مرحبا حبايبي العسل شلونكم ❤️❤️
#الموت الحي
#للكاتبة براء الموسوي
زبيدة : تفاجئت من شفته گبالي هذا شجابه ، اباوعله من شافني ابتسم وتقدم مادلي ايده
حليم : شلونج زبيدة
زبيدة : انداريت على هارون لكيته خال اديه بجيوبه ويباوع لحليم بملامح باردة
شتتت نظري عن هارون صوت حليم وهو يحاجيني
حليم : هاا زبد مو جاي نسلم عليج شنو متسمعين لو حتى سلامي صار ميعجبج
هارون : نزل ايدك وعدل حلكك
حليم : عفوًا ؟
هارون : صير حباب وايدك نزلها لا اني بطريقتي انزلها الك
حليم : واو عنيف د*** ** واستمتع حبيبي
زبيدة : اباوع لهارون سحب ايده من جيبه وحك حاجبة مبتسم
وبدون سابق نزل ايده ضرب حليم بوكس على وجهه وذاك ما تحمل كبل وكع بالكاع وكام يضحك بهستيريا
شهكت من شفت هارون دنك عليه وزنگه من قميصه حيل مكومه من الكاع
لزمت ايده العاته حليم ، على بختك هارون هو مخبل انت شبيك ، متشوفه شلون يتطوطح كدامك مبين مو بوعيه لتحط عقلك بعقله
الله يخليك احنه جايين هنا نحضر مناسبة ونرجع لتسولينا مشكلة فدوة احنه مجايين نخرب فرحة العالم حباب لتسوي هيج
على الاقل لخاطر العرسان خطية شنو ذنبهم تخرب ليلتهم بسببنا حباب عوفه ، هارون الناس دتباوعلنا عيب لتسوي هيج والله فشلة
هارون : اذا بعد شفتك كبالي حتى لو بالصدفة والديك انعلهم يييييله ولي
اباوعله نتر حليم واندار عليه يصيح
هارون : انتِ الثانية ييييله امشيييي ، كلجن نفس الطينة كللللجن
زبيدة : جرني من ايدي ودخل للقاعة واني عيوني على حليم المنتجي على الحايط ويباوعلي
اني بس اريد افتهم شغلة اني شوكت صافحته حتى جاي هسه يمدلي ايده لا فوكاها كدام الشفيه خاف اني عايزه
باوعتله لكيته يتوجه لرجال جبير بالعمر يطلع بكد جدي واكف ويمه هواي ناس وهو اول ما صارت عينه على هارون ابتسم وتقدم مصافح هارون
: هاي منو منورنا اليوم اني مصدوم
هارون : للاسف ما كدرت ارفض عزيمتك
: ههههههه اصلي هارون اصلي انت ، شلونك جدي
هارون : الحمدلله والف مبروك للعرسان
: الله يبارك بيك ، هاي الجميلة زوجتك اكيد
هارون : اي ، زبيدة اعرفج هذا الاستاذ اسحاق ابن عم جدي ومن اكبر المساهمين بشركاتنا
زبيدة : شلونك استاذ
اسحاق : أهلاً بيج جدو حبيبتي شلونج
زبيدة : ابتسمت الحمدلله والف مبروك للعرسان ربنا يجعلها الهم زواجة الدهر
اسحاق : آمين يارب ، اخذي راحتج جدي اذا تحبين روحي يم الجماعة وعوفيلي رجلج شويه اريده
زبيدة : هزيت راسي ومشيت ادور على اهلي ، شفت بيت جدي كاعدين على طاولة وبصفهم بيت عمو يحيى
تقدمت سلمت على الكل ومن وصلت لعمو يحيى ابتسمت من كل گلبي
يحيى : هلا بالحبيب هلا
زبيدة : اسكت مشتاقتلك والله
يحيى : اي مبين اشوفج مكطعه روحج
زبيدة : عرفته ميدري بيه جنت مريضة ، والله حقك عليه بس جنت ملتهيه وماعندي وقت حتى اطلع من البيت
يحيى : عمت عينج يالبسنز ومن بشنو ملتهية
زبيدة : ههههههههه بالحياة والله
يحيى : عوفج من كل هالحجي ما كلتيلي شنو رأيج بستايلي
زبيدة : باوعتله ، لابس قاط اصفر فاتح ومنسق رباط اصفر وبي تنانين بلون اصفر غامق ولازم جكارة جروت بايده
اني بس لو افتهم انت المصمم مالتك منين ديجيب هالافكار والتنسيقات الغريبة هاي
يحيى : غريب بس حلو
زبيدة : يا حلو طالع جنك بطل ليمون برباطك هذا
يحيى : طيح الله حظج
زبيدة : هههههه لا اتشاقة وياك ، حبيب انت شتلبس تطلع تخبل
يحيى : بعد روحي زبد
بالمناسبة تره انتِ اليوم خوش منسقة ويه وذاك الرجال
زبيدة : باوعت لهارون الواكف يم الرجال الاسمه اسحاق ويسولف
يحيى : تره طالعين كلش شيك ولايكين لبعض هم
زبيدة : عيوني على هارون وجاوبته ، هيج رأيك ؟
يحيى : ميه بالميه
زبيدة : ابتسمت وباوعتله ، تره طالع جمال اليوم
يحيى : ههههههه اشكرج
زبيدة : ههههه يله اخذ راحتك ، باوعت لخواتي معزولات بمكان وحدهن
رحت يمهن بوستهن وكعدت هاا شو وجوهجن تلطم خير بس لا متعاركات
دنيا : اني تعرفين وضعي فلتسأليني عن شي
زبيدة : وانتِ ؟
ديمة : متعاركة ويه امين
زبيدة : على شنو ؟
دنيا : النادرة متعاركة ويه رجلها والله شنو لان اجه لابس قاط عرسه وما قبل يطلع يشتري قاط
جديد
زبيدة : وشكو بيها يعني واذا لبس قاط عرسكم ، باوعتله واكف ويه يوسف وولد عمو ، شبي شو
كلش مرتب وانيق
ديمة : شو سكتي زبيدة انتن عمرجن ما راح تفهمني
باعن لولدنا وباوعن اله
دنيا : وانتِ شعليج بولدلنا واصلاً على اي اساس تقارني بيهم هذا التصرف عيب شعايزة الرجال
وشنو فرقة عنهم وكاعدة تقارنين بينه وبين
فلان وعلان
زبيدة : تره جديات ديمة الموضوع ميسوه تتعاركين انتِ هم على كيفج ويا وقدري وضعه هو هم خطية
منين يتلكاها من ظروفه الصعبه لو من شغلة اليشلع الگلب ، انتِ المفروض تخففين عليه
مو تكعدين تتناكرين ويا تره امين خوش امين و ميستاهل الواحد يگله كلمة وحدة تغث
ديمة : اهووو اكلجن شو سدن الموضوع انتن كل وحدة منجن عايشه مترفهه ومرتاحة وجايات تتفلسفن براسي
زبيدة : باوعت لدنيا مستغربة من اسلوب ديمة
دنيا : حبيبتي ديمة ليش دتحجين هيج ليش انتِ شناقصج شو جنج ورد
ديمة : ورد بس مزروع بزبالة
زبيدة : تأدبي ديمة شهالحجي السخيف هذا عيب عليج
ديمة : شو فكن ياخة عني اني من غير شي جزعانه
دنيا : اجيت ارزلها بس اشرتلي زبيدة اسكت
زبيدة : غلسي عنها هاي اذا تتنرفز تضل تجفص عوفيها وحدها تبرد لتناقشيها
دنيا : ما شفتيها شلون تحجي على رجلها الادبسز هاي وهو مدايرها وشايلها بالصلوات
زبيدة : ميخالف عوفيها ، خلي نتفرغ لشغلتج هسه وبعدين نرجعلها ونشوف شنو سالفتها
دنيا : هو هيج ، باوعت للعرسان الي دخلو وصدح مع دخولهم اصوات اغاني الدخولية
ابتسمت من شفتهم جانو طالعين يجننون ووجوهم تبث حيوية وسعادة اني من يمي من شفتهم نسيت
كلشي وضليت مركزة بجمالهم
انوب بدت فقراتهم سوه ، ركصو سلو بوسط القاعة
والورد الاحمر ينزل عليهم من سقف القاعة وهمه يضحكون والناس تصور بيهم
منظرهم ذكرني بعرسي اني ويوسف اوووو ابد ما انسى هاليوم جان احلى يوم بحياتي وما زالت اشوفه
احلى يوم بحياتي
بيومها اني ويوسف ذبينه لحم سوه لا هو جان مصدك ابويه قبل اتزوجه ولا اني الجنت مصدكة إني صرت مرته
جان يوم خيالي ، عمو يحيى وزبيدة بيومها لبسو سوه ويركصون سوه همه وخالة رميم وياهم
ديمة جانت طالعة لعابة بفستانها الوردي المنفوش ، جانت صغيرونه كلش حتى ما محجبة وبيومها
الكل تعجب عليها وعلى جمالها
وماما وسيلة حبيبتي ما حضرت علمود بابا لان جان مقهور عليه تكول ما اكدر اعوفه ضايج وحدة روحو انتو واني ابقى ويا
ابتسمت واني اتذكر هالتفاصيل الحلوة الي مستحيل تمر على ذاكرتي مرور الكرام
سمعنا الدي جي يگول انُ العروس تهدي هالاغنية للعريس والكل كام يصفك
جانت الاغنية لنانسي عجرم
اسمها "إحساس جديد"
إحساس جديد بقلبك بيزيد
بتحسُ كل ما بتتطلع فيّ
إنك ع طول فيّ مشغول
كثير بتشتاق لي و بتموت عليّ
أنا ما بدي تقلي كلام
يذوب قلبي حنين و غرام
أنا ما بدي تقلي كلام
يذوب قلبي حنين و غرام
بيكفيني تقلي بحبك
هيدي الكلمة بتقتلني
ضلو العرسان يركصون على هالاغنية واحنه نباوعلهم ، فدوة شوفيهم زبد شكد طالعين لطيفين
ماردت عليه
انداريت عليها لكيتها خاله ايدها على خدها وصافنه مدري وين ، باوعت على المكان الي دتباوعله
لكيت هارون واكف بعيد يباوعلها وهي تباوعله وفاصلين عن العالم ، ذاك يحاجو هناك وميرد وهي
هنا احاجيها ومتجاوبني
انوب اني عفت العرسان وكمت اباوعلهم واحدهم صافن بوجه الثاني ويجرون حسرات
خلصت الاغنية وكعدو العرسان وهمه بعدهم على نفس الوضع ، ندست زبيدة حتى نفز لان صفنتها
هواي طولت
زبيدة : هاا هاا شبيج
دنيا : صباح الخير صارلي ساعة احجي وياج ، غمزتلها شبيج
زبيدة : هاا لا مابيه شي داباوع للعرسان واندمجت فما سمعتج
دنيا : اشرت بايدي العرسان ذاك وينهم وانتِ دتباوعين للجهه الثانية هاا زبد عليمن دتباوعين
زبيدة : شبيج تغومزين
دنيا : ههههههه اشاقه وياج كملي كملي محد شاف
زبيدة : دنيااا
دنيا : ههههه هاهي سكتت
خلص العرس واحنه طلعنا بعد ما باركنا للعرسان وطبعًا تيم ما قصر كد ما هز وركص كضه الطريق نايم من التعب
وصلنا للبيت قبل الكل ، نزل يوسف شال تيم واني اخذت جنطته ولحكتهم
دخلت للمطبخ وكالعادة ست الحسن والجمال موجودة ، طبعًا اني ملاحظة عليها شغلة
انها اخر وحدة تنام بالبيت شوكت ما انزل الكاها لازمة الوصلة وواكفه على الطباخ عود تمسحه و
ما طلع طباخ هذا وين منضيعها نلكاها واكفه كباله
شفت يوسف گال السلام عليكم وگبل صعد فوگ وهي كامت تلوب ومن شافتني گبل بدلت وابتسمت
سجى : الله يساعدج ست
دنيا : هلا بيج
سجى : طالعة تخبلين ست شنو هذا الجمال
دنيا : شكراً
سجى : ست
دنيا : نعم
سجى : ادري بيج تعبانه بس حبيت اسألج شصار بخصوص سالفة التبديل بعقد الاستاذ قبلت ؟
دنيا : لا ما قبلت
سجى : ليش ما قبلت
دنيا : وشمدريني اني عفتها وصعدت فوك لكيت يوسف منيم تيم وكاعد بس مبين عليه متوتر
شبيك ؟
يوسف : حليم لسه ما رجع للبيت وهسه خابرني جياد يكول لكيته قريب على القاعة سكران ووجهه ينزف
دنيا : يااا وما عرفتو منو الضاربة
يوسف : ما اعرف بس هالولد راح يسودنا والى متى راح نبقى اني واخواني نطمطم اله ما اعرف
دنيا : شوكت يعقل هذا مو مشيته الاسبوع الجاي والله ميصير هيج
يوسف : اني باجر احجي ويا لان هسه شارب وجياد گلي ما بي يحجي وغافي بسيارته
دنيا : يفضل تحجون ويا هو اخوكم الصغير واكيد يسمع منكم
يوسف : هو هيج باجر ناخذه ونطلع نحجي ويا
دنيا : عاشت ايدكم ، كمت غسلت وبدلت ملابسي اجيت انام وتذكرت موبايلي مصفر شلته ورحت للميز
فتحت موبايل يوسف داشوف شكد شحنه حتى اشيله ولكيت رسالة من رقم غريب طالعه على الواجهه
" استاذ اني هسه وره الحديقة ومنتظرتك مو تتأخر "
هاي شنو !!
___________________________________
زبيدة : عيني على الطريق وسألته ، ليش ضربته
هارون : الظاهر مصافحته ضلت بنفسج
زبيدة : لا بس فاجأتني ردة فعلك انُ يعني ليش تنرفزت منه لهالدرجة
سوه روحه ميسمع وغير الموضوع بسرعة
هارون : انتِ بالعادة عادي عندج تصافحين الزلم
زبيدة : لا وحليم جان ديمسلت وحده اني عمري وحياتي ما صافحت اي واحد
ولتعتبر كلامي تبرير لو اثبات الك إني ما اسويها اني داوضح الموقف الصار لا اكثر
رجعت راسي اباوع على الطريق واسمعه كل شويه يتنهد فجأة وكف السيارة بالشارع
باوعتله لكيت ايده ترجف وكوه ديجر النفس ، يااا هارون شبيك شنو حتجيك النوبة
هارون : لا لا
زبيدة : زين كوم انزل اني اسوق بدالك ، انت وضعك مو طبيعي لتضغط على نفسك
هارون : لا ميحتاج ما بقى شي ونوصل عشر دقايق واحنه بالبيت
زبيدة : رجع شغل السيارة وتحرك واني عين عليه وعين على الطريق لمن وصلنا للبيت ياله جريت نفس مرتاحة
نزلت قبله ومشيت باتجاه بسرعة فتحت الباب واخذت ايده
هارون : اكدر امشي لتخافين
زبيدة : ميخالف انطيني ايدك ، سديت الباب ولزمت ايده ومشيت على كيفي ويا
دخلنا جوه وصعدنا فوك ، فتحت الباب وخليته يدخل
هارون : هاهي عوفيني اكدر امشي
زبيدة : عفت ايده وهو راح شمر سترته و كعد على الجرباية ومد ايده يريد يفتح القميص بس ايده ترجف ومجاي يسيطر
مشيت باتجاهه وكعدت يمه ، لزمت اديه الي لازمات الدكم وحاجيته
عوف اني اساعدك
هارون : ميحتاج
زبيدة : لا يحتاج
جريت اديه عن القميص ونزلتهن ، فتحتله دگم الكمام وصعدت ايدي افتح بدگم القميص
فتحتهن كلهن ونزعته القميص على كيفي ، اخذته وكمت طلعتله ملابس وخليتهن يمه
البسك التيشيرت لو انت تلبسه ؟
هارون : احم لا اخذي راحتج اني البسه
زبيدة : تمام ، كمت اخذت ملابس الي ودخلت للحمام بدلت ومسحت المكياج من وجهي ، غسلت وطلعت
لكيته لابس بس البجامة ومتمدد على الجرباية ، اخذت ملابسه ودخلتهن للحمام حتى اغلسهن باجر
طلعت وطفيت كل الاضويه ، بقى بس ضوه بسيط جاي من الحديقة ، رشيت معطر جو على السبلت
ورحت تمددت بصفه
تغطيت زين وباوعتله مغمض عيونه ، مديت ايدي خليتها على كصته مجان مصخن تنهدت براحة
جريت ايدي عنه من شفته فتح عيونه وباوعلي
هارون : شبيج ؟
زبيدة : بدون لا اجاوبه تقربت وخليت راسي على صدره وحضنته
حسيت بجسمه يتشنج ويقشعر ، عدلت راسي على صدره وتنهدت ملتمسه ايده
عجبني انام بحضنك ولتسألني ليش بس اريدك تحضني مثل ما حضنتني الصبح
بدون ليجاوبني سحب البطانية برجليه غطاني وغطه روحه وحاطني باديه ثنيناهم وباس شعري
ابتسمت وغمضت عيوني ، غفيت واني احس بايده تلعب بشعري لو تمشي على جتافي
ما كعدت غير ثاني يوم ، باوعت للساعة جانت بـ9 الصبح
شلت راسي على هارون لكيته رايح بسابع نومه ، باوعت لاديه الي محاوطتني بقوة وابتسمت
سبحت نفسي على كيف منه وكمت داخلة للحمام غسلت وفرشت اسناني وطلعت كعدت يم راسه
ندسته هارون ، حبيب يله كافي كوم خلي ننزل نتريك اني جوعانه ومابيه حيل كل ساعة اسوي اكل
اباوعله فتح عيونه ومد ايده يم راسه سحب علبة فتحتها وخله حباية هيل بحلكه ورجع غمض عيونه وكام يلوج
لحظة اني هالعلبة مو شمرتها فوك الكنتور وين لكاها !!!
فززني صوته وهو يرد عليه والله العظيم خرعني
هارون : عندي هواي مثلها
زبيدة : بسم الله الرحمن الرحيم انت شنو تقره الافكار
هارون : جؤ بس انتِ غبية وتفكرين بصوت عالي
زبيدة : اباوعله فتح عيونه وكعد مرجع ظهره على تاج الجرباية ، مد ايده خله شعري وره اذاني
هارون : صباح الخير
زبيدة : ابتسمت صباح النور شلون صرت
هارون : موزين
زبيدة : خير شبيك اكو شي يوجعك
هارون : ايدي خدرانه من وره جنابج صماخج شكبره الليل كله اني ما اكدر اتحرك من وراج
زبيدة : اييي صحيح بالعلامة جنت معرت بيه لدرجة تكول راح اطير من حضنك بطل سوالفك
هارون : ههههه
زبيدة : ضحكت على ضحكته عابت هالضحكة شلون حلوة
كمت من يمه واشرتله يله كوم حنزل اسوي ريوك مو تتاخر
هارون : سوي بيض عيون اليوم عندي عطلة اكدر اكل بيض
زبيدة : صدك انت ليش باوقات الدوام متاكل بيض ؟
هارون : تصير بيه ريحة زفر فما اكل بس بالعطلة
زبيدة : اني طول عمري اتريگ بيض ولا مرة صارت بيه ريحة زفر
هارون : هي متصير بس اني اوهس
زبيدة : اممم خوش ، راح هو للحمام واني ركضت لبست ثوب صيفي مالت بيت وويا حجاب
لبسته ونزلت داخله للمطبخ ، شفت هيام ونسوان حمزيني عشتو كاعدات بالمطبخ
صباح الخير
ردن عليه من وره خشومهن وحدة زعلانه لان هارون ضرب رجلها والثانية زعلانة لان رجلها مسافر ويه اخوية عشتو واني شلون كطعت روحي
رحت طلعت بيض ووكفت اسوي
هيام : هارون كعد لو بعده
زبيدة : لا كعد وهسه حينزل حتى نتريك
هيام : عوفي اذا نازل خلي اني اسويله ريوك
زبيدة : ميحتاج لتعبين نفسج هياتني طكيت بيض وحسوي جاي
هيام : اكلج زبيدة
زبيدة : كولي خالة اسمعج
هيام : هارون البارحة شبي بالعرس شو مدري وضعيته جانت غريبة
زبيدة : ما اعرف ما سألتي
هيام : هاا اني اسأله
زبيدة : اي شكو بيها
هيام : لا مو ما اريد اضوجه
زبيدة : خدرت جاي وباوعتلها ، اي على راحتج
كمل الجاي صبيته وشلت الطاولة بالصينية وطلعت للصالة لكيت بيبيتي كاعدة هي وهارون
صباح الخير بيبي
حمزية : صباح الورد حبيبتي شنو هالجمال اشو الخدود متفحه اليوم
زبيدة : اي والله البارحة نمت نومة تجنننن
حمزية : بالعافية عليج حبيبتي
زبيدة : الله يعافيج بيبي ، اباوعله لهارون يباوعلي ويمسح على لحيته
يله كوم ، خليت الصينية على الميز وكعدت ، يله بيبي كومي ويانا
حمزية : سبع عافيات سبقتكم
زبيدة : كعدنا نتريك وطبعًا هارون ياكل وهو ساكت واني اسولف ويه بيبتي
حمزية : عمج يحيى البارحة گال مشية ابنه الاسبوع الجاي ويريد جدج وعمامج والولد يحضرون
زبيدة : اي شكو بيها ، هارون انت تروح
هارون : لا
حمزية : ليش بيبي
هارون : هيج
حمزية : اييي براحتك
زبيدة : كملنا اكل وكمت شلت الصينية وديتها للمطبخ وغسلت وطلعت لكيت هارون يطلع من الحمام
وين رايح ؟
هارون : اريد اسبح الخيول
زبيدة : اجي وياك
هارون : شعدج جايه
زبيدة : ضايجة
هارون : امشي فضيني
زبيدة : طلعت ويا للاسطبل ، اكول انت دائمًا تسبحهن لو اكو واحد غيرك يعني يسبحهن ويعتني بيهن من انت مموجود
هارون : من اسافر صاحب ياخذ مكاني
زبيدة : هزيت راسي ، دخلنا للاسطبل وهو راح مدري وين شويه وطلع شايل سطل بي شامبو يمكن و سفنجة خلاهن على صفحة ورجع لنفس الغرفة
طلع منها جهاز يشبه الفارة وبي صوندة طويلة
هارون : هاج سحبي هاي ولحكيني
زبيدة : شال هو السطل واني اجر بالجهاز وامشي ورا طلع خلاه كلشي بكفه الاسطبل
هارون : اوكفي هنا هسه اجي
زبيدة : ماشي ، راح وشويه واجه ساحب ويا 2 خيول
شدهن بمكان معين وجر التيشرت من گفه راسه نزعه
وراح شكل الجهاز ونكعهن
هارون : انطيني بطل الشامبو
زبيدة : اخذت واحد من السطل وانطيته اله ، اباوعله دار كمية على ظهرهن واخذ الاسفنجة وكام يجلف بيهن
باوعت للسطل جان اكو اسنفجة ثانية ، اخذتها وسألته اساعدك حتى تخلص بسرعة ؟
هارون : بكيفج
زبيدة : لعد حساعدك ، فتحت حجابي وشديته شلون العصبة لفوك صار يشبه التوربان
جريت السطل كلبته على وجهه وصعدت عليه ، وكمت اجلف جسم الحصان واضحك
هارون : شبيج تضحكين
زبيدة : الشعور حلو
هارون : دديربالج لتزلكين ويصير شعورج مو حلو
زبيدة : ابتسمت وضليت اجلف بالحصان ، انوب اخذت كمية من الشامبو وكمت اغسل شعره
تعال هارون ديرلي مي هنا ، اجه دار على الحصان ولان المي قوي نكعني ويا
هارون : فركي شعره زين ، اي هيج
زبيدة : كملنا اول حصانين وراح هو جاب ثنين ثانيات
وعدنا وياهن نفس الشي وهيج مشه الوقت
اخر شي جاب ملهم وملهمة
اكول هارون لعد ملهمة مو جابت ابنها وينه
هارون : نايم ، يله استعجلي خلي نكملهم بسرعة ، انتِ سبحي ملهمة واني اسبح ملهم
زبيدة : تمام ، كمت اجلف بملهمة وذاك يصهل بصوت عالي ، انداريت على هارون هذا شبي ؟
هارون : يغار عليها
زبيدة : ياا يعني الحيوانات هم تغار
هارون : لعد وحد
الاسد اذا شاف اللبوة ويه اسد غيره من غيرته عليها يروح يكتل جهالها بس في سبيل يحرگ كلبها
زبيدة : ياااا يعني يكتلهم هيج لو يموتهم
هارون : لا يموتهم حتى ينتقم لنفسه
زبيدة : شكد حقير لعد الجهال شعليهم
هارون : طبعه هذا
زبيدة : كبر كرهته والله
هارون : ليش ما كرهتي اللبوة مو هي البدت بهذا الفعل
زبيدة : ما اعرف اثنينهم حقراء كرهتهم ، رجعت اشتغل واجه ببالي سؤال ، صدك هارون انت من خطفتني ليش هديت عليه النمر مو الاسد
هارون : الاسد اخطر من النمر من ناحية الافتراس يعني لو هاده عليج جان حتمًا راح ياكلج
اما النمر فآني جنت موكله ومشبعه قبل لا اجيبج والنمر اذا شبعان مستحيل ياكل بعد الا يحس بالجوع
زبيدة : لعد اذا مجان رايد ياكلني ليش جان يدفع بيه ويطفر عليه
هارون : النمر بطبعه كائن شقاوجي يحب يشاقة ويزرع الخوف بفريسته مو اله ياكلها
ومن جان يدفع بيج ويزئر بوجهج حتى يخوفج منه يحب يشوفج ضعيفه كدامه هالشي يخلي يحس
بالانتصار
زبيدة : طاحظة اي والله زوعني العافية
هارون : تدرين مرة قريت انُ مبدئ التنمر مقتبس من النمر نفسه
زبيدة : شمعنى ؟
هارون : هو الوحيد من الحيوانات الي يضل يركض وره الحيوانات الاضعف منه ومن يلزمهن يضل يسوي وياهن نفس ما سوه وياج
يحب يعذبهن نفسيًا حتى لو مياكلهن المهم عنده يشوفهن خايفات منه وبس يتونس ويكمل يعوفهن ويروح
ولهالسبب سمو التنمر استنادًا على اسم النمر لان الانسان من يتنمر يريد يحقق انتصار او يتونس من يحس بالمقابل ضعيف او اقل منه
وهيج يكون تشارك طبع حيواني بحت بعيد كل البعد عن تكوينه البشري العاقل ولهالسبب الي يتنمر يعتبر مريض نفسي لان يتصرف بطريقة تنافي طبيعته الانسانية
زبيدة : واو ماشاء الله شنو هالمعلومات ، نشونل جيوغرافيك وين عنك
هارون : دجلفي جلفي شطول لسانج
زبيدة : هههههههه
__________________________________
دنيا : جريت الكرسي صعدت عليه ومديت ايدي خاله الموبايل فوك الكنتور مثل ما كالت زبيدة
تيم : الله ماما وياج
دنيا : باوعتله عزه انت مو جنت نايم شكعدك
اباوعله رفع اديه لفوك
تيم : وياج حبابه
دنيا : نزلت ورجعت الكرسي بمكانه ، شلت وبوسته تعال ناكل عميه ، بدلت ونزلت جوه كعدته يم خالة وحليم ورحت للمطبخ ثردتله صمون ومركة وطلعت كعدت وكمت اوكله
حليم : ولج كافي من شفتي وشفتيني حاطه وتعبين بحلكه راح ينفجر الطفل حتى ركبته اختفت من وراج
دنيا : بوجهك الله ومحمد عينك عليه شجاك
رميم : كول ما شاء الله ووجع
حليم : عليمن ما شاء الله مسوياته دب
دنيا : مالك علاقة انت عود اذا صار عندك جهال لتسمنهم ، افتح حلكك يروحي
تيم : امو
حليم : حبيبي
تيم : هو ميحبك
دنيا : ههههههه حيييل
حليم : هو اني ياهو اليحبني بقت عليك
رميم : يله ميخالف باجر عكبة تجي مرتك وتحبك وتدللك دلال
حليم : اي من ****
رميم : لسانك طايح الحظ استحي على روحك مرت اخوك كاعدة
حليم : عليمن استحي شنو اكو واحد ماعندة ***
رميم : اي
حليم : منوه
رميم : انتتتتت
حليم : عيب عليج يمه
رميم : عيب الله انت من كعدت ولسه تشمر علينا ***** لعبت رواحنا
دنيا : غطيت وجهي وجتافي كامت تهتز من الضحك
حليم : هسه انتِ جاي تضحكين تبجين شنو سالفتج
دنيا : اشرتله كافي عليك الله كلبي كام يوجعني ، كلما اتذكر خالة شلون انفجرت بوجهه وخلته صافن اخرب ضحك
تنهدت جاره نفس يمه نعلعلا بليسج خالة
رميم : الله يجعلها ضحكة خير حبيبتي
دنيا : حبيبتي خالة فدوة لعمرج
رجعت اوكل تيم لمن كمل كمت غسلت وغسلتله واخذته وصعدت داروح للغرفة وشفت سجى بطريقي
اباوعلها طالعة من الممر الي مابي غير غرفتنا وغرفة حليم ولازمة سلة ، هاي شعدها هنا
انوب من شافتني كامت تبلعم
سجى : شلونج ست
دنيا : شعندج هنا
سجى : العفو ست شنو ضايقج وجودي هنا
دنيا : لتحجين زايد شعندج بهالممر احجييي بسرعة
سجى : وو والله اني ما صعدت بكيفي بس ست رميم هي الامرتني اصعد انزل ملابس استاذ حليم الوصخة واني رحت اجيبهم لا اكثر ولا اقل
والله ست هذا كل ما بالموضوع وتكدرين تسألين الست وتره ست اني رغم فقيرة وخدامة بس عيني شبعانة والحمدلله
يعني ماممكن افكر اتقرب لغرفتج لو اخذ منج شي لتظنين بيه ظن السوء الله يخليج وهاي ايدج مستعدة ابوسها واني الممنونه بس لتشكين بيه
دنيا : اباوعلها كامت تشهك مو بس تبجي خلتني صافنه والله
تيم : ماما هدا بابي
دنيا : انداريت على اشارة تيم لكيت يوسف واكف يم الدرج ويباوعلنا
يوسف : نزلي سجى كملي شغلج
سجى : حاضر استاذ
دنيا : هااا هسه افتهمت عليمن هالبجي والمناشغ اثاري يوسف طلع واكف
يوسف : تفضلي دخلي للغرفة
دنيا : اي ادخل ليش حتى ما ادخل
فتحت الباب ودخلت مكعدة تيم على الجرباية ، انداريت عليه لكيته ضام اديه ويباوعلي من وره خشمه
يوسف : شنو هذا الاسلوب الجنتِ جاي تحجين بي ويه البنية
دنيا : رفعتله حاجبي عفوًا بس انت من شوكت جنت تدخل بهاي السوالف
اشو عمري ما شفتك علقت على تصرف اي واحد بينا ويه اي عاملة شمعنى هسه متنرفز وجاي تعاتبني ومحروگ دمك هم
يوسف : تصرفج غلط مو عيب تحاجين البنية هيج شنو هالتكبر والغرور بالتعامل يعني البنية اذا فقيرة
ندوسها خوما ندوسها
متستحين مو عيب عليج ، انتِ لو بمكان البنية تقبلين احد يحاجيج بهالاسلوب الهمجي هذا
دنيا : وانت جاي تقارني بهاي !!
يوسف : واقارنج بيها ليش بشنو تختلف عنج هي مو بشر حالها من حالج شهالعقلية المتخلفة
عود انتِ البسيطة العاقلة تنظرين للناس بهالطريقة لعد شخليتي لابريز مرت علي
دنيا : على كيفك عيني على كيفك حبيبي عليمن كل هالرجيف ما كطمنا نصها لست الحسن
مجرد شفتها طلعت من الممر وسألتها شجاي تسوين هناك ، شنو كطعتها لو شربت من دمها
يوسف : انتِ شفتي اسلوبج وياها لو لا وبعدين اي واحد بمكانج من راح يشوف السلة بايدها تقائيًا راح يعرف شجانت تسوي بس الظاهر انت هرمون الغباء
كلش صاعد عندج
دنيا : ديربالك تجاوز اني ما تايهلك ولا جاييتك من الشارع حتى تحاجيني هيج انتقي الفاظك واحجي باحترام مثل ما اني داحاجيك باحترام
يوسف : من تتعاملين بانسانية واحترام ويه العالم عود تعاي طلبي مني ما احاجيج بهذا الاسلوب
دنيا : انت كمت هواي تدوس بالحجي خلي انزل لان مالي خلكك للامانة ، تعال ماما حبيبي خلي ننزل
يوسف : ونزلتهم طبج طوب
_________________________________
زبيدة : هارون تعال اجلف لملهمة ركبتها اني اخاف اتقرب من راسها لتعضني
هارون : جيبي
زبيدة : اخذ الاسفنجة وكام يجلف ركبتها ويبوسها وهي تدفع روحها عليه وهو يضحك
هارون : حبيبتي المشتاقه الي ، يله حبيبتي كملنا هاهي بقت بس ركبتج ، شو شويه عفية وردة ملهمة
زبيدة : اباوعلهم وابتسم كلش يعجبني تعامله ويه الحيوانات حيل حنين عليهن وهالشي يبين من تعلقهن بي
هارون : تعاي جيبي الصوندة وغسليلها
زبيدة : شغلت الدكمة وكمت انكعها وهو يعصر الاسفنجة عليها ويليفلها
ضليت اغسللها وهو يفرك جسمها لمن كمل واخذها لجوه واجه لملم الغراض ساعدته ودخلنا كلشي جوه
تمغطت وركيت على صدري ااااخ يمه تعبت
هارون : هاا تعبتي
زبيدة : اي والله
هارون : يله امشي خلي ندخل
زبيدة : مشيت ويا وشفت شي خلاني صافنه هارون هاي شنو
هارون : امشي وغلسي
زبيدة : بس لحظة ملهم شبي يصيح
اباوعله لزم جتافي ودفعني حتى امشي
هارون : امشي جاي اكول لتضلين واكفة
زبيدة : دخلي افتهم شبي يصيح ، بلعت ريكي وباوعتله عزه هاي شنو
هارون : ارتاحيتي هسه مو جاي اكلج امشي ليش تعاندين
زبيدة : زين هو ليش هيج يعني العفو هو فجأة يصير هيج بدون سبب
هارون : لا بس لان شاف روحة بالمراية
زبيدة : اي واذا شاف روحه بالمراية
هارون : لا إله الا الله لج بابا شلون افهمها الج ، الخيول بطبعها دائمًا معجبة بنفسها وملهم من شافن نفسه نظيف وحلو هيج انعجب بروحه وصار عنده
استغفر الله شو امشي امشي خرب يومج والله عليج اسأله ، والمشكلة تلحين واله تردين واحد يجاوبج ياله تفوخين
زبيدة : واني شمدريني الخيول طايح حظها هيج وبعدين لتصيح عليه تره ما اقبل
هارون : اعتذر ست تفضلي
زبيدة : اعتذار مقبول حبيبي
هارون : إلهي الصبر ما اريد غير الصبر
زبيدة : طلعنا من الاسطبل وهو راح لبس تيشيرته واجه يمي
اباوعله كالعادة يمشي ويحرك ايده على الورد ، شفته شلع وردة حمرة
ابتسمت وبسرعة فتحتله ايدي
هارون : شنو
زبيدة : خليلي الوردة بأيدي نفس ذاك اليوم
هارون : دفتحي حجابج وضمي ركبتج
زبيدة : اوو نسيت فتحت حجابي ولفيته شلون ما جان بس ضميت شعري وقدمتله ايدي يله
خلاها بايدي رفعتها لانفي شميتها وتقدمت بسته من خده شكراً حبيبي
هارون : ييـ يله امشي
زبيدة : مشيت ويا ، دخلنا جوه وتلكتنا خالة هيام تبجي بالباب بس شنو مفرفحة روحها وشعرها مكفش كد ما مملخته
اني شفتها وانخمط گلبي خير يا ستار
____________________________________
ديمة : كاعدة ودگ موبايلي شلته شفتها تقى ، جاوبتها الووو
تقى : هاا ولج بشري شلونه العرس انتظرتج تخابريني تنطيني اخر الاحداث بس ماكو فكلت اني اخابرج
ديمة : سكتي لو اعرف ما رايحة
تقى : ليش خير شصاير
ديمة : ما تحملت سولفتلها كلشي حتى بجي كمت ابجي
تقى : وهو شدعوة عليه قحط قاط جديد ، خاف تنزعلين بس رجلج شكد فكري ويسد النفس
ديمة : لج تقى سولفت لخواتي لعبن بيه لعب وطلعني اني الغلطانة
تقى : اي شكو على كلبهن هنه مرتاحات وانتِ واكعه بوجه الكباحة
اني متأكدة الاغلبيه انتبهو عليه لابس هدوم العرس ولتكليلي ماكو وحدة اجت كلتلج
ديمة : مسحت دموعي وهزيت راسي اي بنات عمي كللي رجلج مو لابس نفس الهدوم وضليت ساكته
تقى : اوف يا ديمة اوف محد يفهمج بكدي لان اختي نفسج وجاي تعاني نفس معاناتج ولج تخيلي صارلها
سبع سنين ونفس الحال لا اكل نفس العالم لا طلعه نفس العالم
جاي تراوح بنفس مكانها والله شنو لان رجلها ماعنده تعاي شوفيها سودة عليه تكسر الخاطر ولج حتى ذهب متكدر تشتري لبناتها
فنصيحة لوجه الله يا ديمة انفصلي عن رجلج وشوفي حياتج بعيدًا عن هالفكر
ديمة : شلون انفصل والله امين مستحيل يطلكني
تقى : كليلي هسه انتِ تردين تتطلكين لو لا
ديمة : اي اريد
تقى : لعد سمعي الراح اكوله ونفذي بالحرف وشوفي شلون راح يضل يسودن منج
ديمة : بدت تشرحلي واني ابلعم والله خايفة اسوي هيج واجرحة والله بس شسوي مجبورة اني هالحياة
بعد ما اكدر اتحملها
تقى : هاا شكلتي
ديمة : تمام
تقى : خلصي وخابريني
ديمة : ماشي
________
بعد مرور ساعات من الزمن
ديمة : الووو هاا تقى شلونج
تقى : هاا ولج بشري شصار
ديمة : سويت مثل ما كتيلي
تقى : اي وشرد عليج هو ؟
ديمة : زعل واخذ هدومة وطلع نام بره
تقى : اييي همزين عاد فك ياخه عنج
ديمة : بس انقهرت احس نفسي هواي جرحته
تقى : لعد شتسوين متكليلي هذا الحل الوحيد اليخلي ياخذ موقف وميقربلج بعد ياهو الاحسن برأيج يلزكلج اربعة وعشرين ساعة ويجبرج على فراشة
لو يزعل ويفك ياخه منج ، لتاخذج العاطفة انتِ نفسيتج متدمرة وحالتج حالة صايرة ، كافي فكري بس بنفسج ولو لمرة وحدة ما طيح حظج غير نفكيرج بالناس وبمشاعرهم
يمعوده كلمن يصيح ياروحي بهالدنيا ، طز بي وبمشاعرة شنو لزكة الف مره حسستي بعدم رغبتج ويرجع يدحس ويتعذر دخيل محمد شكد ماعندة كرامة
ديمة : بس تره هو خطية كلش حباب
تقى : اكلج لتنرفزيني واذا حباب يعني شنو قابل تدوسين على روحج وتفرضي عليج جبر
ديمة : هيج رأيج ؟
تقى : طبعاً ، يله هسه طبي سبحي واسترخي وكعدي شوفيلج فلم ما دام فرغلتج الغرفة
ديمة : تمام ، سديت الخط وانداريت لكيت بصائر واكفه ورايه وعيونها تجدح نار من العصبية
عززه شكلها سمعتنا اني وتقى
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!