رواية الموت الحي الفصل الخامس عشر 15 - بقلم براء الموسوي

مرحبا حبايبي العسل شلونكم ❤️❤️

#الموت الحي
#للكاتبة براء الموسوي

دنيا : الطريق كله اني دموعي ما نشفت ، فكرة انُ بابا مريض ولازمة عملية ابد ما جاي استوعبها منين وشلون صار عنده خلل بالصمامات ما ادري وانوب مي الرئة طلعلنه صفح

يربي كل المصائب استوعباتها الا هالمصيبة والله مو حمل هيج شي احنه كلشي ولا ابويه ، اذا صار عليه شي نضيع والله نضيع

ياسر : يا بابا ياحبيبتي كافي بجي راحت روحج شجاج يابوية ، الي يشوفج يكول عندي مرض خبيث هو ماي وراح يسحبو شنو اول الناس اخر الناس اني
اتمرض

دنيا : بدموع ، عبالك هي سهلة يعني ، انت اذا صخنت بيتنا كله ينكلب مو عاد يطلع عندك مي بالرئة وتريدنا
ناخذ الامور هيج ومنهتم منين اجتك هالتايهه يربي منين

ياسر : هذا قضاء الله بابا حرام هالحجي ، الله سبحانه وتعالى جاي يختبرني بصحتي ويختبركم بيه
كون نصبر على هاي المحنه ونشكر الله وندعي بدال ما نكعد ننوح لو شتكولين

دنيا : هزيت راسي ودموعي مو راضيه تنشف ، وصلنا للبيت وتلكتنه امي بالباب وبس شافتني ابجي بهتت ملامحها

وئام : خير يا ستار ليش تبجين دنيا شبي ابوج

ياسر : مابيه شي يمعودة هاي بتج دراميه زيادة عن اللزوم ، تعاي خلي نطب جوه ونسولف مابيه حيل اوكف

دنيا : دخلنا جوه وعلى صوتنا كلهم اجوي ماعدى ديمة

زبيدة : هاا دنيا شبي بابا

ام حسن : طمني ابو معين شطلع عندك

وئام : هسه غير تحجي تره سكري ارتفع والله بعد ما اشوف كدامي من الهبطة

ياسر : يابه كلشي مابيه رحنا للدكتور ومن فحصني كلي عندك مشكلة بسيطة بالصمامات مسببتلك ماي بالرئة ويرادلك عملية بس نسحب الماي وهاي يابو
علي فضت راحت

وئام : يااا عزة بعيني ماي بالرئة منين اجاك

ام حسن : يايمة سودة بوجهي

زبيدة : ششـ شنو مي بالرئة شلون صار عندك واصلا خلل القلب منين اجاك وانت معتني بصحتك

معين : يابه احتمال هذا الطبيب تشخيصة غلط عادي تصير لان على كولة زبيدة صح انت معتني بصحتك وباكلك كلش هواي فمنين ممكن يجيك مرض القلب
واحنه القلب مو مرض وراثي عدنا

دنيا : بدموع حتى اني كتله خلي نروح لغير طبيب بس ميقبل

ياسر : اكلكم لتسوولي ياها قصة ، مشيت بحجيكم و رحت راجعت وطلع عندي مرض بسيط

زبيدة : بعصبية صدك بله تحجي انت ، يا بسيط هذا
تره ماي وعلى الرئة مو شويه حتى هيج انت مستهزء

ياسر : مو مستهزء بس اني كلبي بارد وان شاء الله كلشي مابيه جماعتي كومة صار عدهم ماي وسحبو وذولاك وياكم يسمعون حسج

الموضوع ابسط مما تتخيلون فليش اني اجي اكبره واسويها سالفة وهو ميسوه ، يا عيني يابعد كلبي
كولو يا الله وصلو على محمد وان شاء الله خير
شبيكم متشائمين

وئام : زين خلي نروح لطبيب ثاني بعد عمري بس خلي نتاكد كلشي يصير احتمال مثل ما كالو اكو خلل

ياسر : يابه والله ماكو داعي هذا الدكتور مضبوط واحسن واحد بشغلة بس نطقي اسمه وشوفي الناس شتحجي عليه

زبيدة : صدك دنيا هذا الطبيب زين ؟

دنيا : اي والله اني سالت عليه بنفسي قبل لا نروح وهواي مدحولي بي بس مع هذا جل من لا يخطئ يجوز هالمرة خطأ بالتشخيص

ياسر : لا اله الا الله انتو ليييش تزهكوني كلت لدكتور ثاني ما اروح كافي لتلحون

زبيدة : كمت كعدت كدامة ولزمت اديه بوستهن ، فدوة اروحلك ، عليك بداعة امي خلي نراجع طبيب ثاني ، لتباوعلي هيج والله شغلة القلب والرئة تخوف
ليش نجازف بصحتك ، رجعت بست اديه حباب بابا فدوة بس هالمرة اسمع كلامي وخل�ذه راحتج زيادة عن اللزوم نسيتي اني زعلان عليج وما احاجيج

زبيدة : عود صير زين وازعل على راحتك هسه عوف الزعل على كتر وتفضل اشرب المي

من رخصتك اروح اجهز العشاء وبالمناسبة عشاك شوربة لازم نكثر سوائل هالفترة

دنيا : راحت زبيدة عايفه بابا صافن ويهز بايده ، لحكتها لكيتها واكفه تثرم بصل وتبجي

عود شوكت تبطلين تجيبين البصل وتكعدين تثرمين بي عود مسويه نفسج دتبجين من الثرم عبالج يعني ميبين عليج دتبجين صدك

زبيدة : لا يمعودة ابجي شنو قابل شكو هو وبعدين البصل محتاجته للشوربة

دنيا : لعد ذاك الراس المثروم شنو ؟

زبيدة : اي احتاجه بغير شي

دنيا : عشانه شوربة وكبه تكلا بيمن تحتاجين البصل بله ، اباوعلها شمرت السجينه وباوعتلي ، وجها جان احمر وعيونها مليانه دموع

زبيدة : اهوووو شبيج متكليلي شبيج لزكتي عوفيني بحالي وولي

دنيا : ما رديت عليها ، رحت طلعت الطاوة حتى اكلي الكبة ، حسيت بيها توكف يمي وتدغني بجتفي

زبيدة : نصي النار لتحترك الكبة

دنيا : اي

زبيدة : هيي خوما زعلتي

دنيا : ببرود لا عليمن ازعل

زبيدة : لا زعلتي

دنيا : انداريت عليها شتردين ، اباوع لدموعها تنزل بدون متحجي ، طفيت الطباخ وحضنتها

زبيدة : خايفة لا بابا يعوفني

دنيا : اسم الله زبيدة ليش تحجين هيج

زبيدة : بدموع اخاف من الفقدان دنيا ما اتحمل اخسر احد بعد ، لچمة موتته امي وولد معين لسه بكلبي والله مابيه انكسر بعد

دنيا : اسم الله حبيبتي شنو السالفة كولي يا الله ان شاء الله بابا حيصير مثل الورد

زبيدة : ابتعدت ومسحت دموعي هيج تتصورين

دنيا : اكيد وبعدين احنه حنراجع غير طبيب بلكت هيج والله ميطلع بي شي

زبيدة : لا دنيا بي اني من بحثت هسه طلعت الاعراض تنطبق على بابا بالملي

دنيا : بلعكت ريكي ، زين ميخالف حتى وان المهم نستعجل بالعلاج

زبيدة : شي اكيد اني اول ما اخلي بابا يراجع يم هالطبيب حروح اسحب مبلغ من البنك حتى نسوي العملية باسرع وقت

دنيا : تدرين زبيدة ديمة شسوت اول ما سمعت بابا مريض ، كلتلي اخذو المهر مالتي وسوو لبابا العملية

زبيدة : هذا اقل شي ممكن تسوي اصلا هي السبب بالي صار لبابا

دنيا : لزمت اديها لا زبيدة ديمة مالها علاقة والطبيب كال حالة بابا متفاقمة لان مي الرئة ميصير الا اذا المريض قبل بوقت عنده مشكلة بالقلب وما معالجها
فلو نريد نلوم احد فنلوم مبين

اي زبيدة مبين هو السبب بالي صار لبابا لوما هو كسرنا وبهذلنا وبهذل بابا ما جان بابا تعب هيج وتمرض ، اباوع لزبيدة اشتدت ملامحها

زبيدة : كلامج صحيح فعلا ديمة مالها دخل والسبب الرئيسي هو مبين بس وحق الله لو يبقى اخر يوم بعمري اله ادفعه ثمن كل دمعة نزلت من عين ابوية
واني زبيدة بت وسيلة وكد حجايتي

دنيا : هزيت راسي ، يمكن بوقتها اول مرة اوكف ويه زبيدة واساندها بكل حرف تكوله فعلا مبين لازم يتحاسب على افعاله اشد حساب

بس اني عكس زبيدة هي تريد تاخذ حقنا بايدها اما اني فعايفه امر مبين لله لان اعرف ماكو اعظم من انتقام رب العالمين واذا احنه حسابنا يوجع قاط
فحساب الله يوجع الف قاط

رجعت اسوي العشاء وبالي يم بابا ، كملت وطلعنا اني وزبيدة فرشنا وكعدنا نتعشه ، دادا اخذت اكلها وصعدن تاكل ويه ديمة

ثاني يوم رحت للدوام وهناك خابرتني زبيدة ، جاوبتها هاا زبيدة بشري حجزتي لبابا

زبيدة : اي بس للاسف سرانه يوصل بعد اسبوعين لان الدكتور عليه لود كلش جبير

دنيا : زين وهسه شنسوي

زبيدة : شنسوي يعني ننتظر هالاسبوعين ونروحله على الاقل هذا طبيب مضبوط وشغلة كلها تمدح بي حتى لو لا سامح الله فعلا تشخيص ذاك الطبيب صح نخلي هذا الطبيب يسويله العملية بواسطة مشهور
وعنده خبره

دنيا : تنهدت خير ان شاء الله ، سديته منها وانداريت شفت سفير بوجهي ، عفيه هالانسان شكد صاير يغثني ، كلش خفيف وتصرفاته مو حلوة ما اعرف هو طبعه هيج لو بس وياي

نعم استاذ سفير محتاج شي

سفير : هاا لا ست بس ضل بالي يمج لان تأخرتي خير ان شاء الله

دنيا : ماكو شي ليضل ببالك ، من رخصتك

سفير : لحظة ست

دنيا : تفضل

سفير : وين رايحة العفو اقصد انُ شفتج رحتي لاتجاه معاكس للمكتب مالتنه فكلت اسالج

دنيا : رايحة اشرب شي

سفير : تصدكين حتى اني اريد اشرب تفضلي

دنيا : تنهدت يبوو لو ادري ما حجيت ، مشيت وهو لحكني ، دخلت للكافتيريا طلبت جاي وكعدت وهو كابلني وكعد ، اعرف ممكن ابين إني فظة بس اني اكرهه الرجال اليتمادون وياخذون ميانه هيج لذلك
كمت اثكل وجهي على سفير لكن ماكو فائدة

فتحت جنطتي طلعت فطائر جانت مسويتها زبيدة
طبعا مشروع زبيدة هواي خفف عليه مصاريف بواسطة هنا الاكل غالي واني ما احب اصرف
فكمت اخذ فطائر ، صاجات من هالامور التسويها زبيدة واكلها بالدوام هم اوفرلي وهم اطيب

قدمت الحافظة للنص ، تفضل استاذ سفير

سفير : لا شكراً ست والله متريك

دنيا : طلعت موبايلي حتى على عواطف حتى تنزل تتريك ويايه ، عزه بعينه شدهني حتى نساني البنية
اتصلت عليها وجاوبته ، ميخالف تفضل

سفير : يله ما افشلج رغم شبعان بس هاي لخاطرج

دنيا : هزيتله راسي وحاجيت عواطف الووو هاا حبيبي فوفه تعاي تريكي يله ، اي منتظرتج لا بس طلبتلي جاي وهسه كايمة اطلبلج علما تجين
يله تمام ، سديته وهي اجت اخذت جايها وكعدنا نتريك

عواطف : عاشت ايدها لزبودنه والله

دنيا : ابتسمت الف عافية حبيبتي

سفير : منو زبوده هاي

عواطف : اخت دنيا شلون طباخة ما شاء الله تخبل

سفير : يااا اختج طباخة

دنيا : حصرتني الضحكة من سمعته كال يااا ، احم اي طباخة وفاتحه مشروع

سفير : بصراحة تفاجئت يعني انتِ مبينه انسانه جداً راقية شعجب اختج تشتغل هيج شغل

دنيا : باستغراب ليش شكو بيها شنو الطبخ عيب لو حرام وبعدين شنو علاقة مشاريع الطبخ بالرُقي
شنو الناس اليطبخون ماعدهم رُقي مثلا

سفير : لا العفو ست بس تفاجئت

عواطف : على كيفج دنيا تره ابو حسوني ميقصد شي

سفير : أي والله اخاف فهمتني غلط اني اعتذر ما اقصد الاسائة والله

دنيا : انقهرت لان حجيت ويا بوقاحة ، رغم كلشي بس اني ادري بي رغم خفيته بس ماعنده هيج شي
لا ماصار شي ماكو داعي للاعتذار

كملنا اكل وكمنا ، راحت عواطف للمغاسل واني ويا مشينه راجعين للمكتب

سفير : ست دنيا تره قبل شويه من ست عواطف كلتلي ابو حسوني تره مجانت تقصد شي اني اصلا ما متزوج بس ناولي ان شاء الله اذا صار عندي طفل اسمي حسين

دنيا : هزيت راسي ضاحكة يربي هذا شبي ، لا مافهمت غلط وعادي حتى لو جنت متزوج اني اصلا شعليه

سفير : لا مو كلت خاف تفهمين غلط اني بعدني ما متزوج لان ما لكيت الانسانه التستاهلني

دنيا : فتحت موبايلي لكيت يوسف دازلي رسالة
" اذا خلصتي ريوك ويه السنيور سفير ممكن تتفضلين لمكتبي "

سديته وباوعت لسفير ، اييي الله يوفقك وتلكه الي تستاهلك من رخصتك

سفير : وين ؟

دنيا : عندي فايل يم استاذ يحيى اروح اجيبه واجي عن اذنك ، عفته ومشيت داخلة للممر الي بي مكاتب عمو والولد ، عكبت مكتب عمو ورحت لمكتب يوسف
دكيت الباب ودخلت من سمعت صوته ، صباح الخير

يوسف : صباح النور ست ، ريوك العافية ان شاء الله

دنيا : شكراً الله يعافيك ، بس ليش دتحجي بعصبية ، اكو شي ؟ اباوعله اجه وكف كدامي ويخوزر بيه

يوسف : خلي ببالج موديل الاكل والشرب ويه سفير هذاما عاجبني ولا يصرفلي

دنيا : ليش شكو بيها

يوسف : شنوو شكو بيها انتِ ثولة لو تستثولين ؟ شنو العلاقة البينج وبين سفير حتى تكعدون تتريكون سوه ، عرفه ولفه حتى يكعد وياج

دنيا : لتتجاوز مو بوز مهانة عندك اني دتغلط عليه وخلي يكون عندك علم تره اسلوبك هذا اني ما اتقبله

يوسف : عمت عيني الي يسمعج يكول خطية اول مرة تتعاملين وياا هلي مصدومة من اسلوبه

هذا عقلج خلي يشتغل شويه ويرجعج جم سنة لوره اني يوسف لتسويلي روحج ناسية تره النزعته بدلة الشرطة مو اطباعي

دنيا : طبعا ميبطل هالحالة السخيفة يرفع اصبعه السبابة ويخلي على نهاية حاجبي ويضل يدك بي هناك وهالحركة يدري بيها تستفزني لذلك يسويها

خزرته اني جم مرة كتلك ببببطل هالحالة اكرهها
اباوعله ابتسم ودفع راسي باصبعه وضم اديه

يوسف : زين بعدج تتذكرين ولتخوزرين لا افكس عينج واخليج عميه هاي اولا وبالنسبة لسفير فهاي اول مرة واخر مرة اشوفج كاعدة ويا لتستفزيني
اني هالسوالف متمشي عندي وانتِ تدرين

دنيا : تره مابيها شي احنه زملاء واذا كعدنا اكلنا سوه لاعيب ولاحرام قابل شمسوية اني وانت مسويها قصة

يوسف : دنيا اني ما اتقبل اي علاقة بين اي مرة ورجال سواء زمالة ، صداقة كل خريطج هذا
ميخش بعقلي مادام هالشخص غريب عليج
ميصير تكعدين ويا

دنيا : انت مملاحظ نفسك تجاوزت هواي ؟ ولو مقابل تكدر تحجي بأسلوب احسن من هذا تره راح اتفهمك
ماكو داعي للغلط والتجاوز هذا كُلش عيب تره

يوسف : اني ما اتجاوز لوما اشوف شي يستحق احجي وامد لساني وانتِ تعرفيني

اسمعيني دنيا اني صحيح كتلج اذا رجعتي على ذمتي مالي علاقة بيج بس بنفس الوكت اني ما اقبل تكعدين ويه اي رجال غريب وكلامي غير قابل للنقاش

دنيا : انت كلتها اذا رجعت على ذمتك هسه اني غريبة عنك عود من ارجع على ذمتك تدلل ومن هالعين قبل
هالعين اما هسه فمالك حكم عليه

يوسف : هاا هيج الحجي صار

دنيا : اي

يوسف : لعد خوش احسبي حسابج هالاسبوع ابوية يحاجي ابوج وهاا خلي اكلج راح نعقد الاسبوع البعده
وهسه تفضلي اخذي كل راحتج ويه زملائج

دنيا : اني مموافقة

يوسف : شلون بعد روحي شلون بعد كلبي ما سمعتج !!! شنو ما موافقة يمه لعبة هي

دنيا : مو هيج يوسف بس بابا مريض ، اباوع لملامحه تغيرت وبين عليها القلق

يوسف : خير خير شبي ابوج

دنيا : نسيت كل السالفة من تذكرت موضوع بابا ، كعدت لازمة راسي ، باوع البارحة رحنه للطبيب و
حجيتله كلشي

يوسف : وانتن ماعرفتن تخابرنا ، خايفات على الرصيد لو شنو فلمجن يعني ابوج يتمرض واحنه اخر من يعلم صدك جذب تحجون هيج مالنه اعتبار احنه

لو بس مخابرتني ما جان عفنا ابوج وحدة جان اجينه ويا ، شفناله دكتور على ضمانتنه حتى لو نطلعه خارج المحافظة المهم نطمئن عليه

دنيا : حقكم واني اعتذر بس والله مجان عندي فكر داخابرك ، عقلي واماني كله جان يم بابا متشوفني حتى ما خابرتك البارحة وحجيت ويه تيم
جنت مشدوهه وتفكيري مخربط حتى نوم منمت

حتى هسه من كتلك مموافقة ما اقصد شي بس لان بابا مريض واني ما اكدر اعوفه بهيج فترة

يوسف : خير ان شاء الله ، لا لتشيلين هم اني اصلا ما اقبل تتركين اهلج بهيج فترة وهمه يحتاجوج ديمة مريضة وزبيدة متكدر وحدها

دنيا : تنهدت ماسحة على راسي ، صدك انت ليش راسلتني داجي لهنا خو ماكو شي

يوسف : اي والله نسيت اكلج هالالن الكلب سفير نساني شجنت رايد احجي ، المهم ابويه عكب باجر
عازمكم انتو واهل رجل ديمة على الشالي وهم راح يخابر ابوح ياكد عليه بس اني كلت انطيج خبر قبل بوقت

دنيا : شنو المناسبة ؟

يوسف : بواسطة هو عمجن يريد يتعرف على اهل امين وهم يعرفه علينا كلنه تدرين بسوالف ابويه بعد
عود يريد يوطد العلاقات

دنيا : هاا فدوة لكلبه عمو شكد كيوت

يوسف : كلش كيوت

دنيا : اباوعله يعوج بحلكة عود يقلد عشتو ، ابتسمت
يله اني اروح من رخصتك

يوسف : براحتج

دنيا : رجعت للمكتب ، لحد ما كملنا دوام طلعنا للبيت
وصلت وانطيتهم علم بعزيمة عمو يحيى

وئام : يعني يحيى عازم اهل امين ؟

دنيا : اي ماما

وئام : عزه بعيني شكد فشلة

زبيدة : عضيت الخوخة ليش فشلة يعني ؟

وئام : لا اله الا الله ربي صبرني ، هيج حبيبتي ماكو شي عود خلي ام حسن تنطيهم خبر ، هي شوكت

دنيا : عكب باجر يعني الجمعة

زبيدة : والله يرادلنا هيج طلعة بلكت بابا تتغير نفسيته شويه

دنيا : اي والله فعلا بابا حيل تعبان ويرادلة طلعه تغيرله جو وماكو احسن من عمو يحيى الوحيد الي
يكدر يغير مزاج بابا

زبيدة : هو اني ليش اريده يروح على واهس عمو والولد

دنيا : لعد تمام خلي اصعد الاكل لديمة ودادا واكللهم هم حتى

زبيدة : براحتج

دنيا : رحت صبيت الاكل وصعدته فوك ، دخلت لكيت ديمة فارشه السجادة وكاعدة تقره قران هي ودادا ، هذا وضعهن من البارحة لسه ، ينامن شويه ويلزمن القران

يله دادا يله دمدم حبيبتي تعاي تغدي وراج علاج

ديمة : صدقت وسديت القران ، كمت لميت السجادة ورحت اخذت دوايه وكعدت

دنيا : اكول دمدم عمو يحيى عازمنا كلنا على الشاليه

ديمة : اي روحو اني ما اروح

دنيا : هو اصلا مسوي العزيمة علمود خطوبتج وكال عزمو اهل امين يريد يتعرف عليهم وهم حتى همه يتعرفون على بيت عمو

ديمة : باوعتلها صدك تحجين

دنيا : اي والله

ام حسن : يعني شكد شايفه ناس عدها اصول بس مثل ابو علي ما شفت ، شلون اخلاق وذوق

ديمة : ليش شجاب الذوق على عزيمتة لاهل امين ؟

ام حسن : مو انتن متفهمن بهالسوالف ، يحيى سوه هالعزيمة لخاطر ابوجن شلون سودة عليه محد حضر من اهله ولا اخوته بمشية ديمة فكام سوه هالعزيمة حتى يبين لاهل الولد عود تره ياسر مو وحيد واحنه اهله

دنيا : معقولة عمو هيج يفكر ؟

ام حسن : طبعا معقولة ولج اني اعرفهم من جانو جهال ويلعبون بالشارع هو وابوج ويكتلون اولاد ابو عباس

دنيا : هههههه يااا عزه جانو يكتلون الجهال

ام حسن : يبووو سكتي وخليها ابوج جان فقير وينكتل شلون زبيدة من جانت صغيرة بالضبط وعمج يحيى ما مخلي جاهل بالشارع يعتب عليه اذا ما كاتله

ديمة : اباوع لدادا غطت وجها بالشيله وصارت تختض من الضحك ، شبيج دادا

ام حسن : اتذكر مرة عباس كتل ابوجن بالخشبة تدرن
يحيى شسوه راح سحل عباس ونزعه هدومة ودكه بالصونده على **** لمن خلا يفرفح هههههه

ابد ما انسى هاليوم جنت اني اتوسك ويه بيبتجن واجينه لكينه يحيى لابس كليبه وعاض مقدمتها ولازم الصونده وطايح لعباس دك هههههه سودة عليه جنزه تجنز شلون يمد ايده على ياسر

دنيا : احب صداقتهم

ام حسن : ابوج وعمج مو اصدقاء ، ذولة اخوه واعز

ديمة : الله يحفظهم لبعض

: امين

دنيا : يله اعوفجن تتغدن الف عافية ، طلعت ونزلت لكيت بابا جاي وديسولف ويه عمو بالموبايل وفاتح مايك

يحيى : ولك انت صدك متستحي وعار عالاخوة ، ولك اني حتى الـ***** ما اضمها عليك وانت تريد تسوي عملية وضام عليه ليش ولك

ياسر : حقك عليه والله بس فكر ماعندي

يحيى : هسه خلي اخلص سم الحسن وجايك اريد العب بيك لعب ، الظاهر الزمن وبعد المسافة نسوك منو يحيى ، مع الاسف ولك مع الاسف تنساني

ياسر : دنجب ولتغلي زايد انساك شنو ولك بس نسيت والكعبة نسيت

يحيى : جاي اطيح حظك حتى متنساني بعد

ياسر : ههههه هلا بيك ، في امان الله

دنيا : شبيك تباوعلي بابا

ياسر : ليش كلتيله بابا خطية ما شفتي شلون ريكة ناشف وكوه يحجي

وئام : لازم يدري بالتالي هو صديقك اول وتالي راح يدري

دنيا : اباوع لبابا تنهدت وسكت ، رحت سويت جاي وفعلا ساعة واندك الجرس ، طلعت زبيدة فتحت الباب ودخلت ووياها عمو يحيى وخالة رميم ويوسف وتيم

يحيى : هاا ناقص شلونك

ياسر : تادب

دنيا : اباوع لعمو حضن بابا وضل يعاتبه لان ما خابره من البداية وكالعادة خالة رميم حاضنه زبيدة وتسولف وياها للعلم ماما وسيلة الله يرحمها وخالة رميم كُلش جانن صديقات هلي زبيدة هيج مقربة من خالة

لهناك وفزيت على صوت تيم

تيم : ننه تعال ثيل

دنيا : ابتسمت وعدلت حجابي ، رحت ليوسف لكيته واكف ، اشرتله بسؤال ، اخذه

ليوسف : هو اني جايبه علمودج

دنيا : ابتسمت من كل كلبي وشلته ، افيش يمه الوليدات ، مشتاقتلك يروحي

تيم : ثوفي ثوفي

دنيا : يداده يداده هاي شنو اوااا وين تعورت يكلبي

تيم : ثوفي هدا ددا عڤه منا

دنيا : يايمه عضك منا

تيم : اي هيل عڤني

دنيا : يا بعد كلبي ، شو ابوسها افيييش يمه يريحة الورد ، حضنته وهو يضحك ، اخذته ورحت للمطبخ
لكيت امي دتصب جاي شافت تيم واخذته تبوس بي
وهو مكيف بعد كلبي شكد محبوب

وئام : يمه صدقة لهالخدود ، هاج حبيبتي خلي عندج خلي اصب واطلع اسلم

دنيا : على راحتج حبيبتي ، كملت صب واخذت الصينية وطلعت واني اخذت تيم ولحكتها ، طلعت لكيتهم كاعدين يسولفون

يحيى : اني كلش زين دنيا حبيبتي ليش زحمتي نفسج واكلتيني بالسلام

دنيا : صفنت بوجهه وبعدين تذكرت اني ما سلمت لا عليه ولا على خالة اجيت كبل اخذت تيم ، نعلعلا بليسك تيم شسويت بيه

انطيته لزبيدة ورحت سلمت عليهم ، اسفه عمو اسفه خالة والله راح عن بالي كلش اسفه والله

رميم : عاد يحيى ميبطل هالسوالف ، ولا يهمج حبيبتي اصلا حقج حفيدي يلهي فدوة رحتله

دنيا : ابتسمت وانداريت داخذه من زبيدة لكيتها فاتحة حلكها تريد تعضة وقبل لا احجي سمعت يوسف يعيط بيها

يوسف : لا لا ديربالج تسويلها اكسر سنونج والله

زبيدة : حباب بس وحدة ضلت بنفسي

يوسف : لا كلت جيبي يله بيش طالبتنا دخيل الله

يحيى : عوفها بويه عدها داء الجلوبية مو بايدها

زبيدة : ولا يكعد راحة ابو الفسفوري

دنيا : اباوع لبابا عاط بزبيدة

ياسر : بحدة زبيدة

يحيى : يابه دولي اني وبنت اخويه انت شعليك والله عجيبه

زبيدة : لتكول ولي لبابا ما اقبل

يحيى : لا بنت الكلب ولج صدك مو صوجج

ياسر : ههههههه حيل تستاهل

دنيا : ضلو كاعدين بين ضحكة وسالفه ، صدك تونسنا
بس طول الكعدة خالة رميم تباوعلي وتتبسم ، مو غريبة عليها هي انسانة جدا لطيفة بس نظراتها وابتسامتها هالمرة جانت مختلفة عن كل عن مرة

رميم : ما شاء الله دندون صايرة تجننين ولو انتِ من البداية جمال بس هسه السمن حيل لايكلج

دنيا : ابتسمت شكراً خالة

تيم : ننه

دنيا : هاا حبيبي

تيم : يريد بح

دنيا : شنو بح ، جاوبني يوسف

يوسف : يعني جاي

دنيا : هاا ضحكت وجريت استكاني اشربه وهو يمطك بعد كلبي

لنص الليل ياله طلعو بعد ما بلغ عمو بابا بخصوص العزيمة

يحيى : ان شاء الله موعدنا بعد عمليتك عود على اساس ردتها عكب باجر بس نخليها وره عمليتك لان ما اجذب عليك ما اكدر اطلع واتونس وانت مريض

ياسر : والله اصلا مالها داعي

يحيى : دسكت يمعود خلينه نتونس صار هواي ما طالعين بس استعجل بالعملية حتى الونسه تصير على اصولها

رميم : اي والله افتقدنا لجمعات قبل الي انحرمنا منها
خلي تعيدها ونتونس ومن هسه ماكو واحد ميجي كلكم تجون وهاي ديمة الادبسز اعلمها لان ما نزلت وسلمت

يله كليبي تصبحون على خير واحلام سعيدة ، تعاي دنيا انطيني تيم ، ابن الزفره كبل باعني من شافج وميردني بعد

دنيا : ابتسمت وانطيته الها حبيبي جان نايم ومن اخذته كبل كعد ، راحو بيت عمو واحنه كبل رحنا نمنا

ثاني يوم الصبح كعدت بدلت وطلعت للدوام ، دامشي وصادفني امين الصبحيات بس شفته ابتسمت وهو من شافني ردلي الابتسامة

امين : صباح الخير خوية

دنيا : صباح الخيرات

امين : طالعة للدوام مو

دنيا : اي والله

امين : لعد تعاي وياي اني رايح اجيب صمون خلي اوصلج بطريقي للشارع العام

دنيا : شمدريك اني اروح بباديه

امين: اشوفج كل يوم يله تعاي

دنيا : مشيت ويا اكول انت كل يوم تطلع بهيج وقت

امين : لا مرات اطلع ابكر من هيج حسب الاسطا

دنيا : ابتسمت انت تشتغل عامل بناء مو ؟

امين : اي عامل الصبح وكصاب بالليل

دنيا : عاشت ايدك والله يقويك ويرزقك من اوسع ابوابه

امين : رحم الله والديج خويه ، ما كلتيلي انتِ وين تداومين

دنيا : اني موظفة بشركة الـ*******

امين : هاا يعني تداومين ويه حليم

دنيا : باستغراب شمعرفك بحليم

امين : تعرفت عليه عن طريق اسلام اخوية جان يجي للمحل العصريات واني اروح اكعد ويه الشباب وكت الماعندي شي وهناك تعرفت عليه خوش ولد

دنيا : ابتسمت وردة حليم ، وصلنا للشارع العام اني وكفت وهو وكف يمي ، باوعتله شكراً زحمتك اخذ راحتك

امين : ماكو زحمه خلي تجي الباديه واروح

دنيا : عادي تره اني متعودة كل يوم اوكف وحدي علما تجي السيارة

امين : ميخالف حتى لو اني احب اطمئن كلشي يصير

دنيا : ابتسمت بدون ما ارد عليه ، ضليت واكفه وهو واكف ويايه علما اجت الفورتات ، صعدني ودفعلي
وانتظر تحركت السيارة ياله راح

يربي فدوة شنو من اخلاق شايل هالولد والله خجلني
نيالج يا حبيبتي يا دمدم على هالرجال الوردة ، الله يحفظة لشبابه ويخلي لاحبابه

وصلت للشركة وانغمست بالشغل لنهاية الدوام طلعت راجعة للبيت ، وصلت وبدلت وتغدينا وهيج مضت الاسبوعين لحد ما اجه موعد بابا

رحنه اني ويا عمو يحيى ويوسف ، كعدنا وانتظرنا سرانه وطول الكعده اني اندعي الله يسهل علينا
صاحو باسم بايا وكمنا دخلنا

اخذ الدكتور كل التحاليل وطلب منا نرجع نعيدها وبين الفرة ومدة التحاليل صار الليل واحنه بالعيادة
لحد ما طلعت التحاليل واخذها الدكتور يقراها

يحيى : هاا دكتور

الدكتور : صحيح تشخيص الزميل فعلا خلل بالصمامات وماي بالرئة

يوسف : وشنو المفروض نسوي

الدكتور : عملية نسحب بيها الماي باسرع وقت

يحيى : ماكو مشكلة اذا متفرغ باجر نسويها

الدكتور : لا والله عندي لود

يوسف : زين دكتور انطينه اقرب موعد عندك منريد نتاخر

الدكتور : بعد اسبوع عندي مجال بس يوم الثلاثاء وبعدها عندي سفر لخارج المحافظة فاذا اليوم يناسبكم متفقين

يحيى : هاهي دكتور الثلاثاء الثلاثاء متفقين

ياسر : شكد تكاليف العملية

يحيى : اسكت انت يا تكاليف هاي التحجي بيها دسوي العملية وعوف الفلوس

دنيا : كام عمو سلم على الدكتور واحنه طلعنه ، حسيت بايد تحضني

ياسر : لتضوجين حبيبتي كولي الحمدلله

دنيا : نزلت دموعي الحمدلله

ياسر : عفيه بالسباعيه هيج اريدج

دنيا : وصلونه وتلكانه امين بالباب

امين : هاا عمي بشر والله اعذرني ماجنت ادري لوما ام حسن تكول عتبي عليك مو تكلي انت مثل ابني هاي تاليها تتمرض ومتكلي

ياسر : حبيبي وليدي والله ادري بيك متقصر وبعدين هي مراجعة للدكتور وهسه كدامك اجينه وعمك يحيى خذاني ولو احتاجك ادري بيك كفوو ومتقصر

امين : بشريني خويه شكلكم الدكتور

دنيا : ماي بالرئة وعملية بعد اسبوع ان شاء الله

امين : لا اله الا الله ، يله الحمدلله على كل حال ، اجر وعافية ان شاء الله عمي وشتحتاج الله عليك ليردك الا لسانك ومشكولة ذمتك اذا تحتاج شي ومتخابرني

ياسر : حبيبي انت متقصر والله ، تفضل ويانا يله

امين : لا عمي اعذرني عدنه خطار غير مرة ان شاء الله

ياسر : براحتك حبيبي

دنيا : دخلنه ومن وجوهنه عرفن الجواب فما سألن اصلا بس اجن حضنن بابا وبجن الا ديمة واكفة على صفحة ودمعتها على خدها

زبيدة : يله الحمدلله حتسوي العملية وتصير زين مو ؟

ياسر : ان شاء الله حبيبتي

وئام : حبيبي عندك العافية ان شاء الله

ياسر : رحم الله والديج ام معين ، كافي زبد كافي حبيبتي لتبجين ، تعاي دنيا حبيبتي لتبجين

دنيا : حضنته وبجيت ، صارت عيني بعين ديمة الواكفه تباوعلنا من بعيد

اباوع لبابا شافها وفتح ايده واشرلها

ياسر : تعاي

ديمة : اشرت على نفسي اني ؟

ياسر : اي تعاي

دنيا : اباوعلها تقربت تمشي ببطئ ومن وصلت بابا جرها ضامها بحضنه وهي تشبثت بقميصة وبجت بوجع

ديمة : ااااخ يهالحضن شكد مشتاقتله ، اووووف يا بابا اووف عسى المرض بيه ولا بيك حبيبي انت
والله قابله تجنزني تجنز بس كون تصير بخير
سودة عليه حبيبي انت

ياسر : نعلعلا ابيجن شسويتن بيه اريد اجزع منجن وما اكدر ، شو وخرن ومسحن دموعجن والله الاشوفها تبجي

وانت معين متستحي تبجي خواتك ماعدهن سند غيرك صير قوي واسندهن اني راح اسوي العملية
وانام بالفراش شلون بخواتك اذا انت هسه ضعفت
وكاعد تبجي

وضيف امك وام حسن يضلن نسوان ويحتاجن حماية واخياتك بنيات منو يساعدهن واني مريض غيرك
اسند نفسك حبيبي وصير رجال اني معتمد عليك

معين : صار حجي صار

ياسر : لتكول حجي اني ابوك ، كلي يابه بطلها هاي حجي

معين : بدموع والله استحي احجيها

ياسر : لتستحتي جل من لا يخطأ وبعدين موقفك ويه اختك خلاني امحي كل ذنب سويته وياي وراضي عليك من كل كلبي ولك انت وليدي وطالع من ظهري
اتفاخر بيك من تصيحلي يابه اكول هذا ابني
الرجال الماعافني بنص المحنه ووكف بظهري وظهر خواته لك انت شرف وتنحط على الراس عليمن مستحي شنو بس انت تغلط

معين : هـ هاي هي يابه

ياسر : اي عفية ، يله كلكم تطشرو لغرفكم اريد انام ولحد يضل طاب طالع عليه تره تنرفزوني بهاي السوالف متفقين

دنيا : عافنه وراح واحنه رحنه ننام بس وين النوم كلنه ضلينه كاعدين وهيج مر الاسبوع ببطئ شديد
يمكن من الخوف كمنه نحسب اليوم ساعة ساعة
لذلك نحسه سنة مو اسبوع

اجه يوم الثلاثاء يوم العملية ، كعد الصبح بابا حضرناله ملابسه وكعدنا ننتظر يوسف يجي ياخذه
للمستشفى الخاص الي حيسوي بي العملية

صارت بثمانية واجه يوسف وويا امين

يوسف : صباح الخير ، هاا عمي نطلع

ياسر : اي ، امين شعندك جاي مو عندك شغل

امين : لا عمي ما اكدر اعوفك اخذت اذن واجيت

يوسف : والله عمي نسيبك كفوو

ياسر : ابني هذا مو نسيبي

امين : رحم الله والديكم ، احم يله عمي خلي نطلع
منو من البنات راح تجي

وئام : محد تجي اني راح اروح ويا وكلمة زايده ما اريد ابقن بالبيت شعدنه عرس قابل ، يله يمه امشي
يله ياسر

دنيا : طلعو واحنه ضلينه كاعدين ونلوب ، ديمة ودادا من الفجر لسه لازمات القران وكاعدات بهالفترة مدري جم مره ختمن القران ، ينزلن على كد الاكل ويصعدن يقرن قران خو ديمة صارت تغفه وبايدها القران بدون متحس ، اربعة وعشرين ساعة القران والسبحة بايدها حتى من تنام تخلي القران يم راسها والسبحة بايدها

وزبيدة منغمسه بالشغل وحتى نوم متنام لحد ما ينهد حيلها ياله تغفى بدون متحس

واني مو احسن منهن ملتهيه بدوامي ومراقبة أحوال سكان البيت

خو معين ما صار يدخل للبيت الا بالليل وسودة عليه يطب ويطلع يبوس بادين ابويه ويبجي وبابا يكعد يواسي ويهون عليه وذاك متخبل وبس يبجي

تنهدت ماسحة على راسي ياريي سهل امره يارب
ضلينه كاعدين للوحدة الظهر ياله خابرنا عمو يحيى
ركضت زبيدة ردت عليه واديها يرجفن

زبيدة : هاااا عمو بشر

يحيى : الحمدلله نجحت العملية هلهلي ولج

معين : اللهم صلِ على محمد وال محمد الف الحمدلله

دنيا : اباوع لزبيدة صارت تهلهل وتبجي سوه وعلى صوتها نزلت دادا وديمة

ديمة : شكو شكو

زبيدة : عملية بابا نجحت

دنيا : لزمت كلبي الحمدلله الف الحمدلله

يحيى : هههههه طايحة الحظ ولج صوتج سمعته كل المستشفى

زبيدة : ههههههه خلي يسمعون فرحتي خليهم ، زين بشرني شوكت يطلع

يحيى : حجزناله غرفة وباجر ان شاء الله يطلع ، يله ولج روحي طمني خواتج وام حسن وهاا كلي لديمة
رجلها تبرع لابوج بالدم بمدري جم بطل حتى تخربط خطية عود خلي تتشكر من ههههههه

زبيدة : سديته واني مبتسمة سمعتن

ديمة : انصدمت من سمعت امين متبرع لبابا ، عفيه هالرجال منين مخلوق ، بديت اشك انه مو طبيعي

دنيا : يله بنات خلي نصلي صلاة شكر لله

ديمة : اي يله ، تعاي دادا

دنيا : رحنه صلينه ودادا طول الصلاة تبجي واكثر من مرة كطعت صلاتها ، رحت حضنتها حبيبتي دادا فدوة لكلبج شكد حنينه

ام حسن : ولجن ابوجن وليدي الماجبته وانتن حفيداتي وفرحتي اموت عليكم كلكم

زبيدة : نروحلج فدوة دادا

ديمة : مسحت عيونها وبستها لتبجين فدوة موزين على عيونج

ام حسن : تعالن ابوسجن بعد كلبي فدوة رحت لحنيتجن

دنيا : بوستنا وكامت باست معين وهو باس اديها

معين : عذريني خاله اخاف اذيتج بكلامي امسحيها بوجهي واعذيني

ام حسن : انجب ولك انتو قطعة من روحي ما ازعل منكم كافي يله خلي اروح اسويلكم الغدة اليوم راح اسوي تشريب ادري بيكم تحبو

دنيا : راحت دادا تسوي الغدة واحنه كعدنه نضحك ونتشاقة ماعدى ديمة جانت كاعدة وبس تبتسم حتى ما شاركت بحديث

لثاني يوم جابو بابا سودة عليه يون من الالم بس الحمدلله مرت العملية بسلام ، اخذو الولد للغرفة مددنا وغطينا وضلينا مكابلي وكاعدين

بيومها اخت امين باتت عدنه حتى تنطي ابرة المغذي لان احنه منعرف ونخاف عليه ، حبيبي كل اليوم يصيح من الالم منا لمن انطته بصائر ابره مهدئ ياله
ارتاح

زبيدة : بست ايده الحمدلله على سلامتك حبيبي

دنيا : الف الحمدلله تنذكر ومتنعاد ان شاء الله

ديمة : بدموع حبيبي بابا بيه ولا بيك متشوف شر ان شاء الله

معين : عدك العافية يابه اجر وعافيه ان شاء الله

دنيا: ابتسم وجاوبنه كوه لان ميكدر يحجي

ياسر : حبايبي الله يعافيكم ، اييي واخيرا وجوهكم وردت مو كتلكم راح تعدي سلامات شفتو

زبيدة : الف الحمدلله حبيبي ، كعدت يم راسه ومسحت على راسه متنهده يمه نفسه عندي بالدنيا والله راد يوكف كلبي من الخوف

اباوعله يبتسم

ياسر : هاا ولج شو ساكته

زبيدة : ما اريد احجي واتعبك وانت هم اسكت لتسولف موزين عليك وحاول تنام علمود ترتاح
اباوعله غمض عيونه

دنيا : راح اروح اصبله الشوربة واجي تعاي زبد
رحنا اني وزبيدة حضرناله العشه وديمة كاعدة يمه ترتب علاجاته وتوقت موبايلها على اوقاتهن وامي وياها وبصائر خطية لمن ارتاح بابا ياله اجاها امين وراحت

ودينه الاكل لبابا كعدت امي توكله ودادا تعدل مخدته واحنه مكابلي وكاعدين شلون المشايفين وهو كلما يباوعلنه يبتسم

كمل اكل وكمت اني اخذته الصينية ورحت اغسل المواعين وديمة اخذت علاجها وتمددت على القنفه بالصالة وزبيدة لازمه موبايلها وترد على المتابعين

كملت واجيت تمددت بحضن امي وصرت اغفي ، اباوع للساعة صارت الـ2 واحنه لسه كاعدين

وئام : الله يساعدجن حبيباتي تعبتن اليوم

دنيا : لا اصلا كلشي ما سوينه الله يساعدج انتِ

وئام : واجبي هذا حبيبتي ، ديمة متصعدين تنامين موزين عليج نومة القنفه

ديمة : لا مرتاحة

وئام : وانت معين كوم تمدد حبيبي تكسرت من الكعدة

معين : لا يمه خليني كاعد وبعدين حتى لو تكسرت اني اصلا ما احس

دنيا : تنهدت حجايه معين كسرت كلبي

زبيدة : بابتسامة لتخاف بس خلي تفض هالسالفة اخذك ونراجع بيك دكتور اني ماراح اسمح تبقى هيج

معين : انتِ ؟

زبيدة : ليش مو اخويه والمفروض واجبي هذا ؟

معين : هاا لا طبعا اخوج هاهي براحتج

دنيا : سودة عليه معين ماصدك زبيدة تحجي ويا حتى نقاش ما ناقشها

وئام : يله اخذو راحتكم اني تعبت ورايحة اسبح وانام بس زبد حبيبتي بلا امر عليج كومي ترسي دولكة ووديها للغرفة اني بس اسبح واجي

زبيدة : تمام ، كمت ترست دولكة مي ودخلت للغرفة خليتها على الطبله واجيت اطلع بس رجعت شفت بابا نايم بسته من راسه ومن ايده اوف شكد احبك فدوة لكلبك

اجيت ابتعد وصفنت عليه مستغربة ، هاي ليش ماكو نفس ، رفعت ايدي بسرعة خليها على انفه ، بلعت ريكي ممـ ماكو نفس ، حركته بابا ، بابا تسمعني ؟

ميجاوب !

طلعت بسرعة شفتهم واكفين

دنيا : شبيج

زبيدة : ببـ بابا مدري شي ماعنده نفس

دنيا : ششنو ماعنده نفس ، دفعتها وطبيت اركض للغرفة ، لزمت ايد بابا ، بابا حبيبي تسمعني

ام حسن : ولجن خاف بسبب العلاج نايم

زبيدة : بهدوء ممـ ماكو نفس ششـ شوفو

ديمة : خليت ايدي على انفه وعيني على صدره الميصعد وينزل دلالة على التنفس ، همست مات

دنيا : اباوع لديمة ويه ما حجت صارت تلطم

ديمة : ماكو نفسسس باباااا مااااااتتتتتتتت مااااتتتتتتت

دنيا : على صوتها طلعت امي تركض من الحمام وبس شافت وضعنا كامت تلطم بدون سبب

زبيدة : ممـ مستحيل مستحيل ، بابا يا بابا اكعد يروحي مو حتى انت فدوة اروحلك

دنيا : بدون شعور طلعت اركض بطرك هدومي للشارع ، صرت اصرخ وادك الباب على الجوارين وابجي طلعلي ابو كاظم

الله يخليكممم باباااا بابااا ميتنفس وااااللله هستووووه جان يسوللللففففف وياناااااا
على صياحي طلع امييين من شفته ركضت كمشت بقميصة امييين الحكلييي باباااا ديمممة تكوووول مااتتتتت الله يخلييييك الحكلنا

راح امين والجوارين يركضون واني ما اعرف نفسي وين فجأة لكيت نفسي واكفة بالمستشفى وخواتي واخويه داير مدايري ويبجون همه وامي وام حسن

لهناك واشوف عمو ويوسف

يحيى : هااا هااا

دنيا : ببجي بابا عمو بابا ماكو عنده نفس ونحاجي ميحجي ودييييمة هايييييي ديمة تكول ماتتتت
شنووووووو ماتتتت والله قبل جم ساعة شبكني وباسنيييي شلوووون ماتتتتتت

يحيى : تاكل تببببن شنو يموت لالا هاي تمسلت
وييين الطبيببب

دنيا : ايييي حاجيهاااا الجذابببببة تكوووول ماتتت وهوووو عايييش تفاوله المتخاف ااااالله

ديمة : تنشغ ،ماتتتتت والله ماتتتت اني شفت صدررره ميتحرررررك

دنيا : انجبييييي لتحجيييين وتفاوليه ، اجه يوسف يلزمني دفعته وخررررر

ويييين الدكتووور خليييي يجييي يطمنااا على بابااا

يوسف : اهدي دنيا الله يخليج اهدي

دنيا : شهدئ لللللللك شهدئ هذااااا ابوووووييييييه
قبل شويه جنت بحضنه والعب بشعرررره وهسسسه تكلوليييي ماتتتت دولووووو

سمعت صوت الباب تنفتح ويطلع الطبيب ، ركضت لزمت أديه، ههـ هااا دكتور ششـ شلونه بابا

الدكتور : للاسف المريض تعارض وصار عنده مضاعفات وما كدرنا نسيطر عليه لان اصلا من اجه كان قلبه متوقف

" البقاء في حياتكم "

*************************************

(كُلُّ مَنْ عَلَيْهَا فَانٍ ۝ وَيَبْقَى وَجْهُ رَبِّكَ ذُو الْجَلالِ وَالإكْرَامِ ۝ )

للاسف بهالبارت اضطريت ان اذكر وفاة شخص عزيز عليه لدرجة خلتني ما اوكف بجي طول ما اكتب البارت وكلما اتذكر انُ خلص هالانسان ما راح اكدر اذكره بعد اتاذة جدا

عمو ياسر ، القلب الطيب والروح النظيفة ، الاب الصح والحبيب الصح ، الانسان الصح ، عاش متعوب ومات متعوب لكن عوضه ان شاء الله يم رب العالمين

جنت اتمنى تكون نهايتة مو هيج لكن انا اريد وانت تريد والله يفعل ما يريد

بالنهاية كلنا مجرد حكايات لابد انها تنتهي في يوم من الايام

اتمنى منكم تقروله الفاتحة خصوصا بهالايام الفضيله وتهدوها لروحه

واعتذر جدا لو جنت اليوم السبب بحزنكم او بكائكم
يمكن ذكرتكم باحبابكم اليوم بدون قصد لكن صدكوني ما كدرت ما اذكر هالانسان واتعمق بشخصيته

حسيت انُ عمو ياسر انسان يستحق الذكر والمحبة لذلك انطيته جزء من الرواية تمنيت كلكم تحبو مثل ما اني حبيته وتعلقت بحنيته واخلاقة وصبره وتقبله لقضاء الله في كل الاحوال

الله يرحمه برحمتة الواسعة ويرزقه الفردوس الاعلى ويرحم امواتنا وامواتكم جميعًا

تحياتي 🖤