تحميل رواية «المشلول» PDF

_يعني إيه يا بابا عايز تجوزني لواحد مشلول وكمان أنا ماعرفوش طب حتى رؤية شرعية

كنت بتكلم وأنا مخنوقة حاسة إن نفسي محبوسه وهو واقف قدامي، بيرد عليا بنبرة فيها قلة حيلة وقلة صبر

_إنتِ رفضتي عرسان كتير يا ريناد والناس بدأت تتكلم هيقولوا فيكي حاجة هيقولوا إنك معيوبه وأنا مش هسيب سمعتي وسمعتك تروحوا في داهية

سكت لحظة وبعدين كمل وهو بيحاول يقنع نفسه قبل ما يقنعني

_وبعدين يونس ده راجل محترم وشغله كويس ومرتاح وأنا هبقى مطمّن عليكي معاه مستحيل يزعلك أنا عارفه كويس متحكميش من دلوقتي

بصيتله وأنا مش مصدقة

_بس يا بابا أنا مش حاسة إني عايزة أتجوز دلوقتي… عايزة أكمل دراستي وبعدين إيه المشكلة يعني في كلام الناس سيبهم يقولوا

رد وهو بيقوم من مكانه كإنه قفل النقاش

_مين قال إني همنعك من دراستك وبعدين انا هبقي مطمن عليكي معاه مبقاش فاضل حد غيري معاكي وانا مش هدوم العمر كلو بس كفاية عناد أنا كلامي خلص

جريت وراه يا بابا أنا

ملحقتش أكمل مسكني من دراعي وقال بحزم

_خلاص يا ريناد صدعتيني ننام دلوقتي وبكرة الصبح هنتكلم بس الكلام مش هيتغير اعملي حسابك هتقابليه

دخلت أوضتي وأنا مخنوقة أنا مش ضد الجواز بس مش دلوقتي ومش كده أنا لما أتجوز أتجوز حد يفرّحني حد أكمل معاه عمري مش حد مشل…

سكت فجأه استغفر الله أنا قصدي إيه بس؟

كنت بكلم نفسي وبحاول أقنع نفسي بكلام بابا حتى لو بنسبة واحد في المية

تاني يوم صحيت على صوت بابا وهوا صوته عالي

_يا ريناد! قومي يا بنتي كل ده نوم؟ لو سبتك العمر كله هتنامي فين بقى التعليم اللي ماسكة فيه دا مفيش كتاب يوحد ربنا حتي مفتوح

فتحت عيني بالعافية، مرهقة من السهر

_هي الساعة كام يعني؟ العصر يا دكتورة قومي يونس على وصول

اتعدلت وانا بتكلم

يونس مين يا بابا دلوقتي

بس كنت أصلاً دخلت الحمام ومش مركزة

_اتفضل يا يونس نورت البيت

وقفت ورا الحيطة أستخبى وببص

دخل وحد ماسك كرسي متحرك

اتجمدت مكاني

_ده مشلول خالص… يا نهار أسود

بلعت ريقي

تستاهلي يا ريناد… عشان رفضتي اللي قبله كله بس عادي هنرفض كمان مرة وخلاص

دخلوا وقعدوا يتكلموا مش سامعة بس شايفاه لابس بدلة سودة شكله هادي

فجأة صوت بابا بينادي

_ يا ريناد

اتنفضت وجريت على أوضتي

بعد خمس دقايق لقيته داخل ورايا

_مش بنادي عليكي؟ قومي قابليه وبلاش هبل قدامه

مسكت فيه

_ والنبي يا بابا بلاش قوله إني نايمة خرجت أي حاجة

مسكني من إيدي وسحبني يلا

دخلت الصالون غصب عني وعدلت نفسي بسرعة ومثّلت إني هادية

زقني بخفة ف كتفي اتكلمي

_إزيك… أنا ريناد

مديت إيدي بتوتر سلم عليا وهوا وساكت

بابا قام

_طب أسيبكم تتكلموا

وأول ما خرج حسيت إنها فرصتي بصيتله وقلت بسرعة

_ بص… أنا أصلاً مغصوبة على القعدة دي وأكيد إنت مش هترضى حد يتفرض عليك كده إنت باين عليك ابن ناس

كان ساكت ولا كلمة

_استغربت وقولت إنت مشلول ليه؟

بصلي وقال بهدوء مستفز

_إنتِ باين عليكي لسانك طويل

اتلخبطت وقولت

_لا والله… أنا بس بسأل

_هو ده سؤال يتسأل كده؟

بصيت حواليّا وقلت ببرود

_هو إحنا قاعدين نشرب شاي مثلا مطبعي اسأل

قال وهو بيشاور:

_لا… عصير مش شايفة؟

رخمت عليه

_طيب… إنت بقى إيه عرفتني منين؟

مهتمش وسأل كأني متكلمتش

_انتي بقا ايه اهتماماتك

“لا نرد على السؤال الأول… ولا إيه؟

_مش هرد

_طيب عرفتني منين؟

_عرفتك وخلاص

_يعني ايه عرفتك وخلاص انت جاي تتخانق

_ يستي هوا انا اتكلمت كلمتين علي بعض حتي

اتنرفزت وكملت بسرعة

_إنت اتخطبت قبل كده؟ شكلك مش صغير يعني سبتها ولا هي اللي سابتك وبتشتغل إيه أصلاً وإزاي..

قاطعني فجأة وهو بيبصلي ببرود

_هو أنا ليه حاسس إني أنا العروسة؟

وسابني… ونادى

_يا عمي

اتخضيت مش عارفه بينادي علي بابا ليه اصلا

دخل بابا

_في إيه يا يونس يا ابني؟

رد وهو مبتسم ابتسامة غريبة

_العروسة باين عليها خلصت كلامها واتكسفت تقعد لوحدها

بصيتله بصدمة هو بيلعب بيا؟

دخلت أوضتي وأنا مولعة بعد شوية سمعت بابا بيسلّم عليه وصوت الباب بيتقفل

خرجت سألت

_قال إيه؟

وش بابا كان منوّر

_ارتاحلك جدًا وقال إنك كمان ارتاحتي رغم انك كنتي قافله الموضوع بس ممكن تديه فرصه

اتجمدت

_أنا؟

_أيوه يا ريناد وقالي انك أول مرة ترتاحي لحد كده اسمعي الكلام بقى وبلاش عناد

وسابني ودخل وقفت مكاني مصدومةأنا إمتى قولت كده؟!

______________________________

تاني يوم…

رجعت من الكلية، فتحت الباب ودخلت وأنا مرهقة.

لقيت بابا قاعد في الصالة، أول ما شافني ابتسم بطريقة خلتني أستغرب قفلت الباب ورايا وقلت

_إزيك يا بابا مالك؟ حساك فرحان كده

رد بسرعة

_أكيد فرحان يونس كان هنا وقال إن الخطوبة هتكون بعد بكرا إن شاء الله

اتجمدت مكاني

_يعني إيه وبعدين بدري كده ليه أنا أصلًا

سكت لحظة واستوعبت إني ببرر لنفسي أنا لسه مش مرتاحة للموضوع حاسة إني لسه و

قاطعني بابا بنفاد صبر

_لسه إيه بس يا ريناد بقولك حددنا الخطوبة. وبلاش تكسري فرحتي بقى أنا صدّقت أطمن عليكي

بصيتله وقلبي وجعني وقلت بهدوء

_طب والله يا بابا لو فضلت مش مرتاحة حتى بعد الخطوبة هفسخها أنا موافقة عشانك بس

مسكني من إيدي وقعدني جنبه

_يا بنتي والله يونس راجل محترم ده أنا كنت عشرة أنا وأبوه الله يرحمه مربيه على إيدي

ضحكت بسخرية خفيفة

_اسكت يا بابا والنبي كل ما تقول الكلمة دي يطلع حد مش كويس إنت كنت بتربيهم فين

رد وهو متضايق شوية

_كلهم كويسين إنتي اللي ادي نفسك فرصة

تنهدت

_طيب هدي لنفسي فرصة، ونشوف أخرتها

ابتسم

_أخرتها خير إن شاء الله على فكرة قال هييجي النهارده بالليل عايز يقعد معاكي

قلت بصدمه

_نعم ييجي ليه وبعدين أنا ليه كل شوية أعرف حاجة كده فجأة أنا حاسة كمان شوية هيطلعلي من الأوضة

بصلي بحدة

_لسه العند ده يا ريناد وفيها إيه لما ييجي تتكلموا وتتعرفوا قبل الخطوبة

قولت بعصبية وأنا بقوم

_حاضر يا بابا حاضر

دخلت أوضتي وغيرت هدومي وقعدت على السرير غصب عني

بدأت أفكر طيب لما ييجي ألبس إيه أقول إيه

سكت فجأة أنا مالي أصلًا مش فارقة

بس برضه كنت بفكر

______________________________

_يلا يا ريناد يونس بقاله شوية بره مستنيكي

_حاضر يا بابا جاية أهو

طلعت وبصيت لبابا مستنية منه الجملة المعتادة

ابتسم وقال:

_طالعة قمر يا رنودة قمر

ابتسمت غصب عني:

_شكرًا يا بابا إنت اللي مصبرني والله

حضنته وخرجت

كان قاعد ماسك الموبايل أول ما دخلت سابه ومد إيده

_إزيك

عاملة إيه النهارده

سلمت عليه بسرعة بطرف إيدي

_كويسة

بصلي وقال

_شكلك عسول بصراحة

رفعت حاجبي

_عسول؟

ضحك

_ختي بتقولها لما شكلي يبقى حلو خطفتها منها

هزيت راسي

_أمم… شكرًا

سكت شوية وبعدين قال

_ممكن أسأل سؤال؟

بصيتله:

_لا بلاش اسأله

_تمام هسأل

بصلي وقال:

_إنتي متضايقة من وجودي أقوم أمشي يعني؟

بصيتله باستغراب:

_ولو قولتلك امشي هتمشي؟

رد بهدوء:

_لا طبعًا

ضيقت عيني

_العشم ده جايبه منين؟

ابتسم ابتسامة خفيفة:

_بصراحة أنا أعرف باباكي من وأنا صغير ومكنتش أعرف إن عنده بنت حلوة زيك

ضحكت بسخرية:

_إنت بتشقط يا عم ولا إيه؟

رفع حاجبه:

_ أشقط؟ ومستغربة من عسول؟

هزيت راسي:

_ غير الموضوع أنا كده كده مش هعرف أهرب منك

بدأ يتكلم عن نفسه عن شغله

وكان هادي بسيط فيه حاجة مريحة

حسيته طيب يمكن شوية سهل يتضحك عليه بس لطيف

لقيت نفسي بتكلم أنا كمان عن دراستي عن اللي نفسي أعمله

وكان سامعني مركز مع كل كلمة

أخدت راحتي أكتر واتكلمت أكتر.

وجوايا فكرة بتتسلل “يمكن أدي نفسي فرصة.”

يمكن عشان اتدبست

أو يمكن عشان هو غلبان

بصلي فجأه وقال

_هاا بقا يستي كنتي فكراني ايه وطلعت ايه

ابتسمت وقولت

_بصراحه كنت فكراك رخم طلعت رخم برضو بس غلبان شويه

ضحك وقال

_يعني انا رخم وغلبان ؟

_المهم انا طلعت ايه

بصلي بنفس البسمه وقال

_امم طلعتي بلسان طويل بس عسوله كمان

_امم لساني طويل؟

ضحك أكتر وقال

_بس عسوله قولت والله وكمان عندك نظره للمستقبل طموحه يعني وان شاء الله هتنجحي جمبي ومعايا

سكت ومبصيتش عليه

بعد شوية قال فجأة:

_هو إنتي ليه ما سألتيش عن عجزي؟ج

فكرت لحظة:

_مش عارفة يمكن عشان ما جاش في بالي وبعدين ده مش موضوعي ده ابتلاء من ربنا ولازم تصبر

هز راسه:

_ونِعم بالله بس أنا من وأنا صغير كده مش حادثة

بصيتله بسرعة:

_أه

كمل بهدوء:

_بس أوعدك عمرك ما تحسي بتقصير مني بسبب ده

اتكلمت بسرعة:

_لا لا… أنا مش بفكر كده أصلاً

بصلي بتركيز:

_ولو حصل قولي متخافيش مش هزعل

هزيت راسي:

_لا متقولش كده أنا أكيد هقف جنبك

ابتسم بخبث خفيف

_: إيه ده حبيتيني شكلك

اتخضيت:

_ نعم؟!

ضحك:

_بهزر أنا أصلًا اتحب

رفعت حاجبي:

_”آه طبعًا… احنا لسه في الأول على فكرة

ابتسم

_ما أنا عارف يا زوجتي.. لسه في الأول

صحيت من النوم وعيني لسه تقيلة

ببص في السقف وأنا بفكر في بكرة

مش عارفة إزاي كل حاجة حصلت بسرعة كده

خطوبة وكلام ويونس

أول ما اسمه جه في بالي ابتسمت لوحدي

اتنهدت:

_ انا ببتسم ليه؟

مش فاهمة بس الابتسامة طلعت وخلاص

مسكت الموبايل فتحته وأنا لسه نص نايمة

لقيت رسالة منه

اتعدلت فجأة

_”صباح الخير يا عسولة”

رفعت حاجبي وكتبت بسرعة:

_”عسولة تاني؟”

رد فورًا:

_”خلاص متزعليش عسول تمشي؟”

ضحكت غصب عني:

_ “إنت مستفز”

_”مفيش صباح الخير ”

لفيت عيني:

_”ماشي يا عم صباح الخير ”

_”هتعملي إيه النهارده؟”

بصيت حواليا كده وبعدين كتبت:

_”هروح أنقي فستان”

_”لونه إيه؟”

ضيقت عيني وابتسمت بخبث:

_”ليه؟ عشان تروح تلبس نفس اللون مش هقولك”

رد بسرعة:

_ “آه يا ستي هلبس نفس اللون”

ضحكت:

_”إنت فاضي أوي كده؟”

_”فاضيلك”

سكت شوية والجملة علّقت معايا

كتبت وأنا بهرب من الإحساس:

_”طب ما تيجي تختار معايا بدل ما تعمل فيها ذوق”

رد بعد ثواني:

_ “بتقولي كده بجد؟ ولا هزار؟”

بصيت للموبايل شوية

وبعدين كتبت:

_ “مش عارفة… تعال لو عايز”

بعدها بنص ساعة

كنت واقفة قدام الدولاب محتارة ألبس إيه

وأنا بقول لنفسي:

_أنا ليه أصلاً قولتله ييجي؟

بس جوايا كنت مستنياه

بعد شويه سمعت صوت بابا بينادي

_ريناد فيه حد مستنيكي تحت

قلبي دق أسرع بصيت لنفسي في المراية بسرعة وعدلت شعري نزلت لقيته قاعد علي الكرسي قدام العربيه وجمبه شخص بيساعده

أول ما شافني ابتسم نفس الابتسامة الهادية اللي بدأت تبقى مألوفة

قال:

_ صباح العسولة

بصيتله ببرود مصطنع:

_ قولنا خلاص بلاش الكلمة دي

_طيب صباح الفل

ابتسمت غصب عني:

_ صباح الخير

خرجنا سوا وفي الطريق كان بيبصلي من وقت للتاني

لحد ما قال فجأة:

_إنتي فعلًا مش عيزاني ألبس نفس اللون ؟

ضحكت:

_ إنت صدقت؟

وبعدين بصيت قدامي وقلت:

_خلي عندك كرامة شوية

ضحك:

_معاكي؟ صعب

وصلنا المحل

دخلنا وأنا بدأت ألف وأتفرج

وهو ورايا والشخص اللي معاه بدأ يزقه بالكرسي

كل شوية يقول:

_ ده حلو لا ده مش شبهك ده شبهك أوي

بصيتله باستغراب:

_ إنت عرفتني إمتى عشان تقول شبهك ومش شبهك؟

قرب شوية وقال بهدوء:

_من أول ما شوفتك

اتوترت ولفيت أبص للفستان تاني:

_ إنت بتهزر كتير

_وأنتي بتتهربي كتير

بعد شوية لقيت فستان عاجبني بسيط بس حلو

بصلي وقال:

_هو ده

بصيتله:

_ليه؟

_علشان لما تلبسيه هيبقي شبهك

خدت الفستان وبصيتله وقلت:

_ماشي هسمع كلامك المرة دي

ابتسم:

_مش آخر مرة إن شاء الله

وإحنا خارجين

قال فجأة:

_على فكرة أنا فعلًا ممكن ألبس نفس اللون

ضحكت:

_إوعى

_ليه؟

_عشان ما نبانش توأم

بصلي وقال بهدوء:

_ما أنا عايز كده

سكت بس المرة دي مبقتش مستغربة منه قد الأول

بالعكس كنت مستنية يقول أكتر رجعت البيت بعد ما خلصنا اختيار الفستان

ويونس مشي

دخلت وأنا حاسة بحاجه غريبة جوايا

مبسوطة يمكن

بس بسرعة وقفت نفسي:

_ مبسوطة إيه بس دي حاجة عادية أي حد ممكن يهتم واحس اني مبسوطه

قعدت لحظة ساكتة وبعدين دخلت أوضتي

اليوم كله عدى بسرعة تجهيزات كلام تفكير

ولما الليل جه كنت مرهقة جدًا

رميت نفسي على السرير أول ما غمضت عيني سمعت الموبايل بيرن

فتحت بسرعة

يونس

اتعدلت على طول:

_ألو؟

صوته جالي هادي:

_افتحي البلكونة

رفعت حاجبي:

_ ليه؟

_عشان أنا تحت

اتخضيت:

_ نعم ليه وفي الوقت ده

_انزلي شوية

ضيقت عيني:

_ إنت باين عليك مجنون ولا إيه

سكت لحظة وبعدين قال بهدوء ثابت:

_انزلي

وقفت لحظة مترددة

هو إزاي ييجي دلوقتي وإيه اللي جابه

قمت من مكاني وفتحت البلكونة

بصيت لتحت

لقيته واقف

قولت بسرعة بصوت واطي:

_إنت بتعمل إيه هنا؟

رفع راسه:

_انزلي

_يونس الساعة متأخرة

_عارف

لبست اي حاجه ونزلت بسرعه وقفت قدامه كان فيه حد جمبه ماسك الكرسي وبعدها مشي عند العربيه

سكت لحظة وبعدين كمل:

_ كنت عايز أشوفك

قلبي دق بسرعة

_طب إنت جاي ليه كده

سكت وبعدين قال

_الورد ده مش علشان مناسبة ولا علشان حاجة رسمية ده علشان لو في يوم حسّيتي إني بغصبك على حاجة تفتكري إن أنا مش عايزك تحسي كده وعلشان تعرفي إن أي حاجة بينا تبدأ برضاكي إنتي

كمل وهو باصصلي:

_ فجبتلك ده

مد إيده

بوكيه ورد

سكت مش عارفه اقول ايه

هو جاي يصلح إحساس جوايا أنا ماقولتش عليه أصلاً

اتنهدت وقلت:

_ إنت غريب أوي

ضحك بخفة:

_سمعناها قبل كده

_ومتهور

_وأنتي السبب

ضحكت غصب عني:

_أنا مالي؟

سكتنا لحظة

والليل حوالينا هادي

وبعدين قلت وأنا ماسكة الورد:

_طيب روح بقى عشان محدش يشوفك

هز راسه:

_ تمام

بس قبل ما يمشي بصلي تاني:

_ نامي كويس

_وأنت كمان

ابتسم:

_مش هقدر هفضل فاكر إنك خدتِ الورد

ضحكت:

_ماشي يا رخم

لف الكرسي وبدأ يمشي ببطء

وأنا فضلت واقفة ماسكة الورد.

وبصوت واطي من غير ما أحس قلت:

_هو أنا بدأت أرتاحله بجد

صحيت من بدري رغم إني منمتش غير ساعات قليلة

بصيت في السقف شوية وبعدين افتكرت النهارده الخطوبة

قلبي دق أسرع قمت بالعافية وبدأت أجهز

البيت كان فيه حركة خفيفة مش زحمة قوي بس كله متوتر

صحابي حواليا بيهزروا ويضحكوا وأنا بحاول أبان طبيعية

بابا دخل عليا وبصلي وهو مبتسم:

_إيه الجمال ده يا رنوده قمر والله

ابتسمت غصب عني:

_ربنا يخليك يا بابا

قرب مني وطبطب على إيدي:

_متخافيش كله هيبقى تمام

هزيت راسي وأنا من جوايا مش متأكدة من أي حاجة

بعد شوية سمعنا صوت الجرس قلبي وقع واحدة من صحابي قالت وهي بتضحك:

_العريس جه يا عروسة

بصيتلها بقلق وقمت وقفت حاسة رجلي تقيلة

دخل يونس لابس بدلة نبيتي نفس لون الفستان بتاعي وهادي كعادته بس عينيه كانت بتدور عليا

أول ما شافني ابتسم ابتسامة خفيفة مختلفة عن كل مرة حسيت إني اتلخبطت فبصيت في الأرض بسرعة قعدوا يتكلموا شوية وأنا قاعدة ساكتة سامعة نص الكلام بس لحد مسمعت صوت بيقول الفاتحه نادي عليا بابا عشان اسلم علي اهل يونس سلمت وقعدت جمبه بعد مخدت بوكيه الورد

وسكت شوية وبعدين قال بهدوء:

_ متوترة؟

هزيت راسي من غير ما أبصله:

_شوية

_متخافيش

مد إيده بحاجة صغيرة

بصيت لقيته خاتم بسيط مش بتاع الخطوبة الرسمي

ده إيه؟

قال وهو باصصلي:

_ ده مني أنا مش من العيلة

اتوترت:

_ليه؟

_علشان تبقى عارفة إن في فرق بين الجواز اللي اتفرض علينا والحاجة اللي أنا عايزها

سكت وكمل بصوت أوطى:

_وأنا… عايزك

قلبي دق ومعرفتش أرد بعد شوية بدأت الاغاني والناس حوالينا كله بيبارك ويضحك وأنا واقفة جنبه

حاسة إن الدنيا زحمة بس هو الوحيد اللي شايفاه

وأنا واقفة اتوترت شوية إيدي

كانت بترتعش

فجأة حسيت بإيده مسكت إيدي بهدوء بصيتله بسرعة لقيته بيبص قدامه عادي كأن مفيش حاجة

بس إيده كانت ثابتة على إيدي

وقال بهدوء من غير ما يبصلي:

_ اهدي

الغريب إني هديت فعلًا في اللحظة دي ابتديت أحس بحاجة مختلفة مش حب بس مش رفض زي الأول حاجة في النص مخلياني مش عارفة أبعد

الخطوبة خلصت أخيرًا الناس بدأت تمشي واحدة واحدة والبيت رجع أهدى شوية أنا كنت واقفة مرهقة من الزحمة والكلام بصيت ليونس لقيته قاعد بهدوء زي عادته بيتابع كل حاجة من غير ما يتكلم كتير

قربت منه وقلت:

_إيه مبسوط؟

بصلي وابتسم ابتسامة خفيفة:

_مش عارف بس مرتاح

هزيت راسي:

_ممم

سكتنا شوية وبعدين فجأة قلت:

_تيجي نتمشى؟

رفع حاجبه:

_ دلوقتي؟

_آه زهقت من القعدة

بصلي كأنه بيقرأني وبعدين قال:

_ ماشي

بعد شوية كنا على الكورنيش الهوا خفيف والبحر صوته هادي والدنيا شبه فاضية كنت ماشية وراه إيدي على الكرسي بزقه واحدة واحدة في الأول كنت متوترة حاسة إن الناس ممكن تبص أو تحكم

بس مع الوقت نسيت

قال فجأة:

_ إنتي ساكتة ليه

_بفكر

_في إيه

تنهدت:

_في كل حاجة فينا في اللي بيحصل بسرعة

بصلي باستغراب:

_ مالك؟

_إنت إزاي هادي كده مش حاسس إن كل حاجة بتحصل بسرعة؟

ابتسم:

_حاسس بس مش خايف

_ليه

بص قدامه وقال:

_ علشان إنتي معايا

سكت والجملة علقت جوايا كملت مشي تاني بس المرة دي بهدوء أكتر فجأة وقفت ولفيت قدامه:

_ يونس

_ممم

_إنت بجد مش زعلان من وضعك؟

بصلي بثبات:

_كنت زمان دلوقتي لا

_ليه؟

ابتسم:

_ علشان بقيت بلاقي حاجات تانية تمشيني

سكت لحظة وبعدين بصلي وقال:

_زيك

اتوترت وبصيت في الأرض:

_ إنت بتعرف تقول كلام كده إزاي؟

ضحك:

_مش بعرف بقول اللي حاسه

قربت شوية ووقفت وراه تانى ومسكت الكرسي

قال بهدوء:

_تعبتي؟

هزيت راسي:

_ لا

_طب سيبي شوية

_لا… عادي

سكت بس إيده مترفعتش وقفنا قدام البحر

الهوا بيخبط في وشنا وصوت الموج عالي شوية

بصيت قدامنا وقلت بهدوء:

_أنا مش فاهمة أنا فين دلوقتى

قال:

_ ولا أنا

بصيتله:

_طب وده طبيعي؟

ابتسم:

_أظن لو كنا فاهمين كل حاجة مكناش هنحس بيها كده سكتنا بس المرة دي السكوت كان مريح مش تقيل زي الأول رجعت امشي على الكورنيش

إيدي على الكرسي بزقه بهدوء وهو ساكت كعادته

فجأة ضحكت لوحدي

قال وهو ملاحظ:

_ بتضحكي على إيه؟

بصيتله بخبث:

_تيجي نلعب

رفع حاجبه:

_ نلعب؟

_آه هلاعبك لعبة

بصلي باستغراب:

_قولي

قربت شوية من الكرسي ومسكته جامد:

_هجري بيك بسرعة لو وقعت يبقى أنا خسرت

سكت لحظة وبعدين قال ببرود:

_وإنتي واثقة إني هقع؟

ضحكت:

_ مش عارفة نجرب؟

بصلي نص نظرة وقال:

_طب لو وقعت

_يبقي انا خسرت

_طب بلاش أنا غالي عليكي باين

زقّيته بخفة:

_ بطل رغي

وفجأة جريت زقّيت الكرسي بسرعة وأنا بضحك:

_يلااا

اتخض شوية:

_ إيه ده إيه الجنون ده يا بنتي؟

_اللعبة بدأت خلاص

_طب استني طيب ده أنا لسه موقعّتش وصوتي راح

ضحكت أكتر وأنا مكملة:

_لما تقع ابقي اتكلم

قال وهو بيضحك غصب عنه:

_ أنا لو وقعت مش هقوم تاني على فكرة

وقفت فجأة واحنا الاتنين فضلنا نضحك

بصلي وقال وهو بيهدي نفسه:

_إنتي مجنونة

حطيت إيدي على صدري:

_شكرًا شهادة أعتز بيها

هز راسه وهو مبتسم:

_ أنا كنت فاكر إني داخل على واحدة هادية

بصيتله بتحدي:

_اتخدعت بقى

رجعت أمشي بيه بهدوء تاني

بس المرة دي وأنا بضحك

قال فجأة:

_ بس على فكرة

_مم؟

_لو وقعت كنت هخليكي تكسبّي برضو

بصيتله باستغراب:

_ ليه يعني؟

بصلي وقال بهدوء:

_علشان بحب أشوفك مبسوطة

سكت بعد شوية رجعت أتكلم وأنا بتهرب:

_طب المرة الجاية أنا اللي هقعد وإنت تزقني

ضحك:

_لا دي مستحيلة

ليه؟

_علشان أنا لو مسكتك مش هسيبك

اتوترت وضحكت:

_إيه الثقة دي

قال وهو بيبص قدامه:

_ مش ثقة حقيقة

كملت أمشي بيه بس المرة دي كنت حاسة إن المسافة بينا قربت أكتر من أي وقت فات كنا لسه بنضحك بعد اللعبة وأنا بزقه بهدوء لقيته قال فجأة:

_ على فكرة إنتي متهورة شوية

وقفت وبصيتله:

_ نعم؟

كمل وهو بيبتسم:

_يعني لو كنتي وقعتيّني بجد

حطيت إيدي في وسطي:

_ما قولتلك لو وقعت أبقى أنا خسرت

_وأنا؟

_إنت إيه؟

قال وهو بيبصلي بنظرة خفيفة مستفزة:

_ ولا حاجة واضح إن سلامتي مش فارقة معاكي أوي

اتنرفزت:

_ لا والله؟ ده أنا اللي بزقك من ساعة ما خرجنا

_آه زقاني بس بعنف

وسكت لحظة وبعدين قال:

_ شكلك متعودة تتهوري كده

ضيقت عيني:

_إنت بتلمّح لإيه؟

_ولا حاجة بهزر

هزيت راسي بعصبية:

_ لا باين هزارك تقيل أوي

وقفت فجأة ورفعت إيدي من على الكرسي :

_خلاص زق نفسك بقى

وبدون ما أستنى رد لفيت ومشيت

_ريناد

صوته جالي من ورايا بس مرديتش

_ريناد استني

طنشته وكملت مشي

_طب على الأقل زقيني ومش هتكلم تاني

ضحكت غصب عني بس كتمتها وكملت

_يا بنتي أنا حرفيًا مش بعرف أتحرك

وقفت لحظة بس متكلمتش

_ريناد والله بهزر طب استني

وقفت بعيد شوية ولفيت بصيتله

كان واقف مكانه باصصلي مستني

اتنهدت:

_ غبي

رجعتله ببطء وهو أول ما قربت قال:

_خلاص فكرتي تسيبيني هنا وأقضي الليلة؟

بصيتله ببرود:

_عادي كنت هتلاقي حد تاني يزقك

هز راسه:

_لا أنا عايزك إنتي

سكت شوية…وبعدين قال بنبرة أخف:

_معلش هزار سخيف

بصيتله:

_آه سخيف

_طيب نزعل بجد؟

_آه

سكت لحظة وبعدين قال:

_طب لو اعتذرت؟

بصيتله بتحدي:

_ على حسب

ابتسم:

_ أنا آسف يا ريناد مكنتش أقصد

سكت شوية وبعدين كملت:

_ ماشي

مسكت الكرسي تاني وبدأت أزقه

قال بسرعة:

_بس براحه المرة دي

ضحكت:

_لا هجرّي تاني

_لا يا شيخة؟

وزقّيته خفيف بس أسرع شوية

قال وهو بيضحك:

_أنا آسف أنا آسف خلاص

_متأخر

وقفنا تاني والضحك بينا رجع

بصلي وقال:

_إنتي بجد متعبة

رفعت حاجبي:

_ متعبة؟

_آه… بس حلوة