت بفشلة .
_خفت لا اجرحك
_فدوة الج
اخذ مكينة جديدة يكمل واني اباوعلة ولسة منتظرة يحجي كرصتة بزندة:: احجي استاذ
_هههههههههه نجوم كافي لاتموتيني بهذا لسانج
_استاذ اني نجمة
_المفرد والجمع ثنينهن يضون
ضحكت من كل كلبي واكثر كلمة احبها كل مايكول
نجمة اكلة نجوم ويرد المفرد والجمع ثنينهن يضون ولا يمل واني ولا ابطل من هاي السالفة متونسة عليها .
خلص وطلع اني اعدل بحمرتي التفتت صافن علية سحبني من خصري خليت ايدي على صدرة عينة على حمرتي مد اصبعة يمسح بيها واني انتفضت
_لاااا حباب مو لايكة وي مكياجي
_اااخ نجوم ماتحمل اشوف شفافج ملونة
_ليش استاذ
ضغط على خصري ومال راسة يحجي بخفوت
واني كلبي احسة راد يطلع من كال .
_فقار: مرة شفتج مخلية حمرة ككوية نجوم ماتمنيت تبقين يمي ويروح بالي بعيد
_ياحمرة لحظة الاخذتها من روان بوقتها طردتني يااااا تذكرت
ضحك يبوس بية
_اي طردتج اني رجال هم عندي مشاعر ودم ولحم
وانتي جايتني بحمرتج تحجين
مديت ايدي على وجهة عصرتة بقوة
_يعني من تشوف النساوين محمرات ماتلزم روحك
_لا والله نجوم بس انتي أصلاً ما اركز عليهن
_جذاب كشفتك على حقيقتك
_بس انتي وداعت عيونج وغمازتج الشكت كلبي
_عوف الغمازة عيني عوفها واعترف تسرسح على النسوان المكيجة مو؟
_اتسرسح على نجمتي الضاوية
_جذاب
_نجوم الزلم ماتجذب
_اه
_وداعتج خو لو عجبتني وحدة خطبتها سنين اني بدون زواج ماعجبتني وحدة غيرج
راد يبوسني خليت ايدي على شفايفة
_كتلك شنو سبب طلاكك من جمانة ماكلت ليش
_ماريد احجي بيها طلعت من ذمتي
_ترة والله ازعل وما احاجيك اذا ماكلت
برطمت وعفتة ما خلاني سحبني يشم بركبتي
_احجي يلا ترة اروح ازعل يم اختي
_نجوم احبج وميت بيج
_احجي استاذ وصير حباب ريح گلبي
ترة اذا ما كلت اعرف من غيرك
_مو الكل يعرف سبب طلاكنا
_هو شنو؟
_حبت غيري وهي على ذمتي
_هههه هي هسة تحبك
_اي هسة قبل انضحك عليها هواي وبس عرفت طلكتها نجوم هذا الكلام مايطلع لاحد
_لا ما اكول بس ما اصدك هي معجبة بيك وتحبك
_وجانت بس كتلج انضحك عليها وباعتني لولد الحرام
غير هالكلام ماكدرت اعرف كوة بعدتة عني حتى نطلع وكف كدامي خلاني اخفف مكياجي وما خلاني اخلي حمرة بس راح يبدل خليت كلوس وتنت قليل عدلت ربطتي بقيت انتظرة يجهز لبس ساعتة ومحابسة لبس سترتة ورش عطر كمت اعدل بشعرة عدلت ياختة وطبعت بوسة على ركبتة ابتعدت فوراً عنة .
_فقار: نجوم المن رايحين ماشايفين اعراس
_لا حباب عيب لازم نروح روان صديقتي
_خيولون نروحلهم بعد العرس
راد يلزمني شردت منه هم ناقصني والله مايعوفني لليل كعدت يم شهب تاكل وتقرا كتلها .
_ماترحين ويانا للعرس رجلج مو يروح
_شهب: والله ماعرف صدك يروح
_اي غير حسن صديقهم دطلعي غيري جو
_شهب: اروح ابدل ومن يجي اجلب وياة
واذا ما قبل اروح يم كواكب
نزل وسمعنا كال
_فقار: انوب على كلشي وكالن نروح لكولكب
علي عذاب كواكب
_نجمة: اختنا وماتقبل على زعلنا تخلينة يمها
_فقار: يلا عيوني امشي
طلعنا سوى للقاعة وطول الطريق يتغزل بيه ويبوس بيدي واني هنا بس اضحك ولا ارد بكلمة يعرفني ماعرف شرد علية .
نزلت لازمة بيدة ومن شفت الموظفين عفت ايدة وهو ماعافها استحي من اشوفهم يباوعولنا من سكرتيرة الى زوجتة .
يسلم واني بصفة لزك اليعرفني يرجع يسلم علية ردت اروح لروان اسلم عليها ماقبل امشي وحدي كمل كلامة ورحنا الهم الضحكة شكت حلكي من شفتهم يخبلووون مو عرسان كيك جنهم باركت لروان وكعدت يمها فرحانة طايرة من الفرح
_نجمة: هذا نفس استاذ فقار بس بالبداية حباب
بعدين يتحول ديربالج
_هههههههههه اسكتي لج هذا من هسة مو حباب
وشاردة منه شهر هسة يلا تحاجينة
اجت ميس وخطفت الانظار باطلالتها وطكة كبعها اجت يمي باوستها:: اميرررة الاميرررات ميوسة الحلوة
_جميلة الجميلات نجمتنا
_روان: واني عود العروس ماتتغزلن بيه
_ميس: حبيبتي انتي الاستاذ مكفي وموفي وياج بالغزل والمدح
_روان: كاظم الساهر متزوجة عيني عيني مامحتاجة غزلجن الناشف
_ميس: سويقطة صارت الاستاذ خربها ماجانت هيج
ضحكت بصوت والمعازيم تلتم ميس ما ابتعدت مني وكل اليجي يسلم عليها يشوفها ماتتحرك وتنطي وجهة يروح عيونها تروح منا ومنا اجو شهب وقبس ماصدكت وفرحت كلش شهوبة لابسة فستان عريض للحوامل مامخلية اي مكياج غير مسكرة ومشطة حواجبها وشوية مرطب لشفتها وعرفت هذا قبس ازيد من فقار وازيد منهم كلهم رغم هذا تموووت بدون مكياج احلة بهواي .
_ميس: شلون قنعتي الاخ
_شهب: كتلة اذا ماتاخذني اروح اعيش يم كواكب
رحت اجمع غراضي وهو صايرة بية خوفة لا صدك اروح واعوفة وكف على راسي وحتى الملابس هو اختارهن بيدة
_ميس: كواكب راعبتهم رعب
قبس يروح ويرجع يشوفها يمنة خاف وحدها باقية جمعة بنات صارن صديقات روان اجن وبنان
وسما تسالني..
_سما: اكلج نجوم علي مايتزوج
_ماعرف والله
_سما: اخوة استقر ومتزوج مايتزوج ويستقر
امة ماتنقهر علية وتزوجة
_بنان: بنات من الاخير اخطبوها اله سما
راح تنجلط من وراة حاولت بكل الطرق بس ماكو نتيجة منه
_سما: طيح الله حظج ليش هيج تحجين
_بنان: ليش مجذبة عليج هو منو مايعرف بيج
عيونج علية تردين تاكلينة
شغلو الاغاني كلها تركص شهب وقبس على صفحة يسولفون وجنهم تخاربو لان طنكرت وبقو يباوعون للناس باوعت لميس اريد احجي لكيتها صافنة على سما وعلي واكفين سوى احتقن وجهها وهي تراقبهم بنظراتها.
_ها ميوسة شبيج
_ميس: عندي شغل حروح
ماركصنا ابد واكيد السبب لان مختلط المكان ما من المعقول يركصني سلو كدامهم باركت للعرسان وانطت هدية وراحت بسرعة بقة بالي وياها معقولة تغار علية؟ بدت تحبة لو شنو
واكيد انتظرها تسولفلي عن مشاعرها بيوم..
اكلنا واستمتعنا انطينا هدايا فقار اشتراها لان ماطلعت علبة مغلفة بيها كلادة وتراجي ذهب كتلة هاي للعروس والعريس .
_فقار: العريس ماينطونة هدية لان اخذ افخم هدية واغلى والي هي مرتة
_اويييي فدوة شلون تحجي
_خل نرجع للبيت واني اكمل كلامي وياج
_شكراً ناوية اروح لميس
_اكو عاقل يخليج تروحين
_اي انت عاقل
_لا حبيبتي مامخبل من زمان وعندي فايل
جنت بالمستشفى الامراض العقلية
ضحكت على سوالفة رجعنا للبيت شهب وقبس طلعو مارجعو للبيت .
كعدت من النوم متكسرة جاعصني بحضنة فقار
غسلت وسويت ريوك لعبت نفسي ورحت تقيئت من الصبح كعدت ارجف بس لا صدك حامل شبسرعة
بعدنا عرسان شهب كاعدة من الصبح تقرا وفقار مو مثل قبل يطلع من وقت لشغلة صاير يتاخر اذا هو الليل سهران شافتني وجهي اصفر وابجي تخبلت
حضنتها وهي تهدي بيه .
_نجمة: شهبة والله ماريد احبل فدوه شلون شسوي اذا طلعت حامل
_شهب: رزق من الله صدك تحجين النسوان يتمنن الاطفال
_حتى ما افتهمت من عرسي شي شبسرعة حبلت ماريدة
_انجبي نجوم لاتكولين هيج حرام عليج
اخذتني غسلت وجهي كعدت مطنكرة كعد فقار شافني تخبل .
_فقار: شبيج نجوم
_مابية شي
_شنو مابيج شي شايفة عيونج شكد باجية شكو صاير شي
_لا
_الله عليج اني اذيتج شي البارحة
هزيت راسي لا ودموعي نزلت تخبل راح يسال بشهب والعوبة كالتلة من اول كلمة اجة كعد كدامي مصدوم من ردة فعلي اخذ وجهي بين ادية يحاجيني .
_فقار: شبيج عمري واذا حامل غير احنا متزوجين
_ما كلتلي راح اصير حامل أصلاً مو على عبالي
_واني شعرفني انتي ماتردين جهال لو كايلة من البداية جان اخذت احتياطاتي هسة صار
احمدي الله
حجة هواي يلا راح رجع جايب ود وياة شافتني ضايجة وشكلي مخربط من البجي اجتني دكلي
_ود: نجوم شبيج منو ماذيج بابا زعلج
_لا عمري
_ود: بابا شفت نجوم شلون عيونها حمر
_فقار: بابا هاي نجوم رادلها كعدة خاصة
نزلت جوة وشهب ترزل بيه وتضحك علية
_شهب: هسة بس يصير تعزينة على فقار واهلة
_ولي مني انتي
_انتي تعرفين من خسرت حملي الاول شصار بنفسيتي من القهر ولهسة مقهورة اكول هسة العب علية لو باقي
جابلي فقار تحليل منزلي سويتة خطين طلعن سمعن اخواتة اني حامل بالشقة ضحكن وكالن:: شنو جايبتة وياج
حسيت هالكلمة نبتت بصدري سديت باب غرفتي وضلت ادور براسي وتحفرة شقصدهن جنت حامل من الاغتصاب؟ هيج جانن يقصدن؟ بس كلها تعرف مرة فترة طويلة يلة تزوجت كلمة بالغلط دمرت نفسيتي ورجعتني للماضي وذكرياتي القديمة فقار تخبل علية وصل بية يكلي .
_اذا ماتردينة من هسة نزلية صح حرام بس شسوووي لاتبجين كافييي
هو مايعرف اني مو قهري من الحمل نمت مغطية روحي لافتها لف سحب الغطا مني كوة طلعني وحضني وخر شعري من وجهي وباسني بخدي
_يلة يروحي كافي بسج
_انت ماتعرف شي روح
_منو غثج بالكلام كالت شهب اكو كلام غثها شنو
سكتت عصر وجهي بيدة
_احجي نجوم شنو سمعتي
ترة روحي طلعت كولي شنو غثج
شهكت بقهر
_يكولن جبتة وياي يعني..
ماخلاني اكمل طلع من الغرفة صاير نار خفت لايروح يتعارك وي اخواتة ويحقدن علية نزلت لكيت قبس يطبخ وشهب كاعدة تقرا احياء بصوت عالي وقبس يسالها وهي تجاوبة غسلت وجهي كعدت يمها .
_وين راح فقار
_اني مرتة لو انتي
_طلع معصب
_قبس: امر الله هذا
جاب صينية اكل ريحتة تشك الخشم واني باقية بدون اكل خلاها كدامنة كمت اروح اصعد صاح بية
_قبس: اكعدي اكلي اكعددييييي
_لا تصيح ماريد
_قبس: تاكلين وغصب عنج
_ما اكلللل يلاااا
_شلون لسان الله يساعد اخوي عليج دتعالي لا اكوم اسحلج
_ماتصيحين برجلج الغثثثة
_شهب: اكعدي اكلي واني اصيح بية
ردت اغمهم بس لزمت روحي وكعدت لان كاتلني الجوع اكلت والصراحة طبخة يمووووت
_قبس: هسة تعرفين تطبخين هيج
_نجمة: يجنن طبخي قابل نفسك بس تحمس
_قبس: ماحب اسوي مركة وتمن هذا اكل غربي
_نجمة: عود شوفوني مثقف ما اكل مرك وتمن
اكلت وكمت كلت خطية شهب الشغل عليها وهي حامل نزلت اريد اغسل المواعين لكيتة يغسل بيهن وهي تدرخ بعدها سحبت موبايلي وصورتة حتى اضحك علية من اضوج بس مشيت شوية شبعت ضحك على منظرة والله جاي يصدموني بتصرفاتهم .
رحت يم ود تلعب بالتليفون كعدت يمها فتحت شعرها وشغلت اغاني بقيت صافنة عليها تركص اجت تسحول بية اركص وياها .
_يااا شبيج ودودة
_الركص فن ديتعلمونة صديقاتي خل نركص
_حتى يشوفني ابوج يكول تريد توكع الطفل
_هسة انتي حامل باخوي؟
_ماعرف يمكن اخت
ضحكت بفرح تكمز فوك سريرها
_هيي هيييي راح يصير عندي اخو صغيروون
طفت الاغاني واجت يمي كعدت متحمسة تسولفلي وسبحان الله البنية الماتسولف ومتكابة صارت العكس .
_ود: نجوم هسة انتي تجيبين طفل يصير اخوي وماما هم تجيب طفل يصير اخوي مو؟
_اي
_باعي اكلج بس مو دكولين ماما كلتلي راح اتزوج
ويصيرون عندي اطفال
دمعت عيونها سحبتها لحضني اعدل بشعرها
_وانتي ضايجة لو فرحانة
_فرحانة لان ماما وحدها تريد اطفال يونسونها
_وانتي ماتردين تبقين يمها
_لا اني ماعوف بابا يزعل علية وهي دكلي روحي لابوج اني ماكدر ابقيج يمي هواي ماتريدني هي
اخذتها لحضني بوستها بقوة انكسر كلبي عليها
_يا روحـــي ماكو ام ماتحب جهالها اكيد هي تحبج و احنا نريدج ونحبج كلش هواي
_ومن يصير عندج طفل هم تحبينة واني لا
_لا والله أصلاً احنا نحبج اكثر لان الجبيرة
واول وحدة عرفتها هسة انتي يمي وابني بعدة بطني اكيد احبج اكثر
بوستها وهي بحضني خاتلة انفتح الباب دخل فقار شافنة وذب نفس قوي طفرتلة حضنت رجلية نزل يبوسها جابها وكعد يمي .
_ها نجوم شلونج
_زينة وين رحت
_هنا
كرص خدي بخفة ود تكلة
_بابا تريد ولد لو بنية
_كلشي حلو اهم شي السلامة
_ود: بابا شنو نسميها
_والله بابا ماعرف خلينا نشوف الجنس يلا
_ود: اوكي واني حختار اسامي هواي
ثاني يوم اخذني للدكتورة كالت كلشي طبيعي
رجعنا ود سجلت مدرسة متميزين التهيت بيها رغم هي كلشي تعرف حتى تقرا وجاي تتعلم انكليزي .
اجة عمي وصدمنة من كال ...
يتبع
____________________
بالليل كلش ينزل بارت
تفاعلو هنا 🔥🌚
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!